សឿន សំណាង - La Reine Media

Microsoft នឹងចំណេញអ្វីខ្លះ បន្ទាប់ពីបានទិញ TikTok?

បច្ចុប្បន្ន Microsoft ត្រូវបានគេចាត់ទុកថាជាក្រុមហ៊ុនរបស់មនុស្សដែលមានវ័យច្រើន ដូច្នេះ បើសិនជាទទួលបានជោគជ័យក្នុងការទិញក្រុមហ៊ុន TikTok នៅសហរដ្ឋអាមេរិក នោះ Microsoft នឹងក្លាយជាក្រុមហ៊ុនទាន់សម័យជាងមុន។

Microsoft ទើបតែបានប្រកាសថា កំពុងតែចរចាជាមួយក្រុមហ៊ុន ByteDance របស់ចិន ដើម្បីទិញ TikTok នៅសហរដ្ឋអាមេរិក។ NYT (New York Times) បានបញ្ជាក់ថា Microsoft អាចប្រើប្រាស់ឥទ្ធិពលហិរញ្ញវត្ថុដើម្បីក្ដោបក្ដាប់ចំណូលចិត្តរបស់យុវវ័យតាមរយៈជំនួញមួយនេះ។

សេចក្ដីប្រកាសត្រូវបានភាគី Microsoft លើកឡើង ក្រោយពីជំនួបរវាង CEO Satya Nadella និងលោក Trump។ ប្រធានាធិបតីសហរដ្ឋអាមេរិក ធ្លាប់បានគំរាមបិទបណ្ដាញសង្គមវីដេអូខ្លីនេះ ដោយសារមានការព្រួយបារម្ភអំពីសន្តិសុខជាតិ។

TikTok កំពុងទទួលបានការនិយមប្រើនៅទូទាំងពិភពលោក ពិសេសគឺយុវវ័យ។ ដូច្នេះ ការទិញ TikTok នេះ អាចជួយឱ្យក្រុមហ៊ុន Microsoft ដែលមានឈ្មោះល្បីល្បាញខាងទិន្នន័យនិងប្រព័ន្ធប្រតិបត្តិការស្រាប់ អាចគ្រប់គ្រងបណ្ដាញសង្គមមួយក្នុងចំណោមបណ្ដាញសង្គមដែលមានឥទ្ធិពលលំដាប់កំពូលៗនៅសហរដ្ឋអាមេរិក។

CEO របស់ក្រុមហ៊ុន Microsoft លោក Satya Nadella

Dan Ives ដែលជានាយកប្រតិបត្តិ និងជាអ្នកជំនាញខាងវិភាគរបស់ក្រុមហ៊ុន Wedbush Securities បានថ្លែងថា “Microsoft ត្រូវបានគេចាត់ទុកថាជាក្រុមហ៊ុនរបស់អាណាព្យាបាល (សម្រាប់មនុស្សមានអាយុច្រើន) នានា។ ពួកគេកំពុងតែព្យាយាមប្ដូរផ្លាស់ប្រការនេះ”។ លោកបន្តថា បើសិនជាជំនួញនេះបានសម្រេចជាស្ថាពរ នោះ Microsoft នឹងវិវឌ្ឍខ្លួនពីក្រុមហ៊ុនដែលមិនសូវទាក់ទាញសម្រាប់មនុស្សវ័យក្រោម25ឆ្នាំ ទៅជាក្រុមហ៊ុន “ទាន់សម័យ” ដូច TikTok។

ក្រោយពីបានក្លាយជា CEO កាលពីឆ្នាំ2014 លោក Nadella បានជួយឱ្យ Microsoft ក្លាយជាក្រុមហ៊ុន Cloud computing លំដាប់យក្សមួយក្នុងពិភពលោក។ ក្រុមហ៊ុនបច្ចេកវិទ្យាមួយនេះ បច្ចុប្បន្ន មានទុនសរុបជាង1.5លានលានដុល្លារអាមេរិក និងមានទ្រព្យជាសាច់ប្រាក់សុទ្ធចំនួន130ពាន់លានដុល្លារ។

ក៏ប៉ុន្តែ Microsoft ហាក់មិនទាន់បានកំណត់ទិសដៅជាក់លាក់ក្នុងការបម្រើអតិថិជនវ័យក្មេងនៅឡើយ ក្រៅតែពីវិស័យហ្គេម។ ក្នុងដំណាក់កាលបណ្ដាញសង្គមក្លាយជាក្រុមហ៊ុនពាណិជ្ជកម្មដ៏មិហាមា ដូចជា Facebook ដែលមានតម្លៃដល់ទៅជាង720ពាន់លានដុល្លារជាដើមនេះ Microsoft បែរជាតាមមិនទាន់និន្នាការនេះទៅវិញ។

នៅក្នុងសម័យ Nadella ជំនួញធំបំផុតរបស់ Microsoft គឺការទិញក្រុមហ៊ុនអ៊ីនធឺណិតនានា។ បណ្ដាក្រុមហ៊ុននេះ មានបណ្ដាញដែលទាក់ទាញអ្នកប្រើប្រាស់បានច្រើន ប៉ុន្តែពួកគេក៏ត្រូវការហេដ្ឋារចនាសម្ព័ន្ធផ្ទុកទិន្នន័យបែប Cloud computing ដែល Microsoft អាចផ្គត់ផ្គង់បាន។

ឆ្នាំ2014 Microsoft បានទិញក្រុមហ៊ុន Minecraft ក្នុងតម្លៃ2.5ពាន់លានដុល្លារ។ ឆ្នាំ2016 ក្រុមហ៊ុននេះក៏បានទិញក្រុមហ៊ុន LinkedIn ក្នុងតម្លៃ26.2ពាន់លានដុល្លារ។ 2ឆ្នាំក្រោយមកទៀត Microsoft បន្តទិញក្រុមហ៊ុន GitHub ដែលជាមូលដ្ឋានអនឡាញសម្រាប់ក្រុមអ្នកអភិវឌ្ឍផ្នែកទន់ (software) ក្នុងតម្លៃ7.5ពាន់លានដុល្លារ។

សារព័ត៌មាន NYT បានឱ្យដឹងថា យុវវ័យមិនគួរព្រួយបារម្ភ ខ្លាច Microsoft ធ្វើឱ្យការទាក់ទាញរបស់ TikTok ត្រូវថយចុះនោះឡើយ។ ព្រោះថា នៅក្នុងករណីទិញដូរក្រុមហ៊ុនមួយចំនួនកាលពីពេលកន្លងទៅថ្មីៗនេះ Microsoft បានបង្កើនធនធានមនុស្ស ហិរញ្ញវត្ថុ និងបច្ចេកវិទ្យានៅក្នុងបណ្ដាក្រុមហ៊ុនដែល Microsoft បានទិញ ប៉ុន្តែ ភាគច្រើនMicrosoft នៅតែទុកឱ្យក្រុមហ៊ុនទាំងនោះ ដំណើរការដោយឯករាជ្យ។

Microsoft នឹងបានអ្វីខ្លះ បន្ទាប់ពីបានទិញ TikTok? — លោក Zhang Yiming ជា CEO របស់ក្រុមហ៊ុន ByteDance ដែលជាក្រុមហ៊ុនមេរបស់ TikTok

ជាមួយនឹងអ្នកប្រើប្រាស់ជាង100លាននាក់នៅសហរដ្ឋអាមេរិក TikTok ប្រាកដជាទទួលបានការយកចិត្តទុកដាក់ខ្ពស់ ក្រោយពី Microsoft បានទិញយកមកកាន់កាប់។ កិច្ចព្រមព្រៀងដែលកំពុងលើកយកមកចរចារួមមាន ការទិញការិយាល័យនានារបស់ TikTok នៅសហរដ្ឋអាមេរិក កាណាដា អូស្ត្រាលីនិងនូវែលហ្សេឡង់។ ByteDance ដែលជាក្រុមហ៊ុនមេរបស់ TikTok នឹងនៅតែបន្តកាន់កាប់មូលដ្ឋានរបស់បណ្ដាញសង្គមនេះនៅឯទីក្រុងប៉េកាំង។

Microsoft ក៏អាចផ្ដល់នូវអ្វីដែលគូប្រជែងនានាមិនមាន នៅក្នុងវិស័យបច្ចេកវិទ្យានេះ នោះគឺភាពសុខសាន្តនៅវ៉ាស៊ីងតោន។ Amazon, Facebook និង Google ធ្លាប់ត្រូវបង្កើនការប្រុងប្រយ័ត្នក្នុងកាលៈទេសៈមួយដែលស្ថិតក្រោមការតាមដានទាក់ទិននឹងបញ្ហាផ្ដាច់មុខ។ ដូច្នេះ ការធ្វើកិច្ចព្រមព្រៀងលំដាប់ “យក្ស” ជាមួយនឹងបណ្ដាក្រុមហ៊ុនដែលមិនមានភាពរឹងមាំផ្នែកនយោបាយ ក៏មិនមានការទាក់ទាញនោះដែរ។

បើទោះជាប្រឹងប្រែងវាយលុកទីផ្សារប្រទេសចិនជាង1ទសវត្សរ៍កន្លងមក ប៉ុន្តែ Microsoft ទទួលបានជោគជ័យតិចតួចប៉ុណ្ណោះក្នុងទីផ្សារមួយនេះ។ Microsoft Windows និង Office មានការពេញនិយមនៅប្រទេសចិន ក៏ប៉ុន្តែ ភាគច្រើនគឺជាទំនិញគេចពន្ធ។ ទីផ្សារប្រទេសចិន បានរួមចំណែកមិនដល់2%ផងនៅក្នុងចំណូលសរុបរបស់ Microsoft។

ការជជែកគ្នារវាង Satya Nadella ជាមួយនឹងលោក Trump បានកាត់បន្ថយការព្រួយបារម្ភរបស់ប្រធានាធិបតីអំពី TikTok ចំពោះសន្តិសុខជាតិ។ ការព្រួយបារម្ភធំបំផុតរបស់រដ្ឋាភិបាលអាមេរិកាំង នោះគឺបណ្ដាញសង្គមនេះអាចជួយឱ្យចិនក្ដោបក្ដាប់ព័ត៌មានឯកជនរបស់ពលរដ្ឋអាមេរិកាំង។ ប៉ុន្តែ បើតាមការប្រកាសកន្លងមក Microsoft បានធានាថានឹងរក្សាសុវត្ថិភាពទិន្នន័យរបស់អ្នកប្រើប្រាស់ TikTok នៅសហរដ្ឋអាមេរិក៕

ប្រភព៖ NYT

August 5, 2020

លោក Trump ៖ សហរដ្ឋអាមេរិកនឹងអាចមានវ៉ាក់សាំងCOVID-19 នៅចុងឆ្នាំនេះ

ប្រធានាធិបតី Donald Trump បានប្រកាសថា សហរដ្ឋអាមេរិកអាចអភិវឌ្ឍវ៉ាក់សាំងCOVID-19 ដោយជោគជ័យនៅមុនកាលកំណត់ នៅចុងឆ្នាំនេះ ឬដើមឆ្នាំ2021។

“យើងកំពុងធ្វើឱ្យមានតុល្យភាពរវាងល្បឿននិងសុវត្ថិភាព។ យើងកំពុងតែ “ដុតដៃដុតជើង” ដើម្បីមានវ៉ាក់សាំងនៅក្នុងឆ្នាំនេះ ហើយវាអាចនឹងឆាប់ជាងចុងឆ្នាំ” លោក Trump ថ្លែងដូច្នេះនៅក្នុងសន្និសីទសារព័ត៌មានមួយកាលពីម្សិលមិញ (3សីហា)នៅសេតវិមាន។

លោក Trump បន្ថែមថា “យើងក៏កំពុងតែផលិតវ៉ាក់សាំងជាច្រើនដែលនឹងនាំមកនូវក្ដីសង្ឃឹមបំផុត ដើម្បីត្រៀមខ្លួនសម្រាប់ប្រើប្រាស់ភ្លាមៗបន្ទាប់ពីបានអនុម័ត។ កម្លាំងភស្តុភារនៃកងទ័ពក៏បានត្រៀមខ្លួនរួចជាស្រេចហើយដែរ”។

មេដឹកនាំសហរដ្ឋអាមេរិក បានថ្លែងដល់ប្រភេទវ៉ាក់សាំងដែលមានសក្កានុពលដែលត្រូវបានអភិវឌ្ឍដោយក្រុមហ៊ុន Pfizer និង Moderna។ ក្រុមមន្ត្រីជាន់ខ្ពស់អាមេរិកាំងបានឱ្យដឹងថា ក្រុមហ៊ុនទាំង2នេះ បានធ្វើការសាកល្បងដំណាក់កាលចុងក្រោយនៅលើមនុស្សតាំងតែពីសប្ដាហ៍មុន។ លោក Trump អះអាងថា “ទាំងនេះមិនត្រឹមតែជាក្រុមហ៊ុនល្បីឈ្មោះប៉ុណ្ណោះទេ តែថែមទាំងត្រូវបានវាយតម្លៃខ្ពស់ទៀតផង”។

ម្ចាស់សេតវិមានសង្ឃឹមថា ក្រោយពីមានវ៉ាក់សាំង សហរដ្ឋអាមេរិកអាចលុបបំបាត់COVID-19 បានយ៉ាងឆាប់រហ័សបំផុត។

បច្ចុប្បន្ន សហរដ្ឋអាមេរិកគឺជាសម្បុកវីរុសCOVID-19 ធំជាងគេបង្អស់ក្នុងពិភពលោក ដោយបានរកឃើញអ្នកផ្ទុកវីរុសចំនួន 4,862,285នាក់ និងអ្នកស្លាប់ដោយសារវីរុសនេះមានចំនួនជាង158,000នាក់។

នៅទូទាំងពិភពលោក គិតមកដល់ពេលនេះ មានអ្នកជំងឺCOVID-19 សរុប18,467,839នាក់ អ្នកស្លាប់សរុប697,876នាក់ និងអ្នកជំងឺបានជាសះស្បើយមានចំនួន11,695,336នាក់៕

ប្រភព៖ CNBC

August 4, 2020

(វីដេអូ)-យានអវកាសចិនដែលកំពុងហោះទៅកាន់ផ្កាយព្រះអង្គារ បានកែប្រែគន្លងគោចរជាលើកដំបូងរួចហើយ

ក្រោយពីបានហោះហើរអស់រយៈពេល230ម៉ោង និងស្ថិតនៅចម្ងាយ3លានគីឡូម៉ែត្រពីផែនដី យានអវកាសចិន Tianwen-1 ក៏បានកែប្រែគន្លងគោចរជាលើកដំបូងក្នុងដំណើរឆ្ពោះទៅកាន់ពិភពព្រះអង្គារ។

Tianwen-1 ដែលជាយានអវកាសហោះទៅកាន់ពិភពព្រះអង្គារដំបូងរបស់ចិន បានទទួលជោគជ័យក្នុងការកែប្រែគន្លងគោចរជាលើកដំបូងកាលពីថ្ងៃទី2សីហា។

យាន Tianwen-1 បានកែប្រែគន្លងគោចរក្រោយពីម៉ាស៊ីន 3,000 N របស់វា ដំណើរការក្នុងរយៈពេល20វិនាទី។ ក្នុងអំឡុងពេលនោះ Tianwen-1 បានហោះហើរអស់រយៈពេល230ម៉ោងនៅក្នុងទីអវកាស និងមានចម្ងាយពីផែនដីប្រមាណជា3លានគីឡូម៉ែត្រ។

ការកែប្រែគន្លងគោចរនេះគឺក្នុងបំណងធានាឱ្យយានអវកាសអាចហោះសំដៅទៅកាន់ផ្កាយព្រះអង្គារ ទៅតាមគន្លងដ៏ត្រឹមត្រូវដែលបានកំណត់ទុក។

តាមផែនការ យានអវកាស Tianwen-1 របស់ចិននេះ នឹងទៅដល់គោលដៅក្នុងអំឡុងខែកុម្ភៈ ឆ្នាំ2021ខាងមុខ។

ប្រភព៖ CGTN

August 4, 2020

Samsung កំពុងពិចារណា “រើរោងចក្រ PC ពីប្រទេសចិន មកកាន់ប្រទេសវៀតណាម”

ឈប់ផលិតកុំព្យូទ័រនៅប្រទេសចិន ក្រុមហ៊ុន Samsung កំពុងពិចារណាលើការរើរោងចក្រមកកាន់ប្រទេសវៀតណាម ដើម្បីកាត់បន្ថយការចំណាយ និងរក្សាកម្លាំងប្រកួតប្រជែងក្នុងផ្នែកនេះ។

សារព័ត៌មាន Nikkei បានចេញផ្សាយថា ក្រុមហ៊ុន Samsung នឹងបិទរោងចក្រផលិត PC ចុងក្រោយរបស់ខ្លួននៅប្រទេសចិនក្នុងខែសីហានេះ។ ផ្នែកមួយនៃមូលដ្ឋានរបស់ Samsung នៅប្រទេសចិននឹងត្រូវប្ដូរទៅជាមជ្ឈមណ្ឌលស្រាវជ្រាវនិងអភិវឌ្ឍ។

Nikkei ក៏បានឱ្យដឹងដែរថា Samsung កំពុងតែពិចារណាទៅលើការរើរោងចក្រពីប្រទេសចិន ចូលមកពង្រីកបន្ថែមនៅលើរោងចក្រមួយកន្លែងដែលកំពុងដំណើរការនៅប្រទេសវៀតណា។ អ្នកនាំពាក្យរបស់ Samsung បានឱ្យដឹងថា ការផ្អាកដំណើរការនៃរោងចក្រនៅប្រទេសចិន គឺដើម្បីស្វែងរកទីតាំងដែលអាចកាត់បន្ថយការចំណាយ។

រោងចក្រ Samsung នៅទីក្រុង Suzhou នៃប្រទេសចិន គឺជាមជ្ឈមណ្ឌលដំឡើងកុំព្យូទ័រ PC។ បន្ទាប់ពីបានដំឡើង ផលិតផលរបស់រោងចក្រនេះ ភាគច្រើនត្រូវបាននាំទៅលក់ក្នុងប្រទេសកូរ៉េខាងត្បូង តំបន់អាមេរិកខាងជើង និងប្រទេសចិន។ រោងចក្រនេះ ពេលខ្លះមានបុគ្គលិកដល់ទៅ6,500នាក់ ប៉ុន្តែបច្ចុប្បន្ន ត្រូវបានកាត់បន្ថយមកនៅត្រឹម1,700នាក់ប៉ុណ្ណោះ។

ក្រុមហ៊ុនស្រាវជ្រាវទីផ្សារ Gartner បានឱ្យដឹងថា បរិមាណ PC ដែលបានបញ្ចេញលក់នៅក្នុងពិភពលោក បានកើន0.6% ពោលគឺឡើងដល់261.2លានគ្រឿងក្នុងឆ្នាំ2019។ Lenovo Group របស់ចិនកំពុងកាន់កាប់24.1% ក្នុងទីផ្សារពិភពលោក។ ឈរលំដាប់ទី2គឺ HP ដោយកាន់កាប់22.2%។ រីឯ Samsung វិញ កាន់កាប់ចំណែកទីផ្សារទាបជាង Dell, Apple, Acer និង Asus ទៅទៀត។

ប្រភព៖ Nikkei

August 4, 2020

WHO ៖ នឹងមិនមាន “ឱសថទិព្វ” សម្រាប់ប្រឆាំងនឹងCOVID-19ឡើយ

អង្គការសុខភាពពិភពលោក (WHO) យល់ថា ដំណោះស្រាយក្នុងការកម្ចាត់COVID-19 មិនមែនគ្រាន់តែប្រើប្រាស់វ៉ាក់សាំងដ៏ល្អឥតខ្ជោះណាមួយនោះឡើយ។

នៅក្នុងសន្និសីទសារព័ត៌មានមួយកាលពីថ្ងៃទី3សីហា មេដឹកនាំ WHO បានអះអាងថា ផ្លូវសម្រាប់ការប្រយុទ្ធប្រឆាំងនឹងCOVID-19 នៅវែងអន្លាយទៅមុខទៀត ហើយប្រទេសជាច្រើននឹងត្រូវបង្កើតយុទ្ធសាស្ត្រថ្មីដើម្បីទប់ស្កាត់វីរុសនេះ។

ប្រធានាអង្គការសុខភាពពិភពលោក លោក Tedros Adhanom Ghebreyesus និងប្រធានកម្មវិធីបន្ទាន់របស់ WHO លោក Mike Ryan បានផ្ដល់អនុសាសន៍ ក៏ដូចជាជំរុញឱ្យរដ្ឋាភិបាលនានា អនុវត្តវិធានការទប់ស្កាត់ការឆ្លងវីរុសនេះ ដូចជាការពាក់ម៉ាស់ រក្សាគម្លាតសង្គម លាងដៃជាញឹកញាប់ តាមដានករណីសង្ស័យ និងការធ្វើតេស្តរកមេរោគឱ្យបានច្រើនជាងមុន។ល។

លោក Tedros បានសង្កត់ធ្ងន់ថា “វ៉ាក់សាំងមួយចំនួន កំពុងស្ថិតក្នុងការសាកល្បងដំណាក់កាលទី3។ ទាំងអស់នេះសុទ្ធតែត្រូវបានរំពឹងថានឹងមានប្រសិទ្ធភាព។ ប៉ុន្តែ មិនមានដំណោះស្រាយងាយស្រួលណាមួយដើម្បីកម្ចាត់វីរុសនេះបានទាំងស្រុងនោះឡើយ ហើយលទ្ធភាពនេះក៏នឹងមិនអាចកើតមាននោះដែរ”។

នៅក្នុងគ្រាដែលពិភពលោកកំពុងតែរត់ប្រណាំងក្នុងការអភិវឌ្ឍវ៉ាក់សាំង លោក Tedros ថ្លែងថា មិនទាន់មានប្រការណាមួយប្រាកដប្រជានោះទេ។ លោកសង្កត់ធ្ងន់ថា “មានការព្រួយបារម្ភមួយចំនួនថា យើងមិនអាចផលិតបានវ៉ាក់សាំងដែលមានប្រសិទ្ធភាព ឬថាការការពាររបស់វ៉ាក់សាំងនឹងមានរយៈពេលត្រឹមតែប៉ុន្មានខែប៉ុណ្ណោះ។ នៅពេលការសាកល្បងព្យាបាលមិនទាន់ទទួលបានជោគជ័យ នោះយើងមិនអាចសន្និដ្ឋានអ្វីទាំងអស់”។

ប្រធានកម្មវិធីបន្ទាន់របស់ WHO លោក Mike Ryan បានថ្លែងថា “ប្រទេសមួយចំនួនក្នុងពិភពលោក គួរតែថយក្រោយមួយជំហាន និងពិនិត្យឡើងវិញនូវយុទ្ធសាស្ត្រក្នុងការដោះស្រាយបញ្ហាទាក់ទិននឹងជំងឺរាតត្បាតនៅតាមបន្ទាត់ព្រំដែនរបស់ពួកគេ”៕

ប្រភព៖ SCMP

August 4, 2020

អ្នកជំងឺCOVID-19 ម្នាក់ទៀតបានបាត់បង់ជីវិតនៅប្រទេសវៀតណាម

ស្ត្រីវ័យ62ឆ្នាំម្នាក់នៅទីក្រុង Da Nang ភាគកណ្ដាលនៃប្រទេសវៀតណាម បានបាត់បង់ជីវិតកាលពីព្រឹកមិញនេះ ដោយសារផលវិបាករបស់COVID-19 បូករួមជាមួយនឹងជំងឺប្រចាំកាយ។

ក្រសួងសុខាភិបាលវៀតណាមបានប្រកាសថា នេះគឺជាករណីស្លាប់ទី7 ដែលទាក់ទិននឹងការឆ្លងវីរុសCOVID-19 នៅវៀតណាម។ ក្រសួងក៏បានបញ្ជាក់ថា ទន្ទឹមនឹងវីរុសCOVID-19 អ្នកជំងឺដែលបានស្លាប់នេះ ក៏មានរោគខ្សោយតម្រងនោមដំណាក់កាលចុងក្រោយផងដែរ។

អាជ្ញាធរវៀតណាមឱ្យដឹងថា បច្ចុប្បន្ន នៅមានអ្នកជំងឺជាច្រើននាក់ទៀតកំពុងប្រឈមនឹងការស្លាប់ដោយសារCOVID-19 រួមនឹងជំងឺប្រចាំកាយ និងវ័យចំណាស់េរបស់ពួកគេ។ កន្លងមក អ្នកជំងឺCOVID-19 ចំនួន6នាក់ដែលបានបាត់បង់ជីវិត មានអាយុចាប់ពី53ដល់86ឆ្នាំ ក្នុងនោះមានករណីស្លាប់ចំនួន5ជាប់ទាកទិននឹងមន្ទីរពេទ្យក្រុង Na Nang និង2ករណីទៀតនៅខេត្ត Quang Nam ដែលមានទីតាំងនៅជាប់នឹងទីក្រុង Na Nang។

គិតមកដល់ព្រឹកនេះ តួលេខអ្នកជំងឺសរុបនៅប្រទេសវៀតណាមបានកើនដល់ 652នាក់ ក្នុងនោះមាន374បានជាសះស្បើយ 7នាក់បានស្លាប់ និង271នាក់កំពុងទទួលការព្យាបាល៕

ប្រភព៖ សារព័ត៌មានបរទេស

August 4, 2020

ល្បីពេញពិភពលោក!! និស្សិតស្រីជនជាតិមីយ៉ាន់ម៉ា ចង្កេះរៀវតូច អង្ក្រងសុំចាញ់…

កញ្ញា “ស៊ូនេង” និស្សិតស្រីជនជាតិមីយ៉ាន់ម៉ា មានចង្កេះរៀវតូច ទំហំត្រឹមតែ 13.7អ៊ិញប៉ុណ្ណោះ ល្បីថា ជាទំហំដែលរៀវតូចជាងគេបំផុតក្នុងពិភពលោក…។

និស្សិតស្រីជនជាតិមីយ៉ាន់ម៉ា អាយុ 23ឆ្នាំម្នាក់នេះ តែងតែផូស្តរូបភាពរបស់នាងនៅក្នុងប្រព័ន្ធទំនាក់ទំនងសង្គម អ៊ីនស្តាក្រាម ជាញឹកញាប់ ហើយនាងតែងតែត្រូវបានអ្នកតាមដាន Comment ថា នាងកែកុនរូបភាពរបស់នាង រហូតវៀចខូចខុសប្រក្រតី មើលទៅមិនសមសួន។

តែកញ្ញា សូនេង បានឆ្លើយតបទៅវិញ ដោយការពារខ្លួនឯងថា នាងមិនបានកែកុន ឬតុបតែងរូបភាពរបស់នាងអ្វីទាំងអស់ ហើយរូបរាងរបស់នាងដែលមើលទៅឃើញស្គម មានចង្កេះរៀវតូចបែបនេះ គឺដោយសារតែនាងជាមនុស្សដែលញ៉ាំតែអាហារដើម្បីសុខភាព និងមកពីពូជអម្បូររបស់នាងបែបនេះផង។

នាងនិយាយថា “ខ្ញុំជាមនុស្សស្រឡាញ់សុខភាព និងតែងតែប្រើវិធីគ្រប់គ្រងទម្ងន់ខ្លួន ដែលមិនបំផ្លាញសុខភាពខ្លួនឯងជាប់ជានិច្ច ដូច្នេះ គ្មានអ្វីដែលគួរឱ្យបារម្ភនោះទេ…ខ្ញុំគិតថា ដែលខ្ញុំជាមនុស្សបែបនេះ មិនឃើញខុសអ្វីត្រង់ណាសោះ…ខ្ញុំរីករាយដែលបានផូស្តរូបភាព និងបានបង្ហាញរូបរាងរបស់ខ្ញុំ…ពាក្យសរសើរផ្សេងៗ ធ្វើឱ្យខ្ញុំសប្បាយចិត្ត ហើយមានមនុស្សច្រើនណាស់ដែលថា មើលទៅក៏ស្អាតម្យ៉ាងដែរ”

តែយ៉ាងណាក៏ដោយ ទោះជាមានអ្នកជឿថា ចង្កេះរបស់កញ្ញា ស៊ូនេង ប្រហែលជាទំហំចង្កេះដែលរៀវតូចជាងគេបំផុតលើពិភពលោកក៏ដោយ តែនៅក្នុងសៀវភៅ ហ្គីណេស វើល រេកខត បានបញ្ជាក់ថា អ្នកដែលមានចង្កេះរៀវតូចបំផុតក្នុងពិភពលោកគឺ កញ្ញា អ៊ីថេល ហ្គ្រែនជើរ ជនជាតិអង់គ្លេស ដែលមានទំហំចង្កេះត្រឹមតែ 13អ៊ិញប៉ុណ្ណោះ៕

ប្រភព៖ សារព័ត៌មានបរទេស

August 4, 2020

CEO របស់ ByteDance “ធ្វើការទាំងថ្ងៃ ទាំងយប់” ដើម្បីដោះស្រាយបញ្ហា TikTok នៅអាមេរិក

លោក Zhang Yiming កំពុងទទួលរងសម្ពាធយ៉ាងធ្ងន់ធ្ងរពីក្រុមមន្ត្រីអាមេរិកាំង ទាក់ទិននឹងការដែលក្រុមហ៊ុន ByteDance ត្រូវលក់ផ្នែកពាណិជ្ជកម្មរបស់ TikTok នៅសហរដ្ឋអាមេរិក។

នៅក្នុងលិខិតមួយច្បាប់ដែលបានផ្ញើទៅកាន់បុគ្គលិករបស់ខ្លួនកាលពីពេលថ្មីៗនេះ CEO របស់ ByteDance (ក្រុមហ៊ុនមេរបស់ TikTok) លោក Zhang Yiming បានឱ្យដឹងថា ពួកគេកំពុងតែសិក្សាស្រាវជ្រាវអស់ពីកម្លាំងកាយចិត្ត និង “ធ្វើការទាំងយប់ ទាំងថ្ងៃ” ដើម្បីដោះស្រាយបញ្ហាទំនាស់របស់ក្រុមហ៊ុននេះ ជាមួយនឹងក្រុមមន្ត្រីអាមេរិកាំង។ ក្រុមហ៊ុន ByteDance កំពុងរងសម្ពាធធ្ងន់ពីសេតវិមាន និងអ្នកតាក់តែងច្បាប់របស់ហសរដ្ឋអាមេរិក ដោយបង្ខំដោយប្រយោលឱ្យ ByteDance ដកទុនចេញពីសាខា TikTok នៅសហរដ្ឋអាមេរិក។

ក្រុមហ៊ុនចិនមួយនេះកំពុងតែចរចាលក់ផ្នែកពាណិជ្ជកម្មរបស់ TikTok នៅសហរដ្ឋអាមេរិក ទៅឱ្យក្រុមហ៊ុន Microsoft។ ការសម្រេចចុងក្រោយលើកិច្ចព្រមព្រៀងក្នុងការទិញដូរក្រុមហ៊ុន TikTok នេះ តាមគម្រោងអាចនឹងត្រូវបានធ្វើឡើងរួចរាល់ក្នុងរយៈពេល45ថ្ងៃ។

ByteDance កំពុងព្យាយាមកាត់បន្ថយការព្រួយបារម្ភរបស់អង្គភាពនានានៅសហរដ្ឋអាមេរិក ដែលយល់ថា TikTok អាចប្រមូលទិន្នន័យឯកជនរបស់អ្នកប្រើប្រាស់ និងធ្វើការឱ្យរដ្ឋាភិបាលចិន។ ក្រុមហ៊ុននេះ បានជ្រើសរើសបុគ្គលិកជិត1ពាន់នាក់នៅសហរដ្ឋអាមេរិក ព្រមទាំងបានតែងតាំងថ្នាក់ដឹកនាំជើងចាស់របស់ Walt Disney គឺលោក Keven Mayer ឱ្យធ្វើជា CEO របស់ TikTok ទៀតផង។

នៅពេល TikTok មានឈ្មោះល្បីល្បាញលើពិភពលោក ក្រុមមន្ត្រីសហរដ្ឋអាមេរិកក៏ចាប់ផ្ដើមស្នើឱ្យមានការស៊ើបអង្កេតផ្នែកសន្តិសុខជាតិទៅលើក្រុមហ៊ុននេះ។ កាលពីឆ្នាំទៅ (2019) គណៈកម្មការវិនិយោគបរទេសនៅសហរដ្ឋអាមេរិក (CFIUS) ដែលជាអង្គភាពមួយមានសិទ្ធិក្នុងការស៊ើបអង្កេតលើករណីទិញដូរក្រុមហ៊ុននៅសហរដ្ឋអាមេរិក បានបើកការវាយតម្លៃអំពីករណី ByteDance ទិញ Musical.ly។ នេះគឺជាជំនួញមួយដែលជួយឱ្យ TikTok បង្ហាញវត្តមានរបស់ខ្លួននៅសហរដ្ឋអាមេរិក។

“យើងធ្លាប់បានអះអាងជាច្រើនដងហើយថា យើងគឺជាក្រុមហ៊ុនឯកជន និងត្រៀមខ្លួនជានិច្ចដើម្បីអនុវត្តដំណោះស្រាយផ្នែកបច្ចេកទេស និងលើសពីនេះទៀតក៏បាន ដើម្បីកាត់បន្ថយការព្រួយបារម្ភរបស់ CFIUS។ ក៏ប៉ុន្តែ ពួកគេ (មន្ត្រីអាមេរិកាំង) នៅតែយល់ថា ByteDance ត្រូវតែលក់ TikTok នៅសហរដ្ឋអាមេរិក” លោក Zhang Yiming បានសរសេរដូច្នេះនៅក្នុងលិខិតដែលបានផ្ញើទៅកាន់បុគ្គលិក។ លោកបន្តថា លោកមិនយល់ស្របជាមួយនឹងការសម្រេចចិត្តនេះ ហើយបានអះអាងថា “តែងតែការពារសុវត្ថិភាពព័ត៌មានរបស់អ្នកប្រើប្រាស់ ភាពឯករាជ្យ និងតម្លាភាពរបស់បណ្ដាញសង្គមនេះ”។

លោក Zhang Yiming ក៏បានទទួលស្គាល់ថា ក្រុមហ៊ុន ByteDance កំពុងស្ថិតក្នុងដំណាក់កាលចរចាជាមួយក្រុមហ៊ុនបច្ចេកវិទ្យាមួយ ប៉ុន្តែមិនបានលើកឡើងអំពីឈ្មោះ Microsoft នោះទេ។ លោក Zhang Yiming ឱ្យដឹងថា ក្រុមហ៊ុនកំពុងតែចូលរួមពិភាក្សាកិច្ចការផ្ទៃក្នុងនានា ហើយសេចក្ដីសម្រេចចុងក្រោយរបស់ ByteDance មិនទាន់ត្រូវបានដាក់ចេញនៅឡើយ។ លោក Zhang Yiming ថ្លែងថា “ចំណាប់អារម្មណ៍របស់ពិភពលោក និងដំណឹងចចាមអារ៉ាមជុំវិញរឿងរ៉ាវ TikTok នឹងអាចអូសបន្លាយពេលយូរតទៅមុខទៀត”៕

ប្រភព៖ Bloomberg

August 4, 2020

តួលេខអ្នកឆ្លងCOVID-19 នៅកម្ពុជាថ្ងៃនេះ កើនថែម1នាក់ទៀត ខណៈតួលេខនៅទូទាំងពិភពលោកកើនថែម75,039នាក់

ក្រសួងសុខាភិបាលកម្ពុជា នាព្រឹកនេះ (4សីហា) បានប្រកាសឱ្យដឹងថា បានរកឃើញអ្នកផ្ទុកវីរុសCOVID-19 ចំនួន1នាក់ទៀត ដែលករណីនេះត្រូវបានរកឃើញកាលពីម្សិលមិញ (3សីហា)។

ដូច្នេះ គិតមកដល់បច្ចុប្បន្ន កម្ពុជាបានរកឃើញអ្នកឆ្លងវីរុសCOVID-19 សរុបចំនួន240នាក់ ក្នុងនោះអ្នកជំងឺបានជាសះស្បើយមានចំនួន196នាក់ អ្នកជំងឺកំពុងទទួលការព្យាបាលមានចំនួន44នាក់។

នៅទូទាំងពិភពលោក មកដល់ពេលនេះបានរកឃើញអ្នកផ្ទុកវីរុសCOVID-19 សរុបចំនួន18,302,397នាក់ និងអ្នកស្លាប់សរុប694,014នាក់។ ចំណេកអ្នកជំងឺដែលបានជាសះស្បើយមានចំនួន11,508,538នាក់៕

August 4, 2020

Microsoft នឹងឱ្យថ្លៃប៉ុន្មានសម្រាប់ទិញ TikTok?

បណ្ដាញសង្គមសម្រាប់ចែករំលែកវីដេអូខ្លី TikTok ត្រូវបានក្រុមហ៊ុន ByteDance កំណត់តម្លៃដល់ទៅជាង50ពាន់លានដុល្លារអាមេរិក ជាមួយនឹងប្រាក់ចំណូលរំពឹងទុកថានឹងឡើងដល់1ពាន់លានដុល្លារក្នុងមួយឆ្នាំៗ។

ក្រុមហ៊ុន Microsoft កាលពីម្សិលមិញ (2សីហា) បានទទួលស្គាល់ថា កំពុងតែចរចាជាមួយក្រុមហ៊ុន ByteDance នៅប្រទេសចិនដែលជាក្រុមហ៊ុនមេរបស់បណ្ដាញសង្គម TikTok ដើម្បីទិញបណ្ដាញសង្គមនេះនៅសហរដ្ឋអាមេរិក។ តាមគម្រោង ពួកគេនឹងមានកិច្ចព្រមព្រៀងមួយនៅក្នុងថ្ងៃទី15កញ្ញាខាងមុខ។ សេចក្ដីប្រកាសនេះត្រូវបានធ្វើឡើងក្រោយពីជំនួបរវាងលោក Satya Nadella ដែលជា CEO របស់ Microsoft និងប្រធានាធិបតីសហរដ្ឋអាមេរិកDonald Trump។ កាលពីប៉ុន្មានថ្ងៃមុន លោក Trump ថែមទាំងបាននិយាយថានឹងហាម TikTok នៅសហរដ្ឋអាមេរិក ទន្ទឹមនឹងនេះ លោកក៏បានជំទាស់នឹងការដែលក្រុមហ៊ុន Microsoft ចង់ទិញ TikTok ផងដែរ។

បច្ចុប្បន្ន គេមិនទាន់ដឹងច្បាស់ថា Microsoft នឹងហ៊ានទិញ TikTok ក្នុងតម្លៃប៉ុន្មាននៅឡើយ។ កាលពីសប្ដាហ៍មុន Reuters បានចេញផ្សាយថា ByteDance បានកំណត់តម្លៃ TikTok លើសពី50ពាន់លានដុល្លារអាមេរិក។ ប៉ុន្តែ ដោយសារសម្ពាធពីរដ្ឋាភិបាលអាមេរិកាំង តម្លៃនេះអាចនឹងថយចុះច្រើន។

បច្ចុប្បន្ន ByteDance មានភាគហ៊ុនរបស់អ្នកវិនិយោគជាច្រើន ក្នុងនោះក៏មានមូលនិធិ Vision Fund របស់ SoftBank ដែលមានទីស្នាក់ការកណ្ដាលនៅប្រទេសអង់គ្លេស មូលនិធិ General Atlantic នៅសហរដ្ឋអាមេរិក និង Sequoia Capital នៅសហរដ្ឋអាមេរិកផងដែរ។ នៅក្នុងការប្រមូលទុនកាលពីខែមីនា ក្រុមហ៊ុន ByteDance ត្រូវបានកំណត់តម្លៃត្រឹម100ពាន់លានដុល្លារអាមេរិក។ សារព័ត៌មាន WSJ ដកស្រង់ប្រភពព័ត៌មានដែលជិតស្និទ្ធ បានឱ្យដឹងថា កាលណោះ មានការកំណត់តម្លៃ TikTok ប្រមាណជាជាង30ពាន់លានដុល្លារ។

ក្រុមហ៊ុន Microsoft បានឱ្យដឹងថា ពួកគេអាចអញ្ជើញក្រុមអ្នកវិនិយោគអាមេរិកាំងផ្សេងទៀតឱ្យចូលមកទិញភាគហ៊ុនតូចៗរបស់ TikTok។ បច្ចុប្បន្ន អ្នកវិនិយោគប្រមាណជា70%របស់ ByteDance គឺមកពីសហរដ្ឋអាមេរិក។

យោងតាម WSJ ក្រុមហ៊ុន ByteDance កន្លងមកនេះ តែងតែគេចមិនចង់លក់ TikTok នៅសហរដ្ឋអាមេរិក ដោយសារពួកគេគិតថា បណ្ដាញសង្គមនេះអាចគំរាមកំហែងដល់អ្នកប្រើប្រាស់ និងប្រាក់ចំណូលរបស់ Facebook។ ក្រុមហ៊ុន ByteDance បានឱ្យដឹងនៅក្នុងរបាយការណ៍ប្រាក់ចំណូលរបស់ TikTok ថា ឆ្នាំនេះរកបានចំណូល1ពាន់លានដុល្លារអាមេរិក ហើយឆ្នាំក្រោយនឹងឡើងដល់6ពាន់លានដុល្លារ។ ក៏ប៉ុន្តែ នៅទូទាំងពិភពលោក TikTok នៅមិនទាន់រកបានចំណេញនៅឡើយ។

យោងតាមកិច្ចព្រមព្រៀងដំបូង Microsoft នឹងទទួលកាន់កាប់ផ្នែកអាជីវកម្មរបស់ TikTok នៅសហរដ្ឋអាមេរិក កាណាដា អូស្ត្រាលី និងនូវែលហ្សេឡង់។ ក្រុមហ៊ុនបានឱ្យដឹងថា នឹងធានាសុវត្ថិភាពចំពោះទិន្នន័យទាំងអស់របស់អ្នកប្រើប្រាស់នៅសហរដ្ឋអាមេរិក ដែលនឹងត្រូវបានផ្ទេរ និងរក្សាទុកនៅប្រទេសនេះ។

អំពីបញ្ហាសំខាន់នៅក្នុងការចរចារវាង Microsoft និង ByteDance នោះគឺការផ្ដាច់ដោយឡែកនូវបច្ចេកវិទ្យារបស់ TikTok ចេញពីបណ្ដាញរបស់ ByteDance។ ByteDance បច្ចុប្បន្នមានកម្មវិធីមួយផ្សេងទៀតដែលមានលំនាំដូច TikTok នៅក្នុងទឹកដីប្រទេសចិន និងមានឈ្មោះថា Douyin ហើយ TikTok នឹង Douyin កំពុងប្រើប្រាស់កូដតែមួយ។Zhang Yiming,ByteDance,TikTok,Microsoft

លោក Zhang Yiming ស្ថាបនិករបស់ ByteDance ដែលជាក្រុមហ៊ុនមេរបស់ TikTok

ក្រុមមន្ត្រីអាមេរិកាំង មកដល់ពេលនេះ នៅតែចោទប្រកាន់ថា TikTok គឺជាការគំរាមកំហែងមួយសម្រាប់សន្តិសុខជាតិ។ ប៉ុន្តែ TikTok ក៏តែងតែច្រានចោលការចោទប្រកាន់នេះ។

Reuters ដកស្រង់ប្រភពព័ត៌មានមួយឱ្យដឹងថា កិច្ចចរចារវាង ByteDance និង Microsoft នឹងត្រូវបានតាមដានដោយគណៈកម្មការវិនិយោគបរទេសនៅសហរដ្ឋអាមេរិក។ នេះគឺជានាយកដ្ឋានមួយដែលមានសិទ្ធិពេញលេញ អាចរារាំងការទិញដូរក្រុមហ៊ុនណាមួយបានទាំងអស់។

ភាគី Microsoft ឱ្យដឹងនៅក្នុងសេចក្ដីប្រកាសកាលពីម្សិលមិញថា “Microsoft បានដឹងច្បាស់អំពីសារសំខាន់ក្នុងការកាត់បន្ថយការព្រួយបារម្ភរបស់ប្រធានាធិបតី។ យើងសន្យាថាទិញ TikTok ក្រោយពីបានវាយតម្លៃទូទៅអំពីសន្តិសុខ ហើយនឹងផ្ដល់ផលប្រយោជន៍សេដ្ឋកិច្ចសមស្របដល់សហរដ្ឋអាមេរិក រួមទាំងក្រសួងហិរញ្ញវត្ថុអាមេរិកផងដែរ”៕

ប្រភព៖ Reuters និង WSJ

August 3, 2020

Author: សឿន សំណាង