សឿន សំណាង - La Reine Media

អភិបាលទីក្រុងវ៉ាស៊ីងតោនចូលរួមធ្វើបាតុកម្ម បន្ទាប់ពីប្រកែកតវ៉ាជាមួយនឹងប្រធានាធិបតី

អភិបាលក្រុងវ៉ាស៊ីងតោន លោកស្រី Muriel Bowser កាលពីថ្ងៃទី6មិថុនាកន្លងទៅ បានចូលរួមធ្វើបាតុកម្មនៅលើដងផ្លូវក្នុងរដ្ឋធានី ក្រោយពីមានករណីប៉ូលិសសង្កត់កសម្លាប់ George Floyd។

“យើងទាំងអស់គ្នាគួរតែតាមដាននូវអ្វីដែលកំពុងកើតឡើងនៅរដ្ឋធានីវ៉ាស៊ីងតោន ព្រោះថាយើងមិនចង់ឱ្យអាជ្ញាធរធ្វើរឿងនេះទៅលើជនជាតិអាមេរិកាំងណាម្នាក់ផ្សេងទៀតនោះឡើយ” លោកស្រី Bowser មានប្រសាសន៍នៅពេលចូលរួមដង្ហែក្បួនបាតុកម្មជាមួយក្រុមបាតុករ។

អភិបាលក្រុងវ៉ាស៊ីងតោន លោកស្រី Bowser និងប្រធានាធិបតី Trump កាលពីប៉ុន្មានថ្ងៃមុននេះ បានប្រកែកគ្នាទាក់ទិននឹងការដែលម្ចាស់សេតវិមានបង្កើនវត្តមានរបស់កងទ័ពនៅរដ្ឋធានី ខណៈបាតុកម្មពាសពេញប្រទេសកំពុងកើតឡើង។ លោកស្រីអភិបាល បានទាមទារឱ្យដកកងទ័ពដែលត្រូវបានបញ្ជូនមកពីរដ្ឋនានា ចេញពីរដ្ឋធានីវ៉ាស៊ីងតោន។

នៅក្នុងលិខិតមួយច្បាប់ដែលបានផ្ញើជូនប្រធានាធិបតី Trump លោកស្រី Bowser យល់ថា វត្តមានរបស់កងទ័ពនឹងធ្វើឱ្យបាតុករកាន់តែក្ដៅក្រហាយ។

លោក Trump ក៏បានឆ្លើយតបទៅនឹងលោកស្រី Bowser តាមរយៈ Twitter ដោយហៅលោកស្រីថា “អសមត្ថភាព”។ ជាងនេះ លោក Trump ថែមទាំងបានព្រមានថា បើសិនលោកស្រី Bowser មិនប្រព្រឹត្តល្អជាមួយកងទ័ពទេ នោះលោកនឹងបញ្ជូនទាហានជាច្រើនមកកាន់រដ្ឋធានីបន្ថែមទៀត៕

ប្រភព៖ សារព័ត៌មានបរទេស

June 7, 2020

កម្ពុជារកឃើញអ្នកឆ្លងCOVID-19 មួយករណីថ្មីទៀត ខណៈប្រទេសខ្លះនៅអាស៊ីអាគ្នេយ៍រកឃើញអ្នកផ្ទុកវីរុសជាបន្តបន្ទាប់

ក្រសួងសុខាភិបាលបានឱ្យដឹងថា កម្ពុជាបានរកឃើញអ្នកផ្ទុកវីរុសCOVID-19 មួយករណីថ្មីទៀត ដែលកើតលើប្រជាពលរដ្ឋខ្មែរ មានសញ្ជាតិបារាំង នៅក្រុងភ្នំពេញ។

សេចក្ដីប្រកាសបានឱ្យដឹងថា បុរសដែលមានផ្ទុកវីរុសCOVID-19នេះ បានធ្វើដំណើរពីប្រទេសបារាំងចូលមកកម្ពុជាតាមជើងហោះហើរពីកូរ៉េខាងត្បូង។ អ្នកជំងឺរូបនេះ បានមកដល់ភ្នំពេញនៅថ្ងៃទី24ឧសភា2020 និងត្រូវបានរកឃើញថាមានផ្ទុកវីរុសCOVID-19 កាលពីម្សិលមិញ (6 ខែមិថុនា)។

គិតមកដល់បច្ចុប្បន្ន កម្ពុជាបានរកឃើញអ្នកផ្ទុកវីរុសCOVID-19 ចំនួន126នាក់ ក្នុងនោះមាន123នាក់បានជាសះស្បើយ ខណៈ 3នាក់កំពុងទទួលការព្យាបាល។

នៅក្នុងតំបន់អាស៊ីអាគ្នេយ៍ដដែល ប្រទេសសិង្ហបុរី គឺជាសម្បុកមេរោគCOVID-19 ធំជាងគេបង្អស់ ដោយមានអ្នកជំងឺសរុប37,527នាក់ ពោលគឺកើន344នាក់បើធៀបនឹងមុននេះមួយថ្ងៃ។ ប្រទេសនេះ មានអ្នកស្លាប់ដោយសារវីរុសCOVID-19 សរុប25នាក់។

ឥណ្ឌូនេស៊ីឈរលំដាប់ទី2ក្នុងតំបន់ ដោយមានអ្នកជំងឺសរុប30,514នាក់ និងអ្នកស្លាប់សរុប1,801នាក់ ក្នុងនោះមានអ្នកជំងឺថ្មីចំនួន993នាក់និងអ្នកស្លាប់ថ្មី31នាក់ត្រូវបានរកឃើញក្នុងអំឡុង24ម៉ោងចុងក្រោយនេះ។

ហ្វីលីពីនជាសម្បុកមេរោគធំជាងគេលំដាប់ទី3នៅអាស៊ីអាគ្នេយ៍ ដោយមានអ្នកជំងឺសរុប21,340នាក់ អ្នកស្លាប់សរុប994នាក់។

តំបន់អាស៊ីភាគអាគ្នេយ៍មានប្រទេសចំនួន4មិនទាន់មានករណីស្លាប់ដោយសារវីរុសCOVID-19 នៅឡើយ ក្នុងនោះរួមមាន កម្ពុជា វៀតណាម ឡាវ និងទីម័រខាងកើត៕

June 7, 2020

ជាង 400,000នាក់ស្លាប់ដោយសារ COVID-19 នៅទូទាំងពិភពលោក

ពិភពលោក មានអ្នកស្លាប់ជាង 400,000នាក់ នៅក្នុងចំណោមអ្នកបានឆ្លងវីរុសCOVID-19 ជាង 6.9លាននាក់ ខណៈអ្នកបានជាសះស្បើយមានចំនួនជាង 3,400,000នាក់។

213ប្រទេសនិងដែនដីក្នុងពិភពលោក បានរាយការណ៍ថា បានរកឃើញអ្នកផ្ទុកវីរុសCOVID-19 សរុប6,948,800នាក់ និងអ្នកស្លាប់សរុប401,047នាក់ ក្នុងនោះមានអ្នកជំងឺថ្មីចំនួន125,523នាក់ និងអ្នកស្លាប់ថ្មីចំនួន3,723នាក់ត្រូវបានរកឃើញក្នុងរយៈពេល24ម៉ោងចុងក្រោយនេះ។ ចំណែកអ្នកជំងឺដែលបានរួចពីការប្រឈមនឹងការស្លាប់ មានចំនួន3,402,531នាក់។

ទ្វីបអាមេរិកបានរកឃើញអ្នកផ្ទុកវីរុសCOVID-19 សរុប 3,372,437នាក់ ខណៈទ្វីបអឹរ៉ុបមាន2,078,732នាក់ អាស៊ីមាន1,326,435នាក់ និងអាហ្វ្រិកមាន185,996នាក់។

សហរដ្ឋអាមេរិកនៅតែជាសម្បុកមេរោគCOVID-19 ធំជាងគេបង្អស់ក្នុងពិភពលោក ដោយមានអ្នកជំងឺសរុប 1,986,646នាក់ និងអ្នកស្លាប់សរុប112,055នាក់។ ក្នុងរយៈពេល24ម៉ោងចុងក្រោយនេះ សហរដ្ឋអាមេរិករកឃើញអ្នកជំងឺថ្មី 33,970នាក់ និងអ្នកស្លាប់ថ្មីចំនួន682នាក់។

ប្រទេសប្រេស៊ីឈរលំដាប់ទី2 ដោយមានអ្នកជំងឺសរុប 675,830នាក់ និងអ្នកស្លាប់សរុប 36,026នាក់ ខណៈដែលរុស្ស៊ីឈរលំដាប់ទី3 ដោយមានអ្នកជំងឺសរុប 458,689នាក់ និងអ្នកស្លាប់សរុប 5,725នាក់៕

June 7, 2020

“មួយនាទីស្លាប់ម្នាក់” ដោយសារ COVID-19! ប្រធានាធិបតីប្រេស៊ីល គំរាមដកខ្លួនចេញពី WHO

ប្រធានាធិបតីប្រេស៊ីល លោក Jair Bolsonaro គំរាមថានឹងដកប្រទេសនេះចេញពីអង្គការសុខភាពពិភពលោក (WHO) ក្នុងគ្រាដែលមានអ្នកស្លាប់ដល់ទៅជាង 35,000នាក់ ដោយសារតែវីរុសCOVID-19។

មានប្រសាសន៍នៅចំពោះមុខក្រុមអ្នកសារព័ត៌មានកាលពីថ្ងៃទី5មិថុនា ប្រធានាធិបតី Jair Bolsonaro បានឱ្យដឹងថា ប្រេស៊ីល នឹងពិចារណាទៅលើការដកខ្លួនចេញពី WHO បើសិនអង្គការសុខភាពពិភពលោកនេះ មិនព្រមបញ្ឈប់សកម្មភាពបក្សពួកនិយម ទាក់ទិននឹងនយោបាយ។

កាលពីខែមុន ប្រធានាធិបតី Donald Trump ដែលជាសម្ព័ន្ធមិត្តនយោបាយរបស់ប្រធានាធិបតី Bolsonaro ក៏បានប្រកាសផ្ដាច់ទំនាក់ទំនងជាមួយ WHO បន្ទាប់ពីបានចោទអង្គការនេះថាជា “អាយ៉ង” របស់ចិន។

ប្រកាសរបស់ប្រធានាធិបតីប្រេស៊ីលត្រូវបានធ្វើឡើង ក្រោយពី WHO បានព្រមានដល់រដ្ឋាភិបាលបណ្ដាប្រទេស ពិសេសនៅតំបន់អាមេរិកខាងត្បូង អំពីហានិភ័យដែលអាចកើតឡើង បើសិនជាដកបម្រាមគោចរនៅមុនពេលអាចគ្រប់គ្រងល្បឿននៃការរាលដាលរបស់វីរុសCOVID-19។

នៅក្នុងសន្និសីទសារព័ត៌មានមួយនៅទីក្រុងហ្សឺណែវ ប្រទេសស៊្វីស លោកស្រី Harris អ្នកនាំពាក្យរបស់ WHO បានថ្លែងថា “មេរោគ និងការផ្ទុះឆ្លងរាលដាលនៃមេរោគ នៅអាមេរិកខាងត្បូងគឺពិតជាគួរឱ្យព្រួយបារម្ភជាទីបំផុត”។

ក៏ប៉ុន្តែ ប្រធានាធិបតីប្រេស៊ីល នៅតែជ្រើសរើសវិធីផ្ទុយពីអ្វីដែល WHO បានព្រមាន។ លោក Bolsonaro បន្តលើកទឹកចិត្តឱ្យបណ្ដារដ្ឋ បើកទ្វារសេដ្ឋកិច្ចឡើងវិញ ខណៈដែលប្រទេសនេះនៅតែជាសម្បុកមេរោគ COVID-19 ធំជាងគេលំដាប់ទី2ក្នុងពិភពលោក។

យោងតាមស្ថិតិរបស់ Worldometers ប្រទេសប្រេស៊ីលបច្ចុប្បន្ន មានអ្នកជំងឺCOVID-19 ដល់ទៅ646,006នាក់ ខណៈដែលអ្នកស្លាប់ដោយសារវីរុសនេះក៏បានកើនដល់ 35,047នាក់។

អត្ថបទដែលចុះផ្សាយនៅលើទំព័រមុខរបស់កាសែត Folha de S.Paulo បានឱ្យដឹងថា 100ថ្ងៃបានកន្លងផុតទៅរាប់ចាប់តាំងពីប្រធានាធិបតី Bolsonaro អធិប្បាយថា “COVID-19 គ្រាន់តែជាជំងឺផ្ដាសាយធម្មតាប៉ុណ្ណោះ” មេរោគនេះបាន “សម្លាប់ពលរដ្ឋប្រេស៊ីលម្នាក់ ជារៀងរាល់1នាទីកន្លងផុតទៅ”។

អត្ថបទខាងលើបន្តទៀតថា “ក្នុងពេលដែលលោកអ្នកកំពុងអានអត្ថបទនេះ គឺមានពលរដ្ឋប្រេស៊ីលម្នាក់បានស្លាប់ដោយសារ COVID-19″៕

ប្រភព៖ សារព័ត៌មានបរទេស

June 6, 2020

ក្ដីសង្ឃឹមសម្រាប់សេដ្ឋកិច្ចសហរដ្ឋអាមេរិក បានងើបឡើងវិញហើយ បន្ទាប់ពីតួលេខការងារបានប្រសើរឡើងមិនធ្លាប់មានពីមុនមក

តួលេខស្ដីអំពី “ចំនួនការងារនៅសហរដ្ឋអាមេរិកដែលបានបង្កើតឡើងក្នុងខែឧសភា” មានចំនួនច្រើនជាងគេបង្អស់រាប់ចាប់ពីឆ្នាំ1939 ដែលនេះជាលើកទី2ហើយដែលចំនួនមុខតំណែងការងារបានកើនឡើងច្រើនជាប្រវត្តិសាស្ត្រ។

ក្រសួងការងាររបស់សហរដ្ឋអាមេរិក កាលពីម្សិលមិញ (5មិថុនា) បានប្រកាសថា ខឿនសេដ្ឋកិច្ចនៃប្រទេសនេះបានបង្កើតការងារចំនួន2.5លានកន្លែងនៅក្នុងខែឧសភាកន្លងទៅ។ អត្រានៃការបាត់បង់ការងារក៏បានថយចុះមកនៅត្រឹម13.3%។ ទិន្នន័យដែលបានឃ្លាតយ៉ាងឆ្ងាយពីការព្យាកររបស់ក្រុមសេដ្ឋវិទូនេះ បានបង្ហាញថា សហរដ្ឋអាមេរិកកំពុងបោះជំហានទៅជិតដល់ដំណាក់កាលសេដ្ឋកិច្ចមានកំណើនល្អប្រសើរឡើងវិញ។

មុននោះ ក្រុមអ្នកវិភាគក្នុងការសិក្សាស្រាវជ្រាវរបស់ Dow Jones យល់ថា ចំនួនការងារដែលនឹងត្រូវបាត់ក្នុងខែឧសភានឹងមានប្រមាណជា 8.33លានកន្លែង។ អត្រាបាត់បង់ការងារក៏នឹងកើតដល់19.5%។ បើសិនជាតួលេខនេះបានក្លាយជាការពិត នោះវានឹងក្លាយជាខែមួយដ៏អាក្រក់បំផុតរាប់ចាប់ពីមហាវិបត្តិសេដ្ឋកិច្ចក្នុងទសវត្សរ៍ឆ្នាំ1930។

ប៉ុន្តែ ជាក់ស្ដែង ចំនួនការងារដែលត្រូវបានបង្កើតឡើងក្នុងខែឧសភា មានកំណើនខ្ពស់បំផុត គិតចាប់ពីឆ្នាំ1939។ សហរដ្ឋអាមេរិកធ្លាប់មានការកើនឡើងនៃចំនួនការងារដល់ទៅរាប់លានជាលើកចុងក្រោយបង្អស់ គឺនៅក្នុងខែកញ្ញា ឆ្នាំ1983។

លោក Trump បង្ហាញហត្ថលេខារបស់លោកនៅលើ ច្បាប់សម្រាប់កម្មវិធីការពារប្រាក់ខែឆ្នាំ2020 នៅក្នុងសន្និសីទសារព័ត៌មានស្ដីអំពីសេដ្ឋកិច្ច ដែលត្រូវបានធ្វើឡើងនៅសេតវិមានកាលពីថ្ងៃទី5មិថុនាកន្លងទៅ។ (រូបថត៖ MANDEL NGAN / AFP)

ទាក់ទិននឹងការព្យាករខុសអំពីការបាត់បង់ការងារ CNN បានបកស្រាយថា នេះគឺជាវិបត្តិដែលមិនធ្លាប់មានពីមុនមក ធ្វើឱ្យក្រុមសេដ្ឋវិទូពិបាកក្នុងការព្យាករឱ្យបានត្រឹមត្រូវទៅតាមការប្រែប្រួលជាក់ស្ដែង។ ហើយបើទោះជាតួលេខក្នុងខែឧសភាគួរឱ្យមានក្ដីសង្ឃឹមក៏ដោយ ក៏នៅមានកត្តាមិនប្រាកដប្រជាជាច្រើនផ្សេងទៀតដែលនាំឱ្យការព្យាករបន្តជួបការលំបាក។

ផ្សារហ៊ុនសហរដ្ឋអាមេរិកបានកើនឡើងខ្លាំង ក្រោយពីមានរបាយការណ៍ស្ដីអំពីការងារខាងលើ។ អត្រាប្រាក់ចំណេញពីមូលបត្ររបស់រដ្ឋាភិបាលអាមេរិកាំងក៏កើនឡើងខ្ពស់ផងដែរ។ ប្រាក់ចំណេញសម្រាប់មូលបត្រប្រភេទ10ឆ្នាំ បានកើន 0.91% កាលពីម្សិលមិញ (5មិថុនា)។

ប្រធានាធិបតី Donald Trump ពេញចិត្តនឹងដំណឹងខាងលើនេះណាស់។ លោកបានសរសេរនៅលើទំព័រ Twitter ថា “នេះគឺជាតួលេខគួរឱ្យចាប់អារម្មណ៍ជាទីបផុត។ ពិតជាគួរឱ្យសប្បាយចិត្ត។ ផ្សារហ៊ុនពិតជាល្អប្រសើរ”។

“វាហាក់ដូចជាការខួចខាតពីបម្រាមគោចរទូទាំងប្រទេស មិនមានសភាពធ្ងន់ធ្ងរខ្លាំង និងមិនអូសបន្លាយយូរដូចយើងរាល់គ្នាបានព្រួយបារម្ភកាលពីមួយខែមុន” នេះបើតាមការអះអាងរបស់ Scott Clemons អ្នកយុទ្ធសាស្ត្រផ្នែកវិនិយោគមកពី Brown Brothers Harriman ដែលជាធនាគារឯកជនធំជាងគេបង្អស់នៅសហរដ្ឋអាមេរិក។

Brown Brothers Harriman ជាធនាគារឯកជនធំជាងគេបង្អស់នៅសហរដ្ឋអាមេរិក

ចំណែក Tony Bedikian នាយកទីផ្សារសកលនៃធនាគារ Citizens Bank បានឱ្យដឹងថា “នៅពេលទប់ស្កាត់ការផ្ទុះឆ្លងជាលើកទី2របស់ COVID-19 សេដ្ឋកិច្ចសហរដ្ឋអាមេរិកប្រហែលជាដល់ពេលត្រូវប្រែប្រួលហើយ។ ជាភ័ស្តុតាងនោះគឺតួលេខនៃកំណើនការងារដ៏គួរឱ្យភ្ញាក់ផ្អើលនៅក្នុងថ្ងៃនេះ បើទោះជាយើងនៅតែត្រូវរង់ចាំមើលដំណាក់កាលធម្មតា”។

វិស័យកម្សាន្ត និងភោជនីយដ្ឋាន សណ្ឋាគារ បានរួមចំណែកជិតពាក់កណ្ដាលនៃកំណើនការងារក្នុងខែឧសភានៅសហរដ្ឋអាមេរិក។ បុគ្គលិកចំនួន 1.2លាននាក់ត្រូវបានអនុញ្ញាតឱ្យត្រលប់ចូលធ្វើការវិញ។ ការងារនៅក្នុងបណ្ដាហាងបារ និងភោជនីយដ្ឋានបានកើនឡើងខ្ពស់ បន្ទាប់ពីរដ្ឋនានាចាប់ផ្ដើមបន្ធូរបន្ថយការរក្សាគម្លាតសង្គម។

វិស័យដែលទទួលបានផលប្រយោជន៍ច្រើនលំដាប់ទី2 គឺសំណង់ ដោយបង្កើតការងារចំនួន 464,000មុខតំណែងបន្ថែមទៀត។ ចំណែកវិស័យអប់រំ និងសុខាភិបាល បានបង្កើតការងារបន្ថែមចំនួន 424,000មុខតំណែងផងដែរ ខណៈការងារនៅក្នុងវិស័យលក់រាយក៏កើន 368,000មុខតំណែង។

“ក្រុមហ៊ុននានាកំពុងចាប់ផ្ដើមជ្រើសរើសបុគ្គលិកឱ្យចូលធ្វើការឡើងវិញ ជាមួយនឹងចំនួនច្រើនជាងការព្យាករកន្លងមក។ និន្នាការនេះនឹងបន្តនៅពេលបម្រាមគោចរត្រូវបានកាត់បន្ថយនៅទូទាំងប្រទេស។ បើនិយាយឱ្យច្បាស់ជាងនេះ គឺថា អ្វីៗទាំងអស់នៅតែឃ្លាតឆ្ងាយពីស្ថានភាពធម្មតា។ ប៉ុន្តែ បើសិនជាអាចរក្សាបានល្បឿននៃការកែលម្អនេះ នោះក្ដីសង្ឃឹមនៅក្នុងដំណាក់កាលពាក់កណ្ដាលចុងឆ្នាំនេះនឹងមានមូលដ្ឋានច្បាស់លាស់ជាងបច្ចុប្បន្ន”៕

ប្រភព៖ CNBC

June 6, 2020

នាយករដ្ឋមន្ត្រីកាណាដា លុតជង្គង់ជាមួយក្រុមបាតុករ

នាយករដ្ឋមន្ត្រីកាណាដា លោក Trudeau កាលពីថ្ងៃទី5មិថុនាកន្លងទៅ បានលុតជង្គង់ជាមួយនឹងក្រុមបាតុករ នៅខាងមុខវិមានរដ្ឋសភាប្រទេសនេះ ដើម្បីសម្ដែងការប្រឆាំងទៅនឹងការរើសអើងពូជសាសន៍ និងអំពើហិស្សារបស់ប៉ូលិស។

ក្រុមបាតុករនៅប្រទេសកាណាដា មានបំណងបង្ហាញអំពីសាមគ្គីភាព និងគាំទ្រចំពោះបាតុកម្មដែលកំពុងកើតឡើងនៅសហរដ្ឋអាមេរិក ក្រោយពីការស្លាប់របស់ George Floyd ដែលជាជនជាតិស្បែកខ្មៅម្នាក់រស់នៅក្នុងទីក្រុង Minneapolis រដ្ឋ Minnesota កាលពីសប្ដាហ៍មុន។

នាយករដ្ឋមន្ត្រីកាណាដា លោក Justin Trudeau កាន់អាវមួយដែលមានអក្សរ “Black Lives Matter” (ឈ្មោះនៃចលនាប្រឆាំងនឹងការរើសអើងពូជសាសន៍ដែលបង្កើតឡើងដោយសហគមន៍ជនជាតិអាមេរិកាំងដើមកំណើតអាហ្វ្រិក) និងពាក់ម៉ាស់ បានស្រែកជ័យឃោសន៍ជាមួយនឹងក្រុមបាតុកររាប់ពាន់នាក់ដែលបង្ហាញខ្លួននៅក្បែរស្ថានទូតសហរដ្ឋអាមេរិកនៅទីក្រុង Ottawa។ ក្រោយមក ក្រុមបាតុករនាំគ្នាឈរស្ងៀមក្នុងរយៈពេល8នាទីនិង46វិនាទី ដែលនេះជារយៈពេលដែលប៉ូលិសអាមេរិកាំងឈ្មោះ Derek Chauvin បានយកជង្គង់សង្កត់ក George Floyd ធ្វើឱ្យបុរសស្បែកខ្មៅម្នាក់នេះស្រែកអង្វរថា “ខ្ញុំមិនអាចដកដង្ហើម” មុនពេលដាច់ខ្យល់ស្លាប់។

រដ្ឋមន្ត្រីក្រសួងគ្រួសាររបស់ប្រទេសកាណាដា លោក Ahmed Hussen ដែលបានចូលរួមធ្វើបាតុកម្មនៅ Ottawa ជាមួយនាយករដ្ឋមន្ត្រីកាណាដាដែរនោះ បានថ្លែងថា “ចូរសម្លឹងមើលសម្បុរស្បែករបស់ក្រុមបាតុករនេះ។ មិនត្រឹមតែជនជាតិស្បែកខ្មៅកាណាដានោះទេ ប៉ុន្តែ មនុស្សទាំងអស់ ជឿថា ជនជាតិស្បែកខ្មៅគួរតែបានរស់រានមានជីវិតនឹងគេ”។

នាយករដ្ឋមន្ត្រីប្រទេសកាណាដា លោក Justin Trudeau លុតជង្គង់ជាមួយក្រុមបាតុករ

បាតុកម្មដូចគ្នានេះក៏កំពុងតែត្រូវបានធ្វើឡើងនៅក្នុងទីក្រុងជាច្រើនផ្សេងទៀតរបស់ប្រទេសកាណាដា។ នៅទីក្រុង Toronto ស្នងការប៉ូលិស Mark Saunders រួមនឹងមន្ត្រីប៉ូលីសជាច្រើនក៏បានលុតជង្គង់ជាមួយនឹងក្រុមបាតុករផងដែរ។ លោក Mark Saunders ថ្លែងថា “យើងបានមើលឃើញ ហើយយើងក៏កំពុងស្ដាប់។ យើងត្រូវការសាមគ្គីភាពដើម្បីបង្កើតការផ្លាស់ប្ដូរ”។

កាលពីថ្ងៃទី2មិថុនា នាយករដ្ឋមន្ត្រី Trudeau របស់ប្រទេសកាណាដា បាននៅស្ងៀមរយៈពេលជាង20វិនាទីនៅពេលត្រូវបានសួរអំពីការដែលលោក Trump បញ្ជាឱ្យកងទ័ពបំបែកហ្វូងបាតុករ។ លោក Trudeau បង្ហាញទឹកមុខហាក់មិនសប្បាយចិត្តជាមួយនឹងប្រធានាធិបតីសហរដ្ឋអាមេរិក ហើយចុងក្រោយលោកក៏បានសម្រេចចិត្តគេចចេញពីសំណួរនេះ។

នាយករដ្ឋមន្ត្រីកាណាដាថ្លែងថា “យើងទាំងអស់គ្នាកំពុងតាមដានអ្វីដែលកំពុងកើតឡើងនៅលើទឹកដីសហរដ្ឋអាមេរិកប្រកបដោយការរន្ធត់។ នេះគឺជាពេលដែលត្រូវទាញអ្នករាល់គ្នាឱ្យនៅជិតគ្នា ប៉ុន្តែក៏ជាពេលដែលត្រូវស្ដាប់។ នេះគឺជាពេលដែលត្រូវយល់អំពីអ្វីទៅដែលហៅថាអយុត្តិធម៌ ដែលបានកើតឡើងជាច្រើនឆ្នាំ ច្រើនទសវត្សរ៍កន្លងមក”៕

ប្រភព៖ សារព័ត៌មានបរទេស

June 6, 2020

ជាង 6.8លាននាក់នៅទូទាំងពិភពលោក បានឆ្លងCOVID-19

ពិភពលោកទាំងមូលមានអ្នកជំងឺជាង 397,000នាក់បានបាត់បង់ជីវិត ក្នុងចំណោមអ្នកជំងឹCOVID-19 ជាង6.8លាននាក់ ខណៈប្រទេសដែលមានអ្នកជំងឺនេះលើសពី100,000នាក់ បានកើនដល់14ប្រទេស។

ប្រទេស និងដែនដីចំនួន213 បានរាយការណ៍ថា បានរកឃើញអ្នកឆ្លងវីរុសCOVID-19 ចំនួន 6,823,277នាក់ និងអ្នកស្លាប់ដោយសារវីរុសនេះមានចំនួន 397,324នាក់ ក្នុងនោះអ្នកជំងឺកើន142,924នាក់ និងអ្នកស្លាប់កើន5,357នាក់បើធៀបនឹងម្សិលមិញ។ ចំណែកអ្នកបានជាសះស្បើយមានចំនួន 3,311,933នាក់។

ទ្វីបអាមេរិកមានអ្នកជំងឺCOVID-19 សរុប 3,296,109នាក់ ខណៈទ្វីបអឺរ៉ុបមាន2,062,121នាក់ អាស៊ីមាន1,292,123នាក់ និងអាហ្វ្រិកមាន179,309នាក់។

ប្រទេសដែលបានរកឃើញអ្នកផ្ទុកវីរុសCOVID-19 លើសពី100,000នាក់ បានកើនដល់14ប្រទេស រួមមាន សហរដ្ឋអាមេរិក ប្រេស៊ីល រុស្ស៊ី អេស្ប៉ាញ់ អង់គ្លេស អ៊ីតាលី ឥណ្ឌា អាល្លឺម៉ង់ ប៉េរូ ទួរគី អ៊ីរ៉ង់ បារ៉ាំង ឈីលី និងម៉ិកស៊ិក៕

ប្រភព៖ សារព័ត៌មានបរទេស

June 6, 2020

រន្ធត់! បាក់ច្រាំងសមុទ្រនៅន័រវ៉ែស បណ្ដាលឱ្យផ្ទះ8ខ្នងត្រូវធ្លាក់ចូលសាគរ(វីដេអូ)

តំបន់ដីមួយកន្លែងដែលមានផ្ទះចំនួន8ខ្នងនៅទីរួមស្រុក Alta ក្នុងតំបន់ Finnmark ត្រូវបានដីអូសទាញទម្លាក់ទៅក្នុងទឹក នៅពេលច្រាំងសមុទ្របាក់ជ្រាលចូលទៅក្នុងសមុទ្រ ប៉ុន្តែមិនទាន់ដឹងថា មានអ្នកស្លាប់ប៉ុន្មាននាក់នៅឡើយ។

វីដេអូមួយត្រូវបានបង្ហោះនៅលើបណ្ដាញសង្គមក្នុងថ្ងៃទី5 ខែមិថុនា បង្ហាញថា មានហេតុការណ៍បាក់ស្រុតដីដ៏ធំមួយបណ្ដាលឱ្យផ្ទះជាច្រើនខ្នងបានធ្លាក់ទៅក្នុងសមុទ្រ ក៏គួរឱ្យតក់ស្លុត។ ដីដែលបានស្រុតចូលសមុទ្រមានទំហំ800ម៉ែត្រក្រឡា និងជម្រៅ40ម៉ែត្រនៅតំបន់ក្បែរឆ្នេរសមុទ្រ។

មន្ត្រីប៉ូលិសម្នាក់ឈ្មោះ Torfinn Halvari នៅតំបន់ Finnmark បានឱ្យដឹងថា “ក្រុមការងាររបស់យើងកំពុងមានវត្តមាននៅកន្លែងកើតហេតុដើម្បីវាយតម្លៃអំពីទំហំគ្រោះថ្នាក់នៃហេតុការណ៍នេះ ក៏ដូចជាហានិភ័យនៃគ្រោះបាក់ដីថ្មីផ្សេងទៀត”។

បន្ទាប់ពីហេតុការណ៍ស្រុតដីដ៏ធំនេះ ក៏មានហេតុការណ៍ស្រុតដីតួចៗជាបន្តបន្ទាប់ផងដែរ។ ប្រជាជនក្នុងតំបន់ក្បែរៗកន្លែងកើតហេតុត្រូវបានជម្លៀសទៅកាន់កន្លែងទីសុវត្ថិភាព។ មកដល់ពេលនេះ មិនទាន់មានសេចក្ដីរាយការណ៍អំពីការស្លាប់នៅឡើយ។

June 5, 2020

iPhone 13 នឹងមានការ “ប្រែកាយ” ដ៏ធំ ខណៈវត្តមានរបស់ iPhone 12 ត្រូវបានពន្យារពេល

ទូរស័ព្ទឆ្លាតវៃ iPhone ថ្មី ដែលនឹងចេញនៅឆ្នាំ2021 នឹងមានរូបរាងថ្មីស្ទើរទាំងស្រុង ដោយសារ “ក្បាលឆក” របស់វាត្រូវបានបំបាត់ ចំណែកកាមេរ៉ា និងសេនសឺរ នឹងត្រូវស្ថិតក្នុងស្រទាប់អេក្រង់។

Mac Otakara ដែលជាគេហទំព័រមួយធ្លាប់បានបញ្ចេញព័ត៌មានព្យាករត្រឹមត្រូវបំផុតអំពីឧបករណ៍មិនទាន់បង្ហាញខ្លួនរបស់ Apple បានចែករំលែកវីដេអូដែលបង្ហាញអំពីរូបរាងរបស់ iPhone 13 ដែលនឹងចេញលក់នៅឆ្នាំ2021។ ទំព័រនេះបានបង្ហើបឱ្យដឹងអំពីរូបរាង iPhone 13 ដែលត្រូវបានបង្កើតឡើងដោយម៉ាស៊ីនបោះពុម្ភ 3D យោងទៅតាមព័ត៌មានបែកធ្លាយពីផ្ទៃក្នុងរបស់ក្រុមហ៊ុន Apple។

ប្រភពព័ត៌មានបានឱ្យដឹងថា iPhone 13 នឹង “ប្រែកាយ” ទាំងស្រុង ដោយមានរចនារូបរាងជ្រុងដូចទៅនឹង iPhone 5 និងប្រើប្រាស់រន្ធ USB Type C ជំនួសឱ្យ Lightning នាបច្ចុប្បន្ន។ រីឯ ទីតាំងរបស់គ្រាប់ចុចរឹង គ្រាប់ចុចបន្ថែម-បន្ថយសម្លេង និង speaker ក្រៅ នឹងរក្សានៅកន្លែងដដែល។

ការផ្លាស់ប្ដូរធំបំផុតនៅលើ iPhone 13 ឆ្នាំ2021 នោះគឺអេក្រង់ពេញគែមតែម្ដង ដោយសារអេក្រង់ឆកនឹងត្រូវបានបំបាត់។ ប្រភពព័ត៌មានឱ្យដឹងថា បណ្ដុំកាមេរ៉ាខាងមុខ និងសេនសឺរ TrueDepth ប្រើប្រាស់សម្រាប់ Face ID នឹងត្រូវបានលាក់នៅក្រោមអេក្រង់។ ដើម្បីធ្វើបានដូច្នេះ Apple នឹងប្រើបច្ចេកវិទ្យាអេក្រង់របស់ក្រុមហ៊ុន Samsung។

ប៉ុន្តែ ប្រភពព័ត៌មានក៏បានឱ្យដឹងដែរថា Apple ក៏នឹងអាចងាកទៅប្រើសេនសឺរស្កេនក្រយៅដៃផងដែរ។ Touch ID នៅក្រោមស្រទាបអេក្រង់ ជំនួសឱ្យ Face ID ព្រោះថាបច្ចុប្បន្ន បច្ចេកវិទ្យាបង្កប់សេនសឺរក្រោមអេក្រង់គឺមានរួចហើយ។ ការយក Touch ID ទៅដាក់ក្នុងអេក្រង់ មានភាពងាយស្រួលជាងធៀបនឹងការយកសេនសឺរស្កេនផ្ទៃមុខ និងកាមេរ៉ាទៅបង្កប់ក្រោមអេក្រង់។

Mac Otakara ក៏បានឱ្យដឹងថា កំណែតូចបំផុតរបស់ iPhone 13 នឹងមានអេក្រង់ 5.5 inch មិនមែន 5,8 inch ដូចទៅនឹង iPhone 11 Pro ឬ 5,4 inch ដូច iPhone 12 ដែលជិតនឹងបង្ហាញវត្តមាននោះទេ។

នៅខ្នងទូរស័ព្ទ iPhone 13 ក៏មានការផ្លាស់ប្ដូរមួយចំនួនទាក់ទិននឹងកាមេរ៉ា។ ដំណឹងបែកធ្លាយបានបង្ហាញថា iPhone 13 នឹងមានគ្រាប់ចំនួន5ចំណុចនៅខាងក្រោយ ដោយតម្រៀបជារាងជើងក្អែក។ Phonearena ឱ្យដឹងថា iPhone 13 អាចនឹងមានកាមេរ៉ាចំនួន4នៅជ្រុងទាំង4ក្នុងបណ្ដុំកាមេរ៉ា ហើយនៅកណ្ដាលគឺជាសេនសឺរ LIDAR ប្រើសម្រាប់វាស់ជម្រៅរូបភាព និងសម្រាប់ការងារទាក់ទងនឹង AR រួមនិងអំពូលភ្លើង flash ផងដែរ។

បច្ចុប្បន្ន ព័ត៌មានស្ដីអំពី iPhone 13 នៅមានកំណត់នៅឡើយ។ យោងតាមកាលបរិច្ឆេទនៃការបង្ហាញខ្លួនជាប្រចាំឆ្នាំ របស់ Apple ស្មាតហ្វូននេះអាចត្រូវបានឧទ្ទេសនាមនៅក្នុងខែកញ្ញា ឆ្នាំ2021។

និយាយអំពីស្មាតហ្វូនថ្មីរបស់ Apple សម្រាប់ឆ្នាំនេះវិញ ក្រុមហ៊ុននេះមានគម្រោងបញ្ចេញ iPhone 12 ចំនួន4កំណែ រួមមាន iPhone 12 ដែលមានរូបរាងតូចបំផុតត្រឹម5.4 inch និង iPhone 12, iPhone 12 Pro ដែលមានអេក្រង់ 6.1 inch រួមជាមួយនឹង iPhone 12 Pro Max មានអេក្រង់ 67 inch ដែលជាកំណែលំដាប់ខ្ពស់បំផុត។ ប៉ុន្តែ iPhone 12 ត្រូវបានពន្យារពេលដល់ត្រីមាសទី4 ព្រោះតែ COVID-19។ នេះបើតាមការចុះផ្សាយរបស់ 9to5mac ដែលបានដកស្រង់សម្ដី CEO របស់ Broadcom ដែលជាក្រុមហ៊ុនផ្គត់ផ្គង់ហាតវ៉ែរសម្រាប់ Apple៕

June 5, 2020

មហាសេដ្ឋីទី1 របស់វៀតណាម៖ VinFast និង VinSmart នឹងផ្ដោតការនាំចេញទៅកាន់សហរដ្ឋអាមេរិកតែប៉ុណ្ណោះ

លោក Pham Nhat Vuong ដែលជាមហាសេដ្ឋីវៀតណាម និងជាស្ថានិករបស់ក្រុមហ៊ុន Vingroup ថ្លែងថា នេះគឺជាការសាកល្បងសម្រាប់ប្រព័ន្ធទាំងមូល ព្រោះបើសិនផលិតផលមិនមានគុណភាព រីឯតម្លៃក៏មិនអាចប្រកួតប្រជែងបាន នោះនឹងមិនមានមូលហេតុអ្វីដើម្បីអាចរក្សាវត្តមានបានឡើយ។

កាលពីថ្ងៃទី28ឧសភា ក្រុមហ៊ុន Vingroup បានបើកកិច្ចប្រជុំជាមួយភាគហ៊ុនិកប្រចាំឆ្នាំ2020។ ក្នុងកិច្ចប្រជុំនេះ មហាសេដ្ឋី Phan Nhat Vuong អគ្គនាយកក្រុមហ៊ុន Vingroup បានឱ្យដឹងថា ក្រុមហ៊ុនបុត្រសម្ព័ន្ធ VinFast កំពុងសិក្សាស្រាវជ្រាវទីផ្សារនាំចេញ ខណៈដែល Vinsmart បាននាំចេញទៅកាន់ប្រទេសមួយចំនួនរួចហើយ។

រថយន្ត VinFast របស់ក្រុមហ៊ុនវៀតណាម Vingroup

ប៉ុន្តែ អំឡុងពេលបច្ចុប្បន្ន យុទ្ធសាស្ត្ររបស់ក្រុមហ៊ុន Vingroup សម្រាប់ VinFast និង Vinsmart នោះគឺផ្ដោតទៅលើទីផ្សារតែមួយគត់ គឺសហរដ្ឋអាមេរិក។ Vingroup ចាត់ទុកសហរដ្ឋអាមេរិកជាទីផ្សារសំខាន់បំផុត និងជាទីផ្សារដែលពិបាកប្រកួតប្រជែងបំផុត ព្រោះថា បើសិនជាទទួលបានជោគជ័យនៅក្នុងទីផ្សារបែបនេះ នោះការវាយលុកទីផ្សារផ្សេងទៀតនឹងជារឿងងាយស្រួល។

មហាសេដ្ឋីវៀតណាមដែលមានទ្រព្យ 6ពាន់លានដុល្លារ លោក Pham Nhat Vuong ថ្លែងថា “សម្រាប់ក្រុមហ៊ុនថ្មីដែលមានលក្ខណៈជា startup ដូច VinFast និង Vinsmart យើងដាក់គោលដៅយ៉ាងខ្ពស់ និងយ៉ាងម៉ត់ចត់”។

ក្រុមហ៊ុន Vinsmart ផលិតស្មាតហ្វូន និងឧបករណ៍បច្ចេកវិទ្យា

មហាសេដ្ឋីលំដាប់ទីមួយនៅវៀតណាមរូបនេះ បន្តថា Vingroup នឹងសុខចិត្តខាតក្នុងរយៈពេលពី3-5ឆ្នាំសម្រាប់វិស័យឧស្សាហកម្ម ហើយអាចស្រង់ដើមទុនបានមកវិញបានបន្ទាប់ពីដំណាក់កាលនោះ។ ក៏ប៉ុន្តែពេលនោះ Vingroup បានកាន់កាប់ទីផ្សារវៀតណាមបានយ៉ាងល្អទៅហើយ ចំណែកទីផ្សារសហរដ្ឋអាមេរិក យើងក៏មានកន្លែងមួយសម្រាប់ឈរជើងទៅហើយ។ គោលដៅនាបច្ចុប្បន្នរបស់ Vingroup គឺចំណែកទីផ្សារ មិនមែនប្រាក់ចំណេញនោះឡើយ។ Vingroup បានដំណើរការសាកល្បងរថយន្តអគ្គិសនីដំបូងរបស់ខ្លួន ហើយវិស័យ Smartphone ក៏បានលក់ចេញ 1.2លានគ្រឿងហើយដែរ។

ផែនការពាណិជ្ជកម្មរបស់ Vingroup សម្រាប់ឆ្នាំ2020នេះ គឺត្រូវរកចំណូលឱ្យបាន 145លានលានដុង (6,303,000,000ដុល្លារអាមេរិក) (កើន11% ធៀបនឹងឆ្នាំ2019) និងចំណេញក្រោយការបង់ពន្ធ ត្រូវឱ្យបាន5លានលានដុង (217,000,000ដុល្លារអាមេរិក) (ថយចុះ35%)។

A Vinhomes apartment complex in District 1, Ho Chi Minh City. Photo by Shutterstock/Evan_Unit01.

ក្រុមហ៊ុន Vingroup ឱ្យដឹងថា ក្នុងវិស័យអចលនទ្រព្យ ក្រុមហ៊ុនបុត្រសម្ព័ន្ធ Vinhomes នឹងបន្តបើកទ្វារលក់គម្រោងថ្មីៗដែលស្ថិតក្នុងមហាគម្រោង Vinhomes Ocean Park, Vinhomes Smart City និង Vinhomes Grand Park។ ចំណែកគម្រោង Vinhomes Wonder Park នៅរដ្ឋធានីហាណូយ ដែលជាគម្រោងតូចជាងខាងលើ ក៏ត្រូវបានដាក់លក់ផងដែរ ខណៈដែលក្រុមហ៊ុនបុត្រសម្ព័ន្ធ Vincom Retail ជំរុញការលក់រាយ និងការកម្សាន្តលំដាប់អន្តរជាតិជាមួយនឹងរូបមន្តប្លែកថ្មី ស្របពេលដែល Vinpearl ផ្ដោតទៅលើការជំរុញវិស័យពាណិជ្ជកម្ម៕

ប្រភព៖ សារព័ត៌មានបរទេស

June 5, 2020

Author: សឿន សំណាង