Author: សឿន សំណាង

(វីដេអូ) រកឃើញប្រព័ន្ធដែលមានព្រះអាទិត្យ3ដួង កំពុងនាំគ្នា “ហែក” ថាសបង្កើតភព
បណ្ដុំផ្កាយ “ក្មេង” មួយដែលមានចម្ងាយពីផែនដី1,300ឆ្នាំពន្លឺ កំពុងតែហែកកម្ទេចថាសដែលមានតួនាទីបង្កបង្កើតភពនៅជុំវិញពួកវា បង្កើតបានជាខ្សែក្រវាត់បញ្ឆិតគ្នាជាច្រើនជាន់។
ប្រព័ន្ធព្រះអាទិត្យនានាដែលត្រូវបានរកឃើញនៅក្នុងចក្រវាល តែងមានរូបរាងជាថាសរាបស្មើយ៉ាងល្អ ដោយមានភពជាច្រើន និងថាសធូលីវិលជុំវិញផ្កាយដែលនៅកណ្ដាល និងមានទិសស្របគ្នា។ ប៉ុន្តែ ប្រការនេះមិនមែនត្រឹមត្រូវគ្រប់ពេលនោះទេ ពិសេសគឺចំពោះប្រព័ន្ធដែលមានព្រះអាទិត្យច្រើនដួង ដូច GW Orionis ជាដើម។
GW Orionis គឺជាប្រព័ន្ធផ្កាយ3 ដែលមានព្រះអាទិត្យចំនួន3 ស្ថិតនៅក្នុងកញ្ចុំផ្កាយ Orion។ ក្នុងប្រព័ន្ធនេះ ផ្កាយទាំង3វិញជុំវិញគ្នា និងមានចម្ងាយពីផែនដីប្រមាណជា1,300ឆ្នាំពន្លឺ។
នៅក្នុងការសិក្សាស្រាវជ្រាវថ្មីបំផុតដែលទើបត្រូវបានចុះផ្សាយនៅលើទស្សនាវដ្ដី Science កាលពីថ្ងៃទី3កញ្ញា ក្រុមអ្នកវិទ្យាសាស្ត្រអន្តរជាតិ បានសង្កេតឃើញថា ក្រុមផ្កាយនេះកំពុងតែនាំគ្នាហែកថាសបង្កបង្កើតភព (ក្នុងថាសនេះ ភាគច្រើនគឺជាឧស្ម័ន ធូលី និងដុំថ្មអវកាស) ជាបំណែក និងកំពុងតែរុញច្រានបំណែករបស់ថាសនេះឱ្យឃ្លាតចេញពីផ្ទៃរាបរបស់គន្លងគោចរដំបូង។
Alison Young ដែលជាអ្នកស្រាវជ្រាវមកពីសាកលវិទ្យាល័យ Exeter និង Leicester របស់អង់គ្លេស បានសង្កត់ធ្ងន់ថា កន្លងមកធ្លាប់មានការលើកឡើងអំពីករណីហែកថាសបង្កបង្កើតភព ប៉ុន្តែនេះគឺជាភ័ស្តតាងជាក់ស្ដែងដំបូងគេបង្អស់។ ប្រការនេះមានន័យថា ក្នុងចក្រវាល ពិតជាមានភពដែលវិលជុំវិញក្រុមផ្កាយមេរបស់ពួកវាទៅតាមគន្លងតារាវិថីបែបទ្រេត។
ក្រុមអ្នកវិទ្យាសាស្ត្រឱ្យដឹងថា រង្វង់ខ្សែក្រវាត់ធូលីដែលមានសភាពទ្រេតបំផុតរបស់ប្រព័ន្ធ GW Orionis នេះ គឺស្ថិតនៅផ្នែកខាងក្នុងរបស់ថាសធូលី ដែលនៅជិតផ្កាយទាំង3ដួង។ រង្វង់នេះផ្ទុកធូលី និងវត្ថុអវកាសដែលមានទម្ងន់ធ្ងន់ជាង30ដងបើធៀបនឹងទម្ងន់របស់ផែនដី ដែលនេះមានន័យថា វាមានលក្ខខណ្ឌគ្រប់គ្រាន់ដើម្បីបង្កើតបានជាភពក្នុងចំនួនច្រើន។
អ្នកវិទ្យាសាស្ត្រ Alexander Kreplin មកពីសាកលវិទ្យាល័យ Exeter បានពន្យល់ថា៖ “ភពដែលកកើតឡើងនៅក្នុងរង្វង់ទ្រេតនេះ នឹងគោចរតាមគន្លងទ្រេតជុំវិញផ្កាយដែលនៅកណ្ដាល។
https://www.youtube.com/watch?v=nh-yn0mZS6E
ក្រុមតារាវិទូអន្តរជាតិ ដែលរួមមានជនជាតិអង់គ្លេស បែលហ្សិក ឈីលី បារាំង និងអាម៉េរិកាំង បានចាប់ផ្ដើមសង្កេតទៅលើប្រព័ន្ធផ្កាយ GW Orionis តាំងពីឆ្នាំ2008 ដោយប្រើម៉ាស៊ីនប្រមូលកាំរស្មី AMBER និងឧបករណ៍ GRAVITY នៅលើកែវយឹត VLT ដែលមានទីតាំងនៅក្នុងស្ថានីយសង្កេត ESO ក្នុងទឹកដីនៃប្រទេសឈីលី។ ទិន្នន័យដែលប្រមូលបាន ត្រូវបានប្រើប្រាស់ដើម្បីបង្កើតជារចនាសម្ព័ន្ធនៃប្រព័ន្ធផ្កាយនេះតាមរយៈកុំព្យូទ័រ ដែលអនុញ្ញាតឱ្យអ្នកវិទ្យាសាស្ត្រដឹងអំពីប្រការដែលបានកើតឡើងខាងលើនេះ៕
ប្រភព៖ Scitech Daily/Space
September 4, 2020
ប្រទេស Palau អញ្ជើញសហរដ្ឋអាម៉េរិកឱ្យបោះទ័ពលើទឹកដីរបស់ខ្លួន ខណៈចិនកំពុងពង្រីកឥទ្ធិពលក្នុងតំបន់
ប្រទេស Palau ដែលមានទីតាំងនៅមហាសមុទ្រប៉ាស៊ីហ្វិក បានស្នើឱ្យសហរដ្ឋអាម៉េរិក មកតាំងមូលដ្ឋានទ័ពនៅលើទឹកដីរបស់ខ្លួន ស្របពេលដែលប្រទេសចិនកំពុងតែពង្រីកឥទ្ធិពលនៅក្នុងតំបន់សមុទ្រចិនខាងត្បូងដែលជាប់នឹងមហាសមុទ្រប៉ាស៊ីហ្វិក។
ប្រធានាធិបតីនៃប្រទេស Palau លោក Tommy Remengesau ក្នុងសប្ដាហ៍នេះបានផ្ញើលិខិតមួយច្បាប់ទៅកាន់រដ្ឋមន្ត្រីក្រសួងការពារជាតិអាម៉េរិក លោក Mark Esper ដើម្បីស្នើឱ្យកងទ័ពសហរដ្ឋអាម៉េរិក មកតាំងមូលដ្ឋាននៅលើទឹកដីរបស់ខ្លួន ដែលជាកោះមួយនៅកណ្ដាលមហាសមុទ្រប៉ាស៊ីហ្វិក និងមានចម្ងាយប្រមាណជា1,500គីឡូម៉ែត្រទៅទិសខាងកើតនៃប្រទេសហ្វីលីពីន។
ប្រធានាធិបតី Remengesau បានសរសេរថា៖ “ការស្នើរបស់ Palau ចំពោះកងទ័ពអាម៉េរិកាំង គឺសាមញ្ញណាស់ ចូរបង្កើតមូលដ្ឋានទ័ពប្រើប្រាស់រួម ក្រោយមក កងទ័ពសហរដ្ឋអាម៉េរិកអាចមក និងប្រើប្រាស់បានគ្រប់ពេល”។
ប្រធានាធិបតីនៃប្រទេស Palau អះអាងថា ប្រទេសកោះដែលមានប្រជាជនប្រមាណ22,000នាក់នេះ ត្រៀមខ្លួនជានិច្ចក្នុងការផ្ដល់ទីតាំងដីគោក កំពង់ផែ និងព្រលានយន្តហោះទៅឱ្យកងទ័ពសហរដ្ឋអាម៉េរិក។ ទន្ទឹមនឹងនេះ Palau ក៏ស្នើឱ្យកងកម្លាំងល្បាតសមុទ្រសហរដ្ឋអាម៉េរិក បង្ហាញវត្តមាននៅជុំវិញប្រទេស Palau ដើម្បីជួយការពារដែនសមុទ្រនៃប្រទេសនេះផងដែរ។
ប្រធានាធិបតីនៃប្រទេស Palau លោក Tommy Remengesau
រដ្ឋមន្ត្រីក្រសួងការពារជាតិសហរដ្ឋអាម៉េរិក លោក Esper កាលពីសប្ដាហ៍មុន បានទៅធ្វើទស្សនកិច្ចនៅប្រទេស Palau ជាកន្លែងដែលលោកបានសម្ដែងសុន្ទរកថា ចោទប្រទេសចិនថា កំពុងធ្វើសកម្មភាពបង្កអស្ថិរភាពនៅមហាសមុទ្រប៉ាស៊ីហ្វិក។
Palau គឺជាប្រទេសឯករាជ្យមួយ ប៉ុន្តែមិនមានកងទ័ពនោះទេ ហើយសហរដ្ឋអាម៉េរិកទទួលខុសត្រូវក្នុងការការពារប្រទេសនេះទៅតាមសន្ធិសញ្ញា Compact of Free Association (COFA)។ តាមរយៈសន្ធិសញ្ញានេះ កងទ័ពសហរដ្ឋអាម៉េរិកមានសិទ្ធិក្នុងការពង្រាយកងទ័ពរបស់ខ្លួននៅ Palau ក៏ប៉ុន្តែបច្ចុប្បន្ននេះ ពុំវត្តមានកងទ័ពអាម៉េរិកាំងប្រចាំការនៅទីនេះនោះទេ។
ប្រធានាធិបតី Remengesau ថ្លែងថា៖ “យើងគួរតែប្រើប្រាស់យន្តការនៃសន្ធិសញ្ញា COFA ដើម្បីជំរុញឱ្យមានវត្តមានកងទ័ពសហរដ្ឋអាម៉េរិកនៅប្រទេស Palau ជាអចិន្ត្រៃយ៍។ កងទ័ពអាម៉េរិកាំង មានសិទ្ធិក្នុងការបង្កើតមូលដ្ឋានការពារនៅសាធារណរដ្ឋ Palau”។
ទិដ្ឋភាពកោះមួយចំនួនរបស់ប្រទេស Palau
លោក Remengesau យល់ថា មូលដ្ឋានទ័ពរបស់សហរដ្ឋអាម៉េរិកនៅ Palau មិនត្រឹមតែជួយបង្កើនសមត្ថភាពការពារខ្លួនរបស់សហរដ្ឋអាម៉េរិកនោះទេ តែក៏ជួយលើកកម្ពស់សេដ្ឋកិច្ចជាតិរបស់កោះនេះផងដែរ ខណៈដែលកោះនេះកំពុងជួបការលំបាកខ្លាំងក្នុងសម័យ COVID-19 ដែលបានរារាំងសកម្មភាពទេសចរណ៍ និងវិស័យផ្សេងៗរបស់ប្រទេសនេះ។
កោះ Palau ធ្លាប់ជាទីតាំងដែលកើតមានការប្រយុទ្ធគ្នាយ៉ាងខ្លាំងក្លារវាងកងទ័ពសហរដ្ឋអាម៉េរិក និងកងទ័ពជប៉ុន នៅក្នុងសង្គ្រាមលោកលើកទីII។ ក៏ប៉ុន្តែ ក្រោយសង្គ្រាមនេះ ទីក្រុងវ៉ាស៊ីងតោនបានផ្ដោតទៅលើមូលដ្ឋានទ័ពនៅហ្វីលីពីន និងកោះ Guam។ មូលដ្ឋានរ៉ាដាយោធាមួយរបស់សហរដ្ឋអាម៉េរិក ត្រូវបានរៀបគម្រោងសាងសង់រួចហើយ ប៉ុន្តែត្រូវបានពន្យារពេលទៅវិញដោយសារCOVID-19។
ផែនទីនៃទីតាំងប្រទេស Palau
នៅក្នុងដំណើរទស្សនាកិច្ចមិនដល់3ម៉ោងរបស់លោក Esper ទៅកាន់ប្រទេស Palau កាលពីសប្ដាហ៍មុន លោក Remengesau បានថ្លែងថា ប្រទេសចិនកំពុងផ្ដល់ប្រាក់កម្ចីដែលមានការប្រាក់ទាបដើម្បីអូសទាញបណ្ដាប្រទេសកោះនៅមហាសមុទ្រប៉ាស៊ីហ្វិក។
ក៏ប៉ុន្តែ អ្នកនាំពាក្យនៃក្រសួងការបរទេសចិន លោកស្រី Hua Chunying ធ្លាប់បានថ្លែងថា ពុំមានភ័ស្ដុតាងណាមួយបង្ហាញថា ទីក្រុងប៉េកាំងទទួលខុសត្រូវក្នុងការផ្ដល់ប្រាក់កម្ចីមិនមានស្ថិរភាពទៅឱ្យបណ្ដាប្រទេសកោះនៅមហាសមុទ្រប៉ាស៊ីហ្វិកនោះឡើយ៕
ប្រភព៖ AFP
September 4, 2020
កាណាដា បដិសេធពាក្យសុំសិទ្ធិជ្រកកោន របស់អតីតអង្គរក្សលោក គីម ចង់ អ៊ីល
កាលពីថ្ងៃទី3 កញ្ញា សារព័ត៌មានThe Toronto Star បានរាយការណ៍ថា លោកអ៊ី យ៉ុង គុក អាយុ 57ឆ្នាំ ពលរដ្ឋសញ្ជាតិកូរ៉េខាងជើង អតីតអង្គរក្សរបស់អតីតមេដឹកនាំកូរ៉េខាងជើងដែលស្លាប់ទៅហើយ លោក គីម ចង់ អ៊ីល បាននិយាយថា លោកខ្លាចត្រូវគេចាប់ពង្រត់ បើសិនជាត្រូវនិរទេសខ្លួនត្រឡប់ទៅប្រទេសកូរ៉េខាងត្បូងវិញ បន្ទាប់ពីប្រទេសកាណាដាបានបញ្ជាក់ថា ពាក្សសុំសិទ្ធិជ្រកកោនរបស់លោកអ៊ី ខ្វះភាពគួរឱ្យជឿជាក់។
លោកអ៊ី បានផ្ដល់បទសម្ភាសតាមរយៈអ្នកបកប្រែថា “ស្ថានការណ៍ខ្មៅងងឹតខ្លាំងណាស់ រដ្ឋបាលកូរ៉េខាងជើង ព្យាយាមចាប់ពង្រត់ខ្ញុំ ពេលនៅក្នុងប្រទេសកូរ៉េខាងត្បូង បើប្រទេសកាណាដាបញ្ជូនខ្ញុំត្រឡប់ទៅកូរ៉េខាងត្បូងវិញ ខ្ញុំនឹងក្លាយជាសាកសពមិនខាន”
កាលពីឆ្នាំ2001 លោកអ៊ី បានចូលរួមក្នុងការរត់ភៀសខ្លួនមួយរបស់បណ្ដាអ្នកក្បត់ប្រទេសឯទៀត និងធ្វើដំណើរទៅទីក្រុងសេអ៊ូលរបស់កូរ៉េខាងត្បូង ឆ្លងកាត់ប្រទេសចិន។ តមក នៅឆ្នាំ2017 លោកបានធ្វើដំណើរទៅទីក្រុងតូរ៉ុនតូ របស់ប្រទេសកាណាដា ព្រមជាមួយភរិយា និងកូន 2នាក់ ដើម្បីស្នើសុំសិទ្ធិជ្រកកោននៅទីនោះ។
លោកអ៊ី អះអាងថា គ្រួសាររបស់លោក កំពុងស្ថិតក្នុងភាពប្រថុយប្រថានក្នុងការត្រូវគំរាមកំហែង និងបានទទួលការគំរាមសម្លុត ដោយសារតែលោកបានរិះគន់ប្រទេសកូរ៉េខាងជើង ខណៈដែលប្រទេសកូរ៉េទាំង2 ព្យាយាមកែបញ្ហាសម្ព័ន្ធភាពដែលកំពុងតានតឹងរវាងគ្នា តែគណៈកម្មការអន្តោប្រវេសន៍ និងជនភៀសខ្លួនកាណាដា បានបដិសេធពាក្យស្នើសុំសិទ្ធិជ្រកកោនរបស់លោក កាលពីថ្ងៃទី31 កក្កដា ដោយសារតែខ្វះភាពគួរឱ្យជឿជាក់ ខណៈដែលលោកអ៊ី ត្រូវការដាក់ពាក្យឧទ្ធរណ៍លើសេចក្ដីសម្រេចរបស់គណៈកម្មការខាងលើជាបន្ត។
ចំណែកសារព័ត៌មាន Daily Mail បានរាយការណ៍ថា អាជ្ញាធរនៃប្រទេសកាណាដា មិនអាចត្រួតពិនិត្យភាពត្រឹមត្រូវលើអំណះអំណាងរបស់លោកអ៊ី ដែលបានប្រាប់ថា ធ្លាប់ប៊ិះត្រូវគេចាប់ពង្រត់ ដល់ទៅ 2លើក អំឡុងពេលស្ថិតនៅក្នុងប្រទេសកូរ៉េខាងត្បូង។
លោកអ៊ី យ៉ុងគុក បានប្រាប់ឱ្យដឹងថា លោកចាប់ផ្ដើមធ្វើជាអង្គរក្សលោកគីម ចង់អ៊ីល តាំងពីឆ្នាំ1977 ដែលកាលណោះ លោកគីម ចង់អ៊ីល នៅជាកូនប្រុសរបស់លោក គីម អ៊ីលស៊ុង ស្ថាបនិក និងមេដឹកនាំកូរ៉េខាងជើងក្នុងគ្រានោះនៅឡើយ ដោយទទួលបានប្រាក់ខែប្រមាណជា 100ដុល្លារអាមេរិក និងត្រូវតាមការពារលោកគីម ចង់អ៊ីល ទៅគ្រប់ទីកន្លែង។
លោកអ៊ី ថែមទាំងបានផ្ដល់បទសម្ភាសជាមួយ CNN ទៀតផងថា ខណៈពេលនៅធ្វើការឱ្យលោកគីម អ៊ីលស៊ុង អំឡុងទសវត្សរ៍1980 លោកទទួលស្គាល់ថា លោកត្រូវបានលាងខួរក្បាលដោយរដ្ឋបាលកូរ៉េខាងជើង។ “ពេលលោកគីម ចង់អ៊ីល បម្រុងឡើងជិះរថយន្តផ្ទាល់ខ្លួន បណ្ដាទីប្រឹក្សាទាំងឡាយ នឹងរត់គេច និងទម្លាក់ខ្លួនដេកនៅលើស្មៅ ដើម្បីលាក់បំបាំងខ្លួនពីលោកគីម ចង់អ៊ីល ដោយសារតែម្នាក់ៗមានប្រឡាក់ធូលីដីនៅលើសម្លៀកបំពាក់ និងម្នាក់ៗសុទ្ធតែខ្លាចលោកគីម ចង់អ៊ីល ដែលមានសម្ដីអាក្រក់ កាចសាហាវ និងអាចបញ្ជាឱ្យកាត់ក្បាលនរណាក៏បាន ទោះជាពេលមានអារម្មណ៍សប្បាយរីករាយក៏ដោយ”។
លោកអ៊ី ព្យាយាមរត់គេចចេញពីកូរ៉េខាងជើង 2ដង ដោយលើកដំបូង ធ្វើមិនបានសម្រេច ក៏ត្រូវបញ្ជូនខ្លួនទៅជំរំពលកម្មធ្ងន់ធ្ងរ ឬគុកអ្នកទោសនយោបាយរបស់កូរ៉េខាងជើង យ៉ូដុក ក្នុងខេត្តយ៉ុងណាំ។ ក្នុងពេលជាប់ឃុំនៅទីនោះ ដើម្បីឱ្យមានជីវិតរស់ និងបានទទួលអាហារច្រើនពីអ្នកយាម លោកអ៊ី ត្រូវស្ម័គ្រចិត្តលីខ្មោចអ្នកទោស យកទៅកប់នៅតាមភ្នំតែម្នាក់ឯង អស់ជាង 300សាកសព៕
ប្រភព៖ សារព័ត៌មានបរទេស

September 4, 2020
Warrent Buffett ជាមួយនឹងខ្ទង់ចំណាយ 300,000 USD ដើម្បីកាត់សក់! គំនិតដែលគួរយកជាគំរូ
សម្រាប់លោក Warren Buffett “ថ្ងៃនេះចំណាយតែប៉ុន្មានដុល្លារ អនាគតនឹងត្រូវបាត់បង់រាប់ពាន់ដុល្លារមិនខាន។
ប្រធានក្រុមហ៊ុន Berkshire Hathaway Inc លោក Warren Buffett គឺជាវិនិយោគិនម្នាក់ក្នុងចំណោមអ្នកវិនិយោគដែលទទួលបានជោគជ័យបំផុតនៅគ្រប់សម័យកាល ជាមួយនឹងទ្រព្យសម្បត្តិឡើងដល់82ពាន់លានដុល្លារអាមេរិក។ ប៉ុន្តែ ទ្រព្យសម្បត្តិជិត90% របស់លោក សុទ្ធតែរកបាននៅពេលដែលលោកមានវ័យ65ឆ្នាំ។ ភាពពូកែវិនិយោគគឺជារឿងសំខាន់ ប៉ុន្តែការវិនិយោគប្រកបដោយភាពត្រឹមត្រូវក្នុងរយៈពេលវែង គឺរឹតតែសំខាន់ទៅទៀត។
លោក Buffett ថ្លែងថា៖ “ជាយូរណាស់មកហើយ ខ្ញុំតែងតែណែនាំឱ្យអ្នកដទៃប្រើប្រាស់វិធីមួយដែលខ្ញុំឱ្យឈ្មោះថា “បច្ចេកទេស Methuselah”។ នេះគឺជាតម្លៃមួយដែលបូកផ្សំដោយខ្ទង់ចំណូលយូរអង្វែង ទាក់ទាញ និងស្ថិរភាព។
តាំងតែពីកុមារ Buffett យល់ថា ភាពមានបានមិនមែនអាស្រ័យទៅលើប្រាក់ដែលអ្នករកបានតែមួយមុខនោះឡើយ ប៉ុន្តែវាក៏ត្រូវអាស្រ័យទៅលើពេលវេលាដែលអ្នករកបាននៅក្នុងប្រាក់ចំណូលទាំងនោះផងដែរ។
កាលពីអាយុទើបតែ10ឆ្នាំ លោក Buffett បានអានសៀវភៅមួយក្បាលដែលនិយាយអំពីការរកប្រាក់បាន1,000ដុល្លារ ហើយលោកក៏បានយល់អំពីសារសំខាន់នៃពេលវេលា។ ក្នុងរយៈពេល5ឆ្នាំ ប្រាក់1,000ដុល្លារដែលមានការប្រាក់10% នឹងកើនដល់1,600ដុល្លារ ហើយបើ10ឆ្នាំនឹងក្លាយជា2,600ដុល្លារ ចំណែក25ឆ្នាំនឹងឡើងដល់10,800ដុល្លារ តែបើ50ឆ្នាំវិញ 1,000ដុល្លារនេះនឹងកើនឡើងដល់ជិត117,400ដុល្លារ។
Alice Schroeder ជាម្ចាស់សៀវភៅ “The Snowball” ដែលសរសេរអំពីលោក Buffett បានឱ្យដឹងថា លោកអាចស្រមៃឃើញថា តួលេខចេះតែកើនឡើងយ៉ាងរស់រវើក ដូចទៅនឹងព្រិលដ៏តូចមួយគ្រាប់ដែលរមៀលឆ្លងកាត់វាលស្មៅ ហើយធំឡើងបន្តិចម្ដងៗទៅតាមពេលវេលា រួចក៏ក្លាយជាដុំព្រិលដ៏ធំ។
ជាការពិត ប្រការនេះមិនងាយស្រួលសម្រាប់មនុស្សធម្មតានោះឡើយ។ គ្រប់គ្នាមាននិន្នាការវាយតម្លៃទាបហួសទៅលើសារសំខាន់នៃកំណើនរួមផ្សំ ហើយវានឹងអាក្រក់ជាងនេះនៅពេលដែលវេលាកាន់តែអូសបន្លាយ ជាមួយនឹងអត្រាការប្រាក់ខ្ពស់ជាងធម្មតា។
មុខរបរដែលអូសបន្លាយពេលដ៏វែងរបស់លោក Buffett ក៏បាននាំមកនូវបទពិសោធន៍មួយទៀត នោះគឺ “ការបត់បែន”។ កាន់តែមានវ័យច្រើន លោក Buffett កាន់តែកាត់បន្ថយការវិនិយោគទៅតាមរបៀបដែលគាត់ធ្លាប់បានធ្វើកន្លងមក។
លោក Warrent Buffett ជាមួយនឹងភរិយាទី2 អ្នកស្រី Astrid Menks
លោក Buffett រកបានប្រាក់ចំណេញច្រើនបំផុតពីរាប់សិបឆ្នាំមុន ក៏ដោយសារការទិញមូលបត្រតូចបំផុតនិងធូរថ្លៃបំផុតដែលគាត់រកបាន។ បច្ចុប្បន្ន ភាគហ៊ុនដែលធំបំផុតរបស់ក្រុមហ៊ុន Berkshire Hathaway នោះគឺភាគហ៊ុននៅក្នុងក្រុមហ៊ុន Apple Inc។ តាមពិត លោក Buffett មិនមែនជាមនុស្សដំបូងគេដែលបានសម្រេចចិត្តក្នុងការទិញមូលបត្ររបស់ Apple នោះទេ តែមនុស្សដែលស្ថិតក្រោមឱវាទរបស់លោកជាអ្នកធ្វើ។ ក៏ប៉ុន្តែ លោក Buffett កាន់តែសកម្មទៅលើខ្ទង់វិនិយោគនេះពីមួយថ្ងៃទៅមួយថ្ងៃ។
បច្ចុប្បន្ន ចំនួនមូលបត្រ Apple ដែលក្រុមហ៊ុនរបស់លោក Buffett កំពុងកាន់កាប់ មានតម្លៃដល់ទៅ123ពាន់លានដុល្លារ ដែលស្មើនឹង24% នៃតម្លៃទីផ្សារសរុបរបស់ក្រុមហ៊ុន Berkshire។
យោងតាមសៀវភៅរបស់ Schroeder នៅមុនពេលឈានចូលដល់វ័យជំទង់ លោក Buffett បានចាប់ផ្ដើមគិតអំពីពេលវេលាទៅតាមគំនិតខុសពីគេ។ តាមរយៈគំនិតនេះ បច្ចុប្បន្ននិងអនាគតគឹជាប់ទាក់ទិននឹងគ្នាយ៉ាងស្អិតល្មួត បង្កើតបានជា “តម្លៃរួមផ្សំ”។ បើសិនជាថ្ងៃនេះ1ដុល្លារ ប៉ុន្មានឆ្នាំក្រោយមកនឹងទៅជា10ដុល្លារមិនខាន។
នៅពេលមានវ័យជិត30ឆ្នាំ វិធីដែលលោក Buffett គិតអំពី “តម្លៃរួមផ្សំ” គឺដូចទៅនឹងការប្រតិកម្មមួយ។ ពេលលោកចំណាយ31,500ដុល្លារសម្រាប់ទិញផ្ទះមួយខ្នងនៅ Omaha គាត់បានហៅការសម្រេចចិត្តនេះថាជា “រឿងឆ្កួតឡប់” របស់ខ្លួន ព្រោះថា នៅក្នុងការគិតរបស់លោក Buffett 31,500ដុល្លារនឹងទៅជា1លានដុល្លារ ក្រោយពីបានគិតទាំង “តម្លៃរួមផ្សំ” ក្នុងពេលអនាគត។
មិត្តភក្តិ និងសមាជិកគ្រួសាររបស់លោក តែងតែបានឮជារឿយៗនូវឃ្លាឃ្លោងមួយចំនួន ដូចជា “តើយើងពិតជាចង់ចំណាយរហូតដល់300,000ដុល្លារដើម្បីកាត់សក់ដែរ ឬអត់?” ឬ “មិនដឹងថា ខ្លួនចង់បោះចោល500,000ដុល្លារទៅតាមវិធីនោះ ឬអត់” នៅពេលពិចារណាក្នុងការសម្រេចចិត្តលើអ្វីមួយដែលទាក់ទងនឹងប្រាក់កាស។ សម្រាប់លោក Buffett ប៉ុន្មានដុល្លារដែលចំណាយចោលនៅថ្ងៃនេះ នឹងក្លាយជារាប់សែនដុល្លារដែលត្រូវបាត់បង់នៅពេលអនាគត។
ក្នុងគ្រាបច្ចុប្បន្ន លោក Warren Buffett នៅតែបន្តបញ្ជាក់ឱ្យគ្រប់គ្នាឃើញថា “ភាពនឹងន និងរឹងមាំ គឺជាថាមពលដ៏កំពូលរបស់អ្នកវិនិយោគ”៕
ប្រភព៖ WSJ

September 4, 2020
កម្ពុជានៅសល់អ្នកជំងឺCOVID-19 តែ2នាក់ទៀតប៉ុណ្ណោះ! តើពួកគេកំពុងនៅទីណា?
គិតមកដល់ព្រឹក ថ្ងៃទី4កញ្ញា2020 កម្ពុជាបានព្យាបាលអ្នកជំងឺCOVID-19 ជាសះស្បើយចំនួន272នាក់ ដែលស្មើនឹង99.27% បើធៀបនឹងចំនួនអ្នកបានឆ្លងវីរុសនេះ។
ក្រសួងសុខាភិបាលកម្ពុជាបានប្រកាសនាព្រឹកនេះថា មានករណីជាសះស្បើយថ្មី1នាក់ទៀតនៅឯមណ្ឌលសុខភាពចក្រអង្រែក្នុងក្រុងភ្នំពេញ ដែលនេះជាអ្នកជំងឺជនជាតិចិន ដែលបានធ្វើដំណើរពីប្រទេសហ្វីលីពីនចូលមកកម្ពុជាកាលពីថ្ងៃទី9សីហា2020។
បច្ចុប្បន្ន កម្ពុជានៅសល់អ្នកជំងឺCOVID-19 ចំនួន2នាក់ទៀតតែប៉ុណ្ណោះ ដែលពួកគេកំពុងទទួលការព្យាបាលនៅមន្ទីរពេទ្យរដ្ឋ ក្នុងនោះមាន1នាក់នៅមន្ទីរពេទ្យមិត្តភាពខ្មែរ-សូវៀត និង1នាក់ទៀតនៅឯបណ្ឌលសុខភាពចាក់អង្រែ ក្នុងទីក្រុងភ្នំពេញ។
រហូតមកដល់ពេលនេះ កម្ពុជាបានរកឃើញអ្នកឆ្លងCOVID-19 សរុប274នាក់ ក្នុងនោះមានអ្នកជំងឺ272នាក់បានជាសះស្បើយ និង2កំពុងទទួលការព្យាបាល។ កម្ពុជាមិនទាន់មានករណីស្លាប់ដោយសារឆ្លងCOVID-19 ដែលត្រូវបានរាយការណ៍ជាផ្លូវការនៅឡើយ។
នៅទូទាំងពិភពលោក គិតមកដល់បច្ចុប្បន្ន មានអ្នកឆ្លងវីរុសCOVID-19 សរុប26,465,221នាក់ ក្នុងនោះមានអ្នកស្លាប់873,108នាក់ និងជាសះស្បើយ18,660,112នាក់។ ចំណែកអ្នកកំពុងទទួលការព្យាបាល មានចំនួន6,932,001នាក់ ក្នុងនោះមានអ្នកជំងឺ60,749នាក់កំពុងប្រឈមនឹងការបាត់បង់ជីវិត៕
September 4, 2020
(វីដេអូ) រ៉ុកកែត Vega ដែលដឹកផ្កាយរណប53គ្រឿង ត្រូវបានបាញ់បង្ហោះទៅកាន់អវកាសដោយជោគជ័យ
ជើងហោះហើរដែលត្រូវបានធ្វើឡើងកាលពីព្រឹកនេះ គឺជាជំហានដ៏ធំមួយបង្ហាញអំពីសមត្ថភាពក្នុងការបាញ់បង្ហោះផ្កាយរណបច្រើនគ្រឿងក្នុងពេលតែមួយរបស់ក្រុមហ៊ុន Arianespace ដែលមានមូលដ្ឋាននៅប្រទេសបារាំង។
រ៉ុកកែតរុញច្រានដែលមាន4ជាន់ ឈ្មោះថា Vega របស់ក្រុមហ៊ុន Arianespace ត្រូវបានបាញ់បង្ហោះនៅវេលាម៉ោង8និង51នាទីព្រឹកថ្ងៃទី3កញ្ញា (ម៉ោងនៅកម្ពុជា) ចេញពីមជ្ឈមណ្ឌលអវកាស Guiana នៅអាម៉េរិកខាងត្បូង ដោយមាននាំទៅជាមួយនូវផ្កាយរណបចំនួន53គ្រឿងរបស់ដៃគូពាណិជ្ជកម្មចំនួន21មកពីប្រទេសចំនួន13 ឡើងទៅកាន់គន្លងតារាវិថីរបស់ផែនដី។
បេសកកម្ម VV16 គឺជាជើងហោះហើរដំបូងរបស់កាំជ្រួចរុញច្រាន Vega រាប់ចាប់ពីតាំងពីករណីបាញ់បង្ហោះដោយបរាជ័យកាលពីថ្ងៃទី10កក្កដា2019 ដែលបានបណ្ដាលឱ្យកាំជ្រួចនិងផ្កាយរណបសង្កេតផែនដី FalconEye1 របស់ UAE បានបាត់ខ្លួន។ មូលហេតុនៃបរាជ័យនេះ ត្រូវបានគេរកឃើញថា ដោយសារបញ្ហាគ្រប់គ្រងកំដៅ។
នៅក្នុងជើងហោះហើរលើកនេះ បញ្ហាខាងលើត្រូវបានដោះស្រាយ ហើយអ្វីៗទាំងអស់ដំណើរបានល្អទៅតាមផែនការដែលបានកំណត់។ ការបាញ់បង្ហោះលើកនេះក៏ជាជំហានថ្មីមួយនៃការចាប់ផ្ដើមនៃឧបករណ៍ពង្រាយផ្កាយរណប SSMS របស់ទីភ្នាក់ងារអវកាសអឺរ៉ុប (ESA) ផងដែរ។
ឧបករណ៍ពង្រាយផ្កាយរណប SSMS លើកនេះ រួមមាន2ផ្នែក ក្នុងនោះ ផ្នែកខាងលើផ្ទុកផ្កាយរណបចំនួន7គ្រឿងដែលមានទម្ងន់ចាប់ពី15-150គីឡូក្រាម និងផ្នែកខាងក្រោមផ្ទុកផ្កាយរណប46គ្រឿង ដែលភាគច្រើនមានទំហំតូច។
ផ្កាយរណបចំនួន53គ្រឿងខាងលើនេះ ត្រូវបានពង្រាយទៅក្នុងគន្លងគោចរនៃភពផែនដី ដោយចំណាយពេល1ម៉ោងនិង45នាទីបន្ទាប់ពីត្រូវបានបាញ់បង្ហោះ។ ផ្កាយរណបទាំងនេះនឹងបំពេញបេសកកម្មផ្សេងៗគ្នា មានដូចជា ការសង្កេតផែនដី ផ្ដល់សេវាកម្មទូរគមនាគមន៍ និងការសាកល្បងផ្នែកបច្ចេកវិទ្យា។ល។
រ៉ុកកែតរុញច្រាន Vega ដែលមានកម្ពស់30ម៉ែត្រនេះ ត្រូវបានផលិតឡើងដើម្បីដឹកផ្កាយរណបដែលមានទម្ងន់មធ្យម និងស្រាល។ នៅមុនពេលជួបបរាជ័យជាលើកដំបូងជាមួយនឹង FalconEye1 រ៉ុកកែត Vega បានហោះហើរដោយជោគជ័យចំនួន14លើកជាប់ៗគ្នា រាប់ចាប់ពីពេលបានបង្ហាញវត្តមានកាលពីខែកុម្ភៈ2012៕
ប្រភព៖ Space
September 3, 2020
លិចកប៉ាល់ដឹកមនុស្ស43នាក់ និងគោជិត6,000ក្បាលនៅកណ្ដាលសមុទ្រ
កងកម្លាំងល្បាតសមុទ្របានរកឃើញជនរងគ្រោះម្នាក់ដែលនៅមានជីវិត ក្រោយពីមានហេតុការណ៍លិចកប៉ាល់ដែលដឹកមនុស្សចំនួន43នាក់ និងគោជិត6,000ក្បាល នៅលើសមុទ្រជប៉ុន។
កប៉ាល់ Gulf Livestock 1 បានបញ្ចេញសញ្ញាសុំឱ្យជួយសង្គ្រោះបន្ទាន់កាលពីវេលាទៀបភ្លឺថ្ងៃទី2កញ្ញា នៅក្នុងតំបន់ដែលមានចម្ងាយពីកោះ Amami Sohima របស់ជប៉ុនប្រមាណជា185គីឡូម៉ែត្រទៅទិសខាងលិច។ នៅវេលាទៀបភ្លឺនោះដែរ កងកម្លាំងល្បាតសមុទ្ររបស់ជប៉ុនបានរកឃើញជនរងគ្រោះម្នាក់នៅមានជីវិត។ ជនរងគ្រោះនេះគឺជាបុរសមានសញ្ជាតិហ្វីលីពីន អាយុ45ឆ្នាំ។
មូលហេតុដំបូងត្រូវបានគេជឿថា ដោយសារម៉ាស៊ីនរបស់កប៉ាល់នេះលែងដំណើរការបាន ហើយកប៉ាល់ក៏ត្រូវរលកសមុទ្រវាយពន្លិចចូលក្នុងទឹកសមុទ្រ។ បច្ចុប្បន្ន គេមិនទាន់ដឹងច្បាស់អំពីសេចក្ដីលម្អិតនៅឡើយ ប៉ុន្តែ ជងរងគ្រោះខាងលើនិយាយថា ខ្លួនមិនបានឃើញជនរងគ្រោះណាម្នាក់នោះឡើយនៅពេលកំពុងរង់ចាំការជួយសង្គ្រោះ។
ទូកកៅស៊ូមួយគ្រឿងត្រូវបានប្រទះឃើញក្នុងតំបន់កើតហេតុ នៅពេលកងកម្លាំងល្បាតសមុទ្រជប៉ុនបានរកឃើញជនរងគ្រោះម្នាក់ខាងលើ ប៉ុន្តែ អាជ្ញាធរជប៉ុនមិនទាន់កំណត់ច្បាស់ថា វាជាប់ទាក់ទិននឹងហេតុការណ៍លិចកប៉ាល់នេះដែរ ឬយ៉ាងណានៅឡើយ៕
ប្រភព៖ AFP
September 3, 2020
លែងលះគ្នាបាន1ឆ្នាំ អតីតភរិយារបស់ម្ចាស់Amazon បានក្លាយជាស្ត្រីដែលមានទ្រព្យច្រើនជាងគេក្នុងពិភពលោក! តែប្រការដែលគួរចាប់អារម្មណ៍ នោះគឺស្ថានភាពរបស់មនុស្សទី3
ត្រឹមតែមួយរយៈពេលខ្លីសោះ អតីតភរិយារបស់លោក Jeff Bezos បានក្លាយជាស្ត្រីដែលមានទ្រព្យសម្បត្តិច្រើនជាគេបង្អស់ក្នុងពិភពលោក ក្រោយពីបានលែងលះ។
យោងតាម Bloomberg កាលពីថ្ងៃទី1កញ្ញា អ្នកស្រី MacKenzie Scott បានក្លាយជាស្ត្រីដែលមានប្រាក់ច្រើនជាងគេបំផុតក្នុងពិភពលោក ដោយមានទ្រព្យសរុបឡើងដល់66.4ពាន់លានដុល្លារ ដែលស្មើនឹង 273,168,403,000,000រៀល (ជាង273លានលានរៀល)។
ទ្រព្យសម្បត្តិនៃអតីតភរិយារបស់លោក Jeff Bezos បានកើនឡើងច្រើនជាងទ្រព្យរបស់អ្នកស្នងតំណែងនៃក្រុមហ៊ុន L’Oreal SA គឺអ្នកស្រី Francoise Bettencourt Meyers ហើយក៏បានឡើងកាន់កាប់តំណែងលេខ1នេះ ដោយប្រើពេលត្រឹមតែ1ឆ្នាំគត់។
អ្នកស្រី MacKenzie Scott អតីតភរិយារបស់លោក Bezos
អ្នកស្រី MacKenzie Scott បច្ចុប្បន្នគឺជាអ្នកនិពន្ធប្រលោមលោក និងជាសប្បុរសជនជនជាតិអាមេរិកាំង។ អ្នកស្រីត្រូវបានគេស្គាល់ច្រើនបន្ទាប់ពីករណីលែងលះជាមួយនឹងលោក Jeff Bezos ដែលជាកំពូលមហាសេដ្ឋីលំដាប់ទី1ក្នុងពិភពលោក។ អ្នកស្រី MacKenzie Scott ត្រូវបានគេស្ងើចសរសើរថា ជាស្ត្រីដែលមានសុជីវធម៌ខ្ពស់ និងឆ្លាតវៃនៅក្នុងការលែងលះ។
នៅក្នុងកិច្ចព្រមព្រៀងលែងលះគ្នា អ្នកស្រី MacKenzie សម្រេចរក្សាទុកភាគហ៊ុនចំនួន25% នៅក្នុងក្រុមហ៊ុន Amazon ដែលអ្នកទាំង2កាន់កាប់រួមគ្នា ហើយប្រគល់ភាគហ៊ុនទាំងអស់របស់អ្នកស្រីដែលមាននៅក្នុងទីភ្នាក់ងារសារព័ត៌មាន Washington Post និង Blue Origin ទៅឱ្យអតីតស្វាមី។
ការជ្រើសរើសរបស់អ្នកស្រី ធ្លាប់បានធ្វើឱ្យមានមតិមិនយល់ស្របជាច្រើន ដោយគិតថា អ្នកស្រីគួរតែទទួលបានអ្វីៗច្រើនជាងនេះ ព្រោះថា អ្នកស្រីបានចំណាយកម្លាំងកាយ ចិត្ត និងពេលវេលា25ឆ្នាំសម្រាប់រស់នៅជាមួយអតីតស្វាមី។ ប៉ុន្តែ ក្រោយរយៈពេលលែងលះគ្នាបាន1ឆ្នាំ ពេលនេះទើបគ្រប់គ្នាទទួលស្គាល់ថា ការជ្រើសរើសរបស់អ្នកស្រីពិតជាត្រឹមត្រូវ។
ដោយសារការរីកចម្រើនយ៉ាងខ្លាំងក្លារបស់ Amazon អតីតភរិយារបស់មហាសេដ្ឋី Jeff Bezos បានក្លាយជាមហាសេដ្ឋិនីដែលជាស្ត្រីមានទ្រព្យច្រើនជាងគេបង្អស់ក្នុងពិភពលោក។
អ្នកស្រី MacKenzie Scott (ឆ្វេងបង្អស់) អ្នកស្រី Lauren Sanchez (កណ្ដាល) និងលោក Bezos
កាលពីពេលថ្មីៗនេះ អ្នកស្រី MacKenzie ក៏បានប្រកាសថា អ្នកស្រីបានចូលរួមចំណែកក្នុងការផ្ដល់ប្រាក់ឧបត្ថម្ភដល់អង្គការមនុស្សធម៌នានាក្នុងទំហំទឹកប្រាក់ឡើងដល់1.7ពាន់លានដុល្លារអាមេរិក។ សកម្មភាពនេះរបស់អ្នកស្រី ទទួលបានការគាំទ្រ និងកោតសរសើរជាខ្លាំងពីសាធារណជន។
ចំណែកឯអ្នកស្រី Lauren Sanchez ជា “មនុស្សទី3” និងជាស្ត្រីដែលធ្លាប់ត្រូវបានរិះគន់យ៉ាងចាស់ដៃពីសាធារណជន ទាក់ទិននឹងរឿងរ៉ាវស្នេហ៍ត្រីកោណនេះ រហូតមកដល់ពេលបច្ចុប្បន្ននៅតែ “ស្ងាត់ស្ងៀម” ដដែល។
ចាប់តាំងពីដើមឆ្នាំរហូតមកដល់បច្ចុប្បន្ន គូស្នេហ៍របស់មហាសេដ្ឋី Jeff Bezos មិនដែលបានបង្ហាញខ្លួននៅលើសារព័ត៌មាននោះទេ ខណៈដែលលោក Bezos បង្ហាញវត្តមានតែម្នាក់ឯងនៅក្នុងព្រឹត្តិការណ៍មួយចំនួន។
អ្នកស្រី Lauren Sanchez
មានមតិជាច្រើនសង្ស័យអំពីទំនាក់ទំនងស្នេហាលួចលាក់ដែលធ្លាប់ធ្វើឱ្យក្រុមអ្នកសារព័ត៌មានចំណាយទឹកប៊ិចអស់ច្រើនសន្ធឹកនេះ ស្របពេលដែលករណីប្ដឹងផ្ដល់រវាងបងប្រុសរបស់អ្នកស្រី Lauren Sanchez ជាមួយនឹងលោក Bezos ទាក់ទិននឹងរឿងបង្ហើបឱ្យក្រុមអ្នកសារព័ត៌មានដឹងអំពីភស្តុតាងបញ្ជាក់ទៅលើបញ្ហាទាក់ទងគ្នាលួចលាក់រវាងលោក Jeff Bezos និងអ្នកស្រី Lauren Sanchez ដែលមកដល់ពេលនេះ មិនទាន់បានបញ្ចប់នៅឡើយ។
បងប្រុសរបស់អ្នកស្រី Lauren Sanchez ធ្លាប់បានអះអាងថាប្អូនស្រីរបស់ខ្លួនចូលមកក្នុងជីវិតរបស់ស្ថាបនិកនៃក្រុមហ៊ុន Amazon គឺពិតជាមានគោលបំណង៕
ប្រភព៖ Bloomberg,CNN
September 3, 2020
កូរ៉េខាងជើង បញ្ជាឱ្យបាញ់សម្លាប់ចោលទាំងអស់ អ្នកណាដែលចូលមកជិតព្រំដែនចម្ងាយ 1គ.ម៉ ដើម្បីទប់ស្កាត់កូវីដ-19 ចូលប្រទេស
កាលពីថ្ងៃទី1 ខែកញ្ញា Radio Free Asia បានរាយការណ៍ថា កូរ៉េខាងជើង បានបញ្ជាឱ្យទាហាន និងប៉ូលិសបាញ់ភ្លាមៗទៅលើអ្នកណាក៏ដោយ ដែលស្ថិតនៅក្បែរព្រំដែនកូរ៉េខាងជើង និងចិនក្នុងរយៈចម្ងាយ 1គីឡូម៉ែត្រ ដើម្បីបញ្ឈប់ការឆ្លងរាលដាលរបស់មេរោគកូវីដ-19។
ប្រភពព័ត៌មានរដ្ឋបាលកូរ៉េខាងជើង បានដឹងវិធានការដ៏ម៉ឹងម៉ាត់ថ្មីនេះមិនដល់ 1ថ្ងៃផង មុននឹងបទបញ្ជានេះត្រូវបានដាក់ឱ្យប្រើ កាលពីកណ្ដាលអធ្រាត្រនៃថ្ងៃព្រហស្បតិ៍ ទី27សីហា។ ប៉ូលិសនៅក្នុងតំបន់ហាំយ៉ង់ខាងជើង ភាគខាងកើតឆៀងខាងជើង បានបញ្ជាក់ថា ខ្លួននឹងបាញ់សម្លាប់មនុស្សគ្រប់រូបដែលស្ថិតក្បែរព្រំដែនក្នុងរយៈចម្ងាយដូចខាងលើ មិនថាអ្នកទាំងនោះ នៅត្រង់នោះដោយមូលហេតុអ្វីក៏ដោយ។
រដ្ឋបាលកូរ៉េខាងជើងកំពុងបញ្ជូនគ្រាប់កាំភ្លើងទៅគាំទ្រប៉ូលិសព្រំដែន ហើយប្រភពព័ត៌មាន បានបញ្ជាក់ទៀតថា នឹងមិនចាំបាច់មានអ្នកណាត្រូវទទួលខុសត្រូវ លើការបាញ់សម្លាប់មនុស្សក្នុងរយៈចម្ងាយខាងលើនៅតាមព្រំដែននោះឡើយ។
កូរ៉េខាងជើង ថែមទាំងបានដាក់បទបញ្ជាឱ្យប្រើគោលការណ៍ទាំងនោះនៅតាមបណ្ដោយព្រំដែនទាំងអស់ប្រវែង 1,287គីឡូម៉ែត្រទៀតផង ដើម្បីព្យាយាមការពារការឆ្លងរាលដាលនៃមេរោគកូវីដ-19 ពីអ្នកផ្ទុកមេរោគដែលមកពីប្រទេសចិន និងបញ្ជាឱ្យប្រើវិធានការនេះ រហូតទាល់តែការឆ្លងរាលដាលដ៏ធំនេះបាត់អស់ទៅវិញ។
ទោះជាចិន និងកូរ៉េខាងជើង បានបញ្ជាឱ្យបិទព្រំដែន និងផ្អាកការធ្វើពាណិជ្ជកម្មរវាងគ្នាក្ដី តែក៏នៅតែមានការឆ្លងព្រំដែនទៅ-មកដដែល ដោយសារតែកូរ៉េខាងជើងត្រូវពឹងអាស្រ័យលើទំនិញនាំចូលរត់ពន្ធ ដែលយកមកពីប្រទេសចិន រហូតដល់លោក គីម ជុងអ៊ុន មេដឹកនាំខ្ពស់បំផុតរបស់ប្រទេសមួយនេះ ខឹងសម្បាយ៉ាងខ្លាំង និងបានរំលាយអង្គភាពយោធាដែលទទួលខុសត្រូវព្រំដែន ត្រង់ចំណុចដែលមានជនភៀសខ្លួនលបលួចរត់គេចចេញទៅ និងត្រឡប់ចូលមកកូរ៉េខាងជើងវិញដោយមិនត្រូវបានចាប់ខ្លួន។
ទាហានក្នុងកងកម្លាំងពិសេស ត្រូវបានបញ្ជូនទៅជួយអន្តរាគមន៍ តែការងារចម្បង គឺទៅពិនិត្យមើលការទុច្ចរិត ក្រោយពីមានរបាយការណ៍ថា មានអ្នកលបលួចរត់ពន្ធទំនិញ បានសូកលុយទាហានព្រំដែន ដើម្បីឱ្យបំបិទភ្នែក ធ្វើមិនដឹងមិនឮពីការលបលួចនាំយកទំនិញរត់ពន្ធឆ្លងព្រំដែនរបស់ពួកគេ។
ប្រភពព័ត៌មានបានបញ្ជាក់ថា បទបញ្ជាបន្ទាន់ខាងលើ បានកំណត់ឱ្យកងទាហានដែលប្រតិបត្តិតួនាទីការពារព្រំដែន បោះចោលគ្រាប់កាំភ្លើងគ្មានក្បាលគ្រាប់ តែឱ្យដាក់តាមខ្លួននូវគ្រាប់កាំភ្លើងពិត ដោយរដ្ឋបាលបានបញ្ជូនកងកម្លាំងពិសេស ដែលមានឈ្មោះល្បីល្បាញ ទៅប្រចាំការនៅតាមបណ្ដោយព្រំដែន ដើម្បីការពារព្រំដែន និងអនុវត្តតាមបទបញ្ជាខាងលើ ទោះជាអ្នកទៅក្បែរព្រំដែននោះ ជាអ្នកណាក៏ដោយ។
ប្រទេសកូរ៉េខាងជើង បានអះអាងថា ខ្លួនជាប្រទេសតែមួយគត់នៅក្នុងពិភពលោកដែលគ្មានមេរោគវីរុសកូរ៉ូណាប្រភេទថ្មី2019 គ្មានរបាយការណ៍អ្នកឆ្លងមេរោគ សូម្បីតែម្នាក់ និងច្បាស់លាស់ម៉ឺងម៉ាត់យ៉ាងខ្លាំងជាមួយការរក្សាស្ថានភាពនេះ ក្រោមការសង្ស័យយ៉ាងទូលំទូលាយថា មានការលាក់បាំងព័ត៌មានពិត។
កាលពីពេលថ្មីៗនេះ ជនជាតិកូរ៉េខាងជើង បានទទួលការផ្ដល់ដំណឹងថា សត្រូវកំពុងព្យាយាមជ្រៀតព្រំដែនចូលមក ដោយការបញ្ជូនមេរោគវីរុសឆ្លងព្រំដែន ខណៈដែលអាជ្ញាធរ បានបញ្ជាក់ពីភាពចាំបាច់ក្នុងការសាងការយល់ដឹង និងសាងប្រព័ន្ធរាយការណ៍អំពីទង្វើ ឬកិច្ចការងារណាដែលខុសប្រក្រតីនៅជិតទីតាំងដែលចិន និងកូរ៉េខាងជើងប្រសព្វគ្នា។
ប្រភពព័ត៌មានផ្ទៃក្នុង បានឱ្យដឹងថា មន្ត្រីសុខាភិបាលជើងចាស់កូរ៉េខាងជើង ត្រូវបានបណ្ដេញចេញ ដោយសារតែមិនអាចទប់ស្កាត់វីរុសបាន ក្រោយពីមានរបាយការណ៍ថា វីរុសបានចម្លងសាយភាយនៅក្នុងតំបន់ 3ផ្នែករបស់កូរ៉េខាងជើង រួមទាំងទីក្រុងធំៗផង ហើយទីក្រុងឃែសុង ត្រូវបានបិទទាំងស្រុង កាលពីខែកក្កដា ដោយសារតែខ្លាចការឆ្លងរាលដាល៕
ប្រភព៖ សារព័ត៌មានបរទេស
September 3, 2020
Li Ka-shing នៅតែជាអ្នកមានជាងគេនៅហុងកុង ដោយសារតែZoom
ភាគហ៊ុននៅក្នុង Zoom ដែលជាក្រុមហ៊ុនបច្ចេកវិទ្យាមួយកំពុងទទួលបានជោគជ័យនាឆ្នាំនេះ បច្ចុប្បន្នស្មើនឹង1/3នៃទ្រព្យសរុប32.6ពាន់លានដុល្លាររបស់លោក Li Ka-shing ដែលជាកំពូលអ្នកមានលំដាប់ទី1នៅទីក្រុងហុងកុង។
ការរកស៊ីរបស់លោក Li Ka-shing ប្រហែលជាកំពុងជួបការលំបាកខ្លាំង ប៉ុន្តែ លោកនៅតែរក្សាបានតំណែងជាអ្នកមានជាងគេបង្អស់របស់ហុងកុង។ ប្រការនេះ ភាគច្រើនគឺដោយសារការវិនិយោគយ៉ាងឆាប់រហ័សទៅលើក្រុមហ៊ុន Zoom និង Solina Chau ដែលជាមិត្តយូរឆ្នាំ និងជាសហស្ថាបនិករបស់ Horizons Ventures ជាអ្នកគ្រប់គ្រងការវិនិយោគឱ្យលោក Li Ka-shing។
Li Ka-shing បានវិនិយោគទៅលើកម្មវិធីប្រជុំតាមរយៈវីដេអូអនឡាញ (Zoom) ចាប់ពីឆ្នាំ2013។ មហាសេដ្ឋីវ័យ92ឆ្នាំរូបនេះ កំពុងកាន់កាប់ភាគហ៊ុនចំនួន8.5% នៅក្នុងក្រុមហ៊ុន Zoom ដែលភាគហ៊ុននេះមានតម្លៃ11ពាន់លានដុល្លារអាមេរិក ស្មើនឹង1/3នៃទ្រព្យសរុបរបស់លោក។
ក្រុមហ៊ុន Zoom ទទួលបានជោគជ័យក្នុងឆ្នាំនេះ នៅពេល COVID-19 ធ្វើឱ្យគ្រប់គ្នាត្រូវប្រជុំ ឬសិក្សាតាមអនឡាញ។ កាលពីថ្ងៃចន្ទកន្លងទៅ ក្រុមហ៊ុននេះបានប្រកាសថា ចំណូលរបស់ក្រុមហ៊ុនបានកើនឡើង355% ក្នុងអំឡុងចាប់ពីខែឧសភាដល់ខែកក្កដា។ នេះគឺជាក្រុមហ៊ុនដែលមានលទ្ធផលនៃការរកស៊ីល្អជាងគេលំដាប់ទី2 នៅក្នុងក្រុម Nasdaq 100 Index កាលពីត្រីមានកន្លង។
មូលបត្ររបស់ Zoom បានកើនឡើង41% នៅក្នុងការជួញដូរកាលពីម្សិលមិញ (2កញ្ញា) ដែលប្រការនេះបានជួយឱ្យទ្រព្យសម្បត្តិរបស់លោក Li Ka-shing កើនឡើង3.2ពាន់លានដុល្លារបន្ថែមទៀត ដោយប្រើពេលត្រឹមតែ1ថ្ងៃប៉ុណ្ណោះ។
យោងតាម Bloomberg Billionaires Index លោក Li Ka-shing កំពុងកាន់កាប់ទ្រព្យសម្បត្តិដែលមានតម្លៃ32.6ពាន់លានដុល្លារអាមេរិក។ កាលពីឆ្នាំទៅ នៅពេលដែល Zoom ទើបតែចូលរួមក្នុងផ្សារហ៊ុន (IPO) ភាគហ៊ុនរបស់កំពូលមហាសេដ្ឋីហុងកុងនៅក្នុងក្រុមហ៊ុននេះ មានតម្លៃត្រឹមតែ850លានដុល្លារអាមេរិកប៉ុណ្ណោះ។
ផ្ទុយពីនេះ បណ្ដាក្រុមហ៊ុនផ្សេងៗរបស់លោក Li Ka-shing ដូចជា CK Hutchison Holding និង CK Asset Holdings កំពុងតែជួបការលំបាកខ្លាំងដោយសារតែCOVID-19 និងបាតុកម្មនៅហុងកុង។ មូលបត្ររបស់ក្រុមហ៊ុនទាំង2ខាងលើ បានថយចុះជាង25%នៅក្នុងឆ្នាំនេះ ខណៈដែលលោក Li Ka-shing កំពុងរកវិធីដើម្បីកាត់បន្ថយទំហំ ក៏ដូចជាកាត់បន្ថយការចំណាយរបស់ក្រុមហ៊ុន។
ក្រោយពីបានប្រកាសថា ទទួលបានចំណេញ29%កាលពីពាក់កណ្ដាលដើមឆ្នាំ CK Hutchison ក៏បានប្រមានថា ប្រាក់ចំណូលនឹងអាចបន្តធ្លាក់ចុះសម្រាប់វិស័យសំខាន់ៗរបស់ក្រុមហ៊ុន មានដូចជាកំពង់ផែសមុទ្រ និងការលក់រាយជាដើម នៅក្នុងឆមាសចុងក្រោយនៃឆ្នាំនេះ។ ចំណែកប្រាក់ចំណូលរបស់ CK Asset វិញ បានថយចុះ58% នៅក្នុងពាក់កណ្ដាលដើមឆ្នាំ2020នេះផងដែរ៕
ប្រភព៖ Bloomberg
September 3, 2020