សឿន សំណាង - La Reine Media

Jack Ma បាត់ខ្លួន

មហាសេដ្ឋីដែលនៅពីក្រោយក្រុមហ៊ុន Alibaba និង Ant Group មិនបានបង្ហាញខ្លួននៅលើទំព័រសារព័ត៌មានណាមួយនោះទេ បន្ទាប់ពីបានធ្វើការអត្ថាធិប្បាយលើកចុងក្រោយកាលពីខែតុលា ឆ្នាំ 2020។

បើទោះបីខ្លួនជាសមាជិកម្នាក់នៃបក្សកុម្មុយនិស្តចិន លោក Jack Ma ក៏តែងតែរិះគន់យ៉ាងខ្លាំងក្លាទៅលើការកំណត់ទាក់ទងនឹងបច្ចេកវិទ្យា និងហិរញ្ញវត្ថុរបស់ប្រទេសនេះ។ ថ្មីៗនេះ លោកបានហៅប្រព័ន្ធធនាគារដែលហួសសម័យរបស់ចិនថាជា «ហាងទទួលបញ្ចាំទ្រព្យ»។ ជាងនេះ លោកថែមទាំងបានប្រកាសថា កិច្ចព្រមព្រៀងធនាគារសកល Basel ថាជា «ក្លឹបសម្រាប់មនុស្សចាស់» ទៀតផង។

យោងតាមសារព័ត៌មានអង់គ្លេស Dailymail ការយល់ឃើញរបស់មហាសេដ្ឋីរូបនេះ បានធ្វើឱ្យអាជ្ញាធរចិនមានការខឹងសម្បា។ សកម្មភាពដែលត្រូវបានគេចាត់ទុកថាជាការបង្កបញ្ហាដល់អាជ្ញាធរចិននេះ បាននាំឱ្យមានការស៊ើបអង្កេតខុសធម្មតាទៅលើសកម្មភាពជំនួញរបស់ក្រុមហ៊ុន Alibaba។

កាលពីខែវិច្ឆិកា ឆ្នាំ 2020 រដ្ឋាភិបាលចិនបានចាប់ផ្ដើមធ្វើសកម្មភាពរឹតបន្តឹងលើលោក Jack Ma ដោយការផ្អាកការបោះផ្សាយមូលបត្រ (IPO) ដែលមានតម្លៃ 37 ពាន់លានដុល្លារអាមេរិករបស់ក្រុមហ៊ុន Ant Group ទៅតាមបញ្ជាផ្ទាល់របស់ប្រធានាធិបតីចិន លោក Xi Jinping នេះបើតាមសារព័ត៌មាន Wall Street Journal។

ក្រោយមក ការស៊ើបអង្កេតលើការរកស៊ីផ្ដាច់មុខទៅលើក្រុមហ៊ុន Alibaba ក៏ត្រូវបានប្រកាសកាលពីយប់ថ្ងៃបុណ្យណូអែល នេះបើតាមសារព័ត៌មាន Bloomberg។ ក្រុមមន្ត្រីរដ្ឋាភិបាលក៏បានស្នើឱ្យក្រុមហ៊ុនបច្ចេកវិទ្យា Ant Group របស់លោក Jack Ma កាត់បន្ថយទំហំនៃសកម្មភាពពាណិជ្ជកម្មរបស់ខ្លួន។

លោក Jack Ma ក៏បាត់ខ្លួនយ៉ាងអាថ៌កំបាំង ពីកម្មវិធីទូរទស្សន៍ស្វែងរកជំនាញដែលមានឈ្មោះថា «អ្នកក្លាហានក្នុងវិស័យជំនួញនៅអាហ្វ្រិក» ដែលលោកជាអ្នកបង្កើតឡើង។ ជាក់ស្ដែង លោក Ma គួរតែមានវត្តមានក្នុងនាមជាគណកម្មការនៅក្នុងវគ្គផ្ដាច់ព្រ័ត្រ ប៉ុន្តែលោកបែរជាត្រូវបានជំនួសដោយនាយកប្រតិបត្តិម្នាក់ផ្សេងទៀតរបស់ Alibaba ដោយលើកមូលហេតុថា «កាលបរិច្ឆេទត្រូវបានរំខាន»។

អាជ្ញាធរចិនត្រូវបានគេមើលឃើញថា តែងតែធ្វើការពិន័យយ៉ាងធ្ងន់ធ្ងរចំពោះអ្នកដែលបានរិះគន់បញ្ហាផ្ទៃក្នុង។ កាលពីខែមីនា ឆ្នាំ 2020 មហាសេដ្ឋីផ្នែកអចលនទ្រព្យ Ren Zhiqiang ក៏បានបាត់ខ្លួន ក្រោយពីបានហៅប្រធានាធិបតីចិនថាជា «មេត្លុក» ក្នុងការដោះស្រាយវិបត្តិ Covid-19។ មិត្តភក្ដិរបស់លោក Ren Zhiqiang បានឱ្យដឹងថា ពួកគេមិនអាចទាក់ទងទៅលោក Zhiqiang បាន ហើយ 6 ខែក្រោយ ស្រាប់តែលោក Zhiqiang ត្រូវបានកាត់ទោសឱ្យជាប់ពន្ធនាគាររយៈពេល 18 ឆ្នាំ «ក្រោយពីបានសារភាពដោយស្ម័គ្រចិត្ត និងស្មោះត្រង់» អំពីទោសកំហុសជាច្រើនទាក់ទងនឹងបញ្ហាពុករលួយ។

ការស៊ើបអង្កេតប្រឆាំងនឹងភាពផ្ដាច់មុខ រួមជាមួយនឹងការអធិប្បាយកាលពីខែតុលា ឆ្នាំ 2020 បានធ្វើឱ្យតម្លៃមូលបត្ររបស់ Alibaba ធ្លាក់ចុះ 25% បើធៀបនឹងតម្លៃខ្ពស់បំផុត ដែលប្រការនេះក៏បាននាំឱ្យប្រាក់ជាង 10 ពាន់លានដុល្លារអាមេរិក «បាត់ខ្លួន» ពីទ្រព្យសម្បត្តិសុទ្ធរបស់លោក Jack Ma។ យោងតាម Bloomberg បច្ចុប្បន្ន លោក Ma មានទ្រព្យសុទ្ធប្រមាណ 63.1 ពាន់លានដុល្លារអាមេរិក ឈរលំដាប់ទីបីនៅក្នុងបញ្ជីឈ្មោះអ្នកមានជាងគេនៅប្រទេសចិន៕

ប្រភព៖ DailyMail

January 5, 2021

SpaceX អាចនឹងបាញ់បង្ហោះយានអវកាស Starship ពីរប្រភេទក្នុងពេលតែមួយ

បើសិនមិនមានអ្វីប្រែប្រួល ក្រុមហ៊ុន SpaceX អាចត្រៀមខ្លួនរួចជាស្រេចក្នុងការធ្វើតេស្តកំណែចំនួនពីរនៃយានអវកាស Starship នាប៉ុន្មានសប្ដាហ៍ខាងមុខ។

កាលពីថ្ងៃទី 30 ខែវិច្ឆិកា ឆ្នាំ 2020 នៅក្នុងការឆ្លើយតបទៅនឹងរូបភាពមិនផ្លូវការមួយសន្លឹកដែលបានឆ្លងកាត់ការកាត់ត បង្ហាញអំពីយានអវកាស Starship ចំនួនពីរគ្រឿងដែលស្ថិតនៅលើប្រព័ន្ធបាញ់បង្ហោះរបស់ SpaceX នៅក្នុងរដ្ឋ South Texas លោក Elon Musk បានឱ្យដឹងថា រូបភាពប្រដូចនេះ «នឹងក្លាយជាការពិតក្នុងពេលឆាប់»។

ក្នុងរយៈពេល 4 ខែចុងឆ្នាំ 2020 ក្រុមវិស្វកររបស់ SpaceX បានចាប់ផ្ដើមសាងសង់បង្គោលទម្របាញ់បង្ហោះថ្មី (ប្រព័ន្ធសម្រាប់ទ្រ ចាក់ប្រេង និងបាញ់បង្ហោះយានអវកាស Starship) ដើម្បីបន្ថែមទៅលើហេដ្ឋារចនាសម្ព័ន្ធដែលមានស្រាប់នាបច្ចុប្បន្ន។ ដំណើរការនៃការសាងសង់នេះ ត្រូវបានធ្វើឡើងមុនពេលបាញ់បង្ហោះយាន SN5 និង SN6 និងក្រោយការផ្ទុះរបស់យាន Starship SN4 ដែលបានបំផ្លាញប្រព័ន្ធទម្រមួយកន្លែង។

តាមគម្រោង ប្រព័ន្ធបាញ់បង្ហោះនេះនឹងជួយដល់ការធ្វើតេស្តសាកល្បងជាមួយនឹងអណ្ដាតភ្លើងថេររបស់យាន Starship ដែលត្រូវធ្វើឡើងនៅក្នុងថ្ងៃទី 4 ខែមករា ឆ្នាំ 2021 (ថ្ងៃទី 5 នៅកម្ពុជា) នេះ។

យានអវកាសសម្រាប់ធ្វើតេស្ត SN10 និង SN11 ត្រូវបានដំឡើងកាលពីថ្ងៃទី 2 មករា ឆ្នាំ 2021 ដូច្នេះ ការសាកល្បងបាញ់បង្ហោះយានច្រើនគ្រឿងក្នុងពេលតែមួយ ពិតជាអាចទៅរួចក្នុងអំឡុងខែមករានេះ៕

ប្រភព៖ Teslarati

January 5, 2021

អង់គ្លេសដាក់បម្រាមគោចរទូទាំងប្រទេសជាថ្មី

នាយករដ្ឋមន្ត្រីអង់គ្លេសបានចេញបទបញ្ជាដាក់បម្រាមគោចរទូទាំងប្រទេស អំពាវនាវឱ្យប្រជាជននៅក្នុងផ្ទះ និងបិទទ្វារសាលារៀនដើម្បីឈានទៅរកការគ្រប់គ្រងស្ថានភាព Covid-19 ក្លាយពូជ។

«មន្ទីរពេទ្យនានាកាន់តែទទួលរងសម្ភាធខ្លាំងដោយសារ Covid-19 បើធៀបនឹងដំណាក់កាលដំបូងនៃការរាតត្បាតរបស់វីរុសនេះ។ ភាគច្រើន ប្រទេសយើងកំពុងអនុវត្តវិធានការតឹងរ៉ឹង ពិតណាស់ យើងត្រូវការធ្វើច្រើនជាងនេះដើម្បីគ្រប់គ្រងវីរុសក្លាយពូជនេះ។ យើងត្រូវតែដាក់បម្រាមគោចរទូទាំងប្រទេស ហើយរដ្ឋាភិបាល ជាថ្មីម្ដងទៀត សូមណែនាំឱ្យពលរដ្ឋនៅក្នុងផ្ទះ» នាយករដ្ឋមន្ត្រីអង់គ្លេស លោក Boris Johnson មានប្រសាសន៍លើកញ្ចក់ទូរទស្សន៍កាលពីថ្ងៃទី 4 មករា។

យោងតាមបទបញ្ជាបម្រាមគោចរថ្មីនេះ ហាងលក់ទំនិញមិនចាំបាច់នៅទូទាំងប្រទេស និងទីតាំងទទួលភ្ញៀវនានានឹងត្រូវបន្តបិទទ្វារ។ សាលាបឋម និងមធ្យមសិក្សានឹងចាប់ផ្ដើមបិទទ្វារចាប់ពីថ្ងៃទី 5 មករា ដោយទទួលតែសិស្សងាយរងគ្រោះ ឬកូនៗរបស់ក្រុមពលករដែលធ្វើការក្នុងវិស័យចាំបាច់ក្នុងសង្គម។

នាយករដ្ឋមន្ត្រីបានឱ្យដឹងថា បទបញ្ជាខាងលើអាចនឹងត្រូវបានបន្ធូរបន្ថយចចាប់ពីពាក់កណ្ដាលខែកុម្ភៈ បើសិនជាកម្មវិធីចាក់វ៉ាក់សាំងដំណើរការរលូតដូចបានគ្រោងទុក។

បច្ចុប្បន្ន អង់គ្លេសគឺជាសម្បុកវីរុសធំជាងគេលំដាប់ទីប្រាំក្នុងពិភពលោក ដោយមានអ្នកឆ្លង Covid-19 សរុបជាង 2.7 លាននាក់ ក្នុងនោះមានជាង 75,000 នាក់បានបាត់បង់ជីវិត៕

ប្រភព៖ Reuters

January 5, 2021

ស្ថានភាព Covid-19 នៅកម្ពុជានិងពិភពលោក នាថ្ងៃទី 5មករា

ក្នុងរយៈពេល 24 ម៉ោងចុងក្រោយនេះ កម្ពុជាមិនមានអ្នកឆ្លង Covid-19 និងអ្នកជាសះស្បើយពីជំងឺនេះទេ ខណៈករណីឆ្លង Covid-19 នៅទូទាំងពិភពលោកបានកើនឡើងដល់ 86,078,724 នាក់។

គិតត្រឹមព្រឹកថ្ងៃទី 5 ខែមករា ឆ្នាំ 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 382 នាក់ ក្នុងនោះមានអ្នកជាសះស្បើយចំនួន 362 នាក់ ខណៈអ្នកជំងឺចំនួន 20 នាក់ កំពុងសម្រាកព្យាបាលនៅមន្ទីរពេទ្យ។ សម្រាប់ព័ត៌មានលម្អិត សូមអានទិន្នន័យក្នុងតារាងខាងក្រោម។

នៅទូទាំងពិភពលោកឯណោះវិញ អ្នកដែលបានឆ្លងវីរុស Covid-19 សរុប មានចំនួន 86,078,724 នាក់ ក្នុងនោះ អ្នកជំងឺដែលបានជាសះស្បើយមានចំនួន 61,021,418 នាក់ អ្នកកំពុងទទួលការព្យាបាលមានចំនួន 23,197,547 នាក់។ ក្នុងចំណោមអ្នកដែលកំពុងព្យាបាល មាន 107,848 ករណីកំពុងស្ថិតក្នុងស្ថានភាពគ្រោះថ្នាក់ដល់ជីវិត៕

January 5, 2021

សំឡេងនៃករណីផ្ទុះផ្កាយលំដាប់ «យក្ស» ក្នុងចក្រវាលដែលមនុស្សរកឃើញ

NASA បានចែករំលែកវីដេអូបង្កើតឡើងវិញមួយដែលបង្ហាញអំពីសំឡេងនៃការផ្ទុះផ្កាយយក្ស (supernova) មួយដែលមានចម្ងាយ 168,000 ឆ្នាំពន្លឺពីផែនដី ដោយប្រើប្រាស់បច្ចេកវិទ្យានៃកម្មវិធបំប្លែងទិន្នន័យពិសេស។

ជាមួយនឹងកម្មវិធី «បំប្លែងសំឡេងចេញពីទិន្នន័យ» អង្គការអវកាសអាមេរិកាំង (NASA) បានបង្ហាញអំពីបាតុភូតពិសេសនានាក្នុងចក្រវាល ដោយប្រើឧបករណ៍តន្ត្រីនៅលើផែនដី ដោយយោងទៅតាមទិន្នន័យពីស្ថានីយសង្កេតកាំរស្មីអ៊ិច Chandra ដែលជាឧបករណ៍សង្កេតមើលកាឡាក់ស៊ីនៅឆ្ងាយ។

NASA បានចែករំលែកវីដេអូមួយដែលថតបាននូវរូបភាពនៃការផ្ទុះផ្កាយយក្ស 1987A ដែលដាក់ឈ្មោះទៅតាមចំនួនឆ្នាំពន្លឺដែលរត់ចេញពីតំបន់ផ្ទុះស្ថិតក្នុងបណ្ដុំពពកអវកាស Magellan ដែលមានចម្ងាយពីផែនដី 168,000 ឆ្នាំពន្លឺ។

វីដេអូនេះត្រូវបានបំប្លែងដោយកម្មវិធី time-lapse។ នៅពេលសញ្ញាជើងក្អែកក្នុងរង្វង់មូលរត់ជុំវិញជាយរបស់កាំរស្មីដែលបង្កើតឡើងពីឧស្ម័ននៃការផ្ទុះផ្កាយ រូបភាពក៏បានផ្លាស់ប្ដូរជាសន្សឹមៗ និងបង្ហាញអំពីការវិវត្តនៃការផ្ទុះចាប់ពីឆ្នាំ 1999 ដល់ឆ្នាំ 2013។ កាំរស្មីកាន់តែជះពន្លឺ សំឡេងក៏កាន់តែលាន់ឮខ្លាំងជាងមុន។ រង្វង់នៃពន្លឺឧស្ម័នបានកើនឡើងដល់កម្រិតកំពូលនៅពេលរលក shockwave នៃការផ្ទុះផ្កាយជះមកខ្លាំង នាំឱ្យមានសំឡេងឡើងខ្ពស់ និងលាន់ឮខ្លាំងនៅខាងចុងវីដេអូ៕

ប្រភព៖ Space

January 4, 2021

នាយករដ្ឋមន្ត្រីថៃស្នើឱ្យពលរដ្ឋនៅក្នុងផ្ទះ ក្នុងគ្រាករណីវិជ្ជមាននឹង Covid-19 កំពុងកើនឡើងយ៉ាងខ្ពស់

នាយករដ្ឋមន្ត្រីនៃប្រទេសថៃ បានអំពាវនាវឱ្យពលរដ្ឋរបស់ខ្លួននៅក្នុងផ្ទះដើម្បីទប់ស្កាត់ «រលកធំបំផុត» នៃការឆ្លងរាលដាលរបស់វីរុស Covid-19 បន្ទាប់ពីក្រុមមន្ត្រីបញ្ជាក់អំពីការកើនឡើងខ្ពស់នៃករណីឆ្លងថ្មីដល់ទៅ 745 នាក់ក្នុងថ្ងៃនេះ។

រដ្ឋាភិបាលថៃ ថ្ងៃនេះបានប្រកាសថា ខេត្តក្រុងចំនួន 28 រួមមានទាំងរាជធានីបាងកកផងដែរ គឺជាតំបន់ដែលកំពុងមានហានិភ័យខ្ពស់ក្នុងការឆ្លង Covid-19 ហើយបានអំពាវនាវឱ្យប្រជាជនធ្វើការក្នុងផ្ទះ ចៀសវាងការជួបជុំគ្នា ឬចាកចេញពីខេត្តរបស់ខ្លួនក្នុងគ្រាដែលមានការផ្ទុះឆ្លងរាលដាលខ្លាំង ក្រោយការរកឃើញករណីឆ្លងនៅក្នុងផ្សារត្រីក្បែរទីក្រុងបាងកកកាលពីពេលថ្មីៗនេះ។

នាយករដ្ឋមន្ត្រីថៃ លោក Prayuth Chan-ocha បានប្រាប់ក្រុមអ្នកយកព័ត៌មានថា៖ «យើងមិនចង់បិទទ្វារប្រទេសទាំងមូលនោះទេ ព្រោះយើងដឹងច្បាស់អំពីបញ្ហា ដូច្នេះតើគ្រប់គ្នាអាចបិទទ្វារដោយខ្លួនឯងបានទេ?។ ប្រការនេះអាស្រ័យលើអ្នកគ្រប់គ្នា ហើយបើសិនជាមិនចង់ឆ្លងវីរុស គ្រប់គ្នាគ្រាន់តែនៅផ្ទះក្នុងរយៈពេលពី 14-15 ថ្ងៃ។ បើសិនអ្នកគិតដូច្នេះ នោះគ្រប់យ៉ាងនឹងមានសុវត្ថិភាព ហើយងាយស្រួលក្នុងការគ្រប់គ្រង»។

សម្រាប់ថ្ងៃនេះ ប្រទេសថៃមានអ្នកស្លាប់ថ្មីចំនួន 1 ករណី និងបានរកឃើញករណីវិជ្ជមានថ្មីចំនួន 745 នាក់ ដែលនេះគឺជាកម្រិតខ្ពស់បំផុតរាប់ចាប់ពីថ្ងៃដែលប្រទេសនេះរកឃើញករណីដំបូង។ គិតត្រឹមថ្ងៃនេះ ប្រទេសថៃបានរកឃើញអ្នកវិជ្ជមាននឹង Covid-19 សរុបចំនួន 8,439 នាក់ និងអ្នកស្លាប់សរុបចំនួន 65 នាក់។ យ៉ាងនេះក្ដី ប្រទេសថៃនៅតែស្ថិតក្នុងចំណោមបណ្ដាប្រទេសដែលមានករណីឆ្លងទាបជាងគេនៅអាស៊ី។

ករណីឆ្លងថ្មីភាគច្រើនគឺជាប់ទាក់ទងនឹងក្រុមពលរដ្ឋបរទេសដែលចាប់ផ្ដើមឆ្លងរាលដាលនៅខេត្ត Samut Sakhon នៅភាគនិរតីក្រុងបាងកក និងបានរាលដាលទៅកាន់ខេត្តនានាជាងពាក់កណ្ដាលរបស់ប្រទេសនេះ។ រដ្ឋាភិបាលថៃបានចេញបញ្ជាឱ្យហាងនានា និងអ្នកលក់អាហារនៅតាមដងផ្លូវក្នុងក្រុង ផ្អាកដំណើរការជាបណ្ដោះអាសន្នចាប់ពីម៉ោង 19 យប់ ដល់ម៉ោង 6 ព្រឹកថ្ងៃបន្ទាប់ ដោយផ្ដើមអនុវត្តចាប់ពីថ្ងៃទី 5 ខែមករា ដើម្បីទប់ទល់នឹងការឆ្លងវីរុស។

ការលក់គ្រឿងស្រវឹងនៅក្នុងហាង និងបារ ក៏ដូចជាទីតាំងកម្សាន្តនានានៅក្នុងបណ្ដាខេត្តដែលមានហានិភ័យខ្ពស់ក៏ត្រូវបិទទ្វារបណ្ដោះអាសន្ន។ អភិបាលខេត្ត-ក្រុងនានា ទទួលបានសិទ្ធិក្នុងការចេញបទបញ្ជាដោយឡែកដើម្បីចូលរួមទប់ស្កាត់ Covid-19។

ចំណែកសាលារៀន និងមជ្ឈមណ្ឌលអប់រំនៅទូទាំងប្រទេស ក៏ត្រូវបិទទ្វារ ផ្អាកដំណើរការរយៈពេលពេញមួយខែផងដែរ៕

ប្រភព៖ Reuters

January 4, 2021

Tesla របស់ Elon Musk លក់រថយន្តអគ្គិសនីបានជិតកន្លះលានគ្រឿង ក្នុងឆ្នាំ 2020

បរិមាណផលិតដែលបានលក់ចេញរបស់ក្រុមហ៊ុន Tesla ក្នុងឆ្នាំ 2020 នេះ បានកើន 36% បើធៀបជាមួយនឹងឆ្នាំ 2019 ប៉ុន្តែ នៅតែមិនទាន់ដល់គោលដៅដែលក្រុមហ៊ុននេះបានដាក់ចេញ។

ក្នុងឆ្នាំ 2020 ក្រុមហ៊ុន Tesla បានប្រគល់រថយន្តអគ្គិសនីដល់ដៃអតិថិជនចំនួន 499,550 គ្រឿង ជាមួយនឹងបរិមាណ 180,570 គ្រឿងដែលបានលក់ចេញនៅក្នុងត្រីមាសចុងក្រោយ។ តួលេខសរុបនេះខ្ពស់ជាង 36% បើធៀបនឹងឆ្នាំ 2018។ ចំណែកផលិតផលសម្រេចក្នុងឆ្នាំ 2020 គឺ 509,737 គ្រឿង ដូច្នេះ នៅសល់ជាង 10,000 គ្រឿងទៀតដែលមិនទាន់ត្រូវបានប្រគល់ដល់ដៃអតិថិជន។

ថ្វីបើក្រុមហ៊ុនរបស់មហាសេដ្ឋី Elon Musk បរាជ័យក្នុងការលក់ឱ្យបាន 500,000 គ្រឿងក្នុងឆ្នាំ 2020 ប៉ុន្តែ ពួកគេនៅតែទទួលបានជោគជ័យច្រើន ក្រោយរយៈពេលមួយឆ្នាំដែលរងផលប៉ះពាល់ដោយសារ Covid-19។

រថយន្តអគ្គិសនីទំនើបរបស់ Tesla ដែលកំពុងអភិវឌ្ឍ

នាយកប្រតិបត្តិរបស់ក្រុមហ៊ុន Tesla លោក Elon Musk បានសរសេរនៅលើទំព័រ Twitter ថា៖ «មានមោទកភាពចំពោះក្រុមបុគ្គលិក Tesla ព្រោះបានឈានដល់ដំណាក់កាលសំខាន់នេះ»។

ក្រុមហ៊ុន Tesla បានបញ្ចេញរបាយការណ៍មួយបង្ហាញថា ខ្លួនបានចំណេញបន្តបន្ទាប់រហូតដល់ត្រីមាសទីប្រាំ។ បច្ចុប្បន្ន តម្លៃមូលបត្ររបស់ Tesla បានកើនឡើងជាង 700% បើធៀបនឹងឆ្នាំមុន។ Tesla ក៏ក្លាយជាសមាជិកមួយនៅក្នុងបញ្ជី S&P 500 ដែលជាបណ្ដុំនៃក្រុមហ៊ុនចំនួន 500 ដែលមានតម្លៃទុនខ្ពស់ជាងគេក្នុងពិភពលោក៕

ប្រភព៖ Engadget

January 4, 2021

សម្រស់ដ៏ស្រស់សោភានៃកូនស្រីពៅរបស់មេ Huawei៖ ល្បីឈ្មោះ និងបានបញ្ចប់ការសិក្សានៅ Harvard

Annabel Yao មិនត្រឹមតែល្បីឈ្មោះដោយសារតែជាកូនអ្នកមាននោះទេ ប៉ុន្តែនាងគឺជាក្រមុំដែលមានសម្រស់ស្រស់សោភា និងមានចំណេះដឹងខ្ពស់ខ្ពស់ ជាសិស្សពូកែ និងមានទេពកោសល្យផ្នែកសិល្បផងដែរ។

នាង Annabel Yao ដែលជាកូនស្រីពៅរបស់ស្ថាបនិក និងប្រធានក្រុមហ៊ុន Huawei លោក Ren Zhengfei ថ្មីៗនេះបានបង្ហាញខ្លួននៅលើក្របមុខនៃទស្សនាវដ្ដី Harper’s Bazaar ភាសាចិន ចេញផ្សាយសម្រាប់ខែមករា ឆ្នាំ 2021។

Annabel Yao បង្ហាញអំពីសមត្ថភាពក្នុងការរាំបាឡេ ជារបាំដែលនាងចាប់យកតាំងតែពីមានអាយុ 5 ឆ្នាំ។ Annabel Yao បញ្ជាក់ថា «ពួកគេហៅជើងរបស់ខ្ញុំថាជាសិល្បនៃការពត់កោង»។

នៅក្នុងកម្រងរូបថតដែលបង្ហាញទៅតាមលក្ខណប្រណិត និងសភាពអាថ៌កំបាំង នាង Annabel Yao លេងស្ទីលប្រកបដោយជំនាញ ជាមួយនឹងទឹកមុខម៉ឺងម៉ាត់ និងទាក់ទាញ។

Annabel Yao កើតឆ្នាំ 1998 និងទើបតែបានបញ្ចប់ការសិក្សានៅសាកលវិទ្យាល័យ Harvard ផ្នែកវិស្វកម្មកុំព្យូទ័រ។ ប៉ុន្តែ កូនស្រីសំណព្វនៃ CEO របស់ក្រុមហ៊ុន Huawei នេះ បែរជាចូលចិត្តផ្នែកបង្ហាញម៉ូដ និងកម្សាន្តទៅវិញ។

នាងតែងតែបង្ហាញខ្លួននៅក្នុងព្រឹត្តិការណ៍នានារបស់បណ្ដាក្រុមហ៊ុនបរទេសល្បីៗ ជាមួយនឹងសម្លៀកបំពាក់ប្រកបដោយភាពថ្លៃថ្នូរ ឆើតឆាយ និងទាន់សម័យ។

ឆ្នាំ 2018 នាង Annabel Yao ទទួលបានចំណាប់អារម្មណ៍ខ្លាំងនៅពេលបានចូលរួមព្រឹត្តិការណ៍ Le Bal នៅប្រទេសបារាំង ដែលជាពីធី «ជប់លៀង» ផ្នែកម៉ូដែលសម្លៀកបំពាក់ដ៏ល្បីឈ្មោះបំផុតមួយក្នុងពិភពលោកសម្រាប់កូនស្រីអ្នកមានដែលមានអាយុចាប់ពី 19 ដល់ 21 ឆ្នាំ។

កើតនៅក្នុងគ្រួសារអ្នកមាន ប៉ុន្តែ Annabel Yao មិនចូលចិត្តរស់នៅដោយការសម្ញែងទ្រព្យនោះទេ។ នាងឱ្យដឹងថា តែងតែប្រើប្រាស់ផលិតផល «ប្រែន» ក៏ប៉ុន្តែ នាងជ្រើសរើសតែទំនិញដែលមិនសូវលេចធ្លោ និងមិនសូវមានឡូហ្គូល្បី។

កូនក្រមុំវ័យ 22 ឆ្នាំ របស់ស្ថាបនិក Huawei នេះ អះអាងថា ខ្លួនចូលចិត្តការសន្សំសំច័យ បើទោះនាងមានប្រាក់ច្រើន និងចូលចិត្តអ្វីដែលល្អៗ ប៉ុន្តែ ភាគច្រើននាងអាចទប់អារម្មណ៍បាននៅពេលចង់ទិញអ្វីមួយដែលមានតម្លៃថ្លៃ។ Annabel Yao និយាយនៅលើ Sohu ថា៖ «មិត្តភក្ដិសួរថា ហេតុអ្វីមានប្រាក់ច្រើនបែរជាមិនទិញ ខ្ញុំឆ្លើយថា ខ្លួនឯងមិនទាន់រកលុយបានផង ដូច្នេះមិនមានហេតុផលដែលត្រូវចំណាយប្រាក់ច្រើនដើម្បីទិញរបស់ដែលមិនសូវចាំបាច់នោះដែរ។ អាវយឺតប្រភេទ Sweater បច្ចុប្បន្នមានតម្លៃដល់ទៅខ្ទង់ពាន់ដុល្លារអាមេរិក។ ខ្ញុំយល់ថាថ្លៃណាស់ មិនគួរឱ្យទិញ»។

នាពេលអនាគត Annabel Yao ចង់ធ្វើការក្នុងវិស័យជំនួញផ្នែកបច្ចេកវិទ្យា។ ទន្ទឹមនឹងនេះ នាងក៏ចង់ចូលរួមធ្វើសកម្មភាពមនុស្សធម៌ឱ្យបានច្រើន ដើម្បីជួយដល់អ្នកទីទាល់ក្រ។

សម្រស់ដ៏ស្រស់ត្រកាលនៃកូនស្រីពៅកើតឆ្នាំ 1998 របស់ប្រធានក្រុមហ៊ុន Huawei នៃប្រទេសចិន។

January 4, 2021

ករណីវិជ្ជមាននឹង Covid-19 ក្នុងពិភពលោក កើនលើស 85លាននាក់! អាមេរិកព្រួយបារម្ភពីការផ្ទុះឆ្លងក្រោយថ្ងៃបុណ្យ

ពិភពលោកបានរកឃើញមនុស្សជាង 85.4លាននាក់ វិជ្ជមាននឹង Covid-19 ក្នុងនោះមានជាង 1.85លាននាក់បានស្លាប់។ ក្រុមមន្ត្រីសហរដ្ឋអាមេរិក កំពុងមានការព្រួយបារម្ភខ្លាំងអំពីហានិភ័យនៃការផ្ទុះឆ្លងរាលដាលថ្មីនៅក្រោយការឈប់សម្រាកថ្ងៃបុណ្យ។

ក្នុងរយៈពេល 24ម៉ោងចុងក្រោយនេះ ពិភពលោកបានរកឃើញអ្នកឆ្លងវីរុស Covid-19 ថ្មី ចំនួន 538,797 នាក់ និងអ្នកស្លាប់ថ្មីចំនួន 7,715 នាក់ ធ្វើឱ្យអ្នកវិជ្ជមាននឹងវីរុសនេះសរុបកើនដល់ 85,455,471នាក់ និងអ្នកស្លាប់សរុបកើនដល់ 1,850,112នាក់។ អ្នកជំងឺដែលបានជាសះស្បើយមានចំនួន 60,387,163នាក់។ នេះបើតាមគេហទំព័រ Worldometers។

សហរដ្ឋអាមេរិកគឺជាសម្បុកវីរុស Covid-19 ធំជាងគេបង្អស់ក្នុងពិភពលោក ដោយមានអ្នកវិជ្ជមានសរុប 21,080,684នាក់ ក្នុងនោះមានអ្នកស្លាប់សរុបចំនួន 360,027នាក់ បន្ទាប់ពីបានរកឃើញអ្នកឆ្លងវីរុសថ្មីចំនួន 161,493នាក់ និងអ្នកស្លាប់ថ្មីចំនួន 1,336នាក់ ក្នុងអំឡុង 24ម៉ោងកន្លងទៅនេះ។ ក្នុងខែចុងក្រោយនៃឆ្នាំ 2020 ប្រទេសនេះ មានអ្នកឆ្លងវីរុសដល់ទៅជាង 6.4លាននាក់ និងអ្នកស្លាប់ជាង 77,000នាក់។

ក្រុមមន្ត្រីសុខាភិបាល កាលពីថ្ងៃទី 3មករា ឆ្នាំ2021 បានព្រមានថា ថ្ងៃខែដ៏អាក្រក់នៅតែស្ថិតនៅខាងមុខ នៅពេលដែលករណីឆ្លងថ្មីអាចបន្តកើនឡើង ទាក់ទិននឹងសកម្មភាពជួបជុំគ្នាក្នុងរដូវបុណ្យ។

វេជ្ជបណ្ឌិត Anthony S. Fauci ដែលជាអ្នកជំនួញលំដាប់កំពូលផ្នែករោគឆ្លងនៅសហរដ្ឋអាមេរិក បានឱ្យដឹងថា៖ «នោះគឺជាទិដ្ឋភាព និងសំណាងអាក្រក់បំផុត ប៉ុន្តែ ត្រូវបានព្យាករជាមុនរួចហើយ»។

ប្រភព៖ AFP, Reuters

January 4, 2021

កម្ពុជារកឃើញអ្នកវិជ្ជមាននឹង Covid-19 ចំនួន 1ករណីទៀតក្នុងរយៈពេល 24ម៉ោងចុងក្រោយនេះ

ក្រសួងសុខាភិបាលកម្ពុជា នាព្រឹកថ្ងៃទី 4 ខែមករា ឆ្នាំ 2021 នេះ បានឱ្យដឹងថា បានរកឃើញករណីវិជ្ជមាននឹង Covid-19 ថ្មី ចំនួន 1នាក់ទៀត ដែលជាករណីនាំចូល។

អ្នកវិជ្ជមាននឹង Covid-19 នេះគឺជាពលការិនីជនជាតិខ្មែរ អាយុ 21ឆ្នាំ នៅខេត្តប៉ៃលិន។ ស្ត្រីរូបនេះទើបតែត្រលប់មកពីប្រទេសថៃកាលពីថ្ងៃទី 1មករា ឆ្នាំ2021។

គិតមកដល់ព្រឹកថ្ងៃទី 4មករានេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 382នាក់ ក្នុងនោះមានអ្នកជាសះស្បើយចំនួន 362នាក់ និងអ្នកកំពុងព្យាបាលចំនួន 20នាក់។

January 4, 2021

Author: សឿន សំណាង