សឿន សំណាង - La Reine Media

ទូកនិងនាវារបស់ពលរដ្ឋ ឡោមព័ទ្ធយានអវកាស SpaceX ដែលទើបត្រឡប់មកដល់ផែនដី

នាវានិងទូកឯកជនជាច្រើនគ្រឿងបាននាំគ្នាចូលទៅចតក្បែរយានអវកាស Crew Dragon នាំឱ្យបុគ្គលិករបស់ក្រុមហ៊ុន SpaceX ជួបការលំបាកក្នុងពេលនាំយកយាននេះត្រឡប់ទៅក្រុមហ៊ុនវិញ។

យានអវកាស Crew Dragon ឬហៅថា Endeavour របស់ SpaceX បានចុះចតនៅលើលម្ហសមុទ្រ Penacola ក្នុងរដ្ឋ Florida កាលពីព្រឹកមិញ (3សីហា នៅកម្ពុជា) បន្ទាប់ពីបាននាំអ្នកអវកាសរបស់ NASA គឺលោក Bob Behnken និង លោក Doug Hurley ត្រឡប់មកកាន់ផែនដី ក្រោយពីបានហោះទៅកាន់ស្ថានីយអវកាសអន្តរជាតិ និងធ្វើការនៅទីនោះអស់រយៈពេល2ខែ។ មិនយូរប៉ុន្មានក្រោយពីបានចុះចតលើផ្ទៃសមុទ្រ ទូកនិងនាវាតូចៗជាច្រើនគ្រឿងរបស់ពលរដ្ឋ បាននាំគ្នាចូលមកក្បែរយានអវកាស ដើម្បីបានឃើញច្បាស់ផ្ទាល់នឹងភ្នែក។

“ប្រការនេះស្ថិតនៅក្រោយការសន្និដ្ឋានរបស់ខ្ញុំ។ បន្ទាប់ពីក្រុមអ្នកអវកាស និងយានបានចុះចត នាវាជាច្រើនបាននាំគ្នាមកដល់។ ប្រហែលជាពេលក្រោយ យើងត្រូវធ្វើឱ្យបានល្អជាងនេះ”។ នេះបើតាមលោក Jim Bridenstine ប្រធានអង្គការ NASA។

ក្រុមអ្នកស្រង់នាវារបស់ SpaceX ត្រូវបញ្ចេញកម្លាំងដើម្បីរុញច្រាននាវា និងទូកឯកជនទាំងនោះឱ្យចេញឆ្ងាយ។ ប៉ុន្តែ នាវា និងទូកមួយចំនួនក៏នៅតែក្រាញមិនព្រមចេញ ហើយស្ថិតនៅជារង្វង់មូលជុំវិញនាវា Go Navigator ក្នុងពេលដែលបុគ្គលិកធ្វើការប្រមូលយកយានចេញពីផ្ទៃទឹក។

នៅក្នុងទិដ្ឋភាពដែលបានចេញផ្សាយនៅលើទំព័រ NASA TV គេឃើញមាននាវានិងទូកជាច្រើនគ្រឿងត្រូវបានបើកបរចូលមកក្បែរតំបន់យានអវកាស ក្នុងនោះមាននាវាខ្លះថែមទាំងបានលើកទង់ និងបើកបរជារង្វង់មូលជុំវិញយានអវកាសទៀតផង។ លោក Bridenstine ថ្លែងថា ក្រុមល្បាតសមុទ្របានបិទការចេញចូលតំបន់ចុះចតមុននោះ ចំណែកដំណើរការនៃការចុះចតលើសមុទ្រក៏មិនបានជួបបញ្ហាអ្វីដែរ។ នាវា Go Navigator របស់ SpaceX បានស្រង់យាននោះប្រហែល30នាទីក្រោយការចុះចត ក៏ប៉ុន្តែនាវា និងទូកឯកជនជាច្រើនបានទៅដល់មុន។

សូមរំឭកថា SpaceX បានចាប់ផ្ដើមបេសកកម្ម Demo-2 កាលពីថ្ងៃទី30ឧសភា ដើម្បីនាំអវកាសយានិក Behnken និង Hurley ឡើងទៅកាន់ស្ថានីយអវកាសអន្តរជាតិ ISS។ នេះគឺជាការសាកល្បងជាលើកចុងក្រោយ មុនពេល SpaceX ចាប់ផ្ដើមដំណើរការដឹកបុគ្គលិករបស់ NASA ជាផ្លូវការចាប់ពីខែកញ្ញា2020។ SpaceX គឺជាក្រុមហ៊ុនឯកជនមួយក្នុងចំណោមក្រុមហ៊ុនឯកជនចំនួន2 (រួមមាន Boeing ផងដែរ) ដែលទទួលបានកិច្ចព្រមព្រៀងដែលមានតម្លៃរាប់ពាន់លានដុល្លារជាមួយនឹង NASA ដើម្បីដឹកអវកាសចរទៅ-មក រវាងផែនដី និង ISS៕

ប្រភព៖ Space

August 3, 2020

អូស្ត្រាលី ប្រកាសដាក់ប្រទេសក្នុងសភាវគ្រោះវិបត្តិ ដាក់បម្រាមគោចរ ក្រោយជួប “ករណីអាថ៌កំបាំង”

រដ្ឋវិកតូរៀ របស់ប្រទេសអូស្ត្រាលី បានប្រកាសសភាវគ្រោះវិបត្តិទូទាំងរដ្ឋ និងហាមប្រជាជនក្នុងទីក្រុងមែលប៊ន ចេញពីផ្ទះនៅពេលរាត្រី ក្រោយជួប “ករណីអាថ៌កំបាំង” មានមនុស្សជាច្រើនរយអ្នកឆ្លងមេរោគកូវីដ-19 ដោយមិនអាចតាមដានបាន។

ខណៈដែលទូទាំងពិភពលោក រួមទាំងអាមេរិក អង់គ្លេស និងអេស្ប៉ាញផង បានត្រឡប់មកដាក់បញ្ជាឱ្យប្រើវិធានការតឹងរ៉ឹងក្នុងកម្រិតផ្សេងៗនោះ លោក ឌែនៀល អ៊ែនឌ្រូស៍ អភិបាលរដ្ឋវិកតូរៀ បានប្រកាសកាលពីថ្ងៃអាទិត្យ(ទី2សីហា)ឱ្យបង្កើនវិធានការដាក់កំហិតក្នុងកម្រិតខ្ពស់បំផុត ដើម្បីទប់ស្កាត់ចំនួនអ្នកឆ្លងមេរោគដែលកើនឡើងយ៉ាងឆាប់រហ័ស និងមិនអាចតាមដានបាន។

លោកបានថ្លែងថា បើមិនដាក់បញ្ជាឱ្យប្រើវិធានការបិទទីក្រុងកម្រិត4 រយៈពេល 6សប្ដាហ៍ទេនោះ រដ្ឋវិកតូរៀ នឹងត្រូវប្រថុយប្រថានក្នុងការបិទទីក្រុងកម្រិត3 រយៈពេល 6ខែ ដោយសារតែមិនអាចគ្រប់គ្រងការឆ្លងរាលដាលបាន និងថែមទាំងជាការបង្កើនបន្ទុកយ៉ាងធ្ងន់ដល់ប្រព័ន្ធសេវាសុខាភិបាលទៀតផង។

ក្រោមវិធានការបិទទីក្រុងកម្រិត4 នេះ ប្រជាជនមិនអាចធ្វើដំណើរចេញទៅឆ្ងាយក្រៅរង្វង់ 5គីឡូម៉ែត្រពីផ្ទះបានទេ ហាត់ប្រាណនៅក្រៅផ្ទះបាន 1ថ្ងៃ 1ម៉ោង និងគ្រួសារនីមួយៗ នឹងអាចមានតែមនុស្សម្នាក់គត់ ដែលចេញទៅទិញអីវ៉ន់បានក្នុង 1ថ្ងៃ 1ដង និងជាពិសេស ទីក្រុងមែលប៊ន នឹងដាក់បញ្ជាឱ្យប្រើវិធានការបម្រាមគោចរចាប់ពីម៉ោង 8យប់ ដល់ 5ភ្លឺទៀតផង។

សម្រាប់ការប្រកាសសភាវគ្រោះវិបត្តិនេះ នឹងធ្វើឱ្យប៉ូលិស និងអាជ្ញាធរផ្សេងៗ មានអំណាចច្រើនឡើង និងអាចបញ្ជាឱ្យប្រើច្បាប់ថ្មីផ្សេងៗបានយ៉ាងឆាប់រហ័ស។

រដ្ឋនីវសៅថ៍វេលស៍ ជារដ្ឋដែលមានប្រជាជនច្រើនបំផុតក្នុងប្រទេសអូស្ត្រាលី បានលើកកម្ពស់ការប្រកាសអាសន្នដូចគ្នា ដើម្បីគ្រប់គ្រងការឆ្លងរាលដាលរបស់មេរោគកូរ៉ូណា ដោយបានអំពាវនាវឱ្យប្រជាជនពាក់ម៉ាស់អនាម័យការពារនៅពេលប្រើប្រាស់សេវាដឹកជញ្ជូនសាធារណៈ និងទៅផ្សារ។

នៅសហរដ្ឋអាមេរិក អ្នកយកព័ត៌មាន មិនបានទទួលការអនុញ្ញាតឱ្យចូលយកព័ត៌មានពីកិច្ចប្រជុំកម្រិតជាតិរបស់គណបក្ស រីផាប្លិកាន់ ដែលរៀបចំឡើងនៅចុងខែនេះ នៅរដ្ឋ ណូស ឃែរ៉ូឡៃណា ហើយនឹងមានការប្រកាសដាក់ឈ្មោះលោក ដូណាល់ ត្រាំ ជាបេក្ខភាពប្រធានាធិបតីអាណត្តិទី2ទៀតផង ដោយអ្នកនាំពាក្យរបស់គណបក្ស បានបញ្ជាក់ថា ការមិនអនុញ្ញាតឱ្យអ្នកសារព័ត៌មានចូលរួមនេះ គឺដើម្បីការពារការឆ្លងរាលដាលរបស់មេរោគវីរុសកូរ៉ូណា។

លោកត្រាំ បាននិយាយវាយប្រហារថា អ្វីដែលលោក អ៊ែនថូនី ហ្វៅហ្ស៊ី អ្នកជំនាញការផ្នែកជំងឺឆ្លង និងជាទីប្រឹក្សាសំខាន់ក្នុងការក្នុងការតស៊ូប្រឆាំងនឹងកូវីដ-19 របស់មន្ទីរសេតវិមាន និយាយថា អាមេរិកមានអ្នកជំងឺកូវីដ-19ច្រើនជាងគេបំផុតក្នុងពិភពលោក គឺជាង 4.5លាននាក់ គឺដោយសារតែរដ្ឋបាលកណ្ដាល និងរដ្ឋបាលក្នុងតំបន់ ទប់ទល់មិនតឹងរ៉ឹងនោះ “មិនមែនជាការពិតទេ” តែ គឺដោយសារតែមានការពិនិត្យរកអ្នកឆ្លងមេរោគបានច្រើនជាងប្រទេសឯទៀតៗប៉ុណ្ណឹងឯង។

តាមរយៈទិន្នន័យរបស់មហាវិទ្យាល័យ ចន ហប់គីនស៍ បានឱ្យដឹងថា ខណៈនេះមានអ្នកឆ្លងមេរោគកូវីដ-19 ជិត 17.8លាននាក់ និងស្លាប់ជាង 683,000នាក់ ទូទាំងពិភពលោក៕

ប្រភព៖ សារព័ត៌មានបរទេស

August 3, 2020

មេដឹកនាំប្រទេសមួយទៀតហើយដែលបានឆ្លងCOVID-19!

មេដឹកនាំរដ្ឋាភិបាលនៃសាធារណរដ្ឋកូសូវ៉ូ (Republic of Kosovo) លោក Avdullah Hoti បានឱ្យដឹងថា លោកបានឆ្លងវីរុសCOVID-19 និងកំពុងស្ថិតនៅដាច់ដោយឡែកក្នុងគេហដ្ឋានក្នុងរយៈពេល2សប្ដាហ៍។

លោក Avdullah Hoti នាយករដ្ឋមន្ត្រីនៃប្រទេសកូសូវ៉ូ កាលពីថ្ងៃទី2សីហាបានប្រកាសនៅលើបណ្ដាញសង្គម Facebook ថា “ខ្ញុំមិនមានរោគសញ្ញាណាមួយក្រៅពីក្អកតិចៗនោះទេ”។

យោងតាមសារព័ត៌មាន Reuters រដ្ឋាភិបាលរបស់លោក Hoti ត្រូវបានរិះគន់ខ្លាំងៗដោយសារតែមិនបានធ្វើសកម្មភាពពេញលេញក្នុងការទប់ស្កាត់ COVID-19។ តួលេខនៃអ្នកឆ្លងវីរុសCOVID-19 នៅប្រទេសនេះ បាននិងកំពុងកើនឡើងខ្ពស់នៅក្នុងរយៈពេលប៉ុន្មានថ្ងៃចុងក្រោយនេះ ក្នុងនោះរួមមានករណីស្លាប់ចំនួន13នាក់ក្នុងថ្ងៃទី2សីហា។

គិតមកដល់បច្ចុប្បន្ន នៅកូសូវ៉ូ មនុស្សប្រមាណជា9,000នាក់បានឆ្លងវីរុសCOVID-19 និង249នាក់បានស្លាប់ដោយសារវីរុសនេះរាប់ចាប់ពីពាក់កណ្ដាលខែមីនា ជាពេលដែលប្រទេសនេះបានរកឃើញករណីឆ្លងដំបូងបង្អស់។

លោក Hoti មិនមែនជាមេដឹកនាំដំបូងដែលបានឆ្លងវីរុសCOVID-19 នោះទេ។ មុននេះ ប្រធានាធិបតី បេឡារុស លោក Alexander Lukashenko ដែលធ្លាប់បានស្នើឱ្យព្យាបាលCOVID-19 ដោយការផឹកស្រា ឬឆ្ពង់ ក៏បានប្រកាសកាលពីថ្ងៃទី28កក្កដាថា បានឆ្លងCOVID-19 នេះដែរ។

ប្រធានាធិបតីរបស់បូលីវី លោកស្រី Jeanine Anez កាលពីថ្ងៃទី9កក្កដា ក៏បានប្រកាសអំពីលទ្ធផលធ្វើតេស្តរបស់ខ្លួន ដោយវិជ្ជមានជាមួយនឹងវីរុសCOVID-19 ផងដែរ។

មុននោះ នាយករដ្ឋមន្ត្រីអង់គ្លេស លោក Boris Johnson នាយករដ្ឋមន្ត្រីរុស្ស៊ី លោក Mikhail Mishustin និងប្រធានាធិបងតីប្រេស៊ីល លោកJair Bolsonaro ក៏បានបញ្ជាក់ថា បានឆ្លងវីរុសCOVID-19នេះ។

COVID-19 បានចាប់ផ្ដើមកើតមានឡើងនៅទីក្រុង Wuhan ប្រទេសចិន តាំងពីចុងឆ្នាំ2019 ហើយគិតមកដល់បច្ចុប្បន្ន វីរុសនេះបានសម្លាប់មនុស្សយ៉ាងតិច692,794នាក់ ខណៈដែលមានមនុស្សជាង18.2លាននាក់បានឆ្លងវីរុសនេះ៕

ប្រភព៖ សារព័ត៌មានបរទេស

August 3, 2020

WHO បង្កើតបានមូលដ្ឋានស៊ើបអង្កេតរកប្រភពCOVIDD-19 ខណៈអ្នកស្លាប់ដោយសារវីរុសនេះកើនដល់ជាង692,000នាក់

ក្រុមអ្នកជំនាញរបស់អង្គការសុខភាពពិភពលោក (WHO) ប្រចាំប្រទេសចិន សម្រេចបានមូលដ្ឋានសម្រាប់បេសកកម្មស្រាវជ្រាវរកប្រភពពិតប្រាកដរបស់វីរុសCOVID-19 ដែលកំពុងបង្កជំងឺសួតប្រភេទថ្មី និងរាតត្បាតពេញពិភពលោក។

សារព័ត៌មាន SCMP ដកស្រង់សេចក្ដីជូនដំណឹងកាលពីថ្ងៃទី2សីហារបស់ WHO បានឱ្យដឹងថា “ក្រុមអ្នកជំនាញ2រូបរបស់ WHO បានបំពេញបេសកកម្មរយៈពេល3សប្ដាហ៍ដោយជោគជ័យនៅប្រទេសចិន ក្នុងការបង្កើតមូលដ្ឋានសម្រាប់ជំនួយដល់កិច្ចប្រឹងប្រែងរួមក្នុងការកំណត់ឱ្យបានច្បាស់អំពីប្រភពរបស់ COVID-19″។

សេចក្ដីជូនដំណឹងបានបន្តថា ក្រុមអ្នកជំនាញរបស់ WHO បាន “ពិភាក្សាស៊ីជម្រៅជាមួយនឹងដៃគូនានានៅប្រទេសចិន និងទទួលបានព័ត៌មានចុងក្រោយបំផុតស្ដីអំពីការសិក្សាស្រាវជ្រាវផ្នែករោគរាតត្បាត ការវិភាគផ្នែកជីវសាស្ត្រ និងតំណពូជ ក៏ដូចជាសុខភាពសត្វ”។

ក្រុមមកពី WHO នេះក៏បានពិភាក្សាពីចម្ងាយជាមួយក្រុមអ្នកជំនាញផ្នែកវីរុសសាស្ត្រ ក្រុមអ្នកវិទ្យាសាស្ត្រនៅ Wuhan ប្រទេសចិន រួមជាមួយនឹងក្រុមមន្ត្រីនៅទីក្រុងប៉េកាំងផងដែរ។

សេចក្ដីប្រកាសខាងលើត្រូវបានធ្វើឡើងបន្ទាប់ពីអ្នកជំនាញមួយក្រុមបានជំរុញឱ្យ WHO ពន្លឿនការស្រាវជ្រាវដែលបានចាប់ផ្ដើមតាំងតែពីខែមិថុនា។

COVID-19 បានចាប់ផ្ដើមបង្ហាញខ្លួននៅប្រទេសចិនកាលពីចុងឆ្នាំ2019 ហើយបច្ចុប្បន្ន កំពុងរាតត្បាតពាសពេញពិភពលោក បណ្ដាលឱ្យមនុស្សចំនួនជាង18លាននាក់បានឆ្លងរោគ និងជាង692,700នាក់បានបាត់បង់ជីវិត។

នៅក្នុងកិច្ចប្រជុំពេញអង្គរបស់អង្គការសុខភាពពិភពលោកកាលពីខែឧសភា សមាជិកចំនួន194នាក់បានមូលមតិគ្នាសម្រេចចិត្តធ្វើការស្រាវជ្រាវរកប្រភពរបស់ COVID-19 ក៏ដូចជាវិធីដើម្បីទប់ស្កាត់របស់ពិភពលោក។

សហរដ្ឋអាមេរិកនិងបណ្ដាប្រទេសលោកខាងលិចយល់ថា វីរុសCOVID-19 មានប្រភពពីប្រទេសចិន ហើយទីក្រុងប៉េកាំងបានព្យាយាមលាក់បាំងបញ្ហាទាក់ទិននឹងវីរុសនេះ។ ប៉ុន្តែ ភាគីចិនបានច្រានចោលការចោទប្រកាន់នេះ៕

ប្រភព៖ សារព័ត៌មានបេទេស

August 3, 2020

វៀតណាម៖ ស្លាប់1ករណីទៀតហើយ ដោយសារតែឆ្លងCOVIVD-19

នៅព្រឹក ថ្ងៃទី1សីហានេះ “អ្នកជំងឺទី499” នៅវៀតណាម ត្រូវបានរាយការណ៍ថា បានបាត់បង់ជីវិត ដែលនេះគឺជាករណីស្លាប់ទី3ហើយ នៅប្រទេសនេះ។

សាស្ត្រាចារ្យ Nguyen Gia Binh ប្រធានាសមាគមសង្គ្រោះបន្ទាន់ និងជាសមាជិកគណៈកម្មការផ្នែកព្យាបាលនៃគណៈកម្មធិការគ្រប់គ្រងការប្រយុទ្ធប្រឆាំងនឹង COVID-19 បានឱ្យដឹងថា មូលហេតុដែលនាំឱ្យអ្នកជំងឺនេះបាត់បង់ជីវិតគឺដោយសារមានជំងឺមហារីក និងជំងឺសួតធ្ងន់ធ្ងរ បូករួមជាមួយនឹងជំងឺCOVID-19។

អ្នកជំងឺដែលបានស្លាប់ខាងលើនេះគឺជាស្ត្រីវ័យ68ឆ្នាំ មានជំងឺលើសឈាម ទឹកនោមផ្អែម មហារីកគ្រាប់ឈាម (Leukemia) និងជំងឺCOVID-19។ ករណីនេះក៏ជាប់ទាក់ទិននឹងមន្ទីរពេទ្យដាណាំងនៅភាគកណ្ដាលប្រទេសផងដែរ ដោយសារធ្លាប់បានចូលសម្រាកព្យាបាលជំងឺនៅទីនេះជាញឹកញាប់។

នេះគឺជាករណីស្លាប់ទី3 ដោយសារឆ្លងវីរុសCOVID-19 នៅប្រទេសវៀតណាម។ ករណីស្លាប់ទី1 និងទី2 បានកើតមានកាលពីម្សិលមិញ (31កក្កដា)។ អ្នកជំងឺចំនួន18នាក់ផ្សេងទៀតកំពុងតែប្រឈមនឹងការបាត់បង់ជីវិត ដោយសារតែមានសភាពធ្ងន់ធ្ងរ និងសុទ្ធសឹងតែជាមនុស្សចាស់ និងមានជំងឺច្រើនមុខ៕

August 1, 2020

វៀតណាម៖ អ្នកជំងឺCOVID-19 ស្លាប់2 និងរកឃើញករណីផ្ទុកវីរុសថ្មី94នាក់បន្ថែមទៀត

ក្រសួងសុខាភិបាលវៀតណាម ព្រឹកនេះ (1សីហា) បានរកឃើញករណីឆ្លងវីរុសCOVID-19 ថ្មី ចំនួន12នាក់ ដែលសុទ្ធតែជាអ្នកជំងឺ និងអ្នកថែទាំអ្នកជំងឺនៅមន្ទីរពេទ្យដាណាំង រួមនឹងអ្នកទាក់ទងផ្ទាល់ជាមួយអ្នកជំងឺ។

នៅក្នុងរយៈពេល24ម៉ោងកន្លងទៅនេះ វៀតណាមបានរកឃើញអ្នកផ្ទុកវីរុសCOVID-19 សរុប94នាក់។

ករណីស្លាប់ដោយសារវីរុសCOVID-19 ចំនួន2នាក់នេះត្រូវបានវៀតណាមអះអាងថា មានជាប់ទាក់ទិននឹងជំងឺគាំងបេះដូង ចំណែក1ករណីទៀតជាប់ទាក់ទងនឹងបញ្ហាឆ្លងរោគផ្សេងបន្ថែមពីលើ COVID-19។

គិតមកដល់ព្រឹកនេះ វៀតណាមបានរកឃើញអ្នកផ្ទុកCOVID-19 សរុប558នាក់ អ្នកស្លាប់សរុប2នាក់ កំពុងព្យាបាល183នាក់ និងជាសះស្បើយ373នាក់។

មនុស្សជាង91,000នាក់នៃប្រទេសនេះកំពុងត្រូវបានដាក់ឱ្យនៅដាច់ដោយឡែកដោយសង្ស័យថា មានផ្ទុកវីរុសCOVID-19។

នៅទូទាំងពិភពលោក គិតមកដល់បច្ចុប្បន្ន មានអ្នកស្លាប់ដោយសារCOVID-19 ចំនួនជាង660,000នាក់ ក្នុងចំណោមអ្នកជំងឺសរុបជាង17លាននាក់។ សហរដ្ឋអាមេរិក និងប្រេស៊ីលគឺជាប្រទេសដែលមានអ្នកជំងឺ និងអ្នកស្លាប់ដោយសារវីរុសនេះច្រើនជាងគេក្នុងពិភពលោក។ នៅតំបន់អាស៊ីអាគ្នេយ៍ ប្រទេសឥណ្ឌូនេស៊ីឈរលំដាប់ទី1 ដោយមានអ្នកជំងឺសរុប108,376នាក់ និងអ្នកស្លាប់សរុប5,131នាក់៕

August 1, 2020

កម្ពុជារកឃើញករណីឆ្លងCOVID-19 ថ្មី 5នាក់ ខណៈពិភពលោករកឃើញជាង291,000នាក់ក្នុងរយៈពេល24ម៉ោងចុងក្រោយនេះ

ក្រសួងសុខាភិបាលកម្ពុជា នាព្រឹកនេះ (1សីហា) បានប្រកាសឱ្យដឹងថា បានរកឃើញអ្នកជំងឺCOVID-19 ថ្មី ចំនួន5ករណីបន្ថែមទៀត ដែលនេះត្រូវបានរកឃើញកាលពីថ្ងៃទី31កក្កដា2020។

គិតមកដល់បច្ចុប្បន្ន កម្ពុជាបានរកឃើញអ្នកផ្ទុក COVID-19 សរុប ចំនួន239នាក់ ក្នុងនោះអ្នកជំងឺបានជាសះស្បើយមានចំនួន164នាក់ ចំណែកអ្នកជំងឺកំពុងសម្រាកព្យាបាលមានចំនួន73នាក់។

នៅក្នុងរយៈពេល24ម៉ោងចុងក្រោយនេះដែរ ពិភពលោកទាំងមូលត្រូវបានរាយការណ៍ថា បានរកឃើញអ្នកផ្ទុកវីរុសCOVID-19 ថ្មី ចំនួន291,536នាក់ និងអ្នកស្លាប់ថ្មីដោយសារវីរុសនេះមានចំនួន688នាក់ ដូច្នេះ តួលេខសរុបនៃអ្នកផ្ទុកវីរុសនេះនៅទូទាំងពិភពលោកបានកើនឡើងដល់17,754,190នាក់ ចំណែកអ្នកស្លាប់សរុបមានចំនួន682,885នាក់។ អ្នកជំងឺបានជាសះស្បើយមានចំនួន11,159,580នាក់។

August 1, 2020

បេក្ខជនប្រធានាធិបតីសហរដ្ឋអាមេរិក Kanye West កំពុងប្រឈមនឹងការលែងលះ ព្រោះមិនព្រមឈប់ពីឆាកនយោបាយ

ប្រភពជិតស្និទ្ធជាមួយអ្នកស្រី Kim Kardashian បានឱ្យដឹងថា តារាទូរទស្សន៍រូបនេះកំពុងពិចារណាទៅលើរឿងលែងលះ បន្ទាប់ពីបានជជែកគ្នាជាមួយលោក Kanye West កាលពីដើមសប្ដាហ៍។

កាលពីថ្ងៃទី30កក្កដា ប្រភពព័ត៌មានរបស់ People បានបង្ហើបឱ្យដឹងថា “Kim មិនទទួលបាននូវអ្វីដែលនាងប្រាថ្នា ក្រោយពីបានទៅជួប Kanye។ គាត់ហាក់មិនយល់អំពីអ្វីដែលភរិយារបស់គាត់បាននិយាយសោះឡើយ។ Kanye មិនបានផ្លាស់ប្ដូរអ្វីទាំងអស់ បើទោះជា Kim បាននិយាយជាច្រើនលើក។ នាងកំពុងតែពិចារណាចំពោះរឿងលែងលះគ្នា បើទោះវាជាបញ្ហាចុងក្រោយដែលត្រូវគិត។ Kanye West គឺជាដៃគូជីវិតរបស់ Kim ប៉ុន្តែពេលនេះ នាងមិនដឹងថាត្រូវធ្វើអ្វីនោះទេ”។

ប្រភពព័ត៌មានមួយផ្សេងទៀត បានប្រាប់សារព័ត៌មាន People ថា អ្នកស្រី Kim បានទៅរកលោក Kanye West កាលពីដើមសប្ដាហ៍ដើម្បីរំឭកគាត់ឱ្យឈប់ឈរឈ្មោះជាបេក្ខភាពប្រធានាធិបតីសហរដ្ឋអាមេរិក។ នាងចង់ឱ្យស្វាមីផ្ដោតទៅលើការព្យាបាលជំងឺផ្លូវចិត្ត ព្រោះថា លោក West មានរោគសញ្ញានៃជំងឺផ្លូវចិត្តបាយប៉ូឡា (bipolar disorder) ជាច្រើនឆ្នាំមកហើយ ប៉ុន្តែគាត់មិនចង់ព្យាបាល។ ពេលខ្លះ តារាចម្រៀងរ៉ែបរូបនេះ ថែមទាំងបាននិយាយថា គ្រួសាររបស់លោក ចង់បង្ខាំងលោកនៅក្នុងមន្ទីរពេទ្យឆ្កួតទៀតផង។

អស់ជាច្រើនឆ្នាំមកហើយ លោក West ចេះតែគេចពីគ្រួសារ ទៅរស់នៅក្នុងកសិដ្ឋាននៅ Cody ក្នុងរដ្ឋ Wyoming ដើម្បីផលិតចម្រៀង។ Kim តែងនាំកូនៗពី Los Angeles ទៅលេងនឹង West ជារៀងរាល់ខែ។

Kanye West បានទាក់ទង Kim Kardashian តាំងពីខែមេសា ឆ្នាំ2012 ហើយ2ឆ្នាំក្រោយមក ពួកគេក៏បានរៀបការជាមួយគ្នា។ អ្នកទាំង2 មានកូនចំនួន4នាក់ ៖ North (អាយុ7ឆ្នាំ) Saint (4ឆ្នាំ) Chicago (2ឆ្នាំ) និង Psalm (អាយុ1ឆ្នាំ)។

តារាចម្រៀងរ៉ែប Kanye West បានក្លាយជាបេក្ខជនប្រធានាធិបតីសហរដ្ឋអាមេរិក ចាប់ពីថ្ងៃទី15កក្កដា។ បន្ទាប់ពីថ្ងៃឃោសនារកសំឡេងឆ្នោតដំបូង លោក West បានបង្ហោះសាររិះគន់ជាច្រើនទៅលើគ្រួសារ។ Kim Kardashian បានឱ្យដឹងថា ស្វាមីរបស់អ្នកស្រីមានជំងឺផ្លូវចិត្ត ដូច្នេះទើបមិនអាចគ្រប់គ្រងសម្ដីខ្លួនឯងបាន។ ក្រោយមក លោក West ក៏បានសុំទោសប្រពន្ធតាមរយៈបណ្ដាញសង្គម។ អ្នកស្រី Kim បានធ្វើដំណើរទៅកាន់រដ្ឋ Wyoming កាលពីថ្ងៃទី24កក្កដា ដើម្បីថែទាំស្វាមី ក្រោយពីបានដឹងថា លោក West ត្រូវចូលពេទ្យសង្គ្រោះបន្ទាន់៕

ប្រភព៖ សារព័ត៌មានបរទេស

>អត្ថបទទាក់ទង៖ តារាចម្រៀងរ៉ែប Kanye West បានចុះឈ្មោះជាបេក្ខភាពសម្រាប់តំណែងប្រធានាធិបតីសហរដ្ឋអាមេរិកជាផ្លូវការរួចហើយ

July 31, 2020

វៀតណាមរកឃើញអ្នកផ្ទុកCOVID-19 សរុបជាង500នាក់! ក្រុមអ្នកជំនាញអាមេរិក និងអូស្ត្រាលីអះអាងថា នេះមិនទាន់ក្លាយជារលកទី2នៃវីរុសCOVID-19 នៅឡើយ

ទីក្រុងហាណូយបានធ្វើតេស្តលឿនបានចំនួនជិត52,000លើកទៅលើពលរដ្ឋដែលជាប់សង្ស័យថាអាចមានផ្ទុកវីរុសCOVID-19 ក្នុងពេលដែលទីក្រុងហូជីមិញបានបញ្ចេញលទ្ធផលធ្វើតេស្តចំនួន1,351នាក់។

នៅទីក្រុងហាណូយ ក្នុងចំណោមសំណាកចំនួន21,000ករណី ដែលត្រូវបានធ្វើតេស្តលឿន គឺមាន2ករណីបង្ហាញថាវិជ្ជមានជាមួយនឹងCOVID-19 ប៉ុន្តែលទ្ធផលនៃការធ្វើតេស្តដោយប្រើបច្ចេកទេស PCR សុទ្ធតែបង្ហាញលទ្ធផលអវិជ្ជមាន។

លោក Khong Minh Tuan នាយករងនៃមជ្ឈមណ្ឌលគ្រប់គ្រងជំងឺនៃក្រុងហាណូយបានឱ្យដឹងថា CDC របស់ទីក្រុងនេះ បានធ្វើតេស្តលឿនសរុបជិត52,000លើកនៅក្នុងខណ្ឌចំនួន30។ គិតដល់ថ្ងៃនេះ (31កក្កដា) ទីក្រុងហាណូយបានធ្វើតេស្តលឿនទៅលើពលរដ្ឋដែលមកពីទីក្រុងដាណាំងនៅក្នុងខែកក្កដា ចំនួន21,732នាក់។

នៅក្នុងថ្ងៃនេះ ទីក្រុងហាណូយបានរកឃើញអ្នកផ្ទុកវីរុសCOVID-19 ចំនួន2ករណីតែប៉ុណ្ណោះ ដែលអ្នកទាំងនេះមានជាប់ពាក់ព័ន្ធនឹងទីក្រុងដាណាំង។

ចំណែកនៅទីក្រុងហូជីមិញវិញ គិតមកដល់ពេលនេះ កំពុងធ្វើតេស្តលើសំណាករបស់ពលរដ្ឋចំនួន14,000នាក់ ក្នុងចំណោមមនុស្សចំនួន22,000នាក់ដែលបានមករាយការណ៍ បន្ទាប់ពីបានត្រលប់មកពីទីក្រុងដាណាំង រាប់ចាប់ពីថ្ងៃទី1កក្កដា។ ក្នុងចំណោមសំណាកចំនួន14,000ករណីដែលកំពុងធ្វើតេស្ត គឺមានលទ្ធផលអវិជ្ជមានចំនួន1,351នាក់ ក្រៅពីនេះ កំពុងរង់ចាំលទ្ធផល។

បច្ចុប្បន្ន ទីក្រុងហូជីមិញកំពុងព្យាបាលអ្នកជំងឺCOVID-19 ថ្មី ចំនួន2នាក់ ដែលជាជនជាតិអាមេរិកាំង។ ទីក្រុងនេះកំពុងតាមដានមនុស្សចំនួន470នាក់ ចំណែក1,113នាក់ផ្សេងទៀតកំពុងដាក់ឱ្យនៅដោយឡែក ខណៈ3,350នាក់ទៀតកំពុងបង្ខាំងខ្លួននៅក្នុងផ្ទះ។

គិតមកដល់បច្ចុប្បន្ន ប្រទេសវៀតណាមបានរកឃើញអ្នកជំងឺសរុបចំនួន 509នាក់ ក្នុងនោះមាន136នាក់កំពុងទទួលការព្យាបាល និង373នាក់បានជាសះស្បើយ។ ទីក្រុងចំនួន3ដែលបានរកឃើញអ្នកផ្ទុកវីរុសCOVID-19 ច្រើនជាងគេ រួមមានរដ្ឋធានីហាណូយ (123នាក់) ទីក្រុងដាណាំង (85នាក់) និងទីក្រុងហូជីមិញ (64នាក់)។

ទាក់ទិននឹងតួលេខនៃករណីរកឃើញអ្នកផ្ទុកវីរុសCOVID-19 នៅវៀតណាមក្នុងពេលថ្មីៗនេះ ក្រុមជំនាញផ្នែកសុខាភិបាលនៃសហរដ្ឋអាមេរិក និងអូស្ត្រាលី បានអះអាងថា ស្ថានភាព COVID-19 នៅប្រទេសវៀតណាម មិនទាន់ក្លាយជារលកនៃការរាតត្បាតទី2របស់វីរុសនេះនៅឡើយ។ ក៏ប៉ុន្តែ ក្រុមវេជ្ជបណ្ឌិតទាំងនេះបានផ្ដល់យោបល់ថាវៀតណាមគួរតែបន្ថែមការប្រុងប្រយ័ត្នជាងនេះ៕

ប្រភព៖ សារព័ត៌មានបរទេស

July 31, 2020

Huawei យកឈ្នះលើ Samsung និងក្លាយជាក្រុមហ៊ុនស្មាតហ្វូនធំជាងគេបង្អស់ក្នុងពិភពលោក

ក្រុមហ៊ុនផ្ដល់សេវាកម្មផ្នែកវិភាគទីផ្សារ Canalys បានឱ្យដឹងថា ក្រុមហ៊ុន Huawei លក់ស្មាតហ្វូនបានចំនួន55.8លានគ្រឿងនៅក្នុងត្រីមាសទី2នេះ ហើយនេះជាតួលេខមួយដែលខ្ពស់ជាងក្រុមហ៊ុន Samsung របស់កូរ៉េខាងត្បូងទៅទៀត។

ក្រុមហ៊ុនបច្ចេកវិទ្យា Huawei របស់ចិន បានយកឈ្នះលើ Samsung និងបានក្លាយជាក្រុមហ៊ុនផលិតទូរស័ព្ទឆ្លាតវៃធំជាងគេលំដាប់ទី1ក្នុងពិភពលោក នេះបើតាមរបាយការណ៍របស់ក្រុមហ៊ុនវិភាគទីផ្សារ Canalys ដោយយោងទៅតាមបរិមាណនៃស្មាតហ្វូនដែលបានលក់ចេញរបស់ក្រុមហ៊ុនទាំងពីរ។

Canalys បានចេញរបាយការណ៍ថ្មីបំផុតមួយបានឱ្យដឹងថា ក្នុងត្រីមាសទី2នេះ ក្រុមហ៊ុន Huawei លក់ស្មាតហ្វូនបាន55.8លានគ្រឿង ថយចុះ5% បើធៀបនឹងដំណាក់កាលដូចគ្នាក្នុងឆ្នាំ2019។ ចំណែក Samsung វិញ តួលេខនេះមានចំនួន53.7លានគ្រឿង ថយចុះ30%។

នេះគឺជាលើកដំបូងហើយដែល Huawei ដណ្ដើមបានចំណាត់ថ្នាក់ខ្ពស់ជាងគេក្នុងពិភពលោក នៅក្នុង1ត្រីមាស។ Huawei បានតាមរកគោលដៅនេះជាច្រើនឆ្នាំមកហើយ៕

ប្រភព៖ សារព័ត៌មានបរទេស

July 31, 2020

Author: សឿន សំណាង