សឿន សំណាង - La Reine Media

សាស្ត្រាចារ្យអ៊ីស្រាអែល ថា «Trump វិះធ្វើឱ្យបែកធ្លាយរឿងមនុស្សពិភពផ្កាយ»

សាស្ត្រាចារ្យមួយរូបរបស់ប្រទេសអ៊ីស្រាអែល ជឿថា ប្រធានាធិបតីអាមេរិក លោក Donald Trump បានដឹងអំពីព័ត៌មានទាក់ទិននឹងមនុស្សពិភពផ្កាយ ហើយវិះនឹងធ្វើឱ្យបែកធ្លាយព័ត៌មាននេះជាសាធារណៈ បើសិនមិនត្រូវបាន «សម្ព័ន្ធកាឡាក់ស៊ីមីលគីវ៉េ» រារាំងទាន់ពេល។

«រដ្ឋាភិបាលសហរដ្ឋអាមេរិក និងក្រុមមនុស្សមកពីពិភពផ្កាយ បានចុះកិច្ចព្រមព្រៀងមួយ អនុញ្ញាតឱ្យពួកគេធ្វើការពិសោធន៍នៅលើផែនដី» សាស្ត្រាចារ្យ Haim Eshed ដែលជាអតីតប្រធានកម្មវិធីអវកាសរបស់ប្រទេសអ៊ីស្រាអែល ក្នុងអំឡុងឆ្នាំ 1981 ដល់ឆ្នាំ 2010 ថ្លែងដូច្នេះ នៅក្នុងកិច្ចសម្ភាសមួយជាមួយនឹងសារព័ត៌មាន Ediot Aharonot កាលពីថ្ងៃទី 4 ធ្នូកន្លងទៅ។ ការប្រកាសរបស់លោក Eshed ត្រូវបានគេចាប់អារម្មណ៍ខ្លាំង ក្រោយពីសារព័ត៌មាន Jerusalem Post បានបកប្រែអត្ថបទពីភាសាហេប្រ៊ូ (Hebrew) មកជាភាសាអង់គ្លេស និងបានចុះផ្សាយកាលពីថ្ងៃទី 8ធ្នូ។

លោក Eshed ដែលជាអតីតមន្ត្រីជាន់ខ្ពស់ម្នាក់ និងជាសាស្ត្រាចារ្យដែលទទួលបានការគោរពនៅប្រទេសអ៊ីស្រាអែល បានថ្លែងថា ប្រធានាធិបតីសហរដ្ឋអាមេរិក លោក Donald Trump បានដឹងអំពីវត្តមានរបស់មនុស្សពិភពផ្កាយនៅលើផែនដី។

លោក Eshed បន្តថា៖ «មនុស្សពិភពផ្កាយបានស្នើឱ្យរក្សាការសម្ងាត់អំពីវត្តមានរបស់ពួកគេនៅលើផែនដី ព្រោះតែមនុស្សជាតិមិនទាន់ត្រៀមខ្លួនរួចរាល់ក្នុងការទទួលយកប្រការនេះ។ លោក Trump វិះនឹងធ្វើឱ្យបែកធ្លាយរឿងនេះទៅហើយ កាលពីពេលកន្លងទៅ»។

ក៏ប៉ុន្តែ សាស្ត្រាចារ្យខាងលើពន្យល់ថា មនុស្សពិភពក្រៅមកពីអង្គការដែលមានឈ្មោះថា «សម្ព័ន្ធកាឡាក់ស៊ី មីលគីវ៉េ» បានរារាំងលោក Trump មិនឱ្យបង្ហើបអំពីព័ត៌មាននេះ ក្នុងបំណងទប់ស្កាត់ «ការជ្រួលច្របល់ទ្រង់ទ្រាយធំ»។ លោកបន្តថា៖ «ពួកគេបានរង់ចាំរហូតដល់ថ្ងៃដែលមនុស្សជាតិបានរីកចម្រើនខ្លាំង និងយល់អំពីអវកាស និងយានអវកាស»។

សាស្ត្រាចារ្យអ៊ីស្រាអែល៖ «Trump វិះនឹងធ្វើឱ្យបែកធ្លាយរឿងមនុស្សពិភពផ្កាយ» — សាស្ត្រាចារ្យ Haim Eshed គឺជាអតីតប្រធានកម្មវិធីអវកាសរបស់ប្រទេសអ៊ីស្រាអែល ក្នុងអំឡុងឆ្នាំ 1981 ដល់ឆ្នាំ 2010

លោក Haim Eshed ក៏បានបញ្ជាក់ថា មនុស្សពិភពផ្កាយ និងក្រុមអវកាសអាមេរិកាំង បានធ្វើការជាមួយគ្នានៅក្នុងមូលដ្ឋានសម្ងាត់ក្រោមដីនៃឋានព្រះអង្គារផងដែរ។ សាស្ត្រាចារ្យនេះបន្ថែមថា មនុស្សពិភពផ្កាយ ចង់ឱ្យបណ្ដាប្រទេសដូចជា សហរដ្ឋអាមេរិក និងអ៊ីស្រាអែលជាដើម ជួយពួកគេដើម្បី «ស្រាវជ្រាវ និងស្វែងយល់រចនាសម្ព័ន្ធទាំងមូលរបស់ចក្រវាល»។

ក៏ប៉ុន្តែ លោក Haim Eshed មិនបានលើកឡើងអំពីភ័ស្ដុតាងណាមួយដែលអាចបញ្ជាក់អំពីការអះអាងរបស់ខ្លួនទេ។ ចំណែកសេតវិមាន និងក្រុមមន្ត្រីរបស់អ៊ីស្រាអែល ក៏មិនបានឆ្លើយតបនឹងការស្នើឱ្យធ្វើការបកស្រាយអំពីការអះអាងរបស់លោក Haim Eshed ផងដែរ។ Sue Gough ដែលជាអ្នកនាំពាក្យរបស់មន្ទីរបញ្ចកោណ បានបដិសេធការធ្វើអធិប្បាយអំពីរឿងនេះ។

អ្នកនាំពាក្យរបស់ទីភ្នាក់ងារអវកាសអាមេរិក (NASA) ឱ្យដឹងថា គោលដៅមួយក្នុងចំណោមគោលដៅចម្បងៗរបស់អង្គការនេះ នោះគឺការស្វែងរកវត្តមាននៃជីវិតនៅក្នុងចក្រវាលដ៏មហាសែនធំធេង។ ប៉ុន្តែ មកដល់បច្ចុប្បន្ន ពួកគេនៅតែមិនទាន់រកឃើញសញ្ញាណាមួយបញ្ជាក់ថា មានវត្តមានរបស់មនុស្សពិភពផ្កាយនៅឡើយ៕

ប្រភព៖ NBC News

December 9, 2020

វៀតណាមអភិវឌ្ឍវ៉ាក់សាំងប្រឆាំង Covid-19 ដល់ដំណាក់កាលណាហើយ?

ក្រុមហ៊ុន Nanogen បានសាកល្បងវ៉ាក់សាំង Covid-19 នៅលើសត្វកណ្ដុរ និងស្វា ដោយជោគជ័យកាលពីខែមិថុនា ឆ្នាំ2020 បន្ទាប់មក ក្រុមហ៊ុននេះនឹងសហការជាមួយមន្ទីរស្រាវជ្រាវវេជ្ជសាស្ត្រយោធា ដើម្បីជ្រើសរើសអ្នកស្ម័គ្រចិត្តចូលរួមក្នុងការធ្វើតេស្តវ៉ាក់សាំង Covid-19 របស់វៀតណាម ក្នុងដំណាក់កាលទីមួយ នៅថ្ងៃទី 10 ខែធ្នូខាងមុខ។

បច្ចុប្បន្ន វៀតណាមមានក្រុមហ៊ុនចំនួន 3 ដែលបានដំណើរការផលិតវ៉ាក់សាំង Covid-19 សម្រាប់ការសាកល្បងនៅក្នុងមន្ទីរពិសោធន៍ នោះគឺក្រុមហ៊ុន IVAC, Vabiotech និង Nanogen។ ក្រុមហ៊ុនទាំងនេះ កំពុងស្ថិតក្នុងដំណាក់កាលវាយតម្លៃអំពីសុវត្ថិភាព និងប្រសិទ្ធភាពរបស់វ៉ាក់សាំងនៅលើសត្វ។ ដោយឡែក ក្រុមហ៊ុន Nanogen បានឆ្លងផុតដំណាក់កាលខាងលើ និងបានត្រៀមខ្លួនជាស្រេចសម្រាប់ការប្រើប្រាស់សាកល្បងនៅលើមនុស្សដំណាក់កាលទីមួយ។

ស្ថាបនិក និងជានាយកក្រុមហ៊ុន Nanogen លោក Ho Nhan បានឱ្យដឹងថា ក្រុមហ៊ុននេះបានចាប់ផ្ដើមស្រាវជ្រាវ និងអភិវឌ្ឍវ៉ាក់សាំង Covid-19 តាំងពីដើមខែមិនា ឆ្នាំ2020 ក្នុងគ្រាដែលវីរុសនេះកំពុងឆ្លងរាលដាលនៅប្រទេសចិន។ ខែឧសភា2020 ក្រសួងវិទ្យាសាស្ត្រនិងបច្ចេកវិទ្យា បានប្រគល់ភារកិច្ចក្នុងការស្រាវជ្រាវវ៉ាក់សាំងប្រឆាំង Covid-19 មកឱ្យ Nanogen ជាផ្លូវការ។

ថ្ងៃទី 15 ខែឧសភា ក្រសួងខាងលើបានបន្តប្រគល់កិច្ចការអភិវឌ្ឍផ្នែកផលិតវ៉ាក់សាំង Covid-19 ដោយបច្ចេកវិទ្យាប្រូតេអ៊ីនផ្សំដើម្បីបង្កើតប្លាកែតដូចវីរុស និងប្លាកែតណាណូ ទៅឱ្យក្រុមហ៊ុនខាងលើ។ ថ្ងៃទី 21ឧសភា ប្រធានបទស្រាវជ្រាវវ៉ាក់សាំង Covid-19 របស់ក្រុមហ៊ុន Nanogen ទទួលបានការអនុម័តយល់ព្រមឱ្យដំណើរការពីក្រសួងវិទ្យាសាស្ត្រនិងបច្ចេកវិទ្យាវៀតណាម។

លោក Ho Nhan បញ្ជាក់ថា ក្រុមហ៊ុនរបស់លោក បានវិនិយោគជាង 200ពាន់លានដុង (8,662,600 ដុល្លារអាមេរិក) សម្រាប់ពង្រីករោងចក្រចំនួន3 ទិញវត្ថុធាតុដើម និងប្រព័ន្ធផលិតវ៉ាក់សាំង។ ក្រុមហ៊ុន Nanogen ឱ្យដឹងថា របាយការណ៍វាយតម្លៃអំពីប្រសិទ្ធភាព បង្ហាញថា វ៉ាក់សាំងរបស់ក្រុមហ៊ុននេះ ទទួលបានលទ្ធផលល្អក្នុងការប្រឆាំងនឹង Covid-19។ ដោយយោងទៅលើលទ្ធផលនេះ Nanogen ក៏បានធ្វើលិខិតស្នាមរួចរាល់ហើយ សម្រាប់បញ្ជូនឡើងទៅកាន់ក្រសួងសុខាភិបាល ដើម្បីសុំការអនុញ្ញាតបន្តដំណាក់កាលបន្ទាប់។

តំណាងរបស់ Nanogen និយាយថា វ៉ាក់សាំងរបស់វៀតណាមនឹងមានតម្លៃមិនលើសពី 500,000 ដុង (21.5 ដុល្លារអាមេរិក) នៅក្នុងមួយម្ជុល (ដូស) នោះទេ នៅពេលត្រូវបានបញ្ចេញលក់ក្នុងទីផ្សារ៕

December 9, 2020

កម្ពុជានឹងមានសេវាទូទាត់ប្រាក់តាមអនឡាញឆ្លងគ្រឹះស្ថាន «តម្លៃទាប» ដើម្បីទប់ទល់នឹងការឆ្លង Covid-19 តាមរយៈការចាយក្រដាសប្រាក់ផ្ទាល់

សមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា និងសមាគមសហព័ន្ធហិរញ្ញវត្ថុនិងបច្ចេកវិទ្យាកម្ពុជា បានចេញសេចក្ដីថ្លែងការណ៍រួមមួយទាក់ទងនឹងការសហការសម្រួលឱ្យមានសេវាកម្មទូទាត់ប្រាក់ឆ្លងគ្រឹះស្ថានដោយកម្រៃសេវាសមរម្យ ក្នុងបំណងរួមចំណែកទប់ស្កាត់ការឆ្លងរាលដាល Covid-19 តាមរយៈការប្រើប្រាស់សាច់ប្រាក់ផ្ទាល់។

សេចក្ដីប្រកាសបន្តថា សហគមន៍ធនាគារ និងហិរញ្ញវត្ថុបាននិងកំពុងសហការជាមួយធនាគារជាតិនៃកម្ពុជាក្នុងការសម្រួលឱ្យមានការទូទាត់តាមប្រព័ន្ធអេឡិចត្រូនិកឆ្លងគ្រឹះស្ថាន ដែលនឹងកាន់តែមានភាពងាយស្រួល ឆាប់រហ័ស សុវត្ថិភាព និងកម្រៃសេវាកម្មទាបសមរម្យជាងមុន តាមរយៈការកែសម្រួលលក្ខខណ្ឌផ្សេងៗដែលនឹងត្រូវជូនដំណឹងនាពេលខាងមុខ។

នៅក្នុងសេចក្ដីប្រកាសនេះ សមាគមបានលើកទឹកចិត្តឱ្យសាធារណជន អតិថិជន និងអាជីវករទាំងអស់ ធ្វើការទូទាត់ប្រាក់តាមប្រព័ន្ធអេឡិចត្រូនិក ដែលផ្ដល់ដោយគ្រឹះស្ថានធនាគារ ឬគ្រឹះស្ថានហិរញ្ញវត្ថុដែលអតិថិជនកំពុងប្រើប្រាស់ ដោយការទាញយកកម្មវិធីទូទាត់ និងកម្មវិធីធនាគារឌីជីថលនានានៅកម្ពុជា៕

December 9, 2020

អ្នកនាំពាក្យក្រសួងសុខាភិបាល ថ្លែងថា វ៉ាក់សាំងមិនអាចបញ្ចប់ការចម្លង Covid-19 ទាំងស្រុងបានឡើយ

នៅក្នុងសារជាសំឡេងមួយ ដែលត្រូវបានចែករំលែកនាព្រឹកថ្ងៃទី 9ធ្នូនេះ លោកជំទាវ វេជ្ជបណ្ឌិត ឱ វណ្ណឌីន មានប្រសាសន៍ថា វ៉ាក់សាំងមិនអាចបញ្ចប់ការចម្លង Covid-19 ទាំងស្រុងឡើយ។

រដ្ឋលេខាធិការ និងជាអ្នកនាំពាក្យក្រសួងសុខាភិបាលកម្ពុជា លោកជំទាវ វេជ្ជបណ្ឌិត ឱ វណ្ណឌីន ទំនងជាមានការព្រួយបារម្ភថា អាចនឹងមានពលរដ្ឋភាគច្រើនយល់ច្រឡំថា នៅពេលបានចាក់វ៉ាក់សាំង Covid-19 ហើយ ពួកគេនឹងលែងបារម្ភអ្វីទាំងអស់ ដែលនាំឱ្យពួកគេមានការធ្វេសប្រហែស និងលែងមានការយកចិត្តទុកដាក់លើការការពារខ្លួននៅចំពោះមុខវីរុសនេះ។

លោកជំទាវ វេជ្ជបណ្ឌិត បានអំពាវនាវឱ្យពលរដ្ឋគ្រប់រូប មិនត្រូវភ្លេចអនុវត្តនូវវិធានការការពារខ្លួនចម្បងៗចំនួន3 ដើម្បីទប់ស្កាត់ការឆ្លងរាលដាលនៃវីរុស Covid-19 ក្នុងនោះមានដូចជា ការលាងដៃនឹងសាប៊ូ ឬអាល់កុល ការរក្សាគម្លាតសុវត្ថិភាពបុគ្គលឱ្យបានយ៉ាងតិច 1.5ម៉ែត្រ និងពាក់ម៉ាសឱ្យបានត្រឹមត្រូវ។

ទាក់ទងនឹងវ៉ាក់សាំង Covid-19 នៅកម្ពុជា សម្ដេចតេជោ ប្រមុខរដ្ឋាភិបាលកម្ពុជា បានប្រកាសកាលពីពេលថ្មីៗនេះថា នៅពេលកម្ពុជា ទិញបានវ៉ាក់សាំងនេះ នោះរដ្ឋាភិបាល នឹងចែកជូនដល់ពលរដ្ឋទាំងអស់ ដោយឥតគិតថ្លៃ ក៏ប៉ុន្តែក្រុមគោលដៅអាទិភាពដំបូងគេបង្អស់ នោះគឺក្រុមគ្រូពេទ្យ គ្រូបង្រៀន កងកម្លាំងប្រដាប់អាវុធ និងមន្ត្រីរាជការ។

December 9, 2020

NASA ប្រកាសអំពីផែនការលម្អិតសម្រាប់បេសកកម្មឡើងជាន់ដីឋានព្រះចន្ទជាថ្មី

ទីភ្នាក់ងារអវកាសអាមេរិក (NASA) កាលពីថ្ងៃទី 7ធ្នូ បានប្រកាសឱ្យដឹងអំពីរបាយការណ៍បឋមមួយដែលនិយាយលម្អិតអំពីគោលដៅអាទិភាពសម្រាប់ក្រុមអវកាសចរនៅក្នុងបេសកកម្ម Artemis នាពេលខាងមុខ។

មួយក្នុងចំណោមគោលដៅនានារបស់បេសកកម្មខាងលើ នឹងនាំយកសំណាកដីដែលមានទម្ងន់ 85 គីឡូក្រាម ដែលរួមមានទាំងសំណាកនៅលើផ្ទៃខាងលើ និងខាងក្រោមដីរបស់ឋានព្រះចន្ទ ត្រលប់មកកាន់ផែនដី ដែលនេះគឺជាបរិមាណដ៏ច្រើន បើធៀបនឹងទម្ងន់មធ្យម 64 គីឡូក្រាមដែលអវកាសចរក្នុងបេសកកម្ម Apollo បាននាំមកកាន់ផែនដី ចាប់ពីឆ្នាំ 1969 ដល់ឆ្នាំ 1972។

«ព្រះចន្ទមានសក្ដានុពលផ្នែកវិទ្យាសាស្ត្រដ៏ធំធេង ហើយក្រុមអវកាសចរនឹងជួយឱ្យយើងស្រាវជ្រាវទៅលើវា» អនុប្រធានរបស់គណៈកម្មការនៃបេសកកម្មវិទ្យាសាស្ត្ររបស់ NASA លោក Thomas Zurbuchen និយាយដូច្នេះ។

របាយការណ៍ដែលមានកម្រាស់ 188 ទំព័រ បានគូសវាសនូវគោលដៅវិទ្យាសាស្ត្រអាទិភាពជាច្រើនសម្រាប់បេសកកម្ម Artemis ដែលនឹងត្រូវបានដំណើរការចាប់ពីឆ្នាំ 2021។

ក្នុងនោះដែរ បេសកកម្ម Artemis I នឹងមានការសាកល្បងប្រព័ន្ធបាញ់បង្ហោះក្នុងទីអវកាស និងយាន Orion គ្មានមនុស្សបើក ដែលនេះនឹងត្រូវធ្វើឡើងនៅចុងឆ្នាំ 2021។ ពីរឆ្នាំបន្ទាប់ NASA នឹងដំណើរការបេសកកម្ម Artemis II ជាមួយនឹងការសាកល្បងលើយានអវកាសមានមនុស្សបើក ដែលនឹងហោះទៅកាន់គន្លងគោចរផែនដី ប៉ុន្តែមិនទាក់ទងនឹងការចុះចតលើឋានព្រះចន្ទ។ ភារកិច្ចសំខាន់ជាងគេ នោះគឺ បេសកកម្ម Artemis III ដែលនឹងនាំមនុស្សឡើងទៅជាន់ភពរណបធម្មជាតិរបស់ផែនដីនេះ នៅក្នុងឆ្នាំ 2024 ក្នុងនោះក៏នឹងមានអវកាសចរជាស្ត្រីមួយរូបដំបូងគេផងដែរ។

ក្រុមអវកាសចរនឹងត្រូវចំណាយពេលត្រឹមតែ 6ថ្ងៃកន្លះ នៅលើឋានព្រះចន្ទ ដើម្បីប្រមូលសំណាកដី និងថ្ម និងស្វែងយល់បន្ថែមអំពីទីឋាននេះ។ គោលដៅចុងក្រោយរបស់ NASA គឺការសាងសង់មូលដ្ឋាន Artemis នៅលើឋានព្រះចន្ទឱ្យបានមុនដំណាច់ទសវត្សរ៍ 2030 ដែលនេះគឺជាមហិច្ឆតាដ៏ធំសម្បើមមួយទាមទារឱ្យមានជំនួយរាប់ម៉ឺនលានដុល្លារ និងត្រូវការការយល់ព្រមពីប្រធានាធិបតី ក៏ដូចជាសភាអាមេរិកាំង។

នៅក្នុងបេសកកម្ម Artemis III ក្រុមអ្នកជំនាញមានគម្រោងបង្កើតបណ្ដាញវីដេអូ និងទិន្នន័យក្នុងពេលតែមួយដែលភ្ជាប់ពីក្រុមអ្នកអវកាសនៅលើឋានព្រះចន្ទទៅកាន់ក្រុមអ្នកវិទ្យាសាស្ត្រនៅលើផែនដី។ ពួកគេក៏ស្នើឱ្យបង្កើតឧបករណ៍ដែលមានទម្ងន់ស្រាលជាងមុន និងអាចបំពេញភារកិច្ចបានច្រើនជាងមុន។

ក្រៅពីនេះ NASA ក៏នឹងពិនិត្យទៅលើការដំឡើងជាមុននូវឧបករណ៍វិទ្យាសាស្ត្រនៅក្នុងតំបន់ក្បែរខាងនៃទីតាំងចុះចត Artemis III ក្នុងនោះមានដូចជា ឃ្លាំងផ្ទុកសម្ភារសម្រាប់ក្រុមអវកាសចរប្រើប្រាស់ពេលឡើងដល់ឋានព្រះចន្ទ រួមនឹងរ៉ូបូតស្រាវជ្រាវមួយគ្រឿង ឬច្រើនគ្រឿង ដើម្បីតាមដានបរិស្ថាននៅជុំវិញ៕

ប្រភព៖ AFP

December 9, 2020

ក្រសួងរកឃើញករណីវិជ្ជមាននឹង Covid-19 ថ្មី ចំនួន 4នាក់ទៀត ដែលទាក់ទងនឹងព្រឹត្តិការណ៍សហគមន៍28វិច្ឆិកា

នាព្រឹកថ្ងៃទី 9 ធ្នូ ឆ្នាំ 2020 នេះ ក្រសួងសុខាភិបាលកម្ពុជាប្រកាសឱ្យដឹងថា បានរកឃើញអ្នកវិជ្ជមាននឹង Covid-19 ចំនួន 4 នាក់បន្ថែមទៀត នាំឱ្យតួលេខអ្នកឆ្លងវីរុសនេះសរុប ឡើងដល់ 354នាក់។

ក្នុងរយៈពេល 24ម៉ោងចុងក្រោយនេះ កម្ពុជារកឃើញអ្នកឆ្លងវីរុស Covid-19 ថ្មី ចំនួន 4 នាក់ទៀត រួមមាន៖

ទីមួយ គឺបុរសជនជាតិខ្មែរ ឈ្មោះ អិត កុម៉ាល អាយុ 35ឆ្នាំ ស្នាក់នៅសង្កាត់បឹងកេងកង3 ខណ្ឌបឹងកេងកង ទាក់ទងនឹងការឆ្លងនៅហាង Zando បឹងកេងកង។

ទីពីរ គឺបុរសជនជាតិខ្មែរ ឈ្មោះ សន សាន់បញ្ញារិទ្ធ អាយុ 20ឆ្នាំ ស្នាក់នៅភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល ជាបុគ្គលិកហាង Pedro នៅផ្លូវព្រះសីហនុ។

ទីបីគឺ ស្ត្រីជនជាតិខ្មែរ ឈ្មោះ ឡុង សុខនី អាយុ33ឆ្នាំ នៅសង្កាត់ព្រែកឬស្សី ក្រុងតាខ្មៅ ខេត្តកណ្តាល ជាបុគ្គលិកហាង Pedro នៅផ្លូវព្រះសីហនុ។

ទីបួនគឺ បុរសជនជាតិខ្មែរឈ្មោះ ទៅ គឹមហុក អាយុ 27ឆ្នាំ ស្នាក់នៅបឹងទំពន់ ខណ្ឌមានជ័យ រាជធានីភ្នំពេញ ជាអ្នកប៉ះពាល់ជាមួយអ្នកជំងឺ Covid-19 ឈ្មោះ ញិល សុខកូឡា ទាក់ទងនឹងហាង Pedro។

គិតមកដល់បច្ចុប្បន្ន កម្ពុជាបានរកឃើញអ្នកឆ្លងវីរុស Covid-19 សរុបចំនួន 354នាក់ ក្នុងនោះមាន 307នាក់បានជាសះស្បើយ និង 47នាក់កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត និងមណ្ឌលសុខភាពចាក់អង្រែ នារាជធានីភ្នំពេញ៕

December 9, 2020

ផ្ទះស្រោបមាសដ៏ស្រស់ស្អាតមួយខ្នង ទទួលបានភ្ញៀវមកទស្សនាខ្ទង់រយនាក់ជារៀងរាល់ថ្ងៃ

ក្រោយពីចំណាយពេល 6 ឆ្នាំ ក្នុងការគិតគូរ និងសាងសង់ គេហដ្ឋានស្រោបមាសមួយខ្នងដែលស្ថិតក្នុងបរិវេណដីទំហំ 1,500ម៉ែត្រការ៉េ របស់លោក Van Trung កំពុងតែធ្វើឱ្យមហាជនមានការចាប់អារម្មណ៍ជាខ្លាំងនៅទីក្រុង Can Tho។

ថ្មីៗនេះ «ផ្ទះស្រោបមាស» មួយខ្នង ដែលស្ថិតនៅក្នុងទីក្រុង Can Tho ភាគខាងត្បូងប្រទេសវៀតណាម បានក្លាយជាឈ្មោះដែលត្រូវបានគេនិយាយតៗគ្នាពីមាត់មួយទៅមាត់មួយ។ សម្ភារភាគច្រើននៅក្នុងផ្ទះនេះ ត្រូវបានស្រោបពណ៌លឿង នាំឱ្យគេឆ្ងល់ថា «តើនេះត្រូវបានគេស្រោបមាស ឬយ៉ាងណា?»។

ម្ចាស់របស់ផ្ទះពិសេសនេះ គឺលោក Nguyen Van Trung ដែលជាអ្នកជំនួញផ្នែកអចលនទ្រព្យម្នាក់នៅភាគខាងត្បូងប្រទេសវៀតណាម។ លោក Trung និយាយថា គំនិតអំពីផ្ទះនេះត្រូវបានលោកគិតតែងតែពីយូរមកហើយ ប៉ុន្តែ ទើបតែបានចាប់ផ្ដើមធ្វើកាលពី 6ឆ្នាំមុន។ ក្នុងនោះ ផ្ទះធ្វើអំពីឥដ្ឋសេរ៉ាមិច គឺជាចំណុចពិសេសនៅក្នុងហាងកាហ្វេរបស់លោក ដែលស្ថិតក្នុងទីក្រុង Can Tho។

លោក Trung ប្រាប់ថា នេះគឺជាលទ្ធផលដែលបានកើតឡើងពីការសន្សំនូវគំនិតថ្មី ប្លែកៗ ក្នុងគ្រាដែលលោកបានចេញទៅបរទេស។ បច្ចុប្បន្ន ផ្ទះនេះបានចាប់ផ្ដើមបើកទ្វារទទួលភ្ញៀវដែលមកកាន់ហាងកាហ្វេរបស់លោក និងទុកជាអនុស្សាវរីយ៍សម្រាប់ការទស្សនា និងថតរូប។ នៅទីនេះ គេក៏ឃើញមាន «ស្ថាបត្យកម្ម» តាមបែបបទប្រទេសផ្សេងៗ ចាប់ពីអឺរ៉ុប ដល់អាស៊ី។

ម្ចាស់ផ្ទះខាងលើបានបន្ថែមថា ជារៀងរាល់ថ្ងៃ មានមនុស្សមកទស្សនាផ្ទះរបស់លោក ប្រហែលជា 100 នាក់។ ចំណែកថ្ងៃចុងសប្ដាហ៍វិញ គឺមានភ្ញៀវច្រើនណាស់។

លោក Trung បញ្ជាក់ថា ក្រៅពីស្រោបមាស លោកក៏ជ្រើសរើសរុក្ខជាតិប្រណិតៗសម្រាប់តាំងលម្អផ្ទះនេះទៀតផង៕

ប្រភព៖ Soha

December 8, 2020

តៃវ៉ាន់នៅតែត្អូញថា «ខ្លួនរងការគំរាមរាល់ថ្ងៃ» ខណៈអាមេរិកយល់ព្រមលក់អាវុធថ្មី តម្លៃ 280 ដុល្លារមកឱ្យកោះនេះ

តៃវ៉ាន់បាននិយាយថា ខ្លួនត្រូវប្រឈមនឹងការគំរាមកំហែងផ្នែកយោធាជារៀងរាល់ថ្ងៃ នៅក្នុងគ្រាដែលសហរដ្ឋ អាមេរិក ប្រកាសអំពីកិច្ចព្រមព្រៀងជួញដូរអាវុធថ្មីដែលមានតម្លៃ 280លាន ដុល្លារអាមេរិក រវាងទីក្រុងតៃប៉ិ និងទីក្រុងវ៉ាស៊ីងតោន។

ថ្លែងនៅក្នុងកិច្ចប្រជុំសន្តិសុខនៅទីក្រុងតៃប៉ិ ក្នុងថ្ងៃនេះ មេដឹកនាំកោះតៃវ៉ាន់ លោកស្រី Tsai Ing-wen យល់ថា មានកងកម្លាំងមួយចំនួន «តែងតែព្យាយាមរំលោភទៅលើសណ្ដាប់ធ្នាប់ដែលយោងទៅតាមស្ដង់ដាដែលមានស្រាប់។ តៃវ៉ាន់ បាននិងកំពុងទទួលរងការគំរាមកំហែងផ្នែកយោធាដូច្នេះជារៀងរាល់ថ្ងៃ»។

ការថ្លែងរបស់លោកស្រី Tsai ត្រូវបានធ្វើឡើងក្រោយពីរដ្ឋាភិបាលសហរដ្ឋអាមេរិក កាលពីថ្ងៃទី 7ធ្នូ ឱ្យដឹងថា បានជូនដំណឹងទៅសភាអំពីគម្រោងលក់ប្រព័ន្ធទំនាក់ទំនងក្នុងសមរភូមិថ្មី តម្លៃ 280 លានដុល្លារអាមេរិក ទៅឱ្យកោះតៃវ៉ាន់។ នេះគឺជាកិច្ចព្រមព្រៀងលក់ដូរអាវុធលើកទី 6 រវាងសហរដ្ឋអាមេរិក និងកោះតៃវ៉ាន់ នៅក្នុងឆ្នាំនេះ ហើយវាក៏ជាការលក់ដូរអាវុធលើកទី 11 រវាងទីក្រុងតៃប៉ិ និងទីក្រុងវ៉ាស៊ីងតោន នៅក្នុងអាណត្តិប្រធានាធិបតី Donald Trump ផងដែរ។

ភាគីខាងតៃវ៉ាន់បានឱ្យដឹងថា កិច្ចព្រមព្រៀងថ្មីនេះបង្ហាញថា សហរដ្ឋអាមេរិកមិនបានប្ដូរផ្លាស់នូវអ្វីដែលបានសន្យាក្នុងការជួយការពារកោះនេះពីសត្រូវ។

Kurt Campbell ដែលជាអ្នកការទូតកំពូលម្នាក់របស់សហរដ្ឋអាមេរិក ទទួលបន្ទុកតំបន់អាស៊ីខាងកើតក្នុងសម័យលោក Barack Obama ហើយបច្ចុប្បន្នជាទីប្រឹក្សារបស់លោក Biden បានអះអាងថា ទាំងបក្សសាធារណរដ្ឋ ទាំងបក្សប្រជាធិបតេយ្យ សុទ្ធតែគាំទ្រយ៉ាងខ្លាំងក្លាដល់កោះតៃវ៉ាន់។

«មានមនុស្សជាច្រើននៅក្នុងបក្សនយោបាយ បានយល់អំពីអត្ថន័យជាយុទ្ធសាស្ត្រជ្រាលជ្រៅ និងផលប្រយោជន៍ជាយុទ្ធសំខាន់របស់យើង នៅក្នុងការរក្សាទំនាក់ទំនងល្អជាមួយនឹងតៃវ៉ាន់» លោក Kurt Campbell ថ្លែងបែបនេះ។

កិច្ចព្រមព្រៀងលក់អាវុធទៅឱ្យកោះតៃវ៉ាន់ពីសំណាក់សហរដ្ឋអាមេរិកកន្លងមក តែងតែធ្វើឱ្យចិនមានការក្ដៅក្រហាយ និងនាំឱ្យចិនដាក់ទណ្ឌកម្មទៅលើក្រុមហ៊ុនអាមេរិកាំងមួយចំនួនដែលពាក់ព័ន្ធ។ ក្រៅពីនេះ ចិនក៏មិនភ្លេចបញ្ជូននាវាចម្បាំងទៅកាន់តំបន់ក្បែរកោះតៃវ៉ាន់ផងដែរ ដើម្បីគំរាមកោះនេះ។ ប្រទេសចិន តែងតែចាត់ទុកកោះតៃវ៉ាន់ជាខេត្តមួយដែលមិនអាចកាត់ផ្ដាច់ចេញពីប្រទេសចិន ហើយកោះនេះនឹងត្រូវវិលត្រលប់មកជារបស់ចិនវិញនាពេលខាងមុខ បើទោះជាត្រូវប្រើកម្លាំងបាយក៏ដោយ៕

ប្រភព៖ Reuters

December 8, 2020

Covid-19! ត្រូវពិន័យ 100,000ដុល្លារ ព្រោះតែចេញពីបន្ទប់ចត្តាឡីស័ក 8 វិនាទី

បុរសជនជាតិហ្វីលីពីនម្នាក់ ត្រូវបានអាជ្ញាធរតៃវ៉ាន់ពិន័យជាប្រាក់ចំនួន 3,500ដុល្លារអាមេរិក ដោយសារតែបានបំពានការកំណត់ស្ដីអំពីការធ្វើចត្តាឡីស័ក បើទោះជាបុរសនេះនៅខាងក្រៅបន្ទប់ត្រឹមតែ 8 វិនាទី។

បុរសម្នាក់ជាពលករមកពីប្រទេសហ្វីលីពីន ដែលកំពុងធ្វើចត្តាឡីស័កនៅក្នុងសណ្ឋាគារមួយក្នុងទីក្រុង Kaohsiung នៃកោះតៃវ៉ាន់ ត្រូវបានពិន័យ ដោយសារតែបានចាកចេញពីបន្ទប់របស់ខ្លួន និងទៅឈរក្បែរផ្លូវដើរ ក្បែរនោះ នេះបើតាមមន្ទីរសុខាភិបាល។

បន្ទាប់ពីបានឃើញ «ហេតុការណ៍» នេះតាមរយៈកាមេរ៉ាសន្តិសុខ បុគ្គលិកសណ្ឋាគារក៏បានទាក់ទងទៅកាន់មន្ទីរសុខាភិបាល នាំឱ្យបុរសនេះត្រូវរងការពិន័យជាទឹកប្រាក់រហូតដល់ 100,000ដុល្លារតៃវ៉ាន់ (ប្រហែល 3,500ដុល្លារអាមេរិក) បើទោះជាបុរសនេះនៅខាងក្រៅបន្ទប់ត្រឹមតែ 8 វិនាទីក៏ដោយ។

យោងតាមការកំណត់ស្ដីអំពីការទប់ស្កាត់ Covid-19 របស់តៃវ៉ាន់ អ្នកដែលកំពុងធ្វើចត្តាឡីស័ក មិនត្រូវបានអនុញ្ញាតឱ្យចាកចេញពីបន្ទប់ឡើយ ទោះជាក្នុងរយៈពេលប៉ុន្មានវិនាទីក៏ដោយ។ នៅក្នុងទីក្រុង Kaohsiung សណ្ឋាគារចំនួន 56 កន្លែង កំពុងត្រូវបានប្រើប្រាស់ជាកន្លែងសម្រាប់ធ្វើចត្តាឡីស័ក ក្នុងនោះ មានបន្ទប់សរុបប្រមាណ 3,000 បន្ទប់។

សារព័ត៌មាន Taiwan News បានចេញផ្សាយថា បុរសដែលត្រូវបានពិន័យខាងលើ បានធ្វើចត្តាឡីស័កអស់រយៈពេល 5 ថ្ងៃ ហើយបានចេញពីបន្ទប់ដើម្បីយករបស់ទៅឱ្យមិត្តភក្ដិដែលនៅក្នុងបន្ទប់ក្បែរនោះ។

តៃវ៉ាន់ ត្រូវបានគេសរសើរច្រើន ដោយសារតែមានវិធានការយ៉ាងឆាប់រហ័សក្នុងការគ្រប់គ្រង Covid-19។ កោះនេះមិនដែលបានដាក់បម្រាមគោចរតឹងរ៉ឹង ឬកាត់បន្ថយសិទ្ធិសេរីភាពរបស់ពលរដ្ឋម្ដងណានៅឡើយ។ ជំនួសមកវិញ អាជ្ញាធរកោះនេះ ផ្ដោតសំខាន់ទៅលើល្បឿននៃប្រតិកម្មរបស់ភាគីពាក់ព័ន្ធ។ អាជ្ញាធរកោះតៃវ៉ាន់ ក៏បានវិនិយោគទៅលើកិច្ចការធ្វើតេស្តតាមបែបចល័ត និងការតាមរកអ្នកពាក់ព័ន្ធ ប្រកបដោយភាពរហ័សរហួន និងប្រសិទ្ធភាព។

គិតមកដល់បច្ចុប្បន្ន តៃវ៉ាន់បានរកឃើញអ្នកឆ្លងវីរុស Covid-19 សរុប 718នាក់ ក្នុងនោះមាន 7នាក់បានស្លាប់ និង 582នាក់បានជាសះស្បើយ នេះបើតាមគេហទំព័រ Worldometers៕

ប្រភព៖ CNN, Worldometers

December 8, 2020

TikTok បានជួយឱ្យអ្នកលេងវ័យ 20ឆ្នាំម្នាក់ ក្លាយជាសេដ្ឋី

TikTok គឺជាបណ្ដាញសង្គមមួយក្នុងចំណោមបណ្ដាញសង្គមដែលមានអ្នកប្រើប្រាស់ច្រើនជាងគេបង្អស់នាបច្ចុប្បន្ន ហើយវាកំពុងតែក្លាយជាឱកាសសម្រាប់ការរកប្រាក់របស់យុវវ័យ តាមរយៈចំណង់ចំណូលចិត្តផ្ទាល់ខ្លួន។

យោងតាមស្ថិតិពី TikTok ក្នុងចំណោមជនជាតិអាមេរិកាំង3នាក់ដែលប្រើស្មាតហ្វូន គឺមានម្នាក់ប្រើប្រាស់បណ្ដាញសង្គម TikTok។ ដោយសារមូលហេតុនេះហើយ បើទោះជាមានការព្រមានទាក់ទងនឹងសន្តិសុខជាតិនៅសហរដ្ឋអាមេរិក ក្រុមហ៊ុនផ្សាយពាណិជ្ជកម្មជាច្រើននៅតែចាត់ទុក TikTok ជាកន្លែងដ៏ល្អដើម្បីធ្វើការឃោសនាផលិតផល។

ជាមួយនឹងអ្នកប្រើប្រាស់ប្រចាំខែប្រមាណជា 690លាននាក់នៅទូទាំងពិភពលោក បណ្ដាញសង្គម TokTok ត្រូវបានក្រុមអ្នកផលិតវីដេអូវាយតម្លៃថា មិនមានគូប្រជែងនៅលើទីផ្សារ បើគេពិនិត្យទៅលើលទ្ធភាពនៃការ «សាយភាយ» តួលេខអ្នកតាមដាន និងឱកាសអភិវឌ្ឍអាជីព។ TikTok ក្លាយជាផ្ទះថ្មីដែលបើកផ្លូវឱ្យក្រុមមនុស្សដែលមានឥទ្ធិពលបានរីកចម្រើន ពិសេសគឺក្រុមមនុស្សដែលមានឈ្មោះល្បីនៅលើ Youtube និង Instagram។

Michael Le អាយុ 20ឆ្នាំ ដែលចូលចិត្តបង្ហោះវីដេអូរាំកំសាន្តនៅលើ TikTok ទទួលបានការតាមដានពីអ្នកលេងបណ្ដាញសង្គមនេះចំនួន 42.5លាននាក់ និងមានអ្នកចុចចូលចិត្តជាង 1.2ពាន់លានលើក។ ថ្មីៗនេះ Michael Le បានទិញផ្ទះមួយខ្នងនៅ Los Angeles បន្ទាប់ពីបានរើមកពី Florida។

បច្ចុប្បន្ន Michael Le រស់នៅ និងធ្វើការជាមួយសមាជិក 7នាក់ផ្សេងទៀតនៅក្នុងក្រុមរបស់ខ្លួន រួមមាន ម្ដាយ និងប្អូនៗរបស់គាត់។ Michael Le ប្រាប់ថា៖ «ខ្ញុំមានអារម្មណ៍ថា មានសុវត្ថិភាពផ្នែកហិរញ្ញវត្ថុ។ ខ្ញុំគិតថា ខ្លួនបានជ្រើសរើសផ្លូវដែលឆ្លាតវៃ។ បច្ចុប្បន្ន ប្រាក់របស់ខ្ញុំបានឡើងដល់ 7ខ្ទង់»។

ប្រភពចំណូលចម្បងរបស់ Michael Le គឺបានមកពីទំនាក់ទំនងជាដៃគូនៅលើ TikTok ជាមួយនឹងចំណូលចាប់ពី 20,000 ដល់ 50,000ដុល្លារអាមេរិកសម្រាប់ការបង្ហោះអត្ថបទផ្សាយពាណិជ្ជកម្មមួយនៅលើទំព័រ TikTok។ Michael Le ធ្លាប់បានសហការជាមួយក្រុមហ៊ុនមួយចំនួន ដូចជា Amazon Prime Video, Bliss Skincare, Bang Energy, Postmate, Safeguard Soap និង Tums ផងដែរ។

Michael Le និយាយថា៖ «នោះពិតជារឿងដ៏ចៃដន់ សម្រាប់ក្រុមហ៊ុនណាដែលសម្រេចចិត្តសហការជាមួយខ្ញុំ។ ខ្ញុំពិតជាមានទឹកចិត្តបើកទូលាយជាមួយនឹងគ្រប់យ៉ាង។ ក្រុមហ៊ុនមួយដែលចង់ផ្សាយពាណិជ្ជកម្ម ខ្ញុំតែងផ្ដល់យោបល់ដល់ពួកគេ។ បើពួកគេនៅតែសម្រេចចិត្តជ្រើសរើសតាមផែនការដំបូង ពេលនោះ ខ្ញុំអាចនឹងយកថ្លៃខ្ពស់ជាងធម្មតា។ ក៏ប៉ុន្តែ បើសិនជាមានប្រការអ្វីមួយដែលមានលក្ខណបង្ខិតបង្ខំខ្លាំងពេកចំពោះខ្ញុំ ពេលនោះខ្ញុំនឹងមិនធ្វើឡើយ»។

ចំនួនអ្នកតាមដានកាន់តែច្រើន ប្រាក់ដែលរកបានពីការផ្សាយពាណិជ្ជកម្មក៏កាន់តែខ្ពស់។ ទំនាក់ទំនងរវាងក្រុមអ្នកផលិតវីដេអូ និងក្រុមហ៊ុនផ្សាយពាណិជ្ជកម្ម នាំមកនូវប្រយោជន៍រួម ពិសេស ចំពោះក្រុមហ៊ុន ឬយីហោចាស់។ ក្នុងករណីនេះ Michael Le បានឧទ្ធេសនាមក្រុមហ៊ុនផលិតភេសជ្ជប៉ូវកម្លាំង Bang Energy នៅលើបណ្ដាញសង្គម TikTok ក្រោយការធ្វើសកម្មភាពជាច្រើនឆ្នាំនៅលើបណ្ដាញសង្គម Youtube។

Evan Horowitz នាយកក្រុមហ៊ុនច្នៃប្រឌិត Movers + Shakers ដែលមានទីស្នាក់ការកណ្ដាលនៅទីក្រុង Los Angeles សហរដ្ឋអាមេរិក ឱ្យដឹងថា៖ «TikTok គឺជាបណ្ដាញសង្គមសម្រាប់មនុស្សជំនាន់ Z ដោយអ្នកលេងភាគច្រើនគឺមានអាយុក្រោម 18ឆ្នាំ។ ដូច្នេះហើយ ឱកាសធ្វើការជាមួយនឹងយីហោមួយជាលើកដំបូង គឺពិតជានឹងគួរឱ្យចងចាំ»។

បច្ចុប្បន្ន Michael Le មិនមែនជាម្ចាស់គណនី TikTok ដែលមានអ្នកតាមដានច្រើនជាងគេនៅក្នុងបណ្ដាញសង្គមរបស់ចិននេះទេ។ នារីចំទង់ វ័យ 16ឆ្នាំ ឈ្មោះ Charli D’Amelio ដែលមានទីលំនៅនៅ Los Angeles ទើបជាម្ចាស់គណនី TikTok ដែលមានអ្នកតាមដានច្រើនជាងគេបង្អស់៕

ប្រភព៖ Yahoo Finance

December 8, 2020

Author: សឿន សំណាង