សឿន សំណាង - La Reine Media

Facebook នឹងក្លាយជាអ្នកនាំមុខគេក្នុងការផ្លាស់ប្ដូររបៀបធ្វើការថ្មី

ក្រុមហ៊ុន Facebook នឹងអនុញ្ញាតឱ្យបុគ្គលិកយ៉ាងតិចពាក់កណ្ដាលធ្វើការពីចម្ងាយទាំងស្រុងក្នុងបំណងក្លាយជាក្រុមហ៊ុននាំមុខគេក្នុងការផ្លាស់ប្ដូរវិធីធ្វើការក្នុងពិភពលោកនាពេលដ៏ខ្លីខាងមុខ។

CEO របស់ក្រុមហ៊ុន Facebook លោក Mark Zuckerberg បានចែករំលែកព័ត៌មាននៅលើទំព័រផ្ទាល់ខ្លួនរបស់លោកថា បុគ្គលិករបស់ខ្លួនអាចដាក់ពាក្យធ្វើការពីចម្ងាយ ដោយមិនចាំបាច់មកក្រុមហ៊ុន ចាប់ពីចុងឆ្នាំនេះ។ “យើងនឹងអនុវត្តលើកិច្ចការនេះយ៉ាងយកចិត្តទុកដាក់បំផុត និងប្រកបដោយការទទួលខុសត្រូវ។ ការផ្លាស់ប្ដូរនេះនឹងត្រូវចំណាយពេលចាប់ពី5ទៅ10ឆ្នាំ ប៉ុន្តែវាអាចលឿនជាងនេះ”។ លោក Zuckerberg សង្កត់ធ្ងន់ថា “ប្រហែល50% (នៃបុគ្គលិក) នឹងប្ដូរទៅធ្វើការពីចម្ងាយជារៀងរហូត”។

បច្ចុប្បន្ន Facebook មានបុគ្គលិកជាង48,000នាក់ ធ្វើការនៅក្នុងការិយាល័យចំនួន70នៅទូទាំងពិភពលោក។

Facebook បានរៀបផែនការបើកការិយាល័យរបស់ខ្លួនឡើងវិញនៅថ្ងៃទី6កក្កដាខាងមុខ។ តាមគម្រោង ក្រុមហ៊ុននេះនឹងមានបុគ្គលិកតែ25%ប៉ុណ្ណោះដែលនឹងមកធ្វើការនៅក្នុងការិយាល័យ។ ស្ថាបនិករបស់ Facebook បានឱ្យដឹងថា បន្ទាប់ពីបានចូលរួមកិច្ចប្រជុំតាមអនឡាញមួយ លោក “ត្រូវបានបញ្ចុះបញ្ចូល” ទាក់ទិននឹងទៅផលប្រយោជន៍នានានៅពេលអនុញ្ញាតឱ្យបុគ្គលិកធ្វើការពីចម្ងាយ ពិសេសគឺការសន្សំសំច័យថាមពលអគ្គិសនី និងការការពារបរិស្ថាន។

តាមគម្រោង ក្រុមហ៊ុន Facebook នឹងជ្រើសរើសបុគ្គលិកសរុបប្រមាណជា10,000នាក់បន្ថែមទៀតនៅក្នុងឆ្នាំនេះ។ បន្ទឹមនឹងនេះ Facebook ក៏នឹងបង្កើតមជ្ឈមណ្ឌលមួយចំនួននៅ Atlanta, Dallas និង Denver នៃសហរដ្ឋអាមេរិកផងដែរ។ ប៉ុន្តែ Zuckerberg បញ្ជាក់ថា នេះគ្រាន់តែជាទីកន្លែងសម្រាប់បុគ្គលិកមកប្រជុំតែប៉ុណ្ណោះ មិនមែនជាការិយាល័យនោះទេ។

បុគ្គលិករបស់ Facebook ម្នាក់សុំមិនបញ្ចេញឈ្មោះ បានប្រាប់ NYTimes ថា ក្រុមការងារដែលធ្វើការពីចម្ងាយ មានការលំបាកណាស់នៅពេលត្រូវត្រួតពិនិត្យខ្លឹមសាររាប់មិនអស់នៅលើ Facebook ពិសេសគឺព័ត៌មានក្លែងក្លាយទាក់ទងនឹង COVID-19៕

ប្រភព៖ សារព័ត៌មានបរទេស

May 22, 2020

រកឃើញកាឡាក់ស៊ីមួយដែលមានអាយុកាលចាស់ជាងគេបង្អស់ក្នុងចក្រវាល(វីដេអូ)

ក្រុមអ្នកវិទ្យាសាស្ត្រទើបតែបានរកឃើញកាឡាក់ស៊ីដែលមានរូបរាងដូចថាសមួយ និងមានចម្ងាយពីផែនដីប្រមាណជា12.5ពាន់លានឆ្នាំពន្លឺ ដែលនេះជិតស្មើនឹងសម័យដំបូងនៃការកកើតចក្រវាល។

នៅក្នុងលម្ហអវកាសដែលមានអាយុកាល13.8ពាន់លានឆ្នាំពន្លឺ កាឡាក់ស៊ីស្ទើរតែទាំងអស់បានកកើតឡើងបន្តិចម្ដងៗក្នុងរយៈពេលរាប់ពាន់លានឆ្នាំ និងបានពង្រីកមាឌរហូតដូចបច្ចុប្បន្ន គឺវាហាក់បានហួសពេលបន្តិចហើយ។ ឧទាហរណ៍ដូចជា កាឡាក់ស៊ី Milky Way របស់មនុស្ស វាបានឆ្លងកាត់ព្រឹត្តិការណ៍ “ច្របាច់បញ្ចូលគ្នា” ជាច្រើនលើកមកហើយក្នុងរយៈពេល6ពាន់លានឆ្នាំដំបូងរាប់ចាប់ពីការផ្ទុះ Big Bang (Big Bang គឺជាព្រឹត្តិការណ៍ផ្ទុះដ៏មហិមាក្នុងលម្ហអវកាស ដែលជាយុគសម័យដំបូងបំផុតនៃការចាប់កំណើតរបស់ចក្រវាល)។

ក៏ប៉ុន្តែ របកគំហើញថ្មីមួយត្រូវបានធ្វើឡើងនៅឯ Atacama Large Millimiter Array (ALMA) ដែលជាស្ថានីយសង្កេតតារាដោយរលកវិទ្យុធំបំផុតក្នុងពិភពលោក ក្នុងប្រទេសឈីលី បានធ្វើឱ្យរបកគំហើញកាលពីអតីតកាលស្ដីអំពីការចាប់់កំណើតរបស់កាឡាក់ស៊ី ហាក់ងាកចេញពីភាពជាក់ស្ដែងបន្តិច។ នៅក្នុងរបាយការណ៍ដែលត្រូវបានចុះផ្សាយនៅលើទស្សនាវដ្ដី Nature កាលពីថ្ងៃទី20ឧសភាកន្លងទៅ ក្រុមអ្នកវិទ្យាសាស្ត្របានឱ្យដឹងថា ពួកគេបានរកឃើញកាឡាក់ស៊ីមួយដែលមានរូបរាងដូចថាស និងត្រូវបានដាក់ឈ្មោះឱ្យថា DLA0817g ឬ Wolfe Disk ដែលវាបានចាប់កំណើតតាំងពីដំណាក់កាលដំបូងនៃការចាប់កំណើតរបស់ចក្រវាល។

“ដោយមាន ALMA ពេលនេះយើងរកឃើញភ័ស្ដុតាងយ៉ាងច្បាស់ដែលបង្ហាញថា កាឡាក់ស៊ី DLA0817g មានវត្តមានតាំងពី 1.5ពាន់លានឆ្នាំមុន បន្ទាប់ពីការផ្ទុះ Big Bang” នេះបើតាម Marcel Neeleman ដែលជាប្រធានក្រុមអ្នកវិទ្យាសាស្ត្រនៃវិទ្យាស្ថានតារាសាស្ត្រ Max Planck នៅក្នុងតំបន់ Heidelberg ប្រទេសអាល្លឺម៉ង់។ នេះគឺជាកាឡាក់ស៊ីរូបថាសមានវ័យចំណាស់បំផុតដែលមិនធ្លាប់បានរកឃើញពីមុនមក។

កាឡាក់ស៊ី DLA0817g មានចម្ងាយ12.5ពាន់លានឆ្នាំពន្លឺពីភពផែនដី និងមានទម្ងន់ ឬម៉ាស់ធ្ងន់ជាងព្រះអាទិត្យចំនួន72ពាន់លានដង។ ការសិក្សាស្រាវជ្រាវបានបញ្ជាក់ថា កាឡាក់ស៊ីនេះកំពុងតែវិលក្នុងល្បឿន272គីឡូម៉ែត្រក្នុង1វិនាទី ពោលគឺប្រហាក់ប្រហែលនឹងល្បឿនរបស់កាឡាក់ស៊ី Milky Way របស់យើង។

រកឃើញកាឡាក់ស៊ីមួយដែលមានអាយុកាលចាស់ជាងគេបង្អស់ក្នុងចក្រវាល

លោក Neeleman ថ្លែងថា “ស្ទើរតែទាំងអស់នៃកាឡាក់ស៊ីវ័យចំណាស់ដែលយើងបានរកឃើញកន្លងមក សុទ្ធតែកកើតឡើងបន្ទាប់ពីការ “ច្របាច់បញ្ចូលគ្នា” ដ៏ខ្លាំងក្លារវាងបណ្ដាកាឡាក់ស៊ីតូចៗ និងពពកឧស្ម័នយក្សនានា។ នោះគឺជាក្រុមដ៏ច្របូកច្របល់។ រូបមន្តនេះមិនអាចបង្កើតបានជា “ថាសវិលត្រជាក់” និងមានរបៀបរៀបរយដូចអ្វីដែលយើងបានឃើញនៅក្នុងកាឡាក់ស៊ី DLA0817g នោះទេ”។

យោងទៅតាមការវិភាគនៅលើកុំព្យូទ័រ ក្រុមអ្នកវិទ្យាសាស្ត្រយល់ថា ប្រព័ន្ធវត្ថុធាតុងងឹតដ៏មហិមាក្នុងអវកាស នាសម័យកកើតដំបូង អាចជាអ្នកបង្កើតឱ្យមានកាឡាក់ស៊ីត្រជាក់នានា។

“យើងគិតថា Wolfe Disk មានការវិវឌ្ឍន៍តាមរយៈការប្រមូលផ្ដុំនៃឧស្ម័នត្រជាក់ដែលកើតមានឡើងពីបណ្ដាញវត្ថុធាតុងងឹត។ ប៉ុន្តែ សំណួរសួរថា តើធ្វើបែបណាទើបផ្ទាំងឧស្ម័នដ៏មហិមាដូច្នេះអាចកើតឡើងបាន ខណៈដែលវានៅតែអាចរក្សាថាសយក្សឱ្យវិលក្នុងល្បឿនប្រកបដោយស្ថិរភាពបែបនេះ?”។

Neeleman និងក្រុមការងារបានរកឃើញកាឡាក់ស៊ី DLA0817g នេះ នៅពេលពួកគេពិនិត្យទៅលើពន្លឺនានានៃវត្ថុអវកាសដែលនៅសែនឆ្ងាយ និងភ្លឺខ្លាំង (quasar)។ ពន្លឺពី quasar ត្រូវបានស្រូបយកនៅពេលវាធ្វើដំណើរឆ្លងកាត់ “ផ្ទាំងឧស្ម័នអ៊ីដ្រូសែនយក្ស” ដែលព័ន្ធជុំវិញកាឡាក់ស៊ី។ នោះគឺជាវិធីប្រយោលដែលជួយឱ្យអ្នកវិទ្យាសាស្ត្ររកឃើញកាឡាក់ស៊ីដែលនៅសែនឆ្ងាយពីភពផែនដី៕

ប្រភព៖ សារព័ត៌មានបរទេស

May 22, 2020

ដោយសារអ្នកដំណើរពីកម្ពុជាម្នាក់ក្ដៅខ្លួន! វៀតណាមដាក់បម្រាមគោចរចំណតរថយន្តមួយ ពេញមួយយប់

បុរសម្នាក់ដែលធ្វើដំណើរពីកម្ពុជា ត្រឡប់ទៅកាន់ខេត្ត Hau Giang ប្រទេសវៀតណាម បានបង្ហាញអាការក្ដៅខ្លួន និងក្អក ប៉ុន្តែមិនទាន់ត្រូវបានធ្វើតេស្តរកមេរោគនៅឡើយ ដូច្នេះ នៅយប់មិញនេះ សមត្ថកិច្ចវៀតណាមបានដាក់កម្លាំងនគរបាលដើម្បីហាមឃាត់មិនឱ្យមានការចេញចូលនៅចំណតរថយន្តមួយដែលបុរសនេះកំពុងស្ថិតនៅ។

កាលពីព្រឹកមិញនេះ(22ឧសភា) សមត្ថកិច្ចគ្រប់គ្រង COVID-19 នៅទីក្រុង Can Tho និងខេត្ត Hau Giang ប្រទេសវៀតណាមបានឱ្យដឹងថា បានស្រាវជ្រាវរកឃើញអ្នករួមដំណើរជាមួយបុរសដែលវិលត្រឡប់ពីកម្ពុជានេះហើយ ដោយពួកគេកំពុងត្រូវបានដាក់ឱ្យនៅដោយឡែកក្នុងខេត្ត Hau Giang ភាគខាងត្បូងប្រទេសវៀតណាម។

មុននោះ ដោយសារតែឃើញបុរសនេះចូលមកវៀតណាមដោយមិនទាន់ទទួលបានការពិនិត្យសុខភាព និងសង្ស័យថាអាចមានផ្ទុកវីរុសCOVID-19 សមត្ថកិច្ចចម្រុះរបស់វៀតណាមក៏បានធ្វើការដាក់បុរសនេះ រួមនឹងអ្នកបើកបររថយន្ត និងអ្នករួមដំណើរទាំងអស់ ឱ្យនៅដាច់ដោយឡែក។

រហូតដល់ម៉ោង1និង30នាទីរំលងអធ្រាត្រនៃថ្ងៃទី22ឧសភានេះ ក្រុមគ្រូពេទ្យបានយកវត្ថុវិភាគពីបុរសខាងលើ និងធ្វើការពិសោធជាបន្ទាន់។ មកដល់ពេលនេះ សមត្ថកិច្ចចម្រុះរបស់វៀតណាម បានដកបម្រាមគោចរនៅចំណតរថយន្តខាងលើនោះហើយ បន្ទាប់ពីបានធ្វើតេស្តបង្ហាញថា បុរសនោះអវិជ្ជមានជាមួយនឹងវីរុសCOVID-19៕

ប្រភព៖ សារព័ត៌មានវៀតណាម

May 22, 2020

កូនស្រីរបស់ស្ថាបនិកក្រុមហ៊ុនចិន Huawei អាចត្រូវបានដោះលែងនៅសប្ដាហ៍ក្រោយ

តុលាការកាណាដានឹងចេញសាលក្រមនៅសប្ដាហ៍ក្រោយទាក់ទងនឹងបញ្ហាដែលថា គួរតែបញ្ជូនខ្លួននាយិកាផ្នែកហិរញ្ញវត្ថុរបស់ក្រុមហ៊ុន Huawei គឺអ្នកស្រី Meng Wanzhou ទៅកាន់ទឹកដីអាមេរិកតាមសំណើពីអាមេរិកាំងដែរ ឬយ៉ាងណា។

យោងតាមសារព័ត៌មាន South China Morning Post អ្នកស្រី Heather Holmes ដែលជាអនុប្រធានតុលាការកំពូលនៃខេត្ត British Columbia របស់ប្រទេសកាដាណា នៅថ្ងៃទី22នេះ បានឱ្យដឹងថា តុលាការនេះនឹងសម្រេចប្រកាសសាលក្រមលើរឿងក្ដីរបស់អ្នកស្រី Meng Wanzhou ដែលជានាយិកាហិរញ្ញវត្ថុរបស់ក្រុមហ៊ុនចិន Huawei នៅថ្ងៃទី27ឧសភាខាងមុខ ហើយអ្នកស្រី Meng Wanzhou ប្រហែលជាអាចត្រូវបានដោះលែងឱ្យមានសេរីភាព។

សាលក្រមតុលាការខេត្ត British Columbia របស់កាដាណានឹងសម្រេចថា តើអ្នកស្រី Meng Wanzhou បានប្រព្រឹត្តបទល្មើសចំនួនពីរដែរ ឬយ៉ាងណា ពោលគឺមានន័យថា អ្នកស្រីនឹងត្រូវបានបញ្ជូនទៅកាន់សហរដ្ឋអាមេរិក បើសិនជាត្រូវបានថ្កោលទោសទាំងនៅកាណាដា ទាំងនៅសហរដ្ឋអាមេរិក។ បើសិនជាអនុប្រធានតុលាការកំពូលនៃខេត្ត British Columbia សម្រចចិត្តចេញសាលក្រមបញ្ជាក់ថា អ្នកស្រី Meng Wanzhou មិនបានប្រព្រឹត្តខុសច្បាប់សហរដ្ឋអាមេរិកនោះទេ អ្នកស្រី Wanzhou អាចនឹងត្រូវបានដោះលែង ប៉ុន្តែ ប្រការនេះក៏នៅតែអាស្រ័យទៅលើក្រុមមេធាវីរបស់សហរដ្ឋអាមេរិកប្រចាំប្រទេសកាណាដា ដែលថាតើពួកគេបន្តប្ដឹងឧទ្ធរណ៍ទៀតឬអត់។ ផ្ទុយទៅវិញ បើសិនជាពិនិត្យឃើញថា អ្នកស្រី Wanzhou បានប្រព្រឹត្តខុសច្បាប់សហរដ្ឋអាមេរិកដែរនោះ រឿងក្ដីបញ្ជូនខ្លួនអ្នកស្រីទៅកាន់សហរដ្ឋអាមេរិកនឹងនៅតែបន្តទៅមុខជាមួយនឹងការការពារកូនក្ដីរបស់ក្រុមមេធាវីដែលតំណាងឱ្យអ្នកស្រី Wanzhou។

កូនស្រីរបស់ស្ថាបនិកក្រុមហ៊ុន Huawei អាចត្រូវបានដោះលែងនៅសប្ដាហ៍ក្រោយ — អ្នកស្រី Meng Wanzhou ចាកចេញពីតុលារមួយនៅកាណាដាកាលពីខែមករា ឆ្នាំ2020

ដើម្បីទទួលបានសេរីភាព អ្នកស្រី Wanzhou និងក្រុមមេធាវីរបស់អ្នកស្រី ត្រូវតែធ្វើយ៉ាងដើម្បីបញ្ចុះបញ្ចូលចៅក្រមតុលាការឱ្យជឿជាក់ថា ការចោទប្រកាន់របស់សហរដ្ឋអាមេរិកគឺមិនសមស្រាបជាមួយនឹងច្បាប់របស់កាដាណា និងជារឿងនយោបាយ។

រឿងក្ដីធ្វើបត្យាប័ននាយិកាហិរញ្ញវត្ថុរបស់ Huawei អាចបន្តរហូតដល់ខែតុលា ឬខែវិច្ឆិកាឆ្នាំនេះ អាស្រ័យទៅលើការវិនិច្ឆ័យរបស់ចៅក្រម។ ក៏ប៉ុន្តែ ដោយសារតែមានភាពស្មុគស្មាញខ្លាំង រឿងក្ដីនេះអាចអូសបន្លាយជាច្រើនឆ្នាំទៅមុខទៀត។

អ្នកស្រី Wanzou ត្រូវបានសមត្ថកិច្ចប្រទេសកាណាដាចាប់ឃាត់ខ្លួននៅឯព្រលានយន្តហោះ Vancouver កាលពីថ្ងៃទី1ធ្នូ ឆ្នាំ2018 ទៅតាមសំណើរបស់សហរដ្ឋអាមេរិក។ អ្នកស្រី Meng Wanzhou ត្រូវបានសហរដ្ឋអាមេរិកចោទថាបានកុហកធនាគារធំៗនៅសហរដ្ឋអាមេរិកអំពីការគ្រប់គ្រងរបស់ក្រុមហ៊ុន Huawei ទៅលើក្រុមហ៊ុន Skycom នៅទីក្រុងហុងកុង។ Skycom គឺជាក្រុមហ៊ុនមួយដែលត្រូវគេចោទប្រកាន់ថាបានលក់ទំនិញទៅឱ្យប្រទេសអ៊ីរ៉ង់ ដែលនេះគឺជាការរំលោភលើការដាក់ទណ្ឌកម្មសេដ្ឋកិច្ចរបស់សហរដ្ឋអាមេរិកទៅលើរដ្ឋាភិបាលអ៊ីរ៉ង់។ បើសិនជាត្រូវបានកាត់ទោសនៅសហរដ្ឋអាមេរិក អ្នកស្រី Meng Wanzhou អាចប្រឈមនឹងការជាប់ពន្ធនាគាររយៈពេល30ឆ្នាំ។

រឿងក្ដីខាងលើនេះ បានធ្វើឱ្យទំនាក់ទំនងរវាងប្រទេសចិនជាមួយកាដាណា និងចិនជាមួយអាមេរិកាំងមានភាពតានតឹង។ បន្ទាប់ពីអ្នកស្រី Meng Wanzhou ត្រូវបានចាប់ឃាត់ខ្លួនបាន9ថ្ងៃ អាជ្ញាធរចិនក៏បានចាប់ខ្លួន Michael Kovrig ដែលជាអតីតអ្នកការទូត និង Michael Spavor ជាអ្នកជំនួញរបស់សហរដ្ឋអាមេរិកផងដែរ៕

ប្រភព៖ សារព័ត៌មានបរទេស

May 22, 2020

ចិត្តល្អកម្របានជួប! រើសបានប្រាក់ជិតមួយលានដុល្លារអាមរិក តែប្រគល់ឱ្យម្ចាស់ដើមវិញ

គ្រួសារមួយនៅក្នុងរដ្ឋ Virginia ទទួលបានការកោតសរសើរយ៉ាងខ្លាំងពីសមត្ថកិច្ច នៅពេលដែលសម្រេចចិត្តប្រគល់ប្រាក់ជិតមួយលានដុល្លារដែលពួកគេរើសបាននៅលើដងផ្លូវ ទៅឱ្យម្ចាស់ដើមវិញ។

ប្ដីប្រពន្ធ លោក David និងនាង Emily Schantz កាលពីថ្ងៃទី16ឧសភា បានបើកឡានដឹកកូនៗចាកចេញពីផ្ទះនៅតំបន់ Caroline ភាគខាងជើងទីក្រុង Richmond រដ្ឋ Virginia នៃសហរដ្ឋអាមេរិក។ ក្នុងពេលធ្វើដំណើរ រថយន្តបានកិនចំថង់មួយនៅលើផ្លូវ។ ដំបូងឡើយ ពួកគេនឹកស្មានថាជាថង់សំរាម ប៉ុន្តែពេលឈប់ដើម្បីពិនិត្យមើល ស្រាប់តែឃើញថង់មួយផ្សេងទៀតនៅក្នុងប្រឡាយមួយដែលនៅក្បែរនោះ។

រហូតមកដល់ផ្ទះ ទើបពួកគេដឹងថា បានរើសបានប្រាក់ជិតមួយលានដុល្លារអាមេរិក។ ប្រាក់ទាំងនេះត្រូវបានដាក់នៅក្នុងថង់ផ្លាស្លឹក។

ជំនួសឱ្យការរក្សាទុក “ទ្រព្យដែលទេវតាប្រទាន” នេះ គ្រួសារ Shantz ក៏បានសម្រេចចិត្តយកវាទៅប្រគល់ឱ្យសមត្ថកិច្ចនៃតំបន់ Caroline។ មន្ត្រីនគរបាលម្នាក់ ឈ្មោះ Scott Moser បានថ្លែងថា “មនុស្សដែលចិត្តល្អបែបនេះ គឺកម្របានជួបណាស់។ យើងពិតជាមានមោទនភាពចំពោះពួកគេ ហើយពួកគេគឺជាតំណាងនៃភាពស្មោះត្រង់”។

ចំណេកនាង Schantz វិញ បាននិយាយថា គ្រួសាររបស់ពួកគេគ្រាន់តែធ្វើរឿងមួយដែល “ត្រឹមត្រូវ” ប៉ុណ្ណោះ។ “ប្រាក់ទាំងនេះមិនមែនជារបស់គ្រួសារខ្ញុំទេ”។

សមត្ថកិច្ចមិនទាន់បានដឹងច្បាស់អំពីមូលហេតុដែលនាំឱ្យមានថង់ប្រាក់ដ៏ច្រើនបែបនេះធ្លាក់នៅលើផ្លូវនេះនៅឡើយ ប៉ុន្តែជឿជាក់ថា ប្រាក់ទាំងនេះប្រាកដជាបានធ្លាក់ក្នុងពេលម្ចាស់របស់វាកំពុងដឹកទៅកាន់ធនាគារ។ ប្រាក់ជិតមួយលានដុល្លារនេះត្រូវបានបញ្ជូនត្រឡប់ទៅកាន់ម្ចាស់ដើមវិញ តាមរយៈប្រៃសណីយ៍៕

ប្រភព៖ សារព័ត៌មានបរទេស

May 22, 2020

ខឹងរុស្ស៊ីមិនឱ្យឈ្លបយកការណ៍ Trump ដកអាមេរិកចេញពីសន្ធិសញ្ញា “បើកចំហជើងមេឃ”! NATO នឹងបើកកិច្ចប្រជុំបន្ទាន់នៅថ្ងៃនេះ

ប្រធានាធិបតីអាមេរិកាំង លោក Donald Trump បានប្រកាសថា សហរដ្ឋអាមេរិកនឹងចាកចេញពីសន្ធិសញ្ញា Open Skies Treaty (បើកចំហជើងមេឃ) ដែលត្រូវបានចុះហត្ថលេខាដោយប្រទេសចំនួន34 ដោយមូលហេតុថា រុស្ស៊ីបានរំលោភជាច្រើនដងលើសន្ធិសញ្ញានេះ។

មន្ត្រីនៅសេតវិមានបានឱ្យដឹងថា ដំណើរការនៃការចាកចេញពីសន្ធិសញ្ញានេះនឹងត្រូវបានធ្វើឡើងរួចរាល់ក្នុងរយៈពេល6ខែទៅមុខទៀត ប៉ុន្តែ ប្រធានាធិបតីអាមេរិកាំងនៅតែទុកផ្លូវសម្រាប់ការវិលត្រឡប់មកវិញ។ លោក Donald Trump បានប្រាប់អ្នកយកព័ត៌មានកាលពីម្សិលមិញ (21ឧសភា) ថា “ខ្ញុំយល់ថា យើងមានទំនាក់ទំនងល្អជាមួយរុស្ស៊ី ក៏ប៉ុន្តែពួកគេមិនគោរពតាមកិច្ចព្រមព្រៀងនេះទេ។ យើងនឹងដកខ្លួនចេញពីសន្ធិសញ្ញា រហូតដល់ពួកគេគោរពអនុវត្តតាមវា (សន្ធិសញ្ញា)”។

សន្ធិសញ្ញា “បើកចំហជើងមេឃ” (Open Skies Treaty) ត្រូវបានចុះហត្ថលេខាដោយសហរដ្ឋអាមេរិក រុស្ស៊ី និងបណ្ដាប្រទេសមួយចំនួននៅអឺរ៉ុបកាលពីឆ្នាំ1992 និងមានសុពលភាពចាប់ពីឆ្នាំ2002។ សន្ធិសញ្ញានេះ ត្រូវបានបង្កើតឡើងដើម្បីធ្វើឱ្យមានតម្លាភាពអំពីសកម្មភាពយោធារបស់បណ្ដាប្រទេស។ យោងតាមកិច្ចព្រមព្រៀងនេះ ប្រទេសចំនួន35ដែលជាហត្ថាលេខី អាចធ្វើការឈ្លបយកការណ៍នៅលើដែនអាកាសរវាងគ្នានឹងគ្នា ប៉ុន្តែត្រូវរាយការណ៍ប្រាប់ប្រទេសជាម្ចាស់ផ្ទះឱ្យបាន72ម៉ោង មុននឹងធ្វើសកម្មភាព ដើម្បីឱ្យប្រទេសជាម្ចាស់ផ្ទះមានពេលប្រតិកម្មឆ្លើយតប។

ការចាកចេញពីសន្ធិសញ្ញាខាងលើនេះ ត្រូវបានលើកឡើងបន្ទាប់ពីការវាយតម្លៃរយៈពេល6ខែ ក្នុងនោះរដ្ឋាភិបាលរបស់លោក Trump បានចោទភាគីរុស្ស៊ីថា បានរំលោភកិច្ចព្រមព្រៀងជាបន្តបន្ទាប់ ដូចជាការរារាំងយន្តហោះរបស់សហរដ្ឋអាមេរិកមិនឱ្យចូលក្នុងដែនអាកាស Gruzia និងដែនដី Kaliningrad របស់សហព័ន្ធរុស្ស៊ីជាដើម។ ទីក្រុងវ៉ាស៊ីងតោនក៏បានចោទទីក្រុងម៉ូស្គូថា បានប្រើប្រាស់សន្ធិសញ្ញានេះដើម្បីកំណត់ទីតាំង និងហេដ្ឋារចនាសម្ព័ន្ធសំខាន់ៗនៅសហរដ្ឋអាមេរិក និងនៅអឺរ៉ុប ក្នុងបំណងបង្កើតសេនារីយោសម្រាប់ការវាយប្រហារ នៅពេលសង្គ្រាមផ្ទុះឡើង។

ក៏ប៉ុន្តែ អនុរដ្ឋមន្ត្រីការបរទេសរុស្ស៊ី លោក Alexander Grushko បានអះអាងថា សហព័ន្ធរុស្ស៊ីមិនបានរំលោភលើកកិច្ចព្រមព្រៀងខាងលើនេះទេ ហើយថា “គ្មានអ្វីរារាំងការចរចាលើបញ្ហាបច្ចេកទេសនានាដែលភាគីអាមេរិកាំងបានហៅថា ជាសកម្មភាពរំលោភលើសន្ធិសញ្ញានេះនោះដែរ”។

មន្ត្រីការបរទេសមួយរូបនៅអឺរ៉ុបបានឱ្យសារព័ត៌មាន AFP ដឹងថា ឯកអគ្គរដ្ឋទូតទាំងអស់របស់អង្គការសន្ធិសញ្ញាអាត្លង់ទិកខាងជើង NATO (North Atlantic Treaty Organization) នឹងបើកកិច្ចប្រជុំបន្ទាន់មួយនាថ្ងៃទី22ឧសភានេះ បន្ទាប់ពីការប្រកាសរបស់លោក Trump។ កិច្ចប្រជុំនេះនឹងត្រូវធ្វើឡើងក្នុងទីក្រុង Brussels ប្រទេសបែលហ្សិក ដើម្បីវាយតម្លៃអំពីផលវិបាកដែលអាចកើតឡើងដោយសារការចាកចេញពី “សន្ធិសញ្ញាបើកចំហជើងមេឃ” របស់សហរដ្ឋអាមេរិក៕

ប្រភព៖ សារព័ត៌មានបរទេស

May 22, 2020

មនុស្សជិត334,000នាក់បានស្លាប់ដោយសារ COVID-19 នៅទូទាំងពិភពលោក

ចំនួនអ្នកស្លាប់បានកើនដល់ជិត334,000នាក់ ក្នុងចំណោមអ្នកជំងឺ COVID-19 ជិត5.2លាននាក់នៅទូទាំងសកលលោក។

យោងតាមស្ថិតិរបស់ Worldometer ប្រទេសនិងដែនដីចំនួន213ក្នុងពិភពលោក ត្រូវបានរាយការណ៍ថា បានរកឃើញអ្នកផ្ទុកវីរុសកូរ៉ូណាសរុប 5,187,046នាក់ និងអ្នកស្លាប់333,987នាក់ ក្នុងនោះមានអ្នកជំងឺថ្មី111,043នាក់ និងអ្នកស្លាប់ថ្មី4,875នាក់ដែលត្រូវបានរកឃើញក្នុងរយៈពេល24ម៉ោងចុងក្រោយនេះ។

ទ្វីបដែលមានអ្នកជំងឺ COVID-19 ច្រើនជាងគេគឺទ្វីបអាមេរិក ដោយមានអ្នកជំងឺសរុប2,342,459នាក់ ក្នុងនោះអាមេរិកខាងជើងមាន1,794,669នាក់ អាមេរិកខាងត្បូងមាន547,790នាក់ ខណៈដែលអឺរ៉ុបមាន1,848,322នាក់ អាស៊ីមាន887,218នាក់ និងអាហ្វ្រិកមាន101,683នាក់។

ប្រទេសចំនួន3ដែលមានអ្នកជំងឺ COVID-19 ច្រើនជាង300,000នាក់ រួមមានសហរដ្ឋអាមេរិក រុស្ស៊ី និងប្រេស៊ីល។ ចំណែកប្រទេសដែលមានអ្នកស្លាប់ដោយសារវីរុសកូរ៉ូណាច្រើនជាង30,000នាក់ ក៏មានចំនួន3ប្រទេស គឺសហរដ្ឋអាមេរិក អង់គ្លេស និងអ៊ីតាលី។

នៅអាស៊ីអាគ្នេយ៍ ប្រទេសសិង្ហបុរី គឺជាសម្បុកមេរោគCOVID-19 ធំជាងគេបង្អស់ ដោយមានអ្នកជំងឺសរុប 29.812 នាក់ និងអ្នកស្លាប់23នាក់៕

ប្រភព៖ សារព័ត៌មានបរទេស

May 22, 2020

អង់គ្លេសមានអ្នកស្លាប់ច្រើនជាងគេលំដាប់ទី2ក្នុងលោក តែពលរដ្ឋរាប់ម៉ឺននាក់នៅតែចេញទៅលេងសមុទ្រ

ប្រជាជនអង់គ្លេសរាប់ម៉ឺននាក់បាននាំគ្នាទៅកាន់ឆ្នេរសមុទ្រនានារបស់ប្រទេសនេះ ដោយលែងខ្វល់អំពី COVID-19 ដែលកំពុងមានភាពស្មុគស្មាញនៅឡើយ ព្រោះតែអាកាសធាតុក្ដៅខ្លាំងពេក។

យោងតាមសារព័ត៌មាន Dailymail សីតុណ្ហភាពនៅភូមិ Santon Downham សង្គាត់ Suffolk ប្រទេសអង់គ្លេសកាលពីម្សិលម៉្ងៃ(20ឧសភា) បានឡើងដល់28អង្សាសេ ដែលជាថ្ងៃក្ដៅបំផុតគិតចាប់ពីដើមឆ្នាំមកនេះ។ ចំណែកសីតុណ្ហភាពនៅតំបន់ផ្សេងៗក្នុងប្រទេសនេះក៏ចាប់ផ្ដើមឡើងកម្ដៅ ហើយវាអាចនឹងបន្តកើនឡើងក្នុងប៉ុន្មានថ្ងៃខាងមុខ។

សកម្មភាពមនុស្សរាប់ម៉ឺននាក់ទៅលម្ហែកាយនៅតាមឆ្នេរសមុទ្រនៅអង់គ្លេសបែបនេះ ធ្វើឱ្យមានការព្រួយបារម្ភជាខ្លាំងចំពោះហានិភ័័យនៃការឆ្លងវីរុសCOVID-19។

ក្នុងពេលដែលសណ្ឋាគារ និងកន្លែងសម្រាប់បោះតង់មិនទាន់បើកដំណើរការដោយសារ COVID-19 ដូច្នេះអ្នកទៅលេងសមុទ្រក៏នាំគ្នាបោះតង់នៅលើឆ្នេរខ្សាច់ និងកន្លែងសាធារណៈដើម្បីសម្រាកឆ្លងរាត្រី។

“តង់ និងរថយន្តសម្រាប់បោះជំរំជាច្រើនបានបង្ហាញខ្លួន។ កន្លែងដែលធ្លាប់ទំនេរ ពេលនេះវាពេញទៅដោយតង់” នេះបើតាមអ្នកស្រុកនៅក្បែរតំបន់ឆ្នេរសមុទ្រ។

ចាប់ពីដើមខែ បម្រាមគោចរនៅអង់គ្លេសត្រូវបានបន្ធូរបន្ថយជាបណ្ដើរៗ ហើយពលរដ្ឋត្រូវបានអនុញ្ញាតឱ្យធ្វើដំណើរទៅឆ្នេរសមុទ្រ និងតំបន់ទេសចរណ៍ដើម្បីសម្រាកលម្ហែកាយ។

ក្រុមមន្ត្រីនៅមូលដ្ឋានមួយចំនួនបានព្រមានដល់អ្នកទេសចរណ៍ថា “គួរពិចារណាឱ្យបានវែងឆ្ងាយ” មុននឹងសម្រេចចិត្តធ្វើដំណើរទៅលេងឆ្នេរសមុទ្រ ព្រោះថា COVID-19 អាចមាននៅគ្រប់ទីកន្លែង។

គិតមកដល់បច្ចុប្បន្ន ប្រទេសអង់គ្លេសបានរកឃើញអ្នកជំងឺ COVID-19 ចំនួន250,908នាក់ និង36,042នាក់បានបាត់បង់ជីវិត។ អង់គ្លេស បច្ចុប្បន្នគឺជាសម្បុកមេរោគកូរ៉ូណាធំជាងគេលំដាប់ទី5ក្នុងពិភពលោក បន្ទាប់ពីសហរដ្ឋអាមេរិក រុស្ស៊ី ប្រេស៊ីល និងអេស្ប៉ាញ។ ប៉ុន្តែ អង់គ្លេសគឺជាប្រទេសដែលមានអ្នកស្លាប់ដោយសារវីរុសCOVID-19 ច្រើនជាងគេលំដាប់ទី2ក្នុងពិភពលោក បន្ទាប់ពីសហរដ្ឋអាមេរិក៕

ប្រភព៖ សារព័ត៌មានបរទេស

May 22, 2020

ជប៉ុនបាញ់បង្ហោះយានអវកាសដឹកទំនិញទៅកាន់ស្ថានីយអវកាសអន្តរជាតិ ISS (វីដេអូ)

យានអវកាសដឹកទំនិញ HTV ចុងក្រោយរបស់ប្រទេសជប៉ុន កាលពីម្សិលមិញ(20ឧសភា) ត្រូវបានបាញ់បង្ហោះទៅកាន់ស្ថានីយអវកាសអន្តរជាតិ(ISS) ដែលតាមគម្រោង យាននេះនឹងទៅដល់គោលដៅនៅដើមសប្ដាហ៍ក្រោយ។

យានអវកាសមានឈ្មោះថា HTV-9 ដែលត្រូវបានបំពាក់នៅផ្នែកខាងមុខនៃកាំជ្រួច H-IIB ត្រូវបានបាញ់បង្ហោះចេញពីមជ្ឈមណ្ឌលអវកាស Tanegashima របស់ប្រទេសជប៉ុនកាលពីវេលាម៉ោង2និង31នាទីព្រឹក(ម៉ោងក្នុងស្រុក)។ នេះគឺជាការហោះហើរលើកចុងក្រោយបង្អស់របស់យានអវកាសដឹកទំនិញ HTV ក៏ដូចជារ៉ុកកែត H-IIB របស់ទីភ្នាក់ងារអវកាសជប៉ុន(JAXA)។

អ្នកនាំពាក្យរបស់ NASA លោក Rob Navias បានឱ្យដឹងថា “ការបាញ់បង្ហោះនេះ បានប្រព្រឹត្តទៅដោយរលូន ហើយយាននេះកំពុងឆ្ពៅទៅកាន់គោលដៅតាមផែនការដែលបានកំណត់”។

ក្នុងបេសកកម្មចុងក្រោយនេះ HTV-9 ដឹកទំនិញទម្ងន់3,600គីឡូក្រាម រួមមានសម្ភារសម្រាប់អវកាសយានិក ឧបករណ៍វិទ្យាសាស្ត្រ និងថ្ម lithium-ion ចំនួន6ដុំ។

ក្នុងចំណោមឧបករណ៍ខាងលើ ក៏មានកែវពង្រីក Confocal ថ្មី សម្រាប់ធ្វើការសិក្សាស្រាវជ្រាវទៅលើគំរូ ឬសំណាកជីវសាស្ត្រនៅក្នុងអវកាស និងកែវយឹតអវកាសភ្នែកពីរ iSIM សម្រាប់សង្កេតមើលផែនដីផងដែរ។

HTV គឺជាយានអវកាសដឹកទំនិញដែលប្រើប្រាស់តែម្ដង និងអាចដឹកទំនិញទម្ងន់5.4តោនឯណោះ។ យាននេះមានប្រវែងប្រហែល10ម៉ែត្រ និងទទឹង4.4ម៉ែត្រ។

ក្នុងការហោះហើរលើកទី9នេះ HTV-9 នឹងពិសោធប្រព័ន្ធទំនាក់ទំនងអត់ខ្សែមួយប្រភេទ ដែលជាបច្ចេកវិទ្យាមួយនឹងជួយឱ្យ JAXA របស់ជប៉ុនអាចផលិតយានអវកាសជំនាន់ថ្មីដែលមានមុខងារចូលចតដោយស្វ័យប្រវត្ត ដែលវាមានឈ្មោះថា HTV-X។ ប្រទេសនេះក៏កំពុងអភិវឌ្ឍកាំជ្រួចរុញច្រាន H-III ផងដែរ ដើម្បីជំនួសឱ្យ H-IIB។ តាមគម្រោង យានអវកាស និងរ៉ុកកែតថ្មីរបស់ជប៉ុន នឹងធ្វើការហោះហើរជាលើកដំបូងនៅឆ្នាំ2022ខាងមុខ៕

ប្រភព៖ សារព័ត៌មានបរទេស

May 21, 2020

Facebook “បើកផ្សារអេឡិកត្រូនិក” ៖ Amazon និង eBay ព្រួយបារម្ភ ខណៈអ្នកខ្លះថាជា “កាំបិតមុខពីរ”

យុទ្ធសាស្ត្រ “មុខទល់នឹងមុខ” ជាមួយនឹងក្រុមហ៊ុនធំៗក្នុងវិស័យពាណិជ្ជកម្មអេឡិកត្រូនិកដូចជា Amazon និង eBay ជាដើម នឹងអាចនាំមកនូវផលប្រយោជន៍ជាទីគាប់ចិត្តដល់ Facebook ក៏ប៉ុន្តែ វាក៏កង្កប់ទៅដោយហានិភ័យច្រើនសម្រាប់បណ្ដាញសង្គមខ្នាត “យក្ស” មួយនេះដែរ។

អត្ថបទទាក់ទង>Facebook នឹងបង្កើតផ្សារអនឡាញ ទាំងនៅលើ Facebook ទាំងនៅលើ Instagram

កាលពីថ្ងៃទី19ឧសភាកន្លងទៅ បណ្ដាញសង្គមធំជាងគេបង្អស់ក្នុងពិភពលោកបានឧទ្ទេសនាមមុខងារថ្មីមួយ ឱ្យឈ្មោះថា Facebook Shops ដែលអនុញ្ញាតឱ្យអ្នកជំនួញទាំងឡាយបង្កើត “តូបស្រមោល” ដើម្បីដាក់លក់ផលិតផលរបស់ខ្លួននៅលើ Facebook ផង និងនៅលើ Instagram ផង។

CEO របស់ Facebook បានឱ្យដឹងថា Facebook Shops នឹងកែលម្អបទពិសោធន៍ជំនួញដែលធ្វើឡើងតាមរយៈគេហទំព័រនៃផ្សារអនឡាញបច្ចុប្បន្ន ដោយការរក្សាទិន្នន័យពាក់ព័ន្ធនឹងការទូទាត់ដែលត្រូវបានបញ្ជាក់ដោយអ្នកប្រើប្រាស់នៅកន្លែងតែមួយគត់ ហើយក្រោយមក ពួកគេអាចប្រើប្រាស់ទិន្នន័យរបស់ខ្លួននៅគ្រប់ផ្សារអនឡាញ ឱ្យតែផ្សារទាំងនោះស្ថិតនៅក្នុងបណ្ដាញសង្គម Facebook ឬ Instagram។

នេះគឺយុទ្ធសាស្ត្រមួយដែលជួយឱ្យ Facebook ក្លាយជាគូប្រជែងដ៏ធំ និងផ្ទាល់របស់បណ្ដាផ្សារអនឡាញវ័យចំណាស់ ដូចជាផ្សារ Amazon ផ្សារ eBay ឬផ្សារ Etsy ជាដើម។ល។ ការដែលក្រុមហ៊ុន “យក្ស” ដូចជា Facebook ប្ដេជ្ញាដណ្ដើមចំណេកទីផ្សារក្នុងវិស័យពាណិជ្ជកម្មអេឡិកត្រូនិកបែបនេះ ប្រាកដណាស់ថា វានឹងធ្វើឱ្យ Amazon និង eBay ជាដើម ត្រូវ “ដេកមិនលក់ បក់មិនល្ហើយ” មិនខាន។

ក៏ប៉ុន្តែ បើទោះជាយុទ្ធសាស្ត្រនេះរបស់ Facebook ត្រូវបានគេមើលឃើញថា “ដើរទាន់សភាពការណ៍” យ៉ាងណាក៏ដោយ Business Insider បានវាយតម្លៃថា Facebook កំពុងតែប្រថុយប្រថាន ហើយថានឹងអាចប្រឈមនឹងហានិភ័យច្រើនផងដែរ។ មូលហេតុដែលត្រូវបាន Business Insider លើកឡើង នោះគឺថា បណ្ដាញសង្គមដែលមានតម្លៃ607ពាន់លានដុល្លារនេះ ធ្លាប់ជួបរឿងអាស្រូវជាច្រើនដែលជាប់ទាក់ទិននឹងព័ត៌មានផ្ទាល់ខ្លួនរបស់អ្នកប្រើប្រាស់ និងព័ត៌មានក្លែងក្លាយ។ ទន្ទឹមនឹងនេះ នៅលើបណ្ដាញសង្គម Facebook ក៏នៅមានទិន្នន័យដែលមានខ្លឹមសារអាក្រក់ជាច្រើន រួមនឹង ទំនិញហាមឃាត់ និងខ្លឹមសារខុសច្បាប់ផ្សេងទៀតដែលមិនទាន់មានការត្រួតពិនិត្យឱ្យបានត្រឹមត្រូវ និងពេញលេញនៅឡើយ។

បើសិនជា Facebook សម្រេចចិត្តពង្រីកទំហំពាណិជ្ជកម្មអេឡិកត្រូនិក ប៉ុន្តែមិនអាចគ្រប់គ្រងខ្លឹមសារអាក្រក់ ទំនិញហាមឃាត់ ឬខ្លឹមសារខុសច្បាប់ជាដើម វាប្រៀបដូចជា “កាំបិតមុខពីរ” ដែលអាចនាំឱ្យក្រុមហ៊ុននេះ ត្រូវប្រឈមនឹងបញ្ហាអាស្រូវថ្មីៗបំផុតនាពេលខាងមុខ៕

ប្រភព៖ សារព័ត៌មានបរទេស

May 21, 2020

Author: សឿន សំណាង