សឿន សំណាង - La Reine Media

អនុសាសន៍របស់មហាសេដ្ឋីលំដាប់ទីពីរក្នុងលោក៖ CEO គួរតែកាត់បន្ថយកិច្ចប្រជុំដែលស៊ីពេលច្រើន

មហាសេដ្ឋីលំដាប់ទីពីរក្នុងពិភពលោក យល់ថា CEO គួរតែចំណាយពេលវេលាឱ្យបានច្រើនជាងមុនទៅលើការកែលម្អផលិតផល និងស្វែងរកមតិអវិជ្ជមាន ពី ខាងក្រៅ ទន្ទឹមនឹងការកាត់បន្ថយពេលវេលាទៅលើកិច្ចប្រជុំផ្ទៃក្នុង។

នៅក្នុងព្រឹត្តិការណ៍ CEO Summit ដែលត្រូវបានធ្វើឡើងដោយ Wall Street Journal កាលពីថ្ងៃទី 8ធ្នូ លោក Elon Musk បានឱ្យដឹងថា ការលើកកម្ពស់គុណភាពផលិតផលគឺជាបញ្ហាស្លាប់រស់ ដូច្នេះ CEO គួរតែកាត់បន្ថយពេលវេលាសម្រាប់បញ្ហាផ្សេងៗពីនេះ។ ពួកគេគួរចំណាយពេលឱ្យបានច្រើនបន្ថែមទៀតដើម្បីធ្វើឱ្យផលិតផលរបស់ក្រុមហ៊ុនមានភាពអស្ចារ្យតាមដែលអាចធ្វើទៅបាន។

មហាសេដ្ឋីអាមេរិកាំងដើមកំណើតអាហ្វ្រិកខាងត្បូងរូបនេះបានជូនជាអនុសាសន៍ថា បណ្ដា CEO គួរផ្ដោតទៅលើការបង្កើតផលិតផលឱ្យបានកាន់តែល្អជាងមុន ដោយការចំណាយពេលត្រួតពិនិត្យការងារនៅឯរោងចក្រ និងទាក់ទំនងជាមួយអតិថិជន រួមនឹងការកាត់បន្ថយពេលវេលាសម្រាប់កិច្ចប្រជុំ ឬបទបង្ហាញនានាដែលស៊ីពេលច្រើន។

ស្ថាបនិកក្រុមហ៊ុន SpaceX បានអះអាងថា៖ «តើក្រុម CEO នៃបណ្ដាក្រុមហ៊ុនអាមេរិក បានយកចិត្តទុកដាក់ដល់កម្រិតហើយឬនៅ ទៅលើការកែលម្អផលិត? ខ្ញុំគិតថា ចម្លើយគឺ នៅ»។

CEO របស់ Tesla និង SpaceX រូបនេះ យល់ថា សូម្បីតែមេដឹកនាំក្រុមហ៊ុនម្នាក់ដែលមិនមានជំនាញខាងច្នៃប្រឌិតលើផលិតផល ពួកគេនៅតែអាចរៀនបាន ព្រោះថា នេះគឺជាជំនាញ និងស្ថិតក្នុងលទ្ធភាពរបស់មនុស្សម្នាក់។ ជំហានដំបូងបង្អស់ដែលប្រកបដោយភាពសាមញ្ញ នោះគឺ មិនបោះបង់ការតស៊ូ។

អនុសាសន៍របស់មហាសេដ្ឋីលំដាប់ទីពីរក្នុងលោក៖ CEO គួរតែកាត់បន្ថយការប្រជុំដែលស៊ីពេលច្រើន — លោក Elon Musk ថា CEO គួរតែកាត់បន្ថយការប្រជុំដែលស៊ីពេលច្រើន

លោក Musk ថ្លែងថា៖ «បើសិនជាអ្នកប្រឹងប្រែងមិនទាន់ដល់កម្រិត ចូរខំព្យាយាមបន្ថែមទៀត។ រូបមន្តនៃភាពជោគជ័យគឺ មិនមានអ្វីជាអាថ៌កំបាំងឡើយ»។

គោលដៅចុងក្រោយរបស់ CEO នោះគឺ ការក្លាយទៅជាមនុស្សម្នាក់ «ដែលយល់ច្បាស់ជាទីបំផុតអំពីផលិត ឬសេវាកម្មដែលពួកគេកំពុងមាន ក៏ដូជាការស្វែងរកមតិអវិជ្ជមានឱ្យបានគ្រប់ជ្រុងជ្រោយពីអតិថិជន និងពីក្រុមមនុស្សដែលមិនមែនជាអតិថិជន» នេះបើតាមលោក Elon Musk។

មហាសេដ្ឋីវ័យ 49 ឆ្នាំ ក៏បានជំរុញឱ្យ CEO ថយក្រោយមួយជំហានដើម្បីអាចមើលឃើញ «ទិដ្ឋភាព» ទាំងមូល និងសួរខ្លួនឯងថា «តើផលិតផលដែលខ្លួនបានបង្កើតឡើង ពិតជាល្អឥតខ្ជោះហើយ ឬនៅ? ប្រហែលជានៅឡើយទេ។ ដូច្នេះ តើយើងត្រូវធ្វើអ្វីខ្លះដើម្បីឱ្យផលិតផលរបស់យើងអស្ចារ្យជាងមុន?»។

បច្ចុប្បន្ន មានក្រុមហ៊ុនមិនតិចនោះទេដែលយល់ថា បើទោះជាពួកគេមិនចូលចិត្តផលិតផលដែលខ្លួនបានបង្កើតឡើង ប៉ុន្តែអ្នកផ្សេងអាចនឹងយល់ផ្ទុយពីនេះ អតិថិជនប្រហែលជាចូលចិត្ត។ មហាសេដ្ឋី Elon Musk បញ្ជាក់ថា៖ «គ្រប់យ៉ាងនឹងមិនកើតឡើងយ៉ាងដូច្នេះឡើយ។ បើសិនជាអ្នកមិនស្រលាញ់ផលិតផលដែលខ្លួនអ្នកបានបង្កើតឡើងទេ ចូរកុំស្រមៃថា អ្នកផ្សេងនឹងចាប់អារម្មណ៍លើផលិតផលនេះឱ្យសោះ»។

និយាយអំពីបទពិសោធន៍ ក្រៅពីជា CEO របស់ក្រុមហ៊ុនអវកាស SpaceX និងក្រុមហ៊ុនផលិតរថយន្តអគ្គិសនី Tesla លោក Elon Musk ក៏បានបង្កើតក្រុមហ៊ុន Boring Company និងជាសហស្ថាបនិករបស់ក្រុមហ៊ុន OpenAI និង Neuralink ផងដែរ។ លោកបានឆ្លងកាត់ឧបសគ្គជាច្រើននៅក្នុងការរកស៊ី។ ក្នុងកិច្ចសម្ភាសនៅលើទូរទស្សន៍ CBS លោក Musk បានថ្លែងថា៖ «ឆ្នាំ 2008 គឺជាឆ្នាំអាក្រក់បំផុតក្នុងជីវិតរបស់ខ្ញុំ ដោយសារតែពេលនោះ Tesla បានជួបនឹងការខាតបង់ច្រើន ចំណែក SpaceX ក៏បរាជ័យក្នុងការបាញ់បង្ហោះរ៉ុកកែត Falcon 1 ហើយខ្ញុំក៏ត្រៀមលែងលះជាមួយប្រពន្ធ»។

ក៏ប៉ុន្តែ 12 ឆ្នាំក្រោយ ក្រុមហ៊ុនទាំងឡាយរបស់លោក Elon Musk សុទ្ធតែបានបោះជំហានដល់គោលដៅសំខាន់ៗជាបន្តបន្ទាប់ ក្នុងនោះមានដូចជា ការសហការរវាង SpaceX នឹង NASA ក្នុងការបាញ់បង្ហោះយានអវកាសដែលដឹកអ្នកអវកាសចរដំបូងឡើងទៅកាន់ទីអវកាសទទួលបានជោគជ័យ ឬតម្លៃទីផ្សាររបស់ក្រុមហ៊ុន Tesla កើនឡើងដល់ 500ពាន់លានដុល្លារអាមេរិកជាដើម៕

ប្រភព៖ Business Insider

December 14, 2020

ព្រោះតែធ្វើដំណើរទៅតាម Google Maps យុវជនវ័យ 18ឆ្នាំបាត់បង់ជីវិតដ៏គួរឱ្យសង្វេគ នៅក្នុងអាកាសធាតុត្រជាក់ -50អង្សាសេ

ក្រុមប៉ូលិសនៅរុស្ស៊ី បានរកឃើញសាកសពមនុស្សម្នាក់ដែលបានស្លាប់ដោយសារអាកាសធាតុត្រជាក់ខ្លាំង ព្រោះតែបានជាប់គាំងនៅលើដងផ្លូវដែលគ្របដណ្ដប់ពេញដោយព្រឹល។ ក្រោយពីការស្រាវជ្រាវ ទើបអាជ្ញាធរបានដឹងថា មូលហេតុដែលនាំឱ្យមានករណីស្លាប់នេះ គឺព្រោះតែយោបល់របស់កម្មវិធីនាំផ្លូវនៅលើទូរស័ព្ទ។

យោងតាមទំព័រ The Sun យុវវ័យអាយុ 18ឆ្នាំម្នាក់ ឈ្មោះ Sergey Ustinov រួមនឹងមិត្តភក្ដិម្នាក់ ឈ្មោះ Vladislav Istomin បាននាំគ្នាដើរលេងផ្លូវឆ្ងាយ និងបានជួបគ្រោះថ្នាក់។ ពួកគេទាំងពីរ បានធ្វើដំណើរពី Yakutsk ទៅកាន់កំពង់ផែ Magadan នៅភាគឦសាននៃប្រទេសរុស្ស៊ី។

ដោយសារតែជាលើកដំបូងនៅក្នុងការធ្វើដំណើរផ្លូវឆ្ងាយ យុវជនទាំងពីរនេះ បានបើកបររថយន្តទៅតាមការណែនាំរបស់ Google Maps។ Google Maps បានណែនាំអំពីផ្លូវកាត់ ហើយ Sergey ក៏បានធ្វើដំណើរតាមដូចសព្វមួយដង។ ក៏ប៉ុន្តែ ទាំង Sergey ទាំង Google Maps សុទ្ធតែមិនបានដឹងថា ផ្លូវនេះជាផ្លូវនាំទៅរក «ជ្រោះមរណៈ» នោះទេ។

Google Maps បានណែនាំឱ្យយុវជនទាំងពីររូបនេះ ធ្វើដំណើរទៅតាមផ្លូវល្បឿនលឿន ឈ្មោះថា Kolyma ដែលល្បីថា ជាផ្លូវត្រជាក់បំផុតក្នុងពិភពលោក។ ផ្លូវនេះ ត្រូវបានគេហៅថា Road of Bones (ផ្លូវរបស់ឆ្អឹង)។ ផ្លូវនេះស្ថិតនៅក្នុងតំបន់ដែលមានអាកាសធាតុត្រជាក់ខ្លាំង រហូតដល់ថ្នាក់បានសម្លាប់មនុស្សប្រមាណ 250,000 នៅក្នុងអំឡុងពេលកំពុងស្ថាបនា។

ធ្វើដំណើរតាម Google Maps យុវជនវ័យ 18ឆ្នាំបាត់បង់ជីវិតដ៏គួរឱ្យសង្វេគ នៅក្នុងអាកាសធាតុត្រជាក់ -50អង្សាសេ — យុវវ័យអាយុ 18ឆ្នាំ ឈ្មោះ Sergey Ustinov (ឆ្វេង) រួមនឹងមិត្តភក្ដិ ឈ្មោះ Vladislav Istomin

ពលរដ្ឋមួយចំនួនដែលចូលចិត្តទេសចរណ៍បែបផ្សងព្រេង ថែមទាំងបានចាត់ទុកដងផ្លូវ Kolyma នេះ ជាទីតាំងប្រកបដោយភាពទាក់ទាញ ប៉ុន្តែ មានមនុស្សតិចណាស់ដែលហ៊ានមកកាន់ទីនេះ។ ការធ្វើដំណើរទេសចរណ៍មកកាន់តំបន់ខាងលើនេះ មិនត្រូវបានគេលើកទឹកចិត្តឡើយ បើទោះក្រោមរូបភាពណាក៏ដោយ។

ភាពគ្រោះថ្នាក់របស់ផ្លូវនេះ បាននាំឱ្យរដ្ឋាភិបាលរុស្ស៊ី បិទដំណើរការតាំងពីទសវត្សរ៍ទី 70 នៃសតវត្សរ៍មុន។ ប្រជាជនក្នុងតំបន់ សុទ្ធតែបានដឹងអំពីគ្រោះថ្នាក់នេះ និងតែងតែធ្វើដំណើរវាងតាមផ្លូវដទៃ បើទោះវាឆ្ងាយជាងការធ្វើដំណើរតាមផ្លូវនេះ ប្រហែល 200គីឡូម៉ែត្រក៏ដោយ។ ក៏ប៉ុន្តែ គួរឱ្យស្ដាយ Google Maps និងអ្នកដំណើរពីចម្ងាយដូចជា Sergey និង Vladislav មិនបានដឹងអំពីប្រការនេះ។

នៅពេលត្រូវបានរកឃើញ Sergey បានស្លាប់នៅខាងក្នុងរថយន្ត ដោយសារអាកាសធាតុត្រជាក់។ ចំណែក Vladislav នៅមានជីវិត ប៉ុន្តែកំពុងស្ថិតក្នុងស្ថានភាពគ្រោះថ្នាក់ដល់ជីវិត ព្រោះតែអវយវៈបានស្ពឹក និងហាក់ពិការទៅហើយ។

ក្នុងរយៈពេល 1សប្ដាហ៍ដែលជាប់គាំងក្នុងព្រឹលលើដងផ្លូវ យុវជនទាំងពីររូបនេះ បានតស៊ូដើម្បីរស់ ដោយការព្យាយាមស្វែងរកឧសក្បែរផ្លូវដើម្បីដុតយកកំដៅ។ ពួកគេថែមទាំងដុតកង់ឡានទៀតផងដើម្បីរក្សាជីវិត។ ទូរស័ព្ទរបស់ពួកគេក៏លែងដំណើរការ ដោយក៏ព្រោះតែអាកាសធាតុត្រជាក់ដល់ -50 អង្សាសេ៕

ប្រភព៖ The Sun

December 14, 2020

ការបោះឆ្នោតផ្ទាល់ដើម្បីជ្រើសរើសប្រធានាធិបតីអាមេរិក ពីសំណាក់ក្រុមតំណាងម្ចាស់ឆ្នោត នឹងធ្វើឡើងនៅក្នុងថ្ងៃនេះ

តំណាងម្ចាស់ឆ្នោតរបស់អាមេរិក ចំនួន 538 រូប នឹងចូលរួមបោះឆ្នោតនៅក្នុងថ្ងៃទី 14ធ្នូ ឆ្នាំ2020នេះ ដើម្បីទទួលស្គាល់ជាផ្លូវការនូវជ័យជំនះរបស់លោក Joe Biden និងទាត់ចោលរាល់ការប្រឹងប្រែងផ្លាស់ប្ដូរលទ្ធផលបោះឆ្នោតពីសំណាក់លោក Donald Trump។

ក្រុមអ្នកតំណាងម្ចាស់ឆ្នោតរបស់សហរដ្ឋអាមេរិក ក្នុងនោះក៏មានអ្នកនយោបាយល្បីឈ្មោះជាច្រើនរូប មានដូចជាគូស្វាមីភរិយាលោក Bill និង Hillary Clinton ជាដើម នឹងជួបជុំគ្នានៅឯវិមានសភារបស់រដ្ឋចំនួន 50 និងរដ្ឋធានីវ៉ាស៊ីងតោន ដើម្បីបោះឆ្នោតបញ្ជាក់ដោយផ្ទាល់សម្រាប់ការជ្រើសរើសប្រធានាធិបតី។ បេក្ខភាពដែលទទួលបានសំឡេងឆ្នោតយ៉ាងតិច 270 សំឡេង ពីក្រុមអ្នកតំណាងម្ចាស់ឆ្នោតនេះ នឹងក្លាយជាប្រធានាធិបតីបន្ទាប់របស់សហរដ្ឋអាមេរិក។

យោងតាមការកំណត់របស់ច្បាប់ ក្រុមអ្នកតំណាងម្ចាស់ឆ្នោតនឹងបោះឆ្នោតទៅតាមលទ្ធផលនៃការបោះឆ្នោតទូទៅរបស់បណ្ដារដ្ឋនៃប្រទេសនេះ ដើម្បីទទួលស្គាល់ជាផ្លូវការនូវជ័យជំនះរបស់បេក្ខភាពនៅក្នុងការបោះឆ្នោតសកលកាលពីខែវិច្ឆិកាកន្លងទៅ។ មុននេះ រដ្ឋចំនួន 50 របស់សហរដ្ឋអាមេរិក បានទទួលស្គាល់រួចហើយនូវលទ្ធផលនៃការបោះឆ្នោតសកលនេះ ដោយសារសំឡេងគាំទ្រភាគច្រើនបានទៅលើបេក្ខភាព Joe Biden។

តាមការគន់គូរ បេក្ខភាពលោក Joe Biden ទទួលបានសន្លឹកឆ្នោតនៃតំណាងម្ចាស់ឆ្នោត ចំនួន 306 សំឡេង ខណៈដែលលោកប្រធានាធិបតី Donald Trump ទទួលបាន 232 សំឡេង។ យោងតាមការកំណត់ដែលត្រូវបានធ្វើឡើងកាលពីការបោះឆ្នោតដំបូងក្នុងឆ្នាំ 1789 ការបោះឆ្នោតរបស់ប្រតិភូតំណាងម្ចាស់ឆ្នោតនៅថ្ងៃទី 14 ខែធ្នូនេះ គឺជាដំណាក់កាលផ្លូវការដែលលោក Biden នឹងក្លាយជាប្រធានាធិបតីជាប់ឆ្នោតទី 46 របស់សហរដ្ឋអាមេរិក។

ការបោះឆ្នោតរបស់ក្រុមតំណាងម្ចាស់ឆ្នោតក្នុងថ្ងៃនេះ ក៏នឹងជាយន្តការមួយដែលនឹងទាត់ចោលរាល់ការប្រឆាំងជំទាស់នឹងលទ្ធផលបោះឆ្នោតនៅសហរដ្ឋអាមេរិក ពីសំណាក់លោក Trump។ តាមធម្មតា ការបោះឆ្នោតនេះគ្រាន់តែជានិមិត្តរូបប៉ុណ្ណោះ និងមិនត្រូវបានគេចាប់អារម្មណ៍ឡើយ ក៏ប៉ុន្តែ សម្រាប់ការបោះឆ្នោតលើកនេះ ការបោះឆ្នោតរបស់ក្រុមតំណាងម្ចាស់ឆ្នោត ត្រូវបានគេតាមដានដោយយកចិត្តទុកដាក់ ព្រោះតែវាដើរតួនាទីសំខាន់ នៅចំពោះមុខការមិនព្រមទទួលស្គាល់បរាជ័យពីសំណាក់លោក Donald Trump។

ក្រុមរបស់លោក Trump បានដាក់ពាក្យបណ្ដឹងរាប់សិបករណីទៅកាន់រដ្ឋជាច្រើន រួមនឹងទៅកាន់តុលាការផងដែរ ដើម្បីប្រឆាំងនឹងលទ្ធផលនៃការបោះឆ្នោត និងទាមទារឱ្យមានការរាប់សន្លឹកឆ្នោតឡើងវិញ។ ក៏ប៉ុន្តែ ក្រុមចៅក្រមតុលាការនៅថ្នាក់រដ្ឋ និងថ្នាក់ជាតិ រួមនឹងតុលាការកំពូល ភាគច្រើនសុទ្ធតែបានច្រានចោលបណ្ដឹងរបស់ក្រុមលោក Trump។

ទោះជាយ៉ាងណាក៏ដោយ លោក Donald Trump នៅតែមិនព្រមបោះបង់ការប្រឆាំងតវ៉ារបស់ខ្លួន និងបានបង្ហោះសារនៅលើបណ្ដាញសង្គម Twitter ថា «យើងទើបតែចាប់ផ្ដើមការប្រយុទ្ធប៉ុណ្ណោះ»៕

ប្រភព៖ Guardian

December 14, 2020

WHO ថា វ៉ាក់សាំងជិត 1 ពាន់លានដូស ត្រូវបានបញ្ជាទិញរួចហើយ សម្រាប់ផ្គត់ផ្គង់ដល់បណ្ដាប្រទេសក្រីក្រ

គិតមកដល់ព្រឹកថ្ងៃទី 14ធ្នូ ឆ្នាំ2020នេះ ពិភពលោកទាំងមូលបានរកឃើញអ្នកវិជ្ជមាននឹង Covid-19 សរុបចំនួន 72,638,964នាក់ ក្នុងនោះមានអ្នកជំងឺចំនួន 1,618,750 នាក់បានស្លាប់ និង 50,859,438 នាក់បានជាសះស្បើយ ខណៈ 20,160,776 នាក់កំពុងទទួលការព្យាបាលដោយសារបានឆ្លងវីរុសនេះ។

ដោយឡែក កម្ពុជា បច្ចុប្បន្នមានអ្នកឆ្លងវីរុស Covid-19 សរុបចំនួន 359នាក់ ក្នុងនោះមានអ្នកជាសះស្បើយចំនួន 309នាក់ និង 50នាក់ផ្សេងទៀតកំពុងសម្រាកព្យាបាលនៅមន្ទីរពេទ្យ។ ក្នុងរយៈពេល 24ម៉ោងចុងក្រោយនេះ កម្ពុជាមានអ្នកជំងឺចំនួន 2នាក់ បានជាសះស្បើយ និងមិនមានអ្នកវិជ្ជមានថ្មីនោះទេ។

ប្រធានអង្គការសុខភាពពិភពលោក (WHO) លោក Tedros Adhanom Ghebreyesus កាលពីថ្ងៃទី 12ធ្នូ បានឱ្យដឹងថា វ៉ាក់សាំងដែលមានសក្ដានុពលជិត1ពាន់លានដូស ត្រូវបានបញ្ជាទិញជាមុន (pre-order) រួចហើយ ដើម្បីធានាឱ្យបានប្រាកដថា បណ្ដាប្រទេសដែលមានប្រាក់ចំណូលទាប និងមធ្យម នឹងទទួលបានការផ្គត់ផ្គង់គ្រប់គ្រាន់ទៅតាមកម្មវិធី COVAX។

COVAX គឺជាកម្មវិធីដែលត្រូវបានបង្កើតឡើងដំបូងដោយអង្គការសុខភាពពិភពលោក ដោយមានគោលដៅបែងចែកវ៉ាក់សាំង Covid-19 ឱ្យបានរហ័ស និងស្មើភាពគ្នានៅទូទាំងសកលលោក បន្ទាប់ពីវ៉ាក់សាំងនេះត្រូវបានទទួលស្គាល់ និងចាប់ផ្ដើមដាក់លក់ក្នុងទីផ្សារ៕

ប្រភព៖ Reuters/ AFP

December 14, 2020

កម្ពុជារកឃើញអ្នកឆ្លង Covid-19 ថ្មី ចំនួន 2ករណីទៀតហើយ!

ក្នុងរយៈពេល 24ម៉ោងកន្លងទៅនេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 2នាក់បន្ថែមទៀត ដែលជាករណីនាំចូល។

ករណីវិជ្ជមានចំនួន 2នាក់នេះរួមមាន៖

ទីមួយ៖ បុរសជនជាតិហ្ស៊កដានី អាយុ 47ឆ្នាំ ស្នាក់នៅក្នុងសណ្ឋាគារមួយក្នុងទីក្រុងភ្នំពេញ ជាអ្នកដំណើរមកពីប្រទេសហ្ស៊កដានី ឆ្លងកាត់តាមកូរ៉េខាងត្បូង មុននឹងមកដល់កម្ពុជានៅថ្ងៃទី10ធ្នូ 2020។

ទីពីរ៖ បុរសជនជាតិខ្មែរ អាយុ 32ឆ្នាំ ស្នាក់នៅក្នុងសណ្ឋាគារមួយក្នុងទីក្រុងភ្នំពេញ ជាអ្នកដំណើរមកពីប្រទេសម៉ាលី បន្តជើងហោះហើរនៅកូរ៉េខាងត្បូង និងមកដល់កម្ពុជានៅថ្ងៃទី11ធ្នូ 2020។

គិតមកដល់ថ្ងៃទី 13ធ្នូនេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 359នាក់ ក្នុងនោះមាន 307នាក់បានជាសះស្បើយ និង 52នាក់កំពុងសម្រាកព្យាបាលនៅមន្ទីរពេទ្យ។

December 13, 2020

ស្ដាប់សម្ដីរបស់ថៅកែ កំលោះនេះបានក្លាយជាមហាសេដ្ឋីក្នុងវ័យ 30ឆ្នាំ ក្រោយពីឈប់ធ្វើការ ដើម្បីប្រកបអាជីវកម្មផ្ទាល់ខ្លួន

នាពេលបច្ចុប្បន្ន ទ្រព្យសម្បត្តិសរុបរបស់ លោក Nick Molnar មានតម្លៃឡើងដល់ 2ពាន់លានដុល្លារអាមេរិក។

នៅក្នុងវ័យ 30ឆ្នាំ បច្ចុប្បន្ន Nick Molnar គឺមហាសេដ្ឋីដែលរកស៊ីមានបានដោយបាតដៃទទេដែលមានវ័យនៅក្មេងជាងគេបង្អស់នៅប្រទេសអូស្ត្រាលី។ អ្នកជំនួញវ័យក្មេងរូបនេះបានក្លាយជាអ្នកមាន និងមានឈ្មោះល្បីល្បាញ ក្នុងនាមជាសហស្ថាបនិក និងសហនាយកប្រតិបត្តិរបស់ក្រុមហ៊ុន Afterpay ដែលជាកម្មវិធីទូទាត់ថ្លៃទំនិញមួយដែលអនុញ្ញាតឱ្យអ្នកប្រើប្រាស់កាត់បន្ថយការចំណាយទៅលើការទិញទំនិញតាមរយៈខ្ទង់បង់រំលស់ធម្មតា។

យោងតាមរូបមន្ត «ទិញមុន សងក្រោយ» របស់ Afterpay អតិថិជនដែលទិញទំនិញ អាចបែងចែកប្រាក់ចំណាយទៅលើទំនិញ (ឡើងដល់ 1,115ដុល្លារអាមេរិក) ជា 4ចំណែកស្មើៗគ្នាសម្រាប់បង់រំលស់ ខណៈដែលក្រុមអ្នកលក់រាយចូលរួមបង់ប្រាក់កម្រៃជើងសារប្រមាណពី 4%ទៅ 6% ទៅលើការលក់ទំនិញមួយលើក។ បើសិនជាអ្នកទិញមិនបានទូទាំងទៅតាមថ្ងៃកំណត់ ពួកគេនឹងត្រូវបានបិទការប្រើប្រាស់សេវាកម្ម រហូតដល់ពួកគេសងបំណុលអស់។

ឆ្នាំនេះ Afterpay មានការរីកចម្រើនខ្លាំងដោយសារតែ Covid-19 បានធ្វើឱ្យមនុស្សងាកមកទិញទំនិញ និងទូទាត់តាមអនឡាញ។ តម្លៃមូលបត្ររបស់ក្រុមហ៊ុននេះបានកើនឡើង 1,300% ដែលនេះបានជួយឱ្យស្ថាបនិកនៃក្រុមហ៊ុន Afterpay ក្លាយជាមហាសេដ្ឋី។

ក៏ប៉ុន្តែ គ្រប់យ៉ាងប្រហែលជាមិនអាចកើតមានឡើងបានឡើយ បើសិនជាមិនមានការណែនាំពីសំណាក់អតីតថៅកែរបស់ Molnar។ មហាសេដ្ឋី Molnar បានប្រាប់ CNBC ថា៖ «គាត់គឺជាអ្នកដែលបានជំរុញឱ្យខ្ញុំបើកអាជីវកម្មជាមួយនឹង Afterpay»។

ឆ្នាំ 2012 លោក Molnar គឺជានិស្សិតដែលបានបញ្ចប់ការសិក្សាផ្នែកពាណិជ្ជកម្មនៅសាកលវិទ្យាល័យ Sydney ដែលកំពុងធ្វើការជាអ្នកវិភាគលើកការវិនិយោគរបស់ក្រុមហ៊ុន Mark Carnegie។

លោក Nick Molnar (ស្ដាំ) និងលោក Anthony Eisen

ដោយសារមានឈាមជាអ្នកជំនួញ Molnar បានចាប់ផ្ដើមលក់គ្រឿងអលង្ការណ៍នៅលើ eBay តាំងតែពីនៅរៀនមហាវិទ្យាល័យ។ ពេលគាត់ចង់ពង្រីកអាជីវកម្ម និងបង្កើតគេហទំព័រដោយឡែក Carnegie គឺជាអ្នកដែលបានជួយជំរុញគាត់លើរឿងនេះ។ លោក Carnegie ធ្លាប់និយាយទៅកាន់ Molnar ថា៖ «ខ្ញុំមិនយល់សោះថា ហេតុអ្វីបានជាប្អូនឯងនៅតែធ្វើការនៅទីនេះ។ ចូរចំណាយពេលទាំងស្រុងដើម្បីរកស៊ីចុះ»។

ក្រៅពីនេះ លោក Carnegie ថែមទាំងផ្ដល់លក្ខណងាយស្រួលដល់ Molnar ដោយការ «រក្សាកៅអី» ទុកឱ្យ Molnar ក្នុងរយៈពេល 12ខែ។ បើសិនជាបរាជ័យក្នុងមុខជំនួញផ្ទាល់ខ្លួន Molnar អាចត្រលប់មកធ្វើការនៅក្រុមហ៊ុនចាស់បាន។ មកដល់បច្ចុប្បន្ន គេហទំព័រលក់គ្រឿងអលង្ការណ៍របស់ Molnar នៅតែដំណើរការបានល្អ។

ក្រោយរយៈពេលមិនដល់2ឆ្នាំ Molnar ក៏បានចាប់ផ្ដើមគម្រោងអាជីវកម្មបន្ទាប់ នោះគឺ Afterpay ហើយក៏ទទួលបានជោគជ័យហួសពីការស្មាន។ ក្រោយពីបានបង្ហាញខ្លួនកាលពីចុងឆ្នាំ 2014 សកម្មភាពជំនួញរបស់ Afterpay ចាប់ផ្ដើមរីកចម្រើនយ៉ាងឆាប់រហ័ស។ អតិថិជនដែលមានប្រាក់តិចតួច មានការពេញចិត្តនឹងការប្រើប្រាស់រូបមន្តបង់រំលស់ស្មើគ្នានេះ ខណៈក្រុមអ្នកលក់រាយដែលជាអ្នកចង់លក់បានច្រើន ក៏ពេញចិត្តនឹងបង់ថ្លៃសេវាកម្មតិចតួចដើម្បីផលិតផលរបស់ពួកគេបានបង្ហាញខ្លួននៅលើទំព័រ Afterpay។

2ឆ្នាំក្រោយ Afterpay ក៏បានបោះផ្សាយលក់មូលបត្រជាសាធារណៈលើកដំបូងនៅផ្សារហ៊ុន (IPO) និងប្រមូលបានទុនជិត 18លានដុល្លារអាមេរិក។ មុខជំនួញនេះ បានរីកចម្រើនខ្លាំងក្លានៅពេលបានពង្រីកខ្លួនទៅកាន់ពិភពលោក បន្ទាប់ពីក្រុមហ៊ុននេះបានបង្ហាញខ្លួននៅសហរដ្ឋអាមេរិកកាលពីឆ្នាំ 2018 និងត្រូវបានតារាល្បីៗជាច្រើនរូបជួយឧទ្ទេសនាម។

អតិថិជនដែលមានប្រាក់តិចតួច មានការពេញចិត្តនឹងការប្រើប្រាស់រូបមន្តបង់រំលស់ស្មើគ្នានេះ ខណៈក្រុមអ្នកលក់រាយដែលជាអ្នកចង់លក់បានច្រើន ក៏ពេញចិត្តនឹងបង់ថ្លៃសេវាកម្មតិចតួចដើម្បីផលិតផលរបស់ពួកគេបានបង្ហាញខ្លួននៅលើទំព័រ Afterpay

ខែឧសភា ឆ្នាំ 2020 នេះ ក្រុមហ៊ុនយក្សផ្នែកបច្ចេកវិទ្យារបស់ចិន Tencent បានចំណាយជាង 200លានដុល្លារសម្រាប់ទិញភាគហ៊ុនចំនួន 5% របស់ Afterpay។ ប្រការនេះ បានជួយឱ្យ Afterpay ក្លាយជាមូលបត្រមួយដែលលេចធ្លោជាងគេបង្អស់នៅអូស្ត្រាលី និងបាននាំឱ្យ Molnar និងសហស្ថាបនិក Anthony Eisen (ម្នាក់ៗកាន់កាប់ភាគហ៊ុន 7% របស់ក្រុមហ៊ុន) ក្លាយជាមហាសេដ្ឋី ដោយម្នាក់ៗមានទ្រព្យសរុបប្រមាណ 2ពាន់លានដុល្លារអាមេរិក។

មហាសេដ្ឋីវ័យ 30 ឆ្នាំខាងលើ បានផ្ដល់យោបល់ថា៖ «មនុស្សម្នាក់ៗគួរតែមានការងារបន្ថែមមួយផ្សេងទៀតដើម្បីមានចំណូលបន្ថែម។ មិនមានអ្នកណាដឹងច្បាស់ថា វានឹងរីកចម្រើនយ៉ាងណានោះឡើយ ឱ្យតែអ្នកមានការព្យាយាមខ្ពស់។ កាលពីពេលទើបបញ្ចប់ការសិក្សា ខ្ញុំតែងគិតថា “ត្រូវតែរកការងារល្អមួយដើម្បីធ្វើ” ពោលគឺមិនមែន “ធ្វើជំនួញដោយខ្លួនឯងដើម្បីរកប្រាក់ឱ្យខ្លួនឯង និងអ្នកដទៃទេ។ ចូរមានភាពក្លាហានដើម្បីដើរចេញពីតំបន់សុវត្ថិភាព»៕

ប្រភព៖ CNBC

December 12, 2020

ជាង 71លាននាក់បានឆ្លង Covid-19! WHO ព្រមានថា បុណ្យណូអែលឆ្នាំនេះអាចក្លាយជាមហាទុក្ខ

ពិភពលោកបានរកឃើញអ្នកឆ្លងវីរុស Covid-19 សរុបជាង 71លាននាក់ ខណៈដែលបុណ្យណូអែលជិតចូលមកដល់ នាំឱ្យ WHO ព្រមានអំពីហានិភ័យខ្ពស់ក្នុងការឆ្លងវីរុសនេះ នៅចុងឆ្នាំ។

នៅទូទាំងពិភពលោក មនុស្សចំនួន 71,398,029 នាក់បានឆ្លង Covid-19 ក្នុងនោះមាន 1,600,194 នាក់បានស្លាប់ និង 49,585,375 នាក់បានជាសះស្បើយ ខណៈ 20,212,460 នាក់កំពុងសម្រាកព្យាបាល ក្នុងចំណោមនេះដែរ ក៏មានអ្នកជំងឺ 106,566 នាក់កំពុងប្រឈមនឹងហានិភ័យនៃការស្លាប់ខ្ពស់។

ប្រធានអង្គការសុខភាពពិភពលោក (WHO) បានអំពាវនាវឱ្យគ្រប់គ្នាពិចារណាឱ្យបានគ្រប់ជ្រុងជ្រោយអំពីគម្រោងកំសាន្តនៅក្នុងឱកាសបុណ្យណូអែលខាងមុខ។ «ឱកាសឈប់សម្រាកថ្ងៃបុណ្យដើម្បីជប់លៀង កំសាន្តសប្បាយ ប៉ុន្តែ វាអាចក្លាយទៅជាសោកនាដកម្មយ៉ាងឆាប់រហ័ស បើសិនយើងមិនមានវិធានការទប់ស្កាត់ត្រឹមត្រូវ» ប្រធានអង្គការ WHO លោក Tedros Adhanom Ghebreyesus មានប្រសាសន៍ដូច្នេះនៅក្នុងសន្និសីទសារព័ត៌មានមួយកាលពីម្សិលមិញ (11ធ្នូ 2020)។

ប្រធានអង្គការ WHO លោក Tedros Adhanom Ghebreyesus

លោក Tedros បន្ថែមថា «នៅពេលលោកអ្នកជប់លៀង កំសាន្តសប្បាយនាប៉ុន្មានសប្ដាហ៍ខាងមុខ សូមពិចារណាឱ្យបានល្អិតស្អន់អំពីគម្រោងនេះ។ បើសិនអ្នករស់នៅក្នុងតំបន់ដែលមានហានិភ័យឆ្លងវីរុសកម្រិតខ្ពស់ ចូរអនុវត្តវិធានការទប់ស្កាត់ដើម្បីរក្សាសុវត្ថិភាពសម្រាប់ខ្លួនឯង និងអ្នកដទៃ។ កាដូដែលល្អបំផុតដែលអ្នកអាចជូនដល់គ្រួសារ និងអ្នកដទៃ (នៅក្នុងឱកាសបុណ្យណូអែល) នោះគឺកាដូសុខភាព»៕

ប្រភព៖ AFP/Reuters

December 12, 2020

វ៉ាក់សាំងប្រឆាំង Covid-19 របស់វៀតណាម នឹងត្រូវផលិតជាផ្លូវការចាប់ពីខែឧសភា2021 បើសិនពិសោធលើមនុស្សបានជោគជ័យដូចនៅលើសត្វ

បន្ទាប់ពីដំណើរការកម្មវិធីពិសោធន៍វ៉ាក់សាំង Covid-19 ដែលមានឈ្មោះថា Nanocovax នៅលើមនុស្សដំណាក់កាលទីមួយ វិទ្យាស្ថានស្រាវជ្រាវវេជ្ជសាស្ត្រយោធារបស់វៀតណាម ទទួលបានពាក្យចុះឈ្មោះចូលរួមពីអ្នកស្ម័គ្រចិត្តចំនួនជាង 100នាក់។

ក្រោយពីបានចុះឈ្មោះ ក្រុមអ្នកស្ម័គ្រនឹងត្រូវបានចម្រាញ់ ដោយការប្រើប្រាស់លក្ខខណ្ឌចំនួន 5 រួមមាន អាយុ និងសុខភាព។ល។ ហើយបន្ទាប់មក នឹងត្រូវបានបែងចែកជាក្រុម និងចាក់វ៉ាក់សាំង រួចហើយធ្វើការតាមដានសុខភាព។

បន្ទាប់ពីត្រូវបានជ្រើសរើស អ្នកស្ម័គ្រចិត្តនឹងត្រូវបានចាក់វ៉ាក់សាំងនៅក្នុងថ្ងៃជ្រើសរើសនោះតែម្ដង។ តាមគម្រោង ការចាក់វ៉ាក់សាំងពិសោធន៍ដំបូងនឹងត្រូវធ្វើឡើងនៅថ្ងៃទី 17 ខែធ្នូខាងមុខ។

អនុប្រធាននាយកដ្ឋានវិទ្យាសាស្ត្របច្ចេកវិទ្យា និងបណ្ដុះបណ្ដាល នៃក្រសួងសុខាភិបាលវៀតណាម បានឱ្យដឹងថា ការពិសោធលើមនុស្សដំណាក់កាលដំបូងនឹងមានការវាយតម្លៃលើសុវត្ថិភាព និងការវាយតម្លៃជាលើកបំបូងអំពីសមត្ថភាពនៃការបង្កើតអង្គបដិប្រាណរបស់វ៉ាក់សាំង។

នៅពេលបានបញ្ចប់ការធ្វើតេស្តវ៉ាក់សាំងលើមនុស្សក្នុងដំណាក់កាលទីមួយ ក្រុមអ្នកវិទ្យាសាស្ត្រនឹងអាចវាយតម្លៃបានថា បរិមាណថ្នាំកម្រិតណាមានសុវត្ថិភាពបំផុត រួមនឹងសមត្ថភាពនៃការបង្កើតអង់ទីក័រ ក៏ដូចជាការប្រមូលទិន្នន័យដំបូងដើម្បីឈានដល់ការពិសោធលើមនុស្សដំណាក់កាលទីពីរ។ ដំណាក់កាលទីពីរនឹងត្រូវប្រើប្រាស់លទ្ធផលនៃការស្រាវជ្រាវរបស់ដំណាក់កាលទីមួយដើម្បីអនុវត្ត និងបន្ថែមក្រុមគោលដៅជាកុមារអាយុក្រោម 12ឆ្នាំ ឬមនុស្សចាស់អាយុចាប់ពី 60ឆ្នាំឡើងទៅ។

លោក Ho Nhan អគ្គនាយកនៃក្រុមហ៊ុនអភិវឌ្ឍឱសថ Nanogen ដែលជាអ្នកស្រាវជ្រាវរកឃើញវ៉ាក់សាំង Nanocovax បាននិយាយថា លទ្ធផលនៃការពិសោធវ៉ាក់សាំង Covid-19 នៅលើសត្វកណ្ដុរ ស្វា និងទន្សាយ នៅឯវិទ្យាស្ថានជាតិអនាម័យនិងរោគរាតត្បាត បានទទួលលទ្ធផលល្អ។

បើសិនជាការពិសោធនៅលើមនុស្ស ប្រព្រឹត្តទៅដោយរលូន ដូចការពិសោធនៅលើសត្វ នោះក្រុមហ៊ុន Nanogen នឹងអាចបញ្ចប់ការពិសោធរបស់ខ្លួននៅក្នុងខែឧសភា ឆ្នាំ2021 និងដាក់ពាក្យសុំការអនុញ្ញាតពីរដ្ឋាភិបាលដើម្បីផលិតវ៉ាក់សាំងនេះជាបន្ទាន់។

Nanocovax គឺជាវ៉ាក់សាំងប្រឆាំង Covid-19 ដំបូងរបស់វៀតណាម ដែលបានពិសោធនៅលើមនុស្ស។ បច្ចុប្បន្ន ប្រទេសនេះនៅមានបេក្ខភាពវ៉ាក់សាំង Covid-19 ចំនួន 3 ទៀត ដែលកំពុងស្ថិតក្នុងដំណាក់កាលពិសោធន៍នៅលើសត្វ៕

ប្រភព៖ VNexpress

December 11, 2020

តំណាងរាស្ត្ររបស់ Texas ចាប់ផ្ដើមមានផែនការបំបែករដ្ឋនេះ ចេញពីសហរដ្ឋអាមេរិក

តំណាងរាស្ត្រសភាជាន់ទាប Kyle Biedermann ស្នើឱ្យបំបែករដ្ឋ Texas ចេញពីសហរដ្ឋអាមេរិក ដើម្បីបង្កើតជាប្រទេសឯករាជ្យ ដោយសារតែរដ្ឋាភិបាលកណ្ដាលលែងជាតំណាងឱ្យតម្លៃរបស់ប្រជាជននៃរដ្ឋនេះ។

«រដ្ឋាភិបាលកណ្ដាលបានបាត់បង់ការគ្រប់គ្រង និងលែងជាតំណាងនៃតម្លៃរបស់ប្រជាជនក្នុងរដ្ឋ Texas។ នេះគឺជាមូលហេតុដែលខ្ញុំមានគម្រោងដាក់សំណើផ្លូវច្បាប់មួយ ឡើងទៅកាន់ស្ថាប័នសភារបស់រដ្ឋ ដើម្បីធ្វើប្រជាមតិ ក្នុងបំណងឱ្យរដ្ឋ Texas ក្លាយជាប្រទេសឯករាជ្យមួយ» តំណាងរាស្ត្រ Biedermann បានបង្ហោះសារដូច្នេះនៅលើទំព័រ Twitter កាលពីថ្ងៃទី 8ធ្នូ 2020។

ស្ថាប័នសភារបស់រដ្ឋ Texas នឹងបើកកិច្ចប្រជុំឡើងវិញ នៅក្នុងខែមករាខាងមុខ។ ប៉ុន្តែ លោក Biedermann និយាយថា លោកនឹងប្រើប្រាស់មាត្រាទី1 ទី2 នៃច្បាប់ធម្មនុញ្ញរបស់រដ្ឋ Texas ដើម្បីដាក់សំណើផ្លូវច្បាប់របស់ខ្លួន។ មាត្រាទី1 និងទី2 នៃរដ្ឋធម្មនុញ្ញរបស់ Texas បានចែងថា ប្រជាជនមានសិទ្ធិប្ដូរផ្លាស់ កែទម្រង់ ឬលុបចោលអាជ្ញាធរ ទៅតាមអ្វីដែលពួកគេយល់ថាត្រឹមត្រូវ និងជាក់ស្ដែង។

ក្រុមជាច្រើន មានដូចជាចលនាពលរដ្ឋ Texas ជាដើម តាំងតែពីយូរណាស់មកហើយ តែងតែគាំទ្រឱ្យមានការបំបែកខ្លួនចេញពីសហរដ្ឋអាមេរិក។ ស្ថាប័នសភារបស់ Texas ក៏បានទទួលសំណើដូចគ្នានេះចំនួនរាប់រយលើកមកហើយដែរ។

រដ្ឋ Texas ធ្លាប់បានបំបែកចេញពីសហរដ្ឋអាមេរិកម្ដងរួចមកហើយ។ កាលពីឆ្នាំ 1845 Texas បានបំបែកចេញពីសហរដ្ឋអាមេរិក និងបានក្លាយជារដ្ឋមួយ ហើយក៏បានចូលរួមក្នុងសហភាពភាគខាងត្បូងកាលពីឆ្នាំ 1860។ ក្រោយសង្គ្រាមផ្ទៃក្នុង Texas ក៏បានវិលត្រលប់មកជារដ្ឋមួយរបស់សហរដ្ឋអាមេរិកវិញ កាលពីឆ្នាំ 1870។

Texas ក៏ជារដ្ឋមួយដែលថ្មីៗនេះ បានដាក់ពាក្យបណ្ដឹងឡើងតុលាការ ប្រឆាំងនឹងរដ្ឋចំនួន 4 គឺ Georgia, Michigan, Pennsylvania និង Wisconsin ដើម្បីរារាំងក្រុមតំណាងម្ចាស់ឆ្នោតនៃរដ្ឋទាំងនេះ មិនឱ្យធ្វើការបោះឆ្នោតជ្រើសរើសប្រធានាធិបតី ដោយចោទថា រដ្ឋទាំងនេះ បានផ្លាស់ប្ដូរនីតិវិធីក្នុងការបោះឆ្នោតដោយអធម្មនុញ្ញភាពក្នុងគ្រាប្រឈមនឹងវីរុស Covid-19 ដែលទង្វើនេះ បាននាំឱ្យសន្លឹកឆ្នោតដែលបោះតាមប្រៃសណីយ៍មានការកើនឡើងខ្ពស់ ធ្វើឱ្យក្រុមលោក Trump ត្រូវប្រឈមនឹងការចាញ់ឆ្នោត៕

ប្រភព៖ Fox News

December 11, 2020

លែងបារម្ភនឹងបញ្ហា «កាត់លុយទូរស័ព្ទដោយមិនដឹងខ្លួន» ទៀតទៅ! អតិថិជននឹងបានប្រើលេខកូដថ្មី ដើម្បីផ្តាច់សេវាកម្មបន្ថែមទាំងឡាយណាដែលមិនចាំបាច់

ក្រសួងប្រៃសណីយ៍ និងទូរគមនាគមន៍កម្ពុជា បានប្រកាសជូនដំណឹងឱ្យក្រុមហ៊ុនទូរគមនាគមន៍ទាំងអស់នៅកម្ពុជា បង្កើតលេខកូដថ្មីមួយដើម្បីងាយស្រួលដល់អតិថិជនក្នុងការផ្ដាច់សេវាកម្មបន្ថែមណាមួយនៅក្នុងស៊ីមដែលពួកគេមិនចង់ប្រើ ក្នុងបំណងបញ្ចប់បញ្ហាកាត់ទឹកប្រាក់ពីក្នុងស៊ីមដោយមិនដឹងខ្លួន។

នៅក្នុងសេចក្ដីជូនដំណឹងស្ដីអំពីការប្រើលេខកូដ *1200# ដើម្បីផ្ដាច់សេវាកម្មទូរស័ព្ទបន្ថែម ដែលត្រូវបានធ្វើឡើងក្នុងថ្ងៃទី 11ធ្នូនេះ ក្រសួងប្រៃសណីយ៍ និងទូរគមនាគមន៍កម្ពុជា បានណែនាំឱ្យនិយ័តករទូរគមនាគមន៍កម្ពុជា សហការជាមួយនឹងប្រតិបត្តិករប្រព័ន្ធទូរស័ព្ទចល័តទាំងអស់ បង្កើតលេខកូដ *1200# សម្រាប់អតិថិជនប្រើប្រាស់ដើម្បីពិនិត្យ និងផ្ដាច់រាល់សេវាកម្មបន្ថែមដែលខ្លួនមិនត្រូវការ ចាប់ពីថ្ងៃ11ធ្នូ 2020 នេះតទៅ។

សេចក្ដីណែនាំរបស់ក្រសួងប្រៃសណីយ៍ និងទូរគមនាគមន៍កម្ពុជានេះ ត្រូវបានធ្វើឡើងក្រោយពីមានករណីជាច្រើនបានកើតមានឡើងអស់រយៈពេលជាច្រើនឆ្នាំ រួមនឹងការត្អូញត្អែរជាបន្តបន្ទាប់ពីសំណាក់អ្នកប្រើប្រាស់ ទាក់ទិននឹងបញ្ហាត្រូវក្រុមហ៊ុនប្រព័ន្ធទូរស័ព្ទ កាត់ទឹកប្រាក់ក្នុងស៊ីមដោយមិនដឹងមូលហេតុ។ ព័ត៌មានបន្ថែម សូមអានសេចក្ដីជូនដំណឹងរបស់ក្រសួងប្រៃសណីយ៍ និងទូរគមនាគមន៍កម្ពុជា ដូចខាងក្រោម៖

December 11, 2020

Author: សឿន សំណាង