សឿន សំណាង - La Reine Media

ប៉ូលិសលីបង់ប៉ះទង្គិចជាមួយក្រុមបាតុករក្រោយហេតុការណ៍ផ្ទុះនៅ Beirut

កងកម្លាំងសន្តិសុខរបស់ប្រទេសលីបង់ បានបាញ់គ្រាប់បែកផ្សែងបង្ហូរទឹកភ្នែក ដើម្បីបំបែកហ្វូងបាតុករដែលកំពុងតែមានការខឹងសម្បាខ្លាំងជាមួយនឹងរដ្ឋាភិបាលទាក់ទិននឹងហេតុការណ៍ផ្ទុះដ៏រន្ធត់នៅទីក្រុងBeirut។

ការប៉ះទង្គិចគ្នានេះបានកើតឡើងកាលពីយប់ថ្ងៃទី8សីហា នៅលើដងផ្លូវមួយដែលឆ្ពោះទៅកាន់វិមានរដ្ឋសភា នៅកណ្ដាលរដ្ឋធានី Beirut ប្រទេសលីបង់ ខណៈដែលគំនរបាក់បែកដែលកើតឡើងពីការផ្ទុះកាលពីថ្ងៃទី4សីហាមិនទាន់ត្រូវបានប្រមូលចេញពីផ្លូវនៅឡើយ។

សារព័ត៌មានរដ្ឋលីបង់ Lebanon (NNA) បានចេញផ្សាយថា ក្រុមបាតុករបាននាំគ្នាគប់ភ្លើង វាយបំផ្លាញហាងទំនិញនានា និងគប់ដុំថ្មទៅលើក្រុមសមត្ថកិច្ច ដែលនេះបាននាំឱ្យក្រុមប៉ូលិសប្រើប្រាស់គ្រាប់បែបផ្សែងបង្ហូរទឹកភ្នែកដើម្បីបំបែកហ្វូងបាតករដែលកំពុងខឹងខ្លាំង។

ក្រុមបាតុករក៏បានអំពាវនាវឱ្យមានបាតុកម្មធំមួយផ្សេងទៀតនៅចុងសប្ដាហ៍នេះ ដើម្បីប្រឆាំងនឹងរបៀបធ្វើការ ក៏ដូចជាការចាត់វិធានការរបស់រដ្ឋាភិបាលនៅមុននិងក្រោយហេតុការណ៍ផ្ទុះដែលបានសម្លាប់មនុស្សរាប់រយនាក់កាលពីថ្ងៃទី4សីហា។

កាលពីយប់ថ្ងៃទី7សីហា អគ្គរដ្ឋទូតលីបង់ប្រចាំនៅហ្ស៊កដានី លោកស្រី Tracy Chamoun បានប្រកាសលាលែងពីតំណែងដើម្បីប្រឆាំងនឹងរដ្ឋាភិបាល ព្រមទាំងបានថ្លែងថា ការខ្វះការប្រុងប្រយ័ត្នរបស់ក្រុមមន្ត្រីនៃប្រទេសនេះ បានបង្ហាញថា ដល់ពេលត្រូវផ្លាស់ប្ដូរមេដឹកនាំហើយ។ មុននោះ តំណាងរាស្ត្រលីបង់មួយរូប ឈ្មោះ Marwan Hamadeh ក៏បានលាលែងពីតំណែងផងដែរ ដើម្បីតវ៉ាប្រឆាំងរដ្ឋាភិបាលក្រោយពីមានហេតុការណ៍ផ្ទុះនេះ៕

ប្រភព៖ AFP

អត្ថបទទាក់ទង៖ ហេតុការណ៍ផ្ទុះនៅលីបង់! អាជ្ញាធរចាប់ខ្លួនអគ្គនាយកកំពង់ផែ Berut

August 7, 2020

Trump ហាមការជួញដូរជាមួយម្ចាស់ TikTok និង WeChat

ប្រធានាធិបតី Donald Trump បានចុះហត្ថលេខាលើបទបញ្ជាមួយដែលហាមមិនឱ្យបុគ្គល និងស្ថាប័នអាមេរិកាំងណាមួយ ធ្វើការជួញដូរជាមួយក្រុមហ៊ុន ByteDance ដែលជាម្ចាស់បណ្ដាញសង្គម TikTok ដោយទុកពេលឱ្យ45ថ្ងៃ។

“សហរដ្ឋអាមេរិកត្រូវតែធ្វើសកម្មភាពខ្លាំងក្លាផ្ដោតទៅលើម្ចាស់ TikTok ដើម្បីការពារសន្តិសុខជាតិ។ បុគ្គល ឬទ្រព្យសម្បត្តិដែលស្ថិតក្នុងដែនសមត្ថកិច្ចរបស់សហរដ្ឋអាមេរិកនឹងត្រូវបានហាមមិនឱ្យជួញដូរជាមួយ ByteDance ក្រោយរយៈពេល45 បន្ទាប់ពីបទបញ្ជានេះត្រូវបានអនុម័ត” នេះបើតាមខ្លឹមសារខ្លះៗនៅក្នុងបទបញ្ជារបស់ប្រធានាធិបតីសហរដ្ឋអាមេរិកដែលបានចុះហត្ថលេខាកាលពីថ្ងៃទី6សីហា។

លោក Trump កាលពីថ្ងៃទី3សីហា បានថ្លែងថា TikTok មានពេល45ថ្ងៃក្នុងការដកទុនរបស់ខ្លួន និងស្នើឱ្យក្រុមហ៊ុន ByteDance លក់ភាគហ៊ុន និងសកម្មភាពរបស់ TikTok នៅសហរដ្ឋអាមេរិកទៅឱ្យក្រុមហ៊ុន Microsoft ឬក្រុមហ៊ុនណាមួយ ពុំដូច្នោះទេ បណ្ដាញសង្គមនេះនឹងត្រូវបង្ខំឱ្យដកខ្លួនចេញពីសហរដ្ឋអាមេរិកចាប់ពីថ្ងៃទី15កញ្ញា។

រដ្ឋមន្ត្រីការបរទេស លោក Mike Pompeo ក្រោយមកបានថ្លែងថា សហរដ្ឋអាមេរិកចង់ហាមរាល់កម្មវិធីរបស់ចិនដែលមានលក្ខណៈ “មិនគួរជាទីទុកចិត្ត” នៅលើហាងលក់កម្មវិធីរបស់បណ្ដាក្រុមហ៊ុនអ៊ីនធឺណិត និងក្រុមហ៊ុនផលិតទូរស័ព្ទនៅក្នុងប្រទេសនេះ។ លោក Mike ក៏បានប្រកាសថា ទីក្រុងវ៉ាស៊ីងតោនមានបំណងទប់ស្កាត់មិនឱ្យដំឡើងកម្មវិធីនានារបស់សហរដ្ឋអាមេរិកទៅក្នុងឧបករណ៍ដែលផលិតដោយក្រុមហ៊ុនចិន ដូចជា Huawei ជាដើម។

បច្ចុប្បន្ន TikTok មានអ្នកប្រើប្រាស់ប្រមាណជា1ពាន់លាននាក់នៅទូទាំងពិភពលោក។ ក្រុមមន្ត្រីអាមេរិកាំង មួយរយៈចុងក្រោយនេះ បានសម្ដែងការព្រួយបារម្ភខ្លាំងទៅលើលទ្ធភាពដែលទីក្រុងប៉េកាំងប្រើប្រាស់ TikTok សម្រាប់គោលបំណងទុច្ចរិត។

ក៏ប៉ុន្តែ ភាគីខាង TikTok និង ByteDance ក៏បានច្រានចោលរាល់ការចោទប្រកាន់ពីសំណាក់សហរដ្ឋអាមេរិក។ អគ្គនាយករបស់ TikTok ប្រចាំអាមេរិកខាងជើង អ្នកស្រី Vanessa Pappasa កាលពីថ្ងៃទី1សីហា បានអះអាងថា ក្រុមហ៊ុននេះកំពុងប្រឹងប្រែងដើម្បីនាំមកនូវ “ផ្នែកទន់ដែលសុវត្ថិភាពបំផុត” ដល់អ្នកប្រើប្រាស់៕

ប្រភព៖ AFP

August 7, 2020

ហេតុការណ៍ផ្ទុះនៅលីបង់! អាជ្ញាធរចាប់ខ្លួនអគ្គនាយកកំពង់ផែ Berut

ក្រុមមន្ត្រីនៃប្រទេសលីបង់ចំនួន16នាក់ រួមមានអគ្គនាយកកំពង់ផែ Beirut ផងដែរ ត្រូវបានចាប់ខ្លួនដើម្បីស៊ើបអង្កេតករណីផ្ទុះដ៏រន្ធត់ដែលបានបណ្ដាលឱ្យមនុស្សយ៉ាងតិច145នាក់បានស្លាប់ និង5,000នាក់រងរបួស។

សារព័ត៌មាន Lebanon NNA កាលពីថ្ងៃទី6សីហា បានដកស្រង់សម្ដីរបស់ចៅក្រមស៊ើបសួរ Fadi Akiki ដែលតំណាងឱ្យរដ្ឋាភិបាលនៅតុលាការយោធា ឱ្យដឹងថា មកដល់ពេលនេះមានមន្ត្រីគយ និងមន្ត្រីប្រចាំកំពង់ផែជាង18នាក់ត្រូវបានសាកសួរ។ ប៉ុន្តែ ចៅក្រមរូបនេះមិនបានបង្ហើបឱ្យដឹងអំពីឈ្មោះរបស់ក្រុមមន្ត្រីទាំងនេះទេ។ លោក Fadi Akiki ថ្លែងថា “មនុស្សចំនួន16នាក់ត្រូវបានចាប់ខ្លួនដើម្បីស៊ើបអង្កេត”។

ប្រភពព័ត៌មានពីក្រសួងយុត្តិធម៌ និងទូរទស្សន៍ក្នុងស្រុកចំនួន2 បានចេញផ្សាយថា អគ្គនាយកកំពង់ផែ Beirut លោក Hassan Koraytem ក៏ស្ថិតក្នុងចំណោមមនុស្សដែលត្រូវបានចាប់ខ្លួនខាងលើនេះដែរ។ មុននោះ ធនាគារជាតិលីបង់ក៏បានបង្កកទ្រព្យសម្បត្តិរបស់មន្ត្រីចំនួន7រូប រួមមានទាំង Hassan Koraytem និងមេដឹកនាំអគ្គនាយកដ្ឋានគយរបស់លីបង់ទៀតផង។

រដ្ឋធានី Beirut នៃប្រទេសលីបង់កាលពីថ្ងៃទី4សីហា បានទទួលរងគ្រោះដ៏ធ្ងន់ធ្ងរដោយសារហេតុការណ៍ផ្ទុះឃ្លាំងផ្ទុកសមាសធាតុអាម៉ូញ៉ូមនីត្រាត2,750តោន។ ករណីផ្ទុះដែលមានកម្លាំងស្មើនឹងរំសេវ TNT ចំនួន240តោននេះ បានបំផ្លាញទីក្រុង Beirut អស់ជាងពាក់កណ្ដាល បណ្ដាលឱ្យមនុស្សយ៉ាងតិច135នាក់បានបាត់បង់ជីវិត និងជាង5,000នាក់បានរងរបួស ព្រមទាំងបង្កការខាតបង់គិតជាទឹកប្រាក់ឡើងដល់5ពាន់លានដុល្លារអាមេរិក។

រូបថតមួយដែលត្រូវបានចុះផ្សាយកាលពីថ្ងៃទី5សីហា បង្ហាញថា ឃ្លាំងលេខ12របស់កំពង់ផែ Beirut មានផ្ទុកពេញទៅដោយអាម៉ូញ៉ូមនីត្រា ដែលជាសមាសធាតុសម្រាប់យកមកធ្វើជាជី ប៉ុន្តែវាក៏អាចក្លាយជាគ្រឿងផ្ទុះបានដែរនៅពេលត្រូវបានលាយជាមួយវត្ថុធាតុដែលងាយឆេះ។ ក្នុងរូបថតនេះ គេឃើញថា សមាសធាតុទាំងនេះមិនត្រូវបានរក្សាទុកដោយសុវត្ថិភាពនោះទេ ពោលគឺត្រូវបានដាក់នៅក្នុងការ៉ុងធំៗ និងផ្ទុកគរលើគ្នា។

ផលិតផលដែលត្រូវបានគេដឹងថា ជាកម្មសិទ្ធិរបស់អ្នកជំនួញជនជាតិរុស្ស៊ីម្នាក់ឈ្មោះ Igor Grechushkin នេះ ត្រូវបានដឹកតាមកប៉ាល់ Rhosus ដែលដោតទង់ជាតិរបស់ប្រទេសម៉ុលដាវី ដោយដឹកពីប្រទេសហ្គ្រូស៊ី Gruzia (បច្ចុប្បន្នជាប្រទេសហ្សកហ្ស៊ី/Georgia) ទៅកាន់ប្រទេសម៉ូហ្សាំប៊ិក (Mozambique) ដើម្បីធ្វើជាជី ប៉ុន្តែត្រូវបានបោះបង់ចោលនៅពេលដែលកប៉ាល់បានជួបបញ្ហាម៉ាស៊ីនខណៈកំពុងចូលចតនៅឯកំពង់ផែ Beirut កាលពីខែមិថុនា2013។

ប្រាក់ចំណាយដែលបានកើតមាននៅពេលចតក្នុងកំពង់ផែ បាននាំឱ្យអ្នកជំនួញ Grechushkin ប្រកាសក្ស័យធន រួចក៏បានបោះបង់ចោលកប៉ាល់នេះ។ ក្រុមនាវិករបស់កប៉ាល់នេះ រួមមានជនជាតិអ៊ុយក្រែន8នាក់ និងរុស្ស៊ី2នាក់ ត្រូវបានបង្ខំឱ្យនៅលើកប៉ាល់ដែលមានផ្ទុកសមាសធាតុអាម៉ូញ៉ូមនីត្រាតរាប់ពាន់តោននេះ នាំឱ្យវា (កប៉ាល់) ត្រូវគេហៅថា “គ្រាប់បែកអណ្ដែត” នៅកំពង់ផែ Beirut។

អាជ្ញាធរនៃប្រទេសលីបង់ ក្រោយមកក៏បានអនុញ្ញាតឱ្យក្រុមនាវិក6នាក់ចាកចេញពីប្រទេសនេះ ចំណែកមនុស្សក្រៅពីនេះគឺត្រូវជាប់នៅលើកប៉ាល់អស់រយៈពេលជិត1ឆ្នាំ។ អាម៉ូញ៉ូមនីត្រាតទាំងនោះក៏ត្រូវបានបញ្ជូនចេញពីកប៉ាល់ Rhosus ទៅរក្សាទុកក្នុងឃ្លាំងលេខ12ក្នុងកំពង់ផែរហូតដល់ពេលវាត្រូវផ្ទុះ។

លោក Hassan Koraytem និងមេដឹកនាំនៃអគ្គនាយកដ្ឋានគយរបស់លីបង់ លោក Badri Daher ថ្លែងថា ពួកគេធ្លាប់បានផ្ញើលិខិតជាច្រើនលើកទៅកាន់ស្ថាប័នយុត្តិធម៌ដើម្បីស្នើសុំឱ្យបញ្ជូនសមាសធាតុនេះចេញពីកំពង់ផែ ក៏ប៉ុន្តែមិនទទួលបានការយល់ព្រមនោះទេ៕

អត្ថបទទាក់ទង៖
“ជនដៃដល់” ដែលបានកម្ទេចរដ្ឋធានី Beirut ឱ្យទៅជា “សមរភូមិ” ពោរពេញដោយគំនរបាក់បែក

ប្រភព៖ Reuters

August 7, 2020

(វីដេអូ) SpaceX បាញ់បង្ហោះសាកល្បងរ៉ុកកែតទៅកាន់ផ្កាយព្រះអង្គារ

ការសាកល្បងហោះហើររយៈចម្ងាយខ្លីនៃរ៉ុកកែត Starship នេះ អាចបង្កើតបានជាជំហានធំមួយសម្រាប់មនុស្សនៅក្នុងដំណើរឆ្ពោះទៅរុករកពិភពព្រះអង្គារនាពេលដ៏ខ្លីខាងមុខ។

នៅក្នុងការសាកល្បងនេះ ឧបករណ៍ហោះហើរ Starship SN5 បានហោះឡើងទៅលើក្នុងរយៈពេលត្រឹមតែ40វិនាទីប៉ុណ្ណោះ នៅឯមូលដ្ឋានរបស់ SpaceX ដែលមានទីតាំងក្នុងភូមិ Boca Chica ភាគខាងត្បូងរដ្ឋ Texas សហរដ្ឋអាមេរិក។ គំរូ Starship SN5 ធ្វើអំពីដែកថែបមិនច្រែះនេះ ត្រូវបានបាញ់បង្ហោះសាកល្បងនៅវេលាម៉ោង6និង57នាទីព្រឹក ថ្ងៃទី5សីហា (ម៉ោងនៅកម្ពុជា) ហើយបានហោះឡើងដល់កម្ពស់150ម៉ែត្រ។ ក្រោយមក វាក៏បានចុះចតទៅតាមគម្រោងដោយជោគជ័យ។

SN5 គឺជាគំរូ Starship ទីពីររបស់ក្រុមហ៊ុន SpaceX ដែលបានហោះផុតពីដី។ មុននោះ យានដែលមានរូបរាងតឿ Starhopper ក៏ធ្លាប់ត្រូវបានបាញ់បង្ហោះឡើងជាច្រើនដងកាលពីរដូវក្ដៅ2019 នៅមុនពេលផ្អាកដំណើរការ។ មុនយាន SN5 យានមួយចំនួនដែលជាកំណែសាកល្បង ត្រូវបានបំផ្លាញក្នុងពេលធ្វើការសាកល្បងសម្ពាធ និងបញ្ឆេះម៉ាស៊ីន។

Starhopper និង SN5 សុទ្ធតែបំពាក់ម៉ាស៊ីន Raptor ដែលជាម៉ាស៊ីជំនាន់ថ្មីដ៏ខ្លាំងក្លារបស់ SpaceX។ កំណែ Starship ចុងក្រោយនឹងត្រូវបានបំពាក់ម៉ាស៊ីន Raptor ចំនួន6 និងមានកម្ពស់50ម៉ែត្រ ហើយអាចដឹកមនុស្សបាន100នាក់។ យាននេះនឹងត្រូវបានបាញ់បង្ហោះចេញពីពិភពផែនដីជាមួយនឹងរ៉ុកកែត Super Heavy ដែលមានបំពាក់ម៉ាស៊ីន Raptor ចំនួន31គ្រឿង។ ឧបករណ៍ទាំង2នេះក៏សុទ្ធតែអាចប្រើប្រាស់ឡើងវិញបានដូចគ្នា។ Super Heavy នឹងចុះចតលើផែនដីវិញបន្ទាប់ពីការហោះហើរម្ដងៗ។ ចំណែកយាន Starship ក៏មានថាមពលគ្រប់គ្រាន់ដើម្បីហោះទៅដល់ឋានព្រះចន្ទ និងផ្កាយព្រះអង្គារ។

បើសិនជាដំណាក់កាលអភិវឌ្ឍ Starship និង Super Heavy ដំណើរការដោយរលូត យានទាំងនេះនឹងអនុញ្ញាតឱ្យមនុស្សកសាងមូលដ្ឋានរបស់ខ្លួននៅលើពិភពព្រះអង្គារក្នុងរយៈពេលពី50ទៅ100ឆ្នាំខាងមុខ។

ប្រភព៖ Space

August 6, 2020

ហេតុការណ៍ផ្ទុះនៅលីបង់! អ្នកជំនួញរុស្ស៊ីត្រូវគេសង្ស័យថា បានទុកចោល “គ្រាប់បែកអណ្ដែត” នៅឯកំពង់ផែ Beirut

អ្នកជំនួញជនជាតិរុស្ស៊ី ឈ្មោះ Igor Grechushkin ត្រូវបានគេជឿថា បានបោះបង់កប៉ាល់មួយគ្រឿងដែលមានផ្ទុកសមាសធាតុអាម៉ូញ៉ូមនីត្រាត (ammonium nitrate) ចំនួន2,750តោននៅឯកំពង់ផែ Beirut ប្រទេសលីបង់ ចាប់តាំងពីឆ្នាំ2013 ដែលនេះបាននាំឱ្យមានហេតុការណ៍ផ្ទុះដ៏រន្ធត់កាលពីថ្ងៃអង្គារកន្លងទៅ។

រដ្ឋធានី Beirut នៃប្រទេសលីបង់កាលពីថ្ងៃទី4សីហា បានទទួលរងគ្រោះដ៏ធ្ងន់ធ្ងរដោយសារហេតុការណ៍ផ្ទុះឃ្លាំងផ្ទុកសមាសធាតុអាម៉ូញ៉ូមនីត្រាត2,750តោន។ ករណីផ្ទុះដែលមានកម្លាំងស្មើនឹងរំសេវ TNT ចំនួន240តោននេះ បានបំផ្លាញទីក្រុង Beirut អស់ជាងពាក់កណ្ដាល បណ្ដាលឱ្យមនុស្សយ៉ាងតិច135នាក់បានបាត់បង់ជីវិត និងជាង5,000នាក់បានរងរបួស ព្រមទាំងបង្កការខាតបង់គិតជាទឹកប្រាក់ឡើងដល់5ពាន់លានដុល្លារអាមេរិក។

រូបថតមួយដែលត្រូវបានចុះផ្សាយកាលពីថ្ងៃទី5សីហា បង្ហាញថា ឃ្លាំងលេខ12របស់កំពង់ផែ Beirut មានផ្ទុកពេញទៅដោយអាម៉ូញ៉ូមនីត្រា ដែលជាសមាសធាតុសម្រាប់យកមកធ្វើជាជី ប៉ុន្តែវាក៏អាចក្លាយជាគ្រឿងផ្ទុះបានដែរនៅពេលត្រូវបានលាយជាមួយវត្ថុធាតុដែលងាយឆេះ។ ក្នុងរូបថតនេះ គេឃើញថា សមាសធាតុទាំងនេះមិនត្រូវបានរក្សាទុកដោយសុវត្ថិភាពនោះទេ ពោលគឺត្រូវបានដាក់នៅក្នុងការ៉ុងធំៗ និងផ្ទុកគរលើគ្នា។

ផលិតផលដែលត្រូវបានគេដឹងថា ជាកម្មសិទ្ធិរបស់អ្នកជំនួញជនជាតិរុស្ស៊ីម្នាក់ឈ្មោះ Igor Grechushkin នេះ ត្រូវបានដឹកតាមកប៉ាល់ Rhosus ដែលដោតទង់ជាតិរបស់ប្រទេសម៉ុលដាវី ដោយដឹកពីប្រទេសហ្គ្រូស៊ី Gruzia (បច្ចុប្បន្នជាប្រទេសហ្សកហ្ស៊ី/Georgia) ទៅកាន់ប្រទេសម៉ូហ្សាំប៊ិក (Mozambique) ដើម្បីធ្វើជាជី ប៉ុន្តែត្រូវបានបោះបង់ចោលនៅពេលដែលកប៉ាល់បានជួបបញ្ហាម៉ាស៊ីនខណៈកំពុងចូលចតនៅឯកំពង់ផែ Beirut កាលពីខែមិថុនា2013។

អ្នកជំនួញជនជាតិរុស្ស៊ី ឈ្មោះ Igor Grechushkin

ប្រាក់ចំណាយដែលបានកើតមាននៅពេលចតក្នុងកំពង់ផែ បាននាំឱ្យអ្នកជំនួញ Grechushkin ប្រកាសក្ស័យធន រួចក៏បានបោះបង់ចោលកប៉ាល់នេះ។ ក្រុមនាវិករបស់កប៉ាល់នេះ រួមមានជនជាតិអ៊ុយក្រែន8នាក់ និងរុស្ស៊ី2នាក់ ត្រូវបានបង្ខំឱ្យនៅលើកប៉ាល់ដែលមានផ្ទុកសមាសធាតុអាម៉ូញ៉ូមនីត្រាតរាប់ពាន់តោននេះ នាំឱ្យវា (កប៉ាល់) ត្រូវគេហៅថា “គ្រាប់បែកអណ្ដែត” នៅកំពង់ផែ Beirut។

អាជ្ញាធរនៃប្រទេសលីបង់ ក្រោយមកក៏បានអនុញ្ញាតឱ្យក្រុមនាវិក6នាក់ចាកចេញពីប្រទេសនេះ ចំណែកមនុស្សក្រៅពីនេះគឺត្រូវជាប់នៅលើកប៉ាល់អស់រយៈពេលជិត1ឆ្នាំ។ អាម៉ូញ៉ូមនីត្រាតទាំងនោះក៏ត្រូវបានបញ្ជូនចេញពីកប៉ាល់ Rhosus ទៅរក្សាទុកក្នុងឃ្លាំងលេខ12ក្នុងកំពង់ផែរហូតដល់ពេលវាត្រូវផ្ទុះ។

អ្នកជំនួញជនជាតិរុស្ស៊ី Grechushkin បច្ចុប្បន្នរស់នៅលើកោះ Cyprus ជាមួយនឹងភរិយា។ អ្នកជំនួញរូបនេះ រួមនឹងក្រុមគ្រួសារមិនទាន់បានបញ្ចេញយោបល់អ្វីអំពីបញ្ហានេះនៅឡើយ។

អ្នកជំនាញការ Raghida Dergham មកពីមន្ទីរ Beirut កាលពីថ្ងៃ5សីហាបានឱ្យដឹងថា “ការរក្សាទុកអាម៉ូញ៉ូមនីត្រាតនៅក្នុងកំពង់ផែស៊ីវិលគឹជាឧក្រិដ្ឋកម្មប្រឆាំងនឹងមនុស្សជាតិ ដូច្នេះត្រូវតែមានការដាក់ទោសទណ្ឌ។ ការថ្កោលទោសនឹងមិនគ្រប់គ្រាន់នោះឡើយ។ ខ្ញុំមានសុវត្ថិភាព ប៉ុន្តែមានសភាពទ្រុឌទ្រោម។ ខ្ញុំបានបាត់បង់មិត្តភក្ដិ និងផ្ទះ។ បើសិនខ្ញុំនៅក្នុងផ្ទះពេលនោះ ខ្ញុំប្រាកដជាស្លាប់”។

គណៈរដ្ឋមន្ត្រីលីបង់កាលពីម្សិលមិញបានស្នើឱ្យកងទ័ពឃុំខ្លួនក្នុងផ្ទះចំពោះមន្ត្រីទាំងអស់ដែលទទួលខុសត្រូវលើសន្តិសុខ និងការរក្សាទុកសមាសធាតុអាម៉ូញ៉ូមនីត្រាតនេះចាប់ពីឆ្នាំ2014។ Hassan Koraytem ដែលជាអគ្គនាយករបស់កំពង់ផែ Beirut បានឱ្យដឹងថា សមាសធាតុទាំងនេះត្រូវបាននាំមករក្សាទុកក្នុងឃ្លាំងតាមការសម្រេចរបស់តុលាការ។

លោក Hassan Koraytem និងមេដឹកនាំនៃអគ្គនាយកដ្ឋានគយរបស់លីបង់ លោក Badri Daher ថ្លែងថា ពួកគេធ្លាប់បានផ្ញើលិខិតជាច្រើនលើកទៅកាន់ស្ថាប័នយុត្តិធម៌ដើម្បីស្នើសុំឱ្យបញ្ជូនសមាសធាតុនេះចេញពីកំពង់ផែ ក៏ប៉ុន្តែមិនទទួលបានការយល់ព្រមនោះទេ៕

ប្រភព៖ Daily Mail

August 6, 2020

ទិដ្ឋភាពពិភពលោកដែលត្រូវបានCOVID-19 គ្រប់គ្រងក្នុងរយៈពេលពីបីទៅបួនឆ្នាំទៅមុខ

ប្រជាជននឹងតម្រូវឱ្យមានកាតលឿងមួយនៅពេលពួកគេបង្ហាញខ្លួននៅក្នុងអាកាសយានដ្ឋានដើម្បីបញ្ជាក់ថាមិនមានផ្ទុកវីរុស ខណៈដែលសាលារៀន ភោជនីយដ្ឋាន ពហុកីឡដ្ឋានក៏នឹងត្រូវមានមជ្ឈមណ្ឌលត្រួតពិនិត្យរហ័សសម្រាប់ស្វែងរកCOVID-19ផងដែរ។

ក្នុងរយៈពេលពីបីទៅបួនឆ្នាំខាងមុខ ពិភពលោកនឹងបន្តប្រយុទ្ធប្រឆាំងនឹងCOVID-19 នៅពេលដែលចំណុចក្ដៅរបស់វីរុសនេះបន្តលោតឆ្លងពីប្រទេសមួយទៅកាន់ប្រទេសមួយ ហើយឥទ្ធិពលរបស់វីរុសនេះក៏នឹងអូសបន្លាយរាប់ទសវត្សរ៍។ នេះបើតាមការព្យាកររបស់បណ្ឌិត Larry Brilliant អ្នកឯកទេសផ្នែករោគឆ្លងមួយរូបនៅ California សហរដ្ឋអាមេរិក និងជាប្រធានក្រុមប្រឹក្សានៃអង្គការ Ending Pandemics។ លោកធ្លាប់ជាសមាជិករបស់អង្គការសុខភាពពិភពលោក (WHO) ក្នុងទសវត្សរ៍ឆ្នាំ1970 ដែលធ្លាប់បានចូលរួមក្នុងបេសកកម្មប្រយុទ្ធប្រឆាំងនឹងជំងឺអុតធំ (smallpox) ដែលបង្កឡើងដោយវីរុស Variola major និង Variola minor។

ក៏ប៉ុន្តែ ស្ថានភាព “មិនអាក្រក់ខ្លាំងណាស់ណានោះទេ”។ ក្រុមហ៊ុនឱសថរាប់សិបនៅលើពិភពលោកនឹងផលិតវ៉ាក់សាំងជាច្រើនប្រភេទ ព្រមទាំងអាចរកឃើញវិធីព្យាបាលប្រកបដោយប្រសិទ្ធភាព រួមមានទាំងការព្យាបាលជាមួយនឹងអង្គបដិបក្ខក្នុងប្លាស្មាឈាមជាដើម ដែលអាចជួយឱ្យអ្នកជំងឺជាសះស្បើយបានឆាប់រហ័សជាងបច្ចុប្បន្ន។

លោក Brilliant ថ្លែងថា “យើងនឹងនៅតែស្ថិតក្នុងសមរភូមិប្រយុទ្ធប្រឆាំងទល់នឹងCOVID19 ក្នុងរយៈពេលប្រហែលជាបួនឆ្នាំទៀត ប៉ុន្តែមិនដូចបច្ចុប្បន្នឡើយ”។ លោកបន្តថា “សង្គ្រាមនោះនឹងដូចទៅនឹងកម្មវិធីបោសសម្អាតជំងឺអុតធំ ឬជំងឺគ្រុនស្វិតដៃជើង។ វាដូចទៅនឹងជំងឺគ្រុនលឿង (Yellow fever) ដែលប្រទេសខ្លះមាន ហើយប្រទេសខ្លះទៀតមិនមាន”។

ឧបសគ្គនៅចំពោះមុខ បើតាមលោក Brilliant នោះគឺការជួបជុំក្នុងពិធីផ្សេងៗ សិស្សត្រូវចូលរៀន ការឆ្លងរាលដាលនៃវីរុសបង្កជំងឺគ្រុនផ្ដាសាយ រួមនឹងការពលរដ្ឋនាំគ្នាទៅបោះឆ្នោតជាដើម។ល។

សាលារៀនគឺជាកន្លែងដែលងាយនឹងឆ្លងវីរុស ដោយសារសិស្សមួយចំនួនធំត្រូវធ្វើដំណើរតាមរថយន្តក្រុង និងតែងតែជួបជុំគ្នានៅក្នុងបន្ទប់រៀន បរិវេណសាលា និងក្នុងពិធីផ្សេងៗទៀត។ ទាំងនេះសុទ្ធតែជាកត្ដាដែលនាំឱ្យវីរុសឆ្លងរាលដាលលឿន។ ហាងកាហ្វេ បន្ទប់ហាត់ប្រាណ បន្ទប់ផ្លាស់សម្លៀកបំពាក់ សាលមហោស្រប និងអាងហែលទឹកក៏ជាឧបសគ្គចំពោះបេសកកម្មគ្រប់គ្រងCOVID-19ផងដែរ។

បន្ទាប់ពីបានឆ្លងវីរុសពីសាលារៀន សិស្សនឹងនាំវីរុសនេះមកចម្លងឱ្យមនុស្សនៅឯផ្ទះ។ ស្ថានភាពនេះនឹងធ្វើឱ្យCOVID-19 រីកចម្រើនបានយ៉ាងលឿន និងបង្កផលប៉ះពាល់ដល់តំបន់មួយចំនួនដែលមុននេះមិនធ្លាប់មានវីរុស។

លោក Brilliant ថ្លែងថា “យើងកំពុងតែស្ថិតក្នុងផ្លូវដ៏វែងឆ្ងាយ និងមានឧបសគ្គច្រើន”។

បណ្ឌិតរូបនេះបន្តថា វីរុសនេះនឹងបន្តឆ្លងរាលដាលរហូតដល់វាត្រូវបានទប់ស្កាត់ដោយវ៉ាក់សាំង ឬថ្នាំ។ លទ្ធផលនៃការសិក្សាស្រាវជ្រាវមួយដែលត្រូវបានចុះផ្សាយនៅលើទស្សនាវដ្ដី JAMA Internal Medicine បានឱ្យដឹងថា តួលេខនៃការឆ្លងជាក់ស្ដែងគឺច្រើនជាងតួលេខដែលត្រូវបានប្រកាសជាផ្លូវការរហូតដល់6ទៅ24ដងឯណោះ៕

ប្រភព៖ USA Today

August 6, 2020

(វីដេអូ) ចិនសាងសង់ផ្លូវក្រោមដីឆ្លងកាត់សមុទ្រ ល្បឿន350គម/ម៉ោង

ក្រុមវិស្វករចិនកំពុងតែ “ដុតដៃដុតជើង” សាងសង់ផ្លូវដែកក្រោមសមុទ្រដែលមានប្រវែង9,781ម៉ែត្រនៅក្នុងឈូងសមុទ្រ Shantou ក្នុងខេត្ត Guangdong។

ប្រទេសចិនបានចាប់ផ្ដើមសាងសង់ផ្លូវដែកក្រោមដីឆ្លងកាត់សមុទ្រដែលមានផ្លូវដែកចំនួន2ទន្ទឹមគ្នាដំបូងគេបង្អស់ក្នុងពិភពលោក។

ផ្លូវដែកក្រោមដីឆ្លងកាត់សមុទ្រនេះនឹងអនុញ្ញាតឱ្យរថភ្លើងធ្វើដំណើរក្នុងល្បឿនឡើងដល់350គម/ម៉ោង។ ផ្លូវរូងក្រោមដីដែលមានប្រវែង9,781គមនេះ នឹងឆ្លងកាត់កន្លែងដែលមានគ្រោះរញ្ជូយដីចំនួន17 នៃតំបន់ដែលធ្លាប់មានគ្រោះរញ្ជួយដីកម្លាំង8រិចទ័រ។ ក្នុងចំណោមនោះ មាន8កន្លែងគឺជាទីតាំងដ៏សកម្មនៃគ្រោះរញ្ជូយដី។

ផ្លូវរូងក្រោមដីខាងលើនេះ ស្ថិតក្នុងគម្រោងផ្លូវដែកប្រវែង163គម ដែលត្រូវបានបណ្ដាក់ទុនចំនួន3.7ពាន់លានដុល្លារអាមេរិក។

ប្រភព៖ CGTN

August 6, 2020

រដ្ឋធានីរបស់លីបង់ប្រែរូបរាងក្រោយករណីផ្ទុះដ៏សាហាវដែលបានសម្លាប់មនុស្ស135នាក់

រូបភាពដែលបានថតដោយផ្កាយរណបនៅមុននិងក្រោយហេតុការណ៍ផ្ទុះដ៏គួរឱ្យតក់ស្លុតនៅ Beirut បង្ហាញថា រដ្ឋធានីរបស់លីបង់នេះ ត្រូវបានបំផ្លិចបំផ្លាញយ៉ាងធ្ងន់ធ្ងរ និងបានសម្លាប់មនុស្សយ៉ាងហោច135នាក់ និងរាប់ពាន់នាន់ផ្សេងទៀតរងរបួស។

កាលពីល្ងាចថ្ងៃទី4សីហា ការផ្ទុះដ៏រន្ធត់ចំនួន2ករណីបានកើតឡើងនៅក្នុងកំពង់ផែមួយនៅរដ្ឋធានី Beirut នៃប្រទេសលីបង់ បង្កើតបានជាសោកនាដកម្មយ៉ាងធ្ងន់ធ្ងរ បណ្ដាលឱ្យជីវិតមនុស្ស135នាក់ត្រូវបាត់បង់ និងជាង5,000នាក់ត្រូវរងរបួស ខណៈដែលផ្ទះសម្បែងស្ទើររាប់មិនអស់រងការខូចខាត។

ការខាតបង់ដែលកើតឡើងដោយសារហេតុការណ៍ផ្ទុះនេះ ត្រូវបានគេវាយតម្លៃថា មានទំហំជាទឹកប្រាក់ឡើងដល់ប្រមាណពី3-5ពាន់លានដុល្លារអាមេរិក។ បច្ចុប្បន្ន លីបង់កំពុងតែញាប់ដៃញាប់ជើងក្នុងការស្វែងរក និងជួយសង្គ្រោះជនរងគ្រោះដែលកំពុងជាប់នៅក្រោមគំនរបាក់បែក។ តួលេខនៃករណីស្លាប់ត្រូវបានគេព្យាករថានឹងកើនឡើងជាបន្តបន្ទាប់ទៀតនាពេលខាងមុខ។

បច្ចុប្បន្ន មូលហេតុដែលបង្កឱ្យមានសោកនាដកម្មនេះ ត្រូវបានគេជឿថា ដោយសារសមាសធាតុអាម៉ូញ៉ូមនីត្រាត (ammonium nitrate) ដែលគេរក្សាទុកនៅក្នុងឃ្លាំងមួយនៅក្នុងកំពង់ផែតាំងតែពីឆ្នាំ2014។ ក្រុមមន្ត្រីរបស់ប្រទេសលីបង់បានឱ្យដឹងថា ស្ទង់ដានៃការគ្រប់គ្រងសមាសធាតុខាងលើនេះគឺមិនអាចទទួលយកបាន ហើយថានឹងដាក់ទោសចំពោះអ្នកទទួលខុសត្រូវទៅតាមច្បាប់។

អភិបាលក្រុង Beirut លោក Marwan Abboud កាលពីថ្ងៃទី5សីហាបានឱ្យដឹងថា ទ្រព្យសម្បត្តិប្រមាណជាពាក់កណ្ដាលនៃទីក្រុងត្រូវបានបំផ្លាញ ហើយមនុស្សរាប់សែននាក់នឹងមិនអាចត្រឡប់មកផ្ទះវិញបានក្នុងរយៈពេលយ៉ាងហោចពី2-3ខែទៅមុខ។

មន្ទីរពេទ្យចំនួន4របស់ទីក្រុង Beirut ត្រូវបានបំផ្លាញទាំងស្រុងដោយហេតុការណ៍ផ្ទុះកាលពីថ្ងៃទី4សីហា បណ្ដាលឱ្យវិបត្តិសុខភាពនៅលីបង់កាន់តែដុនដាបថែមមួយកម្រិតទៀតពីលើ COVID-19។ មន្ទីរពេទ្យជាច្រើនកំពុងមានការព្រួយបារម្ភថា ពួកគេនឹងមិនអាចទប់ទល់បានជាមួយនឹងរលកនៃអ្នកជំងឺដែលនឹងចូលមករកសេវាព្យាបាលនៅពេលនេះ។

ប្រភព៖ Reuters, AFP, Dailymail

August 6, 2020

ទំហំរង្វង់នៃការបំផ្លាញនៅក្នុងហេតុការណ៍ផ្ទុះដ៏សាហាវនៅលីបង់

បន្ទាប់ពីបានផ្ទុះភ្លាម រលកសម្ពាធខ្យល់កន្ត្រាក់ក៏បានបង្ហាញខ្លួនក្រោយពីភ្លើងបានបាញ់ឡើងទៅលើអាកាស ពេលនោះចំហាយទឹកនៅក្នុងបរិយាកាសក៏បានប្រមូលផ្ដុំដោយសារតែសម្ពាធបានប្ដូរផ្លាស់ភ្លាមៗ ហើយបង្កើតបានជាដុំពពកពណ៌សដ៏ធំគ្របដណ្ដប់កន្លែងកើតហេតុ ដែលមើលទៅហាក់ជាទិដ្ឋភាពដ៏ស្រស់ស្អាត ក៏ប៉ុន្តែតាមពិត ការផ្ទុះនេះមានទំហំធំខ្លាំងណាស់។

នាយករដ្ឋមន្ត្រីប្រទេសលីបង់ លោក Hassan Diab បានឱ្យដឹងថា ហេតុការណ៍ផ្ទុះនេះមានប្រភពចេញពីសមាសធាតុ ammonium nitrate ដែលត្រូវបានរក្សាទុកអស់រយៈពេលជិត6ឆ្នាំនៅក្នុងឃ្លាំងមួយស្ថិតនៅក្បែរកំពង់ផែរបស់ទីក្រុងBeirut។ ករណីផ្ទុះដ៏សាហាវនេះ បានជះរលកសម្ពាធខ្យល់កន្ត្រាក់យ៉ាងខ្លាំងក្លា បណ្ដាលឱ្យហេដ្ឋារចនាសម្ព័ន្ធជាច្រើនដែលស្ថិតក្នុងរង្វង់ជិត5គីឡូម៉ែត្រត្រូវខូចខាតខ្ទេចខ្ទីស្ទើរទាំងស្រុង។

ប្រភព៖ AFP, NY Times

August 5, 2020

“ជនដៃដល់” ដែលបានកម្ទេចរដ្ឋធានី Beirut ឱ្យទៅជា “សមរភូមិ” ពោរពេញដោយគំនរបាក់បែក

មូលហេតុដែលនាំឱ្យមានហេតុការណ៍ផ្ទុះដ៏មហិមានៅក្នុងរដ្ឋធានី Beirut របស់ប្រទេសលីបង់ដែលបានសម្លាប់មនុស្សរាប់សិបនាក់ នោះគឺ ammonium nitrate ដែលជាសមាសធាតុមួយតែងត្រូវបានយកមកធ្វើជាជីសម្រាប់ដំណាំកសិកម្ម ប៉ុន្តែ វាក៏អាចក្លាយជាគ្រឿងផ្ទុះដ៏សាហាវផងដែរ។

រដ្ឋធានី Beirut របស់ប្រទេសលីបង់ កាលពីល្ងាចថ្ងៃទី4សីហាបានជួបគ្រោះថ្នាក់ធ្ងន់ធ្ងរដោយសារហេតុការណ៍ផ្ទុះដ៏ធំមួយ បណ្ដាលឱ្យមនុស្សយ៉ាងតិច78នាក់បានស្លាប់ និងជិត4,000នាក់ផ្សេងទៀតរងរបួស ខណៈដែលផ្ទះសម្បែងជាច្រើនខ្នងនៅក្នុងទីក្រុងនេះក៏ត្រូវបានបំផ្លាញ ឬខូចខាតធ្ងន់ធ្ងរ។ អ្នកជំនាញមួយចំនួនបានសន្និដ្ឋាននេះ ហេតុការណ៍ផ្ទុះនេះមានកម្លាំងប្រហាក់ប្រហែលនឹងរំសេវ TNT ដល់ទៅ240តោន។

នាយករដ្ឋមន្ត្រីប្រទេសលីបង់ លោក Hassan Diab បានឱ្យដឹងថា ហេតុការណ៍ផ្ទុះនេះមានប្រភពចេញពីសមាសធាតុammonium nitrate ដែលត្រូវបានរក្សាទុកអស់រយៈពេលជិត6ឆ្នាំនៅក្នុងឃ្លាំងមួយស្ថិតនៅក្បែរកំពង់ផែរបស់ទីក្រុង។ សមាសធាតុគីមីនេះ ត្រូវបានកប៉ាល់ Rhosus ដែលដោតទង់របស់ Moldova ដឹកពីប្រទេស Gruzia (Georgia/ហ្សកហ្ស៊ី) មកកាន់ ម៉ូហ្សាំប៊ិក (Mozambique) កាលពីឆ្នាំ2014 ប៉ុន្តែត្រូវបានទុកចោលដោយសារជួបបញ្ហាម៉ាស៊ីននៅពេលកំពុងចូលចតនៅឯកំពង់ផែ Beirut។

សមាសធាតុ ammonium nitrate នៅលើកប៉ាល់នេះ ក្រោយមកក៏ត្រូវបានបញ្ជូនទៅរក្សាទុកក្នុងឃ្លាំងមួយនៅកំពង់ផែ Beirut អស់រយៈពេលជិត6ឆ្នាំដោយមិនបានគ្រប់គ្រងត្រឹមត្រូវតាមស្ដង់ដាសុវត្ថិភាព។

សមាសធាតុ ammonium nitrate តែងត្រូវបានយកមកធ្វើជាជីសម្រាប់ដាក់ដំណាំ ប៉ុន្តែវាក៏អាចក្លាយជាគ្រឿងផ្ទុះដ៏ខ្លាំងក្លា បើសិនលាយជាមួយរបស់ដែលងាយឆេះ។ សមាសធាតុ ammonium nitrate ធ្លាប់ត្រូវបានគេប្រើប្រាស់នៅក្នុងអំពើភេរវកម្មជាច្រើនក្នុងពិភពលោក ក្នុងនោះមានករណីបំផ្ទុះគ្រាប់បែកមួយដែលបានសម្លាប់មនុស្ស168នាក់នៅក្នុងទីក្រុង Oklahoma សហរដ្ឋអាមេរិក។

ហេតុការណ៍ផ្ទុះនៅក្នុងរដ្ឋធានី Beirut នៃប្រទេសលីបង់នេះ ត្រូវបានក្រុមមន្ត្រីសហរដ្ឋអាមេរិក និងលីបង់សន្និដ្ឋានថា មិនមែនជាអំពើភេរវកម្មទេ។

ប្រភពព័ត៌មានពីក្រុមរក្សាសន្តិសុខបានប្រាប់ Reuters ថា ហេតុការណ៍ផ្ទុះនេះ កើតឡើងនៅពេលដែលកម្មករផ្សារភ្ជាប់រន្ធមួយនៅក្នុងឃ្លាំងផ្ទុកសមាសធាតុ ammonium nitrate ដែលនេះអាចធ្វើឱ្យមានការឆាបឆេះ រួចក៏បង្កឱ្យផ្ទុះតែម្ដង៕

ប្រភព៖ Cnet

August 5, 2020

Author: សឿន សំណាង