Author: សឿន សំណាង

យន្តហោះចម្បាំង និងយន្តហោះដឹកគ្រឿងសព្វាវុធជាច្រើនគ្រឿងរបស់ទីក្រុងប៉េកាំង បានហោះទៅក្បែរកោះតៃវ៉ាន់ បន្ទាប់ពីកោះនេះបាញ់សាកល្បងកាំជ្រួចថ្មី។

កងទ័ពរំដោះប្រជាជនចិន (PLA) បានបញ្ជូនយន្តហោះចម្បាំង Su-30 និង J-10 រួមនឹងយន្តហោះដឹកគ្រឿងអាវុធ Y-8 ជាច្រើនគ្រឿងទៅកាន់តំបន់កំណត់អត្តសញ្ញាណការពារដែនអាកាស (ADIZ) នៅភាគនិរតីនៃកោះតៃវ៉ាន់។ ព័ត៌មាននេះត្រូវបានប្រកាសឱ្យដឹងពីអង្គភាពការពារជាតិរបស់កោះតៃវ៉ាន់ កាលពីថ្ងៃទី9 និងទី10 ខែកញ្ញា។

កងទ័ពការពារដែនអាកាសរបស់កោះតៃវ៉ាន់ បានបញ្ជូនយន្តហោះចម្បាំងជាច្រើនគ្រឿងទៅរារាំង និងបណ្ដេញយន្តហោះចិនឱ្យចាកចេញ្ពីតំបន់ ADIZ របស់កោះនេះ។

អង្គភាពការពារជាតិរបស់តៃវ៉ាន់បានសម្ដែងការព្រួយបារម្ភយ៉ាងខ្លាំងចំពោះសកម្មភាពរបស់យន្តហោះចម្បាំងចិន និងបានចោទទីក្រុងប៉េកាំងថា បាន “ធ្វើសកម្មភាពជាឯកតោភាគី” និង “បំផ្លាញសន្តិភាព ស្ថិរភាពក្នុងតំបន់”។

ចំណែកភាគីខាងក្រសួងការពារជាតិចិនឯណោះវិញ មិនទាន់មានប្រតិកម្មណាមួយចំពោះព័ត៌មានដែលប្រកាសដោយភាគីតៃវ៉ាន់នៅឡើយ។ ប៉ុន្តែ កន្លងមក ទីក្រុងប៉េកាំងធ្លាប់បានប្រកាសជាច្រើនលើកហើយថា ខ្លួននឹងបញ្ជូនយន្តហោះទៅក្បែរកោះតៃវ៉ាន់ដើម្បី “ការពារអធិបតេយ្យជាតិ”។

សារព័ត៌មានតៃវ៉ាន់បានចុះផ្សាយថា យន្តហោះចម្បាំងរបស់ PLA បានហោះក្បែរតំបន់ភាគនិរតីនៃកោះនេះ យ៉ាងតិច24លើក នៅលើកម្ពស់ចាប់ពី1,500-9,000ម៉ែត្រ ចន្លោះពីម៉ោង7និង7នាទី ទៅម៉ោង9និង30នាទីនៃថ្ងៃទី9កញ្ញា។ សកម្មភាពនេះត្រូវបានធ្វើឡើងភ្លាមៗ បន្ទាប់ពីកោះតៃវ៉ាន់បាញ់សាកល្បងកាំជ្រួចថ្មីដែលមិនទាន់ស្គាល់អត្តសញ្ញាណ នៅវេលាចន្លោះពីម៉ោង5ដល់ម៉ោង7ក្នុងថ្ងៃទី9កញ្ញា។

កោះតៃវ៉ាន់បានប្រកាសថា នឹងបាញ់សាកល្បងកាំជ្រួចជាបន្តបន្ទាប់ទៀតនៅលើលម្ហសមុទ្រភាគខាងត្បូង ភាគខាងកើត និងភាគឦសាននៃកោះនេះ។ យ៉ាងណាក៏ដោយ ទីក្រុងតៃប៉ិ មិនបានបង្ហើបឱ្យដឹងលម្អិតអំពីការបាញ់សាកល្បងអាវុធនេះទេ។

សារព័ត៌មានតៃវ៉ាន់យល់ថា សកម្មភាពរបស់ PLA គឺមានបំណងប្រមូលព័ត៌មានចារកម្មទាក់ទិននឹងការបាញ់សាកល្បងអាវុធនានារបស់កោះតៃវ៉ាន់ ខណៈ Chieh Chung ដែលជាអ្នកជំនាញផ្នែកការពារជាតិនៅទីក្រុងតៃប៉ិ បានអះអាងថា នេះគឺជា “សកម្មភាពបង្ហាញកម្លាំង” របស់ PLA។

ប្រទេសចិន ចាត់ទុកកោះតៃវ៉ាន់ថាជាផ្នែកមួយនៃទឹកដីរបស់ខ្លួន និងត្រៀមខ្លួនជានិច្ចសម្រាប់ការបង្រួបបង្រួមទឹកដីនាពេលខាងមុខ ទោះជាត្រូវប្រើកម្លាំងបាយក៏ដោយ បើសិនជាចាំបាច់។ ប្រទេសចិន ថ្មីៗនេះក៏បានបង្កើនសម្ពាធទៅលើកោះតៃវ៉ាន់ជាបន្តបន្ទាប់ ដោយការធ្វើលំហាត់សមយុទ្ធយោធាទ្រង់ទ្រាយធំនៅក្បែរៗកោះតៃវ៉ាន់ ជាមួយនឹងគ្រឿងសព្វាវុធទំនើបៗបំផុតក្នុងជួរកងទ័ពរបស់ប្រទេសនេះ៕

ប្រភព៖ SCMP, Reuters

លោកប្រធានាធិបតីសហរដ្ឋអាមេរិក ដូណាល់ ត្រាំ បានសារភាពកាលពីខែកុម្ភៈថា លោកបានដឹងពីភាពធ្ងន់ធ្ងរ និងការឆ្លងរាលដាលបានយ៉ាងងាយ របស់មេរោគវីរុសកូរ៉ូណាប្រភេទថ្មី ឬកូវីដ-19 តែមិនព្រមបញ្ជូនសារនេះទៅដល់ប្រជាជនអាមេរិកទេ ព្រោះលោកមិនត្រូវការបង្កភាពភ័យភ្ញាក់ផ្អើល។ នេះបើយោងតាមសៀវភៅទើបតែបោះពុម្ពផ្សាយថ្មីមួយ ដែលអះអាងពីបទសម្ភាសរបស់លោកត្រាំ។

កំណត់ត្រាកិច្ចសម្ភាសន៍ ដែលខាង CNN ទទួលបាន និងសៀវភៅថ្មី “Rage” របស់អ្នកឆ្លើយឆ្លងព័ត៌មាន បប់ វូដវើដ ត្រូវបានផ្សព្វផ្សាយចេញមក មិនប៉ុន្មានសប្ដាហ៍ មុននឹងដល់ថ្ងៃបោះឆ្នោតជ្រើសតាំងប្រធានាធិបតី នៅថ្ងៃទី3 វិច្ឆិកា 2020។ ក្នុងពេលជាមួយគ្នា វាថែមទាំងត្រូវបានផ្សព្វផ្សាយចេញមកខណៈពេលដែលក្ដីព្យាយាមក្នុងការតស៊ូប្រឆាំងនឹងមេរោគកូវីដ-19 របស់លោកត្រាំ កំពុងត្រូវរងការរិះគន់យ៉ាងខ្លាំងថា តិចតួចពេក និងយឺតពេលទៅហើយ។

លោក ដូណាល់ ត្រាំ បេក្ខភាពមកពីគណបក្សសាធារណរដ្ឋ ក្នុងការដណ្ដើមកៅអីប្រធានាធិបតី បានបដិសេធភាពធ្ងន់ធ្ងររបស់មេរោគកូវីដ-19 អស់ជាច្រើនខែមកហើយ ទោះជាមេរោគមរណៈនេះកំពុងឆ្លងរាលដាលយ៉ាងឆាប់រហ័សទូទាំងប្រទេស រហូតដល់ត្រូវលោក ចូ បៃឌិន បេក្ខភាពមកពីគណបក្សដេម៉ូក្រេត វាយប្រហាររដ្ឋបាលរបស់លោកត្រាំថា ឆ្លើយតបនឹងការឆ្លងរាលដាលរបស់មេរោគកូវីដ-19 យឺតយ៉ាវជ្រុលពេក។

លោកត្រាំ បានប្រាប់ទៅលោក វូដវើដ កាលពីថ្ងៃទី19 មីនា ឬមិនប៉ុន្មានថ្ងៃក្រោយលោកប្រកាសស្ថានការណ៍គ្រាអាសន្នកម្រិតជាតិថា “ខ្ញុំត្រូវការបដិសេធភាពធ្ងន់ធ្ងររបស់វា ខ្ញុំបដិសេធភាពធ្ងន់ធ្ងររបស់វា ព្រោះថា ខ្ញុំមិនត្រូវការសាងភាពភ័យភ្ញាក់ផ្អើល”

ក្នុងអំឡុងកិច្ចសន្ទនា លោកត្រាំថែមទាំងបានប្រាប់ទៅលោកវូដវើដទៀតផងថា មានចំណុចជាក់ច្បាស់ដ៏គួរឱ្យភ្ញាក់ផ្អើលម្យ៉ាង ដែលទើបតែបង្ហាញខ្លួនឡើង ពាក់ព័ន្ធនឹងមុខសញ្ញារបស់មេរោគវីរុស។ “វាមិនមែនត្រឹមតែមនុស្សចាស់ជរាប៉ុណ្ណោះទេ តែរួមទាំងមនុស្សវ័យកំលោះក្រមុំទៀតផង ហើយយើងមានមនុស្សវ័យកំលោះក្រមុំច្រើនណាស់”។

លោកប្រធានាធិបតី ត្រាំ កាលពីថ្ងៃពុធ(ទី9កញ្ញា) បានការពារដំណើរផ្លូវរបស់ខ្លួនឯងក្នុងការទប់ទល់នឹងជំងឺឆ្លងរាលដាលដ៏ធំនេះ ដែលរហូតមកដល់ពេលនេះ បានសម្លាប់ជីវិតមនុស្សនៅក្នុងសហរដ្ឋអាមេរិកអស់ជាង 190,000នាក់ទៅហើយ និងរកឃើញចំនួនអ្នកឆ្លងមេរោគថ្មីកើនឡើងយ៉ាងច្រើននៅភាគខាងលិចរបស់ប្រទេស។

លោកត្រាំ ថ្លែងនៅក្នុងការធ្វើកិច្ចការងារមួយនៅមន្ទីរសេតវិមានថា “ចំណុចជាក់ច្បាស់គឺ ខ្ញុំជាអ្នកដឹកនាំការសាទររបស់ប្រទេសមួយនេះ ខ្ញុំស្រឡាញ់ប្រទេសរបស់យើង ហើយខ្ញុំមិនត្រូវការឱ្យប្រជាជនភ័យភ្ញាក់ផ្អើលទេ យើងទាំងអស់គ្នា ធ្វើបានល្អហើយ មិនថាតាមស្តង់ដាណាក៏ដោយ”

CNN និង Washinton Post បានរាយការណ៍ថា តាមរយៈពាក្យសម្ភាសន៍ជាមួយលោកវូដវើដ លោកត្រាំបានដឹងរឿងពាក់ព័ន្ធនឹងកូវីដ-19 ជាពិសេស ភាពកាចសាហាវរបស់វា តាំងពីអំឡុងដើមខែកុម្ភៈ។ “វាបំភាយមេរោគតាមរយៈខ្យល់អាកាស” លោកត្រាំ ថ្លែងក្នុងអំឡុងកិច្ចសម្ភាសន៍កាលពីថ្ងៃទី7កុម្ភៈ។

“ការសាយភាយមេរោគទាំងនោះ ធ្ងន់ធ្ងរជាងការប៉ះពាល់ដោយផ្ទាល់ទៅទៀត លោកអ្នកមិនចាំបាច់ប៉ះពាល់វត្ថុផ្សេងៗទេ មែនទេ? តែជាមួយខ្យល់អាកាស លោកអ្នកគ្រាន់តែដកដង្ហើមចូលទៅប៉ុណ្ណោះ ហើយអាហ្នឹងឯង គឺវិធីចម្លងមេរោគរបស់វា ដូច្នេះទើបវាជាមេរោគវីរុសដែលមានល្បិចកលច្រើនណាស់ ជាវីរុសដែលស្មុគស្មាញ និងវាថែមទាំងជាវីរុសដែលកាចសាហាវជាងគេ ទោះជាលោកអ្នករឹងមាំក៏ដោយ”។

យ៉ាងណាក៏ដោយ 1សប្ដាហ៍បន្ទាប់ពីការផ្ដល់សម្ភាស លោកត្រាំបានថ្លែងក្នុងអំឡុងពេលថ្លែងការណ៍សរុបនៅមន្ទីរសេតវិមានថា ចំនួនករណីអ្នកឆ្លងមេរោគវីរុសកូរ៉ូណាប្រភេទថ្មីនៅក្នុងសហរដ្ឋអាមេរិក នឹងថយចុះឆ្ពោះទៅរកកម្រិតក្បែរសូន្យក្នុងអំឡុង 2សប្ដាហ៍ទៀត។

លោកវូដវើដ បានធ្វើការសម្ភាសលោកដូណាល់ ត្រាំ ចំនួន 18លើក ដើម្បីរួបរួមចងក្រងជាសៀវភៅ ដែលមានកំណត់ចេញផ្សព្វផ្សាយនៅថ្ងៃទី15 កញ្ញា។

ចំណែកការបកអាក្រាតផ្សេងៗទៀតនៅក្នុងសៀវភៅ ក្នុងនោះរួមមានទាំងពាក្យសម្ដីដែលមើលងាយ មើលថោកបណ្ដាមេដឹកនាំកងទ័ពសហរដ្ឋអាមេរិករបស់លោកត្រាំ ខណៈដែលសប្ដាហ៍នេះ លោកត្រាំ ទើបតែត្រូវរងការរិះគន់យ៉ាងធ្ងន់ធ្ងរ ក្រោយមានរបាយការណ៍ព័ត៌មានថា លោកបានប្រមាថមើលងាយកិត្តិយសរបស់ធនធានមនុស្សខាងយោធា និងអតីតយុទ្ធជនដែលបានស្លាប់ទៅហើយផង៕

ប្រភព៖ សារព័ត៌មានបរទេស

វីដេអូបង្ហាញអំពីសកម្មភាពនៃទាហានឥណ្ឌា និងទាហានចិន ប៉ះទង្គិចគ្នានៅជិតទន្លេក្បែរព្រំដែន ទំនងជាត្រូវបានថតកាលពីប៉ុន្មានខែមុន ហើយបច្ចុប្បន្នកំពុងត្រូវបានចែករំលែកតៗគ្នាក្នុងបណ្ដាញសង្គមនៅប្រទេសចិន។

វីដេអូនេះបានបង្ហាញថា ការប៉ះទង្គិចដោយការប្រើដៃ ជើង និងដំបងនេះ បានកើតឡើងនៅលើគំនរថ្មក្បែរទន្លេ និង​ប្រហែល​ជា​នៅលើបន្ទាត់ព្រំដែនគ្រប់គ្រងជាក់ស្ដែង (LAC) ដែលជា​តំបន់​មិនទាន់ត្រូវបានកំណត់ច្បាស់លាស់។ ក៏ប៉ុន្តែ គេនៅមិនទាន់បានដឹងថា ហេតុការណ៍ក្នុងវីដេអូនេះ កើតឡើងនៅទីណា និងពេលណាឱ្យបានប្រាកដនៅ​ឡើយ។

នៅក្នុងវីដេអូនេះ ក្រុមទាហានចិនដែលមានកាន់ដំបង និងខែលការពារ ព្រមទាំងមានគ្នា​ច្រើន​ផងនោះ បានរុញច្រានក្រុមទាហានឥណ្ឌា បណ្ដាលឱ្យពួកគេត្រូវថយក្រោយ ក្នុងនោះមានអ្នកខ្លះត្រូវបានច្រានទម្លាក់ចូលក្នុងទន្លេទៀតផង។ ទាហានឥណ្ឌាមួយចំនួន ស្ពាយកាំភ្លើងពីក្រោយខ្នង ប៉ុន្តែមិនបានប្រើប្រាស់ទេ។ រូបសញ្ញានៅក្នុងវីដេអូនេះបង្ហាញថា វាត្រូវបានថតដោយទូរស័ព្ទចិន។

ភាគីខាងឥណ្ឌា និងចិន មិនទាន់បញ្ចេញយោបល់អ្វីទាក់​ទិន​នឹង​​វីដេអូនេះខាងលើ​នេះ​នៅឡើយ។

ប្រភពព័ត៌មានពីយោធាចិនបានឱ្យដឹងថា វីដេអូខាងលើនេះ ត្រូវបានបង្ហោះលើបណ្ដាញសង្គមចិនកាលពីថ្ងៃទី8កញ្ញា និងត្រូវបានថតកាលពីប៉ុន្មានខែមុនមកម៉្លេះ​។ អ្នកជំនាញខាងយោធាម្នាក់បានអះអាងថា ទិដ្ឋភាពក្នុងវីដេអូនេះមិនមែនជាការប៉ះទង្គិចគ្នាដែលបានបណ្ដាលឱ្យមានអ្នកស្លាប់រាប់សិបនាក់កាលពីថ្ងៃទី15មិថុនានោះទេ ប៉ុន្តែវាជាការប៉ះទង្គិចគ្នាដែលកើតឡើងនៅតាមបណ្ដោយទន្លេ Galwan កាលពីខែឧសភា។

ភាពតានតឹងនៅព្រំដែនឥណ្ឌា-ចិន បានឡើងកម្ដៅខ្លាំងចាប់ពីចុងខែមេសា និងដើមខែឧសភា ឆ្នាំ2020។ ក្រោយមក នៅពាក់កណ្ដាលខែមិថុនា ហេតុការណ៍ប្រើអំពើហិង្សាដាក់គ្នាមួយប្រាវក៏បានកើតឡើង បណ្ដាលឱ្យទាហានឥណ្ឌាចំនួន20នាក់ និងទាហានចិនជាច្រើននាក់បានបាត់បង់ជីត។ ហេតុការណ៍នេះបាននាំឱ្យចិន និងឥណ្ឌាបញ្ជូនទាហានយ៉ាងច្រើនទៅកាន់ព្រំដែន។ កងទ័ពឥណ្ឌា ក៏បានអនុញ្ញាតឱ្យមេបញ្ជាការនៅតាមព្រំដែន មានសិទ្ធិបញ្ជាឱ្យបាញ់ប្រហារនៅពេលចាំបាច់ ក្រោយពីហេតុការណ៍ប៉ះទង្គិចគ្នាកន្លងមកបានកើតឡើង៕

>ទាហានចិនត្រូវបានចោទប្រកាន់ថា បាននាំគ្នាកាន់ដាវ លំពែង និងកាំបិតផ្គាក់ ប្រមូលផ្ដុំគ្នានៅក្បែរព្រំដែនឥណ្ឌា

ប្រភព៖ Sputnik, SCMP

សារព័ត៌មានឥណ្ឌាបានចុះផ្សាយរូបភាពដែលបង្ហាញថា មនុស្សរាប់សិបនាក់ដែលស្លៀកឈុតទាហានចិន ដៃកាន់ដាវលំពែង នាំគ្នាឈរត្រៀមត្រានៅលើជម្រាលភ្នំក្បែរព្រំដែននៃប្រទេសទាំងពីរ។

នៅក្នុងរូបភាពដែលត្រូវបានសារព័ត៌មានឥណ្ឌាចុះផ្សាយកាលពីម្សិលមិញ បង្ហាញថា មនុស្សមួយក្រុមដែលត្រូវបានគេជឿថាជាទាហានចិននោះ ម្នាក់ៗសុទ្ធតែកាន់ដាវ លំពែង ដំបង កាំបិតផ្គាក់ និងកាំភ្លើង ឈរតាមបណ្ដោយលេណដ្ឋានធ្វើអំពីថ្ម នៅលើជម្រាលភ្នំ កាលពីថ្ងៃទី7កញ្ញា។

ប្រភពព័ត៌មាននានាពីរដ្ឋាភិបាលឥណ្ឌាបានឱ្យដឹងថា ទាហានចិនប្រមាណពី40-60នាក់ បានបង្ហាញខ្លួននៅក្នុងតំបន់ Mukhpari ភាគខាងត្បូង Ladahk ដែលជាតំបន់កំពុងមានជម្លោះរវាងប្រទេសចិននិងឥណ្ឌា។ ក្រុមទាហានចិនខាងលើនេះ បានរកវិធីចូលទៅជិតទីតាំងដែលកងទ័ពឥណ្ឌាកំពុងកាន់កាប់ នៅវេលាម៉ោងប្រមាណជា18 ក្នុងថ្ងៃទី7កញ្ញា។

អាវុធនៅក្នុងរូបភាពដែលត្រូវបានចុះផ្សាយដោយសារព័ត៌មានឥណ្ឌា ស្រដៀងទៅនឹងប្រភេទអាវុធដែលត្រូវបានប្រើប្រាស់ក្នុងករណីប្រើកម្លាំងបាយដាក់គ្នាកាលពីថ្ងៃទី15មិថុនានៅជ្រលងភ្នំ Galwan បណ្ដាលឱ្យទាហានឥណ្ឌា20នាក់ និងទាហានចិនជាច្រើននាក់បានបាត់បង់ជីវិត។

ប្រភពព័ត៌មានបានឱ្យដឹងថា “ទាហានចិនទំនងជាចង់វាយប្រហារទៅលើទាហានឥណ្ឌា ដូចទៅនឹងករណីហិង្សានៅជ្រលងភ្នំ Galwan ព្រោះពួកគេយកដំបង ផ្គាក់ ដំបងឆក់ និងដាវទៅតាមខ្លួន”។

“នៅពេលកងទ័ពជើងគោកឥណ្ឌា រុញច្រានទាហានចិន ពួកគេ (ទាហានចិន) បានបាញ់កាំភ្លើងឡើងលើប្រមាណពី10ទៅ15គ្រាប់ដើម្បីគំរាមទាហានឥណ្ឌា។ នេះគឺជាលើកដំបូងហើយដែលចិនបានផ្ទុះអាវុធតាមបន្ទាត់ព្រំដែនគ្រប់គ្រងជាក់ស្ដែង LAC (Line of Actual Control) ក្រោយរយៈពេល45ឆ្នាំ។ ការផ្ទុះអាវុធដាក់គ្នាលើកមុន បានកើតឡើងកាលពីឆ្នាំ1975។ ទាហានឥណ្ឌាមិនបានបាញ់តបតនោះទេ” នេះបើតាមប្រភពព័ត៌មានពីឥណ្ឌា។

សារព័ត៌មានឥណ្ឌាក៏បានឱ្យដឹងថា ស្ថានភាពនៅតាមបន្ទាត់ព្រំដែនគ្រប់គ្រងជាក់ស្ដែង LAC ជាកន្លែងដែលមិនទាន់មានការបែងចែកច្បាស់លាស់រវាងចិននិងឥណ្ឌា កំពុងមានភាពតានតឹងខ្លាំង និងមិនមានស្ថិរភាព។ ទាហានចិនព្យាយាមរកវិធីដើម្បីរុញច្រានទាហានឥណ្ឌាឱ្យចេញឆ្ងាយពីទីតាំងខ្ពស់ៗ ជាកន្លែងយុទ្ធសាស្ត្រនៅចន្លោះកំពូលភ្នំ Mukhpari និងតំបន់ Rezang La។

“ទាហានចិនបានកាត់ផ្ដាច់របងបន្លាលួសរបស់ឥណ្ឌា កាលពីថ្ងៃទី7កញ្ញា។ កងទ័ពឥណ្ឌាបន្តគ្រប់គ្រងទីតាំងខ្ពស់ៗជាយុទ្ធសាស្ត្រនៅក្នុងតំបន់ភាគខាងត្បូងនៃបឹង Pangong Tso និងកំពុងតាមដានសកម្មភាពរបស់ទាហារចិនក្នុងតំបន់ Moldo” ប្រភពព័ត៌មានបានឱ្យដឹងដូច្នេះ។

ក៏ប៉ុន្តែ ទាំងរដ្ឋាភិបាលឥណ្ឌា ទាំងរដ្ឋាភិបាលចិន សុទ្ធតែមិនទាន់មានប្រតិកម្មអ្វីអំពីព័ត៌មានខាងលើនេះនៅឡើយ។

ភាពតានតឹងនៅព្រំដែនឥណ្ឌា-ចិន បានឡើងកម្ដៅខ្លាំងចាប់ពីចុងខែមេសា និងដើមខែឧសភា ឆ្នាំ2020។ ក្រោយមក នៅពាក់កណ្ដាលខែមិថុនា ហេតុការណ៍ប្រើអំពើហិង្សាដាក់គ្នាមួយប្រាវក៏បានកើតឡើង បណ្ដាលឱ្យទាហានឥណ្ឌាចំនួន20នាក់ និងទាហានចិនជាច្រើននាក់បានបាត់បង់ជីត។ ហេតុការណ៍នេះបាននាំឱ្យចិន និងឥណ្ឌាបញ្ជូនទាហានយ៉ាងច្រើនទៅកាន់ព្រំដែន។ កងទ័ពឥណ្ឌា ក៏បានអនុញ្ញាតឱ្យមេបញ្ជាការនៅតាមព្រំដែន មានសិទ្ធិបញ្ជាឱ្យបាញ់ប្រហារនៅពេលចាំបាច់ ក្រោយពីហេតុការណ៍ប៉ះទង្គិចគ្នាកន្លងមកបានកើតឡើង។

រដ្ឋាភិបាលនៃប្រទេសឥណ្ឌា និងរដ្ឋាភិបាលចិន ក្រោយមកក៏បានចោទប្រកាន់គ្នាជាបន្តបន្ទាប់ ទាក់ទិននឹងហេតុការណ៍នានានៅព្រំដែន និងរកតែចំណុចត្រូវរៀងៗខ្លួន៕

ប្រភព៖ Sputnik, Times of India

គ្រួសារជនជាតិអង់គ្លេស 1ក្រុម ប្រទះឃើញសត្វសមុទ្រកម្រដ៏ចម្លែក តោងជាប់នៅលើកំណាត់គល់ឈើមួយ អណ្ដែតមកទើរនៅលើឆ្នេរខ្សាច់ ក៏នាំគ្នាថតជាឃ្លីបវីដេអូ ស៊ែរនៅក្នុងហ្វេសប៊ុក មុននឹងស្រាវជ្រាវរកទិន្នន័យនៅក្នុង Google ទើបបានដឹងថា ជាគ្រំកទាដ៏កម្រ និងមានតម្លៃថ្លៃបំផុត។

លោក ម៉ារទីន ហ្គ្រីន ជនជាតិអង់គ្លេស រស់នៅទីក្រុង នីវប្រៃតុន និងគ្រួសារ បានប្រទះឃើញវត្ថុម្យ៉ាង ដែលពីដំបូង ពួកគេគិតថាជាកំណាត់គល់ឈើខ្នាតធំមួយអណ្ដែតមកទើរលើឆ្នេរខ្សាច់ ខណៈពួកគេកំពុងដើរលេងនៅតាមឆ្នេរសមុទ្រ ក្នុងទីក្រុងខាណាវឹន តំបន់វេលស៍ តែលុះដើរចូលទៅពិនិត្យជិតៗ ទើបបានឃើញថា កំណាត់គល់ឈើនោះ មានសត្វសមុទ្រស្ថិតក្នុងសម្បកម្យ៉ាង និងមានដៃយឺតចេញមក កម្រើកគ្រប់ពេលវេលា រាប់ពាន់ក្បាល តោងជាប់ពេញកំណាត់គល់ឈើនោះ វាប្រៀបដូចជារូបភាព ដែលរបូតចេញមកពីក្នុងខ្សែភាពយន្តមនុស្សក្រៅពិភពអ៊ីចឹង។

លោក ម៉ារទីន បានប្រាប់ទៅសារព័ត៌មានក្នុងតំបន់ថា ហ្គែមមី ភរិយារបស់លោក ជាអ្នកប្រទះឃើញ ទើបស្រែកហៅលោកឱ្យទៅមើល។ ទាំងអស់គ្នាមិនដែលឃើញទិដ្ឋភាពបែបនេះពីមុនមកឡើយ ទើបនាំគ្នាចូលទៅស្វែងរកទិន្នន័យនៅក្នុង ហ្គូហ្គល ជាមួយកូនប្រុសរបស់លោក ហើយក៏បានដឹងថា សត្វសមុទ្រទាំងនោះ មានឈ្មោះថា Goosenecked Barnacles ឬគ្រំកទា ជាសត្វសមុទ្រកម្រ និងមានតម្លៃថ្លៃបំផុត ក៏អាចថាបានដែរ។ គ្រំកទា ជាអាហារប្រណីតដ៏អស្ចារ្យ ជាពិសេសនៅប្រទេសព័រទុយហ្កាល់ និងអេស្ប៉ាញ ដែលពួកគេហៅថា ប៉េសេបេស(Percebes) ដោយគ្រំ1 មានតម្លៃប្រមាណ 25ផោនដ៍ ហើយនៅលើកំណាត់គល់ឈើនោះមានច្រើនដល់ទៅជាង 2,000គ្រំ(សរុបទៅ វាមានតម្លៃប្រមាណជា 50,000ផោនដ៍ ឬជាង 6ម៉ឺនដុល្លារអាមេរិក)។

លោក ម៉ារទីន ដែលជាម្ចាស់ក្រុមហ៊ុនទីផ្សារ បាននិយាយថា លោកសុំមិនប្រាប់ថា ប្រទះឃើញគ្រំកទាទាំងនោះនៅទីណាទេ ដើម្បីទប់ស្កាត់អ្នកឆ្លៀតឱកាស នាំគ្នាទៅស្វែងរក និងបំផ្លាញបរិស្ថាន។ ក្រៅពីនោះ នៅមានរបាយការណ៍បន្ថែមទៀតថា អ្នកនេសាទទាំងឡាយ តែងតែសុខចិត្តប្រថុយស្លាប់ ដើម្បីទៅស្វែងរកសត្វសមុទ្រដ៏កម្រប្រភេទនេះ ពេលខ្លះត្រូវតស៊ូដណ្ដើមគ្នា ដោយប្រើកម្លាំងបាយ និងអំពើហិង្សាផងក៏មាន ដោយសារតែវាតម្លៃខ្ពស់ដល់ទៅ 1គីឡូក្រាម 322ផោនដ៍ ឬប្រមាណ 413ដុល្លារអាមេរិក ក្នុងរដូវកាលខ្លះ។

ទិន្នន័យពី Waghor Aquarium ផេចរបស់សារមន្ទីរសត្វសមុទ្រ បានបញ្ជាក់ថា គ្រំកទានេះ ជាសត្វរស់នៅក្នុងសមុទ្រ ដោយតោងយ៉ាងជាប់ស្អិតនឹងដី ឬវត្ថុអ្វីផ្សេងៗនៅក្នុងសមុទ្រដោយដៃរបស់វា មានសម្បករឹងដូចគ្រំទូទៅ នៅខាងចុងសម្បក នឹងមានរោមតូចៗ ដែលប្រើសម្រាប់ច្រោះទឹកសមុទ្រ ដើម្បីញែកយកសត្វចៃល្អិតៗនៅក្នុងទឹកសមុទ្រ ដើម្បីចាប់ស៊ីជាអាហារ៕

ប្រភព៖ សារព័ត៌មានបរទេស

ព្យុះ Maysak បានបង្កការរាំងស្ទះយ៉ាងធំធេងចំពោះប្រព័ន្ធគមនាគមន៍របស់ប្រទេសកូរ៉េខាងជើង ដោយស្ពានចំនួន59កន្លែង រួមនឹងហេដ្ឋារចនាសម្ព័ន្ធដទៃទៀតត្រូវរងការខូចខាត នាំឱ្យលោក Kim Jong-un ត្រូវពិនិត្យឡើងវិញនូវគម្រោងសាងសង់នានានៅចុងឆ្នាំនេះ។

ទីភ្នាក់ងារសារព័ត៌មានជាតិ (KCNA) របស់កូរ៉េខាងជើង ថ្ងៃនេះបានរាយការណ៍ថា Maysak ឬហៅថាព្យុះលេខ9 នៅប្រទេសកូរ៉េខាងជើង បានធ្វើឱ្យមានស្ថានភាពអាសន្ន ដោយសារតែវាបានបំផ្លាញហេដ្ឋារចនាសម្ព័ន្ធផ្លូវថ្នល់រាប់សិបកន្លែង និងបណ្ដាលឱ្យផ្ទះជាង2,000ខ្នងត្រូវដួលរលំ ព្រមទាំងបានជន់លិចតំបន់មួយចំនួនផងដែរ។

KCNA ដកស្រង់សម្ដីរបស់មេដឹកនាំកូរ៉េខាងជើង លោក Kim Jong-un បានឱ្យដឹងថា ការខូចខាតដែលបង្កឡើងដោយសារព្យុះនេះ ធ្វើឱ្យប្រទេសជាតិធ្លាក់ទៅក្នុងស្ថានភាព “មិនអាចធ្វើអ្វីបាន ក្រៅតែពីការប្ដូរផ្លាស់ទិសដៅក្នុងការដោះស្រាយបញ្ហា ក្រោយពីបានពិនិត្យមើលគ្រប់ជ្រុងជ្រោយនូវភារកិច្ចចុងឆ្នាំដែលកំពុងត្រូវបានធ្វើឡើង”។

ប្រសាសន៍របស់លោក Kim Jong-un ត្រូវបានលើកឡើងនៅក្នុងកិច្ចប្រជុំមួយរបស់បក្សពលករកូរ៉េខាងជើង កាលពីថ្ងៃទី8កញ្ញា ដែលពិភាក្សាអំពីការខិតខំដោះស្រាយបញ្ហាដែលកើតឡើងដោយសារព្យុះនៅក្នុងតំបន់រងគ្រោះ ក្នុងនោះមានស្រុក Komdok ក្នុងខេត្ត Hamgyong ខាងត្បូងជាដើម។

មេដឹកនាំកូរ៉េខាងជើង បានសង្កត់ធ្ងន់ទៅលើកម្រិតនៃភាពចាំបាច់ក្នុងការសាងសង់ផ្ទះសំបែង ផ្លូវថ្នល់ និងផ្លូវដែក រហូតដល់ថ្ងៃទី10តុលា ដែលជាថ្ងៃកំណើតរបស់បក្សពលករកូរ៉េខាងជើង។ លោក Kim Jong-un ក៏បានដាក់គោលដៅផងដែរថា ចុងឆ្នាំនេះ រាល់កិច្ចការដែលបានដាក់ចេញសម្រាប់ការជួសជុលហេដ្ឋារចនាសម្ព័ន្ធដែលរងការខូចខាតដោយសារព្យុះលេខ9 ត្រូវតែធ្វើឱ្យបានរួចរាល់។

ប្រទេសកូរ៉េខាងជើង ថ្មីៗនេះបានទទួលរងការវាយប្រហារពីព្យុះចំនួន3 គឺព្យុះ Bavi ព្យុះ Maysak និងព្យុះ Haishen ខណៈដែលប្រទសនេះកំពុងទប់ទល់នឹងជំនន់ទឹកភ្លៀង។ គ្រោះធម្មជាតិអាចបង្កផលប៉ះពាល់ខ្លាំងដល់ប្រទេសកូរ៉េខាងជើង ដោយសារតែហេដ្ឋារចនាសម្ព័ន្ធនានារបស់ប្រទេសនេះ ភាគច្រើនមានសភាពទ្រុឌទ្រោមស្រាប់។ ជាងនេះ តំបន់ភ្នំត្រងោលជាច្រើននៅកូរ៉េខាងជើង ក៏បង្កការប្រឈមនឹងគ្រោះទឹកជំនន់កាន់តែខ្ពស់ផងដែរ៕

ប្រភព៖ Reuters