សឿន សំណាង - La Reine Media

កម្ពុជារកឃើញអ្នកឆ្លង Covid-19 ថ្មី ចំនួន 3នាក់ទៀតដែលពាក់ព័ន្ធនឹងព្រឹត្តិការណ៍28វិច្ឆិកា

ក្រសួងសុខាភិបាលបានប្រកាសឱ្យដឹងថា កម្ពុជាបានរកឃើញអ្នកឆ្លងវីរុស Covid-19 ចំនួន 3ករណីទៀត ដែលនេះបាននាំឱ្យអ្នកឆ្លងវីរុសនេះនៅកម្ពុជាឡើងដល់ 326នាក់។

ក្រៅពីរកឃើញអ្នកឆ្លងវីរុសថ្មីខាងលើ កម្ពុជាក៏មានអ្នកជាសះស្បើយពីជំងឺ Covid-19 ចំនួន 3នាក់ទៀតផងដែរ។

ចំពោះករណីវិជ្ជមានថ្មីចំនួន 3នាក់នេះ រួមមានដូចខាងក្រោម៖

ទី1. ស្ត្រីជនជាតិខ្មែរអាយុ 64ឆ្នាំ ស្នាក់នៅសង្កាត់ទួលទំពូង1 ខណ្ឌចំការមន ទីក្រុងភ្នំពេញ ដែលជាប់ទាក់ទងនឹងអនុប្រធាននាយកដ្ឋានពន្ធនាគារនៃក្រសួងមហាផ្ទៃដែលបានឆ្លង Covid-19 មុននេះ។

ទី2 និងទី3៖ ស្ត្រីជនជាតិខ្មែរអាយុ 25ឆ្នាំ និងទារកម្នាក់អាយុ 7ខែ ស្នាក់នៅសង្កាត់និរោធ ខណ្ឌច្បារអំពៅ រាជធានីភ្នំពេញ។

គិតមកដល់បច្ចុប្បន្ន កម្ពុជាបានរកឃើញអ្នកជំងឺ Covid-19 សរុបឡើងដល់ 326នាក់ ក្នុងនោះមានអ្នកជាសះស្បើយចំនួន 304នាក់ ខណៈអ្នកកំពុងសម្រាកព្យាបាលមានចំនួន 22នាក់៕

December 1, 2020

CEO របស់ JPMorgan Chase៖ «ជោគជ័យមិនត្រឹមតែត្រូវការឧស្សាហ៍ និងភាពឆ្លាតវៃទេ»

CEO របស់ក្រុមហ៊ុន JPMorgan យល់ថា ថ្នាក់ដឹកនាំដែលជោគជ័យតែងតែមានចំណុចពិសេសមួយចំនួន ដូចជា ការដាក់ខ្លួន ការបើកចិត្តឱ្យទូលាយ ភាពយុត្តិធម៌ និងស្មោះត្រង់។

ប្រការខាងលើនេះត្រូវបាន CEO របស់ក្រុមហ៊ុន JPMorgan លោក Jamie Dimon ចាត់ទុកថាជាបញ្ហាស្នូលចំពោះក្រុមមេដឹកនាំជោគជ័យ ពោលគឺមិនមែនជាមនុស្សដែលមានតែភាពឆ្លាតវៃបំផុត ឬឧស្សាហ៍ជាងគេនៅក្នុងក្រុមហ៊ុនឡើយ។

លោក Jamie Dimon បានចែករំលែកបន្ថែមទៀតថា៖ “ការគ្រប់គ្រងគឺជាការអនុវត្តទិសដៅ ការតភ្ជាប់ ការមានវិន័យ ការរៀបចំផែនការ ការវិភាគ និងប្រកបដោយតម្លាភាព។ ជាងនេះ វាគឺជាការជ្រើសរើសមនុស្សស័ក្ដិសមសម្រាប់ការបំពេញការងារ ការបំបាត់ចោលបញ្ហាការិយាធិបតេយ្យ រួមនឹងបញ្ហាមិនត្រឹមត្រូវមួយចំនួនទៀត»។

យោងតាម CEO រូបនេះ កត្តាសំខាន់បំផុតនោះគឺការគោរពចំពោះអ្នកដទៃ ពោលគឺមិនមែនត្រឹមតែមានកេរ្ដិ៍ឈ្មោះល្អ និងខួរក្បាលឆ្លាតវៃទេ។

នៅពេលអ្នកមានគុណសម្បត្តិដូចខាងលើហើយ វាក៏នឹងជួយឱ្យអ្នកបង្កើនប្រសិទ្ធភាពការងារ ហើយបន្ទាប់មកាវានឹងជួយឱ្យអ្នកទទួលបានជោគជ័យ។ បើសិនជាអ្នកមានចរិតអាត្មានិយម ឬដណ្ដើមស្នាដៃពីអ្នកដទៃដោយអ្នកមិនអាចបង្ហាញអំពីភាពត្រឹមត្រូវ ពេលនោះអ្នកផ្សេងនឹងលែងចង់ធ្វើការជាមួយអ្នក ហើយបញ្ហានេះនឹងប៉ះពាល់យ៉ាងធ្ងន់ធ្ងរដល់ប្រសិទ្ធភាពការងាររបស់អ្នកនាពេលខាងមុខ។

CEO របស់ JPMorgan Chase៖ «ជោគជ័យមិនត្រឹមតែត្រូវការឧស្សាហ៍ និងឆ្លាតវៃនោះទេ» — ទីស្នាក់ការរបស់ក្រុមហ៊ុនវិនិយោគផ្នែកធនាគារ JPMorgan Chase

លោក Dimon ដែលបច្ចុប្បន្នមានទ្រព្យប្រមាណ 1.6ពាន់លានដុល្លារអាមេរិក ក៏ស្វែងរកបេក្ខភាពយ៉ាងដូច្នេះសម្រាប់បំពេញការងារនៅក្នុងក្រុមហ៊ុនវិនិយោគផ្នែកធនាគាររបស់លោក។ នៅពេលធ្វើការសម្ភាស ឬវាយតម្លៃមុននឹងមានការដំឡើងតំណែង លោក Dimon តែងតែសួរសំនួរមួយចំនួន ដូចជា៖ «តើអ្នកចង់ធ្វើការឱ្យអ្នកនោះទេ? អ្នកចង់ឱ្យកូនរបស់អ្នកធ្វើការឱ្យអ្នកនោះទេ?»។ល។

CEO របស់ JPMorgan ក៏មានការយកចិត្តទុកដាក់ទៅលើការចេះទទួលខុសត្រូវរបស់បុគ្គលិក ឬរបៀបដែលពួកគេប្រតិកម្មនៅពេលមានបញ្ហាកើតឡើង។

ជាមេដឹកនាំម្នាក់ លោក Dimon តែងតែប្រឹងប្រែងអនុវត្តនូវអ្វីដែលលោកបានណែនាំដល់គ្រប់គ្នានៅក្នុងក្រុមហ៊ុន។ លោកថ្លែងថា៖ «ពុំមានអ្នកណាម្នាក់ប្រាប់ឱ្យ Jamie Dimon បន្ទាបខ្លួនសោះឡើយ»។

ប៉ុន្តែ លោកឱ្យដឹងថា ខ្លួនលោកផ្ទាល់តែងតែប្រព្រឹត្តចំពោះអ្នករាល់គ្នាប្រកបដោយយុត្តិធម៌ ហើយលោកក៏ប្រាថ្នាឱ្យគ្រប់គ្នាធ្វើដូចរូបលោក។ «អ្នកចង់ធ្វើការឱ្យខ្ញុំ បើសិនអ្នកពិតជាគិតថា ខ្ញុំយកចិត្តទុកដាក់ចំពោះអ្នក។ ប្រសិនជាខ្ញុំប្រព្រឹត្តិចំពោះអ្នកប្រកបដោយយុត្តិធម៌ ជាមួយអ្នកដទៃ ខ្ញុំក៏ធ្វើដូច្នេះ» លោក Dimon បញ្ជាក់បន្ថែម។

ដើម្បីទទួលបានជោគជ័យ «ចូរប្រព្រឹត្តិចំពោះគ្រប់គ្នាឱ្យដូចអ្វីដែលអ្នកប្រាថ្នាឱ្យអ្នករាល់គ្នាប្រព្រឹត្តចំពោះអ្នក» លោក Dimon ថ្លែងដូច្នេះ និងសង្កត់ធ្ងន់ថា៖ «ចូរមានការគោរពចំពោះមនុស្សគ្រប់គ្នា»៕

ប្រភព៖ CNBC, Celebritynetworth

November 30, 2020

ប្រមុខរដ្ឋាភិបាលកម្ពុជា ចេញបទបញ្ជាផ្អាកការជួបជុំមនុស្សលើសពី20នាក់ និងកាត់បន្ថយការចេញទៅក្រៅផ្ទះ

នៅល្ងាចថ្ងៃទី 30 ខែវិច្ឆិកានេះ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានចេញបទបញ្ជាបន្ទាន់មួយទាក់ទងនឹងបញ្ហា Covid-19 ក្នុងនោះមានការស្នើឱ្យផ្អាកការជួបជុំមនុស្សដែលមានចំនួនច្រើនជាងម្ភៃនាក់ រួមទាំងពិធីរៀបការផងដែរ។

ប្រសាសន៍របស់សម្ដេចតេជោ ហ៊ុន សែន ដែលសារព័ត៌មានក្នុងស្រុកទទួលបាន និងបានចុះផ្សាយ បញ្ជាក់ថា ការផ្អាកការជួបជុំខាងលើនេះ ត្រូវធ្វើឡើងរយៈពេល 15 ថ្ងៃ ដោយរាប់ចាប់ពីពេលនេះតទៅ។ បទបញ្ជានេះ សំដៅទៅលើរាជធានីភ្នំពេញ និងខេត្តសៀមរាប។

សម្រាប់ការជួបជុំដែលមានមនុស្សចាប់ពី 20 នាក់ចុះក្រោយ អាចធ្វើទៅបាន ប៉ុន្តែ ត្រូវតែធានាឱ្យបានថា នឹងប្រព្រឹត្តទៅដោយគោរពទៅតាមការណែនាំរបស់ក្រសួងសុខាភិបាល ក្នុងនោះមានដូចជា ការរក្សាគម្លាតសុវត្ថិភាព ការពាក់ម៉ាស ឬសម្អាតដៃដោយអាល់កុល ឬសាប៊ូ។ល។

គិតមកដល់បច្ចុប្បន្ន កម្ពុជាបានរកឃើញអ្នកឆ្លងវីរុស Covid-19 សរុបចំនួន 323 នាក់ ក្នុងនោះមាន 22 នាក់កំពុងសម្រាកព្យាបាលនៅមន្ទីរពេទ្យ និង 301 នាក់ទៀតបានជាសះស្បើយ។

ដោយឡែក នៅទូទាំងពិភពលោក មានអ្នកឆ្លងវីរុសនេះសរុប 63,087,137នាក់ ក្នុងនោះមានអ្នកស្លាប់ 1,465,368 នាក់ អ្នកបានជាសះស្បើយ 43,557,257 នាក់ ខណៈដែលអ្នកកំពុងផ្ទុកវីរុសមានចំនួន 18,064,512 នាក់៕

November 30, 2020

បង្គោលលោហធាតុអាថ៌កំបាំងដែលគេប្រទះឃើញនៅកណ្ដាលសមុទ្រខ្សាច់អាមេរិក បានបាត់ខ្លួន!

ក្រុមមន្ត្រីនៃរដ្ឋ Utah បានឱ្យដឹងថា បង្គោលលោហធាតុដ៏អាថ៌កំបាំងដែលត្រូវបានគេប្រទះឃើញនៅកណ្ដាលសមុទ្រខ្សាច់ បានបាត់ខ្លួនហើយ ដែលនេះត្រូវបានសង្ស័យថា ប្រហែលជាមានក្រុមមនុស្សណាមួយ លួចគាស់យកទៅកន្លែងផ្សេង។

នាយកដ្ឋានគ្រប់គ្រងដីធ្លីរបស់រដ្ឋ Utah សហរដ្ឋអាមេរិក កាលពីថ្ងៃទី 28 វិច្ឆិកា បានឱ្យដឹងថា ពួកគេទទួលបានសេចក្ដីរាយការណ៍ដ៏គួរឱ្យទុកចិត្តមួយ និយាយថា បង្គោលលោហធាតុនេះ ត្រូវបាន “ក្រុមជនណាមួយ” លួចគាស់យកទៅកន្លែងផ្សេងកាលពីយប់មុននោះ។ ប៉ុន្តែ នាយកដ្ឋាននេះប្រកាសថា ខ្លួនមិនធ្វើការស៊ើបអង្កេតលើបទល្មើសទាក់ទងនឹងទ្រព្យឯកជននេះទេ ដោយកិច្ចការនេះជាភារកិច្ចរបស់ស្នងការដ្ឋាននគរបាលក្នុងតំបន់។ នាយកដ្ឋាននេះ ជឿថា បង្គោលលោហធាតុនេះគឺជាទ្រព្យឯកជន។

សូមរំលឹកថា មុនពេលបាត់ខ្លួនពីកន្លែងកើតហេតុ បង្គោលលោហធាតុដែលមានរាងត្រីកោណ កម្ពស់ប្រហែល 3.6 ម៉ែត្រ និងត្រូវបានផ្គុំពីបន្ទះដែកដែកអ៊ីណុកចំនួន 3 ផ្ទាំង នៅកណ្ដាលថ្មពណ៌ក្រហមនៅលើសមុទ្រខ្សាច់ភាគខាងត្បូងរដ្ឋ Utah ត្រូវបានក្រុមមន្ត្រីក្នុងតំបន់ប្រទះឃើញកាលពីថ្ងៃទី 18 វិច្ឆិកា នៅពេលពួកគេកំពុងហោះហើរដើម្បីរាប់ចំនួនសត្វចៀមស្នែងធំនៅក្នុងតំបន់។

ក្រុមមន្ត្រីខាងលើ មិនបានបង្ហើបឱ្យដឹងអំពីទីតាំងរបស់បង្គោលខាងលើទេ ប៉ុន្តែ វានៅតែត្រូវបានរកឃើញដោយក្រុមអ្នកចង់ដឹងចង់ឮ ហើយមនុស្សជាច្រើនបានទៅដល់កន្លែងកើតហេតុ។ អ្នកខ្លះបានចាត់ទុកថា វាគឺជាវត្ថុរបស់មនុស្សមកពីពិភពខាងក្រៅ ខណៈអ្នកខ្លះថា វាគឺជាស្នាដៃរបស់មនុស្សនៅលើផែនដី។

មកដល់បច្ចុប្បន្ន មិនទាន់មានអ្នកណាម្នាក់ចេញមុខអះអាងថា ជាម្ចាស់កម្មសិទ្ធិលើបង្គោលលោហធាតុនេះនៅឡើយ។

>ប្រទះឃើញបង្គោលលោហធាតុចម្លែកនៅកណ្ដាលសមុទ្រខ្សាច់! អាជ្ញាធរថា “ទោះអ្នកដាំមកពីពិភពផ្កាយក៏ដោយ វាជារឿងខុសច្បាប់ បើសិនជាធ្វើឡើងនៅទីសាធារណៈ”

>ទីតាំងនៃបង្គោលលោហធាតុដ៏អាថ៌កំបាំងនៅកណ្ដាលសមុទ្រខ្សាច់ ត្រូវបានគេរកឃើញហើយ!

ប្រភព៖ AFP

November 30, 2020

កម្ពុជាបិទសារមន្ទីរ រោងភាពយន្ត និងរោងសម្តែងសិល្បៈជាបណ្តោះអាសន្ន

ដើម្បីចូលរួមទប់ស្កាត់ការឆ្លងរាលដាលនៃវីរុស Covid-19 ក្រសួងវប្បធម៌ និងវិចិត្រសិល្បៈ បានប្រកាសឱ្យផ្អាកដំណើរការស្ថាប័ន និងទីតាំងកម្សាន្តមួយចំនួនដែលស្ថិតក្រោមឱវាទរបស់ក្រសួងនេះជាបណ្ដោះអាសន្ន។

នៅថ្ងៃទី 30 ខែវិច្ឆិកានេះ ក្រសួងវប្បធម៌ និងវិចិត្រសិល្បៈ បានប្រកាសឱ្យដឹងថា ក្រសួងសម្រេចឱ្យផ្អាកដំណើរការរោងភាពយន្ត រោងសម្តែងសិល្បៈគ្រប់ប្រភេទ រួមនឹងសារមន្ទីរនៅទូទាំងប្រទេស រយៈពេល14ថ្ងៃ។ បទបញ្ជានេះត្រូវបានអនុវត្តចាប់ពីថ្ងៃ 30 ខែវិច្ឆិកានេះតទៅ។

ក្រសួងវប្បធម៌ និងវិចិត្រសិល្បៈកម្ពុជាបានបញ្ជាក់ថា ស្ថាប័ន និងភាគីពាក់ព័ន្ធ មានដូចជា មន្ទីរវប្បធម៌រាជធានី-ខេត្ត សាធារណជន សមាគមបគ្គុទ្ទេសទេសចរណ៍ ទីភ្នាក់ងារទេសចរណ៍ ក្រុមហ៊ុនទេសចរណ៍ និងអ្នកទេសចរណ៍ ត្រូវតែអនុវត្តតាមការណែនាំនេះដោយស្មារតីទទួលខុសត្រូវខ្ពស់បំផុត។

សូមរំលឹកថា ការសម្រេចចិត្តខាងលើនេះ ត្រូវបានធ្វើឡើងបន្ទាប់ពីមានករណីឆ្លងវីរុស Covid-19 នៅក្នុងសហគមន៍កម្ពុជាជាលើកដំបូង ដែលករណីនេះត្រូវបានសម្ដេចតោជោ ហ៊ុន សែន ដាក់ឈ្មោះឱ្យថា “ព្រឹត្តិការណ៍ 28 វិច្ឆិកា” ហើយព្រឹត្តិការណ៍នេះដែរ មានជាប់ទាក់ទងនឹងករណីឆ្លង Covid-19 របស់គ្រួសារលោក ឆែម សាវុធ អគ្គនាយកនៃអគ្គនាយកដ្ឋានពន្ធនាគារជាតិ។

គិតមកដល់បច្ចុប្បន្ន កម្ពុជាបានរកឃើញអ្នកឆ្លងវីរុស Covid-19 សរុបចំនួន 323 នាក់ ក្នុងនោះមាន 22 នាក់កំពុងសម្រាកព្យាបាលនៅមន្ទីរពេទ្យ និង 301 នាក់ទៀតបានជាសះស្បើយ។

ដោយឡែក នៅទូទាំងពិភពលោក មានអ្នកឆ្លងវីរុសនេះសរុប 63,066,166 នាក់ ក្នុងនោះមានអ្នកស្លាប់ 1,465,048 នាក់ អ្នកបានជាសះស្បើយ 43,542,378 នាក់ ខណៈដែលអ្នកកំពុងផ្ទុកវីរុសមានចំនួន 18,058,740 នាក់៕

November 30, 2020

ករណីអ្នកជំងឺ Covid-19 កំពុងសម្រាកព្យាបាល បានកើនដល់ 22 ហើយ!

នៅក្នុងពិធីបើកការដ្ឋានសាងសង់ និងកែលំអរផ្លូវទាំង 38ខ្សែ ក្នុងទីក្រុងសៀមរាប ខេត្តសៀមរាប សម្ដេចតេជោ បានដាក់ឈ្មោះការឆ្លងក្នុងសហគមន៍ជាលើកដំបូងក្នុងប្រទេសកម្ពុជាដែលទាក់ទងនឹងគ្រួសារអគ្គនាយកពន្ធនាគារថាជា “ព្រឹត្តិការណ៍សហគមន៍28វិច្ឆិកា”។

នៅក្នុងពិធីខាងលើ សម្ដេច ហ៊ុន សែន ក៏បានអំពាវនាវឱ្យពលរដ្ឋមានការប្រុងប្រយ័ត្នខ្ពស់ និងស្នើឱ្យអ្នកដែលពាក់ព័ន្ធនឹងព្រឹត្តិការណ៍សហគមន៍ 28 វិច្ចិកា ឱ្យទៅពិនិត្យសុខភាពដើម្បីទប់ស្កាត់ការឆ្លងរាលដាលនៃវីរុស Covid-19។

គិតត្រឹមព្រឹកនេះក្រុមគ្រូពេទ្យបានយកសំណាកចំនួន 3,332 មកពីខេត្តចំនួន 7 ក្នុងនោះវិទ្យាស្ថានប៉ាស្ទ័ និងវិទ្យាស្ថានជាតិសុខភាពសាធារណៈធ្វើតេស្តបាន 2,247 សំណាក និងបានរកឃើញករណីវិជ្ជមានចំនួន 14 នាក់ ខណៈ 1 ករណីនៅសៀមរាបដែលសង្ស័យថាវិជ្ជមាន មិនទាន់ត្រូវបានបញ្ជាក់ពីវិទ្យាស្ថានប៉ាស្ទ័នៅឡើយ។ នេះបើតាមប្រសាសន៍របស់សម្ដេចតោជោ។

មកដល់បច្ចុប្បន្ន កម្ពុជាបានរកឃើញអ្នកផ្ទុកវីរុស Covid-19 ចំនួន 323 នាក់ ក្នុងនោះមាន 22 នាក់កំពុងសម្រាកព្យាបាលនៅមន្ទីរពេទ្យ និង 301 នាក់បានជាសះស្បើយ។

November 30, 2020

រកឃើញអ្នកវិជ្ជមាននឹង Covid-19 ចំនួន 7នាក់ទៀតហើយ ក្នុងអំឡុង 24ម៉ោងមុននេះ

កម្ពុជាបានរកឃើញមនុស្សចំនួន 7នាក់ទៀតដែលវិជ្ជមានជាមួយនឹងវីរុស Covid-19 កាលពីថ្ងៃទី 28 វិច្ឆិកាកន្លងទៅនេះ នាំឱ្យតួលេខសរុបនៃអ្នកបានឆ្លងវីរុស កើនឡើងដល់ 315 នាក់។

តាមរយៈបណ្ដាញសង្គម ក្រសួងសុខាភិបាលកម្ពុជាបានប្រកាសឱ្យដឹងថា បានរកឃើញអ្នកឆ្លងវីរុស Covid-19 ចំនួន 7 ករណីបន្ថែមទៀតនៅក្នុងអំឡុង24ម៉ោងកន្លងទៅនេះ។ ខាងក្រោមនេះគឺជាអ្នកជំងឺទាំង 7 នាក់ដែលមានផ្ទុក Covid-19 ដែលត្រូវបានរកឃើញកាលពីថ្ងៃទី 28វិច្ឆិកា៖

-ស្ត្រីជនជាតិខ្មែរ-អាមេរិកាំង អាយុ 31 ឆ្នាំ នៅទីក្រុងប៉ៃលិន ខេត្តប៉ៃលិន ធ្វើដំណើរមកពីសហរដ្ឋអាមេរិក។

-ស្ត្រីជនជាតិខ្មែរ អាយុ 56 ឆ្នាំ រួមនឹងស្វាមីដែលជាអគ្គនាយកពន្ធនាគារនៃក្រសួងមហាផ្ទៃ រួមនឹងសមាជិកគ្រួសារចំនួន 4 នាក់ផ្សេងទៀត ក្នុងនោះមានស្ត្រីម្នាក់អាយុ 36ឆ្នាំ កុមារ៉ាម្នាក់អាយុ 12ឆ្នាំ បុរសម្នាក់អាយុ 36ឆ្នាំ និងបុរសម្នាក់ទៀតអាយុ 30ឆ្នាំ។ អ្នកទាំងនេះស្នាក់នៅក្នុងបុរីប៉េងហួត ក្នុងទីក្រុងភ្នំពេញ និងនៅទីក្រុងសៀមរាប ខេត្តសៀមរាប។

គិតមកដល់បច្ចុប្បន្ន កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 315នាក់ ក្នុងនោះមានអ្នកជាសះស្បើយចំនួន 301នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន 14 នាក់៕

November 29, 2020

Trump ប្រើប្រាស់តុប្រជុំខ្នាតតូចខុសពីធម្មតា ធ្វើឱ្យសាធារណជនមានការភ្ញាក់ផ្អើល

ប្រធានាធិបតីអាមេរិក បានក្លាយជាប្រធានបទជជែកគ្នានៅលើបណ្ដាញសង្គម បន្ទាប់ពីលោកបង្ហាញខ្លួនជាមួយនឹងតុខ្នាតតូចមិនគួរឱ្យជឿកាលពីព្រលប់ថ្ងៃទី26វិច្ឆិកា។

ថ្លែងការណ៍នៅក្នុងសន្និសីទសារព័ត៌មានផ្សាយផ្ទាល់ពីសេតវិមានកាលពីយប់ថ្ងៃទី26វិច្ឆិកា ប្រធានាធិបតី Donald Trump បានឱ្យដឹងថា លោកនឹងចាកចេញពីតំណែង បើសិនលោក Joe Biden ដណ្ដើមបានជ័យជំនះនៅក្នុងការបោះឆ្នោតនៃក្រុមប្រតិភូតំណាងម្ចាស់ឆ្នោត នៅថ្ងៃទី14ធ្នូខាងមុខ។

ក្នុងគ្រាដែលប្រធានាធិបតីបានលើកឡើងអំពីការបោះឆ្នោតប្រកបដោយការលួចបន្លំ អ្នកលេងបណ្ដាញសង្គមបែរជាចាប់អារម្មណ៍ទៅលើតុដ៏តូចខុសពីធម្មតាដែលលោក Trump កំពុងប្រើប្រាស់នៅក្នុងសន្និសីទរបស់លោក។

អ្នកលេងបណ្ដាញសង្គមមួយចំនួនយល់ថា តុដែលមានខ្នាតដ៏តូចនេះ បង្ហាញអំពីអំណាចនៃប្រធានាធីបតីកំពុងថមថយ ប៉ុន្តែ អ្នកលេងបណ្ដាញសង្គមមួយចំនួនទៀតគិតថា វាអាចជាស្នាដៃនៃការកាត់តរូបភាព។

តារាសម្ដែង Mark Hamill បានសរសេរនៅលើបណ្ដាញសង្គម Twitter ថា ៖ “បើសិនជាលោកប្រព្រឹត្តត្រឹមត្រូវ ឈប់និយាយកុហកដើម្បីធ្វើឱ្យការបោះឆ្នោតមានបញ្ហា និងគិតអំពីប្រការល្អៗសម្រាប់ប្រទេសជាតិជំនួសឱ្យការត្អូញត្អែរថាអយុត្តិធម៌ នោះប្រហែលជាលោកទទួលបានការអញ្ជើញឱ្យឡើងអង្គុយនៅលើកៅអីនិងតុធំជាងនេះ។

អ្នកលេងបណ្ដាញសង្គមម្នាក់ទៀត សរសេរថា៖ “មិនគួរឱ្យជឿសោះថា ប្រការនេះបានកើតឡើងនៅក្នុងថ្ងៃនេះ។ អរគុណដល់អ្នកដែលមានគំនិតអំពីតុនេះ។

លោក Trump ក្រោយមកបានបង្ហោះសារនៅលើ Twitter ដោយចោទបណ្ដាញផ្សព្វផ្សាយថា បានចុះផ្សាយព័ត៌មានមិនពិតអំពីការអធិប្បាយរបស់លោក និងបានចោទ Twitter ថា បានបង្កើត “ខ្លឹមសារអវិជ្ជមាន” សម្រាប់អ្វីដែលកំពុងពេញនិយមរបស់បណ្ដាញសង្គម។

រាប់ចាប់ពីលោក Joe Biden ត្រូវបានគេព្យាករថា បានជាប់ឆ្នោតដោយមានសំឡេងឆ្នោតចំនួន 306 សំឡេងពីតំណាងម្ចាស់ឆ្នោត លោក Trump ក៏បានចោទប្រកាន់ថា មានការលួចបន្លំសន្លឹកឆ្នោត និងធ្វើការប្ដឹងតវ៉ាជាបន្តបន្ទាប់ដើម្បីកែប្រែស្ថានការណ៍នៅក្នុងរដ្ឋមួយចំនួន ដូចជា Georgia, Michigan, Nevada, Arizona និង Pennsylvania។ ប៉ុន្តែ បច្ចុប្បន្ន មិនទាន់មានរដ្ឋណាមួយទទួលស្គាល់ការប្ដឹងតវ៉ារបស់លោក Trump និងក្រុមរបស់លោកនៅឡើយ៕

ប្រភព៖ Guardian

November 28, 2020

ករណីឆ្លងវីរុស Covid-19 នៅកម្ពុជា បានកើនដល់ 308នាក់ ខណៈពិភពលោកកើនដល់ជិត62លាននាក់

តាមរយៈបណ្ដាញសង្គម ក្រសួងសុខាភិបាលកម្ពុជាបានប្រកាសឱ្យដឹងថា បានធ្វើតេស្តរកឃើញអ្នកឆ្លងវីរុស Covid-19 ថ្មី ចំនួន 1ករណីទៀតកាលពីថ្ងៃទី 27វិច្ឆិកា ដែលនេះបាននាំឱ្យតួលេខសរុបនៃអ្នកបានឆ្លងវីរុសនេះនៅកម្ពុជា កើនដល់ 308 នាក់។

ករណីវិជ្ជមាននឹងវីរុស Covid-19 ថ្មីនេះ បានកើតឡើងចំពោះស្ត្រីជនជាតិខ្មែរ-អាមេរិកាំង មានអាយុ62ឆ្នាំ ស្នាក់នៅសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។ អ្នកជំងឹនេះបានធ្វើដំណើរពីសហរដ្ឋអាមេរិក បន្តជើងហោះហើរនៅប្រទេសកូរ៉េខាងត្បូង មុននឹងមកដល់កម្ពុជានៅថ្ងៃទី 26វិច្ឆិកា។ បច្ចុប្បន្ន ស្ត្រីរូបនេះកំពុងត្រូវបានដាក់ឱ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត នាទីក្រុងភ្នំពេញ។

ក្រុមអ្នកដំណើរចំនួន 73នាក់ដែលបានរួមដំណើរនៅក្នុងជើងហោះហើរជាមួយនឹងស្ត្រីខាងលើ កំពុងត្រូវបានដាក់ឱ្យធ្វើចត្តាឡីស័ករយៈពេល 14ថ្ងៃ នៅក្នុងសណ្ឋាគារមួយចំនួននៅភ្នំពេញ បន្ទាប់ពីធ្វើតេស្តអវិជ្ជមាន។

គិតត្រឹមព្រឹកថ្ងៃទី 28វិច្ឆិកា ឆ្នាំ 2020 នេះ កម្ពុជាបានរកឃើញអ្នកផ្ទុកវីរុស Covid-19 សរុប 308នាក់ ដែលក្នុងនោះមានអ្នកជាសះស្បើយចំនួន 299នាក់ និង 9នាក់ផ្សេងទៀតកំពុងទទួលការព្យាបាលនៅមន្ទីរពេទ្យ។

ដោយឡែក នៅទូទាំងពិភពលោក តួលេខនៃករណីឆ្លងវីរុស Covid-19 បានកើនឡើងដល់ 61,967,331នាក់ ក្នុងនោះមានអ្នកស្លាប់ 1,448,287នាក់ អ្នកជាសះស្បើយ 42,783,713នាក់ និង 17,735,331នាក់ទៀងកំពុងសម្រាកព្យាបាល។ ក្នុងចំណោមអ្នកជំងឺដែលកំពុងទទួលការព្យាបាល គឺមាន105,223នាក់កំពុងប្រឈមនឹងការបាត់បង់ជីវិត៕

November 28, 2020

ទីតាំងនៃបង្គោលលោហធាតុដ៏អាថ៌កំបាំងនៅកណ្ដាលសមុទ្រខ្សាច់ ត្រូវបានគេរកឃើញហើយ!

ក្រុមអ្នកជំនាញផ្នែកស្វែងរកទីតាំងនៅលើប្រព័ន្ធអ៊ីនធើណិត បានរុករកឃើញទីតាំងរបស់បង្គោលលោហធាតុដ៏ចម្លែកដែលត្រូវបានគេប្រទះឃើញនៅលើសមុទ្រខ្សាច់កាលពីប៉ុន្មានថ្ងៃមុននេះ នាំឱ្យមានមនុស្សកាន់តែច្រើន នាំគ្នាធ្វើដំណើរទៅកាន់កន្លែងកើតហេតុ បើទោះជាមានការព្រមានអំពីសុវត្ថិភាពពីអាជ្ញាធរ។

នៅពេលមានព័ត៌មានទាក់ទងនឹងបង្គោលលោហធាតុខាងលើ កាលពីថ្ងៃទី23វិច្ឆិកា ក្រុមមន្ត្រីនៅរដ្ឋ Utah បានបដិសេធមិនប្រាប់អំពីទីតាំងរបស់បង្គោលនេះទេ ដោយសារបារម្ភអំពីសុវត្ថិភាព។

ប៉ុន្តែ ក្នុងរយៈពេលតែ48ម៉ោង ក្រោយពីមានព័ត៌មានខាងលើ មនុស្សដំបូងគេបានរុករកឃើញទីតាំងរបស់បង្គោលនេះ ហើយក៏បានមកដល់ទីតាំងនោះផ្ទាល់ដើម្បីពិនិត្យមើល បើទោះជាមានការបារម្ភថា គេអាចវង្វេងផ្លូវ។ មកដល់ថ្ងៃទី25វិច្ឆិកា នៅលើ Instagram គេក៏ឃើញមានរូបថតជាច្រើនសន្លឹក បង្ហាញអំពីទិដ្ឋភាពមនុស្សមួយចំនួនដែលបានទៅដល់ទីតាំងនៃបង្គោលលោហធាតុនោះ។

អ្នកទាំងនេះ ទទួលបានជំនួយពីក្រុមអ្នកលេងអ៊ីនធើណិត ដែលជាក្រុមមនុស្សបានស្វែងរកឃើញទីតាំងរបស់បង្គោល តាមរយៈកម្មវិធី Google Earth។

សូមរំលឹកថា ក្រុមបុគ្គលិកនៅអង្គភាពសុវត្ថិភាពសាធារណៈនៃរដ្ឋ Utah (DPS) សហរដ្ឋអាមេរិក កាលពីថ្ងៃទី18វិច្ឆិកា បានប្រើប្រាស់ឧទ្ធម្ភាគចក្រជួយដល់នាយកដ្ឋានការពារធនធានសត្វព្រៃ ដើម្បីរាប់សត្វចៀមស្នែងធំនៅលើសមុទ្រខ្សាច់ភាគអាគ្នេយ៍របស់រដ្ឋនេះ។ ពួកគេស្រាប់តែបានប្រទះឃើញវត្ថុមួយដែលដូចទៅនឹងដុំថ្មអាថ៌កំបាំងដែលមាននៅក្នុងខ្សែភាពយន្តរឿង “2001: A Space Odyssey” ដែលផលិតឆ្នាំ1968។

អ្នកបើកបរឧទ្ធម្ភាគចក្រ Bret Hutchings បានរៀបរាប់ថា៖ “អ្នកជំនាញខាងជីវសាស្ត្រម្នាក់នៅក្នុងក្រុមហោះហើរបានប្រទះឃើញវា នៅពេលយើងហោះពីលើវត្ថុនោះ។ គាត់បានស្រែកឡើង “អូ! អូ! ត្រលប់ក្រោយ!។ ខ្ញុំក៏សួរថា “ថីហ្នឹង?។ ហើយគាត់ក៏ប្រាប់ថា “ត្រលប់ក្រោយសិនៗ មានអ្វីនៅខាងក្រោយ យើងត្រូវតែទៅមើល!។ វានៅទីនោះ! នៅកណ្ដាលដុំថ្មធំៗពណ៌ក្រហម គឺជាបង្គោលលោហធាតុពណ៌ប្រាក់ រលោកផ្លេកដែលផុសឡើងផុតពីដី។

Hutchings ប៉ាន់ប្រមាណដឹងថា បង្គោលលោហធាតុនោះមានកម្ពស់ប្រហែលពី3-3.6ម៉ែត្រ ហើយវាមិនដូចទៅនឹងករណីធ្លាក់ពីលើអាកាសនោះទេ វាទំនងជាមានអ្នកយកមកដាំ៕

ប្រភព៖ BBC

November 27, 2020

Author: សឿន សំណាង