សឿន សំណាង - La Reine Media

(វីដេអូ)-SpaceX បាញ់បង្ហោះផ្កាយរណបអ៊ីនធើណិត60គ្រឿងបន្ថែមទៀតដោយជោគជ័យ! គម្រោងអ៊ីនធើណិតនេះនឹងរកចំណូលបាន30ពាន់លានដុល្លារជារៀងរាល់ឆ្នាំ

ការបាញ់បង្ហោះយានអវកាសដែលមានដឹកអវកាសចរជាប្រវត្តិសាស្ដ្រឡើងទៅលើ “មេឃ” មិនទាន់បាន5ថ្ងៃផង SpaceX ក៏បន្តទទួលបានជោគជ័យក្នុងការបាញ់បង្ហោះបណ្ដុំផ្កាយរណប Starlink ទី8 ឡើងទៅកាន់កន្លងគោចរ។

បណ្ដុំផ្កាយរណបត្រូវបានភ្ជាប់នៅផ្នែកខាងមុខនៃកាំជ្រួចរុញច្រាន Falcon 9។ កាំជ្រួចនេះត្រូវបានបាញ់បង្ហោះឡើងពីស្ថានីយនៃទ័ពអាកាស Cape Canaveral នៅក្នុងរដ្ឋ Florida សហរដ្ឋអាមេរិក កាលពីថ្ងៃទី4មិថុនា នៅវេលាម៉ោង21និង25នាទី(ម៉ោងនៅសហរដ្ឋអាមេរិក)។ ការបាញ់បង្ហោះដោយជោគជ័យនេះ បានបញ្ជាក់បន្ថែមអំពីសមត្ថភាពរបស់កាំជ្រួចប្រើឡើងវិញ Falcon 9 ហើយក៏បានជួយឱ្យចំនួនឧបករណ៍នៅក្នុងប្រព័ន្ធផ្កាយរណប Starlink កើនឡើងដល់ 480គ្រឿង។

ប្រហែល2នាទីនិង45វិនាទីក្រោយពីបានបាញ់បង្ហោះ ក្បាលរុញច្រានជាន់ទី1របស់កាំជ្រួច បានផ្ដាច់ខ្លួន និងចុះចតដោយជោគជ័យនៅលើកប៉ាល់គ្មានមនុស្សបើកដែលមានឈ្មោះថា “Just Read the Instructions” នៅលើលម្ហមហាសមុទ្រអាត្លង់ទិក ខណៈដែលក្បាលរុញជាន់ទី2 បន្តនាំផ្កាយរណបចំនួន60 ចូលទៅកាន់គន្លងគោចរកម្រិតទាបរបស់ផែនដី និងបានពង្រាយទៅក្នុងប្រព័ន្ធដែលបានគ្រោងទុកដោយជោគជ័យ ក្រោយរយៈពេល15នាទី។

ជាមួយនឹងការប្រើប្រាស់ឡើងវិញជាលើកទី5នេះ Falcon 9 បានបង្កើតឯតទគ្គកម្មថ្មីមួយទៀត អំពីអាយុកាលរបស់កាំជ្រួចរុញច្រាន។ ដំបូងឡើង គម្រោងបាញ់បង្ហោះខាងលើនេះត្រូវបានកំណត់នៅពាក់កណ្ដាលខែឧសភា ប៉ុន្តែ វាត្រូវបានពន្យារពេលកន្លះខែដោយសារតែឥទ្ធិពលរបស់ព្យុះ Arthur។

ប្រព័ន្ធផ្កាយរណប Starlink ត្រូវបានបង្កើតឡើងដើម្បីផ្គត់ផ្គង់សេវាអ៊ីនធើណិតល្បឿនលឿន និងមានវិសាលភាពគ្រងដណ្ដប់ទូទាំងពិភពលោក។ ផ្កាយរណបទាំងនោះនឹងហោះជុំវិញផែនដីនៅលើកម្ពស់ប្រមាណជា550គីឡូម៉ែត្រ។ គោលដៅចុងក្រោយរបស់ក្រុមហ៊ុន SpaceX គឺការបង្កើនចំនួនផ្កាយរណបនៅក្នុងបណ្ដាញអ៊ីនធើណិតនេះ ឱ្យបាន40,000គ្រឿង។

មហាសេដ្ឋី Elon Musk ដែលជា CEO របស់ SpaceX

“បើសិនជាជោគជ័យ គម្រោងខាងលើនេះនឹងប្រមូលបានប្រាក់ចំណូល 30ពាន់លានដុល្លារជារៀងរាល់ឆ្នាំសម្រាប់ SpaceX” នេះបើតាមការប៉ាន់ប្រមាណរបស់មហាសេដ្ឋី Elon Musk ដែលជា CEO របស់ SpaceX។ ក្រុមហ៊ុននេះ មានគម្រោងផ្គត់ផ្គង់អ៊ីនធើណិតដំបូងគេពីបណ្ដាញ Starlink ទៅឱ្យអតិថិជននៅសហរដ្ឋអាមេរិក និងប្រទេសកាដាណានៅក្នុងឆ្នាំនេះ៕

ប្រភព៖ AFP/Cnet

June 5, 2020

George Floyd! តំណាងរាស្ត្រអំពាវនាវឱ្យបន្តធ្វើបាតុកម្ម ខណៈរាប់ពាន់នាក់ចូលរួមពិធីបុណ្យសពនិងរំឭកវិញ្ញាណក្ខន្ធជនរងគ្រោះ

មនុស្សរាប់រយនាក់បានចូលរួមពិធីបុណ្យសពនៅ Minneapolis ដើម្បីគោរព និងរំឭកវិញ្ញាណក្ខន្ធរបស់ George Floyd ដែលជាបុរសស្បែកខ្មៅម្នាក់បានបាត់បង់ជីវិត ក្រោយពីត្រូវបានប៉ូលិសចាប់ខ្លួននិងសង្កត់ក9នាទី។

ពិធីបុណ្យសពរបស់ George Floyd ដែលមានអាយុ46ឆ្នាំ ត្រូវបានធ្វើឡើងកាលពីថ្ងៃទី4មិថុនា នៅវិហាររបស់សាកលវិទ្យាល័យ North Central នាទីក្រុង Minneapolis ក្នុងរដ្ឋ Minnesota សហរដ្ឋអាមេរិក។ Philonise Floyd ដែលជាប្អូនប្រុសរបស់ George Floyd បាននិយាយថា គ្រួសាររបស់ពួកគេក្រីក្រ និងខ្វះខាតខ្លាំងណាស់។

Philonise Floyd ថ្លែងថា “ពិតជាអស្ចារ្យណាស់ដែលគាត់ (George Floyd) បានធ្វើឱ្យបេះដូងរបស់មនុស្សជាច្រើនញាប់ញ័រ”។ Philonise Floyd ពាក់អាវខ្មៅ ពាក់កាតដែលមានរូបបងប្រុសរបស់ខ្លួន រួមជាមួយនឹងអក្សរ “ខ្ញុំមិនអាចដកដង្ហើម” នៅលើអាវផងដែរ។

ពិធីបុណ្យសពនេះ តាមគម្រោងនឹងអូសបន្លាយរយៈពេល6ថ្ងៃ និងត្រូវបានធ្វើឡើងនៅក្នុងរដ្ឋ Minnesota រដ្ឋ North Carolina និងរដ្ឋ Texas។ សពរបស់លោក Floyd នឹងត្រូវបានបញ្ចុះ នៅថ្ងៃទី9មិថុនាខាងមុខ។

Ben Crump ដែលជាមេធាវីរបស់គ្រួសារសពលោក Floyd ថ្លែងនៅក្នុងពិធីបុណ្យសពថា សកម្មភាពរបស់ប៉ូលិសកាលណោះគឺជាអំពើឃោរឃៅ។ “អ្វីដែលយើងបានឃើញក្នុងវីដេអូ គឺជាសកម្មភាពឃោរឃៅ។ ដូច្នេះ សហរដ្ឋអាមេរិក ដូចដែលយើងបានប្រកាសក្នុងពេលរំឭកវិញ្ញាណក្ខន្ធរបស់Georg Floyd យើងមិនអាចទទួលយកបានចំពោះអំពើកាចសាហាវនេះបានទេ។ យើងត្រូវធ្វើបាតុកម្មប្រឆាំងនឹងអំពើឃោរឃៅ។ យើងមិនត្រូវឃុបឃិតនឹងអំពើព្រៃផ្សៃ និងការធ្វើទារុណបែបនេះឡើយ”។

ការស្លាប់របស់ Floyd បានក្លាយជាស្នូលថ្មីនៃភាពអយុត្តិធម៌ ដែលប៉ូលិសប្រើប្រាស់អំពើហិង្សាហួសហេតុចំពោះជនជាតិអាមេរិកាំងដើមកំណើតអាហ្វ្រិក និងបានបង្កើតឱ្យមានបាតុកម្មជាច្រើនកើតឡើងពាសពេញទឹកដីសហរដ្ឋអាមេរិក។ បាតុកម្មនៅតែបន្តកើតឡើងក្នុងថ្ងៃទី4មិថុនា ប៉ុន្តែភាគច្រើនគឺជាបាតុកម្មសន្តិវិធី។

Derek Chauvin អាយុ44ឆ្នាំ ជាអ្នកដែលបានយកជង្គង់សង្កត់ករបស់ Floyd ដោយផ្ទាល់ ត្រូវបានបណ្ដេញចេញពីការងារ និងត្រូវបានចោទប្រកាន់ពីបទមនុស្សឃាតកម្រិត2។ កម្រិតនេះអាចធ្វើឱ្យ Derek Chauvin ជាប់ពន្ធនាគារ40ឆ្នាំ។ មិត្តរួមការងាររបស់ Derek ចំនួន3នាក់ក៏ត្រូវបានចោទប្រកាន់ពីបទសមគំនិតក្នុងករណីមនុស្សឃាតនេះ។ អតីតមន្ត្រីប៉ូលិសទាំងនេះ កំពុងប្រឈមនឹងទោសជាប់ពន្ធនាគារយូរបំផុតត្រឹមរយៈពេល40ឆ្នាំ។

នៅ New York ជាកន្លែងដែលមានករណីឆក់ប្លន់ជាច្រើនកើតឡើងក្នុងបាតុកម្មនានាកន្លងមក មានមនុស្សរាប់ពាន់នាក់បានចូលរួមរំឭកវិញ្ញាណក្ខន្ធរបស់ Floyd នៅឯសួន Brooklyn។ មនុស្សជាច្រើនបានលុតជង្គង់នៅលើស្មៅដើម្បីប្រឆាំងនឹងអំពើឃោរឃៅរបស់ប៉ូលិស ព្រមទាំងបាននាំគ្នាស្រែកថា “មិនមានយុត្តិធម៌ មិនមានសន្តិភាព”។

តំណាងរាស្ត្រ Hakeem Jeffries នៅ New York មកពីបក្សប្រជាធិបតេយ្យ បានអំពាវនាវឱ្យពលរដ្ឋបន្តធ្វើបាតុកម្ម។ Hakeem Jeffries ថ្លែងថា សោកនាដកម្មដែលបានដាស់ស្មារតីរបស់មនុស្សមួយភាគធំនឹងនាំមកនូវការផ្លាស់ប្ដូរយូរអង្វែង។

រដ្ឋមន្ត្រីក្រសួងយុត្តិធម៌ William Barr កាលពីថ្ងៃទី4មិថុនាបានឱ្យដឹងថា មានភ័ស្តុតាងបង្ហាញអំពីផលប្រយោជន៍របស់បរទេស និងក្រុមអ្នកអុជអាលជ្រុលនិយម មានជាប់ទាក់ទិននឹងចលនាឆ្វេងនិយម ដូចជា Antifa កំពុងដណ្ដើមការគ្រប់គ្រងបាតុកម្មនានានៅសហរដ្ឋអាមេរិក។ ក៏ប៉ុន្តែរដ្ឋមន្ត្រីរូបនេះ មិនទាន់បានបង្ហាញ ឬបញ្ជាក់លម្អិតអំពីប្រការនេះនៅឡើយ៕

ប្រភព៖ សារព័ត៌មានបរទេស

June 5, 2020

ជិត 392,000នាក់់បានស្លាប់ដោយសារវីរុសCOVID-19 នៅទូទាំងពិភពលោក

ពិភពលោកទាំងមូល ត្រូវបានរាយការណ៍ថា មានអ្នកស្លាប់ជិត 392,000នាក់ ក្នុងចំណោមអ្នកជំងឺCOVID-19 ជិត6.7លាននាក់។

ប្រទេស និងដែនដីចំនួន213ក្នុងពិភពលោក មានអ្នកជំងឺCOVID-19 សរុប 6,680,356នាក់ ក្នុងនោះមានអ្នកស្លាប់ចំនួន931,967នាក់។ អ្នកជំងឺកើន 125,741នាក់ និងអ្នកស្លាប់កើន5,680នាក់ បើធៀបនឹងម្សិលមិញ។ ចំណែកអ្នកដែលបានជាសះស្បើយមានចំនួន 3,227,186នាក់។

ទ្វីបអាមេរិកមានអ្នកជំងឺសរុប3,205,881នាក់ ទ្វីបអឺរ៉ុបមាន2,045,150នាក់ ទ្វីបអាស៊ីមាន1,260,001នាក់ និងទ្វីបអាហ្វ្រិកមាន172,183នាក់។

សហរដ្ឋអាមេរិកនៅតែជាសម្បុកមេរោគធំជាងគេបង្អស់ ដោយមានអ្នកជំងឺសរុប1,923,049នាក់ និងអ្នកស្លាប់ 110,138នាក់។ អ្នកជំងឺកើន 21,556នាក់ និងអ្នកស្លាប់កើន 10,011នាក់ បើធៀបនឹងមុននេះមួយថ្ងៃ។

សម្បុកមេរោគធំជាងគេទី2 គឺប្រទេសប្រេស៊ីល ដោយមានអ្នកជំងឺសរុប615,870នាក់ និងអ្នកស្លាប់សរុប34,039នាក់ ក្នុងនោះមានអ្នកជំងឺថ្មី 31,890នាក់។

ចំណែករុស្ស៊ីវិញ មានអ្នកជំងឺសរុប441,108នាក់ និងអ្នកស្លាប់សរុប5,384នាក់។ ប្រទេសនេះ ជាសម្បុកមេរោគ COVID-19 ធំជាងគេលំដាប់ទី3ក្នុងពិភពលោក៕

June 5, 2020

អ្នកទទួលកេររបស់ Samsung កំពុងប្រឈមនឹងការចាប់ខ្លួនពីតុលាការកូរ៉េខាងត្បូង

ដើម្បីស្រាវជ្រាវករណីច្របាច់បញ្ចូលគ្នាមួយពាក់ព័ន្ធនឹងក្រុមហ៊ុន Samsung និងការបន្លំផ្នែកគណនី ក្រុមចៅក្រមរបស់តុលាការកូរ៉េខាងត្បូង បានស្នើឱ្យចាប់ខ្លួនលោក Lee Jae-yong រួមនឹងអតីតមេដឹកនាំ2រូបផ្សេងទៀតរបស់ក្រុមហ៊ុន Samsung។

ក្រុមចៅក្រមបានឱ្យដឹងថា ការបញ្ជាឱ្យចាប់ខ្លួននេះ គឺយោងទៅលើមូលដ្ឋានដែលសង្ស័យថា ពួកគេបានរៀបចំគ្រប់គ្រងតម្លៃមូលបត្រ រួមនឹងបទចោទមួយចំនួនទៀត។ ថ្មីៗនេះ តុលាការកំពុងតែស៊ើបអង្កេតលើបញ្ហាពាក់ព័ន្ធនឹងការបន្លំផ្នែកគណនីនៅក្នុងក្រុមហ៊ុនផលិតឱសថ Samsung Biologics ក្រោយពីក្រុមមន្ត្រីហិរញ្ញវត្ថុកូរ៉េខាងត្បូងយល់ថា តម្លៃរបស់ក្រុមហ៊ុននេះត្រូវបានបំប៉ោងបន្ថែម 4.5លានលាន (4,500,000,000,000) វ៉ុន (3,691,338,479 ដុល្លារអាមេរិក) ក្នុងឆ្នាំ2015។

កាលពីខែមុន លោក Lee Jae-yong ក៏ត្រូវបានអញ្ជើញឱ្យចូលបំភ្លឺទាក់ទិននឹងការចោទប្រកាន់អំពីការបន្លំផ្នែកគណនីខាងលើ ក៏ដូចជាការច្របាច់បញ្ចូលគ្នាមួយរវាងក្រុមហ៊ុន2 កាលពីឆ្នាំ2015 ដែលត្រូវបានគេជឿថា បានជួយឱ្យលោក មានភាពងាយស្រួលក្នុងការទទួលកាន់កាប់ “អាណាចក្រ” Samsung។ ក្រុមចៅក្រមយល់ថា មន្ត្រីជាន់ខ្ពស់របស់ក្រុមហ៊ុន Samsug មានចេតនាក្នុងការទម្លាក់តម្លៃមូលបត្រ Samsung C&T នៅមុនការច្របាច់បញ្ចូលគ្នាជាមួយក្រុមហ៊ុន Cheil Industries។ លោក Lee Jae-yong គឺជាភាគហ៊ុនិកធំជាងគេរបស់ Cheil Industries ដោយលោកកាន់កាប់ភាគហ៊ុនដល់ទៅ 23.2%។ ក៏ប៉ុន្តែ សារព័ត៌មាន Yonhap បានឱ្យដឹងថា លោក Lee បានច្រាលចោលការចោទប្រកាន់នេះ។

លោក Lee Jae-yong ក៏ធ្លាប់មានរឿងក្ដីដ៏ធំមួយកាលពីឆ្នាំ2017ផងដែរ

នេះគឺជាបញ្ហាផ្លូវច្បាប់ថ្មីបំផុតរបស់លោក Lee។ កាលពីខែកុម្ភៈ ឆ្នាំ2017 លោកក៏ត្រូវបានចាប់ខ្លួនដើម្បីស៊ើបអង្កេតដោយសារមានជាប់ពាក់ព័ន្ធនឹងរឿងអាស្រូវពុករលួយផ្នែកនយោបាយដ៏ធំដែលបានធ្វើឱ្យកក្រើកកូរ៉េខាងត្បូងកាលណោះ។

លោក Lee ត្រូវបានចោទប្រកាន់ថាបានចំណាយប្រាក់រាប់សិបលានដុល្លារអាមេរិកទៅឱ្យអង្គការមិនស្វែងរកកម្រៃមួយរបស់ Choi Soon-sil ដែលជាមិត្តជិតស្និទ្ធរបស់អតីតប្រធានាធិបតីកូរ៉េខាងត្បូង Park Geun-hye ដើម្បីទទួលបានការយល់ព្រមពីរដ្ឋាភិបាលក្នុងការច្របាច់បញ្ចូលគ្នាមួយរវាងក្រុមហ៊ុន2 ដែលបង្កឱ្យរឿងចម្រូងចម្រាសជាច្រើនកើតឡើង។ ការទិញដូរក្រុមហ៊ុននេះត្រូវបានគេយល់ថា បានជួយបង្កើនអំណាចរបស់លោក Lee នៅក្នុង “អាណាចក្រ” Samsung ដែលជាក្រុមហ៊ុនពហុវិស័យធំបំផុតរបស់កូរ៉េខាងត្បូង។

លោក Lee Jae-yong ត្រូវបានឃុំខ្លួនបណ្ដោះអាសន្នរយៈពេល1ឆ្នាំ រហូតដល់ការស៊ើបអង្កេតលើរឿងក្ដីពុករលួយបានចប់សព្វគ្រប់នៅឆ្នាំ2018។ ប៉ុន្តែ លោក Lee Jae-yong បច្ចុប្បន្នត្រូវប្រឈមនឹងការវិនិច្ឆ័យប្រកបដោយភាពខ្លាំងក្លាជាងមុន ក្រោយពីតុលាកំពូលកាលពីឆ្នាំ2019 បានសម្រេចចិត្តសើរើសាលក្រមរបស់តុលាការជាន់ទាបឡើងវិញ ដើម្បីកាត់ក្ដីសាជាថ្មី៕

ប្រភព៖ សារព័ត៌មានបរទេស

June 4, 2020

(វីដេអូ) កាំជ្រួចរុញច្រានរបស់ SpaceX បានចុះចតដោយជោគជ័យ បន្ទាប់ពីជើងហោះហើរជាប្រវត្តិសាស្ត្រ

កាំជ្រួចរុញច្រាន Falcon 9 ត្រូវបាននាំពីមហាសមុទ្រអាត្លង់ទិក (Atlantic Ocean) ចូលទៅកាន់កំពង់ផែន Florida ដោយកប៉ាល់គ្មានមនុស្សបើក “Of Course I Still Love You” របស់ក្រុមហ៊ុនអវកាស SpaceX ក្រោយពីបានរុញច្រានយានអវកាសទៅដល់គោលដៅ។

កាំជ្រួចរុញច្រាន2ជាន់ Falcon 9 របស់ SpaceX បានហោះឡើងពីមជ្ឈមណ្ឌលអវកាស Kennedy របស់ NASA ក្នុងរដ្ឋ Florida កាលពីថ្ងៃទី30ឧសភា នាំយានអវកាស Crew Dragon ដែលមានដឹកអវកាសយានិក2នាក់របស់ NASA (លោក Bob Behnken និងលោក Duog Hurley) ឡើងទៅកាន់ស្ថានីយអវកាសអន្តរជាតិ(ISS) ដោយជោគជ័យ។ ក្រោយរយៈពេលប្រហែល9នាទីបន្ទាប់ពីបានបាញ់បង្ហោះ ក្បាលរុញជាន់ទី1របស់កាំជ្រួច Falcon 9 បានចុះចតនៅលើកប៉ាល់គ្មានមនុស្សបើកមួយគ្រឿងដែលមានឈ្មោះថា “Of Course I Still Love You” របស់ SpaceX ដែលស្ថិតនៅលើលម្ហសមុទ្រចម្ងាយពី Florida ជាច្រើនរយគីឡូម៉ែត្រ។ ក្រោយពីបានទទួលការចុះចតរបស់កាំជ្រួច Falcon 9 កប៉ាល់គ្មានមនុស្សបើក “Of Course I Still Love You” នេះ ក៏បានធ្វើដំណើរសំដៅចូលកំពង់ផែ Canaveral កាលពីថ្ងៃទី2មិថុនា។

ក្រុមហ៊ុន SpaceX តែងធ្វើការកែច្នៃ និងប្រើប្រាស់កាំជ្រួចរុញច្រាន Falcon 9 និងកាំជ្រួច Falcon Heavy របស់ខ្លួនឡើងវិញដើម្បីកាត់បន្ថយការចំណាយ។ ក៏ប៉ុន្តែ កាំជ្រួចរុញច្រានដែលបានប្រើនៅក្នុងជើងហោះហើរ Demo-2 ប្រហែលជាមិនត្រូវបានប្រើប្រាស់ទៀតនោះទេ។ SpaceX មិនទាន់បានបង្ហើបឱ្យដឹងអំពីគម្រោងរបស់ខ្លួនក្នុងការប្រើប្រាស់ កាំជ្រួចនេះនោះដែរ តែបើតាមការស្មាន ក្រុមហ៊ុននេះអាចនឹងរក្សាវាទុកជាភ័ស្តុតាងប្រវត្តិសាស្ត្រ។ កន្លងមក ក្បាលរុញច្រានដំបូងរបស់កាំជ្រួច Falcon 9 ដែលធ្លាប់បានចុះចតដោយជោគជ័យ កំពុងត្រូវបានរក្សាទុកនៅខាងក្រៅទីស្នាក់ការកណ្ដាលរបស់ SpaceX ក្នុងតំបន់ Hawthorne នៃរដ្ឋ California សហរដ្ឋអាមេរិក។ ក្បាលរុញច្រានដែលត្រូវបានប្រើកាលពីថ្ងៃទី30ឧសភា មានលក្ខណៈពិសេស ដោយមានឡូហ្គូរបស់ NASA។

Demo-2 គឺជាជើងហោះហើរដំបូងបង្អស់ដែលបាននាំមនុស្សចេញពីទឹកដីអាមេរិកាំងទៅកាន់អវកាស តាំងពី NASA ផ្អាកប្រើប្រាស់យានអវកាស Space shuttle ចាប់ពីឆ្នាំ2011។ នេះគឺជាជើងហោះហើរមួយដែលជាលទ្ធផលនៃកិច្ចសហការរវាង SpaceX ជាមួយនឹង NASA។

SpaceX ទទួលបានកិច្ចព្រមព្រៀងដែលមានតម្លៃ 2.6ពាន់លានដុល្លារក្នុងកម្មវិធី Commercial Crew ដើម្បីធ្វើការបញ្ជូនយានអវកាសមានមនុស្សបើកចំនួន6ជើងឡើងទៅកាន់ស្ថានីយអវកាសអន្តរជាតិ (ISS)។ Demo-2 ត្រូវបានធ្វើឡើងដើម្បីវាយតម្លៃទៅលើស្ដង់ដាសុវត្ថិភាព និងភាពគួរទុកចិត្តរបស់យានអវកាស Crew Dragon និងកាំជ្រួច Falcon 9 សម្រាប់ការហោះហើរនោះ៕

ប្រភព៖ សារព័ត៌មានបរទេស

June 4, 2020

ស្នាមរបួសមុតជ្រៅ កណ្ដាលដួងចិត្តជនអាមេរិកាំង…

អ្នកណាទៅនឹកដល់ថា សង្គមជនអាមេរិកាំង ត្រូវប្រឈមនឹងភាពជ្រួលច្របល់ ការចលាចល ដុតបំផ្លាញអគារហាង ផ្សារទំនើបផ្សេងៗ នៅក្នុងរាប់សិបទីក្រុងទូទាំងប្រទេស ចាប់ផ្ដើមពីការប្រមូលផ្ដុំគ្នាដើរក្បួនប្រឆាំងតវ៉ានៅក្នុងទីក្រុងមីននីសូតា ដោយសារតែការស្លាប់របស់ជនស្បែកខ្មៅ 1នាក់ ដោយសារទង្វើរបស់ប៉ូលិស 4នាក់។

ជនអាមេរិកាំង ត្រូវចងចាំឈ្មោះ ចច ហ្វ្លយដ៍ ជនរងគ្រោះដោយសារប៉ូលិសឃោរឃៅ ដេរេក ឆូវីន ដែលមានប្រវត្តិក្នុងការប្រើអំពើហិង្សាទៅលើប្រជាជនដោយអាវុធ និងការវាយតប់ រហូតត្រូវរងការប្ដឹងផ្ដល់ដល់ទៅ 17លើក ក្នុងស្ថានការណ៍ការចលាចលដែលមិនទាន់បញ្ចប់នៅឡើយក្នុងខណៈពេលនេះ បានសាងនូវភាពខូចខាតដ៏ច្រើនមហាសាល។

តើប៉ូលិស 3នាក់ទៀត នឹងត្រូវរងការដំណើរការរឿងក្ដីដែរឬទេ ក្រោយពីត្រូវបានបណ្ដេញចេញពីអង្គភាព? ម្នាក់នៅក្នុងចំណោមនោះ ជាកូនចៅជនជាតិម៉ុង នៅក្នុងប្រទេសឡាវ ដែលបានភៀសខ្លួនទៅរស់នៅសហរដ្ឋអាមេរិក ជាមួយជនភៀសខ្លួនជាច្រើនម៉ឺននាក់ទៀត ក្រោយសង្គ្រាមក្នុងស្រុកនៅប្រទេសឡាវបានបញ្ចប់ទៅ។ ជនជាតិម៉ុង មានមេដឹកនាំម្នាក់ គឺលោកឧត្តមសេនីយ៍ វ៉ាង ប៉ៅ ដែលស៊ីឈ្នួល CIA ទៅប្រយុទ្ធជាមួយទាហានឡាវក្រហម និងវៀតណាម។

ភរិយារបស់ ឆូវីន ឈ្មោះ ខេលលី ក៏ជាស្ត្រីជនជាតិឡាវ នាងបានសុំប្ដឹងលែងលះភ្លាមៗ ក្រោយពីបានដឹងពីទង្វើរបស់ស្វាមី ដែលរូបភាពរបស់ ឆូវីន ប្រើជង្គង់សង្កត់បំពង់ករបស់ ហ្វ្លយដ៍ ដោយមិនបានរវីរវល់នឹងសំឡេងស្រែកសុំអង្វរឱ្យបានដកដង្ហើមរបស់ ហ្វ្លយដ៍ រហូតដល់សន្លប់បាត់ស្មារតី និងស្លាប់នៅពេលតមកនោះ បានក្លាយជាខ្សែបញ្ឆេះនៃក្ដីក្រេវក្រោធ និងគំនុំដ៏ខ្លាំងក្លា។

ត្រឹមតែការខូចខាតផ្នែកទ្រព្យសម្បត្តិពីការត្រូវបានបំផ្លិចបំផ្លាញ ដុតកម្ទេចចោល និងសម្រុកចូលប្លន់ដោយហ្វូងមនុស្សឆ្លៀតឱកាសបន្លំខ្លួនវាយទម្លាយហាង លួចទ្រព្យសម្បត្តិយ៉ាងមិនខ្វល់ខ្វាយអំពីច្បាប់នោះ គឺជារូបបែបនៃភាពអនាធិបតេយ្យពិតប្រាកដក្នុងប្រទេសមហាអំណាចលំដាប់លេខ1 របស់ពិភពលោកដែលលើកតម្កើងរបបប្រជាធិបតេយ្យ។

លទ្ធផលអវិជ្ជមានខាងសេដ្ឋកិច្ច នៅមិនទាន់រកច្រកចេញឃើញនៅឡើយពីការឆ្លងរាតត្បាតរបស់មេរោគកូវីដ-19 ឥឡូវថែមទាំងត្រូវមានស្នាមរបួសក្នុងដួងចិត្តរ៉ាំរ៉ៃ ពាក់ព័ន្ធនឹងការរើសអើសពូជសាសន៍ពណ៌សម្បុរជាច្រើនរយឆ្នាំទៀត និងគ្មានថ្ងៃនឹងបញ្ចប់…។

ជនអាមេរិកាំងជាង 300លាននាក់ ប្រហែលជាស្រឡាំងកាំង នៅពេលមើលឃើញសភាវការគ្មានច្បាប់ទម្លាប់ទាំងនោះ និងប្រហែលជាសួរខ្លួនឯងថា តើហេតុអ្វី បានហេតុការណ៍បែបនេះកើតឡើង និងរាលដាលទៅទូទាំងប្រទេសក្នុងរយៈពេលតែមិនប៉ុន្មានថ្ងៃបែបនេះទៅកើត? និងតើវានឹងចប់បែបណា?

ការធ្វើបាតុកម្មតវ៉ាដោយសន្តិភាព បានក្លាយជាការប្រើអំពើហិង្សា និងត្រូវបានឆ្លើយតបទៅវិញដោយអំពើហិង្សា…ប៉ូលិស និងអាជ្ញាធរពីអង្គភាពផ្សេងៗទៀត បានប្រើឧស្ម័នបង្ហូរទឹកភ្នែក គ្រាប់កាំភ្លើងកៅស៊ូ វាយដោយដំបង និងវិធានការដទៃទៀត។ ឈាមក្បាល បាក់ដៃបាក់ជើង អ្នកឆ្លៀតឱកាសលួចប្លន់ និងអ្នកប្រើអំពើហិង្សាជាច្រើនរយនាក់ ត្រូវបានចាប់ខ្លួន។

ជាស្នាមរបួសមុតជ្រៅក្នុងប្រវត្តិសាស្ត្រនៃការរើសអើសពូជសាសន៍ពណ៌សម្បុរ…ជនស្បែកខ្មៅត្រូវរងការប្រតិបត្តិយ៉ាងឃោរឃៅ។

ការដើរក្បួនបាតុកម្មតវ៉ា បង្កការចលាចលទូទាំងប្រទេសកម្រិតនេះ មិនបានកើតមានឡើងញឹកញាប់ឡើយ។ ក្នុងករណីរបស់ប៉ូលិស 4នាក់មិនបានរងទោសទណ្ឌអ្វីសោះ ក្រោយពីបានវាយសង្គ្រប់ទៅលើលោក រ៉ត់នីយ៍ ឃីង នៅក្នុងទីក្រុសឡូសអ៊ែនជើលេស ក្នុងឆ្នាំ1992 បានធ្វើឱ្យកើតចលាចលប្រមាណជា 2ខែ តែ ក៏នៅតែមិនរីករាលដាលទូទាំងប្រទេស ដូចគ្រានេះដែរ។

កាលពីពេលមុនហ្នឹងទៀត ក្នុងឆ្នាំ1968 មានការដើរក្បួនបាតុកម្មប្រឆាំងសង្គ្រាមវៀតណាមយូររាប់ខែ ក៏គ្មានផលប៉ះពាល់រឿងពណ៌សម្បុរដែរ ទោះជាមានការចោទប្រកាន់ថា កងទាហានដែលបញ្ជូនទៅធ្វើសង្គ្រាមនោះ មានជនស្បែកខ្មៅ និងស្បែកពណ៌ផ្សេងទៀត ច្រើនជាងជនស្បែកសក៏ដោយ តែប្រធានបទចម្បងរបស់ការប្រឆាំងនៅពេលនោះគឺ នយោបាយរបស់រដ្ឋបាលដែលទៅពាក់ព័ន្ធនឹងវៀតណាម។

ទាំង 2ហេតុការណ៍នេះ បានធ្វើឱ្យរដ្ឋាភិបាលក្នុងខណៈពេលនោះ បានប្រកាសប្រើច្បាប់រក្សាភាពស្ងប់ស្ងាត់ ដែលធ្លាប់បានចាប់ផ្ដើមកាលពីឆ្នាំ1807 ដើម្បីចាត់ការភាពច្របូលច្របល់ គឺជាច្បាប់ដូចគ្នានឹងច្បាប់ដែលលោកប្រធានាធិបតី ដូណាល់ ត្រាំ បច្ចុប្បន្នកំពុងគំរាមថា នឹងប្រើឡើងវិញម្ដងទៀត ដើម្បីចាត់ការភាពអសន្តិសុខក្នុងគ្រានេះ បើសិនជានៅមិនទាន់បញ្ឈប់ និងនៅពេលអភិបាលរដ្ឋផ្សេងៗ ទប់លែងឈ្នះ។

ច្បាប់នេះ បានផ្ដល់អំណាចដល់ប្រធានាធិបតី ឱ្យបញ្ជាទៅកងទ័ព បញ្ជូនទាហានចូលទៅរក្សាភាពស្ងប់ស្ងាត់ ដែលអាចនិយាយបានថា ជាសភាវមិនប្រក្រតី តែគ្រានេះ បានទទួលការទិតៀនពីមេដឹកនាំអង្គភាពយោធាថា នៅមិនទាន់ចាំបាច់នៅឡើយ និងអភិបាលរដ្ឋផ្សេងៗ ក៏មិនយល់ស្របដែរ ព្រោះយល់ឃើញថា លោកត្រាំ ត្រូវការបង្វែរចំណុចទទួលខុសត្រូវ។

លោក ត្រាំ បាក់មុខខ្លាំងណាស់ ព្រោះគិតចង់ធ្វើអ្វី ក៏សុទ្ធតែបរាជ័យ តាំងពីការចាត់ការរឿងការឆ្លងរាលដាលរបស់មេរោគកូវីដ-19 ដែលធ្វើឱ្យពលរដ្ឋអាមេរិកាំងឆ្លងមេរោគមួយនេះរហូតដល់ជិត 2លាននាក់ និងមានអ្នកស្លាប់ជិត 1.2សែននាក់ ហើយការប្រមូលផ្ដុំគ្នាធ្វើបាតុកម្មដែលរ៉ាំរ៉ៃ មួយ អាចនឹងធ្វើឱ្យកើតការឆ្លងរាលដាលនៃមេរោគនេះជាថ្មី ដែលពិបាកនឹងចាត់ការមិនខាន។

អំពើហិង្សា បានរីករាលដាលក្លាយជារង្វង់ធំក្នុងគ្រានេះ ដោយសារតែប្រជាជនបានទទួលរងសម្ពាធពីបញ្ហាសេដ្ឋកិច្ច មនុស្សគ្មានការងារធ្វើជាង 40លាននាក់ និងនៅមិនទាន់មានសញ្ញាណាមួយថា វានឹងចប់នៅពេលណា? ធ្វើឱ្យក្លាយជាវិបត្តិជាន់លើវិបត្តិ ធ្វើឱ្យមេដឹកនាំសេតវិមាន ដើរទៅមុខលែងរួច បាត់បង់អស់សភាពគួរឱ្យគោរពជឿជាក់ក្នុងភាពជាអ្នកដឹកនាំ។

អំពើហិង្សាយូរជាង 9ថ្ងៃនេះ លោកត្រាំ ក៏នៅមិនទាន់មានឥរិយាបថណាមួយថា នឹងចាត់ការយ៉ាងណានៅឡើយ? ចង់ប្រើទាហានចេញមកបង្ក្រាបដើម្បីរក្សាភាពស្ងប់ស្ងាត់សុវត្ថិភាព អាចនឹងធ្វើឱ្យស្ថានការណ៍កាន់តែអាក្រក់ខ្លាំងជាងមុនទៅទៀត។

អ្វីដែលគួរឱ្យខ្មាស់អៀនបំផុតសម្រាប់ខ្លួនលោក ត្រាំ គឺការគ្មានសមត្ថភាពគ្រប់គ្រងស្ថានការណ៍ រឹតតែពេលនាំយកករណីរបស់ទីក្រុងហុងកុង មកប្រៀបធៀបជាមួយទៀតផងនោះ លោកត្រាំ រឹតតែក្លាយជាមុខសញ្ញានៃការសើចចំអកឡកឡាយដោយអ្នកនាំពាក្យរបស់ក្រសួងការបរទេសចិន 2-3លើក ធ្វើឱ្យលោកត្រាំស្ទើរតែក្អួតឈាម…។

រឹតតែមានព័ត៌មានថា អំឡុងពេលមានក្រុមបាតុករមកផ្ដុំគ្នានៅមុខសេតវិមាន មានការប៉ះទង្គិចគ្នាជាមួយអង្គភាពរក្សាសន្តិសុខសុវត្ថិភាពផងនោះ លោកត្រាំ និងក្រុមគ្រួសារត្រូវបាននាំខ្លួនចូលទៅពួននៅក្នុងលេណដ្ឋានបង់គើរសុវត្ថិភាពក្រោមដី ដល់ទៅជិត 1ម៉ោង ធ្វើឱ្យបាក់មុខយ៉ាងខ្លាំង និងត្រូវបានគេមើលឃើញថា ជាមេដឹកនាំ “មាត់ហ៊ាន តែជើងញ័រ” ហើយបន្ទាប់ពីនោះមក បានសម្ងំខ្លួននៅតែក្នុងសេតវិមាន។

បន្ទាប់ពីនោះមក លោកត្រាំ បានព្យាយាមបញ្ចេញក្បាច់ថ្មី មានអ្នកបញ្ជាឱ្យអាជ្ញាធររំលាយក្រុមបាតុករនៅមុខសេតវិមាន បាញ់ឧស្ម័នបង្ហូរទឹកភ្នែកបណ្ដេញ ដើម្បីបើកផ្លូវឱ្យលោកត្រាំ និងក្រុមមន្ត្រីជាន់ខ្ពស់ដែលមានសុទ្ធតែអ្នកស្បែកសទាំងអស់ បានធ្វើដំណើរទៅព្រះវិហារក្នុងសួនច្បារសាធារណៈ ឡាហ្វាយែត ទៅឈរកាន់ព្រះគម្ពីប៊ីប ឱ្យជាងថតរូប បង្ហាញពីភាពក្លាហាន។

ធ្វើឱ្យក្រុមបព្វជិតទាំងឡាយមិនសប្បាយចិត្ត ព្រោះការយកព្រះគម្ពីប៊ីប មកកាន់បង្ហាញដោយមិនបានអាន បើកចុះបើកឡើង ធ្វើរាងសង្ហានោះ មិនបានធ្វើឱ្យស្ថានការណ៍ល្អប្រសើរឡើងឡើយ។ ឯប្រជាជន ក៏ខឹងក្រេវក្រោធខ្លាំង ព្រោះត្រូវអាជ្ញាធរបណ្ដេញចេញ ដើម្បីឱ្យលោកត្រាំបានទៅឈរបង្ហាញរាង និងប្រកាសថា ខ្លួនឯងជាប្រធានាធិបតីដែលជាតំណាងរបស់ច្បាប់។

ពលរដ្ឋអាមេរិកាំង រស់នៅក្នុងសង្គមដែលនិយមការប្រើប្រាស់អាវុធក៏ពិតមែន តែនៅមិនទាន់មានការដឹកជញ្ជូនអាវុធ យកចេញមកដេញបាញ់ប្រហារគ្នា រហូតក្លាយជាសង្គ្រាមក្នុងស្រុកនៅឡើយទេ មានត្រឹមតែការដុតបំផ្លាញ លួចប្លន់ទ្រព្យសម្បត្តិប៉ុណ្ណោះ និងធ្វើឱ្យពលរដ្ឋអាមេរិកាំងមានអារម្មណ៍ថា ស្រុកទេសហាក់ដូចជាគ្មានច្បាប់ លទ្ធផលចុងក្រោយ ម្ចាស់មុខជំនួញនីមួយៗ ត្រូវតែទទួលយកការខូចខាតទាំងអស់នោះដោយខ្លួនឯង។

ក្រុមហ៊ុនធានារ៉ាប់រង នឹងធានាខុសត្រូវសងឱ្យមកវិញក្នុងករណីមានការចលាចលបែបនេះ ឬយ៉ាងណា? វាស្រេចតែលើលក្ខខណ្ឌ ព្រោះនោះជារឿងលុយកាក់ តែរឿងរបស់ស្នាមរបួសមុតជ្រៅក្នុងដួងចិត្ត និងអារម្មណ៍វិញនោះ ត្រូវប្រើពេលវេលាយូរតទៅទៀត ទម្រាំនឹងបានធូរស្រាល…៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

June 4, 2020

រដ្ឋបាលលោក ត្រាំ បិទជើងហោះហើររបស់ចិនទាំងអស់ ដើម្បីកៀបសង្កត់ក្រុងប៉េកាំង ឱ្យបើកផ្លូវអាកាសចរណ៍អាមេរិក ចូលប្រទេសចិនឡើងវិញ

រដ្ឋបាលរបស់លោកប្រធានាធិបតី ដូណាល់ ត្រាំ កាលពីថ្ងៃពុធ(ទី3មិថុនា) បានហាមឃាត់យន្តហោះដឹកអ្នកដំណើរគ្រប់ជើងហោះហើររបស់ចិន មិនឱ្យហោះចូលសហរដ្ឋអាមេរិក ដោយនឹងចាប់ផ្ដើមពីថ្ងៃទី16 មិថុនាខាងមុខតទៅ ដើម្បីកៀបសង្កត់ឱ្យក្រុងប៉េកាំងយល់ព្រមអនុញ្ញាតឱ្យក្រុមហ៊ុនអាកាសចរណ៍ទាំងឡាយរបស់អាមេរិក បានហោះដឹកអ្នកដំណើរឆ្ពោះទៅប្រទេសចិនបានឡើងវិញ ក្រោមភាពតានតឹងដែលកំពុងតែកើនកម្ដៅឡើងជារឿយៗ រវាងប្រទេសដែលមានសេដ្ឋកិច្ចធំជាងគេបំផុតរបស់ពិភពលោក។ នេះបើតាមសេចក្ដីរាយការណ៍របស់ទីភ្នាក់ងារព័ត៌មាន AFP។

សកម្មភាពនានាដែលថ្លែងដោយក្រសួងគមនាគមន៍សហរដ្ឋអាមេរិក ជាការដាក់ទោសចិនចំពោះករណី មិនប្រតិបត្តិតាមកិច្ចព្រមព្រៀងក្នុងពេលបច្ចុប្បន្នលើវិស័យហោះហើររវាងប្រទេសទាំង2 ដោយទាំងអស់នេះ បទបញ្ជាទាំងនោះ ត្រូវបានផ្សព្វផ្សាយចេញមកក្នុងខណៈដែលសម្ព័ន្ធភាពរវាងសហរដ្ឋអាមេរិក នឹងចិនកំពុងតែក្ដៅគគុកឡើងជារឿយៗក្នុងអំឡុងពេលប៉ុន្មានខែកន្លងមកនេះ ក្រោមស្ថានការណ៍នៃភាពតានតឹងពាក់ព័ន្ធនឹងរោគរាតត្បាតដ៏ធំរបស់វីរុសកូរ៉ូណាប្រភេទថ្មី និងសកម្មភាពរបស់ចិនដែលបានបញ្ចេញច្បាប់សន្តិសុខថ្មីសម្រាប់ទីក្រុងហុងកុង។

បទបញ្ជាទាំងនោះ ត្រូវបានដាក់ឱ្យប្រើទៅលើក្រុមហ៊ុនអាកាសចរណ៍ អ៊ែរ ឆាយណា, ឆៃណា អ៊ីស្ទើន អ៊ែរឡាញ ខប, ឆៃណា សៅធើន អ៊ែរឡាញ, ហៃណាន អ៊ែរឡាញ ហូលឌីង ខូ, សេឈួន អ៊ែរឡាញ និងសៀកមឹន អ៊ែរឡាញ។
សកម្មភាពរបស់សហរដ្ឋអាមេរិកនេះ បានកើតឡើង បន្ទាប់ពីកាលអំឡុងដើមសប្ដាហ៍នេះ ដេលតា អ៊ែរឡាញ និងយូណៃធេត អ៊ែរឡាញ របស់អាមេរិក បាននាំគ្នាទាមទារឱ្យចិន បើកផ្លូវហោះហើរឡើងវិញនៅក្នុងខែនេះ ខុសពីក្រុមហ៊ុនអាកាសចរណ៍របស់ចិន ដែលនៅតែអាចធ្វើដំណើរទៅសហរដ្ឋអាមេរិកបាន ក្នុងអំឡុងពេលដែលកើតការឆ្លងរាតត្បាតរបស់វីរុសកូរ៉ូណាប្រភេទថ្មី។

ចំណែកក្រសួងគមនាគមន៍ បានបញ្ជាក់នៅក្នុងសេចក្ដីថ្លែងការណ៍ 1ផ្សេងទៀតថា “យើងនឹងអនុញ្ញាតឱ្យក្រុមហ៊ុនអាកាសចរណ៍របស់ចិន ប្រតិបត្តិការហោះហើរជាប្រចាំ ក្នុងចំនួនដូចគ្នានឹងរដ្ឋបាលចិនអនុញ្ញាតឱ្យយើងដែរ”

រដ្ឋបាលរបស់លោកប្រធានាធិបតី ត្រាំ កាលពីថ្ងៃទី22 ឧសភា បានចោទប្រកាន់រដ្ឋបាលចិនថា បានធ្វើឱ្យការវិលត្រឡប់មកបើកសេវាកម្មជើងហោះហើរឆ្ពោះទៅប្រទេសចិនរបស់ក្រុមហ៊ុនអាកាសចរណ៍ផ្សេងៗរបស់អាមេរិក ក្លាយជារឿងដែលមិនអាចទៅរួច និងបានចេញបញ្ជាឱ្យក្រុមហ៊ុនអាកាសចរណ៍ចិនចំនួន4 ត្រូវដាក់កាលវិភាគការហោះហើរជាមួយរដ្ឋបាលសហរដ្ឋអាមេរិកជាថ្មី។

ក្រុមហ៊ុនអាកាសចរណ៍ផ្សេងៗរបស់ចិន បានទទួលការអនុញ្ញាតឱ្យដំណើរការជើងហោះហើរប្រចាំ ទៅ-មកសហរដ្ឋអាមេរិក មិនលើស 1ជើង ក្នុង 1សប្ដាហ៍ តែពួកគេអាចប្រើយន្តហោះជួលម៉ៅដាច់ ហោះហើរមកសហរដ្ឋអាមេរិកបន្ថែមបានច្រើនជើង ដោយជាញឹកញាប់ យន្តហោះជួលម៉ៅដាច់ទាំងនោះ ត្រូវបានប្រើប្រាស់ សម្រាប់ជួយដឹកពួកនិស្សិតចិនត្រឡប់ទៅប្រទេសវិញ។

ដោយហេតុនេះហើយ ទើបរដ្ឋបាលរបស់លោក ត្រាំ កំពុងគ្រប់គ្រងជើងហោះហើរជួលម៉ៅដាច់ របស់ក្រុមហ៊ុនអាកាសចរណ៍ចិនដូចគ្នា ដោយនៅក្នុងបទបញ្ជារបស់ក្រសួងគមនាគមន៍ បានបញ្ជាក់ថា រដ្ឋបាលជឿថា ក្រុមហ៊ុនអាកាសចរណ៍ផ្សេងៗ បានឆ្លៀតឱកាសប្រើជើងហោះហើរបែបជួលយន្តហោះម៉ៅដាច់ទាំងនោះ ក្នុងការគេចចេញពីវិធានការកំណត់ជើងហោះហើររបស់ចិន ចូលមកសហរដ្ឋអាមេរិក មិនលើស 1ជើងក្នុង 1សប្ដាហ៍ និងបន្ថែមការយកប្រៀបពីលើក្រុមហ៊ុនអាកាសចរណ៍ផ្សេងៗរបស់សហរដ្ឋអាមេរិក ក្នុងការផ្ដល់សេវាកម្មដល់ពួកអ្នកដំណើរដែលហោះទៅ-មករវាងសហរដ្ឋអាមេរិកនឹងចិន។

កាលពីថ្ងៃទី31 មករា រដ្ឋបាលសហរដ្ឋអាមេរិក បានហាមអ្នកដំណើរគ្រប់រូប ដែលមិនមែនជាពលរដ្ឋអាមេរិក និងធ្លាប់ស្នាក់នៅប្រទេសចិនក្នុងអំឡុង 14ថ្ងៃមុនពេលនោះ មិនឱ្យធ្វើដំណើរចូលប្រទេសរបស់ខ្លួន ដោយសារតែវិបត្តិនៃការឆ្លងរាលដាលរបស់វីរុសកូរ៉ូណាប្រភេទថ្មី តែកាលនោះ មិនបានចេញច្បាប់កំណត់អ្វីមួយ ទៅលើក្រុមហ៊ុនអាកាសចរណ៍របស់ចិនឡើយ ចំណែកក្រុមហ៊ុនអាកាសចរណ៍ធំៗរបស់សហរដ្ឋអាមេរិក បានសម្រេចផ្អាកគ្រប់ជើងហោះហើរឆ្ពោះទៅប្រទេសចិនដោយស្ម័គ្រចិត្តក្នុងខែកុម្ភៈ៕

ប្រភព ៖ សារព័ត៌មានបរទេស

June 4, 2020

យល់ថាចិនស៊ីខ្សែលើ ទីក្រុងវ៉ាស៊ីងតោន ហាមមិនឱ្យអាកាសចរណ៍ចិនដឹកភ្ញៀវទៅកាន់ទឹកដីអាមេរិក

ទីក្រុងវ៉ាស៊ីងតោនហាមយន្តហោះដឹកភ្ញៀវពីប្រទេសចិនចូលមកទឹកដីអាមេរិក ចាប់ពីពាក់កណ្ដាលខែមិថុនា ក្រោយពីទីក្រុងប៉េកាំងមិនអនុញ្ញាតឱ្យក្រុមហ៊ុនអាកាសចរណ៍អាមេរិកដំណើរការជើងហោះហើរទៅប្រទេសចិនឡើងវិញ។

“បណ្ដាក្រុមហ៊ុនអាកាសចរណ៍អាមេរិកបានស្នើឱ្យមានការតភ្ជាប់សេវាដឹកអ្នកដំណើរជាមួយប្រទេសចិនឡើងវិញ ចាប់ពីថ្ងៃទី1មិថុនា។ ការដែលរដ្ឋាភិបាលចិនមិនយល់ព្រមតាមសំណើរនេះ គឺជាការរំលោភលើកិច្ចព្រមព្រៀងផ្នែកដឹកជញ្ជូនផ្លូវអាកាសរវាងចិនជាមួយនឹងសហរដ្ឋអាមេរិក”។ នេះបើតាមរដ្ឋមន្ត្រីក្រសួងដឹកជញ្ជូនអាមេរិក ដែលបានប្រកាសកាលពីថ្ងៃទី3មិថុនា។

ការហាមរបស់សហរដ្ឋអាមេរិកខាងលើនេះ តាមគម្រោងនឹងមានសុពលភាពចាប់ពីថ្ងៃទី16មិថុនាខាងមុខ ប៉ុន្តែអាចត្រូវបានជំរុញឱ្យបានឆាប់ជាងនេះ។ បណ្ដាក្រុមហ៊ុនអាកាសដែលទទួលរងផលវិបាកពីបម្រាមនេះ មានដូចជា ក្រុមហ៊ុនអាកាសចរណ៍ Air China, China Eastern Airlines Corp, China Southern Airlines Co និង Hainan Airlines Holding Co។

បណ្ដាក្រុមហ៊ុនអាកាសចរណ៍អាមេរិកមានដូចជា Delta Air Lines និង United Airlines នៅដើមខែនេះបានស្នើឱ្យចិនបើកផ្លូវឱ្យពួកគេអាចហោះទៅកាន់ប្រទេសចិន ប៉ុន្ត ទីក្រុងប៉េកាំងមិនយល់ព្រម បើទោះជាបណ្ដាក្រុមហ៊ុនអាកាសចរណ៍ចិននៅតែអាចបន្តធ្វើការហោះហើរទៅកាន់សហរដ្ឋអាមេរិកក៏ដោយ៕

ប្រភព៖ សារព័ត៌មានបរទេស

June 4, 2020

កងទ័ពជិត7ម៉ឺននាក់ ត្រូវបានដាក់ពង្រាយដើម្បីទប់ទល់នឹងកុបកម្មនៅសហរដ្ឋអាមេរិក ខណៈបាតុករជិត1ពាន់នាក់ត្រូវបានចាប់ខ្លួន

រដ្ឋធានីវ៉ាស៊ីងតោននៃសហរដ្ឋអាមេរិក កំពុងតែបង្ហាញវត្តមានរបស់ទាហានរាប់ពាន់នាក់ រួមនឹងគ្រឿងសព្វាវុធយោធាជាច្រើន ដែលដាក់ពង្រាយនៅតាមតំបន់នានា ក្នុងបំណងគ្រប់គ្រងស្ថានការណ៍កុបកម្មដែលកើតឡើងក្រោយពីការស្លាប់របស់បុរសស្បែកខ្មៅឈ្មោះ George Floyd។

ក្រោយរយៈពេល5ថ្ងៃនៃការកើតមានបាតុកម្មនៅរដ្ឋធានីវ៉ាស៊ីងតោនដើម្បីទាមទាររកយុត្តិធម៌ជូនជនរងគ្រោះស្បែកខ្មៅឈ្មោះ Floyd ដែលត្រូវបានប៉ូលីសចាប់ខ្លួន និងសង្កត់ករហូតដល់ស្លាប់នៅឯរដ្ឋ Minnesota លោក ប្រធានាធិបតី Donald Trump បានចាប់ផ្ដើមបង្ហាញសាច់ដុំដែលហាក់ដូចមិនធ្លាប់មានពីមុនមក ដោយមានការដាក់ពង្រាយកងទ័ពរាប់ពាន់នាក់នៅទីក្រុងវ៉ាស៊ីតោន ខណៈដែលមានកុបកម្ម និងការឆក់ប្លន់មួយចំនួនបានកើតឡើង។

យន្តហោះឈ្លបយកការណ៍ RC-26B របស់កងកម្លាំងការពារជាតិ បានបង្ហាញខ្លួននៅទីក្រុងវ៉ាស៊ីងតោនកាលពីព្រលប់ថ្ងៃទី2មិថុនា។ ចំណែកឧទ្ធម្ភាគចក្រ Bell 412 ដែលមានជំនាញខាង “ហិតក្លិន” ចំហាយវិទ្យុសកម្មនុយក្លេអែរ ក៏ត្រូវបានបញ្ជូនមកកាន់រដ្ឋធានីផងដែរ ដែលប្រការនេះបង្ហាញថា រដ្ឋាភិបាលអាមេរិកាំង មានការព្រួយបារម្ភខ្លាំងចំពោះបាតុកម្ម និងកុបកម្មដែលអាចនាំឱ្យមានអំពើភេរវកម្ម។ល។

ព័ត៌មានមួយចំនួនដែលមិនទាន់ត្រូវបានបញ្ជាក់ប្រភពច្បាស់លាស់នៅលើបណ្ដាញសង្គមបានបង្ហើបឱ្យដឹងអំពីសកម្មភាពរបស់យន្តហោះគ្មានមនុស្សបើកនៅវ៉ាស៊ីងតោន។ កាលពីថ្ងៃទី3មិថុនា ក្រុមអ្នកតាមដានបានឃើញយន្តហោះយោធា V-22 Osprey របស់កងម៉ារីនសហរដ្ឋអាមេរិក ត្រូវបានប្រើប្រាស់ដើម្បីដឹកជញ្ជូនទ័ព។

ក្នុងរយៈពេល2ថ្ងៃ ចាប់ពីថ្ងៃទី30 និង31 ខែឧសភា ការប៉ះទង្គិចគ្នារវាងបាតុករ និងប៉ូលីសបានកើតឡើងជាហូរហែ នាំឱ្យសមត្ថកិច្ចប្រើប្រាស់គ្រាប់បែកបង្ហូរទឹកភ្នែកដើម្បីបំបែកហ្វូងបាតុក។ កងទ័ពក្នុងតំបន់ក៏ត្រូវបានដាក់ពង្រាយដើម្បីជួយដល់ប៉ូលីសក្រុងវ៉ាស៊ីងតោន។

អំពើឆក់ប្លន់ ការលួចទ្រព្យសម្បត្តិ និងកុបកម្មបានកើតឡើងនៅពេលយប់ ធ្វើឱ្យអាជ្ញាធរត្រូវដាក់បម្រាមគោចរ និងបញ្ចេញឆ្មាំការពារជាតិនៅវ៉ាស៊ីងតោន។

ក៏ប៉ុន្តែ ប៉ុន្មានថ្ងៃចុងក្រោយនេះ សកម្មភាពបាតុកម្ម បានកើតឡើងភាគច្រើនគឺដោយសន្តិវិធី។ ការហែក្បួនដ៏ធំនៅយប់ថ្ងៃទី2មិថុនាបានបំពានបម្រាមគោចរ19ម៉ោង ប៉ុន្តែមិនមានអំពើហិង្សាកើតឡើងនោះទេ។

ប្រធានាធិបតីសហេរដ្ឋអាមេរិកកាលពីថ្ងៃទី1មិថុនា បានប្រកាសថា កំពុងបញ្ជូនទាហានរាប់ពាន់នាក់មកកាន់ទីក្រុងវ៉ាស៊ីងតោនដើម្បីបង្រាបបាតុករ។ លោក Trump ក៏បានគំរាមថានឹងបញ្ជូនកងទ័ពទៅកាន់រដ្ឋទាំងឡាយណាដែលបានបដិសេធមិនប្រើប្រាស់ឆ្មាំការពារជាតិ។

កាលពីម្សិលមិញ (3មិថុនា) ទាហានប្រមាណជា3,000នាក់បានបង្ហាញវត្តមាននៅក្នុងរដ្ឋធានីវ៉ាស៊ីងតោន ក្នុងនោះមានកងកម្លាំងឆ្មាំការពារជាតិរបស់រដ្ឋធានីចំនួន1,300នាក់ និង2,300នាក់ទៀតត្រូវបានបញ្ជូនមកពីបណ្ដារដ្ឋផ្សេងៗ។ CNN ដកស្រង់សម្ដីរបស់មន្ត្រីការពារជាតិម្នាក់ឱ្យដឹងថា ទាហានប្រមាណ 1,300នាក់ផ្សេងទៀតនឹងត្រូវបានបញ្ជូនពីកងពលធំទ័ពអាកាសលេខ82 តាមគម្រោងនឹងត្រូវដាក់ពង្រាយនាប៉ុន្មានថ្ងៃខាងមុខ។

យោងតាមអភិបាលរដ្ឋវ៉ាស៊ីងតោន លោកស្រី Muriel Bowser ទាហានទាំងនោះអាចប្រើប្រាស់គ្រាប់បែកផ្សែងបង្ហូរទឹកភ្នែក ដំបងឆក់ និងស្លៀកពាក់ឈុតការពារកុបកម្មក្នុងពេលធ្វើសកម្មភាពដើម្បីគ្រប់គ្រងរដ្ឋធានី ប៉ុន្តែ ពួកគេនឹងមិនត្រូវបានបំពាក់គ្រាប់ពិតនោះទេ។ ប៉ុន្តែ កាលពីថ្ងៃទី3មិថុនា សារព័ត៌មាន Star and Stripes ដកស្រង់សម្ដីរបស់មន្ត្រីការពារជាតិសហរដ្ឋអាមេរិក ឱ្យដឹងថា ទាហានមួយចំនួនបានយកកាំភ្លើងតាមខ្លួនពេលបំពេញភារកិច្ច។

ទាហានដែលត្រូវបានកែននៅទូទាំងសហរដ្ឋអាមេរិក ត្រូវបានប៉ាន់ប្រមាណថា មានចំនួន67,000នាក់ ប្រហាក់ប្រហែលនឹងទាហានដែលត្រូវបានដាក់ពង្រាយដើម្បីបញ្ចប់កុបកម្មដែលបានកើតឡើងក្រោយការធ្វើឃាតអាចារ្យ Martin Luther King Jr. កាលពីឆ្នាំ1968។

ចាប់ពីថ្ងៃទី29ឧសភា បាតុករជាង400នាក់ត្រូវបានចាប់ខ្លួននៅក្នុងទីក្រុងវ៉ាស៊ីងតោន ខណៈនៅទូទាំងប្រទស មានបាតុករជាង9,300នាក់ត្រូវបានចាប់ខ្លួន៕

ប្រភព៖ សារព័ត៌មានបរទេស

June 4, 2020

George Floyd និងប៉ូលិសឃោរឃៅ ធ្លាប់ធ្វើការកន្លែងជាមួយគ្នា!!!

តាមរយៈហេតុការណ៍ដែល ចច ហ្វ្លយដ៍ (George Floyd) បុរសស្បែកខ្មៅ ត្រូវ ដេរេក ឆូវីន (Derek Chauvin) ប៉ូលិសស្បែកស ប្រើជង្គង់សង្កត់ក ខណៈចាប់ឃុំខ្លួនអស់រយៈពេលជាច្រើននាទី រហូតដល់ស្លាប់កាលពីថ្ងៃទី25 ឧសភាកន្លងទៅនោះ បើទោះជាប៉ូលិសរូបនោះត្រូវបានបណ្ដេញចេញពីអង្គភាព និងត្រូវបានចោទប្រកាន់ពីបទឃាតកម្មទៅហើយក្ដី តែទោសទណ្ឌ នឹងធ្ងន់ ឬក៏ស្រាលយ៉ាងណានោះ វាមានចំណុចសង្កេតដែលអាចមានផលដល់រឿងក្ដីដែលកើតឡើងនេះបាន។

ម៉ាយ៉ា សានតាម៉ារៀ (Maya Santamaria) ស្ត្រីម្ចាស់ហាង អេល នូអេវ៉ូ រ៉ូដេអូ (El Nuevo Rodeo) ណៃត៍ក្លិបល្បីល្បាញក្នុងក្រុមពួកអាមេរិកឡាទីន ដែលស្ថិតនៅប៉ែកខាងត្បូងនៃទីក្រុង មីននីអាប៉ូលិស រដ្ឋមីននីសូតា (Minneapolis, Minnesota) សហរដ្ឋអាមេរិក បានឱ្យដឹងថា ទាំង 2នាក់នោះ(ហ្វ្លយ និង ដេរេក) ធ្លាប់ធ្វើការជាសន្តិសុខ នៅក្នុងណៃត៍ក្លិបរបស់អ្នកស្រីជាមួយគ្នា ដោយដេរេក ធ្វើយូរមកហើយ ប្រហែលជា 17ឆ្នាំ ជាមេក្រុមរបស់ពួកប៉ូលិសដែលមកមើលការខុសត្រូវណៃត៍ក្លិប ខណៈដែល ហ្វ្លយ មានការងារផ្សេងទៀតស្រាប់ហើយនោះ តែងតែត្រូវបានហៅមកជួយធ្វើអន្តរាគមន៍ជាមួយកម្លាំងសន្តិសុខ បែបម្ដងម្កាល ពេលមានពិធីធំៗជាមួយគ្នាយ៉ាងតិចណាស់ក៏ជាង 10ដងដែរ ដោយកាលពីឆ្នាំកន្លងទៅ(2019) ក៏នៅតែធ្វើនៅឡើយ ទើបតែមកផ្អាក ក្នុងអំឡុងពេលមានវីរុសកូរ៉ូណាឆ្លងរាលដាលហ្នឹងឯង។

អ្នកស្រីបានបង្ហើបឱ្យដឹងទៀតថា ដេរេក ត្រូវគ្នាណាស់ជាមួយពួកអតិថិជនអាមេរិកឡាទីន តែបើអតិថិជនដែលបង្កបញ្ហានោះជាជនស្បែកខ្មៅវិញ គឺច្រើនតែមានអំពើហិង្សាខ្លាំងក្លាកើតឡើងជាញឹកញាប់មិនខាន។ ទោះជាអ្នកស្រីមិនអាចអះអាងបានថា ទាំង 2នាក់នោះ ស្គាល់គ្នា ឬអត់ក៏ដោយ តែខ្ញុំ(អ្នកសរសេរ)ក៏គិតថា រឿងនេះ វាអាចមានអាថ៌កំបាំងអ្វីម្យ៉ាងជ្រៅជាងយើងគិតទៅទៀត ដែលបើសិនជា ដេរេក ធ្លាប់ស្គាល់ ហើយធ្លាប់ស្អប់មុខ ហ្វ្លយដ៍ ពីមុនមកផងនោះ ការកាត់ក្ដីករណីដែលជាដើមហេតុបណ្ដាលឱ្យ ហ្វ្លយដ៍ ស្លាប់នោះ ប្រហែលជាមានទោសធ្ងន់ជាងអ្នកណាៗ គិតទៅទៀតយ៉ាងពិតប្រាកដ។ រឹតតែសាកល្បងពិចារណាមើលពីទិដ្ឋភាព ខណៈដែល ដេរេក យកជង្គង់សង្កត់ក ហ្វ្លយដ៍ ឱ្យបានច្បាស់ៗផងនោះ យើងនឹងមើលឃើញថា គេកំពុងតែសម្លឹងមើលជនរងគ្រោះក្នុងអារម្មណ៍ហាក់ដូចជាសប្បាយចិត្តខ្លាំងណាស់ និងយកដៃឆ្វេងលូកហោប៉ាវខោទៀតផង។ ទិដ្ឋភាពនេះ បង្ហាញឱ្យឃើញពីភាពឈាមត្រជាក់របស់ប៉ូលិសម្នាក់នេះបានយ៉ាងច្បាស់ក្រឡែត។

ករណីការស្លាប់របស់ ចច ហ្វ្លយដ៍ ត្រូវបានមើលឃើញថា ជាការរើសអើងជាតិសាសន៍ពណ៌សម្បុរ ដែលសាងក្ដីមិនពេញចិត្តយ៉ាងខ្លាំង និងយ៉ាងទូលំទូលាយ។ មនុស្សម្នាបាននាំគ្នាចេញមកតាមដងផ្លូវ រហូតរាលដាលទៅក្នុងទីក្រុងជាច្រើនទៀត មានការបំផ្លិចបំផ្លាញទព្យសម្បត្តិ ហាងលក់ទំនិញ និងឆ្លៀតឱកាសឆក់ប្លន់ទៀតផងក៏មាន។ តែយ៉ាងណាក៏ដោយ ជនល្បីឈ្មោះជាច្រើនមកពីពិភពសិល្បៈ អ្នកចម្រៀង តារាសម្ដែង និងពិភពកីឡា កីឡាករតឺនីស កីឡាករបាល់ទាត់-ល- បាននាំគ្នាចេញមករួមបង្ហាញពីកម្លាំងនៃការមិនយល់ស្របចំពោះការរើសអើងពូជសាសន៍ពណ៌សម្បុរលើកនេះ ហើយ EYE ON SPORTS ក្នុងឋានៈជាអត្ថបទដែលពាក់ព័ន្ធនឹងរឿងគ្រប់យ៉ាងនៃជីវិតតាមរយៈកីឡា ដែលតែងតែមានរឿងរ៉ាវទាក់ទិននឹងនយោបាយជាញឹកញាប់នោះ ក៏សូមរួមកម្លាំងតវ៉ាទាមទារ សម្ដែងការមិនយល់ស្របចំពោះការរើសអើងពណ៌សម្បុរក្នុងគ្រានេះមួយចំណែកដែរ។

កាលពីអតីតកាល ក្នុងពិភពកីឡា ក៏ធ្លាប់មានការបង្ហាញកម្លាំងតតាំងនឹងការរើសអើងពូជសាសន៍ពណ៌សម្បុរនេះដែរ ខ្ញុំសូមថយត្រឡប់ទៅក្នុងហេតុការណ៍ការប្រកួតកីឡាអូឡាំពិក ក្នុងឆ្នាំ1968 ដែលទីក្រុងមិកស៊ីកូ ស៊ីធី ធ្វើជាម្ចាស់ផ្ទះរៀបចំព្រឹត្តិការណ៍ដ៏ធំមួយនេះ ដែលនៅយុគសម័យនោះ បញ្ហាការរើសអើងពណ៌សម្បុរនៅមានច្រើនណាស់នៅក្នុងសហរដ្ឋអាមេរិក។ នាពេលព្រឹកនៃថ្ងៃទី16 តុលា ឆ្នាំ1968នោះ គឺជាការប្រកួតកីឡារត់ប្រណាំង 200ម៉ែត្រ ផ្ដាច់ព្រ័ត្រផ្នែកបុរស ដែលលទ្ធផលបានបង្ហាញថា អត្តពលិកស្បែកខ្មៅរបស់សហរដ្ឋអាមេរិកបានឡើងទទួលពានរង្វាន់ដល់ទៅ 2នាក់ ដោយ ថមមី ស្ម៊ីត(Tommy Smith) បានមកដល់ទីមុនគេ ក្នុងរយៈពេល 19.83វិនាទី បំបែកឯកទគ្គកម្មពិភពលោក។ កីឡាករ ភីធើរ ណ័រមែន (Peter Norman) មកពីអូស្ត្រាលី មកដល់ទីលំដាប់ទី2 ដោយប្រើរយៈពេល 20.06វិនាទី និង ចន ខាឡូស (John Carlos) កីឡាករស្បែកខ្មៅរបស់សហរដ្ឋអាមេរិកម្នាក់ទៀត តាមមកដល់ទីលំដាប់លេខ3 ដោយប្រើពេល 20.10វិនាទី។

ពេលឡើងទទួលពានរង្វាន់ ទាំង 3នាក់ សុទ្ធតែមានពាក់និមិត្តសញ្ញានៃការលើកតម្កើងសិទ្ធិមនុស្សរបស់អូឡាំពិក(Olympic Project for Human Rigths)នាសម័យនោះទាំងអស់ តែអ្វីដែលពិសេសនោះគឺ អត្តពលិកស្បែកខ្មៅរបស់សហរដ្ឋអាមេរិកទាំង 2នាក់ បានណាត់គ្នាសម្ដែងនិមិត្តសញ្ញាដើម្បីបង្ហាញអំពីកម្លាំងរបស់ជនស្បែកខ្មៅ ដោយទាំង 2នាក់មិនពាក់ស្បែកជើង តែពាក់ស្រោមជើងពណ៌ខ្មៅ ដែលបង្ហាញពីភាពទីទ័លក្ររបស់ជនស្បែកខ្មៅ។ ថមមី មានកន្សែងបង់កពណ៌ខ្មៅ បង្ហាញពី ក្ដីមោទនភាពរបស់ជនស្បែកខ្មៅដែលហៅថា ប្ល៊ែក ផ្រាយដ៍ (Black Pride) ខណៈដែល ចន បានដោះឡេវអាវក្រៅរបស់គេ ដែលនេះជានិមិត្តសញ្ញា បង្ហាញពីភាពរួមគ្នាជាធ្លុងមួយរបស់ជនវណ្ណៈកម្មករនៅក្នុងសហរដ្ឋអាមេរិក និងពាក់ខ្សែអង្កាំ ឧទ្ទិសដល់ជនស្បែកខ្មៅដែលត្រូវបានធ្វើបាប ឬសម្លាប់ រួមទាំងពួកដែលត្រូវបានចាប់បោះទម្លាក់ទៅក្នុងសមុទ្រ ក្នុងយុគសម័យដេញចាប់ជនស្បែកខ្មៅយកមកធ្វើជាទាសករ។

ការពិត អត្តពលិកស្បែកខ្មៅរបស់អាមេរិកទាំង 2នាក់ បានណាត់គ្នាពាក់ស្រោមដៃពណ៌ខ្មៅ ដែលជានិមិត្តសញ្ញាបង្ហាញពីកម្លាំងរបស់ជនស្បែកខ្មៅ ដែលហៅថា ប្ល៊ែក ផៅវើរ (Black Power) ជាទង្វើដែលកើតឡើងនៅក្នុងសហរដ្ឋអាមេរិក ក្នុងយុគទសវត្សរ៍ទី60 ដែលសង្កត់ធ្ងន់លើការរួមកម្លាំងគ្នាតស៊ូ ដើម្បីផលប្រយោជន៍របស់ជនជាតិស្បែកខ្មៅ…តែ ចន បែរជាភ្លេចពាក់ស្រោមដៃចេញមក ពេលនោះ ភីធើរ (កីឡាកររបស់អូស្ត្រាលីដែលឡើងទទួលរង្វាន់លេខ2) ក៏ណែនាំឱ្យ ថមមី ចែករំលែកស្រោមដៃខាងឆ្វេងទៅឱ្យ ចន ពាក់ផង។ នេះហើយ ជាដើមហេតុដែលធ្វើឱ្យមានរូបភាពអត្តពលិកសហរដ្ឋអាមេរិក ខណៈឡើងទទួលពានរង្វាន់ បង្ហាញពីការពាក់ស្រោមដៃម្នាក់ម្ខាង ឈរឱនមុខ និងលើកកណ្ដាប់ដៃឡើងម្នាក់ម្ខាងនៅលើក្ដារចំណាត់ថ្នាក់នោះឯង។ លទ្ធផលនៃការសម្ដែងនិមិត្តសញ្ញាក្នុងគ្រានោះ បានធ្វើឱ្យអត្តពលិកសហរដ្ឋអាមេរិកទាំង 2នាក់ ត្រូវគេបង្ខំឱ្យចាកចេញកន្លែងស្នាក់នៅរបស់អ្នកកីឡា និងថែមទាំងត្រូវបញ្ជាឱ្យប្រគល់ពានរង្វាន់នោះ ទៅឱ្យគណៈកម្មការអូឡាំពិកវិញទៀតផង៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

June 4, 2020

Author: សឿន សំណាង