Author: សឿន សំណាង

យីហោរបស់អតីតប្រធានាធិបតី Barack Obama រកប្រាក់បានច្រើនសន្ធឹក តាមវីធីណាខ្លះ?
ពេលទើបតែឈានជើងចូលសេតវិមាន ទ្រព្យសម្បត្តិរបស់គ្រួសារអតីតប្រធានាធិបតី Barack Obama កាលណោះមានតែ 1.3លានដុល្លារប៉ុណ្ណោះ។ ដល់ឆ្នាំ2018 តួលេខនេះបានឡើងដល់40លានដុល្លារ ហើយនាពេលបន្តបន្ទាប់ទៀត កំពុងតែកើនយ៉ាងឆាប់រហ័ស។
បន្ទាប់ពីចាកចេញពីសេតវិមាន លោក Obama បានកសាង “អនាចក្រទូរគមនាគមន៍” មួយដោយខ្លួនឯង ប្រកបដោយជោគជ័យ។
អ្នកជំនាញការម្នាក់អះអាងថា៖ “ដោយសារតែសង្គមអាមេរិកបែកបាក់គ្នាយ៉ាងធ្ងន់ធ្ងរ យីហោ Obama នឹងនៅតែត្រូវបានគេនិយមចូលចិត្ត។
“យីហោចម្លងអាជីវកម្ម (Franchise) Obama
គេហទំព័រ Le Figaro បានចុះផ្សាយអត្ថបទស្ដីអំពីប្រព័ន្ធទូរគមនាគមន៍របស់ស្វាមីភរិយាលោកអតីតប្រធានាធិបតីអាមេរិក Barack Obama ដែលជា “ប្រភពថាមពល” អាចជួយឱ្យទ្រព្យរបស់លោកកើនឡើងយ៉ាងឆាប់រហ័ស រហូតជីតដល់240លានដុល្លារអាមេរិក។
ដោយត្រូវបានបង្កើតឡើងក្នុងពេលតែមួយនៅក្នុងប្រទេសចំនួន23 កាលពីថ្ងៃទី17វិច្ឆិកា ទៅតាមបែបបទនៃការចាក់បញ្ចាំងខ្សែភាពយន្តកំពូលៗរបស់ Hollywood សៀវភៅភាគទីមួយនៃកំណត់ហេតុរបស់ប្រធានាធិបតីទី44របស់សហរដ្ឋអាមេរិក បានក្លាយជា “បាតុភូត” ដ៏អស្ចារ្យមួយ។ នៅសហរដ្ឋអាមេរិក និងកាណាដា សៀវភៅនេះត្រូវបានលក់ដាច់ជាង890,000ក្បាលនៅក្នុងថ្ងៃចេញផ្សាយដំបូង។ សៀវភៅ Becoming របស់ស្ត្រីទីមួយរបស់អាមេរិកដែលបានបោះពុម្ភក្នុងឆ្នាំ2018 ក៏លក់បាន724,000ក្បាលប៉ុណ្ណោះក្នុងថ្ងៃដំបូង ហើយមកដល់ពេលនេះ វាបានឡើងដល់14លានក្បាលទៅហើយ។
គូស្វាមីភរិយា Barack Obama និង Michelle Obama បានក្លាយជាយីហោមួយដែលមានផលិតផលជាច្រើន នាំមកនូវប្រាក់ចំណេញច្រើនសន្ធឹក។ តួលេខដែលគេត្រូវលើកយកមកនិយាយពេលនេះ មានដូចជា ខ្ទង់ប្រាក់ចំណូលជិត65លានដុល្លារបានមកពីកិច្ចព្រមព្រៀងជាមួយនឹងម្ចាស់រោងពុម្ភ Penguin Random House និងជាង50លានដុល្លារបានមកពីកិច្ចព្រមព្រៀងជាមួយនឹង Netflix បូករួមនឹងមូលប្បទានប័ត្រ20លានដុល្លារពី Spotify ដើម្បីទទួលបាន postcast ផ្ដាច់មុខពីលោក Obama ជាដើម។ល។
ប៉ុន្តែ បញ្ជីរាយនាម “ផលិតផល” របស់គ្រួសារ Obama ខាងលើនេះ នឹងមានច្រើនជាងនេះទៀតនាពេលខាងមុខ។ ក្នុងនោះមានដូចជា កិច្ចពិភាក្សាគ្នាដែលមានតម្លៃ 400,000ដុល្លារ/មួយពេល ហើយសូម្បីតែប៉ានតែដែលមានផ្ដិចឃ្លាដែលទាក់ទងនឹងសេចក្ដីថ្លែងការប្រកបដោយការច្នៃប្រឌិតរបស់លោក Obama ក៏មានតម្លៃដល់ទៅ20ដុល្លារផងដែរក្នុងប៉ាន់ចំនួនមួយ។
Obama ហាក់ដូចជា “ប៉ះត្រង់ណា ត្រង់នោះក៏ក្លាយជាមាស”
នៅសហរដ្ឋអាមេរិក ការដែលប្រធានាធិបតីចេញផ្សាយសៀវភៅ ឬបង្កើតមូលនិធិឯកជន បានក្លាយជារឿងទំនៀមទម្លាប់ទៅហើយ បន្ទាប់ពីពួកគេបានចាកចេញពីសេតវិមាន។ អតីតប្រធានាធិបតី Bush, Bill Clinton ជាដើម សុទ្ធតែបានធ្វើដូច្នេះ។ ប៉ុន្តែ Louis Morales-Chanard ដែលជានាយកផ្នែកយុទ្ធសាស្ត្ររបស់ក្រុមហ៊ុនទូរគមនាគមន៍ Dentsu និយាយថា លោក Obama គឺជាមនុស្សដំបូងគេដែលទទួលបានជោគជ័យខ្លាំង ហើយលទ្ធផលនេះបានកើតឡើងដំណាលគ្នានឹងការរីកចម្រើនរបស់បណ្ដាញសង្គម ដូចជា Facebook, Twitter, Youtube ព្រោះគ្រួសារលោក Obama បានចាប់យកឥទ្ធិពលនេះបានយ៉ាងឆាប់រហ័ស។
មួយវិញទៀត ជោគជ័យរបស់លោក Obama មួយផ្នែកក៏ដោយសារលោកគឺជាប្រធានាធិបតីអាមេរិកស្បែកខ្មៅដំបូងគេ។ ក្រៅពីនេះ លោក Obama ក៏ត្រូវបានគេចាត់ទុកដូចជាតំណាងរបស់ក្រុមភាគតិចផងដែរ។ ហើយដើម្បីរក្សាមុខមាត់ និងកេរ្ដិ៍ឈ្មោះនេះ លោក Obama តែងតែធ្វើខ្លួនឱ្យជាប្រធានាធិបតី និងអតីតប្រធានាធិបតីដែលមានលក្ខណសាមញ្ញ និងងាយស្រួលរាប់អាន។
ជាងនេះ លោក Obama កំពុងតែចាត់ទុកលោក Trump ជាឥន្ធនៈដ៏ល្អឯកសម្រាប់ប្រព័ន្ធដំណើរការរបស់ខ្លួន។ ក្នុងពេលដែលស្ដង់ដា និងតម្លៃនៃសហរដ្ឋអាមេរិកត្រូវបានថយចុះ ក្នុងនោះសង្គមត្រូវបែកបាក់ លោក Obama គឺជាតំណាងនៃសេចក្ដីសុខ និងសុវត្ថិភាពរបស់ពិភពបុរាណ នេះបើតាមអ្នកវិភាគ Jean-Emmanuel Cortade de la Saussay ស្ថាបនិករបស់ Story Mind ដែលជាក្រុមហ៊ុនស្រាវជ្រាវអំពីយីហោ និងប្រព័ន្ធផ្សព្វផ្សាយ។
មកដល់បច្ចុប្បន្ន គូស្វាមីភរិយាលោក Obama ហាក់ដូចជា “ប៉ះត្រង់ណា ត្រង់នោះក៏ក្លាយជាមាស។ ពេលទើបតែឈានជើងចូលសេតវិមាន ទ្រព្យសម្បត្តិរបស់គ្រួសារអតីតប្រធានាធិបតី Barack Obama កាលណោះត្រូវបានប្រកាសថា មានតែ 1.3លានដុល្លារប៉ុណ្ណោះ។ ដល់ឆ្នាំ2018 តួលេខនេះបានឡើងដល់40លានដុល្លារ នេះបើតាម GoBankingRates។ ចំណែក New York Post ថ្មីៗនេះ បានគន់គូរឃើញថា ទ្រព្យរបស់គ្រួសារ Obama មានដល់ទៅ135លានដុល្លារអាមេរិក ខណៈដែលស្ថិតិរបស់សាកលវិទ្យាល័យវ៉ាស៊ីងតោនបានព្យាករថា នាពេលខាងមុខ តួលេខនេះនឹងកើនដល់242លានដុល្លារអាមេរិក៕
ប្រភព៖ BI, Le Figaro,RFI

November 27, 2020
(វីដេអូ) ភ្នំ Huanghua ប្រែក្លាយជា “ឋានសួគ៌ា” បន្ទាប់ពីព្រឹលធ្លាក់ដើមរដូវ
ព្រឹលបានធ្លាក់ចាប់ពីថ្ងៃអាទិត្យសប្ដាហ៍មុន បានគ្របដណ្ដប់លើតំបន់ភ្នំ Huanghuan នៃខេត្ត Henan ភាគកណ្ដាលប្រទេសចិន ធ្វើឱ្យតំបន់ទាំងមូលពោរពេញទៅដោយពណ៌ស ប្រៀបបានទៅនឹងឋានទេវតា គួរជាទីចាប់ចិត្ត។
ព្រឹលដើមរដូវ កាលពីថ្ងៃទី22វិច្ឆិកា បានធ្លាក់ចុះមកគ្របដណ្ដប់ពេញតំបន់ភ្នំ Huanghua នាទីក្រុង Anyang ខេត្ត Henan ប្រទេសចិន។
ទិដ្ឋភាពដ៏មហាសែនស្អាតនៃព្រៃភ្នំ បូកជាមួយនឹងសម្រស់ដ៏ស្រស់ត្រកាលនៃពណ៌សក្បុសរបស់ព្រឹល រួមនឹងពពកអ័ព្ទអណ្ដែតត្រសែតនៅមិនឆ្ងាយពីផ្ទៃដី បង្កើតបានជាទេសភាពមួយដែលអាចប្រៀបទៅនឹងឋានត្រ័យត្រិង្សដែលជាសួគ៌ាគួរជាទីរស់នៅ។
ស្ថិតក្នុងឧទ្យាន Huanghua Shenyuan ភ្នំ Huanghua គឺជាទីតាំងដ៏ល្បីឈ្មោះតាំងតែពីសម័យដើម និងធ្លាប់ត្រូវបានរំលឹកនៅក្នុងស្នាដៃកំណាព្យ និងចម្រៀងជាច្រើនរបស់ចិន៕

ប្រភព៖ CCTV+
November 27, 2020
Trump ថានឹងចាកចេញពីសេតវិមាន ប៉ុន្តែត្រូវមានលក្ខខណ្ឌ
ប្រធានាធិបតី Donald Trump បានឱ្យដឹងថា នឹងចុះចេញពីសេតវិមាន បើសិនជាគូប្រជែង Joe Biden ឈ្នះក្នុងការបោះឆ្នោតរបស់តំណាងម្ចាស់ឆ្នោតដែលនឹងត្រូវធ្វើឡើងនៅថ្ងៃទី14ធ្នូខាងមុខ។
កាលពីថ្ងៃទី 26វិច្ឆិកា លោក Donald Trump បានអះអាងថា លោកនឹងចុះចេញពីសេតវិមាន បើសិនជាបេក្ខភាពមកពីបក្សប្រជាធិបតេយ្យ លោក Joe Biden ត្រូវបានប្រតិភូតំណាងម្ចាស់ឆ្នោតទទួលស្គាល់ថាជាអ្នកឈ្នះ នៅក្នុងការបោះឆ្នោតនាថ្ងៃទី14ធ្នូខាងមុខ ប៉ុន្តែបានបន្ថែមថា នឹងពិបាកខ្លាំងដើម្បីឱ្យលោកទទួលស្គាល់បរាជ័យ នៅក្នុងស្ថានការណ៍បច្ចុប្បន្ន ហើយតំណាងម្ចាស់ឆ្នោតនឹង “បង្កឱ្យមានកំហុសឆ្គង” បើសិនជាបោះឆ្នោតឱ្យ Biden។
នេះគឺជាឥរិយាបថចុងក្រោយ និងទំនងជាការទទួលស្គាល់បរាជ័យថ្មីបំផុតរបស់ខ្លួន ដែលលោក Trump បានលើកឡើងនៅក្នុងរយៈពេលប៉ុន្មានសប្ដាហ៍ចុងក្រោយនេះ។
នៅក្នុងសន្និសីទសារព័ត៌មានមួយនៅសេតវិមាន លោក Trump ថ្លែងថា “ការបោះឆ្នោតនេះ គឺជាករណីបោកប្រាស់” ក៏ប៉ុន្តែ លោកមិនបានលើកឡើងអំពីភ័ស្តុតាងនោះទេ។
ចាប់ពីថ្ងៃទី7វិច្ឆិកា សារព័ត៌មានអាមេរិកាំង បានទទួលស្គាល់ថា លោក Joe Biden គឺជាប្រធានាធិបតីជាប់ឆ្នោត។ ចំនួនសន្លឹកឆ្នោតនៃប្រតិភូតំណាងម្ចាស់ឆ្នោតដែលលោក Biden កំពុងកាន់កាប់ មានចំនួន 306សំឡេង ខណៈលោក Trump កាន់កាប់ 232សំឡេង នេះបើតាមលទ្ធផលនៃការព្យាករដែលត្រូវបានប្រកាសដោយបណ្ដាស្ថាប័នសារព័ត៌មានធំៗនៅសហរដ្ឋអាមេរិក។
ក៏ប៉ុន្តែ Trump មិនទាន់ទទួលស្គាល់ថាចាញ់នៅឡើយ ហើយបច្ចុប្បន្ន លោកកំពុងធ្វើ “សង្គ្រាម” ផ្នែកច្បាប់នៅឯបណ្ដារដ្ឋសំខាន់ៗ រួមមាន Pennsylvania, Georgia និង Michigan ដើម្បីប្រឆាំងនឹងលទ្ធផលនៃការរាប់សន្លឹកឆ្នោត បើទោះជារដ្ឋទាំងនេះ បានទទួលស្គាល់ជ័យជំនះរបស់លោក Biden ក៏ដោយ៕
ប្រភព៖ Reuters
November 27, 2020
ពាក្យតែមួយម៉ាត់នេះ ធ្វើឱ្យមេរបស់ Xiaomi ត្រូវបាត់បង់តំណែង
គ្រាន់តែនិយាយពាក្យមួយម៉ាត់សោះ បានបណ្ដាលឱ្យនាយិកាប្រតិបត្តិនៃក្រុមហ៊ុនបច្ចេកវិទ្យាចិន Xiaomi នាង Wang Mei ត្រូវសុំលាលែងពីតំណែង ដោយខ្លួនឯង ដោយសារតែមានការខឹងសម្បាខ្លាំងពីក្រុមអ្នកលេងបណ្ដាញសង្គម។
ហេតុការណ៍ខាងលើបានចាប់ផ្ដើមឡើងនៅក្នុងកិច្ចប្រជុំប្រចាំឆ្នាំស្ដីអំពីការគ្រប់គ្រងប្រភពធនធានមនុស្សនៅប្រទេសចិន ដែលត្រូវបានធ្វើឡើងកាលពីថ្ងៃទី21វិច្ឆិកា។ នៅទីនោះ Wang Mei ដែលជានាយិកាប្រតិបត្តិ និងជាអនុប្រធាននៃសាកលវិទ្យាល័យ Qinghe របស់ក្រុមហ៊ុនបច្ចេកវិទ្យាចិន Xiaomi នៅក្នុងសុន្ទរកថាមួយ បាននិយាយថា៖ “Xiaomi ជឿជាក់ថា អនាគត អ្នកដែលក្ដាប់បាន Diaosi នឹងជាអ្នកឈ្នះលើសាធារណជន ចូរធ្វើជាយុវវ័យ និងលាតសន្ធឹងទៅកាន់ពិភពលោក”។
ក៏ប៉ុន្តែ ពាក្យថា “Diaosi” ដែលនាយិការូបនេះបានប្រើប្រាស់ គឺជាគ្រាមភាសាមួយនៅប្រទេសចិន ដែលតែងត្រូវបានប្រើជាលក្ខណកំប្លុកកំប្លែង សំដៅលើក្រុមយុវវ័យដែលត្រូវបានគេចាត់ទុកថាជាអ្នកបរាជ័យ (ឬហៅថា loser) មានរូបរាងមិនគួរឱ្យចាប់អារម្មណ៍ និងមិនមាន “ទឹកមាត់ប្រៃ” នៅក្នុងសង្គម។ ពាក្យ “Diaosi” នេះ ក៏តែងត្រូវបានអ្នកលេងបណ្ដាញសង្គមប្រើប្រាស់ដើម្បីបង្អាប់គ្នា ហើយវាក៏តែងត្រូវគេចាត់ទុកថា ជាពាក្យបង្ហាញអំពីការប្រកាន់ឋានៈ និងខ្វះការគោរព ឬជាការមើលងាយជាដើម។
ក៏ប៉ុន្តែ គំនិតរបស់អនុប្រធានសាកលវិទ្យាល័យរូបនេះ មិនមែនមានន័យថា មើលងាយអ្នកណាឡើយ។ គំនិតរបស់នាងគឺថា យុវវ័យគឺជាអ្នកប្រើប្រាស់ដ៏សំខាន់ ហើយក្រុមហ៊ុនរបស់ខ្លួននឹងផលិតចេញនូវផលិតផលដែលឆ្លើយតបតាមតម្រូវការរបស់ក្រុមយុវវ័យនេះ។
យ៉ាងណាក៏ដោយ អ្នកលេងបណ្ដាញសង្គមចិន មិនបានគិតដូចនាយិកាប្រតិបត្តិរបស់ Xiaomi នេះឡើយ។ បន្ទាប់ពីសុន្ទរកថាត្រូវបានគេបង្ហោះលើបណ្ដាញសង្គមភ្លាម វាបានធ្វើឱ្យមានរលកនៃការខឹងសម្បាជាបន្តបន្ទាប់ ក្នុងនោះក៏មានអ្នកគាំទ្ររបស់ Xiaomi ផងដែរ។
ការិយាល័យកណ្ដាលរបស់ក្រុមហ៊ុន Xiaomi
មានអ្នកបណ្ដាញសង្គមម្នាក់ បានប្រតិកម្មថា៖ “គំនិតរបស់នាងគឺថា អ្នកប្រើប្រាស់ផលិតផលរបស់ Xiaomi គឺសុទ្ធតែជាក្រុមមនុស្សធុនអន់មែនទេ?”។
ម្នាក់ទៀតសរសេរថា៖ “កាន់ Redmi ក្នុងដៃ ហើយឮពាក្យនេះ ចង់តែគ្រវាត់វាចោលទេ”។
មនុស្សមួយចំនួនទៀតយល់ថា ក្រៅពីការខ្វះការគោរពដល់អ្នកប្រើប្រាស់ និងអ្នកគាំទ្រ សម្ដីរបស់ Wang Mei ក៏ដើរបញ្ច្រាសនឹងស្ថានការណ៍បច្ចុប្បន្ន នៅពេលដែល Xiaomi កំពុងប្រឹងប្រែងដើម្បី “រើបម្រាស” ខ្លួនចេញពីយីហោ “តម្លៃធូរថ្លៃ” ដោយងាកទៅផលិតស្មាតហ្វូនលំដាប់ខ្ពស់។
ហេតុការណ៍ខាងលើ មិនមែនធម្មតាឡើយ តែវាធ្ងន់ធ្ងររហូតដល់ថ្នាក់ ក្រុមហ៊ុន Xiaomi កាលពីថ្ងៃទី25វិច្ឆិកា ត្រូវធ្វើសេចក្ដីប្រកាសព័ត៌មានមួយ ឱ្យដឹងថា នាយិកាប្រតិបត្តិ Wang Mei របស់ក្រុមហ៊ុននេះ មានការស្ដាយក្រោយជាខ្លាំងចំពោះផលវិបាកដែលបង្កើតឡើងដោយសម្ដីរបស់ខ្លួន ដែលបានធ្វើឱ្យប៉ះពាល់ដល់អ្នកគាំទ្រ និងអ្នកប្រើប្រាស់ ដោយសារតែការយល់ឃើញមិនប្រកបដោយវិន័យ និងជាកំហុសឆ្គងមួយរបស់ខ្លួន។ នាងបានសុំលាលែងពីតំណែង ហើយក្រុមហ៊ុនក៏បានយល់ព្រមតាមសំណើរបស់នាងហើយដែរ។
ចំណែក Wang Mei ក៏បានធ្វើការសុំអភ័យទោសជាសាធារណៈនៅក្នុងការប្រតិកម្មមួយរបស់ខ្លួន ដោយនិយាយថា ការយល់ឃើញដែលទាក់ទងនឹងបញ្ហានេះ គ្រាន់តែជាកំហុសបុគ្គលរបស់ខ្លួននាងផ្ទាល់តែប៉ុណ្ណោះ ហើយវាមិនតំណាងឱ្យទស្សនៈ និងយោបល់របស់ក្រុមហ៊ុនឡើយ។
“សង្ឃឹមថា គ្រប់គ្នានឹងមិនយល់ច្រឡំលើក្រុមហ៊ុន Xiaomi” អតីតនាយិកាប្រតិបត្តិ Wang Mei របស់ក្រុមហ៊ុន Xiaomi និយាយដូច្នេះ៕
November 27, 2020
សាប៊ូមួយដុំដែលមានតម្លៃជិត3,000ដុល្លារអាមេរិក! តើវាត្រូវបានធ្វើឡើងអំពីអ្វីខ្លះ?
រោងចក្រតូចមួយដែលជាកម្មសិទ្ធិរបស់គ្រួសារអ្នកផលិតសាប៊ូតាំងតែពីសតវត្សរ៍ទី15 បានពពាយនាយលក់សាប៊ូពិសេសមួយដុំដែលមានតម្លៃ2,800ដុល្លារអាមេរិក ដែលនេះគឺជាតម្លៃថ្លៃជាងគេបង្អស់ក្នុងពិភពលោក។
យីហោសាប៊ូ Khan Al Saboun ត្រូវបានបង្កើតឡើងដោយ Bader Hassen & Sons ដែលជាសិប្បកម្មផលិតសាប៊ូមួយនៅតំបន់ Tripoli នៃប្រទេសលីបង់។ សិប្បកម្មនេះផលិតសាប៊ូ និងផលិតផលថែរក្សាស្បែកដ៏ប្រណិតជាច្រើនទៀតដែលមានផ្ទុកសារជាតិប្រេង និងទឹកដមផ្កាធម្មជាតិ។ វាត្រូវបានដាក់លក់នៅក្នុងហាងផ្ដាច់មុខបំផុតមួយចំនួននៅទីក្រុង Dubai និងអារ៉ាប់រួម ប៉ុន្តែផលិតផលដែលមានតម្លៃថ្លៃបំផុតរបស់ក្រុមហ៊ុននេះ ត្រូវបានផ្គត់ផ្គង់ដល់អតិថិជនពិសេសៗ និងបុគ្គលល្បីៗតែប៉ុណ្ណោះ។
ដោយត្រូវបានផលិតឡើងជាលើកដំបូងកាលពីឆ្នាំ2013 ដែលទុកដូចជាជំនូនពិសេសបំផុតគ្មានពីរសម្រាប់ជំទាវទីមួយនៅប្រទេសកាតា ដុំសាប៊ូដែលមានតម្លៃថ្លៃជាងគេលើពិភពលោកនេះ មានផ្ទុកម្សៅមាស និងម្សៅត្បូងពេជ្រ ដែលវាមានតម្លៃរហូតដល់2,800ដុល្លារអាមេរិក។
ដុំសាប៊ូនេះ ដំបូងឡើយវាមានរូបរាងដូចទៅនឹងដុំឈីសដែលមានតម្លៃថ្លៃ តែបច្ចុប្បន្នត្រូវបាន Bader Hassen & Sons កែច្នៃឡើងវិញ។ នៅក្នុងវីដេអូមួយដែលត្រូវបានចែករំលែកតៗគ្នានៅលើអ៊ីនធើណិត បង្ហាញថា នាយកប្រតិបត្តិនៃក្រុមហ៊ុន Amir Hasen បានជូនសាប៊ូមួយដុំដែលមានតម្លៃថ្លៃបំផុតក្នុងលោក ដល់តារាសម្ដែងស្រីនៃប្រទេសបារ៉ែន និងកំពូលតារា Instagram ឈ្មោះ Shaila Sabt។ ក្នុងវីដេអូនេះដែរ គេឃើញថា វាត្រូវបានធ្វើឡើងដោយដៃ និងត្រូវបានស្រោបដោយមាសសុទ្ធ។
កាលពីឆ្នាំ2015 ពេលដែល BBC បានចុះផ្សាយព័ត៌មានអំពីដុំសាប៊ូដែលមានតម្លៃថ្លៃបំផុតក្នុងលោក មានដំណឹងថា ផលិតផលប្រណិតនេះទំនងជាមានសភាពគ្រើម ដោយសារតែមាស និងពេជ្រ។ ក៏ប៉ុន្តែ Amir Hasen និយាយថា វាមិនធ្វើឱ្យខូចស្បែកនោះទេ ហើយសភាពគ្រើមនេះ តាមពិតវាជួយធ្វើឱ្យមានអារម្មណ៍ស្រស់ស្រាយ និងស្រើបស្រាល។ ជាងនេះ វាក៏ជួយឱ្យទម្លាប់ងូតទឹករៀងរាល់ថ្ងៃ ក្លាយទៅជារឿងមួយដែលគួរជាទីរំភើបទៀតផង៕
ប្រភព៖ BBC
November 26, 2020
អតីតនាយករដ្ឋមន្ត្រីស៊ូដង់ បង់ជីវិតនៅ UAE ដោយសារCovid-19
ក្រោយរយៈពេល3សប្ដាហ៍ដែលបានចូលសម្រាកព្យាបាលនៅមន្ទីរពេទ្យក្នុងប្រទេសអារ៉ាប់រួម (UAE) អតីតនាយករដ្ឋមន្ត្រីនៃប្រទេសស៊ូដង់ លោក Sadiq al-Mahdi បានទទួលមរណភាព ព្រោះតែបានឆ្លងវីរុសCovid-19។
កាលពីខែមុន គ្រួសាររបស់អតីតនាយករដ្ឋមន្ត្រីស៊ូដង់ Sadiq al-Mahdi បានឱ្យដឹងថា លោកបានធ្វើតេស្តរកឃើញថា វិជ្ជមានជាមួយនឹងCovid-19។ ក្រោយការព្យាបាលរយៈពេលខ្លីនៅប្រទេសស៊ូដង់មិនទទួលបានផលល្អ លោក Sadiq al-Mahdi ក៏ត្រូវបានបញ្ជូនទៅកាន់ប្រទេសអារ៉ាប់រួម។
ថ្ងៃទី26វិច្ឆិកានេះ គ្រួសារ និងបក្ស Umma បានប្រកាសថា លោក Sadiq al-Mahdi បានទទួលមរណភាព។ សាកសពអតីតនាយករដ្ឋមន្ត្រីស៊ូដង់រូបនេះ នឹងត្រូវបានបញ្ចុះនៅព្រឹកថ្ងៃទី27វិច្ឆិកានៅក្នុងទីក្រុង Omdurman នៃប្រទេសស៊ូដង់។ នេះបើតាមសារព័ត៌មាន Reuters។
លោក Sadiq al-Mahdi ឆ្នាំនេះ មានវ័យ84ឆ្នាំ។ លោកគឺជាអ្នកនយោបាយកំពូលមួយរូបនៅប្រទេសស៊ូដង់។ លោកធ្លាប់បានកាន់កាប់តំណែងនាយករដ្ឋមន្ត្រីស៊ូដង់ក្នុងដំណាក់កាលពីឆ្នាំ1966-1967 និងឆ្នាំ1986-1989។ ឆ្នាំ1989 លោកត្រូវបានគេធ្វើរដ្ឋប្រហារយោធាទម្លាក់ពីតំណែង ហើយអតីតប្រធានាធិបតី Omar al-Bashir បានឡើងកាន់កាប់តំណែងនាយករដ្ឋមន្ត្រីជំនួសលោករូប។
ក្រោយការរស់នៅនិរទេសខ្លួនបានមួយឆ្នាំ លោក Sadiq al-Mahdi ក៏ត្រលប់មកកាន់ស៊ូដង់វិញនៅចុងឆ្នាំ2018 ខណៈដែលរដ្ឋាភិបាលរបស់លោក Bashir កំពុងប្រឈមនឹងការប្រឆាំងតវ៉ាយ៉ាងខ្លាំងក្លា។ កូនស្រីរបស់លោក Sadiq al-Mahdi ឈ្មោះ Mariam Sadiq al-Mahdi ដែលគ្រប់គ្រងតំណែងជាអនុប្រធាននៃគណបក្សប្រឆាំង Umma ក៏ធ្លាប់ត្រូវបានឃុំខ្លួននៅក្នុងគ្រាដែលមានបាតុកម្មកើតឡើងផងដែរ។
ក្នុងកាលៈទេសៈដែលបក្សប្រឆាំងនានាសុទ្ធតែចុះខ្សោយក្រោមរបបលោក Bashir គណបក្ស Umma ក៏បានសាមគ្គីគ្នា និងដើរតួនាទីសំខាន់ដើម្បីរក្សាតុល្យភាពអំណាចនៅស៊ូដង់។ ក្រោយពីកងទ័ពបានបង្ខំឱ្យអតីតប្រធានាធិបតី al-Bashir ចាកចេញពីអំណាច លោក Sadiq al-Mahdi ក៏បន្តជំរុញឱ្យប្រទេសជាតិងាកមករករបបប្រជាធិបតេយ្យវិញ៕
ប្រភព៖ Reuters
November 26, 2020
ក្រុមបាតុករថៃ ជាង10,000នាក់ នាំគ្នាតវ៉ានៅមុខធនាគារដែលមានភាគហ៊ុនរបស់ស្ដេច
ប្រជាជនថៃប្រមាណជាង10,000នាក់ បានលើកគ្នាមកតវ៉ានៅខាងមុខធនាគារពាណិជ្ជសៀម ដើម្បីស្នើឱ្យមានការស៊ើបអង្កេតលើទ្រព្យសម្បត្តិ ក៏ដូចជាការចំណាយរបស់មហាក្សត្រ Vajiralongkorn។
បាតុកម្មនេះត្រូវបានធ្វើឡើងចាប់ពីវេលាម៉ោងប្រហែល15 ក្នុងថ្ងៃទី25វិច្ឆិកា នៅខាងក្រៅការិយាល័យកណ្ដាលរបស់ធនាគារពាណិជ្ជសៀម (SCB) នៅភាគខាងជើងទីក្រុងបាងកក បណ្ដាលឱ្យមានការកកស្ទះចរាចរណ៍នៅក្នុងតំបន់នេះ។ ការិយាល័យកណ្ដាលរបស់ SCB នៅទីក្រុងបាងកកបានបិទទ្វារកាលពីម្សិលមិញ ប៉ុន្តែសាខារបស់ធនាគារនេះនៅតែដំណើរការជាធម្មតា។
មហាក្សត្រថៃ Vajiralongkorn គឺជាភាគហ៊ុនិកធំបំផុតរបស់ធនាគារ SCB ហើយកន្លងមក ក្រុមបាតុករក៏ធ្លាប់បានអំពាវនាវឱ្យប្រជាជនបិទគណនីនៅធនាគារនេះដើម្បីសម្ដែងការជំទាស់។
មេដឹកនាំក្រុមបាតុករ Parit “Penguin” Chiwarak បានស្នើឱ្យបើកការស៊ើបអង្កេតទៅលើទ្រព្យសម្បត្តិ និងការចាយវាយរបស់មហាក្សត្រថៃផងដែរ។ Penguin បានស្នើឱ្យក្រុមបាតុករច្រៀងរួមគ្នានូវចម្រៀងមួយបទមុននឹងបញ្ចប់ការតវ៉ាដោយសន្តិវិធីដើម្បីទប់ស្កាត់ករណីត្រូវចាប់ខ្លួនដែលអាចនាំឱ្យពួកគេមិនអាចធ្វើបាតុកម្មនៅថ្ងៃទី27វិច្ឆិកា។
មេដឹកនាំម្នាក់ទៀតរបស់ក្រុមបាតុករ នោះគឺ Panusaya “Ruang” Sithijirawattanakul បានឱ្យដឹងថា បាតុកម្មបន្ទាប់នឹងត្រូវធ្វើឡើងនៅក្នុងថ្ងៃទី27វិច្ឆិកាខាងមុខ ក៏ប៉ុន្តែមេដឹកនាំរូបនេះមិនបានបង្ហើបឱ្យដឹងអំពីទីតាំងជាក់លាក់នោះទេ។
Penguin បានសរសេរនៅទំព័រ Facebook កាលពីថ្ងៃទី24វិច្ឆិកាថា ខ្លួនត្រូវបានប៉ូលិសស្នើឱ្យចូលខ្លួនបំភ្លឺនៅឯនាយកដ្ឋានប្រឆាំងបទល្មើសបច្ចេកវិទ្យានៅថ្ងៃទី1ធ្នូ។ ដីកាកោះនេះក៏ត្រូវបានធ្វើឡើងចំពោះក្រុមសកម្មជនចំនួន12នាក់ផ្សេងទៀតផងដែរ។
ក្រុមបាតុករនេះ ដំបូងឡើយមានផែនការប្រមូលផ្ដុំគ្នានៅទីលានប្រជាធិបតេយ្យ ហើយបន្ទាប់មកនឹងឆ្ពោះទៅកាន់នាយកដ្ឋានរាជសម្បត្តិ (CBP) នៅកណ្ដាលរាជធានីដើម្បីស្នើឱ្យមានការស៊ើបអង្កេតលើទ្រព្យសម្បត្តិ និងការចំណាយរបស់មហាក្សត្រ។ ប៉ុន្តែ ក្រុមប៉ូលិសបានរារាំងនៅតំបន់ CBP ដោយប្រើប្រាស់កុងតឺន័រ របងបេតុង និងបន្លាលួស។ ប៉ូលិសព្រមានក្រុមបាតុករមិនឱ្យចូលដល់រង្វង់150ជុំវិញ CBP។
ក្រុមបាតុករ ក្រោយមកក៏បានប្ដូរទិសដៅទៅកាន់ធនាគារ SCB ដើម្បីកាត់បន្ថយភាពតានតឹងដែលអាចប្រឈមមុខដាក់គ្នា ឬការប៉ះទង្គិចជាមួយក្រុមប៉ូលិសដែលអាចនាំឱ្យពួកគេធ្លាក់ចូលក្នុងអន្ទាក់។ អាជ្ញាធរបានបំពាក់កាមេរ៉ានៅជុំវិញ SCB កាលពីព្រឹកថ្ងៃទី25វិច្ឆិកា។
មហាក្សត្រថៃ Vajiralongkorn គឺជាភាគហ៊ុនិកធំជាងគេបង្អស់របស់ SCB ដែលជាធនាគារធំលំដាប់ទីពីរនៅប្រទេសថៃ និងកាន់កាប់ភាគហ៊ុនប្រមាណ 23.4% ដោយព្រះអង្គជាអ្នកឈរព្រះនាមផ្ទាល់។
ក្រោយពីបានឡើងគ្រងរាជ មហាក្សត្រ Vajiralongkorn ក៏បានកាន់កាប់សិទ្ធិគ្រប់គ្រង CPB និងឈរព្រះនាមក្ដោបក្ដាប់ទ្រព្យសម្បត្តិដែលមានតម្លៃសរុបប្រមាណជាង 60ពាន់លានដុល្លារអាមេរិកកាលពីឆ្នាំ2016 រួមមាន អចលនទ្រព្យកំពូលៗនៅទីក្រុងបាងកក និងមូលបត្រនៅ SCP។ CPB ត្រូវបានបង្កើតឡើងកាលពីទសវត្សរ៍ឆ្នាំ1930 ដើម្បីគ្រប់គ្រងរាជសម្បត្តិ ប៉ុន្តែ នៅឆ្នាំ2017 វាបានក្លាយជាទ្រព្យឯកជនរបស់មហាក្សត្រ។
សូមរំលឹកថា បាតុករថៃបានចេញធ្វើបាតុកម្មអស់ជាច្រើនខែមកហើយ ដើម្បីទាមទារឱ្យមានការកែសម្រួលរដ្ឋធម្មនុញ្ញ ឬកែទម្រង់របបយោធានិយម ដែលប្រការនេះត្រូវបានគេចាប់អារម្មណ៍យ៉ាងខ្លាំង ដោយសារតែថៃជាប្រទេសមួយដែលមានទំនៀមទម្លាប់គោរពរាជវង្សយ៉ាងខ្ជាប់ខ្ជួន។ យោងតាមច្បាប់ប្រមាទព្រះមហាក្សត្រ ដែលត្រូវគេចាត់ទុកថាមានលក្ខណតឹងរ៉ឹងបំផុតក្នុងពិភពលោក ជនល្មើសអាចត្រូវបានកាត់ទោសឱ្យជាប់ពន្ធនាគារដល់ទៅ15ឆ្នាំឯណោះ។
នាយករដ្ឋមន្ត្រីថៃ Prayuth Chan-ocha កាលពីសប្ដាហ៍មុន បានប្រកាសថា រាជរដ្ឋាភិបាលថៃ និងស្ថាប័នសន្តិសុខ “នឹងប្រើប្រាស់ច្បាប់ដែលមានស្រាប់ ដើម្បីទប់ទល់នឹងក្រុមបាតុករ” ដែលលោកបានហៅថា ជាក្រុមល្មើសច្បាប់៕
ប្រភព៖ Nikkei
November 26, 2020
អាមេរិកចេញគោលនយោបាយថ្មី៖ អ្នកទេសចរណ៍មកពីប្រទេសចំនួន23 នឹងត្រូវដាក់ប្រាក់កក់ធានាខ្លួនរហូតដល់15,000ដុល្លារ
គោលនយោបាយថ្មីរបស់ក្រសួងការបរទេសអាមេរិក តម្រូវឱ្យអ្នកទេសចរណ៍បរទេសមកពីប្រទេសចំនួន23 ដាក់ប្រាក់កក់ជាមុនរហូតដល់15,000ដុល្លារ នៅពេលសុំទិដ្ឋាការចូលទឹកដីអាមេរិក។ ខ្ទង់ប្រាក់កក់នេះនឹងត្រូវបានអាជ្ញាធរដកហូត បើសិនជាអ្នកទេសចរណ៍ស្នាក់នៅលើសថ្ងៃកំណត់នៅលើទឹកដីអាមេរិក។
ក្រសួងការបរទេសអាមេរិក កាលពីថ្ងៃទី23វិច្ឆិកា បានឱ្យដឹងថា គោលនយោបាយថ្មីនេះនឹងមានសុពលភាពចាប់ពីថ្ងៃទី24ធ្នូ ឆ្នាំ2020ខាងមុខ រហូតដល់ថ្ងៃទី24មិថុនា ឆ្នាំ2021។ ការកំណត់ថ្មីនេះ ភាគច្រើនសំដៅទៅលើបណ្ដាប្រទេសដែលមានអត្រាពលរដ្ឋទៅស្នាក់នៅហួសកាលកំណត់លើទឹកដីអាមេរិកខ្ពស់ជាងគេ ដោយប្រើប្រាស់ប្រភេទទិដ្ឋាការ B-2 (សម្រាប់គោលដៅទេសចរណ៍) និង B-1 (សម្រាប់គោលដៅការងារ)។ ព័ត៌មានខាងលើនេះ ត្រូវបានចុះផ្សាយលើបណ្ដាញព័ត៌មានរបស់នាយកដ្ឋានចុះឈ្មោះជាតិសហរដ្ឋអាមេរិក កាលពីថ្ងៃទី24វិច្ឆិកា។
គោលនយោបាយថ្មីនេះ បញ្ជាក់ថា អ្នកទេសចរណ៍ដែលសុំទិដ្ឋាការប្រភេទ B ទៅកាន់សហរដ្ឋអាមេរិក នឹងត្រូវកក់ប្រាក់ចំនួន 5,000ដុល្លារ ឬ 10,000ដុល្លារ ឬ 15,000ដុល្លារ។ ខ្ទង់ប្រាក់នេះនឹងត្រូវនាយកដ្ឋានអន្តោប្រវេសន៍ដកហូត បើសិនស្នាក់នៅហួសថ្ងៃកំណត់។
ប្រទេសដែលមានឈ្មោះក្នុងបញ្ជីនៃគោលនយោបាយខាងលើ មានចំនួន23ប្រទេស ដែលសុទ្ធសឹងតែជាប្រទេសដែលមានអត្រាពលរដ្ឋទៅស្នាក់នៅអាមេរិកខ្ពស់ជាង10% ហើយភាគច្រើនគឺជាប្រទេសនៅទ្វីបអាហ្វ្រិក (15ប្រទេស)។ ក្រៅពីនេះក៏មានប្រទេសមួយចំនួននៅអាស៊ីផងដែរ។ ក៏ប៉ុន្តែ ការកំណត់ថ្មីខាងលើ មិនប៉ះពាល់ដល់និស្សិត ឬទេសចរមកពីបណ្ដាប្រទេសអភិវឌ្ឍន៍ផ្សេងទៀតដែលទទួលបានការលើកលែងទិដ្ឋាការចូលទឹកដីអាមេរិក។
អាមេរិកចេញគោលនយោបាយថ្មី៖ អ្នកទេសចរណ៍មកពីប្រទេសចំនួន23 នឹងត្រូវដាក់ប្រាក់កក់រហូតដល់15,000ដុល្លារ
គោលនយោបាយសាកល្បងដែលមានសុពលភាពរយៈពេល 6ខែនេះរបស់រដ្ឋាភិបាលលោក Trump ត្រូវបានធ្វើឡើងដើម្បីកាត់បន្ថយស្ថានភាពទេសចរស្នាក់នៅហួសកាលកំណត់ ដែលនេះនឹងជួយឱ្យរដ្ឋាភិបាលបន្ថយបានការចំណាយទាក់ទងនឹងការបណ្ដេញចេញជនបរទេសដែលស្នាក់នៅលើសថ្ងៃកំណត់នៅលើទឹកដីអាមេរិក។
បណ្ដាប្រទេសដែលរងផលប៉ះពាល់ពីគោលនយោបាយថ្មីរបស់សហរដ្ឋអាមេរិក រួមមាន៖ អាហ្វហ្គានីស្ថាន អ៊ីរ៉ង់ ស៊ីរី យេមែន លីប៊ី ម៉ូរីតានី អ៊ីរីទ្រា ស៊ូដង់ អង់ហ្គោឡា ប៊ូតាន បួគីណាហ្វាសូ បួរុនឌី កាបវែរ ឆាត សាធារណរដ្ឋកុងហ្គោ ជីប៊ូទី ហ្គាមប៊ី ហ្គីណេប៊ីសូ ឡាវ មីយ៉ានម៉ារ ប៉ាពួញ៉ូវហ្គីណេ និងប្រទេស សៅតូម៉េប្រាំងស៊ីប៕
ប្រភព៖ AFP
November 26, 2020
Jeff Bezos ប្រកាសបង្ហាញអ៊ីម៉ែលផ្ទាល់ខ្លួនជាសាធារណៈ ដើម្បីទទួលសំបុត្រត្អូញត្អែរពីអតិថិជន
ម្ចាស់ក្រុមហ៊ុន Amazon ត្រូវបានគេស្គាល់ថា ជាមនុស្សមានការយកចិត្តទុកដាក់ខ្ពស់ចំពោះសកម្មភាពកែលម្អថ្មីទៅលើផលិតផល និងសេវាកម្មរបស់ខ្លួន ទៅតាមសំណើ និងបំណងប្រាថ្នារបស់អតិថិជន។ល។
នៅក្នុងកិច្ចសម្ភាសមួយជាមួយសារព័ត៌មាន CNBC កាលពីពេលថ្មីៗនេះ លោក Jeff Bezos ដែលជាស្ថាបនិក និងជា CEO របស់ក្រុមហ៊ុនពាណិជ្ជកម្មអនឡាញ Amazon បានឱ្យដឹងថា លោកប្រកាសបង្ហាញជាសាធារណៈអំពីអាសយដ្ឋានអ៊ីម៉ែល [email protected] គឺដើម្បីទទួលមតិប្រតិកម្ម និងការត្អូញត្អែរពីអតិថិជនរបស់ខ្លួន។
“បច្ចុប្បន្ន ខ្ញុំនៅតែទទួលបានអ៊ីម៉ែលជាច្រើនពីអតិថិជន” ម្ចាស់ផ្សារ Amazon បានឱ្យដឹងនៅពេលនិយាយអំពីសំបុត្រដែលបានផ្ញើមកកាន់អ៊ីម៉ែលខាងលើ។
នៅក្នុងសៀវភៅថ្មី “Invent & Wander: The Collected Writings of Jeff Bezos” លោក Bezos បានប្រាប់ថា [email protected] គឺជាអាសយដ្ឋានអ៊ីម៉ែលផ្លូវការរបស់លោក ហើយលោកចាត់ទុកបញ្ហាគ្រប់យ៉ាងដែលទទួលបានពីអតិថិជនគឺជាឱកាសដើម្បីកែលម្អសេវាកម្មរបស់ក្រុមហ៊ុន Amazon។
ភាគច្រើននៃសំបុត្រដែលបានផ្ញើមកកាន់អ៊ីម៉ែលរបស់លោក Bezos គឺមានខ្លឹមសារត្អូញត្អែរអំពីសេវាកម្មរបស់ក្រុមហ៊ុន Amazon។ លោក Bezos ឱ្យដឹងថា “នោះគឺជាមូលហេតុដែលអតិថិជនតែងតែសរសេរសំបុត្រផ្ញើមកយើងខ្ញុំ។ ដោយវិធីណាមួយនោះ យើងធ្លាប់បានធ្វើឱ្យការបញ្ជាទិញរបស់ពួកគេត្រូវច្របូកច្របល់”។
មហាសេដ្ឋីលំដាប់ទីមួយក្នុងពិភពលោករូបនេះ បានអះអាងថា លោកតែងតែពិនិត្យមើលខ្លឹមសារអ៊ីម៉ែលយ៉ាងយកចិត្តទុកដាក់។ ឧទាហរណ៍ នៅពេលទទួលបានការត្អូញត្អែរអំពីបញ្ហាផលិតផល ភ្លាមនោះលោកនឹងស្នើឱ្យបុគ្គលិកស្រាវជ្រាវស្វែងរកមូលហេតុដើមនៃបញ្ហា និងដោះស្រាយជាបន្ទាន់។
“នៅពេលដោះស្រាយទៅតាមវិធីនោះ យើងមិនត្រឹមតែអាចដោះស្រាយបញ្ហាជាក់ស្ដែងមួយជាមួយនឹងអតិថិជនម្នាក់នោះឡើយ ប៉ុន្តែគឺសម្រាប់អតិថិជនគ្រប់រូបផងដែរ។ នេះគឺជាផ្នែកមួយដ៏សំខាន់នៅក្នុងដំណើរការជំនួញរបស់យើង” Bezos បកស្រាយនៅក្នុងសៀវភៅខាងលើ។
ដើម្បីជាការសាកល្បង ទំព័រ CNBC Make It បានផ្ញើសំបុត្រទៅកាន់អ៊ីម៉ែលរបស់ Jeff Bezos នៅវេលាម៉ោង10និង20នាទីព្រឹក។ ពួកគេទទួលបានការឆ្លើយតប ក្រោយការផ្ញើចេញត្រឹមតែ10នាទីប៉ុណ្ណោះ។
ម្ចាស់ក្រុមហ៊ុន Amazon ត្រូវបានគេស្គាល់ថា ជាមនុស្សដែលមានការយកចិត្តទុកដាក់ខ្ពស់ចំពោះសកម្មភាពកែលម្អថ្មីទៅលើផលិតផលរបស់ខ្លួនទៅតាមសំណើ និងបំណងប្រាថ្នារបស់អតិថិជន។ល។ លោកជឿជាក់ថា ត្រូវតែផ្ដោតការយកចិត្តទុកដាក់ទៅលើអតិថិជនជាសំខាន់ មិនមែនយកចិត្តទុកដាក់ទៅលើគូប្រជែងនោះឡើយ។
នៅក្នុងលិខិតមួយច្បាប់ដែលបានផ្ញើទៅកាន់ភាគហ៊ុនិករបស់ Amazon កាលពីឆ្នាំ2017 លោក Bezos ឱ្យដឹងថា៖ “ប្រការមួយរបស់អតិថិជនដែលខ្ញុំចូលចិត្ត នោះគឺថា ពួកគេតែងតែមិនពេញចិត្ត។ ការរំពឹងទុករបស់ពួកគេមិនដែលគ្រប់គ្រាន់ឡើយ គឺតែងតែកើនឡើង។ នោះគឺជាធម្មជាតិរបស់មនុស្សលោក។ល។ យើងមិនអាចដេកលក់ជាមួយនឹងកម្រងផ្កានៅលើពិភពលោកនេះទេ”។
យោងតាមលោក Bezos អ្នកជំនួញត្រូវតែយល់ច្បាស់អំពីទីផ្សាររបស់ខ្លួន និងយល់ច្បាស់ថា អតិថិជនកំពុងស្វែងរកអ្វីខ្លះ។ បើសិនជាបាននាំមកនូវអ្វីៗដែលអតិថិជនចង់បាន នោះពួកគេនឹងវិលត្រលប់មកជាថ្មីម្ដងទៀត។ លោកយល់ថា នេះគឺជាវិធីតែមួយគត់ដើម្បីអាចរក្សាវត្តមាន និងរីកចម្រើននៅលើទីផ្សារដែលមានការប្ដូរផ្លាស់ជាប្រចាំនេះបាន ហើយក៏ជាគោលការណ៍មូលដ្ឋានដ៏សំខាន់បំផុត នៅពីក្រោយការវិនិយោគនានារបស់ក្រុមហ៊ុន Amazon៕
ប្រភព៖ CNBC
November 26, 2020
រៀងរាល់40វិនាទី Covid-19 សម្លាប់បានមនុស្សម្នាក់ នៅសហរដ្ឋអាមេរិក
សហរដ្ឋអាមេរិក ជាលើកដំបូងបានកត់ត្រាតួលេខអ្នកស្លាប់ដោយសារCovid-19 ជាង2,000ករណីនៅក្នុងមួយថ្ងៃ រាប់ចាប់ពីខែឧសភា ពោលគឺមានន័យថា រៀងរាល់40វិនាទី មានអ្នកជំងឺCovid-19 ម្នាក់បានបាត់បង់ជីវិត។
សហរដ្ឋអាមេរិកដែលជាសម្បុកវីរុសCovid-19 ធំជាងគេលំដាប់ទីមួយក្នុងពិភពលោក បានរកឃើញអ្នកឆ្លងវីរុសសរុប 13,137,962នាក់ និងស្លាប់សរុប268,219នាក់ ក្នុងនោះមានករណីវិជ្ជមានថ្មីចំនួន186,409នាក់ និងស្លាប់ថ្មីចំនួន2,367នាក់នៅក្នុងរយៈពេល24ម៉ោងចុងក្រោយនេះ។
យោងតាមសារព័ត៌មាន Reuters កាលពីថ្ងៃទី24វិច្ឆិកា សហរដ្ឋអាមេរិកមានអ្នកជំងឺCovid-19 ដល់ទៅ2,157នាក់បានស្លាប់នៅក្នុងអំឡុង24ម៉ោង ពោលគឺមានន័យថា រៀងរាល់40វិនាទី Covid-19 សម្លាប់បានមនុស្សម្នាក់។ នេះគឺជាលើកដំបូងហើយដែលសហរដ្ឋអាមេរិកមានអ្នកស្លាប់ជាង2,000នាក់នៅក្នុងមួយថ្ងៃដោយសារCovid-19 បើរាប់ចាប់ពីខែឧសភា។ តួលេខអ្នកជំងឺCovid-19 ដែលបានចូលព្យាបាលនៅមន្ទីរពេទ្យកាលពីថ្ងៃទី25វិច្ឆិកាមានចំនួនជាង88,000ករណី ខណៈដែលបានរកឃើញអ្នកវិជ្ជមានថ្មីចំនួន2.3លាននាក់នៅក្នុងរយៈពេល2សប្ដាហ៍កន្លងទៅ។
នៅទូទាំងពិភពលោក វីរុស Covid-19 បានឆ្លងទៅមនុស្សសរុបចំនួន 60,715,719នាក់ និងបានសម្លាប់មនុស្សចំនួន 1,426,734នាក់ ក្នុងនោះ អ្នកជំងឺបានកើនឡើងជាង575,730នាក់ និងអ្នកស្លាប់កើនឡើង11,486នាក់ ខណៈអ្នកជំងឺ42,028,241នាក់បានជាសះស្បើយ។ ចំណែកអ្នកជំងឺកំពុងព្យាបាលមានចំនួន17,260,744នាក់ ក្នុងនោះមានអ្នកជំងឺ 103,933នាក់កំពុងប្រឈមនឹងការស្លាប់៕
ប្រភព៖ Reuters, Worldometers

November 26, 2020