សឿន សំណាង - La Reine Media

ជិត352,000នាក់ស្លាប់ដោយសារ COVID-19 នៅទូទាំងពិភពលោក

ពិភពលោកមានអ្នកស្លាប់ជិត352,000នាក់ក្នុងចំណោមអ្នកជំងឺ COVID-19 ជិត5.7លាននាក់ ដោយមានសម្បុកមេរោគធំថ្មីនៅអាមេរិកខាងត្បូង នោះគឺប្រទេសប្រេស៊ីល។

ប្រទេសនិងដែនដីចំនួន213ក្នុងពិភពលោក ត្រូវបានរាយការរណ៍ថា រកឃើញអ្នកផ្ទុកវីរុសCOVID-19 ចំនួន5,676,850នាក់ និងអ្នកដែលបានបាត់បង់ជីវិតមានចំនួន351,599នាក់។ អ្នកជំងឺCOVID-19 កើន95,560នាក់ និងអ្នកស្លាប់កើន4,069នាក់ បើធៀបនឹងតួលេខកាលពីម្សិលមិញ។ ចំណែកអ្នកដែលបានជាសះស្បើយ មានចំនួនជាង2,426,000នាក់។

ទ្វីបអឺរ៉ុបមានអ្នកជំងឺCOVID-19 សរុប1,934,081នាក់ តំបន់អាមេរិកខាងជើងមាន1,926,612នាក់ ទ្វីបអាស៊ីមាន1,002,918នាក់ តំបន់អាមេរិកខាងត្បូងមាន683,742នាក់ និងទ្វីបអាហ្វ្រិកមាន121,547នាក់។

គិតមកដល់បច្ចុប្បន្ន មាន12ប្រទេសហើយដែលមានអ្នកជំងឺCOVID-19 ច្រើនជាង100,000នាក់ រួមមានសហរដ្ឋអាមេរិក ប្រេស៊ីល រុស្ស៊ី អេស្ប៉ាញ អង់គ្លេស អ៊ីតាលី បារាំង អាល្លឺម៉ង់ ទួរគី ឥណ្ឌា អ៊ីរ៉ង់ និងប្រទេសប៉េរូ។

ចំណែកប្រទេសដែលមានអ្នកស្លាប់ដោយសារវីរុសCOVID-19 លើសពី20,000នាក់ មានចំនួន6ប្រទេស រួមមាន សហរដ្ឋអាមេរិក អង់គ្លេស អ៊ីតាលី បារាំង អេស្ប៉ាញ និងប្រទេសប្រេស៊ីល៕

ប្រភព៖ សារព័ត៌មានបរទេស

May 27, 2020

“មេស្ដេចល្បែងនៅម៉ាកៅ” ទទួលមរណភាពហើយ

Stanley Ho Hung-sun ដែលជាមេដឹកនាំរបស់ SJM Holdings ដែលជាក្រុមហ៊ុនល្បែង (កាស៊ីណូ/Casino) ធំជាងគេបង្អស់នៅអាស៊ី ក្នុងរយៈពេលជាងកន្លះសតវត្សរ៍ បានទទួលមរណភាពក្នុងវ័យ98ឆ្នាំ។

CCTV ថ្ងៃនេះ (26ឧសភា) បានចេញផ្សាយថា មេល្បែង Stanley Ho បានស្លាប់នៅក្នុងវ័យ98ឆ្នាំ។ លោកគឺជាអ្នកដែលបានដឹកនាំក្រុមហ៊ុនកាស៊ីណូ SJM Holdings នៅម៉ាកៅ ឱ្យក្លាយជាក្រុមហ៊ុនមួយក្នុងចំណោមក្រុមហ៊ុនកាស៊ីណូធំជាងគេក្នុងពិភពលោក។ កេរ្ដិ៍ឈ្មោះរបស់លោកក៏បានផ្សារភ្ជាប់ជាមួយនឹងការរីកចម្រើនរបស់ទីក្រុងម៉ាកៅ ក្នុងដំណើរលោតរំលង Las Vegas ដើម្បីក្លាយជាអាណាចក្រល្បែងទូទាំងពិភពលោក។

លោក Stanley Ho មានស្រុកកំណើតនៅហុងកុង ក្នុងគ្រួសារអ្នកមានមួយ។ លោកធ្លាប់ជាមហាសេដ្ឋីម្នាក់នៅអាស៊ីក្នុងរយៈពេលរាប់ទសវត្សរ៍។ ទ្រព្យរបស់លោក ត្រូវបានគេប៉ាន់ប្រមាណឃើញថា ប្រហែល50ពាន់លានដុល្លារហុងកុង (6.4ពាន់លានដុល្លារអាមេរិក) ក្នុងឆ្នាំ2018។

លោក Allan Zeman អគ្គនាយកប្រតិបត្តិរបស់ក្រុមហ៊ុន Wynn Macau ដែលជាគូប្រជែងមួយរបស់លោក Stanley Ho បានឱ្យដឹងថា “នេះគឺជាការបញ្ចប់នៃយុគសម័យមួយ។ គាត់គឺជាផ្នែកដ៏សំខាន់មួយរបស់ហុងកុង។

លោក Stanley Ho មានភរិយាចំនួន4នាក់ និងមានកូនចំនួន17នាក់។ លោកធ្លាប់បង្កើតរចនាសម្ព័ន្ធក្រុមហ៊ុនល្បែង SJM Holdings ឡើងវិញ បន្ទាប់ពីសង្គ្រាមផ្លូវច្បាប់ទាក់ទិននឹងទ្រព្យសម្បត្តិក្នុងគ្រួសារកាលពីឆ្នាំ2012។

ដោយសារតែ Stanley Ho បានចូលនិវត្តន៍តាំងពី2ឆ្នាំមុន ដូច្នេះក្រុមអ្នកវិភាគយល់ថា មរណភាពរបស់គាត់នឹងមិនប៉ះពាល់ដល់សកម្មភាពប្រចាំថ្ងៃរបស់ក្រុមហ៊ុនកាស៊ីណា SJM Holdings នេះទេ។ SJM Holdings ត្រូវបានគេកំណត់តម្លៃប្រមាណជា 6ពាន់លានដុល្លារអាមេរិក៕

ប្រភព៖ សារព័ត៌មានបរទេស

May 26, 2020

ចិន “ត្រៀមខ្លួនសម្រាប់សេនារីយោអាក្រក់បំផុត” ដែលប្រទេសជាតិអាចជួបប្រទះនាពេលខាងមុខ

រដ្ឋាភិបាលចិនដែលកំពុងរៀបចំយុទ្ធសាស្ត្រដើម្បីផ្លាស់ប្ដូរការផ្ដោតលើការនាំចេញទៅកាន់ទីផ្សារបរទេស ហើយងាកមកផ្ដោតលើទីផ្សារក្នុងស្រុកជាចម្បង បានបង្ហាញថា លោកស៊ី ជីនភីងកំពុងត្រៀមខ្លួនសម្រាប់ទប់ទល់នឹងសេនារីយោអាក្រក់បំផុតនាពេលអនាគត។ នេះបើតាមការយល់ឃើញរបស់សេដ្ឋវិទូនានា។

នៅចំពោះមុខទីប្រឹក្សាកំពូលៗរាប់សិបនាក់នាទីក្រុងប៉េកាំងកាលពីថ្ងៃទី23ឧសភាកន្លងទៅ ប្រធានាធិបតីចិន លោកស៊ី ជីនភីង មានប្រសាសន៍ថា ប្រទេសចិនកំពុងតែតាមចាប់គម្រោងអភិវឌ្ឍន៍ថ្មី ក្នុងនោះ “ចរាចរណ៍(ទីផ្សារ) ក្នុងស្រុក នឹងដើរតួនាទីសំខាន់បំផុត”។

លោក ស៊ី ជីនភីង បន្តថា “អនាគត យើងត្រូវតែចាត់ទុកតម្រូវការនៃទីផ្សារក្នុងស្រុកជាចំណុចចាប់ផ្ដើម និងជាគ្រឹះដ៏រឹងមាំនៅពេលយើងពន្លឿនការកសាងប្រព័ន្ធតម្រូវការក្នុងស្រុក និងជំរុញយ៉ាងខ្លាំងក្លាទៅលើការអភិវឌ្ឍក្នុងវិស័យវិទ្យាសាស្ត្រ បច្ចេកវិទ្យា និងវិស័យផ្សេងៗទៀត”។

សុន្ទរកថារបស់លោកស៊ី ជីនភីង បានបង្ហាញថា ទីក្រុងប៉េកាំងកំពុងតែបោះបង់យុទ្ធសាស្ត្រ “វាយលុកទីផ្សារបរទេស” ដែលត្រូវបានអនុវត្តក្នុងអំឡុងទសវត្សរ៍ឆ្នាំ1990 ដែលធ្លាប់បានជួយលើកស្ទួយកំណើនសេដ្ឋកិច្ច និងនាំឱ្យចិនក្លាយជាខឿនសេដ្ឋកិច្ចធំទី2ក្នុងពិភពលោកអំឡុងប៉ុន្មានឆ្នាំចុងក្រោយនេះ។

“នោះគឺជាការត្រៀមសម្រាប់សេនារីយោអាក្រក់បំផុត ដែលរួមទាំងការផ្ដាច់ទំនាក់ទំនងជាមួយអាមេរិកាំង ឬជាមួយពិភពអឺរ៉ុបទាំងមូល” នេះបើតាម Hu Xingdou ដែលជាអ្នកឯកទេសផ្នែកសេដ្ឋកិច្ចឯករាជ្យមកពីវិទ្យាស្ថានបច្ចេកវិទ្យាប៉េកាំង។

លោក Hu ថ្លែងថា ប្រទេសចិនមិនមានជម្រើសណាក្រៅពីការប្រឈមមុខនឹងទុក្ខលំបាកនោះទេ ប៉ុន្តែ លោក Hu បានព្រមានថា ប្រទេសចិនមិនអាចបំផ្លាញកំណែទម្រង់ទីផ្សារ ឬវិលត្រឡប់ទៅកាន់ធាតុដើមដែលប្រកបដោយការបិទបាំងផ្នែកទីផ្សារ ដែលគ្រប់គ្រងទាំងស្រុងដោយរដ្ឋអំណាចនោះដែរ។ លោក Hu យល់ថា ប្រទេសចិនគួរតែប្រឹងប្រែងបញ្ចុះបញ្ចូលផ្នែកដែលនៅសល់របស់ពិភពលោក ដោយបញ្ជាក់ថា ប្រទេសចិននឹងមិនមានគម្រោងកសាងរូបមន្តសេដ្ឋកិច្ចផ្ទុយពីប្រព័ន្ធទីផ្សារសេរីដូចបច្ចុប្បន្ននោះឡើយ។

លោក ស៊ី ជីនភីង មានប្រសាសន៍ថា ចិននឹងមិនវិលត្រឡប់ទៅរកទីផ្សារផែនការដែលគ្រប់គ្រងទាំងស្រុងដោយរដ្ឋាភិបាលនោះទេ

យោងតាមយុទ្ធសាស្ត្រកំណត់ទិសដៅក្នុងការនាំចេញកន្លងមក គោលនយោបាយរបស់រដ្ឋាភិបាលចិនត្រូវបានបកប្រែតាមភាសាចិនថា “ចូលធំ ចេញធំ” ដោយប្រទេសចិនកំណត់គោលដៅទីផ្សារទូទាំងពិភពលោក និងអនុវត្តផែនការរបស់ខ្លួន ដោយការនាំចូលគ្រឿងបន្លាស់ ហើយក្រោយមកដំឡើងជាផលិតផលសម្រេច រួចនាំចេញទៅកាន់ទីផ្សារវិញ។

យន្តការ ឬយុទ្ធសាស្ត្រខាងលើនេះ បានបង្ហាញប្រសិទ្ធភាពបន្ទាប់ពីប្រទេសចិនបានក្លាយជាសមាជិកនៃអង្គការពាណិជ្ជកម្មពិភពលោក(WTO)កាលពីឆ្នាំ2001 ហើយវាក៏បានជួយប្រទេសនេះក្លាយជា “រោងចក្រ” របស់ពិភពលោក។ ប៉ុន្តែ រូបមន្តនេះ កាន់តែបាត់បង់ឥទ្ធិពលក្នុងមួយរយៈពេលចុងក្រោយនេះ នៅពេលចិនត្រូវប្រកួតប្រជែងយ៉ាងខ្លាំងក្លាពីបណ្ដាប្រទេស រួមនឹងសង្គ្រាមពាណិជ្ជកម្មជាមួយអាមេរិកាំង។ល។ ទាំងនេះ កំពុងជំរុញឱ្យប្រទេសចិនមានគោលបំណងពង្រីក និងពង្រឹងភាពម្ចាស់ការនាពេលខាងមុខ។

លោក ស៊ី ជីនភីង បានថ្លែងថា “ពេលនេះ យើងត្រូវជំរុញឱ្យមានការរីកចម្រើននៅក្នុងពិភពមួយដែលពោរពេញដោយអស្ថិរភាព និងប្ដូរផ្លាស់ជាប្រចាំ”។

លោក ស៊ី ក៏បានអំពាវនាវឱ្យប្រទេសចិនខ្លួនឯង មានម្ចាស់ការជាងនេះ ទៅលើបច្ចេកវិទ្យា និងទីផ្សារ ពិសេសលោកបានលើកឡើងអំពីវិស័យសេដ្ឋកិច្ចពាក់ព័ន្ធនឹងបច្ចេកវិទ្យាឌីជីថល ផលិតកម្មឆ្លាតវៃ វិទ្យាសាស្ត្រសុខាភិបាល និងវត្ថុធាតុថ្មី ជាបណ្ដាវិស័យដែលប្រទេសចិនត្រូវការលើកស្ទួយជាអាទិភាព។ លោក ស៊ី ជីនភីង ថា ប្រទេសចិននឹងឈរនៅខាង “ភាពត្រឹមត្រូវរបស់ប្រវត្តិសាស្ត្រ” ដើម្បីបញ្ជាក់អំពីលទ្ធិពហុភាគីនិយម និងមិនបិទទ្វារបង្ខាំងខ្លួនពីពិភពលោកខាងក្រៅ។ ជំនួសមកវិញ ប្រទេសចិននឹងនៅតែបន្តជំរុញការអភិវឌ្ឍរបស់ពិភពលោកទៅតាមរូបមន្ត “បើកទូលាយជើងមេឃ”។

Raymond Yeung សេដ្ឋវិទូចិនមកពីធនាគារ ANZ បានឱ្យដឹងថា ការប្ដូរផ្លាស់យុទ្ធសាស្ត្ររបស់ចិន កើតចេញពីការព្រួយបារម្ភចំពោះការធ្លាក់ចុះនៃតម្រូវការរបស់ទីផ្សារខាងក្រៅប្រទេសដែលនឹងមិនអាចងើបឡើងវិញបានក្នុងរយៈពេលពី2 ឬ3ឆ្នាំខាងមុខ។

លោក Raymond Yeung ថ្លែងថា “នេះគឺជាទិសដៅនៃការប្ដូរផ្លាស់សេដ្ឋកិច្ច។ សំណួរសួរថា តើពួកគេនឹងត្រូវធ្វើបែបណា?”៕

ប្រភព៖ សារព័ត៌មានបរទេស

May 26, 2020

ដំណឹងល្អមួយទៀតហើយ!! នៅចិន មានវ៉ាក់សាំងថ្មីមួយ កំពុងសាកល្បងលើមនុស្ស ដំណាក់កាលទី2

របាយការណ៍នៅក្នុងព្រឹត្តិបត្រខាងវេជ្ជសាស្ត្រ Lancet កាលពីថ្ងៃទី24 ឧសភា បានបញ្ជាក់ឱ្យដឹងថា វ៉ាក់សាំងបែប MRNA ដើម្បីការពារជំងឺកូវីដ-19 របស់ក្រុមហ៊ុន ឃែនស៊ីណូ បៃអូឡូជិក អ្នកផលិតឱសថមកពីប្រទេសចិន កំពុងទទួលបានជោគជ័យក្នុងសាកល្បងលើមនុស្សដំណាក់កាលដំបូង និងកំពុងត្រៀមការសាកល្បងលើមនុស្សក្នុងដំណាក់កាលទី2 នាពេលនេះ។ អាចរាប់បានថា ជារូបមន្តមួយ ក្នុងចំណោមរូបមន្តវ៉ាក់សាំងមិនច្រើនប៉ុន្មានឡើយ ដែលបានឆ្លងចូលដល់ដំណាក់កាលទី2 នាពេលនេះ ដែលរួមមានទាំងវ៉ាក់សាំងរបស់ក្រុមហ៊ុន ម៉ូឌើណា, វ៉ាក់សាំងរបស់មហាវិទ្យាល័យអុកស្វ៊ើដ, និងវ៉ាក់សាំងរបស់ក្រុមហ៊ុន ស៊ិណូវែក ផងដែរ។

វ៉ាក់សាំងមួយនេះ មានឈ្មោះហៅថា “អេឌី5-អិនខូហ្វ”(Ad5-nCoV) ទទួលបានជោគជ័យក្នុងការសាកល្បងនៅលើមនុស្ស ដើម្បីរកមើលថា តើវានឹងជំរុញឱ្យកើតមានការតបស្នងរបស់ប្រព័ន្ធប្រឆាំងមេរោគបង្កជំងឺកូវីដ-19 បានឬទេ? ដោយវាស់ពីបរិមាណរបស់ ធី-សេលល៍ (សេលល៍គ្រាប់ឈាមស 1ប្រភេទ) និងបរិមាណរបស់អង់ទីគ័រនៅក្នុងរាងកាយរបស់ក្រុមអ្នកស្ម័គ្រចិត្តសាកល្បង។

លោក វើយ ឈឹន អ្នកជំនាញការពីស្ថាប័នតិចណូឡូជីជីវសាស្ត្រទីក្រុងប៉េកាំង បានបញ្ជាក់ថា វ៉ាក់សាំងនេះ 1ដូស អាចសាងអង់ទីគ័របណ្ដុះ និងធីសេលល៍ ដែលត្រូវការឡើងបានក្នុងអំឡុងពេល 14ថ្ងៃ ធ្វើឱ្យមានសក្ដានុពលដល់ការស្រាវជ្រាវស្វែងរកការសាកល្បងជាបន្តទៀត តែក៏នៅមានចំណុចគួរឱ្យបារម្ភ និងបញ្ហាដែលត្រូវកែខៃកើតឡើងឱ្យយើងបានឃើញផងដែរ។

ការចាក់វ៉ាក់សាំងកម្រិត 3ដូស ទៅលើក្រុមអ្នកស្ម័គ្រចិត្ត បានបង្ហាញឱ្យឃើញថា វ៉ាក់សាំងនេះបានបង្កឱ្យកើតមានផលបន្ទាប់បន្សំ ពោលគឺ ភាគច្រើននៃក្រុមអ្នកស្ម័គ្រចិត្តសាកល្បង នឹងកើតអាការគ្រុនក្ដៅ ឈឺក្បាល និងឈឺចុកចាប់តាមរាងកាយ ដំណាលគ្នានោះ ក៏នៅខ្វះភាពទៀងទាត់ក្នុងការបង្កឱ្យកើត ធីសេលល៍ និងអង់ទីគ័រដែលយើងត្រូវការដែរ…នេះគឺជាបញ្ហាធំ ដែលត្រូវកែខៃជាបន្តទៀត ព្រោះវាបានបង្ហាញឱ្យឃើញថា អ្នកទទួលបានវ៉ាក់សាំង អាចមានប្រព័ន្ធប្រឆាំងជំងឺក្នុងពេលវេលាដែលមានកំណត់ រហូតដល់អាចត្រូវបានទទួលការចាក់វ៉ាក់សាំងនេះជាលើកទី2 និងក្នុងពេលជាមួយគ្នា វាក៏បង្ហាញឱ្យឃើញទៀតដែរថា វ៉ាក់សាំងនេះ អាចនឹងទទួលបានលទ្ធផលល្អ ចំពោះតែលើក្រុមមនុស្សក្នុងអាយុណាមួយប៉ុណ្ណោះ៕

ប្រភព៖ សារព័ត៌មានបរទេស

May 26, 2020

ចិនថ្លែងការណ៍ ប្រកាសពីគោលជំហរការងារទំនាក់ទំនងអន្តរជាតិ ក្រោយចប់វិបត្តិកូវីដ-19

កាលពីថ្ងៃអាទិត្យ(ទី24 ឧសភា) លោក វ៉ាង យី មន្ត្រីនៃរដ្ឋ និងជារដ្ឋមន្ត្រីការបរទេសរបស់ចិន បានថ្លែងថា ជំងឺបណ្ដាលមកពីមេរោគវីរុសកូរ៉ូណាប្រភេទថ្មី ឬកូវីដ-19 គឺជាសត្រូវរួមគ្នា របស់ចិន និងសហរដ្ឋអាមេរិក ហើយប្រជាជនរបស់ប្រទេសទាំង2 សុទ្ធតែមានក្ដីសង្ឃឹមរំពឹងដូចគ្នា នោះគឺការគាំទ្រ និងជួយគ្នាទៅវិញទៅមក។

1.ចិន-សហរដ្ឋអាមេរិក គួរចាប់ដៃគ្នាកម្ចាត់សត្រូវរួម “កូវីដ-19”

លោក វ៉ាង បានថ្លែងនៅក្នុងពិធីថ្លែងព័ត៌មានមួយ ដែលរៀបចំឡើងនៅក្រៅកិច្ចប្រជុំសភានិតិបញ្ញត្តិជាតិប្រចាំឆ្នាំ ក្នុងប្រធានបទ សម្ព័ន្ធភាព រវាងចិននឹងសហរដ្ឋអាមេរិកថា ប្រទេសទាំង2 គួរតែប្រតិបត្តិតាមក្ដីសង្ឃឹមរបស់សហគមន៍ពិភពលោក ក្នុងការចូលរួម និងបង្កើនកិច្ចសហការកម្រិតពហុភាគី ក្នុងការតតាំងប្រឆាំងជំងឺកូវីដ-19 និងមានតួនាទីក្នុងន័យវិជ្ជមាន ក្នុងការទប់ទល់នឹងជំងឺរាតត្បាតទូទាំងពិភពលោកមួយនេះ។

លោកថ្លែងថា “ខណៈដែលយើងកំពុងត្រៀមខ្លួនប្រយុទ្ធជាមួយជំងឺកូវីដ-19 ទាំងក្នុងរយៈពេលវែង និងទាំងតាមវិធីប្រក្រតី ប្រទេសទាំង2 គួរតែចាប់ផ្ដើមរួមដៃ និងទំនាក់ទំនងគ្នាលើផ្នែកនយោបាយសេដ្ឋកិច្ចពហុភាគី យ៉ាងលឿនបំផុតតាមដែលអាចធ្វើបាន ដើម្បីសម្រាលផលប៉ះពាល់ដែលបណ្ដាលមកពីជំងឺកូវីដ-19 ដែលប៉ះពាល់ដល់សេដ្ឋកិច្ចរបស់ប្រទេសទាំង2 និងសេដ្ឋកិច្ចពិភពលោកទាំងមូល”

លោក វ៉ាង យី ថ្លែងថា វីរុសនយោបាយ បានព្យាយាមវាយលុក និងទម្លាក់កំហុសមកលើចិន ដោយមិននឹកទៅដល់រឿងពិតជាមូលដ្ឋាននោះ កំពុងតែរីកសាយភាយនៅក្នុងសហរដ្ឋអាមេរិក។

លោករដ្ឋមន្ត្រីក្រសួងការបរទេសរបស់ចិន បានថ្លែងអំពាវនាវឱ្យចិន និងសហរដ្ឋអាមេរិក រៀនយល់ដឹងអំពីគ្នាទៅវិញទៅមក និងចែករំលែកបទពិសោធក្នុងការប្រយុទ្ធប្រឆាំងនឹងវីរុស ដើម្បីជួយតតាំងការឆ្លងរាតត្បាតរបស់ជំងឺដ៏សាហាវនេះនៅក្នុងប្រទេសទាំង2។

2.បញ្ហារបស់លោកាវិវឌ្ឍន៍ ចាំបាច់ត្រូវតែដោះស្រាយដោយលោកាវិវឌ្ឍន៍

លោកាវិវឌ្ឍន៍ពហុភាគី និងធម្មាភិបាលពិភពលោក គួរតែបានទទួលការការពារ និងកែសម្រួលឱ្យស័ក្តិសម ក្នុងពិភពនៃការឆ្លងរាលដាលរបស់កូវីដ-19។

លោក វ៉ាង យី ថ្លែងថា ការអភិវឌ្ឍប្រវត្តិសាស្ត្រមនុស្ស តែងតែប្រឈម និងយកជ័យជម្នះលើវិបត្តិដែលសំខាន់ទាំងឡាយ “ដរាបណាដែលយើងជ្រើសរើសត្រឹមត្រូវ និងធ្វើតាមដំណើរផ្លូវដែលត្រឹមត្រូវ យើងនឹងព្រមទទួលស្គាល់អនាគតដ៏ភ្លឺស្វាង”

“យើងចាំបាច់ត្រូវតែកាត់បន្ថយបញ្ហាការអភិវឌ្ឍក្នុងកម្រិតភូមិភាគ និងភាពមិនស្មើភាពគ្នា ដែលកើតពីលោកាវិវឌ្ឍន៍ តែបញ្ហារបស់លោកាវិវឌ្ឍន៍ វាចាំបាច់ត្រូវកែខៃដោយលោកាវិវឌ្ឍន៍”

3.ចិន និងរុស្ស៊ីជាមួយវីរុសកូរ៉ូណា

ការប្រយុទ្ធប្រឆាំងរួមគ្នារវាងចិន និងរុស្ស៊ី ជាមួយវីរុសកូរ៉ូណាប្រភេទថ្មី នឹងជួយបង្កើនសម្ព័ន្ធភាពទ្វេភាគីយ៉ាងរឹងមាំ។ ចិនស្វាគមន៍ក្នុងការធ្វើ

ការរួមគ្នាជាមួយរុស្ស៊ី ដើម្បីផ្លាស់ប្ដូរវិបត្តិ ទៅជាឱកាសក្នុងការថែរក្សាស្ថិរភាពនៃការសហការផ្នែកថាមពល និងសាខាដែលមានតាំងពីពេលមុនមកផ្សេងៗ និងបង្កើនកិច្ចសហការក្នុងផ្នែកថ្មីៗទៀត ដូចជា អ៊ីខំមើក និងឱសថ ដើម្បីសាងយន្តការថ្មីនៃការរីកធំធាត់ខាងសេដ្ឋកិច្ច ក្រោយពីការឆ្លងរាតត្បាតដ៏ធំរបស់កូវីដ-19។

4.ការជួយគ្នាកម្រិតពិភពលោក មិនបានបង្កប់របៀបវារៈនយោបាយអ្វីទាំងអស់

លោក វ៉ាង ថ្លែងថា “ប្រទេសចិន បានផ្ដល់ការជួយសង្គ្រោះទៅដល់ប្រទេសផ្សេងៗ ដើម្បីប្រយុទ្ធនឹងមេរោគកូវីដ-19 ដោយការតាំងចិត្តតែម្យ៉ាងគត់ គឺព្យាយាមជួយជីវិតមនុស្សលោកឱ្យបានច្រើនបំផុត”

ប្រទេសចិនបានផ្ដល់ជំនួយសង្គ្រោះទៅដល់ប្រទេសជាង150 និងអង្គការអន្តរជាតិ 4ស្ថាប័ន រៀបចំការប្រជុំតាមវីដេអូ ដើម្បីចែករំលែកបទពិសោធការព្យាបាល និងគ្រប់គ្រងជំងឺជាមួយជាង 170ប្រទេស និងបានបញ្ជូនក្រុមគ្រូពេទ្យជំនាញការទៅ 24ប្រទេសទៀតផង។

“ចិន មិនដែលស្វែងរកផលប្រយោជន៍ខាងសេដ្ឋកិច្ច ឬខាងនយោបាយអ្វីទាំងអស់ និងមិនបានបង្កប់របៀបរាវៈនយោបាយអ្វី នៅក្នុងការជួយសង្គ្រោះទាំងនោះឡើយ”

5.ចិន និងសហភាពអឺរ៉ុប មិនមែនជាគូប្រជែងក្នុងន័យឧត្ដមគតិទេ

លោក វ៉ាង យី បានថ្លែងអំពីសម្ព័ន្ធភាពរវាងចិន ជាមួយសហភាពអឺរ៉ុបថា ចិន និងសហភាពអឺរ៉ុបមិនមែនជាគូប្រជែងក្នុងន័យឧត្ដមគតិទេ តែជាសម្ព័ន្ធមិត្តក្នុងន័យយុទ្ធសាស្ត្រ ដែលមានចំណាប់អារម្មណ៍ និងក្ដីព្យាយាមរួមគ្នាជាច្រើន។

“មេរៀនដែលសំខាន់បំផុតពីសម្ព័ន្ធភាពគឺ ទាំង 2ខាង អាចសាងជំនឿទុកចិត្តគ្នាទៅវិញទៅមក តាមរយៈការសន្ទនាដែលយុត្តិធម៌ និងចាត់ការភាពខុសប្លែកគ្នា តាមរយៈការចែករំលែកដែលរីកចម្រើន”

លោករដ្ឋមន្ត្រីការបរទេសចិន បានបន្ថែមទៀតថា “ចិន និងសហភាពអឺរ៉ុប គ្មានទំនាស់ខាងផលប្រយោជន៍ជាមូលដ្ឋានឡើយ បដិសម្ព័ន្ធរវាងចិននឹងសភាពអឺរ៉ុប ជាចរន្តវិជ្ជមាន ដែលជាប្រយោជន៍រួមគ្នា មិនមែនជាការប្រកួតប្រជែងដែលមានខាងណាម្នាក់ចាញ់ និងខាងណាម្នាក់ឈ្នះនោះទេ”៕

ប្រភព៖ សារព័ត៌មានបរទេស

ប្រែសម្រួលដោយ តាវ៉ែនតា

May 26, 2020

WHO ផ្អាកការសាកល្បងប្រើថ្នាំអួតអាងប្រឆាំងកូវីដ-19 របស់ត្រាំ ក្រោយពីលទ្ធផលស្រាវជ្រាវ រកឃើញមានហានិភ័យដល់ស្លាប់!!

អង្គការសុខភាពពិភពលោក ឬ WHO បានផ្អាកការសាកល្បងប្រើថ្នាំហាយដ្រុកស៊ីក្លូរ៉ូគីន ថ្នាំព្យាបាលជំងឺគ្រុនចាញ់ លើអ្នកជំងឺកូវីដ-19 ដោយសារតែមានក្ដីកង្វល់ខាងសុវត្ថិភាព។ នេះបើតាមរយៈការបង្ហើបឱ្យដឹងរបស់លោក ថេដ្រូស អាដាណូម កេប្រេយេស៊ុស ប្រធានអង្គការសុខភាពពិភពលោក កាលពីថ្ងៃចន្ទ(ទី25 ឧសភា) មិនយូរប៉ុន្មាន បន្ទាប់ពីលទ្ធផលនៃការសិក្សាស្រាវជ្រាវមួយ បានរកឃើញថា វាមានចំណែកបង្កើនភាពប្រថុយប្រថានដល់ថ្នាក់ស្លាប់ ចំពោះអ្នកជំងឺវីរុសកូរ៉ូណាប្រភេទថ្មី។

លោកថេដ្រូស ប្រាប់ថា ក្រុមអ្នកធ្វើការស្រាវជ្រាវវិភាគដែលហៅថា “Solidarity Trial” ឬ “ការសាកល្បងដែលជារួមគ្នាជាធ្លុងមួយ” របស់អង្គការសុខភាពពិភពលោក ដែលជាគ្រោងការវិភាគខាងវេជ្ជសាស្ត្រអន្តរជាតិ ដើម្បីស្វែងរក និងសាកល្បងឱសថផ្សេង ដែលអាចព្យាបាលកូវីដ-19 បានផ្អាកការសាកល្បងការប្រើថ្នាំហាយដ្រុកស៊ីក្លូរ៉ូគីន ជាបណ្ដោះអាសន្ន ដែលនេះជាផ្នែកមួយនៃវិធានការការពារទុកជាមុន។

ការសម្រេចចិត្តនេះ បានកើតឡើង បន្ទាប់ពីព្រឹត្តិបត្រខាងវេជ្ជសាស្ត្រ Lancet បានបោះពុម្ពរបាយការណ៍ការសិក្សាស្រាវជ្រាវមួយកាលពីសប្ដាហ៍កន្លងទៅ ដោយបានបញ្ជាក់ថា ការប្រើថ្នាំហាយដ្រុកស៊ីក្លូរ៉ូគីន លើអ្នកជំងឺកូវីដ-19 អាចបន្ថែមភាពប្រថុយប្រថានក្នុងការស្លាប់ចំពោះអ្នកជំងឺទាំងនោះ។

ហាយដ្រុកស៊ីក្លូរ៉ូគីន ថ្នាំព្យាបាលជំងឺគ្រុនចាញ់ បានទទួលការអួតអាងដោយលោកប្រធានាធិបតី នៃសហរដ្ឋអាមេរិក ដូណាល់ ត្រាំ និងមនុស្សចំនួនទៀតថា អាចព្យាបាលជំងឺដែលមានប្រភពពីមេរោគវីរុសកូរ៉ូណាប្រភេទថ្មីបាន និងថែមទាំងប្រាប់ទៀតថា ពួកគេបានប្រើវាជាប្រចាំ និងបានណែនាំឱ្យអ្នកឯទៀតធ្វើតាមទៀតផង។

លោកថេដ្រូស បានថ្លែងក្នុងអំឡុងពេលថ្លែងការណ៍សរុបតាមអនឡាញថា “មានការផ្អាកអង្គភាពសាកល្បងថ្នាំហាយដ្រុកស៊ីក្លូរ៉ូគីន នៅក្នុង “Solidarity Trial” ក្នុងអំឡុងពេលដែលមានការពិនិត្យមើលឡើងវិញនូវព័ត៌មានស្ដីពីសុវត្ថិភាព ដោយគណៈកម្មការគ្រប់គ្រងពិនិត្យខាងផ្នែកសុវត្ថិភាព តែយ៉ាងណាក៏ដោយ អង្គភាពផ្សេងទៀតរបស់ការសាកល្បងនេះ នឹងដំណើរការជាបន្តទៅទៀត”

កាលពីពេលមុននេះ អង្គការសុខភាពពិភពលោក ធ្លាប់បានចេញមកណែនាំប្រឆាំងនឹងការប្រើថ្នាំហាយដ្រុកស៊ីក្លូរ៉ូគីន ក្នុងការព្យាបាល ឬការពារការឆ្លងមេរោគវីរុសកូរ៉ូណាប្រភេទថ្មី លើកលែងតែ វាជាផ្នែកមួយរបស់ការសាកល្បងខាងការព្យាបាល។

លោកវេជ្ជបណ្ឌិត ម៉ៃក៍ រ៉ៃអាន់ អគ្គនាយកគ្រោងការបន្ទាន់របស់អង្គការសុខភាពពិភពលោក បានប្រាប់ថា ការសម្រេចផ្អាកសាកល្បងថ្នាំហាយដ្រុកស៊ីក្លូរ៉ូគីន គឺជាការដំណើរការដោយក្ដីប្រុងប្រយ័ត្នជាទីបំផុត៕
ប្រភព៖ សារព័ត៌មានបរទេស

May 26, 2020

បុគ្គលិកសុខាភិបាលអេស្បា៉ញរាប់រយនាក់ ធ្វើបាតុកម្ម

បុគ្គលិកសុខាភិបាលដែលតម្រូវឱ្យចូលរួមបេសកកម្មប្រយុទ្ធប្រឆាំងនឹង COVID-19 នៅប្រទេសអេស្ប៉ាញ បានប្រមូលផ្ដុំគ្នានៅខាងក្រៅមន្ទីរពេទ្យនានាដើម្បីតវ៉ាចំពោះស្ថានភាពខ្វះសម្ភារការពារខ្លួន។

ក្រុមគ្រូពេទ្យ និងគិលានុបដ្ឋាយិកាជាដើម បាននាំគ្នាធ្វើបាតុកម្មនៅខាងក្រៅមន្ទីរពេទ្យមួយចំនួនក្នុងរាជធានី Madrid កាលពីម្សិលមិញ(25ឧសភា)។ គ្រូពេទ្យខ្លះកាន់បដាដែលសរសេរថា “បុគ្គលិកសុខាភិបាលគឺសំខាន់និងចាំបាច់” ឬ “យើងកំពុងប្រយុទ្ធដោយមិនមានអាវុធ” និង “អ្នកណាខ្លះយកចិត្តទុកដាក់ដល់អ្នកថែទាំសុខភាព”។ល។

Silvia Garcia ដែលជាគិលានុបដ្ឋាកិយានៅបន្ទប់សង្គ្រោះបន្ទាន់ បានឱ្យដឹងថា បាតុកម្មនេះធ្វើឡើងក្នុងបំណងប្រាប់អ្នករាល់គ្នាអំពី “ការប្រថុយប្រថានក្នុងការងារ” របស់ពួកគេ។ Silva Garcia គឺជាម្នាក់ក្នុងចំណោមបាតុកររាប់រយនាក់ដែលបានប្រមូលផ្ដុំគ្នានៅខាងក្រៅមន្ទីរពេទ្យ Gregorio Maranon នៅរាជធានី Madrid ប្រទេសអេស្ប៉ាញ។

“យើងត្រូវការមធ្យោបាយដើម្បីថែទាំអ្នកជំងឺ។ យើងត្រូវការឱ្យមានការធានាថា ខ្លួនអាចឈប់សម្រាក និងការពារខ្លួនដើម្បីបំពេញការងារនៅក្នុងស្ថានភាពល្អបំផុតដែលអាចធ្វើទៅបាន” Victor Aparermo ជាបុគ្គលិកសុខាភិបាលម្នាក់នៅបន្ទប់ថែទាំសកម្ម បាននិយាយបែបនេះ។

ក្រុមបាតុករបានឱ្យដឹងថា ពួកគេបានបាក់កម្លាំងទៅហើយ ទន្ទឹមនឹងនេះក៏បានរៀបរាប់អំពីការខ្វះបុគ្គលិក និងសម្ភារការពារខ្លួននៅពេលទប់ទល់នឹង COVID-19។ ប្រមាណជា1ភាគ3នៃតួលេខអ្នកឆ្លង និងស្លាប់ដោយសារវីរុសCOVID-19 នៅអេស្ប៉ាញ ត្រូវបានរកឃើញនៅរាជធានី Madrid ជាកន្លែងដែលប្រព័ន្ធសុខាភិបាលជិតនឹងដួលរលំនៅពេលមេរោគរាតត្បាតឡើងដល់ចំណុចកំពូល។ ក្រុមបុគ្គលិកសុខាភិបាល ត្រូវការឱ្យអាជ្ញាធរក្រុងបន្ថែមបុគ្គលិកចំនួន10,000នាក់បន្ថែមទៀតដើម្បីជួយទប់ទល់នឹងCOVID-19។

អេស្ប៉ាញ កាលពីម្សិលមិញ(25ឧសភា) បានចាប់ផ្ដើមបន្ធូរបន្ថយវិធានការទប់ស្កាត់វីរុស។ រាជធានី Madrid និងទីក្រុង Barcelona ដែលត្រូវបានគេចាត់ទុកថាមានការដាក់បម្រាមគោចរតឹងតែងបំផុតក្នុងពិភពលោក បានអនុញ្ញាតឱ្យបើកទ្វារឧទ្យាន និងហាងកាហ្វេនៅទីវាលក្នុងសួនច្បារនានា បន្ទាប់ពីបានផ្អាកដំណើរការជាង2ខែកន្លងមកនេះ។

ឆ្នេរសមុទ្រនានានៅភាគខាងជើងប្រទេសអេស្ប៉ាញ និងតំបន់មួយចំនួននៅភាគខាងត្បូងប្រទេសនេះ រួមមានប្រជុំកោះ Canary និង Balearics ក៏បានបើកទ្វារដើម្បីឱ្យពលរដ្ឋមកហែលលេងផងដែរ។

COVID-19 បានបង្ហាញខ្លួននៅក្នុងប្រទេសនិងដែនដីចំនួន213ក្នុងពិភពលោក បណ្ដាលឱ្យមនុស្សជាង5.5លាននាក់បានឆ្លងវីរុស និងជាង347,000នាក់បានបាត់បង់ជីវិត។ អេស្ប៉ាញ ជាសម្បុកមេរោគធំជាងគេទី4ក្នុងពិភពលោក ដោយមានអ្នកជំងឺសរុប280,000នាក់ និងជិត27,000នាក់បានស្លាប់៕

ប្រភព៖សារព័ត៌មានបរទេស

May 26, 2020

Bloomberg៖ ម្ចាស់ Facebook ក្លាយជាអ្នកមានបំផុតលំដាប់ទី3ក្នុងពិភពលោក

បើទោះជាមានការរំខានពីវីរុសCOVID-19 ប៉ុន្តែទ្រព្យរបស់ Zuckergerg នៅតែកើនជិត20ពាន់លានដុល្លារក្នុងរយៈពេលប្រហែល1ខែចុងក្រោយនេះ ដែលនេះបានជួយឱ្យគាត់មានជាង Bernard Arnault និង Warren Buffett នៅក្នុងតារាងចំណាត់ថ្នាក់របស់ទស្សនាវដ្ដី Bloomberg។

នៅក្នុងបញ្ជីចំណាក់ថ្នាក់មហាសេដ្ឋីពិភពលោករបស់ Bloomberg គេឃើញ CEO របស់ Facebook គឺលោក Mark Zuckerberg ទើបតែបាន “លោតរំលង” ម្ចាស់ក្រុមហ៊ុន Louis Vuitton លោក Bernard Arnault និងមហាសេដ្ឋី Warren Buffett ហើយបានក្លាយជាអ្នកមានបំផុតលំដាប់ទី3ក្នុងពិភពលោក។

Zuckerberg មានទ្រព្យសរុប 87,8ពាន់លានដុល្លារ ខណៈដែល Arnault មាន 81,1ពាន់លានដុល្លារ និង Buffett មាន 68,9ពាន់លានដុល្លារ។

នេះគឺជាប្រការដែលខុសឆ្ងាយបើធៀបនឹង1ឆ្នាំមុន ដែលកាលណោះ Zuckerberg មានទ្រព្យត្រឹមតែ72,5ពាន់លានប៉ុណ្ណោះបើគិតត្រឹមថ្ងៃទី22ឧសភា2019 ខណៈដែល Arnault មាន 89,6ពាន់លានដុល្លារ និង Buffett មាន 83,5ពាន់លានដុល្លារ។

ជាងនេះ កាលពី1ខែមុន ទាំង Buffett ទាំង Arnault សុទ្ធតែមានទ្រព្យច្រើនជាង CEO របស់ Facebook។ កាលពីថ្ងៃទី20មេសា2020 ទ្រព្យរបស់ Zuckerberg មានត្រឹមតែ68,1ពាន់លានដុល្លារ គឺតិចជាង6,2ពាន់លានដុល្លារបើធៀបជាមួយនឹងទ្រព្យរបស់ Buffett និងតិចជាង12,1ពាន់លានដុល្លារបើធៀបនឹងទ្រព្យរបស់ Arnault។

មហាសេដ្ឋី Jeff Bezos (ស្ដាំបង្អស់) Bill Gates(ឆ្វេង) Zuckerberg(កណ្ដាល)

ទ្រព្យរបស់ Zuckerberg បានកើនឡើងលឿនបន្ទាប់ពី Facebook ប្រកាសអំពីរបាយការណ៍ហិរញ្ញវត្ថុដែលមានលទ្ធផលល្អជាងការព្យាករ ក៏ដូចជាការកើនឡើងនៃតួលេខអ្នកចូលប្រើ Facebook នៅក្នុងត្រីមាសទី1។ ទុនសរុបរបស់ Facebook ក៏បានកើន44ពាន់លានដុល្លារបន្ថែមទៀតដែរ។

ថ្មីៗនេះ ក្រុមហ៊ុន Facebook បានលោតចូលក្នុងវិស័យពាណិជ្ជកម្មអេឡិកត្រូនិក នៅពេលដែលបានបញ្ចេញមុខងារ Facebook Shop ដែលអនុញ្ញាតឱ្យក្រុមហ៊ុននានាបង្កើតតូបលក់ដូរនៅលើ Facebook។ កាលពីខែមេសាកន្លងទៅ ក្រុមហ៊ុននេះក៏បានឧទ្ទេសនាមមុខងារ Messenger Rooms ផងដែរដើម្បីប្រជែងជាមួយ Zoom នៅក្នុងបច្ចេកវិទ្យា “ប្រជុំអនឡាញ”។

បច្ចុប្បន្ន មហាសេដ្ឋី2រូបដែលមានទ្រព្យច្រើនជាងគេបង្អស់ក្នុងពិភពលោករបស់ទស្សនាវដ្ដី Bloomberg នៅតែជា Jeff Bezos និង Bill Gates។ បើទោះមានទ្រព្យតិចជាងច្រើនបើធៀបជាមួយមហាសេដ្ឋី Jeff Bezos និង Bill Gates ប៉ុន្តែ Zuckerberg កំពុងតែកាត់បន្ថយគម្លាតយ៉ាងឆាប់រហ័ស។

យ៉ាងណាក៏ដោយ នៅលើតារាងចំណាត់ថ្នាក់តាមពេលវេលាជាក់ស្ដែងរបស់ទស្សនាវដ្ដី Forbes ម្ចាស់ Facebook នៅតែជាមហាសេដ្ឋីដែលមានទ្រព្យច្រើនជាងគេលំដាប់ទី4ក្នុងពិភពលោក បន្ទាប់ពី Jeff Bezos, Bill Gates និង Bernard Arnault ដោយមានទ្រព្យសរុប 87ពាន់លានដុល្លារ។

ប្រភព៖ Businessinsider

May 26, 2020

ជាង347,000នាក់ស្លាប់ដោយសារCOVID-19 នៅទូទាំងពិភពលោក

ពិភពលោកទាំងមូលមានអ្នកស្លាប់ជាង347,000នាក់ ក្នុងចំណោមអ្នកជំងឺ COVID-19 ជិត5.7លាននាក់ ខណៈដែលអាមេរិកខាងត្បូងកំពុងក្លាយជាសម្បុកមេរោគធំបំផុតមួយក្នុងពិភពលោក។

ប្រទេសនិងដែនដីចំនួន213ក្នុងសកលលោកត្រូវបានរាយការណ៍ថា បានរកឃើញអ្នកផ្ទុកវីរុសកូរ៉ូណាប្រភេទថ្មីសរុប5,581,290នាក់ និងអ្នកស្លាប់សរុបមានចំនួន347,530នាក់ ក្នុងនោះចំនួនអ្នកជំងឺថ្មីមាន90,097នាក់ និងអ្នកស្លាប់ថ្មីមាន1,204នាក់។ អ្នកជំងឺដែលបានជាសះស្បើយមានចំនួន2,360,911នាក់។

សហរដ្ឋអាមេរិកដែលជាសម្បុកមេរោគកូរ៉ូណាធំជាងគេក្នុងពិភពលោក មានអ្នកជំងឺសរុប1,705,668នាក់ និងអ្នកស្លាប់99,782នាក់។ ក្នុងរយៈពេល24ម៉ោងចុងក្រោយនេះ សហរដ្ឋអាមេរិកបានរកឃើញអ្នកជំងឺថ្មី19,232នាក់ និងអ្នកស្លាប់ថ្មី452នាក់។ តួលេខនេះបានថយចុះបន្តិចបើធៀបនឹងដំណាក់កាលកំពូលរបស់ COVID-19។

ប្រទេសប្រេស៊ីល ទើបរកឃើញអ្នកជំងឺCOVID-19 ចំនួន11,280នាក់ និងអ្នកស្លាប់757នាក់បន្ថែមទៀតក្នុងរយៈពេល24ម៉ោងកន្លងទៅនេះ ធ្វើឱ្យតួលេខនៃអ្នកជំងឺកូរ៉ូណាសរុបឡើងដល់374,898នាក់ និងអ្នកស្លាប់សរុបឡើងដល់23,473នាក់ បន្តជាសម្បុកមេរោគធំជាងគេលំដាប់ទី2ក្នុងពិភពលោក។ ក្រុមអ្នកជំនាញនិយាយថា តួលេខពិតប្រាកដនៃការឆ្លងវីរុសCOVID-19នៅប្រេស៊ីល អាចខ្ពស់ជាង15ដងបើធៀបនឹងទិន្នន័យដែលបានប្រកាស ដោយសារតែសមត្ថភាពនៃការធ្វើតេស្តរកមេរោគរបស់ប្រេស៊ីលនៅមានកម្រិត។

ចំណែកប្រទេសរុស្ស៊ីវិញ មានអ្នកជំងឺCOVID-19សរុប 353,427នាក់ និងអ្នកស្លាប់សរុប3,633នាក់ ក្នុងនោះអ្នកជំងឺ និងអ្នកស្លាប់ដែលទើបត្រូវបានរកឃើញក្នុងរយៈពេល24ម៉ោងចុងក្រោយនេះមានចំនួន 8,946នាក់ និង92នាក់។ រុស្ស៊ីជាសម្បុកមេរោគCOVID-19 ធំជាងគេលំដាប់ទី3ក្នុងពិភពលោក៕

ប្រភព៖ សារព័ត៌មានបរទេស

May 26, 2020

(វីដេអូ)-ទារកអាយុ8សប្ដាហ៍សោះចាប់ផ្ដើមរៀនឈរ ហើយដល់អាយុ15សប្ដាហ៍ស្រាប់តែចេះឈរមែនទេ

ទារិកាម្នាក់ឈ្មោះថា Lula បានចាប់ផ្ដើមរៀនឈរនៅពេលមានអាយុទើបតែ8សប្ដាហ៍ ហើយដល់អាយុ15សប្ដាហ៍ ទារិកានេះក៏អាចឈរបានដោយខ្លួនឯង ដោយមិនបាច់មានអ្នកណាជួយទប់។

Tezra Finn-Johnston អាយុ31ឆ្នាំ និងប្រពន្ធរបស់គាត់គឺនាង Emily Derrick អាយុ23ឆ្នាំ រស់នៅក្នុងតំបន់ Kingswood នៃទីក្រុង Bristol ប្រទេសអង់គ្លេស។ ពួកគេបានចាប់ផ្ដើមចាប់អារម្មណ៍ទៅលើភាពរឹងមាំខុសធម្មតារបស់កូនស្រី Lula បន្ទាប់ពីបានចាកចេញពីមន្ទីរពេទ្យក្រោយពេលឆ្លងទន្លេរួច។

Lula កើតនៅថ្ងៃទី31មករាឆ្នាំ2020 និងមានទម្ងន់តែ2.5គីឡូក្រាមប៉ុណ្ណោះ គឺស្រាលជាង5%បើធៀបជាមួយទារកទូទៅពេលទើបចាប់កំណើត។ កាលពីទើបមានអាយុ5ថ្ងៃ Lula អាចងើបក្បាលឡើងដោយខ្លួនឯង។ ពេលមានអាយុ1ខែ Finn-Johnston បានដឹងថា ជើងទាំងពីររបស់កូនស្រីគាត់មានសភាពមាំមួនខុសប្រក្រតី។

Tezra Finn-Johnston ប្រាប់ថា “កូនស្រីខ្ញុំចេះតែរពឹស និងយំ ខ្ញុំក៏ឱ្យនាងអង្គុយលើក្បាលជង្គង់។ នាងមិនអង្គុយទេ នាងបែរជាចេះតែចង់ឈរនៅលើជង្គង់ខ្ញុំទៅវិញ”។

Tezra Finn-Johnston បន្តថា “ប៉ុន្មានសប្ដាហ៍ក្រោយមក កូនស្រីខ្ញុំចាប់ផ្ដើមចង់ឈរញឹកញាប់ជាងមុន។ ពេលនោះខ្ញុំគិតថា បើសិនជាធ្វើបែបនេះពេលនាងយំ នាងក៏ប្រហែលជាធ្វើបែបនេះពេលនាងសប្បាយចិត្ត”។

Finn-Johnston ក៏សម្រេចចិត្តសាកល្បង។ គាត់ជួយទ្រ និងកាន់ដៃកូនដើម្បីឱ្យនាងឈរ។ នៅពេលមានអាយុ15សប្ដាហ៍ Lula ក៏អាចក្រោកឈរដោយមិនបាច់មានអ្នកណាជួយលើក។

ឪពុករបស់ Lula បាននិយាយថា “អ្នកណាៗក៏យល់ថា នេះជារឿងចម្លែក ព្រោះថាអាយុប៉ុនហ្នឹង ក្មេងមិនទាន់អាចងើបក្បាលឡើង ឬអង្គុយបាននោះទេ កុំថាឡើយក្រោកឈរដោយខ្លួនឯង។ បើតាមសៀវភៅ ក្មេងត្រូវមានអាយុចាប់ពី9ខែដល់1ឆ្នាំទើបអាចឈរដោយខ្លួនឯងបាន”។

Tezra Finn-Johnston ចូលចិត្តមើលភាពយន្តឯកសារទាក់ទងនឹងក្មេងៗជាមួយកូនស្រីរបស់គាត់។ គាត់ក៏ចូលចិត្តមើលកម្មវិធីអ្នកមាំមួនបំផុតក្នុងពិភពលោកផងដែរ។ Tezra Finn-Johnston ជឿថា Lula ប្រហែលជាបានចាប់អារម្មណ៍ទៅលើសកម្មភាពក្នុងវីដេអូដែលពួកគេបានមើលជាមួយគ្នា៕

ប្រភព៖ សារព័ត៌មានបរទេស

May 25, 2020

Author: សឿន សំណាង