សឿន សំណាង - La Reine Media

មូលនិធិវិនិយោគសោធននិវត្តន៍ធំបំផុតក្នុងពិភពលោក ខាតបង់165ពាន់លានដុល្លារអាមេរិក

មូលនិធិវិនិយោគសោធននិវត្តន៍ធំជាងគេក្នុងពិភពលោក GPIF (Government Pension Investment Fund) របស់រាជរដ្ឋាភិបាលជប៉ុន រងការខាតបង់យ៉ាងធ្ងន់ធ្ងរក្នុងត្រីមាសទី1 ដោយសារតែមូលបត្រក្នុងទីផ្សារពិភពលោកត្រូវបានគេនាំគ្នាលក់ចេញ ព្រោះតែ COVID-19។

កាលពីថ្ងៃទី3កក្កដាកន្លងទៅ GPIF បានបញ្ចេញរបាយការណ៍មួយដែលបានឱ្យដឹងថា ក្នុងរយៈពេល3ខែដើមឆ្នាំ2020នេះ មូលនិធិវិនិយោគសោធននិវត្តន៍ដែលជាអង្គការគ្រប់គ្រងការបើកប្រាក់ខែជូនបុគ្គលិកចូលនិវត្សន៍ បានខាតអស់11% គឺប្រហាក់ប្រហែលនឹង17.7លានលានយ៉េន (164.7ពាន់លានដុល្លារអាមេរិក)។ នេះគឺជាការខាតបង់ធំបំផុតរបស់ពួកគេគិតចាប់ពីខែមេសា2008។ បច្ចុប្បន្ន តម្លៃទ្រព្យសម្បត្តិដែលមូលនិធិនេះកំពុងកាន់កាប់ នៅសល់ត្រឹមតែ150.63ពាន់លានយ៉េនប៉ុណ្ណោះ។ មូលបត្រនៅបរទេសរបស់មូលនិធិ GPIF គឺជាក្រុមដែលត្រូវខាតបង់ច្រើនជាងគេ។

លទ្ធផលខាងលើត្រូវបានប្រកាស ក្រោយពីមូលនិធិនេះបានធ្វើការកែទម្រង់រចនាសម្ព័ន្ធនៃថ្នាក់ដឹកនាំ និងរៀបចំឡើងវិញនូវប្រភេទវិនិយោគរបស់ខ្លួន។ ការខាតបង់នេះក៏បានបំបាត់កំណើនទាំងស្រុងក្នុងឆ្នាំ2019ផងដែរ។ ប្រការនេះអាចធ្វើឱ្យមានចំណាប់អារម្មណ៍ពីក្រុមអ្នកនយោបាយនៅប្រទេសជប៉ុន ដោយសារតែរបបសន្តិសុខសង្គមគឺជាការយកចិត្តទុកដាក់ជាចម្បងរបស់ពលរដ្ឋចូលនិវត្សន៍រាប់សិបលាននាក់នៅប្រទេសនេះ។

“ការថយចុះនៃក្រុមមូលបត្រក្នុងប្រទេសនិងក្រៅប្រទេស បានបណ្ដាលឱ្យកំណើនរបស់មូលនិធិនេះត្រូវដាំក្បាលចុះនៅដំណាច់ឆ្នាំ2019” នេះបើតាម Masataka Miyazono ដែលជាមេដឹកនាំរបស់ GPIF។ លោក Masataka Miyazono បានបន្តថា “ទីផ្សារទាំងពីរនេះសុទ្ធតែមានកំណើនខ្ពស់ក្នុងឆ្នាំ2019 បើទោះរងសម្ពាធពីការចរចាពាណិជ្ជកម្មរវាងអាមេរិកនិងចិនក៏ដោយ។ ប៉ុន្តែ មហាអាសន្នរោគនៅដើមឆ្នាំនេះ បានធ្វើឱ្យអ្នកវិនិយោគដកខ្លួនចេញពីទ្រព្យហានិភ័យ”។

មូលបត្របំណុលក្រៅប្រទេសគឺជាក្រុមទ្រព្យខ្នាតធំបំផុតតែមួយគត់ដែលរកបានចំណេញនៅក្នុងត្រីមាសទី1 ដោយមានកំណើន0.5%។ មូលបត្របំណុលក្នុងប្រទេសបានធ្លាក់ថ្លៃ 0.5% ខណៈភាគហ៊ុនក្នុងប្រទេសបានបាត់បង់18% និងភាគហ៊ុនបរទេសបានថយចុះ22%។

យ៉ាងណាក៏ដោយ ភាគីខាងមូលនិធិ GPIF បានអះអាងថា លទ្ធផលនៃជំនួញមួយឆ្នាំ មិនប៉ះពាល់ដល់ការបើកប្រាក់ខែសោធននិវត្តន៍នោះឡើយ។

GPIF វិនិយោគទៅលើសន្ទស្សន៍ជាច្រើនដូចជា FTSE Blossom Japan, MSCI Japan ESG Select Leaders និង MSCI Japan Empowering Women ជាដើម។ ក្នុងត្រីមាសដំបូងនៃឆ្នាំនេះ សន្ទស្សន៍ MSCI All-Country World បានថយចុះ22% ចំណែកភាគលាភនៃមូលបត្របំណុលរបស់រតនាគារសហរដ្ឋអាមេរិករយៈពេល10 ក៏បានថយចុះ1.25% ដែលនេះជាការដាំក្បាលចុះ “ជ្រៅ” បំផុត ដោយសារតែវិធានការរំញោចមិនធ្លាប់មានពីមុនមករបស់ Fed៕

ប្រភព៖ Bloomberg

July 4, 2020

ទឹកជំនន់នៅប្រទេសចិន! មនុស្សជាង100នាក់បានស្លាប់និងបាត់ខ្លួន ខណៈសេដ្ឋកិច្ចជាតិត្រូវខាតបង់25ពាន់លានយន់

ទឹកជំនន់ដ៏ធ្ងន់ធ្ងរនៅភាគខាងត្បូងប្រទេសចិន បានទាញរំលំអគារជាច្រើនកន្លែង និងបានធ្វើឱ្យប៉ះពាល់ដល់ពលរដ្ឋប្រមាណជា15លាននាក់ ព្រមទាំងបានបណ្ដាលឱ្យមនុស្សជាង100នាក់ត្រូវបាត់បង់ជីវិតនិងបាត់ខ្លួន។

នៅក្នុងទីក្រុង Yichang ខេត្ត Hubei ទឹកជំនន់បានឡើងដល់ត្រឹមចង្កេះ នាំឱ្យអ្នកដំណើរនិងមធ្យោបាយធ្វើដំណើរត្រូវជាប់គាំងនៅតាមដងផ្លូវ។ នៅក្បែរទីក្រុង Chongqing លំហូរទឹកជំនន់ហាក់បានកួចយកកំណាត់ផ្លូវនានា ខណៈដែលទីរួមស្រុកទេសចរណ៍ Yangshuo នៃតំបន់ Guangxi ក៏មានភ្លៀងធ្លាក់ខ្លាំង ដែលនេះត្រូវបានអាជ្ញាធរពណ៌នាថា ជាព្រឹត្តិការណ៍ “រយឆ្នាំ” ទើបមានម្ដង។

ជាច្រើនសប្ដាហ៍មកនេះ ភ្លៀងធ្លាក់ខ្លាំងខុសពីធម្មតា បានបំផ្លិចបំផ្លាញគ្រប់តំបន់នៅភាគខាងត្បូងប្រទេសចិន បណ្ដាលមនុស្សមនុស្សយ៉ាងតិច106នាក់បានស្លាប់និងបាត់ខ្លួន ព្រមទាំងបង្កផលប៉ះពាល់អាក្រក់ដល់ពលរដ្ឋរាប់សិបលាននាក់។ នេះគឺជាគ្រោះទឹកជំនន់ដែលមានសភាពអាក្រក់បំផុតក្នុងអំឡុងប៉ុន្មានទសវត្សរ៍កន្លងមកនេះ។
តំបន់មួយក្នុងចំណោមតំបន់ដែលទទួលរងគ្រោះធ្ងន់ធ្ងរជាងគេបំផុត នោះគឺខេត្ត Hubei ដែលមាន Wuhan ជាទីរួមខេត្ត ជាកន្លែងដែលបានរងការខាតបង់ច្រើនបំផុតដោយសារតែវីរុសCOVID-19។

ក្រោយរយៈពេល31ថ្ងៃដែលបានព្រមានអំពីភ្លៀងនិងទឹកជំនន់ មជ្ឈមណ្ឌលជាតិឧតុនិយមចិន កាលពីថ្ងៃទី3កក្កដាកន្លងទៅក៏បានព្យាករថា នឹងមានភ្លៀងធំជាច្រើនមេមេទៀតកើតឡើងនៅតំបន់ភាគនិរតី ដែលចាប់ផ្ដើមពីថ្ងៃទី4កក្កដានេះ។ ក្រុមមន្ត្រីឧតុនិយមក៏បានព្រមានអំពីហានិភ័យនៃការបាក់ដីនិងបាក់ទំនប់ទឹកផងដែរ។

គ្រោះទឹកជំនន់នេះបាននាំឱ្យប្រជាជនមានការព្រួយបារម្ភអំពីស្ថានភាពទំនប់ Three Gorges Dam នៅលើទន្លេ Yangtze នៅពេលដែលវាកំពុងប្រឈមនឹងគ្រោះធំបំផុតរាប់ចាប់ពីពេលត្រូវបានដំណើរការកាលពីឆ្នាំ2003។

ក្រុមមន្ត្រីចិនបានអះអាងជាច្រើនដងថា ការព្រួយបារម្ភខាងលើនេះគឺ “គ្មានន័យ” នោះទេ ខណៈដែលសារព័ត៌មានរដ្ឋចិន Xinhua ក៏បានបញ្ជាក់ថា ទំនប់ទឹក Three Gorges Dam នេះបានជួយកាត់បន្ថយទឹកជំនន់នៃទន្លេ Yangtze។ ក៏ប៉ុន្តែ តំបន់នេះនៅតែបន្តរងការបំផ្លិចបំផ្លាញដោយសារទឹកជំនន់និងបាក់ដី ព្រមទាំងមានគ្រោះរញ្ជួយដីកាលពីពេលថ្មីៗនេះទៀតផង។

យោងតាមក្រសួងគ្រប់គ្រងគ្រោះអាសន្នចិន ទឹកជំនន់នេះបានបង្កផលប៉ះពាល់ដល់ខេត្តចំនួន26នៃប្រទេសនេះ ក្នុងនោះមានផ្ទះរាប់សែនខ្នងត្រូវខូចខាត ចំណែកសេដ្ឋកិច្ចវិញក៏ត្រូវខាតបង់ប្រមាណជា25ពាន់លានយន់ (3.6ពាន់លានដុល្លារអាមេរិក)៕

ប្រភព៖ NY Times

July 4, 2020

ចិន៖ សំឡេងចម្លែកដ៏គួរឱ្យខ្លាច លាន់ឮចេញពីតំបន់ភ្នំ ទាក់ទាញអ្នកទេសចររាប់ពាន់នាក់ក្នុងមួយថ្ងៃៗ (វីដេអូ)

នៅក្នុងរយៈពេលជាច្រើនថ្ងៃមកនេះ សំឡេងដ៏ចម្លែកបាននិងកំពុងបន្លឺឡើងពីជ្រលងភ្នំក្បែរទីរួមស្រុក Xiushui ក្នុងតំបន់ Guizhou ប្រទេសចិន។ សំឡេងដ៏គួរឱ្យព្រឺក្បាលនេះ បានបង្កឱ្យមានការភ្ញាក់ផ្អើលជាខ្លាំងនៅក្នុងតំបន់ និងបានទាក់ទាញចំណាប់អារម្មណ៍អ្នកទេសចរ ក្នុងនិងក្រៅប្រទេសផងដែរ។

កាលពីថ្ងៃទី2កក្កដាកន្លងទៅ ពលរដ្ឋក្នុងតំបន់ខាងលើបាននិយាយប្រាប់សារព័ត៌មាន Epoch Times ថា ពួកគេពិតជាបានឮសូរសំឡេងស្រែកជាច្រើនប្រភេទ វាដូចទៅនឹងសម្រែករបស់សត្វគោ ស្រែកចេញពីក្នុងល្អាងភ្នំ ហើយសំឡេងនេះលាន់ឮគួរភ័យខ្លាច។

ពលរដ្ឋក្នុងតំបន់កើតហេតុបានបញ្ជាក់ថា សំឡេងចម្លែកនេះបានចាប់ផ្ដើមកើតមានឡើងពីថ្ងៃទី26មិថុនាមកម្ល៉េះ។ ក្នុងរយៈពេលប៉ុន្មានថ្ងៃចុងក្រោយនេះ គេឃើញមានមនុស្សរាប់ពាន់នាក់ រួមមានទាំងក្រុមអ្នកជំនាញការ ក្រុមអ្នកយកព័ត៌មាន ព្រមទាំងក្រុមមន្ត្រីរដ្ឋាភិបាលចិនជាច្រើន ក៏បាននាំគ្នាឡើងភ្នំដើម្បីស្វែងយល់។

ពលរដ្ឋម្នាក់បាននិយាយថា សម្រែកដ៏ចម្លែកនេះ ភាគច្រើនកើតមានឡើងនៅវេលាថ្ងៃត្រង់ “វាស្រែកឡើងតាំងពីថ្ងៃត្រង់ រហូតដល់ថ្ងៃរសៀល ហើយថ្ងៃណាក៏មានឮសូរសម្រែកចម្លែកនេះដែរ”។

ពលរដ្ឋម្នាក់ផ្សេងទៀតថ្លែងថា “សំឡេងចម្លែកនេះពិតជាគួរឱ្យខ្លាចណាស់។ ក្នុងភូមិកំពុងតែមានភាពច្របូកច្របល់ គ្មានអ្នកណាហ៊ានដើរកាត់តំបន់នេះទេបើសិនជាមានគ្នាតិច។ ប្រជាជនលែងហ៊ានរស់នៅក្នុងតំបន់នេះទៀតហើយ។ សម្រែកនេះ លាន់ឮខ្លាំង ហើយជូនកាលវាបន្លឺឡើងដូចសំឡេងរបស់សត្វគោស្រែកយ៉ាងដូច្នោះដែរ”។

ពលរដ្ឋក្នុងតំបន់ខាងលើបានរាយការណ៍អំពីសំឡេងចម្លែកនេះជូនអាជ្ញាធរចិន។ ក្នុងចំណោមពលរដ្ឋទាំងនោះ មានអ្នកខ្លះនិយាយថា វាគឺជា “សំឡេងស្រែករបស់សត្វគោ” អ្នកខ្លះថាជា “សំឡេងគ្រហឹមរបស់ខ្លា” ឯអ្នកខ្លះទៀតក៏យល់ថាជា “សម្រែករបស់សត្វនាគ” ឬ “សំឡេងកញ្ជ្រៀវរបស់បក្សី” ។ល។

អាជ្ញាធរចិន សហការជាមួយក្រុមអ្នកជំនាញខាងគ្រោះធម្មជាតិកំពុងតែធ្វើការស្រាវជ្រាវស្វែងរកប្រភពនៃសំឡេងចម្លែកខាងលើ។ នេះបើតាមសារព័ត៌មាន China News Service។

ប៉ុន្តែ បន្ទាប់ពីបានធ្វើការស្រាវជ្រាវនិងពិនិត្យត្រួសៗ ភាគីអាជ្ញាធរបានឱ្យដឹងថា “មិនមានសកម្មភាពរញ្ជួយដីណាមួយត្រូវបានរកឃើញក្នុងតំបន់ដែលមានសម្រែកចម្លែកនេះទេ។ “មិនទាន់បានរកឃើញមូលហេតុ និងប្រភពរបស់សំឡេងនេះនៅឡើយ”។ អាជ្ញាធរបានស្នើឱ្យពលរដ្ឋ កុំយកចិត្តទុកដាក់ស្ដាប់សំឡេងនេះ និងមិនត្រូវនិយាយតគ្នាអំពី”ដំណឹងចចាមអារ៉ាម” នេះដែរ។

កាលពីល្ងាចថ្ងៃទី2កក្កដា sina.cs បានរាយការណ៍ថា ថ្មីនេះ ទីរួមស្រុក Xiushui បានក្លាយជាតំបន់ល្បីឈ្មោះព្រោះតែសំឡេងចម្លែកនេះ។ Sina.cs បន្តថា សំឡេងនេះបានទាក់ទាញចំណាប់អារម្មណ៍របស់មនុស្សជាច្រើន។ អ្នកក្រុង Kunming ក៏បានប្រារព្ធពិធី “ដំណើរពិសេស” មួយ ដើម្បីមកមើល “នាគ” នៅទីនេះ។

សារព័ត៌មានចិនបានចេញផ្សាយថា សំឡេងចម្លែកនេះបានកើតឡើងអស់រយៈពេលជាច្រើនថ្ងៃមកហើយ។ ជារៀងរាល់ថ្ងៃ មានមនុស្សរាប់ពាន់នាក់បានមកតាមដាននិងស្វែងយល់។ ក្រៅពីប្រជាជនក្នុងតំបន់កើតហេតុ ក៏មានក្រុមអ្នកទេសចរមកពីតំបន់ផ្សេងៗផងដែរ។ ប៉ុន្តែ រហូតមកដល់ពេលនេះ ក្រុមអ្នកជំនាញ និងក្រុមអ្នកវិទ្យាសាស្ត្រមិនទាន់បកស្រាយច្បាស់ប្រកបដោយវិទ្យាសាស្ត្រនៅឡើយអំពីបាតុភូតនេះ៕

ប្រភព៖ Epoch Times

July 3, 2020

ម្ចាស់ Amazon កាន់់តែមានឡើងពីមួយថ្ងៃទៅមួយថ្ងៃ បើទោះCOVID-19 បានធ្វើឱ្យពិភពលោកជួបវិបត្តិធំ

Jeff Bezos រកបានប្រាក់ចំនួន 56.7ពាន់លានដុល្លាររាប់ចាប់ពីដើមឆ្នាំ2020នេះ បើទោះជាសេដ្ឋកិច្ចនៅសហរដ្ឋអាមេរិក និងពិភពលោក កំពុងធ្លាក់ “ជ្រោះជ្រៅ” ជាទីបំផុត គិតចាប់ពីមហាវិបត្តិសេដ្ឋកិច្ច។

បញ្ចប់ការជួញដូរនៅក្នុងថ្ងៃទី1កក្កដា តម្លៃមូលបត្រ Amazon បានកើន4.4% ដែលនាំឱ្យវាមានតម្លៃ 2,878ដុល្លារ/ហ៊ុន។ ប្រការនេះបានជួយឱ្យទ្រព្យសម្បត្តិរបស់មហាសេដ្ឋី Jeff Bezos កើនឡើងដល់ 171.6ពាន់លានដុល្លារ។ នេះបើតាម Bloomberg Billionaires Index។

កន្លងមក ពោលគឺនៅថ្ងៃទី4កញ្ញា2018 ទ្រព្យសម្បត្តិរបស់ម្ចាស់ Amazon លោក Jeff Bezos មានចំនួន 167.7ពាន់លានដុល្លារ។ ក្រោយមក លោកបានបែកបាក់គ្រួសារ និងបានចែកភាគហ៊ុន25% នៃចំនួនមូលបត្រសរុបដែលពួកគេកាន់កាប់រួម ទៅឱ្យភរិយាដែលលោកបានលែងលះ។ ភាគហ៊ុន 25% នេះ មានតម្លៃប្រមាណជា 35.6ពាន់លានដុល្លារអាមេរិក។

ចាប់ផ្ដើមដើមឆ្នាំ បើទោះជាសេដ្ឋកិច្ចនៅសហរដ្ឋអាមេរិកជួបការលំបាកខ្លាំងបំផុតរាប់ពីមហាវិបត្តិសេដ្ឋកិច្ច ទ្រព្យរបស់លោក Bezos ក៏នៅតែកើន56.7ពាន់លានដុល្លារ។ ក្នុងសប្ដាហ៍នេះ ក្រុមហ៊ុនរបស់លោក ថែមទាំងបានផ្ដល់រង្វាន់លើកទឹកចិត្តចំនួន500លានដុល្លារទៅឱ្យបុគ្គលិកធ្វើការនៅក្នុងវិបត្តិសុខភាពដែលបង្កឡើងដោយ COVID-19 ទៀតផង។ ការរកស៊ីរបស់ Amazon មានដំណើរការល្អនៅពេលដែល COVID-19 បានធ្វើឱ្យអតិថិជនងាកមកទិញទំនិញតាមផ្សារអនឡាញ។

នៅក្នុងឆ្នាំនេះ អ្នកដែលមានទ្រព្យកើនឡើងខ្ពស់បំផុត សុទ្ធសឹងតែជាអ្នកជំនួញក្នុងវិស័យបច្ចេកវិទ្យា។ ក្រៅពី Bezos លោក Elon Musk ក៏រកប្រាក់បាន25.8ពាន់លានដុល្លារបន្ថែមទៀតដែរ ខណៈដែល Eric Yuan ដែលជាស្ថាបនិករបស់កម្មវិធី Zoom រកបាន 13.1ពាន់លានដុល្លារបន្ថែមទៀត។

ផ្ទុយទៅវិញ លោក Amancio Ortega ដែលជាម្ចាស់ក្រុមហ៊ុន Zara បានបាត់បង់ទ្រព្យប្រមាណជា 19.2ពាន់លានដុល្លារ។ នេះគឺជាមហាសេដ្ឋីដែលបានបាត់បង់ទ្រព្យច្រើនជាងគេបង្អស់នៅក្នុងបញ្ជីចំណាត់ថ្នាក់របស់ Bloomberg។ រីឯទ្រព្យសរុបរបស់លោក Warren Buffett ដែលជាអតីតកំពូលអ្នកវិនិយោគផ្នែកអចលនទ្រព្យ ក៏បានបាត់បង់ 19ពាន់លានដុល្លារ ចំណែកមហាសេដ្ឋីផលិតផលប្រណិត លោក Bernard Arnault ក៏បានបាត់បង់ 17.6ពាន់លានដុល្លារផងដែរ។

បច្ចុប្បន្ន ទ្រព្យសរុបរបស់កំពូលអ្នកមានចំនួន500នាក់នៅទូទាំងពិភពលោក មានប្រមាណជា 5.93លានលានដុល្លារអាមេរិក កើនឡើងបន្តិចបើធៀបជាមួយនឹងចំនួន 5.91លានលានដុល្លារកាលពីដើមឆ្នាំ2020៕

ប្រភព៖ Bloomberg

July 3, 2020

ឥណ្ឌាទិញយន្តហោះចម្បាំង33គ្រឿងពីបរទេស ខណៈមានជម្លោះព្រំដែនជាមួយចិន

រដ្ឋាភិបាលឥណ្ឌា កាលពីថ្ងៃទី2កក្កដាកន្លងទៅ បានអនុម័តយល់ព្រមទិញយន្តហោះចម្បាំងចំនួន33គ្រឿងពីប្រទេសរុស្ស៊ី ព្រមទាំងធ្វើការបន្ទាន់សម័យទៅលើយន្តហោះចម្បាំងចំនួន59គ្រឿងផ្សេងទៀត ក្នុងគ្រាដែលភាពតានតឹងកំពុងឡើងកម្ដៅនៅតាមព្រំដែនដែលមានជម្លោះជាមួយប្រទេសចិន។

សារព័ត៌មាន Reuters ដកស្រង់ប្រភពព័ត៌មានពីក្រសួងការពារជាតិឥណ្ឌា បានឱ្យដឹងថា រដ្ឋាភិបាលប្រទេសនេះបានអនុម័តយល់ព្រមទិញយន្តហោះចម្បាំង MiG-29 ចំនួន21គ្រឿង និង Su-30 ចំនួន12គ្រឿង ដែលមានតម្លៃសរុប 2.43ពាន់លានដុល្លារអាមេរិក។ ការទិញយន្តហោះចម្បាំង ក៏ដូចជាការបន្ទាន់សម័យយន្តហោះចម្បាំងផ្សេងទៀតរបស់កងទ័ពឥណ្ឌា គឺជាផ្នែកមួយដើម្បីឆ្លើយតបទៅនឹងតម្រូវការក្នុងការពង្រីកឥទ្ធិពលនៃទ័ពអាកាសរបស់ឥណ្ឌា។

ការអនុម័តទិញយន្តហោះចម្បាំងខាងលើនេះ ត្រូវបានធ្វើឡើងក្រោយពីដំណើរទស្សនកិច្ចរបស់រដ្ឋមន្ត្រីក្រសួងការពារជាតិឥណ្ឌា លោក Rajnath Singh ទៅកាន់ប្រទេសរុស្ស៊ី កាលពីចុងខែមិថុនាកន្លងទៅ។ ក្នុងដំណើរទស្សនកិច្ចនេះដែរ ទីក្រុងនីវដេលី (New Delhi) ក៏បានតឿនឱ្យទីក្រុងមូស្គូបង្កើនល្បឿនក្នុងការប្រគល់ប្រព័ន្ធមីស៊ីលការពារដែនអាកាសដែលឥណ្ឌាបានបញ្ជាទិញនោះផងដែរ។

ឥរិយាបថខាងលើរបស់ឥណ្ឌា បានកើនឡើងក្នុងកាលៈទេសៈដែលប្រទេសចិននិងឥណ្ឌាកំពុងមានជម្លោះនៅតាមបន្ទាត់ព្រំដែន ក្រោយពីមានហេតុការណ៍ប៉ះទង្គិចគ្នាប្រកបដោយភាពឃោរឃៅកាលពីពេលថ្មីៗនេះនៅក្នុងតំបន់ជ្រលងភ្នំ Galwan ដែលហេតុការណ៍នេះបានបណ្ដាលឱ្យទាហានឥណ្ឌាយ៉ាងតិច20នាក់បាត់បង់ជីវិត។

ក្រោយកិច្ចចរចាក្នុងសប្ដាហ៍នេះ ក្រុមមន្ត្រីនៃប្រទេសទាំងពីរបានយល់ព្រមដកកងទ័ពចេញពីតំបន់ព្រំដែនដែលកំពុងមានជម្លោះទៅតាមដំណាក់កាលនីមួយៗ ក្នុងបំណងកាត់បន្ថយភាពតានតឹង។ ប្រភពព័ត៌មានមួយចំនួន មុននេះ បានរាយការណ៍ថា ទាំងឥណ្ឌា ទាំងចិន នៅតែបន្តបង្កើនវត្តមានកងទ័ពរៀងៗខ្លួននៅតាមបន្ទាត់ព្រំដែន សូម្បីតែនៅពេលប្រទេសទាំងពីរបានព្រមព្រៀងគ្នាក្នុងការដកកងទ័ពដ៏ដោយ៕

ប្រភព៖ Reuters

July 3, 2020

ប្រទេសដែលមានអ្នកជំងឺCOVID-19 ច្រើនជាង100,000នាក់ បានកើនដល់19ប្រទេស

ពិភពលោកបានរកឃើញអ្នកផ្ទុកវីរុសCOVID-19 ចំនួនជិត11លាននាក់ ក្នុងនោះមានអ្នកជំងឺជិត523,000នាក់បានបាត់បង់ជីវិត។ ក្នុងចំណោមមនុស្ស1លាននាក់គឺមាន1,212នាក់បានឆ្លងវីរុសCOVID-19នេះ។

ប្រទេសនិងដែនដីចំនួន221ក្នុងពិភពលោក ត្រូវបានរាយការណ៍ថា បានរកឃើញអ្នកផ្ទុកវីរុសCOVID-19 សរុប 10,960,668នាក់ និងអ្នកស្លាប់ដោយសារវីរុសនេះមានចំនួន522,979នាក់ ក្នុងនោះមានអ្នកជំងឺថ្មី182,899នាក់ និងអ្នកស្លាប់ថ្មីចំនួន5,169នាក់ត្រូវបានរកឃើញក្នុងរយៈពេល24ម៉ោងចុងក្រោយនេះ។ ចំនួនអ្នកជំងឺដែលបានជាសះស្បើយ បានកើនឡើងដល់ 6,127,637នាក់។

ប្រទេសដែលមានអ្នកជំងឺច្រើនជាង1លាននាក់មានចំនួន2ប្រទេស គឺសហរដ្ឋអាមេរិក (អ្នកជំងឺសរុប 2,830,523នាក់ អ្នកស្លាប់សរុប 131,490នាក់) និងប្រទេសប្រេស៊ីល (អ្នកជំងឺសរុប 1,157,451នាក់ និងអ្នកស្លាប់សរុប 52,951
នាក់)។

ចំណែកប្រទេសដែលមានអ្នកជំងឺCOVID-19ចាប់ពី100,000នាក់ឡើងទៅ បានកើនដល់19ប្រទេស រួមមាន សហរដ្ឋអាមេរិក ប្រេស៊ីល រុស្ស៊ី ឥណ្ឌា អង់គ្លេស អេស្ប៉ាញ ប៉េរូ ឈីលី អ៊ីតាលី អ៊ីរ៉ង់ អាល្លឺម៉ង់ ទួរគី ម៉ិកស៊ិក ប៉ាគីស្ថាន អារ៉ាប់ប៊ីសាអូឌីត បារាំង បង់ក្លាដែស ប្រទេសអាហ្វ្រិកខាងត្បូង និងប្រទេសកាណាដា។

បើគិតទៅតាមចំនួនប្រជាជនសរុបនៅទូទាំងពិភពលោក គេរកឃើញថា ក្នុងចំណោមមនុស្ស1លាននាក់គឺមាន1,212នាក់បានឆ្លងCOVID-19 និង61.9នាក់ត្រូវបាត់បង់ជីវិតដោយសារវីរុសនេះ៕

ប្រភព៖ សារព័ត៌មានបរទេស

July 3, 2020

ចំនួនមហាសេដ្ឋីពិភពលោកកើនឡើងមិនធ្លាប់មាន! អឺរ៉ុបមានច្រើនជាងគេ រីឯអាស៊ីជាកន្លែង “ផលិត” មហាសេដ្ឋីថ្មីច្រើនបំផុត

នៅទូទាំងសកលលោកមានមនុស្សជិត2,900នាក់ មានទ្រព្យច្រើនជាងពាន់លានដុល្លារអាមេរិកនៅក្នុងឆ្នាំ2019 ដែលភាគច្រើនគឺជាក្រុមមនុស្សដែលរកស៊ីក្នុងវិស័យហិរញ្ញវត្ថុ ធនាគារ ឧស្សាហកម្ម និងអចលនទ្រព្យ។

ក្រុមហ៊ុនស្រាវជ្រាវទ្រព្យសម្បត្តិ Wealth-X ដែលទើបតែបានបញ្ចេញរបាយការណ៍មួយដែលមានឈ្មោះថា Biilionaire Census បានបង្ហាញថា ពិភពលោកមានមហាសេដ្ឋីសរុបចំនួន2,825នាក់នៅក្នុងឆ្នាំ2019 គឺកើន 8.5% បើធៀបនឹងឆ្នាំ2018។ នេះគឺជាចំនួនច្រើនបំផុត រាប់ចាប់ពី Wealth-X បានចាប់ផ្ដើមតាមដានទិន្នន័យនេះតាំងពីឆ្នាំ2010។ ទ្រព្យសរុបរបស់ក្រុមមហាសេដ្ឋីនេះ គឺប្រមាណជា 9.4 (9,400,000,000,000.00 USD) លានលានដុល្លារអាមេរិក គឺកើនឡើងច្រើនបើធៀបនឹង 8.6 (8,600,000,000,000.00 USD) លានលានដុល្លារកាលពីឆ្នាំ2018។

ក្នុងចំណោមមហាសេដ្ឋីទាំងអស់ក្នុងពិភពលោក គឺមានបុរសចំនួន 88% និងមានវ័យជាមធ្យម 66ឆ្នាំ។ ចំណែកមហាសេដ្ឋិនីវិញ គឺមានតែ 12% ប៉ុណ្ណោះ។ ជាងពាក់កណ្ដាលនៃមហាសេដ្ឋីសរុប គឺជាអ្នកមានដោយសារការប្រឹងប្រែងផ្ទាល់ខ្លួន ហើយពួកគេមានវ័យជាមធ្យមក្រោម 50ឆ្នាំ។

ភាគច្រើននៃមហាសេដ្ឋីខាងលើ គឺរកស៊ីមានបាននៅក្នុងវិស័យហិរញ្ញវត្ថុ ធនាគារ ឧស្សាហកម្ម និងអចលនទ្រព្យ។ ទោះជាយ៉ាងនេះក្ដី ចំនួនមហាសេដ្ឋីក្នុងវិស័យបច្ចេកវិទ្យាក៏កំពុងតែកើនឡើងយ៉ាងលឿនផងដែរ។

អឺរ៉ុបគឺជាទ្វីបដែលមានមហាសេដ្ឋីច្រើនជាងគេបង្អស់ក្នុងពិភពលោក ដោយមានដល់ទៅ 847នាក់។ ឈរលំដាប់ទី2គឺអាមេរិកខាងជើង ដោយមាន 834នាក់។ ប៉ុន្តែបើគិតអំពីទ្រព្យសរុបវិញ អាមេរិកខាងជើងមានច្រើនជាង (3.5លានលានដុល្លារ)។

រីឯអាស៊ីវិញ បែរជាតំបន់ដែលបាន “ផលិត” មហាសេដ្ឋីច្រើនជាងគេបង្អស់ក្នុងឆ្នាំ2019 ដោយមានមហាសេដ្ឋីថ្មីចំនួន80នាក់ ក្នុងចំណោមមហាសេដ្ឋីសរុប 758នាក់។ ទ្រព្យសរុបនៃមហាសេដ្ឋីទាំងនេះ មានចំនួន 2.4លានលានដុល្លារអាមេរិក គឺកើន 11% បើធៀបនឹងឆ្នាំ2018។ ដោយឡែក ប្រទេសចិនមានមហាសេដ្ឋីសរុបចំនួន 342នាក់៕

ប្រភព៖ CNBC

July 2, 2020

ប្រព័ន្ធផ្សាយពាណិជ្ជកម្មរបស់បណ្ដាញសង្គម Facebook ធំកម្រិតណា?

សូម្បីតែនៅក្នុងគ្រាត្រូវប្រឈមនឹង “រលកយក្ស” នៃ “ពហិការ” ធំបំផុតក្នុងប្រវត្តិសាស្ត្រ Facebook នៅតែអាចគេចផុតពីការខាតបង់ធំដោយសារតែចំនួនអតិថិជនដ៏ច្រើនមហិមារបស់ក្រុមហ៊ុននេះ។

មកដល់ពេលនេះ មានក្រុមហ៊ុនធំៗកាន់តែច្រើនឡើង នាំគ្នាដកការផ្សាយពាណិជ្ជកម្មចេញពី Facebook ដើម្បីប្រឆាំងទៅនឹងគោលនយោបាយគ្រប់គ្រងខ្លឹមសារប្រកបដោយការបង្កជម្លោះរបស់បណ្ដាញសង្គមនេះ។ គិតដោយឡែកត្រឹមតែនៅក្នុងថ្ងៃចន្ទដើមសប្ដាហ៍នេះ មានក្រុមហ៊ុនធំៗចំនួន3ដែលបានដកផ្ទាំងពាណិជ្ជកម្មរបស់ខ្លួនចេញពីទំព័រ Facebook រួមមានក្រុមហ៊ុន Adidas, HP និង Ford។ មុននេះ បណ្ដាក្រុមហ៊ុនដូចជា Unilever, The North Face, Coca Cola និងក្រុមហ៊ុន Honda ក៏បានចូលរួមយុទ្ធនាការធ្វើពហិការខាងលើនេះដែរ។

ប្រការខាងលើនេះបានបង្កផលប៉ះពាល់ដល់តម្លៃមូលបត្ររបស់ Facebook ហើយវានឹងបង្ខំឱ្យថ្នាក់ដឹកនាំរបស់ក្រុមហ៊ុននេះ ចេញមុខដោះស្រាយបញ្ហាមួយចំនួនដែលពាក់ព័ន្ធ។ ក៏ប៉ុន្តែ ដើម្បីដាក់សម្ពាធទៅលើប្រព័ន្ធផ្សាយពាណិជ្ជកម្មអនឡាញយក្សរបស់ក្រុមហ៊ុន Facebook បណ្ដាក្រុមហ៊ុនធំៗផ្សេងទៀតត្រូវតែធ្វើសកម្មភាពច្រើនជាងនេះ។

កាលពីឆ្នាំទៅ Facebook រកបានចំណូល 69.7ពាន់លានដុល្លារពីសេវាកម្មផ្សាយពាណិជ្ជកម្ម ស្មើនឹង98%នៃចំណូលសរុបរបស់ក្រុមហ៊ុន។ ភាគច្រើននៃខ្ទង់ប្រាក់ចំណូលខាងលើនេះ មិនមែនបានមកពីបណ្ដាក្រុមហ៊ុនដូចជា Starbucks ឬ Coca Cola នោះទេ តែវាបានមកពីបណ្ដាក្រុមហ៊ុនខ្នាតមធ្យម និងតូច ដែលកំពុងតែពឹងផ្អែកលើ Facebook ដើម្បីទាក់ទាញអតិថិជន។

នៅដើមឆ្នាំនេះ Facebook បានឱ្យដឹងថា ពួកគេមានអតិថិជនចំនួន8លានដែលបានដាក់ផ្សាយពាណិជ្ជកម្ម។ ក្រុមហ៊ុនស្រាវជ្រាវ Pathmatics បានបញ្ចេញរបាយការណ៍ថា Top 100 នៃបណ្ដាក្រុមហ៊ុនដែលចំណាយច្រើនជាងគេ បាននាំចំណូល 4.2ពាន់លានដុល្លារមកឱ្យ Facebook កាលពីឆ្នាំទៅ ដែលនេះគឺស្មើនឹង6%នៃចំណូលសរុបរបស់បណ្ដាញសង្គមនេះ។

Nicole Perrin ដែលជាអ្នកវិភាគម្នាក់មកពីក្រុមហ៊ុន eMarketer បញ្ចេញយោបល់ថា “Facebook មានដៃគូផ្សាយពាណិជ្ជកម្មដ៏ច្រើនមហិមា។ បណ្ដាញសង្គមនេះ ពិតណាស់ថា កំពុងពឹងផ្អែកច្រើនទៅលើបណ្ដាក្រុមហ៊ុនខ្នាតតូច”។

បើទោះជាត្រូវប្រឈមនឹងរលកនៃការឈប់ផ្សាយពាណិជ្ជកម្មដ៏ធំក្នុងប្រវត្តិសាស្ត្រ ប៉ុន្តែចំនួនអតិថិជនដ៏ច្រើនរបស់ Facebook បានជួយឱ្យបណ្ដាញសង្គមនេះគេចផុតពីការខាតបង់ធំផ្នែកហិរញ្ញវត្ថុ។ ទន្ទឹមនឹងនេះ សំណួរមួយដែលនៅមិនទាន់មានចម្លើយនោះគឺថា តើក្រុមហ៊ុននានាអាចចាកចោល “ថ្នាល” ផ្សាយពាណិជ្ជកម្មនេះបានដែរឬអត់?។

Facebook បានចំណាយប្រាក់យ៉ាងច្រើនទៅលើបច្ចេកវិទ្យាបញ្ញាសិប្បនិម្មិត (Artificial intelligence) និងបច្ចេកវិទ្យាពិភពនិម្មិត VR (Virtual Reality)។ ការបោះជំហានដ៏ធំរបស់ពួកគេគឺមិនមែនដើម្បីតភ្ជាប់រវាងក្រុមគ្រួសារ និងមិត្តភក្តិទៀតនោះទេ ប៉ុន្តែវាគឺជាការកំណត់ទិសដៅឱ្យបណ្ដាញសង្គមនេះក្លាយជាឧបករណ៍ចាំបាច់បំផុតសម្រាប់ក្រុមហ៊ុនទូទៅក្នុងការភ្ជាប់ទំនាក់ទំនងជាមួយអតិថិជន ដោយគ្រាន់តែធ្វើការចុចលើប៊ូតុងមួយ។ Facebook អាចផ្ដល់ជម្រើសច្រើនដល់អតិថិជនក្នុងការជ្រើសរើសការផ្សាយពាណិជ្ជកម្មនៅគ្រប់ទម្រង់ និងគ្រប់កម្រិត។

ប្រាក់ចំណូលបានមកពីការផ្សាយពាណិជ្ជកម្មរបស់ Facebook ក៏បានកើនឡើងជាបន្តបន្ទាប់ទៅតាមចំនួននៃអ្នកប្រើប្រាស់បណ្ដាញសង្គមនេះ។ ឆ្នាំ2009 ពួកគេរកបាន 761លានដុល្លារ ដែលពេលនោះ Facebook មានអ្នកប្រើប្រាស់ចំនួន350លាននាក់ជារៀងរាល់ខែ។ នេះបើតាម eMarketer។

បច្ចុប្បន្ន បណ្ដាញសង្គមនេះមានអ្នកប្រើប្រាស់ចំនួន2.6ពាន់លាននាក់ជារៀងរាល់ខែ ហើយនេះមិនទាន់រាប់បញ្ចូលទាំង Instagram (ជាបណ្ដាញសង្គមមួយដែល Facebook បានទិញកាលពីឆ្នាំ2012) នៅឡើយ។

Facebook បានក្លាយជាគូប្រជែងដ៏ខ្លាំងបំផុតរបស់ Google។ បច្ចុប្បន្ន ក្រុមហ៊ុនទាំងពីរនេះកំពុងតែទាញយកចំណូលជាងពាក់កណ្ដាលនៃចំណូលដែលបានមកពីការផ្សាយពាណិជ្ជកម្មអនឡាញ និងជិត30% បើធៀបនឹងប្រាក់ចំណាយសរុបសម្រាប់ការផ្សាយពាណីជ្ជកម្មនៅលើបណ្ដាញទូរគមនាគមន៍នៅសហរដ្ឋអាមេរិក។

ក៏ប៉ុន្តែ ទំនាក់ទំនងរវាង Facebook នឹងបណ្ដាដៃគូរបស់ខ្លួន ក្នុងរយៈពេលប៉ុន្មានឆ្នាំមកនេះ ក៏មានបញ្ហាមួយចំនួនកើតឡើងផងដែរ។ កាលពីឆ្នាំ2016 Facebook ធ្លាប់បានទទួលស្គាល់ថា ខ្លួនបានគណនាខុសទៅលើតួលេខទាក់ទិននឹងការផ្សាយពាណិជ្ជកម្ម ដូចជាចំនួនអ្នកចូលទស្សនាវីដេអូ ឬចំនួនអ្នកចូលអានទំព័រផ្សេងៗដែលមាននៅលើបណ្ដាញសង្គមនេះ។

ឆ្នាំ2018 Facebook រងការរិះគន់ដោយសារតែវិធីគ្រប់គ្រងព័ត៌មានឯកជន បន្ទាប់ពីមានរឿងអាស្រូវ Cambridge Analytica។ ថ្មីៗនេះ ពោលគឺក្នុងខែមករា មានក្រុមហ៊ុនជាច្រើន បានអំពាវនាវឱ្យ Facebook និងបណ្ដាក្រុមហ៊ុនបច្ចេកវិទ្យា ធ្វើការបន្ថែមទៀតដើម្បីទប់ស្កាត់ផ្ទាំងផ្សាយពាណិជ្ជកម្មរបស់ពួកគេ មិនឱ្យបង្ហាញខ្លួននៅក្បែរខ្លឺមសារអាក្រក់។

ទោះជាយ៉ាងណាក៏ដោយ ការរិះគន់គឺងាយស្រួលជាងច្រើនបើធៀបនឹងការចាកចេញទាំងស្រុងពី Facebook។ បណ្ដាក្រុមហ៊ុនធំៗដែលមានប្រាក់ច្រើនអាចពិចារណាក្នុងការជ្រើសយកថ្នាលផ្សាយពាណិជ្ជកម្មផ្សេង ដូចជា Google, Amazon ឬ TikTok និង Snapchat ជាច្រើន។ ក៏ប៉ុន្តែ ក្រុមហ៊ុនខ្នាតមធ្យម និងតូចរាប់លានដែលមានប្រាក់តិចតួចនៅពាសពេញពិភពលោក គឺពិតជាពិបាកខ្លាំងណាស់ក្នុងការបោះបង់បណ្ដាញសង្គមមួយនេះ៕

ប្រភព៖ CNN

July 2, 2020

កូនកំលោះម្នាក់បានចម្លងCOVID-19 ទៅភ្ញៀវការជាង100នាក់ ព្រោះតែមិនចង់ខាត…

កូនកំលោះម្នាក់នៅទីក្រុង Paliganj បានបាត់ជីវិតក្រោយពីបានចម្លងវីរុសCOVID-19 ទៅមនុស្សជាង100នាក់ដែលបានចូលរួមពិធីរៀបអាពាហ៍ពិពាហ៍របស់ខ្លួនកាលពីថ្ងៃទី15មីថុនាកន្លងទៅ។

បុរសជាវិស្វករផ្នែកទន់ម្នាក់ អាយុ30ឆ្នាំ មានអាការរាកនិងក្ដៅខ្លួនខ្លាំងនៅមុនថ្ងៃចូលរោងការ ក៏ប៉ុន្តែក្រុមគ្រួសារមិនបានអើពើដល់ការណែនាំរបស់ក្រុមគ្រូពេទ្យនោះឡើយ ដោយកូនកំលោះគ្រាន់តែលេបថ្នាំបន្ថយការឈឺចាប់និងបន្ថយកម្ដៅ និងបានប្រារព្ធពិធីរៀបមង្គលការដ៏ធំ ដែលមានមនុស្សចូលរួមចំនួនជាង360នាក់។

ពីរថ្ងៃបន្ទាប់ពីពិធីរៀបអាពាហ៍ពិពាហ៍នៅទីក្រុង Paliganj រដ្ឋ Bibar ភាគឦសានប្រទេសឥណ្ឌា ស្ថានភាពសុខភាពរបស់កូនកំលោះក៏កាន់តែធ្ងន់ធ្ងរជាងមុន។ មិនយូរប៉ុន្មាន កូនកំលោះនេះក៏បានស្លាប់នៅតាមផ្លូវបញ្ជូនទៅកាន់មន្ទីរពេទ្យ។ សាកសពត្រូវបានបូជាយ៉ាងឆាប់រហ័សដោយមិនទាន់មានការធ្វើតេស្តរកវីរុសCOVID-19។

កាលពីថ្ងៃទី19មិថុនា មនុស្សដែលមានទំនាក់ទំនងជិតស្និទ្ធជាមួយនឹងកូនកំលោះ សុទ្ធតែត្រូវបានពិនិត្យសុខភាព ក្នុងនោះមានមនុស្សចំនួន16នាក់ ទទួលបានលទ្ធផលវិជ្ជមានជាមួយនឹងCOVID-19។ ការធ្វើតេស្តលើភ្ញៀវទាំងអស់ដែលបានចូលរួមពិធីមង្គលការខាងលើនៅតែបន្ត ហើយបានរកឃើញអ្នកផ្ទុកវីរុសចំនួន86នាក់បន្ថែមទៀត នាំឱ្យតួលេខសរុបកើនឡើងលើសពី100នាក់ ខណៈដែលកូនក្រមុំទទួលបានលទ្ធផលអវិជ្ជមាន។

សាច់ញាតិម្នាក់របស់កូនកំលោះ និយាយថា “កាលពីថ្ងៃទី14មិថុនា បើទោះជាគាត់បានប្រាប់ថា មិនស្រួលខ្លួន ហើយចង់ពន្យារពេលរៀបការ ប៉ុន្តែមេបាទាំងសងខាងបានផ្ដល់យោបល់ថា មិនគួរធ្វើបែបនេះ ព្រោះថា នឹងខាតបង់ប្រាក់យ៉ាងច្រើន បើសិនជាលុបចោលពិធីរៀបការនេះ”។

សាច់ញាតិម្នាក់ផ្សេងទៀតឱ្យដឹងថា គ្មានអ្នកណាម្នាក់គិតថា កូនកំលោះមានផ្ទុកវីរុសCOVID-19នោះឡើយ។ “នៅតំបន់ជនបទដែលហាក់មិនមានស្រមោលរបស់COVID-19 យើងមានភាពងាយស្រួលក្នុងការដើរហើរ”។

ប្រភពព័ត៌មានបានឱ្យដឹងថា នៅក្នុងថ្ងៃរៀបការ កូនកំលោះមានអាការក្ដៅខ្លួនខ្លាំង ធ្វើឱ្យសាច់ញាតិក្នុងគ្រួសារមានការព្រួយបារម្ភ ព្រមទាំងបាន “បួងសួងសូមឱ្យCOVID-19 បរវាសចៀសឆ្ងាយ”។ ញាតិម្នាក់បាននិយាយថា “គាត់នៅតែធ្វើកិច្ចទាំងអស់ក្នុងពិធីអាពាហ៍ពិពាហ៍ ក្រោយពីបានលេបថ្នាំប៉ារ៉ា”។

Chiranjeev Pandey ដែលជាមន្ត្រីម្នាក់នៅមូលដ្ឋានបានឱ្យដឹងថា អាជ្ញាធរបានដាក់បម្រាមគោចរតំបន់មួយចំនួននៅ Paliganj, Meetha Kuan និង Khagari។

គិតមកដល់បច្ចុប្បន្ន ពិភពលោកទាំងមូលមានអ្នកឆ្លងវីរុសCOVID-19 សរុប 10,777,769នាក់ ខណៈដែលអ្នកស្លាប់ដោយសារវីរុសនេះបានកើនឡើងដល់517,810នាក់។ ឥណ្ឌាគឺជាសម្បុកមេរោគCOVID-19 ធំជាងគេលំដាប់ទី4ក្នុងពិភពលោក និងធំជាងគេបង្អស់នៅទ្វីបអាស៊ី ដោយមានអ្នកជំងឺជាង600,000នាក់ និងអ្នកស្លាប់ដោយសារវីរុសនេះ មានចំនួនជាង 17,800នាក់៕

ប្រភព៖ សារព័ត៌មានបរទេស

July 2, 2020

លោក Trump ជឿថា COVID-19 នឹងបាត់ខ្លួនទៅវិញ ខណៈដែលមនុស្សជាង130,000នាក់ស្លាប់នៅសហរដ្ឋអាមេរិក!

ប្រធានាធិបតីសហរដ្ឋអាមេរិកជឿថា វីរុសCOVID-19 ចុងក្រោយនឹងបាត់ខ្លួនទៅវិញ ខណៈដែលតួលេខអ្នកឆ្លងវីរុសនេះនៅតែបន្តកើនឡើងនៅក្នុងរដ្ឋជាច្រើននៅសហរដ្ឋអាមេរិកនាសប្ដាហ៍នេះ។

ក្នុងកិច្ចសម្ភាសមួយជាមួយ Fox Business កាលពីថ្ងៃទី1កក្កដា ប្រធានាធិបតី Donald Trump ថ្លែងថា លោកមានសុទិដ្ឋិនិយមចំពោះក្ដីសង្ឃឹមដែលថាសេដ្ឋកិច្ចនឹងងើបឡើងវិញក្រោយពីបានបទទ្វារអស់មួយរយៈពេលដោយសារតែCOVID-19។ ម្ចាស់សេតវិមានបានលើកឡើងអំពីទិន្នន័យដ៏ល្អប្រសើរនាពេលថ្មីៗនេះទាក់ទិននឹងចំនួនការងារ និងប្រាក់ចំណូលនៃការលក់រាយ។

លោក Trump បានថ្លែងថា “ខ្ញុំគិតថា យើងកំពុងតែវិលត្រលប់មកវិញទៅតាមវិធីដ៏ខ្លាំងក្លា។ ហើយខ្ញុំក៏គិតថា យើងនៅតែទប់ទល់ទៅនឹងវីរុសCOVID-19 បានយ៉ាងល្អ។

នៅពេលត្រូវបានសួរអំពីថា តើលោកជឿទេថា COVID-19 នឹងបាត់ខ្លួន លោក Trump អះអាងថា “ខ្ញុំយល់ថា នៅក្នុងអំឡុងពេលណាមួយនោះ វីរុសនឹងបាត់ខ្លួន។ ខ្ញុំសង្ឃឹមបែបនេះ។ ខ្ញុំជឿថា ប្រាកដជាបែបនេះ។ ដល់ពេលកំណត់ណាមួយនោះ វានឹងទៅជាយ៉ាងនេះ ហើយយើងនឹងមានវ៉ាក់សាំងក្នុងពេលឆាប់ៗខាងមុខ”។

ក្នុងរយៈពេលប៉ុន្មានខែចុងក្រោយនេះ លោក Trump ធ្លាប់បានអះអាងជាច្រើនលើកថា លោកជឿថា វីរុសCOVID-19 នឹង “បាត់ខ្លួន” ខណៈដែលរដ្ឋជាច្រើននៅសហរដ្ឋអាមេរិកនៅតែបន្តរកឃើញអ្នកផ្ទុកវីរុសកាន់តែច្រើនឡើងៗ។

កាលពីចុងខែកុម្ភៈ លោក Trump ប្រកាសថា COVID-19 នឹងបាត់ខ្លួន “ដូចជាប្រការដ៏អស្ចារ្យមួយ”។ កាលពីខែឧសភា លោកក៏ធ្លាប់បានថ្លែងថា វីរុសCOVID-19 នឹងបាត់ខ្លួនទៅវិញ ដោយ “មិនចាំបាច់មានវ៉ាក់សាំង” ផងដែរ។

ក៏ប៉ុន្តែ ក្រុមអ្នកវិទ្យាសាស្ត្រ និងមន្ត្រីសុខាភិបាលរបស់លោក Trump បានព្យាករថា ពលរដ្ឋអាមេរិកាំងនឹងត្រូវរស់នៅជាមួយវីរុសនេះក្នុងរយៈពេលវែងតទៅមុខទៀត ដែលយ៉ាងហោចណាស់ក៏រហូតដល់មានវ៉ាក់សាំងដែលត្រូវបានប្រើប្រាស់ជាទូលំទូលាយ។

ចំនួនករណីឆ្លងវីរុសនៅបណ្ដារដ្ឋដូចជា Texas, Arizona, Florida, California និងរដ្ឋផ្សេងៗជាច្រើនទៀតនៅសហរដ្ឋអាមេរិក គឺជាសញ្ញាដែលបង្ហាញថា COVID-19 នៅតែឆ្លងរាលដាលខ្លាំងនៅទឹកដីនេះ។

គិតមកដល់បច្ចុប្បន្ន ពិភពលោកទាំងមូលមានអ្នកឆ្លងវីរុសCOVID-19 សរុប 10,777,769នាក់ ខណៈដែលអ្នកស្លាប់ដោយសារវីរុសនេះបានកើនឡើងដល់517,810នាក់ ក្នុងនោះសហរដ្ឋអាមេរិកមានអ្នកស្លាប់130,746 នាក់ និងអ្នកជំងឺសរុបមានចំនួន 2.773.269នាក់៕

ប្រភព៖ Guardian

July 2, 2020

Author: សឿន សំណាង