សឿន សំណាង - La Reine Media

អាមេរិកាំងត្រៀមបង្កើត “ប្រព័ន្ធភ្នែកទិព្វនៅលើមេឃ” ដើម្បីតាមដានអាវុធមហាលឿនរបស់ចិននិងរុស្ស៊ី

សហរដ្ឋអាមេរិកកំពុងរៀបគម្រោងបាញ់បង្ហោះផ្កាយរណបរាប់រយគ្រឿងឡើងទៅកាន់គម្លងគោចរផែនដីក្នុងរយៈពេល5ឆ្នាំទៀត ដើម្បីតាមដានអាវុធមហាលឿន និងឧបករណ៍បច្ចេកវិទ្យាទំនើបរបស់ប្រទេសរុស្ស៊ី និងប្រទេសចិន។

សារព័ត៌មាន SCMP (South China Morning Post) ដកស្រង់ឯកសារមួយរបស់អង្គភាពអភិវឌ្ឍអវកាសអាមេរិកាំង SDA (Space Development Agency) ឱ្យដឹងថា សហរដ្ឋអាមេរិកមានគម្រោងបាញ់បង្ហោះផ្កាយរណបចំនួន150គ្រឿងឡើងទៅកាន់គន្លងគោចររបស់ផែនដី គិតត្រឹមឆ្នាំ2024។ “ភ្នែកទេព” ទាំងនេះ នឹងមានសមត្ថភាពក្នុងការតាមដានអាវុធមហាលឿន(hyper-sonic weapons)ដែលត្រូវបានបាញ់ចេញពីគ្រប់ទីកន្លែងក្នុងពិភពលោក។ ក្រុមអ្នកតាមដានសភាពការណ៍ពិភពលោកយល់ថា អាមេរិកាំងធ្វើបែបនេះគឺដើម្បីជួយឱ្យមន្ទីរបញ្ចកោណអាចគ្រប់គ្រងឧបករណ៍ទាំងឡាយដែលពួកគេបានបាញ់បង្ហោះទៅក្នុងទីអវកាស និងដើម្បីតាមដានសកម្មភាពរបស់ប្រទេសចិន និងរុស្ស៊ី ដែលជាគូប្រជែងសំខាន់បំផុតរបស់ខ្លួន។

SCMP ឱ្យដឹងថា សហរដ្ឋអាមេរិកកំពុងស្វែងរកអ្នកវិនិយោគដើម្បីរចនា និងផលិតផ្កាយរណបដែលមានបំពាក់ឧបករណ៍ចាប់ពន្លឺអ៊ីនហ្វ្រារ៉េដដើម្បីអាចតាមដានអាវុធដែលមានល្បឿនមហាលឿន។ ផ្កាយរណបទាំងនេះនឹងស្ថិតក្នុងក្រុមឧបករណ៍ដំបូងទាំង20ដែលនឹងត្រៀមខ្លួនជាស្រេចក្នុងការបំពេញបេសកកម្មចាប់ពីឆ្នាំ2022 ដែលវានឹងបើកផ្លូវឱ្យមានការបាញ់បង្ហោះផ្កាយរណបរាប់រយគ្រឿងទៅក្នុងគន្លងគោចររយៈកម្ពស់ទាបរបស់ផែនដីនាពេលខាងមុខ។
He Qisong អ្នកជំនាញផ្នែកសន្តិសុខអវកាសមកពីសាកលវិទ្យាល័យច្បាបនិងវិទ្យាសាស្ត្រនយោបាយសៀងហៃបានឱ្យដឹងថា គម្រោងរបស់អាមេរិកាំងខាងលើនេះ អាចជួយឱ្យពួកគេតាមដានអាវុធដែលប្រទេសរុស្ស៊ី និងចិនបានអភិវឌ្ឍ។

He Qisong អះអាងថា “ប្រព័ន្ធផ្កាយរណប150គ្រឿងនេះគឺជាផ្នែកមួយនៃគម្រោងបាញ់បង្ហោះផ្កាយរណបជាង42,000គ្រឿងទៅក្នុងទីអវកាសរបស់អាមេរិកាំងដើម្បីតាមដានរាល់សកម្មភាព តាំងពីកាំជ្រួចប្លោងល្បឿនមហាលឿន រ៉ុកកែតប្រឆាំងផ្កាយរណប រួមនឹងបច្ចេកវិទ្យាទំនើបផ្សេងទៀតរបស់ប្រទេសរុស្ស៊ី និងប្រទេសចិន”។

អ្នកជំនាញខាងលើបានបន្តថា SDA អាចនឹងសហការជាមួយក្រុមហ៊ុនអវកាស SpaceX របស់មហាសេដ្ឋី Elon Musk (នៅសហរដ្ឋអាមេរិក) ក្នុងការដាក់ពង្រាយប្រព័ន្ធផ្កាយរណបដ៏ច្រើននេះ។

ថ្មីៗនេះ ប្រធានាធិបតីអាមេរិកាំង លោក Donald Trump បានបង្ហើបឱ្យដឹងថា សហរដ្ឋអាមេរិកកំពុងអភិវឌ្ឍកាំជ្រួចប្លោង “មហាអស្ចារ្យ” ដែលមានល្បឿនលឿនជាង17ដងបើធៀបជាមួយនឹងល្បឿនរបស់កាំជ្រួចប្លោងល្បឿនលឿនបំផុតរបស់អាមេរិកាំងនាបច្ចុប្បន្ន៕

ប្រភព៖ SCMP

May 21, 2020

សហរដ្ឋអាមេរិកអនុម័តលើកការលក់គ្រាប់បែកបាញ់នាវាទៅឱ្យតៃវ៉ាន់

សហរដ្ឋអាមេរិកបានរៀបគម្រោងលក់គ្រាប់បែកបាញ់នាវាចំនួន18គ្រាប់ក្នុងតម្លៃ180លានដុល្លារទៅឱ្យកោះតៃវ៉ាន់ ដោយមិនខ្ចីអើពើដល់ការព្រមានពីប្រទេសចិន។

យោងតាមសេចក្ដីប្រកាសកាលពីថ្ងៃទី20ឧសភាពរបស់អង្គភាពសហប្រតិបត្តិការសន្តិសុខជាតិអាមេរិកាំង ក្រសួងការបរទេសសហរដ្ឋអាមេរិកបានផ្ដល់ការអនុញ្ញាតឱ្យលក់គ្រាប់បែកបាញ់នាវា (torpedo) ប្រភេទ MK-48 Mod6 ធុនធ្ងន់និងបច្ចេកវិទ្យាខ្ពស់ចំនួន18គ្រាប់ និងឧបករណ៍ផ្សេងៗទៀតទៅឱ្យកោះតៃវ៉ាន់។ យុទ្ធោបករណ៍ខាងលើនេះ មានតម្លៃសរុបប្រមាណជា180លានដុល្លារអាមេរិក។

សេចក្ដីប្រកាសបានឱ្យដឹងថា អង្គភាពសហប្រតិបត្តិសន្តិសុខជាតិរបស់សហរដ្ឋអាមេរិកបានផ្ដល់ទិន្នន័យចាំបាច់ដើម្បីរាយការណ៍ឡើងសភាអំពីគម្រោងលក់គ្រាប់បែកបាញ់នាវាទៅឱ្យកោះតៃវ៉ាន់។

គម្រោងខាងលើនេះក៏ត្រូវបានគេរៀបរាប់ថា គឺដើម្បីបម្រើផលប្រយោជន៍ផ្នែកសេដ្ឋកិច្ច និងសន្តិសុខរបស់សហរដ្ឋអាមេរិក នៅពេលជួយដល់កោះតៃវ៉ាន់ដើម្បី “បន្តកិច្ចប្រឹងប្រែងក្នុងការធ្វើទំនើបកម្មកម្លាំងប្រដាប់អាវុធ និងដើម្បីរក្សាទំនុកចិត្តទៅលើសមត្ថភាពការពារខ្លួន”។

សេចក្ដីប្រកាសខាងលើត្រូវធ្វើឡើងក្នុងថ្ងៃដែលមេដឹកនាំកោះតៃវ៉ាន់ លោកស្រី Tsai Ing-wen ស្បថចូលកាន់តំណែងអាណត្តិទី2របស់ខ្លួន។

សូមរំឭកថា នៅក្នុងសុន្ទរកថាដំបូងនៃការចូលកាន់តំណែងប្រធានាធិបតីតៃវ៉ាន់ក្នុងអាណត្តិទី2នេះ លោកស្រី Tsai Ing-wen បានប្រកាសថា តៃវ៉ាន់មិនទទួលយកការដែលខ្លួនត្រូវក្លាយជាចំណែកមួយរបស់ប្រទេសចិនដោយប្រើប្រាស់រូបមន្ត “ប្រទេសមួយ របបពីរ” ដែលត្រូវបានលើកឡើងដោយទីក្រុងប៉េកាំងនោះទេ ប៉ុន្តែ លោកស្រីបានអំពាវនាវឱ្យមានការចរចាដើម្បីភាគីទាំងពីរអាចបន្តវត្តមានទៅមុខទៀត។

ទីក្រុងប៉េកាំងបានព្រមានជាច្រើនដងមកហើយទៅលើកោះតៃវ៉ាន់ដែលចង់ប្រកាសឯករាជ្យ។ ប្រទេសចិនចាត់ទុកតៃវ៉ាន់ជាផ្នែកមួយរបស់់ខ្លួន ដោយរង់ចាំតែថ្ងៃបម្រួបបង្រួមតែប៉ុណ្ណោះ បើទោះជាត្រូវធ្វើសង្គ្រាមនឹងគ្នា។

សហរដ្ឋអាមេរិក និងប្រទេសជាច្រើនក្នុងពិភពលោក មិនមានទំនាកទំនងការទូតជាផ្លូវការជាមួយតៃវ៉ាន់នោះទេ។ ប៉ុន្តែសហរដ្ឋអាមេរិកនៅតែលក់អាវុធឱ្យកោះនេះ បើទោះជាមានការប្រឆាំងយ៉ាងខ្លាំងក្លាពីទីក្រុងប៉េកាំងក៏ដោយ។

កាលពីថ្ងៃទី20ឧសភាកន្លងទៅ ប្រទេសចិនបានរិះគន់រដ្ឋមន្ត្រីការបរទេសអាមេរិកាំង ព្រោះតែលោក Mike Pompeo បានផ្ញើសារអបអរសាទរដល់មេដឹកនាំតៃវ៉ាន់ គឺលោកស្រី Tsai Ing-wen ដែលបានជាប់ឆ្នោតជាប្រធានាធិបតីក្នុងអាណត្តិទី2។ ទីក្រុងប៉េកាំងបានចោទលោក Mike Pompeo ថាបានរំលោភលើគោលការណ៍ “ប្រទេសមួយ របបពីរ” និងជ្រៀតជ្រែកកិច្ចការផ្ទៃក្នុងរបស់ប្រទេសចិន៕

ប្រភព៖ សារព័ត៌មានបរទេស

May 21, 2020

ថតបានរូបភាពច្បាស់ត្រជាក់ភ្នែកនៃភពចំនួន2ដែលកំពុង “ចាប់កំណើត” (វីដេអូ)

រូបភាពទាំងនេះបង្ហាញអំពីភពចំនួន2ដែលមានម៉ាស់(ទម្ងន់នៅក្នុងទីអវកាស) ធ្ងន់ជាងភពព្រហស្បតិ៍ច្រើនដង និងស្ថិតនៅក្នុងប្រព័ន្ធផ្កាយ PDS 70។

ក្រុមអ្នកវិទ្យសាស្ត្រនៅវិទ្យាស្ថានបច្ចេកវិទ្យា California ថតបានរូបភាពនៃភពចំនួន2ដែលកំពុង “ចាប់កំណើត” នៅក្នុងប្រព័ន្ធផ្កាយ PDS 70 ដែលមានចម្ងាយពីផែនដីប្រមាណជា370ឆ្នាំពន្លឺ។

ភព PDS 70b មានម៉ាស់ធ្ងន់ជាងភពព្រហស្បតិ៍ប្រមាណពី4ទៅ17ដង ខណៈដែលភព PDS 70c មានម៉ាស់ធ្ងន់ជាងប្រមាណពី1ទៅ10ដង បើធៀបនឹងភពព្រហស្បតិ៍ក្នុងប្រព័ន្ធព្រះអាទិត្យរបស់មនុស្សលោក។

PDS 70 គឺជាប្រព័ន្ធផ្កាយដែលមានភពច្រើនដំបូងគេបង្អស់ដែលក្រុមអ្នកវិទ្យាសាស្ត្រសង្កេតឃើញភពរបស់វាកំពុងស្ថិតក្នុងដំណាក់កាលនៃការកកើត។

មុននោះ ក្រុមអ្នកវិទ្យាសាស្ត្រក៏ធ្លាប់បានថតយករូបភាពភព PDS 70b និង PDS 70c ខាងលើនេះ ប៉ុន្តែរូបភាពមិនបានច្បាស់ល្អដូចពេលនេះ។

ថតបានរូបភាពច្បាស់ត្រជាក់ភ្នែកនៃភពចំនួន2ដែលកំពុង “ចាប់កំណើត" — ស្ថានីយសង្កេតអវកាស W.M.Keck

ឧស្ម័ន និងធីលីអវកាសព័ទ្ធជុំវិញភពទាំង2 បង្កើតបានជាថាសអវកាសដ៏មហិមាដែលបិទបាំងភពទាំង2 ធ្វើឱ្យក្រុមតារាវិទូមានការលំបាកក្នុងការសង្កេត។

រូបភាព និងលទ្ធផលនៃការសិក្សាស្រាវជ្រាវនេះ ត្រូវបានចុះផ្សាយនៅលើទំព័រទស្សនាវដ្ដី Astronomical Journal។ រូបភាពថ្មី និងច្បាស់ទាំងនេះ ត្រូវបានថតជាប់ដោយស្ថានីយសង្កេតអវកាស W.M.Keck នៅលើកោះ Hawaii សហរដ្ឋអាមេរិក៕

ប្រភព៖ សារព័ត៌មានបរទេស

May 21, 2020

អាមេរិកាំង៖ ពិភពលោកខាតបង់ប្រាក់ 9លានលានដុល្លារដោយសារតែចិន

រដ្ឋមន្ត្រីក្រសួងការបរទេសសហរដ្ឋអាមេរិក ថ្លែងថា ខ្ទង់ប្រាក់2ពាន់លានដុល្លារដែលប្រទេសចិនសន្យាថានឹងយកមកជួយដល់ពិភពលោកក្នុងការទប់ទល់នឹងវិបត្តិសុខភាព នោះគឺវា “មិនគ្រប់គ្រាន់” នោះទេ បើធៀបនឹងការខាតបង់ដែលបង្កឡើងដោយវីរុសCOVID-19។

សារព័ត៌មាន Reuters បានចេញផ្សាយថា រដ្ឋមន្ត្រីការបរទេសអាមេរិកាំង លោក Mike Pompeo កាលពីថ្ងៃទី20ឧសភាបានបន្តប្លោងសម្ដីដាក់ប្រទេសចិន ក្នុងគ្រាដែលប្រទេសទាំងពីរនេះកំពុងប្រឈមនឹងភាពតានតឹងកាន់តែខ្លាំងឡើងៗដោយសារ COVID-19។

មេដឹកនាំវិស័យការបរទេសរបស់សហរដ្ឋអាមេរិកថ្លែងថា ទឹកប្រាក់ចំនួន2ពាន់លានដុល្លារដែលទីក្រុងប៉េកាំងសន្យាថានឹងយកមកជួយដល់សកម្មភាពទប់ទល់នឹងវីរុសកូរ៉ូណា គឺមិនមានតម្លៃគ្រប់គ្រាន់នោះឡើយបើធៀបជាមួយនឹងអាយុជីវិតមនុស្សរាប់សែននាក់ និងប្រាក់រាប់លានលានដុល្លារ ដែលបានបាត់បង់ពីពិភពលោកដោយសារវីរុសCOVID-19។

ប្រាក់2ពាន់លានដុល្លារដែលលោក Pompeo លើកឡើងនោះគឺជាខ្ទង់ប្រាក់ដែលប្រធានាធិបតីចិន ស៊ី ជីនភីង បានសន្យានៅក្នុងមហាសន្និបាតសុខភាពពិភពលោកដែលត្រូវបានធ្វើឡើងតាមអនឡាញកាលពីថ្ងៃទី18ឧសភាកន្លងទៅ។

“ជំងឺរាតត្បាតនេះបានបណ្ដាលឱ្យមនុស្សប្រមាណជា90,000នាក់បានស្លាប់ មនុស្សជាង36លាននាក់នៅអាមេរិកបានបាត់បង់ការងាររាប់ចាប់ពីខែមីនា និងធ្វើឱ្យមនុស្ស300,000នាក់នៅទូទាំងពិភពលោកបានបាត់បង់ជីវិត។ តាមការគណនារបស់ខ្ញុំ ពិភពលោកបានខាតបង់ប្រាក់ប្រមាណជា 9,000,000,000,000 (9លានលាន) ដុល្លារអាមេរិក ដោយសារតែកំហុសរបស់ប្រទេសចិន” នេះជាសម្ដីរបស់លោក Mike Pompeo។

លោក Pompeo ក៏បានចោទប្រទេសចិនថា បានគំរាមអូស្ត្រាលីទាក់ទិននឹងការអំពាវនាវឱ្យមានការស៊ើបអង្កេតឯករាជ្យអំពីប្រភពរបស់COVID-19។ រដ្ឋមន្ត្រីការបរទេសអាមេរិកាងក៏ចោទប្រធានអង្គការ WHO ថា មានទំនាក់ទំនង “ជិតស្និទ្ធខុសធម្មតាជាមួយទីក្រុងប៉េកាំងចាប់ពីមុនមេរោគCOVID-19កើតឡើងផងដែរ។

WHO និងស្ថានទូតចិននៅសហរដ្ឋអាមេរិក បច្ចុប្បន្នមិនទាន់មានប្រតិកម្មអ្វីចំពោះការចោទប្រកាន់ខាងលើរបស់លោក Mike Pompeo នៅឡើយ។

គិតមកដល់បច្ចុប្បន្ន សហរដ្ឋអាមេរិកគឺជាសម្បុកមេរោគកូរ៉ូណាធំជាងគេក្នុងពិភពលោក ដោយមានអ្នកជំងឺជិត1.6លាននាក់ ក្នុងនោះមានជិត95,000នាក់បានបាត់បង់ជីវិត ដែលនេះជាស្ថិតិរបស់គេហទំព័រ Worlddometers៕

May 21, 2020

តួលេខអ្នកឆ្លងវីរុសCOVID-19 បានកើនលើស5លាននាក់ហើយ នៅទូទាំងពិភពលោក

ពិភពលោកទាំងមូលត្រូវបានរាយការណ៍ថា មានអ្នកជំងឺ COVID-19 ជាង5លាននាក់ ខណៈចំនួនអ្នកស្លាប់ដោយសារវីរុសកូរ៉ូណានេះ កើនដល់ជាង329,000នាក់។

ប្រទេសនិងដែនដីចំនួន213ក្នុងពិភពលោក បានរកឃើញអ្នកជំងឺCOVID-19 ចំនួន5,076,003នាក់ និងអ្នកស្លាប់សរុប329,112នាក់ ក្នុងនោះ អ្នកជំងឺថ្មីមានចំនួន86,893នាក់ និងអ្នកស្លាប់ថ្មីមានចំនួន4,667នាក់ ខណៈអ្នកដែលបានជាពីជំងឺមានចំនួន1,902,554នាក់។ នេះបើតាមស្ថិតិរបស់ Worldometer។

ទ្វីបអាមេរិកមានអ្នកជំងឺCOVID-19 សរុប2,281,740នាក់ ក្នុងនោះអាមេរិកខាងជើងមាន1,761,652នាក់ អាមេរិកខាងត្បូងមាន520,088នាក់ ខណៈទ្វីបអឺរ៉ុបមាន1,830,667នាក់ អាស៊ីមាន863,440នាក់ និងអាហ្វ្រិកមាន96,990នាក់។

សហរដ្ឋអាមេរិកបានរកឃើញអ្នកជំងឺថ្មី18,789នាក់ និងអ្នកស្លាប់ថ្មីមាន1,369នាក់ក្នុងអំឡុង24ម៉ោងចុងក្រោយនេះ ធ្វើឱ្យចំនួនអ្នកជំងឺសរុបកើនដល់1,589,372នាក់ និងអ្នកស្លាប់សរុបឡើងដល់94,902នាក់។

ប្រទេសរុស្ស៊ីបានរកឃើញអ្នកជំងឺសរុប308,705នាក់ ក្នុងនោះមានអ្នកស្លាប់2,972នាក់។ ក្នុងរយៈពេល24ម៉ោងចុងក្រោយនេះ ប្រទេសរុស្ស៊ីបានរកឃើញអ្នកជឺងឺ8,764នាក់។

អេស្ប៉ាញបានរាយការណ៍ថា បានរកឃើញអ្នកជំងឺថ្មី721នាក់ និងអ្នកស្លាប់ថ្មី110នាក់ក្នុងអំឡុង24ម៉ោងចុងក្រោយនេះ ធ្វើឱ្យតួលេខអ្នកជំងឺCOVID-19សរុបក្នុងប្រទេសនេះ ឡើងដល់279,524នាក់ និងអ្នកស្លាប់27,888នាក់៕

ប្រភព៖ សារព័ត៌មានបរទេស

May 21, 2020

ថៃជោគជ័យក្នុងការសាកល្បងវ៉ាក់សាំងនៅលើសត្វ

តាមគម្រោង ប្រទេសថៃនឹងមានវ៉ាក់សាំងប្រឆាំង COVID-19 នៅឆ្នាំក្រោយ នេះបើតាមមន្ត្រីជាន់ខ្ពស់ម្នាក់បានឱ្យដឹងកាលពីម្សិលមិញ បន្ទាប់ពីការពិសោធសាកល្បងនៅលើសត្វកណ្ដុរ ទទួលបានលទ្ធផលល្អ។

ទីភ្នាក់ងារសារព័ត៌មាន Reuters កាលពីថ្ងៃទី20ឧសភា បានដកស្រង់សម្ដីរបស់លោក Taweesin Wisanuyothin អ្នកនាំពាក្យរបស់មជ្ឈមណ្ឌលគ្រប់គ្រងស្ថានភាព COVID-19 របស់រាជរដ្ឋាភិបាលថៃ បានឱ្យដឹងថា ប្រទេសថៃនឹងចាប់ផ្ដើមសាកល្បងវ៉ាក់ថ្មីប្រឆាំង COVID-19 នៅលើសត្វស្វានៅសប្ដាហ៍ក្រោយ បន្ទាប់ពីការសាកល្បងនៅលើសត្វកណ្ដុរទទួលបានជោគជ័យ។

មន្ត្រីខាងលើបានថ្លែងថា “តាមគម្រោង វ៉ាក់សាំងរបស់ថៃនឹងត្រូវបានដាក់ឱ្យប្រើប្រាស់នៅឆ្នាំក្រោយ”។

វ៉ាក់សាំងថ្មីនេះត្រូវបានអភិវឌ្ឍដោយវិទ្យាស្ថានវ៉ាក់សាំងជាតិ ក្រសួងវេជ្ជសាស្ត្រ និងមជ្ឈមណ្ឌលស្រាវជ្រាវវ៉ាក់សាំងនៃសាកលវិទ្យាល័យ ជូឡាឡុងកន របស់ប្រទេសថៃ (Chulalongkorn)។

នៅទូទាំងពិភពលោក មានវ៉ាក់សាំងចំនួនជាង100ប្រភេទដែលមានសក្ដានុពលក្នុងការទប់ស្កាត់វីរុសCOVID-19 កំពុងត្រូវបានអភិវឌ្ឍ ក្នុងនោះមានវ៉ាក់សាំងមួយចំនួនកំពុងត្រូវបានសាកល្បងនៅលើមនុស្ស ប៉ុន្តែ កាលពីខែមេសា អង្គការសុខភាពពិភពលោក(WHO) បានព្រមានថា វ៉ាក់សាំងមួយតែងត្រូវការពេលយ៉ាងតិច12ខែទើបអាចដាក់ឱ្យប្រើប្រាស់បាន។

វ៉ាក់សាំងប្រឆាំង COVID-19 ដែលត្រូវបានសាកល្បងដំបូងគេនៅសហរដ្ឋអាមេរិក នោះគឺវ៉ាក់សាំងរបស់ក្រុមហ៊ុនផលិតឱសថ Moderna។ វ៉ាក់សាំងនេះត្រូវបានសាកល្បងនៅលើក្រុមអ្នកស្ម័គ្រចិត្តមួយចំនួន ហើយវាបង្ហាញថា មានប្រសិទ្ធភាពក្នុងការបង្កើតអង្គបដិប្រាណ។ នេះបើតាមទិន្នន័យថ្មីបំផុតដែលត្រូវបានក្រុមហ៊ុន Moderna ប្រកាសឱ្យដឹងនាដើមសប្ដាហ៍នេះ។

លោក Taweesin បានឱ្យដឹងថា ប្រទេសថៃ ចង់ក្លាយជាប្រទេសមួយក្នុងចំណោមប្រទេសដែលមានវ៉ាក់សាំងដំបូងគេដើម្បីប្រើប្រាស់ឱ្យទាន់ពេល។

គិតមកដល់បច្ចុប្បន្ន ប្រទេសថៃ បានរកឃើញអ្នកជំងឺរលាកសួតប្រភេទថ្មី (COVID-19) សរុប 3,034នាក់ និង56នាក់បានបាត់បង់ជីវិត៕

ប្រភព៖ សារព័ត៌មានបរទេស

May 21, 2020

យានអវកាសមានមនុស្សបើកបរដំបូងគេបង្អស់របស់ SpaceX នឹងហោះទៅកាន់ស្ថានីយអវកាស ISS នៅសប្ដាហ៍ក្រោយ

ជើងហោះហើរជាប្រវត្តិសាស្ត្ររបស់រ៉ុកកែត Falcon 9 នាថ្ងៃទី27ឧសភាខាងមុខនឹងក្លាយជាលើកដំបូងបង្អស់ដែលទីភ្នាក់ងារអវកាសអាមេរិកាំង NASA បាញ់បង្ហោះយានអវកាសដឹកអវកាសយានិកពីទឹកដីសហរដ្ឋអាមេរិក ក្រោយរយៈពេលជិត1ទសវត្សរ៍មកនេះ។

រ៉ុកកែត Falcon 9 របស់ក្រុមហ៊ុន SpaceX នឹងត្រូវបានបាញ់បង្ហោះពីមជ្ឈមណ្ឌលអវកាស Dennedy ក្នុងរដ្ឋ Florida សហរដ្ឋអាមេរិក។ នៅក្នុងយានអវកាស Crew Dragon របស់ក្រុមហ៊ុន SpaceX នោះ នឹងមានអវកាសយានិកជនជាតិអាមេរិកាំង2រូប។ គោលដៅរបស់ពួកគេគឺស្ថានីយអវកាសអន្តរជាតិ(ISS) ជាកន្លែងដែលពួកគេត្រូវចំណាយពេលចាប់ពី1ខែទៅ4ខែ នៅលើកម្ពស់400គីឡូម៉ែត្រពីលើផែនដី។

ជើងហោះហើរនេះ មិនត្រឹមតែជាសញ្ញានៃជោគជ័យផ្នែកបច្ចេកវិទ្យានោះទេ ប៉ុន្តែវាក៏មានអត្ថន័យធំធេងទាក់ទងនឹងភូមិសាស្ត្រនយោបាយរបស់អាមេរិកាំងផងដែរ។

NASA នឹងលែងពឹងផ្អែកទៅលើកាំជ្រួច Soyuz របស់រុស្ស៊ីដូចមុនទៀតហើយក្នុងការហោះហើរទៅកាន់ស្ថានីយអវកាសអន្តរជាតិ ISS ដោយពួកគេនឹងអាចបញ្ជូនអវកាសចរឡើងទៅទីអវកាសពីសហរដ្ឋអាមេរិកផ្ទាល់។
នេះនឹងជាបេសកកម្មឡើងទៅកាន់អវកាសដែលមានមនុស្សបើកបរដំបូងបង្អស់ដែលត្រូវបានបាញ់បង្ហោះពីទឹកដីសហរដ្ឋអាមេរិកក្នុងរយៈពេលជិត1ទសវត្សរ៍មកនេះ។

ក្រុមហ៊ុន SpaceX របស់មហាសេដ្ឋី Elon Musk បានទទួលជោគជ័យក្នុងការហោះហើរលក្ខណៈហ្វឹកហាត់មួយដោយប្រើអវកាសយានិកសិប្បនិម្មិតកាលពីខែមីនា ឆ្នាំ2019។

https://www.youtube.com/watch?v=FLP5EGO-RzU

ពួកគេក៏បានដឹកជញ្ជូនទំនិញឡើងទៅកាន់ស្ថានីយអវកាសអន្តរជាតិ ចំនួន19លើក ចាប់ពីឆ្នាំ2012 រហូតមកដល់បច្ចុប្បន្ន ដោយប្រើប្រាស់យានអវកាស Crew Dragon៕

ប្រភព៖ សារព័ត៌មានបរទេស

May 20, 2020

ធ្លាក់យន្តហោះទៀតហើយ! 5ថ្ងៃចុងក្រោយនេះ យន្តហោះចម្បាំងបំបាំងកាយអាមេរិកពីរគ្រឿង បានជួបគ្រោះថ្នាក់

យន្តហោះចម្បាំងបំបាំងកាយ F-35A ដែលទើបតែបានជួបឧបទ្ទវហេតុនៅពេលកំពុងហ្វឹកហាត់នៅក្នុងរដ្ឋ Florida បានក្លាយជាជាយន្តហោះចម្បាំងបំបាំងកាយទីពីររបស់សហរដ្ឋអាមេរិកដែលបានធ្លាក់ ក្នុងអំឡុងពេលមិនដល់មួយសប្ដាហ៍កន្លងទៅនេះ។

“F-35A ស្ថិតក្រោមការគ្រប់គ្រងរបស់ក្រុមយន្តហោះចម្បាំងលេខ58 បានធ្លាក់នៅពេលកំពុងចុះចតនាវេលាម៉ោង21និង30នាទី ក្នុងថ្ងៃទី19ឧសភា។ អ្នកបើកបរយន្តហោះបានចុចគន្លឹះបាញ់កៅអីចេញពីយន្តហោះទាន់ពេលដោយសុវត្ថិភាព និងត្រូវបានបញ្ជូនទៅកាន់មន្ទីរពេទ្យដើម្បីពិនិត្យ និងព្យាបាលរបួស។ គ្រោះថ្នាក់ធ្លាក់យន្តហោះនេះបានកើតឡើងនៅពេលយន្តហោះនេះកំពុងចូលរួមក្នុងការហ្វឹកហាត់នៅពេលយប់។ ប៉ុន្តែ ហេតុការណ៍នេះមិនបានធ្វើឱ្យមានអ្នកស្លាប់ ឬរបួស និងខូចខាតទ្រព្យសម្បត្តិនៅលើដីនោះទេ” នេះបើតាមសម្ដីមេបញ្ជាការនៃជំរំទ័ពអាកាស Eglin ក្នុងរដ្ឋ Florida នៃសហរដ្ឋអាមេរិក ដែលបានប្រកាសឱ្យដឹងក្នុងថ្ងៃទី20ឧសភានេះ។

នេះគឺជាយន្តហោះចម្បាំងបំបាំងកាយទីពីររបស់កងកម្លាំងនៅមូលដ្ឋានទ័ព Eglin ដែលបានជួបគ្រោះថ្នាក់ក្នុងអំឡុងពេលត្រឹមតែ5ថ្ងៃប៉ុណ្ណោះ បន្ទាប់ពីយន្តហោះ F-22 មួយគ្រឿងបានធ្លាក់នៅពេលកំពុងហ្វឹកហាត់កាលពីថ្ងៃទី15ឧសភាកន្លងទៅ៕

ប្រភព៖ សារព័ត៌មានបរទេស

May 20, 2020

Hot News! ចិនថាមិនអត់ឱនឱ្យក្រុមណាដែលចង់ “ផ្ដាច់ខ្លួន” នោះឡើយ បន្ទាប់ពីតៃវ៉ាន់ប្រកាសបដិសេធគោលការណ៍ “ប្រទេសមួយ របបពីរ”

ប្រទេសចិនបានប្រកាសអំពីគោលនយោបាយ “ប្រទេសមួយ របបពីរ” តាំងពីយូរយារមកហើយ និងបានប្រកាសជាថ្មីថានឹងមិនលើកលែងទោសឱ្យក្រុម “ផ្ដាច់ខ្លួន” ណាមួយនៅកោះតៃវ៉ាន់នោះឡើយ។

Ma Xiaoguang ដែលជាអ្នកនាំពាក្យរបស់ការិយាល័យទទួលបន្ទុកកិច្ចការតៃវ៉ាន់របស់ប្រទេសចិន ថ្ងៃនេះបានថ្លែងថា រូបមន្ត “ប្រទេសមួយ របបពីរ” គឺជាគោលការណ៍ស្នូលក្នុងគោលនយោបាយសម្រាប់តៃវ៉ាន់របស់ប្រធានាធិបតីចិន លោក ស៊ី ជីនភីង។ ប្រទេសចិននឹងប្រកាន់ខ្ជាប់នូវរូបមន្តនេះ។

“បង្រួបបង្រួមគឺជាប្រការដែលមិនអាចគេចរួចនៅក្នុងប្រវត្តិរីកចម្រើនដ៏មហិមារបស់ប្រទេសចិន” លោក Ma Xiaoguang ថ្លែងបែបនេះ។ លោកបន្តថា “យើងមានការប្ដេជ្ញាចិត្តខ្ពស់ ប្រកបដោយភាពជឿជាក់ និងសមត្ថភាពពេញលេញដើម្បីការពារអធិបតេយ្យភាពរបស់ប្រទេសជាតិ។ យើងនឹងមិនលើកលែងទោសឱ្យក្រុមណាមួយដែលធ្វើសកម្មភាពផ្ដាច់ខ្លួន ឬកម្លាំងបរទេសណាដែលជ្រៀតជ្រែកកិច្ចការផ្ទៃក្នុងរបស់ចិនជាដាច់ខាត”។

ចិនថាមិនអត់ឱនឱ្យក្រុមណាដែលចង់ "ផ្ដាច់ខ្លួន" នោះឡើយ បន្ទាប់ពីតៃវ៉ាន់ប្រកាសបដិសេធគោលការណ៍ "ប្រទេសមួយ របបពីរ" — លោក Ma Xiaoguang អ្នកនាំពាក្យរបស់ការិយាល័យទទួលបន្ទុកកិច្ចការតៃវ៉ាន់របស់ប្រទេសចិន

អ្នកនាំពាក្យរបស់ការិយាល័យទទួលបន្ទុកកិច្ចការតៃវ៉ាន់របស់ប្រទេសចិន បានសង្កត់ធ្ងន់ថា “តៃវ៉ាន់ឯករាជ” គឺជាការដើរបញ្ច្រាសនិន្នាការសម័យថ្មី និងជាផ្លូវដែលមិនអាចនាំទៅណាបាននោះទេ។ “យើងត្រៀមខ្លួនជាស្រេចក្នុងការបង្កើតវិសាលភាពធំទូលាយសម្រាប់បង្រួបបង្រួមជាតិដោយសន្តិភាព ប៉ុន្តែដាច់ខាតមិនទុកចន្លោះប្រហោងណាមួយសម្រាប់សកម្មភាពផ្ដាច់ខ្លួននៃក្រុម “តៃវ៉ាន់ឯករាជ” នោះទេ បើទោះក្នុងរូបភាពណាក៏ដោយ”។

ការប្រកាសរបស់ Ma Xiaoguang ខាងលើនេះ ត្រូវបានធ្វើឡើងបន្ទាប់ពីសុន្ទរកថាដំបូងនៃការឡើងកាន់អំណាចជាថ្មីរបស់មេដឹកនាំតៃវ៉ាន់ លោកស្រី Tsai Ing-wen។ លោកស្រីថ្លែងថា តៃវ៉ាន់ត្រៀមខ្លួនជាស្រេចក្នុងការចរចាជាមួយភាគីចិន ប៉ុន្តែមិនយល់ព្រមឱ្យទីក្រុងប៉េកាំងប្រើប្រាស់រូបមន្ត “ប្រទេសមួយ របបពីរ” ដើម្បីទម្លាក់តួនាទីរបស់តៃវ៉ាន់នោះឡើយ។

ប្រទេសចិន (ដីគោក) តែងតែចាត់ទុកកោះតៃវ៉ាន់ជាផ្នែកមួយនៃទឹកដីរបស់ខ្លួន ដែលរង់ចាំតែការបង្រួបបង្រួមប៉ុណ្ណោះ រាប់ទាំងការប្រើប្រាស់កម្លាំងបាយផងដែរ។ ទំនាក់ទំនងរវាងចិនដីគោក និងកោះតៃវ៉ាន់ បានប្រែទៅជាល្អក់កករជាថ្មីចាប់តាំងពីលោកស្រី Tsai Ing-wen ដែលជាអ្នកប្រឆាំងនឹងគោលនយោបាយ “ប្រទេសមួយ របបពីរ” បានជាប់ឆ្នោតកាលពីឆ្នាំ2016។

មេដឹកនាំកោះតៃវ៉ាន់ លោកស្រី Tsai Ing-wen និងថ្នាក់ដឹកនាំកោះតៃវ៉ាន់ — មេដឹកនាំកោះតៃវ៉ាន់ លោកស្រី Tsai Ing-wen និងថ្នាក់ដឹកនាំ

នៅក្នុងអាណត្តិដំបូង លោកស្រី Tsai Ing-wen បានប្រកាសជាច្រើនដងថាមិនទទួលយករូបមន្ត “ប្រទេសមួយ របបពីរ” ដែលប្រទេសចិនបានលើកឡើង។ លោកស្រីថា តៃវ៉ាន់ “គឺជាប្រទេសឯករាជ្យ”។ ទន្ទឹមនឹងនេះ “ភាពផ្អែមល្ហែម” រវាងកោះតៃវ៉ាន់ និងអាមេរិកាំង ក៏បានធ្វើឱ្យប្រទេសចិនខឹងសម្បាខ្លាំងផងដែរ។ ប្រទេសចិនបានបញ្ជុះបញ្ចូលឱ្យសម្ព័ន្ធមិត្តចំនួន7របស់កោះតៃវ៉ាន់ កាត់ផ្ដាច់ទំនាក់ទំនងការទូតជាមួយកោះនេះ ហើយងាកមកបង្កើតទំនាក់ទំនងជាមួយទីក្រុងប៉េកាំង។ បច្ចុប្បន្ន កោះតៃវ៉ាន់ត្រូវបានទទួលស្គាល់ដោយប្រទេសចំនួន15 ដែលភាគច្រើនជាបណ្ដាប្រទេសតូចៗនៅអាមេរិកខាងត្បូង និងប្រទេសនៅជាប់មហាសមុទ្រប៉ាស៊ីហ្វីក។ តៃវ៉ាន់ក៏មានទំនាក់ទំនងពិសេសជាមួយបណ្ដាប្រទេសដូចជា អូស្ត្រាលី កាណាដា បណ្ដាប្រទេសនៅក្នុងសហភាពអឺរ៉ុប ជប៉ុន នូវែលហ្សេឡង់ និងសហរដ្ឋអាមេរិកផងដែរ៕

ប្រភព៖ សារព័ត៌មានបរទេស

May 20, 2020

អាមេរិក-ចិន “សង្គ្រាមពាក្យសម្ដី” ដើមកំណើតកូវីដ-19 នឹងធ្វើឱ្យបែកបាក់ ប្រេះឆាពី 1ជំនាន់ ទៅ1ជំនាន់…

សម្ព័ន្ធភាពរវាង “មហានាគ” និង “មហាឥន្ទ្រី” កំពុងត្រូវធ្វើឱ្យញ័ររញ្ជួយជាថ្មីម្ដងទៀត បន្ទាប់ពី “សង្គ្រាមពាណិជ្ជកម្ម” ដែលទាំង 2នាក់ធ្លាប់បើកឆាកប្ដូរកណ្ដាប់ដៃគ្នាម្នាក់ 1ដៃកាលពីពេលមុនរួចមកហើយ និងកំពុងស្ថិតក្នុងអំឡុងពេលសម្រាកឱ្យទឹកនោះ ក៏ស្រាប់តែមានកម្លាំងជំរុញជាថ្មីម្ដងទៀត ពីអ្វីដែល “មនុស្សមិនអាចមើលឃើញបានដោយភ្នែកទទេ” តែបានសម្លាប់ជីវិតមនុស្សរួចទៅហើយអស់រាប់សែននាក់ និងថែមទាំងធ្វើឱ្យមនុស្សជាច្រើនត្រូវរងទុក្ខវេទនា ដោយសារតែត្រូវអស់ការងារធ្វើ ជាច្រើនលាននាក់ទៀត ទូទាំងពិភពលោក។

1.Chinese Virus!!
2.ឧប្បត្តិហេតុក្នុងបន្ទប់ពិសោធន៍ទីក្រុងវូហាន ធ្វើឱ្យកូវីដ-19 ដែលឆ្លងកាត់ការបង្កាត់ពូជរួចហើយ របូតធ្លាយចេញមក!!
3.ដោយសារតែរដ្ឋបាលចិន បិទបាំងព័ត៌មាន ធ្វើឱ្យកូវីដ-19 រាលដាលឆាបឆេះពេញសហរដ្ឋអាមេរិក!!
4.WHO កាន់ជើងរដ្ឋបាលចិន ជាហេតុបណ្ដាលឱ្យការធ្វើការងារកើតការខុសឆ្គង រហូតធ្វើឱ្យសហរដ្ឋអាមេរិករងផលប៉ះពាល់!!
5.វីរុសកូវីដ-19 កើតឡើងនៅក្នុងប្រទេសចិន ដូច្នេះ ចិនត្រូវតែទទួលខុសត្រូវ និងចេញថ្លៃខូចខាតឱ្យពលរដ្ឋអាមេរិកាំងដែលរងផលប៉ះពាល់!!

នេះគ្រាន់តែជា “ការបើកឆាក” ដែលលោកប្រធានាធិបតី ដូណាល់ ត្រាំ និងលោក ម៉ៃក៍ ប៉ុមប៉េអូ រដ្ឋមន្ត្រីការបរទេសអាមេរិក គាស់ឡើងយកមកសំពង “មហានាគ” ក្រោយពីកូវីដ-19 សម្លាប់ជីវិតពលរដ្ឋអាមេរិកាំងអស់ 91,981នាក់ និងឆ្លងមេរោគ 1,550,294នាក់(សម្រាប់ថ្ងៃទី19 ឧសភា ដោយទីភ្នាក់ងារព័ត៌មាន Worldmeter) និងអស់ការងារធ្វើ ប្រមាណជា 36.6លាននាក់(ប្រភព Financial Times កាលពីថ្ងៃទី14 ឧសភា)។

នៅពេលត្រូវសំពងមកយ៉ាងធ្ងន់ៗបែបនេះ តើមានដែរឬ ដែល “មហានាគនៃអាស៊ី” នៅធ្វើព្រងើយបាននោះ? ដូច្នេះបាតុភូត China strikes back ក៏ចាប់កំណើតឡើង!!

“អ្នកអាចកុហកមនុស្សគ្រប់គ្នាបាននៅពេលខ្លះ និងអាចកុហកអ្នកខ្លះបាន
នៅគ្រប់ពេល តែអ្នកមិនអាចកុហកមនុស្សគ្រប់គ្នាបានគ្រប់ពេលនោះទេ”

សម្ដីមាស របស់លោកប្រធានាធិបតី “អាប្រាហាម លិនខន់” អ្នករំដោះប្រទេសសហរដ្ឋអាមេរិកចេញពីការ “ជិះជាន់ខាងវណ្ណៈ” ត្រូវបានព្រលែងចេញមកពីមាត់របស់លោក “ចាវ លី ចៀន” អ្នកនាំពាក្យក្រសួងការបរទេសរបស់ចិន។ បន្ទាប់ពីនោះ ក៏បន្តទៀតដោយ “មុខកាំបិត លាបទឹកឃ្មុំ” វះចាក់ដោតបន្ថែម ដោយការហៅអ្វីគ្រប់យ៉ាងដែលរដ្ឋបាលសហរដ្ឋអាមេរិកលាបពណ៌នោះថា ជា “ភាពកុហកបោកប្រាស់ 24ចំណុច”។

តើអ្វីដែលធ្វើឱ្យសម្ព័ន្ធភាពរវាងរដ្ឋាភិបាលទាំង 2ប្រទេស ដើរមកដល់ “ចំណុចទាស់ទែង” រហូតដល់ថ្នាក់បើកសង្គ្រាមជះពាក្យសម្ដីដាក់គ្នា និងពាក្យសម្ដីដែលថានេះ កំពុងតែនាំឆ្ពោះទៅកាន់បញ្ហាទំនាស់រវាងជនជាតិ ដែលអាចនឹងធ្លាក់បន្តពី “1ជំនាន់ ទៅ1ជំនាន់” នៅទីបំផុត…

តើការបើកឆាកសង្គ្រាម “ថ្ងៃប្រកួតពាក្យសម្ដី” នេះ វាកើតឡើងនៅពេលណា?

ក្នុងអំឡុងពេលដំបូងៗ រដ្ឋបាលចិន ត្រូវរងការរិះគន់យ៉ាងធ្ងន់ធ្ងរទាំងខាងក្នុង និងខាងក្រៅ ក្នុងរឿងការចាត់ការកែបញ្ហាការឆ្លងរាលដាលនៃមេរោគកូវីដ-19 ហើយវាចាប់ផ្ដើមធ្ងន់ធ្ងរឡើងៗ នៅពេលដែលសហរដ្ឋអាមេរិកបានចូលមកប្រឡូកជាមួយដែរ តែយ៉ាងណាក៏ដោយ ក្នុងអំឡុងពេលនោះ រដ្ឋបាលប៉េកាំង នៅតែព្យាយាម “ខាំមាត់អត់ធ្មត់” មិនសូវចេញមកបង្ហាញឥរិយាបថឆ្លើយតបការចោទប្រកាន់ទាំងនោះប៉ុន្មានឡើយ។

តែទីបំផុត នៅពេលចូលដល់ខែមីនា ស្ថានការណ៍នៅក្នុងប្រទេសចិន “ចាប់ល្អប្រសើរឡើង” តែ “វីរុស” មហាកំណាចនោះ បែរជាឆ្លងរាលដាល និងរាតត្បាតចេញទៅទូទាំងពិភពលោក ជាពិសេសសហរដ្ឋអាមេរិក និងប្រទេសក្នុងទ្វីបអឺរ៉ុប បានរងផលប៉ះពាល់យ៉ាងធ្ងន់ធ្ងរខ្លាំងក្លាបំផុត។ ពេលនោះហើយ “មហានាគ” ក៏ចាប់ផ្ដើមវែកវាំងននសន្សឹមៗ ចេញមកឆ្លើយតប “មហាឥន្ទ្រី” ប្រភពកំណើតនៃពហុ “ការចោទប្រកាន់” និង “មហាព័ត៌មានចចាមអារ៉ាម” ទាំងឡាយ។

ដោយអ្នកនាំពាក្យក្រសួងការបរទេសរបស់ចិន “ដណ្ដើមវាយលុកមុន” ដោយការព្រលែងសារក្នុងធ្វីតធើរ “បង្កើតទ្រឹស្ដីសមគំនិត” ឡើងមកថ្មីមួយថា វីរុសកូវីដ-19 ការពិតទៅ ប្រហែលជា “អាវុធជីវសាស្ត្រ” ដែលត្រូវបានផលិតឡើងដោយ “កងទ័ពអាមេរិក” ច្រើនជាង ដោយការនាំយក “ឃ្លីប” ពាក្យសម្ដីផ្ដល់ដំណឹង នៅក្នុងសភាកុងហ្ក្រេសរបស់លោក “រ៉ូប៊ើត រេដហ្វ៉ដ” អគ្គនាយកមជ្ឈមណ្ឌលការគ្រប់គ្រងរោគ និងការការពាររបស់សហរដ្ឋអាមេរិក ឬ CDC ដែលបានបញ្ជាក់ថា រកឃើញថា មានអ្នកស្លាប់មួយចំនួននៅក្នុងសហរដ្ឋអាមេរិក បណ្ដាលមកពីការឆ្លងមេរោគវីរុសកូរ៉ូណាប្រភេទថ្មី(ដែលក្រោយមកគឺ កូវីដ-19) មកប្រើប្រកបជាមួយការអះអាង រហូតធ្វើឱ្យសារនៅក្នុងធ្វីតធើរនោះ ត្រូវបានចែកចាយបន្តជាង 300,000ដង។

តែភ្លាមៗនោះ លោកមហាមេដឹកនាំ ដូណាល់ ត្រាំ ក៏ចេញមកឆ្លើយតបវិញដោយការ “អារ-ក បែបទន់ភ្លន់” អំពីទ្រឹស្ដីសមគំនិតនេះ ដោយការហៅ “មេរោគកំណាច” នេះ ស្ទើរតែគ្រប់ពេលក្នុងការធ្វើសម្ភាសថា “Chinese Virus” ភ្លាមៗតែម្ដង!! ដោយមានគោលបំណង ដើម្បីបញ្ជាក់ប្រាប់ពលរដ្ឋអាមេរិកាំង មនុស្សលើពិភពលោកថា ដើមកំណើតរបស់ “វា” គឺនៅក្នុងប្រទេសចិន!!។

សូមរង់ចាំអាននៅថ្ងៃស្អែក
ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

May 20, 2020

Author: សឿន សំណាង