Author: សឿន សំណាង

មូលបត្រអនាគតអាមេរិក ប្រាក់ដុល្លារអាមេរិក ប្រេងឆៅ និងតម្លៃមាស បាននិងកំពុងប្រែប្រួលខ្លាំង បន្ទាប់ពីមានព័ត៌មានផ្សាយថា ប្រធានាធិបតីសហរដ្ឋអាមេរិក និងភរិយា វិជ្ជមានជាមួយនឹងវីរុសCOVID-19។

បច្ចុប្បន្ន សន្ទស្សន៍ DJIA អនាគត (Dow Jones Industrial Average) បានបាត់បង់1.5%, S&P 500 ថយចុះ1.57% និង Nasdaq បាត់បង់1.9%។ បណ្ដាសន្ទស្សន៍នេះ បានដាំក្បាលចុះ ក្រោយពីមានព័ត៌មានថា នាង Hope Hicks ដែលជាជំនួយការផ្ទាល់របស់លោក Trump ត្រូវបានគេបញ្ជាក់ថា មានផ្ទុកវីរុសCOVID-19។ ប៉ុន្តែ ការដាំក្បាលចុះរបស់សន្ទស្សន៍នៃផ្សារមូលបត្រនៅសហរដ្ឋអាមេរិក បានចាប់ផ្ដើមបង្កើនល្បឿន បន្ទាប់ពីប្រធានាធិបតីសហរដ្ឋអាមេរិក បានប្រកាសនៅលើ Twitter ថា លោក និងភរិយា សុទ្ធតែបានឆ្លងវីរុសCOVID-19។

ផ្ទុយទៅវិញ ប្រាក់ដុល្លារអាមេរិក បែរជាមានតម្លៃជាងមុន ក្រោយពីមានព័ត៌មានខាងលើ ពិសេសនៅពេលដែលគេប្រៀបធៀបជាមួយនឹងលុយផោនរបស់អង់គ្លេស ដុល្លារអូស្ត្រាលី និងដុល្លារនូវវែលហ្សេឡង់។ ចំណែកប្រាក់យ៉េនរបស់ជប៉ុនក៏កំពុងតែឡើងថ្លៃ ដែលនេះគឺជាសញ្ញាបង្ហាញថា ក្រុមវិនិយោគិនកំពុងតែធ្វើសកម្មភាពដើម្បីបញ្ចៀសហានិភ័យ។ តម្លៃមាសទម្រង់ទិញភ្លាមប្រគល់ភ្លាមរបស់ពិភពលោកក៏ឡើងថ្លៃជិត30ដុល្លារដោយប្រើពេលតែកន្លះម៉ោងប៉ុណ្ណោះ ពោលគឹឡើងថ្លៃពី 1,890ដុល្លារ ទៅ1,906ដុល្លារក្នុងមួយអោន (ounce)។

ការប្រាក់នៃមូលបត្របំណុលរបស់រដ្ឋាភិបាលអាមេរិកប្រភេទ10ឆ្នាំ បានថយមកនៅត្រឹម 0.6578%។ ប្រការនេះមានន័យថា តម្លៃនៃប្រភេទមូលបត្របំណុលនេះ កំពុងតែឡើងថ្លៃ។

នៅក្នុងទីផ្សារប្រេងឆៅ តម្លៃប្រេងប្រភេទ Brent បច្ចុប្បន្នធ្លាក់ចុះ3.62% មកនៅត្រឹម39.45ដុល្លារក្នុងមួយធុង (បារ៉ែល)។ ប្រេងឆៅអាមេរិក WTI ក៏បាត់បង់តម្លៃ3.64% មកនៅត្រឹម37.31ដុល្លារក្នុងមួយធុង។ កាលពីម្សិលមិញ ប្រេងទាំង2ប្រភេទនេះ សុទ្ធតែបាត់បង់តម្លៃជិត4%។

ការដែលលោក Trump វិជ្ជមានជាមួយនឹងCOVID-19 គឺអាចធ្វើឱ្យមានរលកនៃការប្រែប្រួលថ្មីនៅក្នុងទីផ្សារពិភពលោក ដោយសារតែក្រុមអ្នកវិនិយោគកំពុងតែតាមដានស្ថានការណ៍នៃការឃោសនារកសំឡេងឆ្នោតរបស់លោក Trump និងលោក Biden។ Sean Callow អ្នកជំនាញខាងយុទ្ធសាស្ត្ររូបិយវត្ថុ មកពីក្រុមហ៊ុន Westpac យល់ថា៖ “បញ្ហានេះ (ការឆ្លងCOVID-19 របស់លោក Trump) នឹងកាត់បន្ថយសមត្ថភាពនៃការធ្វើសកម្មភាពឃោសនារកសំឡេងឆ្នោតរបស់លោក Trump។ វាក៏នឹងនាំឱ្យលោក ទទួលរងការខាតបង់ច្រើន ព្រោះតែលោក Trump យល់ឃើញថា “មិនគួរព្រួយបារម្ភខ្លាំងពេកអំពីមហារោគរាតត្បាត””៕

ប្រភព៖ CNBC

លោក ដូណាល់ ត្រាំ ប្រធានាធិបតី នៃសហរដ្ឋអាមេរិក បានបង្ហើបឱ្យដឹងថា លោក និងលោកស្រី មេឡានៀ ត្រាំ ភរិយារបស់លោក បានទទួលលទ្ធផលពិនិត្យមេរោគវីរុសកូរ៉ូណាប្រភេទថ្មី(កូវីដ-19)ដែលចេញមកហើយ គឺវិជ្ជមាន ហើយពេលនេះ លោក និងភរិយា កំពុងចាប់ផ្ដើមចូលក្នុងដំណើរការបង្ខាំងខ្លួននៅដោយឡែក និងព្យាបាលជាបន្ទាន់ភា្លមៗតែម្ដង៕

ប្រភព៖សាព័ត៌មានបរទេស

សុនខ ឆ្មា ទន្សាយ និងសត្វចិញ្ចឹមផ្សេងៗទៀតប្រមាណជា 4,000ក្បាល ដែលគេជឿថា ត្រូវបានកុម្ម៉ង់ទិញតាមអនឡាញ ត្រូវបានរកឃើញក្នុងសភាពងាប់ស្ដូកៗនៅក្នុងប្រអប់ក្រដាសបញ្ជូនទំនិញ នៅឯមជ្ឈមណ្ឌលឡូជីស្ទិកមួយកន្លែងនៅភាគកណ្ដាលនៃប្រទេសចិន ក្រោយពីជាប់គាំងនៅក្នុងមជ្ឈមណ្ឌលនោះយូរជាង 1សប្ដាហ៍។ នេះបើតាមទិន្នន័យរបស់ក្រុមអ្នកការពារសុវត្ថិភាពសត្វ។

ក្រុមមន្ត្រីអាចជួយជីវិតសត្វទន្សាយ ហ៊ែមស្ទើរ ឆ្កែ និងឆ្មា បានប្រមាណជា 1,000ក្បាល តែនៅសល់ប៉ុន្មាន បានងាប់តាំងពីមុនពេលដែលពួកវាត្រូវបានបញ្ជូនមកដល់មជ្ឈមណ្ឌលចែកចាយទំនិញតុងស៊ិង ក្នុងទីក្រុងលួហ៊ើរ មណ្ឌលហ៊ើណាន កាលពីថ្ងៃទី22 កញ្ញាកន្លងទៅ។

Li Chade ប្លុកគើរផ្នែកសត្វចិញ្ចឹម បានផ្ដល់ទិន្នន័យថា សត្វចិញ្ចឹមទាំងនោះ ត្រូវបានបញ្ជូនទៅឱ្យអ្នកទិញទូទាំងប្រទេស ដែលកុម្ម៉ង់ទិញតាមអនឡាញ ដោយដឹកជញ្ជូនតាមរថយន្តដឹកទំនិញ ពីកសិដ្ឋាន ទៅឃ្លាំងស្តុកទំនិញនៅក្នុងទីក្រុងជឹងចូ ភាគកណ្ដាល មុននឹងបញ្ជូនបន្តទៅឯឃ្លាំងស្តុកទំនិញក្នុងទីក្រុងលួហ៊ើរ ក្រោយពីសត្វចំនួនដ៏ច្រើន បានស្លាប់កណ្ដាលផ្លូវ។

ស្ត្រីអ្នកស្ម័គ្រចិត្តម្នាក់ របស់ក្រុម Utopia Animal Rescue បានប្រាប់ថា “យើងធ្លាប់បានជួយសង្គ្រោះពីមុនមកហើយ តែលើកនេះ គឺជាលើកដំបូងហើយ ដែលខ្ញុំត្រូវមកជួបនូវអ្វីដែលគួរឱ្យសោកសង្រេងបែបនេះ…ពេលយើងទៅដល់ មានប្រអប់ក្រដាសបញ្ជូនទំនិញ គរដូចភ្នំ ដែលមានសត្វចិញ្ចឹមនៅខាងក្នុង សត្វជាច្រើនក្បាលបានស្លាប់ និងចាប់ផ្ដើមធុំក្លិនស្អុយ គួរឱ្យខ្ពើមខ្លាំងណាស់”។

អាជ្ញាធរកំពុងស្ថិតក្នុងអំឡុងពេលស៊ើបអង្កេតពីហេតុការណ៍ដែលកើតឡើងនេះ គឺជាហេតុការណ៍ 1ទៀតដែលបង្កឱ្យកើតមានក្ដីកង្វល់ពាក់ព័ន្ធនឹងការគ្មានច្បាប់ទម្លាប់ក្នុងការទិញ-លក់សត្វចិញ្ចឹមតាមអនឡាញនៅក្នុងប្រទេសចិន។ ដោយសារតែមុខជំនួញ E-Commerce កំពុងតែពង្រីកខ្លួន បែបគ្រប់ដណ្ដប់ទូទាំងចក្កវាឡ ក្នុងនោះរួមទាំងការអាចទិញ-លក់សត្វមានជីវិតតាមអនឡាញផងដែរ តែជាញឹកញាប់ណាស់ ដែលសត្វចិញ្ចឹមទាំងនោះ ត្រូវបានដឹកជញ្ជូន ក្នុងសភាពគ្មានសុវត្ថិភាពដោយបណ្ដាក្រុមហ៊ុនដឹកជញ្ជូនទំនិញទាំងឡាយ៕

ប្រភព៖ សារព័ត៌មានបរទេស

ក្រុមប្រដាប់អាវុធដែលស្និទ្ធនឹងអ៊ីរ៉ង់ បានបាញ់រ៉ុកកែតចំនួន6គ្រាប់ទៅលើមូលដ្ឋានទ័ពអាកាសអ៊ីរ៉ាក់ដែលមានកងទ័ពសហរដ្ឋអាមេរិកកំពុងបំពេញបេសកកម្ម ក៏ប៉ុន្តែមិនបានបង្កឱ្យមានមនុស្សស្លាប់នោះឡើយ។

“កងកម្លាំងប្រដាប់អាវុធ Hashed al-Shaabi បានបាញ់រ៉ុកកែតចំនួន6គ្រាប់ចេញពីខេត្ត Nineveh សំដៅលើព្រលានយន្តហោះ Erbil ជាកន្លែងដែលកងទ័ពអាមេរិកកំពុងឈរជើង” នេះបើតាមសេចក្ដីប្រកាសកាលពីថ្ងៃទី30កញ្ញារបស់អង្គភាពប្រឆាំងភេរវកម្មនៃតំបន់ស្វយ័តរបស់ជនជាតិឃឺដ (Kurd) នៅអ៊ីរ៉ាក់។ Hashed al-Shaabi គឺក្រុមប្រដាប់អាវុធអ៊ីរ៉ាក់ដែលគាំទ្រដោយប្រទេសអ៊ីរ៉ង់។

Souran Ali ជាមន្ត្រីម្នាក់មកពីបក្សប្រជាធិបតេយ្យជនជាតិឃឺដអ៊ីរ៉ង់ Kurd Iran (PDK-I) មុននោះបានឱ្យដឹងថា រ៉ុកកែតជាច្រើនគ្រាប់ត្រូវបានបាញ់កាលពីយប់ថ្ងៃទី30កញ្ញា សំដៅទៅកាន់មូលដ្ឋានរបស់ PDK-I ដែលមានចម្ងាយពីព្រលានយន្តហោះ Erbil 2គីឡូម៉ែត្រ។ វីដេអូដែលត្រូវបានបង្ហោះនៅលើបណ្ដាញសង្គមបានបង្ហាញថា មានអគ្គិសភ័យកំពុងឆាបឆេះយ៉ាងសន្ធោសន្ធោ ដោយសារគ្រាប់រ៉ុកកែត។

Wayne Marotto អ្នកនាំពាក្យនៃយុទ្ធនាការ Operation Inherent Resolve ឬហៅកាត់ថា OIR (OIR គឺជាយុទ្ធនាការរបស់កងទ័ពសហរដ្ឋអាមេរិកដែលធ្វើអន្តរាគមន៍យោធាប្រឆាំងនឹងអង្គការរដ្ឋអ៊ីស្លាមនៅអ៊ីរ៉ាក់ និងស៊ីរី) ដែលដឹកនាំដោយសហរដ្ឋអាមេរិក បានឱ្យដឹងថា គ្រាប់រ៉ុកកែតមិនបានធ្លាក់ចំទីតាំងរបស់កងកម្លាំងចម្រុះនៅមូលដ្ឋាន Erbil នោះទេ។ Marotto បង្ហោះសារនៅលើ Twitter ថា៖ “មិនមានការខូចខាត និងការបាត់បង់ជីវិតឡើយ ហើយករណីវាយប្រហារនេះកំពុងត្រូវបានស្រាវជ្រាវ”។

នៅក្នុងខែសីហា2020 បណ្ដាមូលដ្ឋានទ័ព និងកងកម្លាំងសហរដ្ឋអាមេរិកនៅអ៊ីរ៉ាក់ ត្រូវរងការវាយប្រហារដោយរ៉ុកកែតប្រមាណជា40លើករូចមកហើយ។

ក្រសួងការបរទេសអាមេរិក ក្រោយមកក៏បានចោទប្រកាន់ក្រុមប្រដាប់អាវុធអ៊ីរ៉ាក់ដែលគាំទ្រដោយអ៊ីរ៉ង់ថា ជាក្រុមដៃដល់ដែលបានធ្វើការវាយប្រហារនេះ។ សហរដ្ឋអាមេរិក បានព្រមានអំពីការបិទស្ថានទូត និងដកកងទ័ព3,000នាក់ចេញពីប្រទេសអ៊ីរ៉ាក់ បើសិនជាការវាយហារដោយរ៉ុកកែតមិនត្រូវបានទប់ស្កាត់។

សូមបញ្ជាក់ថា Hashed al-Shaabi មានសមាជិកជាង80,000នាក់ និងត្រូវគាំទ្រដោយប្រទេសអ៊ីរ៉ង់។ កងកម្លាំងនេះមានតួនាទីសំខាន់នៅក្នុងយុទ្ធនាការប្រឆាំងនៃអង្គការរដ្ឋអ៊ីស្លាម (ISIS) ក៏ប៉ុន្តែ ថ្មីៗនេះ ពួកគេមានការខឹងជាខ្លាំងនឹងសហរដ្ឋ​អាមេរិក បន្ទាប់ពីមេបញ្ជាការម្នាក់ត្រូវបានសម្លាប់រួមជាមួយនឹងមេទ័ពម្នាក់របស់អ៊ីរ៉ង់ គឺលោក Qasem Soleimani កាលពីខែមករា៕

ប្រភព៖ AFP

ក្រុមហ៊ុនអាកាសចរណ៍រុស្ស៊ី បានសូមទោសជើងឯកលើកដុំដែក(លើកទម្ងន់)ម្នាក់ ក្រោយពីមិនអនុញ្ញាតឱ្យឡើងយន្តហោះ បើមិនពិសោធថា ពិតជាមនុស្សស្រីជាមុនសិន។

កញ្ញា Anna Turaeva ជើងឯកលើកដុំដែក 6សម័យកាល និងជាជើងឯកអឺរ៉ុប 10សម័យកាល ជនជាតិរុស្ស៊ី បានចែករំលែកបទពិសោធ ដែលនាងបានបញ្ជាក់ថា ពិតជាអាក្រក់ខ្លាំងណាស់ នៅពេលឮសំណួរដ៏គួរឱ្យខ្មាសអៀនពីបុគ្គលិកយន្តហោះ ដែលសុំឱ្យនាងពិសោធជាមុនសិនថា ជាមនុស្សស្រីពិតមែន។

ហេតុការណ៍នេះកើតឡើង ខណៈពេលធ្វើដំណើរតាមជើងហោះហើររបស់ក្រុមហ៊ុនអាកាសចរណ៍Utair ពីទីក្រុង សេនត៍ ពីធើរ៍ស្ប៊ើក ភាគខាងលិចឆៀងខាងជើង ទៅទីក្រុង ក្រាស្នូដារ៍ ភាគខាងត្បូង កាត់តាមទីក្រុងម៉ូស្គូ តែនៅឯកន្លែងត្រួតពិនិត្យ បុគ្គលិកអាកាសចរណ៍មិនព្រមឱ្យនាងឡើងយន្តហោះ ព្រោះមិនជឿថា នាងជាមនុស្សស្រី ដូចការបញ្ជាក់នៅក្នុងលិខិតឆ្លងដែន។

Anna ម្ចាស់រាងកាយដ៏មាំធំ ម៉ូដសក់ស្គីនហេត បញ្ជាក់ថា នាងត្រូវគេស្ដីឱ្យដូចកូនក្មេងអាយុ 5ឆ្នាំ ដោយសំណួរល្មើសផ្លូវភេទនៅចំពោះមុខមនុស្សម្នាដែលកំពុងតម្រង់ជួរគ្នា។ បុគ្គលិកទាំងនោះចង់ដឹងថា តើនាងស្ថិតក្នុងឥរិយាបថណា ពេលនៅលើគ្រែ? តែនាងព្យាយាមគ្រប់គ្រងអារម្មណ៍ និងមិននិយាយច្រងេងច្រងាង។ នាងមានអារម្មណ៍អស់ជម្រើស ខណៈព្យាយាមពន្យល់ថា នាងមិនបានកុហកទេ ខណៈត្រូវមនុស្សទាំងជួរ សម្លឹងមើលមកនាងតែម្នាក់ តែក៏ខំព្យាយាមអធិប្បាយបែបស្ងាត់ៗទៅអ្នកតំណាងក្រុមហ៊ុនអាកាសចរណ៍នោះថា ពួកគេខុសហើយ ដែលសុំឱ្យរូបនាងពិសោធខ្លួននាងបែបនេះ។ Anna និយាយថា “ខ្ញុំបានធ្វើគ្រប់យ៉ាងអស់ហើយ ដើម្បីឱ្យពួកគេជឿពីធម្មជាតិរបស់ខ្ញុំ តែភ្លាមនោះ ភាពធូរស្រាលក៏កើតឡើង ខ្ញុំត្រូវបានគេអនុញ្ញាតឱ្យឡើងយន្តហោះ…” តែតមកទៀត នាងបានផូស្តិ៍ពីការមិនសប្បាយចិត្តនឹងក្រុមហ៊ុនអាកាសចរណ៍នោះ ដោយបាននិយាយថា នាងបានលះបង់ពេញ 1ជីវិត ដោយញើស និងឈាមដើម្បីប្រទេសជាតិ មិនគួរមកត្រូវគេប្រតិបត្តិដាក់បែបនេះសោះ។

ស្ត្រីជើងឯកលើកដុំដែកជនជាតិរុស្ស៊ីរូបនេះ បានទទួលកម្លាំងចិត្តយ៉ាងច្រើនពីអ្នកគាំទ្រក្នុងពិភពអនឡាញ។ មនុស្សជាច្រើននិយាយថា ទោះវាជាតួនាទីដែលនឹងត្រូវពិសោធក៏ដោយ តែក៏គួរតែមានសំណួរណាផ្សេងក្នុងការចាត់ការចំពោះរឿងបែបនេះដែរ ខណៈអ្នកខ្លះយល់ឃើញថា បើបានឃើញរូបភាពដែល Anna ផូស្តនៅក្នុងអ៊ីនស្តាក្រាម ទាំងរូបលែងខ្លួនទទេល្វែងលើ មើលឃើញរូបសាក់ ឬរូបដែលថតជាមួយស្រីៗស្លៀកឈុតហែលទឹកនៅលើឆ្នេរខ្សាច់ហើយនោះ ក៏ពិបាកដូចគ្នា ក្នុងការសម្រេចពីភេទពិតប្រាកដរបស់នាង តែយ៉ាងណាក៏ដោយ ក្រុមហ៊ុនអាកាសចរណ៍Utair បានសុំអភ័យទោសនាងយ៉ាងឆាប់រហ័ស ព្រមទាំងអះអាងថា នឹងពិនិត្យមើលទង្វើរបស់បុគ្គលិកនៅឯអាកាសយានដ្ឋានទៀតផង។

Anna កាលពីអតីត ជាក្មេងឈឺច្រើន ចេញ-ចូលមន្ទីរពេទ្យសឹងគ្មានលោះថ្ងៃ រហូតទាល់តែត្រូវបានគ្រូលើកលែង មិនបាច់រៀនមុខវិជ្ជាហាត់ប្រាណ
។ រហូតដល់អាយុ 15ឆ្នាំ ឪពុករបស់នាងជាជាងក្រឡឹង ធ្វើការនៅរោងចក្រផលិតគ្រឿងចក្រ គាត់បានធ្វើដុំដែកសម្រាប់លើកទម្ងន់ និងឧបករណ៍ហាត់ប្រាណជាច្រើនយ៉ាង ឱ្យនាង និងមិត្តភក្តិ។ ម្ដាយរបស់នាង គឺកម្លាំងគាំទ្រ បើទោះជាក្រោយមក កូនស្រី បានផ្លាស់ប្ដូររហូតលែងដូចមនុស្សស្រីទៀតក៏ដោយ។ តែ Anna ប្រាប់ថា នាងស្រឡាញ់ និងសរសើរខ្លួនឯងនូវអ្វីដែលខ្លួនឯងមាន និងមិនគិតចង់ប្រែប្រួលទៀតផង។

ការពិតទៅ នាងនៅចង់ដើរផ្សារទិញអីវ៉ាន់ ចូលហាងអ៊ុតសក់ ធ្វើក្រចក និងតុបតែងមុខមាត់ តែនឹងមិនពិសោធអ្វីឱ្យអ្នកណាឃើញឡើយ ព្រោះនេះជាឡាយស្តាយល៍ របស់នាង៕

ប្រភព៖ សារព័ត៌មានបរទេស