សឿន សំណាង - La Reine Media

ក្រុមហ៊ុន Startup ដែលរកបានចំណូលច្រើនពីភាពឯការបស់មនុស្ស នៅក្នុងវិបត្តិសុខភាពពិភពលោក

COVID-19 បានផ្ដល់ឱកាសសម្រាប់ក្រុមហ៊ុននានាក្នុងការបង្កើតសេវាកម្មជួយដល់អតិថិជនដើម្បីភ្ជាប់ទំនាក់ទំនងជាងញាតិ ឬអ្នកដទៃ ការផ្ដល់ប្រឹក្សាយោបល់ផ្លូវចិត្ត និងកាត់បន្ថយភាពតប់ប្រមល់នៅពេលត្រូវនៅផ្ទះយូរថ្ងៃខែ។

បម្រាមគោចរ និងបទបញ្ជារក្សាគម្លាតសង្គមដោយសារតែវិបត្តិសុខភាពដែលបង្កឡើងដោយវីរុសCOVID-19 គឺជាឧបសគ្គសម្រាប់ក្រុមហ៊ុនជាច្រើន។ ប៉ុន្តែ ក្រុមហ៊ុនមួយចំនួនបានបង្វែរបញ្ហានេះឱ្យទៅជាឱកាស។ នៅលើទំព័រសារព័ត៌មាន CNBC ស្ថាបនិកក្រុមហ៊ុនថ្មីៗចំនួន3 បានចែករំលែកអំពីបទពិសោធន៍ក្នុងការរកលុយពីតម្រូវការនៃការកាត់បន្ថយភាពឯកានៅក្នុងសម័យCOVID-19នេះ។

នៅមុនសម័យCOVID-19 ភាពឯកាក៏ជាបញ្ហាមួយនៅក្នុងយុគសម័យបច្ចេកវិទ្យា។ យោងតាមរបាយការណ៍មួយនៅសហរដ្ឋអាមេរិកកាលពីពេលថ្មីៗនេះបានឱ្យដឹងថា ជិត2/3 (61%) នៃក្រុមមនុស្សដែលត្រូវបានស្ទង់មតិ មានអារម្មណ៍ថាឯកា។ តួលេខនេះបានកើនឡើងច្រើនបើធៀបនឹង54%កាលពីឆ្នាំ2018។

បញ្ហាខាងលើនេះនឹងបង្កផលវិបាកច្រើនដល់សុខភាព ព្រោះថាអ្នកដែលតែងតែមានអារម្មណ៍ឯកានឹងងាយជួបប្រទះបញ្ហាគាំងបេះដូង ជំងឺបេះដូង ជំងឺសរសៃឈាមបេះដូង ដែលអាចធ្វើឱ្យពួកគេមានអាយុមិនបានវែង។

Karen Dolva អាយុ29ឆ្នាំ ជាសហស្ថាបនិករបស់ក្រុមហ៊ុន No Isolation ដឹងយ៉ាងច្បាស់អំពីប្រការខាងលើនេះ។ ក្នុងរយៈពេល5ឆ្នាំកន្លងទៅ ក្រុមហ៊ុននៃប្រទេសន័រវែសមួយនេះ បានប្រឹងប្រែងជួយដល់អតិថិជនរបស់ខ្លួនក្នុងការកាត់បន្ថយភាពឯកានិងបញ្ហាសុខភាពដែលកើតឡើងដោយសារភាពឯកា។ អតិថិជនរបស់ក្រុមហ៊ុន No Isolation គឺជាមនុស្សវ័យចំណាស់និងកុមារ។ ក្រុមហ៊ុននេះប្រើប្រាស់ផលិតផលបច្ចេកវិទ្យាដែលមានមុខងារជួយដល់ទំនាក់ទំនងរបស់អ្នកជំងឺ ដូចជាមនុស្សយន្តដែលបង្ហាញអំពីចលនា ឬកុំព្យូទ័រថេប្លែតជាដើម។

វិបត្តិសុខភាពដែលបណ្ដាលមកពីវីរុសCOVID-19 ធ្វើឱ្យបញ្ហានេះកាន់តែធ្ងន់ធ្ងរជាងមុន។ នៅក្នុងរយៈពេល2សប្ដាហ៍ចុងក្រោយនៃខែមីនា នៅពេលដែលCOVID-19បានរាលដាល់ពេញអឺរ៉ុប តម្រូវការទាក់ទិននឹងផលិតផលរបស់ក្រុមហ៊ុន No Isolation បានកើនឡើងខ្ពស់។ ពួកគេត្រូវបង្កើនផលិតកម្មដើម្បីឆ្លើយតបនឹងតម្រូវការថ្មី។ Dolva បានឱ្យដឹងថា៖ “ដំបូងឡើយ យើងគិតថានឹងមិនអាចផលិតអ្វីបន្ថែមទៀតនោះទេនៅក្នុងឆ្នាំ2020នេះ។ ប៉ុន្តែ ក្រោយមកអ្វីៗទាំងអស់ក៏បានដើរបញ្ច្រាស់ទិស ហើយយើងក៏ស្វែងរកវិធីដើម្បីបង្កើនការផលិត”។

ឧបករណ៍របស់ក្រុមហ៊ុន No Isolation បានជួយឱ្យអតិថិជនជាមនុស្សចាស់ តភ្ជាប់ទំនាក់ទំនងជាមួយនឹងញាតិក្នុងគ្រាដែលត្រូវសម្រាកនៅក្នុងផ្ទះ។ Dolva និយាយថា៖ “ខ្ញុំពិតជាសប្បាយចិត្តណាស់នៅពេលឃើញផលិតផលរបស់យើងមានប្រសិទ្ធភាព ព្រោះថាមានមនុស្សជាច្រើនកំពុងប្រើប្រាស់។ អតិថិជនវ័យចំណាស់នឹងទទួលបានរូបថតចំនួន17សន្លឹកក្នុងមួយសប្ដាហ៍។ សម្រាប់ពួកគេ វាប្រៀបដូចជាការទទួលបានរូបថតពីប្រៃសណីយ៍យ៉ាងដូច្នោះដែរ។

ចំណែក Calvin Benton ដែលជាសហស្ថាបនិករបស់ក្រុមហ៊ុន Spill នៅអង់គ្លេសវិញ បានបង្កើតកម្មវិធី (App) មួយដែលអនុញ្ញាតឱ្យបណ្ដាក្រុមហ៊ុនអាចផ្ដល់ប្រឹក្សាយោបល់ផ្នែកផ្លូវចិត្តពីចម្ងាយ តាមរយៈកម្មវិធីផ្ញើសារ Slack។ នៅពេលដែលគ្រប់គ្នាត្រូវធ្វើការពីចម្ងាយ សេវាកម្មនេះកាន់តែមានសារសំខាន់។

“នៅក្នុងអំឡុង2ខែកន្លងទៅ អ្វីៗទាំងអស់ពិតជាច្របូកច្របល់។ យើងទទួលបានសំណួរស្ដីអំពី Spill ច្រើនជាងរយៈពេល2ឆ្នាំកន្លងទៅបូកចូលគ្នាទៅទៀត” Benton បានឱ្យដឹងបែបនេះ។ ក្រុមហ៊ុន Spill ត្រូវបានបង្កើតឡើងកាលពីឆ្នាំ2018។

តម្រូវការមិនត្រឹមតែមកពីបណ្ដាប្រធានក្រុមហ៊ុន ឬម្ចាស់អាជីវកម្មនោះទេ សូម្បីតែបុគ្គលធម្មតាដែលមានបញ្ហាការងារ ឬសុខភាពក៏ស្វែងរកសេវាកម្មរបស់ Spill ដែលនេះធ្វើឱ្យតួលេខនៃតម្រូវការសេវាកម្ម កើនឡើងច្រើនជាងពេលធម្មតាដល់ទៅ4ដង។

Calvin Benton (ស្ដាំ) និងក្រុមការងារជួរមុខរបស់ក្រុមហ៊ុន Spill

នេះក៏ជាដំណឹងល្អសម្រាប់ក្រុមគ្រូពេទ្យឯកទេសផ្នែកផ្លូវចិត្តផងដែរ។ គ្រូពេទ្យអាចប៉ះប៉ូវទៅលើខ្ទង់ប្រាក់ចំណូលដែលបានបាត់បង់ដោយសារមិនអាចណាត់ជួបអតិថិជនដោយផ្ទាល់។ Spill ក៏បានបង្កើតសេវាកម្មសាធារណៈ ដូចជា “សួរអ្នកឯកទេស” នៅលើ story របស់ Instagram រួមនឹងការប្រឹក្សាយោបល់ដោយោមិនគិតថ្លៃដើម្បីអនុញ្ញាតឱ្យក្រុមមនុស្សដែលត្រូវបានផ្អាកពីការងារបណ្ដោះអាសន្ន អាចជួយគ្នាទៅវិញទៅមក។

ក្រៅពីបញ្ហាទាក់ទិននឹងគម្លាត និងវិបត្តិផ្លូវចិត្ត បទបញ្ជារក្សាគម្លាតសង្គមក៏បានធ្វើឱ្យមនុស្សមានអារម្មណ៍តប់កមល ព្រួយចិត្ត និងឯកាផងដែរ។ នេះគឺជាមូលហេតុដែលនាំឱ្យ Danielle Baskin និងសហស្ថាបនិករបស់ខ្លួនបង្កើត QuarantineChat ដែលជាកម្មវិធីមួយ ជួយតភ្ជាប់ទំនាក់ទំនងរវាងមនុស្សចម្លែកនិងមនុស្សចម្លែក តាមរយៈការហៅទូរស័ព្ទបែបចៃដន្យជារៀងរាល់ថ្ងៃ។

Baskin និង Max Hawkins បានបង្កើតសេវាកម្មនេះកាលពីខែមីនា នៅលើថ្នាលនៃកម្មវិធីផ្ញើសារ Dialup របស់ពួកគេ នៅក្នុងគ្រាដែលសហរដ្ឋអាមេរិកចាប់ផ្ដើមអនុវត្តបម្រាមគោចរ។ ប៉ុន្តែ គំនិតនេះបានកើតឡើងតាំងពីយូរមកហើយ នៅពេលដែល Baskin ត្រូវនៅក្នុងផ្ទះព្រោះតែកើតជំងឺឆ្លងម្យ៉ាង។

Baskin និយាយថា៖ “ខ្ញុំគិតថា អូ! ពិតជាអស្ចារ្យណាស់បើសិនជាខ្លួនអាចតភ្ជាប់ទំនាក់ទំនងជាមួយអ្នកណាម្នាក់ដែលមានជំងឺដូចគ្នានេះនៅពេលនេះតែម្ដង។ ដូច្នេះ ពេលដែល COVID-19 បានបង្ហាញខ្លួន ខ្ញុំក៏បានធ្វើឱ្យគំនិតនេះក្លាយជាការពិត”។

Danielle Baskin សហស្ថាបនិកនៃក្រុមហ៊ុន QuarantineChat

កម្មវិធីនេះទទួលបានជោគជ័យខ្លាំងណាស់។ អ្នកប្រើប្រាស់បានប្រើ QuarantineChat ក្នុងការសន្ទនាជាង2,300ម៉ោងជារៀងរាល់សប្ដាហ៍នៅក្នុងប្រទេសចំនួន183ក្នុងពិភពលោក។ Baskin ថ្លែងថា៖ “យើងគិតថា នេះគ្រាន់តែជាវិធីមួយដើម្បីជួយឱ្យអ្នករាល់គ្នាបានសប្បាយ។ ប៉ុន្តែ ជាក់ស្ដែង អ្នកប្រើប្រាស់តែងនិយាយគ្នាលេងយ៉ាងយូរ ព្រមទាំងបានក្លាយជាមិត្តនឹងគ្នាទៀតផង”។

ការបង្កើតអាជីវកម្មនៅក្នុងវិបត្តិសុខភាពពិភពលោក គឺមិនមែនជារឿងងាយស្រួលនោះឡើយ។ ក្រៅពីបញ្ហាហិរញ្ញវត្ថុ និងភាពសមហេតុផល កត្តាបរិស្ថាននៃអាជីវកម្មនិងតម្រូវការរបស់អតិថិជនក៏ជារឿងដែលពិបាកស្មានផងដែរ។

ប៉ុន្តែ Eric Ries ដែលជាអ្នកនិពន្ធរបស់សៀវភៅ The Lean Startup ដែលនិយាយអំពីអាជីវកម្ម បានឱ្យដឹងថា នេះអាចជាឱកាសដ៏ល្អ បើសិនជាអ្នកបានរកឃើញដំណោះស្រាយសម្រាប់បញ្ហាដែលគ្រប់គ្នាត្រូវប្រឈម។ លោកបន្តថា៖ “ភាគច្រើននៃក្រុមហ៊ុនធំៗដែលយើងធ្លាប់ដឹង គឺសុទ្ធសឹងតែត្រូវបានបង្កើតឡើងក្នុងគ្រាមានវិបត្តិ”។

យ៉ាងនេះក្ដី លោក Ries យល់ថា ក្រុមហ៊ុននានាគួរតែត្រូវបានបង្កើតឡើងជាមួយនឹងចក្ខុវិស័យវែងឆ្ងាយ ជំនួសឱ្យការដោះស្រាយតែបញ្ញាមួយនៅក្នុងគ្រាជាក់លាក់ណាមួយ។ Eric Ries សង្កត់ធ្ងន់ថា៖ “យើងនឹងមិនស្ថិតនៅក្នុងស្ថានភាពអាសន្នជានិច្ចនោះឡើយ។ ក្រុមហ៊ុនជាច្រើនធ្វើជំនួញបានយ៉ាងល្អនៅក្នុងគ្រាមានវិបត្តិ ប៉ុន្តែនៅពេលដែលអ្វីៗទាំងអស់បានវិលត្រលប់មករកសភាពធម្មតា ការរកស៊ីរបស់ពួកគេក៏ធ្លាក់ចុះទៅតាមនោះដែរ”៕

ប្រភព៖ CNBC

June 23, 2020

ហុងកុង ចេញច្បាប់ប្រតិបត្តិ ឱ្យសាលារៀន “បង្ហូតទង់ជាតិ-ច្រៀងភ្លេងជាតិ” ជំរុញឱ្យកូនសិស្សស្គាល់អត្តសញ្ញាណជាតិ

ស៊ីនហួ ទីភ្នាក់ងារព័ត៌មានផ្លូវការរបស់ចិន បានរាយការណ៍ថា កាលពីថ្ងៃព្រហស្បតិ៍(ទី18 មិថុនា) រដ្ឋបាលតំបន់គ្រប់គ្រងពិសេសហុងកុងរបស់ចិន បានចេញច្បាប់ប្រតិបត្តិសម្រាប់សាលារៀន ស្ដីពីការបង្ហូត ឬលើកទង់ជាតិចិន និងទង់ប្រចាំហុងកុង និងប្រគំភ្លេង និងច្រៀងចម្រៀងភ្លេងជាតិ។

អ្នកនាំពាក្យនាយកដ្ឋានការសិក្សា(EDB) បានបញ្ជាក់ថា នាយកដ្ឋាន បានបញ្ជូនទិន្ន័យចុងក្រោយបំផុតទៅឱ្យសាលារៀនផ្សេងៗ ពាក់ព័ន្ធនឹងប្រភពធនធានផ្នែករូបមន្តក្បួនការរៀនសូត្រ ការបង្រៀន និងវិធានការគាំទ្រដែលពាក់ព័ន្ធរួចហើយ។

អ្នកនាំពាក្យថ្លែងថា សាលាបឋម និងមធ្យមសិក្សា ត្រូវតែបង្ហាញទង់ជាតិប្រទេសចិន និងទង់ប្រចាំតំបន់គ្រប់គ្រងពិសេសហុងកុង រួមទាំងប្រគំបទភ្លេង និងច្រៀងភ្លេងជាតិចិន ក្នុងខណៈដែលមានការរៀបចំធ្វើកិច្ចការងារអបអរសាទរក្នុងឱកាសថ្ងៃឆ្លងឆ្នាំថ្មី ថ្ងៃបង្កើតតំបន់គ្រប់គ្រងពិសេសហុងកុងរបស់ចិន និងថ្ងៃបុណ្យជាតិចិន។

អ្នកនាំពាក្យបានបន្ថែមទៀតថា នាយកដ្ឋានសូមណែនាំដោយទទូច ឱ្យសាលារៀនរៀបចំធ្វើកិច្ចការងារខាងលើ ក្នុងថ្ងៃសំខាន់ និងក្នុងឱកាសពិសេសផ្សេងៗ និងត្រូវជំរុញធ្វើឱ្យបានយ៉ាងជាប់លាប់។

ដើម្បីជួយសាលារៀនក្នុងការបណ្ដុះបណ្ដាលកូនសិស្សឱ្យស្គាល់ និងចេះគោរពទង់ជាតិចិន ច្រៀងភ្លេងជាតិចិន រួមទាំងយល់ដឹងពីប្រវត្តិសាស្ត្រ និងចិត្តវិញ្ញាណនៃភ្លេងជាតិចិន ទើបនាយកដ្ឋានបានរំឭកឡើងវិញនូវរូបមន្ត ប្រមូលរួបរួមប្រភពទិន្នន័យដែលពាក់ព័ន្ធ និងបន្ថែមវិធានការគាំទ្រលើផ្នែករូបមន្តប្រតិបត្តិ។

ច្បាប់ភ្លេងជាតិ បានទទួលការប្រកាសនៅក្នុងច្បាប់ផ្លូវរដ្ឋ និងត្រូវបានប្រកាសប្រើនៅក្នុងទីក្រុងហុងកុង តាំងពីថ្ងៃទី12 មិថុនា កន្លងមកថ្មីៗ ដោយអ្នកនាំពាក្យខាងលើ បានបញ្ជាក់ថា ទង់ជាតិ ភ្លេងជាតិ និងត្រារបស់ផែនដី គឺជាសញ្ញាសម្គាល់ និងជានិមិត្តសញ្ញារបស់ជាតិ ដែលប្រជាជនគ្រប់រូបគួរតែផ្ដល់នូវការគោរព។

ទាំងអស់នេះ អ្នកនាំពាក្យនៅបានបញ្ជាក់ទៀតថា សាលារៀន គួរតែផ្ដល់ចំណេះ ការយល់ដឹងដល់សិស្សពាក់ព័ន្ធនឹងទង់ជាតិ ភ្លេងជាតិ និងត្រាផែនដីរបស់ចិន ដោយធ្វើជាផ្នែកមួយនៃការសិក្សាមុខវិជ្ជាគុណធម៌ តួនាទីពលរដ្ឋ និងជាតិ ព្រមទាំងជួយជំរុញឱ្យសិស្សរឭកដឹងពីអត្តសញ្ញាណជាតិ… ព្រមទាំងបានបន្ថែមថា ការបណ្ដុះបណ្ដាលអំពីអត្តសញ្ញាណរបស់ជាតិដល់សិស្សនោះ គឺជាគោលដៅមួយក្នុងការរៀនយល់ដឹងដ៏សំខាន់របស់ការសិក្សាក្នុងកម្រិតបឋម និងមធ្យមសិក្សា៕

ប្រភព៖ សារព័ត៌មានបរទេស

June 23, 2020

TOYOTA មិនចុះចាញ់កូវីដ-19ទេ នៅតែមានប្រាក់ចំណេញ និងមិនកាត់បន្ថយបុគ្គលិក សូម្បីតែម្នាក់!

CEO តូយ៉ូតា ក្រុមហ៊ុនផលិតរថយន្តធំបំផុតរបស់ប្រទេសជប៉ុន បានបង្ហើបឱ្យដឹងថា ក្រុមហ៊ុននៅតែមានប្រាក់ចំណេញ បើទោះជាប្រឈមនឹងវិបត្តិដ៏ធំដោយសារវីរុសកូវីដ-19 ខ្លាំងជាងអំឡុងពេលវិបត្តិ លេយ៍មែន ប្រាឌើរ ដែលមានប្រភពពីសហរដ្ឋអាមេរិកទៅទៀត។

លោក អាគីអូ តូយ៉ូដា CEO ក្រុមហ៊ុនតូយ៉ូតា ម៉ូទ័រ បានថ្លែងនៅក្នុងការប្រជុំភាគហ៊ុនិកកាលពីសប្ដាហ៍កន្លងទៅថា តូយ៉ួតានៅតែមានប្រាក់ចំណេញក្នុងឆ្នាំសារពើពន្ធ ដែលនឹងបញ្ចប់ក្នុងខែមីនា ឆ្នាំក្រោយ។ លោកថែមទាំងបានបញ្ជាក់ទៀតថា “តូយ៉ូតា រឹងមាំឡើង ដោយសារការកាត់បន្ថយការចំណាយយ៉ាងមានប្រសិទ្ធភាព”។

ក្រុមហ៊ុនតូយ៉ូតា ម៉ូទ័រ បានប្រមាណថា ទោះជានៅមានប្រាក់ចំណេញក្ដី តែប្រាក់ចំណេញពីការដំណើរការរបស់ក្រុមខ្សែបណ្ដាញ បានថយចុះជិត 80ភាគរយ បើធៀបនឹងឆ្នាំទៅ នៅសល់ត្រឹមតែ 500,000លានយ៉េនប៉ុណ្ណោះ ដែលនេះជាតួលេខទាបបំផុតក្នុងរង្វង់ 9ឆ្នាំ តែ ដោយសារការកាត់បន្ថយការចំណាយ ធ្វើឱ្យតូយ៉ូតានៅតែមានប្រាក់ចំណេញ កណ្ដាលវិបត្តិកូវីដ-19 ដែលកំពុងរាលដាលទូទាំងពិភពលោក។

តូយ៉ូតា បានបញ្ជាក់ថា នឹងគ្មានការកាត់បន្ថយបុគ្គលិកឡើយ តែនឹងកាត់បន្ថយការចំណាយយ៉ាងតឹងរ៉ឹង និងកែសម្រួលធុរកិច្ចយ៉ាងគ្រប់ជ្រុងជ្រោយ។

តូយ៉ូតា ថែមទាំងប្រាប់ឱ្យដឹងទៀតថា ចំនួនការផលិតរថយន្តរបស់តូយ៉ូតាទូទាំងពិភពលោក បានថយចុះច្រើនជាង 50% ក្នុងខែមេសា ព្រោះការឆ្លងរាលដាលរបស់មេរោគកូវីដ-19 តែចំនួនលក់រថយន្តថ្មីរបស់តូយ៉ូតានៅក្នុងប្រទេសចិន ក្នុងខែឧសភា បែរជាកើនឡើងដល់ទៅ 20.1% បើប្រៀបធៀបនឹងឆ្នាំកន្លងទៅ ដោយលក់រថយន្តថ្មី របស់តូយ៉ូតានៅក្នុងប្រទេសចិនបាន 166,300គ្រឿង ក្រោយពីចំនួនលក់រថយន្តតូយ៉ូតាក្នុងប្រទេសនេះបានធ្លាក់ចុះ 15.9% ក្នុងខែមីនា ជាអំឡុងពេលដែលកូវីដ-19 រាតត្បាតយ៉ាងខ្លាំងនៅក្នុងប្រទេសចិន៕

ប្រភព៖ សារព័ត៌មានបរទេស

June 23, 2020

កម្ពុជារកឃើញអ្នកផ្ទុកCOVID-19 មួយករណីទៀតហើយសម្រាប់ថ្ងៃទី23មិថុនា

ក្រសួងសុខាភិបាលកម្ពុជាបានប្រកាសឱ្យដឹងថា កម្ពុជាបានរកឃើញអ្នកផ្ទុកវីរុសបង្កជំងឺរលាកសួតប្រភេទថ្មី (COVID-19) ចំនួនមួយនាក់ទៀតនៅក្នុងថ្ងៃទី23មិថុនា ឆ្នាំ2020នេះ។

ករណីនេះគឺជាបុរសខ្មែរ សញ្ជាតិអាមេរិកកាំង ដែលធ្វេីដំណេីរមកពីសហរដ្ឋអាមេរិក និងបានមកដល់កម្ពុជាក្នុងថ្ងៃទី21 ខែមិថុនា ឆ្នាំ2020។ អ្នកជំងឺរូបនេះទទួលបានលទ្ធផលតេស្តវិជ្ជមានជាមួយនឹងវីរុសCOVID-19 នៅថ្ងៃទី22 ខែមិថុនា ឆ្នាំ2020។

គិតមកដល់បច្ចុប្បន្ន កម្ពុជាបានរកឃើញអ្នកផ្ទុកវីរុសCOVID-19 ចំនួន130នាក់ ក្នុងនោះមានអ្នកជំងឺចំនួន127នាក់បានជាសះស្បើយ ខណៈ3នាក់កំពុងទទួលការព្យាបាល។ កម្ពុជាមិនទាន់មានករណីស្លាប់ដោយសារវីរុសCOVID-19នេះនៅឡើយ។

June 23, 2020

WHO ថា “COVID-19 កំពុងបង្កើនល្បឿន” ខណៈជិត9.2លាននាក់បានឆ្លងវីរុស

ពិភពលោកបានរកឃើញអ្នកផ្ទុកវីរុសជិត9.2លាននាក់ និងអ្នកស្លាប់ជាង473,000នាក់ដោយសារCOVID-19 ក្នុងគ្រាដែលស្ថានភាពវិបត្តិសុខភាពនៅទ្វីបអាមេរិកកំពុងមានភាពស្មុគស្មាញខ្លាំង។

ប្រទេសនិងដែនដីចំនួន221ក្នុងពិភពលោកបានរាយការណ៍ថា COVID-19 បានឆ្លងទៅមនុស្សសរុបចំនួន9,170,913នាក់ និងបានសម្លាប់មនុស្សចំនួន473,277នាក់។ អ្នកជំងឺថ្មីមានចំនួន138,848នាក់ និងអ្នកស្លាប់ថ្មីមានចំនួន3,750នាក់ត្រូវបានកត់ត្រានៅក្នុងរយៈពេល24ម៉ោងចុងក្រោយនេះ។ ចំណែកអ្នកជំងឺបានជាសះស្បើយមានចំនួន4,903,232នាក់។

“រោគរាតត្បាតកំពុងតែបង្កើនល្បឿន” នេះបើតាមប្រធានអង្គការសុខភាពពិភពលោក (WHO) លោក Tedros Adhanom Ghebreyesus ដែលបានថ្លែងនៅក្នុងកិច្ចប្រជុំអនឡាញមួយដែលធ្វើឡើងដោយអារ៉ាប់រួម (UAE) កាលពីថ្ងៃទី22មិថុនា2020។

ទ្វីបអាមេរិកមានអ្នកជំងឺសរុប4,584,212នាក់ ខណៈទ្វីបអឺរ៉ុបមានចំនួន2,326,847នាក់ ទ្វីបអាស៊ីមាន1,940,674នាក់ និងទ្វីបអាហ្វ្រិកមានចំនួន318,321នាក់៕

ប្រភព៖ សារព័ត៌មានបរទេស

June 23, 2020

សេដ្ឋីម្នាក់ដែលមានបានដោយការប្រឹងប្រែង បង្ហើបអំពីការសោកស្ដាយកាលពីវ័យខ្ទង់ម្ដៃ! ដឹងបានឆាប់ ជោគជ័យលឿន!

សេដ្ឋី Grant Cardone បានផ្ញើការក្រើនរំឭកថា ការចំណាយពេល និងប្រាក់កាសដោយឥតប្រយោជន៍ទៅលើការផឹកស៊ី ការដើរទេសចរណ៍បែបអ្នកមានជាដើមនឹងធ្វើឱ្យយុវវ័យត្រូវស្ដាយក្រោយមិនខាននៅពេលអនាគត។

Grant Cardone គឺជាសេដ្ឋីម្នាក់ដែលរកស៊ីមានបានដោយខ្លួនឯងនៅក្នុងវិស័យអចលនទ្រព្យ ព្រមទាំងបានសរសេរសៀវភៅជាច្រើនស្ដីអំពីជំនួញនិងការលក់ដូរ។ នឹកឃើញដល់ដំណាក់កាលក្នុងវ័យខ្ទង់ម្ភៃ Grant Cardone និយាយថា គាត់មានអតីតកាលជាច្រើនដែលមិនដឹងអ្វីសោះអំពីប្រាក់។ រកប្រាក់បានតិច ប៉ុន្តែបែរជាចំណាយពេលឥតប្រយោជន៍ច្រើន និងចាយវាយខ្ជះខ្ជាយទៅលើតែកិច្ចការដែលមិននាំមកនូវផលប្រយោជន៍ដល់ជីវិតនិងការរកស៊ី។ ខាងក្រោមនេះគឺជាប្រការទាំង4កាលពីពេលនៅក្មេងដែលលោក Grant Cardone ស្ដាយក្រោយជាទីបំផុត៖

1.គ្រឿងស្រវឹង និងគ្រឿងរំញោចអារម្មណ៍គឺជាកំហុសឆ្គងធំជាងគេបង្អស់

ក្រោយពីបានបញ្ចប់ការសិក្សា Cardone ធ្លាប់បានធ្លាក់ទៅក្នុងអន្ទាក់នៃការសប្បាយជាមួយការជួបជុំជប់លៀង។ លោកនិយាយថា គួរណាស់តែយកប្រាក់ទាំងនោះមកចំណាយទៅលើការបង្កើនជំនាញ ចំណេះដឹងថ្មី និងបង្កើតទំនាក់ទំនងដែលមានគុណភាព។

“បើសិនជាខ្ញុំអាចធ្វើឱ្យពេលវេលាត្រលប់ថយក្រោយ ខ្ញុំនឹងប្រាប់ខ្លួនឯងឱ្យបន្តសិក្សាដោយប្រឹងប្រែងបើទោះជាបានបញ្ចប់ការសិក្សាមហាវិទ្យាល័យក៏ដោយ”។ លោក Cardone បន្តថា សញ្ញាបត្រធម្យមសិក្សាគឺគ្មានប្រយោជន៍នោះទេ ហើយសញ្ញាបត្របរិញ្ញាបត្រក៏មិនមានន័យអ្វីច្រើននោះដែរបើសិនជាអ្នកមិនមានជំនាញសមស្របដើម្បីដើរឱ្យទាន់ទីផ្សារ។

“រហូតដល់អាយុ25ឆ្នាំ ទើបខ្ញុំដឹងអំពីប្រការនេះ ហើយក៏បានចំណាយប្រាក់3,000ដុល្លារសម្រាប់វគ្គបណ្ដុះបណ្ដាលដំបូងបង្អស់ស្ដីអំពីគន្លឹះនៃការលក់ដូរ។ នោះគឺជាការបើកទំព័រថ្មីសម្រាប់ជោគជ័យរបស់ខ្ញុំនៅថ្ងៃនេះ” លោក Cardone បន្ថែមដូច្នេះ។

1.ដំណើរទេសចរណ៍ដែលចំណាយប្រាក់និងពេលវេលាច្រើន

តាមការយល់ឃើញរបស់លោក ការប្រើប្រាស់ gap year (ការសម្រាកមួយឆ្នាំបន្ទាប់ពីបានបញ្ចប់ការសិក្សាថ្នាក់មធ្យមសិក្សា និងត្រៀមចូលមហាវិទ្យាល័យ) ដើម្បីដើរទេសចរណ៍គឺជាគំនិតមិនល្អ។ យុវវ័យជាច្រើននាសម័យនេះ មិនមានគោលដៅក្នុងការងារច្បាស់លាស់ ហើយពួកគេជឿថា ការប្រើប្រាស់ gap year ដើម្បីឈប់សម្រាកនឹងជួយឱ្យពួកគេរកឃើញអ្វីដែលពួកគេត្រូវការ។ នៅពេលដែលអ្នកមិនទាន់ដឹងថាត្រូវធ្វើអ្វី អ្នកអាចដើរទេសចរណ៍មួយរយៈ ដោយទៅស្នាក់នៅក្នុងផ្ទះសំណាក់ និងហូបមីកញ្ចប់។ ក៏ប៉ុន្តែ ភាពស្រណុកសុខស្រួលគឺជាសត្រូវនៃភាពជោគជ័យ និងភាពមានបាន។

Grant Cardone យល់ថា មុននឹងទទួលភាពស្រណុកសុខស្រួល ចូរខំប្រឹងប្រែងធ្វើការដើម្បីទទួលបានលទ្ធផលល្អ។ “ខ្ញុំមិនបាននិយាយថា អ្នកមិនមានសិទ្ធិឈប់សម្រាកនោះទេ ប៉ុន្តែអ្នកគួរតែកែលម្អការយល់ដឹង និងជំនាញក្នុងការងារ ជំនួសឱ្យការដើរទេសចរណ៍ដែលមានការចំណាយពេលនិងប្រាក់កាសច្រើន”។

3.មិនចេះដកបទពិសោធន៍អ្វីសោះពីការងារ

“ខ្ញុំបានចំណាយពេលវេលាឥតប្រយោជន៍នៅក្នុងវ័យម្ភៃឆ្នាំ នៅពេលដែលខ្ញុំធ្វើការងារដែលមានប្រាក់ខែទាបដោយមិនបានជួយដល់ការអភិវឌ្ឍជំនាញដែលមានតម្លៃ។ ខ្ញុំមិននិយាយថាការងារដែលមានប្រាក់ខែទាបគឺជារឿងអាក្រក់នោះឡើយ ហើយបើសិនជាមិនមានការតស៊ូប្រឹងប្រែងនោះទេ អ្នកនឹងមានការលំបាកខ្លាំងណាស់ក្នុងការរកឃើញជោគជ័យ” នេះបើតាមសម្ដីរបស់សេដ្ឋី Grant Cardone។

លោក Grant Cardone ថ្លែងថា លោកធ្លាប់ធ្វើការនៅហាង McDonald ដែលទទួលបានប្រាក់7ដុល្លារសម្រាប់មួយម៉ោង។ ចំពោះលោក នោះគឺគ្រាន់តែជាវិធីរកប្រាក់មួយតែប៉ុណ្ណោះ។ ប៉ុន្តែ សម្រាប់មិត្តរួមការងារម្នាក់របស់លោកក្នុងគ្រានោះ ការងារនេះគឺជាឱកាសរៀនសូត្រអំពីជំនួញ ដែលក្រោយមកម្នាក់នោះបានប្រើប្រាស់បទពិសោធន៍ដើម្បីធ្វើអាជីវកម្ម ហើយបង្កើតបានជាបណ្ដាញរកលុយមួយដែលមានហាងចំនួន100កន្លែងត្រូវបានផ្ដល់សិទ្ធិប្រើប្រាស់ពាណិជ្ជសញ្ញា។

4.គេងច្រើន

ក្នុងចំណោមប្រការដែលសេដ្ឋី Cardone សោកស្ដាយបំផុតនោះគឺការដែលលោកមិនបានប្រើប្រាស់ពេលវេលាឱ្យបានច្រើន តែបែរជាពេញចិត្តជាមួយនឹងជីវភាពខណៈដែលលោកពិតជាត្រូវការគូសវាសគោលដៅ និងស្វែងរកវិធីដើម្បីឈោងចាប់វា។ លោក Cardone ថ្លែងថា បើសិនជាដឹងអំពីប្រការនេះបានឆាប់ នោះជោគជ័យរបស់លោកនឹងបានមកដល់ឆាប់ជាងអ្វីដែលលោកទទួលបាននាបច្ចុប្បន្ន។

សេដ្ឋី Cardone បានផ្ដល់យោបល់សម្រាប់យុវវ័យដែលមានអាយុខ្ទង់ម្ភៃ ឱ្យ “គេងដូចអ្នកមាន និងក្រោកពីព្រលឹមមុនថ្ងៃរះ”។ បច្ចុប្បន្ន ទីផ្សារកំពុងតែប្ដូរផ្លាស់យ៉ាងលឿន ដូច្នេះ អ្នកនិងខ្ញុំត្រូវតែមានភាពរហ័សរហួនដើម្បីចាប់យកឱកាស ក៏ដូចជាបង្កើតឱកាសល្អឱ្យទាន់ពេលវេលា៕

ប្រភព៖ CNBC

June 22, 2020

តើចិននឹងទប់ទល់យ៉ាងណា បើវីរុសកូរ៉ូណានឹងនៅមានរហូត?

ឆ្នាំនេះ កន្លងផុតទៅហើយកន្លះឆ្នាំ ស្មេរមានអារម្មណ៍ថា ពេលវេលាកន្លងផុតទៅលឿនដូចគេកុហក…។ ថយត្រឡប់ទៅគិតឡើងវិញថា តើឆ្នាំនេះ មានបានធ្វើអ្វីសម្រេចតាមគោលដៅខ្លះហើយឬនៅ? ចម្លើយក៏គឺ រឿងរ៉ាវជាច្រើន ត្រូវគាំងង៉ក់នៅមួយកន្លែងដោយស្វ័យប្រវត្តិ ក្រោយវត្តមានរបស់មេរោគកូវីដ-19។ ស្មេរជឿថា មិត្តអ្នកអានជាច្រើន ក៏អាចមានអារម្មណ៍បែបហ្នឹងដូចគ្នាដែរ…វីរុសកូរ៉ូណាប្រភេទថ្មីនេះ ចេញមកលឿន ហើយសាយភាយ ឆ្លងរាលដាលយ៉ាងឆាប់រហ័ស ដោយខណៈនេះ ចំនួនអ្នកឆ្លងមេរោគទូទាំងពិភពលោក មានច្រើនជាង 9លាននាក់ទៅហើយ…តាមរយៈនិន្នាការនេះ យើងមិនទាន់មើលឃើញពីសញ្ញាថា តួលេខនេះ នឹងថយចុះនៅឡើយ និងអាចនិយាយបានថា ពិភពលោករបស់យើងនៅតែស្ថិតក្នុងស្ថានការណ៍ដែលគួរឱ្យព្រួយបារម្ភខ្លាំងមែនទែន។ រោគរាតត្បាត គឺជាអ្វីដែលរុករានមនុស្សជាតិយើងគ្រប់យុគ គ្រប់សម័យកាល និងជារឿងដែលនៅក្បែរខ្លួនមនុស្សគ្រប់រូប។ មនុស្សខំព្យាយាមចង់យកឈ្នះលើធម្មជាតិ តែការពិតទៅ នៅពេលប្រឈមនឹងគ្រោះវិបត្តិផ្សេងៗវិញ មនុស្សយើង ជាច្រើនដង ជាអ្នកបរាជ័យ។

កន្លះឆ្នាំដែលកន្លងទៅ ចិន និងប្រទេសជាច្រើនទៀតទូទាំងពិភពលោក បានប្រើប្រាស់ពេលវេលា ប្រើប្រាស់កម្លាំងថាមពលទាំងអស់ទៅលើការប្រយុទ្ធប្រឆាំងនឹងរោគរាតត្បាតប្រភេទថ្មីនេះ ឯវិធីការតស៊ូប្រឆាំង និងការការពារវិញ ប្រទេសជាច្រើន មានគោលការណ៍ស្រដៀងៗគ្នា។ ចំណែកប្រទេសចិនវិញ បានប្រើប្រព័ន្ធបន្ទាន់ និងឆាប់រហ័ស បញ្ជាដោយផ្ទាល់ពីមជ្ឈិម ធ្វើឱ្យអាចរួបរួម គ្រប់គ្រង និងរៀបចំធនធានគ្រប់បែបយ៉ាងបានយ៉ាងមានប្រសិទ្ធភាព តែវាដូចអ្វីដែលយើងទាំងអស់គ្នាបានដឹងហើយថា ការឆ្លងរាលដាលរបស់វីរុសកូរ៉ូណា វាឆាប់រហ័សណាស់ និងងាយឆ្លងបំផុត ដូច្នេះនៅគ្រប់ប្រទេស បន្ទាប់ពីគ្រប់គ្រងដំណាក់កាលដំបូងបានហើយ ត្រូវប្រយ័ត្នលើការវិលត្រឡប់មកឆ្លងរាលដាលរលកទី2 បន្តទៀត ជាពិសេសគឺ កុំភ្លេចខ្លួន លែងការពារ…។

រហូតមកដល់ពេលនេះ អ្នកជំនាញការមកពីប្រទេសជាច្រើន ក៏នៅតែមិនទាន់ប្រកាសច្បាស់ 100% ដែរថា វីរុសកូរ៉ូណា ការពិតទៅ មានដើមកំណើតមកពីណានៅឡើយ។ សព្វថ្ងៃនេះ យើងនៅតែត្រូវស្រាវជ្រាវអំពីមេរោគមួយនេះជារឿយៗ ព្រោះវីរុសកូរ៉ូណា វាអភិវឌ្ឍខ្លួន ឱ្យត្រូវនឹងសភាពបរិស្ថាន និងសាយភាយពង្រីក បែកខ្នែងប្រភេទចេញមកយ៉ាងច្រើន។ អ្នកជំនាញការផ្នែករោគរាតត្បាតវិទ្យាជាច្រើននាក់របស់ចិន បានប្រាប់ដូចៗគ្នារួចមកហើយថា វីរុសកូរ៉ូណាប្រភេទនេះ រស់នៅក្នុងសភាពបរិស្ថានផ្សេងៗបានយ៉ាងធន់មាំ និងមាននិន្នាការថា អាចនឹងរស់នៅជាមួយយើងរហូតតទៅទៀតផង ពោលគឺ វីរុសកូរ៉ូណាប្រភេទនេះ នៅមានជីវិត និងសាយភាយបានស្ទើរតែគ្រប់សភាពបរិស្ថាន ហើយថែមទាំងស្ថិតនៅលើស្រទាប់ខាងលើរបស់វត្ថុផ្សេងៗ វាអាចនឹងមានជីវិតរស់នៅបានច្រើនថ្ងៃទៀតផង!!។ ក្រោយពីកើតឧប្បត្តិការណ៍មេរោគកូវីដ-19មក ជីវិតមនុស្សគ្រប់រូបប្រែប្រួលខុសពីមុន… ការសម្របខ្លួន និងការការពារខ្លួន បានធ្វើឱ្យមានវិថីជីវិតបែបថ្មីមួយកើតឡើងដោយបរិយាយ។

ក្នុងសប្ដាហ៍កន្លងមកនេះ មានកើតហេតុការណ៍ឆ្លងរាលដាលឡើងជាថ្មី នៅក្នុងប្រទេសចិន ដែលធ្វើឱ្យមនុស្សគ្រប់គ្នាងឿងឆ្ងល់ ភាន់ភាំង និងនាំគ្នាប្រយ័ត្នប្រយែងឡើងម្ដងទៀត គឺនៅក្នុងទីក្រុងប៉េកាំង។ តាំងពីថ្ងៃទី11 មិថុនា កន្លងទៅ ទីក្រុងប៉េកាំងបានរកឃើញអ្នកជំងឺថ្មីម្នាក់ ក្រោយពីចំនួនអ្នកឆ្លងមេរោគស្ថិតក្នុងតួលេខសូន្យអស់ 56ថ្ងៃ និងរហូតមកដល់ថ្ងៃដែលស្មេរកំពុងសរសេរអត្ថបទនេះ(ថ្ងៃទី14 មិថុនា) កន្លងទៅតែ 4ថ្ងៃ អ្នកជំងឺថ្មីក្នុងតំបន់ក្រុងប៉េកាំង បានកើនឡើងជិត 50នាក់ហើយ។ អ្នកជំងឺថ្មីទាំងនេះ សុទ្ធតែមានប្រវត្តិពាក់ព័ន្ធនឹងផ្សារ ស៊ីនហ្វាទី មជ្ឈមណ្ឌលលក់ដុំអាហារស្រស់ដ៏ធំមួយ ស្ថិតនៅក្នុងតំបន់ហ្វឹងថៃ ប៉ែកខាងត្បូងទីក្រុងប៉េកាំង។ អាជ្ញាធរបានបិទផ្សារ និងភូមិកផ្ទះសំបែងក្បែៗនោះភ្លាមៗ ក្រោយពីរកឃើញអ្នកជំងឺទី3 និងទី4 និងថែមទាំងហាមមនុស្សចេញ-ចូល និងពិនិត្យរកមេរោគគ្រប់មនុស្សទាំងអស់ គ្របដណ្ដប់ទាំងអ្នកនៅក្នុងផ្សារ និងអ្នកជិតខាងទាំងអស់ ចេញសេចក្ដីប្រកាសទៅគ្រប់តំបន់ ឱ្យអ្នកដែលធ្លាប់ទៅផ្សារស៊ីនហ្វាទីក្នុងអំឡុងក្រោយថ្ងៃទី30 ឧសភា ទៅពិនិត្យរកមេរោគវីរុស ព្រមទាំងប្រមូលសំណាកផ្សេងៗពីវត្ថុរបស់របរនៅក្នុងផ្សារទៀតផង។

នេះគឺជាភាពប្រថុយប្រថានថ្មីរបស់ចិនជាមួយការវិលមកឆ្លងរាលដាលក្នុងរង្វង់ធំ រលកទី2…លើកនេះរដ្ឋបាលកណ្ដាល រដ្ឋបាលក្នុងតំបន់ អង្គភាពឯកជន និងប្រជាជនចិនបាននាំគ្នាស្វាហាប់យ៉ាងខ្លាំងក្លា។ ការឆ្លងរាលដាលថ្មីនេះ ជាអ្វីមួយដែលលើសពីការប៉ាន់ស្មានរបស់មនុស្សទូទៅ ព្រោះក្នុងអំឡុងពេលនេះ ចិនសង្កត់ធ្ងន់លើការការពារអ្នកឆ្លងមេរោគកូវីដ-19 មកពីក្រៅប្រទេសយ៉ាងតឹងរ៉ឹង ហើយតាមរយៈការឆ្លងរាលដាលជាថ្មីនេះ ពុំទាន់រកមូលហេតុ និងប្រភពឃើញនៅឡើយថា តើវាចេញមកពីណា? បើទោះជាបានពិនិត្យរកឃើញមេរោគវីរុសកូរ៉ូណានៅលើជ្រញ់ពន្លះសាច់ត្រីសាល់ម៉ុនហើយក៏ដោយ ក៏នៅតែមិនទាន់ប្រាកដច្បាស់ថា តើមនុស្សឆ្លងមេរោគមកពីត្រីសាល់ម៉ុន ឬក៏ត្រីសាល់ម៉ុនឆ្លងមេរោគពីមនុស្សនៅឡើយ?។

ចិនគឺជាប្រទេសដំបូងគេដែលកើតការឆ្លងរាលដាលមេរោគវីរុសកូរ៉ូណាប្រភេទថ្មី ដោយផ្ដើមចេញពីទីក្រុងវូហាន កាលពីចុងខែធ្នូ ឆ្នាំទៅ។ នៅពេលចិនគ្រប់គ្រងការឆ្លងរាលដាលបាន ប្រជាជនចិនគ្រប់រូប បានទន្ទឹងរង់ចាំថ្ងៃដែលមេរោគកូវីដ-19 នឹងបាត់អស់វិញ និងត្រឡប់មករស់នៅយ៉ាងសុខសាន្តប្រក្រតីដូចពីមុន ប៉ុន្តែ រង់ចាំរហូតដល់កន្លះឆ្នាំហើយ ក៏នៅតែគ្មានសញ្ញាថា មេរោគចង្រៃនេះនឹងរលាយបាត់អស់…ចំណែកឯវ៉ាក់សាំងការពារវិញ ក៏ប្រហែលជានៅតែមិនទាន់មានការប្រកាសចេញមកឱ្យប្រើប្រាស់ឆាប់ៗនេះទៀត ដូច្នេះ គឺវាពិតជាដូចអ្វីដែលពួកអ្នកជំនាញការបានសន្និដ្ឋានទុកថា មេរោគកូវីដ-19 អាចនឹងនៅជាមួយយើងរយៈពេលយូររហូតតទៅ ឬភាសាចិន និយមនាំគ្នានិយាយញឹកញាប់ថា “长期共存” (អានថា ឆាងឈីកុងឈុន) ឬភាសាអង់គ្លេស Long-term coexistence។

ការពាក់ម៉ាស់អនាម័យការពារនៅក្នុងទីសាធារណៈ ដូចជាស្ថានីយរថភ្លើងអគ្គិសនី ជាដើម បានក្លាយជាសភាវប្រក្រតីថ្មីទៅហើយ

ក្នុងពេលដែលនៅមិនទាន់រកឃើញវិធីយកឈ្នះដាច់លើមេរោគវីរុសកូរ៉ូណានេះបាន ក៏ត្រូវតែងាកមករកវិធីទប់ទល់ទាំងអស់គ្នាតទៅទៀត ហើយបើនៅតែកើតមានការឆ្លងរាលដាលឥតឈប់ឈរ និងកើតឡើងជាថ្មីជាប់រហូតនោះ សួរថា តើប្រទេសចិនមានវិធានការទប់ទល់នាពេលអនាគតយ៉ាងណា? ស្មេរសូមសរុបជាចំណុចផ្សេងៗ ត្រួសៗដូចខាងក្រោមនេះ…៖

1-ការលើកកម្ពស់ការត្រួតពិនិត្យសុខភាពរបស់ប្រជាជនគ្រប់រូប Healthy code ប្រចាំខ្លួនបុគ្គលម្នាក់ៗនឹងត្រូវប្រើជារៀងរហូតតទៅ៖ ក្រោយការឆ្លងរាលដាលជាសហគមន៍ជាថ្មីនៅក្នុងទីក្រុងប៉េកាំង រដ្ឋបាលបានប្រកាសថា នឹងអាប់ហ្គ្រេត វើហ្សឹន ថ្មីរបស់ Healthy code ទូទាំងប្រទេស ដែលមានភាពលម្អិត និងជាក់ច្បាស់ខ្លាំងឡើង មិនមែនគ្រាន់តែភ្ជាប់ជាមួយអត្តសញ្ញាណប័ណ្ណ និងលេខទូរស័ព្ទប៉ុណ្ណោះទេ តែនឹងមានភ្ជាប់ជាមួយបណ្ណសុខុមាលភាពសង្គម រហូតដល់បណ្ណចេញ-ចូលទីប្រជុំជនទៀតផង។ ទាំងអស់នេះ គឺដើម្បីកាត់បន្ថយអត្រាការខុសឆ្គងរបស់ទិន្នន័យការត្រួតពិនិត្យ និងបង្កើនកម្រិតការគ្រប់គ្រងជំងឺយ៉ាងគ្រប់ជ្រុងជ្រោយ។ ក្នុងពេលបច្ចុប្បន្ន តំបន់សាធារណៈជាច្រើននៅក្នុងប្រទេសចិន ក្រៅពីវាស់សីតុណ្ហភាពរាងកាយហើយ នៅមានការពិនិត្យមើល Healthy code ក្នុងការចេញ-ចូលស្ទើរតែគ្រប់កន្លែង ហើយរឿងនេះនឹងក្លាយជាសភាវប្រក្រតីថ្មីមួយ របស់ប្រទេសចិនទៅជារៀងរហូត ដែលគ្រប់គ្នាត្រូវតែងាកមកសម្របខ្លួនឱ្យស៊ាំធ្លាប់ឱ្យបាន។

2-ការពាក់ម៉ាស់អនាម័យការពារនៅក្នុងទីសាធារណៈ នឹងក្លាយជាសភាវប្រក្រតីថ្មីរបស់ជនជាតិចិន៖ ក្រោយពីការបានពាក់ម៉ាស់អនាម័យការពារ ពេញមួយរយៈពេលកន្លះឆ្នាំកន្លងមក ជនជាតិចិនក៏នៅតែនាំគ្នាពាក់ជាបន្តទៅទៀត ទោះបីជាតំបន់ជាច្រើនមានការបន្ធូរបន្ថយវិធានការខ្លះហើយក្ដី តែការពាក់ម៉ាស់ការពារ នៅតែជារឿងចាំបាច់ក្នុងការជិះរថយន្តក្រុងសាធារណៈ និងការចូលក្នុងទីកន្លែងដែលបិទជិតផ្សេងៗដដែល។ ទាំងអស់នេះ ការពាក់ម៉ាស់អនាម័យការពារ នឹងក្លាយជារឿងមួយដែលគ្រប់គ្នាត្រូវតែធ្វើជាប់ជានិច្ច ព្រោះការការពារជំងឺរាតត្បាត ជាតួនាទីរបស់មនុស្សគ្រប់រូបនៅក្នុងសង្គម ដូច្នេះគ្រប់គ្នាត្រូវតែងាកមកសម្របសម្រួលខ្លួនឱ្យស៊ាំធ្លាប់ដូចៗគ្នា។

3-បង្កើនសក្ដានុពលខាងវេជ្ជសាស្ត្រ ជាពិសេសផ្នែកតិចណូឡូជី ការពិនិត្យមេរោគកូវីដ-19 នឹងក្លាយជាសភាវប្រក្រតីថ្មី៖ ក្នុងពេលបច្ចុប្បន្ន ចិនបានបើកទូលាយការពិនិត្យរកមេរោគកូវីដ-19 ជាមួយប្រជាជនទូទៅហើយ ខុសគ្នានឹងកាលពីពេលមុននេះ ពួកគេនឹងមិនពិនិត្យឱ្យបុគ្គលណាដែលមិនមែនជាក្រុមប្រថុយប្រថានក្នុងការឆ្លងនោះឡើយ។ ដូចជាសព្វថ្ងៃនេះ ក្នុងទីក្រុងប៉េកាំង មានចំណុចពិនិត្យមេរោគកូវីដ-19 ក្នុងមន្ទីរពេទ្យទាំងអស់ 98កន្លែង។ កាលពីមុនហ្នឹង ធនធានឈុតត្រួតពិនិត្យផ្សេងៗមានចំនួនកំណត់ តែចិនប្រើពេលត្រឹមតែប៉ុន្មានខែប៉ុណ្ណោះ ក្នុងការលើកកម្ពស់សក្ដានុពលការផលិតឧបករណ៍ពេទ្យ ឱ្យត្រឡប់មកមានគ្រប់គ្រាន់ជាមួយតម្រូវការ និងថែមទាំងត្រៀមជាស្រេចសម្រាប់តម្រូវការនាពេលអនាគតទៀតផង។ ឈុតត្រួតពិនិត្យ និងវិធីការពិនិត្យកូវីដ-19 របស់ចិន មានច្រើន វើហ្សឹន មានច្រើនវិធី អភិវឌ្ឍរហូតមកដល់បច្ចុប្បន្ន ដែលមានភាពច្បាស់លាស់ខ្ពស់ និងឆាប់រហ័ស…ទាំងអស់នេះ នាពេលអនាគត ការពិនិត្យរកមេរោគកូវីដ-19 ផ្ទៃក្នុងប្រទេស នឹងក្លាយជាសភាវប្រក្រតីថ្មី ដូចគ្នា។

នៅមានសេចក្ដីលម្អិតច្រើនចំណុចទៀត ដែលស្មេរមិនបានរៀបរាប់ដល់ តែរឿងដែលកើតឡើងក្នុងពេលបច្ចុប្បន្ន ធ្វើឱ្យយើងត្រូវតែរិះរកវិធីទប់ទល់បន្តទៅទៀតនាពេលអនាគត បើទោះបីជាមិនស៊ាំធ្លាប់ជាមួយរឿងជាច្រើនក្ដី តែក៏ត្រូវតែបង្ខំចិត្ត និងសម្របសម្រួលខ្លួនទាំងអស់គ្នា ដើម្បីសុខសុវត្ថិភាពរបស់ខ្លួនឯង និងសួនរួម ហើយខណៈពេលនេះ វ៉ាក់សាំងការពារមេរោគកូវីដ-19 គឺជាសេចក្ដីសង្ឃឹមតែមួយគត់របស់មនុស្សទូទាំងពិភពលោក៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

June 22, 2020

វីដេអូ៖ នឹងទៅជាយ៉ាងណា បើសិនកាំជ្រួចអវកាសមានរូបរាងថ្លាដូចកញ្ចក់?

អ្នកប្រហែលជាមានចម្ងល់ហើយថា តើឥន្ធនៈ និងផ្នែកខាងក្នុងរបស់កាំជ្រួចមានរូបរាងនិងផ្លាស់ប្ដូរស្ថានភាពយ៉ាងណានៅពេលពួកវាហោះឡើងទៅលើមេឃ? វីដេអូមួយដែលត្រូវបានគេបង្កើតឡើងនិងចែករំលែកកាលពីពេលថ្មីៗនេះ បានបង្ហាញឱ្យឃើញយ៉ាងច្បាស់អំពីស្ថានភាពរបស់កាំជ្រួចចំនួន4គ្រាប់ដែលមានរូបរាងថ្លាដូចកញ្ចក់ក្នុងពេលពួកវាហោះឡើង និងបំបែកខ្លួនទៅតាមដំណាក់កាលនីមួយៗ ក្នុងនោះយើងឃើញមានទិដ្ឋភាពកាំជ្រួចអស់ថាមពលនៅដំណាក់កាលចុងក្រោយផងដែរ។

វីដេអូនេះបានធ្វើការប្រៀបធៀបអំពីលក្ខណៈរបស់កាំជ្រួចទាំង4ប្រភេទដែលមានរូបរាងថ្លា (ពីឆ្វេងទៅស្ដាំ) ដូចខាងក្រោម៖

1. កាំជ្រួច Saturn V ដែលជាមធ្យោបាយដឹកជញ្ជូនប្រភេទធ្ងន់ ត្រូវបានផលិតឡើងដោយសហរដ្ឋអាមេរិក និងត្រូវបាន NASA ប្រើប្រាស់ចាប់ពីឆ្នាំ1967ដល់ឆ្នាំ1973។

2. កាំជ្រួចនៃយាន Space Shuttle ជាយានអវកាសរបស់ NASA ដែលឈប់ធ្វើសកម្មភាពចាប់ពីឆ្នាំ2011។

3. កាំជ្រួច Falcon Heavy របស់ក្រុមហ៊ុន SpaceX ជាមធ្យោបាយដឹកជញ្ជូនទំនិញធុនធ្ងន់។

4. កាំជ្រួចមហាទម្ងន់សម្រាប់នាំយានអវកាសរបស់ NASA (SLS) កំពុងត្រូវបានអភិវឌ្ឍដើម្បីជំនួសយានSpace Shuttle។

វីដេអូនេះបានប្រើប្រាស់ពណ៌មួយចំនួនដើម្បីបង្ហាញអំពីវត្ថុធាតុ និងប្រេងឥន្ធនៈជាថាមពលផ្សេងៗគ្នាដែលត្រូវបានប្រើប្រាស់សម្រាប់កាំជ្រួចនីមួយៗ។

>ពណ៌ក្រហមគឺជា RP-1 ដែលជាប្រេងមួយប្រភេទត្រូវបានចម្រាញ់ដល់កម្រិតខ្ពស់ដូចទៅនឹងឥន្ធនៈប្រើសម្រាប់ម៉ាស៊ីនយន្តហោះ។

>ពណ៌ទឹកក្រូចគឺជាអ៊ីដ្រូសែនរាវ (LH2) ដែលជាឧស្ម័នមួយប្រភេទដែលត្រូវបានប្រើប្រាស់យ៉ាងទូលំទូលាយដោយអង្គការ NASA។ ប្រការដែលអស្ចារ្យនោះគឺថា ដំបូងបង្អស់ ឧស្ម័ននេះធ្វើឱ្យត្រជាក់នៅត្រង់បំពង់កន្ទុយរុញច្រាននៅមុនពេលវាត្រូវបានដុតបញ្ឆេះដោយសារធាតុអុកស៊ីតកម្ម។

>ពណ៌ផ្ទៃមេឃគឺជាអុកស៊ីសែនរាវ (LOX) តែងត្រូវបានប្រើជាសារធាតុអុកស៊ីតកម្មសម្រាប់អ៊ីដ្រូសែនរវាវក្នុងកាំជ្រួចដឹកទំនិញធុនធ្ងន់ដូចជា RS-25 (របស់ NASA) ដែលជាម៉ាស៊ីនមួយប្រភេទត្រូវបានប្រើប្រាស់សម្រាប់យានអវកាស Space Shuttle។

កាំជ្រួច SLS នាពេលខាងមុខរបស់ NASA នឹងលាយបញ្ចូលគ្នារវាង LH2 និង LOX ដើម្បីបង្កើតបានជាប្រភពថាមពលដ៏មហិមា និងបញ្ចេញទឹកមកខាងក្រៅ។

ដោយសារតែបរិមាណ LH2 មានកម្រិតទាប កាំជ្រួច SLS នឹងត្រូវបានបំពង់ដាក់ឥន្ធនៈដ៏ធំមួយ។ ដើម្បីកាត់បន្ថយបញ្ហានេះ ក្រុមអ្នកវិទ្យាសាស្ត្របានដាក់កាំជ្រួចអម (booster) ចំនួនពីរនៅសងខាង។

កាំជ្រួច Falcon Heavy របស់ SpaceX និងកាំជ្រួច Saturn V សុទ្ធតែប្រើប្រាស់ប្រេងឥន្ធនៈដែលបានចម្រាញ់រួចនៅដំណាក់កាលដំបូង។

ការដុតបញ្ឆេះប្រេងនឹងបង្កផលប៉ះពាល់ច្រើនដល់បរិស្ថាន ព្រោះថាវាបង្កើតឱ្យមានសារធាតុកាបូនឌីអុកស៊ីតយ៉ាងច្រើន ហើយប្រការនេះនឹងកាន់តែអាក្រក់នៅពេលក្រុមហ៊ុន SpaceX បានដាក់គោលដៅបាញ់បង្ហោះកាំជ្រួចក្នុងរយៈពេលពីរសប្ដាហ៍/លើកនាពេលខាងមុខ។

អ្នកផលិតវីដេអូនេះថែមទាំងបានគិតដល់ការដាក់រថយន្ត Tesla Roadster ពណ៌ក្រហម (ដែលជារថយន្តដ៏ល្បីឈ្មោះដែលត្រូវបាននាំទៅកាន់អវកាសកាលពីឆ្នាំ2018 ដោយលោក Elon Musk ដែលជា CEO របស់ក្រុមហ៊ុន SpaceX) នៅខាងក្នុងក្បាលកាំជ្រួចទៀតផង៕

ប្រភព៖ Futurism

June 22, 2020

ជាង9លាននាក់បានឆ្លងវីរុសCOVID-19 នៅទូទាំងពិភពលោក

ពិភពលោកទាំងមូលមានមនុស្សជាង9លាននាក់បានឆ្លងវីរុសCOVID-19 និងជិត470,000នាក់បានស្លាប់ដោយសារវីរុសនេះ។

ប្រទេសនិងដែនដីចំនួន221បានរកឃើញអ្នកផ្ទុកវីរុសCOVID-19សរុប 9,032,065នាក់ និងអ្នកស្លាប់ដោយសារវីរុសនេះសរុប 469,527នាក់ ក្នុងនោះមានអ្នកជំងឺថ្មីចំនួន131,832នាក់ និងអ្នកស្លាប់ថ្មីចំនួន3,412នាក់ត្រូវបានរកឃើញក្នុងអំឡុង24ម៉ោងចុងក្រោយនេះ។ ចំនួនអ្នកជំងឺដែលបានជាសះស្បើយបានកើនឡើងដល់ជិត5លាននាក់។

ទ្វីបអាមេរិកមានអ្នកជំងឺសរុប4,513,806នាក់ ខណៈទ្វីបអឺរ៉ុបមាន2,310,961នាក់ ទ្វីបអាស៊ីមាន1,900,841នាក់ និងទ្វីបអាហ្វ្រិកមាន309,153នាក់។

ប្រទេសដែលបានរកឃើញអ្នកផ្ទុកវីរុសចាប់ពី300,000នាក់ឡើងទៅ មានចំនួន5ប្រទេស រួមមាន សហរដ្ឋអាមេរិក (2,356,657នាក់) ប្រេស៊ីល (1,086,990នាក់) រុស្ស៊ី (584,680នាក់) ឥណ្ឌា (426,910នាក់) និងប្រទេសអង់គ្លេស (304,331នាក់)។

បណ្ដាប្រទេសដែលមានអ្នកស្លាប់ដោយសារវីរុសCOVID-19 ច្រើនជាង20,000នាក់ មានចំនួន7ប្រទេស រួមមានសហរដ្ឋអាមេរិក (122,247នាក់) ប្រេស៊ីល (50,659នាក់) អង់គ្លេស (42,632នាក់) អ៊ីតាលី (34,634នាក់) ប្រទេសបារាំង (29,640នាក់) អេស្ប៉ាញ (28,323នាក់) ម៉ិកស៊ិក (21,825នាក់) និងប្រទេសឥណ្ឌា (13,703នាក់)៕

ប្រភព៖ សារព័ត៌មានបរទេស

June 22, 2020

គ្រូបបង្រៀនក្លាយជា “ចោរ zombie” ប្លន់ធនាគារ18កន្លែងនៅអាមេរិក

Alan Hurwitz ធ្លាប់ជាគ្រូបង្រៀនម្នាក់ដែលជួយជំរុញឱ្យមានយត្តិធម៌សង្គម ក៏ប៉ុន្តែចាប់ពីឆ្នាំ1992 Alan Hurwitz ត្រូវបានគេស្គាល់ជាទូទៅថាជា “ចោរ Zombie” បន្ទាប់ពីបានប្លន់ធនាគារជាបន្តបន្ទាប់។

រយៈពេល9សប្ដាហ៍ក្នុងឆ្នាំ1992 Zurwitz បានប្លន់ធនាគារចំនួន18កន្លែងនៅក្នុងរដ្ឋ Michigan, Indiana, Illinois និងរដ្ឋ Ohio នៃសហរដ្ឋអាមេរិក។ ទឹកមុខដែលប្រកបដោយភាពគ្មានវិញ្ញាណរបស់គាត់ក្នុងពេលប្លន់ធនាគារ បានធ្វើឱ្យ FBI ដាក់រហ័សនាមឱ្យគាត់ថា “ចោរ zombie” (Zombie Bandit)។

ក្រោយពីកម្មវិធី “ជនល្មើសត្រូវតាមចាប់ខ្លួនខ្លាំងក្លាបំផុតនៅអាមេរិក” បានបង្ហោះវីដេអូស្ដីអំពីករណីប្លន់ធនាគាររបស់ Hurwitz ភាគីខាង FBI ក៏ទទួលបានតម្រុយមួយចំនួនដែលនាំឱ្យឈានដល់ការចាប់ខ្លួន Hurwitz នៅក្នុងតំបន់ Fowlerville នៃទីក្រុង Detroit រដ្ឋ Michigan។ Hurwitz បានសារភាពថា បានប្លន់ធនាគារចំនួន13កន្លែង ហើយក៏ទទួលទោសជាប់ពន្ធនាគារ12ឆ្នាំ។

ប៉ុន្តែ Hurwitz មិនបានកែខ្លួននោះឡើយ។ នៅចុងឆ្នាំ2008 Hurwitz ប្រើប្រាស់កាំភ្លើងដើម្បីប្លន់ជាច្រើនលើកនៅ Oregon និង North California នៅពេលកំពុងរស់នៅក្នុងតំបន់ Orleans រដ្ឋ California ជាមួយកូនស្រី Laura។ Hurwitz ត្រូវបានចាប់ខ្លួននៅក្នុងតំបន់ Wyoming និងត្រូវបានកាត់ទោសឱ្យជាប់ពន្ធនាគារចំនួន17ឆ្នាំកន្លះ។

កាលពីថ្ងៃទី20ឧសភា Hurwitz ត្រូវបានដោះលែងពីពន្ធនាគារមួយនៅ North Carolina ក្នុងគ្រាដែល COVID-19 កំពុងរាតត្បាតខ្លាំងនៅក្នុងពន្ធនាគារ។ អ្នកទោស8នាក់បានស្លាប់ដោយសារCOVID-19 នៅពេលដែល Hurwitz ត្រូវបានដោះលែង។ កូនស្រី Kanwitz Hurwitz Hoene បានឱ្យដឹងថា ឪពុករបស់នាងមិនទាន់បានធ្វើតេស្តរកវីរុសនៅឡើយនៅពេលនៅក្នុងពន្ធនាគារ។

លោក Alan Hurwitz កាលពីពេលមិនទាន់ក្លាយជា “ចោរ zombie”

Hurwitz បានធ្វើដំណើរតាមយន្តហោះពី North Carolina ទៅកាន់ Chicago ហើយក៏បានធ្លាក់ខ្លួនឈឺ បន្ទាប់ពីធ្វើដំណើរទៅដល់ Denver ក្នុងដំណើរឆ្ពោះទៅកាន់ Orleans។ Hurwitz ត្រូវបានបញ្ជូនទៅកាន់មន្ទីរពេទ្យនៅក្នុងតំបន់ Denver ហើយក៏បានស្លាប់ក្នុងថ្ងៃទី6មិថុនានៅក្នុងវ័យ79ឆ្នាំ ដោយសារតែឆ្លង COVID-19។

Alan Hurwitz កើតនៅថ្ងៃទី18មករា1941 នៅក្នុងទីក្រុង Detroit។ ម្ដាយរបស់ Alan Hurwitz ឈ្មោះ Minnie គឺជាលេខាម្នាក់ ចំណែកឪពុកឈ្មោះ Theodor គឺជាមន្ត្រីគយ។ Alan Hurwitz បាននិយាយប្រាប់ Detroit Metro Times កាលពីឆ្នាំ2005ថា “ខ្ញុំធំឡើងជាមួយនឹងតម្លៃនៃសាសនាយូដាប្រកបដោយសេរីភាពទាក់ទិននឹងយុត្តិធម៌ ការសិក្សា និងភាពស្មើគ្នា”។

ក្រោយពីត្រូវបានបញ្ឈប់ពីការសិក្សានៅសាកលវិទ្យាល័យរដ្ឋ Wayne ព្រោះតែរៀនខ្សោយ Hurwitz ក៏បានចូលបម្រើកងទ័ពបម្រុងនៃទ័ពម៉ារីន។ បន្ទាប់មក Hurwitz ក៏ត្រលប់មកសាកលវិទ្យាល័យរដ្ឋ Wayne ដើម្បីទទួលយកសញ្ញាបត្របរិញ្ញាផ្នែកអប់រំ។

លោក Hurwitz បានធ្វើជាគ្រូបង្រៀនផ្នែកអក្សរសាស្ត្រនិងស្រាវជ្រាវសង្គមនៅសាលាមធ្យមសិក្សាមួយ និងបានកាន់កាប់តំណែងមួយចំនួន រួមមានទីប្រឹក្សាផ្នែកកិច្ចការឈប់អនុវត្តគោលនយោបាយបែងចែកសិស្សទៅតាមពូជសាសន៍នៅក្នុងបណ្ដាសាលាឯកជននៅទីក្រុងDetroit។ លោកថែមទាំងជាសមាជិកនៃក្រុមសកម្មជនប្រឆាំងអំពើហិង្សាក្នុងសាលា និងជានាយកផ្នែកអប់រំរបស់ក្រុមសង្គមស៊ីវិលមួយដែលមានឈ្មោះថា New Dtroit ផងដែរ។

Hurwitz ចាប់ផ្ដើមចេញប្លន់ធនាគារក្រោយពីញៀនថ្នាំកូកាអ៊ីន។ Tim George ជាមន្ត្រីប្រចាំការនៅប៉ូស្តិ៍នគរបាល Medford ក្នុងរដ្ឋ Oregon ថ្លែងថា “គាត់បានធ្វើកិច្ចការល្អជាច្រើនក្នុងជីវិត ប៉ុន្តែគាត់គឺជាទាសកររបស់កូកាអ៊ីន”។ Hurwitz ប្រាប់ថា គាត់បាក់ទឹកចិត្តដោយសារតែការប្រឹងប្រែងកែទម្រុងផ្នែកអប់រំនិងទប់ស្កាត់គ្រោះរើសអើងពូជសាសន៍របស់ខ្លួនទទួលបរាជ័យ”។

ប៉ុន្តែ ជីវិតប្រកបដោយទោសទណ្ឌបានផ្ដល់ឱកាសឱ្យគាតបង្រៀនអ្នកទោស។ Karen និយាយថា “គាត់បានរកឃើញគោលដៅរបស់ខ្លួននៅក្នុងពន្ធនាគារ។ គាត់បានបង្រៀនអ្នកទោសឱ្យចេះសរសេរនិងអានអក្សរ ព្រមទាំងបង្រៀនអំពីប្រវត្តិសាស្ត្រផងដែរ”។

Hurwitz មិនមានអារម្មណ៍ថាមានកំហុសចំពោះការប្លន់ធនាគារនោះទេ។ Karen ប្រាប់ថា “គាត់ស្អប់ក្រុមមនុស្សជាម្ចាស់ធនាគារ និងការដែលពួកគេទទួលបានការធានាគាំពារ។ ប៉ុន្តែគាត់មានអារម្មណ៍សោកស្ដាយព្រោះតែអាចធ្វើឱ្យប៉ះពាល់ដល់ផ្លូវចិត្តរបស់បុគ្គលិកធនាគារ ដែលជាអ្នកជឿថា Hurwitz បានលាក់កាំភ្លើងខ្លីនៅត្រង់ចង្កេះ”។

Karen បន្តថា “ប្រការដែលឪពុកខ្ញុំសោកស្ដាយបំផុតនោះគឺការដែលជីតារបស់ខ្ញុំបានស្លាប់ក្នុងពេលដែលគាត់ត្រូវជាប់ពន្ធនាគារ។ លោកតាខ្ញុំ ជឿជាក់លើឪពុកខ្ញុំ ហើយក៏បានលើកលែងទោសឱ្យគាត់”៕

ប្រភព៖ NYTimes

June 22, 2020

Author: សឿន សំណាង