Author: សឿន សំណាង

កូនប្រុសមានខាន់ស្លា តែមិនស្របច្បាប់ម្នាក់របស់សពសហស្ថាបនិកក្រុមហ៊ុនធំបំផុតមួយនៅប្រទេសឥណ្ឌូនេស៊ី បានដាក់ពាក្យប្ដឹងទាមទារសិទ្ធិទទួលមរតកក្រុមហ៊ុនដែលឪពុករបស់ខ្លួនបានបង្កើតលើង ពីបងប្អូន5នាក់ផ្សេងទៀតដែលជាមានឪពុកជាមួយ ម្ដាយទីទៃ។

សង្គ្រាមដណ្ដើមសិទ្ធិទទួលមរតកក្នុងបណ្ដាក្រុមហ៊ុនដែលមានតម្លៃរាប់សិបពាន់លានដុល្លារដែលគ្រប់គ្រងដោយក្រុមហ៊ុនមេ Sinar Mas (ឥណ្ឌូនេស៊ី) ទើបតែមានការប្រែប្រួលថ្មីនៅពេលដែលមានកូនម្នាក់ក្នុងចំណោមកូនៗរបស់អតីតស្ថាបនិកក្រុមហ៊ុននេះ មានបំណងកាន់កាប់ភាគហ៊ុនមួយចំនួនរបស់ក្រុមហ៊ុន។

លោក Feddy Widjaja ដែលជាកូនម្នាក់ក្នុងចំណោមកូនៗរបស់អតីតស្ថាបនិក Eka Tjipta Widjaja បានដាក់ពាក្យស្នើសុំឱ្យតុលាការទទួលស្គាល់ថា លោករួមនឹងបងប្អូន5នាក់ផ្សេងទៀតគឺជាអ្នកស្នងមរតកស្របច្បាប់របស់លោក Eka Tjipta Widjaja នៅក្នុងក្រុមហ៊ុនរាប់សិប និងទ្រព្យសម្បត្តិនៃក្រុមហ៊ុន Sinar Mas។ ពាក្យបណ្ដឹងដែលត្រូវបានដាក់ឡើងតុលាការកាលពីថ្ងៃទី16មិថុនា ដោយបានរៀបរាប់ឈ្មោះកូនៗដែលកំពុងទាមទារសិទ្ធិ រួមមាន លោក Freddy Widjaja លោក Indra Widjaja លោក Teguh Ganda Widjaja លោក Muktar Widjaja លោក Djafar Widjaja និងលោក Franky Oesman Widjaja។

ក្រុមហ៊ុន Sinar Mas Group បានច្រានចោលការទាមទាររបស់លោក Frddy Widjaja ដោយយល់ថា វាគឺជារឿង “គ្មានមូលដ្ឋាន”។ ភាគីក្រុមហ៊ុននេះនិយាយថា លោក Freddy Widjaja ដែលជា “កូនគ្មានខាន់ស្លាស្របច្បាប់” មិនមានសិទ្ធិទទួលមរតកណាមួយនៅក្នុងក្រុមហ៊ុននេះឡើយ។

Gandi Sulistiyanto ដែលជានាយកប្រតិបត្តិម្នាក់នៅក្នុងក្រុមហ៊ុន Sinar Mas ប្រកាសថា លោក Freddy ទទួលបានចំណែកទ្រព្យសម្បត្តិទៅតាមបណ្ដាំមរតករបស់លោក Eka Tjipta Wedjaja រួចហើយ ដូច្នេះមិនមានជាប់ទាក់ទងអ្វីទៅនឹងជម្លោះក្នុងត្រកូលរបស់ស្ថាបនិកក្រុមហ៊ុននេះទៀតទេ។

លោក Eka Tjipta Wdjaja ស្ថាបនិករបស់ក្រុមហ៊ុន Sinar Mas បានទទួលមរណភាពកាលពីខែមករា2019 ដោយបានបន្សល់ទុកក្រុមហ៊ុនដ៏ធំ និងរឹងមាំមួយ ដែលនៅមានជីវិតក្រោយវិបត្តិសេដ្ឋកិច្ចលើកមុន។ បច្ចុប្បន្ន Sinar Mas គឺជាក្រុមហ៊ុនមួយក្នុងចំណោមក្រុមហ៊ុនធំៗនៅឥណ្ឌូសេស៊ី ដែលទទួលបានផលប្រយោជន៍ទាំងក្នុងនិងក្រៅបរទេស ដោយធ្វើពាណិជ្ជកម្មក្នុងវិស័យកសិកម្ម ស្បៀងអាហារ ទូរគមនាគមន៍ បច្ចេកវិទ្យា ហិរញ្ញវត្ថុ សុខាភិបាល រុករករ៉ែ ថាមពល អចលនទ្រព្យ ក្រដាស និងវិស័យមួយចំនួនផ្សេងទៀត។ យោងតាមទស្សនាវដ្ដី Bloomberg ក្រុមហ៊ុន Sinar Mas បច្ចុប្បន្នមានទុនឡើងដល់46ពាន់លានដុល្លារអាមេរិក។

លោក Eka Tjipta Widjaja មានស្រុកកំណើតនៅទីក្រុង Quanzhou ប្រទេសចិន ដោយមានឈ្មោះដើមថា Oei Ek Fjhong។ លោក និងគ្រួសារ បានមករស់នៅប្រទេសឥណ្ឌូនេស៊ីតាំងពីនៅក្មេង និងបានចាប់ផ្ដើមបើកក្រុមហ៊ុន Sinar Mas នៅ Makassar ក្នុងឆ្នាំ1938 ដែលពេលនោះ Eka Tjipta Widjaja មានអាយុទើបតែ15ឆ្នាំប៉ុណ្ណោះ។

ឆ្នាំ1972 លោកបានបង្កើតរោងចក្រមួយដែលមានជំនាញខាងផលិត sodium bicarbonate ដែលក្រោយមកវាបានក្លាយជាក្រុមហ៊ុនផលិតក្រដាសដំបូងគេរបស់ Sinar Mas ដែលមានឈ្មោះថា Tjiwi Kimia។ ក្នុងឆ្នាំ1972ដដែល លោកបានពង្រីកវិសាលភាពទៅកាន់វិស័យអចលនទ្រព្យជាមួយនឹង Duta Pertiwi ដែលជាក្រុមហ៊ុនបុត្រសម្ព័ន្ធ ហើយមកដល់បច្ចុប្បន្ន ក្រុមហ៊ុនបុត្រសម្ព័ន្ធ Bumi Serpong Damai របស់ Duta Pertiwi
គឺជាក្រុមហ៊ុនអចលនទ្រព្យធំជាងគេបំផុតមួយរបស់ឥណ្ឌូនេស៊ី។

លោក Ek Tjipta Widjaja បានបង្ហាញវត្តមាននៅក្នុងតារាងចំណាត់ថ្នាក់មហាសេដ្ឋីជាលើកដំបូងនៅក្នុងឆ្នាំ1991 នេះបើតាមទស្សនាវដ្ដី Forbes។ ចំណែកទស្សនាវដ្ដី Bloomberg វិញ ឱ្យដឹងថា អ្នកជំនួញរូបនេះ បានទទួលមរណភាពនៅពេលដែលទ្រព្យរបស់លោកបានកើនឡើងដល់ប្រមាណជា9.3ពាន់លានដុល្លារអាមេរិក។

មិនត្រឹមតែបានបន្សល់ទ្រព្យសម្បត្តិយ៉ាងច្រើននោះទេ លោក Eka ថែមទាំងមានប្រពន្ធកូនជាច្រើននាក់ទៀតផង ដែលនេះបាននាំឱ្យមានជម្លោះដណ្ដើមទ្រព្យមរតកនាបច្ចុប្បន្ន។ លោក Eka មានប្រពន្ធស្របច្បាប់ចំនួន3នាក់។

ក្រុមហ៊ុន Sinar Mas បច្ចុប្បន្ន ភាគច្រើនត្រូវបានគ្រប់គ្រងដោយកូនប្រុសចំនួន4នាក់របស់លោកជាមួយនឹងប្រពន្ធទីមួយ។ ក្នុងនោះ Teguh Ganda Wijaya ដែលជាកូនច្បង គ្រប់គ្រង APP (Asia Pulp & Paper) ខណៈដែល Indra Widjaja ជាកូនបន្ទាប់ គ្រប់គ្រងខ្ទង់វិនិយោគទៅលើសេវាកកម្មហិរញ្ញវត្ថុនិងរុករករ៉ែ ចំណែក Muktar Widjaja កាន់កាប់បណ្ដាក្រុមហ៊ុនអចលនទ្រព្យ រីឯ Franky Oesman Widjaja គ្រប់គ្រងមុខជំនួញក្នុងវិស័យកសិកម្មនិងស្បៀងអាហាររបស់ក្រុមហ៊ុនមេ Sinar Mas។

ក្រៅពីនេះ ក៏នៅមានកូនៗជាច្រើនផ្សេងទៀតរបស់លោក Eka កំពុងតែធ្វើជំនួញដាច់ដោយឡែក និងជាអ្នកមាននៅតំបន់ផ្សេងៗផងដែរ ក្នុងនោះ លោក Oei Hong Leong គឺជាមហាសេដ្ឋីម្នាក់ប្រចាំប្រទេសសឹង្ហបុរី ដោយមានទ្រព្យប្រមាណជា1.4ពាន់លានដុល្លារអាមេរិក។ លោក Frankle Djafar Widjaja កំពុងកាន់កាប់ក្រុមហ៊ុនវិនិយោគ Bund Center Investment នៅសឹង្ហបុរី។ លោកស្រី Sukmawati Widjaja គ្រប់គ្រងក្រុមហ៊ុនអចលនទ្រព្យ Top Global នៅសឹង្ហបុរី។

ចំណែកលោក Freddy Widjaja វិញ គឺជាកូនរបស់លោក Eka ជាមួយនឹងប្រពន្ធម្នាក់ផ្សេងទៀត ឈ្មោះ Lidia Herawati ដែលបានរៀបការតាមប្រពៃណី ប៉ុន្តែមិនបានចុះអេតាត៍ ស៊ីវិល តាមច្បាប់នោះឡើយ៕

ប្រភព៖ Bloomberg, Forbes

ការដែលមូលបត្រ Tesla បានកើនឡើងយ៉ាងលឿនក្នុងមួយរយៈពេលខ្លីកន្លងមក បាននិងកំពុងជួយឱ្យលោក Elon Musk ឆ្ពោះទៅក្បែរប្រាក់រង្វាន់2.4ពាន់លានដុល្លារដែលស្ថិតនៅក្នុងកញ្ចប់ប្រាក់រង្វាន់ដែលមានតម្លៃជាង55ពាន់លានដុល្លាររបស់ក្រុមហ៊ុនផលិតរថយន្តអគ្គិសនីមួយនេះ។

រាប់ចាប់ពីដើមឆ្នាំមកទល់នឹងពេលបច្ចុប្បន្ន មូលបត្រ Tesla បានកើនឡើង275% នាំឱ្យក្រុមហ៊ុនផលិតរថយន្តអគ្គិសនេះ ក្លាយជាអ្នកផលិតរថយន្តដែលមានទុនច្រើនជាងគេបង្អស់ក្នុងពិភពលោក ដោយមានតម្លៃជាង290ពាន់លានដុល្លារ។

CEO របស់ក្រុមហ៊ុន Tesla គឺលោក Elon Musk មិនទទួលបានប្រាក់ខែ ឬប្រាក់រង្វាន់ផ្ទាល់ពី Tesla នោះទេ។ យោងតាមកិច្ចព្រមព្រៀងជាមួយភាគហ៊ុនិកកាលពីឆ្នាំ2018 លោក Elon Musk នឹងទទួលបានមូលបត្រសរុបឡើងដល់20.3លានរហូតដល់ឆ្នាំ2028 ពោលគឺលោក Musk មានសិទ្ធិលក់ ឬរក្សាទុកមូលបត្រទាំងនេះ បើសិនជា Tesla សម្រេចបានគោលដៅនៃការរកស៊ី និងទំហំទុនដែលបានកំណត់។ រង្វាន់ទាំងអស់សម្រាប់លោក Musk នឹងត្រូវបានចែកជា12លើក។ កាលពីខែឧសភា លោក Musk បានទទួលខ្ទង់ប្រាក់រង្វាន់ជាលើកទីមួយក្នុងកញ្ចប់រង្វាន់ខាងលើនេះ។

នៅពេលទុនជាមធ្យមក្នុងរយៈពេល6ខែរបស់ Tesla បានឡើងដល់150ពាន់លានដុល្លារ លោក Musk នឹងទទួលបានរង្វាន់បន្ទាប់ទៀត នោះគឺសិទ្ធិទិញមូលបត្រចំនួន1.69លានហ៊ុនក្នុងតម្លៃទាបជាងទីផ្សារជាក់ស្ដែង។ សិទ្ធិនេះនឹងនាំមកនូវខ្ទង់ប្រាក់ចំណេញប្រមាណជា2.4ពាន់លានដុល្លារសម្រាប់លោក Musk។

កំណើននៃមូលបត្រ Tesla ក៏បានជួយបង្កើនទំហំទ្រព្យរបស់លោក Musk ឱ្យឡើងដល់70.5ពាន់លានដុល្លារ ដែលនេះបាននាំឱ្យលោកក្លាយជាអ្នកមានជាងគេលំដាប់ទី7ក្នុងតារាងចំណាត់ថ្នាក់កំពូលអ្នកមានក្នុងពិភពលោករបស់ Bloomberg Billionaires Index។

ក្រុមអ្នកវិនិយោគកំពុងតែរង់ចាំតាមដានរបាយការណ៍លទ្ធផលនៃការធ្វើពាណិជ្ជកម្មក្នុងត្រីមាសទី2របស់ Tesla ដែលនឹងត្រូវបានប្រកាសនៅថ្ងៃទី22កក្កដាខាងមុខ៕

ប្រភព៖ សារព័ត៌មានបរទេស

ទ្រព្យ​សម្បត្តិ​របស់​មហា​សេដ្ឋី​ឥណ្ឌា​ លោក Mukesh Ambani ទើប​តែ​បាន​កើន​ឡើង​លើស​ពី​ទំហំ​​ទ្រព្យ​របស់​លោក​ Elon Musk និង​សហស្ថាបនិក​2​រូប​របស់ក្រុម​ហ៊ុន​​ Google គឺ​លោក​ Sergey Brin និង​លោក​ Larry Page ហើយ​បាន​ក្លាយ​ជា​អ្នក​មាន​ជាង​គេ​លំដាប់​ទី​6​នៅក្នុង​ពិភពលោក​។

លោក​តាម​ Bloomberg Billionaires Index បន្ទាប់​ពី​បាន​លោត​រំលង​មហា​សេដ្ឋី​ Warren Buffett កាល​ពី​ចុង​សប្ដាហ៍​​មុន ប្រធាន​ក្រុម​ហ៊ុន​ Reliance Industries របស់​ឥណ្ឌា​ គឺ​លោក​ Mukesh Ambani បន្ត​រក​បាន​ប្រាក់​យ៉ាង​ច្រើន​បន្ថែម​ទៀត ដែល​នេះ​បាន​ជួយ​ឱ្យ​ទ្រព្យ​សរុប​របស់​លោក​កើន​ឡើង​ដល់​72.4​ពាន់​លាន​ដុល្លារ​អាមេរិក​។ មូលបត្រ​របស់​ក្រុម​ហ៊ុន​ពហុវិស័យ​នេះ​បាន​កើនជាង​ពាក់​កណ្ដាល​រាប់​ចាប់​ពីពេល​បាន​​ធ្លាក់​ដល់​បាត​កាល​ពី​ខែ​មីនា​។ ការ​កើន​ឡើង​នេះ​គឺ​ដោយ​សារ​ផ្នែក​ឌីជីថល់​ដែល​បាន​ទាក់​ទាញ​ខ្ទង់​វិនិយោគ​រាប់ពាន់​លាន​ដុល្លារ​ពី​បណ្ដា​ក្រុម​ហ៊ុន​ធំ​ៗ​ដូច​ជា​ Facebook, និង​ Silver Lake ជា​ដើម​ ហើយ​ថ្មី​ៗ​នេះ​ក៏​មាន​ការ​ចូល​រួម​វិនិយោគ​ពី​ក្រុម​ហ៊ុន​ Qualcomm​ ផងដែរ។

ទន្ទឹម​នឹង​នេះ ​មូលបត្រ​​នៃ​ក្រុម​ហ៊ុន​បច្ចេក​វិទ្យា​នានា​នៅ​សហរដ្ឋ​អាមេរិក​ កាល​ពី​ម្សិល​មិញ​ត្រូវ​បាន​លក់​ចេញ​ជា​បន្ត​បន្ទាប់​។ ប្រការ​នេះ​បណ្ដាល​ឱ្យ​ទ្រព្យ​របស់​លោក​ Page នៅ​សល់​ត្រឹម​តែ​71.6​ពាន់​លាន​ដុល្លារ​ ខណៈ​ដែល​ទ្រព្យ​របស់​លោក​ Brin នៅ​ត្រឹម​69.4​ពាន់​លាន​ដុល្លារ​ រីឯលោក​ Musk ចុះ​មក​នៅ​ត្រឹម​68.6​ពាន់​លាន​ដុល្លារ​។ មុន​នោះ​ ទ្រព្យ​របស់​លោក​ Buffett បាន​ថយ​ចុះ​អស់​ជិត​3​ពាន់​លាន​ដុល្លារផងដែរ​ ដោយ​សារ​ការ​បរិច្ចាគ​សម្រាប់​សកម្ម​ភាព​មនុស្ស​ធម៌​។

កត្តា​ទាំង​ឡាយ​ខាង​លើ​នេះ បាន​ជួយ​ឱ្យ​មហា​សេដ្ឋី​ឥណ្ឌា លោក Mukesh Ambani ក្លាយ​ជា​អ្នក​មាន​ជាង​គេ​លំដាប់​ទី​6​ក្នុង​ពិភពលោក​។ កាលពី​ជិត​1ខែ​មុន លោក​ Mukesh ក៏​បាន​ក្លាយ​ជា​តំណាង​តែ​ម្នាក់​គត់​របស់​ទ្វីប​អាស៊ី​ដែល​បាន​ឡើង​ដល់​ top 10 នៃ​មហា​សេដ្ឋី​ពិភពលោក​​។

ក្រុម​ហ៊ុន​ថាម​ពល​របស់​មហា​សេដ្ឋី Mukesh កំពុង​តែ​បង្វែរ​គោល​ដៅ​បន្តិ​ច​ម្ដង​ៗ​ទៅ​រក​ពាណិជ្ជកម្ម​អេឡិច​ត្រូនិច។ ថ្មី​ៗ​នេះ​ ប្រទេស​ឥណ្ឌា​ទទួល​បាន​ចំណាប់អារម្មណ៍​ច្រើន​ពី​បណ្ដា​ក្រុម​ហ៊ុន​បច្ចេក​វិទ្យា​​បរទេស​ ពិសេស​គឺ​នៅ​តំបន់​ជ្រលង​ភ្នំ​ Silicon។ ក្រុម​ហ៊ុន​ Google កាល​ពី​ម្សិល​មិញ​បាន​ឱ្យ​ដឹង​ថា​ នឹង​ចំណាយ​ប្រាក់​10​ពាន់​លាន​ដុល្លារ​ក្នុង​ប៉ុន្មាន​ឆ្នាំ​ខាង​មុខ​នេះ​ដើម្បី​ជួយ​បង្កើន​ល្បឿន​ឆ្ពោះ​ទៅ​រក​វិស័យ​ឌីជីថល់​របស់​ប្រទេស​ដែល​មាន​ប្រជា​ជន​ច្រើន​ជាង​គេ​លំដាប់​ទី​2​ក្នុង​ពិភពលោក​មួយ​នេះ​ផងដែរ​​។

លោក Mukesh Ambani បាន​ចូល​រួម​ធ្វើ​កិច្ច​ការ​ក្រុម​ហ៊ុន​របស់​គ្រួ​សារ​លោក​ តាំង​ពី​ទសវត្សរ៍​ទី​80​នៃ​សហស្សវត្សរ៍​មុន​។ ក្រោយ​ពី​ឪពុក​របស់​លោក​បាន​ទទួល​មរណភាព​ លោក​ Mukesh និង​ប្អូន​ប្រុសឈ្មោះ​ Anil ​ក៏​បាន​ចែក​ក្រុម​ហ៊ុន​នេះ​ជា​2ចំណែក​​ ក្នុង​នោះ​លោក​ Mukesh ទទួល​គ្រប់​គ្រង​ផ្នែក​ចម្រាញ់​ប្រេង​ គីមី​ប្រេង​ ឧស្ម័ន​ និង​វាយណ​ភណ្ឌ​។ ជំនួញ​របស់​លោក​​ Mukesh ទទួល​បាន​ជោគ​ជ័យ​ច្រើន​ ហើយ​ក៏​បាន​​ពង្រីក​វិសាល​ភាព​ទៅ​ក្នុង​វិស័យ​ទូរគមនាគមន៍​ ពាណិជ្ជ​កម្ម​អេឡិច​ត្រូនិច ហើយ​លោក​ Mukesh ក៏​បាន​ក្លាយ​ជា​អ្នក​មាន​ជាង​គេ​បង្អស់​នៅ​ទ្វីប​អាស៊ី​កាល​ពី​ប៉ុន្មាន​ឆ្នាំ​មុន៕

ប្រភព៖ Bloomberg

ឱកាសដែលសេដ្ឋកិច្ច នឹងស្ដារខ្លួនបានឡើងវិញយ៉ាងឆាប់រហ័ស ដូចដែលអ្នកកំពុងទូលទុក្ខជាច្រើនចង់បាននោះ ប្រហែលជាពិបាកនឹងទៅរួចណាស់ នៅពេលមើលឃើញការឆ្លងរាលដាលរបស់មេរោគកូរ៉ូណាប្រភេទថ្មីសព្វថ្ងៃនេះ ដែលនៅតែគួរឱ្យខ្លាចដដែល ជាពិសេសក្នុងទ្វីបអាមេរិក ចាប់ពីកាណាដា រហូតទៅដល់អាហ្សង់ទីន ធ្វើឱ្យក្លាយជាមណ្ឌលកណ្ដាលនៃការឆ្លងរាលដាលបាត់ទៅហើយ។

និងមិនទាន់មានដំណោះស្រាយចេញមកថា នឹងចាត់ការយ៉ាងណានៅឡើយ នៅពេលមិនទាន់មានវ៉ាក់សាំង និងថ្នាំព្យាបាលដែលអាចប្រើបានជាទូទៅស្ថិតក្នុងតម្លៃដែលមិនថ្លៃហួសហេតុពេក ដូចដែលកំពុងមាននាពេលបច្ចុប្បន្ននេះ ដូចជាថ្នាំ Remdesivir របស់ក្រុមហ៊ុន Gilead ដែលមានតម្លៃខ្ពស់កប់ពពក គឺជាង 3ពាន់ដុល្លារក្នុង1ឈុត។

សហរដ្ឋអាមេរិក និងប្រេស៊ីល និងប្រទេសនៅក្នុងតំបន់អាមេរិកឡាទីន គឺជាតំបន់ដែលមិនទាន់អាចគ្រប់គ្រងការឆ្លងរាលដាលបាននៅឡើយ។ សហរដ្ឋអាមេរិក ក៏នៅតែជាប្រទេសដែលមានចំនួនអ្នកឆ្លងមេរោគ និងស្លាប់ខ្ពស់ជាងគេបំផុតលំដាប់លេខ1 ក្នុងពិភពលោក និងមានប្រទេសប្រេស៊ីលតាមពីក្រោយលំដាប់លេខ2 និងប្រទេសមិកស៊ិក លំដាប់លេខ3។

ហើយមេដឹកនាំសហរដ្ឋអាមេរិក និងប្រេស៊ីល ថែមទាំងមិនបានយកចិត្តទុកដាក់នឹងការពាក់ម៉ាស់អនាម័យការពារការឆ្លងមេរោគតាំងពីដំបូងទៀតផង ដោយលោកដូណាល់ ត្រាំ បានលើកឡើងថា បើពាក់ម៉ាស់ការពារ នឹងធ្វើឱ្យមើលឃើញដូចជាមនុស្សទន់ជ្រាយ និងគ្មានសមត្ថភាពគ្រប់គ្រងស្ថានការណ៍បាន ដែលគំនិតនេះ អាចរាប់បានថា ជាគំនិតដែលឡប់សតិមែនទែន។

លោកត្រាំ ថែមទាំងបានអះអាងឱ្យប្រជាជនអាមេរិកលង់ជឿទៀតផងថា មេរោគវីរុសកូរ៉ូណានេះ មិនមានគ្រោះថ្នាក់អ្វីទេ ទាំងដែលមានពលរដ្ឋអាមេរិកាំងឆ្លងមេរោគច្រើនដល់ទៅជាង 3.3លាននាក់ និងមានអ្នកស្លាប់ជាង 1.3សែននាក់ទៅហើយនោះ និងមិនព្រមទទួលស្គាល់ថា ខ្លួនឯងបានដំណើរការនយោបាយ និងវិធានការផ្សេងៗក្នុងការទប់ទល់នឹងការឆ្លងរាតត្បាតដែលខុសឆ្គងឡើយ។

មេដឹកនាំប្រទេសប្រេស៊ីល ឆាអ៊ីរ៍ បូលសូណារ៉ូ ដែលបានឆ្លងមេរោគកូរ៉ូណារួចទៅហើយ ព្រោះតែមិនព្រមពាក់ម៉ាស់ការពារនោះ ធ្លាប់បានប្រកាសកាលពីពេលមុននេះថា មេរោគវីរុសកូរ៉ូណា គ្រាន់តែជាមេរោគ “គ្រុនផ្ដាសាយតូចមួយ” ខណៈពេលនេះ កំពុងត្រូវរងបណ្ដឹងដោយអ្នកសារព័ត៌មាន ដែលទៅធ្វើព័ត៌មានពីមេដឹកនាំដែលបានបើកម៉ាស់ការពារនិយាយទទួលស្គាល់ថា ខ្លួនឯងកំពុងឆ្លងមេរោគ។

ក្រុមប្រទេសអាមេរិកឡាទីន ដូចជាប៉េរូ ឈីលី កូឡុំបៀ នៅតែជាប្រភពនៃការឆ្លងរាលដាល ដែលហុចផលប៉ះពាល់ដល់សេដ្ឋកិច្ចក្នុងតំបន់អាមេរិកឡាទីន ដែលមានវិបត្តិបំណុលមិនបង្កឱ្យកើតមានកម្រៃបានច្រើនឡើង រួមទាំងមានអ្នកគ្មានការងារធ្វើជាច្រើន គ្មានប្រាក់ចំណូល និងមានវិបត្តិហិរញ្ញវត្ថុយ៉ាងធ្ងន់ធ្ងរ។

បញ្ហាសេដ្ឋកិច្ចក្នុងប្រទេសវេណេហ្ស៊ុយអេឡា ធ្ងន់ធ្ងរ ធ្វើឱ្យមនុស្សរត់ភៀសខ្លួន គេចចេញពីក្ដីលំបាក ការខ្វះខាតចំណីអាហារ ទៅរស់នៅក្នុងប្រទេសជិតខាង និងព្យាយាមរត់ភៀសខ្លួនទៅសហរដ្ឋអាមេរិក ដែលត្រូវបានចោទប្រកាន់ថា ជាអ្នកបង្កបញ្ហាដល់ប្រទេស និងបានប្រកាសនយោបាយបិទប្រទេស ហាមមនុស្សចូល…។

នៅពេលសហរដ្ឋអាមេរិក ដែលមានទំហំសេដ្ឋកិច្ចលំដាប់លេខ1 ក្នុងពិភពលោក ត្រូវធ្លាក់សភាពសោកសៅ ទាំងផ្នែកផលិតកម្មឧស្សាហកម្ម ហិរញ្ញវត្ថុ រួមទាំងការលក់រាយផងនោះ បើទោះជាមានសញ្ញាថា ល្អឡើងវិញក៏ដោយ តែក៏នៅមិនទាន់មានស្ថិរភាពដែរ ដោយអាចព្យាករបានតាមរយៈ Index ផ្សារហ៊ុន Dow Jones ដែលនៅតែប្រែប្រួលយ៉ាងឆាប់រហ័ស ទើបធ្វើឱ្យបញ្ហាវីរុសកូរ៉ូណានៅក្នុងសហរដ្ឋអាមេរិក មានភាពស្មុគស្មាញ ព្រោះកើតមានទំនាស់គ្នាទាំងក្នុងកម្រិតជាតិ និងកម្រិតមណ្ឌលរដ្ឋនានា ដោយក្នុងកម្រិតជាតិនេះ មេដឹកនាំមន្ទីរសេតវិមាន លោកដូណាល់ ត្រាំ នៅតែជាគូទំនាស់ជាមួយនឹងក្រុមអ្នកជំនាញការ និងគ្រូពេទ្យដែលរៀបផែនការទប់ទល់សភាវវិបត្តិ។

ជាក្រុមអ្នកធ្វើការងារប្រចាំមន្ទីរសេតវិមាន មានលោកវេជ្ជបណ្ឌិត អ៊ែនថូនី ហ្វៅស៊ី ដែលមានការយល់ឃើញខុសពីលោកត្រាំ ដែលមិនជឿជាក់ក្នុងគោលការណ៍របស់វិទ្យាសាស្ត្រ ដូច្នេះការណែនាំផ្សេងៗរបស់លោកដុកទ័រហ្វៅស៊ី ក៏មិនត្រូវបាននាំយកទៅធ្វើជាគោលការណ៍ប្រតិបត្តិដោយអ្នកដឹកនាំប្រទេសដែរ។

ដំបូន្មានផ្សេងៗ ដូចជា ត្រូវពាក់ម៉ាស់អនាម័យការពារ ត្រូវរក្សាគម្លាតឆ្ងាយពីគ្នាក្នុងសង្គម ត្រូវរក្សាទុកវិធានការគ្រប់គ្រងតឹងរ៉ឹង ក៏ត្រូវបានធ្វើព្រងើយកន្តើយដោយលោកត្រាំ ដែលមិនព្រមពាក់ម៉ាស់ការពារតាំងពីកើតមានការឆ្លងរាលដាល រហូតដំណាក់កាលត្រូវទៅសួរសុខទុក្ខកងទាហានរងរបួសនៅឯមជ្ឈមណ្ឌលពេទ្យយោធា វ៉ធើរ រីដ កាលពីចុងសប្ដាហ៍កន្លងទៅ ទើបបានឃើញលោកត្រាំ ពាក់ម៉ាស់ការពារពណ៌ខ្មៅ ដើរនាំមុខក្រុមអ្នកទៅសួរសុខទុក្ខទាហានរងរបួស ធ្វើឱ្យមើលទៅ ឃើញរាងចម្លែក ប្រៀបដូចមនុស្សក្រៅពិភពចុះមកលេងផែនដី។

ឬដោយសារតែលោកត្រាំភ័យខ្លាចឈឺ ទើបព្រមពាក់ម៉ាស់ការពារ? ឬខ្លាចស្លាប់? តែបើពាក់បែបគ្មានមូលហេតុអ្វីជំរុញចិត្ត ឬត្រូវបានបង្ខំ ក៏នឹងបាក់មុខ ដូច្នេះហើយ ទើបការចុះទៅមជ្ឈមណ្ឌលពេទ្យយោធានោះ គឺជាដំណោះស្រាយ សម្រាប់លោកត្រាំ និងបរិវារ ដែលមិនចង់ឱ្យគេមើលឃើញថា ជាពួកឆាប់ផ្អើល…។

ប្រជាជនអាមេរិកាំងស្បែកស ដែលស្រឡាញ់ចូលចិត្តលោកត្រាំ ក៏យកតម្រាប់តាម ប្រកាសគាំទ្រលោកត្រាំយ៉ាងពេញទំហឹង អាងសិទ្ធិសេរីភាព ទោះស្លាប់ក៏មិនថាដែរ សុំឱ្យតែបានរក្សាសិទ្ធិសួនបុគ្គល មិនមានអ្នកណាមកបញ្ជាបាន…។

ក្នុងកម្រិតមណ្ឌលរដ្ឋ ក៏មានបញ្ហាទំនាស់ផ្នែកផ្នត់នយោបាយ…កាលពីពេលមុននេះ មានការបើកចំហឡើងវិញជាច្រើនរដ្ឋ ដែលមានអភិបាលស្ថិតក្នុងក្រុមបក្ស រីផាប្លីកាន់ និងបានកើតមានការឆ្លងរាលដាលជាថ្មី រលកទី2 ធ្វើឱ្យអភិបាលក្រុងជាច្រើនទីក្រុងដែលស្ថិតក្នុងគណបក្ស ដេម៉ូហ្ក្រេត ត្រូវប្រកាសបិទទីក្រុង។

នៅពេលការទប់ទល់នឹងការឆ្លងរាលដាល ខ្វះឯកភាពខាងផ្នែកនយោបាយ ធ្វើឱ្យមិនអាចធ្វើការបានយ៉ាងមានប្រសិទ្ធផលឡើយ រដ្ឋនីមួយៗ ក៏មានច្បាប់កំណត់វិធានការផ្សេងរបស់ខ្លួនឯង ទើបធ្វើឱ្យមានចំណុចឆ្លងរាលដាលឡើងជាថ្មី មានតួលេខកើនឡើងច្រើន។ មេដឹកនាំសេតវិមាន ខ្វះការដឹកនាំ រឹតតែមានបញ្ហាជាមួយក្រុមវេជ្ជបណ្ឌិតជំនាញយ៉ាងខ្លាំងក្លាផងនោះ លោកត្រាំក៏លែងមើលមុខលោកវេជ្ជបណ្ឌិតហ្វៅស៊ី ធ្វើឱ្យកើតមានការបែងចែកបក្សពួក ហើយពួកកូនចៅលោកត្រាំ ក៏មិនធ្វើតាមនយោបាយរបស់លោកវេជ្ជបណ្ឌិតហ្វៅស៊ី…ទំនាស់ចម្បងគឺ លោកត្រាំ ជឿលើសញ្ជាតិញាណខ្លួនឯងខ្លាំងជាងភ័ស្តុតាងជាក់ស្ដែង និងលទ្ធផលរបស់ការវិភាគស្រាវជ្រាវខាងវិទ្យាសាស្ត្រ។

ជាទូទៅ ការធ្វើប្រជាមតិពីការយល់ឃើញរបស់ប្រជាជនអាមេរិកាំង គឺលោកវេជ្ជបណ្ឌិតហ្វៅស៊ី បានទទួលការជឿទុកចិត្តខ្លាំងជាងលោកត្រាំ និងជាអ្នកដែលបានធ្វើការជាមួយប្រធានាធិបតីមុនៗនេះជាច្រើននាក់ និងទទួលបានការជឿទុកចិត្តលើផ្នែកចំណេះដឹង និងសមត្ថភាព តែជាមួយលោកត្រាំ មិនស៊ីខ្សែគ្នាយ៉ាងខ្លាំងក្លា…។

ដូច្នេះ មណ្ឌលរដ្ឋនីមួយៗ ត្រូវមើលថែទាំគ្នាឯង ដោយមិនបណ្ដោយឱ្យលោកត្រាំដឹកនាំសហរដ្ឋអាមេរិក ទៅតាមផ្លូវដែលខ្លួនឯងត្រូវការឡើយ មិនថាវានឹងល្អប្រសើរឡើង ឬកាន់តែអាក្រក់ទៅក៏ដោយ។ ប្រជាជនអាមេរិក ត្រូវបានបដិសេធមិនឱ្យចូលប្រទេសជាច្រើន ដូចជាអឺរ៉ុបជាដើម ត្រូវបានមើលឃើញថា ពលរដ្ឋអាមេរិក ជាក្រុមដែលមានសក្ដានុពលខាងចម្លងសាយភាយមេរោគ។

ទោះជាសហរដ្ឋអាមេរិក អាចនឹងចាត់ការរឿងការឆ្លងរាលដាលរបស់មេរោគកំណាចនេះបានក៏ដោយ តែក៏នៅមានបញ្ហាសង្គ្រាមពាណិជ្ជកម្មជាមួយចិន និងទំនាស់ជាមួយប្រទេសផ្សេងៗទៀតដែរ ឯលោកត្រាំ ដែលកំពុងបារម្ភកង្វល់រឿងឱកាសក្នុងការចាញ់ការបោះឆ្នោតដណ្ដើមកៅអីប្រធានាធិបតីអាណត្តិទី2 នេះផង អាចនឹងធ្វើអ្វីឆ្កួតៗ ដើម្បីស្ដារពិន្ទុសំឡេងគាំទ្រឡើងវិញ ក៏អាចថាបានដែរ…៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

ការ​ដក​ទុន​បន្តិច​ម្ដងៗ​នេះ​ បាន​កើត​ឡើង​នៅ​ពេល​លោក Jack Ma បាន​ចាក​ចេញ​ពី​តំណែង​ប្រធាន​ក្រុម​ហ៊ុន​ Alibaba កាលពី​ខែ​កញ្ញា​2019 ហើយ​ការ​លក់​មូល​បត្រ​នេះ​ក៏​ត្រូវ​បាន​គេ​ជឿ​ថា គឺ​ដើម្បី​យក​ប្រាក់​ទៅ​ធ្វើ​សកម្ម​ភាព​មនុស្ស​ធម៌​។

របាយ​ករណ៍​ប្រចាំ​ឆ្នាំ​របស់ Alibaba Group ដែល​ទើប​ត្រូវ​បាន​ប្រកាស​ បាន​ឱ្យ​ដឹង​ថា ភាគ​ហ៊ុន​របស់​ហសស្ថាបនិក​ Jack Ma បាន​ថយ​ចុះ​ពី​6.4​% មក​នៅ​ត្រឹម​4.8​%​ក្នុង​ឆ្នាំ2019។ បើ​គិត​តាម​តម្លៃ​ទីផ្សារ​បច្ចុប្បន្ន ភាគ​ហ៊ុន​នេះគឺ​​ប្រហាក់​ប្រហែល​​នឹង​9.6​ពាន់​លាន​ដុល្លារ​អាមេរិក​។

ការ​ដក​ទុន​បន្តិច​ម្ដងៗ​នេះ​ បាន​កើត​ឡើង​នៅ​ពេល​លោក Jack Ma ចាក​ចេញ​ពី​តំណែង​ប្រធាន​ក្រុម​ហ៊ុន​ Alibaba កាលពី​ខែ​កញ្ញា​ឆ្នាំ​មុន​ ដែល​នេះ​ត្រូវ​បាន​គេ​យល់​ថា​ លោក​ Jack Ma ធ្វើ​ឡើង​​ដើម្បី​ផ្ដោត​លើ​សកម្ម​ភាព​មនុស្ស​ធម៌​ឱ្យ​បាន​ច្រើន​ជាង​មុន។ Alibaba មិន​បាន​ប្រកាស​បញ្ជាក់​អំពី​តម្លៃ​ជា​មធ្យម​របស់​មូលបត្រ​របស់​ខ្លួន​នោះ​ទេ​។ ក្នុង​រយៈ​ពេល​ពេញ​មួយ​ឆ្នាំ​2019​ មូលបត្រ​ Alibaba បាន​កើន​ឡើង​ដល់​ទៅ​40​%​ ធៀប​នឹង​ឆ្នាំ​​2018។​

មូលបត្រ​របស់​ Alibaba កើន​ឡើង​បែប​នេះ​ ក៏ព្រោះ​តែ​លទ្ធ​ផល​នៃ​ការ​ធ្វើ​ជំនួញ​ បាន​កើន​ឡើង​លើស​ពី​ការ​រំពឹង​ទុក​ បើ​ទោះ​ជាកំណើន​​សេដ្ឋ​កិច្ច​ប្រទេស​ចិន​​បាន​ធ្លាក់​ចុះ​យ៉ាង​ណា​ក៏​ដោយ​។ បញ្ហា​វិបត្តិ​សុខ​ភាព​ដែល​បង្ក​ឡើង​ដោយ​COVID-19 បាន​បណ្ដាល​ឱ្យ​ប្រជា​ជន​ងាក​មក​ទិញ​ទំនិញ​តាម​អនឡាញ​ច្រើន​ជាង​ធម្មតា​ ដោយ​សារ​ពួកគេ​ត្រូវ​នៅ​ផ្ទះ​ព្រោះ​បម្រាម​គោចរ​។

ភាគ​ហ៊ុន​របស់​អនុប្រធាន​ក្រុម​ហ៊ុន​ Alibaba លោក Joseph Tsai ក៏​បាន​ថយ​ចុះ​ក្នុង​អំឡុង​ពេល​នេះ​ដែរ ពោល​គឺ​ថយ​ចុះ​ពី​2.3​% មក​នៅ​ត្រឹម​1.6​%។ មូល​បត្រ​ចំនួន1.6​% របស់​លោក Joseph Tsai មាន​តម្លៃ​ប្រមាណ​ជា​4.1​ពាន់​លាន​ដុល្លារ​អាមេរិក​។ ទាំង​លោក​ Jack Ma ទាំង​លោក Joseph Tsai សុទ្ធ​តែ​កំពុង​កាត់​បន្ថយ​វត្តមានរបស់​ខ្លួន​​នៅក្នុង​​ក្រុម​ហ៊ុន​ បន្ទាប់​ពី​ Daniel Zhang ត្រូវ​បាន​ប្រកាស​​ឱ្យ​ឡើង​កាន់កាប់​តំណែង​ជា​ប្រធាន​ជំនួស​លោក​ Jack ma។ លោក Daniel Zhang បាន​គ្រប់​គ្រង​តំណែង​នេះ​ចាប់​ពី​ខែ​កញ្ញា​2019។

ឆ្នាំ​នេះ ទាំង​លោក Ma ទាំង​លោក Tsai ក៏​បាន​រួមចំណែក​ផ្ដល់​ជំនួយ​ជា​ឧបករណ៍​ការ​ពារ​សុខ​ភាព​​ចំនួន​រាប់​លាន​ឈុត​ តាម​រយៈ​មូលនិធិមនុស្សធម៌​ សម្រាប់​ជួយ​ដល់​មន្ទីរ​ពេទ្យ​នានា​ក្នុង​ពិភពលោក​ ក្នុង​បំណង​​ទប់​ស្កាត់​COVID-19។ ក្នុង​របាយ​ការណ៍​មួយ​កាល​ពី​ខែ​មេសា​2019 របស់​គណកម្មការ​មូលបត្រ​សហរដ្ឋ​អាមេរិក​ SEC (U.S. Securities and Exchange Commission) បាន​ឱ្យ​ដឹង​ថា​ មហាសេដ្ឋី​ Jack Ma មាន​ផែន​ការ​លក់​មូល​បត្រ​ចំនួន​21​លាន​ហ៊ុន​ដោយ​ប្រើ​ពេល​​​1​ឆ្នាំ ដើម្បី​យក​ប្រាក់​ទៅ​ធ្វើ​សកម្ម​ភាព​មនុស្ស​ធម៌​។

មហាសេដ្ឋី​Jack Ma បច្ចុប្បន្ន មាន​ទ្រព្យ​សរុប​52.4​ពាន់​លាន​ដុល្លារ​ នេះ​បើ​តាម​​របាយ​ការណ៍​ Bloomberg Billionaire Index។ លោក​ Jack Ma គឺជា​អ្នក​មាន​ជាង​គេ​លំដាប់​ទី​19​ក្នុង​ពិភពលោក​ និង​លំដាប់​ទី​2​នៅ​ប្រទេស​ចិន​ បន្ទាប់​ពី​ CEO របស់​ក្រុម​ហ៊ុន​ Tencent គឺ​លោក​ Pony Ma (Ma Huateng)។ លោក​ Jack Ma បាន​បាត់​បង់​តំណែង​ជា​អ្នក​មាន​ជាង​គេ​លំដាប់​ទី​1​នៅ​ប្រទេស​ចិន​ កាលពី​ប៉ុន្មាន​សប្ដាហ៍​ចុង​ក្រោយ​នេះ​៕

ប្រភព៖ Reuters