សឿន សំណាង - La Reine Media

មហាសេដ្ឋីឥណ្ឌា ក្លាយជាអ្នកមានជាងគេលំដាប់ទី4ក្នុងពិភពលោក

អ្នកមានជាងគេបង្អស់នៅទ្វីបអាស៊ី លោក Mukesh Ambani បានយកឈ្នះលើម្ចាស់ក្រុមហ៊ុន LVMH នៅក្នុងបញ្ជីចំណាត់ថ្នាក់មហាសេដ្ឋីពិភពលោករបស់ Bloomberg ដោយមានទ្រព្យសរុបឡើងដល់80.6ពាន់លានដុល្លារអាមេរិក។

Bloomberg Billionaires Index ដែលជាផ្នែកមួយនៃសារព័ត៌មាន Bloomberg បានចេញផ្សាយថា ប្រធានក្រុមហ៊ុនឥណ្ឌា Reliance Industries លោក Mukesh Ambani រកបានទ្រព្យ22ពាន់លានដុល្លារបន្ថែមទៀតនៅក្នុងឆ្នាំ2020 ដែលនេះបានជួយឱ្យទ្រព្យសម្បត្តិសរុបរបស់លោកកើនឡើងដល់80.6ពាន់លានដុល្លារ។ បច្ចុប្បន្ន លោក Mukesh Ambani មានទ្រព្យច្រើនជាងមហាសេដ្ឋី Bernard Arnault ដែលជាម្ចាស់នៃក្រុមហ៊ុន LVMH ទៅទៀត។ លោក Arnault មានទ្រព្យចំនួន80.2ពាន់លានដុល្លារអាមេរិក។

ក្រោយពីបានបញ្ចប់ការជួញដូរកាលពីចុងសប្ដាហ៍ ទ្រព្យរបស់លោក Mukesh Ambani បានកើនថែម300លានដុល្លារ ខណៈដែលលោក Arnault បានបាត់បង់ជាង1.2ពាន់លានដុល្លារ។ មូលបត្រនៃក្រុមហ៊ុន LVMH របស់លោក Arnault នៅក្នុងមួយរយៈពេលចុងក្រោយនេះបានធ្លាក់ចុះច្រើន ដោយសារអតិថិជនរបស់ក្រុមហ៊ុននេះកាត់បន្ថយការទិញដូរផលិតផលដែលមានតម្លៃថ្លៃនៅក្នុងរដូវCOVID-19។

តំណែងអ្នកមានជាងគេបង្អស់ក្នុងពិភពលោកនាបច្ចុប្បន្ន នៅតែត្រូវបានកាន់កាប់ដោយម្ចាស់ក្រុមហ៊ុន Amazon គឺលោក Jeff Bezos ដោយមានទ្រព្យសរុប187ពាន់លានដុល្លារអាមេរិក។ ឈរលំដាប់ទី2 គឺលោក Bill Gates (121ពាន់លានដុល្លារ និងទី3គឺលោក Mark Zuckerberg (102ពាន់លានដុល្លារ)។

លោក Arnault មានទ្រព្យចំនួន80.2ពាន់លានដុល្លារអាមេរិក

នៅប៉ុន្មានសប្ដាហ៍កន្លងទៅថ្មីៗនេះ ទ្រព្យសម្បត្តិរបស់លោក Mukesh Ambani បានលោតរំលងមហាសេដ្ឋីកំពូលៗជាច្រើនរូបនៅទូទាំងពិភពលោក តាំងពីលោក Elon Musk ដែលជា CEO របស់ Tesla និងសហស្ថាបនិក2រូបរបស់ Google គឺលោក Larry Page និងលោក Sergey Brin រហូតដល់មហាសេដ្ឋី Warren Buffett។

បើទោះជាត្រូវទទួលរងឥទ្ធិពលយ៉ាងធ្ងន់ធ្ងរពីការធ្លាក់ចុះនៃតម្រូវការប្រេងកាត់នៅក្នុងរដូវCOVID-19នេះក្ដី ប៉ុន្តែមូលបត្រនៃក្រុមហ៊ុនរបស់លោក Mukesh Ambani នៅតែកើនឡើងខ្ពស់ជាងមុនទ្វេដងរាប់ចាប់ពីខែមីនា។ មូលហេតុគឺដោយសារផ្នែកសេវាកម្មឌីជីថលរបស់ក្រុមហ៊ុននេះ ទទួលបានខ្ទង់វិនិយោគធំៗជាបន្តបន្ទាប់ពីក្រុមហ៊ុនវិនិយោគផ្សេងៗ ក្នុងនោះមាន Facebook និង Google ផងដែរ៕

ប្រភព៖ Bloomberg

August 10, 2020

ចិនទាមទារឱ្យសហរដ្ឋអាមេរិក បញ្ជាក់ពីករណីមន្ទីរពិសោធន៍យោធា ដែលកំពុងដំណើរការយ៉ាងសម្ងាត់នៅបរទេស

ទីភ្នាក់ងារព័ត៌មានស៊ីនហួ បានរាយការណ៍កាលពីថ្ងៃអង្គារ ដើមសប្ដាហ៍កន្លងទៅថា ចិនបានជំរុញឱ្យសហរដ្ឋអាមេរិក ឆ្លើយតបនឹងក្ដីកង្វល់របស់សហគមន៍អន្តរជាតិឱ្យបានច្បាស់លាស់ និងបញ្ជាក់ពីករណីដែលសហរដ្ឋអាមេរិក បានរៀបចំកិច្ចការងារបែបជីវសាស្ត្រខាងយោធានៅឯបរទេស។

លោក វ៉ាង វឹនពីន អ្នកនាំពាក្យនៃក្រសួងការបរទេសចិន បានចេញសេចក្ដីថ្លែងការណ៍មួយ ស្ដីអំពីកិច្ចការងារខាងយោធារបស់សហរដ្ឋអាមេរិក ដែលបង្កឱ្យកើតមានក្ដីកង្វល់យ៉ាងខ្លាំង និងនាំមកនូវសំណួរ និងសំឡេងជំទាស់ដ៏ច្រើន។

កាលពីពេលថ្មីៗនេះ សារព័ត៌មាននៅក្នុងសាធារណរដ្ឋកូរ៉េ (ROK) បានរាយការណ៍ជាច្រើនលើកថា ទាហានសហរដ្ឋអាមេរិកដែលប្រចាំការនៅក្នុងប្រទេសកូរ៉េខាងត្បូង បានរៀបចំធ្វើកិច្ចការងារមួយ ដែលល្មើសនឹងអនុសញ្ញាហាមឃាត់អាវុធជីវសាស្ត្រ (BWC) រហូតធ្វើឱ្យមនុស្សនៅក្នុងសង្គមជាច្រើនក្រុម បានចេញមកទាមទារឱ្យបិទបន្ទប់ប្រតិបត្តិការរបស់កងទ័ពសហរដ្ឋអាមេរិកនោះ និងបណ្ដេញកងយោធាសហរដ្ឋអាមេរិកនៅក្នុងប្រទេសកូរ៉េខាងត្បូង ដែលមានចំណែកពាក់ព័ន្ធនឹងការល្មើសនេះ ចេញពីប្រទេស។

លោក វ៉ាង បានបញ្ជាក់ថា សហរដ្ឋអាមេរិក បានរៀបចំធ្វើកិច្ចការងារបែបជីវសាស្ត្រខាងយោធានៅក្នុងប្រទេសជាច្រើន ដែលបង្កឱ្យកើតមានក្ដីសង្ស័យ និងការតតាំងយ៉ាងទូលំទូលាយ។ ដោយសារតែកិច្ចការងារទាំងនោះមិនបានបញ្ជាក់ច្បាស់ ទើបមានប្រទេសដែលពាក់ព័ន្ធជាច្រើន មិនដឹងថា តើបន្ទប់ប្រតិបត្តិការខាងយោធារបស់សហរដ្ឋអាមេរិកនោះ កំពុងធ្វើអ្វី? ទាំងដែលសហរដ្ឋអាមេរិកជាប្រទេសដែលដំណើរការខាងកិច្ចការងារយោធានៅក្នុងប្រទេសផ្សេងៗច្រើនជាងគេបំផុត តែបែរជាគ្មានការបញ្ជាក់ឱ្យបានច្បាស់លាស់អំពីរឿងនេះនៅក្នុងឯកសារវិធានការសាងភាពជឿជាក់ (CBM) ដែលសហរដ្ឋអាមេរិកបានផ្ញើទៅឱ្យអង្គការអនុសញ្ញាហាមឃាត់អាវុធជីវសាស្ត្រ។

លោក វ៉ាង បានថ្លែងថា ការដំណើរការទាំងអស់នោះ មិនមានសុវត្ថិភាព កិច្ចការងារជាច្រើនយ៉ាងរបស់ពួកគេ មានចំណែកពាក់ព័ន្ធនឹងមេរោគ ដែលមានភាពប្រថុយប្រថានខ្ពស់យ៉ាងជិតដិត ដែលបើសិនជាមានឧប្បត្តិហេតុណាមួយកើតឡើង នឹងកើតមានផលប៉ះពាល់ដ៏អាក្រក់ទៅដល់ប្រទេសដែលពាក់ព័ន្ធ ប្រទេសជិតខាង និងទូទាំងពិភពលោក។

ក្រៅពីនេះ សហរដ្ឋអាមេរិក នៅខ្វះភាពយុត្តិធម៌ ដែលយើងអាចមើលឃើញបានថា មានតែសហរដ្ឋអាមេរិកប៉ុណ្ណោះ ដែលជាអ្នកនាំមុខគេ ក្នុងការបង្កើតបន្ទប់ប្រតិបត្តិការខាងជីវសាស្ត្រទូទាំងពិភពលោក និងប្រមែប្រមូលធនធានខាងជីវសាស្ត្រនៅក្នុងប្រទេសផ្សេងៗយ៉ាងគ្មានដែនកំណត់ និងមានតែសហរដ្ឋអាមេរិកប៉ុណ្ណោះ ដែលប្រឆាំងនឹងការចរចារឿងរបៀបការត្រួតពិនិត្យសមាជិកអនុសញ្ញាហាមឃាត់អាវុធជីវសាស្ត្រ “ដែលទោះជាសហរដ្ឋអាមេរិក ចង់អធិប្បាយប៉ុនណា ក៏មិនអាចពិសោធភាពបរិសុទ្ធរបស់ខ្លួនឯងក្នុងរឿងនេះបានដែរ”។

លោក វ៉ាង បានថ្លែងទៀតថា “យើងទាមទារឱ្យសហរដ្ឋអាមេរិក ទទួលខុសត្រូវក្នុងរឿងនេះ ចាត់ការរឿងក្ដីកង្វល់របស់សហគមន៍អន្តរជាតិយ៉ាងពិតប្រាកដ បញ្ជាក់ពីកិច្ចការងារបែបជីវសាស្ត្រខាងយោធានៅក្នុងប្រទេសផ្សេងៗទាំងនោះឱ្យបានច្បាស់លាស់ ប្រតិបត្តិតាមកាតព្វកិច្ចរបស់អនុសញ្ញាខាងលើយ៉ាងពិតប្រាកដ និងបញ្ឈប់ការធ្វើខ្លួនជាអ្នកប្រឆាំង រារាំងការចរចាស្ដីពីការត្រួតពិនិត្យរបស់អនុសញ្ញានោះ”៕
ប្រភព៖ សាព័ត៌មានបរទេស

August 10, 2020

តួលេខអ្នកជំងឺ និងអ្នកស្លាប់ដោយសារCOVID-19នៅក្នុងតំបន់អាស៊ីអាគ្នេយ៍

នៅតំបន់អាស៊ីអាគ្នេយ៍ ប្រទេសហ្វីលីពីន ឥណ្ឌូនេស៊ី និងសិង្ហបុរី គឺជាចំណុចក្ដៅនៃការរាតត្បាតរបស់វីរុសបង្កជំងឺរលាកសួតប្រភេទថ្មី COVID-19 ខណៈដែលតួលេខសរុបនៃអ្នកជំងឺដែលត្រូវបានរកឃើញក្នុងតំបន់នេះ បានកើនដល់ជាង324,400នាក់។

ខាងក្រោមនេះគឺជាចំណាត់ថ្នាក់ ក៏ដូចជាតួលេខនៃអ្នកជំងឺ និងអ្នកស្លាប់ដោយសារCOVID-19 នៅអាស៊ីអាគ្នេយ៍៖

1.ហ្វីលីពីនបច្ចុប្បន្នជាសម្បុកវីរុសធំជាងគេបង្អស់នៅអាស៊ីអាគ្នេយ៍ ដោយមានអ្នកជំងឺសរុប129,913នាក់ និងអ្នកស្លាប់ដោយសារឆ្លងវីរុសCOVID-19នេះ ឡើងដល់2,270នាក់។

2.ឥណ្ឌូនេស៊ីបានធ្លាក់មកនៅលំដាប់ទី2 ជាមួយនឹងអ្នកជំងឺសរុប125,396នាក់ និងអ្នកស្លាប់សរុប5,723នាក់។

3.សិង្ហបុរីវិញ រកឃើញអ្នកផ្ទុកវីរុសសរុប55,104នាក់ និងអ្នកស្លាប់27នាក់។

4.ម៉ាឡេស៊ី រកឃើញអ្នកជំងឺ9,083នាក់ និងស្លាប់125នាក់។

5.ប្រទេសថៃ រកឃើញអ្នកជំងឺ3,351នាក់ និងស្លាប់58នាក់។

6.វៀតណាមរកឃើញអ្នកជំងឺ841នាក់ និងស្លាប់11នាក់។

7.មីយ៉ានម៉ារកឃើញអ្នកជំងឺ360នាក់ និងស្លាប់6នាក់។

8.កម្ពុជាឈរលំដាប់ទី8 ដោយបានរកឃើញអ្នកជំងឺCOVID-19 សរុបចំនួន251នាក់។

9.ប៊្រុយណេមានអ្នកជំងឺ142នាក់ និងស្លាប់3នាក់។

10.ទីម័រខាងកើតមានអ្នកជំងឺ25នាក់។

11.ប្រទេសឡាវមានអ្នកជំងឺ20នាក់។

ដូច្នេះ យោងតាមតួលេខខាងលើនេះ គេឃើញថា នៅទូទាំងតំបន់អាស៊ីអាគ្នេយ៍ មានអ្នកជំងឺCOVID-19 សរុបឡើងដល់324,486នាក់ និងអ្នកស្លាប់សរុបឡើងដល់8,474នាក់៕

ប្រភព៖ Worldometers

August 10, 2020

កម្ពុជារកឃើញករណីវិជ្ជមានជាមួយCOVID-19 ថ្មី ចំនួន3ករណីទៀត ខណៈពិភពលោករកឃើញ6,975នាក់ ក្នុងរយៈពេល24ម៉ោងចុងក្រោយនេះ

ក្រសួងសុខាភិបាលកម្ពុជា បានប្រកាសនាព្រឹកថ្ងៃទី10សីហានេះថា បានរកឃើញអ្នកផ្ទុកវីរុសCOVID-19 ចំនួន3នាក់បន្ថែមទៀត ដែលអ្នកជំងឺទាំងនេះគឺជាជនជាតិខ្មែរ។

យោងតាមគេហទំព័ររបស់ក្រសួងសុខាភិបាលកម្ពុជា អ្នកមានផ្ទុកវីរុសCOVID-19 ខាងលើនេះសុទ្ធតែជាបុរស និងជាពលរដ្ឋនៅក្នុងខេត្តត្បូងឃ្មុំ។

ដូច្នេះ គិតមកដល់ពេលនេះ កម្ពុជាបានរកឃើញអ្នកជំងឺCOVID-19 សរុបឡើងដល់251នាក់។ ក្នុងនោះមាន32នាក់កំពុងទទួលការព្យាបាលនៅមន្ទីរពេទ្យ និង219នាក់បានជាសះស្បើយ។

នៅទូទាំងពិភពលោក បច្ចុប្បន្នបានរកឃើញអ្នកឆ្លងវីរុសCOVID-19 សរុប20,022,265នាក់ ខណៈតួលេខនៃអ្នកបានស្លាប់ដោយសារវីរុសនេះបានឡើងដល់733,971នាក់ ចំណែកអ្នកជំងឺបានជាសះស្បើយមានចំនួន12,897,799នាក់៕

August 10, 2020

SpaceX បាញ់បង្ហោះផ្កាយរណបចំនួន59គ្រឿងក្នុងពេលតែមួយ ក្នុងបំណងរកចំណូល30ពាន់លានដុល្លារក្នុង1ឆ្នាំៗ

ក្រោយការពន្យារពេលជាច្រើនលើក កាលពីម្សិលមិញ ក្រុមហ៊ុន SpaceX បានបាញ់បង្ហោះផ្កាយរណបអ៊ីនធឺណិត Starlink ចំនួន57គ្រឿង និងផ្កាយរណបសង្កេតផែនដី Global ចំនួន2គ្រឿងទៀតដោយជោគជ័យ នៅក្នុងពេលតែមួយ។

នេះគឺជាក្រុមផ្កាយរណប Starlink ទី10 ដែលត្រូវបាន SpaceX បាញ់បង្ហោះទៅក្នុងទីអវកាស រាប់ចាប់ពីខែឧសភា2019 ក្នុងបំណងបង្កើតប្រព័ន្ធអ៊ីនធឺណិត broadband (អ៊ីនធឺណិតល្បឿនលឿន) ដែលគ្របដណ្ដប់ទូទាំងសកលលោក។ ការបាញ់បង្ហោះនេះត្រូវបានធ្វើឡើងទៅតាមការគ្រោងទុកនៅវេលាម៉ោង1និង12នាទីទៀបភ្លឺក្នុងថ្ងៃទី7សីហា (ម៉ោងក្នុងស្រុក) នៅឯមជ្ឈមណ្ឌលអវកាស Kennedy ក្នុងរដ្ឋ Florida សហរដ្ឋអាមេរិក។

រយៈពេល2នាទីកន្លះក្រោយពីការហោះឡើង ជាន់ទី1របស់រ៉ុកកែត Falcon 9 បានផ្ដាច់ចេញពីតួខ្លួន ហើយបានចុះចតដោយសុវត្ថិភាពនៅលើស្រឡាងគ្មានមនុស្សបើក ឈ្មោះ “Of Course I Still Love You” ដែលកំពុងចតនៅលើសមុទ្រភាគឦសាននៃតំបន់ច្រមុះជ្រូកCanaveral ក្នុងមហាសមុទ្រអាត្លង់ទិក។

ផ្កាយរណបសង្កេតផែនដីមួយគូ គឺ Global-7 និង Global-8 របស់ក្រុមហ៊ុន BlackSky ត្រូវបានដាក់ពង្រាយទៅក្នុងគន្លងគោចរមុនគេ បន្ទាប់មកទើបដាក់ពង្រាយផ្កាយរណប Starlink ចំនួន57គ្រឿងរបស់ SpaceX។

ដោយមានការដាក់ពង្រាយផ្កាយរណប់ថ្មីចំនួន57គ្រឿងបន្ថែមទៀតនេះ ក្រុមផ្កាយរណបអ៊ីនធឺណិត Starlink របស់ SpaceX បានកើនឡើងដល់595គ្រឿង។ គោលដៅចុងក្រោយរបស់ SpaceX គឺការបង្កើតប្រព័ន្ធផ្កាយរណប Starlink ឱ្យបានជាង40,000គ្រឿងដែលគោចរជុំវិញផែនដីនៅក្នុងរយៈកម្ពស់ប្រមាណជា550ម៉ែត្រពីផែនដី។ ក្រុមហ៊ុន SpaceX របស់មហាសេដ្ឋី Elon Musk មានគម្រោងចាប់ផ្ដើមផ្គត់ផ្គង់សេវាកម្មអ៊ីនធឺណិតទៅឱ្យអតិថិដំបូងៗរបស់ខ្លួននៅសហរដ្ឋអាមេរិក និងកាណាដានៅក្នុងឆ្នាំនេះ។

យោងតាមលោក Elon Musk ប្រព័ន្ធផ្កាយរណបនេះអាចនាំចំណូល30ពាន់លានដុល្លារក្នុងមួយឆ្នាំៗសម្រាប់ SpaceX។ ប្រាក់ទាំងនេះនឹងត្រូវបានប្រើប្រាស់សម្រាប់អភិវឌ្ឍគម្រោង Starship ដែលជាប្រព័ន្ធរ៉ុកកែតនិងយានអវកាសសម្រាប់បំពេញបេសកកម្មបញ្ជូនមនុស្សទៅជាន់ដីនៃពិភពព្រះអង្គារជាលើកដំបូងក្នុងប្រវត្តិសាស្ត្រនាពេលខាងមុខ៕

ប្រភព៖ UPI/Space News

August 8, 2020

យន្តហោះឥណ្ឌាជួបគ្រោះថ្នាក់ បាក់ជា2កំណាត់ សម្លាប់មនុស្សយ៉ាងតិច17នាក់

យន្តហោះមួយគ្រឿងរបស់ Air India Express ដែលដឹកអ្នកដំណើរជិត200នាក់ បានជួបគ្រោះថ្នាក់ដោយសាររត់ខុសផ្លូវកាលពីយប់ថ្ងៃទី7សីហា បណ្ដាលឱ្យមនុស្សយ៉ោងហោច17នាក់បានបាត់បង់ជីវិត។

យន្តហោះ Boeing 737 មានលេខសម្គាល់ជើងហោះហើរ IX 1344 របស់ក្រុមហ៊ុនអាកាសចរណ៍ Air India Express ដែលជួបគ្រោះថ្នាក់នេះ បានហោះហើរពីទីក្រុង Dubai និងបានរត់ខុសផ្លូវក្នុងពេលកំពុងចុះចតនៅអាកាសយានដ្ឋានអន្តរជាតិ Kozhikode កាលពីវេលាម៉ោង19និង40នាទី (ម៉ោង21និង10នាទីនៅភ្នំពេញ) ដោយសារតែភ្លៀងធំ។ អាកាសយានដ្ឋានអន្តរជាតិ Kozhikode ស្ថិតនៅក្នុងរដ្ឋ Kerala ភាគខាងត្បូងប្រទេសឥណ្ឌា។

យន្តហោះខាងលើនេះ ដឹកមនុស្សចំនួន184នាក់ ក្នុងនោះមានទារកទើបកើតចំនួន10នាក់ និងបុគ្គលិកចំនួន7នាក់។ នេះបើតាមការប្រកាសព័ត៌មានពីក្រុមហ៊ុន Air India Express។

ហេតុការណ៍គ្រោះថ្នាក់យន្តហោះនេះ បានបណ្ដាលឱ្យមនុស្សយ៉ាងតិច89នាក់រងរបួស ក្នុងនោះមាន15នាក់រងរបួសធ្ងន់។ ចំណែកអ្នកដែលបានស្លាប់ក្នុងហេតុការណ៍នេះក៏បានកើនឡើងដល់17នាក់។

តំណាងរាស្ត្រឥណ្ឌា Alphons Kannanthanam បានឱ្យដឹងតាមរយៈ Twitter ថា ផ្នែកខាងមុខរបស់យន្តហោះ បានបាក់ចេញពីតួរបស់វា។

IX 1344 គឺជាជើងហោះហើរមួយក្នុងចំណោមយន្តហោះជាច្រើនដែលបានដឹកពលរដ្ឋឥណ្ឌាត្រលប់ចូលស្រុកវិញ។ សកម្មភាពដែលត្រូវបានគេហៅថា Vande Bharat នេះ ត្រូវបានធ្វើឡើងក្នុងបំណងនាំពលរដ្ឋឥណ្ឌាដែលជាប់គាំងនៅបរទេសដោយសារCOVID-19 ត្រលប់មកស្រុកវិញ៕

ប្រភព៖ សារព័ត៌មានបរទេស

August 8, 2020

កម្ពុជាបានរកឃើញអ្នកផ្ទុកCOVID-19 សរុប246នាក់ ខណៈពិភពលោករកឃើញជាង19,541,000នាក់

នាព្រឹកថ្ងៃទី8សីហានេះ ក្រសួងសុខាភិបាលកម្ពុជាបានប្រកាសឱ្យដឹងថា បានរកឃើញអ្នកផ្ទុកCOVID-19ចំនួន3នាក់បន្ថែមទៀត នៅក្នុងគ្រាដែលពិភពលោករកឃើញអ្នកជំងឺថ្មីចំនួន8,687នាក់ ក្នុងរយៈពេល24ម៉ោងចុងក្រោយនេះ។

នៅកម្ពុជា ករណីឆ្លងវីរុសទាំង3ខាងលើនេះ ត្រូវបានក្រសួងសុខាភិបាលរកឃើញកាលពីថ្ងៃទី7សីហា។ អ្នកជំងឺទាំងនេះគឺជាជនជាតិខ្មែរ ក្នុងនោះមាន2នាក់នៅខេត្តកំពង់ឆ្នាំង និង1នាក់នៅកំពង់ចាម។ ដូច្នេះគិតមកដល់បច្ចុប្បន្ន កម្ពុជាបានរកឃើញអ្នកផ្ទុកវីរុសCOVID-19 សរុបចំនួន246នាក់ ក្នុងនោះមានអ្នកជំងឺ215នាក់បានជាសះស្បើយ និង31នាក់កំពុងសម្រាកព្យាបាលនៅមន្ទីរពេទ្យ។

នៅទូទាំងពិភពលោក គិតមកដល់ពេលនេះ បានរកឃើញអ្នកឆ្លងCOVID-19 សរុប19,541,219នាក់ អ្នកស្លាប់សរុប724,050នាក់ និងជាសះស្បើយចំនួន12,544,480នាក់៕

August 8, 2020

ចិនរិះគន់សហរដ្ឋអាមេរិកថា “កៀបសង្កត់” TikTok និង WeChat ដោយគ្មានមូលដ្ឋាន

ទីក្រុងប៉េកាំងបានចោទប្រកាន់ទីក្រុងវ៉ាស៊ីងតោនថា “ត្រួតត្រា និងកៀបសង្កត់តាមតែអំពើចិត្ត” ទៅលើក្រុមហ៊ុនចិន ក្រោយពីលោក Trump ហាមមិនឱ្យជនជាតិអាមេរិកាំងជួញដូរជាមួយនឹងម្ចាស់គ្រប់គ្រងរបស់ TikTok និង WeChat។

>អត្ថបទទាក់ទង៖ Trump ហាមការជួញដូរជាមួយម្ចាស់ TikTok និង WeChat

អ្នកនាំពាក្យរបស់ក្រសួងការបរទេសចិន លោក Wang Wenbin បានថ្លែងនៅក្នុងសន្និសីទសារព័ត៌មានមួយនៅទីក្រុងប៉េកាំងក្នុងថ្ងៃនេះ (7សីហា) ថា៖ “សហរដ្ឋអាមេរិក ជាញឹកញាប់ បានរំលោភលើអំណាចជាតិ និងកៀបសង្កត់ដោយមិនសមហេតុផលទៅលើបណ្ដាក្រុមហ៊ុនដែលមិនមែនជារបស់សហរដ្ឋអាមេរិក”។

សេចក្ដីថ្លែងការណ៍ខាងលើនេះត្រូវបានលោក Wang Wenbin លើកឡើង ក្រោយពីប្រធានាធិបតីសហរដ្ឋអាមេរិក កាលពីថ្ងៃទី6សីហា បានចុះហត្ថលេខាលើបទបញ្ជាមួយដែលហាមមិនឱ្យបុគ្គល និងស្ថាប័ននានានៅសហរដ្ឋអាមេរិក ធ្វើការជួញដូរជាមួយនឹង ByteDance និង Tencent ដែលជាម្ចាស់របស់ក្រុមហ៊ុន TikTok និង WeChat ក្រោយរយៈពេល45ថ្ងៃទៀត។

លោក Wang Wenbin បន្តថា៖ “ដោយមិនអើពើដល់សិទ្ធិ និងផលប្រយោជន៍របស់អ្នកប្រើប្រាស់ និងក្រុមហ៊ុនអាមេរិកាំង សហរដ្ឋអាមេរិកនៅតែធ្វើសកម្មភាពក្ដោបក្ដាប់ និងកៀបសង្កត់នយោបាយតាមតែអំពើចិត្ត”។

លោក Trump បានប្រកាសថា បណ្ដាកម្មវិធី (App) របស់ចិនគឺជាការគំរាមកំហែងដល់ “សន្តិសុខជាតិ គោលនយោបាយការបរទេស និងសេដ្ឋកិច្ច” របស់សហរដ្ឋអាមេរិក

នៅក្នុងបទបញ្ជាដែលត្រូវបានចុះហត្ថលេខាកាលពីថ្ងៃទី6សីហា លោក Trump បានប្រកាសថា បណ្ដាកម្មវិធី (App) របស់ចិនគឺជាការគំរាមកំហែងដល់ “សន្តិសុខជាតិ គោលនយោបាយការបរទេស និងសេដ្ឋកិច្ច” របស់សហរដ្ឋអាមេរិក ហើយទីក្រុងវ៉ាស៊ីងតោនត្រូវតែ “ធ្វើសកម្មភាពឱ្យបានខ្លាំងក្លា”។ បទបញ្ជានេះ នឹងអាចធ្វើឱ្យកម្មវិធីនានារបស់ចិន មិនអាចបង្ហាញខ្លួននៅលើទឹកដីសហរដ្ឋអាមេរិក។

អ្នកនាំពាក្យរបស់ក្រសួងការបរទេសចិន លោក Wang Wenbin បានថ្លែងកាលពីថ្ងៃទី4សីហាថា មូលដ្ឋានស្ដីអំពីសន្តិសុខជាតិដែលសហរដ្ឋអាមេរិកបានប្រើប្រាស់ដើម្បី “កៀបសង្កត់បណ្ដាក្រុមហ៊ុនចិន” គឺជារឿង “មិនមានមូលដ្ឋាន”។ លោកបន្តថា ក្រុមហ៊ុននានារបស់ចិន ធ្វើសកម្មភាពជំនួញទៅតាមគោលការណ៍អន្តរជាតិ និងច្បាប់របស់សហរដ្ឋអាមេរិក។

ស្ថាបនិករបស់ក្រុមហ៊ុន ByteDance លោក Zhang Yiming

ទំនាក់ទំនងរវាងទីក្រុងវ៉ាស៊ីងតោន និងប៉េកាំង កំពុងធ្លាក់ទៅក្នុងសភាពអាក្រក់បំផុតក្នុងរយៈពេលច្រើនឆ្នាំកន្លងមកនេះ។ សហរដ្ឋអាមេរិកតែងតែចោទប្រកាន់ប្រទេសចិនអំពីបញ្ហាCOVID-19 និងបញ្ហាជាច្រើនផ្សេងទៀតជាញឹកញាប់។

CEO របស់ក្រុមហ៊ុន Tencent លោក Ma Huateng

សហរដ្ឋអាមេរិកក៏បាន និងកំពុងដាក់ទណ្ឌកម្មទៅលើចិន ទាក់ទិននឹងគោលនយោបាយរបស់ចិននៅលើទឹកដីហុងកុង និងស៊ីនជាំង ព្រមទាំងជំរុញឱ្យបណ្ដាប្រទេសសម្ព័ន្ធមិត្ត ឈប់សហការជាមួយក្រុមហ៊ុន Huawei ដោយចោទថា ក្រុមហ៊ុននេះមានជាប់ពាក់ព័ន្ធជាមួយនឹងកងទ័ពចិន៕

ប្រភព៖ AFP

August 7, 2020

បុគ្គលិកម្នាក់ៗរបស់ Facebook ទទួលបានប្រាក់ឧបត្ថម្ភបន្ថែម1,000ដុល្លារ ដើម្បីទិញឧបករណ៍សម្រាប់បន្តធ្វើការពីចម្ងាយ

Facebook អនុញ្ញាតឱ្យបុគ្គលិករបស់ខ្លួនធ្វើការពីចម្ងាយរហូតដល់ខែមិថុនាឆ្នាំ2021 ព្រមទាំងផ្ដល់ប្រាក់ឧបត្ថម្ភដល់បុគ្គលិកម្នាក់ៗចំនួន1,000ដុល្លារដើម្បីទិញសម្ភារៈសម្រាប់ធ្វើការនៅឯផ្ទះ ក្នុងគ្រាដែលរលកទី2របស់COVID-19បានបង្ហាញខ្លួន។

យោងតាម Reuters ព័ត៌មានខាងលើនេះត្រូវបានអ្នកនាំពាក្យរបស់ Facebook ទទួលស្គាល់កាលពីថ្ងៃទី6សីហាថា៖ “បន្ទាប់ពីបានពិនិត្យទៅលើការណែនាំរបស់អ្នកជំនាញការផ្នែកសុខាភិបាល និងរដ្ឋាភិបាល ក៏ដូចជាកិច្ចប្រជុំផ្ទៃក្នុងអំពីបញ្ហានេះ យើងក៏សម្រេចអនុញ្ញាតឱ្យបុគ្គលិកបន្តធ្វើការពីផ្ទះដោយស្ម័គ្រចិត្តរហូតដល់ពាក់កណ្ដាលឆ្នាំក្រោយ”។

មុននោះ បុគ្គលិករបស់ Facebook ចំនួន45,000នាក់ ត្រូវបានអនុញ្ញាតឱ្យធ្វើការពីចម្ងាយតាំងពីខែមីនា ប៉ុន្តែមិនទាន់បានកំណត់ច្បាស់លាស់ថា ពេលណាទើបអាចត្រលប់មកធ្វើការក្នុងក្រុមហ៊ុនវិញនោះទេ។ ពួកគេនៅតែទទួលបានប្រាក់ខែពេញលេញ ព្រមទាំងទទួលបានប្រាក់ឧបត្ថម្ភចំនួន1,000ដុល្លារដើម្បីដោះស្រាយបញ្ហាក្នុងសម័យCOVID-19នេះ។

កាលពីចុងខែកក្កដា Google ក៏ជាក្រុមហ៊ុនបច្ចេកវិទ្យាធំដំបូងគេនៅជ្រលងភ្នំSilicon បានប្រកាសបន្តឱ្យបុគ្គលិករបស់ខ្លួនចំនួនជិត200,000នាក់នៅទូទាំងពិភពលោក បំពេញការងារពីចម្ងាយរហូតដល់ខែមីថុនាឆ្នាំ2021។

លោក Sundar Pichai ដែលជា CEO របស់ Alphabet (Google) បានសរសេរនៅក្នុងអ៊ីមែលដែលផ្ញើទៅកាន់បុគ្គលិករបស់ខ្លួនថា “ខ្ញុំដឹងថាប្រការនេះមិនងាយស្រួលឡើយ។ ខ្ញុំសង្ឃឹមថា ការសម្រេចចិត្តថ្មីនេះនឹងជួយឱ្យអ្នកទាំងអស់គ្នា មានភាពម្ចាស់ការជាងមុនក្នុងការធ្វើឱ្យមានតុល្យភាពរវាងការងារក្រុមហ៊ុននិងការថែរក្សាសុខភាពផ្ទាល់ខ្លួន រួមនឹងគ្រួសារក្នុងរយៈពេល12ខែទៅមុខទៀត”។

ចំណែកក្រុមហ៊ុន Microsoft មកដល់បច្ចុប្បន្នមិនទាន់បានចេញសេចក្ដីកែប្រែលើការប្រកាសកាលពីពេលកន្លងទៅដែលថានឹងអនុញ្ញាតឱ្យបុគ្គលិកចូលធ្វើការក្នុងក្រុមហ៊ុនវិញនៅរដូវស្លឹកឈើជ្រុះនៅឡើយ។ រីឯក្រុមហ៊ុន Apple ឯណោះ ក៏បានធ្វើសកម្មភាពទៅតាមកាលៈទេសៈ ដោយបើក-បិទហាងរបស់ខ្លួនទៅតាមការប្រែប្រួលនៃស្ថានភាពរបស់COVID-19៕

ប្រភព៖ សារព័ត៌មានបរទេស

August 7, 2020

ទ្រព្យរបស់ម្ចាស់ Facebook កើនឡើងដល់100ពាន់លានដុល្លារអាមេរិក

Mark Zuckerberg បច្ចុប្បន្នគឺជាអ្នកមានជាងគេលំដាប់ទី3ក្នុងពិភពលោក បន្ទាប់ពីម្ចាស់ Amazon គឺលោក Jeff Bezos និងសហស្ថាបនិករបស់ Microsoft លោក Bill Gates។

យោងតាម Bloomberg Billionaires Index មហាសេដ្ឋីវ័យ36ឆ្នាំ Mark Zuckerberg មានទ្រព្យចំនួន100ពាន់លានដុល្លារអាមេរិក។ លោកគឺជាមនុស្សទី3 បន្ទាប់ពីលោក Jeff Bezos (ម្ចាស់ Amazon) និងលោក Bill Gates (សហស្ថាបនិករបស់ Microsoft) ដែលមានទ្រព្យរយពាន់លានដុល្លារអាមេរិក។ ទ្រព្យសម្បត្តិរបស់លោក Zuckerberg ភាគច្រើនបានមកពីភាគហ៊ុនចំនួន13% របស់លោក នៅក្នុងក្រុមហ៊ុន Facebook។

មូលបត្រ Facebook កាលពីម្សិលមិញបានកើន6.5% ដែលនេះគឹជាកំណត់ត្រាថ្មី និងកើតឡើងដោយសារក្រុមអ្នកវិនិយោគជឿជាក់ទៅលើការដែលក្រុមហ៊ុននេះឧទ្ទេសនាម Reals ដែលជាគូប្រជែងរបស់បណ្ដាញសង្គមវីដេអូខ្លី TikTok របស់ចិន។ កត្តានេះបានជួយឱ្យលោក Zuckerberg រកបានទ្រព្យបន្ថែមចំនួន5.9ពាន់លានដុល្លារដោយប្រើពេលត្រឹមតែមួយរាត្រីប៉ុណ្ណោះ។

ចំណែកអ្នកដែលមានជាងគេបង្អស់ក្នុងពិភពលោក នៅតែជា Jeff Bezos ដោយមានទ្រព្យសរុប190ពាន់លានដុល្លារ។ ចំណែកអ្នកមានជាងគេលំដាប់ទី2ក្នុងពិភពលោក គឺលោក Bill Gates ដោយមានទ្រព្យសរុប120ពាន់លានដុល្លារអាមេរិក។

ទីស្នាក់ការកណ្តាលរបស់ Facebook នៅទីក្រុង Menlo Park ក្នុងរដ្ឋ California សហរដ្ឋអាមេរិក

មហាសេដ្ឋីបច្ចេកវិទ្យារបស់សហរដ្ឋអាមេរិក ថ្មីៗនេះ រកបានប្រាក់យ៉ាងច្រើនសន្ធឹក និងយ៉ាងឆាប់រហ័សបំផុត បើទោះសេដ្ឋកិច្ចសហរដ្ឋអាមេរិកកំពុងធ្លាក់ទៅក្នុងវិបត្តិដោយសារCOVID-19យ៉ាងណាក៏ដោយ។ ទ្រព្យរបស់ Zuckerberg បានកើត22ពាន់លានដុល្លារបន្ថែមទៀតនៅក្នុងឆ្នាំនេះ ខណៈដែល Bezos រកបាន75ពាន់លានដុល្លារ រាប់ចាប់ពីដើមឆ្នាំមកដល់បច្ចុប្បន្ន។

ក្រុមហ៊ុនបច្ចេកវិទ្យាធំៗបំផុតនៅសហរដ្ឋអាមេរិកចំនួន5 ដែលរួមមាន Apple, Amazon, Alphabet, Facebook និង Microsoft បច្ចុប្បន្នមានទុនប្រហាក់ប្រហែលនឹង30% នៃ GDP សរុបរបស់ប្រទេសនេះ៕

ប្រភព៖ Bloomberg

August 7, 2020

Author: សឿន សំណាង