Author: សឿន សំណាង

ក្លាយជាសេដ្ឋីក្រោយរយៈពេលតែ1យប់ គឺជាលទ្ធផលនៃការប្រឹងប្រែងរយៈពេល4ឆ្នាំ ដោយធ្វើការចាប់ពីម៉ោង7ព្រឹកដល់10យប់រៀងរាល់ថ្ងៃ
រឿងរ៉ាវជោគជ័យរបស់ Peter Rahal គឺជាភស្តុតាងយ៉ាងច្បាស់លាស់បំផុតដែលបង្ហាញថា “ចង់អង្គុយនៅលើកៅអីដែលអ្នកដទៃមិនអាចអង្គុយបាន អ្នកត្រូវតែចេះទ្រាំការលំបាកដែលអ្នកដទៃមិនអាចទ្រាំបាន”។
អ្នកជំនួញវ័យ33ឆ្នាំ ឈ្មោះ Peter Rahal បានក្លាយជាសេដ្ឋី ក្រោយរយៈពេលតែ1យប់ បន្ទាប់ពីគាត់បានលក់ក្រុមហ៊ុន startup ឈ្មោះ Rxbar ដែលខ្លួនបានបង្កើតឡើង នៅក្នុងតម្លៃ600លានដុល្លារអាមេរិក។ ក្នុងដំណាក់កាលត្រូវបានលក់ ក្រុមហ៊ុនរបស់ Peter Rahal រកបានចំណូល130លានដុល្លារក្នុងមួយឆ្នាំ និងលក់ផលិតផលបានជាង105លានឈុត។
បច្ចុប្បន្ន Peter Rahal កំពុងរស់នៅក្នុងវីឡាមួយនៅឯឆ្នេរសមុទ្រ Miami ជាកន្លែងដែលមានបំពាក់គ្រឿងសង្ហារិមប្រណិតៗ និងមានតម្លៃប្រមាណជា19លានដុល្លារអាមេរិក។ Peter Rahal ក៏បានទិញរថយន្ត Ferrari 488 មួយគ្រឿង និង Vespa មួយគ្រឿងផងដែរ។
ត្រលប់ទៅកាន់ដំណាក់កាលទើបបង្កើតក្រុមហ៊ុន Rxbar កាលពីឆ្នាំ2012។ លោក Peter Rahal និង Jared Smith ដែលជាមិត្តនឹងគ្នាតាំងតែពីជំនាន់នៅសិក្សាថ្នាក់បឋម បានសម្រេចចិត្តចេញធ្វើជំនួញ បន្ទាប់ពីបានរកឃើញឱកាសក្នុងទីផ្សារទាក់ទងនឹងបន្ទះថាមពល (ប្រភេទអាហារសម្រាប់ក្រុមមនុស្សដែលចំណាយកម្លាំងកាយច្រើន ដូចជាអ្នកកីឡាជាដើម)។
លោក Peter Rahal (ស្ដាំ) និងលោក Smith
Rahal បានឱ្យដឹងថា៖ “កាលពីឆ្នាំ2012 ខ្ញុំបានអានសៀវភៅណាមួយនោះដែលមានសរសេរថា គ្រាន់តែចំណាយ10,000ដុល្លារប៉ុណ្ណោះដើម្បីចាប់ផ្ដើមបើកក្រុមហ៊ុនធ្វើអាជីវកម្មលើបន្ទះអាហារូបត្ថម្ភ។ អ្នកដឹងហើយថា ទោះជាបុគ្គលល្ងង់ខ្លៅណាក៏អាចបង្កើតបានបន្ទះថាមពលបានដោយងាយ។ យើងបានរួមចំណែកម្នាក់ៗចំនួន 5,000ដុល្លារ ដើម្បីបង្កើតផលិតផល និងលក់ទៅឱ្យមជ្ឈមណ្ឌលហាត់ប្រាណនានា។ ទន្ទឹមនឹងនេះ RxBar ថែមទាំងលក់ផលិតផលរបស់ខ្លួនតាមអនឡាញផងដែរ។ ដំបូងឡើយ យើងគិតថា វាគ្រាន់តែជាក្រុមហ៊ុនមួយដែលមានតម្លៃត្រឹមប្រមាណ10លានដុល្លារប៉ុណ្ណោះ ពោលគឺមិនគិតថា វាមានតម្លៃដល់ទៅរាប់រយលានដុល្លារដូចបច្ចុប្បន្នសោះឡើយ”។
រូបមន្តនៃផលិតផលជាអាហារថាមពលដែលពួកគេបានបង្កើតឡើងដំបូង រួមមាន ផ្លែលម៉ើ (date palm) គ្រាប់ធញ្ញជាតិ និងស៊ុតពណ៌ស ដែលមាននៅក្នុងផ្ទះបាយរបស់ម្ដាយ Rahal។ ប្រអប់វេចខ្ចប់ និងពាណិជ្ជសញ្ញាត្រូវបានធ្វើឡើងដោយប្រើកម្មវិធី PowerPoint។ ម្ដាយរបស់ Rahal ក៏បានចូលរួមធ្វើសកម្មភាពក្នុងដំណាក់កាលផលិតដើម្បីកាត់បន្ថយការចំណាយ ប៉ុន្តែដោយសារមានបញ្ហាភ្លេចភ្លាំងច្រើន អ្នកស្រីក៏ត្រូវបានកូនប្រុស “បញ្ឈប់ពីការងារ” បើទោះជាអ្នកស្រីធ្វើកិច្ចការដោយមិនគិតកម្រៃក៏ដោយ។
ម្ដាយ និងកុមារ Rahal កាលពីនៅតូច
ក្រោយពីផលិតបាន Rahal និង Smith ក៏លក់ផលិតផលរបស់ខ្លួនទៅឱ្យមជ្ឈមណ្ឌលហាត់ប្រាណនានានៅ Chicago និង Indiana រួចក៏ពង្រីកខ្លួនទៅក្នុងទីផ្សារនៃតំបន់ Midwestern United States។ ក្នុងដំណាក់កាលដែល RxBar បានរីកចម្រើនទៅជាក្រុមហ៊ុនដែលរកបានចំណូលឡើងដល់100លានដុល្លារ (ដោយមិនមានទុនពីខាងក្រៅ) Rahal ធ្វើការដោយមិនឈប់ឈរ ចាប់ពីម៉ោង7ព្រឹកដល់ម៉ោង10យប់ជារៀងរាល់ថ្ងៃ សូម្បីតែនៅថ្ងៃចុងសប្ដាហ៍។ Rahal ថ្លែងថា គាត់ជាមួយនឹង Smith មិនមានពេលទៅលម្ហែកាយម្ដងណាឡើយក្នុងរយៈពេល4ឆ្នាំបន្ទាប់ពីបានបង្កើតក្រុមហ៊ុន។
នៅពេលកិច្ចព្រមព្រៀងលក់ក្រុមហ៊ុនទៅឱ្យ Kellogg កាលពីឆ្នាំ2017 បានបញ្ចប់ Rahal និយាយថា គាត់មិនបានធ្វើពិធីជប់លៀងនោះទេ ហើយថ្ងៃបន្ទាប់ គាត់នៅតែយកបាយពីផ្ទះទៅធ្វើការដូចសព្វមួយដង។ Rahal និង Smith ម្នាក់ៗទទួលបានការទូទាត់ប្រាក់កម្រៃតែម្ដងគត់។ Rahal នៅតែជួយគ្រប់គ្រងក្រុមហ៊ុន RxBar ដដែល។
ផលិតផលរបស់ក្រុមហ៊ុន RxBar
ប៉ុន្តែ ក្រោយការប្រឹងប្រែងអស់មួយរយៈពេល គាត់ក៏មានអារម្មណ៍ថា លែងមានកម្លាំងចិត្ត។ សេដ្ឋីវ័យក្មេងរូបនេះរំឭកឡើងវិញថា៖ “ខ្ញុំហាក់មិនសមស្របជាមួយនឹងតំណែង CEO។ នៅរៀងរាល់យប់ថ្ងៃអាទិត្យ ខ្ញុំមិនបានធ្វើការដូចមុន។ ការជួយឱ្យ RxBar រីកចម្រើនជាងនេះ គឺលែងនៅជាបញ្ហាធំដូចដំណាក់កាលដំបូងទៀតហើយ។ នៅទីនេះ ខ្ញុំទទួលបានប្រាក់ខែច្រើនគួរសម ប៉ុន្តែ អ្វីៗទាំងអស់ វាហាក់មានសុវត្ថិភាពហួសពេក”។ ដូច្នេះហើយ Rahal ក៏បានសុំឈប់ពីការងារនៅ Kellogg ប៉ុន្តែ នៅតែរក្សាកិត្តិនាមជាសហស្ថាបនិករបស់ RxBar។
សម្រាប់ Rahal គាត់មានអារម្មណ៍ថា ដូចជារឿងចម្លែក និងគួរឱ្យខ្លាចនៅពេលក្លាយជាអ្នកមានយ៉ាងឆាប់រហ័សបែបនេះ។ បច្ចុប្បន្ន Rahal មានទំនាក់ទំនងជាមួយក្រុមមនុស្សវណ្ណៈខ្ពស់ៗក្នុងសង្គម ទទួលបានការអញ្ជើញឱ្យចូលរួមកម្មវិធីលំដាប់ប្រណិតៗ និងពិភាក្សាគ្នាអំពីបញ្ហាធំៗ មានដូចជាអត្រាពន្ធដារររបស់រដ្ឋ Florida ធៀបនឹងតំបន់ Puerto Rico នៃសហរដ្ឋអាមេរិក។ល។
Peter Rahal រស់នៅលើកោះមួយដែលមានសន្តិសុខយាមត្រឹមត្រូវ។ ហើយបើសិនគាត់ចង់ណាត់ជួបមិត្តស្រី ឬមិត្តថ្មី ពួកគេអាចរកឃើញឈ្មោះ និងខ្ទង់ប្រាក់ដែលគាត់រកបាននៅលើ Google ដោយងាយ។ ការក្លាយជាអ្នកមានដោយប្រើពេលខ្លីបែបនេះ គឺមានន័យថា ជីវភាពរស់នៅមានភាពងាយស្រួលជាងមុនឆ្ងាយណាស់។ ក៏ប៉ុន្តែ Rahal ឱ្យដឹងថា ជួនកាលគាត់នៅតែមិនអាចសម្របខ្លួនឱ្យទាន់ជីវភាពបែបនេះបាននៅឡើយ៕
ប្រភព៖ FBN
September 25, 2020
ឧបករណ៍បច្ចេកវិទ្យាថ្មី ជួយឱ្យអ្នកពិការភ្នែកអាចមើលឃើញឡើងវិញ
ជាលើកដំបូងហើយដែលក្រុមអ្នកវិទ្យាសាស្ត្របង្កើតបានឧបករណ៍មួយប្រភេទដែលអាចជួយឱ្យអ្នកពិការភ្នែកអាចមើលឃើញឡើងវិញ ហើយឧបករណ៍នេះនឹងត្រូវបានដាក់ឱ្យប្រើប្រាស់សាកល្បងនៅលើមនុស្សនាពេលដ៏ខ្លីខាងមុខ។
ក្រោយការប្រឹងប្រែងសិក្សាស្រាវជ្រាវអស់រយៈពេលជាង10ឆ្នាំ ក្រុមអ្នកវិទ្យាសាស្ត្រមកពីសាកលវិទ្យាល័យ Monash នៃប្រទេសអូស្ដ្រាលី បានអភិវឌ្ឍឧករណ៍អេឡិកត្រូនិកគ្មានខ្សែមួយប្រភេទ ដែលអាចដាំក្នុងលលាដ៍ក្បាលដើម្បីជួយឱ្យអ្នកងងឹតភ្នែក អាចមើលឃើញបាន។ លទ្ធផលនៃការសិក្សាស្រាវជ្រាវ និងការសាកល្បងត្រូវបានចុះផ្សាយនៅលើទំព័រទស្សនាវដ្ដី Neural Engineering កាលពីខែកក្កដាកន្លងទៅ។
មានមនុស្សជាច្រើនត្រូវពិការភ្នែកដោយសារតែសរសៃចក្ខុវិញ្ញាណត្រូវរងរបួស ហើយបញ្ហានេះបានរារាំងសញ្ញាដែលបញ្ជូនពីស្រទាប់ retina របស់ភ្នែក ទៅកាន់មជ្ឈមណ្ឌលចក្ខុវិញ្ញាណរបស់ខួរក្បាល។ ដើម្បីដោះស្រាយបញ្ហានេះ ប្រព័ន្ធចក្ខុវិញ្ញាណជីវសាស្ត្រដែលមានឈ្មោះថា Gennaris ត្រូវបានបង្កើតឡើង។ ប្រព័ន្ធនេះរួមមាន មួកពិសេសដែលមានកាមេរ៉ា និងប្រព័ន្ធបញ្ជូនទិន្នន័យគ្មានខ្សែ ប្រព័ន្ធចាត់ការរបស់ចក្ខុវិញ្ញាណ ផ្នែកទន់ រួមនឹងបន្ទះឧបករណ៍មួយដែលមានរាងបួនជ្រុង ទំហំ9×9មម ដែលត្រូវដាំជាប់នៅលើស្រោមខួរ។
បច្ចេកវិទ្យាខាងលើនេះបង្កើតបានជាគំរូចក្ខុ តាមរយៈការរួមផ្សំនៃពន្លឺទាំង172ចំណុច ការផ្ដល់ព័ត៌មានលក្ខណឯកជនដើម្បីកំណត់ទិសក្នុងផ្ទះ និងក្រៅផ្ទះ ទន្ទឹមនឹងនេះក៏អាចដឹងបានអំពីវត្តមានរបស់មនុស្ស និងវត្ថុនានាដែលនៅជុំវិញ។
ជាងនេះ ទិដ្ឋភាពពិតរបស់ពិភពលោកត្រូវបានកាមេរ៉ាដែលបំពាក់នៅលើមួកថតយក រួចបញ្ជូនទិន្នន័យនេះទៅកាន់ប្រព័ន្ធចាត់ការនៃចក្ខុវិញ្ញាណ។ ប្រព័ន្ធនេះ មានតួនាទីចម្រាញ់យកទិន្នន័យដែលមានប្រយោជន៍ជាងគេ។ ទិន្នន័យដែលត្រូវបានចម្រាញ់រួចហើយនឹងត្រូវបានបញ្ជូនទៅកាន់ឧបករណ៍ដែលបំពាន់នៅលើស្រោមខួរក្បាល។ ប្រការនេះនឹងប្រែក្លាយទិន្នន័យឱ្យទៅជាបន្ទុកអគ្គិសនីមួយប្រភេទដែលអាចរំញោចទៅលើប្រព័ន្ធខួរក្បាលតាមរយៈមីក្រូអេឡិកត្រូនិកដ៏សែនតូច។
សាស្ត្រាចារ្យ Lowery ដែលជាសមាជិកម្នាក់របស់ក្រុមអ្នកវិទ្យាសាស្ត្រខាងលើ បាននិយាយថា៖ “ឧបករណ៍ដែលដាំនៅលើស្រោមខួរក្បាល មានតួនាទីកែលម្អចក្ខុវិញ្ញាណសម្រាប់ក្រុមមនុស្សដែលពិការភ្នែក ដោយវិធីបញ្ជូនអគ្គិសនីទៅកាន់ស្រោមខួរផ្នែកចក្ខុវិញ្ញាណ ដែលជាកន្លែងទទួលនិងចាត់ការព័ត៌មានទាក់ទងនឹងរូបភាព”។
លទ្ធផលនៃការពិសោធរយៈពេលជាង2,700ម៉ោងទៅលើឧបករណ៍ខាងលើ បានបង្ហាញថា មិនមានផលវិបាកណាមួយកើតឡើងចំពោះសុខភាព ក៏ដូចជាចក្ខុវិញ្ញាណនោះទេ។
បណ្ឌិត Lewis សមាជិកម្នាក់ទៀតរបស់ក្រុមស្រាវជ្រាវនេះ ថ្លែងថា៖ “បើសិនជាជោគជ័យ ក្រុមរបស់យើងនឹងបង្កើតក្រុមហ៊ុនថ្មីមួយដែលផ្ដោតទៅលើសេវាកម្មផ្ដល់ចក្ខុវិញ្ញាណទៅឱ្យអ្នកពិការភ្នែកដែលមិនអាចព្យាបាលបាន”។
ក្រុមអ្នកវិទ្យាសាស្ត្រខាងលើ មានគម្រោងផលិតឧបករណ៍ដាំនៅលើស្រោមខួរនេះក្នុងបរិមាណចាំបាច់ ដើម្បីធ្វើការប្រើប្រាស់សាកល្បងនៅលើមនុស្សជាលើកដំបូងក្នុងពិភពលោក នៅឯទីក្រុង Melbourne៕
ប្រភព៖ Monash News
September 25, 2020
(ទស្សនា)រូបភាពក្រុមស្ត្រីអ្នកបើកយន្តហោះចម្បាំង 10នាក់ដំបូងរបស់ចិន
ទីភ្នាក់ងារសារព័ត៌មាន People Daily កាលពីថ្ងៃទី20កញ្ញា បានបង្ហាញរូបភាព ស្ត្រីអ្នកបើកយន្តហោះចម្បាំង 10នាក់ដំបូង ដែលបានឆ្លងកាត់ការហ្វឹកហាត់ និងបានទទួលការជ្រើសរើសឱ្យចូលបម្រើក្នុងជួរកងទ័ពអាកាសរបស់ប្រទេសចិន ដោយការហ្វឹកហាត់ នឹងចប់ជាស្ថាពរនៅក្នុងឆ្នាំ2021 ខាងមុខ។
តាមទិន្នន័យ បានបញ្ជាក់ថា ក្រុមអ្នកបើកយន្តហោះចម្បាំងនៃកងទ័ពអាកាសចិន ឈុតដំបូង 10នាក់នេះ បានបញ្ចប់ការហោះហើរទោលលើកដំបូងរួចហើយ ដោយទាំងអស់ បានបញ្ចប់ការសិក្សាពីសាលាមធ្យមសិក្សាក្នុងឆ្នាំ2017 និងទាំង 10នាក់នោះ គឺជាស្ត្រី ក្រុមដំបូងគេ ដែលបានទទួលការហ្វឹកអប់រំ ដែលនឹងបញ្ចប់នៅឆ្នាំ2021ខាងមុខ។
កាលពីពេលថ្មីៗនេះ រដ្ឋាភិបាលចិន បានដំណើរការដើម្បីបង្កើនភាពមាំមួនរឹងប៉ឹងដល់កងទ័ព ដើម្បីត្រៀមរួចជាស្រេចសម្រាប់ហេតុការណ៍អាសន្នណាមួយ ដែលអ្នកបើកយន្តហោះចម្បាំង គឺជាកម្លាំងសំខាន់មួយដែលអស្ចារ្យបំផុត៕
ប្រភព៖ សារព័ត៌មានបរទេស
September 25, 2020
ស្ត្រីអ្នកជំនួញម្នាក់ បង្កើតបក្សថ្មី សុំប្រកួតប្រជែងនឹង “លោកស្រីស៊ូជី” និងប្រាប់ថា NLD មិនមែនជាជម្រើសរបស់មីយ៉ាន់ម៉ាទេ!
បន្ទាប់ពីត្រូវបណ្ដេញចេញពីបក្សដែល “រញ៉េរញ៉ៃ និងផ្ដាច់ការ” របស់លោកស្រី អ៊ុងសាន ស៊ូជី រួចមក សមាជិកសភាតំណាងរាស្ត្រជាស្ត្រីម្នាក់ កំពុងប្រកួតប្រជែងជាមួយវីរនារីរបស់មីយ៉ាន់ម៉ា ក្នុងការបោះឆ្នោតដែលនឹងកើតឡើងនាពេលឆាប់ៗនេះ ដោយបានថ្លែងថា ប្រទេសចាំបាច់ត្រូវតែធ្វើការរួមគ្នាជាមួយយោធា មិនមែនតតាំងគ្នាទេ!។
គេរំពឹងថា អ្នកមានសិទ្ធិបោះឆ្នោតទាំងឡាយ នឹងជួយជំរុញគណបក្ស National League for Democracy ឬ NLD របស់លោកស្រីស៊ូជី ឱ្យវិលត្រឡប់ទៅរកអំណាចម្ដងទៀត នៅក្នុងការបោះឆ្នោតជាតិ ថ្ងៃទី8 វិច្ឆិកាខាងមុខនេះ ជាការបោះឆ្នោតលើកទី2 របស់ប្រទេស ចាប់តាំងពី របូតរួចផុតពីការគ្រប់គ្រងរបស់យោធាមក តែលោកស្រី តេត តេត ខាញ (Thet Thet Khine) រំពឹងថា ការបោះឆ្នោតលើកនេះ នឹងសាងកេរ្តិ៍ឈ្មោះដល់ខ្លួនលោកស្រី។
លោកស្រី តេត តេត ខាញ ជាសកម្មជននយោបាយ ជាគ្រូពេទ្យ ជាអ្នកជំនួញ និងជាអ្នកជួញដូរគ្រឿងអលង្ការដ៏មានឥទ្ធិពលម្នាក់ មុននឹងបានទទួលការជ្រើសតាំងឱ្យធ្វើជាសមាជិកសភាតំណាងរាស្ត្ររបស់គណបក្ស NLDក្នុងឆ្នាំ2015 តែលោកស្រីតេត តេត ខាញ ក៏ត្រូវបាត់បង់ស្ថានភាពនោះទៅវិញ ក្រោយពីត្រូវបានបណ្ដេញពីគណបក្ស NLD កាលពីឆ្នាំមុន។ លោកស្រីថ្លែងថា វាជាលទ្ធផលពីការនិយាយ តាមអ្វីដែលខ្លួនឯងបានគិត ហើយលោកស្រីនឹកសង្ឃឹមថា អ្នកដែលមានសិទ្ធិបោះឆ្នោត នឹងគាំទ្រគណបក្ស People’s Pioneer Party(PPP) របស់លោកស្រី។
“គណបក្ស NLD លែងជាជម្រើសសម្រាប់ប្រទេសនេះតទៅទៀតហើយ” លោកស្រីបានថ្លែងប្រាប់ AFP ដូច្នេះ នៅឯភូមិគ្រឹះរបស់លោកស្រីក្នុងទីក្រុង យ៉ាងគុង ដែលតុបតែងលម្អដោយបង្គោលភ្លើងនីអូក្លាសស៊ិក ចង្កៀងគោមស៊ែនឌើលៀ និងគ្រឿងសង្ហារិមទំនើប។
“គោលការណ៍ការដំណើរការរបស់បក្សមួយនោះ មានទាំងភាពរញ៉េរញ៉ៃ ច្របូកច្របល់ និងមានភាពផ្ដាច់ការខ្លាំងណាស់ មានមនុស្សតែម្នាក់គត់ ជាអ្នកសម្រេចអ្វីៗទាំងអស់” លោកស្រីតេត តេត ខាញ ថ្លែង ដោយបានបញ្ជាក់ថា ភាពស្វាមីភក្តិ មានតម្លៃជាងសមត្ថភាពទៅទៀត។
ទោះជាមានការខកចិត្តចំពោះគណបក្ស NLD ដែលគ្របដណ្ដប់យ៉ាងទូលំទូលាយក្នុងតំបន់ជនជាតិភាគតិចមែន តែគណបក្ស PPP អាងថា ពួកគេមានមូលដ្ឋានអ្នកគាំទ្រដែលស្វាមីភក្តិ ស្មោះត្រង់ក្នុងក្រុមជនជាតិមីយ៉ាន់ម៉ា ដែលជាចំនួនភាគច្រើនរបស់ប្រទេស និងសម្រាប់មនុស្សជាច្រើន លោកស្រីអ៊ុងសាន ស៊ូជី គឺគណបក្ស NLD។
លោកស្រីស៊ូជី បានដឹកនាំរដ្ឋាភិបាល ក្នុងឋានៈទីប្រឹក្សានៃរដ្ឋ គ្រប់គ្រងសម្ព័ន្ធភាពអន្តរជាតិ ក្នុងឋានៈរដ្ឋមន្ត្រីក្រសួងការបរទេស និងថែមទាំងជាខ្សែត្រៀមជួរមុខ និងមជ្ឈមណ្ឌលកណ្ដាលក្នុងការប្រយុទ្ធប្រឆាំងនឹងកូវីដ-19របស់ប្រទេសទៀតផង។
លោកស្រីតេត តេត ខាញ ថ្លែងថា ការនិយាយបើកចំហជាសាធារណៈបែបនេះ មានន័យថា លោកស្រី និងសាច់ញាតិ ត្រូវប្រឈមនឹងការគំរាមកំហែងនៅក្នុងបណ្ដាញសង្គមអនឡាញ។

ក្រុមគ្រួសាររបស់លោកស្រីតេត តេត ខាញ មានបានឡើងដោយសារឧស្សាហកម្មត្បូងទទឹម។ ក្នុងអំឡុងពេលដែលលោកស្រីនៅជានិស្សិតពេទ្យ លោកស្រីបានចូលរួមក្នុងក្រុមសកម្មជនគាំទ្រការទាមទារប្រជាធិបតេយ្យក្នុងការធ្វើបាតុកម្មនៅឆ្នាំ1988 មុននឹងត្រូវបង្ក្រាបយ៉ាងខ្លាំងក្លាដោយយោធា ដែលការជួបជុំធ្វើបាតុកម្មក្នុងគ្រានោះ បានសាងកេរ្តិ៍ឈ្មោះដល់លោកស្រីអ៊ុងសាន ស៊ូជី “ដែលធ្វើឱ្យលោកស្រីស៊ូជី ក្លាយជាមនុស្សពិសេសរបស់ពួកយើង” លោកស្រីតេត តេត ខាញ រៀបរាប់ពីអតីតកាល។
ក្រោយការបង្ក្រាប លោកស្រីតេត តេត ខាញ បានជ្រើសរើសក្នុងការដំណើរការមុខជំនួញ តែបានវិលត្រឡប់មកចូលក្នុងដំណើរផ្លូវខាងនយោបាយម្ដងទៀត ក្រោយពីប្រទេសរួចផុតពីការគ្រប់គ្រងរបស់យោធា។
ពេលនេះ លោកស្រីជាប្រធានគណបក្សរបស់ខ្លួនឯង ដែលលោកស្រីបានអធិប្បាយថា គណបក្ស PPP របស់លោកស្រី មានភាពជាអ្នកដឹកនាំរួមគ្នានៅក្នុងក្រុមសមាជិក និងអាយុជាមធ្យមរបស់បេក្ខភាពទទួលការបោះឆ្នោត សុទ្ធតែស្ថិតក្នុងវ័យ 46ឆ្នាំ។
គណបក្សរបស់លោកស្រី បានសន្យាថា នឹងបង្កើតការងារឱ្យបានច្រើនឡើង មានប្រាក់ឈ្នួលពលកម្មខ្ពស់ និងទម្លាក់ពន្ធភាស៊ី និងមើលទៅហាក់ដូចជាបក្ស នឹងមានគោលដៅទៅលើប្រជាជនក្នុងរង្វង់ធំ ដោយការបញ្ជូនបេក្ខជនតំណាងដ៏ច្រើន និងសម្បូរបែប ទាំងបេក្ខជនដែលបង្ហាញខ្លួនឯងថា ជាមនុស្សស្រឡាញ់ភេទដូចគ្នាយ៉ាងបើកចំហដំបូងគេរបស់ប្រទេស បេក្ខជនដែលជាជនជាតិមូស្ល៊ីម និងបេក្ខជនដែលជាពុទ្ធសាសនិកនិយមជ្រុលទៀតផង។
លោក ឃីន សូ វីន អ្នកវិភាគនយោបាយនៅក្នុងក្រុង យ៉ាងគុង ថ្លែងថា “មានអ្នកនយោបាយមិនច្រើនទេ ដែលយល់ដឹងពីពិភពធុរកិច្ច…ហ្នឹងហើយដែលជាចំណុចល្អសម្រាប់លោកស្រីតេត តេត ខាញ”។
រឿងសំខាន់ 1ប្រការទៀត គឺការផ្សារភ្ជាប់ការបែកបាក់រវាងរដ្ឋាភិបាលស៊ីវិល និងយោធា និងផ្សារភ្ជាប់សម្ព័ន្ធភាពដែលតានតឹង ដែលត្រូវបានឆ្លុះបញ្ចាំងចេញមកដោយលោកស្រីស៊ូជី និងលោកឧត្ដមសេនីយ៍ឯកជើងចាស់ មីន អង់ ឡាយ អគ្គមេបញ្ជាការ។
“បើឪពុកម្ដាយកំពុងឈ្លោះគ្នា កូនៗក៏មិនដឹងថា នឹងធ្វើយ៉ាងណាដែរ” លោកស្រីតេត តេត ខាញ អធិប្បាយ និងបន្ថែមថា យោធា គឺជាផ្នែកមួយនៃការកែបញ្ហានៅក្នុងដំណើរការកសាងរដ្ឋ។
ស្ថិតក្រោមរដ្ឋធម្មនុញ្ញដែលយោធារៀបចំឡើង កងទ័ពបានក្ដោបក្ដាប់អំណាចយ៉ាងច្រើនមហាសាល គ្រប់គ្រងក្រសួងសំខាន់3 និងទទួលបានអាសនៈ1 ភាគ4 នៃអាសនៈទាំងអស់នៅក្នុងសភា ដែលធ្វើឱ្យយោធាមានសិទ្ធិរារាំងការចង់ផ្លាស់ប្ដូរច្បាប់ណាមួយ។
លោកស្រីតេត តេត ខាញ បញ្ជាក់ថា គណបក្សរបស់លោកស្រីនឹងលើកស្នើបង្ហាញពីផ្លូវកណ្ដាល។
តែស្ថិតក្រោមការគ្រប់គ្រងរបស់រដ្ឋាភិបាលផ្ដាច់ការយោធា ជាងកន្លះសតវត្សរ៍មកនោះ ធ្វើឱ្យមនុស្សជាច្រើនដាក់ការសង្ស័យទៅលើយោធា ដែលដាក់គុកមនុស្សចំនួនរាប់ពាន់នាក់ដោយសារជំនឿរបស់ពួកគេ ការបង្ក្រាបជនជាតិដើមភាគតិច និងការគ្រប់គ្រងប្រទេសដែលធ្វើឱ្យសេដ្ឋកិច្ចធ្លាក់ចុះខ្សោយ។
“កាលពីអតីត ពួកគេសម្រេចចិត្តខុស និងចាត់ការខុសឆ្គងអស់យ៉ាងច្រើន” លោកស្រីតេត តេត ខាញ ទទួលស្គាល់ តែអះអាងថា យោធាជំនាន់ថ្មីទទួលស្គាល់ពីភាពច្បាស់លាស់ក្នុងការងារ។
លោកឃីន សូ វីន អ្នកវិភាគដដែល បានសន្និដ្ឋានថា ការធ្វើខ្លួនជាសម្ព័ន្ធមិត្តជាមួយយោធា មានន័យថា លោកស្រីនឹងបាត់បង់ការគាំទ្រមួយផ្នែកដែរ។

យោធាត្រូវបានចោទប្រកាន់ថា មានទង្វើល្មើសសិទ្ធិក្នុងការធ្វើសង្គ្រាមយូរអង្វែងរាប់សិបឆ្នាំជាមួយក្រុមប្រដាប់អាវុធកុលសម្ព័ន្ធ និងក្នុងឆ្នាំ2017 ជនមូស្លីមរ៉ូហ៊ីងយ៉ាបានបង្ហើបឱ្យដឹងពីរឿងរ៉ាវពាក់ព័ន្ធនឹងអំពើឃាតកម្ម ការរំលោភបំពាន និងការដុតបំផ្លាញ នៅក្នុងប្រតិបត្តិការរបស់យោធា ដែលជាលទ្ធផល ធ្វើឱ្យមកដល់ពេលនេះ មីយ៉ាន់ម៉ាត្រូវបានជាប់ចោទពីបទប្រល័យពូជសាសន៍នៅឯតុលាការកំពូលរបស់អង្គការសហប្រជាជាតិ និងការធ្វើសវនការរឿងក្ដី ដែលលោកស្រីតេត តេត ខាញ ថ្លែងថា គ្មានភាពចាំបាច់ទាល់តែសោះ។ លោកស្រីថ្លែងថា “យោធាអាចមានប្រតិកម្មឆ្លើយតបដែលខ្លាំងក្លាជ្រុលហួសហេតុ តែវាមិនមែនជាការប្រល័យពូជសាសន៍ ឬបោសសម្អាតផ្ដាច់ពូជសាសន៍នោះឡើយ”។
ទោះជាជនជាតិដើមភាគតិចរ៉ូហ៊ីងយ៉ា រស់នៅក្នុងរដ្ឋយ៉ៈខៃ អស់ជាច្រើនសតវត្សរ៍មកហើយក្ដី ប៉ុន្តែពួកគេត្រូវបានមើលឃើញយ៉ាងទូលំទូលាយថា ជាជនអន្តោប្រវេសន៍ខុសច្បាប់។
“រ៉ូហ៊ីងយ៉ា នឹងគ្មានថ្ងៃក្លាយជា ជនជាតិដើមរបស់ទីនេះឡើយ” លោកស្រីតេត តេត ខាញ ថ្លែងយ៉ាងដូច្នេះ តែទទួលស្គាល់ថា ជនរ៉ូហ៊ីងយ៉ាដែលក្រុមគ្រួសារភៀសខ្លួនចូលមករស់នៅយូរជាង 3-4ជំនាន់ហើយនោះ គួរតែបានទទួលការទទួលស្គាល់។
លោកស្រីថ្លែងថា “ពួកគេគួរតែបានទទួលឋានៈជាពលរដ្ឋ និងមិនប្រឈមនឹងការរើសអើងពីការប្រតិបត្តិតទៅទៀត”
តែយ៉ាងណាក៏ដោយ ជនជាតិដើមភាគតិចរ៉ូហ៊ីងយ៉ាទាំង 600,000នាក់ដែលកំពុងស្ថិតនៅក្នុងប្រទេសមីយ៉ាន់ម៉ា នឹងត្រូវកាត់សិទ្ធិបញ្ចេញសំឡេង នៅក្នុងការបោះឆ្នោតនាពេលខាងមុខនេះ ដូចគ្នានឹងគ្រាមុនៗដែរ។
វាសនាកម្មរបស់ជនជាតិដើមភាគតិចរ៉ូហ៊ីងយ៉ា មិនមែនជារឿងសំខាន់សម្រាប់គណបក្សនយោបាយភាគច្រើននោះទេ រួមទាំងគណបក្សPPP របស់លោកស្រីតេត តេត ខាញផងដែរ។
គណបក្ស PPP បានបញ្ជូនបេក្ខភាពរបស់ខ្លួនត្រឹមតែ 1ភាគ3 នៃតំបន់បោះឆ្នោតទាំងអស់ប៉ុណ្ណោះ ដោយលោកស្រីតេត តេត ខាញ ថ្លែងថា លោកស្រីនឹងមានសេចក្ដីសុខខ្លាំងណាស់ បើទទួលបានអាសនៈ 5% នៃចំនួនអាសនៈទាំងអស់ និងថែមទាំងទទួលស្គាល់ទៀតផងថា ការចូលរួមប្រកួតប្រជែងក្នុងការបោះឆ្នោតក្នុងគ្រានេះ គឺជាការហ្វឹកហាត់សម្រាប់ការបោះឆ្នោតនៅឆ្នាំ2025 ដែលនៅពេលនោះលោកស្រីអ៊ុងសាន ស៊ូជី នឹងមានអាយុ 80ឆ្នាំ។
លោកស្រីតេត តេត ខាញ ថ្លែងថា “ស៊ូជី មិនជឿលើរឿងការបន្តវេនមុខតំណែងទេ ដូច្នេះ បន្ទាប់ពីយុគសម័យរបស់គាត់ទៅ NLDនឹងដួលរលំក្នុងន័យធុរកិច្ច តែខ្ញុំគិតថា គាត់នឹងតែគ្រប់គ្រងអំណាចរហូតដល់ថ្ងៃចុងក្រោយរបស់គាត់”៕
ប្រភព៖ សារព័ត៌មានបរទេស

September 25, 2020
ប៉ូឡូញ ប្រកាសបង្ហាញថ្នាំព្យាបាល COVID-19 ដំបូងគេបង្អស់ក្នុងពិភពលោក
ថ្នាំនេះកំពុងស្ថិតក្នុងការប្រើប្រាស់សាកល្បងក្រោមបែបបទមិនមែនពាណិជ្ជកម្ម ហើយបើសិនជាគ្រប់យ៉ាងដំណើរការបានល្អ នោះប៉ូឡូញអាចក្លាយជាប្រទេសដំបូងគេក្នុងពិភពលោកដែលមានថ្នាំកម្ចាត់វីរុសCOVID-19។
កាលពីថ្ងៃទី23កញ្ញា ក្រុមហ៊ុនផលិតឱសថ Biomed Lublin របស់ប្រទេសប៉ូឡូញ បានប្រកាសថា បានផលិតដោយជោគជ័យនូវថ្នាំប្រឆាំងនឹងCOVID-19 ដំបូងគេបង្អស់ ដោយប្រើប្លាស្មា (plasma) របស់អ្នកជំងឺCOVID-19 ដែលបានជាសះស្បើយ។ បច្ចុប្បន្ន ថ្នាំនេះកំពុងត្រូវបានរៀបចំដើម្បីធ្វើការព្យាបាលសាកល្បងក្នុងត្រីមាសទី4 ឆ្នាំ2020។
តំណាងរបស់ក្រុមហ៊ុនផលិតឱសថខាងលើបានឱ្យដឹងថា ការសិក្សាស្រាវជ្រាវដំបូងរបស់ពួកគេ បានបញ្ជាក់អំពីប្រសិទ្ធភាពប្រកបដោយវិជ្ជមាន។ នៅពេលនេះ ក្រុមហ៊ុន Biomed Lublin កំពុងមានគម្រោងចាប់ផ្ដើមការព្យាបាលសាកល្បងតាមបែបបទមិនមែនពាណិជ្ជកម្ម ហើយបើសិនជាគ្រប់យ៉ាងដំណើរការទៅដោយរលូត នោះប៉ូឡូញអាចក្លាយជាប្រទេសដំបូងគេក្នុងពិភពលោកដែលមានថ្នាំព្យាបាលជំងឺរលាកសួតប្រភេទថ្មីដែលបង្កឡើងដោយវីរុសCOVID-19 ដោយប្រើប្រាស់ប្លាស្មា (ប្លាស្មា គឺជាអង្គធាតុរាវពណ៌លឿងខ្ចី ហើយវាក៏ជាសមាសធាតុសំខាន់មួយរបស់ឈាមផងដែរ។ ប្លាស្មាមានចំនួនពី 55 ទៅ 65% នៃបរិមាណឈាមសរុបនៅក្នុងខ្លួនរបស់មនុស្ស។) នៅក្នុងរយៈពេលប៉ុន្មានខែខាងមុខ។
ប្លាស្មា គឺជាអង្គធាតុរាវពណ៌លឿងខ្ចី ហើយវាក៏ជាសមាសធាតុសំខាន់មួយរបស់ឈាមផងដែរ។ ប្លាស្មាមានចំនួនពី 55 ទៅ 65% នៃបរិមាណឈាមសរុបនៅក្នុងខ្លួនរបស់មនុស្ស
លោក Marcin Pirog នាយករបស់ក្រុមហ៊ុន Biomed Lublin បានឱ្យដឹងថា ថ្នាំនេះត្រូវបានបង្កើតឡើងដោយវិធីបំបែកជាកំណាត់នូវប្លាស្មារបស់អ្នកមានសុខភាពល្អ ដែលរួមមានទាំងអ្នកកំពុងផ្ទុកវីរុសCOVID-19 ប៉ុន្តែមានអាការរោគស្រាល ឬមិនមានរោគសញ្ញា និងមានផ្ទុក globulin ប្រឆាំងនឹងវីរុសCOVID-19។
លោក Marcin Pirog និយាយថា ក្រុមហ៊ុនរបស់លោក បានផលិត globulin ប្រឆាំងនឹងវីរុសCOVID-19 ចំនួនជាង3,000អំពូល។ ក្រោយពីទទួលបានជោគជ័យក្នុងការធ្វើតេស្តចាំបាច់នានា ដែលរួមមានទាំងការពិសោធទៅលើកម្រិតនៃស្ថិរភាពរបស់ផលិតផលជាដើម ថ្នាំនេះនឹងត្រូវបានដាក់ឱ្យព្យាបាលសាកល្បងភ្លាមៗនៅក្នុងមជ្ឈមណ្ឌលចំនួន4 នៅ Lublin, Bytom, Białystok និង Warsaw។ តាមគម្រោង ការដាក់ឱ្យព្យាបាលសាកល្បងតាមបែបមិនមែនពាណិជ្ជកម្មនេះ ត្រូវបានគេរៀបផែនការសម្រាប់ដំណើរការនៅក្នុងត្រីមាសទី4 ឆ្នាំ2020នេះ៕
ប្រភព៖ TFN
September 25, 2020
មើលទៅ ដូចជារាងធ្ងន់ធ្ងរជាងមុន! បារាំងឆ្លងមេរោគ 1ថ្ងៃ លើសខ្ទង់ម៉ឺន ឯអេស្ប៉ាញក៏នៅតែយ៉ាប់យ៉ឺន!
ប្រទេសបារាំង កាលពីថ្ងៃអង្គារ(ទី22កញ្ញា) បានរាយការណ៍អំពីការរកឃើញអ្នកឆ្លងមេរោគវីរុសកូរ៉ូណាប្រភេទថ្មី(កូវីដ-19) ច្រើនជាង 1ម៉ឺននាក់ក្នុងអំឡុងពេល 24ម៉ោង ដែលនេះជាតួលេខលើសខ្ទង់ម៉ឺន ជាថ្ងៃទី6ហើយ ក្នុងអំឡុងពេល 12ថ្ងៃចុងក្រោយ ខណៈដែលអេស្ប៉ាញ ស្ថានការណ៍ ក៏វិលត្រឡប់ទៅរកសភាវអាក្រក់ មិនចាញ់គ្នាប៉ុន្មានដែរ ដោយតួលេខអ្នកឆ្លងមេរោគប្រចាំថ្ងៃចុងក្រោយបំផុត ហក់ឡើងដល់ជិត 10,800នាក់។
ក្រសួងសាធារណៈសុខាភិបាលបារាំង បានរាយការណ៍ពីការរកឃើញអ្នកឆ្លងមេរោគ 10,008នាក់ ក្នុងថ្ងៃអង្គារ(ទី22កញ្ញា) កើនឡើងយ៉ាងច្រើនពី 5,298នាក់ កាលពីថ្ងៃចន្ទ(ទី21កញ្ញា) តែធ្លាក់ចុះពីកម្រិត 10,569នាក់នៅថ្ងៃអាទិត្យ(ទី20កញ្ញា) ខណៈដែលតួលេខអ្នកឆ្លងមេរោគប្រចាំថ្ងៃខ្ពស់បំផុត រាប់ចាប់ពីមានការឆ្លងរាលដាលមក ទើបតែកើតមានកាលពីថ្ងៃសៅរ៍(ទី19កញ្ញា)ក្នុងចំនួន 13,498នាក់។ ទាំងអស់នេះ បានធ្វើឱ្យចំនួនអ្នកឆ្លងមេរោគ កើនឡើងដល់ 468,069នាក់។
ក្រសួងសាធារណៈសុខាភិបាលបារាំង ថែមទាំងបានរាយការណ៍ពីការរកឃើញអ្នកស្លាប់ កើនឡើង 78នាក់ ដែលធ្វើឱ្យចំនួនអ្នកស្លាប់សរុបកើនឡើងដល់ 31,416នាក់ ដោយចំនួនអ្នកស្លាប់ក្នុងថ្ងៃអង្គារ(ទី22កញ្ញា) គឺជាចំនួនខ្ពស់ជាងកម្រិតមធ្យម 7ថ្ងៃ ដែលស្ថិតក្នុងចំនួនប្រមាណជា 60នាក់ក្នុង 1ថ្ងៃ។
ក្រៅពីនេះ ទិន្នន័យខាងក្រសួងសាធារណៈសុខាភិបាលបារាំង នៅបានរកឃើញទៀតថា ចំនួនអ្នកចូលព្យាបាលនៅក្នុងមន្ទីរពេទ្យ បានកើនឡើងជាបន្តបន្ទាប់ក្នុងអំឡុង3 ក្នុង4សប្ដាហ៍ចុងក្រោយ ដោយក្នុងថ្ងៃអង្គារ(ទី22កញ្ញា) បានកើនឡើង 180នាក់ សរុប 5,796នាក់។
ចំណែកចំនួនអ្នកដែលត្រូវចូលព្យាបាលនៅក្នុងបន្ទប់សង្គ្រោះបន្ទាន់ ដែលជាចំនួនវាស់ពីសក្ដានុពលរបស់ប្រព័ន្ធសាធារណៈសុខាភិបាល ក្នុងការទប់ទល់នឹងជំងឺរាតត្បាតដ៏ធំនេះ បានកើនឡើង 32នាក់ សរុប 951នាក់ តែ នៅតែតិចជាងកម្រិតខ្ពស់បំផុតកាលពីអំឡុងដើមខែមេសា ដែលគ្រានោះ តួលេខបានហក់ឡើងដល់កម្រិត 7,148នាក់ឯណោះ។
បារាំង ក៏ដូចប្រទេសជាច្រើននៅក្នុងទ្វីបអឺរ៉ុបដែរ ដែលអត្រាការឆ្លងមេរោគ បានវិលមកកើនឡើងខ្ពស់ក្នុងខែកន្លងទៅ បណ្ដាលឱ្យពួកគេត្រូវលើកកម្ពស់វិធានការទប់ស្កាត់ការឆ្លងរាលដាល ដោយបានបង្កើនភាពតឹងរ៉ឹង ដាក់កំណត់ផ្នែកការជួបជុំរបស់សាធារណជន ឬបុគ្គល ក្នុងទីតាំងផ្សេងៗ ដែលកំពុងរងផលប៉ះពាល់ធ្ងន់ធ្ងរបំផុត។
ក្រៅពីប្រទេសបារាំងហើយ អេស្ប៉ាញ ក៏ជាប្រទេស 1ទៀតដែរ ដែលស្ថានការណ៍ឆ្លងរាលដាល បានវិលមកអាក្រក់ឡើងវិញ ដោយចុងក្រោយបំផុត អេស្ប៉ាញរកឃើញអ្នកឆ្លងមេរោគថ្មីប្រចាំថ្ងៃ កើនឡើងជិត 10,800នាក់ កាលពីថ្ងៃអង្គារ(ទី22កញ្ញា) ធ្វើឱ្យចំនួនអ្នកឆ្លងមេរោគសរុបចំនួន 682,267នាក់ ខណៈដែលតំបន់ កាតាឡូនី បានឱ្យដឹងថា នឹងលើកកម្ពស់ការដាក់កំណត់ការជួបជុំរបស់សាធារណជន។
ដោយបានរកឃើញអ្នកស្លាប់បន្ថែមទៀត 21នាក់ ក្នុងអំឡុងពេល 24ម៉ោងកន្លងមក ធ្វើឱ្យចំនួនអ្នកស្លាប់ដោយសារកូវីដ-19 នៅក្នុងប្រទេសអេស្ប៉ាញ ឡើងដល់ 30,904នាក់។
ទិន្នន័យរបស់ក្រសួងសាធារណៈសុខាភិបាលអេស្ប៉ាញ បានបញ្ជាក់ថា មានអ្នកឆ្លងមេរោគកូវីដ-19 ច្រើនជាង 10,600នាក់ ដែលកំពុងសម្រាកព្យាបាលនៅក្នុងមន្ទីរពេទ្យ ក្នុងនោះ 1,348នាក់ ស្ថិតក្នុងបន្ទប់សង្គ្រោះបន្ទាន់។ អេស្ប៉ាញ មានចំនួនអ្នកឆ្លងមេរោគកូវីដ-19 ខ្ពស់ជាងគេបំផុតនៅក្នុងតំបន់អឺរ៉ុបខាងលិច ហើយមន្ត្រីសុខាភិបាលតំបន់កាតាឡូនី បានប្រាប់ថា ពួកគេនឹងដាក់កំណត់លើការប្រមូលផ្ដុំរបស់ប្រជាជន ច្រើនបំផុតមិនលើស 6នាក់ ដែលកាលពីមុនបាន10នាក់ នៅទូទាំងតំបន់ខាងកើតឆៀងខាងជើងមួយនេះ ដើម្បីកាត់បន្ថយភាពប្រថុយប្រថានពីការចម្លងសាយភាយមេរោគ។
នៅក្នុងតំបន់អ្នកប្រើកម្លាំងពលកម្មមួយចំនួនក្នុងទីក្រុងម៉ាឌ្រីត ជាចំណុចដែលតួលេខអ្នកឆ្លងមេរោគហក់ឡើងខ្ពស់បំផុតនោះ អាជ្ញាធរតំបន់ បានចេញបញ្ជាឱ្យបិទទីតាំងមួយចំនួន តាំងពីថ្ងៃចន្ទរហូតមក ដែលបញ្ហានេះបានជំរុញឱ្យកើតមានការតវ៉ាទាមទារ និងបង្កឱ្យមានការចោទប្រកាន់ថា អាជ្ញាធរ ជ្រើសរើសប្រតិបត្តិតែលើទីតាំងអ្នកក្រ៕
ប្រភព៖ សារព័ត៌មានបរទេស

September 23, 2020
ចិនរកឃើញទៀតហើយ អាហារក្លាស្សេ នាំចូលពីរុស្ស៊ី លទ្ធផលពិនិត្យ វិជ្ជមានកូវីដ-19
សារព័ត៌មានស៊ីនហួ បានរាយការណ៍ថា រដ្ឋបាលក្នុងតំបន់ទីក្រុងឆាងឈុន ទីក្រុងធំរបស់មណ្ឌលជីលីន ភាគខាងកើត ឆៀងខាងជើងនៃប្រទេសចិន បានពិនិត្យរកឃើញនៅលើគំរូសម្ភារវេចខ្ចប់អាហារសមុទ្រក្លាស្សេរឹង ដែលនាំចូលមកពីបរទេស មានលទ្ធផលពិនិត្យមេរោគវីរុសកូរ៉ូណាប្រភេទថ្មី វិជ្ជមាន។
សម្ភារវេចខ្ចប់ទាំងនោះ បាននាំចូលមកពីប្រទេសរុស្ស៊ី និងមានលទ្ធផលពិនិត្យរកមេរោគ វិជ្ជមាន ក្នុងអំឡុងពេលពិនិត្យចម្រាញ់រកមេរោគកូវីដ-19 តាមប្រក្រតី កាលពីថ្ងៃសុក្រ ទី18 កញ្ញា ដោយមជ្ឈមណ្ឌលគ្រប់គ្រង និងការពារជំងឺនៃទីក្រុងឆាងឈុន ដែលបានអះអាងលទ្ធផលនៃការពិនិត្យនេះ នៅថ្ងៃសៅរ៍ ទី19កញ្ញា។
អង្គភាពសាធារណៈសុខាភិបាលរបស់ទីក្រុងឆាងឈុន បានតាមស្វែងរកអ្នកដែលធ្វើការប៉ះពាល់ជិតស្និទ្ធជាមួយសម្ភារវេចខ្ចប់ទាំងនោះ និងបាននាំខ្លួនមកដាក់នៅក្រោមការពិនិត្យតាមដានពីក្រុមគ្រូពេទ្យ តែបច្ចុប្បន្ន ទាំងអស់គ្នានោះ នៅមានលទ្ធផលអវិជ្ជមាននៅឡើយ។
សេចក្ដីប្រកាស ពីអង្គភាពផ្នែកការការពារ និងគ្រប់គ្រងជំងឺរាតត្បាតរបស់ទីក្រុង កាលពីថ្ងៃអាទិត្យ ទី20 កញ្ញា បានឱ្យដឹងថា សម្ភារវេចខ្ចប់ខាងលើនោះ មានទម្ងន់ 10គីឡូក្រាម និងត្រូវបានបញ្ជូនមកទីក្រុងហ្វ៊ូអ៊ី របស់ជីលីន។
ក្រៅពីនេះ អង្គភាពសាធារណៈសុខាភិបាលរបស់ទីក្រុងឆាងឈុន បានអំពាវនាវឱ្យប្រជាជនដែលអាចមានប៉ះពាល់ជិតស្និទ្ធនឹងសម្ភារវេចខ្ចប់ទាំងនោះ ត្រូវមកបង្ហាញខ្លួននៅអង្គភាពសាធារណៈសុខាភិបាលគ្រប់ជាន់ថ្នាក់ នៅតាមភូមិឃុំ និងចូលទៅទទួលការពិសោធ អាស៊ីត នីវគ្លីអ៊ិក ដើម្បីពិនិត្យរកមេរោគកូវីដ-19៕
ប្រភព៖ សាព័ត៌មានបរទេស
September 22, 2020
គ្រូពេទ្យវៀតណាមស្រឡាំងកាំង ឃើញដែកកេះ ស៊ីរ៉ាងចាក់ថ្នាំ ជ័រប្លាស្ទិក និងដុំថ្ម នៅក្នុងពោះអ្នកជំងឺ
លោកវេជ្ជបណ្ឌិត ង្វៀង ឌុក ជីន នៅមន្ទីរពេទ្យ Viet Duc បានធ្វើការព្យាបាលអ្នកជំងឺប្រុស វ័យ 55ឆ្នាំម្នាក់ កាលពីថ្ងៃសុក្រកន្លងទៅ(ទី18កញ្ញា) ដោយការស៊កបញ្ចូលម៉ាស៊ីនថតពិនិត្យមើលក្រពះ និងពោះវៀន ក្រោយពីអ្នកជំងឺរូបនោះ ត្រូវគេនាំមកមន្ទីរពេទ្យដោយមានអាការឈឺបំពង់កយ៉ាងខ្លាំងក្លា ទទួលទានអាហារ ឬលេបអ្វីមិនបានទាល់តែសោះ។ ក្រោយពីការពិនិត្យរួច លោកវេជ្ជបណ្ឌិតបានរកឃើញមាន ផ្លែឡាមកោរពុកមាត់ជាប់នៅក្នុងបំពង់កផ្នែកខាងក្រោយរបស់អ្នកជំងឺរូបនោះ។ លុះដល់ពិនិត្យមើលខាងក្នុងក្រពះអាហារ ក៏ស្រាប់តែនឹកចម្លែកចិត្តយ៉ាងខ្លាំងទៅទៀត នៅពេលរកឃើញវត្ថុចម្លែកៗជាច្រើនផ្សេងទៀត មានទាំងស៊ីរ៉ាងចាក់ថ្នាំ ដែកកេះ ដុំថ្មតូចៗ និងថង់ប្លាស្ទិក ដែលភាគច្រើន បានក្លាយជាពណ៌ខ្មៅអស់ទៅហើយ ដោយសារតែនៅក្នុងក្រពះ រយៈពេលយូរមកហើយ។
“ការវះកាត់ យកវត្ថុចម្លែកៗចេញមកលើកនេះ វាប្រៀបដូចជាការស្រង់យកវត្ថុបុរាណឡើងមកពីបាតសមុទ្រអ៊ីចឹង” លោកវេជ្ជបណ្ឌិតថ្លែងប្រៀបធៀប។
ចំណែកឯខាងក្រុមគ្រួសារអ្នកជំងឺ បានប្រាប់ថា អ្នកជំងឺម្នាក់នេះកើតជំងឺផ្លូវចិត្តជាង 30ឆ្នាំមកហើយ និងធ្លាប់បានចូលវះកាត់នៅឯមន្ទីរក្នុងតំបន់ ម្ដងរួចមកហើយកាលពីឆ្នាំកន្លងទៅ ហើយការវះកាត់កាលគ្រានោះ គឺដើម្បីយកវត្ថុប្លែកចម្លែកផ្សេងៗ ចេញពីក្នុងរាងកាយរបស់គាត់ដូចគ្នាដែរ។
ក្រុមគ្រូពេទ្យ នៅមិនទាន់អាចអធិប្បាយបានពីអាការខុសប្រក្រតីបែបនេះបាននៅឡើយ តែយល់ឃើញថា អាការជំងឺរបស់អ្នកជំងឺម្នាក់នេះ ស្រដៀងនឹងអាការ រ៉ាផាន់សេល ស៊ីនដ្រូម ឬTrichobezoar ជាអាការខុសប្រក្រតីខាងផ្លូវចិត្ត ដែលកម្រជួបប្រទះណាស់ ដោយអ្នកជំងឺ ច្រើនតែទាញសរសៃសក់ ឬរោមផ្សេងៗ ហើយដាក់ចូលមាត់ហូបចូលទៅ នៅពេលដែលប្រមូលសន្សំនៅខាងក្នុងខ្លួនកាន់តែច្រើនឡើង អ្នកជំងឺនឹងកើតមានអាការឈឺចុកចាប់ ព្រោះសរសៃសក់ មិនរំលាយបានទេ និងកើតការញ៉ុកស្ទះណែននៅក្នុងប្រអប់ពោះ ឬក្នុងប្រព័ន្ធរំលាយអាហារ៕
ប្រភព៖ សារព័ត៌មានបរទេស

September 22, 2020
ថៃ៖ យកយន្តហោះធ្វើជាហាងកាហ្វេ ដើម្បីជួយ “កាត់បន្ថយការនឹក” ចំពោះអារម្មណ៍នៅពេលជិះយន្តហោះនិងទេសចរណ៍
សម្រាប់មនុស្សជាច្រើនដែលកំពុងជាប់ក្នុងផ្ទះ ឬមិនអាចធ្វើដំណើរតាមយន្តហោះបានដូចមុន ព្រោះតែCOVID-19 ការបង្ហាញខ្លួនរបស់ “ហាងកាហ្វេយន្តហោះ” នៅប្រទេសថៃ បាននិងកំពុងនាំមកនូវឱកាសទទួលបទពិសោធន៍ថ្មី ដែលនេះហាក់ដូចជាពួកគេកំពុងស្ថិតនៅលើអាកាស ហើយគំនិតនេះ កំពុងទទួលបានជោគជ័យគួរសម។
នៅលើយន្តហោះពាណិជ្ជកម្មមួយគ្រឿងដែលបាន “ចូលនិវត្តន៍” គឺជាហាងកាហ្វេមួយមានឈ្មោះថា Coffee War ដែលមានទីតាំងនៅក្នុងទីក្រុង Pattaya ប្រទេសថៃ។ នៅទីនេះ ភ្ញៀវទាំងឡាយនឹងទទួលបានអារម្មណ៍ស្រស់ស្រាយជាមួយនឹងកៅអីលំដាប់លេខ1 និងអាចថតរូបទុកជាអនុស្សាវរីយ៍ដូចទៅនឹងពេលកំពុងជិះលើយន្តហោះដែលហោះហើរនៅលើវេហា។ ជាងនេះ គ្រប់គ្នាអាចចូលទៅក្នុងបន្ទប់សម្រាប់អ្នកបើកបរបានតាមចិត្ត ដែលនេះជាប្រការដែលពួកគេមិនអាចធ្វើបាននៅពេលធ្វើដំណើរតាមយន្តហោះធម្មតា។
នារីជាអតិថិជនម្នាក់ដែលមានឈ្មោះថា Thipsuda Faksaithong អាយុ26ឆ្នាំ បានថ្លែងថា៖ “ខ្ញុំអាចអង្គុយនៅក្នុងកាប៊ីនលំដាប់លេខ1 ឬធ្វើជាប្រធានក្រុមហោះហើរនៅក្នុងកាប៊ីនសម្រាប់អ្នកបើកបររបស់យន្តហោះ។ ប្រការនេះពិតជាអស្ចារ្យខ្លាំងណាស់”។
ចំណែក Chalisa Chuensranoi អាយុ25ឆ្នាំ និយាយថា “ការធ្វើដំណើរ” នៅឯ Coffee War បាននាំមកនូវបទពិសោធន៍មិនខុសអ្វីទៅនឹងជើងហោះហើរពិតៗនោះឡើយ។
ដោយឡែក នៅឯរាជធានីបាងកកវិញ ក៏មានហាងកាហ្វេយន្តហោះមួយត្រូវបានគេបើកទទួលភ្ញៀវនៅក្នុងទីស្នាក់ការកណ្ដាលរបស់ក្រុមហ៊ុនអាកាសចរណ៍ Thai Airways និងកំពុងទាក់ទាញអតិថិជនបានយ៉ាងច្រើនផងដែរ។ ក្រៅពីកាហ្វេ ហាងនេះក៏ទទួលបានការបញ្ជាទិញអាហារជាច្រើនប្រភេទ ដូចជាមី ឬសាច់គោបែបថៃទៀតផង។ សកម្មភាពនេះ ត្រូវបានគេចាត់ទុកថាជាវិធីសាស្ត្រមួយដើម្បីកុំឱ្យអតិថិជននឹកការហោះហើរខ្លាំងពេក នៅក្នុងគ្រាដែលជើងហោះហើរនានាត្រូវបានផ្អាកបណ្ដោះអាសន្នដើម្បីទប់ស្កាត់ការឆ្លងវីរុសCOVID-19។
Intrawut Simapichet វ័យ38ឆ្នាំ ដែលបាននាំប្រពន្ធកូនមកហាងនេះ និយាយថា វាជាបទពិសោធន៍មួយដែលលើសពីការទទួលទានអាហារលំដាប់ខ្ពស់ទៅទៀត។ លោកថ្លែងថា៖ “ជាធម្មតា ខ្ញុំជាមនុស្សដែលដើរទេសចរណ៍ជាញឹកញាប់។ នៅពេលត្រូវបង្ខំឱ្យនៅតែផ្ទះដោយសារតែរោគឆ្លង ខ្ញុំមានអារម្មណ៍មិនសប្បាយចិត្តសោះ។ ហាងកាហ្វេបែបនេះ បានជួយឱ្យមនុស្សដូចខ្ញុំនេះ អាចកាត់បន្ថយការនឹកអារម្មណ៍ហោះហើរទៅនេះទៅនោះបានខ្លះដែរ”។
ស្រដៀងទៅនឹងប្រការខាងលើនេះដែរ កាលពីខែមុន ក្រុមហ៊ុនអាកាសចរណ៍ Eva Air របស់តៃវ៉ាន់ ក៏បានបង្កើតជើងហោះហើរ “នៅនឹងកន្លែង” មួយ ដែលអូសបន្លាយពេល3ម៉ោង ដោយចាប់ផ្ដើមហោះចេញពីព្រលានយន្តហោះអន្តរជាតិ Taoyuan (Taiwan Taoyuan International Airport) និងហោះឆ្វែលនាយអាយនៅលើអាកាស រួចក៏ត្រលប់មកកាន់កន្លែងដើមវិញ។
មុននេះ ព្រលានយន្តហោះ Songshan របស់តៃវ៉ាន់ ក៏បាននាំមកនូវឱកាសជូនដល់អតិថិជនចំនួន90នាក់ ដោយការអនុញ្ញាតឱ្យចូលមកធ្វើទស្សនកិច្ចព្រលានយន្តហោះរបស់ខ្លួន ដើម្បីរំឭកឡើងវិញនូវអារម្មណ៍នៃការហោះហើរ និងទេសចរណ៍ ដោយមិនចាំបាច់ហោះផុតពីដី។ នៅទីនេះ អតិថិជនត្រូវបានអនុញ្ញាតឱ្យបំពេញបែបបទ “ចូលប្រទេស ឡើងយន្តហោះ” ហើយក្រោយមក “ត្រលប់មកវិញ” ដែលនេះគឺជាបែបបទនៃការហោះហើរ។
និយាយអំពីប្រទេសថៃវិញ គិតមកដល់បច្ចុប្បន្នប្រទេសនេះបានរកឃើញអ្នកឆ្លងវីរុសCOVID-19 ចំនួន3,480នាក់ ក្នុងនោះមានអ្នកស្លាប់58នាក់ និងអ្នកកំពុងព្យាបាល 107នាក់។ នៅទូទាំងពិភពលោក មកដល់ពេលនេះមានអ្នកជំងឺសរុប 29,445,847នាក់ ក្នុងនោះមាន 7,232,908នាក់កំពុងទទួលការព្យាបាល និង 932,746នាក់បានបាត់បង់ជីវិត៕
ប្រភព៖ SCMP, Worldometers
September 15, 2020
វេជ្ជបណ្ឌិតចិនប្រកាសថានឹងបញ្ចេញភស្ដុតាងបង្ហាញថា “COVID-19 មានប្រភពពីបន្ទប់ពិសោធន៍នៅ Wuhan”
អ្នកស្រី Meng Yan បានឱ្យដឹងថា ខ្លួននឹងប្រកាសបង្ហាញភស្ដុតាងដែលបញ្ជាក់ថា វីរុសCOVID-19 គឺជាផលិតដែលមនុស្សជាអ្នកបង្កើតឡើង និងមានប្រភពពីបន្ទប់ពិសោធន៍នៅទីក្រុង Wuhan នៃប្រទេសចិន។
ថ្មីៗនេះ នៅក្នុងកម្មវិធី talkshow Loose Women របស់ស្ថានីយទូរទស្សន៍ ITV (អង់គ្លេស) វេជ្ជបណ្ឌិត Li-Meng Yan អ្នកឯកទេសផ្នែកវីរុសសាស្ត្រដែលធ្លាប់បានធ្វើការនៅឯសាលាវេជ្ជសាស្ត្រសាធារណៈហុងកុង (ប្រទេសចិន) បានបង្ហើបឱ្យដឹងអំពីព័ត៌មានជាច្រើនដែលធ្វើឱ្យមានការភ្ញាក់ផ្អើលជាខ្លាំងទាក់ទងនឹងប្រភពពិតរបស់វីរុសCOVID-19។
អ្វីដែលគួរឱ្យចាប់អារម្មណ៍ជាងនេះ នោះគឺថា អ្នកស្រីវេជ្ជបណ្ឌិតជនជាតិចិនរូបនេះ បានឱ្យដឹងថា អ្នកស្រីកំពុងត្រៀមប្រកាសអំពីភស្ដុតាងផ្នែកវិទ្យាសាស្ត្រដែលបញ្ជាក់ថា វីរុសCOVID-19 គឺជាផលិតផលដែលមនុស្សជាអ្នកបង្កើតឡើង។
បន្ទាប់ពីបានចាកចេញពីទីក្រុងហុងកុង ដោយសារតែមានការព្រួយបារម្ភអំពីសុវត្ថិភាពផ្ទាល់ខ្លួន អ្នកស្រីវេជ្ជបណ្ឌិត Li-Meng Yan បានធ្វើបទសម្ភាសជាមួយអ្នកយកព័ត៌មានពីទីកន្លែងអាថ៌កំបាំងមួយ ក្នុងនោះអ្នកស្រីបានឱ្យដឹងថា ព័ត៌មានទាំងឡាយស្ដីអំពីអ្នកស្រី ត្រូវបានគេលុបចេញពីមូលដ្ឋានទិន្នន័យរបស់រដ្ឋាភិបាលចិន។
នៅក្នុងកម្មវិធី talkshow Loose Women កាលពីថ្ងៃទី11កញ្ញា អ្នកស្រី Yan ថ្លែងថា៖ “ជាដំបូង ព័ត៌មានដែលនិយាយថា COVID-19 ឆ្លងរាលដាលចេញពីផ្សារមួយនៅទីក្រុង Wuhan គឺគ្រាន់តែជា “ផ្ទាំងវាំងនន” សម្រាប់បិទបាំងការពិតតែប៉ុណ្ណោះ ហើយវីរុសនេះមិនមានប្រភពពីធម្មជាតិនោះទេ”។
នៅពេលត្រូវបានសួរអំពីប្រភពពិតរបស់វីរុសCOVID-19 អ្នកស្រី Yan បានអះអាងថា៖ “វាកើតចេញពីបន្ទប់ពិសោធន៍នៅ Wuhan”។
អ្នកស្រីវេជ្ជបណ្ឌិត Yan ថ្លែងថា៖ “លំដាប់នៃប្រព័ន្ធហ្សែនគឺដូចទៅនឹងស្នាមក្រយៅដៃរបស់មនុស្ស។ ដូច្នេះ យោងទៅតាមប្រការនេះ អ្នកអាចផ្ទៀតផ្ទាត់បានអំពីបញ្ហាទាំងឡាយខាងលើ។ ខ្ញុំប្រើប្រាស់ភស្ដុតាងនានាដើម្បីបង្ហាញឱ្យអ្នកគ្រប់គ្នាបានដឹងថា ហេតុអ្វីបានជាវីរុសCOVID-19 មានប្រភពពីបន្ទប់ពិសោធន៍នៅប្រទេសចិន និងហេតុអ្វីបានជាពួកគេគឺជាមនុស្សតែមួយក្រុមគត់ដែលបង្កើតវា (វីរុស)”។
“សូម្បីតែនៅពេលមិនមានចំណេះដឹងច្រើនអំពីជីវសាស្ត្រ អ្នកក៏នៅតែអាចអាន ផ្ទៀតផ្ទាត់ និងបញ្ជាក់ការពិតដោយខ្លួនឯងបានដែរ។ ការដឹងច្បាស់អំពីប្រភពពិតរបស់វីរុសគឺជារឿងសំខាន់ បើមិនដូច្នេះទេ យើងនឹងមិនអាចឆ្លងផុតវិបត្តិសុខភាព ហើយ COVID-19 នឹងគំរាមកំហែងដល់អាយុជីវិតរបស់មនុស្សគ្រប់គ្នា”។
វេជ្ជបណ្ឌិត Li-Meng Yan
វេជ្ជបណ្ឌិត Li-Meng Yan ធ្លាប់ធ្វើការនៅសាកលវិទ្យាល័យដ៏ល្បីឈ្មោះមួយនៅទីក្រុងហុងកុង ជាមជ្ឈមណ្ឌលស្រាវជ្រាវជំងឺឆ្លងលំដាប់ពិភពលោក និងជាស្ថាប័នសំខាន់មួយនៅក្នុងបណ្ដាញគ្រប់គ្រងជំងឺរាតត្បាតរបស់អង្គការសុខភាពពិភពលោក (WHO) ផងដែរ។
អ្នកស្រីវេជ្ជបណ្ឌិតថ្លែងថា អ្នកស្រីគឺជាមនុស្សម្នាក់ក្នុងចំណោមអ្នកវិទ្យាសាស្ត្រកំពូលៗដែលបានស្រាវជ្រាវអំពីវីរុស Corona មួយប្រភេទដែលបង្កឱ្យមានមហារោគរាតត្បាតCOVID-19។ កាលពីខែធ្នូ2019 ថ្នាក់លើរបស់អ្នកស្រី Li-Meng Yan នៅឯវិទ្យាស្ថានសុខាភិបាលសាធារណៈហុងកុង បានស្នើឱ្យអ្នកស្រីស្រាវជ្រាវលើសម្បុកវីរុសចម្លែកមួយដែលត្រូវបានគេចាត់ទុកថា ដូចទៅនឹងវីរុសSARS កំពុងបង្ហាញខ្លួននៅប្រទេសចិន។
វេជ្ជបណ្ឌិត Yan ថែមទាំងបានបង្ហើបឱ្យដឹងថា តាមរយៈទំនាក់ទំនងក្នុងវិស័យវិទ្យាសាស្ត្រ និងសុខាភិបាលរបស់ខ្លួន អ្នកស្រីបានរកឃើញថា មានការបិទបាំងអំពីទំហំនៃការឆ្លងរាលដាល ហើយបានចោទទីក្រុងប៉េកាំងថា បានព្យាយាមបង្វែងដានព័ត៌មានអំពីប្រភពរបស់វីរុសCOVID-19។
នៅពេលមានមនុស្សស្លាប់កាន់តែច្រើនឡើងដោយសារCOVID-19 វេជ្ជបណ្ឌិត Yan គិតថា អ្នកស្រីត្រូវតែមានទំនួលខុសត្រូវផ្នែកសីលធម៌ និងវិទ្យាសាស្ត្រ ហើយអ្នកស្រីក៏បានសម្រេចចិត្តនិយាយការពិត។ បច្ចុប្បន្ន អ្នកវិទ្យាសាស្ត្រចិនរូបនេះ ត្រូវបានគេជឿថា កំពុងស្ថិតនៅលើទឹកដីសហរដ្ឋអាម៉េរិក និងកំពុងមានការព្រួយបារម្ភយ៉ាងខ្លាំងអំពីសុវត្ថិភាពផ្ទាល់ខ្លួន។
ប្រតិកម្មទៅនឹងការប្រកាសរបស់អ្នកស្រីវេជ្ជបណ្ឌិត Yan លោក Ma Xiaowei ដែលជាប្រធានគណៈកម្មការសុខាភិបាលជាតិចិន បានអះអាងថា៖ “ការពិតគឺថា រដ្ឋាភិបាលចិនមិនមានការយឺតយ៉ាវ ឬបិទបាំងអ្វីទាំងអស់នៅទីនេះ។ រដ្ឋាភិបាលបានធ្វើសេចក្ដីរាយការណ៍អំពីតួលេខនានានៃវីរុស ព្រមទាំងផ្ដល់ព័ត៌មានដល់អន្តរជាតិឱ្យបានរហ័សតាមដែលអាចធ្វើទៅបាន។
លោក Ma Xiaowei ថ្លែងថា៖ បន្ទាប់ពីកំណត់បានករណីឆ្លងវីរុសនៅ Wuhan ប្រទេសចិនបានធ្វើសកម្មភាពភ្លាមៗដើម្បីស្រាវជ្រាវនិងទប់ស្កាត់ការឆ្លងរាលដាល”។
ប្រទេសចិន ជាច្រើនលើកច្រើនសាហើយដែលបានបដិសេធថា COVID-19 មិនបានឆ្លងរាលដាលចេញពីបន្ទប់ពិសោធន៍នោះទេ ដោយបានលើកឡើងថា៖ “អង្គការសុខភាពពិភពលោក (WHO) បានអះអាងជាច្រើនលើកហើយថា មិនមានភស្ដុតាងណាមួយដែលបង្ហាញថា វីរុសCOVID-19 ត្រូវបានបង្កើតឡើងក្នុងបន្ទប់ពិសោធន៍ឡើយ”។
ភាគីខាង WHO ក៏បានលើកឡើងអំពីការយល់ឃើញរបស់ខ្លួនចំពោះការអះអាងរបស់អ្នកស្រីវេជ្ជបណ្ឌិត Yan ៖ “WHO បានប្រកាសអំពីស្ថានភាពបន្ទាន់នៅទូទាំងពិភពលោកជាមួយនឹងCOVID-19 កាលពីថ្ងៃទី30មករា2020 ដែលនេះគឺជាកម្រិតនៃការប្រកាសអាសន្នខ្ពស់បំផុត បើយោងទៅតាមច្បាប់សុខាភិបាលអន្តរជាតិ”។
ស្ថានីយទូរទស្សន៍ ITV ដកស្រង់សម្ដីរបស់សាស្ត្រាចារ្យមួយរូបដែលធ្វើការជាមួយវេជ្ជបណ្ឌិត Yan នៅវិទ្យាស្ថានសុខាភិបាលសាធារណៈហុងកុង បានឱ្យដឹងថា៖ “វេជ្ជបណ្ឌិត Yan គឺជានិស្សិតថ្នាក់ក្រោយឧត្តមសិក្សានៅបន្ទប់ពិសោធន៍របស់ខ្ញុំ។ ការស្រាវជ្រាវរបស់នាង មិនទាក់ទងទៅនឹងបញ្ហាវីរុសCOVID-19 ឆ្លងពីមនុស្សទៅមនុស្សនោះទេ។ អ្នកវិទ្យាសាស្ត្រផ្លូវការទាំងអស់ សុទ្ធតែមិនបានរកឃើញភស្ដុតាងប្រាកដប្រជាណាមួយដែលបង្ហាញថា វីរុសCOVID-19 ត្រូវបានបង្កើតឡើងដោយស្នាដៃមនុស្សនោះឡើយ”៕
ប្រភព៖ Daily Mail
September 15, 2020