Author: សឿន សំណាង

គ្រាន់តែលក់ខ្យល់ដែលយកមកពីភ្នំសោះ ក៏រកបានជាង300,000ដុល្លារក្នុងមួយឆ្នាំ
គេអាចនិយាយបានថា អ្វីៗគ្រប់យ៉ាងទំនងជាអាចលក់បាន បើទោះវាហាក់ដូចជារឿងឆ្កួតឡប់យ៉ាងណាក៏ដោយ។ នៅក្នុងករណីជាច្រើន លទ្ធផលដែលអាចលក់បាន មិនអាស្រ័យទាំងស្រុងទៅលើផលិតផលនោះទេ ប៉ុន្តែវាអាស្រ័យទៅលើយុទ្ធសាស្ត្រទីផ្សារ។
ពិភពលោកបានប្ដូរផ្លាស់យ៉ាងច្រើន និងយ៉ាងលឿននៅក្នុងប៉ុន្មានឆ្នាំចុងក្រោយនេះ ហើយអ៊ីនធើណិតបានបើកផ្លូវឱ្យមនុស្សធ្វើជំនួញបែបថ្មី ជាមួយនឹងការទំនាក់ទំនងបែបថ្មី ពីគ្រប់ទីកន្លែងក្នុងសកលលោក។
មនុស្សជាច្រើនបានប្រើប្រាស់បច្ចេកវិទ្យាដើម្បីប្រែក្លាយគំនិតរបស់ខ្លួនឱ្យទៅជាសកម្មភាពជំនួញដែលនាំមកនូវចំណូលយ៉ាងច្រើនសន្ធឹក ក្នុងនោះក៏មានកំលោះជនជាតិកាណាដាពីរូប គឺ Moses Lam និង Troy Paquette ផងដែរ។
ល្បែងលេងបានក្លាយជាគំនិតរកប្រាក់យ៉ាងងាយស្រួល
Moses Lam និង Troy Paquette បាននាំគ្នាដាក់លក់ខ្យល់ដែលបានបូមចូលទៅក្នុងថង់ជាលើកដំបូងរបស់ពួកគេនៅលើផ្សារអនឡាញ eBay ក្នុងតម្លៃ 0.99ដុល្លារ/ថង់ ដោយចាត់ទុកវាជាអំណោចសម្រាប់លេងសើចជាមួយនឹងអ្នកទិញ។ ប៉ុន្តែ ក្រោយមក ផលិតផលនេះត្រូវបានគេទិញអស់ដោយមិនដឹងខ្លួន ហើយជាងនេះ វាក៏បានក្លាយជា “សង្គ្រាម” ប្រកួតប្រជែងលើតម្លៃយ៉ាងអស្ចារ្យទៀតផង។ មានកន្លែងខ្លះដាក់លក់ថង់ខ្យល់នេះក្នុងតម្លៃឡើងដល់168ដុល្លារឯណោះ។
Moses Lam និង Troy Paquette បានដាក់លក់ខ្យល់បរិសុទ្ធច្រកបំពង់ដំបូងគេនៅក្នុងខែមិថុនា2015 ដែលជាគំនិតទីផ្សារដ៏កំពូល ដោយសារតែខ្យល់គឺជារបស់ដែល “ជូនគេមិនយក លក់គេមិនទិញ” ព្រោះតែវាមានស្រាប់ និងប្រើមិនអស់លុយ។
Moses Lam និយាយថា ផលិតផល Vitality Air ថ្មីរបស់ពួកគេ មិនមែនជាល្បែងលេងសើចដូចមុនទៀតឡើយ។ ខ្យល់ត្រូវបានយកពីតំបន់ជួរភ្នំ Rocky ក្នុងខេត្ត Alberta ប្រទេសកាណាដា។ វាត្រូវបានបូមយកដោយប្រើប្រាស់បំពង់ដ៏ធំ និងរក្សាទុកក្នុងម៉ាស៊ីនបង្ហាប់ខ្យល់ស្វ័យប្រវត្ត។
Moses និង Troy ធ្វើការត្រួតពិនិត្យគុណភាពខ្យល់មុនពេលត្រូវបានបញ្ចូលទៅក្នុងបំពង់រក្សាខ្យល់ និងផ្ញើទៅកាន់កន្លែងបញ្ជាទិញនៅពាសពេញពិភពលោក។ យុទ្ធសាស្ត្រទីផ្សាររបស់ពួកគេ ក៏នៅមានការបែងចែកប្រភេទនៃខ្យល់ទៀតផង ក្នុងនោះមានដូចជា ខ្យល់បរិសុទ្ធដែលយកពីភ្នំ ខ្យល់ដែលយកពីទន្លេទឹកកក បឹង Louise ឬខ្យល់ដែលមានក្លឹន “ស្វាយទុំ” និងក្លឹន “ស្ត្រូបូរី” ជាដើម។ល។
យោងតាមហាងអនឡាញរបស់ក្រុមហ៊ុនខាងលើ ខ្យល់អុកស៊ីសែនលំដាប់គុណភាពខ្ពស់ប្រភេទធំរបស់ពួកគេ អាចឱ្យអ្នកប្រើប្រាស់ស្រូបបាន200ដងឯណោះ។ ប្រសិទ្ធភាពរបស់ខ្យល់បរិសុទ្ធនេះ គឺជួយឱ្យមានអារម្មណ៍ធូរស្បើយ ឬទប់ស្កាត់អាការរកកលក្អួត ក៏ដូចជាជួយឱ្យមានកម្លាំង និងសុខភាពល្អឡើងវិញ ពិសេសគឺសម្រាប់អ្នកដែលទើបតែបានបំពេញការងារនឿយហត់ ឬផឹកស៊ីជ្រុល។
តម្រូវការនៃផលិតផលខ្យល់នេះ បានមកពីណា?
ដំបូង សូមពិចារណាទៅលើទឹកដែលគេច្រកដប។ នោះគឺជាធនធានធម្មជាតិដែលមាននៅស្ទើរគ្រប់កន្លែងក្នុងពិភពលោក។ ដើមឡើយ ពុំមានអ្នកណាម្នាក់គិតថា នឹងច្រកទឹកក្នុងដបដើម្បីយកទៅលក់នោះទេ ប៉ុន្តែពេលនេះវាបានក្លាយជាផលិតផលពេញនិយមទៅហើយ។ ប្រការនេះក៏នឹងកើតឡើងចំពោះខ្យល់បរិសុទ្ធដែលត្រូវគេច្រកក្នុងបំពង់ដូច្នេះដែរ។
Moses និង Troy បានរកឃើញតម្រូវការនៃការប្រើប្រាស់ខ្យល់បរិសុទ្ធនៅក្នុងតំបន់ ឬទីក្រុងដែលមានបរិយាកាសសម្បូរដោយធូលី និងផ្សែងពុល ដូចជា ទីក្រុងមួយចំនួននៅប្រទេសចិន កូរ៉េខាងត្បូង ឥណ្ឌា និងប្រទេសជាច្រើនទៀត ដែលនេះបាននាំឱ្យមានវត្តមានរបស់ផលិតផលខ្យល់បរិសុទ្ធ Vitality Air។
Moses បានឱ្យដឹងថា៖ “ទីផ្សារគោលដៅរបស់យើង គឺជាតំបន់ទាំងឡាយណាដែលមានខ្យល់មិនល្អ។ មនុស្សជាច្រើនពិតជាបានស្លាប់មុនអាយុ ដោយសារតែបានស្រូបខ្យល់មិនល្អជារៀងរាល់ថ្ងៃ”។
បណ្ឌិត Maria Neira ប្រធានផ្នែកសុខាភិបាលសាធារណៈរបស់អង្គការសុខភាពពិភពលោក (WHO) ធ្លាប់បាននិយាយថា៖ “បញ្ហាធំបំផុតនោះគឺ នៅពេលអ្នករស់នៅមួយកន្លែងនៅតំបន់ណាមួយ ហើយអ្នកមិនអាចជ្រើសរើសខ្យល់បរិយាកាសដែលខ្លួនត្រូវស្រូបចូលក្នុងរាងកាយ”។
ប៉ុន្តែ អ្នកវិទ្យាសាស្ត្រមួយចំនួនមកពីស្ថាប័នស្រាវជ្រាវផ្នែកប្រព័ន្ធដង្ហើមនៅប្រទេសកាណាដាបានអះអាងថា មិនទាន់មានភ័ស្ដុតាងជាក់លាក់ណាមួយបង្ហាញអំពីផលប្រយោជន៍របស់ខ្យល់ដែលគេដាក់ចូលក្នុងបំពង់នៅឡើយ ហើយនោះគ្រាន់តែជាផលិតផលមួយប្រភេទដែលធ្វើឱ្យខាត់បង់ប្រាក់កាស និងពេលវេលាតែប៉ុណ្ណោះ។ យ៉ាងនេះក្ដី Moses និង Troy បានបង្ហើបឱ្យដឹងថា ពួកគេនៅតែរកចំណួលបានច្រើនជាង300,000ដុល្លារអាមេរិក/ឆ្នាំ ពីផលិតផលខាងលើ៕
ប្រភព៖ CNBC
November 25, 2020
Elon Musk រកបានជិត 8ពាន់លានដុល្លារបន្ថែមទៀត ក្នុងរយៈពេលតែមួយយប់
ទ្រព្យសម្បត្តិរបស់ CEO នៃក្រុមហ៊ុន Tesla បច្ចុប្បន្នបានឡើងដល់136ពាន់លានដុល្លារអាមេរិក ដែលនេះបានជួយអះអាងបន្ថែមអំពីចំណាត់ថ្នាក់អ្នកមានជាងគេលំដាប់ទីពីរក្នុងពិភពលោករបស់មហាសេដ្ឋីនេះ។
បញ្ចប់ការជួញដូរក្នុងថ្ងៃទី24វិច្ឆិកា មូលបត្ររបស់ក្រុមហ៊ុនផលិតរថយន្តអគ្គិសនី Tesla បានកើនថែម 6.43%។ ប្រការនេះបានជួយឱ្យទ្រព្យសម្បត្តិរបស់លោក Elon Musk កើនឡើង7.7ពាន់លានដុល្លារបន្ថែមទៀត នាំឱ្យទ្រព្យសរុបរបស់មហាសេដ្ឋីជនជាតិអាមេរិកាំងដើមកំណើតអាហ្វ្រិកខាងត្បូងរូបនេះ ឡើងដល់136ពាន់លានដុល្លារ នេះបើតាម Bloomberg Billionaires Index។
តួលេខនៃទ្រព្យថ្មីរបស់់លោក កំពុងតែគាំទ្រ និងការពារតំណែងជាអ្នកមានជាងគេលំដាប់ទីពីរក្នុងពិភពលោកដែលទើបតែដណ្ដើមបានពីមហាសេដ្ឋី Bill Gates កាលពីថ្ងៃទី23វិច្ឆិកា។ បច្ចុប្បន្ន សហស្ថាបនិករបស់ក្រុមហ៊ុន Microsoft មានទ្រព្យសរុប 129ពាន់លានដុល្លារអាមេរិក កើន1.26ពាន់លានដុល្លារបន្ទាប់ពីបញ្ចប់ការជួញដូរមូលបត្រកាលពីម្សិលមិញ។
រាប់ចាប់ពីដើមឆ្នាំ2020 លោក Musk រកបានប្រាក់108ពាន់លានដុល្លារ ដោយសារមូលបត្រ Tesla កើនឡើងជាបន្តបន្ទាប់។ មូលបត្រនេះបានកើន550% នៅក្នុងឆ្នាំនេះ។
តម្លៃទុនរបស់ក្រុមហ៊ុនផលិតរថយន្ត Tesla កាលពីថ្ងៃទី24វិច្ឆិកាក៏បានកើនលើសពី500ពាន់លានដុល្លារជាលើកដំបូងផងដែរ។ តម្លៃទុនរបស់ក្រុមហ៊ុននេះ បច្ចុប្បន្ន ធំជាងទុនសរុបរបស់បណ្ដាក្រុមហ៊ុនផលិតរថយន្តធំៗក្នុងពិភពលោកបូកចូលគ្នាទៀតផង ក្នុងនោះរួមមាន Toyota, Volkswagen, GM, Ford, Fiat Chrysler និង PSA Group។
កាលពីខែមុន Tesla បានចេញរបាយការណ៍អំពីប្រាក់ចំណេញរបស់ខ្លួននៅក្នុងត្រីមាសទីបី ក្នុងនោះ ប្រាក់ចំណេញមានចំនួន874លានដុល្លារ កើន156% បើធៀបនឹងដំណាក់កាលដូចគ្នាកាលពីឆ្នាំទៅ (2019)។ Tesla ត្រូវបានគេរំពឹងថា នឹងលក់រថយន្តបានកន្លះលានគ្រឿងនៅក្នុងឆ្នាំនេះ។
កាលពីសប្ដាហ៍មុន S&P Global ក៏បានប្រកាសថា នឹងបញ្ចូលក្រុមហ៊ុន Tesla ទៅក្នុងសន្ទស្សន៍ S&P 500 ចាប់ពីចុងខែធ្នូនេះ។ ក្រុមអ្នកវិនិយោគចាត់ទុកថា នេះគឺជាសញ្ញាវិជ្ជមានសម្រាប់ក្ដីសង្ឃឹមនាពេលអនាគតរបស់ក្រុមហ៊ុន Tesla៕
Bloomberg, CNN
November 25, 2020
អ្នកវិទ្យាសាស្ត្ររកឃើញវិធីថ្មីសម្រាប់ព្យាបាលជំងឺមហារីក ដោយគ្មានផលប៉ះពាល់៖ វិធីនេះធ្លាប់ត្រូវបានគេបង្អាប់ថាជារឿងស្រមើស្រមៃកាលពីជាង10ឆ្នាំមុន!
ក្រុមអ្នកវិទ្យាសាស្ត្រមកពីសាកលវិទ្យា Tel Aviv នៃប្រទេសអ៊ីស្រាអែល ទើបតែបានប្រកាសលទ្ធផលនៃការសិក្សាស្រាវជ្រាវអំពីបច្ចេកវិទ្យាព្យាបាលជំងឺមហារីកបែបថ្មីដែលមានឈ្មោះថា “កន្ត្រៃល្អិត” ដែលវាអាចជួយព្យាបាលជំងឺមហារីកឱ្យជាដាច់ និងមិនមានផលប៉ះពាល់អ្វីឡើយ។
ថ្មីៗនេះ សារព័ត៌មាន The Times of Israel របស់ប្រទេសអ៊ីស្រាអែល បានចុះផ្សាយថា ក្រុមអ្នកវិទ្យាសាស្ត្រនៃប្រទេសនេះ ទើបតែបានរកឃើញវិធីថ្មីក្នុងការព្យាបាលជំងឺមហារីក ដោយការប្រើប្រាស់វិធីសាស្ត្រ “កន្ត្រៃល្អិត” សំដៅទៅលើការកាត់កោសិកាមហារីកនៅលើសត្វកណ្ដុរក្នុងបន្ទប់ពិសោធន៍ ខណៈដែលវាមិនប៉ះពាល់ដល់កន្លែងផ្សេងៗដែលនៅជុំវិញកោសិកាមហារីកនោះ។
សាស្ត្រាចារ្យ Dan Peer អ្នកឯកទេសផ្នែកជំងឺមហារីកមកពីសាកលវិទ្យាល័យ Tel Aviv ប្រទេសអ៊ីស្រាអែល បានឱ្យដឹងថា៖ “នេះគឺជាការសិក្សាស្រាវជ្រាវដំបូងគេបង្អស់ក្នុងពិភពលោកដែលបញ្ជាក់ថា បច្ចេកវិទ្យាកែលម្អហ្សែន CRISPS មានតួនាទី “កាត់” DNA អាចមានប្រសិទ្ធភាពក្នុងការព្យាបាលជំងឺមហារីកនៅលើសត្វ”។
លទ្ធផលនៃការសិក្សាស្រាវជ្រាវខាងលើនេះ បានឆ្លងកាត់ដំណាក់កាលត្រួតពិនិត្យផ្ទៀងផ្ទាត់ និងត្រូវបានចុះផ្សាយលើទស្សនាវដ្ដីវិទ្យាសាស្ត្រ Science Advance។
សាស្ត្រាចារ្យ Peer ថ្លែងថា៖ “វិធីសាស្ត្រព្យាបាលនេះមិនផ្ដល់ផលវិបាក ហើយយើងខ្ញុំជឿជាក់ថា កោសិកាមហារីកដែលត្រូវបានព្យាបាលដោយវិធីសាស្ត្រនេះនឹងមិនដំណើរការត្រលប់ឡើងវិញឡើយ។ បច្ចេកវិទ្យានេះអាចពន្យារជីវិតរបស់អ្នកជំងឺមហារីក ហើយយើងសង្ឃឹមថា ថ្ងៃណាមួយវានឹងអាចព្យាបាលជំងឺនេះឱ្យជាសះស្បើយមិនខាន”។
លោក Peer សង្កត់ធ្ងន់ថា៖ “បើសិនយើងអាចប្រើប្រាស់បច្ចេកវិទ្យានេះ នោះការព្យាបាលតែ3លើកប៉ុណ្ណោះ គឺអាចកម្ចាត់សាច់មហារីកបានមួយដុំ។ បច្ចេកទេសនេះអាចកាត់ DNA នៅក្នុងកោសិកាមហារីក ហើយកោសិកាមហារីកទាំងនោះនឹងមិនអាចមានវត្តមានឡើងវិញបានឡើយ”។
លោកសាស្ត្រាចារ្យ Dan Peer
សាស្ត្រាចារ្យ Peer បានហៅវាថា ជា “វិធីព្យាបាលពេញលេញជាងមុន” ហើយក៏សង្ឃឹមថា វានឹងជំនួសវិធីព្យាបាលដែលបង្កផលវិបាកធ្ងន់ធ្ងរដល់អ្នកជំងឺមហារីក ព្រោះតែការព្យាបាលនាបច្ចុប្បន្នតែងតែជះឥទ្ធិពលដល់រាងកាយទាំងមូល។
ការស្រាវជ្រាវដែលប្រើប្រាស់បច្ចេកវិទ្យាកែលម្អហ្សែននាបច្ចុប្បន្ន ត្រូវបានគេប្រើប្រាស់សម្រាប់តែការព្យាបាលជំងឺកម្រមួយចំនួន និងនៅលើតែកោសិកាដែលត្រូវបានកម្ចាត់ចេញពីរាងកាយតែប៉ុណ្ណោះ។ វា (DNA) ត្រូវបានកែប្រែដើម្បីកែលម្អ ឬ “លុបបំបាត់” កោសិកាមហារីក។
អត្ថបទដែលត្រូវបានចុះផ្សាយនៅលើទស្សនាវដ្ដី Science Advance បានឱ្យដឹងអំពីការសាកល្បងប្រើប្រាស់បច្ចេកទេសនេះនៅលើសត្វកណ្ដុររាប់រយក្បាល ដែលក្នុងនោះសាស្ត្រាចារ្យ Peer បានបញ្ជាក់ថា វាអាចត្រូវបានប្រើប្រាស់នៅលើមនុស្សបន្ទាប់ពី2ឆ្នាំទៀត។
ក្រុមអ្នកស្រាវជ្រាវបានរកឃើញថា កណ្ដុរទាំងឡាយដែលកើតជំងឺមហារីក និងត្រូវបានព្យាបាលដោយវិធីសាស្ត្រខាងលើ មានអាយុវែងជាងទ្វេដងធៀបនឹងក្រុមកណ្ដុរផ្ទុយពីនេះ ហើយអត្រានៃការរស់រានមានជីវិតក៏ខ្ពស់ជាង30%ផងដែរ។
សាស្ត្រាចារ្យ Peer ឱ្យដឹងថា នៅពេលត្រូវបានសម្រួលឱ្យសមស្របជាមួយមនុស្ស វិធីសាស្ត្រព្យាបាលនេះនឹងត្រូវបានធ្វើបដិរូបកម្មដែលអាចប្រើបានទៅតាមលក្ខខណ្ឌអំណោយផលរបស់អ្នកជំងឺម្នាក់ៗ ដោយយោងទៅតាមលទ្ធផលនៃការវាយតម្លៃជាក់ស្ដែង និងត្រូវបានធ្វើឡើងដោយការចាក់ថ្នាំដោយប្រយោល ឬដោយផ្ទាល់ទៅក្នុងដុំសាច់មហារីក ដែលនេះអាស្រ័យទៅតាមប្រភេទដែលសមស្របបំផុត។
បច្ចេកវិទ្យាកែលម្អហ្សែន CRISPS មានតួនាទី “កាត់” DNA អាចមានប្រសិទ្ធភាពក្នុងការព្យាបាលជំងឺមហារីក
“បច្ចេកវិទ្យានេះ ត្រូវការអភិវឌ្ឍន៍បន្ថែមទៀង ប៉ុន្តែប្រការសំខាន់បំផុតនោះគឺថា យើងបានធ្វើការបញ្ជាក់ហើយថា បច្ចេកវិទ្យានេះអាចកម្ចាត់កោសិកាមហារីកបាន” សាស្ត្រាចារ្យ Peer មានប្រសាសន៍បន្ថែមយ៉ាងដូច្នេះ។
លោក Peer យល់ថា ថ្នាំចាក់ រួមមានសមាសធាតុចំនួន3៖ ទីមួយគឺ ណាណូ (nano) 1គ្រាប់ដែលត្រូវបានផ្សំឡើងអំពី lipid ទីពីរគឺ RNA ព័ត៌មានដែលត្រូវបានបំប្លែងជាកូដ និងមានតួនាទីជា “កន្ត្រៃល្អិត” ដើម្បីកាត់ DNA និងទីបីគឺប្រព័ន្ធកំណត់ទិសដែលអាចកំណត់អត្តសញ្ញាណរបស់កោសិកាមហារីក។
“នៅពេលដែលយើងខ្ញុំបានលើកឡើងជាលើកដំបូងអំពីវិធីសាស្ត្រព្យាបាលជាមួយនឹង RNA ព័ត៌មាន កាលពី12ឆ្នាំមុន គ្រប់គ្នាគិតថា នោះគឺជាវិទ្យាសាស្ត្របែបប្រឌិត។ ខ្ញុំជឿជាក់ថា នៅក្នុងអនាគតដ៏ខ្លីខាងមុខ យើងនឹងមានវិធីសាស្ត្រព្យាបាលជំងឺដទៃទៀតដែលត្រូវបានធ្វើបដិរូបកម្មដោយយោងទៅលើហ្សែន សម្រាប់អ្នកជំងឺមហារីក និងជំងឺតំណពូជផ្សេងៗទៀត”៕
ប្រភព៖ The Times of Israel
November 25, 2020
Trump លើកលែងទោសនិងរំដោះគ្រោះដល់មាន់ដាំងដុង នៅក្នុងថ្ងៃបុណ្យអំណរគុណប្រចាំឆ្នាំ
ប្រធានាធិបតីអាមេរិក លោក Donald Trump បានចូលរួមពិធីលើកលែងទោស ឬរំដោះគ្រោះដល់មាន់ដាំងដុងដែលមានឈ្មោះថា Corn ដែលជាព្រឹត្តិការណ៍ប្រពៃណីពិសេសមួយនៅសេតវិមាន ក្នុងឱកាសបុណ្យអំណរគុណ (Thanksgiving)។
“Corn ខ្ញុំលើកលែងទោសទាំងស្រុងដល់អ្នក” លោក Donald Trump បានប្រកាសយ៉ាងដូច្នេះ នៅក្នុងពិធីលើកលែងទោស ឬរំដោះគ្រោះដល់សត្វមាន់បារាំង (មាន់ដាំងដុង) នៅក្នុងសួនកុលាបនៃសេតវិមានកាលពីថ្ងៃទី24វិច្ឆិកា។ Corn ត្រូវបាននាំយកពីរដ្ឋ Iowa មកកាន់ទីក្រុងវ៉ាស៊ីងតោន ដើម្បីចូលរួមពិធីខាងលើនេះ។ ការប្រារព្ធពិធីលើកលែងទោសទៅតាមប្រពៃណីនេះ មានអត្ថន័យថា ជាការដោះលែងជីវិតសត្វឱ្យរួចផុតពីការក្លាយជាចំណីរបស់មនុស្សនៅក្នុងថ្ងៃបុណ្យអំណរគុណ។ ក្រុមមនុស្សដែលចូលរួមក្នុងពិធីនេះ បន្ទាប់មកក៏នាំគ្នាទះដៃអបអរសាទរ។
នៅមុនពិធីនេះ Corn និងមាន់ដាំងដុង1ក្បាលផ្សេងទៀត ត្រូវបាននាំមកកាន់រដ្ឋធានីវ៉ាស៊ីងតោនកាលពីថ្ងៃទី22វិច្ឆិកា និងបានសម្រាកនៅក្នុងសណ្ឋាគារលំដាប់ខ្ពស់ Willard នៅក្បែរសេតវិមាន។ ការជ្រើសរើសតាមអនឡាញមួយក៏ត្រូវបានធ្វើឡើងនៅក្នុងរយៈពេល24ម៉ោង ដើម្បីឱ្យពលរដ្ឋអាមេរិកាំង បោះឆ្នោតជ្រើសរើសថា គួរយក Corn ឬ Cob ទៅកាន់សេតវិមានដើម្បីឱ្យប្រធានាធិបតីលើកលែងទោស។
ពិធីលើកលែងទោសដល់មាន់បារាំងនៅក្នុងថ្ងៃបុណ្យអំណរគុណរបស់សេតវិមាននេះ ត្រូវបានប្រារព្ធឡើងជាលើកដំបូងនៅក្នុងឆ្នាំ1947 ក្នុងសម័យប្រធានាធិបតី Harry Truman ក្រោយមកត្រូវបាន George H.W. Bush ប្រែក្លាយឱ្យវាទៅជាទំនៀមទម្លាប់របស់សេតវិមានចាប់ពីឆ្នាំ1989។ ក្រោយពិធីរំដោះគ្រោះ ឬពិធីលើកលែងទោសនេះ មាន់ទាំងពីរសុទ្ធតែត្រូវបានបញ្ជូនចេញពីសេតវិមាន និងត្រលប់ទៅរស់នៅក្នុងសកិដ្ឋាននៅក្នុងសាកលវិទ្យាល័យនៃរដ្ឋ Iowa ដើម្បីទទួលភ្ញៀវទេសចរណ៍មកទស្សនាចាប់ពីថ្ងៃទី5 ខែធ្នូ៕
ប្រភព៖ Reuters
November 25, 2020
តួលេខអ្នកឆ្លងCovid-19 ទូទាំងពិភពលោកកើនដល់ជាង 60លាននាក់ ខណៈកម្ពុជាមាន307នាក់
ក្រសួងសុខាភិបាលកម្ពុជានាព្រឹកនេះ បានឱ្យដឹង បានរកឃើញករណីវិជ្ជមាននឹងCovid-19 ចំនួន1ករណីបន្ថែមទៀត ដែលនេះបាននាំឱ្យតួលេខសរុបកើនដល់307នាក់ ស្របពេលដែលពិភពលោកបានរកឃើញអ្នកផ្ទុកវីរុសជាង60លាននាក់។
ការឆ្លងថ្មី1ករណីខាងលើនេះ ត្រូវបានរកឃើញកាលពីថ្ងៃទី24វិច្ឆិកា ហើយអ្នកជំងឺគឺជាបុរសជនជាតិនេប៉ាល អាយុ37ឆ្នាំ ស្នាក់នៅក្នុងសណ្ឋាគារមួយកន្លែងក្នុងទីក្រុងភ្នំពេញ។ បុរសនេះបានធ្វើដំណើរពីប្រទេសនេប៉ាល់ទៅកាន់ដូហា និងបន្តជើងហោះហើរនៅកូរ៉េខាងត្បូងមុននឹងមកដល់កម្ពុជានៅថ្ងៃទី11វិច្ឆិកា។
គិតមកដល់បច្ចុប្បន្ន កម្ពុជាបានរកឃើញអ្នកផ្ទុកវីរុសCovid-19 សរុបចំនួន307នាក់ ក្នុងនោះមាន298នាក់បានជាសះស្បើយ និង9នាក់ផ្សេងទៀតកំពុងសម្រាកព្យាបាលនៅមន្ទីរពេទ្យ។
ដោយឡែក នៅទូទាំងពិភពលោកវិញ វីរុសCovid-19 បានឆ្លងទៅមនុស្សចំនួន 60,099,771នាក់ ក្នុងនោះមាន1,414,621នាក់បានស្លាប់ និង41,549,934នាក់បានជាសះស្បើយ ខណៈ17,135,216នាក់កំពុងសម្រាកព្យាបាល៕
November 25, 2020
ប្រទះឃើញបង្គោលលោហធាតុចម្លែកនៅកណ្ដាលសមុទ្រខ្សាច់! អាជ្ញាធរថា “ទោះអ្នកដាំមកពីពិភពផ្កាយក៏ដោយ វាជារឿងខុសច្បាប់ បើសិនជាធ្វើឡើងនៅទីសាធារណៈ”
ក្រុមអ្នកបើកបរឧទ្ធម្ភាគចក្រ បានប្រទះឃើញបង្គោលលោហធាតុដ៏អាថ៌កំបាំងមួយដែលត្រូវបានដាំនៅកណ្ដាលសមុទ្រខ្សាច់ Utah ហើយបញ្ហានេះនៅមិនទាន់មានការបកស្រាយច្បាស់លាស់ណាមួយនៅឡើយពីអាជ្ញាធរដែនដី។
ក្រុមបុគ្គលិកនៅអង្គភាពសុវត្ថិភាពសាធារណៈនៃរដ្ឋ Utah (DPS) សហរដ្ឋអាមេរិក កាលពីថ្ងៃទី18វិច្ឆិកា បានប្រើប្រាស់ឧទ្ធម្ភាគចក្រជួយដល់នាយកដ្ឋានការពារធនធានសត្វព្រៃ ដើម្បីរាប់សត្វចៀមស្នែងធំនៅលើសមុទ្រខ្សាច់ភាគអាគ្នេយ៍របស់រដ្ឋនេះ។ ពួកគេស្រាប់តែបានប្រទះឃើញវត្ថុមួយដែលដូចទៅនឹងដុំថ្មអាថ៌កំបាំងដែលមាននៅក្នុងខ្សែភាពយន្តរឿង “2001: A Space Odyssey” ដែលផលិតឆ្នាំ1968។
អ្នកបើកបរឧទ្ធម្ភាគចក្រ Bret Hutchings បានរៀបរាប់ថា៖ “អ្នកជំនាញខាងជីវសាស្ត្រម្នាក់នៅក្នុងក្រុមហោះហើរបានប្រទះឃើញវា នៅពេលយើងហោះពីលើវត្ថុនោះ។ គាត់បានស្រែកឡើង “អូ! អូ! ត្រលប់ក្រោយៗ!។ ខ្ញុំក៏សួរថា “ថីហ្នឹង?”។ ហើយគាត់ក៏ប្រាប់ថា “ត្រលប់ក្រោយសិនៗ មានអ្វីនៅខាងក្រោយ យើងត្រូវតែទៅមើល!”។ វានៅទីនោះ! នៅកណ្ដាលដុំថ្មធំៗពណ៌ក្រហម គឺជាបង្គោលលោហធាតុពណ៌ប្រាក់ រលោកផ្លេកដែលផុសឡើងផុតពីដី”។
Hutchings ប៉ាន់ប្រមាណដឹងថា បង្គោលលោហធាតុនោះមានកម្ពស់ប្រហែលពី3-3.6ម៉ែត្រ ហើយវាមិនដូចទៅនឹងករណីធ្លាក់ពីលើអាកាសនោះទេ វាទំនងជាមានអ្នកយកមកដាំ។
Hutchings និយាយថា៖ “យើងបាននិយាយលេងនឹងគ្នាថា បើសិនជាមានម្នាក់ក្នុងចំណោមពួកគេ ស្រាប់តែបានបាត់ខ្លួនភ្លាមៗ នោះអ្នកនៅសល់ប្រាកដជារត់បះសក់មិនខាន”។
អ្នកបើកបរឧទ្ធម្ភាគចក្រនេះយល់ថា វាអាចមានសិល្បករណាម្នាក់យកកំណាត់លោហធាតុនេះទៅដាំទីនោះ ដោយចាត់ទុកជាស្នាដៃសិល្បៈដែលមានការរៀបចំ ពោលគឺវាមិនដូចទៅនឹងសកម្មភាពរបស់មនុស្សពិភពផ្កាយឡើយ។ Hutchings បន្តថា “ខ្ញុំយល់ថា នោះគឺជាការនិយមថ្មីក្នុងពិភពសិល្បៈ ឬប្រហាក់ប្រហែលនេះ ដូចជាអ្នកគាំទ្រខ្សែភាពយន្ត “2001: A Space Odyssey” ជាដើម។
ក្រុមមន្ត្រីនៃរដ្ឋ Utah មិនទាន់រកឃើញប្រភពរបស់បង្គោលលោហធាតុនេះនៅឡើយ។ ប៉ុន្តែ ការដាំបង្គោលដែលមានរចនាសម្ព័ន្ធ ឬស្នាដៃសិល្បៈអ្វីមួយនៅទីសាធារណៈតាមតែការនឹកឃើញ គឺជាអំពើខុសច្បាប់ “បើទោះជាអ្នកមកពីពិភពផ្កាយណាមួយក៏ដោយ” នេះបើតាមការប្រកាសកាលពីថ្ងៃទី23វិច្ឆិការបស់ DPS។
ទីតាំងរបស់បង្គោលលោហធាតុនោះក៏មិនទាន់ត្រូវបានបង្ហើបឱ្យដឹងនៅឡើយ ហើយនៅតែមិនទាន់ដឹងច្បាស់ថា អ្នកណា ឬអ្វីមួយបានដាំវានៅទីនោះ។ នាយកដ្ឋានគ្រប់គ្រងដីធ្លីនឹងសម្រេចថា គួរតែស្រាវជ្រាវបន្ថែមលើបញ្ហានេះដែរ ឬយ៉ាងណា៕
ប្រភព៖ CNN
November 24, 2020
Elon Musk យកឈ្នះលើ Bill Gates ក្លាយជាអ្នកមានជាងគេលំដាប់ទីពីរក្នុងពិភពលោក
មហាសេដ្ឋីដែលមានវ័យទើបតែ49ឆ្នាំរូបនេះ បច្ចុប្បន្នមានទ្រព្យជិត128ពាន់លានដុល្លារអាមេរិក ដោយសារមូលបត្ររបស់ក្រុមហ៊ុនផលិតរថយន្តអគ្គិសនី Tesla កើនឡើងយ៉ាងឆាប់រហ័សកាលពីម្សិលមិញ (23វិច្ឆិកា)។
យោងតាម Bloomberg Billionaires Index ប្រធានប្រតិបត្តិរបស់ក្រុមហ៊ុន Tesla លោក Elon Musk រកប្រាក់បាន7.2ពាន់លានដុល្លារបន្ថែមទៀតកាលពីថ្ងៃទី23វិច្ឆិកា បន្ទាប់ពីមូលបត្ររបស់ Tesla បានកើនឡើង6.6%។ បច្ចុប្បន្ន មហាសេដ្ឋី Elon Musk មានទ្រព្យ127.9ពាន់លានដុល្លារ ច្រើនជាងបន្តិចបើធៀបនឹង 127.7ពាន់លានដុល្លាររបស់សហស្ថាបនិកនៃក្រុមហ៊ុន Microsoft លោក Bill Gates។ ដូច្នេះ លោក Musk បានក្លាយជាមហាសេដ្ឋីដែលមានទ្រព្យច្រើនជាងគេលំដាប់ទីពីរក្នុងពិភពលោក ដោយនៅពីក្រោយម្ចាស់ផ្សារអនឡាញ Amazon លោក Jeff Bezos ដែលបច្ចុប្បន្ន មានទ្រព្យសរុប 182ពាន់លានដុល្លារអាមេរិក។
ឆ្នាំនេះ ដោយសារតែមូលបត្រ Tesla កើនឡើងខ្លាំង លោក Musk ក៏រកបានជាង100ពាន់លានដុល្លារបន្ថែមទៀត។ នេះគឺជាការកើនឡើងខ្ពស់បំផុតនៅក្នុងតារាងចំណាត់ថ្នាក់ Bloomberg Billionaires Index។ កាលពីខែមករា2020 លោក Musk ទើបតែជាប់ចំណាត់ថ្នាក់ទី35ប៉ុណ្ណោះ។
3ភាគ4នៃទ្រព្យរបស់លោក Musk បានមកពីមូលបត្រ Tesla ជាក្រុមហ៊ុនផលិតរថយន្តអគ្គិសនីដែលបច្ចុប្បន្នមានតម្លៃទុនឡើងដល់500ពាន់លានដុល្លារអាមេរិក។ មូលបត្ររបស់លោក Musk នៅក្នុងក្រុមហ៊ុន Tesla មានតម្លៃខ្ពស់ជាងមូលបត្រនៅក្នុងក្រុមហ៊ុនអវកាស SpaceX ដល់ទៅ4ដងឯណោះ។
ដោយឡែក បើនិយាយអំពីទ្រព្យដែលលោក Bill Gates មាន នោះលោកនឹងនៅតែជាប់ចំណាត់ថ្នាក់លេខពីរក្នុងពិភពលោក បើសិនលោកមិនបានចំណាយរាប់សិបពាន់លានដុល្លារដើម្បីធ្វើសកម្មភាពមនុស្សធម៌។ គិតចាប់ពីឆ្នាំ2006 លោក Gates បានបរិចាគប្រាក់ជាង27ពាន់លានដុល្លារអាមេរិក តាមរយៈមូលនិធិមនុស្សធម៌ដែលមានដាក់ឈ្មោះលោក និងភរិយា៕
ប្រភព៖ Bloomberg
November 24, 2020
អភ័យឯកសិទ្ធិដំបូងៗដែល Biden នឹងទទួលបានក្នុងគ្រាប្រគល់និងទទួលអំណាច
ក្រុមរបស់លោក Joe Biden នឹងទទួលបានប្រាក់ជាង6លានដុល្លារ និងអភ័យឯកសិទ្ធិផ្នែកសន្តិសុខជាច្រើនផ្សេងទៀត បន្ទាប់ពី GSA ប្រកាសអំពីការចាប់ផ្ដើមដំណើរការប្រគល់អំណាច។
ប្រធានរដ្ឋបាលសេវាកម្មទូទៅរបស់អាមេរិក បានផ្ញើលិខិតមួយជូនទៅបេក្ខភាពប្រធានាធិបតី Joe Biden ដោយបានឱ្យដឹងថា រដ្ឋាភិបាលរបស់លោក Donald Trump បានត្រៀមខ្លួនរួចហើយក្នុងការប្រគល់អំណាចជូនគណបក្សជាប់ឆ្នោត។ នេះជាសញ្ញាបង្ហាញថា GSA នឹងចុះហត្ថលេខលើលិខិតស្នាមមួយចំនួនដើម្បីទទួលស្គាល់ជ័យជំនះរបស់លោក Biden ជាផ្លូវការ។
GSA គឺជាស្ថាប័នឯករាជ្យរបស់រដ្ឋាភិបាលអាមេរិក ដែលមានតួនាទីជួយដល់សកម្មភាពនានារបស់ស្ថាប័នរដ្ឋាភិបាលកណ្ដាល និងទទួលខុសត្រូវទៅលើការចុះហត្ថលេខាលើសំណុំបែបបទផ្លូវការ ក្រោយពីមានប្រធានាធិបតីជាប់ឆ្នោត ដើម្បីប្រគល់ប្រាក់រាប់លានដុល្លារ ផ្ដល់សិទ្ធិកាន់កាប់ទៅឱ្យក្រុមមន្ត្រីរដ្ឋាភិបាល ប្រគល់ការិយាល័យនានា និងសម្ភារទូទៅ ទៅឱ្យគណបក្សជាប់ឆ្នោតថ្មី។
ជាមួយនឹងលិខិតប្រកាសខាងលើរបស់ប្រធានា GSA ប្រធានាធិបតីជាប់ឆ្នោត លោក Joe Biden និងក្រុមរបស់លោកនឹងចាប់ផ្ដើមទទួលបានអភ័យឯកសិទ្ធិជាច្រើនទាក់ទងនឹងហិរញ្ញវត្ថុ និងសន្តិសុខ ដើម្បីត្រៀមសម្រាប់ដំណើរការនៃការទទួលគ្រប់គ្រងអំណាចប្រកបដោយរលូន។
ក្រុមរបស់លោក Biden ពេលនេះ អាចចាប់ផ្ដើមប្រើប្រាស់ខ្ទង់ថវិកា 6.3លានដុល្លារនៃកញ្ចប់ថវិការបស់រដ្ឋដែលបានត្រៀមសម្រាប់ការប្រគល់ និងទទួលអំណាច ក៏ដូចជាការទៅបំពេញការងារនៅតាមស្ថាប័ននានារបស់រដ្ឋាភិបាលកណ្ដាលដើម្បីស៊ាំជាមួយនឹងដំណើរការនៃការទទួលអំណាច ទៅតាមច្បាប់ប្រគល់តំណែងប្រធានាធិបតី។
លោក Biden ក៏នឹងទទួលបានរបាយការណ៍លម្អិតអំពីការគំរាមកំហែងផ្នែកសន្តិសុខដែលទាក់ទិននឹងអាមេរិក ក៏ដូចជាសកម្មភាពយោធា និងយុទ្ធនាការសម្ងាត់ដែលកំពុងត្រូវបានធ្វើឡើង។
បន្ទាប់ពីសេចក្ដីប្រកាសរបស់ GSA មេដឹកនាំនៃបណ្ដាស្ថាប័នរដ្ឋបាលកណ្ដាលអាចចាប់ផ្ដើមធ្វើការជាមួយនឹងសមាជិកក្នុងក្រុមរបស់លោក Biden ដើម្បីត្រៀមសម្រាប់ដំណើរការនៃការប្រគល់អំណាច នៅពេលដែលលោក Biden នឹងចូលកាន់តំណែងនៅថ្ងៃទី20មករា2021។
ក្រុមមន្ត្រីរដ្ឋបាលកណ្ដាលក៏អាចចាប់ផ្ដើមផ្ដល់លិខិតស្នាមផ្នែកសន្តិសុខជូនដល់សមាជិកក្នុងក្រុមរបស់លោក Biden និងក្រុមមនុស្សដែលត្រូវបានតែងតាំងទៅក្នុងគណៈរដ្ឋមន្ត្រីថ្មី។ លិខិតស្នាមនេះនឹងអនុញ្ញាតឱ្យពួកគេចូលទៅកន្លែងដែលមានការការពារយ៉ាងតឹងរ៉ឹង និងអាចទទួលបានព័ត៌មានសម្ងាត់ផងដែរ។
ក្រុមរបស់លោក Biden នឹងទទួលបានតំណភ្ជាប់អ៊ីនធើណិតដែលមានឈ្មោះដែនគេហទំព័រ (domain name) ជារដ្ឋាភិបាលអាមេរិក ដើម្បីបង្កើតទំព័រនៃគេហទំព័រ និងអ៊ីម៉េល។
ការសម្រេចចិត្តទទួលស្គាល់របស់ GSA អាចជំរុញឱ្យដំណើរការនៃការប្រគល់អំណាចប្រព្រឹត្តទៅបានលឿនជាងមុន។ លោក Biden បានចាប់ផ្ដើមធ្វើសកម្មភាពទាក់ទងនឹងការទទួលអំណាច ក្នុងនោះមានដូចជាការជ្រើសរើស និងឧទ្ទេសនាមសមាជិករបស់រដ្ឋាភិបាលថ្មី ក៏ដូចជាការប្រជុំជាមួយក្រុមហ៊ុនសំខាន់ៗ មានដូចជាក្រុមហ៊ុនផលិតឱសថដែលកំពុងស្រាជ្រាវវ៉ាក់សាំងជាដើម រួមនឹងការធ្វើទំនាក់ទំនងទៅកាន់ក្រុមមេដឹកនាំអឺរ៉ុបដើម្បីកែលម្អទំនាក់ទំនងរវាងប្រទេសនៃឆ្នេរមហាសមុទ្រអាត្លង់ទិកទាំងពីរនេះផងដែរ៕
ប្រភព៖ Reuters
November 24, 2020
អង្គការ NASA សាកល្បងប្រព័ន្ធរុញច្រានអន្តរតារា ដែលអាចនាំយានហោះចេញក្រៅប្រព័ន្ធព្រះអាទិត្យ ដោយប្រើពេលខ្លីជាងមុន
ក្រុមអ្នកស្រាវជ្រាវនៅសាកលវិទ្យាល័យ Johns Hopkins កំពុងតែពិនិត្យទៅលើបច្ចេកវិទ្យាដែលប្រើប្រាស់កម្ដៅព្រះអាទិត្យដើម្បីរុញច្រានយានអវកាសឱ្យទៅដល់ជាយប្រព័ន្ធព្រះអាទិត្យ និងចូលទៅដល់ទីអវកាសអន្តរតារា (Interstellar medium) ដែលនៅចន្លោះពីព្រះអាទិត្យមួយទៅព្រះអាទិត្យមួយ នៅក្នុងកាឡាក់ស៊ី។
ក្រុមអ្នកអភិវឌ្ឍបច្ចេកវិទ្យានេះបានឱ្យដឹងថា កម្លាំងរុញច្រានដែលប្រើថាមពលព្រះអាទិត្យមិនមែនជាទិដ្ឋភាពចម្លែកហួសនិស្ស័យនោះទេ។ ឧបករណ៍ពិសោធន៍(កុងតឺរន័រមួយដែលផ្ទុកពេញដោយអំពូលភ្លើង LED) របស់សាកលវិទ្យាល័យនេះ អាចបញ្ជាក់បានថា បច្ចេកវិទ្យានេះពិតជាមានលទ្ធភាព នេះបើតាម Jason Benjoski មកពីមន្ទីរពិសោធន៍រូបវិទ្យាអនុវត្តនៃសាកលវិទ្យាល័យ John Hopkins នៅ Maryland សហរដ្ឋអាមេរិក។
ការសិក្សាស្រាវជ្រាវនូវអ្វីដែលស្ថិតនៅខាងក្រៅតំបន់ heliosphere ជាលម្ហអវកាសដែលលែងមានឥទ្ធិពលរបស់ព្រះអាទិត្យ គឺជាការលំបាក ដោយសារតែមានរយៈចម្ងាយឆ្ងាយ។ យានអវកាសចំនួន2គ្រឿងគត់ដែលធ្លាប់បានហោះចេញក្រៅតំបន់ heliosphere នៃប្រព័ន្ធព្រះអាទិត្យ នោះគឺ Voyager 1 និង Voyager 2 ដែលពួកវាត្រូវហោះហើរក្នុងរយៈពេលជិតកន្លះសតវត្សរ៍ដើម្បីប្រមូលទិន្នន័យអំពីលម្ហអវកាសអន្តរតារាជាលើកដំបូង។ នេះគឺជាមូលហេតុដែលធ្វើឱ្យ NASA ត្រូវធ្វើការជាមួយក្រុមអ្នកវិទ្យាសាស្ត្រនៅមន្ទីរពិសោធន៍រូបវិទ្យាអនុវត្តដើម្បីស្វែងរកបច្ចេកវិទ្យាដែលអាចរុញច្រានយានអវកាសឱ្យហោះហើរក្នុងល្បឿនលឿនជាងបច្ចុប្បន្នច្រើនដង។
យានអវកាសចំនួន2គ្រឿងធ្លាប់បានហោះចេញក្រៅតំបន់ heliosphere នៃប្រព័ន្ធព្រះអាទិត្យ នោះគឺ Voyager 1 និង Voyager 2
NASA បានប្រកាសឱ្យដឹងអំពីគម្រោងសហការខាងលើកាលពីខែតុលា2019 និងបានបន្ថែមថា ភារកិច្ចនៃការអនុវត្តបច្ចេកវិទ្យាថ្មីនេះ នឹងអាចត្រូវបានធ្វើឡើងចាប់ពីឆ្នាំ2030។
ជំនួសឱ្យការដុតប្រេងឥន្ធនៈ យានអវកាសថ្មីរបស់ NASA នឹងដំណើរការដោយកម្ដៅព្រះអាទិត្យ ដោយការប្រើប្រាស់អ៊ីដ្រូសែនពីព្រះអាទិត្យ បង្កើតជាកម្ដៅ និងបាញ់ថាមពលចេញពីបំពង់របស់ម៉ាស៊ីនដើម្បីបង្កើតជាកម្លាំងរុញច្រាន។
តំបន់ heliosphere ជាលម្ហអវកាសដែលលែងមានឥទ្ធិពលរបស់ព្រះអាទិត្យ
ក្រៅពីឧបសគ្គទាក់ទងនឹងការរចនាម៉ាស៊ីន កាំជ្រួចដែលប្រើថាមពលព្រះអាទិត្យនេះក៏ត្រូវតែជាឧបករណ៍ដែលមិនរលាយនៅពេលទៅក្បែរព្រះអាទិត្យបំផុត ដើម្បីទទួលបានថាមពលគ្រប់គ្រាន់សម្រាប់ការហោះហើរដែលមានល្បឿនចាប់ពី 48,280ដល់ 321,868គម/ម៉ោង។ បច្ចុប្បន្ន មានវត្ថុធាតុតិចតួចណាស់ដែលអាចស៊ូទ្រាំបានជាមួយនឹងកម្ដៅខ្ពស់ពេលទៅក្បែរព្រះអាទិត្យ ដោយនៅតែអាចនាំឧស្ម័នអ៊ីដ្រូសែនបាន។ ក៏ប៉ុន្តែ Benkoski សង្ឃឹមថា លោហធាតុដែលបង្កើតឡើងដោយម៉ាស៊ីនបោះពុម្ភ 3D នឹងជាគន្លឹះដែលអាចបង្កើតបានបន្ទះការពារកម្ដៅដ៏ខ្លាំងក្លាពីព្រះអាទិត្យ៕
ប្រភព៖ Futurism
November 24, 2020
(វីដេអូ) យន្តហោះចម្បាំងបំបាំងកាយ F-35A ទម្លាក់គ្រាប់បែកនុយក្លេអែរនៅលើតំបន់ពិសោធន៍និងហ្វឹកហាត់យោធា Nevada
កងទ័ពអាកាសរបស់សហរដ្ឋអាមេរិក បានចូលរួមធ្វើលំហាត់សាកល្បងទៅលើយន្តហោះចម្បាំង F-35A ដោយការទម្លាក់គ្រាប់បែកនុយក្លេអែរ B61-12 ក្លែងក្លាយកាលពីខែសីហា ប៉ុន្តែ វីដេអូទើបតែត្រូវបានគេបញ្ចេញកាលពីពេលថ្មីៗនេះ។
មន្ទីរពិសោធន៍ជាតិ Sandia និងមន្ទីរពិសោធន៍ជាតិ Los Alamos រួមជាមួយនឹងកងទ័ពអាកាសអាមេរិក កាលពីថ្ងៃទី25សីហា បានប្រើប្រាស់យន្តហោះចម្បាំង F-35A ដើម្បីធ្វើលំហាត់ទម្លាក់គ្រាប់បែកនុយក្លេអែរក្លែងក្លាយ B61-12 ដែលមានរូបរាង និងទម្លន់ស្មើនឹងគ្រាប់បែកនុយក្លេអែរពិត ប៉ុន្តែវាមិនមានរំសេវ សារធាតុវិទ្យុសកម្ម ឬឧបករណ៍អេឡិចត្រូនិកនោះទេ។ ការសាកល្បងនេះត្រូវបានធ្វើឡើងនៅឯទីលាន Tonopah ដែលស្ថិតក្នុងតំបន់ពិសោធន៍និងហ្វឹកហាត់យោធា Nevada។
វីដេអូស្ដីអំពីការសាកល្បង ឬការហ្វឹកហាត់ដែលត្រូវបានប្រកាសដោយមន្ទីរពិសោធន៍ជាតិ Sandia កាលពីថ្ងៃទី23វិច្ឆិកា បង្ហាញថា គ្រាប់បែក B64-12 ត្រូវបានទម្លាក់ចេញពីប្រព័ន្ធបំពាក់អាវុធរបស់យន្តហោះចម្បាំង F-35A នៅលើកម្ពស់ជាង 3,000ម។ គ្រាប់បែកនេះបានបង្វិលខ្លួនពេលកំពុងធ្លាក់ចុះ និងចំណាយពេលប្រហែល42វិនាទីមុននឹងសំដៅចំគោលដៅ។
យន្តហោះចម្បាំង F-35A
Steven Samuels អ្នកគ្រប់គ្រងក្រុមដែលទទួលខុសត្រូវលើប្រព័ន្ធរបស់ B61-12 នៃមន្ទីរពិសោធន៍ជាតិ Sandia បានឱ្យដឹងថា “នេះគឺជាការពិសោធដំបូងដើម្បីពិនិត្យលើប្រព័ន្ធម៉ាស៊ីន អេឡិចត្រូនិក ទំនាក់ទំនង និងការទម្លាក់រវាងយន្តហោះ F-35A និងគ្រាប់បែក B61-12។ ការសាកល្បងថ្មីបំផុតនេះគឺជាផ្នែកមួយនៃកម្មវិធី F-35A និង B-61-12”។
យន្តហោះចម្បាំង F-35A ធ្លាប់បានចូលរួមធ្វើការហ្វឹកហាត់ និងសាកល្បងទម្លាក់គ្រាប់បែកក្លែងក្លាយ B61-12 កាលពីខែមិថុនា2019។ ការសាកល្បងនេះគឺមានបំណងដើម្បីធានាឱ្យបានប្រាកដថា គ្រាប់បែកនុយក្លេអែរ B61-12 ដែលត្រូវទម្លាក់ពី F-35A នឹងដំណើរការនៅពេលចាំបាច់ និងមិនទាមទារលក្ខខណ្ឌផ្សេង”។ របាយការណ៍កាលពីឆ្នាំ2007 បានឱ្យដឹងថា ស្ថាប័នដែលបានចូលរួមធ្វើការសាកល្បងនេះមានសង្ឃឹមថា គ្រាប់បែកនុយក្លេអែរ B61-12 នឹងត្រូវបានបំពាក់ទៅឱ្យយន្តហោះចម្បាំង F-35A របស់សហរដ្ឋអាមេរិកនៅចុងឆ្នាំ2020នេះ។
គ្រាប់បែកនុយក្លេអែរយុទ្ធសាស្ត្រ B61-12 អាចត្រូវបានបំពាក់ប្រព័ន្ធនាំផ្លូវពីផ្កាយរណប ក្បាលគ្រាប់នុយក្លេអែរដែលមានកម្លាំងស្មើនឹងរំសេវ TNT 50,000តោន។ ចំណែកទំហំវិញ គឺតូចល្មមដែលអាចដាក់បានយ៉ាងល្អនៅក្នុងយន្តហោះចម្បាំង F-35A។
កម្មវិធីកែលម្អ B61-12 ត្រូវចំណាយប្រាក់សរុប 10ពាន់លានដុល្លារ ក្នុងនោះ គ្រាប់បែក1គ្រាប់ៗមានទម្ងន់ 320គីឡូក្រាម និងមានតម្លៃ28លានដុល្លារអាមេរិក ដែលតម្លៃនេះខ្ពស់ជាង1.5ដងបើធៀបនឹងតម្លៃមាសសុទ្ធដែលមានទម្ងន់ដូចគ្នា។ សហរដ្ឋអាមេរិកមានផែនការផលិតគ្រាប់បែកនុយក្លេអែរ B61-12 ដែលមានអាយុកាល20ឆ្នាំចំនួន500គ្រាប់ ដើម្បីបំពាក់ឱ្យក្រុមហោះហើរ F-15E និង F-35 របស់ប្រទេសនេះ និងសម្ព័ន្ធមិត្ត NATA៕
https://www.youtube.com/watch?v=6HmR2D5ZRnw
ប្រភព៖ Drive
November 24, 2020