សឿន សំណាង - La Reine Media

Elon Musk ផលិតយានអវកាសដឹកមនុស្សម្ដង100នាក់ឡើងទៅកាន់ពិភពព្រះអង្គារ

មហាសេដ្ឋី Elon Musk បានដាក់គោលដៅនាំមនុស្សឡើងទៅកាន់ឋានព្រះចន្ទ និងផ្កាយព្រះអង្គារដោយប្រើប្រាស់កាំជ្រួចយានអវកាស Starship ដែលអាចប្រើឡើងវិញទាំងស្រុងជាច្រើនដង។

នៅក្នុងសារមួយច្បាប់ដែលត្រូវបានផ្ញើទៅកាន់បុគ្គលិកទាំងអស់របស់ក្រុមហ៊ុន SpaceX កាលពីថ្ងៃទី6មិថុនាកន្លងទៅ ប្រធានក្រុមហ៊ុន SpaceX លោក Elon Musk បានស្នើឱ្យបុគ្គលិកពាក់ព័ន្ធរបស់លោក ពន្លឿនការអភិវឌ្ឍកាំជ្រួចរុញច្រានជំនាន់ថ្មី Starship។ “លោកអ្នកសូមមេត្តាផ្ដល់អាទិភាពលំដាប់កំពូលរបស់ SpaceX ដល់ Starship”។ មហាសេដ្ឋី Elon Musk សរសេរបែបនេះ។

ក្រុមហ៊ុន SpaceX បានទទួលជោគជ័យក្នុងបេសកកម្មជាប្រវត្តិសាស្តក្នុងការបញ្ជូនអ្នកអវកាសរបស់ NASA ឡើងទៅកាន់ទីអវកាសកាលពីថ្ងៃទី30ឧសភា។ កាំជ្រួច Falcon 9 និងយានអវកាស Crew Dragon ដែលបានដឹកអវកាសចររបស់ទីភ្នាក់ងារអវកាសអាមេរិក (NASA) ឡើងទៅកាន់ស្ថានីយអវកាសអន្តរជាតិ (ISS) នឹងបញ្ជូនពួកគេត្រលប់មកផែនដីវិញក្នុងរយៈពេលជាច្រើនខែខាងមុខ។

ទិដ្ឋភាពបាញ់បង្ហោះកាំជ្រួចរុញច្រាន Falcon 9 របស់ក្រុមហ៊ុន SpaceX

កាំជ្រួច Falcon 9 គឺជាមធ្យោបាយស្នូលរបស់ក្រុមហ៊ុន SpaceX ដោយបានធ្វើការហោះហើរចំនួន85លើកនៅក្នុងទសវត្សរ៍កន្លង។ ប៉ុន្តែ Starship វិញ គឺជាតំណាងនៃមហិច្ឆតាធំធេងនិងវែងឆ្ងាយជាង Falcon 9 ទៅទៀត។ Falcon 9 គឺជាកាំជ្រួចរុញច្រានដែលមួយផ្នែករបស់វាត្រូវបានប្រើប្រាស់ឡើងវិញ ដោយក្រុមហ៊ុន SpaceX តែងអនុញ្ញាតឱ្យក្បាលរុញច្រានរបស់កាំជ្រួចចុះចតនៅលើផែនដី រួចដោះយកក្បាលផ្នែកខាងដើមរបស់វា។ គោលដៅរបស់លោក Musk គឺការធ្វើឱ្យ Starship ក្លាយជាកាំជ្រួចដែលអាចប្រើប្រាស់ឡើងវិញបានទាំងស្រុង ដែលវាជិតដូចទៅនឹងយន្តហោះពាណិជ្ជកម្មនាបច្ចុប្បន្ន។

កាលពីឆ្នាំទៅ លោក Musk បានឧទ្ទេសនាមយានអវកាស Starship ដែលច្នៃពីដែកអ៊ីណុក ជាមួយនឹងទំហំធំជាងឆ្ងាយបើធៀបនឹងយានអវកាស Dragon។ ក្រុមហ៊ុន SpaceX អភិវឌ្ឍ Starship ក្នុងគោលបំណងបញ្ជូនអវកាសចរម្ដង100នាក់ឡើងទៅកាន់ឋានព្រះចន្ទ និងពិភពព្រះអង្គារ។ ក៏ប៉ុន្តែ កម្មវិធី Starship របស់ SpaceX នៅ Boca Chica ក្នុងរដ្ឋ Texas បានទទួលបរាជ័យចំនួន4លើកមកហើយក្នុងអំឡុងពេលថ្មីៗកន្លងទៅនេះ។ បើទោះជាក្រុមហ៊ុនតែងតែធ្វើការអភិវឌ្ឍនិងកែប្រែចំណុចអវិជ្ជមានជារៀងរាល់លើក ក្រោយពីការសាកល្បងម្ដងៗ តែទោះជាយ៉ាងនេះក្ដី កំណែថ្មីបំផុតដែលទើបត្រូវបានសាកល្បងកាលពីថ្ងៃទី29ឧសភាក៏បានទទួលបរាជ័យ ដោយសារវាបានផ្ទុះនៅពេលកំពុងសាកល្បងម៉ាស៊ីនរ៉ុកកែត៕

ប្រភព៖ CNBC

June 10, 2020

កសិករដាំគូលែនវៀតណាម កំពុងពិបាកចិត្ត កូវីដ-19ធ្វើឱ្យការនាំចេញផ្លែឈើលំបាក នៅសល់ហៀរទីផ្សារ និងធ្លាក់ថ្លៃ

នៅកណ្ដាលគំនរផ្លែគូលែនដ៏ច្រើនសន្ធឹកសន្ធាប់នៅក្នុងទីផ្សារលក់ដុំ មួយកន្លែងក្នុងខេត្ត បាក់យ៉ាង ភាគខាងជើងប្រទេសវៀតណាម កសិករជាច្រើននាក់កំពុងរអ៊ូ រឿងតម្លៃផ្លែឈើដែលកំពុងធ្លាក់ថ្លៃយ៉ាងបន្តបន្ទាប់ ដោយមូលហេតុពាណិជ្ជករបរទេសត្រូវបានហាមឃាត់ដោយសារជំងឺកូវីដ-19។

តាមរយៈការឆ្លើយតបទៅនឹងការឆ្លងរាលដាលរបស់វីរុសកូវីដ-19 បែបវាយលុក បានធ្វើឱ្យវិថីជីវិតរបស់ប្រជាជនវៀតណាមវិលត្រឡប់មករកសភាវប្រក្រតីឡើងវិញ កម្មករបានប្រមូលផ្ដុំគ្នាដោយមិនពាក់ម៉ាស់អនាម័យការពារ ដោយនៅលើទោចក្រយានយន្តរបស់ពួកគេមានកញ្ឆេធំមួយនៅពីក្រោយ ដែលផ្ទុកណែនដោយផ្លែគូលែនទុំទើបនឹងបេះថ្មីៗពីចម្ការ។

ជាប្រក្រតី វៀតណាមបាននាំចេញផ្លែគូលែនស្រស់ប្រមាណជា 100,000តោនក្នុង 1រដូវកាល គិតជាតម្លៃសរុប ច្រើនជាង 30លានដុល្លារ ដោយមានប្រទេសគោលដៅធំៗ ដូចជា ចិន ជប៉ុន អូស្ត្រាលី និងសហរដ្ឋអាមេរិក តែធុរកិច្ចនេះ ត្រូវជាប់គាំងក្នុងឆ្នាំនេះ នៅពេលដែលវៀតណាមនៅតែមានវិធានការបិទព្រំដែន។

កសិករម្នាក់ឈ្មោះ ង្វៀង វ៉ាន់ ធែង បាននិយាយថា “ដោយសារតែការឆ្លងរាតត្បាតរបស់ជំងឺកូវីដ-19 ធ្វើឱ្យពួកយើងលែងឃើញអ្នកទិញជនជាតិចិនចូលមក ហើយឥឡូវពួកយើងភាគច្រើន លក់ឱ្យអតិថិជនក្នុងប្រទេស ទើបធ្វើឱ្យធ្លាក់ថ្លៃយ៉ាងខ្លាំង” លោកបន្តថា ជាប្រក្រតី ផ្លែគូលែនរបស់លោក ជាងពាក់កណ្ដាល បានលក់ឱ្យបរទេស។

អ្នកម៉ៅទិញបរទេស ច្រើនតែធ្វើដំណើរមកផ្សារនេះដោយផ្ទាល់ ដោយបើករថយន្តក្នុងចម្ងាយផ្លូវពីព្រំដែនចិនមក ត្រឹមតែមិនប៉ុន្មានម៉ោងប៉ុណ្ណោះ តែសារព័ត៌មានផ្លូវការក្នុងស្រុកមួយបានរាយការណ៍កាលពីសប្ដាហ៍មុនថា មានជនជាតិចិន និងជប៉ុនជាច្រើនរយនាក់ត្រូវបានហាមឃាត់ និងបង្ខាំងខ្លួន ដើម្បីសង្កេតតាមដានមើលមេរោគរយៈពេល 14ថ្ងៃ។

ទោះជាអាជ្ញាធរបានអះអាងថា ពួកគេនឹងជួយជំរុញការផ្សព្វផ្សាយអំពីការបរិភោគនៅក្នុងស្រុកក៏ដោយ តែតម្លៃបានធ្លាក់ចុះដល់ទៅជាងពាក់កណ្ដាលនៃតម្លៃដែលពួកគេធ្លាប់លក់បានកាលពីឆ្នាំកន្លងទៅ។

កសិករអាយុ 47ឆ្នាំខាងលើ ដែលបានរំពឹងទុកថា ក្នុងរដូវកាលនេះ លោកនឹងប្រមូលប្រាក់បានមិនលើសពី 4,000ដុល្លារ បានបន្តទៀតថា “យើងត្រូវធ្វើធ្ងន់ពេញមួយឆ្នាំ តែប្រាក់ចំណូល បែរជាមិនគ្រប់ចិញ្ចឹមជីវិត”

ក្នុងអំឡុងច្រើនឆ្នាំមកនេះ វៀតណាមដែលជាប្រទេសអ្នកនាំចេញកាហ្វេ អង្ករ និងត្រីអណ្ដែងជាចម្បងស្រាប់ហើយនោះ បានចាប់ផ្ដើមងាកមកផ្ដល់ចំណាប់អារម្មណ៍លើដំណាំផ្លែឈើរបស់ខ្លួនវិញម្ដង ដោយកាលពីឆ្នាំ2018 វៀតណាមបាននាំចេញបន្លែ និងផ្លែឈើក្នុងតម្លៃសរុបប្រមាណជា 3,760លានដុល្លារ៕

ប្រភព៖ សារព័ត៌មានបរទេស

June 10, 2020

Donald Trump និងសភា តែងតាំងជនជាតិស្បែកខ្មៅ ជាមេបញ្ជាការកងទ័ពដំបូងគេក្នុងប្រវត្តិសាស្ត្រ

Charles Brown ត្រូវបានសភាជាន់ខ្ពស់សហរដ្ឋអាមេរិកតែងតាំងជាមេបញ្ជាការកងទ័ពអាកាស និងក្លាយជាពលរដ្ឋអាមេរិកដើមកំណើតអាហ្វ្រិកដំបូងគេដែលកាន់កាប់តំណែងជាមេបញ្ជាការកងទ័ពសហរដ្ឋអាមេរិក។

លោក Charles Brown អាយុ57ឆ្នាំ បច្ចុប្បន្នគឺជាមេបញ្ជាការកងទ័ពអាកាសប្រចាំតំបន់ប៉ាស៊ីហ្វិក ទើបត្រូវបានសភាជាន់ខ្ពស់អាមេរិកាំងតែងតាំងជាមេបញ្ជាការកងទ័ពអាកាសសហរដ្ឋអាមេរិក ដោយទទួលបានសំឡេងឆ្នោតគាំទ្រ98សំឡេង និងមិនមានសំឡេងប្រឆាំង នៅក្នុងការអនុម័តរបស់សភាជាន់ខ្ពស់កាលពីថ្ងៃទី9មិថុនា។

ជាមួយនឹងសេចក្ដីសម្រេចនេះ លោក Charles Brown ក្លាយជាពលរដ្ឋដើមកំណើតអាហ្រិកដំបូងគេដែលគ្រប់គ្រង់តំណែងខ្ពស់បំផុតមួយក្នុងចំណោមតំណែងជាមេបញ្ជាការកងទ័ពចំនួន6របស់សហរដ្ឋអាមេរិក។ លោក Brown ក៏ជាជនជាតិស្បែកខ្មៅទី2ដែលបានមានវត្តមាននៅក្នុងអគ្គបញ្ជាការដ្ឋានចម្រុះសហរដ្ឋអាមេរិក (Joint Chiefs of Staff) បន្ទាប់ពីលោក Colin Powell អតីតអគ្គមេបញ្ជាការកងទ័ព (Chairman of the Joint Chiefs of Staff) ដំណាក់កាលពីឆ្នាំ1989-1993។

លោក Colin Powell អតីតអគ្គមេបញ្ជាការកងទ័ព (Chairman of the Joint Chiefs of Staff) ដំណាក់កាលពីឆ្នាំ1989-1993។

ប្រធានាធិបតី Donald Trump បានសរសេរនៅលើ Twitter កាលពីថ្ងៃទី9មិថុនាថា “ការសម្រេចចិត្តរបស់ខ្ញុំក្នុងការតែងតាំងមេបញ្ជាការកងទ័ពអាកាសនេះ លោក Charles Brown ក្លាយជាពលរដ្ឋដើមកំណើតអាហ្វ្រិកដំបូងគេដែលបានធ្វើជាមេបញ្ជាការកងទ័ពដែលត្រូវបានសភាជាន់ខ្ពស់អនុម័តយល់ព្រម។ ជាថ្ងៃប្រវត្តិសាស្ត្រចំពោះសហរដ្ឋអាមេរិក! ពិតជាមានការសប្បាយរីករាយក្នុងការធ្វើការម៉ត់ចត់បន្ថែមទៀតជាមួយមេបញ្ជាការ Brown ដែលជាអ្នកស្នេហាជាតិ និងជាមេដឹកនាំល្អម្នាក់!”។

ការតែងតាំងខាងលើនេះ បានកើតឡើងក្នុងគ្រាដែលមានបាតុកម្មជាច្រើនកើតឡើងនៅទូទាំងសហរដ្ឋអាមេរិកក្រោយពីការស្លាប់របស់ George Floyd ដែលនេះបានរួមចំណែកបន្ថែមទៀតក្នុងសាមគ្គីភាពដើម្បីលុបបំបាត់អំពើរើសអើងពូជសាសន៍ក្នុងប្រទេសវនេះ។

លោក Brown ធ្លាប់បានបញ្ចេញយោបល់កាលពីសប្ដាហ៍មុនថា បញ្ហាដើមកំណើតអាហ្វ្រិកកំពុងតែរាំងខ្ទប់រូបលោកក្នុងការទទួលបានការដំឡើងឋានន្តរសក្ដិ។ លោកថ្លែងថា ការតែងតាំងនេះអាចនាំមកនូវក្ដីសង្ឃឹមដល់អ្នកផ្សេង ប៉ុន្តែលោកបានទទួលស្គាល់ថា ចំពោះលោកតែម្នាក់ឯង “មិនអាចផ្សះផ្សារការបែងចែកពូជសាសន៍ដែលកើតមានអស់រយៈពេលរាប់សតវត្សរ៍” នៅសហរដ្ឋអាមេរិកឡើយ៕

ប្រភព៖ AFP

June 10, 2020

ប៉ូលិសអាមេរិកាំង នាំគ្នាចូលរួមហែសពលោក George Floyd ខណៈបេក្ខភាពប្រធានាធិបតីផ្ញើសាររំលែកទុក្ខ

ក្រុមមន្ត្រីប៉ូលិសអាមេរិកាំង ឈរជាងពីរជួរ និងលើកដៃគំនាប់ដើម្បីបង្ហាញការគោរព នៅពេលដែលសពរបស់លោក George Floyd ត្រូវបាននាំទៅកាន់វិហារសាសនាមួយនៅទីក្រុង Houston។

ពិធីបុណ្យសពរបស់លោក George Floyd ជាជនរងគ្រោះស្បែកខ្មៅ អាយុ46ឆ្នាំ ដែលត្រូវបានប៉ូលិសសង្កត់កនឹងជង្គង់រហូតដល់ស្លាប់កាលពីថ្ងៃទី25ឧសភានៅក្នុងទីក្រុង Minneapolis រដ្ឋ Minnesota សហរដ្ឋអាមេរិក ត្រូវបានប្រព្រឹត្តឡើងក្នុងថ្ងៃទី9មិថុនាកន្លងទៅនៅឯវិហារ Fountain of Praise ក្នុងទីក្រុង Houston រដ្ឋ Texas ដែលជាស្រុកកំណើតរបស់ Floyd។ មិត្តភ័ក្ដិ ក្រុមគ្រួសារ រួមនឹងថ្នាក់ដឹកនាំស្បែកខ្មៅ បានចូលរួមពិធីបុណ្យសពនេះផងដែរ។

ពិធីបុណ្យខាងលើត្រូវបានផ្សាយផ្ទាល់តាមកញ្ចក់ទូរទស្សន៍។ ក្រុមសកម្មភាព និងពលរដ្ឋក្នុងទីក្រុង Houston នាំគ្នាឈរនៅខាងក្រៅវិហាររហូតដល់ចប់ពីធីនានា។ ក្រុមប៉ូលិស ឈរជាពីរជួរ និងធ្វើការគំនាប់ សម្ដែងការគោរពនៅពេលសពត្រូវបាននាំទៅកាន់រថយន្ត ក្រោយមក មនុស្សម្នាក់បានស្រែកថា “ចូរហៅឈ្មោះរបស់គាត់! George Floyd”។

លោក Joe Biden ផ្ញើការចូលរួមរំលែកទុក្ខគ្រួសារសពតាមរយៈវីដេអូផ្សាយផ្ទាល់

ផ្សារហ៊ុន New York (New York Stock Exchange) បានធ្វើការគោរពចំពោះសពលោក Floyd ដោយការរក្សាភាពស្ងៀមស្ងាត់រយៈពេល8នាទីនិង46វិនាទី ស្មើនឹងរយៈពេលដែល Floyd ស្ថិតក្រោមជង្គង់របស់ប៉ូលិស Derek Chauvin។ នេះគឺជាការរក្សាភាពស្ងៀមស្ងាត់យូរជាងគេបង្អស់ក្នុងប្រវត្តិសាស្ត្រ228ឆ្នាំរបស់ផ្សារហ៊ុននេះ (ផ្សារហ៊ុន New York Stock Exchange ត្រូវបានបង្កើតឡើងកាលពីថ្ងៃទី17 ឧសភា ឆ្នាំ1792)។

អតីតអនុប្រធានាធិបតីអាមេរិកាំង លោក Joe Biden ដែលបច្ចុប្បន្នជាបេក្ខជនប្រធានាធិបតីរបស់បក្សប្រជាធិបតេយ្យនៃសហរដ្ឋអាមេរិក បានផ្ញើសម្ដីចូលរួមរំលែកទុក្ខជាមួយគ្រួសារសពរបស់លោក Floyd តាមរយៈវីដេអូ។ លោកថ្លែងថា “នៅពេលដែលយើងទាមទារយុត្តិធម៌ជូន George Floyd យើងទាំងអស់គ្នាកំពុងស្ថិតនៅលើផ្លូវឆ្ពោះទៅកាន់សមភាពពូជសាសន៍ដ៏ពិតប្រាកដនៅសហរដ្ឋអាមេរិក”។

ចំណែកអភិបាលក្រុង Houston លោក Sylvester Turner បានឱ្យដឹងថា លោកនឹងចុះហត្ថលេខាលើបទបញ្ជាហាមប៉ូលិសចាប់ខ្លួនជនសង្ស័យដោយការក្រៀកក និងសង្កត់ក ព្រមទាំងត្រូវធ្វើការព្រមានជាមុន នៅពេលត្រៀមផ្ទុះអាវុធ៕

ប្រភព៖ សារព័ត៌មានបរទេស

June 10, 2020

ជាង7.3លាននាក់បានឆ្លងវីរុសCOVID-19 នៅទូទាំងពិភពលោក

ពិភពលោកទាំងមូលបានរកឃើញអ្នកផ្ទុកវីរុសCOVID-19 ចំនួនជាង7.3លាននាក់ និងអ្នកស្លាប់ជិត413,000នាក់ ខណៈពេលប្រទេសជាច្រើនបានបន្ធូរបន្ថយបម្រាមគោចរ។

ប្រទេសនិងដែនដីចំនួន213ក្នុងពិភពលោក ត្រូវបានរាយការណ៍ថា បានរកឃើញអ្នកជំងឺCOVID-19 ដល់ទៅ 7,309,428នាក់ និងអ្នកស្លាប់សរុប 412,968នាក់ ក្នុងនោះមានអ្នកជំងឺថ្មីចំនួន 125,521នាក់ និងអ្នកស្លាប់ថ្មីចំនួន 4,940នាក់។ អ្នកជំងឺដែលបានជាសះស្បើយ បានកើនដល់ 3,593,948នាក់។

សហរដ្ឋអាមេរិកដែលជាសម្បុកមេរោគរលាកសួតប្រភេទថ្មីធំជាងគេក្នុងពិភពលោក បានរកឃើញអ្នកជំងឺសរុប 2,044,460នាក់ និងអ្នកស្លាប់សរុប 114,127នាក់ ក្នុងនោះអ្នកជំងឺថ្មីមានចំនួន 17,967នាក់ និងអ្នកស្លាប់ថ្មីមានចំនួន 1,072នាក់។

តំបន់សម្បុកមេរោគCOVID-19 ធំជាងគេទី2ក្នុងពិភពលោក គឺប្រទេសប្រេស៊ីល ដោយមានអ្នកជំងឺសរុប 742,084នាក់ និងអ្នកស្លាប់សរុប 38,497នាក់។

ប្រទេសរុស្ស៊ី នៅតែជាសម្បុកមេរោគCOVID-19 ធំជាងគេលំដាប់ទី3ក្នុងពិភពលោក។ ប្រទេសនេះបានរកឃើញអ្នកជំងឺសរុប 485,253នាក់ និងអ្នកស្លាប់សរុប 6,142នាក់ ក្នុងនោះអ្នកជំងឺថ្មីមានចំនួន 8,595នាក់ និងអ្នកស្លាប់ថ្មី171នាក់ត្រូវបានរកឃើញនៅក្នុងរយៈពេល24ម៉ោងចុងក្រោយនេះ។ ប្រេស៊ីល បានចាប់ផ្ដើមបន្ធូរបន្ថយបម្រាមរក្សាគម្លាតសង្គមតាំងពីថ្ងៃទី12ឧសភា ខណៈតំបន់នីមួយៗប្រើវិធីផ្សេងៗគ្នាក្នុងការទប់ស្កាត់ការឆ្លងវីរុស៕

June 10, 2020

“អ្នកស្នងមរតក” របស់ Samsung រួចទុក្ខភ័យបានមួយគ្រាទៀតហើយ

តុលាការកូរ៉េខាងត្បូងយល់ថា ភ័ស្តុតាងមិនទាន់គ្រប់គ្រាន់ ដូច្នេះ លោក Lee Jae-yong ក៏មិនទាន់ត្រូវបានចោទប្រកាន់ជាផ្លូវការនៅឡើយដែរ។

អនុប្រធានរបស់ក្រុមហ៊ុន Samsung Electronics លោក Lee Jae-yong បានរួចខ្លួនពីបទបញ្ជាចាប់ខ្លួន ក្រោយពីតុលាការទីក្រុង Seoul បានច្រានចោលការស្នើឱ្យចាប់ខ្លួនពីរដ្ឋអាជ្ញា។ ក្រុមរដ្ឋអាជ្ញាបានដាក់ពាក្យស្នើទៅតុលាការដើម្បីធ្វើការចាប់ខ្លួនលោក Lee Jae-yong ក្នុងបំណងបម្រើដល់ការស៊ើបអង្កេតលើសកម្មភាពបន្លំ និងឧបាយកលក្នុងការរៀបចំទីផ្សារ។ មុននោះ លោក Lee ក៏ធ្លាប់ជាប់ពន្ធនាគាររយៈពេលជិតមួយឆ្នាំ ព្រោះតែអំពើពុករលួយ។

លោក Lee Jae-yong អនុប្រធានក្រុមហ៊ុន Samsung Electronics ចាកចេញពីមន្ទីរឃុំឃាំងបន្ទាប់ពីការរង់ចាំសេចក្ដីសម្រេចរបស់តុលាការលើដីកាចាប់ខ្លួន

យោងតាមរបាយការណ៍របស់ Nikkei តុលាការទីក្រុង Seoul បានឱ្យដឹងថា ក្រុមរដ្ឋអាជ្ញាប្រមូលបានភ័ស្តុតាងជាច្រើន ប៉ុន្តែមិនទាន់គ្រប់គ្រាន់ដែលអាចឱ្យធ្វើការកាត់ទោស និងមិនមានហេតុផលសមស្របដើម្បីឃាត់ខ្លួនលោក Lee បាននៅឡើយ។ ប្រការនេះមានន័យថា លោក Lee មិនទាន់ត្រូវបានចោទប្រកាន់ជាផ្លូវការនោះដែរ។

ក្រុមរដ្ឋអាជ្ញានៅតែបន្តធ្វើការស៊ើបអង្កេត ហើយនឹងអាចស្នើឱ្យចាប់ខ្លួនលោក Lee ម្ដងទៀត បន្ទាប់ពីមានភ័ស្តុតាងគ្រប់គ្រាន់ដើម្បីចោទប្រកាន់។ Nikkei បានឱ្យដឹងថា ក្រុមរដ្ឋអាជ្ញាយល់ថា ការសម្រេចរបស់តុលាការគឺពិតជាគួរឱ្យសោកស្ដាយ ប៉ុន្តែ ការចោទប្រកាន់មិនទាន់បានបញ្ចប់នៅឡើយ ហើយការស៊ើបអង្កេតនៅតែបន្តទៅមុខ។

ការចោទប្រកាន់ខាងលើ ទាក់ទងទៅនឹងករណីច្របាច់បញ្ចូលគ្នារវាងក្រុមហ៊ុនចំនួនពីររបស់ Samsung Group នោះគឺក្រុមហ៊ុន Cheil Industries និង Samsung C&T។ លោក Lee ត្រូវបានគេគិតថា បានប្រើប្រាស់ករណីច្របាច់បញ្ចូលគ្នានេះដើម្បីមានអំណាចច្រើនជាងមុនក្នុងការគ្រប់គ្រងក្រុមហ៊ុន Samsung។ ទន្ទឹមនឹងនេះ ករណីច្របាច់បញ្ចូលគ្នានោះក៏មានបញ្ហាមិនច្បាស់លាស់ ទាក់ទិននឹងកិច្ចការសវនកម្មផងដែរ៕

ប្រភព៖ The Verge

June 9, 2020

ស្ពានឫស្សីវែងជាងគេបង្អស់ក្នុងពិភពលោក នឹងបើកទ្វារទទួលទេសចរ ចាប់ពីពាក់កណ្ដាលខែនេះតទៅ (មានវីដេអូ)

ស្ពានប្រវែងជិត5គីឡូម៉ែត្រដែលត្រូវបានធ្វើឡើងពីបន្ទះឫស្សីនេះ ស្ថិតនៅចំកណ្ដាលនៃតំបន់បឹង Poyang ក្នុងទីក្រុង Jiujiang ប្រទេសចិន។ តាមគម្រោង ស្ពាននេះនឹងដាក់ឱ្យដំណើរការនៅពាក់កណ្ដាលខែមិថុនា ឆ្នាំ2020។

ក្រុមកម្មករបានសាងសង់ផ្លូវដើរជាស្ពានដែលធ្វើអំពីឬស្សី វែងជាងគេបំផុតក្នុងពិភពលោករួចរាល់ហើយ។ ស្ពាននេះមានទីតាំងនៅក្នុងទីក្រុង Jiujiang ខេត្ត Jiangxi ដែលស្ថិតនៅក្នុងតំបន់ភាគខាងកើតនៃប្រទេសចិន។ ស្ពាននេះត្រូវបានសាងសង់នៅចំកណ្ដាលតំបន់អភិរក្សបឹង Poyang (Poyang Lake Natural Reserve)។

ផ្លូវឆ្លងកាត់តំបន់អភិរក្សបឹង Poyang (Poyang Lake Natural Reserve)

ស្ពានឫស្សីនេះមានប្រវែងជិត5គីឡូម៉ែត្រ និងទទឹង3ម៉ែត្រ។ ដើម្បីសាងសង់ស្ពាននេះ គេត្រូវប្រើប្រាស់បន្ទះឫស្សីចំនួនជាង 66,000បន្ទះ។ វត្ថុធាតុសម្រាប់សាងសង់ស្ពាននេះ សុទ្ធសឹងតែមានលក្ខណៈធម្មជាតិ ហើយធន់នឹងទឹកទៀតផង។

ស្ពាននេះនឹងជួយឱ្យអ្នកទេសចរ និងជាងថតរូប ធ្វើដំណើរដោយថ្មើរជើងប្រកបដោយសុវត្ថិភាព និងងាយស្រួលជាងមុន ដើម្បីចូលទៅទស្សនាទេសភាពដ៏ស្រស់ស្អាត រួមនឹងសត្វស្លាប និងសត្វព្រៃទាំងឡាយនៅជុំវិញបឹង Poyang នេះផងដែរ។

តំបន់ទេសចរណ៍នៅចំកណ្ដាលបឹងអភិរក្សធម្មជាតិ Poyang (Poyang Lake Natural Reserve)

ស្ពានឫស្សីវែងជាងគេក្នុងពិភពលោកនេះ នឹងត្រូវបើកទ្វារទទួលអ្នកទេសចរចាប់ពីពាក់កណ្ដាលខែមិថុនា ឆ្នាំ2020នេះតទៅ៕

ប្រភព៖ CGTN

June 9, 2020

មន្ត្រីសេតវិមានប្រាប់ថា លោកត្រាំ ទាមទារឱ្យទាហាន 10,000នាក់ ចេញមកទប់ស្កាត់បាតុកម្មក្នុងវ៉ាស៊ីនតោន តែមេធំកងទ័ព មិនឯកភាព…

លោកប្រធានាធិបតីនៃសហរដ្ឋអាមេរិក ដូណាល់ ត្រាំ ធ្លាប់បានប្រាប់បណ្ដាទីប្រឹក្សា កាលពីសប្ដាហ៍កន្លងទៅថា ត្រូវការទាហាន 10,000នាក់ ប្រចាំការក្នុងទីក្រុងវ៉ាស៊ីនតោន ឌីស៊ី ដើម្បីរារាំងហេតុការណ៍ចលាចល ករណីប៉ូលិសសម្លាប់បុរសស្បែកខ្មៅ “ចច ហ្វ្លយដ៍” ប៉ុន្តែ តម្រូវការនេះ ត្រូវបាន ទាំងរដ្ឋមន្ត្រីការពារជាតិ និងមេដឹកនាំកងទ័ព មិនលេងចូល…។ នេះបើតាមការរាយការណ៍របស់ទីភ្នាក់ងារព័ត៌មានរ៉យទ័រ។

ការទាមទាររបស់លោក ត្រាំ ក្នុងអំឡុងពេលពិភាក្សាគ្នានៅក្នុងបន្ទប់ធ្វើការរាងពងក្រពើកាលពីថ្ងៃចន្ទ(ទី1មិថុនា)កន្លងទៅ បានបង្ហាញឱ្យឃើញថា មេដឹកនាំសហរដ្ឋអាមេរិក បម្រុងនឹងបញ្ជូនទាហានប្រដាប់អាវុធ បង្ក្រាបបាតុកម្មនៅក្នុងទីក្រុងនានា រួចជាស្រេចទៅហើយ ទោះជាមានសំឡេងជំទាស់ពីមេដឹកនាំមន្ទីរបញ្ចកោណក៏ដោយ។

មន្ត្រីលំដាប់ខ្ពស់ ដែលមិនមានបំណងបញ្ចេញឈ្មោះ បានបង្ហើបឱ្យដឹងថា លោក ម៉ាក អេស្ពើរ រដ្ឋមន្ត្រីក្រសួងការពារជាតិ, លោកឧត្ដមសេនីយ៍ឯក ម៉ាក មីលលីយ៍ នាយរួមសេនាធិការ និងលោក វីលៀម បារ៍ រដ្ឋមន្ត្រីក្រសួងយុត្តិធម៌ បានព្យាយាមដាស់តឿនលោកត្រាំ ឱ្យបញ្ឈប់គំនិតក្នុងការបញ្ជូនទាហានទៅបង្ក្រាបប្រជាជន ហើយពួកគេបាន “ប្រកែកគ្នាយ៉ាងខ្លាំងក្លា”។

រដ្ឋមន្ត្រីក្រសួងការពារជាតិសហរដ្ឋអាមេរិក លោក Mark Esper

បន្ទាប់ពីនោះមក លោកត្រាំ ហាក់ដូចជាបន្ថយតម្រូវការនោះ និងពេញចិត្តនឹងការប្រើប្រាស់កងកម្លាំងការពារមាតុភូមិ(National Guard) មកគ្រប់គ្រងស្ថានការណ៍វិញ ជាជម្រើសដែលខាងមន្ទីរបញ្ចកោណបានណែនាំ និងជាវិធីដដែលមួយ ដែលសហរដ្ឋអាមេរិកធ្លាប់បានប្រើដើម្បីចាត់ការវិបត្តិចលាចលក្នុងប្រទេសរួចមកហើយ។

មេដឹកនាំមន្ទីរបញ្ចកោណ បានទាក់ទងទៅអភិបាលរដ្ឋនានា ដើម្បីស្នើសុំឱ្យបញ្ជូនកងកម្លាំងការពារមាតុភូមិចូលមកក្នុងក្រុងវ៉ាស៊ីនតោន និងមានការប្រមូលផ្ដុំអាជ្ញាធរដែលគ្រប់គ្រងច្បាប់ផ្នែកផ្សេងៗទៀតផង តែវិធានការចម្បងដែលធ្វើឱ្យលោក ត្រាំ ពេញចិត្តបំផុតនោះ គឺប្រហែលជាបញ្ជារបស់ លោក អេស្ពើរ ដែលបានបញ្ជាឱ្យទាហានក្នុងកងហោះហើរ 82 និងអង្គភាពដទៃទៀតក្នុងទីក្រុងវ៉ាស៊ីនតោន ឌីស៊ី ស្ថិតក្នុងសភាពប្រុងជើងការជាស្រេច។

មន្ត្រីជាន់ខ្ពស់សហរដ្ឋអាមេរិកម្នាក់ បានបញ្ជាក់ថា “ការមានទាហានដែលស្ថិតក្នុងសភាពប្រុងជើងការជាស្រេច តែមិនទាន់ដល់ថ្នាក់ចូលទៅប្រចាំការនៅក្នុងទីក្រុង គឺជារឿងដែលគ្រប់គ្រាន់ហើយសម្រាប់លោកប្រធានាធិបតីនៅពេលនោះ”។

ប្រធានអគ្គសេនាធិការចម្រុះ ឧត្តមសេនីយ៍ Mark Milley

លោករដ្ឋមន្ត្រីក្រសួងយុត្តិធម៌ វីលៀម បារ៍ បានអះអាងនៅក្នុងកម្មវិធី Face the Nation ខាងស្ថានីយទូរទស្សន៍ CBS កាលពីថ្ងៃទី7 មិថុនា ថា មិនមានទាហានប្រចាំការប្រក្រតី(Active duty troops) ត្រូវបញ្ជូនចូលមកតាមផ្លូវថ្នល់ក្នុងក្រុងវ៉ាស៊ីនតោននៅឡើយ តែមានតម្រួតយោធាស្ថិតនៅក្នុងតំបន់ក្បែរៗនោះ។ លោកនិយាយថា “យើងបញ្ជាឱ្យពួកគេ ស្ទែនបាយ ក្រែងលោមានភាពចាំបាច់មែនទែនណាមួយ”។

ការព្យាយាមរបស់លោកត្រាំ ដែលចង់អូសទាញទាហានចូលមកជួយបញ្ឈប់ការជំនុំតវ៉ា ដែលមានដើមកំណើតមកពីបញ្ហាការរើសអើងពូជសាសន៍ បានបង្កឱ្យមានសំឡេងរិះគន់ពីអតីតនាយទាហានលំដាប់ខ្ពស់ជាច្រើននាក់ រួមទាំងលោក ចេមស៍ មេតធីស អតីតរដ្ឋមន្ត្រីការពារប្រទេស និងជាឧត្ដមសេនីយផ្កាយ4 វ័យចូលនិវត្តន៍ ដែលជាធម្មតា មិនដែលរវីរវល់នឹងរឿងនយោបាយឡើយ។

លោករដ្ឋមន្ត្រីការពារជាតិ អេស្ពើរ បានបញ្ជាក់នៅក្នុងសេចក្ដីថ្លែងការណ៍កាលពីថ្ងៃពុធ(ទី3 មិថុនា)កន្លងទៅថា លោកមិនយល់ស្របចំពោះការប្រើច្បាប់បង្ក្រាបចលាចល Insurrection Act ដែលនឹងអនុញ្ញាតឱ្យមានការប្រមូលផ្ដុំទាហានប្រចាំការ ចូលមកបង្ក្រាបក្រុមអ្នកជំនុំតវ៉ាឡើយ ដោយសេចក្ដីថ្លែងការណ៍នោះ បានជំទាស់នឹងឥរិយាបថរបស់លោក ត្រាំ និងជំនួយការលំដាប់ខ្ពស់ទាំងឡាយ និងថែមទាំងមានការនិយាយថា មេដឹកនាំសហរដ្ឋអាមេរិក ដល់ថ្នាក់ស្រែកគំហកដាក់លោក អេស្ពើរ បន្ទាប់ពីការថ្លែងការណ៍បានបញ្ចប់ទៀតផង។

រដ្ឋមន្ត្រីក្រសួងយុត្តិធម៌ លោក William Bar

ហេតុការណ៍នេះ ថែមទាំងបានធ្វើឱ្យមនុស្សជាច្រើនមានការទស្សន៍ទាយថា តើលោកត្រាំ នឹងបណ្ដេញលោកអេស្ពើរចេញពីតំណែងឬទេទៀតផង តែលោកស្រី ខេយ៍លីហ៍ មេកអេណានីយ៍ អ្នកនាំពាក្យរបស់សេតវិមាន បានអះអាងថា លោកត្រាំ “នៅមានភាពជឿជាក់លើលោករដ្ឋមន្ត្រី អេស្ពើរ” នៅឡើយ។

លោក អេស្ពើរ បានចេញកំណត់ហេតុមួយទៅកាន់ក្រុមមន្ត្រី នៃក្រសួងការពារជាតិកាលពីថ្ងៃអង្គារ(ទី2 មិថុនា) ដោយបានដាស់តឿនថា “ពួកយើងមានតួនាទីត្រូវការពារសិទ្ធិរបស់ពលរដ្ឋអាមេរិកាំង ក្នុងការមានសេរីភាព ក្នុងការបញ្ចេញគំនិតយោបល់ និងជួបជំនុំគ្នាដោយសន្តិភាព” ខណៈដែលលោកឧត្ដមសេនីយ៍ឯក មីលលីយ៍ ក៏បានថ្លែងដាស់តឿនពលទាហានគ្រប់រូប ឱ្យចងចាំពាក្យសម្បថ ដែលបានធ្វើនៅចំពោះមុខរដ្ឋធម្មនុញ្ញអាមេរិកាំងដែលថា នឹងការពារសិទ្ធិសេរីភាពក្នុងការជួបជំនុំយ៉ាងសន្តិភាព ដូចគ្នា៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

June 9, 2020

ផ្សារហ៊ុនអាមេរិកងើបឡើងដល់ចំណុចកំពូល បើទោះសេដ្ឋកិច្ចជួបឱនភាព

បិទបញ្ជប់ការជួញដូរក្នុងថ្ងៃទី8មិថុនាម្សិលមិញ ទន្ទស្សន៍ DJIA កើន1.7%បន្ថែមទៀត ជួយឱ្យវាឡើងដល់27,572ពិន្ទុ ចំណែក S&P 500 យកបានពន្ទុចាស់ដែលបានបាត់បង់ក្នុងឆ្នាំនេះត្រលប់មកវិញបន្ទាប់ពីសន្ទស្សន៍របស់វាបានកើន1.2% ខណៈដែលសន្ទស្សន៍ Nasdaq Composite កើន1.1% ជួយឱ្យពន្ទុរបស់វាឡើងដល់ចំណុចឯតទគ្គកម្ម 9,924ពន្ទុ។

នេះគឺជាលើដំបូងហើយដែលសន្ទស្សន៍ខាងលើបានឡើងដល់ចំណុចកំពូលថ្មី រាប់ចាប់ពីខែកុម្ភៈ។ ផ្សារមូលបត្រអាមេរិកមានកំណើនល្អខ្លាំងនៅនាទីចុងក្រោយនៃការជួញដូរក្នុងថ្ងៃទី8មិថុនា ក្រោយពីប្រព័ន្ធបម្រុងសហព័ន្ធ (ធនាគារកណ្ដាលរបស់អាមេរិក/Federal Reserve System (Fed) បានប្រកាសបន្ធូរបន្ថយលក្ខខណ្ឌនៃការទទួលប្រាក់កម្ចីចំពោះបណ្ដាក្រុមហ៊ុនខ្នាតតូច និងមធ្យម។

Nasdaq បានកើនពន្ទុក្នុងពេលថ្មីៗនេះក៏ដោយសារតែភាគហ៊ុនក្នុងវិស័យបច្ចេកវិទ្យា និងទូរគមនាគមន៍។ ទន្ទស្សន៍នេះបានកើន44% រាប់ចាប់ពីដំណាក់កាលដែលវាបានធ្លាក់ដល់បាតនៅក្នុងខែមីនា។

ក្នុងរយៈពេលកន្លង មូលបត្រនៅសហរដ្ឋអាមេរិកបានងើបក្បាលឡើងខ្ពស់ ព្រោះតែព័ត៌មានល្អពីបណ្ដាក្រុមហ៊ុនផលិតឱសថ និងវ៉ាក់សាំងប្រឆាំងCOVID-19។ ចំណែកការដែលសេដ្ឋកិច្ចត្រូវបាននិងកំពុងបើកដំណើរការឡើងវិញបន្តិចម្ដងៗ ក៏ជាកត្តាមួយផ្សេងទៀតជំរុញឱ្យមូលបត្រនៃក្រុមហ៊ុននានាទទួលបានលទ្ធផលល្អជាងមុន ដោយសារក្រុមអ្នកវិនិយោគចាប់ផ្ដើមមានទំនុកចិត្ត។

ក៏ប៉ុន្តែ កាលពីម្សិលមិញ (8មិថុនា) ខឿនសេដ្ឋកិច្ចអាមេរិកត្រូវបានប្រកាសថា បានធ្លាក់ចូលក្នុងវិបត្តិ។ ដោយមិនរង់ចាំលទ្ធផលស្ដីអំពី GDP នៃត្រីមាសទី2ឆ្នាំនេះ មន្ទីរស្រាវជ្រាវសេដ្ឋកិច្ចជាតិសហរដ្ឋអាមេរិក NBER (National Bureau of Economic Research) បានប្រកាសថា សហរដ្ឋអាមេរិកបានធ្លាក់ចូលក្នុងវិបត្តិសេដ្ឋកិច្ចតាំងពីខែកុម្ភៈមកម្លេះ ដែលប្រការនេះបានបញ្ចប់សម្ទុះនៃកំណើនសេដ្ឋកិច្ចដ៏យូរអង្វែងជាប្រវត្តិសាស្ត្ររបស់ប្រទេសនេះ។ សញ្ញាទាំង2នេះបានបង្ហាញអំពីភាពផ្ទុយគ្នានៅក្នុងបម្រែបម្រួលរបស់ទីផ្សារមូលបត្រ និងភាពជាក់ស្ដែងនៃសេដ្ឋកិច្ចសហរដ្ឋអាមេរិកក្នុងអំឡុង11សប្ដាហ៍កន្លងមកនេះ។

សន្ទស្សន៍ S&P 500 បច្ចុប្បន្ននៅតែទាបជាង5% បើធៀបជាមួយនឹងការឡើងដល់ចំណុចកំពូលក្នុងខែកុម្ភៈ2020 ដែលនេះមានន័យថា អស្ថិរភាពនៃការងើបឡើងវិញរបស់សេដ្ឋកិច្ចនៅតែមានហានិភ័យខ្ពស់នៅឡើយ។ ការកើនឡើងនៃសន្ទស្សន៍ Nasdaq គ្រាន់តែអាចបញ្ជាក់ថា ក្រុមវិនិយោគិនត្រៀមខ្លួនជាស្រេចក្នុងការផ្សងព្រេងរកស៊ីជាមួយបណ្ដាក្រុមហ៊ុនបច្ចេកវិទ្យាតែប៉ុណ្ណោះ ដោយពួកគេសង្ឃឹមថា វិស័យនេះនឹងឆាប់ងើបឡើងវិញនៅក្រោយ “យុគសម័យ” របស់ COVID-19។

មូលបត្ររបស់ Microsoft, Apple និង Alphabet បានកើនឡើងខ្ពស់ជាងគេ បើធៀបជាមួយនឹងបណ្ដាក្រុមហ៊ុនដែលស្ថិតក្នុងសន្ទស្សន៍ផ្សារហ៊ុន Nasdaq។ មូលបត្ររបស់ក្រុមហ៊ុន Amazon និង Facebook ក៏ធ្លាប់បានឡើងដល់ចំណុចកំពូលក្នុងអំឡុងប៉ុន្មានសប្ដាហ៍កន្លងទៅថ្មីៗនេះផងដែរ។

ចាប់តាំងពីថ្ងៃទី19កុម្ភៈ ទុនសរុបរបស់ Amazon បានកើនជាង170ពាន់លានដុល្លារបន្ថែមទៀត ដោយសារអ្នកវិនិយោគជឿថា អតិថិជននឹងងាកមកទិញទំនិញអនឡាញ។ Microsoft និង Apple នៅតែជាក្រុមហ៊ុនដែលមានតម្លៃបំផុតនៅសហរដ្ឋអាមេរិក៕

ប្រភព៖ Reuters

June 9, 2020

រង់ចាំ លុះដង្ហើមចុងក្រោយ… ការឃ្លាតទៅគ្មានថ្ងៃត្រឡប់របស់ឪពុកម្នាក់ ដែលលះបង់ពេលវេលាពាក់កណ្ដាលជីវិត តាមរកកូនស្រីដែលត្រូវកូរ៉េខាងជើងចាប់ពង្រត់…

រឿងរ៉ាវដ៏កម្សត់នៅប្រទេសជប៉ុន…លោកឪពុករបស់កូនស្រីម្នាក់ដែលត្រូវភ្នាក់ងារសម្ងាត់កូរ៉េខាងជើងចាប់ពង្រត់ទៅបាត់កាលពីជាង 40ឆ្នាំមុន បានផុតខ្យល់ដង្ហើមក្នុងវ័យ 87ឆ្នាំ ដោយគ្មានឱកាសបានឱបកូនស្រីជាទីស្រឡាញ់ក្នុងរង្វង់ដៃជាថ្មីម្ដងទៀតឡើយ…។

យ៉ូកូតៈ ឈិកេរុ ឪពុករបស់ក្មេងស្រីជនជាតិជប៉ុន ដែលត្រូវភ្នាក់ងារសម្ងាត់កូរ៉េខាងជើងចាប់ពង្រត់កាលពីជាង 40ឆ្នាំមុន បានទទួលមរណភាពកាលពីថ្ងៃទី5 មិថុនាកន្លងទៅ ខណៈអាយុ 87ឆ្នាំ។ ការឃ្លាតទៅរបស់បុរសជរាម្នាក់នេះ ជារឿងរ៉ាវដ៏សែនរំជួលចិត្តខ្លាំងណាស់ បើវិលត្រឡប់ទៅមើលពីភាពឈឺចាប់របស់ឪពុកម្នាក់ ដែលនៅសុខៗ កូនស្រីវ័យ 13ឆ្នាំ បានបាត់ខ្លួនទៅយ៉ាងគ្មានដំណឹង។

ថ្ងៃទី15 ឧសភា ឆ្នាំ1979 យុវតី មេគូមិ រៀនថ្នាក់មធ្យមសិក្សាទី1 កំពុងតែត្រឡប់មកពីសាលា នៅក្នុងខេត្តនីអ៊ិកាតៈ ភាគខាងលិច ឆៀងខាងជើង ខេត្តមាត់សមុទ្រ ជាទីដែលឪពុក ជាបុគ្គលិកធនាគារកណ្ដាលជប៉ុន ត្រូវបានផ្លាស់ទៅប្រចាំការនៅទីនោះ…តែនាងបែរជាមិនឃើញមកដល់ផ្ទះ…ក្រុមគ្រួសារបានព្យាយាមតាមរក តែរកមិនឃើញទាល់តែសោះ។

20ឆ្នាំក្រោយមក ទើបបានដឹងថា នាងគឺជាមនុស្សម្នាក់នៅក្នុងគម្រោងការចាប់ពង្រត់ពលរដ្ឋបរទេស របស់រដ្ឋបាលក្រុងព្យុងយ៉ាងក្នុងយុគសម័យទសវត្សរ៍ឆ្នាំ70 និង80 ដើម្បីយកទៅបង្រៀនភាសា និងវប្បធម៌របស់ប្រទេសជិតខាងឱ្យភ្នាក់ងារសម្ងាត់របស់ខ្លួន។ គ្រួសារដែលរងផលប៉ះពាល់ដោយសារគ្រោងការនេះ 7គ្រួសារ បានរួមគ្នាបង្កើត “សមាគមគ្រួសារជនរងគ្រោះដែលត្រូវកូរ៉េខាងជើងចាប់ពង្រត់” នៅឆ្នាំ1997 ដោយមានឪពុក និងម្ដាយរបស់ មេគូមិ ជាប្រធាន។

ទាំង 2នាក់(ឪពុក និងម្ដាយរបស់មេគូមិ) បានក្លាយជានិមិត្តសញ្ញានៃការធ្វើសកម្មភាពទាមទារ ឱ្យនាំអ្នកដែលត្រូវកូរ៉េខាងជើងចាប់ពង្រត់ទៅនោះ ត្រឡប់មកផ្ទះវិញ។ នាំគ្នាដើរត្រាច់ចរទូទាំងប្រទេសយ៉ាងមិនដែលអស់សង្ឃឹម ដើម្បីប្រមូលផ្ដុំការគាំទ្រ និងមិនឱ្យរឿងរ៉ាវនេះស្ងប់ស្ងាត់ទៅវិញ ជាពិសេសក្នុងអំឡុងពេលនោះ បណ្ដាសារព័ត៌មានទាំងឡាយ ហាក់ដូចជាមិនសូវផ្ដល់ចំណាប់អារម្មណ៍ចំពោះរឿងនេះប៉ុន្មានឡើយ និងថែមទាំងសង្ស័យទៀតផងថា តើវាជារឿងដែលកើតឡើងមែន ឬមិនមែនទៀតផង។ 10ឆ្នាំកន្លងទៅ ទាំង 2នាក់ស្វាមីភរិយា បានបង្ហាញខ្លួននៅតាមទីប្រជុំជននានាជាង 1,400លើក មុននឹងលោកតា យ៉ូកូតៈ ចាំបាច់ត្រូវលាឈប់ពីតំណែងប្រធានសមាគម ដោយសារតែសុខភាពមិនអំណោយផល។

រដ្ឋបាលជប៉ុន បានបញ្ជាក់ថា មានពលរដ្ឋជប៉ុន ត្រូវភ្នាក់ងារសម្ងាត់កូរ៉េខាងជើងចាប់ពង្រត់យកទៅចំនួន 17នាក់ តែគេជឿថា អាចមានច្រើនជាងនេះទៅទៀត។

នៅក្នុងខែកញ្ញា ឆ្នាំ2002 លោក គីម ចង់ អ៊ីល មេដឹកនាំកូរ៉េខាងជើងក្នុងខណៈពេលនោះ បានបង្ហើបឱ្យដឹងនៅក្នុងអំឡុងកិច្ចប្រជុំជាប្រវត្តិសាស្ត្រមួយ ជាមួយលោកនាយករដ្ឋមន្ត្រីជប៉ុន ជុនអ៊ិឈិរ៉ូ ខូអ៊ិស៊ូមិ ថា ជនជាតិជប៉ុនដែលត្រូវចាប់ពង្រត់យកទៅនោះ នៅមានជីវិតរស់ចំនួន 5នាក់ និងអនុញ្ញាតឱ្យវិលត្រឡប់ទៅជប៉ុនវិញបាន តែ មេគូមិ ជាមួយនឹងជនជាតិជប៉ុន 7នាក់ទៀត បានស្លាប់អស់ហើយ។

កូរ៉េខាងជើងបានអះអាងថា មេគូមិ បានធ្វើអត្តឃាត ខណៈពេលកំពុងព្យាបាលជំងឺសោកសៅកាលពីឆ្នាំ1993 តែរួចហើយ ស្រាប់តែប្ដូរឆ្នាំនៃការស្លាប់នោះទៅជាឆ្នាំ2004 ទៅវិញ។ រដ្ឋបាលជប៉ុន មិនជឿលើទិន្នន័យនេះឡើយ មួយផ្នែកដោយសារតែអដ្ឋិធាតុ(ឆ្អឹង) ដែលខាងក្រុងព្យុងយ៉ាងនាំយកមកប្រគល់ឱ្យដោយប្រាប់ថា ជារបស់មេគូមិនោះ លទ្ធផលនៃការពិនិត្យ DNA នៅក្នុងប្រទេសជប៉ុន បែរជារកឃើញថា ជារបស់អ្នកផ្សេងទៅវិញ ធ្វើឱ្យក្រុមគ្រួសាររបស់នាង នៅតែមានសង្ឃឹមតទៅទៀតថា នាងអាចនៅមានជីវិតរស់នៅឡើយ។

ដំណឹងរបស់មេគូមិ ដែលខាងកូរ៉េខាងជើងប្រាប់មកទៀតគឺ នាងជាមួយនឹង គីម យ៉ង់ ណាំ ជនជាតិកូរ៉េខាងត្បូងដែលគេជឿថា ត្រូវបានចាប់ពង្រត់ទៅដូចគ្នាខណៈស្ថិតក្នុងវ័យជំទង់ដែរនោះ បានរៀបការនឹងគ្នានៅឆ្នាំ1986 មានកូនស្រីជាមួយគ្នា 1នាក់ ដែលស្វាមីភរិយាយ៉ូកូតៈ(ឪពុកម្ដាយរបស់មេគូមិ) បានទទួលការអនុញ្ញាតពីក្រុងព្យុងយ៉ាងឱ្យទៅជួបមុខចៅស្រី គីម អ៊ឹន យង់ នៅឯទីក្រុងរបស់ប្រទេសម៉ុងហ្គោលី កាលពីខែមីនា ឆ្នាំ2014…គឺជាលើកដំបូង ដែល 2នាក់តាយាយបានជួបមុខចៅស្រី តែមិនឃើញសូម្បីតែស្រមោលកូនស្រីកម្សត់ រហូតដល់ថ្ងៃស្លាប់។

រូបភាពរបស់ទីភ្នាក់ងារព័ត៌មាន NHK លោកតា យ៉ូកូតៈ បង្ហាញវត្ថុដែលលោកតាស្រឡាញ់បំផុត គឺក្រាសសិតសក់ ដែលកូនស្រីបានជូនជាកាដូថ្ងៃកំណើតគម្រប់ 45ឆ្នាំរបស់ឪពុក គឺ 1ថ្ងៃគត់ មុនពេលនាងបាត់ខ្លួនជារៀងរហូត…

លោកនាយករដ្ឋមន្ត្រី ស៊ីហ្សូ អាបេ បានថ្លែងក្រោយពីបានទទួលដំណឹងការស្លាប់របស់លោកតាយ៉ូកូតៈ ថា លោកទន្ទឹងរង់ចាំថ្ងៃដែលលោកតា យ៉ូកូតៈ ឈិកេរុ និងភរិយា បានឱប មេគូមិ កូនស្រីជាទីស្រឡាញ់នៅក្នុងរង្វង់ដៃសាជាថ្មី… “ខ្ញុំបានខិតខំព្យាយាមយ៉ាងអស់ពីកម្លាំងហើយ ក្នុងឋានៈនាយករដ្ឋមន្ត្រី ខ្ញុំមានអារម្មណ៍ថាខុស និងសោកស្ដាយខ្លាំងណាស់…”។ លោកបានបញ្ជាក់ទៀតថា ការបញ្ចប់រឿងចាប់ពង្រត់មនុស្ស នៅតែជារឿងសំខាន់លំដាប់ទី1 របស់រដ្ឋាភិបាល និងទាមទារឱ្យមានការចរចាជាមួយលោក គីម ជុង អ៊ុន ដោយគ្មានលក្ខខណ្ឌជាមុន។

ខណៈដែលលោក អ៊ិស៊ុខៈ ឈិកេអូ អ្នកតំណាងឱ្យក្រុមគ្រួសារជនរងគ្រោះដែលត្រូវចាប់ពង្រត់ បានបញ្ជាក់ថា ពួកយើងដឹងថា ថ្ងៃនេះត្រូវតែមកដល់…នេះគឺជាលទ្ធផលនៃការមិនព្រមធ្វើអ្វីសោះកាលពីច្រើនឆ្នាំកន្លងមក…បើសិនមិនបញ្ចប់ និងនៅតែបណ្ដោយឱ្យនៅបែបនេះយូរតទៅទៀត ប្រហែលជានៅមានឪពុកម្ដាយ មិនច្រើនទៀតទេ ដែលនៅមានខ្យល់ដង្ហើម រង់ចាំបុគ្គលជាទីស្រឡាញ់របស់ខ្លួន ត្រឡប់មកវិញ៕

ប្រភព៖ សារព័ត៌មានបរទេស
ប្រែសម្រួលដោយអ្នកគ្រូ ឆវី

June 9, 2020

Author: សឿន សំណាង