Author: សឿន សំណាង

NASA ផលិតយានអវកាសទៅស្រាវជ្រាវអាចម៍ផ្កាយដែលមានផ្ទុកលោហធាតុតម្លៃ1,000កោដិដុល្លារអាមេរិក
ទីភ្នាក់ងារអវកាសអេមរិក (NASA) បានទទួលជោគជ័យក្នុងការរចនា ហើយឈានដល់ដំណាក់កាលផលិតយានអវកាសដើម្បីហោះទៅកាន់អាចម៍ផ្កាយដែលសម្បូរទៅដោយលោហធាតុដ៏កម្រ ដែលមានឈ្មោះថា Psyche 16។
យានអវកាសនេះនឹងត្រូវបានបញ្ជូនទៅកាន់គោលដៅដោយប្រើកាំជ្រួចរុញច្រាន Falcon Heavy របស់ SpaceX នៅខែសីហា2022។ គម្រោងដែលមានតម្លៃទឹកប្រាក់117លានដុល្លារនេះ បានឈានដល់ដំណាក់កាលអនុម័តជ្រើសរើសរចនារូបរាងនៃយានអវកាសនេះ។ ប្រការនេះមានន័យថា ក្រុមវិស្វករអាចចាប់ផ្ដើមផលិតយានអវកាសនេះបានហើយ។
ក្រោយពីត្រូវបានបាញ់បង្ហោះ យានរុករក Spyche 16 នឹងហោះឆ្លងកាត់ពិភពព្រះអង្គារ ទៅកាន់ខ្សែក្រវាត់អាចម៍ផ្កាយដែលនៅចន្លោះពិភពព្រះអង្គារនិងពិភពព្រហស្បតិ៍។ យានអវកាសនេះនឹងប្រើប្រាស់ឧបករណ៍វាស់ដែនម៉ាញេទិចរបស់អាចម៍ផ្កាយ និងកាមេរ៉ាពហុវិសាល (Multispectral cameras) ដើម្បីថតផ្ទៃខាងលើរបស់អាចម៍ផ្កាយនេះ។ គម្រោងនេះក៏នឹងប្រមូលយកទិន្នន័យអំពីធាតុផ្សំនិងស្ថានភាពភូមិសាស្ត្ររបស់ Psyche 16 នេះផងដែរ។
Psyche 16 ត្រូវបានរកឃើញជាលើកដំបូងកាលពីឆ្នាំ1852។ ក្រុមអ្នកវិទ្យាសាស្ត្រយល់ថា នេះគឺជាសំណល់នៃភពមួយដែលត្រូវបានកម្ទេចដោយការប៉ះទង្គិចក្នុងគ្រាដែលប្រព័ន្ធព្រះអាទិត្យកំពុងកកើត។ អាចម៍ផ្កាយនេះមានទទឹង225គីឡូម៉ែត្រ។ អ្នកវិទ្យាសាស្ត្របានគណនាឃើញថា គ្រាន់តែបរិមាណធាតុដែករបស់អាចម៍ផ្កាយនេះ មានតម្លៃដល់ទៅ1,000កោដិ (10.000 quadrillion/10,000,000,000,000,000,000) ដុល្លារអាមេរិកឯណោះ។ Psyche 16 ក៏មានផ្ទុកលោហធាតុកម្រផ្សេងទៀតជាច្រើនផងដែរ រួមមានមាស ប្រាក់ និងសំរឹទ្ធជាដើម។
គោលដៅចម្បងនៃគម្រោង Psyche គឺការសិក្សាលើអាចម៍ផ្កាយនេះដើម្បីស្វែងយល់អំពីដំណើរការនៃការកកើតពិភពផែនដី។ NASA បានឱ្យដឹងថា “ដោយសារតែយើងមិនអាចពិនិត្យមើល ឬវាស់វែងស្នូលផែនដីដោយផ្ទាល់ ដូច្នេះ Psyche នឹងផ្ដល់ការយល់ដឹងអំពីប្រវត្តិនៃការប៉ះទង្គិចដ៏ខ្លាំងក្លាដែលបង្កើតឱ្យមានអាចម៍ផ្កាយថ្ម”។
ការដំឡើងនិងសាកល្បងយានអវកាសខាងលើនេះនឹងចាប់ផ្ដើមពីខែកុម្ភៈ2021។ ឧបករណ៍ទាំងឡាយនឹងត្រូវបានបញ្ជូនទៅកាន់បន្ទប់គ្មានមេរោគនៃមន្ទីរពិសោធន៍ Jet Propulsion Laboratory (JPL) នាខែមេសា2021។ ផ្នែកចម្បងរបស់យានអវកាសដែលគេហៅថា Solar Electric Propulsion (SEP) Chassis កំពុងត្រូវបានផលិតនៅក្នុងក្រុងហ៊ុន Maxar Technologies នៅទីក្រុង Palo Alto រដ្ឋ California សហរដ្ឋអាមេរិក។ តាមផែនការ យានអវកាសនេះនឹងហោះចេញពីផែនដីក្នុងខែសីហា2022 ហើយប្រើប្រាស់ដែនទំនាញរបស់ផ្កាយព្រះអង្គារនៅក្នុងខែឧសភា2023 ដើម្បីហោះឆ្ពោះទៅដល់អាចម៍ផ្កាយ Psyche 16 នៅដើមឆ្នាំ2026៕
ប្រភព៖ Sci Tech Daily
July 13, 2020
មហាសេដ្ឋីចិនដែលជាអ្នកផលិតថ្មផ្ទុកថាមពលអគ្គិសនី ចាប់ផ្ដើមក្ដោបក្ដាប់អនាគត Tesla នៅប្រទេសចិន
Tesla ត្រូវតែជោគជ័យនៅប្រទេសចិនដើម្បីគ្រប់គ្រងទីផ្សាររថយន្តអគ្គិសនី ដែលនេះបាននាំឱ្យលោក Elon Musk ស្វែងរកលោក Zeng Yuqun ជាបុរសដែលធ្លាប់ជួយឱ្យ Apple អាចបង្កើនអាយុកាលរបស់ថ្មសម្រាប់ MacBook។
Zeng Yuqun ឆ្នាំនេះមានអាយុ52ឆ្នាំ។ លោក Zeng បានប្រែក្លាយ Contemporary Amperex Technology Co. Ltd (CATL) ឱ្យទៅជាក្រុមហ៊ុនផលិតថ្មផ្ទុកថាមពលអគ្គិសនីលំដាប់ជួរមុខនៅប្រទេសចិន ដោយប្រើពេលមិនដល់1ទសវត្សរ៍។ បច្ចុប្បន្ន CATL គឺជាក្រុមហ៊ុនផលិតថ្មផ្ទុកថាមពលធំជាងគេក្នុងពិភពលោកសម្រាប់ប្រភេទរថយន្តដែលត្រូវបានគេចាត់ទុកថាជាអនាគតរបស់វិស័យរថយន្ត (រថយន្តអគ្គិសនី)។ ប្រការនេះហើយបាននាំឱ្យលោក Zeng ដែលមានស្រុកកំណើតនៅជនបទ និងធ្លាប់ជាមន្ត្រីរដ្ឋការដែលទទួលបានប្រាក់ខែត្រឹម30ដុល្លារ/ខែ ក្លាយជាមហាសេដ្ឋីដែលមានទ្រព្យ17ពាន់លានដុល្លារអាមេរិក។ នេះបើតាមទស្សនាវដ្ដី Bloomberg។
ផលិតផលរបស់ CATL ត្រូវបានប្រើប្រាស់នៅលើរថយន្តស្ទើរតែទាំងអស់នៃបណ្ដាក្រុមហ៊ុនផលិតរថយន្តធំៗក្នុងពិភពលោក។ ចាប់ពីខែកក្កដានេះ CATL ចាប់ផ្ដើមផលិតថ្មផ្ទុកថាមពលសម្រាប់រថយន្តរបស់ Tesla ដែលផលិតនៅរោងចក្រក្នុងខេត្តសៀងហៃ ប្រទេសចិន។ កិច្ចសហការនេះពិតជាមានសក្កានុពលធំធេងខ្លាំងណាស់។ ពួកគេនឹងធ្វើការរួមផ្សំស៊េរីរថយន្តអគ្គិសនីដែលទទួលបានការប្រើប្រាស់ច្រើនបំផុត (Tesla Model 3) ជាមួយនឹងថ្មថាមពលតម្លៃទាបនៅក្នុងទីផ្សារដែលមានការប្រើប្រាស់រថយន្តអគ្គិសនីច្រើនជាង បើធៀបជាមួយនឹងសហរដ្ឋអាមេរិកកាលពីឆ្នាំទៅ(2019)។
លោក Zheng និងលោក Musk បានពិភាក្សាគ្នាអំពីការរីកចម្រើននៃបច្ចេកវិទ្យា រួមនឹងដំណោះស្រាយដើម្បីឆ្លងកាត់ឧបសគ្គក្នុងវិបត្តិសុខភាពនាបច្ចុប្បន្ន និងការព្រួយបារម្ភរបស់ CEO នៃក្រុមហ៊ុន Tesla។ នោះគឺជារថយន្តអគ្គិសនី និងថ្មបញ្ចូលថាមពលអគ្គិនតម្លៃទាប។ លោក Zheng បានឱ្យដឹងថា “Elon និយាយអំពីការប្រើប្រាស់ថ្មឱ្យបានពេញមួយថ្ងៃ។ ហើយខ្ញុំបានប្រាប់គាត់ថា ខ្ញុំមានវិធី។ យើងស៊ីចង្វាក់គ្នាគ្រាន់បើ។ គាត់គឺជាមនុស្សមានចរឹតរីករាយ”។
លោក Zeng Yuqun អាយុ52ឆ្នាំជាCEO របស់ក្រុមហ៊ុន Contemporary Amperex Technology Co. Ltd (CATL)
បណ្ដាប្រភេទថ្មថាមពលរបស់ក្រុមហ៊ុន CATL អាចនាំមកនូវអត្ថប្រយោជន៍ដែលអាចសម្រេចបានជោគជ័យសម្រាប់ក្រុមហ៊ុន Tesla នៅប្រទេសចិន ពិសេសគឺសមត្ថភាពក្នុងការបង្កើនប្រាក់ចំណេញ និងបញ្ចុះតម្លៃរថយន្តនៅលើទីផ្សារចិនដែលត្រូវបានព្យាករថានឹងមានរថយន្តអគ្គិសនីចំនួន59គ្រឿងនៅឆ្នាំ2030។ សំខាន់បំផុតនោះគឺថា លោក Zeng អាចផ្គត់ផ្គង់ថ្ម LFP ដែលប្រើប្រាស់វត្ថុធាតុមានតម្លៃទាបជាង និងការចំណាយក្នុងការផលិតក៏ទាបជាងដល់ទៅ20% បើធៀបនឹងថ្មផ្ទុកថាមពលប្រភេទធម្មតា។
ធ្វើការជាមួយនឹងក្រុមហ៊ុនក្នុងស្រុក ដូចជា CATL គឺអាចជួយឱ្យ Tesla រឹតចំណងទាក់ទងជាមួយនឹងក្រុមមន្ត្រីចិន។ នេះក៏ជាចំណុចសំខាន់សម្រាប់ជោគជ័យរបស់ក្រុមហ៊ុន Tesla នៅក្នុងទីផ្សារមួយនេះផងដែរ។ លោក Zeng ក៏ជាសមាជិកម្នាក់នៃគណៈកម្មាធិការជាតិពិគ្រោះយោបល់នយោបាយប្រជាជនចិន (National Committee of the Chinese People’s Political Consultative Conference) ផងដែរ។ លោក Zeng កំពុងតែជំរុញឱ្យមានការស្នើដើម្បីផ្ដោតទៅលើថាមពលកកើតឡើងវិញទៀតផង។
សម្រាប់ CATL កិច្ចសហការនេះបានកើតឡើងនៅក្នុងកាលៈទេសៈសំខាន់។ បរិមាណនៃផលិតផលថ្មរបស់ក្រុមហ៊ុននេះ បានថយចុះជិត1ភាគ3 នៅក្នុងរយៈពេល5ខែដើមឆ្នាំ2020។ SNE Research បានឱ្យដឹងថា បញ្ហានេះកើតឡើងដោយសារCOVID-19 សង្គ្រាមពាណិជ្ជកម្ម និងការដែលរដ្ឋាភិបាលកាត់បន្ថយការឧបត្ថម្ភ។ បណ្ដាក្រុមហ៊ុនផលិតរថយន្តរបស់ចិន កាលពីថ្ងៃទី10កក្កដាបានឱ្យដឹងថា បរិមាណរថយន្តដែលត្រូវបានលក់ចេញ បានថយចុះប្រមាណជា38% បើធៀបជាមួយនឹងអំឡុងពេលដូចគ្នាក្នុងឆ្នាំ2019។
យោងតាមការគន់គូររបស់ Sanford C. Bernstein ចាប់ពីដើមឆ្នាំក្រោយ CATL អាចផ្គត់ផ្គង់ថ្មថាមពលសម្រាប់រថយន្ត Tesla ដែលផលិតនៅសៀងហៃ ដល់ទៅពាក់កណ្ដាលឯណោះ។
Daixin Li អ្នកវិភាគមកពី BNEF ឱ្យដឹងថា “CATL ជោគជ័យក៏ដោយសារតម្រូវការយ៉ាងខ្ពស់នៅប្រទេសចិន។ ក្នុងអនាគត នៅពេលទីផ្សាររថយន្តអគ្គិសនីចិនរីកចម្រើនខ្លាំង ការរក្សានិងបង្កើនចំណែកទីផ្សារនៅលើឆាកអន្តរជាតិ នឹងអាស្រ័យលើបញ្ហាថា តើពួកគេបង្កើតបានតម្រូវការប៉ុន្មាននៅខាងក្រៅប្រទេសចិន”។
ភាគីក្រុមហ៊ុនរបស់លោក Zeng រំពឹងថា នឹងអាចផ្គត់ផ្គង់ថ្មសម្រាប់រថយន្តរបស់ Tesla ដែលផលិតនៅប្រទេសផ្សេងៗ ដូចជារោងចក្រដែលកំពុងត្រូវបានសាងសង់នៅអាល្លឺម៉ង់ជាដើម។ CATL ក៏បានលក់គ្រឿនបន្លាស់ទៅឱ្យក្រុមហ៊ុន Vlkswagen និង BMW ព្រមទាំងកំពុងសាងសង់រោងចក្រនៅទីនេះទៀតផង។
រថយន្ត Tesla ម៉ូដែល 3
លោក Zeng ថ្លែងថា បច្ចុប្បន្ន CATL កំពុងតែបង្កើនល្បឿនក្នុងការស្រាវជ្រាវស្វែងរកវិធីសាស្ត្រកាត់បន្ថយចំណាយដើម្បីអាចបញ្ចុះតម្លៃរថយន្តអគ្គិសនីមកនៅប្រហាក់ប្រហែលនឹងរថយន្តប្រើសាំង។ លោក Zeng ក៏ជាមនុស្សដែលធ្លាប់បានជួយឱ្យ Apple អាចអូសបន្លាយអាយុកាលរបស់ថ្ម MacBook ផងដែរ។
CEO របស់ CATL បញ្ជាក់ថា ពួកគេអាចផលិតប្រភេទថ្មដែលអាចប្រើប្រាស់បានរហូតដល់16ឆ្នាំ និងជួយឱ្យរថយន្តអាចបរបាន2លានគីឡូម៉ែត្រ។ នេះគឺជាចំណុចមួយដែលបណ្ដាក្រុមហ៊ុនផលិតរថយន្ត ដូចជា Tesla ឬ General Motors ជាដើម កំពុងតែតាមរក។
បច្ចុប្បន្ន ក្រុមហ៊ុន CATL មានបុគ្គលិកចំនួន5,400នាក់កំពុងធ្វើការក្នុងផ្នែកស្រាវជ្រាវនិងអភិវឌ្ឍ (R&D/Research & Development) ក្នុងនោះមាន143នាក់មានសញ្ញាបត្របណ្ឌិត។
Bernstein គន់គូរឃើញថា ប្រភេទថ្មតូច និងតម្លៃទាបរបស់ CATL សម្រាប់ Model 3 នឹងជួយឱ្យតម្លៃរថយន្ត Tesla ថយចុះពី600ទៅ1,200ដុល្លារក្នុង1គ្រឿង។
Mark Newman អ្នកវិភាគម្នាក់មកពី Bernstein បានព្យាករថា “CATL នឹងទទួលបានផលប្រយោជន៍ច្រើន បើសិនអាចនាំយកប្រភេទថ្មថាមពលនេះចេញទៅទីផ្សារអន្តរជាតិ ព្រោះថា ក្រៅពីប្រទេសចិន គឺមិនទាន់មានប្រទេសណាមួយប្រើប្រាស់ថ្ម LFP សម្រាប់រថយន្តអគ្គិសនីនៅឡើយ”។ អ្នកវិភាគរូបនេះក៏បានសង្កត់ធ្ងន់ដែរថា “Tesla នឹងមានប្រៀបច្រើនជាងគូប្រជែង (នៅក្នុងទីផ្សាររថយន្តអគ្គិសនី)”។
ប្រភព៖ Bloomberg
July 13, 2020
លោក ត្រាំ ពាក់ម៉ាស់ការពារជាលើកដំបូង ខណៈអាមេរិកអ្នកឆ្លងជំងឺថ្មីនៅតែកើនឡើងខ្លាំង
លោកដូណាល់ ត្រាំ សុខចិត្តពាក់ម៉ាស់អនាម័យការពារនៅក្នុងទីសាធារណៈជាលើកដំបូង កាលពីថ្ងៃសៅរ៍(ទី11កក្កដា) ខណៈដែលរបាយការណ៍ចំនួនអ្នកឆ្លងមេរោគកូវីដ-19 ប្រចាំថ្ងៃ បានកើនឡើងឥតឈប់ឈរ ចំណែកសួនកម្សាន្ត វ៉លដ៍ ឌីស្នីយ៍ ក្នុងរដ្ឋហ្វ្លរីដា ដែលនៅតែរកឃើញការឆ្លងរាលដាលនោះ ចាប់ផ្ដើមបើកបម្រើសេវាកម្មជាថ្មីឡើងវិញកាលពីចុងសប្ដាហ៍កន្លងទៅ ខណៈដែលហុងកុង បានបញ្ជាឱ្យបិទសាលារៀនម្ដងទៀតចាប់តាំងពីថ្ងៃចន្ទ(ទី13កក្កដា) តទៅ ក្រោយពីរកឃើញការឆ្លងមេរោគក្នុងតំបន់កើនឡើងយ៉ាងឆាប់រហ័ស។
អ្នកជំនាញការរបស់មន្ទីរសេតវិមាន ដែលជាអ្នកដឹកនាំការប្រយុទ្ធប្រឆាំងនឹងវិបត្តិរោគរាតត្បាតនៅក្នុងប្រទេសអាមេរិក បានណែនាំមកជាយូរហើយ ឱ្យពាក់ម៉ាស់ការពារនៅក្នុងទីសាធារណៈ ដើម្បីការពារការឆ្លងសាយភាយ តែលោកប្រធានាធិបតី ដូណាល់ ត្រាំ បែរជាព្រងើយកន្តើយ ទោះបីជាមានមន្ត្រីមន្ទីរសេតវិមានជាច្រើននាក់ត្រូវបានពិនិត្យឃើញថា បានឆ្លងមេរោគកូវីដ-19 និងអ្នកជំនួយការជាច្រើននាក់ចាប់ផ្ដើមពាក់ម៉ាស់ការពារហើយក៏ដោយ។
ទោះជាយ៉ាងនោះក្ដី ប៉ុន្មានម៉ោងក្រោយពីអង្គការសុខភាពពិភពលោក(WHO)អំពាវនាវឱ្យប្រទេសផ្សេងៗលើកកម្ពស់ការគ្រប់គ្រងការឆ្លងរាលដាល លោកត្រាំ បានយល់ព្រមពាក់ម៉ាស់អនាម័យការពារដែលមានរូបត្រាប្រធានាធិបតី ក្នុងអំឡុងពេលចុះទៅសួរសុខទុក្ខអតីតយុទ្ធជនដែលរងរបួសនៅឯមន្ទីរពេទ្យយោធា វ៉ធើរីត ក្រៅទីក្រុងវ៉ាស៊ីនតោន។
ទាំងអស់នេះ ក្រោយពីធ្វើដំណើរចេញពីមន្ទីរសេតវិមាន លោកត្រាំ បានប្រាប់ទៅអ្នកយកព័ត៌មានថា លោកមិនបានប្រឆាំងនឹងការពាក់ម៉ាស់ការពារទេ គ្រាន់តែជឿថា គួរតែពាក់នៅក្នុងទីកន្លែងណាខ្លះ និងពេលណាខ្លះតែប៉ុណ្ណោះ។
លោកត្រាំ មានពិន្ទុនិយមតាមពីក្រោយលោក ចូ បៃឌិន អនាគតបេក្ខភាពមកពីគណបក្ស ដេម៉ូក្រេត ក្នុងការបោះឆ្នោតជ្រើសតាំងប្រធានាធិបតីសហរដ្ឋអាមេរិក ដែលនឹងធ្វើឡើងនៅដើមខែវិច្ឆិកាខាងមុខ ដោយការធ្វើប្រជាមតិ បានបញ្ជាក់ថា ប្រជាជនអាមេរិកាំងភាគច្រើន មិនពេញចិត្តនឹងវិធានការទប់ទល់វិបត្តិរោគរាតត្បាតរបស់លោកត្រាំឡើយ តែមេដឹកនាំសហរដ្ឋអាមេរិករូបនេះ នៅតែអួតអាងពីស្នាដៃក្នុងការចាត់ការវីរុសកូរ៉ូណារបស់ខ្លួន ទោះជាចំនួនអ្នកឆ្លងមេរោគនេះនៅក្នុងប្រទេសនៅតែកើនឡើងខ្ពស់ឥតឈប់ឈរក៏ដោយ។ របាយការណ៍ដែលចេញមកកាលពីរាត្រីថ្ងៃសៅរ៍(ទី11កក្កដា) បានបញ្ជាក់ថា ចំនួនអ្នកឆ្លងមេរោគថ្មីក្នុងជុំ 24ម៉ោង មាន 66,528នាក់ ដែលជាស្ថិតិខ្ពស់បំផុតជាថ្មី និងស្លាប់ជិត 800នាក់ សរុបទាំងអស់ជិត 135,000នាក់។
នៅឯរដ្ឋហ្វ្លរីដា បានរកឃើញករណីថ្មី 1ក្នុងចំណោម 6 របស់ប្រទេស ខណៈដែលសួនកម្សាន្ត វ៉លដ៍ ឌីស្នីយ៍ បានបើកបម្រើសេវាកម្មឡើងវិញ ក្រោយពីបិទអស់រយៈពេល 4ខែ ដោយសាររោគរាតត្បាតនេះ។ អ្នកទេសចរជាច្រើនរយនាក់ បានមកឈរតម្រង់ជួរ ដើម្បីចូលទៅកម្សាន្តនៅក្នុងធីមផាក ក្នុងទីក្រុងអ័រលែនដូមួយនេះ ដោយទាំងអស់គ្នាសុទ្ធតេពាក់ម៉ាស់អនាម័យការពារ រក្សាគម្លាតឆ្ងាយពីគ្នា និងប្រតិបត្តិតាមវិធានការសុខភាពអនាម័យនានា ដែលសួនកម្សាន្តនេះបានកំណត់។
កាលពីពេលមុននេះ លោកអាន់ថូនី ហ្វៅស៊ី អ្នកជំនាញការកំពូលផ្នែករោគឆ្លងរបស់សហរដ្ឋអាមេរិក បានបញ្ជាក់ថា រដ្ឋហ្វ្លរីដា ចាប់ផ្ដើមបើកទីក្រុងឡើងវិញមុនពេលកំណត់ សម្រាប់ការបន្ធូរបន្ថយវិធានការបិទទីក្រុងយ៉ាងសុវត្ថិភាព។
ខណៈនេះ មានអ្នកឆ្លងមេរោគកូវីដ-19 ទូទាំងពិភពលោកជិត 13លាននាក់ និងស្លាប់ 560,000នាក់ ហើយវិបត្តិរោគរាតត្បាតនេះ នៅតែបន្តសាងការខូចខាតយ៉ាងធំមហាសាលខាងសេដ្ឋកិច្ច ចាប់តាំងពីមេរោគនេះបានចាប់កំណើតឡើងនៅក្នុងប្រទេសចិនកាលពីចុងឆ្នាំកន្លងទៅ។
អាមេរិកជាប្រទេស ដែលមានការឆ្លងរាលដាលខ្លាំងក្លាបំផុត តាមពីក្រោយដោយប្រទេសប្រេស៊ីល ដែលមានអ្នកស្លាប់គិតត្រឹមថ្ងៃសុក្រសប្ដាហ៍មុនចំនួនជាង 70,000នាក់។
ក្នុងថ្ងៃជាមួយគ្នានោះ លោក ថេដ្រូស អាត់ហាណូម គេប្រេយេស៊ុស ប្រធានអង្គការសុខភាពពិភពលោក បានអំពាវនាវក្នុងអំឡុងការថ្លែងព័ត៌មាននៅឯទីក្រុងហ្សឺណែវ ប្រទេសស្វ៊ីស ឱ្យប្រទេសផ្សេងៗប្រើវិធានការម៉ឺងម៉ាត់ ដើម្បីចាត់ការមេរោគដ៏កំណាចនេះ ដោយបានលើកពីភាពជោគជ័យរបស់ប្រទេសអ៊ីតាលី កូរ៉េខាងត្បូង និងប្រទេសផ្សេងទៀត និងបានបន្ថែមថា វិធានការម៉ឺងម៉ាត់ រួមជាមួយការរួមដៃគ្នាកម្រិតប្រទេស និងទូទាំងពិភពលោក នឹងអាចក្រឡាស់ស្ថានការណ៍រោគរាតត្បាតនេះបាន។
លោកប្រធានាធិបតី នៃប្រទេសអ៊ីស្រាអែល បេនចាមីន នេតាន់យ៉ាហ៊ូ បានទទួលស្គាល់ថា ការសម្រេចចិត្តអនុញ្ញាតឱ្យរង្គសាល និងធុរកិច្ចផ្សេងៗបើកដំណើរការឡើងវិញនោះ អាចនឹង “ឆាប់រហ័សពេក” ក្រោយពីរកឃើញអ្នកឆ្លងមេរោគកើនឡើងដល់ទៅ 1,500នាក់ ក្នុងថ្ងៃសុក្រតែ 1ថ្ងៃ ចំណែកប្រទេសបារាំង រដ្ឋបាលបានប្រកាសដាស់តឿនថា ចំនួនអ្នកឆ្លងមេរោគ បានត្រឡប់មកកើនឡើងជាថ្មីម្ដងទៀត ខណៈដែលចំនួនអ្នកស្លាប់បានឡើងដល់ 30,000នាក់។
ឯប្រទេសអូស្ត្រាលី បានឱ្យដឹងថា នឹងកាត់បន្ថយចំនួនពលរដ្ឋ ដែលធ្វើដំណើរត្រឡប់ពីបរទេស ក្នុង 1ថ្ងៃឱ្យបានពាក់កណ្ដាល ក្រោយពីចំនួនអ្នកឆ្លងមេរោគ នៅតែហក់ឡើងខ្ពស់ក្នុងទីក្រុងមែលប៊ន ដែលត្រូវបិទម្ដងទៀតតាំងពីចុងសប្ដាហ៍ទីមួយ នៃខែកក្កដា។
នៅហុងកុង រកឃើញអ្នកឆ្លងមេរោគកើនឡើងដូចគ្នា ក្រោយពីប្រជាជននាំគ្នាត្រឡប់មកដំណើរការជិវិតរស់នៅដូចកាលពីពេលមុនច្រើនឡើង ដោយភោជនីយដ្ឋាន និងបារ៍ រួមទាំងមណ្ឌលទេសចរណ៍បែបវប្បធម៌ បានទទួលការអនុញ្ញាតឱ្យបើកឡើងវិញតាមប្រក្រតី។
យ៉ាងណាក៏ដោយ រដ្ឋបាលទីក្រុងហុងកុង មានបញ្ជាឱ្យបិទសាលារៀនទាំងអស់ជាថ្មីម្ដងទៀត តាំងពីថ្ងៃចន្ទ(ទី13កក្កដា)នេះ ក្រោយរកឃើញការឆ្លងមេរោគនៅក្នុងតំបន់កើនឡើងយ៉ាងឆាប់រហ័ស៕
ប្រភព៖ សារព័ត៌មានបរទេស
July 13, 2020
អាស៊ីអាគ្នេយ៍បានរកឃើញអ្នកផ្ទុកCOVID-19 ជាង1សែននាក់ ក្នុងនោះមាន4ប្រទេសមិនទាន់មានអ្នកស្លាប់ដោយសារវីរុសនេះនៅឡើយ
ពិភពលោកទាំងមូល បានរកឃើញអ្នកផ្ទុកវីរុសCOVID-19 សរុបចំនួន 13,036,587នាក់ ក្នុងនោះមានអ្នកស្លាប់សរុប571,574នាក់ ខណៈអាស៊ីអាគ្នេយ៍បានរកឃើញអ្នកជំងឺសរុប106,480នាក់។
នៅតំបន់អាស៊ីអាគ្នេយ៍ ប្រទេសឥណ្ឌូនេស៊ីគឺជាសម្បុកវីរុសCOVID-19 ធំជាងគេបង្អស់ ដោយមានអ្នកឆ្លងវីរុសចំនួន75,699នាក់ និងអ្នកស្លាប់សរុបចំនួន3,606នាក់ ក្នុងនោះមានអ្នកជំងឺថ្មី1,681នាក់ និងអ្នកស្លាប់ថ្មីមានចំនួន71នាក់។ ក្នុងចំណោមអ្នកជំងឺសរុប ក៏មានអ្នកជំងឺជិត1,300នាក់ដែលមានជាប់ទាក់ទិននឹងសាលាយោធាឥណ្ឌូនេស៊ីផងដែរ។
Achmad Yurianto មន្ត្រីម្នាក់នៃក្រសួងសុខាភិបាលឥណ្ឌូនេស៊ី យល់ថា ការកើនឡើងយ៉ាងឆាប់រហ័សនៃករណីឆ្លងវីរុសCOVID-19 គឺដោយសារប្រជាជនមានការធ្វេសប្រហែសនៅពេលប្រទេសនេះបានបើកច្រកព្រំដែន និងបន្ធូរបន្ថយការរឹតត្បិតលើការដើរហើរ។
ហ្វីលីពីនគឺជាសម្បុកវីរុសCOVID-19 ធំជាងគេលំដាប់ទី2នៅអាស៊ីអាគ្នេយ៍ ដោយមានអ្នកជំងឺសរុប56,259នាក់ និងអ្នកស្លាប់សរុបចំនួន1,372នាក់។
សិង្ហបុរី ដែលជាសម្បុកមេរោគធំជាងគេទី3ក្នុងតំបន់ បានរកឃើញអ្នកផ្ទុកវីរុសសរុបចំនួន45,961នាក់ គឺកើន178នាក់បើធៀបនឹងម្សិលមិញ ក្នុងនោះមានអ្នកស្លាប់ចំនួន26នាក់។
ប្រទេសថៃ មានអ្នកជំងឺសរុប3,217នាក់ ក្នុងនោះមានអ្នកស្លាប់សរុប58នាក់ ខណៈប្រទេសវៀតណាមមានអ្នកជំងឺសរុប372នាក់ ប្រទេសមីយ៉ានម៉ាមានអ្នកជំងឺ331 (ស្លាប់6នាក់) ប្រទេសកម្ពុជាមាន156នាក់ ប្រទេសប៊្រុយណេមានអ្នកជំងឺ141នាក់ (ស្លាប់3នាក់) ប្រទេសទីម័រខាងកើតមានចំនួន24នាក់ និងប្រទេសឡាវមាន19នាក់។
ប្រទេសកម្ពុជា ឡាវ វៀតណាម និងទីម័រខាងកើត គឺជាបណ្ដាប្រទេសនៅតំបន់អាស៊ីអាគ្នេយ៍ដែលមិនទាន់មានករណីស្លាប់ដោយសារវីរុសCOVID-19នេះនៅឡើយ។
ប្រធានអង្គការសុខភាពពិភពលោក (WHO) លោក Tedros Adhanom Ghebreyesus កាលពីចុងសប្ដាហ៍កន្លងទៅ បានអំពាវនាវឱ្យបណ្ដាប្រទេសដែលកំពុងទទួលរងផលប៉ះពាល់ធ្ងន់ធ្ងរពីCOVID-19 បន្តរក្សាវិធានការគ្រប់គ្រងយ៉ាងខ្លាំងក្លាដើម្បីទប់ស្កាត់វីរុសនេះ៕
ប្រភព៖ សារព័ត៌មានបរទេស
July 13, 2020
ម៉ាស់ច្នៃអំពីមាសនិងម៉ាស់ដាំពេជ្យកំពុងក្លាយជាជម្រើសថ្មីរបស់អ្នកមាននៅឥណ្ឌា
ម៉ាស់ដាំត្បូងពេជ្រ និងមាសមានតម្លៃចាប់ពីទាបបំផុតត្រឹម1,860ដុល្លារ កំពុងត្រូវបានអ្នកមាននៅឥណ្ឌាជាច្រើន ស្វែងរកទិញ ខណៈCOVID-19 កំពុងធ្វើឱ្យតម្រូវការម៉ាស់ ចេះតែកើនឡើង។
ហាងលក់គ្រឿងអលង្ការមួយនៅតំបន់ Surat ក្នុងរដ្ឋ Gujarat ប្រទេសឥណ្ឌា ជាកន្លែងដែលត្រូវបានគេចាត់ទុកជាទីក្រុងពេជ្រ ទើបតែបានដាក់លក់ម៉ាស់ដែលច្នៃអំពីមាស និងដាំពេជ្រ ដែលមានតម្លៃចាប់ពី1,860-5,300ដុល្លារក្នុងមួយឈុត អាស្រ័យទៅលើចំនួននិងគុណភាពត្បូងពេជ្រដែលត្រូវបានដាំនៅលើអលង្ការនោះ។
Dipak Choksi ដែលជាម្ចាស់ហាងពេជ្រខាងលើ បានឱ្យដឹងថា លោកមានគំនិតផលិតម៉ាស់ដាំត្បូងពេជ្រនេះដោយសារតែតម្រូវការប្រើប្រាស់ម៉ាស់ចេះតែកើនឡើងពីមួយថ្ងៃទៅមួយថ្ងៃពីសំណាក់សាធារណជន ជាពិសេសគឺក្រុមអ្នកមាន។ លោក Dipak Choksi បន្តថា ត្រូវចំណាយពេលប្រហែលមួយសប្ដាហ៍ ទើបច្នៃបានម៉ាស់ដាំពេជ្រមួយឈុត។
បន្ទាប់ពីបានឃើញម៉ាស់ដាំត្បូងពេជ្រ អតិថិជនម្នាក់បានសម្រេចចិត្តចំណាយប្រាក់ជិត2,000ដុល្លារភ្លាមៗ ដើម្បីក្លាយជាម្ចាស់ដាំពេជ្រយនេះ ព្រោះតែ “មើលឃើញថា វាស៊ីជាមួយនឹងសម្លៀកបំពាក់របស់ខ្លួន និងចង់ក្លាយជាមនុស្សពិសេស”។
កាលពីសប្ដាហ៍មុន អ្នកជំនួញជនជាតិឥណ្ឌាម្នាក់ឈ្មោះ Shankar Kurhade រស់នៅក្នុងទីក្រុង Pune ភាគខាងលិចប្រទេសឥណ្ឌា បានបង្កការចាប់អារម្មណ៍ខ្លាំង នៅពេលចំណាយប្រាក់ប្រមាណជា4,000ដុល្លារដើម្បីទិញម៉ាសមាសមួយឈុតសម្រាប់បង្អួតគេឯង និងដើម្បីការពារCOVID—9ផងដែរ។
Surat ត្រូវបានគេចាត់ទុកថាជា “ទីក្រុងពេជ្រ” ដោយសារតែវាជាកន្លែងដែលមានសកម្មភាពច្នៃត្បូងពេជ្រ និងប៉ូលាត្បូងពេជ្រប្រមាណជា90%នៃសកម្មភាពទាំងមូលរបស់ពិភពលោក។
រដ្ឋាភិបាលឥណ្ឌាបានចេញបទបញ្ជា បង្ខំឱ្យប្រជាជនពាក់ម៉ាស់នៅទីសាធារណៈ ក្នុងស្ថានភាពប្រទេសនេះក្លាយជាសម្បុកវីរុសCOVID-19 ធំជាងគេលំដាប់ទី3ក្នុងពិភពលោក ដោយបានរកឃើញអ្នកផ្ទុកវីរុសសរុបជាង850,000នាក់ និងអ្នកស្លាប់ដោយសារវីរុសនេះមានចំនួន22,687នាក់។ ក្រុមអ្នកជំនាញផ្នែកសុខាភិបាលបានព្យាករថា ឥណ្ឌាត្រូវការពេលជាច្រើនសប្ដាហ៍ ឬច្រើនខែទៀត ទើប COVID-19 អាចឆ្លងរាលដាលដល់កម្រិតកំពូល៕
ប្រភព៖ សារព័ត៌មានបរទេស
July 13, 2020
Elon Musk មានទ្រព្យច្រើនជាង Warren Buffett បន្ទាប់ពីមូលបត្រ Tesla កើនឡើងច្រើន
មហាសេដ្ឋី Elon Musk បច្ចុប្បន្នមានទ្រព្យសរុបជាង70ពាន់លានដុល្លារ ច្រើនជាងមហាសេដ្ឋី Warren Buffett ដោយសារតែមូលបត្រ Tesla ចេះតែឡើងថ្លៃនាពេលថ្មីៗនេះ។
យោងតាមរបាយការណ៍របស់ Bloomberg មូលបត្ររបស់ក្រុមហ៊ុនរថយន្ត Tesla កាលពីម្សិលមិញបានកើនឡើង11% ដែលនេះក៏បានទាញទ្រព្យសម្បត្តិរបស់ CEO នៃក្រុមហ៊ុន Tesla កើនឡើងបន្ថែម6.1ពាន់លានដុល្លារផងដែរ។ ដូច្នេះ បច្ចុប្បន្នលោក Elon Musk មានទ្រព្យសរុបចំនួន70.5ពាន់លានដុល្លារ ច្រើនជាងមហាសេដ្ឋី Warren Buffett ហើយបានក្លាយជាអ្នកមានជាងគេលំដាប់ទី7ក្នុងពិភពលោក។ ទ្រព្យសម្បត្តិរបស់លោក Musk ក៏ច្រើនជាងមហាសេដ្ឋី Larry Ellison ដែលជាម្ចាស់ក្រុមហ៊ុន Oracle និង Sergey Brin ដែលជាសហស្ថានិករបស់ក្រុមហ៊ុន Google ទៀតផង។
ចំណែកមហាសេដ្ឋី Warren Buffett វិញ ក្នុងសប្ដាហ៍នេះ ទ្រព្យរបស់លោកបានថយចុះ បន្ទាប់ពីបានបរិច្ចាគប្រាក់សម្រាប់សកម្មភាពមនុស្សធម៌អស់ចំនួន2.9ពាន់លានដុល្លារពីមូលបត្រនៅក្នុងក្រុមហ៊ុន Berkshire Hathaway។ កំពូលវិនិយោគិនរូបនេះ បានបរិច្ចាគប្រាក់ជាង37ពាន់លានដុល្លារនៃមូលបត្ររបស់ខ្លួនសម្រាប់សកម្មភាពមនុស្ស រាប់ចាប់ពីឆ្នាំ2006 ដល់2020នេះ។ បច្ចុប្បន្ន លោកមានទ្រព្យសរុបប្រមាណជា69.2ពាន់លានដុល្លារ។
លោក Elon Musk កាន់កាប់ភាគហ៊ុន Tesla ចំនួនមួយភាគប្រាំ ដែលតួលេខនេះគឺជាទ្រព្យមួយភាគធំក្នុងចំណោមទ្រព្យសរុបរបស់លោក។ ភាគហ៊ុនរបស់លោក Musk នៅក្នុងក្រុមហ៊ុនអវកាស SpaceX មានតម្លៃ15ពាន់លានដុល្លារ។
ទ្រព្យសម្បត្តិរបស់មហាសេដ្ឋី Warren Buffett បានថយចុះ បន្ទាប់ពីបានបរិច្ចាគ2.9ពាន់លានដុល្លារសម្រាប់សកម្មភាពមនុស្សធម៌
នៅក្នុងឆ្នាំនេះ មូលបត្រ Tesla បានកើន269%។ ការដែលតម្លៃទុនរបស់ក្រុមហ៊ុនរថយន្ត Tesla ចេះតែកើនឡើងបែបនេះ បានជួយឱ្យលោក Musk ទទួលបានរង្វាន់ជាមូលបត្រដែលមានតម្លៃ595លានដុល្លារនៅក្នុងឆ្នាំនេះទៀតផង ហើយលោកក៏បានក្លាយជា CEO ដែលទទួលបានប្រាក់ឈ្នួលខ្ពស់ជាងគេបង្អស់នៅសហរដ្ឋអាមេរិក។
នៅមុនលោក Elon Musk អ្នកជំនួញផ្នែកបច្ចេកវិទ្យាមួយចំនួនទៀតដូចជា Steve Ballmer (CEO របស់ Microsoft) Larry Page, Sergey Brin (សហស្ថាបនិករបស់ Google) ក៏បានលោតទៅឈរពីមុខ Warren Buffett ផងដែរ នៅលើបញ្ជីចំណាត់ថ្នាក់អ្នកមានបំផុត។ កំពូលអ្នកជំនួញឥណ្ឌា លោក Mukesh Ambani បច្ចុប្បន្នក៏មានទ្រព្យច្រើនជាងមហាសេដ្ឋី Warren Buffett ផងដែរ៕
ប្រភព៖ Bloomberg
July 11, 2020
រថយន្តដឹកអ្នកដំណើរ38នាក់ ធ្លាក់ពីចង្កេះភ្នំ បណ្ដាលឱ្យមនុស្សយ៉ាងតិច6នាក់បានបាត់បង់ជីវិត
រថយន្តក្រុងពីរជាន់មួយគ្រឿងដែលមានដឹកអ្នកដំណើរ38នាក់ ធ្វើដំណើរពីភាគខាងជើងទៅកាន់ភាគខាងត្បូងនៃប្រទេសវៀតណាម បានធ្លាក់ចូលជ្រោះជម្រៅប្រហែល20ម៉ែត្រ បណ្ដាលឱ្យមនុស្សស្លាប់យ៉ាងតិច6នាក់ និងរងរបួសធ្ងន់ជាច្រើននាក់ផងដែរ។
នៅវេលាម៉ោងប្រហែល4ទៀបភ្លឺ ថ្ងៃទី11កក្កដានេះ រថយន្តដឹកអ្នកដំណើរប្រភេទ48កៅអីមួយគ្រឿង ធ្វើដំណើរពីតំបន់ភាគខាងជើង ទៅកាន់តំបន់ភាគខាងត្បូងប្រទេសវៀតណាម។ នៅពេលឆ្លងកាត់តំបន់ភ្នំក្នុងខេត្ត Kon Tum ស្រាប់តែរថយន្តនេះបានរអិលចេញពីផ្លូវ និងធ្លាក់ចូលទៅក្នុងជ្រោះដែលមានជម្រៅប្រហែល20ម៉ែត្រ ធ្វើឱ្យរថយន្តនោះបាក់ជាពីរកំណាត់។
អាជ្ញាធរខេត្ត Kon Tum បានឱ្យដឹងថា គិតដល់ម៉ោង9និង35នាទីព្រឹកនេះ មានជនរងគ្រោះចំនួន6នាក់ហើយដែលបានបាត់បង់ជីវិត និង28នាក់ផ្សេងទៀតរងរបួសធ្ងន់។ ក្នុងចំណោមជនរងគ្រោះ មាន26នាក់ត្រូវបានបញ្ជូនទៅកាន់មន្ទីរបង្អែក ចំណែក2នាក់ទៀតដែលមានរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យក្រុង Kon Tum។
កន្លែងកើតហេតុខាងលើនេះ គឺជាតំបន់ក្បែរព្រំដែនជាប់ជាមួយនឹងកម្ពុជា។ ក្រុមអ្នកជួយសង្គ្រោះកំពុងរំដោះជនរងគ្រោះដែលនៅជាប់ក្នុងរថយន្ត យ៉ាងញាប់ដៃញាប់ជើងបំផុត។
ប្រភពព័ត៌មានបានឱ្យដឹងថា ដំណឹងបឋមបានបញ្ជាក់ថា នៅលើរថយន្តខាងលើនេះ មានដឹកអ្នកដំណើរចំនួន38នាក់ ក្នុងនោះមានកុមារចំនួន6នាក់ផងដែរ។
ផែនទីនៃកន្លែងកើតហេតុ
ប្រជាជននៅក្បែរកន្លែងកើតហេតុបានឱ្យដឹងថា រថយន្តនេះប្រហែលជាដឹកអ្នកដំណើរពីខេត្ត Thanh Hoa មកកាន់ខេត្ត Kon Tum និងខេត្ត Gia Lai ដើម្បីរកស៊ី។
ឧបនាយករដ្ឋមន្ត្រីវៀតណាម លោក Truong Hoa Binh ដែលជាប្រធានគណកម្មសុវត្ថិភាពចរាចរណ៍ជាតិនៃប្រទេសនេះ បានស្នើឱ្យថ្នាក់ដឹកនាំខេត្ត Kon Tum និងអាជ្ញាធរពាក់ព័ន្ធ យកចិត្តទុកដាក់ខ្ពស់បំផុតលើបញ្ហានេះផងដែរ៕
ប្រភព៖ សារព័ត៌មានបរទេស
July 11, 2020
ជាង12.6លាននាក់បានឆ្លងCOVID-19! WHO បញ្ជូនក្រុមអ្នកជំនាញទៅកាន់ប្រទេសចិនដើម្បីស្រាវជ្រាវរកប្រភពវីរុស
ប្រទេសនិងដែនដីចំនួន221ក្នុងពិភពលោក បានរកឃើញអ្នកផ្ទុកវីរុសCOVID-19 ចំនួន12,614,315នាក់ និងអ្នកស្លាប់ដោយសារវីរុសនេះមានចំនួន561,987នាក់ ខណៈអ្នកជំងឺដែលបានជាសះស្បើយ មានចំនួន 7,319,888នាក់។
ទ្វីបអាមេរិករកឃើញអ្នកជំងឺសរុប6,645,257នាក់ ខណៈទ្វីបអាស៊ីរកឃើញ2,848,060នាក់ អឺរ៉ុបរកឃើញ2,546,899នាក់ និងអាហ្វ្រិករកឃើញ562,357នាក់។
អ្នកនាំពាក្យរបស់អង្គការសុខភាពពិភពលោក (WHO) លោកស្រី Margaret Harris កាលពីថ្ងៃទី10កក្កដា បានប្រកាសថា អ្នកជំនាញការរបស់ WHO ចំនួន2រូប ដែលរួមមានអ្នកជំនាញផ្នែកសុខភាពសត្វ និងជំងឺឆ្លង នឹងធ្វើការជាមួយក្រុមអ្នកវិទ្យាសាស្ត្រចិនដើម្បីកំណត់ទំហំនិងផែនការសម្រាប់ការស្រាវជ្រាវស្វែងរកប្រភពរបស់COVID-19។
លោកស្រី Harris ថ្លែងថា “មួយក្នុងចំណោមបញ្ហាដែលគ្រប់គ្នាចាប់អារម្មណ៍ និងជាមូលហេតុដែលយើងបញ្ជូនអ្នកជំនាញផ្នែកសុខភាពសត្វទៅកាន់ប្រទេសចិន នោះគឺការកំណត់ឱ្យដឹងច្បាប់ថា តើវីរុសនេះអាចឆ្លងពីសត្វមកមនុស្សដែរឬទេ ហើយតើវាមានប្រភពពីសត្វអ្វី”។
អ្នកនាំពាក្យរូបនេះបន្តថា “យើងដឹងហើយថា វាពិតជាដូចទៅនឹងប្រភេទវីរុសដែលរកឃើញនៅលើសត្វប្រចៀវខ្លាំងណាស់ ប៉ុន្តែ តើវាឆ្លងតាមរយៈភ្នាក់ងារចម្លងណាមួយ? នេះគឺជាសំណួរដែលយើងត្រូវផ្ដល់ចម្លើយ”។
ក្រុមមន្ត្រីរបស់ WHO ធ្លាប់យល់ថា វីរុសCOVID-19 អាចមានប្រភពចេញពីផ្សារលក់សត្វព្រៃមួយកន្លែងនៅក្នុងទីក្រុង Wuhan ខេត្ត Hubei ប្រទេសចិន។ ពួកគេយល់ថា វាឆ្លងពីសត្វប្រចៀវទៅកាន់ “ភ្នាក់ងារចម្លងកណ្ដាល” មួយ មុននឹងបានឆ្លងមកមនុស្ស។
ក្រុមអ្នកវិទ្យាសាស្ត្រនៅក្នុងបន្ទប់ពិសោធន៍ផ្នែកវីរុសសាស្ត្រនៅក្នុងទីក្រុង Wuhan ប្រទេសចិន
ប្រធានាធិបតី និងរដ្ឋមន្ត្រីការបរទេសសហរដ្ឋអាមេរិក ធ្លាប់បានលើកឡើងអំពីសម្មតិកម្មមួយដែលថា COVID-19 មានប្រភពចេញពីបន្ទប់ពិសោធន៍មួយនៅក្នុងទីក្រុង Wuhan ជាកន្លែងដែលវីរុសនេះផ្ទុះឆ្លងរាលដាលមុនគេបង្អស់។ ប៉ុន្តែ ក្រុមមន្ត្រីអាមេរិកាំងមិនទាន់បានលើកឡើងអំពីភ័ស្តុតាងជាក់លាក់ណាមួយនៅឡើយ ខណៈដែលចិនបានប្រឆាំង និងទាត់ចោលការ “ចោទប្រកាន់” នេះ។
ប្រធានអង្គការ WHO លោក Tedros ធ្លាប់បានដឹកនាំប្រតិភូមួយក្រុមទៅកាន់ប្រទេសចិនកាលពីខែមករា។ លោក Tedros បានជួបពិភាក្សាជាមួយលោក Xi Jinping ដើម្បីស្វែងយល់បន្ថែមអំពីវិធីដែលទីក្រុងប៉េកាំងប្រើប្រាស់ក្នុងការទប់ទល់នឹងCOVID-19។
ក្រោយដំណើរទស្សនាកិច្ចរបស់លោក Tedros អ្នកវិទ្យាសាស្ត្រអន្តរជាតិមួយក្រុមផ្សេងទៀតក៏បានទៅកាន់ប្រទេសចិនកាលពីខែកុម្ភៈ ដើម្បីពិនិត្យមើលស្ថានភាព ក្នុងនោះក៏មានក្រុមអ្នកជំនាញមកពីអាល្លឺម៉ង់ ជប៉ុន កូរ៉េខាងត្បូង រុស្ស៊ី សឹង្ហបុរី សហរដ្ឋអាមេរិក និងនីហ្សេរីយ៉ាផងដែរ៕
ប្រភព៖ Reuters
July 11, 2020
អតីតប្រធានាធិបតីកូរ៉េខាងត្បូង ត្រូវបានកាត់ទោសដាក់ពន្ធនាគារ20ឆ្នាំ
អតីតប្រធានាធិបតីកូរ៉េខាងត្បូង លោកស្រី Park Geun-hye ទើបតែត្រូវបានកាត់ទោសដាក់ពន្ធនាគាររយៈពេល20ឆ្នាំ ដោយសារអំពើពុករលួយនិងប្រើអំណាចខុសច្បាប់។
តុលាការកំពូលរបស់កូរ៉េខាងត្បូង កាលពីម្សិលមិញ (10កក្កដា) បានសម្រេចកាត់បន្ថយទោសជាប់ពន្ធនាគារ30ឆ្នាំ មកនៅត្រឹម20ឆ្នាំ ចំពោះអតីតប្រធានាធិបតី Park Geun-hye។ សាលក្រមចុងក្រោយនេះ បានបញ្ចប់រឿងក្ដីដែលបានអូសបន្លាយជាច្រើនឆ្នាំរបស់លោកស្រី Park ដែលជាប្រធានាធិបតីភេទស្រីដំបូងគេរបស់ប្រទេសកូរ៉េខាងត្បូង។
ទោសជាប់ពន្ធនាគារ20ឆ្នាំរបស់លោកស្រី Park រួមមាន 15ឆ្នាំជាទោសទទួលសំណូក និង5ឆ្នាំជាទោសរំលោភអំណាច(ប្រើប្រាស់អំណាចខុសច្បាប់) រួមជាមួយនឹងទោសព្រហ្មទណ្ឌមួយចំនួនទៀត។ លោកស្រី Park អាយុ68 ក៏ត្រូវបង់ប្រាក់ពិន័យចំនួន18ពាន់លានវ៉ុន (ប្រហែល15លានដុល្លារ) និងត្រូវបានរឹបអូសទ្រព្យសម្បត្តិចំនួន3.5ពាន់លានវ៉ុនផងដែរ។
លោកស្រី Park ត្រូវបានទម្លាក់ពីតំណែងប្រធានាធិបតីកាលពីឆ្នាំ2017 និងត្រូវបានកាត់ទោសទាក់ទិននឹងការឃុបឃិតជាមួយមិត្តជិតស្និទ្ធម្នាក់ឈ្មោះ Choi Soon-sil នៅក្នុងករណីបង្ខំបណ្ដាក្រុមហ៊ុនធំៗដែលក្នុងនោះក៏មាន Samsung ផងដែរ ដើម្បីឱ្យឧបត្ថម្ភប្រាក់ចំនួន77.4ពាន់លានវ៉ុនទៅឱ្យអង្គការចំនួន2ដែលអ្នកស្រី Choi កាន់កាប់។
ក្រោយមក លោកស្រី Park ក៏ត្រូវបានប្ដឹងកាលពីឆ្នាំ2018 ទាក់ទងនឹងការទទួលសំណូក3.5ពាន់លានវ៉ុន ពីមេដឹកនាំ3រូបនៃអង្គភាពយកការណ៍សម្ងាត់កូរ៉េខាងត្បូង ចាប់ពីឆ្នាំ2013ដល់ឆ្នាំ2016។
លោកស្រី Park Geun-hye កាលពីនៅកាន់តំណែងជាប្រធានាធិបតីកូរ៉េខាងត្បូង
នៅកូរ៉េខាងត្បូង ក្រៅពីលោកស្រី Park Geun-hye ក៏មានប្រធានាធិបតីមួយចំនួនផ្សេងទៀត ត្រូវជាប់ពន្ធនាគារក្រោយពីបានបញ្ចប់តំណែង។ នេះភាគច្រើនគឺជាលទ្ធផលនៃការស៊ើបអង្កេតដែលចាប់ផ្ដើមដោយបណ្ដាគូប្រជែងនយោបាយក្នុងប្រទេស។
អ្នកកាន់តំណែងជំនាន់មុនរបស់លោកស្រី Park គឺអតីតប្រធានាធិបតី Lee Myung-bak ក៏ត្រូវបានកាត់ទោសឱ្យជាប់ពន្ធនាគារ17ឆ្នាំ ចាប់ពីថ្ងៃទី19កុម្ភៈ ក្រោមបទចោទប្រកាន់ថាបានកេងបន្លំថវិកាជាតិ និងស៊ីសំណូក។ លោក Lee Myung-bak ត្រូវបានកាត់ទោសពីបទបង្កើត “មូលនិធីខ្មៅ” តម្លៃរាប់សិបលានដុល្លារ និងទទួលសំណូកពីក្រុមហ៊ុន Samsung Electronics ជាថ្នូរនឹងការលើកលែងការចោទប្រកាន់ចំពោះលោក Lee Kun-hee ដែលជាប្រធានក្រុមហ៊ុននេះ។ លោក Lee Kun-hee ក៏ត្រូវជាប់ពន្ធនាគារផងដែរ ដោយសារទោសគេចពន្ធ។
អតីតមេដឹកនាំមួយរូបផ្សេងទៀតរបស់កូរ៉េខាងត្បូង នោះគឺលោក Roh Moo-hyun ក៏បានធ្វើអត្តឃាត ក្រោយពីត្រូវបានសួរចម្លើយនៅក្នុងការស៊ើបអង្កេតមួយលើបញ្ហាពុករលួយដែលជាប់ទាក់ទិននឹងគ្រួសាររបស់លោក៕
ប្រភព៖ Yonhap
July 11, 2020
អ្នកបាត់បង់ការងារនៅអង់គ្លេស នាំគ្នាទៅស៊ីឈ្នួលបេះផ្លែឈើ ដើម្បីរកប្រាក់ចិញ្ចឹមជីវិត
បើទោះជាប្រាក់ឈ្នួលត្រឹមតែ10ដុល្លារក្នុងមួយម៉ោង ប៉ុន្តែជនជាតិអង់គ្លេសមួយចំនួន នៅតែទៅសុំការងារធ្វើនៅក្នុងកសិដ្ឋានដើម្បីរកប្រាក់ផ្គត់ផ្គង់ជីវភាព ឬយ៉ាងហោចក៏ដើម្បីកុំឱ្យឯកោនិងទំនេរហួសពេកនៅក្នុងសម័យCOVID-19នេះ។
បើសិនជាពេលធម្មតា Ella Chandler នឹងលេង cricket ស្ទើរតែរាល់ថ្ងៃ។ ចំណែក Zak Oyrzynski នឹងធ្វើជាមេចុងភៅនៅទីក្រុងឡុងដ៍។ រីឯ Beth Blease ដែលជាគ្រូបង្វឹកឯកជនម្នាក់ នឹងជួយដល់អតិថិជនជារៀងរាល់ថ្ងៃ ខណៈដែល Sam Richards វិញ នឹងចេញទៅលក់ផលិតផល។
ក៏ប៉ុន្តែ ក្នុងឆ្នាំនេះ ពួកគេបែរជាមានវត្តមាននៅលើវាល និងចំការ និងកសិដ្ឋាន ដោយធ្វើការងារដែលពួកគេនឹកស្មានមិនដល់កាលពីប៉ុន្មានខែមុន នោះគឺការងារបេះបន្លែផ្លែឈើ។ យ៉ាងនេះក្ដី មនុស្សមួយចំនួនក៏នៅតែបង្ហាញអំពីការសប្បាយរីករាយជាមួយការងារទាំងនេះ។
“ការងារនេះសប្បាយណាស់ ប៉ុន្តែក៏ហត់ណាស់ដែរ” Chandler ដែលធ្លាប់ជាកីឡាករម្នាក់ក្នុងក្រុម cricket នៅនូវែលសហ្សេឡង់ថ្លែងដូច្នេះ។ ថ្មីៗនេះ នាងបេះផ្លែស្ត្រូបូរីបានដល់ទៅ250គីឡូក្រាមឯណោះក្នុងរយៈពេលជាង5ម៉ោង។ នាងនិយាយថា “ខ្ញុំពិតជាពេញចិត្តណាស់”។
មុននេះ Chandler បានទទួលដំណឹងថា កសិដ្ឋាននានានៅជនបទ និងនៅជាយក្រុង កំពុងប្រកាសស្វែងរកអ្នកបេះផ្លែឈើ ព្រោះតែខ្វះពលករ។ នាងក៏បានសុំធ្វើការនៅក្នុងស្រុក Surrey ដែលស្ថិតនៅភាគខាងលិចទីក្រុងឡុងដ៍។ ទន្ទឹមនឹងឱកាសរកប្រាក់ អ្នកបាត់បង់ការងារទាំងនេះនៅតែចាត់ទុកថា ជាវិធីដែលពួកគេអាចជួបជុំគ្នានិងជជែកគ្នាលេងនៅពេលដែលប្រទេសជាតិកំពុងស្ថិតក្នុង “ការឡោមព័ន្ធ” របស់COVID-19។
Zak Oyrzynski កំពុងបេះផ្លែស្ត្រូបូរីនៅក្នុងកសិដ្ឋាន Hall Hunter
Zak Oyrzynski ដែលជាមិត្តរួមការងារនៅក្នុងកសិដ្ឋានជាមួយនាង Chandler និយាយថា “យ៉ាងហោចណាស់ខ្ញុំក៏អាចមានការងារធ្វើនឹងគេដែរ”។ លោក Zak Oyrzynski ថ្លែងថា គាត់មានមោទនភាព ដោយសារតែសុំបានការងារធ្វើ និងមិនមានឈ្មោះថា “ដើរទាត់ខ្យល់” នោះដែរ។
មុខរបរបេះផ្លែស្រ្តូបូរីរកបានចំណូលទាបខ្លាំងណាស់។ Oyrzunski ប្រាប់ថា គាត់ទទួលបានប្រាក់ឈ្នួលត្រឹមតែ 8.72ផោន (11ដុល្លារអាមេរិក) ប៉ុណ្ណោះក្នុងមួយម៉ោង។ នៅក្នុងក្រុមហ៊ុនចាត់ចែងកសិដ្ឋាន Hall Hunter ប្រាក់ឈ្នួលគិតជាសប្ដាហ៍កាលពីឆ្នាំមុនគឺ 414ផោន (ជិត520ដុល្លារអាមេរិក)។
Oyrzynski និយាយថា “មនុស្សមួយចំនួនបានបោះបង់ការងារនេះ ព្រោះតែប្រាក់ខែមិនសមតាមបំណង”។ លោកបន្តថា បើទោះជាការងារនេះហាក់មានភាពសប្បាយរីករាយ ប៉ុន្តែ គេត្រូវការគោរពបទបញ្ជាតឹងរឹងមួយចំនួន។ “នេះមិនមែនជាការងារល្អនោះឡើយ”។
ពលករកំពុងបំពេញការងារនៅក្នុងចំការមួយនៅប្រទេសអង់គ្លេស
ជាធម្មតា ការងារបេះផ្លែឈើនៅអង់គ្លេស តែងត្រូវបានធ្វើឡើងដោយក្រុមពលករចំណាកស្រុកធ្វើការតាមរដូវ មកពីអឺរ៉ុបខាងកើត។ ជារឿងរាល់ឆ្នាំ ប្រទេសអង់គ្លេសទទួលយកពលករធ្វើការតាមរដូវប្រមាណជា 70,000នាក់ដើម្បីប្រមូលកសិផល។
ប៉ុន្តែ ដោយសារមានCOVID-19 ទើបបានជាពលករមកពីបរទេសមិនអាចចូលមកកាន់ប្រទេសអង់គ្លេសបាន ខណៈដែលដំណាំត្រូវបានដាំដុះរួចរាល់ហើយ។ ដោយសារខ្វះកម្លាំងពលកម្ម រាជរដ្ឋាភិបាលប្រទេសអង់គ្លេសក៏បានបង្កើតយុទ្ធនាការ “Pick for Britain” ចាប់ពីខែមេសាឆ្នាំ2020 ដើម្បីប្រមូលកម្លាំងពលកម្មក្នុងស្រុក។ ព្រះអង្គម្ចាស់ Charles ក៏ធ្លាប់បានចូលរួមយុទ្ធនាការខាងលើនេះដែរ តាមរយៈការបង្ហោះសារជាវីដេអូអំពាវនាវដល់ពលរដ្ឋ។
នាង Ella Chandler (ស្ត្រីពាក់អាវខ្មៅ) និងមិត្តរួមការងារ ក្នុងពេលសម្រាកថ្ងៃត្រង់
Blease ដែលជាគ្រូបង្វឹកឯកជនម្នាក់ ក៏បានមកធ្វើការជាអ្នកបេះផ្លែឈើ និងវេចខ្ចប់ទំពាំងបារាំង ដោយធ្វើការ9ម៉ោងក្នុងមួយថ្ងៃនៅក្នុងកសិដ្ឋាន Claremont Farm នៅភាគខាងជើងប្រទេសអង់គ្លេស និងទទួលបានប្រាក់ខែទាបមិនគួរឱ្យជឿ។ ប៉ុន្តែ នាងនិយាយថា ការងារកសិកម្មគឺជារង្វាន់ធំជាងប្រាក់ចំណូលទៅទៀត។ នាង Blease បានឱ្យដឹងថា នឹងទិញកសិដ្ឋានមួយកន្លែង ក្រោយពីCOVID-19 លែងមានឥទ្ធិពល ហើយនាងនឹងប្រើប្រាស់កសិដ្ឋាននោះ ដើម្បីធ្វើជាកន្លែងសម្រាប់ទទួលអ្នកដែលមានជំងឺផ្លូវចិត្តជាដើម មកទទួលការព្យាបាល។
ចំណែក Richards វិញ ក៏កំពុងតែធ្វើការនៅក្នុងកសិដ្ឋាន Claremont Farm ក្រោយពីបានបាត់បង់ការមួយនៅក្នុងក្រុមហ៊ុនស្រាបៀមួយ។ Richards ថ្លែងថា ការងារបេះផ្លែស្ត្រូបូរីនេះគឺជាការងារហត់នឿយបំផុត ព្រមទាំងទទួលបានប្រាក់ឈ្នួលទាបទៀតផង។ “ប៉ុន្តែ វាជាការងារដែលធ្វើឱ្យខ្ញុំសប្បាយចិត្តបំផុត ពិតជាចម្លែកណាស់” អ្នកស្រី Richards ថ្លែងដូច្នេះ។
កសិករអង់គ្លេស មានការភ្ញាក់ផ្អើលជាខ្លាំងនៅពេលឃើញអ្នកស្រុកអង់គ្លេសមកធ្វើការជាពលករបេះបន្លែផ្លែឈើយ៉ាងដូច្នេះ៕
ប្រភព៖ NYT
July 10, 2020