សឿន សំណាង - La Reine Media

WHO ប្រាប់ថា កូវីដ-19 ស្ថិតនៅឆ្ងាយណាស់ពីពាក្យថា “ចប់” និងបញ្ជាក់ថា សូម “កុំធ្លាក់ដៃឱ្យសោះ”

អង្គការសុខភាពពិភពលោក បានចេញមកបញ្ជាក់ថា តួលេខអ្នកឆ្លងមេរោគវីរុសកូរ៉ូណាប្រភេទថ្មី បានហក់ឡើងខ្លាំងបំផុតដល់ទៅជាង 136,000នាក់ កាលពីថ្ងៃអាទិត្យ(ទី7 មិថុនា)កន្លងទៅ ដែលតួលេខនេះ គឺជាការកើនឡើងរបស់អ្នកជំងឺដែលច្រើនបំផុតក្នុង 1ថ្ងៃ និងបានបង្ហាញឱ្យដឹងថា ការឆ្លងរាលដាលដ៏ធំរបស់វីរុសកូវីដ-19 កំពុងកាន់តែអាក្រក់ខ្លាំងឡើង ទូទាំងពិភពលោក។

លោក ថេដ្រូស អាត់ហាណូម គីប្រ៊ីយេស៊ុស ប្រធានអង្គការសុខភាពពិភពលោក បានថ្លែងថា រាប់មកដល់ខណៈពេលនេះ ការឆ្លងរាលដាលដ៏ធំមួយនេះ បានស៊ីពេលវេលាអស់ជាង 6ខែហើយ តែនេះ មិនទាន់ជាពេលវេលាសម្រាប់ប្រទេសណាមួយ គិតចង់បន្ធូរបន្ថយការប្រុងប្រយ័ត្ននោះឡើយ ដូច្នេះ ទើបយើងស្នើសុំឱ្យប្រទេសទាំងអស់ ចូរនៅតែព្យាយាមដំណើរការវិធានការក្នុងការគ្រប់គ្រងការឆ្លងរាលដាលរបស់វីរុសកូរ៉ូណាប្រភេទថ្មីនេះជាបន្តទៅទៀត។

លោក គីប្រ៊ីយេស៊ុស បានថ្លែងទៀតថា តាមរយៈចំនួនអ្នកឆ្លងមេរោគថ្មីទូទាំងពិភពលោកដែលហក់ឡើងច្រើនដល់ចំនួនជាង 136,000នាក់ កាលពីថ្ងៃអាទិត្យកន្លងទៅនោះ មានជិត 75% មកពី 10ប្រទេស ដែលភាគច្រើនស្ថិតនៅក្នុងទ្វីបអាមេរិក និងអាស៊ីខាងត្បូង។

ចំណែកលោក ម៉ៃក៍ រ៉ៃអាន់ ប្រធានផ្នែកស្ថានការណ៍អាសន្នរបស់អង្គការសុខភាពពិភពលោក បានថ្លែងថា ការសិក្សាស្រាវជ្រាវបកក្រោយ ពាក់ព័ន្ធនឹងការឆ្លងរាលដាលរបស់មេរោគកូវីដ-19 ជារឿងដែលយើងអាចរង់ចាំបាន តែអ្វីដែលយើងចាំបាច់ត្រូវផ្ដល់ចំណាប់អារម្មណ៍នាពេលបច្ចុប្បន្ននេះគឺ តើយើងត្រូវធ្វើយ៉ាងណានៅថ្ងៃនេះ ដើម្បីការពារមិនឱ្យមានការឆ្លងរាលដាល រលកទី2។

លោក រ៉ៃអាន់ បានបន្តថា ស្ថានការណ៍ឆ្លងមេរោគនៅក្នុងអាមេរិកកណ្ដាល នៅតែកើនឡើងឥតឈប់ឈរ និងមានភាពស្មុគស្មាញនៃការចម្លងទៀតផង។ ខណៈនេះ គឺជាអំឡុងពេលដែលគួរឱ្យព្រួយកង្វល់បំផុត និងទាមទារឱ្យរដ្ឋបាលនៃប្រទេសនីមួយៗ ត្រូវបង្ហាញពីភាពជាអ្នកដឹកនាំដែលរឹងមាំម៉ឺងម៉ាត់ ព្រមទាំងសំណូមពរសុំការគាំទ្រពីសហគមន៍អន្តរជាតិដល់ប្រទេសក្នុងទ្វីបអាមេរិកកណ្ដាលផងដែរ។

លោកស្រី ម៉ារៀ វែន ឃើរខហ្វ អ្នកជំនាញខាងជំងឺរាតត្បាត របស់អង្គការសុខភាពពិភពលោក បានថ្លែងថា ចាំបាច់ត្រូវតែមានការចាត់ការចំពោះស្ថានការណ៍នៅក្នុងអាមេរិកកណ្ដាល ដោយវិធានការដែលគ្រប់គ្រងបែបទូលំទូលាយ ព្រមទាំងបញ្ជាក់ថា ការឆ្លងរាតត្បាតរបស់វីរុសកូរ៉ូណាប្រភេទថ្មីនេះ ស្ថិតនៅឆ្ងាយណាស់ពីពាក្យថា “ចប់”។

លោកស្រី វែន ឃើរខហ្វ បានបន្តទៀតថា ប្រទេសជាច្រើនបានធ្វើការតាមដានរាល់បុគ្គលទាំងអស់ ដើម្បីបញ្ជាក់ពីអ្នកជំងឺដែលមិនបង្ហាញអាការរោគ តែបែរជារកមិនឃើញថា មនុស្សទាំងអស់នោះ ជាមូលហេតុបណ្ដាលឱ្យមានការឆ្លងរាលដាលរបស់មេរោគបន្ថែមទៅវិញ នេះគឺជារឿងដែលពិបាកនឹងរកឃើញ៕

ប្រភព៖ សារព័ត៌មានបរទេស

June 9, 2020

ក្រុមមេដឹកនាំបក្សប្រជាធិបតេយ្យ លុតជង្គង់ជិត9នាទី មុនពេលដាក់សេចក្ដីព្រាងច្បាប់ ជូនសភាសហរដ្ឋអាមេរិក (វីដេអូ)

ក្រុមមេដឹកនាំជាន់ខ្ពស់នៃបក្សប្រជាធិបតេយ្យ បានលុតជង្គង់រយៈពេល8នាទីនិង46វិនាទីដើម្បីជាការរំឭក និងគោរពវិញ្ញាណក្ខន្ធជនរងគ្រោះ នៅមុនពេលដាក់សេចក្ដីព្រាងច្បាប់ជូនសភាជាន់ទាបអាមេរិកាំង កាលពីថ្ងៃទី8មិថុនា។

ប្រធានសភាជាន់ទាបអាមេរិកាំង លោកស្រី Nancy Pelosi មានប្រសាសន៍នៅក្នុងវិមានសភាសហរដ្ឋអាមេរិកកាលពីថ្ងៃទី8មិថុនាថា “យើងនៅទីនេះដើម្បីរំឭកដល់ការឈឺចាប់ និងបង្ហាញការគោរពចំពោះពលរដ្ឋដែលបានបញ្ចេញមតិប្រឆាំងនឹងបញ្ហានោះ (បញ្ហារើសអើងពូជសាសន៍) ពិសេសគឺអំពើហិង្សារបស់ប៉ូលិស។ យើងនៅទីនេះដើម្បីលើកតម្កើងកិត្តិយសរបស់ George Floyd”។

លោកស្រី Pelosi រួមជាមួយនឹងក្រុមមេដឹកនាំកំពូលរបស់បក្សប្រជាធិបតេយ្យនៅរដ្ឋសភា បាននាំគ្នាលុតជង្គង់ និងគោរពវិញ្ញាណក្ខន្ធរយៈពេល8នាទីនិង46វិនាទី ដែលនេះស្មើនឹងរយៈពេលដែលប៉ូលិស Derek Chauvin យកជង្គង់សង្កត់ក George Floyd កាលពីថ្ងៃទី25ឧសភា។ ប្រធានគណៈកម្មធិការយុត្តធម៌នៅសភាជាន់ទាប លោក Jerry Nadler មិនបានលុងជង្គង់ព្រោះបញ្ហាសុខភាព។

ក្នុងព្រឹត្តិការណ៍ខាងលើ គេឃើញសមាជិកទាំងអស់នៃបក្សប្រជាធិបតេយ្យ សុទ្ធតែបង់កកន្សែងដែលធ្វើអំពីក្រណាត់ Kente។ ក្រណាត់នេះមានប្រភពពីតំបន់ Ghana និងត្រូវបានត្បាញដោយសូត្រដែលមានពណ៌ចម្រុះ និងរូបភាពដ៏ស្រស់ស្អាត។ កន្សែងប្រភេទនេះត្រូវបានគេចាត់ទុកជានិមិត្តរូបដែលបង្ហាញអំពីអត្តសញ្ញាញ និងមោទនភាពរបស់ប្រជាជននៅតំបន់អាហ្វ្រិកខាងលិច។

ក្រុមតំណាងរាស្ត្របក្សប្រជាធិបតេយ្យនៅសភាជាន់ខ្ពស់អាមេរិកាំងកាលពីថ្ងៃទី8មិថុនា បានប្រកាសសេចក្ដីព្រាងច្បាប់ប្រឆាំងនឹងអំពើហិង្សារបស់ប៉ូលិសនិងការរើសអើងពូជសាសន៍ ក្នុងនោះក៏បានស្នើឱ្យមានការហាមសមត្ថកិច្ចមិនឱ្យចាប់ជនសង្ស័យដោយកៀបក ឬសង្កត់ក ឈប់ធ្វើកំណត់ហេតុទៅតាមពូជសាសន៍ ព្រមទាំងស្នើឱ្យបំពាក់កាមេរ៉ានៅលើខ្លួនសមត្ថកិច្ចពេលកំពុងបំពេញភារកិច្ច។

សេចក្ដីព្រាងច្បាប់ខាងលើក៏បានហាមមិនឱ្យធ្វើយោធូបនីយកម្មកម្លាំងប៉ូលិស តាមរយៈការកាត់បន្ថយចំនួនអាវុធដែលត្រូវបានមន្ទីរបញ្ចកោណបញ្ជូនទៅឱ្យស្ថាប័នប៉ូលិស។

ក្រុមតំរាងរាស្ត្របក្សប្រជាធិបតេយ្យដែលមានសម្លេងភាគតិចនៅសភាជាន់ខ្ពស់នឹងពិនិត្យលើសេចក្ដីព្រាងច្បាប់នេះនាពេលខាងមុខ។ បច្ចុប្បន្ន មិនទាន់ដឹងថា ក្រុមសម្លេងភាគច្រើនមកពីបក្សសាធារណរដ្ឋដែលកំពុងគ្រប់គ្រងសភាជាន់ខ្ពស់ គាំទ្រសេចក្ដីព្រាងច្បាប់នេះដែរ ឬអត់នៅឡើយ។ សេចក្ដីព្រាងច្បាប់នេះត្រូវការការអនុម័តយល់ព្រមពីសភាជាន់ខ្ពស់ និងប្រធានាធិបតី Donald Trump ដើម្បីបង្កើតសុពលភាព។

បាតុកម្មជាច្រើនបាននិងកំពុងកើតឡើងនៅទូទាំងសហរដ្ឋអាមេរិក ក្នុងរយៈពេលជិត2សប្ដាហ៍កន្លងដើម្បីប្រឆាំងនឹងករណីប្រើអំពើហិង្សារបស់ប៉ូលិសដែលបានបណ្ដាលបុរសស្បែកខ្មៅ George Floyd បាត់បង់ជីវិតកាលពីថ្ងៃទី25ឧសភាកន្លងទៅ។ Floyd ត្រូវបានប៉ូលិស Chauvin យកជង្គង់សង្កត់កជាប់ពីលើរហូតដល់ស្លាប់ បើទោះជនរងគ្រោះស្រែកអង្វរថា “ខ្ញុំមិនអាចដកដង្ហើមបានទេ” យ៉ាងណាក៏ដោយ។ បាតុកម្មក៏បានរាលដាលដល់ប្រទេសជាច្រើនដើម្បីទាមទារយុត្តិធម៌ជូន Floyd និងទាមទារឱ្យមានភាពស្មើគ្នារវាងជាតិសាសន៍នៅក្នុងប្រទេសនេះ៕

ប្រភព៖ សារព័ត៌មានបរទេស

June 9, 2020

ជិត7.2លាននាក់បានឆ្លងវីរុសCOVID-19 នៅទូទាំងពិភពលោក

ពិភពលោកទាំងមូល មានមនុស្សជិត7.2លាននាក់បានឆ្លងមេរោគCOVID-19 និងអ្នកជំងឺជាង408,000នាក់បានបាត់បង់ជីវិត ខណៈដែលស្ថានភាពCOVID-19 នៅអឺរ៉ុប មានភាពល្អប្រសើរឡើងវិញខ្លះហើយ។

ប្រទេសនិងដែនដីចំនួន213ក្នុងពិភពលោកត្រូវបានរាយការណ៍ថាបានរកឃើញអ្នកផ្ទុកវីរុសCOVID-19 សរុប7,183,907នាក់ និងអ្នកស្លាប់ដោយសារវីរុសនេះមានចំនួន408,028នាក់ ក្នុងនោះមានអ្នកជំងឺថ្មី105,010នាក់ និងអ្នកស្លាប់ថ្មី3,053នាក់បើធៀបនឹងម្សិលមិញ។ ចំណែកអ្នកជំងឺដែលបានជាសះស្បើយមានចំនួន3,506,725នាក់។ ប្រធានអង្គការសុខភាពពិភពលោក បានឱ្យដឹងថា ស្ថានភាពCOVID-19 នៅអឺរ៉ុបបានល្អប្រសើរជាងមុន ប៉ុន្តែសម្រាប់ពិភពលោកទាំងមូលវិញ កំពុងតែអាក្រក់ឡើងៗដដែល។

ទ្វីបអាមេរិកមានអ្នកឆ្លងវីរុសCOVID-19 សរុប3,478,485នាក់ ក្នុងនោះតំបន់អាមេរិកខាងជើងមាន2,302,305នាក់ និងអាមេរិកខាងត្បូងមាន1,176,180នាក់។ ទ្វីបអឺរ៉ុបមានអ្នកជំងឺ2,109,178នាក់ ខណៈទ្វីបអាស៊ីមាន1,392,482នាក់ និងទ្វីបអាហ្វ្រិកមាន198,938នាក់។

ប្រទេសដែលបានរកឃើញអ្នកជំងឺលើសពី100,000នាក់ មានចំនួន16ប្រទេស រួមមានសហរដ្ឋអាមេរិក ប្រេស៊ីល រុស្ស៊ី អេស្ប៉ាញ អង់គ្លេស ឥណ្ឌា អ៊ីតាលី ប៉េរូ អាល្លឺម៉ង់ អ៊ីរ៉ង់ ទួរគី បារាំង ឈីលី ម៉ិកស៊ិក អារ៉ាប់ប៊ីសាអ៊ូឌីត និងប្រទេសប៉ាគីស្ថាន។

សហរដ្ឋអាមេរិកជាសម្បុកមេរោគCOVID-19 ធំជាងគេក្នុងពិភពលោក ដោយមានអ្នកឆ្លងវីរុសនេះសរុប 2,025,441នាក់ និងអ្នកស្លាប់សរុប113,049នាក់។ អ្នកជំងឺកើន18,474នាក់ និងអ្នកស្លាប់កើន103នាក់បើធៀបនឹងម្សិលមិញ។ អ្នកជំងឺដែលបានជាសះស្បើយ មានចំនួន 771,935នាក់។

ប្រទេសប្រេស៊ីលមានអ្នកជំងឺសរុប710,887នាក់ និងអ្នកស្លាប់37,312នាក់។ ក្នុងរយៈពេល24ម៉ោងចុងក្រោយនេះ ប្រេស៊ីលបានរកឃើញអ្នកឆ្លងវីរុសសរុប18,925នាក់ និងអ្នកស្លាប់813នាក់។ អ្នកជំងឺបានជាសះស្បើយមានចំនួន325,602នាក់។

ចំណែកប្រទេសរុស្ស៊ីវិញ មានអ្នកឆ្លងវីរុសសរុប476,658នាក់ និងអ្នកស្លាប់សរុប5,971នាក់ ក្នុងនោះមានអ្នកជំងឺថ្មីចំនួន8,985នាក់ និងអ្នកស្លាប់ថ្មី112នាក់។ ចំណែកអ្នកជំងឺដែលបានជាសះស្បើយមានចំនួន230,688នាក់។

June 9, 2020

អ្នកក្រុងហុងកុងសម្រុកទៅរង់ចាំទិញផ្ទះ បើទោះនយោបាយនិងសេដ្ឋកិច្ចកំពុងជួបបញ្ហា

ផ្ទះចំនួន93ល្វែងដែលស្ថិតក្នុងគម្រោងមួយរបស់ក្រុមហ៊ុនអចលនទ្រព្យ China Vanke ត្រូវបានលក់ដាច់អស់គ្មានសល់ ដោយប្រើពេលត្រឹមតែ 8ម៉ោងប៉ុណ្ណោះ ដែលនេះបានជួយឱ្យក្រុមហ៊ុនរកបានប្រាក់ 880លានដុល្លារហុងកុងដោយមិនបាច់ហត់យូរ។

ច្បាប់សន្តិសុខហុងកុងដែលទើបត្រូវបានបង្កើតឡើងដោយទីក្រុងប៉េកាំង គំរាមកំហែងខ្លាំងដល់ “តំណែង” ជាមជ្ឈមណ្ឌលហិរញ្ញវត្ថុពិភពលោករបស់ទីក្រុងហុងកុង ក៏ប៉ុន្តែ វាហាក់មិនមានឥទ្ធិពលច្រើនទៅលើទីផ្សារអចលនទ្រព្យលំដាប់ថ្លៃបំផុតនេះទេ។ កាលពីសប្ដាហ៍មុន មនុស្សរាប់សិបនាក់បានមកតម្រង់ជួររង់ចាំដេញថ្លៃទិញផ្ទះចំនួន94ល្វែងនៅក្នុងគម្រោង The Campton នៅក្នុងមជ្ឈមណ្ឌល Kowloon។

ក្រុមហ៊ុន China Vanke បានឱ្យដឹងថា ផ្ទះចំនួន94ខាងលើ ត្រូវបានលក់ក្នុងតម្លៃចាប់ពី 6.8លានដុល្លារហុងកុង (872.400 USD) សម្រាប់ល្វែងដែលមានបន្ទប់គេងចំនួនមួយ។ ផ្ទះល្វែងចំនួន93ខ្នងត្រូវបានលក់អស់ក្នុងរយៈពេល8ម៉ោង ដែលនេះបានជួយឱ្យក្រុមហ៊ុន China Vanke រកបានប្រាក់ 880លានដុល្លារហុងកុង (113,546,570 USD)។

អ្នកស្រី Li ដែលជាអតិថិជនម្នាក់របស់ក្រុមហ៊ុន China Vanke បានឱ្យដឹងថា “នៅពេលដែលប្រព័ន្ធនយោបាយ និងសេដ្ឋកិច្ចជួបអស្ថិរភាព ប្រាក់សុទ្ធនឹងបាត់បង់តម្លៃយ៉ាងលឿន។ ខ្ញុំចង់យកប្រាក់ទៅទិញផ្ទះដើម្បីការពារតម្លៃរបស់វា”។

នៅពេលគេមើលមួយក្រឡេក គេនឹងឃើញថា បច្ចុប្បន្នមិនមែនជាពេលល្អបំផុតសម្រាប់ទិញអចលនទ្រព្យនៅហុងកុងនោះទេ។ អនាគតរបស់ហុងកុងកំពុងចាប់ផ្ដើមអាប់អួដោយស្រមោលនៃច្បាប់សន្តិសុខហុងកុងរបស់ទីក្រុងប៉េកាំង ដែលនាំឱ្យសហរដ្ឋអាមេរិកគំរាមដកហូតអាទិភាពពិសេសរបស់ទីក្រុងនេះ។

ច្បាប់សន្តិសុខហុងកុងក៏បានធ្វើឱ្យមានការព្រួយបារម្ភចំពោះទុនវិនិយោគដែលនឹងអាច “រត់ចោល” ហុងកុង ផងដែរ បណ្ដាលឱ្យមានបាតុកម្មជាច្រើនកើតឡើង និងបង្កើនអស្ថិរភាពក្នុងតំបន់សេដ្ឋកិច្ច “យក្ស” មួយនេះ។ GDP របស់ហុងកុងត្រូវបានព្យាករថានឹងធ្លាក់ចុះដល់ទៅ7% ក្នុងឆ្នាំ2020នេះ។

បើទោះជាយ៉ាងណាក៏ដោយ សម្រាប់មនុស្សមួយចំនួនយល់ថា អស្ថិរភាពសេដ្ឋកិច្ច និងនយោបាយ បានធ្វើឱ្យអចលនទ្រព្យក្លាយជារបស់ផ្សងព្រេងដែលមានសុវត្ថិភាពជាងទ្រព្យដទៃ។ កាលពីខែមុន Sun Hung Kai Properties លក់បាន 97% ក្នុងចំណោមផ្ទះចំនួន298ល្វែង ប្រមូលបានប្រាក់2ពាន់លានដុល្លារហុងកុង (258,060,386 USD) ក្នុងរយៈពេលតែមួយថ្ងៃ។

Prospective buyers waiting in line outside the sales office for the Campton residential project by China Vanke in Hong Kong, on June 2, 2020

អ្នកស្រី Li វ័យ40ឆ្នាំ ជឿជាក់ថា ទីផ្សារអចលនទ្រព្យអាចទប់ទល់នឹងឱនភាពនៃសេដ្ឋកិច្ច ដោយសារតែគិតថា “ដីមិនកើន តែមនុស្សកើន”។ អ្នកស្រីបន្តថា “ហុងកុងតូចណស់។ បើប្រៀបធៀបតម្លៃផ្ទះកាលពី20ឆ្នាំមុន និងពេលនេះ លោកនឹងឃើញថា អចលនទ្រព្យដែលបានទិញកាលណោះ កំពុងតែនាំមកនូវចំណេញយ៉ាងសម្បើម”។

អ្នកស្រី Li និយាយមិនខុសទេ។ ទិន្នន័យរបស់ក្រុមហ៊ុន Centaline Property Agency បានបង្ហាញថា តម្លៃអចលនទ្រព្យនៅហុងកុងបានកើនឡើង230% ចាប់ពីឆ្នាំ2000មកនេះ។ ប្រការនេះបានធ្វើឱ្យពលរដ្ឋហុងកុងកាន់តែជឿជាក់ទៅលើការយល់ឃើញរបស់ពួកគេដែលថា “អចលនទ្រព្យតែងតែជាទ្រព្យសុវត្ថិភាព”។

ទោះបីជាសេដ្ឋកិច្ចកំពុងមានឱនភាព ប៉ុន្តែតម្លៃផ្ទះនៅទីក្រុងហុងកុងបែរជាឡើងថ្លៃ1.2% ក្នុងឆ្នាំនេះ ហើយបច្ចុប្បន្នវាបានឡើងដល់ចំណុចកំពូលរាប់ចាប់ពីខែវិច្ឆិកា ឆ្នាំ2019។

ក្នុងពេលដែលតម្លៃ និងចំនួនផ្ទះនៅក្នុងបណ្ដាទីផ្សារពិភពលោក ដូចជាទីក្រុងឡុងដ៍ ឬសិង្ហបុរីជាដើម កំពុងតែដាំក្បាលចុះ ទីក្រុងហុងកុងឯណោះបែរជាងើបក្បាលឡើង ដោយមានការជួញដូរចំនួន 6,885លើកត្រូវបានធ្វើឡើងក្នុងខែឧសភាកន្លងទៅ។ នេះគឺជាតួលេខខ្ពស់បំផុតក្នុងអំឡុង12ខែមកនេះ។

របាយការណ៍មួយរបស់ Morgan Stanley កាលពីថ្ងៃទី26ឧសភា បានព្យាករថា ក្នុងរយៈពេលវែង ប្រភពផ្គត់ផ្គង់មានកំណត់ និងតម្រូវការខ្ពស់ដោយសារតែអត្រាមានផ្ទះនៅទាបនៅឡើយ រួមនឹងការប្រាក់ជិតស្មើនឹង0% នឹងជំរុញឱ្យទីផ្សារអចលនទ្រព្យនៅហុងកុងកាន់តែងើបឡើងខ្ពស់។

យ៉ាងណាក៏ដោយ ទីផ្សារអចលនទ្រព្យមិនមែនមិនមានហានិភ័យនោះទេ។ ក្រុមហ៊ុននានាកំពុងតែផ្អាកដំណើរការ។ អត្រាបាត់បង់ការងារក៏កំពុងស្ថិតនៅក្នុងកម្រិតខ្ពស់បំផុត ហើយបើទោះចំនួនការងារដែលបានបាត់បង់ភាគច្រើនជាការងារលំដាប់ទាប ដូចជាវិស័យលក់រាយ ឬសេវាអាហារជាដើម ប៉ុន្តែវាជះឥទ្ធិពលរាលដាលដល់ការងារលំដាប់ខ្ពស់ផងដែរ ដែលប្រការនេះក៏នឹងមានផលប៉ះពាល់ដល់លទ្ធភាពនៃការបង់រំលស់ទ្រព្យរបស់អ្នកទិញ។ Simon Smith ដែលជាប្រធានផ្នែកស្រាវជ្រាវទីផ្សារនិងប្រឹក្សាយោបល់របស់ក្រុមហ៊ុន Savills បានព្យាករថា តម្លៃផ្ទះនៅហុងកុងនឹងធ្លាក់ចុះ5% ក្នុងឆ្នាំនេះ៕

ប្រភព៖ Bloomberg

June 8, 2020

ចិនចាប់ផ្ដើមសាងសង់ស្ពានឆ្លងសមុទ្រប្រវែង31គីឡូម៉ែត្រ (វីដេអូ)

ស្ពានឆ្លងសមុទ្រ Huangmao (Huangmao Sea Bridge) ដែលមាន6ជួរសម្រាប់ធ្វើដំណើរទៅ-មក តភ្ជាប់ពីទីក្រុង Zhuhai ទៅកាន់ទីក្រុង Jiangmen ត្រូវបានចាប់ផ្ដើមសាងសង់ពីថ្ងៃទី6មិថុនា ឆ្នាំ2020។

សារព័ត៌មាន CGTN (China Global Television Network) បានឱ្យដឹងថា ស្ពាននេះមានចំណុចចាប់ផ្ដើមពីតំបន់សេដ្ឋកិច្ចកំពង់ផែ Gaolan (Gaolan Port Economic Zone/GPEZ) នៃទីក្រុង Zhuhai និងបញ្ចប់នៅក្នុងទីរួមស្រុក Doushan នៃទីក្រុង Taishan។

ស្ពានឆ្លងសមុទ្រ Huangmao នេះ មានប្រវែងប្រមាណជា31គីឡូម៉ែត្រ និងប្រើប្រាស់ស្ដង់ដាផ្លូវល្បឿនលឿនដែលមាន6ជួរសម្រាប់ធ្វើដំណើរទៅនិងមក ជាមួយនឹងការកំណត់ល្បឿនត្រឹម100គីឡូម៉ែត្រ/ម៉ោង។

Huangmao គឺជាស្ពានឆ្លងសមុទ្រថ្មី បន្ទាប់ពីស្ពាន Hong Kong-Zhuhai-Macao និងស្ពាន Shenzhen-Zhongshan នៅក្នុងតំបន់ឈូងសមុទ្រ Greater Bay។

តាមផែនការ គម្រោងសាងសង់ស្ពានឆ្លងសមុទ្រ Huangmao នេះ នឹងត្រូវបានបញ្ចប់ជាស្ថាពរនៅក្នុងឆ្នាំ2024៕

ប្រភព៖ CGTN

June 8, 2020

ប៉ូលិសអាមេរិកាំង “លាងជើង” ជូនមេដឹកនាំសាសនាស្បែកខ្មៅ

ក្រុមប៉ូលិស និងពលរដ្ឋស្បែកស នាំគ្នាលាងជើងជូនក្រុមមេដឹកនាំសាសនាដែលជាជនជាតិស្បែកខ្មៅនៅក្នុងរដ្ឋ North Carolina សហរដ្ឋអាមេរិក ដែលទង្វើនេះជួយរួមចំណែកធ្វើឱ្យភាពតានតឹងនៃបញ្ហាដែលកើតឡើងដោយការរើសអើងពូជសាសន៍មានការថយចុះ។

បើទោះជាអាកាសធាតុក្ដៅខ្លាំងយ៉ាងណាក៏ដោយ ក្រុមសមាជិករបស់មជ្ឈមណ្ឌលសាសនា Legacy Center Church ដឹកនាំដោយអាចារ្យ Faith Wokoma និងស្វាមីគឺអ្នកស្រី Soboma បានដង្ហែក្បួនធម្មយាត្រានៅទីក្រុង Cary រដ្ឋ North Carolina កាលពីថ្ងៃទី6មិថុនាដើម្បីប្រឆាំងទៅនឹងអំពើមនុស្សឃាតដែលប៉ូលិសបានប្រព្រឹត្តចំពោះបុរសជនជាតិស្បែកខ្មៅ George Floyd កាលពីថ្ងៃទី25ឧសភា។ ក្រុមនេះបានស្នើឱ្យលុបបំបាត់ការរើសអើងពូជសាសន៍ ព្រមទាំងបានចំណាយពេល8នាទីនិង46វិនាទីដើម្បីគោរពវិញ្ញាណក្ខន្ធជនរងគ្រោះ។

នៅក្នុងព្រឹត្តិការណ៍ខាងលើនេះ ក៏មានពិធី “លាងជើង” ដែលក្នុងនោះក៏មានក្រុមប៉ូលិសស្បែកសជាច្រើន រួមនឹងពលរដ្ឋ បានចូលរួមលាងជើងជូនអាចារ្យ Faith និងអ្នកស្រី Soboma Wokoma។ បណ្ដារូបភាព និងវីដេអូដែលត្រូវបានគេចែករំលែកលើបណ្ដាញសង្គម បង្ហាញថា ក្រុមសាសនិកបាននាំគ្នាបួងសួង រួចលុតជង្គង់នៅក្បែរធុងទឹក និងលាងជើងជូនអាចារ្យដែលអង្គុយនៅលើកៅអី។

លាងជើងគឺជាពិធីសាសនាមួយដែលត្រូវបានសាសនិកនៃក្រុមអ្នកកាន់សាសនាគ្រិស្តមួយចំនួនធ្វើឡើង ដោយយោងទៅលើពាក្យប្រដៅរបស់ព្រះយេស៊ូ ដែលថា សាសនិកគួរតែលាងជើងជូនអ្នកដទៃដើម្បីបង្ហាញអំពីការគោរព និងក្ដីស្រលាញ់។ យោងតាមគម្ពីរ ព្រះយេស៊ូក៏ធ្លាប់បានលាងជើងជូនក្រុមសាវករបស់ទ្រង់ដែរ។

ពលរដ្ឋម្នាក់ដែលបានចូលរួមក្នុងពិធីខាងលើបានថ្លែងថា “នេះគឺជាការបង្ហាញឱ្យឃើញអំពីការផ្សះផ្សារដ៏ខ្លាំងក្លាមួយ”។ ខណៈសាសិកម្នាក់ផ្សេងទៀតនិយាយថា “នេះគឺជាការចាប់ផ្ដើមនៃការផ្សះផ្សារជាតិសាសន៍”។

លោកអាចារ្យ Faith និង Soboma Wokoma បានឱ្យដឹងថា ពួកគេបង្កើតព្រឹត្តិការណ៍នេះឡើងដើម្បីជួយឱ្យសាសនិកអាចពិភាក្សាគ្នាដោយសេរីអំពីបាតុកម្មដែលបាននិងកំពុងកើតឡើងទូទាំងសហរដ្ឋអាមេរិក។

លោកអាចារ្យ Faith ថ្លែងថា “យើងមិនចង់ឱ្យមានការបែងចែកជាសាសនាក្រុមស្បែកខ្មៅ ឬស្បែកស ឬក៏សាសនាអាស៊ីអ្វីនោះទេ។ យើងបានសម្រេចចិត្តប្រមូលផ្ដុំក្រុមសាសនាឯទៀត ហើយពិតជាគួរឱ្យភ្ញាក់ផ្អើលនៅពេលភាគីប៉ូលិសមានបំណងក្លាយជាផ្នែកមួយនឹងព្រឹត្តិការណ៍ធម្មយាត្រា។ ចំណែកអភិបាលក្រុងក៏មានបំណងចូលរួមជាមួយយើងផងដែរ”។

Lori Bush សមាជិកក្រុមប្រឹក្សាភិបាលក្រុង Cary បានថ្លែងថា ធម្មយាត្រានេះគឺជាព្រឹត្តិការណ៍ដែល “មានឥទ្ធិពលដ៏អស្ចារ្យ”។

លោកស្រី Lori Bush ថ្លែងថា “យើងបានឈប់ច្រើនកន្លែងដើម្បីបួងសួង ច្រៀងចម្រៀង Amazing Grace។ ខ្ញុំពិតជារំភើបចិត្តខ្លាំងណាស់នៅចំពោះវត្តមានដ៏ច្រើនរបស់ពលរដ្ឋ”។

បាតុកម្មនានានៅសហរដ្ឋអាមេរិកបានអូសបន្លាយពេលអស់12ថ្ងៃមកហើយ បន្ទាប់ពីមានករណីប៉ូលិសប្រើជង្គង់សង្កត់កបុរសស្បែកខ្មៅម្នាក់ឈ្មោះ George Floyd រហូងដល់ស្លាប់។ បាតុកម្មបាននិងកំពុងកើតឡើងទូទាំងសហរដ្ឋអាមេរិក ក្នុងនោះភាគច្រើនជាបាតុកម្មអហិង្សា៕

ប្រភព៖ សារព័ត៌មានបរទេស

June 8, 2020

(វីដេអូ) ចិនកំពុងបង្ហើយផ្លូវល្បឿនលឿនឆ្លងសមុទ្រខ្សាច់ហូរធំជាងគេលំដាប់ទីពីរក្នុងពិភលោក

បុគ្គលិកកម្មករត្រូវការបង្ហើយកំណាត់ផ្លូវប្រវែង40គីឡូម៉ែត្រទៀតប៉ុណ្ណោះនឹងបានបញ្ចប់ការសាងសង់ជាស្ថាពរនូវផ្លូវល្បឿនលឿនមួយខ្សែប្រវែង330គីឡូម៉ែត្រដែលឆ្លងកាត់សមុទ្រខ្សាច់ Taklimakan តភ្ជាប់ស្រុក Qiemo ជាមួយនឹងស្រុក Yuli មានទីតាំងនៅក្នុងតំបន់ស៊ីនជាំង (Xinjiang) ប្រទេសចិន។

បេសកកម្មសាងសង់ផ្លូវល្បឿនលឿនទី3 ឆ្លងកាត់សមុទ្រខ្សាច់ធំបំផុតនៅប្រទេសចិន Taklimakan បានឈានចូលដល់ដំណាក់កាលចុងក្រោយ។

នៅសល់ត្រឹមតែជាង40គីឡូម៉ែត្រទៀតប៉ុណ្ណោះនៅក្នុងប្រវែងសរុប330គីឡូម៉ែត្រនៃផ្លូវល្បឿនលឿន Yuli-Qiemo នឹងត្រូវបានសាងសង់រួចរាល់នាពេលដ៏ខ្លីខាងមុខ។

កម្មករកំពុងតែញាប់ដៃញាប់ជើងក្នុងការឈូសឆាយដំបូកខ្សាច់ធំបំផុតដែលមានកម្ពស់ដល់ទៅ70ម៉ែត្រនៅក្នុងគម្រោងសាងសង់ផ្លូវថ្នល់ Yuli-Qiemo នេះ។

ពួកគេត្រូវធ្វើការឈូសឆាយខ្សាច់ចំនួន1.2លានម៉ែត្រគីបទៀតចេញពីគម្រោងផ្លូវថ្លល់ និងត្រូវចាក់វត្ថុធាតុសំណង់ចំនួន100,000ម៉ែត្រគីបទៀតផងដែរ ទើបរួចរាល់ជាស្ថាពរ។

ផ្លូវល្បឿនលឿន Yuli-Qiemo ឆ្លងកាត់សមុទ្រខ្សាច់ហូរធំបំផុតលំដាប់ទី2ក្នុងពិភពលោក។ ផ្លូវនេះតភ្ជាប់ស្រុក Qiemo ដែលនៅភាគខាងត្បូងតំបន់ Taklimakan ទៅកាន់ស្រុក Yuli ដែលនៅភាគខាងជើង។

Taklimakan គឺជាសមុទ្រខ្សាច់ធំជាងគេបង្អស់លំដាប់ទី16ក្នុងពិភពលោក និងជាសមុទ្រខ្សាច់ហូរធំជាងគេលំដាប់ទី2 បន្ទាប់ពី Antarctica។ តាមគម្រោង ផ្លូវល្បឿនលឿនលើសមុទ្រខ្សាច់នេះនឹងត្រូវដាក់ឱ្យប្រើប្រាស់ចាប់ពីឆ្នាំ2021ខាងមុខ៕

ប្រភព៖ Xinhua

June 8, 2020

សន្ទស្សន៍មូលបត្រអាកាសចរណ៍ងើបឡើងវិញ! លោក Trump ថា Warren Buffett “គិតខុស” ពេលលក់អស់ភាគហ៊ុនអាកាសចរណ៍

លោក Donald Trump បានថ្លែងជាសាធារណៈថា លោក Warren Buffett បាន “សម្រេចចិត្តត្រឹមត្រូវពេញមួយជីវិត ប៉ុន្តែ លោកបានធ្វើឱ្យមានកំហុសនៅពេលសម្រេចចិត្តលក់អស់ភាគហ៊ុននៅក្នុងវិស័យអាកាសចរណ៍”។

មុននេះមិនយូរប៉ុន្មាន មហាសេដ្ឋី Warren Buffett ធ្លាប់បាននិយាយថា បានលក់ភាគហ៊ុនរបស់លោកដែលមាននៅក្នុងវិស័យអាកាសចរណ៍។ កាលពីថ្ងៃទី5មិថុនា ក្នុងសុន្ទរកថាមួយនៅសេតវិមាន ប្រធានាធិបតីសហរដ្ឋអាមេរិក លោក Donald Trump ដែលជាអតីតកំពូលអ្នកជំនួញម្នាក់ដែរនោះ បានថ្លែងថា “គួរណាស់តែរក្សាទុកភាគហ៊ុនក្នុងវិស័យនេះ (អាកាសចរណ៍) ក្នុងគ្រាដែលវាបានងើបឡើងវិញក្នុងថ្ងៃនេះ”។

មតិរបស់លោក Trump ត្រូវបានលើកឡើងបន្ទាប់ពីមានទិន្នន័យបង្ហាញថា តួលេខនៃកំណើនការងារនៅសហរដ្ឋអាមេរិកក្នុងខែឧសភាបានឡើងខ្ពស់បំផុតរាប់ចាប់ពីឆ្នាំ1939 ដោយមានការងារថ្មីចំនួន2.5លានតំណែង។ អត្រាបាត់បង់ការងារក៏បានថយចុះមកនៅត្រឹម 13.3%។ ទិន្នន័យខាងលើនេះ ត្រូវបានក្រុមសេដ្ឋវិទូចាត់តុកថាជាភ័ស្ដុតាងបង្ហាញថា សេដ្ឋកិច្ចសហរដ្ឋអាមេរិកចាប់ផ្ដើមងើបឡើងវិញបន្ទាប់ពីស្ថានភាព COVID-19 ត្រូវគ្រប់គ្រងបានមួយផ្នែក។

ក្រោយពីមានដំណឹងល្អខាងលើ សន្ទុស្សន៍នានាក្នុងផ្សារហ៊ុនអាមេរិក បានចាប់ផ្ដើមមានប្រតិកម្ម៖ Dow Jones និង S&P កើនជាបន្តបន្ទាប់គឺ 3.1% និង 2.6%។ ជាពិសេស មូលបត្ររបស់បណ្ដាក្រុមហ៊ុនអាកាសចរណ៍ Delta Airlines, American Airlines និង United Airlines ដែលមុននេះត្រូវបានមហាសេដ្ឋី Warren Buffett លក់ចោល បានងើបក្បាលឡើងវិញក្នុងការជួញដូរនៅថ្ងៃទី5មិថុនា ដោយកើនឡើងជាបន្តបន្ទាប់ ក្នុងនោះ Delta Airlines កើន10.4% ខណៈ American Airlines កើន21% និង United Airlines កើន16.8%។

បើទោះជាងើបក្បាលឡើងវិញ ប៉ុន្តែមូលបត្ររបស់បណ្ដាក្រុមហ៊ុនអាកាសចរណ៍នៅតែមានតម្លៃទាបបើធៀបជាមួយនឹងតម្លៃកាលពីដើមឆ្នាំ។ ជាសរុប តម្លៃមូលបត្ររបស់ United Airlines បានថយចុះ48% បើធៀបនឹងដំណាក់កាលចុងឆ្នាំ2019 ចំណែក Delta Airlines បានថយចុះ38% ខណៈ American Airlines ក៏បានថយចុះ29% រាប់ចាប់តាំងពីដើមឆ្នាំមកនេះ។

ក្រុមអ្នកវិភាគយល់ថា មតិរបស់លោក Trump មិនទាន់ប្រាកដថាជាការត្រឹមត្រូវនៅឡើយ។ គេត្រូវការពេលវេលាច្រើនបន្ថែមទៀតដើម្បីអាចពិនិត្យទៅលើល្បឿននៃការងើបឡើងវិញក្នុងវិស័យទេសចរណ៍ និងអាកាសចរណ៍ នៅក្រោយការគ្រប់គ្រង COVID-19 បានជោគជ័យ ទើបគេអាចដឹងច្បាស់ថា ការសម្រេចចិត្តលក់ភាគហ៊ុនក្នុងវិស័យអាកាសចរណ៍របស់លោក Buffett “ខុសឬក៏ខុស”៕

ប្រភព៖ CNBC

June 8, 2020

តំណាងរាស្ត្រសភាជាន់ខ្ពស់បក្សសាធារណរដ្ឋ ចូលរួមធ្វើបាតុកម្ម “ខ្ញុំមិនអាចដកដង្ហើម”

តំណាងរាស្ត្រនៅសភាជាន់ខ្ពស់ក្នុងរដ្ឋ Utah សហរដ្ឋអាមេរិកាំង មកពីបក្សសាធារណរដ្ឋ លោក Mitt Romney កាលពីថ្ងៃទី7មិថុនាកន្លងទៅ បានចូលរួមហែក្បួនបាតុកម្មឆ្ពោះទៅកាន់សេតវិមាន ដើម្បីតវ៉ារកយុត្តិធម៍ជូនលោក George Floyd។

បាតុកម្មនេះមានការចូលរួមពីបាតុករប្រមាណជា 1,000នាក់។ ក្បួនបាតុកម្ម បានធ្វើដំណើរតាមផ្លូវនានាក្នុងរដ្ឋធានី វ៉ាស៊ីងតោន ហើយក៏ឆ្ពោះទៅកាន់សេតវិមាន។

“យើងត្រូវតែបញ្ចេញសម្លេងដើម្បីប្រឆាំងទៅនឹងការរើសអើងពូជសាសន៍។ យើងក៏ត្រូវការសម្លេងជាច្រើនដើម្បីជំទាស់នឹងការរើសអើងពូជសាសន៍ និងអំពើហិង្សា” តំណាងរាស្ត្រ Romney ថ្លែងបែបនេះនៅពេលត្រូវបានសួរអំពីមូលហេតុដែលនាំឱ្យលោកចូលរួមធ្វើបាតុកម្ម។ លោកបន្តថា “យើងទាំងអស់គ្នាត្រូវតែក្រោកឈរដើម្បីសម្ដែងឱ្យដឹងថា “ជីវិតរបស់ជនស្បែកខ្មៅក៏សំខាន់”។

លោក Mitt Romney តំណាងរាស្ត្រនៅសភាជាន់ខ្ពស់ក្នុងរដ្ឋ Utah សហរដ្ឋអាមេរិកាំង មកពីបក្សសាធារណរដ្ឋ

ក្នុងគ្រាដែលប្រធានាធិបតី Donald Trump តែងតែរិះគន់ទៅលើបាតុករ លោក Romney ដែលជាតំណាងរាស្ត្រនៅសភាជាន់ខ្ពស់ មកពីបក្សសាធារណរដ្ឋក៏បានបង្ហោះសារជាច្រើននៅលើទំព័រ Twitter ទាក់ទិននឹង George Floyd ដែលជាបុរសស្បែកខ្មៅម្នាក់បានស្លាប់ក្រោមស្នាដៃរបស់ប៉ូលិស។ លោក Romney ក៏បានបង្ហោះរូបថតឪពុករបស់លោក គឺអតីតអភិបាលរដ្ឋ Michigan លោក George Romney ដែលធ្លាប់បានចូលរួមធ្វើបាតុកម្មទាមទារសិទ្ធិមនុស្សកាលពីឆ្នាំ1960។

លោក Romney បានសរសេរថា “ការស្លាប់របស់ George Floyd មិនអាចក្លាយជារឿងអត់ន័យនោះឡើយ៖ ការរន្ធត់់ និងការក្ដៅក្រហាយរបស់យើង ត្រូវតែក្លាយជាការប្ដេជ្ញាចិត្តជាក្រុមដើម្បីបំបាត់អំពើប្រកាន់ពូជសាសន៍ជារៀងរហូត”។

បាតុកម្មនានាបានកើតឡើងនៅទូទាំងសហរដ្ឋអាមេរិក បន្ទាប់ពីបុរសស្បែកខ្មៅម្នាក់ឈ្មោះ George Floyd បានបាត់បង់ជីវិតនៅពេលត្រូវបានប៉ូលិសចាប់ខ្លួន និងយកជង្គង់សង្កត់ក កាលពីថ្ងៃទី25ឧសភានៅឯទីក្រុង Minneapolis ក្នុងរដ្ឋ Minnesota សហរដ្ឋអាមេរិក។ “ខ្ញុំមិនអាចដកដង្ហើម” គឺជាសម្ដីចុងក្រោយរបស់ Floyd ហើយឃ្លានេះក៏ត្រូវបានក្រុមបាតុករយកមកប្រើដើម្បីប្រឆាំងតវ៉ា និងទាមទាររកយុត្តិធម៌ជូនជនរងគ្រោះ និងដើម្បីលុបបំបាត់អំពើហិង្សារបស់ប៉ូលិស និងការរើសអើងពូជសាសន៍ក្នុងសង្គម៕

ប្រភព៖ សារព័ត៌មានបរទេស

June 8, 2020

ជិត 405,000នាក់ស្លាប់ដោយសារ COVID-19 នៅទូទាំងពិភពលោក

ពិភពលោកទាំងមូលមានអ្នកស្លាប់ជិត405,000នាក់ ក្នុងចំណោមអ្នកជំងឺ COVID-19 ជិត7.1លាននាក់ ខណៈវីរុសកំពុងវាយលុយខ្លាំងនៅទ្វីបអាមេរិកខាងត្បូង។

ប្រទេសនិងដែនដីចំនួន213ត្រូវបានរាយការណ៍ថា បានរកឃើញអ្នកជំងឺ 7,078,897នាក់ និងអ្នកស្លាប់ 404,975នាក់ ដោយសារវីរុសCOVID-19 ក្នុងនោះអ្នកជំងឺកើន130,097នាក់ និងអ្នកស្លាប់កើន3,926នាក់បើធៀបនឹងម្សិលមិញ។ អ្នកជំងឺចំនួន 3,453,287នាក់បានជាសះស្បើយ។

ទ្វីបអាមេរិកមានអ្នកជំងឺCOVID-19 សរុបឡើងដល់3,425,529នាក់ ខណៈទ្វីបអឺរ៉ុបមាន2,094,324នាក់ អាស៊ីមាន1,361,249នាក់ និងអាហ្វ្រិកមាន192,118នាក់។

សហរដ្ឋអាមេរិកនៅតែជាសម្បុកមេរោគធំជាងគេក្នុងពិភពលោក ដោយមានអ្នកជំងឺCOVID-19 សរុប 2,006,967នាក់ និងអ្នកស្លាប់សរុប112,946នាក់ ក្នុងនោះមានអ្នកជំងឺថ្មី20,321នាក់ និងអ្នកស្លាប់ថ្មី891នាក់។

ប្រទេសប្រេស៊ីលមានអ្នកជំងឺសរុប691,962នាក់ និងអ្នកស្លាប់សរុប36,499នាក់ ក្នុងនោះមានអ្នកជំងឹថ្មី18,375នាក់ និងអ្នកស្លាប់ថ្មីមាន542នាក់ ធ្វើឱ្យប្រទេសនេះនៅតែជាសម្បុកមេរោគ COVID-19 ធំជាងគេលំដាប់ទី2 ក្នុងពិភពលោក។

ប្រទេសរុស្ស៊ី មានអ្នកជំងឺសរុប467,673នាក់ និងអ្នកស្លាប់សរុប 5,859នាក់។ អ្នកជំងឺកើន8,984នាក់ និងអ្នកស្លាប់កើន134នាក់ក្នុងរយៈពេល24ម៉ោងចុងក្រោយនេះ៕

ប្រភព៖ សារព័ត៌មានបរទេស

June 8, 2020

Author: សឿន សំណាង