សឿន សំណាង - La Reine Media

អ្នកចម្រៀងរ៉ែប Kanye West ស្វាមីរបស់ Kim Kardashian ប្រកាសដណ្ដើមសន្លឹកឆ្នោតពីលោក Trump ដើម្បីធ្វើជាប្រធានាធិបតីក្នុងឆ្នាំនេះ

អ្នកចម្រៀងរ៉ែប Kanye West បានឱ្យដឹងថា ខ្លួនចូលរួមការប្រកួតប្រជែងដណ្ដើមតំណែងប្រធានាធិបតីសហរដ្ឋអាមេរិកដើម្បីជ័យជំនះ និងបានបង្ហាញអំពីការលែងគាំទ្រចំពោះលោក Donald Trump ដូចមុនទៀតហើយ។

“ជាមួយនឹងកិច្ចសម្ភាសនេះ ខ្ញុំនឹងយកមួកក្រហមចេញពីក្បាល” អ្នកចម្រៀងរ៉ែប Kayne West ថ្លែងបែបនេះនៅក្នុងកិច្ចសម្ភាសមួយដែលត្រូវបានចុះផ្សាយក្នុងថ្ងៃនេះ ដោយលោកនិយាយអំពីមួកកីឡាបេស្បលពណ៌ក្រហមដែលមានពាក្យស្លោក “នាំទឹកដីអាមេរិកដ៏មហាអស្ចារ្យត្រលប់មកវិញ” របស់លោកប្រធានាធិបតី Donald Trump កាលពីពេលឃោសនារកសំឡេងឆ្នោត។ លោក West ធ្លា់ប់ជាអ្នកគាំទ្ររបស់លោក Trump និងធ្លាប់ទទួលបានការអញ្ជើញឱ្យចូលមកធ្វើទស្សនកិច្ចនៅសេតវិមានផងដែរ។

West ថ្លែងថា “ខ្ញុំនឹងប្រជែងរកសំឡេងឆ្នោតក្នុងនាមជាបេក្ខភាពមកពីបក្សសាធារណរដ្ឋ បើសិនមិនមានលោក Trump។ ខ្ញុំនឹងប្រជែងយកតំណែងប្រធានាធិបតី ក្នុងនាមជាបេក្ខភាពឯករាជ្យ បើសិនមានលោក Trump”។

លោក West បានឱ្យដឹងថា លោកនឹងចូលរួមប្រកួតប្រជែងការបោះឆ្នោតសម្រាប់បក្ស Birthday Party និងបានច្រានចោលការចោទប្រកាន់ដែលថា លោកកំពុងបំបែកសំឡេងឆ្នោតរបស់ក្រុមជនជាតិអាមេរិកាំងស្បែកខ្មៅ ក៏ដូចជាការបង្កការខាតបង់ឱកាសជាប់ឆ្នោតរបស់លោក Joe Biden ដែលជាបេក្ខភាពប្រធានាធិបតីមកពីបក្សប្រជាធិបតេយ្យ និងជាគូប្រជែងសំខាន់របស់លោក Trump នៅក្នុងការបោះឆ្នោតនៅសហរដ្ឋអាមេរិកក្នុងឆ្នាំនេះ។

លោក West សង្កត់ធ្ងន់ថា “នឹងជារូបភាពប្រកាន់ពូជសាសន៍ និងលទ្ធិអភិជនស្បែកស” នៅពេលស្នើឱ្យជនជាតិស្បែកខ្មៅទាំងអស់ គាំទ្របក្សប្រជាធិបតេយ្យ។ បើសិនជាខ្ញុំឈ្នះឆ្នោតក្នុងឆ្នាំនេះ នោះគឺជាការចាត់ចែងរបស់ព្រះ។ ហើយបើខ្ញុំឈ្នះក្នុងឆ្នាំ2024 នោះក៏ជាការរៀបចំរបស់ព្រះ”។

នៅពេលត្រូវបានសួរអំពីគោលនយោបាយការបរទេសនៅពេលឈ្នះឆ្នោត អ្នកចម្រៀងរូបនេះថ្លែងថា មិនទាន់ផ្ដោតទៅលើបញ្ហានេះនៅឡើយ។ “ខ្ញុំនឹងផ្ដោតទៅលើការ ការពារទឹកដីអាមេរិកជាដំបូងគេបង្អស់ជាមួយនឹងកងទ័ពដ៏មហិមារបស់យើង។ ជាដំបូង យើងចូរយកចិត្តទុកដាក់ទៅលើខ្លួនយើងរាល់គ្នាជាមុនសិន”។

នៅពេលនិយាយដល់ប្រទេសចិន លោក West ថ្លែងថា “ខ្ញុំស្រលាញ់ប្រទេសចិន។ អាសន្នរោគនោះមិនមែនជាកំហុសរបស់ប្រទេសចិន និងមិនមែនជាកំហុសរបស់ជនជាតិចិនទេ។ ពួកគេក៏ជាមនុស្សរបស់ព្រះ។ សេចក្ដីស្នេហាប្រទេសចិន បានផ្លាស់ប្ដូរជីវិតខ្ញុំ និងផ្លាស់ប្ដូរការយល់ឃើញរបស់ខ្ញុំ។ ម្ដាយរបស់ខ្ញុំគឺជាសាស្ត្រាចារ្យភាសាអង់គ្លេសនៅប្រទេសចិន កាលពីខ្ញុំនៅរៀនថ្នាក់ទី5”។

មួយម៉ោងក្រោយពីកិច្ចសម្ភាស អ្នកចម្រៀងរ៉ែបរូបនេះ បានឱ្យដឹងថា ប្រាកដជាប្រជែងឆ្នោតក្នុងឆ្នាំ2020នេះ ដោយប្រើពាក្យស្លោក “YES” និងមិនរង់ចាំដល់ឆ្នាំ2024នោះឡើយ។ អ្នកដែលត្រូវបាន West ជ្រើសរើសជាដៃគូសម្រាប់អមការប្រជែងរកសំឡេងឆ្នោតរបស់លោក នោះគឺ Michelle Tedball ជាគ្រួអាចារ្យម្នាក់មកពីកាហ្សាក់ស្ថាន។ នៅពេលត្រូវបានសួរអំពីមូលហេតុដែលនាំឱ្យជ្រើសរើសឈ្មោះ Birthday Party ជាឈ្មោះរបស់បក្ស លោក West ឆ្លើយថា “ព្រោះថា នៅពេលយើងខ្ញុំឈ្នះ នោះនឹងជាថ្ងៃកំណើតរបស់អ្នកគ្រប់គ្នា”។

លោក Kanye West កើតឆ្នាំ1977 នៅក្នុងទីក្រុង Atlanta រដ្ឋ Georgia នៃសហរដ្ឋអាមេរិក។ បច្ចុប្បន្ន លោករស់នៅជាមួយភរិយាដែលជាកំពូលតារាទូរទស្សន៍ម្នាក់ គឺអ្នកស្រី Kim Kardashian នៅ Hidden Hills ក្នុងទីក្រុង Los Angeles។ ទស្សនាវដ្ដី Forbes កាលពីខែមេសា បានទទួលស្គាល់ថា តារាចម្រៀងរ៉ែប Kanye West នេះ គឺជាមហាសេដ្ឋីម្នាក់ដែលមានទ្រព្យប្រមាណជា 1.3ពាន់លានដុល្លារអាមេរិក។

នៅក្នុងដំណើរទស្សនកិច្ចទៅកាន់សេតវិមានកាលពីឆ្នាំ2018 លោក West បានឱបលោក Trump និងបាននិយាយថា “ខ្ញុំស្រលាញ់បុរសនេះ”។ នៅពេលត្រូវបានសួរថា តើចាត់ទុក West ជាបេក្ខភាពប្រធានាធិបតីដែលមានសក្ដានុពលទេ លោក Trump កាលណោះបានឆ្លើយថា អ្នកចម្រៀងរ៉ែបរូបនេះ អាច “ជាបេក្ខភាពល្អណាស់”។ ក៏ប៉ុន្តែ លោក West អះអាងថា ប្រការនោះអាចកើតឡើងលុះត្រាតែក្រោយឆ្នាំ2024 នៅពេលដែលលោក Trump បានបញ្ចប់អាណាត្តិកាលទី2របស់ខ្លួននៅសេតវិមាន៕

ប្រភព៖ សារព័ត៌មានបរទេស

July 8, 2020

យុទ្ធសាស្ត្រ “ចងជើង” បុគ្គលិកពួកែៗរបស់ក្រុមហ៊ុន FWD ដែលទើបទទួលបានពានរង្វាន់ ”កន្លែងធ្វើការល្អបំផុតប្រចាំទ្វីបអាស៊ី ឆ្នាំ2020″

FWD ផ្ដល់សិទ្ធិដល់បុគ្គលិក បង្កើតបរិយាកាសការងារល្អ ដែលមានលក្ខណៈតភ្ជាប់ទំនាក់ទំនងគ្នា គោរពគ្នាទៅវិញទៅមក ផ្ដល់អត្ថប្រយោជន៍ល្អៗ និងនាំមកនូវឱកាសអភិវឌ្ឍខ្លួនសម្រាប់បុគ្គលិកគ្រប់រូប។ល។

FWD វៀតណាមគឺជាក្រុមហ៊ុនមួយក្នុងចំណោមបណ្ដាក្រុមហ៊ុនដែលទើបតែទទួលបានការលើកតម្កើងដោយពានរង្វាន់ “កន្លែងធ្វើការល្អបំផុតប្រចាំទ្វីបអាស៊ី2020” (Best Companies To Work For In Asia Awards) ពី HR Asia Awards។ អ្នកស្រី Nguyen Kim Mai Thu (អគ្គនាយិការងផ្នែកអភិវឌ្ឍធនធានមនុស្សរបស់ក្រុមហ៊ុន FWD បានចែករំលែងនូវវិធីសាស្ត្រដែលក្រុមហ៊ុននេះបានប្រើប្រាស់ដើម្បីទាក់ទាញ ក៏ដូចជា “ចងជើង” បុគ្គលិកឆ្នើមៗ ដែលនេះបានជួយឱ្យក្រុមហ៊ុនក្លាយជាកន្លែងធ្វើការមួយដែលត្រូវបានវាយតម្លៃខ្ពស់លំដាប់អន្តរជាតិ។

FWD ទទួលបានការកោតសរសើរនៅក្នុងបញ្ជីចំណាត់ថ្នាក់ស្ដីអំពីបណ្ដាក្រុមហ៊ុនដែលមានបរិយាកាសការងារល្អបំផុតនៅក្នុងទ្វីបអាស៊ីប្រចាំឆ្នាំ2020 ដែលត្រូវបាន HR Asia ដែលជាទស្សនាវដ្ដីមានកេរ្តិ៍ឈ្មោះល្អគួរទុកចិត្តកម្រិតកំពូលស្ដីអំពីធនធានមនុស្សនៅក្នុងតំបន់អាស៊ី ជាអ្នករៀបចំ និងជ្រើសរើស។

ខាងក្រោមនេះគឺជាសំណួរ និងចម្លើយសំខាន់ៗដែលត្រូវបានធ្វើឡើងនៅក្នុងកិច្ចសម្ភាសរបស់សារព័ត៌មាន ជាមួយនឹងអ្នកស្រី Nguyen Kim Mai Thu ៖

អ្នកស្រី Nguyen Kim Mai Thu (អគ្គនាយិការងផ្នែកអភិវឌ្ឍធនធានមនុស្សរបស់ក្រុមហ៊ុន FWD

– កត្តាអ្វីខ្លះដែលបានជួយឱ្យក្រុមហ៊ុនដែលទើបតែរកស៊ីនៅវៀតណាមត្រឹមរយៈពេល4ឆ្នាំសោះ អាចទទួលបានពានរង្វាន់ HR Asia Awards 2020 ?

+ ក្រុមធនធានមនុស្សដ៏ពូកែ និងពោរពេញដោយថាមពល បានរួមចំណែកនាំមកនូវពានរង្វាន់នេះ ជូនដល់ក្រុមហ៊ុន។ FWD វៀតណាម គឺជាក្រុមហ៊ុន “វ័យក្មេង” មានមហិច្ឆតាខ្ពស់ក្នុងវិស័យធានារ៉ាប់រង។ ពានរង្វាន់នេះគឺជាការទទួលស្គាល់នូវការប្រឹងប្រែងមិនឈប់ឈររបស់យើងខ្ញុំក្នុងការបង្កើតបរិយាកាសការងារល្អ ឆ្ពោះទៅរកការទទួលអារម្មណ៍និងបទពិសោធន៍ពិសេសសម្រាប់បុគ្គលិក ក្នុងបំណងបង្កើតបានជាជំហានដ៏អស្ចារ្យក្នុងវិស័យធនារ៉ាប់រងនេះ។

ខ្ញុំមានមោទនភាពខ្លាំងណាស់ ដោយសារបុគ្គលិកមានការជឿជាក់លើទស្សនវិស័យរបស់ក្រុមហ៊ុន។ សំខាន់ជាងនេះ ពួកគេមានអារម្មណ៍ថា ទទួលបានការស្ដាប់ ផ្ដល់ឱកាសក្នុងការអភិវឌ្ឍខ្លួន ព្រមទាំងដើរទន្ទឹមគ្នាជាមួយនឹងការរីកចម្រើនរបស់ក្រុមហ៊ុន។

- ទីផ្សារធនារ៉ាប់រងអាយុជីវិត មានការចូលរួមប្រកួតប្រជែកពីក្រុមហ៊ុនធំៗជាច្រើន តើ FWD ធ្វើយ៉ាងណាដើម្បីទាក់ទាញធនធានមនុស្ស សម្រាប់បង្កើនសមត្ថភាពប្រកួតប្រជែងក្នុងរយៈពេលខ្លីបានដូច្នេះ?

យុទ្ធសាស្ត្រ "ចងជើង" បុគ្គលិកពួកកែៗរបស់ក្រុមហ៊ុន FWD ដែលទើបទទួលបានពានរង្វាន់ "កន្លែងធ្វើការល្អបំផុតប្រចាំទ្វីបអាស៊ី ឆ្នាំ2020" — ក្រុមហ៊ុន FWD ទើបទទួលបានពានរង្វាន់ ”កន្លែងធ្វើការល្អបំផុតប្រចាំទ្វីបអាស៊ី ឆ្នាំ2020″

+ ទស្សនវិស័យរបស់ FWD គឺ “ការផ្លាស់ប្ដូរការយល់ឃើញរបស់អ្នកគ្រប់គ្នាចំពោះធនារ៉ាប់រង”។ ដូច្នេះ យើងខ្ញុំបានបង្កើតក្រុម “សកម្មជន” វ័យក្មេងប្រកបដោយថាមពល ដែលមានមហិច្ឆតាក្លាយជាផ្នែកមួយនៅក្នុងដំណើរការបង្កើតលក្ខណៈពិសេសថ្មីៗ ប្លែកៗ សម្រាប់អតិថិជន។

គ្រប់បុគ្គលិករបស់ក្រុមហ៊ុនតែងតែជាមនុស្សនាំមុខក្នុងការទទួលយកឧបសគ្គ និងមានការច្នៃប្រឌិតជារៀងរាល់ថ្ងៃ ព្រមទាំងស្ម័គ្រចិត្តទទួលយកការរៀនសូត្រ និងបទពិសោធន៍ថ្មីៗ។

– កត្តាអ្វីខ្លះដែលបានជួយបំផុសបំផុលឱ្យបុគ្គលិកមានអារម្មណ៍ល្អនៅពេលធ្វើការក្នុងក្រុមហ៊ុន FWD?

+ និយមន័យ “មនុស្សគឺជាទ្រព្យសម្បត្តិសំខាន់បំផុតរបស់ក្រុមហ៊ុន” មិនមែនថ្មីនោះទេ ប៉ុន្តែសម្រាប់ FWD វាគឺជាត្រីវិស័យដ៏ពិតប្រាកដមួយដើម្បីឱ្យយើងខ្ញុំអាចធ្វើឱ្យទស្សនវិស័យ “ផ្លាស់ប្ដូរការយល់ឃើញរបស់គ្រប់គ្នាចំពោះការធនារ៉ាបរង” ក្លាយជាការពិត។

យើងបង្កើតបរិយាកាសការងារប្រកបដោយទំនាក់ទំនងល្អ ដោយរួមមាន ការសន្យា ការកែលម្អ ភាពម្ចាស់ការ ការបើកទូលាយ និងការថែរក្សាបុគ្គលិក។ ក្រុមហ៊ុនក៏យកចិត្តក្នុងការលើកសរសើរ និងផ្ដល់រង្វាន់ដល់បុគ្គលិកតាមរយៈឧបករណ៍គ្រប់គ្រងលទ្ធផលការងារល្អប្រសើរ រួមនឹងបណ្ដាកម្មវិធីដូចជា Star Award, i-Appreciate ។ល។

បុគ្គលិកទទួលបានការផ្ទេរសិទ្ធិ បង្កើនសមត្ថភាពដឹកនាំ ការអភវឌ្ឍខ្លួនមិនឈប់ឈរ និងទទួលបានលទ្ធផលតាមការជាក់ស្ដែងនៅក្នុងបរិយាកាសការងារប្រកបដោយទំនាក់ទំនងល្អ និងបទពិសោធន៍ពិសេសៗ។ គ្រប់គ្នាតែងទទួលបានការបណ្ដុះបណ្ដាលប្រកបដោយការពេញចិត្ត ជាមួយនឹងស្មារតី “រស់ដោយពេញលេញចាប់ពីថ្ងៃនេះ” និងទទួលបានឱកាសតាមចាប់ចំណូលចិត្ត និងការដុសខាត់ភាពក្លាហានជាដើម ដែលនេះនឹងជួយពួកគេឱ្យមានភាពជឿជាក់ក្នុងសាមគ្គីភាព ដើម្បីអនុវត្តនូវទស្សនវិស័យដែលក្រុមហ៊ុនបានដាក់ចេញ។ យើងខ្ញុំតែងតែជឿជាក់គ្នាទៅវិញទៅមក និងរួមគ្នាដើម្បីរីកចម្រើន និងជោគជ័យ។

– តើមានកត្តាអ្វីខ្លះដែលត្រូវបានធ្វើឡើងដើម្បីទាក់ទាញ និងរក្សាបុគ្គលិកដែលមានទេពកោសល្យល្អ?

+ ខ្ញុំពិតជាសប្បាយចិត្តណាស់ នៅពេលបុគ្គលិកតែងតែមានអារម្មណ៍ថា ពួកគេទទួលបានការផ្គាប់ចិត្ត និងការយកចិត្តទុកដាក់ថែរក្សានៅក្នុងក្រុមហ៊ុន FWD តាមរយៈកម្មវិធីនានាដែលត្រូវបានរៀបចំដោយឡែកសម្រាប់ពួកគេ ដូចជា Newbie Anchor, FWD Maven ឬថ្ងៃនៃគ្រួសារជាដើម។ គោលនយោបាយធនធានមនុស្សរបស់ក្រុមហ៊ុន គឺឆ្ពោះទៅរកការបង្កើតក្រុមបុគ្គលិកដែលពោរពេញដោយសុភមង្គល និងថាមពល។

FWD Care និង FWD Wellbeing ដែលជាកម្មវិធីសុខុមាលភាព ត្រូវបានបង្កើតឡើងដោយផ្ដោតទៅលើកត្តាសុខភាពរាងកាយ អារម្មណ៍ ហិរញ្ញវត្ថុ និងតភ្ជាប់បណ្ដាញសង្គម ក៏ត្រូវបានជំរុញបន្ថែមដើម្បីនាំមកនូវសន្តិសុខពេញលេញដល់បុគ្គលិកផងដែរ។ ទន្ទឹមនឹងនេះ ក្រុមហ៊ុនក៏បានផ្ដល់ឱកាសដល់បុគ្គលិកក្នុងការចំណាយពេលសម្រាប់គ្រួសាររបស់ពួកគេនៅពេលចាំបាច់ ឬសម្រាកយកកម្លាំង តាមរយៈកម្មវិធីដូចជា ការធ្វើការពីផ្ទះ ឬការបំពេញការងារតាមពេលវេលាជាក់ស្ដែងប្រកបដោយការបត់បែន (flexible work hours) ជាដើម។

ការរួមចំណែកបំពេញការងារ ឬការផ្ដល់យោបល់របស់បុគ្គលិកម្នាក់ៗ សុទ្ធតែទទួលបានការយកចិត្តទុកដាក់ស្ដាប់ លើកទឹកចិត្ត និងផ្ដល់កិត្តិយសទាន់ពេលវេលា។ នេះក៏ជាកត្តាជំរុញឱ្យបុគ្គលិកកែលម្អសមត្ថភាពជាបន្តបន្ទាត់ និងតភ្ជាប់ទំនាក់ទំនងជាមួយមិត្តរួមការងារ បង្កើតបានជាកម្លាំងរួមសម្រាប់បំពេញការងារថ្មីៗដែល FWD បានសន្យាថានឹងនាំមកជូនអតិថិជន៕

ប្រភព៖ សារព័ត៌មានបរទេស

July 8, 2020

អ្នកមានជាងគេនៅទ្វីបអឺរ៉ុប និងជាម្ចាស់ក្រុមហ៊ុនសម្លៀកបំពាក់ Zara បង្ហើបជាលើកដំបូងអំពីទំហំអចលនទ្រព្យ

មហាសេដ្ឋី Amancio Ortega កំពុងកាន់កាប់ទ្រព្យសម្បត្តិដែលមានតម្លៃសុបចំនួន 58.5ពាន់លានដុល្លារ ក្នុងនោះអចលនទ្រព្យរបស់គាត់មានតម្លៃខ្ទង់ 17.2ពាន់លានដុល្លារអាមេរិក។

យោងតាមសេចក្ដីប្រកាសក្នុងថ្ងៃទី7កក្កដារបស់ Pontegadea ដែលជាក្រុមហ៊ុនគ្រប់គ្រងភាគហ៊ុន59.3%នៅក្នុងក្រុមហ៊ុនផលិតសម្លៀកបំពាក់ Inditex (ក្រុមហ៊ុនមេរបស់ Zara) បានឱ្យដឹងថា ម្ចាស់ក្រុមហ៊ុន Zara លោក Amancio Ortega បច្ចុប្បន្នមានអចលនទ្រព្យដែលមានតម្លៃប្រមាណជា 15.2ពាន់លានអឺរ៉ូ (17.2ពាន់លានដុល្លារអាមេរិក)។ នេះគឺជាលើកដំបូងហើយដែលអចលនទ្រព្យរបស់លោក Ortega ត្រូវបានបង្ហើបឱ្យដឹងជាសាធារណៈ។ យោងតាម Bloomberg តួលេខនេះបានជួយឱ្យម្ចាស់ Zara ក្លាយជាអ្នកដែលមានអចលនទ្រព្យធំជាងគេក្នុងចំណោមកំពូលអ្នកមាននៅទ្វីបអឺរ៉ុប។

កាលពីឆ្នាំមុន តាមរយៈក្រុមហ៊ុនបុត្រសម្ព័ន្ធនៃក្រុមហ៊ុន Pontegadea លោក Ortega បានវិនិយោគទឹកប្រាក់2.1ពាន់លានអឺរ៉ូទៅក្នុងវិស័យអចលនទ្រព្យ។ ក្រុមហ៊ុននេះ រកបានចំណូលប្រមាណជា1.8ពាន់លានអឺរ៉ូក្នុងឆ្នាំ2019 រួមមាន ភាគលាភចំនួន1.64ពាន់លានអឺរ៉ូពីក្រុមហ៊ុនសម្លៀកបំពាក់ Inditex និង 621លានអឺរ៉ូ ពីអចលនទ្រព្យ។

ក្នុងរយៈពេលប៉ុន្មានឆ្នាំចុងក្រោយនេះ លោក Ortega បានប្រើប្រាស់យុទ្ធសាស្ត្រពហុវិស័យក្នុងមុខជំនួញរបស់ខ្លួនដើម្បីការពារហានិភ័យនៃការបាត់បង់ទ្រព្យ។ ដូច្នេះ លោកក៏បានវិនិយោគទៅលើអចលនទ្រព្យ។ មហាសេដ្ឋីរូបនេះ បានទិញអគារ Haughwout Building ដ៏ល្បីឈ្មោះនៅ Manhattan និងអគារការិយាល័យខ្ពស់បំផុតនៅទីក្រុង Miami ក្នុងរដ្ឋ Florida សហរដ្ឋអាមេរិក។

កាលពីឆ្នាំមុន ក្រុមហ៊ុនរបស់លោក ក៏បានចំណាយប្រាក់72.5លានដុល្លារ ក្នុងការទិញសណ្ឋាគារមួយនៅក្នុងទីក្រុង Chicago ផងដែរ។ មុននោះ លោក Ortega ក៏បានទិញអគារមួយនៅក្នុងរដ្ឋធានីវ៉ាស៊ីងតោន និងអគារការិយាល័យចំនួន2ផ្សេងទៀតនៅទីក្រុង Seattle ក្នុងរដ្ឋវ៉ាស៊ីងតោនទៀតផង។

យោងតាម Bloomberg Billionaires Index លោក Ortega ឆ្នាំនេះមានអាយុ84ឆ្នាំ និងកាន់កាប់ទ្រព្យសម្បត្តិដែលមានតម្លៃ58.5ពាន់លានដុល្លារ។ ដោយសារតែ COVID-19 រាប់ចាប់ពីដើមឆ្នាំ ទ្រព្យសម្បត្តិរបស់មហាសេដ្ឋីអេស្ប៉ាញរូបនេះ បានថយចុះ20%។ ក្រុមហ៊ុន Inditex ត្រូវបង្ខំចិត្តបិទហាងមួយចំនួនធំ បណ្ដាលឱ្យមូលបត្ររបស់ក្រុមហ៊ុននេះធ្លាក់ចុះ22%៕

ប្រភព៖ Bloomberg

July 8, 2020

អ្នកជំនាញព្យាករថា “សេដ្ឋកិច្ចនៃប្រទេសអាស៊ីអាគ្នេយ៍មួយចំនួន នៅតែមានកំណើនអវិជ្ជមាននៅក្នុងត្រីមាសបន្ទាប់

សេដ្ឋកិច្ចរបស់ប្រទេសចំនួន5ក្នុងតំបន់អាស៊ីអាគ្នេយ៍ ត្រូវបានក្រុមសេដ្ឋវិទូព្យាករថា នឹងមានកំណើនថយក្រោយនៅក្នុងត្រីមាសបន្ទាប់ក្នុងឆ្នាំ2020នេះ។

មជ្ឈមណ្ឌលស្រាវជ្រាវផ្នែកសេដ្ឋកិច្ចរបស់ជប៉ុន JCER (Japan Center for Economic Research) និងសារព័ត៌មាន Nikkei ទើបតែបានធ្វើការស្ទង់មតិប្រមូលបានយោបល់ចំនួន38ពីក្រុមអ្នកសេដ្ឋកិច្ច និងបានធ្វើការវិភាគអំពីខឿនសេដ្ឋកិច្ចនៃប្រទេសចំនួន5នៅតំបន់អាស៊ីអាគ្នេយ៍ រួមមានប្រទេសឥណ្ឌូនេស៊ី ម៉ាឡេស៊ី ហ្វីលីពីន សិង្ហបុរី និងប្រទេសថៃ។ ក្នុងការព្យាករនេះ មិនបានរាប់បញ្ចូលប្រទេសកម្ពុជា និងប្រទេសមួយចំនួនទៀតក្នុងតំបន់នេះទេ។

ការស្ទង់មតិបានបង្ហាញថា ការរំពឹងទុកនៃបណ្ដាខឿនសេដ្ឋកិច្ចខាងលើនេះ បានប្រែទៅជាអាក្រក់ក្នុងអំឡុង3ខែកន្លងមកនេះ ដោយសារតែឥទ្ធិពលរបស់COVID-19 និងដែនកំណត់នៃពាណិជ្ជកម្មទូទាំងសកលលោក។ ការព្យាករ កំណើនសេដ្ឋកិច្ចរបស់បណ្ដាប្រទេសអាស៊ីអាគ្នេយ៍ទាំង5 (ASEAN5) ខាងលើ ក្នុងដំណាក់កាលពីខែមេសាដល់ខែមិថុនាគឺ -7.8% ថយចុះ9.7ពន្ទុភាគរយបើធៀបជាមួយនឹងការស្ទង់មតិកាលពីខែមីនា។ អត្រានៃកំណើនអវិជ្ជមានក្នុងត្រីមាសទី2 ឆ្នាំ2020 នៃបណ្ដាប្រទេសទាំង5ខាងលើ ត្រូវបានព្យាករថានឹងថយចុះផងដែរ ក្នុងនោះប្រទេសម៉ាឡេស៊ី ថៃ និងសិង្ហបុរីនឹងដាំក្បាលចុះជាង10%។

Vincent Loo Yeong Hong មកពីក្រុមហ៊ុន KAF Research នៃប្រទេសម៉ាឡេស៊ីបានបកស្រាយថា “ការដាំក្បាលចុះយ៉ាងជ្រៅនៅក្នុងត្រីមាសទី2 បានបង្ហាញអំពីឥទ្ធិពលនៃការដាក់បម្រាមគោចរក្នុងរយៈពេល3ខែ រាប់ចាប់ពីថ្ងៃទី18មីនា ដល់ថ្ងៃទី9មិថុនា”។ ចំណែក Panundorn Aruneeniramarn មកពីធនាគារពាណិជ្ជ Siam នៃប្រទេសថៃ មានយោបល់ថា “សេដ្ឋកិច្ចរបស់ប្រទេសថៃនឹងជួបការលំបាកដោយសារផលប៉ះពាល់ទៅលើវិស័យទេសចរណ៍ នាំចេញ និងឥទ្ធិពលពីបម្រាមគោចរ”។

ការព្យាករសម្រាប់ឆ្នាំ2020 ក៏ដូចជាក្នុងត្រីមាសទី3និងទី4នៃឆ្នាំនេះ នៅតែជាកំណើនអវិជ្ជមានដដែល ចំពោះសេដ្ឋកិច្ចនៃបណ្ដាប្រទេសដែលត្រូវបានស្ទង់មតិទាំងនេះ។ ក្រុមសេដ្ឋវិទូរំពឹងថា បញ្ហាបាត់បង់ការងារធ្វើនឹងអាចធូរស្រាលនៅក្នុងពាក់កណ្ដាលចុងឆ្នាំ2020នេះ។

បុរសម្នាក់កំពុងដេកនៅលើឆ្នេរសមុទ្រ Pattaya ដែលហាក់ដូចគ្មានស្រមោលមនុស្សដោយសារតែឥទ្ធិពលរបស់ COVID-19 — បុរសម្នាក់កំពុងដេកនៅលើឆ្នេរសមុទ្រ Pattaya (ប្រទេសថៃ) ដែលហាក់ដូចគ្មានស្រមោលមនុស្សដោយសារតែឥទ្ធិពលរបស់ COVID-19 (រូបភាព៖ Reuters

Lalita Thienprasiddhi មកពីមជ្ឈមណ្ឌលស្រាវជ្រាវ Kasikorn យល់ថា “នៅពេលដែលស្ថានភាពCOVID-19 ក្នុងប្រទេសថៃ ត្រូវបានគ្រប់គ្រងក្នុងត្រីមាសទី2 យើងជឿថា សេដ្ឋកិច្ចនឹងធ្លាក់ចុះដល់បាត នៅក្នុងត្រីមាសនេះ”។

Pauline Revillas មកពីក្រុមហ៊ុន Metrobank ថ្លែងអំពីសេដ្ឋកិច្ចហ្វីលីពីនថា “ការងើបឡើងវិញយ៉ាងលឿន” នឹងត្រូវបាន “មើលឃើញនៅក្នុងឆ្នាំ2021 បើសិនជា COVID-19 ត្រូវបានទប់ស្កាត់ប្រកបដោយប្រសិទ្ធភាពក្នុងឆ្នាំនេះ”។

Manu Bhaskaran មកពីក្រុមហ៊ុន Cent Years Asia របស់សិង្ហបុរី យល់ថា សកម្មភាពសេដ្ឋកិច្ចទូទាំងសកលលោកនឹងងើបឡើងវិញជាបណ្ដើរៗចាប់ពីត្រីមាសទី3 ហើយងើបឡើងយ៉ាងខ្លាំងក្លាក្នុងត្រីមាសទី4ឆ្នាំ2020 ឱ្យតែរលកនៃការឆ្លងរាលដាលបន្ទាប់របស់COVID-19 ត្រូវបានទប់ស្កាត់ទាន់ពេល។

ក្រៅពីCOVID-19 ក្រុមអ្នកសេដ្ឋសាស្ត្រក៏បានចាត់ទុកថា ទំនាក់ទំនងរវាងអាមេរិក-ចិន គឺជាកត្តាសំខាន់មួយដែលមានឥទ្ធិពលលើសេដ្ឋកិច្ចនៃបណ្ដាប្រទេសនៅអាស៊ីអាគ្នេយ៍ផងដែរ។ “ភាពតានតឹងនៃសង្គ្រាមពាណិជ្ជកម្មអាមេរិក-ចិន បានកើនឡើងជាថ្មី នៅពេលប្រទេសចិនបង្កើនការក្ដោបក្ដាប់ទីក្រុងហុងកុង ដែលនេះនឹងប៉ះពាល់ដល់ទីផ្សារហិរញ្ញវត្ថុ ក៏ដូចជាពាណិជ្ជកម្មទូទាំងពិភពលោក” នេះបើតាម Wan Suhaimie មកពីធនាគារវិនិយោគ Kenanga In នៃប្រទេសម៉ាឡេស៊ី៕

ប្រភព៖ Nikkei/Asian Re

July 8, 2020

ប្រធានាធិបតីប្រេស៊ីល ឆ្លងវីរុសCOVID-19

ប្រធានាធិបតីប្រទេសប្រេស៊ីល លោក Jair Bolsonaro បានប្រកាសថា លោកវិជ្ជមានជាមួយនឹងវីរុសCOVID-19 ក្រោយពីមានអាការអស់កម្លាំងនិងក្ដៅខ្លួន។

“លទ្ធផលគឺវិជ្ជមាន” ប្រធានាធិបតីប្រេស៊ីលមានប្រសាសន៍ជាមួយក្រុមអ្នកយកព័ត៌មានក្នុងពេលទទួលទានអាហារថ្ងៃត្រង់ នៅក្នុងកម្មវិធីទូរទស្សន៍ផ្សាយផ្ទាល់មួយកាលពីថ្ងៃទី7កក្កដាកន្លងទៅ ។

លោក Bolsonaro បានឆ្លងវីរុសនេះ បន្ទាប់ពីលោកបានអញ្ជើញទៅទទួលទានអាហារនៅឯគេហដ្ឋានរបស់លោក Todd Chapman ដែលជាឯកអគ្គរដ្ឋទូតសហរដ្ឋអាមេរិកនៅប្រេស៊ីល នារដ្ឋធានី Brasilia។ លោកចាប់ផ្ដើមមានអាការអស់កម្លាំងកាលពីព្រលប់ថ្ងៃទី4កក្កដា ហើយថ្ងៃបន្ទាប់ក៏នៅតែមានអារម្មណ៍ថាមិនស្រួលដដែល។

រដ្ឋាភិបាលប្រេស៊ីល បានឱ្យដឹងថា លោក Bolsonaro មានអារម្មណ៍ថាមិនស្រួលខ្លួន និងមានកម្ដៅខ្លួនឡើងដល់38អង្សា។ លោក Bolsonaro ក៏បានបញ្ជាក់ថា លោកបានធ្វើតេស្តរកមេរោគជាលើកទី4ហើយ រាប់ចាប់ពីខែមីនា និងបានថតកាំរស្មីអ៊ិចពិនិត្យមើលសួតនៅមន្ទីរពេទ្យយោធា ប៉ុន្តែមិនមានសញ្ញាខុសប្រក្រតីនោះទេ។

មេដឹកនាំប្រេស៊ីលវ័យ65ឆ្នាំរូបនេះ តែងតែវាយតម្លៃទាបទៅលើហានិភ័យក៏ដូចជាការគំរាមកំហែងរបស់វីរុសCOVID-19។ លោកធ្លាប់បានថ្លែងថា វីរុសនេះមិនខុសអ្វីទៅនឹងជំងឺផ្ដាសាយធម្មតាទេ។ លោក Bolsonaro ក៏ជឿថា ការដែលលោកធ្លាប់ជាអតីតអត្តពលិកនឹងជួយឱ្យលោកមានប្រព័ន្ធការពាររាងកាយល្អសម្រាប់ទប់ទល់នឹងអាការធ្ងន់ធ្ងរបំផុតរបស់COVID-19។

mainichi.jp Brazil's President Bolsonaro appears in protest — លោក Bolsonaro កន្លងមក ធ្លាប់បានចូលរួមធ្វើបាតុកម្មប្រឆាំងនឹងបម្រាមគោចរដែលបានដាក់ចេញដោយរដ្ឋមួយចំនួននៃប្រទេសនេះ

លោក Bolsonaro គឺជាសមាជិកទី2ដែលបានឆ្លងវីរុសCOVID-19 នៅក្នុងគ្រួសាររបស់លោក។ លោកយាយរបស់លោកជំទាវទី1 Michelle Bolsonaro ត្រូវបានគេរាយការណ៍ថា ត្រូវដាក់ម៉ាស៊ីនជំនួយដង្ហើម បន្ទាប់ពីបានចូលព្យាបាលនៅមន្ទីរពេទ្យដោយសារតែឆ្លងCOVID-19 កាលពីថ្ងៃទី1កក្កដា។

មុនករណីប្រធានាធិបតី អភិបាលក្រុង Manaus ដែលជាទីក្រុងធំបំផុតក្នុងតំបន់ Amazon ក៏បានចូលព្យាបាលនៅមន្ទីរពេទ្យនាទីក្រុង Sao Paulo ព្រោះតែឆ្លងវីរុសCOVID-19 នេះដែរ កាលពីសប្ដាហ៍មុន។

គិតមកដល់បច្ចុប្បន្ន COVID-19 បានសម្លាប់មនុស្ស ជាង482,100នាក់នៅក្នុងចំណោមអ្នកជំងឺសរុបជាង9,445,800នាក់ក្នុងពិភពលោក។ ប្រេស៊ីលគឺជាសម្បុកមេរោគធំជាងគេលំដាប់ទី2ក្នុងសកលលោក ដោយមានអ្នកជំងឺសរុប1,6លាននាក់ និងអ្នកស្លាប់សរុប52,951នាក់៕

ប្រភព៖ សារព័ត៌មានបរទេស

July 8, 2020

ទិដ្ឋភាពយន្តហោះនិងនាវាចម្បាំងអាមេរិក ធ្វើសមយុទ្ធកក្រើកមេឃរញ្ជួយទឹក នៅលើសមុទ្រចិនខាងត្បូង

បណ្ដាយន្តហោះយោធាអាមេរិកាំងត្រូវបានបញ្ជូនចេញពីរនាវាចម្បាំង USS Ronald Reagan និង USS Nimitz បានចូលរួមធ្វើសមយុទ្ធយោធារបស់ហរដ្ឋអាមេរិកនៅលើសមុទ្រចិនខាងត្បូង។

ក្រុមប្រយុទ្ធនៃនាវាចម្បាំងចំនួន2 គឺ USS Nimitz និង USS Ronald Reagan ដែលធ្វើសកម្មភាពក្រោមឈ្មោះ “កងកម្លាំងយុទ្ធសាស្ត្រនាវាផ្ទុកយន្តហោះ Nitmiz កំពុងធ្វើសមយុទ្ធយោធានៅលើសមុទ្រចិនខាងត្បូង ជាកន្លែងដែលកំពុងមានភាពតានតឹងព្រោះតែប្រទេសជាច្រើនដណ្ដើមគ្នាកាន់កាប់កោះ និងប្រជុំកោះនៅក្នុងតំបន់សមុទ្រនេះ។

ការធ្វើសមយុទ្ធយោធានៅសមុទ្រចិនខាងត្បូងរបស់កងទ័ពសហរដ្ឋអាមេរិក ត្រូវបានគេមើលឃើញថា សហរដ្ឋអាមេរិកចង់បញ្ជាក់ថា សមុទ្រចិនខាងត្បូងគឺជាដែនទឹកអន្តរជាតិ ហើយនេះក៏ជាការបង្ហាញសាច់ដុំដាក់ប្រទេសចិនផងដែរ ក្នុងបំណងការពារបណ្ដាប្រទេសតូចៗ និងការពារផលប្រយោជន៍សហរដ្ឋអាមេរិកនៅលើដែនសមុទ្រមួយនេះ ដោយសារតែចិនមានបំណងគ្រប់គ្រងផ្ដាច់ទៅលើសមុទ្រនេះ។

ខាងក្រោមនេះគឺជាបណ្ដារូបភាពដែលបង្ហាញអំពីសកម្មភាពធ្វើសមយុទ្ធរបស់កងទ័ពសហរដ្ឋអាមេរិកនៅលើសមុទ្រចិនខាងត្បូង៖

បណ្ដាយន្តហោះដែលមកពីក្រុមហោះហើររបស់ក្រុមនាវាផ្ទុកយន្តហោះ កំពុងហោះជា2ក្រុម នៅពីលើនាវាផ្ទុកយន្តហោះ USS Nimitz និង USS Ronald Reagan លើផ្ទៃសមុទ្រចិនខាងត្បូងកាលពីថ្ងៃទី6កក្កដា។

ក្រុមនាវិកនៅលើនាវាផ្ទុកយន្តហោះ USS Nimitz កំពុងរៀបចំឱ្យយន្តហោះចម្បាំងធ្វើសមយុទ្ធ

ក្រុមហ៊ុនយន្តដែលមកពីក្រុមទី11 នៃនាវាផ្ទុកយន្តហោះ កំពុងហោះពីលើនាវា

ប្រភព៖ សារព័ត៌មានបរទេស

July 7, 2020

ប្រទេសចំនួន3នឹងបញ្ជូនយានអវកាសទៅកាន់ផ្កាយព្រះអង្គារនៅក្នុងខែនេះ

សហរដ្ឋអាមេរិក ប្រទេសចិន និងអារ៉ាប់រួម កំពុងឆ្លៀតយកឱកាសដ៏ល្អបំផុតក្នុងឆ្នាំនេះដើម្បីបញ្ជូនយានអវកាសទៅស្រាវជ្រាវពិភពព្រះអង្គារ ដើម្បីត្រួសត្រាយផ្លូវសម្រាប់ការបញ្ជូនមនុស្សទៅរស់នៅលើភពក្រហមនេះ។

ទីតាំងនិងរយៈចម្ងាយពីផែនដីទៅកាន់ពិភពព្រះអង្គារមិនមែនសុទ្ធតែដូចគ្នាគ្រប់ពេលនោះទេ ដូច្នេះដំណាក់កាលដែលល្អបំផុតសម្រាប់ហោះពីផែនដីទៅកាន់ភពក្រហមនេះ គឺមានតែម្ដងគត់ក្នុងរយៈពេល26ខែ។ ចាប់ពីខែកក្កដាដល់ខែសីហាឆ្នាំនេះ គឹជាដំណាក់កាលល្អបំផុតដែលមិនអាចរំលងបាន។ យ៉ាងនេះហើយទើបសហរដ្ឋអាមេរិក ប្រទេសចិន និងអារ៉ាប់រួម សុទ្ធតែសម្រេចចិត្តបាញ់បង្ហោះយានអវកាសរបស់ខ្លួនទៅកាន់ផ្កាយព្រះអង្គារនៅក្នុងដំណាក់កាលនេះ។ ចំនួននិងកម្រិតនៃភាពស្មុគស្មាញរបស់បណ្ដាបេសកកម្ម បានបង្ហាញថា ពិភពព្រះអង្គារពិតជាមានសារសំខាន់ដ៏ធំធេងក្នុងការរុករកក្នុងទីអវកាសរបស់មនុស្សជាតិ។ នេះបើតាមការចេញផ្សាយកាលពីថ្ងៃទី6កក្កដារបស់សារព័ត៌មាន Futurism។

ទីភ្នាក់ងារអវកាសអាមេរិក (NASA) មានគម្រោងបញ្ជូនរ៉ូបូត Perseverance ទៅកាន់ឋានព្រះអង្គារនៅក្នុងដំណាក់កាលចាប់ពីថ្ងៃទី30កក្កដា ដល់ថ្ងៃទី15សីហាខាងមុខ។ Perseverance នឹងចុះចត់ត្រង់រណ្ដៅ Jezero ដែលមានទំហំ45គីឡូម៉ែត្រនៅថ្ងៃទី18កុម្ភៈ2021។ រ៉ូបូតនេះមានភារកិច្ចតាមរកដាននៃសភាវរស់នៅលើឋានព្រះអង្គារ ហើយប្រមូលយកសំណាកដី និងធ្វើការសិក្សាស្រាវជ្រាវមួយចំនួនផ្សេងទៀត។ រ៉ូបូតនេះក៏នឹងនាំយកឧទ្ធម្ភាគចក្រស្វ័យប្រវត្តិខ្នាតតូច Ingenuity ទៅជាមួយវាផងដែរ។ ឧទ្ធម្ភាគចក្រស្វ័យប្រវត្តិខ្នាតតូច Ingenuity នឹងក្លាយជាឧករណ៍ហោះហើរឡើងដំបូងគេបង្អស់នៅភពដទៃក្រៅពីផែនដី។

សហរដ្ឋអាមេរិកធ្លាប់បានបញ្ជូនយានទៅកាន់ពិភពព្រះអង្គារជាច្រើនលើកមកហើយ ក្នុងនោះ Mariner 4 គឺជាយានអវកាសដំបូងដែលបានធ្វើការហោះហើរទៅក្បែរពិភពក្រហមដោយជោគជ័យកាលពីឆ្នាំ1965។ ការបញ្ជូនយានទៅកាន់ភពព្រះអង្គារកន្លងមក រួមនឹងបេសកកម្មក្នុងឆ្នាំនេះ គឺជាការត្រៀមលក្ខណៈសម្រាប់បញ្ជូនមនុស្សឡើងទៅជាន់ដីផ្កាយព្រះអង្គារនាពេលខាងមុខ។ ក្រៅពី NASA ក៏មានក្រុមហ៊ុនឯកជនមួយកំពុងប្រឹងប្រែងដើម្បីសម្រេចគោលដៅខាងលើនេះដែរ នោះគឺក្រុមហ៊ុន SpaceX របស់ជនជាតិអាមេរិកាំងដើមកំណើតអាហ្វ្រិក លោក Elon Musk។

ចំណែកប្រទេសចិនឯណោះវិញ ក៏មិនព្រមចាញ់អាមេរិកាំងនោះឡើយ។ តាមគម្រោង បេសកកម្មស្រាវជ្រាវពិភពព្រះអង្គាររបស់ប្រទេសចិន ដែលមានឈ្មោះថា Tianwen 1 នឹងចាប់ផ្ដើមចេញដំណើរក្នុងអំឡុងពេលចាប់ពីថ្ងៃទី20កក្កដាដល់ថ្ងៃទី25កក្កដា2020នេះ។ Tianwen 1 រួមមានយានអវកាសហោះនៅលើគន្លងគោចរដើម្បីស្រាវជ្រាវពិភពព្រះអង្គារពីចម្ងាយ រួមនឹងយានសម្រាប់ចុះចត1គ្រឿង និងរ៉ូបូតរុករក1គ្រឿង។ Tianwen 1 នឹងជួយដល់ក្រុមអ្នកវិទ្យាសាស្ត្រចិន ស្វែងយល់អំពីដី ភូមិសាស្ត្រ បរិស្ថាន និងបរិយាកាសរបស់ភពក្រហមនេះ។

ឆ្នាំ2011 ប្រទេសចិនបានបញ្ជូនយានអវកាស Yinghuo-1 ទៅសិក្សាស្រាវជ្រាវឋានព្រះអង្គារ ប៉ុន្តែមិនបានសម្រេច។ យ៉ាងនេះក្ដី ប្រទេសចិនក៏ទទួលបានជោគជ័យច្រើនក្នុងវិស័យវិទ្យាសាស្ត្រអវកាសនៅក្នុងរយៈពេលប៉ុន្មានឆ្នាំកន្លងទៅថ្មីៗនេះ ក្នុងនោះ ប្រទេសចិនបានក្លាយជាប្រទេសដំបូងគេដែលបានបញ្ជូនយានទៅចុះចតនៅលើតំបន់ងងឹតអចិន្ត្រៃយ៍របស់ឋានព្រះចន្ទផងដែរ។

នៅអាស៊ីខាងលិចវិញ ក្នុងថ្ងៃទី14កក្កដាខាងមុខ ប្រទេសអារ៉ាប់រួម (UAE) នឹងបញ្ជូនយានអវកាសខ្នាតតូច Hope ទៅកាន់ពិភពព្រះអង្គារ។ Hope នឹងមិនចុះចតលើភពក្រហមនេះទេ ដោយវានឹងហោះជុំវិញឋានព្រះអង្គារ និងចំណាយពេលយ៉ាងតិច2ឆ្នាំ ដើម្បីសិក្សាស្រាវជ្រាវអំពីបរិយាកាសនៃស្រទាប់អូហ្សូន។

សម្រាប់អារ៉ាប់រួម Hope គឺជាបេសកកម្មស្រាវជ្រាវភពព្រះអង្គារដំបូងបំផុត។ នេះគឺជាផ្នែកមួយនឹងគោលដៅអភិវឌ្ឍវិស័យបច្ចេកវិទ្យាជាន់ខ្ពស់ ដូចជាបច្ចេកវិទ្យាអវកាសជាដើម។

រាល់ទិន្នន័យដែលប្រមូលបានពីបេសកកម្មទាំង3ខាងលើនេះ នឹងរួមចំណែកបង្កើតបានជាទិដ្ឋភាពទាំងមូល និងលម្អិតស្ដីអំពីពិភពព្រះអង្គារ។

ផ្កាយ ពិភព ឬឋានព្រះអង្គារនេះ មានរយៈចម្ងាយពីផែនដីមិនដូចគ្នានោះទេនៅក្នុងអំឡុងពេលខុសៗគ្នា។ ចម្ងាយជាមធ្យមពីផែនដីទៅឋានព្រះអង្គារគឺប្រមាណជា 225លានគីឡូម៉ែត្រ ខណៈចម្ងាយឆ្ងាយបំផុតស្មើ401លានគីឡូម៉ែត្រ ចំណែកចម្ងាយជិតបំផុតគឺប្រមាណជា 54.6លានគីឡូម៉ែត្រ។

ក្រុមអ្នកវិទ្យាសាស្ត្រមួយចំនួនធំ មានបំណងកែប្រែពិភពព្រះអង្គារឱ្យទៅជាទីឋានដែលអាចឱ្យមនុស្សរស់នៅបាននាអនាគតវែងឆ្ងាយខាងមុខ៕

ប្រភព៖ Futurism

July 7, 2020

តម្លៃទុននៃក្រុមហ៊ុនបច្ចេកវិទ្យាអាមារិកចំនួន4 កើនលើស1លានលានដុល្លារព្រមៗគ្នា

ជាលើកដំបូងហើយរាប់ចាប់ពី COVID-19 បានបង្ហាញខ្លួន តម្លៃទុនរបស់ក្រុមហ៊ុន Apple, Microsoft, Amazon និង Alphabet បានកើនលើសពី1លានលានដុល្លារអាមេរិក។

Alphabet ដែលជាក្រុមហ៊ុនមេរបស់ Google គឺជាឈ្មោះថ្មីដែលទើបតែបានក្លាយជាក្រុមហ៊ុនដែលមានតម្លៃទុនលានលានដុល្លារសាជាថ្មីម្ដងទៀត នៅពេលបិទការជួញដូរមូលបត្រកាលពីថ្ងៃទី6កក្កដា ជាមួយនឹងទុនសរុបឡើងដល់ 1.02លានលានដុល្លារអាមេរិក។ ចំណែក Apple ត្រូវបានកំណត់តម្លៃ 1.64លានលានដុល្លារ ខណៈ Microsoft មានតម្លៃទុនសរុប 1.61លានលានដុល្លារ និង Amazon បញ្ចប់ការជួញដូរក្នុងថ្ងៃដដែលជាមួយនឹងតម្លៃទុន 1.52លានលានដុល្លារអាមេរិក។

មូលបត្រ Amazon កាលពីម្សិលមិញ (6កក្កដា) ក៏បានបង្កើតកំណត់ត្រាថ្មីនៅពេលដែលតម្លៃមូលបត្រនេះបានកើនដល់3,000ដុល្លារក្នុងមួយហ៊ុន។ មូលបត្រ Amazon ក៏ជាកម្លាំងរុញច្រានដ៏ខ្លាំងក្លាសម្រាប់សន្ទស្សន៍ S&P 500 និង Nasdaq កាលពីម្សិលមិញ។

នេះគឺជាលើកដំបូងហើយដែលក្រុមហ៊ុនបច្ចេកវិទ្យាធំៗចំនួន4របស់សហរដ្ឋអាមេរិក មានតម្លៃទុនឡើងដល់លានលានដុល្លារព្រមៗគ្នាបែបនេះរាប់ចាប់ពីចុងខែមករា2020 មុនពេលដែល COVID-19 វាយលុកពិភពលោក។ ប្រការនេះបានបង្ហាញអំពីក្ដីសង្ឃឹមរបស់វិស័យបច្ចេកវិទ្យានៅក្នុងស្ថានភាពមានអាសន្នរោគ វិបត្តិសេដ្ឋកិច្ច និងវិបត្តិគ្មានការងារធ្វើ ដែលរាលដាលនៅពាសពេញពិភពលោក។

តម្លៃមូលបត្រក្នុងវិស័យបច្ចេកវិទ្យា បានអូសទាញកំណើនសេដ្ឋកិច្ចដ៏គួរឱ្យចាប់អារម្មណ៍នៅក្នុងទីផ្សារនាបច្ចុប្បន្ន ក្រោយពីបានធ្លាក់ដល់បាតកាលពីខែមីនាកន្លងទៅ។ ក្រុមអ្នកវិនិយោគកំពុងតែមានក្ដីសង្ឃឹមខ្ពស់ទៅលើកំណើននៃចំណូល និងចំណេញដែលមានកម្រិតខ្ពស់របស់វិស័យបច្ចេកវិទ្យានេះ បើទោះជាសេដ្ឋកិច្ចសហរដ្ឋអាមេរិកនៅតែដំណើរការយ៉ាងត្រដាបត្រដួសដោយសារCOVID-19។

ចំណែកតម្លៃមូលបត្ររបស់បណ្ដាក្រុមហ៊ុនបច្ចេកវិទ្យាជាច្រើនផ្សេងទៀត ដូចជា ក្រុមហ៊ុន Netflix, Tesla, Square, PayPal, Nvidia និង Adobe ជាដើម ក៏សុទ្ធតែបង្កើតបានកំណត់ត្រាថ្មីកាលពីម្សិលមិញ។ ប្រភេទមូលបត្រដែលទទួលបានប្រយោជន៍ច្រើនពីបម្រាមគោចរ ដូចជា Zoom Video, Peloton, Lowe’s, Clorox និង Teladoc ក៏បានឡើងថ្លៃកាលពីថ្ងៃទី6កក្កដាផងដែរ។

ជារួម ផ្សារមូលបត្រនៅសហរដ្ឋអាមេរិកកាលពីម្សិលមិញ បានកើនតម្លៃខ្ពស់គួរឱ្យត្រេកអរ។ សន្ទស្សន៍ DJIA កើន 1.78% ខណៈ S&P 500 និង Nasdaq Composite កើន 1.6% និង 2.2%។ Nasdaq បង្កើតកំណត់ត្រាថ្មីជាមួយនឹង 10,433ពិន្ទុ រីឯ S&P 50 បានកើនជាង 40% រាប់ចាប់ពីខែមីនា2020៕

ប្រភព៖ CNN, CNBC

July 7, 2020

លោកប្រធានាធិបតី ដូណាល់ ត្រាំ ស្ថិតក្នុងស្ថានភាព ស្ដារលែងឡើង…

លោក ដូណាល់ ត្រាំ មេដឹកនាំសេតវិមានដ៏មហាសែនក្លៀវក្លា កំពុងត្រូវបានវាយតម្លៃដោយអ្នកវិភាគថា កំពុងស្ថិតក្នុងស្ថានភាពអស់ក្បាច់ហក់…ឱកាសក្នុងការឈ្នះការបោះឆ្នោតជ្រើសតាំង ក្លាយជាប្រធានាធិបតីអាណត្តិទី2 មើលទៅកាន់តែស្រពេចស្រពិលខ្លាំងឡើងជារៀងរាល់ថ្ងៃ…ការនិយាយស្ដី ថ្លែងការប្រាស្រ័យនៅចំពោះមុខប្រជាជន មិនរញ្ជួយចិត្ត មិនដាច់ខាត និងមិនគួរឱ្យជឿជាក់ ដូចកាលពីអាណត្តិមុនឡើយ។

ទោះជាចង់ប្រើកាយវិការបែបណា ក៏មិនជំពប់ភ្នែក ឬត្រូវចិត្តអ្នកស្ដាប់ដែរ…រឹតតែជិតដល់ថ្ងៃបោះឆ្នោតជ្រើសតាំងផង ជនអាមេរិកាំងដែលធ្លាប់និយមពេញចិត្តលោកត្រាំ បានចាប់ផ្ដើមមើលឃើញថា លោកត្រាំ ជាមេដឹកនាំដែលមានបញ្ហាច្រើនណាស់ ទាំងផ្នែកការគិត នយោបាយ ទង្វើ និងតួនាទីផ្សេងៗ ក្នុងឋានៈជាអ្នកដឹកនាំប្រទេសមហាអំណាចលំដាប់លេខ1 របស់ពិភពលោក។

រឹតតែជាបញ្ហាដ៏ធ្ងន់មួយទៀត នៅពេលដែលមិត្តជិតស្និទ្ធ មិត្តយូរអង្វែង ដូចជាក្រុមប្រទេសអឺរ៉ុប ចាប់ផ្ដើមបែរខ្លួនចេញឆ្ងាយ និងមើលឃើញហើយថា លោកត្រាំ ដូចជាមិនមែនជាមិត្តភក្តិដែលគួរឱ្យសេពគប់ ទុកចិត្តមិនបាន និងថែមទាំងមិនអាចពឹងពាក់បានទៀតផង ហើយថែមទាំងសម្លឹងមើលមកពួកមិត្តភក្តិមេដឹកនាំប្រទេសក្នុងសហគមន៍អឺរ៉ុប ប្រៀបដូចជាកូនចៅ តួរង ឬខ្ញុំកញ្ជះទៀតផង។

ការបង្ហាញខ្លួនក្នុងអំឡុងពិធីជប់លៀងនៅថ្ងៃបុណ្យជាតិសហរដ្ឋអាមេរិក 4កក្កដា លោកត្រាំមិនបានបង្ហាញឱ្យប្រជាជនអាមេរិកាំង ជឿជាក់លើគុណភាពនៃការធ្វើជាមេដឹកនាំទាល់តែសោះ…ព្រោះជំនួសឱ្យការដែលត្រូវនិយាយឱ្យជនអាមេរិកាំង មានក្ដីសង្ឃឹមនាពេលអនាគត កណ្ដាលវិបត្តិធ្ងន់ធ្ងរផ្នែកសេដ្ឋកិច្ច នយោបាយ សង្គមនោះ លោកត្រាំមិនធ្វើ…តែបែរជាទៅនិយាយបំផុសបំផុលជនអាមេរិកាំង ឱ្យមើលឃើញពីគ្រោះភ័យដ៏កាចសាហាវរបស់ក្រុមឆ្វេងនិយម ក្រុមប្រឆាំងហ្វាស់ស៊ីស ក្រុមក្បាលរឹងផ្សេងៗទៀត ដែលចេញមកពីផលប៉ះពាល់របស់ការទាមទារតវ៉ាប្រឆាំងនឹងទង្វើរបស់ជនស្បែកស ដែលនៅមានគំនិតបង្កប់នៅក្នុងខួរក្បាល រឿងការរើសអើងជាតិសាសន៍ពណ៌សម្បុរ រហូតក្លាយជាវិបត្តិរបស់ប្រទេសជាតិនាពេលបច្ចុប្បន្នទៅវិញ។

ក្នុងសភាវប្រក្រតី ជនអាមេរិកាំងមានការបែកបាក់ខាងគំនិត រឿងនយោបាយពណ៌សម្បុរស្រាប់ទៅហើយ គ្រាន់តែរង់ចាំការផ្ទុះឡើងប៉ុណ្ណោះ ជួនកាល ការថ្លែងរបស់លោកត្រាំ ក្នុងអំឡុង 2-3ថ្ងៃ មុនថ្ងៃឈប់សម្រាកវែងកន្លងមកនេះ គ្រាន់តែជាការចាប់ផ្ដើមទេ តែវាត្រូវបានសំពងបន្ថែមឱ្យទំនាស់រឿងពណ៌សម្បុរនោះ រឹតតែបើកធំឡើងជាងអ្វីដែលកំពុងមាន ក្នុងខណៈពេលនេះ។

លោកត្រាំ និយាយរឿងការបង្កភេរវកម្ម អាងថា ក្រុមមនុស្សជំនាន់ថ្មី រង់ចាំតែបំផ្លាញប្រវត្តិសាស្ត្រ ពិធីសាសនា វប្បធម៌ ជាក្រុមឆ្វេងជ្រុល ជាក្រុមអ្នកត្រូវការកសាងសង្គមថ្មី ក្រុមនិយមអនាធិបតេយ្យ ក្រុមនិយមការរឹងរូស…អាងថា ក្រុមស្បែកខ្មៅចង់តែបំផ្លាញ និងចង់ផ្លាស់ប្ដូរប្រវត្តិសាស្ត្រ។

ការថ្លែងប្រាស្រ័យ សំឡេងវ៉េវវ៉ាវនៅក្នុងសួនច្បារផ្កាកុលាបខាងក្រោយមន្ទីរសេតវិមាន ដែលនិយាយអំពីរឿងប្រវត្តិសាស្ត្រនោះ អ្នកវិភាគមើលឃើញថា លោកត្រាំកំពុងស្ថិតក្នុងគំនិតតែលតោល មិនតភ្ជាប់នឹងសភាពការណ៍ពិតនាពេលបច្ចុប្បន្ន ព្យាយាមដាស់ខ្មោចស្នេហាជាតិ លើកតម្កើងវប្បធម៌របស់ជនជាតិអាមេរិក និងថែមទាំងធ្វើឱ្យគេឯងមើលឃើញទៀតថា លោកកំពុងស្ថិតក្នុងសភាព “ស្រមើស្រមៃ” វង្វេងវង្វាន់ ដូចការវិភាគនៅក្នុងអត្ថបទមួយរបស់សារព័ត៌មាន របស់ជនល្បីឈ្មោះ ខាល ប៊ើនស្ទីន ដែលបានគាស់កកាយលើករឿង វ៉តធើរ ហ្គេត មកនិយាយក្នុងយុគសម័យលោកប្រធានាធិបតី រីឆាដ និកសុន ដែលត្រូវលាឈប់ពីតំណែងយ៉ាងអាម៉ាស់។

នៅពេលប្រៀបធៀបជាមួយមេដឹកនាំប្រទេសមហាអំណាច 2ទៀត ដែលជាគូសងសឹករបស់លោកត្រាំ គឺលោក វ៉្លាឌីមៀរ ពូទីន មេដឹកនាំប្រទេសរុស្ស៊ី ក៏រឹតតែខុសគ្នាឆ្ងាយទៅទៀត…កម្រិតខុសគ្នាឆ្ងាយណាស់! ព្រោះលោកពូទីន បានឈ្នះការធ្វើប្រជានិយមឱ្យកែច្បាប់ ដោយកែសម្រួលឱ្យលោកពូទីន នៅធ្វើជាមេដឹកនាំប្រទេសរុស្ស៊ីបាន 2អាណត្តិទៀត រហូតដល់អាយុ 83ឆ្នាំ។

នឹងនៅបានឬអត់? វាអាស្រ័យលើលទ្ធផលការបោះឆ្នោតជ្រើសតាំងក្នុង 2អាណត្តិដែលកន្លងមក ហើយនឹងនៅបានឬអត់? អាស្រ័យលើគ្រូពេទ្យ ដែលនឹងត្រូវពិនិត្យរាងកាយលោកពូទីនថា នៅតែមាំមួនល្អ ព្រោះត្រូវឆ្លងកាត់ការបោះឆ្នោត បើប្រជាជនរុស្ស៊ី មិនជ្រើសយក ក៏មានន័យថា លោកពូទីន មានឱកាស តែធ្វើតទៅទៀតមិនបាន…។

តពីពេលនេះទៅ គឺ 16ឆ្នាំទៀត តើលោកត្រាំនឹងទៅជាអ្វី? ទៅនៅទីណាបាត់ហើយក៏មិនដឹង? បើនៅរស់ ក៏ស្ថិតក្នុងវ័យជាង 90ឆ្នាំ និងនៅក្នុងគុក ឬក្រៅគុក? ក៏នៅតែជាប្រធានបទឱ្យយើងសន្និដ្ឋានទៅ ព្រោះធ្លាប់ទៅលូកលាន់ពាក់ព័ន្ធនឹងកិច្ចការ ដែលត្រូវបានគេមើលឃើញថា មានផលប្រយោជន៍ ដែលមានទាំងដោយផ្ទាល់ និងមិនស្មុគស្មាញទៀតផង។

ហើយអ្នកជំនាញខាងវិភាគ លោក ខាល ប៊ើនស្ទីន មើលឃើញថា លោកត្រាំនៅស្ទើរភ្លើងណាស់ ពេលចរចានយោបាយជាមួយរុស្ស៊ី ដោយលោកពូទីនបានប្រើក្បាច់ជន្លផង មែនផងក្នុងការជជែកតវ៉ា ធ្វើឱ្យលោកត្រាំទៅលែងរួច ព្រោះខ្លួនឯងគិតតែពីនិយាយអួតអាងថា ជាមេដឹកនាំប្រទេសដែលមានសមត្ថភាព អច្ឆរិយៈ ស្ថិតស្ថេរ…ហើយប្រធានាធិបតីមុនៗ សុទ្ធតែប្រើការមិនកើតទាំងអស់!។

អ៊ីចឹងសួរថា បើលោកពូទីន នៅតទៅទៀតបានយូរ ឯលោកត្រាំ នៅបានតែ 1អាណត្តិ តើសហរដ្ឋអាមេរិក នឹងទៅជាយ៉ាងណា?

រឹតបើប្រៀបធៀបជាមួយលោកប្រធានាធិបតីនៃប្រទេសចិន ស៊ី ជីនភីង ដែលនឹងនៅបានយូរទៅទៀត ឬរហូតដល់ស្លាប់ផងនោះ រឹតតែធ្វើឱ្យលោកត្រាំមិនអាចប្រៀបធៀបបានទៅទៀត ហើយម្យ៉ាងទៀតមេដឹកនាំចិន និងរុស្ស៊ី មានសម្ព័ន្ធភាពដ៏ល្អនឹងគ្នាទៀតផង។ វាជាភាពខុសគ្នាយ៉ាងខ្លាំងផ្នែកប្រព័ន្ធនយោបាយ ទោះជាប្រទេសមហាអំណាចដូចគ្នាក៏ដោយ…។

ស្ថានភាពរបស់លោកត្រាំ មើលទៅទន់ជ្រាយ នៅពេលសហរដ្ឋអាមេរិក ក្លាយជាប្រភពធំរបស់ការឆ្លងរាលដាលមេរោគកូវីដ-19 ដែលធ្វើឱ្យជនអាមេរិកាំងឆ្លងមេរោគដល់ទៅជិត 3លាននាក់ និងស្លាប់ជិត 1.4សែននាក់ និងពេលនេះកំពុងឆ្លងយ៉ាងធ្ងន់ធ្ងរ ស្ទើរតែរកមើលវិធីទប់ស្កាត់មិនបានទៀតផង។ ទាំងអស់នេះ គឺលោកត្រាំមានចំណែកធ្វើឱ្យក្លាយទៅជាដូច្នោះ។

ការបណ្ដែតបណ្ដោយ ធ្វើព្រងើយចំពោះការណែនាំរបស់អ្នកជំនាញការ ភាពបែកបាក់ខាងគំនិតនយោបាយ ធ្វើឱ្យខ្វះភាពជាធ្លុងមួយផ្នែកនយោបាយ និងវិធានការការពារព្យាបាល ហើយថែមទាំងនៅមានវិបត្តិផ្នែករើសអើងជាតិសាសន៍ពណ៌សម្បុរ ជាបញ្ហាដែលលោកត្រាំធ្វើឱ្យរីកធំ និងសាងភាពបែកបាក់ក្នុងសង្គមទៀតផង។

និយាយប្រាស្រ័យរកសំឡេងឆ្នោត ក៏គិតតែសង្កត់ធ្ងន់លើការសាងភាពរ៉ៅឆាន ក្នុងក្រុមជនអាមេរិកាំង…។

លោកត្រាំ មើលទៅរាងឆ្លេឆ្លា មិនដឹងថា ត្រូវយកពីណា ទៅតនៅត្រង់ណា នៅពេលដែលជនស្បែកខ្មៅ នាំគ្នាបំផ្លាញស្ដូបអនុស្សាវរីយ៍ជនល្បីឈ្មោះសំខាន់ៗក្នុងប្រវត្តិសាស្ត្រ។ ចាប់ផ្ដើមពីរូបសំណាកលោក គ្រីស្ដូហ្វើរ ខូឡាំបាស់ អ្នកប្រមាញ់អាណានិគម ដែលរកឃើញប្រទេសអាមេរិក និងជាអតីតប្រធានាធិបតីសហរដ្ឋអាមេរិក ដែលមានឥរិយាបថក្នុងការធ្វើជំនួញទាសករ សាងសង្គ្រាមក្នុងស្រុក ធ្វើឱ្យរឿងរ៉ាវកាន់តែធំទៅ។

លោកត្រាំក៏គិតតែពីឆ្លៀតឱកាសវាយសំពងបន្ថែម សាងអារម្មណ៍បែកបាក់កាន់តែខ្លាំងចូលទៅទៀត។ ប្រជាជនអាមេរិកាំងមួយចំនួន មើលឃើញថា លោកត្រាំ នឹងធ្វើឱ្យប្រទេសមានបញ្ហារយៈពេលយូរ និងជាមេដឹកនាំដែលមានគ្រោះថ្នាក់ចំពោះសន្តិសុខជាតិ ដូចដែលអ្នកវិភាគ និងអ្នកធ្លាប់រួមការងារជាមួយលោកត្រាំកាលពីមុន ធ្លាប់បាននិយាយទុកពីមុនមកហើយ។

ក្នុងសភាវបែបនេះ សហរដ្ឋអាមេរិកកំពុងត្រូវក្រុមសម្ព័ន្ធមិត្តក្នុងអឺរ៉ុប មិនចង់ជិតស្និទ្ធជាមួយឡើយ ព្រោះវាមិនកើតប្រយោជន៍អ្វី ទើបពួកគេបែរទៅសេពគប់ជាមួយរុស្ស៊ី និងចិន ដែលមានផលល្អប្រសើរជាង ខាងផ្នែកពាណិជ្ជកម្ម នយោបាយ…លោកត្រាំ មិនអាចបន្ទោសនរណាបានទេ ក្រៅពីខ្លួនឯង ព្រោះធ្លាប់ទៅមើលងាយប្រជាជនអឺរ៉ុប តាំងពីពេលខ្លួនឯងឡើងធ្វើជាអ្នកដឹកនាំ។

ខែវិច្ឆិកា ជាវារៈសំខាន់ ដែលជនអាមេរិកាំង នឹងធ្វើការសម្រេចចិត្តថា តើនឹងជ្រើសយកលោកត្រាំ ធ្វើជាមេដឹកនាំ 1អាណត្តិទៀត ឬយ៉ាងណា? និងតើ ជនមហាកំពូលអហង្ការរូបនេះ នៅមានវិធីណាស្ដារភាពធ្លាក់ចុះ ដើម្បីយកឈ្នះចិត្តជនអាមេរិកាំងបានទេ?

ប្រភព៖ សាព័ត៌មានបរទេស
ប្រែសម្រួលដោយ តាវ៉ែនតា

July 7, 2020

ស្ថានភាពCOVID-19នៅសហរដ្ឋអាមេរិកនិងប្រទេសមួយចំនួនពិតជាធ្ងន់ធ្ងរណាស់ ខណៈពិភពលោកទាំងមូលមានជាង11.7លាននាក់បានឆ្លងវីរុស

ពិភពលោកទាំងមូល បានរកឃើញអ្នកផ្ទុកវីរុសCOVID-19 សរុបចំនួន11,710,170នាក់ និងអ្នកស្លាប់សរុបចំនួន539,720នាក់ ក្នុងនោះមានអ្នកជំងឺថ្មីចំនួន172,717នាក់ និងអ្នកស្លាប់ថ្មីចំនួន3,396នាក់ ក្នុងពេលដែលស្ថានភាពវិបត្តិសុខភាពនៅសហរដ្ឋអាមេរិកនិងប្រទេសមួយចំនួន កាន់តែធ្ងន់ធ្ងរឡើងៗ។

យោងតាមតួលេខរបស់ Worldometers ក្នុងរយៈពេល24ម៉ោងចុងក្រោយនេះ សហរដ្ឋអាមេរិកបានរកឃើញអ្នកផ្ទុកវីរុសCOVID-19 ចំនួន41,500នាក់ ដែលនេះបាននាំឱ្យតួលេខអ្នកជំងឺសរុបកើនឡើងដល់ជាង3លាននាក់ ខណៈដែលអ្នកស្លាប់សរុបក៏កើនដល់ជិត133,000នាក់។

Channel News Asia បានរាយការណ៍ថា នៅក្នុងកិច្ចសម្ភាសកាលពីថ្ងៃទី6កក្កដាកន្លងទៅជាមួយបណ្ឌិត Anthony Fauci ដែលជាអ្នកជំនាញផ្នែករោគឆ្លងនៅសហរដ្ឋអាមេរិក និងជាសមាជិកនៃគណៈកម្មធិការប្រយុទ្ធប្រឆាំងនឹងCOVID-19 របស់រដ្ឋាភិបាលអាមេរិក បានព្រមានថា មហារោគរាតត្បាតនៅសហរដ្ឋអាមេរិក “ពិតជាធ្ងន់ធ្ងរណាស់” និង “ត្រូវការដោះស្រាយជាបន្ទាន់”។

ចំនួនអ្នកឆ្លងវីរុស មាននិន្នការកើនឡើងយ៉ាងឆាប់រហ័សនៅក្នុងរដ្ឋជាច្រើននាពេលថ្មីៗនេះ នៅពេលដែលតំបន់មួយចំនួនបានចាប់ផ្ដើមដំណើរការសេដ្ឋកិច្ចឡើងវិញ។ ចំណែកពលរដ្ឋអាមេរិកាំងនៅតែបន្តនាំគ្នាទៅកាន់ឆ្នេរសមុទ្រក្នុងពេលអាកាសធាតុក្ដៅ ដោយមិនយកចិត្តទុកដាក់ដល់ការព្រមានពីក្រុមអ្នកជំនាញផ្នែកសុខាភិបាល។

ពលរដ្ឋអាមេរិកាំងហាក់មិនបានចាប់អារម្មណ៍ចំពោះការព្រមានពីក្រុមអ្នកជំនាញផ្នែកសុខាភិបាល នៅពេលពួកគេហ៊ាននាំគ្នាទៅកាន់ឆ្នេរសមុទ្រ

លោក Rochelle Walensky ប្រធានផ្នែករោគឆ្លងនៅមន្ទីរពេទ្យ Massachusetts ថ្លែងថា “មហារោគរាតត្បាតនេះ មិនទាន់ថមថយកម្លាំងនៅឡើយ។

រីឯលោក Peter Hotez ប្រធានផ្នែកម្នាក់នៅសាកលវិទ្យាល័យវេជ្ជសាស្ត្រ Baylor នៅទីក្រុង Bouston ក៏បានសង្កត់ធ្ងន់ថា “យើងមានកំណត់ត្រាថ្មី (ស្ដីអំពីចំនួនអ្នកឆ្លងCOVID-19) ស្ទើរតែរាល់ថ្ងៃនៅក្នុងរដ្ឋ Texas។ ស្ថានភាពនេះកំពុងកើតឡើងនៅក្នុងរដ្ឋផ្សេងៗផងដែរនៃប្រទេសនេះផងដែរ។

ការព្រមានខាងលើ រួមនឹងការព្រមានជាច្រើនផ្សេងទៀត គឺផ្ទុយទាំងស្រុងទៅនឹងការអះអាងប្រកបដោយទំនុកចិត្តជ្រុលហួសរបស់ប្រធានាធិបតី Donald Drump និងក្រុមមន្ត្រីរបស់លោក។ កាលពីសប្ដាហ៍មុន ប្រធានាធិបតីសហរដ្ឋអាមេរិកថ្លែងថា “យុទ្ធសាស្ត្រទប់ទល់នឹង COVID-19 របស់សហរដ្ឋអាមេរិក កំពុងដើរលើផ្លូវត្រូវ”។

ម្ចាស់សេតវិមាននេះអះអាងថា “យើងបានធ្វើតេស្តជិត40លាននាក់។ តាមរយៈនេះ បានបង្ហាញថា 99% នៃអ្នកជំងឺ គឺមិនមានគ្រោះថ្នាក់ទេ។ ពុំមានប្រទេសណាមួយដែលមានលទ្ធផលបែបនេះឡើយ ព្រោះពួកគេមិនអាចធ្វើតេស្តដូចយើង ទាំងបរិមាណ និងគុណភាព”។

ស្ថានភាព COVID-19 នៅឥណ្ឌាក៏មានសភាពធ្ងន់ធ្ងរជាងមុន

ក្រៅពីសហរដ្ឋអាមេរិក ក៏មានប្រទេសជាច្រើនកំពុងជួបនឹងបញ្ហាកើនឡើងជាលើកទីពីរនៃតួលេខអ្នកជំងឺCOVID-19នេះដែរ។ ប្រទេសប្រេស៊ីលគឺជាសម្បុកមេរោគធំជាងគេទីពីរក្នុងពិភពលោក ដោយមានអ្នកជំងឺសរុប1,623,284នាក់ និងអ្នកស្លាប់ចំនួន65,487នាក់ ក្នុងនោះមានអ្នកជំងឺថ្មី18,669នាក់ និងអ្នកស្លាប់ថ្មីចំនួន587នាក់។ ចំណែកឥណ្ឌាដែលទើបតែបានក្លាយជាសម្បុកមេរោគCOVID-19ធំជាងគេលំដាប់ទី3ក្នុងពិភពលោក បានរកឃើញអ្នកជំងឺសរុបចំនួន720,346នាក់ និងអ្នកស្លាប់សរុបចំនួន20,174នាក់៕

ប្រភព៖ សារព័ត៌មានបរទេស

July 7, 2020

Author: សឿន សំណាង