សឿន សំណាង - La Reine Media

កម្ពុជារកឃើញអ្នកផ្ទុកCOVID-19 7ករណីទៀតហើយ ខណៈពិភពលោករកឃើញ8,528នាក់បន្ថែមទៀត

ក្រសួងសុខាភិបាលកម្ពុជាបានប្រកាសឱ្យដឹងថា បានរកឃើញអ្នកផ្ទុកវីរុសCOVID-19 ចំនួន7ករណីបន្ថែមទៀតនាព្រឹកថ្ងៃទី29កក្កដា2020 ដែលនេះបានធ្វើឱ្យតួលេខនៃអ្នកផ្ទុកវីរុសCOVID-19 នៅកម្ពុជាកើនឡើងដល់233ករណី។

យោងតាមសេចក្តីប្រកាសព័ត៌មានរបស់ក្រសួងសុខាភិបាលដែលចេញផ្សាយនាព្រឹកនេះ ក្នុងចំណោមអ្នកជំងឺថ្មីទាំងនេះក៏មានកងកម្លាំងមួកខៀវកម្ពុជាចំនួន4នាក់ផងដែរ ដែលពួកគេទើបត្រលប់មកពីប្រទេសម៉ាលីកាលពីថ្ងៃទី10 កក្កដា។ ក្រៅពីនេះ គឺជាពលរដ្ឋខ្មែរដែលទើបមកពីប្រទេសឥណ្ឌូនេស៊ីកាលពីថ្ងៃទី23ខែកក្កដា។

គិតមកដល់បច្ចុប្បន្ន កម្ពុជាបានរកឃើញអ្នកផ្ទុកវីរុសCOVID-19 សរុប233នាក់ ក្នុងនោះមាន79នាក់កំពុងទទួលការព្យាបាល និង154នាក់បានជាសះស្បើយ។

នៅទូទាំងពិភពលោក ប្រទេសនិងដែនដីចំនួន221 បានរកឃើញអ្នកផ្ទុកវីរុសCOVID-19 សរុប16,892,319នាក់ ក្នុងនោះមានអ្នកស្លាប់ដល់ទៅ663,408នាក់ និងជាសះស្បើយមានចំនួន10,456,307នាក់៕

July 29, 2020

មាសពិភពលោកបន្តឡើងថ្លៃខ្ពស់! 1អោនមានតម្លៃ1,960ដុល្លារអាមេរិក

ក្រោយពីបានបង្កើតកំណត់ត្រាថ្មីកាលពីម្សិលមិញ តម្លៃមាសពិភពលោកនាព្រឹកនេះក៏បានបន្តកើនឡើងរាប់សិបដុល្លារ នាំឱ្យតម្លៃក្នុង1អោន (ounce) ឡើងដល់1,960ដុល្លារអាមេរិក។

បិទការជួញដូរកាលពីម្សិលមិញ (27កក្កដា) មាសទិញប្រគល់ភ្លាមៗក្នុង1អោនឡើងថ្លៃ2%បើធៀបនឹងម្សិលម៉្ងៃ (26កក្កដា) ដែលមានតម្លៃ1,943ដុល្លារ។ បើកការជួញដូរនាព្រឹកនេះ មាសបន្តឡើងថ្លៃបន្ថែម20ដុល្លារ ហើយបច្ចុប្បន្នត្រូវបានជួញដូរក្នុងរង្វង់1,963ដុល្លារក្នុង1អោន (1អោន=8.29,426ជី)។

មាសដែលបង្កើតបានកំណត់ត្រាថ្មីកាលពីម្សិលមិញ គឺដោយសារអ្នកវិនិយោគស្វែងរក “ទីជម្រកសុវត្ថិភាព” សម្រាប់រក្សាទ្រព្យរបស់ពួកគេ នៅពេលភាពតានតឹងរវាងចិននិងអាមេរិកាំងបានកើនឡើងខ្លាំងក្នុងគ្រាស្ថានភាពសេដ្ឋកិច្ចពិភពលោកកំពុងដាំក្បាលចុះដោយសារCOVID-19។ Dollar Index ដែលជារង្វាស់សម្រាប់វាស់ស្ទង់កម្លាំងរបស់ដុល្លារអាមេិរកជាមួយនឹងបណ្ដារូបិយប័ណ្ណធំៗផ្សេងទៀត បានធ្លាក់ចុះដល់បាតអស់រយៈពេល2ឆ្នាំមកហើយដោយសារតែភាពតានតឹងរវាងសហរដ្ឋអាមេរិកនិងប្រទេសចិន។

Edward Moya ដែលជាអ្នកវិភាគជាន់ខ្ពស់មកពីក្រុមហ៊ុន OANDA បានអះអាងថា “ខ្ញុំយល់ថា មាសនឹងបន្តឡើងថ្លៃ ខណៈដែលរូបិយវត្ថុដុល្លារអាមេរិកដាំក្បាលចុះ”។ លោកបន្តថា អ្វីៗទាំងអស់កំពុងតែនាំប្រយោជន៍មកឱ្យមាស។ Fed (ធនាគារកណ្ដាលសហរដ្ឋអាមេរិក) នឹងបង្កើនល្បឿនក្នុងការបញ្ចេញខ្ទង់ប្រាក់ជំនួយដ៏ច្រើនដើម្បីគាំទ្រសេដ្ឋកិច្ច។ អស្ថិរភាពនៃវិបត្តិសុខភាពចេះតែបន្តកើនកើតមាន ក៏មានន័យថា វិធានការរឹតបន្តឹងលើការធ្វើដំណើរ ត្រូវបានធ្វើឡើងជាបន្តទៀត”។

ឆ្នាំ2020 មាសបានឡើងថ្លៃជិត30% ដែលនេះគឺផ្ទុយទាំងស្រុងទៅនឹងស្ថានភាពក្នុងដំណាក់កាលមុនCOVID-19 មកដល់។ នៅមុនវិបត្តិសុខភាព មាសត្រូវប្រជែងជាមួយនឹង “ជម្រកសុវត្ថិភាព” ជាច្រើនផ្សេងទៀត ពិសេសគឺរូបិយវត្ថុដុល្លារអាមេរិក។

មាសគឺជា “ជម្រកសុវត្ថិភាព” ដែលមិនមានការប្រាក់តាមការកំណត់ណាមួយនោះទេ ដោយវាគឹជាឧបករណ៍សម្រាប់ការពារហានិភ័យដែលអាចកើតឡើងព្រោះតែបញ្ហាអតិផរណា និងបញ្ហាប្រាក់ចុះថោក។ មូលហេតុមួយផ្សេងទៀតដែលនាំឱ្យមាសឡើងថ្លៃខ្ពស់ នោះគឺទុនវិនិយោគដ៏ធំនានាត្រូវបានបណ្ដាក់ទៅក្នុងមូលនិធិមាស Exchange-traded fund ឬហៅថា ETF (ETF គឺជាប្រភេទមូលនិធិមួយ ហើយវាកាន់កាប់ទ្រព្យជាច្រើនប្រភេទ ដូចជាមូលបត្របំណុល ភាគហ៊ុន និងមាសដុំជាដើម ដែលត្រូវបានបែងចែកកម្មសិទ្ធិរបស់វាផ្ទាល់ទៅជាភាគហ៊ុនដែលគ្រប់គ្រងដោយភាគហ៊ុនិក)។

អ្នកវិភាគ Lukman Otunuga មកពីក្រុមហ៊ុន FXTM បានអះអាងថា “ការរកបានវិធីព្យាបាល COVID-19 នឹងអាចកែលម្អផ្លូវចិត្ត និងអូសទាញទំនុកចិត្តរបស់អ្នកវិនិយោគឡើងវិញ។ ដូច្នេះនៅពេលស្ថានការណ៍វិជ្ជមាននានាបានកើតឡើង ក្រុមអ្នកវិនិយោគនឹងត្រូវទាក់ទាញឱ្យចាកចេញពី “ជម្រកសុវត្ថិភាព” (មាស) នេះ៕

ប្រភព៖ សារព័ត៌មានបរទេស

July 28, 2020

លោក គីម ជុងអ៊ុន សប្បាយចិត្ត ក្នុងថ្ងៃគម្រប់ខួប 67ឆ្នាំ ផ្អាកសង្គ្រាមជាមួយកូរ៉េខាងត្បូង ចែកកាំភ្លើងខ្លីឱ្យទាហាន ដោយគ្មានពាក់ម៉ាស់ការពារវីរុស

ទីភ្នាក់ងារព័ត៌មានAFP បានរាយការណ៍អំពីបរិយាកាសក្នុងការរៀបចំពិធីរំឭកខួប 67ឆ្នាំ ថ្ងៃផ្អាកសង្គ្រាម ឬការបញ្ឈប់សង្គ្រាមរវាងកូរ៉េទាំង2 កាលពីថ្ងៃទី27 កក្កដា ឆ្នាំ1953 ថា ទាំងកូរ៉េខាងជើង និងកូរ៉េខាងត្បូង បានរៀបចំពិធីនេះដោយឡែកពីគ្នារៀងៗខ្លួន ក្រោមសម្ព័ន្ធភាពដ៏តានតឹងរបស់ប្រទេសទាំង2 ជាពិសេស ពេលកើតមានការចោទប្រកាន់ថា កូរ៉េខាងត្បូង បានសាយភាយមេរោគកូវីដ-19 ចូលទៅក្នុងប្រទេសកូរ៉េខាងជើង។

នៅទីក្រុងព្យុងយ៉ាង ទីក្រុងធំរបស់ប្រទេសកូរ៉េខាងជើង លោកគីម ជុងអ៊ុន មេដឹកនាំខ្ពស់បំផុតរបស់កូរ៉េខាងជើង បានធ្វើជាអធិបតីភាពក្នុងពិធី ដោយបានប្រគល់កាំភ្លើងខ្លីឱ្យបណ្ដានាយទាហានថ្នាក់ឧត្ដមសេនីយ៍ និងថ្នាក់ដឹកនាំកងទ័ពជើងចាស់ ដែលបានថ្លែងសច្ចាប្រណិធាន ស្មោះស្ម័គ្រភក្ដីចំពោះលោកប្រធានគីម ដើម្បីជាការឆ្លងរបៀបវារៈសំខាន់នេះ។

នាយទាហានគ្រប់រូបដែលចូលរួមក្នុងពិធីនេះ ក្រៅពីមិនបានពាក់ម៉ាស់ការពារវីរុសហើយ នៅបានឈរជិតៗគ្នា ដើម្បីថតរូបជាក្រុម បើទោះជាកូរ៉េខាងជើងទើបតែប្រកាសស្ថានការណ៍អាសន្នថា រកឃើញអ្នកជំងឺសង្ស័យឆ្លងមេរោគកូវីដ-19 ដំបូងគេនៅក្នុងប្រទេស និងបិទទីក្រុងឃែសុង ទីក្រុងព្រំដែនដែលធ្លាប់ធ្វើជំនួញរួមគ្នាក៏ដោយ។

កូរ៉េខាងជើង ថែមទាំងចាប់ឃាត់ខ្លួនអ្នកក្បត់ប្រទេសជាតិដែលប្ដូរចិត្ត វិលត្រឡប់មកពីកូរ៉េខាងត្បូងវិញ ឆ្លងកាត់តំបន់DMC មកពីខាងត្បូង ដើម្បីបន្ទោសថា បាននាំមេរោគកូវីដ-19 ពីកូរ៉េខាងត្បូង មកចម្លងនៅក្នុងកូរ៉េខាងជើង។

ចំណែកខាងមន្ត្រីកូរ៉េខាងត្បូងវិញ បាននិយាយថា បុរសម្នាក់ដែលគេជឿថា ជាអ្នកក្បត់ប្រទេសជាតិ តែប្ដូរចិត្តវិញនោះ មិនដែលទទួលការអះអាងថា ឆ្លងមេរោគកូវីដ-19 ទេ និងថែមទាំងមិនដែលបានប៉ះពាល់ជាមួយអ្នកជំងឺទៀតផង។

លោក គីម ឌូយ៉ន អ្នកជំនាញការរឿងកូរ៉េ មកពីក្រុមអ្នកស្រាវជ្រាវសិក្សាវិបត្តិអន្តរជាតិ បានបញ្ជាក់ថា កូរ៉េខាងជើង មានសញ្ញាក្នុងការមានអ្នកជំងឺកូវីដ-19 ស្រាប់ទៅហើយ តែបានឆ្លៀតឱកាសនេះ ចោទប្រកាន់ថា ជាកំហុសរបស់កូរ៉េខាងត្បូង ជាជាងបន្ទោសចិនដែលជាសម្ព័ន្ធមិត្តនឹងគ្នាដ៏យូរអង្វែង។

ចំណែកនៅឯខាងកូរ៉េខាងត្បូងវិញ ក្រៅពីរៀបចំពិធីរំឭកខួបថ្ងៃផ្អាកសង្គ្រាមហើយ ថែមទាំងជាពិធីរំឭកខួបនៃការចូលរួមរបស់កងកម្លាំងសហប្រជាជាតិ ឬUN Forces Participation Day ដែលគម្រប់ខួប 67ឆ្នាំដូចគ្នា។

ពិធីនេះ ត្រូវបានរៀបចំឡើងនៅក្នុងភូមិ ប៉ាន់ មុនចម ទីក្រុងប៉ាជូ ដែលមានអតីតយុទ្ធជនកូរ៉េខាងត្បូង រួមទាំងទាហានអាមេរិក និងតំណាងអង្គការសហប្រជាជាតិ ចូលរួមផងដែរ។ គ្រប់គ្នាសុទ្ធតែពាក់ម៉ាស់អនាម័យការពារ ឈរឆ្ងាយៗពីគ្នា តាមវិធានការការពារមេរោគកូវីដ-19។

ការរៀបចំពិធីនេះ គឺដើម្បីរំឭកគុណដល់អតីតយុទ្ធជនជាង 2លាននាក់ មកពី 22ប្រទេស ដែលបានចូលរួមជាមួយកងកម្លាំងកូរ៉េខាងត្បូងក្រោមទង់អង្គការសហប្រជាជាតិ៕

ប្រភព៖ សារព័ត៌មានបរទេស

July 28, 2020

កម្ពុជារកឃើញអ្នកផ្ទុកវីរុសCOVID-19ចំនួន1ករណីទៀតហើយ ខណៈពិភពលោករកឃើញ6,834ករណីក្នុងថ្ងៃនេះ

ពិភពលោកបានរកឃើញអ្នកផ្ទុកវីរុសCOVID-19 ចំនួនជាង1.6លាននាក់ និងអ្នកស្លាប់ដោយសារវីរុសនេះបានកើនឡើងដល់ជាង655,000នាក់ ខណៈកម្ពុជាបានរកឃើញអ្នកផ្ទុកវីរុសសរុប226នាក់។

ប្រទេសនិងដែនដីចំនួន221ក្នុងពិភពលោក បានរាយការណ៍ថា បានរកឃើញអ្នកផ្ទុកវីរុសCOVID-19 សរុប16,613,540នាក់ និងអ្នកជំងឺចំនួន655,557នាក់បានបាត់បង់ជីវិត ក្នុងនោះមានអ្នកជំងឺថ្មី219,951នាក់ និងអ្នកស្លាប់ថ្មីចំនួន4,054នាក់ត្រូវបានរកឃើញនៅក្នុងរយៈពេល24ម៉ោងចុងក្រោយនេះ។ អ្នកដែលបានជាសះស្បើយមានចំនួន10,212,395នាក់។ នេះបើតាមស្ថិតិរបស់គេហទំព័រ Worldometers។

សហរដ្ឋអាមេរិកគឺជាសម្បុកមេរោគCOVID-19ធំជាងគេបង្អស់ក្នុងពិភពលោក ដោយបានរកឃើញអ្នកផ្ទុកវីរុសចំនួន4,426,041នាក់ និងអ្នកស្លាប់ចំនួន150,333នាក់ ក្នុងនោះមានអ្នកជំងឺថ្មី60,545នាក់ និងអ្នកស្លាប់ថ្មីចំនួន561នាក់។

នៅតំបន់អាស៊ីអាគ្នេយ៍ ឥណ្ឌូនេស៊ីគឺជាសម្បុកវីរុសធំជាងគេបង្អស់ ដោយបានរកឃើញអ្នកជំងឺសរុប100,303នាក់ អ្នកស្លាប់សរុប4,838នាក់ ក្នុងនោះមានអ្នកជំងឺថ្មី1,525នាក់ និងអ្នកស្លាប់ថ្មី57នាក់។

ហ្វីលីពីនគឺជាសម្បុកវីរុសធំជាងគេលំដាប់ទី2 ដោយមានអ្នកជំងឺ82,040នាក់ និងអ្នកស្លាប់ចំនួន1,945នាក់។ អ្នកជំងឺ1,657នាក់ និងអ្នកស្លាប់13នាក់ត្រូវបានរកឃើញក្នុងអំឡុង24ម៉ោងកន្លងមកនេះ។

សិង្ហបុរីឈរលំដាប់ទី3ក្នុងតំបន់ជាមួយនឹងអ្នកជំងឺសរុប50,838នាក់ ក្នុងនោះមានអ្នកស្លាប់27នាក់។

កម្ពុជា តាមរយៈក្រសួងសុខាភិបាល នៅព្រឹកនេះបានរាយការណ៍ថា បានរកឃើញអ្នកផ្ទុកវីរុសថ្មីចំនួន1នាក់ដែលអ្នកជំងឺគឺជាអ្នកដំណេីរជាជនជាតិឥណ្ឌា ធ្វេីដំណេីរពីប្រទេសឥណ្ឌា ឆ្លងកាត់ប្រទេសម៉ាឡេស៊ី និងបន្តជេីងហោះហេីរទៅប្រទេសកូរ៉េខាងត្បូងមុននឹងមកដល់កម្ពុជា។ ករណីនេះបានធ្វើឱ្យតួលេខអ្នកផ្ទុកវីរុសសរុបនៅកម្ពុជាឡើងដល់226នាក់ ក្នុងនោះមានអ្នកជំងឺ49នាក់កំពុងសម្រាកព្យាបាលនៅមន្ទីរពេទ្យ ខណៈ147នាក់បានជាសះស្បើយ។

កម្ពុជា ឡាវ វៀតណាម និងទីម័រខាងកើតគឺជាបណ្ដាប្រទេសនៅអាស៊ីអាគ្នេយ៍ដែលមិនទាន់មានករណីស្លាប់ដោយសារវីរុសCOVID-19 ត្រូវបានរាយការណ៍ជាផ្លូវការនៅឡើយ៕

ប្រភព៖ សារព័ត៌មានបរទេស/ក្រសួងសុខាភិបាលកម្ពុជា

July 28, 2020

មហាសេដ្ឋី Mark Cuban ជឿថា “ការក្លាយជាអ្នកមាននឹងមិនអាចផ្លាស់ប្ដូរគ្រប់យ៉ាង”

យោងតាមសម្ដីរបស់មហាសេដ្ឋី Mark Cuban ការយល់ខុសដ៏ធ្ងន់ធ្ងរបំផុតទាក់ទិននឹងប្រាក់កាសនោះគឺ “ការយល់ថា ការក្លាយជាអ្នកមាននឹងបណ្ដាលឱ្យមនុស្សប្ដូរផ្លាស់”។

លោក Mark Cuban ដែលជាអ្នកជំនួញ និងជាម្ចាស់ក្រុមហ៊ុន Dallas Mavericks បានក្លាយជាមហាសេដ្ឋីមួយរូបបន្ទាប់ពីលោក រួមនឹងសហស្ថាបនិក បានលក់ក្រុមហ៊ុន Broadcast.com ទៅឱ្យ Yahoo ក្នុងតម្លៃ5.7ពាន់លានដុល្លារកាលពីឆ្នាំ1999។ ពេលនោះ លោក Mark Cuban មានអាយុ40ឆ្នាំ។ បច្ចុប្បន្ន លោកមានវ័យ61ឆ្នាំ និងមានទ្រព្យសម្បត្តិសរុបប្រមាណជា4.3ពាន់លានដុល្លារអាមេរិក។

មហាសេដ្ឋីរូបនេះ បានឱ្យដឹងថា ការយល់ឃើញថា “នៅពេលក្លាយជាអ្នកមាន និងអាចរក្សាបានកេរ្តិ៍ឈ្មោះជាកំពូលអ្នកមាន គឺជាដើមហេតុដែលនាំឱ្យអ្នកផ្លាស់ប្ដូរច្រើន” នោះគឺជារឿងមួយប្រកបដោយកំហុសឆ្គង។ លោកថ្លែងថា “គ្រប់គ្នាគិតថា ប្រាក់ធ្វើឱ្យអ្នកប្ដូរផ្លាស់។ អាចបែបនេះនៅក្នុងជ្រុងផ្សេងៗណាមួយ ប៉ុន្តែមិនដូច្នោះទាំងស្រុងនោះឡើយ”។

មុនពេលមានទ្រព្យស្ដុកស្ដម្ភដូចបច្ចុប្បន្ន លោក Cuban ក៏ធ្លាប់ឆ្លងកាត់អារម្មណ៍ដែលកើតមាននៅក្នុងគ្រាដែលលោកត្រូវក្ស័យធនពិតប្រាកដ កាលពីលោកនៅមានអាយុ20ឆ្នាំ។ លោកមិនមានប្រាក់គ្រប់គ្រាន់ដើម្បីបើកគណនីធនាគារ និងត្រូវស្នាក់នៅក្នុងផ្ទះជួលជាមួយនឹងមនុស្ស5នាក់ផ្សេងទៀត ដោយរួមគ្នាបង់ថ្លៃផ្ទះជួល600ដុល្លារអាមេរិកក្នុងមួយខែ។ កាលណោះ លោកត្រូវគេងនៅលើឥដ្ឋ ឬកៅអីទៀតផង។

ប៉ុន្តែ លោកថ្លែងថា លោកនៅតែមានការរីករាយ និងមានសុភមង្គល។ “សូម្បីតែនៅពេលបានក្លាយជាមនុស្សក្ស័យធនពិតប្រាកដ និងត្រូវដេកនៅលើឥដ្ឋក៏ដោយ ខ្ញុំនៅតែសប្បាយរីករាយ និងដើរលេងជាមួយមិត្តភក្តិដូចធម្មតា។ ហើយអ្នកទាំងនោះ ពេលនេះនៅតែជាមិត្តភក្ដិរបស់ខ្ញុំ”។

ក៏ប៉ុន្តែ ការស្វែងរកវិធីដើម្បីកែសម្រួលទំនាក់ទំនងក្រោយពីបានក្លាយជាអ្នកមាន គឺត្រូវការពេលវេលាខ្លះ។ លោក Cuban ថ្លែងថា “អ្វីដែលពិបាកបំផុត នោះគឺទំនាក់ទំនងជាមួយមិត្តភក្ដិចាស់ៗ ដោយសារតែពួកគេសង្ស័យថា អ្នកប្រហែលជាលែងដូចមុនទៀតហើយ។ លោក Cuban ប្រាប់ថា បញ្ហានេះគឺទាមទារពេលវេលាដើម្បីកែលម្អស្ថានការណ៍ ប៉ុន្តែ លោកបញ្ជាក់ថា “មិត្តពិតប្រាកដ នឹងនៅតែជាមិត្តនឹងគ្នាដដែលទេ”។

ពិតណាស់ នៅពេលរកប្រាក់បានច្រើន ពិសេសគឺនៅពេលអ្នកចាប់ផ្ដើមដោយចំណុចសូន្យ អ្នកប្រាកដជាផ្លាស់ប្ដូរចំណុចខ្លះៗ។ លោក Cuban ឧទាហរណ៍ថា ប្រាក់ធ្វើឱ្យលោកមានទំនុកចិត្ត និងស្វាហាប់ជាងមុន។ លោកថា “ខ្ញុំមានសំណាងព្រោះលែងមានអារម្មណ៍តានតឹងជាមួយនឹងវិក្កយបត្រនានា និងមិនព្រួយខ្លាចគេផ្ដាច់ភ្លើងជាដើម ដែលជាប្រការដែលខ្ញុំធ្លាប់បានជួបកាលពីអតីតកាល។ ខ្ញុំមិនបារម្ភអំពីបញ្ហាប្រាក់កាស និងអាចបង្កើតកាលបរិច្ឆេទផ្ទាល់ខ្លួនបាន”។

ជាងនេះទៀត លោកមានលទ្ធភាពគ្រប់គ្រាន់ក្នុងការធ្វើឱ្យជីវភាពល្អប្រសើរជាងមុន។ អ្វីដែលលោកត្រូវចំណាយប្រាក់ដំបូងគេបន្ទាប់ពីបានក្លាយជាមហាសេដ្ឋី នោះគឺដំណើរទេសចរណ៍ និងពិធីជប់លៀងនៅ Las Vegas ការសម្រាកលម្ហែកាយនៅលើកោះ និងទិញភូមិគ្រឹះមួយកន្លែង។

លោក Cuban បន្តថា “មិនថាទំហំទ្រព្យធំកម្រិតណាទេ ការមានប្រាក់ច្រើនជាងពេលដែលអ្នកកំពុងក្ស័យធនក៏អាចធ្វើឱ្យអ្នកប្ដូរផ្លាស់ត្រង់ចំណុចមួយចំនួន។ ប៉ុន្តែ មិនអាចផ្លាស់ប្ដូរអ្នកបានច្រើននោះដែរ ហើយខ្ញុំគិតថា នេះ (ការយល់ថា ប្រាក់ធ្វើឱ្យមនុស្សផ្លាស់ប្ដូរច្រើន) គឺជាការយល់ខុសធំបំផុត”។

បច្ចុប្បន្ន បន្ទាប់ពីរយៈពេល2ទសវត្សរ៍ដែលមានវត្តមាននៅក្នុងបញ្ជីឈ្មោះអ្នកមាន លោកនៅតែមិនអាចជឿបានថា ខ្លួនជាអ្នកមាន។ មហាសេដ្ឋីរូបនេះថ្លែងថា “សូម្បីតែដល់ពេលនេះ រាល់ថ្ងៃ ពេលនឹកឃើញអំពីរឿងមានបាន ខ្ញុំតែងតែគិតថា ធ្វើម៉េចបានជារឿងនេះកើតឡើង? ម៉េចក៏អាចយ៉ាងនេះបាន? ខ្ញុំគ្រាន់តែចង់កោតសរសើរប្រការនេះ និងមិនចាត់ទុកថាវាជារឿងជាក់ស្ដែង ហើយក៏មិនបណ្ដោយឱ្យវា (ភាពមានបាន) ធ្វើឱ្យមានផលវិបាកដល់ខ្ញុំ និងកូនៗរបស់ខ្ញុំដែរ”។

លោក Mark Cuban គឺជាអ្នកជំនួញជនជាតិអាមេរិកាំង ជាមនុស្សល្បីឈ្មោះក្នុងទូរទស្សន៍ ជាម្ចាស់ក្រុមហ៊ុនទូរគមនាគមន៍ និងជាអ្នកវិនិយោគម្នាក់។ លោកជាម្ចាស់ក្លិប Dallas Mavericks និងជាថៅកែម្នាក់របស់ក្រុមហ៊ុន 2929 Entertainment ព្រមទាំងជានាយកទូរទស្សន៍ AXS TV ផងដែរ៕

ប្រភព៖ CNBC

July 27, 2020

ចោរប្រដាប់អាវុធប្លន់យកប្រាក់ពីធនាគារវៀតណាមបានសម្រេច រួចចេញមកក្រៅប្លន់យកម៉ូតូមួយគ្រឿងជិះគេចខ្លួនបាត់ស្រមោល

បុរស2នាក់ពាក់ម៉ាស់ ប្រដាប់ដោយកាំភ្លើង សម្រុកចូលក្នុងធនាគារ BIDV នៅរដ្ឋធានីហាណូយនៃប្រទេសវៀតណាម ហើយក៏បានប្លន់យកប្រាក់រាប់រយលានដុងពីធនាគារ និងម៉ូតូ1គ្រឿងទៀតពីអតិថិជនរបស់ធនាគារនេះផងដែរ។

ករណីប្លន់ប្រដាប់អាវុធនេះ បានកើតឡើងនៅវេលាម៉ោង9និង50នាទី ថ្ងៃទី27កក្កដានេះ នៅធនាគារ BIDV ក្នុងតំបន់ Huynh Thuc Khang ទីក្រុងហាណូយ។ នៅពេលបុគ្គលិកធនាគារកំពុងតែជាប់ដៃទទួលអតិថិជន ចោរប្លន់2នាក់បានសម្រុកចូលធនាគារ រួចបានផ្ទុះអាវុធ គំរាមមនុស្សគ្រប់គ្នា។

ភាគីខាងធនាគារបានបញ្ជាក់ថា ចោរប្រដាប់អាវុធ2នាក់នេះ បានប្លន់យកប្រាក់អស់រាប់រយលានដុងពីកន្លែងប្រតិបត្តិការរបស់ធនាគារ។ មកដល់បច្ចុប្បន្ន ធនាគារ BIDV សាខា Ngoc Khanh ដែលត្រូវចោរប្លន់នេះ បាននិងកំពុងដំណើរការជាធម្មតាឡើងវិញហើយ។

ប៉ូលិសខណ្ឌ Dong Da នៃរដ្ឋធានីហាណូយបានឱ្យដឹងថា នៅពេលចាកចេញពីធនាគារ ចោរប្រដាប់អាវុធ2នាក់នេះថែមទាំងបានភ្ជង់ប្លន់យកម៉ូតូរបស់អតិថិជនម្នាក់ដែលកំពុងដកប្រាក់នៅក្នុងទូ ATM នៅខាងមុខទ្វារធនាគារនេះ រួចជិះគេចខ្លួនបាត់ស្រមោល។ បច្ចុប្បន្ន សមត្ថកិច្ចកំពុងតាមរកចាប់ខ្លួនជនសង្ស័យនេះហើយ៕

ប្រភព៖ សារព័ត៌មានបរទេស

July 27, 2020

បន្ទាន់!! លោកគីម ជុងអ៊ុន ប្រកាសស្ថានការណ៍អាសន្នកម្រិតខ្ពស់បំផុត បិទទីក្រុងដែលមានអ្នកសង្ស័យឆ្លងជំងឺកូវីដ-19

សេចក្ដីរាយការណ៍បន្ទាន់ មេដឹកនាំនៃប្រទេសកូរ៉េខាងជើង លោកគីម ជុងអ៊ុន បានប្រកាសស្ថានការណ៍អាសន្នកម្រិតខ្ពស់បំផុត បិទទីក្រុងឃែសុង ក្រោយរកឃើញអ្នកជំងឺសង្ស័យឆ្លងមេរោគកូវីដ-19។

ទីភ្នាក់ងារព័ត៌មានមជ្ឈិមកូរ៉េ(KCNA) បានរាយការណ៍កាលពីថ្ងៃអាទិត្យ(ទី26កក្កដា) ថា លោកគីម ជុងអ៊ុន មេដឹកនាំខ្ពស់បំផុត នៃប្រទេសកូរ៉េខាងជើង បានប្រកាសស្ថានការណ៍អាសន្ននៅក្នុងទីក្រុងជាប់ព្រំដែន ឃែសុង ក្រោយពីមានរបាយការណ៍ រកឃើញអ្នកជំងឺសង្ស័យ ជាជំងឺឆ្លងវីរុសកូរ៉ូណាប្រភេទថ្មី2019 ឬកូវីដ-19 ចំនួន 1នាក់។

“អាចនិយាយបានថា ជាស្ថានការណ៍វិបត្តិ ដែលវីរុសកំណាចនោះ អាចបានចូលមកក្នុងប្រទេសហើយ”
លោកគីម ជុងអ៊ុន បានថ្លែងដូច្នេះ កាលពីថ្ងៃសៅរ៍(ទី25កក្កដា) ខណៈធ្វើជាប្រធានក្នុងការប្រជុំបន្ទាន់មួយរបស់គណៈកម្មការកិច្ចការនយោបាយរបស់បក្សពលករកូរ៉េ(WPK)

លោកគីម បានថ្លែងថា លោកបានប្រើវិធានការការពារជាច្រើនប្រការនៅថ្ងៃសៅរ ដើម្បីបិទទីក្រុងឃែសុងទាំងមូល និងបានបិទតំបន់នីមួយៗ និងភូមិភាគឱ្យនៅដាច់ដោយឡែកពីគ្នាភ្លាមៗ ក្រោយមានរបាយការណ៍ថា រកឃើញអ្នកជំងឺសង្ស័យឆ្លងមេរោគកូវីដ-19 មួយនាក់ខាងលើ។

ដោយសារតែស្ថានការណ៍គ្រោះថ្នាក់នៅក្នុងទីក្រុងឃែសុង លោកគីម បានថ្លែងទៀតថា លោកបានសម្រេចចិត្តកែសម្រួល ពីការប្រើប្រព័ន្ធការពារការឆ្លងរាលដាលក្នុងស្ថានការណ៍អាសន្ន មកជាប្រព័ន្ធស្ថានការណ៍អាសន្នកម្រិតខ្ពស់បំផុត ព្រមទាំងចេញសេចក្ដីប្រកាសដាស់តឿនកម្រិតខ្ពស់បំផុតដូចគ្នា។

របាយការណ៍របស់ទីភ្នាក់ងារព័ត៌មានមជ្ឈិមកូរ៉េ បានបញ្ជាក់ថា អ្នកណាដែលធ្លាប់ប៉ះពាល់ ឬទំនាក់ទំនងជាមួយអ្នកជំងឺម្នាក់នោះ និងអ្នកដែលធ្លាប់បានធ្វើដំណើរទៅទីក្រុងឃែសុង ក្នុងអំឡុងពេល 5ថ្ងៃកន្លងមកនេះ នឹងត្រូវចូលទៅទទួលការពិនិត្យរាងកាយ និងបង្ខាំងដើម្បីតាមដានអាការ។

អ្នកជំងឺសង្ស័យម្នាក់នោះ ជាអ្នករត់ភៀសខ្លួនចេញពីកូរ៉េខាងជើង ទៅកូរ៉េខាងត្បូង ដែលធ្វើដំណើរត្រឡប់មកទីក្រុងឃែសុងវិញ ក្រោយពីលបលួចឆ្លងដែនដោយខុសច្បាប់ កាលពីថ្ងៃទី19 កក្កដា ហើយពេលនេះ រូបគេកំពុងត្រូវអាជ្ញាធរកូរ៉េខាងជើងបង្ខាំងឱ្យនៅដាច់ដោយឡែកយ៉ាងតឹងរ៉ឹងបំផុត។

សូមជម្រាបថា រហូតមកដល់ពេលបច្ចុប្បន្ន ប្រទេសកូរ៉េខាងជើង មិនទាន់មានរបាយការណ៍ពីអ្នកជំងឺដែលបានអះអាងថាឆ្លងមេរោគកូវីដ-19 នៅឡើយ៕

ប្រភព៖សារព័ត៌មានបរទេស

July 27, 2020

តម្លៃមាសពិភពលោក ឡើងថ្លៃជាងពេលណាៗទាំងអស់

មាសពិភពលោកក្នុង1អោននាព្រឹកនេះបានឡើងថ្លៃ20ដុល្លារបន្ថែមទៀត នាំឱ្យតម្លៃឡើងដល់1,926ដុល្លារ ដែលនេះជាកំណត់ត្រាថ្មី និងខ្ពស់ជាងកំណត់ត្រាឆ្នាំ2011ទៅទៀត។

បើកដំណើរការជួញដូរនៅព្រឹកនេះ (27កក្កដា) និន្នាការកើនឡើងនៃតម្លៃមាសពិភពលោក កាន់តែបង្កើនល្បឿន។ បច្ចុប្បន្ន មាសលក់ប្រគល់ភ្លាមៗមានតម្លៃ1,946ដុល្លារក្នុង1អោន ពោលគឺខ្ពស់ជាតម្លៃ1,921ដុល្លារនៃកំណត់ត្រាខ្ពស់បំផុតកាលពីខែកញ្ញា2011។ ចំណែកមាសអនាគតក៏បានបង្កើតកំណាត់ត្រាថ្មី ដោយមានតម្លៃ19,46ដុល្លារក្នុង1អោន។

Gavin Wendt អ្នកវិភាគជាន់ខ្ពស់មកពីក្រុមហ៊ុន MineLife បានអះអាងថា “កំណើនដ៏ខ្លាំងក្លានេះមិនអាចគេចបាននៅពេលយើងកំពុងឆ្ពោះទៅកាន់ដំណាក់កាលជិតដូចទៅនឹងសម័យក្រោយវិបត្តិហិរញ្ញវត្ថុសកល។ មានន័យថា តម្លៃមាសកើនឡើងខ្ពស់បំផុតនៅពេលនាយកដ្ឋានប្រព័ន្ធបម្រុងសហព័ន្ធ (Fed) របស់ហសរដ្ឋអាមេរិក បញ្ចេញខ្ទង់ប្រាក់ទៅក្នុងប្រព័ន្ធហិរញ្ញវត្ថុ។ រូបិយវត្ថុដុល្លារអាមេរិកចុះខ្សោយ និងអត្រាការប្រាក់ពិតស្ថិតក្រោមសូន្យ កាន់តែជួយដល់លោហធាតុមានតម្លៃនេះ (មាស)។

តម្លៃមាសឡើងថ្លៃខ្ពស់ខ្លាំងកាលពីពេលថ្មីៗនេះ ក៏ដោយសារភាពតានតឹងរវាងចិនជាមួយនឹងសហរដ្ឋអាមេរិក។ កាលពីសប្ដាហ៍មុន រដ្ឋមន្ត្រីការបរទេសសហរដ្ឋអាមេរិក លោក Mike Pompeo បានបន្តរិះគន់ប្រទេសចិន។ លោកសង្កត់ធ្ងន់ថា ទីក្រុងវ៉ាស៊ីងតោននិងប្រទេសជាសម្ព័ន្ធមិត្ត ត្រូវតែប្រើប្រាស់ “វិធានការធ្ងន់ធ្ងរ និងច្ឆៃប្រឌិតជាងមុន” ដើម្បីបង្ខំឱ្យទីក្រុងប៉េកាំងផ្លាស់ប្ដូរឥរិយាបទ។

កាលពីម្សិលមិញ (26កក្កដា) មន្ត្រីម្នាក់មកពីសេតវិមានបានឱ្យដឹងថា សេតវិមាន និងតំណាងរាស្ត្រនៃសភាជាន់ខ្ពស់មកពីបក្សសាធារណរដ្ឋ “សម្រេចបានកិច្ចព្រមព្រៀងនៅលើគោលការណ៍” ស្ដីអំពីកញ្ចប់ថវិកាជំនួយសេដ្ឋកិច្ចជាតិបន្ទាប់នៅក្នុងវិបត្តិសុខភាពនេះ។

លោហធាតុមានតម្លៃ ត្រូវបានគេចាត់ទុកថាជាទ្រព្យដែលមានសុវត្ថិភាពនៅក្នុងកាលៈទេសដែលពិភពលោកកំពុងប្រឈមនឹងបញ្ហាអស្ថិរភាពសង្គម សេដ្ឋកិច្ច អតិផរណា និងបញ្ហារូបិយប័ណ្ណធ្លាក់ថ្លៃ។ គណៈកម្មធិការជួញទំនិញអនាគតរបស់សហរដ្ឋអាមេរិក (CFTC) កាលពីចុងសប្ដាហ៍កន្លងទៅបានឱ្យដឹងថា ក្រុមអ្នកវិនិយោគកំពុងតែដាក់ការភ្នាល់ទៅលើតម្លៃលោហធាតុមាសនិងលោហធាតុប្រាក់ដែលកំពុងឡើងថ្លៃ។

អ្នកវិភាគសេដ្ឋកិច្ចមកពីក្រុមហ៊ុន Goldman Sachs បានព្យាករថា មាសអាចនឹងឡើងថ្លៃដល់2,000ដុល្លារក្នុងរយៈពេល12ខែខាងមុខ។ ចំណែកក្រុមហ៊ុន Citigroup ក៏យល់ថា លទ្ធភាពដែលតម្លៃមាសអាចឡើងថ្លៃដល់2,000ដុល្លារក្នុង1អោននៅចុងឆ្នាំ2020នេះ គឺ30%។

Dollar Index បច្ចុប្បន្នបានធ្លាក់ចុះ0.1% ដែលនេះគឺជាកម្រិតក្បែរបាតក្នុងរយៈពេល2ឆ្នាំមកនេះបើធៀបជាមួយនឹងរូបិយប័ណ្ណធំៗដទៃទៀត។ សន្ទស្សន៍អនាគតនៃផ្សារមូលបត្ររបស់សហរដ្ឋអាមេរិកកំពុងតែដាំក្បាលចុះ។

ពិន្ទុផ្សារហ៊ុនមួយចំនួននៅអាស៊ីនាព្រឹកនេះក៏បានធ្លាក់ចុះ ដោយសារតែមានការព្រួយបារម្ភចំពោះបញ្ហាអស្ថិរភាពរវាងមហាយក្សចិននិងអាមេរិកាំង៕

ប្រភព៖ Reuters/Kitco

July 27, 2020

ចិនបង្ហាញរូបឆោមយន្តហោះចតលើទឹក រត់លើគោក និងហោះលើអាកាស ធំជាងគេបំផុតក្នុងពិភពលោក

ផលិតចប់រួចរាល់ហើយ សម្រាប់ AG600 យន្តហោះពហុជំនាញ មេដ អ៊ីន ឆាយណា ធំជាងគេបំផុតក្នុងពិភពលោក និងចេញហោះហើរលើមហាសមុទ្រជាលើកដំបូង។

AG600 ជាយន្តហោះពហុជំនាញខ្នាតធំបំផុត ដែលចិនអភិវឌ្ឍឡើងដោយខ្លួនឯងនេះ បានទទួលជោគជ័យយ៉ាងស្រស់បំព្រង ក្នុងការហោះហើរលើមហាសមុទ្រជាលើកដំបូង កាលពីពេលព្រឹកថ្ងៃអាទិត្យ(ទី26កក្កដា) ក្នុងទីក្រុងស៊ីងតៅ ទីក្រុងឆ្នេរសមុទ្រ ក្នុងមណ្ឌលសានតុង ភាគខាងកើតប្រទេសចិន។

AG600 បានហោះឡើងពីលើផ្ទៃទឹកសមុទ្ររបស់ទីក្រុងស៊ីងតៅ នៅវេលាម៉ោង 10 និង18នាទី តាមម៉ោងក្នុងស្រុក និងបានបញ្ចប់ជើងហោះហើរសាកល្បងនេះ បន្ទាប់ពីហោះហើរនៅលើអាកាសបានប្រមាណជា 31នាទី។ នេះ អាចរាប់បានថា ជាជំហានដ៏សំខាន់មួយ របស់គ្រោងការ យន្តហោះពហុជំនាញខ្នាតធំរបស់ប្រទេសចិន។

AG600 ដែលមានឈ្មោះថា “ឃុនលង់” បានទទួលការច្នៃម៉ូដឱ្យក្លាយជាយន្តហោះដែលអាចចត និងរត់នៅលើផ្ទៃទឹក រត់នៅលើគោក និងហោះលើអាកាសបាន ដែលមានទំហំធំបំផុតលើពិភពលោក ដែលការអភិវឌ្ឍ AG600 នេះ បានបង្ហាញឱ្យឃើញពីនវានុវត្តន៍ដ៏ទំនើបបំផុតរបស់ប្រទេសចិនក្នុងផ្នែកនេះ។

AG600 ជាស្នាដៃការអភិវឌ្ឍរបស់ក្រុមហ៊ុនឧស្សាហកម្មការហោះហើរនៃប្រទេសចិន(AVIC) ដើម្បីឆ្លើយតបទៅនឹងតម្រូវការផ្នែកការជួយសង្គ្រោះគ្រាអាសន្ន និងការការពារ និងគ្រប់គ្រងគ្រោះធម្មជាតិរបស់ប្រទេសចិន។

ក្រុមហ៊ុនឧស្សាហកម្មការហោះហើរនៃប្រទេសចិន បានបញ្ជាក់ថា AG600 ដែលជាយន្តហោះពហុជំនាញនេះ បានទទួលការច្នៃម៉ូដឱ្យមានល្បឿនលឿន ហោះចុះចតបានគ្រប់ស្ថានភាពផ្ទៃដី និងទឹក របស់តំបន់នានា និងមានចលនារហ័ស អាចធានាបានគ្រប់ភារកិច្ច ដូចជាការពន្លត់ភ្លើងព្រៃ និងការជួយសង្គ្រោះនៅលើផ្ទៃទឹក ជាដើម។

ក្នុងការប្រតិបត្តិភារកិច្ចជួយសង្គ្រោះ AG600 មានចំណុចខ្លាំងខាងផ្នែកស្វែងរក ក្នុងបរិវេណធំទូលាយដោយប្រសិទ្ធភាពខ្ពស់ មានសុវត្ថិភាពខ្ពស់ និងមានទម្ងន់ផ្ទុកបានច្រើន ដោយក្នុងការប្រតិបត្តិការម្ដងៗ AG600 អាចជួយមនុស្សបានដល់ទៅ 50នាក់។

ទាំងអស់នេះ ភាពជោគជ័យក្នុងការហោះឡើងពីផ្ទៃទឹកសមុទ្រលើកដំបូងរបស់ AG600 គឺជាជំហានសំខាន់មួយក្នុងការអភិវឌ្ឍយន្តហោះពហុជំនាញម៉ូដែលនេះ ក្រោយពី AG600 ធ្លាប់បានធ្វើការហោះហើជាលើកដំបូងម្ដងរួចមកហើយ កាលពីខែធ្នូ ឆ្នាំ2017 និងធ្លាប់បានហោះឡើង-ចុះចត នៅលើផ្ទៃទឹក ជាលើកដំបូងនៅក្នុងទំនប់ស្តុកទឹកដ៏ធំមួយ កាលពីខែតុលា ឆ្នាំ2018។

ប្រភព៖ សារព័ត៌មានបរទេស

July 27, 2020

ចោរជនជាតិវៀតណាម ប្លន់ហាងទំនើប3កន្លែងក្នុងថ្ងៃតែមួយនៅតៃវ៉ាន់

ពលករចំណាកស្រុកជនជាតិវៀតណាមម្នាក់ត្រូវបានប៉ូលិសតៃវ៉ាន់ចាប់ខ្លួន បន្ទាប់ពីបានប្លន់ និងចាក់កាប់បុគ្គលិកហាងទំនើប3កន្លែងនៅក្នុងថ្ងៃតែមួយ។

មុនពេលចាប់ខ្លួនជនសង្ស័យនេះ ក្រុមប៉ូលិសសន្និដ្ឋានថា ករណីប្លន់ហាងទំនើបជាច្រើនកន្លែងនៅទីក្រុងតៃប៉ិ (Taipei) និងទីក្រុងតៃប៉ិថ្មី (New Taipei ) កាលពីព្រឹកព្រលឹមនាថ្ងៃទី24កក្កដា គឺជាករណីដែលធ្វើឡើងដោយមនុស្សតែមួយ។ សមត្ថកិច្ចបានរកឃើញថា ចោរដែលបានប្លន់នៅក្នុង3ករណីនេះ មានកម្ពស់ប្រហែលគ្នា ព្រោះទាំងស្ពាយកាបូបដូចគ្នាពេលកំពុងធ្វើសកម្មភាព បើទោះពាក់ម៉ាស់បិទមុខក៏ដោយ។

សមត្ថកិច្ចក្រុងតៃប៉ិថ្មី បានបញ្ចេញកម្លាំងប៉ូលិសចំនួន5ក្រុមដើម្បីតាមស្វែងរក និងបានចាប់ខ្លួនជនសង្ស័យម្នាក់អាយុ21ឆ្នាំក្នុងថ្ងៃដដែលនៅក្នុងទីលំនៅរបស់ជននេះនៅឯទីក្រុង Keelung។

ក្រោយពីបានសួរចម្លើយ ប៉ូលិសក៏កំណាត់បានអត្តសញ្ញាណរបស់ជននេះ។ បុរសជាចោរ និងជាពលករវៀតណាមចំណាកស្រុកម្នាក់នេះ បានប្លន់ហាងទំនើបចំនួន3ករណីនៅក្នុងថ្ងៃតែមួយ។ ករណីប្លន់ដំបូងត្រូវបានធ្វើឡើងនៅវេលាម៉ោង0និង58នាទី ដោយចោរប្លន់នេះបានភ្ជង់កាំបិទទៅលើបុគ្គលិកហាង និងយកបានប្រាក់9,900ដុល្លារតៃវ៉ាន់ (TWD) ប្រហែល335ដុល្លារអាមេរិក។ ចោរជនជាតិវៀតណាមនេះថែមទាំងបានកាប់ទៅលើដៃជនរងគ្រោះ បណ្ដាលឱ្យរងរបួសធ្ងន់ផងដែរ។

មួយម៉ោងក្រោយមក នៅក្នុងហាងទំនើបមួយកន្លែងផ្សេងទៀត ជននេះក៏បានយកកាំបិទចាក់ទៅលើបុគ្គលិកម្នាក់ និងប្លន់បានប្រាក់ចំនួន10,000ដុល្លារតៃវ៉ាន់ (340ដុល្លារអាមេរិក) រួចគេចខ្លួនបាត់ស្រមោល។

នៅក្នុងករណីប្លន់ទី3 ពលករវៀតណាមចំណាកស្រុករូបនេះ បានទទួលបរាជ័យក្នុង ព្រោះបុគ្គលិកហាងធ្វើសកម្មភាពប្រឆាំងតបត។ ចោរប្លន់ជាជនជាតិរៀតណាមម្នាក់នេះ បានវាយប្រហារ និងបង្ករបួសទៅលើបុគ្គលិកហាងម្នាក់ឈ្មោះ Shen នៅមុនពេលឡើងតាក់ស៊ីគេចខ្លួនបាត់ពីកន្លែងកើតហេតុ។ ក៏ប៉ុន្តែ ក្រោយមកក៏ត្រូវបានប៉ូលិសចាប់ខ្លួននៅឯកន្លែងស្នាក់នៅ៕

ប្រភព៖ CNA

July 27, 2020

Author: សឿន សំណាង