សឿន សំណាង - La Reine Media

រូបិយវត្ថុឌីជីថល Bitcoin ឡើងថ្លៃលើស 35,000 USD/bitcoin ខណៈតម្លៃទុនសរុបឡើងដល់ជាង 650 ពាន់លានដុល្លារ

តម្លៃរូបិយវត្ថុឌីជីថលដែលពេញនិយមបំផុតក្នុងពិភពលោក បានបង្កើតកំណត់ត្រាថ្មីជាបន្តបន្ទាប់ ដោយប៉ុន្មានម៉ោងមុននេះ វាមានតម្លៃឡើងដល់ជាង 35,000 ដុល្លារក្នុងមួយ bitcoin។

រូបិយវត្ថុឌីជីថល Bitcoin បានឡើងថ្លៃកាលពីថ្ងៃត្រង់ ពី 33,800 ដុល្លារ ឡើងដល់ 35,751 ដុល្លារ ដោយប្រើពេលមិនដល់ 1 ម៉ោង។ CoinDesk បានឱ្យដឹងថា ពេលនេះ 1 bitcoin ត្រូវបានគេជួញដូរក្នុងតម្លៃប្រហែល 35,100 ដុល្លារអាមេរិក។ ដូច្នេះ តម្លៃរបស់វាបានកើនឡើងជាង 12.5% នៅក្នុងរយៈពេល 24 ម៉ោងកន្លងទៅនេះ។

កាលពីថ្ងៃទី 2 ខែមករា Bitcoin បានចាប់ផ្ដើមឆ្នាំថ្មីដោយការ «លោត» ឆ្លងកាត់ចំណុច 30,000 ដុល្លារ និងបន្តកើនឡើងលើសពី 33,000 ដុល្លារក្នុង 1 bitcoin ដោយចំណាយពេលតែប៉ុន្មានម៉ោងបន្ទាប់នោះ។ នៅក្នុងការជួញដូរថ្មីៗនេះ តម្លៃរបស់ Bitcoin បានឡើង-ចុះពិបាកស្មានត្រូវ ព្រោះពេលខ្លះវាបានធ្លាក់ដល់ 29,400 ដុល្លារក៏មាន។

ពេញមួយឆ្នាំ 2020 Bitcoin បានកើនឡើង 300% ខណៈក្នុងខែធ្នូ ឆ្នាំ 2020 វាបានកើនឡើង 50%។ មូលហេតុដែលនាំឱ្យតម្លៃរបស់ Bitcoin ឡើងថ្លៃខ្ពស់ គឺដោយសារមានមនុស្សកាន់តែច្រើនចាត់ទុកថា វាជាមាសឌីជីថល និងទាក់ទាញបានអ្នកវិនិយោគ ក៏ដូចជាមូលនិធិជាច្រើន មានដូចជា Skybridge Capital, MassMutual និង Guggenheim ជាដើម។

តារាងដែលបង្ហាញអំពីតម្លៃឡើងចុះរបស់ Bitcoin

ការដែលធនាគារកណ្ដាលរបស់សហរដ្ឋអាមេរិក (Federal Reserve System – Fed) និងធនាគារជាតិនៃបណ្ដាប្រទេស បានបន្ធូរបន្ថយផ្នែកហិរញ្ញវត្ថុដើម្បីកាត់បន្ថយផលប៉ះពាល់ដល់សេដ្ឋកិច្ចដែលបណ្ដាលមកពី Covid-19 ក៏បានផ្ដល់ផលប្រយោជន៍ដល់ Bitcoin ផងដែរ។ ដោយសារប្រការនេះត្រូវបានចាត់ទុកថាជាកាតាលីករធ្វើឱ្យមានអតិផរណា ដែលអាចជាន់ពន្លិចតម្លៃរូបិយបណ្ណដុល្លារអាមេរិក ដូច្នេះ តម្លៃរបស់ Bitcoin ក៏កើនឡើង។

អស្ថិរភាពនយោបាយនៅទូទាំងពិភពលោក ឥទ្ធិពលរបស់ Covid-19 និងការព្រួយបារម្ភអំពី Brexit (Brexit គឺជាព្រឹត្តិការណ៍ដែលអង់គ្លេសដកខ្លួនចេញពីសហភាពអឺរ៉ុបនិងសហគមន៍ថាមពលអាតូម៉ិកអឺរ៉ុប កាលពីដំណាច់ថ្ងៃទី 31 ខែមករា ឆ្នាំ 2020 (ម៉ោងនៅអឺរ៉ុប)) ក៏ត្រូវបានគេជឿថា បានធ្វើឱ្យក្រុមអ្នកវិនិយោគរត់ទៅរក Bitcoin។

បច្ចុប្បន្ន តម្លៃទុនសរុបរបស់រូបិយវត្ថុឌីជីថល Bitcoin មានទំហំប្រមាណ 654 ពាន់លាន (654,000,000,000) ដុល្លារអាមេរិក៕

ប្រភព៖ CoinDesk

January 6, 2021

ខាតបង់ប្រាក់អស់ 300 លាន ដោយសារមូលបត្រ កំលោះវ័យ 27ឆ្នាំ សម្រេចចិត្តលោតពីស្ពានសម្លាប់ខ្លួន

ការលេងមូលបត្រនៅលើកម្មវិធីទូរស័ព្ទ នាំឱ្យកំលោះជនជាតិវៀតណាមម្នាក់ វ័យ 27 ឆ្នាំ ខាតបង់ប្រាក់អស់ចំនួន 300 លានដុង។ ក្នុងពេលទាល់ច្រក កំលោះរូបនេះក៏បាននឹកឃើញដល់ដំណោះស្រាយមួយ នោះគឺសម្លាប់ខ្លួនដោយលោតពីលើស្ពានចូលទៅក្នុងទឹកទន្លេ។

ក៏ប៉ុន្តែ សំណាងអាក្រក់ គោលបំណងធ្វើអត្តឃាតកាលពីព្រលប់ថ្ងៃទី 5 មករា នៅឯខណ្ឌ Cai Rang ទីក្រុង Can Tho ភាគខាងត្បូងប្រទេសវៀតនាម របស់កំលោះនេះមិនទទួលបានជោគជ័យនោះទេ ដោយសារតែមានក្រុមប៉ូលិសមកជួយសង្គ្រោះ ក្នុងគ្រាបុរសអស់សង្ឃឹមនេះកំពុងត្រៀមលោតពីលើស្ពាន។

ប្រភពព័ត៌មានឱ្យដឹងថា ដំបូងឡើយ នៅវេលាម៉ោងប្រហែល 15 រសៀល មន្ត្រីសន្តិសុខប្រចាំស្ពាន Can Tho បានមើលឃើញកំលោះម្នាក់ឈប់ម៉ូតូលើស្ពាន រួចតោងឡើងឆ្លងកាត់បង្កាន់ដៃស្ពាន ដើម្បីលោតសម្លាប់ខ្លួន ភ្លាមនោះ សន្តិសុខក៏បានរាយការណ៍ដល់សមត្ថកិច្ច។

មិនយូរប៉ុន្មាន ក្រុមប៉ូលិសក៏មកដល់កន្លែងកើតហេតុ និងបានស្នើកម្លាំងជំនួយបន្ថែម។ ម៉ោងប្រហែល 17 ល្ងាច អនុប្រធាននគរបាលសង្កាត់ Hung Phu ក៏បានឡើងទៅក្បែរ រួចក៏នាំគ្នាអូសកំលោះនេះចេញពីតំបន់គ្រោះថ្នាក់។

ក្រោយការស្រាវជ្រាវ ប៉ូលិសឱ្យដឹងថា បុរសនេះមានឈ្មោះថា L.H.D កើតឆ្នាំ 1994 មកពីខេត្ត Tra Vinh (ព្រះត្រពាំង) ភាគខាងត្បូងនៃប្រទេសវៀតណាម។

L.H.D បានឱ្យដឹងថា នៅពាក់កណ្ដាលឆ្នាំ 2019 ខ្លួនបានទៅកាន់ហាងលក់ទូរស័ព្ទមួយកន្លែងដើម្បីខ្ចីប្រាក់ និងបានធ្វើឯកសារសរុបចំនួន 15 ច្បាប់ (11 ច្បាប់នៅលើ app ទូរស័ព្ទ ជាមួយនឹងប្រាក់ប្រហែល 120 លានដុង និង 4 ច្បាប់ទៀតធ្វើនៅឯហាងផ្សេងៗ ដែលមានតម្លៃសរុបប្រហែល 220 លានដុង)។

ក្រោយពីខ្ចីបានប្រាក់ L.H.D ក៏បានប្រើប្រាស់វាទៅក្នុងគោលដៅផ្ទាល់ខ្លួន។ L.H.D បានទៅកាន់ធនាគារមួយដើម្បីដាក់ប្រាក់ បន្ទាប់មកក៏បានប្រើប្រាស់កម្មវិធីមួយនៅលើទូរស័ព្ទដើម្បីផ្ទេរប្រាក់នៅក្នុងការលេងមូលបត្រលើកម្មវិធីនេះ។ គិតមកដល់ដំណាក់កាលត្រៀមធ្វើអត្តឃាត L.H.D បានខាតបង់ប្រាក់អស់ប្រមាណជា 300 លានដុង (13,000 ដុល្លារអាមេរិក)។

ដោយសារតែជំពាក់បំណុលច្រើនពេក និងគ្មានលទ្ធភាពសង បូករួមនឹងការគិតខ្លី L.H.D ក៏នឹកឃើញដល់ការសម្លាប់ខ្លួនដើម្បីបញ្ចប់បញ្ហា។ បច្ចុប្បន្ន សមត្ថកិច្ចបានទាក់ទងទៅកាន់សាច់ញាតិ ដើម្បីមកទទួលកំលោះនេះត្រលប់ទៅផ្ទះវិញ៕

ប្រភព៖ CB

January 6, 2021

ប្រាក់ខែ CEO របស់ Apple ក្នុងឆ្នាំ 2020 កើនជិត 30%

ក្នុងឆ្នាំ 2020 ប្រាក់បៀវត្សសរុបប្រចាំឆ្នាំរបស់លោក Tim Cook ដែលជា CEO នៃក្រុមហ៊ុន Apple បានកើនជិត 30% ពោលគឺខ្ទង់ 15 លានដុល្លារអាមេរិក នៅពេលដែលក្រុមហ៊ុនផលិត iPhone នេះ បានរីកចម្រើនខ្លាំងក្នុងសម័យ Covid-19។

យោងតាមសេចក្ដីប្រកាសរបស់ Apple ប្រាក់រង្វាន់របស់ CEO Tim Cook បានកើនឡើង 28% ក្នុងឆ្នាំ 2020 បើគិតជាទឹកប្រាក់ ស្មើនឹង 14,769,259 ដុល្លារអាមេរិក។ ឆ្នាំ 2019 ប្រាក់ដែលលោករកបាន (មិនទាន់បូករួមទាំងរង្វាន់ជាមូលបត្រ) ចំនួន 11,555,466 ដុល្លារ។

ជាសរុប ថ្នាក់ដឹកនាំកំពូលៗចំនួន 5 រូបរបស់ Apple (Tim Cook, នាយកផ្នែកហិរញ្ញវត្ថុ Luca Maestri, នាយកផ្នែកច្បាប់ Kate Adams, នាយកផ្នែកលក់រាយ Deirdre O’Brien, នាយកប្រតិបត្តិ Jeff Villiams) ត្រូវបានផ្ដល់ប្រាក់បៀវត្សចំនួន 119,8 លានដុល្លារ កើន 13% ធៀបនឹងឆ្នាំ 2019។

កាលពីខែសីហា ឆ្នាំ 2020 CEO របស់ Apple បានក្លាយជាមហាសេដ្ឋីជាផ្លូវការ ដោយសារប្រាក់ចំណូល និងមូលបត្រដែលលោកមាននៅក្នុងក្រុមហ៊ុន Apple។

ប្រាក់បៀវត្សគោលរបស់លោក Tim Cook គឺ 3 លានដុល្លារ មិនមានការប្រែប្រួលបើធៀបនឹងឆ្នាំមុន។ លោក Tim Cook ក៏ទទួលបានរង្វាន់ផ្នែកពាណិជ្ជកម្មចំនួន 10,7 លានដុល្លារផងដែរ។ ក្រៅពីនេះ Apple ថែមទាំងចំណាយប្រាក់ 1 លានដុល្លារផ្សេងទៀតទាក់ទងនឹងតំណែង CEO មានដូចជា 470,000 ដុល្លារសម្រាប់សន្តិសុខ និង 430,000 ដុល្លារសម្រាប់ការធ្វើដំណើរ។

Apple បានឱ្យដឹងថា ប្រាក់បៀវត្សរបស់ CEO ខ្ពស់ជាង 256 ដង បើធៀបនឹងប្រាក់បៀវត្សជាមធ្យមរបស់បុគ្គលិក (57,783 ដុល្លារ) ក្នុងឆ្នាំ 2020។ ឆ្នាំ 2019 អត្រានេះខុសគ្នាចំនួន 200 ដង៕

ប្រភព៖ BI

January 6, 2021

ហុងកុងចាប់ខ្លួនពលរដ្ឋអាមេរិកាំង និងសកម្មជនបក្សប្រឆាំងរាប់សិបនាក់ ទៅតាមច្បាប់សន្តិសុខជាតិ

ក្រុមប៉ូលិសក្រុងហុងកុងនៃប្រទេសចិន បានចាប់ខ្លួនសកម្មជនបក្សប្រឆាំងប្រមាណ 50 នាក់ ដោយប្រើច្បាប់សន្តិសុខថ្មី ក្នុងនោះក៏មានឈ្មោះ John Clancey ដែលមានសញ្ជាតិអាមេរិកផងដែរ។

John Clancey ជាពលរដ្ឋអាមេរិកាំង និងជាមេធាវីរបស់ក្រុមហ៊ុនផ្នែកច្បាប់ Ho Tse Wai & Partners ដែលជាក្រុមហ៊ុនល្បីឈ្មោះជាមួយនឹងករណីការពារក្ដីទាក់ទងនឹងសិទ្ធិមនុស្ស ត្រូវបានចាប់ខ្លួននៅក្នុងព្រឹកនេះ (6 មករា) ដោយត្រូវបានសង្ស័យថា មានល្បិចកល «ផ្ដួលរំលំ» នេះបើតាមប្រភពព័ត៌មានពីស្ថាប័នច្បាប់។ ប្រភពព័ត៌មានពីប៉ូលិសក៏បានបញ្ជាក់អំពីការចាប់ខ្លួន Clancey និងការចោទប្រកាន់មកលើមេធាវីរូបនេះ។

ប្រភពព័ត៌មាននានាបានឱ្យដឹងថា ប៉ូលិសជាង 30 នាក់បានចូលឆែកឆេការិយាល័យរបស់ក្រុមហ៊ុនច្បាប់ Ho Tse Wai & Partners។ នេះជាក្រុមហ៊ុនមួយដែលត្រូវបានក្រុមសកម្មជនបក្សប្រឆាំងជួលជាញឹកញាប់ ខណៈដែលមេធាវី Clancey ក៏ជាហេរញ្ញិករបស់ Power for Democracy ដែលធ្លាប់បានជួយដល់កិច្ចការបោះឆ្នោតបឋមកាលពីខែកក្កដា ឆ្នាំ 2020។

Power for Democracy គឺជាក្រុមនយោបាយមួយដែលគាំទ្រប្រជាធិបតេយ្យនៅហុងកុង ដែលត្រូវបានបង្កើតឡើងកាលពីឆ្នាំ 2002 ដោយក្រុមសកម្មជនដែលគាំទ្រប្រជាធិបតេយ្យ។

Clancey គឺជាពលរដ្ឋអាមេរិកាំងដំបូងគេដែលត្រូវបានចាប់ខ្លួនទៅតាមច្បាប់សន្តិសុខនៅហុងកុង។ Clancey ក៏ជាប្រធានគណៈកម្មការសិទ្ធិមនុស្សអាស៊ី និងជាសហស្ថាបនិកម្នាក់នៃគណៈកម្មាធិការប្រតិបត្តិនៃក្រុមមេធាវីសិទ្ធិមនុស្សចិនផងដែរ។

Clancey ស្ថិតក្នុងចំណោមអតីតតំណាងរាស្ត្រ និងសកម្មជនបក្សប្រឆាំងរបស់ហុងកុងប្រមាណ 50 នាក់ដែលត្រូវបានប៉ូលិសហុងកុងចាប់ខ្លួនកាលពីព្រឹកមិញនេះ ដែលភាគច្រើនត្រូវបានចោទប្រកាន់ថា «ផ្ដួលរំលំរដ្ឋាភិបាល» ទៅតាមច្បាប់សន្តិសុខជាតិដែលត្រូវបានទីក្រុងប៉េកាំងអនុម័តកាលពីខែឧសភា ឆ្នាំ 2020។ នេះគឺករណីចាប់ខ្លួនជាក្រុមធំបំផុតដែលត្រូវបានធ្វើឡើងបន្ទាប់ពីច្បាប់សន្តិសុខជាតិរបស់ចិនបានចូលជាធរមាន។

សូមរំលឹកថា ច្បាប់សន្តិសុខជាតិសម្រាប់ទីក្រុងហុងកុងដែលត្រូវបានសភាចិនអនុម័តកាលពីថ្ងៃទី 30 មិថុនា ឆ្នាំ 2020 មិនត្រឹមតែទប់ស្កាត់ និងដាក់ទោសលើជនដែលធ្វើ “សកម្មភាពប្រឆាំង” នានានោះទេ តែច្បាប់នេះក៏រាប់បញ្ចូលទាំងសកម្មគំរាមកំហែងដល់សន្តិសុខផងដែរ៕

ប្រភព៖ AFP

January 6, 2021

ចិនរារាំងមិនឱ្យអ្នកជំនាញរបស់ WHO ស្រាវជ្រាវប្រភព Covid-19 នៅលើទឹកដីរបស់ខ្លួន

អាជ្ញាធរចិនបានប្រកាសថា មិនផ្ដល់ទិដ្ឋាការដល់ក្រុមអ្នកជំនាញរបស់អង្គការសុខភាពពិភពលោក សម្រាប់ការចូលមកកាន់ទីក្រុង Wuhan ដើម្បីស្រាវជ្រាវរកប្រភពរបស់វីរុស Covid-19 បើទោះសមាជិកមួយចំនួនបានចេញដំណើររួចហើយក្ដី។

ប្រតិភូនៃអ្នកជំនាញរបស់អង្គការសុខភាពពិភពលោក (WHO) មានគម្រោងទៅកាន់ទីក្រុង Wuhan នៃខេត្ត Hubei របស់ប្រទេសចិន ជាកន្លែងដែលត្រូវគេជឿថា ជាប្រភពនៃវីរុស Covid-19 ដើម្បីធ្វើការស្រាវជ្រាវលើករណីដំបូងៗនៃការឆ្លងវីរុសនេះ។ ក្រុមអ្នកជំនាញនេះ មិនមានបំណងស្រាវជ្រាវលើទ្រីស្ដីដែលថា Covid-19 មានប្រភពចេញពីបន្ទប់ពិសោធន៍នៅ Wuhan ដែលធ្លាប់ត្រូវបានក្រុមអ្នកវិទ្យាសាស្ត្របដិសេធនាពេលកន្លង។

វេជ្ជបណ្ឌិត Mike Ryan នាយកប្រតិបត្តិនៃកម្មវិធីសុខាភិបាលបន្ទាន់របស់ WHO បានឱ្យដឹងថា ប្រតិភូនេះរួមមាន ក្រុមអ្នកជំនាញមកពីប្រទេសនានាដែលបានធ្វើការយ៉ាងជិតស្និទ្ធជាមួយនឹងចិនទាក់ទងនឹងគម្រោងទៅកាន់ប្រទេសចិន។ លោក Ryan បាននិយាយកាលពីថ្ងៃទី 5 ខែមករាថា៖ «ក្រុមនេះនឹងចាប់ផ្ដើមធ្វើកិច្ចការនៅថ្ងៃស្អែក»។

ក៏ប៉ុន្តែ នៅពេលសមាជិកពីរនាក់ដែលនៅឆ្ងាយបានចេញដំណើរ ក្រុមអ្នកស្រាវជ្រាវនេះក៏បានទទួលព័ត៌មានថា ទិដ្ឋាការរបស់ពួកគេមិនត្រូវបានមន្ត្រីចិនអនុញ្ញាតនោះឡើយ។ សមាជិកម្នាក់បានត្រលប់ក្រោយវិញ ខណៈម្នាក់ទៀតកំពុងឆ្លងកាត់ប្រទេសទីបី។

លោក Tedros Adhanom Ghebreyesus ប្រធានអង្គការសុខភាពពិភពលោក បានសម្ដែងការខកចិត្តចំពោះព័ត៌មានខាងលើនេះ និងឱ្យដឹងថា បានអំពាវនាវឱ្យប្រទេសចិន អនុញ្ញាតឱ្យក្រុមអ្នកជំនាញបានចូលស្រុក។

លោក Tedros ថ្លែងថា៖ «ខ្ញុំបានទាក់ទងទៅកាន់ក្រុមមន្ត្រីចិន និងបានធ្វើឱ្យប្រាកដអំពីភារកិច្ចថា នេះគឺជាអាទិភាពមួយរបស់ WHO និងក្រុមអ្នកស្រាវជ្រាវអន្តរជាតិ»។

ជាច្រើនខែមកហើយ WHO បានប្រឹងប្រែងដើម្បីអាចបញ្ជូនក្រុមអ្នកជំនាញអន្តរជាតិទៅកាន់ប្រទេសចិន។ ពួកគេចាប់ផ្ដើមពិភាក្សាជាមួយក្រុមមន្ត្រីចិនតាំងពីខែកក្កដា ដើម្បីរកផ្លូវចូលទៅកាន់ទីក្រុង Wuhan ក្នុងបំណងស្រាវជ្រាវឱ្យដឹងប្រាកដថា តើវីរុស Covid-19 បានឆ្លងពីសត្វមកមនុស្សដោយរបៀបណាខ្លះ។

Ilona Kickbusch ប្រធានមជ្ឈមណ្ឌលសុខាភិបាលសកលនៅទីក្រុងហ្សឺណែវ យល់់ថា កត្តាភូមិសាស្ត្រនយោបាយបាននិងកំពុងរារាំងបណ្ដាប្រទេសក្នុងការសហការគ្នាដើម្បីប្រយុទ្ធប្រឆាំងនឹង Covid-19 ហើយអរិភាពដែលកើតឡើងអាចជាឧបសគ្គនៃយុទ្ធនាការស្វែងយល់អំពីប្រភព និងដំណើរការនៃរោគរាតត្បាត។

Kickbusch ថ្លែងថា៖ «ខ្ញុំគិតថា នឹងមានការលំបាកខ្លាំងនៅក្នុងការស្វែងរកប្រភពរបស់វីរុស ព្រោះថា ពេលវេលាបានកន្លងផុតទៅយូរណាស់មកហើយ»។

ក៏ប៉ុន្តែ ក្រុមអ្នកជំនាញរបស់ WHO សង្ឃឹមថា ការដែលចិនបដិសេធមិនឱ្យពួកគេចូលប្រទេសនេះ គ្រាន់តែជាបញ្ហាបន្ទាប់បន្សំប៉ុណ្ណោះ ហើយថា «បញ្ហាការិយាធិបតេយ្យនឹងត្រូវបានដោះស្រាយយ៉ាងឆាប់រហ័ស»៕

ប្រភព៖ Guardian

January 6, 2021

ប្រទេសដែលចាក់វ៉ាក់សាំង Covid-19 ជូនពលរដ្ឋ បើទោះមិនមានអ្នកឆ្លងសូម្បីតែម្នាក់

សាធារណរដ្ឋផៅឡូ អាចក្លាយជាប្រទេសមួយក្នុងចំណោមបណ្ដាប្រទេសដំបូងគេក្នុងពិភពលោកដែលបញ្ចប់យុទ្ធនាការចាក់វ៉ាក់សាំង Covid-19 បើទោះជាមិនទាន់មានអ្នកឆ្លងវីរុសនេះក៏ដោយ។

សាធារណរដ្ឋផៅឡូ (Palau) ដែលជាប្រទេសកោះមួយមានប្រជាជនសរុប 18,000 នាក់ កាលពីថ្ងៃទី 2 ខែមករា បានទទួលវ៉ាក់សាំង Covid-19 លើកទីមួយពីក្រុមហ៊ុនអាមេរិក Moderna។ ក្រសួងសុខាភិបាលប្រទេសនេះ បានប្រកាសនៅលើទំព័រ Twitter ថា យុទ្ធនាការចាក់វ៉ាក់សាំងបានចាប់ផ្ដើមចាប់ពីថ្ងៃទី 3 ខែមករា ឆ្នាំ 2021។

វ៉ាក់សាំងចំនួន 2,800 ដូសដំបូង ដែលបានបញ្ជូនដល់ប្រទេសនេះ ត្រូវបានចាក់ជូនក្រុមមនុស្សអាទិភាពដំបូង រួមមាន បុគ្គលិកសុខាភិបាលជួរមុខ ក្រុមមន្ត្រីសំខាន់ៗ និងក្រុមពលរដ្ឋងាយរងគ្រោះ ក្នុងនោះ ម្នាក់ៗនឹងត្រូវបានចាក់ពីរម្ជុលដែលមានគម្លាតពីគ្នា 28 ថ្ងៃ។

អង្គការសុខាភាពពិភពលោក (WHO) បានឱ្យដឹងថា សាធារណរដ្ឋផៅឡូ គឺជាប្រទេសមួយក្នុងចំណោមប្រទេសភាគតិចក្នុងពិភពលោកដែលមិនទាន់មានអ្នកឆ្លងវីរុស Covid-19 និងអ្នកស្លាប់ដោយសារវីរុសនេះ។ កាលពីខែមករា ឆ្នាំ 2020 នៅពេល Covid-19 បានចាប់ផ្ដើមរាតត្បាតតំបន់អាស៊ីប៉ាស៊ីហ្វិក ផៅឡូ គឺជាប្រទេសដែលបានចាប់ផ្ដើមប្រើប្រាស់វិធានការរឹតបន្តឹងព្រំដែនយ៉ាងតឹងរ៉ឹងបំផុត។

ផៅឡូបានចាប់ផ្ដើមបិទច្រកព្រំដែននៅក្នុងខែមីនា និងចាប់ផ្ដើមធ្វើតេស្តរកវីរុស Covid-19 ជូនពលរដ្ឋនៅក្នុងខែមេសា។ វិធានការទាំងនេះបានរួមចំណែកជួយឱ្យប្រទេសកោះមួយនេះ រួចផុតពីការរាតត្បាតរបស់ Covid-19។ នេះបើតាមការចែករំលែករបស់ឯកអគ្គរដ្ឋទូតប្រទេសផៅឡូនៅអង្គការសហប្រជាជាតិកាលពីខែឧសភា ឆ្នាំ 2020។

ជាប្រទេសឯករាជ្យ និងមានទំនាក់ទំនងសេរីជាមួយសហរដ្ឋអាមេរិក ផៅឡូ បានទទួលផលប្រយោជន៍ពីកម្មវិធីចាក់វ៉ាក់សាំងរបស់សហរដ្ឋអាមេរិក ឬហៅថា យុទ្ធនាការអភិវឌ្ឍវ៉ាក់សាំងមហាលឿនដែលមានឈ្មោះថា Operation Warp Speed (OWS)។

Sylvia Osarch អាយុ 60 ឆ្នាំ ជាវេជ្ជបណ្ឌិតផ្នែកមនុស្សចាស់ គឺជាមនុស្សដំបូងគេនៅផៅឡូ ដែលបានទទួលការចាក់វ៉ាក់សាំង Covid-19

ប្រទេសកោះ ផៅឡូ មានផ្ទៃដីត្រឹមតែ 459 គីឡូម៉ែត្រក្រឡាប៉ុណ្ណោះ ដែលនេះស្មើនឹង 1/6 នៃទំហំផ្ទៃដីរបស់ Rhode Island ជារដ្ឋតូចបំផុតនៅសហរដ្ឋអាមេរិក។ ជាមួយនឹងផ្ទៃក្រឡាតូចបែបនេះ ផៅឡូ អាចក្លាយជាប្រទេសដំបូងគេមួយក្នុងពិភពលោកដែលបញ្ចប់យុទ្ធនាការចាក់វ៉ាក់សាំង Covid-19។

តាមគម្រោងដំបូង ផៅឡូ នឹងបញ្ចប់យុទ្ធនាការចាក់វ៉ាក់សាំងនៅក្នុងខែឧសភា ប៉ុន្តែ Ritter Udui អ្នកទទួលខុសត្រូវលើស្ថានភាពបន្ទាន់របស់ក្រសួងសុខាភិបាល បាននិយាយថា ដំណាក់កាលបញ្ចប់យុទ្ធនាការនេះអាចនឹងយឺតជាងការគ្រោងទុក ដោយសារតែមានការពន្យារពេលក្នុងការផ្គត់ផ្គង់វ៉ាក់សាំងពីសហរដ្ឋអាមេរិក។

«ការចាក់វ៉ាក់សាំងមិនត្រូវបានចាប់បង្ខំនោះទេ ដូច្នេះទើបគោលដៅរបស់យើងគឺត្រូវចាក់វ៉ាក់សាំងឱ្យបាន 80% នៃប្រជាជនសរុប» Udui ថ្លែងបែបនេះ។

Sylvia Osarch អាយុ 60 ឆ្នាំ ជាវេជ្ជបណ្ឌិតផ្នែកមនុស្សចាស់ គឺជាមនុស្សដំបូងគេនៅផៅឡូ ដែលបានទទួលការចាក់វ៉ាក់សាំង Covid-19 ដែលបានធ្វើឡើងកាលពីថ្ងៃទី 3 ខែមករា។

ផៅឡូបានជ្រើសរើសវ៉ាក់សាំងដែលអភិវឌ្ឍដោយក្រុមហ៊ុន Moderna របស់សហរដ្ឋអាមេរិក ព្រោះថាវាអាចត្រូវបានរក្សាទុកក្នុងទូទឹកកកប្រភេទស្ដង់ដា ជំនួសឱ្យការរក្សាទុកក្នុងសីតុណ្ហភាព -70 អង្សាសេដូចជាវ៉ាក់សាំងរបស់ Pfizer។ ប៉ុន្តែ ក្រុមមន្ត្រីប្រទេសនេះបានឱ្យដឹងថា ផៅឡូ បានទទួលឃ្លាំងត្រជាក់មួយកាលពីចុងខែធ្នូ ឆ្នាំ2020 ដែលអាចរក្សទុកវ៉ាក់សាំង 5,000 ដូសរបស់ក្រុមហ៊ុន Pfizer៕

ប្រភព៖ CNN

January 6, 2021

កម្ពុជារកឃើញករណីវិជ្ជមាននឹងវីរុស Covid-19 ថ្មី 1នាក់ទៀត ខណៈតួលេខអ្នកឆ្លងសរុបនៅទូទាំងពិភពលោក ចេះតែបន្តកើនឡើង

ក្រសួងសុខាភិបាលកម្ពុជាបានប្រកាសថា បានរកឃើញករណីវិជ្ជមាននឹង Covid-19 ថ្មី ចំនួន 1 នាក់ទៀត នាំឱ្យតួលេខអ្នកឆ្លងវីរុសនេះសរុបឡើងដល់ 362 នាក់។

អ្នកវិជ្ជមានថ្មីនេះគឺជាបុរសជនជាតិខ្មែរ អាយុ 28 ឆ្នាំ នៅខេត្តប៉ៃលិន ជាពលករដែលទើបត្រលប់មកពីប្រទេសថៃ។ ព័ត៌មានលម្អិត សូមអាចតារាងខាងក្រោម។

គិតមកដល់ព្រឹកថ្ងៃទី 6 មករា ឆ្នាំ 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 383 នាក់ ក្នុងនោះមានអ្នកជាសះស្បើយចំនួន 362 នាក់ និងអ្នកកំពុងទទួលការព្យាបាលមានចំនួន 21 នាក់។

នៅទូទាំងពិភពលោកឯណោះវិញ បច្ចុប្បន្ន តួលេខនៃអ្នកបានឆ្លងវីរុសនេះ បានកើនឡើងដល់ 86,806,579 នាក់ ក្នុងនោះមានអ្នកស្លាប់ដល់ទៅ 1,874,318 នាក់ និងអ្នកជាសះស្បើយមានចំនួន 61,520,911 នាក់ ខណៈអ្នកកំពុងទទួលការព្យាបាលមានចំនួន 23,411,350 នាក់ ហើយក្នុងចំណោមនេះក៏មានអ្នកជំងឺ 107,872 នាក់ កំពុងប្រឈមនឹងការបាត់បង់ជីវិតដោយសារមានអាការធ្ងន់ធ្ងរ៕

January 6, 2021

(វីដេអូ) តើពិភពដទៃក្នុងប្រព័ន្ធព្រះអាទិត្យ មានព្រឹលធ្លាក់ដូចលើផែនដីដែរ ឬទេ?

តំបន់ជាច្រើននៅលើផែនដី នារដូវរងាតែងតែមានព្រឹលធ្លាក់។ ប៉ុន្តែ នៅលើភព និងទីកន្លែងផ្សេងៗក្នុងប្រព័ន្ធព្រះអាទិត្យវិញ តើមានធ្លាក់ព្រឹលដូច្នេះដែរ ឬទេ?

ភពព្រះអង្គារ (Mars) ភពព្រហស្បតិ៍ (Jupiter) និងព្រះចន្ទ Enceladus របស់ភពសៅរ៍ (Saturn) គឺជាទីកន្លែងដែលមានបាតុភូតដូចទៅនឹងការធ្លាក់ព្រឹលនារដូវរងានៅលើភពផែនដី។

មិនចាំបាច់ទៅរកឯណាឆ្ងាយនោះទេ ក្រុមអ្នកវិទ្យាសាស្ត្របានរកឃើញព្រឹលធ្លាក់នៅលើផ្កាយព្រះអង្គារ។ កាលពីឆ្នាំ 2008 យានចុះចត Phoenix របស់ទីភ្នាក់ងារអវកាសអាមេរិក (NASA) បានរកឃើញព្រឹលប្រភេទទឹកកក និងប្រភេទព្រឹលធម្មតាដូចនៅលើផែនដី បានធ្លាក់នៅក្បែរប៉ូលខាងជើងនៃភពព្រះអង្គារ។ ចំណែកព្រឹលទម្រង់ទឹកកកស្ងួត (CO2 កក) ត្រូវបានប្រទះឃើញធ្លាក់នៅជុំវិញប៉ូលខាងត្បូង។

យោងតាម NASA បើទោះជាមានសីតុណ្ហភាពជាធម្យម -63 អង្សាសេ ប៉ុន្តែ ព្រឹលដែលធ្លាក់មក តែងតែហួតជាចំហាយឡើងទៅលើ មុននឹងអាចធ្លាក់មកលើផ្ទៃរបស់ភពព្រះអង្គារ ដោយសារតែភពនេះមានបរិយាកាសស្ដើងពេក។

នៅលើភពព្រហស្បតិ៍វិញ ពពកទឹកកកធ្លាក់ចុះដោយលាយលំជាមួយនឹងទឹកកកប្រភេទទឹកធម្មតា និងអាម៉ូញាក់ ដែលវាស្រដៀងនឹងភ្លៀងទឹកកកច្រើនជាង។ បាតុភូតនេះត្រូវបានរកឃើញដោយយានអវកាស Juno របស់ NASA។

ទីកន្លែងដែលល្អបំផុតសម្រាប់លេងកីឡានារដូវរងាក្នុងប្រព័ន្ធព្រះអាទិត្យ នោះគឺ Enceladus ដែលជាព្រះចន្ទរបស់ភពសៅរ៍ ដោយមានចង្កេះភ្នំដែលគ្របដណ្ដប់ពេញដោយល្បាយទន់ៗដូចម្សៅ។ យោងតាមទិន្នន័យដែលបានមកពីយានអវកាស Cassini របស់ NASA គ្រាប់ទឹកកកល្អិតៗបាញ់ចេញពីដីទៅលើអាកាស ហើយធ្លាក់មកវិញទៅតាមទិសដែលគេអាចព្យាករបាន។ ក៏ប៉ុន្តែ ល្បឿននៃការធ្លាក់មកវិញរបស់គ្រាប់ទឹកនេះ មានសភាពយឺតជាងនៅលើផែនដី។ ផ្ទៃខាងលើរបស់ព្រះចន្ទ Enceladus ទទួលបានផង់ទឹកល្អិតនេះមិនដល់ 1/1,000 ផង នៅក្នុងមួយឆ្នាំ៕

ប្រភព៖ Amaze Lab

January 5, 2021

រថយន្តអគ្គិសនី Tesla ទើបតែបើកហាងនៅប្រទេសចិនសោះ លក់ដាច់ដូចវ៉ាក់សាំង Covid-19

Tesla បានធ្វើឱ្យមានការភ្ញាក់ផ្អើលថ្មីនៅប្រទេសចិន ដែលតភ្ជាប់ជោគជ័យដ៏ធំធេងកាលពីឆ្នាំ 2020 កន្លងទៅ ដោយទទួលបានការបញ្ជាទិញរថយន្តអគ្គិសនីដល់ទៅ 100,000 គ្រឿង ក្នុងរយៈពេលត្រឹមតែប៉ុន្មានម៉ោងប៉ុណ្ណោះ។

នៅក្នុងថ្ងៃដំបូងនៃឆ្នាំថ្មី ក្រុមហ៊ុន Tesla បានប្រកាសបង្ហាញវត្តមានរថយន្តអគ្គិសនី Model Y កំណែចិនជាផ្លូវការ ដោយដាក់លក់ក្នុងតម្លៃចាប់ពី 339,900 ដល់ 369,900 យន់ (52,570 ដល់ 57,210 ដុល្លារអាមេរិក)។

នៅពេលព័ត៌មាននេះត្រូវបានប្រកាស តួលេខនៃការបញ្ជាទិញរថយន្ត Tesla Model Y នៅប្រទេសចិន បានកើនឡើងលើសពី 100,000 គ្រឿង ដោយប្រើពេលត្រឹមតែ 10 ម៉ោងប៉ុណ្ណោះ។ ទន្ទឹមនឹងនេះ ចំនួនមនុស្សចូលមើលគេហទំព័ររបស់ Tesla ក៏កើនឡើងយ៉ាងខ្ពស់ បណ្ដាលឱ្យវាត្រូវផ្អាកដំណើរការមួយរយៈ។ មានព័ត៌មានមួយចំនួននិយាយថា រថយន្តថ្មីនឹងត្រូវបានប្រគល់ជូនអតិថិជននៅក្នុងខែមករា ឆ្នាំ 2021 នេះ។

រថយន្ត Tesla Model Y កំណែចិន មានរចនារូបរាងខាងមុខដូចទៅនឹងកំណែអន្តរជាតិ ប៉ុន្តែ រូបរាងខាងក្រោយគឺដូចទៅនឹង Model 3 និងមានបន្ថែមភាសាចិនទៅលើពាណិជ្ជសញ្ញា។

Model Y កំណែចិន ត្រូវបានបំពាក់ម៉ាស៊ីនកម្លាំង 431 សេះ អាចបង្កើនល្បឿនពី 0 – 100 គម ដោយប្រើពេល 5.1 វិនាទី ខណៈកំណែ Performance គឺ 3.7 វិនាទី។ បន្ទាប់ពីបានបញ្ចូលថាមពលពេញ រថយន្ត Model Y អាចបើកបរបាន 594 គម ចំណែកកំណែ Performance គឺ 480 គម។

Tesla បានបង្កឱ្យមានភាពជ្រួលជ្រើមថ្មីនៅប្រទេសចិន ទាក់ទងនឹងការនិយមប្រើប្រាស់រថយន្តអគ្គិសនី ដែលនេះបាននិងកំពុងបន្តអូសបន្លាយជោគជ័យដ៏ធំធេងរបស់ខ្លួនដែលទទួលបានកាលពីឆ្នាំ 2020 កន្លងទៅ៕

ប្រភព៖ chinapev

January 5, 2021

ចិនជិតចាប់ផ្ដើមសាងសង់នាវាផ្ទុកយន្តហោះក្នុងស្រុកទីបី

ប្រទេសចិន កំពុងត្រៀមខ្លួនសម្រាប់ការចាប់ផ្ដើមសាងសង់នាវាផ្ទុកយន្តហោះក្នុងស្រុកទីបី នៅដើមឆ្នាំ 2021 នេះ បើទោះជាជួបការលំបាកច្រើនទាក់ទងនឹងបញ្ហាហិរញ្ញវត្ថុ បច្ចេកទេស និងការហ្វឹកហ្វឺន។

ប្រភពព័ត៌មានពីកងទ័ពបានឱ្យដឹងថា នាវាផ្ទុកយន្តហោះក្នុងស្រុកទីបីរបស់ចិន គឺជាប្រភេទ Type 002 នឹងត្រូវបានចាប់ផ្ដើមសាងសង់នៅដើមឆ្នាំនេះ ក្នុងគ្រាដែលនាវាប្រភេទដូចគ្នាដំបូងកំពុងស្ថិតក្នុងដំណាក់កាលនៃការបង្ហើយ។ នាវាប្រភេទ Type 002 ទាំងពីរគ្រឿងនេះ អាចនឹងត្រូវបានបំពាក់ប្រព័ន្ធបាញ់បង្ហោះយន្តហោះទំនើបបំផុតក្នុងពិភពលោក។

នេះគឹជានាវាផ្ទុកយន្តហោះទីបីដែលផលិតឡើងដោយប្រទេសចិនផ្ទាល់ ប៉ុន្តែវាគឺជានាវាផ្ទុកយន្តហោះទីបួនរបស់ប្រទេសនេះ។ ប្រទេសចិន មុននេះបានទិញនាវាផ្ទុកយន្តហោះចាស់មួយគ្រឿងពីប្រទេសអ៊ុយក្រែន និងបានជួសជុលឡើងវិញ ហើយបានដាក់ឈ្មោះឱ្យថា Liaoning ដែលជានាវាផ្ទុកយន្តហោះដំបូងគេរបស់ប្រទេសនេះ។

ដោយយោងទៅតាមរចនារបស់ Liaoning ប្រទេសចិនក៏បានសាងសង់នាវាផ្ទុកយន្តហោះក្នុងស្រុកដំបូងគេដែលមានឈ្មោះថា Shandong និងត្រូវបានដាក់ឱ្យប្រើប្រាស់កាលពីខែធ្នូ ឆ្នាំ 2019។ ក្រោយមក ចិនក៏បានចាប់ផ្ដើមសាងសង់នាវាផ្ទុកយន្តហោះមួយប្រភេទផ្សេងទៀតដែលមានឈ្មោះថា Type 002 ដែលត្រូវបានគេជឿថា បំពាក់ឧបករណ៍បច្ចេកវិទ្យាទំនើបជាង Liaoning និង Shandong។

នាវាផ្ទុកយន្តហោះដំបូងដែលស្ថិតក្នុងប្រភេទ Type 002 ត្រូវបានចាប់ផ្ដើមសាងសង់កាលពីដើមឆ្នាំ 2017។ គម្រោងសាងសង់នាវាផ្ទុកយន្តហោះទីបួនរបស់ចិន ក៏ស្ថិតក្នុងប្រភេទ Type 002 ដែលត្រូវបានចាប់ផ្ដើមសាងសង់នៅចុងឆ្នាំ 2017 ប៉ុន្តែត្រូវពន្យារពេលដោយសារតែ Covid-19។

តំបន់ស្មុគស្មាញដែលមានតម្លៃ 2.8 ពាន់លានដុល្លារអាមេរិក ទំហំជាង 240 ហិកតា គឺជាកន្លែងសម្រាប់ធ្វើសកម្មភាពស្រាវជ្រាវ រចនារូបរាងនាវា និងជាទីដែលមានរោងចក្រនានាសម្រាប់ការសាងសង់នាវាផ្ទុកយន្តហោះ Type 002។

ប្រទេសចិនមានគម្រោងបង្កើតក្រុមនាវាផ្ទុកយន្តហោះយ៉ាងតិចចំនួនបួននៅក្នុងឆ្នាំ 2030 ដើម្បីក្លាយជាកម្លាំងជើងទឹកខ្លាំង និងទាន់សម័យជាងគេលំដាប់ទីពីរក្នុងពិភពលោក បន្ទាប់ពីសហរដ្ឋអាមេរិក។ ក៏ប៉ុន្តែ ប្រភពព័ត៌មានមួយចំនួនឱ្យដឹងថា ដំណើរការនៃការហ្វឹកហាត់របស់កងទ័ពជើងទឹកចិន នៅមិនទាន់ជឿនលឿន ខណៈក្រុមនាវិកនឹងមិនទទួលបានការបណ្ដុះបណ្ដាលគ្រប់គ្រាន់នៅក្នុងអំឡុងនាវាផ្ទុកយន្តហោះទីបួនត្រូវបានដាក់ទៅលើផ្ទៃទឹក៕

ប្រភព៖ SCMP

January 5, 2021

Author: សឿន សំណាង