Author: សឿន សំណាង

ក្រសួងសុខាភិបាលក្រើនរំលឹកជាថ្មីដល់អ្នកពាក់ព័ន្ធនឹងព្រឹត្តិការណ៍3វិច្ឆិកា
ក្រសួងសុខាភិបាលកម្ពុជា តាមរយៈសេចក្ដីប្រកាសនៅលើបណ្ដាញសង្គម បានឱ្យដឹងថា កម្ពុជាមិនបានរកឃើញអ្នកឆ្លងវីរុសCovid-19 ថ្មីនោះទេកាលពីម្សិលមិញ ប៉ុន្តែ បានអំពាវនាវសាជាថ្មីដល់អ្នកដែលពាក់ព័ន្ធនឹងព្រឹត្តិការណ៍3វិច្ឆិកា ទាក់ទងនឹងការធ្វើតេស្ត ក៏ដូចការគោរពវិធានការទប់ស្កាត់ការឆ្លងរាលដាលនៃវីរុសនេះ។
នាព្រឹកថ្ងៃទី16វិច្ឆិកានេះ ក្រសួងសុខាភិបាលបានប្រកាសថា កម្ពុជាមិនមានអ្នកឆ្លងវីរុសCovid-19 ថ្មី ឬអ្នកជាសះស្បើយថ្មីណាមួយនោះទេ នៅក្នុងរយៈពេល24ម៉ោងចុងក្រោយនេះ។ ដោយឡែក អ្នកដែលពាក់ព័ន្ធនឹងព្រឹត្តិការណ៍3វិច្ជិកា ក្រសួងបានធ្វើតេស្តលើវត្ថុសំណាកចំនួន28សំណាកបន្ថែមទៀតនៅថ្ងៃទី15វិច្ឆិកា ហើយលទ្ធផដែលបានទទួលគឺសុទ្ធតែអវិជ្ជមាន។
រាប់ចាប់ពីថ្ងៃទី4វិច្ឆិកាដល់ថ្ងៃទី15វិច្ឆិកា ក្រសួងបានធ្វើតេស្តលើវត្ថុសំណាកសរុបចំនួន3918លើក ដែលក្នុងនោះមានអ្នកខ្លះធ្វើតេស្តលើកទីមួយ ទីពីរ និងទីបីផងដែរ។ លទ្ធផលនៃការធ្វើតេស្តលើអ្នកពាក់ព័ន្ធនឹងព្រឹត្តិការណ៍3វិច្ឆិកាទាំងអស់គឺមានតែ4ករណីប៉ុណ្ណោះដែលវិជ្ជមាននឹងCovid-19។
ទាក់ទងនឹងព្រឹត្តិការណ៍ថ្ងៃទី3វិច្ឆិកា ក្រសួងសុខាភិបាលកម្ពុជាបានធ្វើសេចក្ដីក្រើនរំលឹក និងអំពាវនាវដល់អ្នកពាក់ព័ន្ធថា សូមបន្តការធ្វើចត្តាឡីស័កឱ្យបានគ្រប់ចំនួន14ថ្ងៃដោយត្រឹមត្រូវ ហ្មត់ចត់ជាទីបំផុត និងធ្វើតេស្តលើកទី4ឡើងវិញនៅថ្ងៃទី18វិច្ឆិកាឱ្យបានគ្រប់គ្នា ទៅតាមការណែនាំរបស់ប្រមុខរដ្ឋាភិបាល និងក្រសួងសុខាភិបាលកម្ពុជា ដើម្បីទប់ស្កាត់ការឆ្លងចូលដល់សហគមន៍នានា។
រដ្ឋមន្ត្រីក្រសួងសុខាភិបាលកម្ពុជា ឯកឧត្តមវេជ្ជបណ្ឌិត ម៉ម ប៊ុនហេង ក៏បានអំពាវនាវឱ្យពលរដ្ឋគ្រប់រូប ការពារសុខភាពផ្ទាល់ខ្លួន តាមរយៈការរក្សាអនាម័យ ការពាក់ម៉ាស ការរក្សាគម្លាតសុវត្ថិភាពសង្គមនិងបុគ្គល រួមនឹងវិធានការការពារផ្សេងៗជាច្រើនទៀត ដើម្បីទប់ទល់នឹងCovid-19។
គិតមកដល់ថ្ងៃទី16វិច្ឆិកានេះ កម្ពុជាបានរកឃើញអ្នកឆ្លងវីរុសCovid-19 សរុប 302នាក់ ក្នុងនោះមាន289នាក់បានជាសះស្បើយ និង13នាក់កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត នារាជធានីភ្នំពេញ។
ដោយឡែកនៅទូទាំងពិភពលោក បច្ចុប្បន្នបានរកឃើញអ្នកឆ្លងវីរុសបង្កជំងឺរលាកសួតប្រភេទថ្មីនេះ សរុប 54,809,103នាក់ ក្នុងនោះមានអ្នកស្លាប់ដល់ទៅ1,324,317នាក់ អ្នកកំពុងព្យាបាលមានចំនួន15,349,262នាក់៕
ប្រភព៖ ក្រសួងសុខាភិបាល/Worldometers

November 16, 2020
ឥណ្ឌា-ប៉ាគិស្ថាន បាញ់គ្រាប់ផ្លោងដាក់គ្នា សម្លាប់មនុស្សយ៉ាងតិច15នាក់
ទាហានឥណ្ឌានិងប៉ាគិស្ថាន បានបាញ់ប្រហារគ្នាយ៉ាងខ្លាំងក្លានៅតំបន់ Kashmir បណ្ដាលឱ្យមនុស្សយ៉ាងហោច15នាក់បាត់បង់ជីវិត និងរាប់សិបនាក់ត្រូវរងរបួស។
សារព័ត៌មាន Reuters បានរាយការណ៍ថា ការប្រយុទ្ធគ្នានេះបានកើតឡើងនៅថ្ងៃទី13វិច្ឆិកាកន្លងទៅ នៅក្នុងតំបន់មានជម្លោះ Himalaya, Kashmir។ ជាសរុប មានមនុស្សយ៉ាងហោច15នាក់បានស្លាប់ ក្នុងនោះមានជនស៊ីវិលយ៉ាងតិច10 និងទាហាន5នាក់។ AP បានឱ្យដឹងថា តួលេខអ្នករងរបួសរបស់ភាគីទាំង2 សរុប36នាក់។
Reuters អះអាងថា នេះគឺជាថ្ងៃមួយដែលមានមនុស្សស្លាប់ច្រើនជាងគេនៅក្នុងឆ្នាំនេះ ទាក់ទងនឹងការប៉ះទង្គិចប្រដាប់អាវុធរវាងប្រទេសដែលមានអាវុធប្រល័យលោកដូចគ្នាទាំងពីរនេះ។
មន្ត្រីឥណ្ឌានិយាយថា ការវាយប្រហារគ្នាដោយកាំភ្លើងត្បាល់ និងអាវុធផ្សេងទៀតនៅតាមបណ្ដោយព្រំដែន LoC បានចាប់ផ្ដើមបន្ទាប់ពីកងទ័ពឥណ្ឌាបានរារាំងការរុលចូលរបស់ទាហានប៉ាគិស្ថាននៅភាគខាងជើងតំបន់ Kashmir។
ចំណែកភាគីប៉ាគិស្ថានវិញ និយាយថា ពួកគេបានឆ្លើយតបទៅនឹងការផ្ទុះអាវុធរបស់ភាគីឥណ្ឌា ដែលទីក្រុង Islamabad ចោទប្រកាន់ថា “គ្មានហេតុផល និងផ្ដេសផ្ដាស”។
រាប់សិបឆ្នាំមកហើយ ដែល Kashmir បានក្លាយជាតំបន់ប្រទាញប្រទង់រវាងឥណ្ឌានិងប៉ាគិស្ថាន។ ភាគីទាំងពីរសុទ្ធតែប្រកាសថា តំបន់នេះគឺជាសកម្មសិទ្ធិផ្ដាច់មុខរបស់ពួកគេរៀងៗខ្លួន បើទោះជាពួកគេបានបែងចែកគ្នាកាន់កាប់តំបន់នេះហើយដ៏ដោយ។
ឥណ្ឌានិងប៉ាគិស្ថាន ជាញឹកញាប់បានធ្វើការវាយប្រហារគ្នាយ៉ាងខ្លាំងក្លា ហើយពេលខ្លះថែមទាំងបានបាញ់គ្រាប់រ៉ុកកែតដាក់គ្នាផងដែរនៅតាមបន្ទាត់ព្រំដែនបែងចែក Kashmir ប៉ុន្តែ ការប៉ះទង្គិចគ្នាកាលពីម្សិលមិញនេះ ត្រូវបានគេចាត់ទុកថា ជាករណីធ្ងន់ធ្ងរជាងគេ។ ភាគីទាំងពីរបានចោទគ្នាថា បានផ្លោងគ្រាប់រ៉ុកកែតតម្រង់តំបន់ដែលមានពលរដ្ឋស៊ីវិលរស់នៅ។
សូមបញ្ជាក់ថា ពលរដ្ឋសាមញ្ញជាង40នាក់បានស្លាប់ដោយសារតែការប្រយុទ្ធគ្នារវាងឥណ្ឌានិងប៉ាគិស្ថាន នៅក្នុងឆ្នាំ2020នេះ៕
ប្រភព៖ Reuters
November 14, 2020
ជិត54លាននាក់បានឆ្លងវីរុសCovid-19 នៅទូទាំងពិភពលោក
នៅក្នុងសកលលោកទាំងមូល ករណីឆ្លងថ្មីជាង620,000នាក់ត្រូវបានរាយការណ៍ក្នុងអំឡុង24ម៉ោងកន្លងទៅ ដែលនេះធ្វើឱ្យតួលេខអ្នកជំងឺCovid-19 សរុបឡើងដល់ជិត 54លាននាក់ ក្នុងនោះមានជាង1.3លាននាក់បានបាត់បង់ជីវិត។
នៅព្រឹកថ្ងៃទី14វិច្ឆិកានេះ ពិភពលោករាយការណ៍ថា បានរកឃើញអ្នកឆ្លងវីរុសថ្មីចំនួន 623,783នាក់បន្ថែមទៀតនៅក្នុងថ្ងៃទី13វិច្ឆិកាកន្លងទៅ នាំឱ្យតួលេខអ្នកជំងឺរលាកសួតប្រភេទថ្មីនេះ កើនឡើងដល់ 53,699,511នាក់។ ចំនួនមនុស្សដែលបានស្លាប់ដោយសារCovid-19 បច្ចុប្បន្នឡើងដល់ 1,308,295នាក់ ពោលគឺកើន 9,668នាក់ បើធៀបនឹងម្សិលមិញ។ អ្នកដែលបានជាសះស្បើយ ក៏កើនដល់ 37,469,105នាក់។
សហរដ្ឋអាមេរិកដែលជាសម្បុកវីរុសCovid-19 ធំជាងគេក្នុងពិភពលោក បច្ចុប្បន្នមានអ្នកជំងឺសរុប 11,041,846នាក់ ក្នុងនោះមានអ្នកស្លាប់ចំនួន 249,823នាក់។ ក្នុងរយៈពេល24ម៉ោងចុងក្រោយនេះ សហរដ្ឋអាមេរិករកឃើញអ្នកឆ្លងវីរុសចំនួន161,310នាក់ និងអ្នកស្លាប់1,239នាក់។
ឈរលំដាប់ទីពីរគឺប្រទេសឥណ្ឌា ដោយមានអ្នកជំងឺសរុប 8,773,243នាក់ និងអ្នកស្លាប់សរុប ចំនួន 129,225នាក់។
ចំណែកប្រទេសដែលបានរកឃើញអ្នកឆ្លងវីរុសCovid-19 ច្រើនជាងគេលំដាប់ទីបី គឺប្រេស៊ីល។ ប្រទេសនេះបានរកឃើញអ្នកផ្ទុកCovid-19 សរុបចំនួន 5,819,496នាក់ ក្នុងនោះមានអ្នកស្លាប់សរុប 164,946នាក់៕
ប្រភព៖ Worldometers

November 14, 2020
កម្ពុជារកឃើញអ្នកវិជ្ជមានជាមួយCovid-19 ថ្មី ចំនួន1នាក់ទៀត ជាករណីនាំចូល
នៅព្រឹកថ្ងៃទី14វិច្ឆិកានេះ ក្រសួងសុខាភិបាលកម្ពុជា តាមរយៈទំព័រ Facebook បានប្រកាសឱ្យដឹងថា ក្រសួងបានរកឃើញអ្នកឆ្លងវីរុសCovid-19 ចំនួន1នាក់ទៀត ដែលករណីនេះកើតឡើងចំពោះបុរសជនជាតិអាមេរិកាំង។
អ្នកជំងឺខាងលើនេះ មានអាយុ69ឆ្នាំ ស្នាក់នៅក្នុងអគារស្នាក់នៅមួយក្នុងទីក្រុងភ្នំពេញ។ បុរសនេះបានធ្វើដំណើរពីសហរដ្ឋអាមេរិក ឆ្លងកាត់តាមកោះតៃវ៉ាន់ មុននឹងមកដល់កម្ពុជាកាលពីថ្ងៃទី13វិច្ឆិកា2020។ បច្ចុប្បន្ន បុរសនេះកំពុងដាក់ឱ្យទទួលការព្យាបាលនៅមន្ទីរពេទ្យមិត្តភាពខ្មែរ-សូវៀតនាទីក្រុងភ្នំពេញ។
ចំណែកមនុស្សចំនួន70នាក់ផ្សេងទៀតដែលបានរួមដំណើរក្នុងជើងហោះហើរជាមួយបុរសខាងលើ ក៏ត្រូវបានដាក់ឱ្យធ្វើចត្តាឡីស័កចំនួន14ថ្ងៃ បន្ទាប់ពីបានទទួលលទ្ធផលធ្វើតេស្តអវិជ្ជមាន ក្នុងនោះមាន19នាក់ធ្វើចត្តាឡីស័កនៅមណ្ឌលទ័ពអាកាស 3នាក់នៅសណ្ឋាគារសុខា-ភ្នំពេញ 5នាក់នៅសណ្ឋាគារធានយី និង44នាក់នៅសណ្ឋាគារចុងស៊ីង។
ក្រៅពីនេះ កាលពីថ្ងៃទី13វិច្ឆិកា ការធ្វើតេស្តលើមនុស្សចំនួន14នាក់ផ្សេងទៀតដែលពាក់ព័ន្ធក្នុងព្រឹត្តិការណ៍3វិច្ឆិកា បានបង្ហាញថា មិនមានករណីវិជ្ជមានទេ។ រាប់ចាប់ពីថ្ងៃទី4វិច្ឆិកា មកដល់ថ្ងៃទី13វិច្ឆិកានេះ ក្រសួងបានធ្វើតេស្តលើអ្នកពាក់ព័ន្ធនឹងព្រឹត្តិការណ៍3វិច្ឆិកា បាន2,567នាក់ ក្នុងនោះមាន4នាក់ទទួលបានលទ្ធផលវិជ្ជមាននឹងCovid-19។
គិតត្រឹមព្រឹកថ្ងៃទី14វិច្ឆិកា2020នេះ កម្ពុជាបានរកឃើញអ្នកឆ្លងវីរុសCovid-19 សរុបចំនួន 302នាក់ ក្នុងនោះមាន289នាក់បានជាសះស្បើយ ខណៈដែល13នាក់ផ្សេងទៀតកំពុងទទួលការព្យាបាលនៅមន្ទីរពេទ្យ៕
November 14, 2020
Black Friday ដែលជាថ្ងៃបញ្ចុះតម្លៃទំនិញធំបំផុតប្រចាំឆ្នាំ នឹងមានអ្វីប្រែប្រួលខ្លះ សម្រាប់ឆ្នាំ2020?
តាមការប៉ាន់ស្មាន Covid-19 នឹងប៉ះពាល់យ៉ាងធ្ងន់ធ្ងរដល់ Black Friday ប្រចាំឆ្នាំ2020 ប៉ុន្តែ ព្រឹត្តិការណ៍នេះនៅតែត្រូវបានគេចាត់ទុកថា ជាថ្ងៃទិញទំនិញធំបំផុតនៅក្នុងឆ្នាំនេះ។
Black Friday ឬហៅថា “ថ្ងៃសុក្រដ៏អួអាប់” គឹជាថ្ងៃលក់ទំនិញបញ្ចុះតម្លៃធំបំផុតប្រចាំឆ្នាំ ដែលមានប្រភពពីសហរដ្ឋអាមេរិក និងបានរាលដាលពាសពេញពិភពលោក។
Black Friday ប្រព្រឹត្តទៅមួយដងក្នុងមួយឆ្នាំ និងចំថ្ងៃសុក្រ បន្ទាប់ពីបុណ្យអំណរគុណ (Thanksgiving)។ បុណ្យអំណរគុណនឹងប្រារព្ធឡើងនៅថ្ងៃព្រហស្បតិ៍លើកទី4ក្នុងខែវិច្ឆិកា ដូច្នេះ Black Friday ឆ្នាំ2020នេះ នឹងត្រូវធ្វើឡើងនៅក្នុងថ្ងៃទី27វិច្ឆិកា។
នៅក្នុងថ្ងៃ Black Friday ហាងទំនិញស្ទើរតែទាំងអស់សុទ្ធតែបើករកស៊ីតាំងពីព្រលឹម ដើម្បីត្រៀមទទួលអតិថិជន។ ទំនិញនានា ពិសេសគឺសម្លៀកបំពាក់ អេឡិចត្រូនិក សម្ភារក្នុងផ្ទះ គ្រឿងសង្ហារិមជាដើម នឹងត្រូវបានបញ្ចុះតម្លៃមកនៅទាបជាទីបំផុត។ នៅថ្ងៃធម្មតា គេអាចឃើញមានទំនិញលក់បញ្ចុះតម្លៃចាប់ពី20-50% ប៉ុន្តែ នៅក្នុងថ្ងៃ Black Friday ទំនិញអាចបញ្ចុះតម្លៃរហូតដល់50% ឯណោះ។
ខាងលើនេះគឺជាមូលហេតុដែលគេសុខចិត្តតម្រង់ជួរគ្នារង់ចាំតាំងពីយប់ និងប្រជ្រៀតគ្នាចូលទិញទំនិញនៅក្នុងថ្ងៃ Black Friday។ ជាងនេះ កន្លែងខ្លះក៏មានករណីដណ្ដើមទំនិញគ្នា និងប៉ះទង្គិចគ្នាដើម្បីបានទិញទំនិញបញ្ចុះតម្លៃផងដែរ។
ក៏ប៉ុន្តែឆ្នាំនេះ នៅចំពោះមុខ Covid-19 ទិវាទំនិញបញ្ចុះតម្លៃ Black Friday ទំនងជារងផលប៉ះពាល់ច្រើន ពិសេសគឺនៅពេលរលកនៃការឆ្លងរាលដាលថ្មីដែលទើបតែចាប់ផ្ដើមកើតឡើងនៅអឺរ៉ុប និងសហរដ្ឋអាមេរិក។
កន្លងមកក៏ធ្លាប់មានករណីជាច្រើនទាក់ទងនឹងការប៉ះទង្គិចគ្នា និងប្រជ្រៀតគ្នាចូលទិញទំនិញនៅក្នុងថ្ងៃ Black Friday
ទាក់ទងនឹងឥទ្ធិពលរបស់ Covid-19 ក្រុមហ៊ុន Amazon នឹងដកការផ្សាយពាណិជ្ជកម្មបញ្ចុះតម្លៃមុនថ្ងៃ Black Friday នៅប្រទេសបារាំង បន្ទាប់ពីរដ្ឋាភិបាលយល់ថា យុទ្ធនាការនេះមិនយុត្តិធម៌ចំពោះហាងទំនិញតូចតាចដែលត្រូវបានបង្ខំឱ្យបិទទ្វារក្នុងគ្រាដែលប្រទេសនេះកំពុងអនុវត្តវិធានការគម្លាតសង្គមដោយសារ Covid19។ មុននោះ យុទ្ធនាការឃោសនាពាណិជ្ជកម្មនៅប្រទេសបារាំងរបស់ Amazon តាមគម្រោងនឹងចាប់ផ្ដើមពីថ្ងៃទី26តុលាដល់19វិច្ឆិកា។
ចំណែក Walmart (អាមេរិក) បានឱ្យដឹងថា ពួកគេនឹងបំបែកថ្ងៃ Black Friday ទៅជា3ថ្ងៃនៅក្នុងខែវិច្ឆិកា ជំនួសឱ្យការធ្វើឡើងតែមួយថ្ងៃដូចសព្វមួយដង។ នេះគឺជាការប្រឹងប្រែងរបស់ក្រុមហ៊ុនលក់រាយធំបំផុតនៅសហរដ្ឋអាមេរិក ដើម្បីកាត់បន្ថយហ្វូងមនុស្សនៅក្នុងហាងទំនិញ ខណៈដែល Covid-19 នៅតែបន្តឆ្លងរាលដាល។
ទន្ទឹមនឹងនេះ Walmart ក៏នឹងបញ្ចុះតម្លៃមកមកនៅទាបជាងគេ សម្រាប់អតិថិជនណាដែលបញ្ជាទិញទំនិញតាមអនឡាញ ក្នុងបំណងកាត់បន្ថយការវត្តមានមនុស្សនៅក្នុងបណ្ដាហាងរបស់ខ្លួន។
ShopperTrak ដែលជាក្រុមហ៊ុនវិភាគផ្នែកលក់រាយ បានឱ្យដឹងថា នៅក្នុងរយៈពេល10ថ្ងៃនៃព្រឹត្តិការណ៍ Black Friday ឆ្នាំនេះ ចំនួនមនុស្សដែលចូលទៅទិញទំនិញនៅក្នុងហាងបែបបុរាណ នឹងមានចំនួន34.2% ថយចុះច្រើនធៀបនឹងអត្រា46.5% កាលពីឆ្នាំ2019។
យ៉ាងនេះក្ដី Black Friday នៅតែត្រូវបានគេព្យាករថា នឹងជាថ្ងៃរវល់បំផុតសម្រាប់ហាងទំនិញនានានៅក្នុងឆ្នាំ2020នេះ៕
ប្រភព៖ CNBC, Reuters
November 13, 2020
Jeff Bezos ចំណាយពេលធ្វើអ្វីខ្លះនៅយប់ថ្ងៃសៅរ៍?
បោះបង់អាវសាច់ក្រណាត់ polo ខោវែងខូវប៊យ និងវ៉ែនតាខ្មៅ Jeff Bozos ងាកមកស្លៀកពាក់ឈុតគេងធ្វើអំពីសូត្រ ពាក់ស្បែកជើងប្រភេទសម្រាប់នៅផ្ទះ និងចំណាយពេលមួយព្រលប់នៅចុងសប្ដាហ៍ មិនខុសអ្វីទៅនឹងមនុស្សគ្រប់រូបនោះដែរ។
បច្ចុប្បន្ន Jeff Bezos គឹជាអ្នកមានជាងគេបង្អស់ក្នុងពិភពលោក ដោយមានទ្រព្យសរុប 184ពាន់លានដុល្លារ នេះបើតាមស្ថិតិរបស់ទស្សនាវដ្ដី Forbes។
ក្រៅពីថ្ងៃធ្វើការប្រកបដោយភាពតានតឹងស្ទើរពេញមួយសប្ដាហ៍ គ្រប់គ្នាប្រាកដជាចង់ដឹងថា ចុងសប្ដាហ៍របស់មហាសេដ្ឋី Jeff Bezos បានប្រព្រឹត្តទៅយ៉ាងដូច្នេះ។ បន្ទាប់ពីការបំពេញការងារនៅពេលព្រឹក និងពេលល្ងាច នៅម៉ោងប្រហែល5ល្ងាចនៃថ្ងៃសៅរ៍ Bezos ចាកចេញពីក្រុមហ៊ុន ត្រលប់ទៅផ្ទះ។
ម៉ោង5ល្ងាច៖ របបសម្រាកនៅយប់ថ្ងៃសៅរ៍ ក៏ត្រូវបានចាប់ផ្ដើម។
បន្ទាប់ពីដោះអាវសាច់ក្រណាត់ polo ខោវែងខូវប៊យ និងវ៉ែនតាខ្មៅ Jeff Bozos ងាកមកស្លៀកពាក់ឈុតគេងធ្វើអំពីសូត្រ ពាក់ស្បែកជើងប្រភេទសម្រាប់នៅផ្ទះ និងចំណាយពេលមួយព្រលប់ចុងសប្ដាហ៍ មិនខុសអ្វីទៅនឹងមនុស្សគ្រប់រូបនោះដែរ។ ពេលដែលមានអារម្មណ៍ល្អ Bezos ថែមទាំងរាំចង្វាក់ឌីស្កូ 1បទ 2បទទៀតផង។
ពីបន្ទប់ធំក្នុងគេហដ្ឋាន ម្ចាស់ Amazon ក៏ឆៀងចូលបន្ទប់ពិភពនិម្មិត (virtual reality) របស់ខ្លួន។
ម៉ោង 5:05-5:15៖ ដំណើរការសេណារីយ៉ោដំបូង៖ បុគ្គលិកនៅឃ្លាំងទំនិញរបស់ Amazon ស្នើសុំដំឡើងប្រាក់ខែបន្ថែម2ដុល្លារ/ម៉ោង។ នៅចំពោះមុខសំណើនេះ Bezos សុទ្ធតែពិចារណាយ៉ាងល្អិនល្អន់។ ចុងក្រោយ លោកនៅតែនិយាយថា “ទេ”។
ម៉ោង 5:15-5:35៖ សេណារីយ៉ោទីពីរត្រូវបានបង្ហាញ៖ ទេសភាពទីក្រុង Seattle។ យន្តហោះដឹកទំនិញគ្មានមនុស្សបើករបស់ Amazon បង្ហាញខ្លួនស្ទើរគ្រប់កន្លែង។
ម៉ោង 5:35៖ ចាកចេញពីបន្ទប់ពិភពនិម្មិត រួចទៅកាន់បន្ទប់ហាត់ប្រាណ។ នៅទីនេះ Bezos នឹងចេញបញ្ជាឱ្យជំនួយការនិម្មិត Alexa ចាក់ចម្រៀងដើម្បីហាត់ប្រាណ។
ម៉ោង 5:35-6:35៖ ចាប់ផ្ដើមធ្វើលំហាត់ប្រាណ។
ម៉ោង 6:35-6:50៖ ងូតទឹក
ម៉ោង 7:00៖ ត្រៀមទទួលទានអាហារពេលយប់ដែលបានត្រៀមជាស្រេច។
ម៉ោង 7:00-7:20៖ ចាប់ផ្ដើមបរិភោគ។
ម៉ោង 7:20-8:00៖ ចេញបញ្ជាឱ្យ Alexa ចាក់ភ្លេងដែលមានការណែនាំសម្រាប់ហាត់ធ្វើសមាធិ។
ម៉ោង 8:00៖ ធ្វើដំណើរតាមជណ្ដើរប្រអប់ឡើងទៅកាន់បន្ទប់គេង។ បន្ទាប់ពីដាក់ខ្នងដល់គ្រែ Bezos ក៏ចាប់ផ្ដើមហូតទូរស័ព្ទចេញ។
ម៉ោង 8:00-9:00៖ ពិនិត្យស្ថានភាពមូលបត្រ Amazon នៅលើផ្សារហ៊ុន។ ចេញបញ្ជាឱ្យ Alexa ចាក់ចម្រៀងតិចៗដើម្បីស្ដាប់កម្សាន្តអារម្មណ៍។
ក្រោយពីម៉ោង 9:00៖ បានគេងលង់លក់ទៅហើយ ដើម្បីធានាថា ដំណេកបានគ្រប់8ម៉ោង និងអាចក្រោកពីព្រលឹមថ្ងៃស្អែកដោយអារម្មណ៍ស្រស់ស្រាយ ពេញដោយកម្លាំង។
នៅព្រឹកថ្ងៃសៅរ៍ Bezos នៅតែក្រោកពីម៉ោង 5:15នាទី និងធ្វើការរហូតដល់ម៉ោង12ថ្ងៃត្រង់។ ប៉ុន្តែ សម្រាប់លោក កាលវិភាគនេះនៅតែស្ថិតក្នុងប្រភេទ “ខ្ជិល” ព្រោះថា ថ្ងៃផ្សេងពីនេះ កិច្ចការដែលលោកត្រូវធ្វើគឺមានច្រើនជាងនេះឆ្ងាយណាស់។
ប្រការមួយដែលគេចាប់អារម្មណ៍ នោះគឺថា Bezos មិនដែលធ្វើការសម្រេចចិត្តលើកិច្ចការសំខាន់ណាមួយនៅពេលល្ងាចនោះឡើយ ជំនួសមកវិញ លោកនឹងរកវិធីពន្យារពេលដល់ម៉ោង10ព្រឹកថ្ងៃបន្ទាប់ដើម្បីអាចពិចារណាបានគ្រប់ជ្រុងជ្រោយ។
យោងតាម Bezos ក្រោយការបំពេញការងារពេញមួយថ្ងៃ ខួរក្បាលរបស់យើងនឹងស្ថិតក្នុងស្ថានភាពអស់កម្លាំង។ បញ្ហានេះនឹងនាំឱ្យយើងធ្វើសកម្មភាពមិនប្រកបដោយបញ្ហា។ ដូច្នេះ មហាសេដ្ឋីរូបនេះក៏បានជូនជាដំបូន្មានថា មិនគួរធ្វើការសម្រេចចិត្តលើបញ្ហាសំខាន់អ្វីមួយនៅក្នុងដំណាក់កាលដ៏ “រសើប” នេះទេ។
នៅព្រលប់ចុងសប្ដាហ៍ Bezos ចំណាយពេលច្រើនទៅលើការហាត់ប្រាណ និងសមាធិ ជាកិច្ចការដែលជួយឱ្យលោកមានសុខភាពល្អ ទាំងផ្លូវការ ទាំងផ្លូវចិត្តដើម្បីអាចប្រឈមនឹងកិច្ចការរាប់ពាន់ជំពូកជារៀងរាល់ថ្ងៃ។ ក្រៅពីនេះ មហាសេដ្ឋីលេខ1លើលោក ជូនកាលក៏មានពេលសម្រាកលម្ហែកាលនៅចុងសប្ដាហ៍ផងដែរ។ លោក Bezos ប្រាប់ថា មានតែការធ្វើដំណើរឆ្លងប្រទេស ឬទៅដល់តំបន់ដែលមានពេលវេលាខុសគ្នាប៉ុណ្ណោះ ទើបធ្វើឱ្យលោកគេងមិនគ្រប់8ម៉ោង។ ក្រៅពីនេះ លោកតែងតែគេងបាន ចាប់ពី7-8ម៉ោងជារៀងរាល់យប់ ប្រការនេះបានជួយឱ្យលោកមានអារម្មណ៍ស្រស់ស្រាយបំផុតពេលក្រោកពីព្រលឹម៕
ប្រភព៖ Forbes, Medium
November 13, 2020
ហ្វីលីពីនរងគ្រោះធ្ងន់ធ្ងរដោយសារ Vamco ខណៈព្យុះនេះកំពុងឆ្ពោះទៅកាន់វៀតណាម
កងកម្លាំងសង្គ្រោះបន្ទាន់របស់ហ្វីលីពីន បានញាប់ដៃញាប់ជើងក្នុងការជម្លៀសពលរដ្ឋចេញពីតំបន់ដែលជន់លិច បន្ទាប់ពីព្យុះ Vamco បង្កឱ្យមានភ្លៀងធ្លាក់ខ្លាំង ធ្វើឱ្យតំបន់ជាច្រើននៃប្រទេសនេះ ត្រូវលិចក្នុងទឹកយ៉ាងជ្រៅ។
ព្យុះ Vamco ដែលហ្វីលីពីនហៅថា Ulysses បានបោកបក់ទៅលើកោះ Luzon កាលពីយប់ថ្ងៃទី11វិច្ឆិកា ជាមួយនឹងល្បឿន155គម/ម៉ោង។ ព្យុះនេះមានកម្លាំងខ្សោយជាងព្យុះ Goni ប៉ុន្តែ វាបានបោកបក់ចំតំបន់ទីក្រុងម៉ានីល ទើបបណ្ដាលឱ្យមានការខូចខាតធ្ងន់ធ្ងរ។
ភ្លៀងធំបានបណ្ដាលឱ្យទីក្រុងម៉ានីល ដែលមានប្រជាជនជាង12លាននាក់ រួមនឹងតំបន់ជុំវិញត្រូវរងគ្រោះធំ ដោយសារផ្លូវនានាក្នុងទីក្រុងបានក្លាយជាទន្លេ។ ក្រុមមន្ត្រីបានប្រកាសជូនដំណឹងមុនពេលព្យុះមកដល់ ប៉ុន្តែ ដោយសារតែភ្លៀងខ្លាំង ជំនន់ទឹកភ្លៀងកើនឡើងយ៉ាងឆាប់រហ័ស ទើបប្រជាជនជម្លៀសខ្លួនមិនទាន់ពេល។
កងកម្លាំងរបស់កាកបាទក្រហមហ្វីលីពីន ប៉ូលិស កងទ័ព និងកងកម្លាំងសង្គ្រោះបន្ទាន់ បានប្រើប្រាស់ទូកដើម្បីចូលទៅជួយពលរដ្ឋដែលកំពុងជាប់ក្នុងផ្ទះនៅទីក្រុងម៉ានីល។ យ៉ាងហោចណាស់មានមនុស្ស2នាក់បានស្លាប់ 4នាក់បាត់ខ្លួន និង8នាក់រងរបួសនៅក្នុងខេត្ត Camarnes Norte។
បច្ចុប្បន្ន Vamco បានចាកចេញ្ពីផុតពីកោះ Luzon ឆ្ពោះទៅកាន់សមុទ្រចិនខាងត្បូង និងកំពុងស្ថិតនៅក្នុងតំបន់សមុទ្រដែលមានចម្ងាយពីប្រជុំកោះ Paracels ប្រមាណ450គមទៅទិសអាគ្នេយ៍ឆៀងខាងកើត។ កម្លាំងខ្យល់បានឡើងដល់135គម/ម៉ោង។
នៅក្នុងថ្ងៃ និងយប់នេះ ព្យុះ Vamco នឹងឆ្ពោះទៅទិសខាងលិចក្នុងល្បឿន15-20គម/ម៉ោង។ រហូតដល់ថ្ងៃទី14វិច្ឆិកា ព្យុះនឹងទៅដល់តំបន់សមុទ្រភាគខាងត្បូងនៃប្រជុំកោះ Paracels កម្លាំងខ្យល់នឹងនៅរក្សាល្បឿន135គម/ម៉ោង។
មកដល់ម៉ោង4ទៀបភ្លើងថ្ងៃទី15វិច្ឆិកា ចំណុចកណ្ដាលរបស់ Vamco នឹងស្ថិតនៅលើតំបន់សមុទ្រនៃបណ្ដាខេត្តនៅភាគកណ្ដាលប្រទេសវៀតណាម កម្លាំងខ្យល់នឹងមានល្បឿន100គម/ម៉ោង។ នៅថ្ងៃបន្ទាប់ ព្យុះនេះនឹងបោកបក់ចូលដីគោករបស់វៀតណាម និងចុះខ្សោយបន្តិចម្ដងៗ ក្លាយជាសម្ពាធទាប។
នៅម៉ោង4 ថ្ងៃទី16វិច្ឆិកា សម្ពាធទាបនេះនឹងធ្វើដំណើរទៅដល់ភាគកណ្ដាលប្រទេសឡាវ
នៅម៉ោង4 ថ្ងៃទី16វិច្ឆិកា សម្ពាធទាបនេះនឹងធ្វើដំណើរទៅដល់ភាគកណ្ដាលប្រទេសឡាវ ខណៈដែលកម្ពុជាបានរួចផុតពីជ្រលងសម្ពាធទាបនេះ៕
ប្រភព៖ Reuters, AFP
November 13, 2020
Trump ចេញបទបញ្ជា “ហាមវិនិយោគទៅលើក្រុមហ៊ុនចំនួន31របស់ចិន”
ប្រធានាធិបតីអាមេរិក បានចុះហត្ថលេខាលើបទបញ្ជាមួយដែលហាមបណ្ដាក្រុមហ៊ុនអាមេរិក វិនិយោគទៅលើក្រុមហ៊ុនចំនួន31របស់ចិនដែលកំពុងរងការចោទប្រកាន់ថា មានជាប់ទាក់ទងនឹងកងទ័ពរំដោះប្រជាជនចិន។
“ប្រទេសចិនកំពុងតែឆ្លៀតឱកាសកាន់តែច្រើនឡើងៗក្នុងការកេងចំណេញលើមូលនិធិវិនិយោគរបស់សហរដ្ឋអាមេរិក ដើម្បីប្រមូលប្រភពធនធានមនុស្ស ដែលអនុញ្ញាតឱ្យពួកគេអភិវឌ្ឍ និងធ្វើទំនើបកម្មយោធា ចារកិច្ច រួមនឹងប្រព័ន្ធសន្តិសុខរបស់ពួកគេ” បទបញ្ជាដែលត្រូវបានលោក Donald Trump ចុះហត្ថលេខាកាលពីថ្ងៃទី12វិច្ឆិកា មានឃ្លាមួយសរសេរដូច្នេះ។
បទបញ្ជាខាងលើដែលនឹងមានសុពលភាពចាប់ពីថ្ងៃទី11មករា2021 មុនពេលអាណត្តិប្រធានាធិបតីរបស់លោក Trump បានបញ្ចប់នេះ មានការហាមឃាត់ក្រុមហ៊ុនអាមេរិក វិនិយោគទៅលើក្រុមហ៊ុនចំនួន31របស់ចិន ដែលត្រូវបានទីក្រុងវ៉ាស៊ីងតោនចោទថា មានទំនាក់ទំនង ឬត្រូវបានគ្រប់គ្រងដោយកងទ័ពចិន។ បទបញ្ជានេះក៏ហាមបណ្ដាក្រុមហ៊ុនអាមេរិក ទិញនិងលក់ភាគហ៊ុននៅក្នុងបណ្ដាក្រុមហ៊ុនចិនទាំងនោះ ក្រោយរយៈពេល60ថ្ងៃ រាប់ចាប់ពីពេលត្រូវបានចាត់ទុកថាជាក្រុមហ៊ុនរបស់កងទ័ពចិន។
បទបញ្ជានោះក៏បានសរសេរថា៖ “ខ្ទង់វិនិយោគនានាកំពុងតែជួយឱ្យចិនគំរាមកំហែងដោយផ្ទាល់ទៅលើទឹកដីអាមេរិក និងកងកម្លាំងអាមេរិកនៅបរទេស ក្នុងនោះមានទាំងការអភិវឌ្ឍ និងការដាក់ពង្រាយអាវុធដែលអាចប្រល័យជីវិតទ្រង់ទ្រាយធំ អាវុធធម្មតាតែទំនើបៗ រួមនឹងសកម្មភាពអាក្រក់នៅក្នុងបណ្ដាញអ៊ីនធើណិតសំដៅលើទឹកដីអាមេរិក និងប្រជាជនអាមេរិកាំង”។
នេះគឺជាការផ្លាស់ប្ដូរគោលនយោបាយដ៏ធំដំបូងបង្អស់ដែលត្រូវបានលោក Trump ធ្វើឡើង គិតចាប់ពីក្រោយការបោះឆ្នោតកាលពីខែវិច្ឆិកា។ ប្រការនេះបង្ហាញថា លោក Trump កំពុងប្រើប្រាស់អំណាចរបស់ខ្លួននៅចុងអាណត្តិ ដើម្បីដាក់សម្ពាធលើប្រទេសចិន នៅក្នុងគ្រាដែលម្ចាស់សេតវិមានរូបនេះ កំពុងផ្ដោតការយកចិត្តទុកដាក់ទៅលើលទ្ធផលនៃការបោះឆ្នោតនៅអាមេរិក។
ទីប្រឹក្សាសេដ្ឋកិច្ចរបស់សេតវិមាន លោក Peter Navarro និយាយថា នេះគឺជាបទបញ្ជាដ៏ខ្លាំងក្លាមួយ ដើម្បីកាត់ផ្ដាច់ប្រភពវិនិយោគរបស់អាមេរិកទៅក្នុងសកម្មភាពនៃការធ្វើយោធូបនីយកម្មរបស់ចិន។ វិស័យដែលបណ្ដាក្រុមហ៊ុនចិនត្រូវរងផលប៉ះពាល់ពីបទបញ្ជារបស់លោក Trump គឺវិស័យទូរគមនាគមន៍ អាកាសចរណ៍អវកាស និងសំណង់។
អគ្គរដ្ឋទូតចិនប្រចាំសហរដ្ឋអាមេរិក មិនទាន់មានប្រតិកម្មណាមួយទៅលើបទបញ្ជាដ៏មានឥទ្ធិពលរបស់ប្រធានាធិបតីអាមេរិកនៅឡើយ។
ក្រុមអ្នកវិភាគ និងអតីតមន្ត្រីជាន់ខ្ពស់អាមេរិក អះអាងថា មូលហេតុដែលលោក Trump បញ្ចេញអំណាចរបស់ខ្លួននៅចុងអាណត្តិនេះ គឺដើម្បីលើកកម្ពស់អាទិភាពរបស់ខ្លួន ព្រមទាំងដើម្បី “រាំងខ្ទប់ ឬចងដៃ” អ្នកកាន់អំណាចក្នុងអាណត្តិថ្មីផងដែរ៕
ប្រភព៖ Reuters
November 13, 2020
កម្ពុជាធ្វើតេស្តអ្នកប៉ះពាល់ក្នុងព្រឹត្តិការណ៍03វិច្ឆិកា បានជាង50នាក់បន្ថែមទៀតកាលពីម្សិលមិញ
នៅព្រឹកថ្ងៃទី13វិច្ឆិកា2020នេះ ក្រសួងសុខាភិបាលកម្ពុជា បានប្រកាសឱ្យដឹងថា កាលពីម្សិលមិញ ស្ថាប័ននេះមិនបានរកឃើញករណីវិជ្ជមានជាមួយនឹងCovid-19 ទេ បន្ទាប់ពីបានធ្វើតេស្តទៅលើវត្ថុសំណាកចំនួន56 ដែលទាក់ទងនឹងព្រឹត្តិការណ៍3វិច្ឆិកា។
នៅក្នុងសេចក្ដីប្រកាសព័ត៌មាននេះ ក្រសួងឱ្យដឹងថា គិតចាប់ពីថ្ងៃទី4វិច្ឆិកា ដល់ថ្ងៃទី12វិច្ឆិកា ក្រសួងសុខាភិបាលបានធ្វើតេស្តទៅលើវត្ថុសំណាករបស់អ្នកពាក់ព័ន្ធនឹងព្រឹត្តិការណ៍3វិច្ឆកាសរុប បាន2553លើក ក្នុងនោះមានអ្នកបានធ្វើតេស្តលើកទីមួយចំនួន1734នាក់ និងលើកទីពីរបាន819នាក់ ក្នុងនោះដែរក៏មានករណីវិជ្ជមានចំនួន4នាក់។ ចំណែកអ្នកដែលពាក់ព័ន្ធនឹងព្រឹត្តិការណ៍3វិច្ឆិកាចំនួន1730នាក់ផ្សេងទៀត ទទួលបានលទ្ធផលអវិជ្ជមាន។
នៅក្នុងថ្ងៃទី12វិច្ចិកា កម្ពុជាមានអ្នកបានជាសះស្បើយពីជំងឺCovid-19 ចំនួន1នាក់។
គិតមកដល់ថ្ងៃទី13វិច្ឆិកានេះ កម្ពុជាបានរកឃើញអ្នកឆ្លងវីរុសCovid-19 សរុប 301នាក់ ក្នុងនោះមាន289នាក់បានជាះស្បើយ និង12នាក់ផ្សេងទៀតកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ក្នុងទីក្រុងភ្នំពេញ។ កម្ពុជាមិនទាន់មានសេចក្ដីរាយការណ៍ផ្លូវការណាមួយបញ្ជាក់ថា មានករណីស្លាប់ដោយសារវីរុសCovid-19នៅឡើយ៕

November 13, 2020
រថភ្លើងដែលប្រើបច្ចេកវិទ្យា “មហាបដិវត្តន៍” របស់ Elon Musk ជោគជ័យក្នុងការធ្វើតេស្តដំបូង
ក្រោយរយៈពេលជាច្រើនឆ្នាំដែលបានអភិវឌ្ឍ គំនិតមួយកាលពី7ឆ្នាំមុនរបស់មហាសេដ្ឋី Elon Musk និង Tesla ក៏បានឆ្ពោះមកដល់ដំណាក់កាលថ្មី និងជោគជ័យជាលើកដំបូង។
Hyperloop គឺជាប្រព័ន្ធដឹកជញ្ជូនល្បឿនលឿន។ នៅពេលរថភ្លើងមួយគ្រឿងដែលធ្វើដំណើរក្នុងបំពង់សុញ្ញកាសដើម្បីកាត់បន្ថយការកកិត ពេលនោះល្បឿនរបស់វានឹងប្រហាក់ប្រហែលល្បឿនរបស់យន្តហោះដឹកអ្នកដំណើរធម្មតា (965គម/ម៉ោង)។ Hyperloop ត្រូវបានគេចាត់ទុកថាជាអនាគតនៃវិស័យដឹកជញ្ជូន និងទេសចរណ៍ ដោយសារវាធ្វើដំណើរក្នុងល្បឿនយ៉ាងលឿន និងកាត់បន្ថយការចំណាយលើថាមពលបានយ៉ាងច្រើនផងដែរ។ បច្ចេកវិទ្យានេះ ដំណើរការ 22/24ម៉ោង បើទោះជាអាកាសធាតុមិនល្អ ហើយវាក៏មិនមានគ្រោះថ្នាក់អ្វីនោះដែរ។
ដំបូងឡើយ Hyperloop គឺជាគំនិតរបស់ Tesla និង CEO Elon Musk កាលពីឆ្នាំ2012។ ប៉ុន្តែ លោក Elon Musk មិនបានអភិវឌ្ឍបច្ចេកវិទ្យាដែលមានលក្ខណមហាបដិវត្តន៍នេះនៅក្នុងក្រុមហ៊ុនរបស់ខ្លួនដោយផ្ទាល់ទេ តែបានប្រគល់បច្ចេកទេសលម្អិតរបស់ Hyperloop ទៅឱ្យក្រុមហ៊ុនដទៃ។
កាលពីថ្ងៃទី8វិច្ឆិកា ក្រុមហ៊ុន Virgin Hyperloop ទើបតែបានសាកល្បងរថភ្លើងល្បឿនលឿនដែលប្រើប្រាស់បច្ចេកវិទ្យា Hyperloop នៅឯសមុទ្រខ្សាច់ Nevada សហរដ្ឋអាមេរិក។ អ្នកដំណើរ2រូបដែលបានចូលរួមក្នុងការធ្វើតេស្តនេះ គឺ Josh Giegel ជានាយកផ្នែកបច្ចេកវិទ្យា និង Sar Luchian ជានាយិកាផ្នែកអតិថិជន មកពីក្រុមហ៊ុន Virgin Hyperloop។
ប្រព័ន្ធរបស់ Virgin Hyperloop ប្រើប្រាស់បច្ចេកវិទ្យា cushion magnetic (បកប្រែក្រៅផ្លូវការថា “បច្ចេកវិទ្យាខ្នើយម៉ាញេទិក”) ប្រហាក់ប្រហែលនឹងបច្ចេកវិទ្យាដែលប្រើសម្រាប់គម្រោងរថភ្លើងល្បឿនលឿននៅប្រទេសជប៉ុន និងអាល្លឺម៉ង់។ បណ្ដាប៉ូលដែលមានសញ្ញាដូចគ្នារបស់មេដែកនឹងជួយឱ្យរថភ្លើងអណ្ដែតលើផ្លូវដែក ខណៈដែលប៉ូលផ្ទុយពីនេះរបស់មេដែកនឹងអូសរថភ្លើងឆ្ពោះទៅមុខ។
លទ្ធផលនៃការសាកល្បងនេះបានបង្ហាញថា រថភ្លើងរបស់ Virgin Hyperloop ចំណាយពេលតែ15វិនាទីប៉ុណ្ណោះនៅក្នុងការធ្វើដំណើរលើចម្ងាយផ្លូវ500ម៉ែត្រ ដោយមានល្បឿន160គម/ម៉ោង។ Virgin Hyperloop ឱ្យដឹងថា ដោយសារចម្ងាយផ្លូវតែ500ម៉ែត្រ ទើបរថភ្លើងមិនមានពេលគ្រប់គ្រាន់ដើម្បីបង្កើនល្បឿនឱ្យដល់កម្រិតកំពូល។ ប៉ុន្តែ ក្រុមហ៊ុននៅតែចាត់ទុកថា នេះជាល្បឿនដែលពួកគេត្រូវការ មុននឹងធ្វើពាណិជ្ជកម្មលើបច្ចេកវិទ្យា Hyperloop នេះ។
អនាគត Virgin Hyperloop មានគម្រោងសាងសង់ផ្លូវជាច្រើនខ្សែសម្រាប់រថភ្លើងរបស់ពួកគេ ដែលនឹងតភ្ជាប់ទីក្រុងធំៗនៅជុំវិញពិភពលោក ហើយរថភ្លើងនីមួយៗនឹងអាចដឹកអ្នកដំណើរបានចាប់ពី25ទៅ30នាក់។ គោលដៅរបស់ក្រុមហ៊ុននេះ គឺដឹកអ្នកដំណើរឱ្យបានរាប់ម៉ឺននាក់នៅរៀងរាល់ម៉ោង។ ប៉ុន្តែ បញ្ហាហិរញ្ញវត្ថុគឺជាឧបសគ្គរបស់ Virgin Hyperloop។ ក្រុមហ៊ុននេះកំពុងស្វែងរកការបណ្ដាក់ទុនដើម្បីសាងសង់ផ្លូវសាកល្បងមួយខ្សែប្រវែង10គម នៅ Virginia ខាងលិច ដែលមានតម្លៃ500លានដុល្លារ។ បើសិនការសាកល្បងទទួលបានជោគជ័យ ក្រុមហ៊ុននេះនឹងចាប់ផ្ដើមធ្វើពាណិជ្ជកម្មនៅក្នុងឆ្នាំ2026៕
ប្រភព៖ CNN
November 12, 2020