សឿន សំណាង - La Reine Media

កម្ពុជារកឃើញអ្នកឆ្លង Covid-19 ចំនួន 10ករណីបន្ថែមទៀត ដែលភាគច្រើនគឺជាករណីឆ្លងក្នុងសហគមន៍

ក្នុងរយៈពេល 24ម៉ោងចុងក្រោយនេះ កម្ពុជាបានរកឃើញអ្នកឆ្លងវីរុស Covid-19 សរុប 10នាក់បន្ថែមទៀត នាំឱ្យតួលេខអ្នកបានឆ្លងសរុបឡើងដល់ 345នាក់។

ក្រសួងសុខាភិបាលបានប្រកាសឱ្យដឹងថា ក្នុងចំណោមករណីឆ្លងថ្មីដែលទើបរកឃើញនេះ រួមមានករណីនាំចូលចំនួន 4នាក់ និងករណីពាក់ព័ន្ធនឹងព្រឹត្តិការណ៍28វិច្ឆិកាចំនួន 6នាក់។

គិតមកដល់ព្រឹកថ្ងៃទី 5ធ្នូនេះ កម្ពុជាបានរកឃើញអ្នកឆ្លងវីរុស Covid-19 សរុប 345នាក់ ក្នុងនោះមានអ្នកជាសះស្បើយចំនួន 305នាក់ អ្នកកំពុងសម្រាកព្យាបាលនៅមន្ទីរពេទ្យចំនួន 40នាក់។

December 5, 2020

ស្ថាបនិក BioNTech ក្លាយជាមហាសេដ្ឋី បន្ទាប់ពីមូលបត្រកើនឡើង 250%

Sahin បច្ចុប្បន្នគឺជាអ្នកមានជាងគេលំដាប់ទី 493 ក្នុងពិភពលោក ជាមួយនឹងទ្រព្យសរុបចំនួន 5.1ពាន់លានដុល្លារអាមេរិក នេះបើតាមស្ថិតិរបស់ Bloomberg Billionaires Index។

សហស្ថាបនិករបស់ក្រុមហ៊ុន BioNTech ទើបតែមានឈ្មោះនៅក្នុងបញ្ជីមហាសេដ្ឋីទាំង 500នាក់ដែលមានទ្រព្យច្រើនជាងគេក្នុងពិភពលោក ក្រោយពីមុននេះប៉ុន្មានថ្ងៃត្រូវបានរដ្ឋាភិបាលអង់គ្លេសសម្រេចអនុម័តប្រើប្រាស់វ៉ាក់សាំង Covid-19 ដែលក្រុមហ៊ុនអាល្លឺម៉ង់សហការជាមួយក្រុមហ៊ុន Pfizer ក្នុងការអភិវឌ្ឍ។

ចាប់ពីដើមសប្ដាហ៍រហូតដល់ពេលនេះ មូលបត្រ BioNTech បានកើនឡើងជិត 10% និងកើនសរុបជាង 250% រាប់ចាប់ពីដើមឆ្នាំ។ Ugur Sahin បច្ចុប្បន្នគឺជាអ្នកមានជាងគេលំដាប់ទី 493 ក្នុងពិភពលោក ជាមួយនឹងទ្រព្យសរុបចំនួន 5.1ពាន់លានដុល្លារអាមេរិក នេះបើតាមស្ថិតិរបស់ Bloomberg Billionaires Index។

អង់គ្លេសគឺជាប្រទេសដំបូងគេមួយនៅអឺរ៉ុបដែលបានអនុម័តប្រើប្រាស់វ៉ាក់សាំង Covid-19 ដែលជាជំហានដ៏ធំមួយសម្រាប់វ៉ាក់សាំងដែលក្រុមហ៊ុន Pfizer និង BioNTech អះអាងថា មានប្រសិទ្ធភាពរហូតដល់ 95% ក្នុងការទប់ស្កាត់វីរុស Covid-19។ BioNTech កំពុងតែរង់ចាំការសម្រេចពីនាយកដ្ឋានគ្រប់គ្រងឱសថ និងចំណីអាហារអាមេរិក (FDA) និងក្រុមអ្នកគ្រប់គ្រងរបស់សហភាពអឺរ៉ុប។

មុននេះ ក្រុមហ៊ុន BioNTech ផ្ដោតទៅលើតែការព្យាបាលជំងឺមហារីក ប៉ុន្តែចាប់តាំងពីខែមករា Sahin និងភរិយា Ozlem Tureci បានងាកមកផ្ដោតទៅលើ Covid-19 ក្រោយពីបានដឹងអំពីការឆ្លងរាលដាលនៃវីរុសនេះនៅទីក្រុង Wuhan ប្រទេសចិន។ លទ្ធផលនៃការសិក្សាស្រាវជ្រាវរបស់គូស្វាមីភរិយានេះ បានរកឃើញថ្នាំថ្មីមួយប្រភេទដែលពួកគេចំណាយពេលជាច្រើនឆ្នាំដើម្បីតាមរក។

Sahin ដែលជាអ្នកវិទ្យាសាស្ត្រដើមកំណើតទួរគី គឺជាម្ចាស់ភាគហ៊ុនតែមួយគត់នៃក្រុមហ៊ុនមួយរបស់អាល្លឺម៉ង់ដែលកំពុងកាន់កាប់ភាគហ៊ុន 18% របស់ BioNTech។ កាលពីឆ្នាំទៅ BioNTech ប្រមូលទុនបាន 150លានដុល្លារនៅក្នុងការធ្វើ IPO នៅសហរដ្ឋអាមេរិក។

ក្រៅពី Sahin បងប្អូនត្រកូល Struengmann ដែលកំពុងកាន់កាប់ BioNTech ចំនួនពាក់កណ្ដាល ក៏ស្ថិតក្នុងបញ្ជីអ្នកមានជាងគេទាំង 500នាក់នៅក្នុងពិភពលោករបស់ទស្សនាវដ្ដី Bloomberg។ ពួកគេក៏គាំទ្រដល់ក្រុមហ៊ុនបច្ចេកវិទ្យាជីវសាស្ត្រ Ganymed Pharmaceuticals ដែលប្ដីប្រពន្ធ Sahin បានបង្កើតឡើងផងដែរ។

ការប្រជែងគ្នាក្នុងវិស័យវ៉ាក់សាំង Covid-19 ក៏បង្កើតបានមហាសេដ្ឋីមួយចំនួននៅក្នុងក្រុមហ៊ុន Moderna ដែលជាគូប្រជែងធំបំផុតរបស់ BioNTech។ មូលបត្ររបស់ក្រុមហ៊ុន Moderna ដែលមានទីស្នាក់ការកណ្ដាលនៅ Massachusetts សហរដ្ឋអាមេរិកបានកើនឡើងជាង 650% ចាប់តាំងពីដើមឆ្នាំរហូតដល់ពេលនេះ ដែលនេះបានជួយឱ្យក្រុមមនុស្សដែលបានវិនិយោគដំបូងៗ ដូចជាសាស្ត្រាចារ្យ Bob Langer មកពីសាកលវិទ្យាល័យ MIT និងសាស្ត្រាចារ្យ Tim Springer មកពីសាកលវិទ្យាល័យ Harvard រួមនឹង CEO Stephane Bancel ក្លាយជាមហាសេដ្ឋីទៀតផង៕

December 4, 2020

តំណាងរាស្ត្រ 9ប្រទេស ចូលរួមពិធីជប់លៀង Sex ក្នុងគ្រា Covid-19 កំពុងរាតត្បាតខ្លាំង

អ្នករៀបចំកម្មវិធីជប់លៀង Sex នៅទីក្រុង Brussels កាលពីសប្ដាហ៍មុន បានឱ្យដឹងថា បុរសជាតំណាងរាស្ត្រមកពីប្រទេសចំនួន 9 បានចូលរួមព្រឹត្តិការណ៍ដែលខ្លួនបានរៀបចំ នៅមុនពេលត្រូវបានក្រុមប៉ូលិសឆ្មក់ចូលចាប់។

នៅក្នុងកិច្ចសម្ភាសមួយជាមួយនឹងសារព័ត៌មាន Onet របស់ប៉ូឡូញ កាលពីថ្ងៃទី 3ធ្នូ David Manzheley បានឱ្យដឹងថា ខ្លួនបានប្រារព្ធកម្មវិធីជប់លៀង Sex សម្រាប់មនុស្សភេទទីបីនេះអស់រយៈពេល 2ឆ្នាំមកហើយ។ លោកបន្តថា កម្មវិធីរបស់ខ្លួនតែងតែមានមនុស្សរាប់រយនាក់ចូលរួម។

លោក Manzheley និយាយថា៖ «ក្រុមមនុស្សល្បីឈ្មោះជាច្រើនមកពីប្រទេសនានា បានបង្ហាញខ្លួននៅក្នុងពិធីជប់លៀងដែលខ្ញុំបានរៀបចំ ក្នុងនោះមានទាំងអ្នកនយោបាយប៉ូឡូញផងដែរ។ ពួកគេសុទ្ធតែជាអ្នកមានគ្រួសាររួចហើយ ហើយពួកគេក៏សុទ្ធតែស្នើឱ្យរក្សាការសម្ងាត់អំពីការចូលរួមពិធីជប់លៀងសម្រាប់មនុស្សភេទពីរបីនេះ»។

កាលពីសប្ដាហ៍មុន Manzheley បានរៀបចំពិធីជប់លៀងដូចខាងលើ នៅក្នុងផ្ទះមួយនៅទីក្រុង Brussels ដោយមានមនុស្ស 25នាក់ចូលរួម ប៉ុន្តែ ត្រូវបានក្រុមប៉ូលិសឆ្មក់ចូលត្រួតពិនិត្យ ដោយសារតែបានរំលោភលើបម្រាមគោចរដើម្បីទប់ស្កាត់ Covid-19។

Manzheley និយាយថា៖ «ពួកគេគឺជាអ្នកនយោបាយមកពី អ៊ុយក្រែន បារាំង អាល្លឺម៉ង់ ហូឡង់ លុចហ្សំបួរ ស្វីស និងអេស្ប៉ាញ។ ក៏ប៉ុន្តែ ភ្ញៀវដែលបានចូលរួមជាញឹកញាប់គឺអ្នកតំណាងរាស្ត្រនៃប្រទេសប៉ូឡូញ និងហុងគ្រី»។

អ្នករៀបចំពិធីជប់លៀង Sex ខាងលើបានអះអាងថា មានអ្នកនយោបាយដល់ទៅ 9រូបរបស់បក្សកាន់អំណាច Fidesz នៅហុងគ្រី ក្នុងនោះមានតំណាងរាស្ត្រ Jozsef Szajer ផងដែរដែលបានចូលរួមពិធីជប់លៀងនេះ។

Manzheley បានរៀបរាប់ថា ពិធីជប់លៀង Sex របស់លោក ត្រូវបានប្រារព្ធឡើងទៅតាមរូបភាព “អាក្រាតជាទីបំផុត” ក្នុងនោះ មិនមានវិធានការការពារ ក៏ដូចជាការពិនិត្យរកវីរុស Covid-19។ ភ្ញៀវគ្រប់រូបត្រូវតែចូលរួមដោយអស់ពីចិត្ត ហើយពុំមានអ្នកណាម្នាក់ត្រូវបានអនុញ្ញាតឱ្យប្រើទូរស័ព្ទ ឬថតរូបនៅក្នុងពិធីជប់លៀង Sex នេះទេ។

ក្រុមមន្ត្រីបានរកឃើញថា អ្នកចូលរួមចំនួន 25នាក់ដែលជាបុរស ភាពច្រើនគ្មានសម្លៀកបំពាក់ជាប់ខ្លួននោះឡើយ នៅក្នុងពិធីជប់លៀងក្នុងបន្ទប់មួយនៅជាន់លើរបស់ហាងកាហ្វេមួយកន្លែង។ ព័ត៌មាននេះបានបែកធ្លាយ និងបាននាំឱ្យ Szajer អាយុ 59ឆ្នាំ មកពីបក្សកំពុងកាន់អំណាច Fidesz របស់នាយករដ្ឋមន្ត្រីហុងគ្រី Vikto Orban ត្រូវលាលែងពីតំណែង។

ការិយាល័យរដ្ឋអាជ្ញានៃទីក្រុង Brussels បានទទួលស្គាល់ថា មានបុរសម្នាក់ត្រូវបានគេដាក់ឈ្មោះថា S.J. បានចូលរួមពិធីជប់លៀង និងបានព្យាយាមគេចចេញពីពិធីជប់លៀង មុនពេលត្រូវបានចាប់ខ្លួន។

Manzheley បានបញ្ជាក់ថា អ្នកចូលរួមសុទ្ធតែត្រូវបានតម្រូវឱ្យចុះឈ្មោះទៅក្នុងបញ្ជីមួយដែលប្រកាសថា មិនមានផ្ទុកវីរុស Covid-19។ គាត់និយាយថា ក្រុមប៉ូលិសអាចឆ្មក់ចូលបាន ក៏ព្រោះតែមានអ្នកទុកទ្វារចំហ៕

ប្រភព៖ Fox News

December 4, 2020

ម្ចាស់ក្រុមហ៊ុនរថយន្តអគ្គិសនីជាច្រើនរូបបានក្លាយជាអ្នកមានយ៉ាងឆាប់រហ័ស! ដោយឡែក Elon Musk រកបានជាង 100ពាន់លានដុល្លារនៅក្នុងឆ្នាំនេះ

សារព័ត៌មាន Bloomberg បានស្រាវជ្រាវឃើញថា ទ្រព្យសរុបរបស់បណ្ដាមហាសេដ្ឋីក្នុងវិស័យរថយន្តអគ្គិសនី បានកើនឡើងជាង 140ពាន់លានដុល្លារអាមេរិក ក្នុងនោះ ម្ចាស់ក្រុមហ៊ុន Tesla រកបានចំណូល 111ពាន់លានដុល្លារនៅក្នុងឆ្នាំ 2020។

2020 គឺជាឆ្នាំដែលមហាសេដ្ឋី Elon Musk ទទួលបានដំណឹងល្អជាបន្តបន្ទាប់។ ប៉ុន្មានថ្ងៃបន្ទាប់ពីបានក្លាយជាអ្នកមានជាងគេលំដាប់ទីពីរក្នុងពិភពលោក ជាមួយនឹងទ្រព្យសរុប 139ពាន់លានដុល្លារអាមរិក លោក Musk ក៏បានក្លាយជាម្ចាស់ក្រុមហ៊ុនមួយដែលស្ថិតក្នុងសន្ទស្សន៍ S&P 500 (សន្ទស្សន៍ដែលស្ដីអំពីក្រុមហ៊ុនដែលមានតម្លៃទុនច្រើនជាងគេទាំង 500 នៅក្នុងពិភពលោក) នៅពេលដែល Tesla ត្រូវបានបញ្ចូលឈ្មោះទៅក្នុងសន្ទស្សន៍នេះ។

ប៉ុន្តែ CEO របស់ Tesla មិនមែនជាអ្នកជំនួញតែម្នាក់គត់ក្នុងវិស័យផលិតរថយន្តអគ្គិសនីដែលទទួលបានជោគជ័យត្រចះត្រចង់ក្នុងឆ្នាំ 2020នេះទេ។ យោងតាមស្ថិតិរបស់ Bloomberg មានគូប្រជែងមួយចំនួនរបស់ Tesla ថែមទាំងរកបានចំណូលលឿនជាងលោក Elon Musk ទៀតផង។

William Li ស្ថាបនិករបស់ក្រុមហ៊ុន Nio រកបានទ្រព្យច្រើនជាងមុន 12ដង ដោយសារតម្លៃមូលបត្រដែលលោកកំពុងកាន់កាប់នៅក្នុងក្រុមហ៊ុនផលិតរថយន្តអគ្គិសនីនេះ (កំពុងបោះផ្សាយមូលបត្រនៅសហរដ្ឋអាមេរិក) កំពុងបន្តកើនឡើងយ៉ាងឆាប់រហ័ស។ នេះគឺជាមហាសេដ្ឋីដែលមានទ្រព្យកើនឡើងលឿនជាងគេបង្អស់នៅក្នុងចំណោមក្រុមអ្នកមានជាងគេទាំង 500នាក់ក្នុងពិភពលោក។

ទ្រព្យសុទ្ធរបស់ He Xiaopeng ដែលជាប្រធានក្រុមហ៊ុន Xpeng Inc ក៏កើនឡើងជាង 600% ផងដែរ។ ទ្រព្យសម្បត្តិសរុបរបស់បណ្ដាមហាសេដ្ឋីផ្នែកផលិតរថយន្តអគ្គិសនី ត្រូវបាន Bloomberg រកឃើញថា បានកើនឡើងជាង 140ពាន់លានដុល្លារអាមេរិក ក្នុងនោះ ទ្រព្យសម្បត្តិរបស់មហាសេដ្ឋីជនជាតិអាមេរិកាំងដើមកំណើតអាហ្វ្រិកខាងត្បូង លោក Elon Musk បានកើនឡើង 111ពាន់លានដុល្លារ។

General Motors គឺជាក្រុមហ៊ុនផលិតរថយន្តដែលមានផែនការបញ្ចេញរថយន្តអគ្គិសនីថ្មីចំនួន 30ម៉ូដែល នៅក្នុងឆ្នាំ 2025 ហើយប្រការនេះក៏បានជួយឱ្យមូលបត្ររបស់ក្រុមហ៊ុននេះ លោតឡើងដល់ចំណុចកំពូលបំផុតក្នុងអំឡុង 3ឆ្នាំកន្លងមកនេះ។

បណ្ដាគូប្រជែងរបស់លោក Musk រកបានប្រាក់ចំណេញកើនឡើងលឿនជាង ប៉ុន្តែ លោក Musk នៅតែជាអ្នកដែលរកបានប្រាក់ច្រើនជាងគេបង្អស់ក្នុងឆ្នាំនេះ ដោយសារអត្រាកើនឡើង 580% នៃមូលបត្រ Tesla រាប់ចាប់ពីដើមឆ្នាំរហូតមកដល់បច្ចុប្បន្ន។ តាមពីក្រោយ Elon Musk គឺជាអ្នកមានជាងគេលំដាប់ទីពីរក្នុងវិស័យផលិតរថយន្តអគ្គិសនី នោះគឺ Wang Chuan-Fu ដែលជាស្ថាបនិករបស់ BYD។ ទ្រព្យរបស់លោក Wang បានកើនឡើងច្រើនជាងមុនបីដង ដែលនាំឱ្យទ្រព្យសរុបរបស់លោក បានឡើងដល់ 14ពាន់លានដុល្លារអាមេរិក៕

ប្រភព៖ Bloomberg

December 4, 2020

កម្ពុជារកឃើញអ្នកឆ្លងវីរុស Covid-19 ចំនួន 4 ករណីបន្ថែមទៀតហើយនៅក្នុងរយៈពេល 24ម៉ោងចុងក្រោយនេះ

ក្នុងរយៈពេល 24ម៉ោងកន្លងទៅនេះ ក្រសួងសុខាភិបាលកម្ពុជាបានរកឃើញអ្នកឆ្លងវីរុស Covid-19 ចំនួន 4នាក់បន្ថែមទៀត ដែលនេះគឺករណីពាក់ព័ន្ធនឹងព្រឹត្តិការណ៍ 28វិច្ឆិកា ដែល Covid-19 បានចាប់ផ្ដើមឆ្លងចូលសហគមន៍។

ករណីវិជ្ជមានចំនួន 4 នាក់ថ្មីនេះ រួមមាន ៖ ទីមួយ បុរសជនជាតិខ្មែរអាយុ 39ឆ្នាំ នៅបុរីលឹមឈាងហាក់ សង្កាត់វាលស្បូវ ខណ្ឌច្បារអំពៅ ក្រុងភ្នំពេញ។ ទីពីរ ស្ត្រីជនជាតិខ្មែរ អាយុ 32ឆ្នាំ ជាភរិយារបស់បុរសអ្នកជំងឺខាងលើ និងទីបីគឺកុមារាជនជាតិខ្មែរ អាយុ3ឆ្នាំ ត្រូវជាកូនរបស់អ្នកជំងឺខាងលើ។ ទីបួន គឺបុរសជនជាតិខ្មែរ អាយុ22ឆ្នាំ នៅសង្កាត់ចាក់អង្រែលើ ក្រុងភ្នំពេញ។

គិតមកដល់បច្ចុប្បន្ន កម្ពុជាបានរកឃើញអ្នកឆ្លងវីរុស Covid-19 សរុបចំនួន 335នាក់ ក្នុងនោះមាន 304នាក់បានជាសះស្បើយ និង 31នាក់កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត និងមណ្ឌលសុខភាពចាក់អង្រែ នារាជធីនីភ្នំពេញ។

December 4, 2020

ទីផ្សារវ៉ាក់សាំងប្រឆាំង Covid-19! តើប្រទេសណាខ្លះដែលបានបញ្ជាទិញមុន ច្រើនជាងគេ?

ប្រទេសអ្នកមានជាងគេចំនួន 32 ក្នុងពិភពលោក បានបញ្ជាទិញជាមុន (pre-order) ជាងពាក់កណ្ដាលនៃបរិមាណសរុបរបស់វ៉ាក់សាំង Covid-19 នៅទូទាំងពិភពលោក ប៉ុន្តែ ប្រទេសទាំងនេះ មានប្រជាជនត្រឹមតែ 13% ប៉ុណ្ណោះនៃប្រជាជនសរុបក្នុងពិភពលោក។

យោងតាមលទ្ធនៃការប្រើប្រាស់សាកល្បងវ៉ាក់សាំង Covid-19 ដំណាក់កាលទីបី និងសេចក្ដីប្រកាសអំពីផលិតភាពដែលបានគ្រោងទុកពីបណ្ដាក្រុមហ៊ុនផលិតវ៉ាក់សាំង យើងអាចនឹងមានវ៉ាក់ស៊ាំង Covid-19 គ្រប់គ្រាន់សម្រាប់ចាក់ឱ្យប្រជាជនចំនួន 1/3 ក្នុងពិភពលោកនៅចុងឆ្នាំ 2021។ ប៉ុន្តែ ពលរដ្ឋជាច្រើននៅក្នុងបណ្ដាប្រទេសក្រីក្រ អាចនឹងត្រូវរង់ចាំរហូតដល់ឆ្នាំ 2023 ឬ 2024 ទើបអាចមានវ៉ាក់សាំងដើម្បីចាក់នឹងគេ។ នេះគឺជាទិដ្ឋភាពដែលត្រូវបានព្យាករដោយមជ្ឈមណ្ឌលកែប្រែសុខាភិបាលសកល Duke ដែលមានទីស្នាក់ការនៅតំបន់ Durham ក្នុងរដ្ឋ Carolina ខាងជើងនៃសហរដ្ឋអាមេរិក។

មើលទៅលើក្រុមហ៊ុនចំនួន 3 ដែលកំពុងកាន់កាប់បេក្ខភាពវ៉ាក់សាំង Covid-19 ដែលមានសក្ដានុពលបំផុត គឺក្រុមហ៊ុន AstraZeneca, Pfizer និង Moderna។ តាមការគណនា បរិមាណសរុបនៃផលិតផលរបស់ពួកគេ អាចធានាការផ្គត់ផ្គង់វ៉ាក់សាំង Covid-19 ចំនួន 5.3 ពាន់លានអំពូលនៅក្នុងឆ្នាំ 2021។

តាមការគណនា បរិមាណវ៉ាក់សាំងនេះអាចចាក់ឱ្យមនុស្សចាប់ពី 2.6 ដល់ 3.1 ពាន់លាននាក់នៅលើពិភពលោក អាស្រ័យទៅលើវ៉ាក់សាំងរបស់ ក្រុមហ៊ុន AstraZeneca ដែលអាចចាក់ទៅតាមសេណារីយ៉ោ 1.5អំពូល ឬ 2អំពូលសម្រាប់មនុស្សម្នាក់។

ក្រៅពីបណ្ដាក្រុមហ៊ុនផលិតវ៉ាក់សាំងខាងលើ ក៏នៅមានក្រុមហ៊ុនជាច្រើនផ្សេងទៀត ដូច្នេះ រុស្ស៊ីជាដើម។ មូលនិធិវិនិយោគ Russia Direct ឱ្យដឹងថា ពួកគេអាចផ្គត់ផ្គង់វ៉ាក់សាំង Covid-19 ទៅឱ្យមនុស្សចំនួន 500លាននាក់នៅក្រៅប្រទេសជារៀងរាល់ឆ្នាំ ចាប់ពីឆ្នាំ 2021។

នៅក្នុងពិភពលោក មានប្រទេសចំនួន 32 ហើយដែលបានបញ្ជាទិញជាងពាក់កណ្ដាលនៃបរិមាណវ៉ាក់សាំងសរុបក្នុងពិភពលោក ដែលប្រទេសទាំងនេះមានប្រជាជនសរុបប្រហែល 13% ប៉ុណ្ណោះ បើធៀបនឹងប្រជាជនសរុបទូទាំងសកលលោក។ កាណាដា បច្ចុប្បន្នគឺជាប្រទេសដែលឈរលើកំពូលតារាង ដោយប្រជាជនម្នាក់ៗរបស់ប្រទេសនេះ អាចនៅសល់វ៉ាក់សាំងដែលអាចចាក់បានរហូតដល់ 9ដងឯណោះ។

ប្រការខាងលើនេះ នឹងនាំឱ្យបណ្ដាប្រទេសក្រីក្រ ជួបការលំបាកខ្លាំងដោយសារតែមិនមានលទ្ធភាពគ្រប់គ្រាន់ក្នុងការបញ្ជាទិញជាមុននូវវ៉ាក់សាំងដែលមានសក្ដានុពល។ ក៏ប៉ុន្តែ បណ្ដាប្រទេសក្រីក្រ នៅមានក្ដីសង្ឃឹមផ្សេងមួយទៀត នោះគឺការរំពឹងទៅលើការរួមចំណែករបស់ COVAX ដែលជាមូលនិធិបែងចែកវ៉ាក់សាំងស្មើភាពគ្នា។

COVAX ត្រូវបានបង្កើតឡើង និងដំណើរការដោយអង្គការចំនួន 3 រួមមាន សម្ព័ន្ធផ្លាស់ប្ដូរត្រៀមសម្រាប់ការទប់ទល់នឹងរោគរាតត្បាត (CEPI) អង្គការសុខភាពពិភពលោក (WHO) និង Gavi ដែលជាសម្ព័ន្ធវ៉ាក់សាំង និងជាអង្គការមិនស្វែងរកកម្រៃឯកជន ដែលធ្វើសកម្មភាពក្នុងវិស័យផ្ដល់ជំនួយវ៉ាក់សាំងទៅឱ្យបណ្ដាប្រទេសដែលមានចំណូលទាប។

រហូតមកដល់ពេលនេះ COVAX បានបញ្ជាទិញជាមុននូវវ៉ាក់សាំង Covid-19 ចំនួន 700លានអំពូល ហើយបើតាមគម្រោង អង្គការនេះនឹងផ្គត់ផ្គង់វ៉ាក់សាំងចំនួន 2 ពាន់លានអំពូលនៅក្នុងឆ្នាំ 2021 ដើម្បីជួយដល់ប្រជាជនយ៉ាងតិច 20% នៅក្នុងបណ្ដាប្រទេសដែលបានចូលរួមជាមួយអង្គការនេះ។ បច្ចុប្បន្ន មានប្រទេសជាង 198 ដែលបានចុះឈ្មោះចូលរួមជាមួយនឹងអង្គការ COVAX ដោយរួមមានទាំងបណ្ដាប្រទេសអ្នកមានផងដែរ។

ក្រៅពីនេះ ក្ដីសង្ឃឹមមួយផ្សេងទៀតដែលបណ្ដាប្រទេសក្រីក្រអាចរង់ចាំ នោះគឺការផ្ដល់ជំនួយវ៉ាក់សាំងពីបណ្ដាប្រទេសអ្នកមានដែលពួកគេប្រើប្រាស់វ៉ាក់សាំងមិនអស់។ ក៏ប៉ុន្តែ ក្រុមអ្នកជំនាញយល់ថា ក្ដីសង្ឃឹមនេះ ពិតជាស្ដួចស្ដើងខ្លាំងណាស់៕

ប្រភព៖ Nature

December 3, 2020

អគារកាណាឌីយ៉ា ត្រូវបានក្រសួងសុខាភិបាលបិទបណ្ដោះអាសន្ន ក្រោយពីរកឃើញបុគ្គលិកធនាគារម្នាក់វិជ្ជមាននឹង Covid-19

ក្រសួងសុខាភិបាលកម្ពុជា បានប្រកាសបិទធនាគារកាណាឌីយ៉ាដែលមានទីតាំងជិតផ្លូវភ្លោះវត្តភ្នំ ក្នុងសង្កាត់ស្រះចក ខណ្ឌដូនពេញជាបណ្ដោះអាសន្ន ក្រោយពីបានរកឃើញបុរសជនជាតិខ្មែរម្នាក់ជាបុគ្គលិកធនាគារចិន វិជ្ជមាននឹង Covid-19។

កាលពីយប់មិញ ក្រសួងសុខាភិបាលរកឃើញអ្នកផ្ទុកវីរុស Covid-19 ម្នាក់ ដែលជាបុរសជនជាតិខ្មែរ និងជាបុគ្គលិកធនាគារចិន (Bank of China) ដែលមានការិយាល័យនៅក្នុងអគារកាណាឌីយ៉ាខាងលើ ដូច្នេះ ក្រសួងសុខាភិបាលក៏សម្រាប់បិទអគារនេះជាបណ្ដោះអាសន្នដើម្បីស្រាវជ្រាវអ្នកដែលជាប់ពាក់ព័ន្ធ។ បុគ្គលិកធនាគារចិនខាងលើនេះ មានទីលំនៅនៅក្នុងសង្កាត់វាលស្បូប ខណ្ឌច្បារអំពៅ រាជធានីភ្នំពេញ។ នេះបើតាមសារព័ត៌មាន FN ដែលបានដកស្រង់សម្ដីលោកស្រី យក់ សម្បត្តិ រដ្ឋលេខាធិការក្រសួងសុខាភិបាល។

ដូច្នេះ គិតមកដល់បច្ចុប្បន្ន កម្ពុជាបានរកឃើញអ្នកឆ្លងីវីរុស Covid-19 សរុបចំនួន 331នាក់ ក្នុងនោះមានអ្នកកំពុងសម្រាកព្យាបាលចំនួន 27នាក់ និងជាសះស្បើយចំនួន 304នាក់៕

December 3, 2020

កម្ពុជារកឃើញអ្នកឆ្លង Covid-19 ថ្មីចំនួន 2 ករណីបន្ថែមទៀត ក្នុងនោះមានបុគ្គលិកធនាគារផងដែរ

នៅព្រឹកថ្ងៃទី 3 ខែធ្នូនេះ ក្រសួងសុខាភិបាលកម្ពុជា បានប្រកាសឱ្យដឹងថា បានរកឃើញករណីវិជ្ជមាននឹង Covid—19 ថ្មី ចំនួន 2នាក់បន្ថែមទៀត ដែលនេះមានជាប់ទាក់ទងនឹងករណីផ្ទុកវីរុសរបស់ភរិយាលោកអគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃ។

ករណីឆ្លងខាងលើរួមមាន៖ ទីមួយ៖ ស្ត្រីជនជាតិខ្មែរ អាយុ 23ឆ្នាំ នៅសង្កាត់វាលស្បូវ ខណ្ឌច្បារអំពៅ រាជធានីភ្នំពេញ ដែលមានស្វាមីជាអនុប្រធាននាយកដ្ឋានពន្ធនាគារនៃក្រសួងមហាផ្ទៃ។ ទីពីរ៖ ស្ត្រីជនជាតិខ្មែរ អាយុ 21ឆ្នាំ នៅសង្កាត់វាលស្បូវ ខណ្ឌច្បារអំពៅ ទីក្រុងភ្នំពេញ ដែលជាប្អូនបង្កើតរបស់ស្ត្រីខាងលើ និងជាបុគ្គលិករបស់ធនាគារកាធេយូណាយធីត នៅភ្នំពេញ។

គិតត្រឹមព្រឹកថ្ងៃទី 3ធ្នូនេះ កម្ពុជាបានរកឃើញអ្នកឆ្លងីវីរុស Covid-19 សរុបចំនួន 331នាក់ ក្នុងនោះមានអ្នកកំពុងទទួលការព្យាបាលចំនួន 27នាក់ និងជាសះស្បើយចំនួន 304នាក់៕

December 3, 2020

សិង្ហបុរីអនុញ្ញាតឱ្យលក់ «សាច់សិប្បនិម្មិតដែលចិញ្ចឹមក្នុងបន្ទប់ពិសោធន៍»

ប្រទេសនៅក្នុងតំបន់អាស៊ីអាគ្នេយ៍មួយនេះ បានក្លាយជាទឹកដីដំបូងគេក្នុងពិភពលោក ដែលបានអនុញ្ញាតឱ្យដាក់លក់សាច់សិប្បនិម្មិតដែលគេចញ្ចឹមក្នុងបន្ទប់ពិសោធន៍ ដែលសាច់ប្រភេទនេះ ត្រូវបានគេចិញ្ចឹមតាំងតែពីនៅជាកោសិកាតូចៗ និងមិនចាំបាច់សម្លាប់សត្វ។

ក្រុមហ៊ុនផលិតសាច់ និងស៊ុតសិប្បនិម្មិតរបស់អាមេរិក Eat Just Inc. ទើបតែទទួលបានការអនុញ្ញាតឱ្យដាក់លក់សាច់មាន់ “ចិញ្ចឹមក្នុងបន្ទប់ពិសោធន៍” នៅសិង្ហបុរី។ តាមរយៈនេះ សិង្ហបុរីបានក្លាយជាប្រទេសដំបូងគេក្នុងពិភពលោក ដែលបានអនុញ្ញាតឱ្យលក់សាច់សិប្បនិម្មិត។

ដោយត្រូវបានបង្កើតឡើងពីកោសិកាសត្វ សាច់មាន់សិប្បនិម្មិតរបស់ក្រុមហ៊ុន Eat Just Inc. នឹងត្រូវបានដាក់លក់ក្នុងទីផ្សារសិង្ហបុរី ក្រោមយីហោ GOOD Meat ជាមួយនឹងមុខម្ហូប «សាច់មាន់បំពងម្សៅ» នៅក្នុងភោជនីយដ្ឋានតែមួយគត់។

ដំណាក់កាលដំបូង Eat Just Inc. នឹងសហការជាមួយមជ្ឈមណ្ឌលប្រភពធនធាននិងកែប្រែអាហាររបស់សិង្ហបុរីដើម្បីផលិតសាច់មាន់សិប្បនិម្មិត។ ក្រោយមក ក្រុមហ៊ុនក៏នឹងទិញសម្ភារបន្ថែមដើម្បីពង្រីកសេវាកម្មផ្គត់ផ្គង់សាច់ដល់បណ្ដាភោជនីយដ្ឋាននានា ហើយបន្ទាប់មកទៀតគឺផ្គត់ផ្គង់សាច់នេះទៅឱ្យផ្សារទំនើប។

Josh Tetrick ដែលជា CEO របស់ក្រុមហ៊ុន បានឱ្យដឹងថា៖ «យើងចង់ជួយឱ្យសិង្ហបុរីក្លាយជាមជ្ឈមណ្ឌលផលិតរបស់ក្រុមហ៊ុន Eat Just សម្រាប់ផ្គត់ផ្គង់នៅទូទាំងពិភពលោក។ សិង្ហបុរីពិតជាមានការយល់ឃើញទាន់សម័យនៅក្នុងការកសាង និងបង្កលក្ខណងាយស្រួលដល់សកម្មភាពប្រភេទនេះ»។

Josh Tetrick ក៏បានបញ្ជាក់ថា រសជាតិរបស់សាច់មាន់សិប្បនិម្មិត គឺដូចទៅនឹងសាច់មាន់ពិតយ៉ាងដូច្នោះដែរ។

ការអនុញ្ញាតឱ្យលក់សាច់សិប្បនិម្មិតនេះ គឺស្ថិតក្នុងផែនការកែសម្រួលបញ្ហាសន្តិសុខស្បៀងរបស់ប្រទេសសិង្ហបុរី ព្រោះថា ប្រទេសនេះកំពុងពឹងផ្អែកភាគច្រើនទៅលើអាហារនាំចូលពីបរទេស។ សន្តិសុខស្បៀងកំពុងក្លាយជារឿងចាំបាច់ជាងមុន ពិសេសគឺនៅក្នុងគ្រាដែល Covid-19 កំពុងវាយប្រហារពិភពលោក។

Josh Tetrick ដែលជា CEO របស់ក្រុមហ៊ុន បានឱ្យដឹងថា៖ «យើងចង់ជួយឱ្យសិង្ហបុរីក្លាយជាមជ្ឈមណ្ឌលផលិតរបស់ក្រុមហ៊ុន Eat Just សម្រាប់ផ្គត់ផ្គង់នៅទូទាំងពិភពលោក។ សិង្ហបុរីពិតជាមានការយល់ឃើញទាន់សម័យនៅក្នុងការកសាង និងបង្កលក្ខណងាយស្រួលដល់សកម្មភាពប្រភេទនេះ»។ Josh Tetrick ក៏បានបញ្ជាក់ថា រសជាតិរបស់សាច់មាន់សិប្បនិម្មិត គឺដូចទៅនឹងសាច់មាន់ពិតយ៉ាងដូច្នោះដែរ។ — សាច់ដែលគេចញ្ចឹមក្នុងបន្ទប់ពិសោធន៍

ផលិតផលសាច់មាន់សិប្បនិម្មិតរបស់ Eat Just នឹងត្រូវបានលក់ក្នុងតម្លៃប្រហាក់ប្រហែលនឹងសាច់មាន់ធម្មតាប្រភេទគុណភាពខ្ពស់នៅក្នុងរយៈពេល 6 ខែដំបូង។ Tetrick ឱ្យដឹងថា តម្លៃនេះនឹងថយចុះជាបន្តបន្ទាប់ នៅពេលក្រុមហ៊ុនឈានដល់ការផ្គត់ផ្គង់ទូទាំងពិភពលោក និងឆ្ពោះទៅរកតម្លៃមួយដែលធូរថ្លៃជាងសាច់មាន់ចិញ្ចឹមនៅក្នុងកសិដ្ឋាន។

ក្រៅពីសាច់មាន់សិប្បនិម្មិត ក្រុមហ៊ុន Eat Just ក៏មានគម្រោងសុំច្បាប់លក់សាច់គោសិប្បនិម្មិតនៅសិង្ហបុរីនៅដើមឆ្នាំ 2021 ផងដែរ ខណៈដែលដំណើរការនេះនៅសហរដ្ឋអាមេរិក និងអឺរ៉ុប ត្រូវបានធ្វើឡើងយឺតជាងនេះ។

បច្ចុប្បន្ន ក្រុមហ៊ុន Eat Just ដែលមានទីស្នាក់ការកណ្ដាលនៅទីក្រុង San Francisco សហរដ្ឋអាមេរិក មិនទាន់រកបានចំណេញនៅឡើយ ហើយបើតាមផែនការ ក្រុមហ៊ុននេះនឹងធ្វើ IPO ជាសាធារណៈនៅពេលដ៏ខ្លីខាងមុខ៕

ប្រភព៖ CNBC

December 2, 2020

មូលបត្រក្រុមហ៊ុនផលិតថ្នាំបាញ់ច្រមុះប្រឆាំង Covid-19 កើនឡើងជិត 500% ក្នុងរយៈពេលតែមួយថ្ងៃ

មូលបត្ររបស់ Auris Medical ដែលជាក្រុមហ៊ុនមួយមានទីស្នាក់ការកណ្ដាលនៅលើទឹកដី Bermuda បានកើនឡើងយ៉ាងលឿនពីតម្លៃ 1.1 ដុល្លារអាមេរិកក្នុងការជួញដូរកាលពីថ្ងៃទី 30 វិច្ឆិកា ឡើងដល់ជាង 5 ដុល្លារ/ហ៊ុន នៅក្នុងការជួញដូរកាលពីម្សិលមិញ។ល។

ក្នុងការជួញដូរកាលពីថ្ងៃទី 1 ខែធ្នូ តម្លៃមូលបត្ររបស់ Auris Medical បានកើនឡើងដល់ 480% បន្ទាប់ពីមានព័ត៌មានថា ថ្នាំបាញ់ច្រមុះ AM-301 ដែលក្រុមហ៊ុននេះបានផលិតឡើង មានប្រសិទ្ធភាពខ្ពស់ក្នុងការការពារការឆ្លងវីរុស Covid-19។

មុននោះ Auris Medical បានធ្វើការពិសោធដោយប្រើប្រាស់ថ្នាំ AM-301 នេះ បាញ់ទៅលើកោសិកាក្នុងច្រមុះរបស់មនុស្សសិប្បនិម្មិតដែលត្រូវបានគេបង្កើតឡើងដើម្បីជាតំណាងមនុស្សនៅក្នុងបន្ទប់ពិសោធន៍។ លទ្ធផលបានបង្ហាញថា កោសិកាដែលត្រូវបានបាញ់ថ្នាំ AM-301 មានផ្ទុកវីរុស Covid-19 តិចជាង 90% បើធៀបនឹងកោសិកាដែលមិនបានបាញ់ថ្នាំនេះក្រោយរយៈពេល 48 ម៉ោង។ ប្រសិទ្ធភាពនេះបានកើនឡើង 99.2% បន្ទាប់ពីបានបាញ់ថ្នាំនេះរយៈពេល 72 ម៉ោង។ ប្រការនេះបង្ហាញថា ថ្នាំប្រភេទបាញ់ AM-301 មានប្រសិទ្ធភាពខ្ពស់ក្នុងការទប់ទល់នឹងការឆ្លងវីរុស Covid-19។

ស្ថាបនិក និងជា CEO របស់ Auris Medical លោក Thomas Meyer បានឱ្យដឹងថា៖ «យើងពិតជាមានការសប្បាយចិត្តជាមួយនឹងប្រសិទ្ធភាពរបស់ AM-301 នៅក្នុងការប្រឆាំងនឹងវីរុស Covid-19 ក្រោយពីថ្នាំនេះត្រូវបានពិសោធនៅក្នុងបរិស្ថានសិប្បនិម្មិតស្រដៀងទៅនឹងច្រមុះមនុស្សពិត»។

លោក Thomas Meyer បន្ថែមថា៖ «ជាមួយនឹងរូបមន្តប្រភេទបាញ់ថ្មី យើងមានភ័ស្ដុតាងផ្ទាល់បង្ហាញថា AM-301 អាចជួយកាត់បន្ថយហានិភ័យនៃការឆ្លងវីរុសតាមរយៈភ្នាសក្នុងរន្ធច្រមុះ។

លោក Meyer ក៏បាននិយាយថា Auris Medical នឹងធ្វើការពិសោធបន្ថែមទៅលើថ្នាំបាញ់ច្រមុះ AM-301 ហើយតាមផែនការ ក្រុមហ៊ុននេះនឹងដាក់ពាក្យសុំចុះបញ្ជិកានៅឆ្នាំ2021។ AM-301 កំពុងត្រូវបានអភិវឌ្ឍដោយ Altamira Medica ដែលជាក្រុមហ៊ុនបុត្រសម្ព័ន្ធរបស់ Auris Medical។

ក្រុមហ៊ុន Auris Medical ត្រូវបានបង្កើតឡើងកាលពីឆ្នាំ 2003 និងមានទីស្នាក់ការកណ្ដាលនៅទីក្រុង Hamilton នៃកោះ Bermuda ដែលជាទឹកដីមួយរបស់ចក្រភពអង់គ្លេស នៅកណ្ដាលមហាសមុទ្រអាត្លន់ទិកខាងជើង។ មូលបត្ររបស់ Auris Medical Holding Ltd បច្ចុប្បន្នត្រូវបានដាក់ឱ្យជួញដូរនៅលើផ្សារហ៊ុន Nasdaq ដោយប្រើឈ្មោះ «EARS»៕

December 2, 2020

Author: សឿន សំណាង