សឿន សំណាង - La Reine Media

ទ្រព្យរបស់ Elon Musk បន្តកើនឡើងលើសពី 200 ពាន់លានដុល្លារ

មហាសេដ្ឋី Elon Musk បន្តបង្កើតកំណត់ត្រាថ្មីអំពីទំហំទ្រព្យសម្បត្តិដែលលោកកំពុងកាន់កាប់ ក្រោយពីបានដណ្ដើមបានតំណែងជាអ្នកមានជាងគេលំដាប់ទីមួយក្នុងពិភពលោក ពីមហាសេដ្ឋី Jeff Bezos។

បញ្ចប់ការជួញដូរកាលពីថ្ងៃទី 8 មករា មូលបត្រ Tesla បានកើនឡើងខ្ពស់ ជួយឱ្យទ្រព្យរបស់លោក Elon Musk កើនលើសពី 200 ពាន់លាន (200,000,000,000) ដុល្លារអាមេមេរិកជាលើកដំបូង។

យោងតាម Bloomberg Billionaires Index បច្ចុប្បន្ន មហាសេដ្ឋីអាមេរិកាំងដើមកំណើតអាហ្វ្រិកខាងត្បូងរូបនេះ កាន់កាប់ទ្រព្យសម្បត្តិដែលមានតម្លៃសរុបចំនួន 209 ពាន់លានដុល្លារអាមេរិក ច្រើនជាង 23 ពាន់លានដុល្លារបើធៀបនឹងមហាសេដ្ឋី Jeff Bezos។ រាប់ចាប់ពីដើមឆ្នាំ 2021 មកដល់បច្ចុប្បន្ន CEO របស់ Tesla រកបានប្រាក់បន្ថែមចំនួន 39.6 ពាន់លានដុល្លារ។

កាលពីខែសីហា ឆ្នាំ 2020 អគ្គនាយកប្រតិបត្តិរបស់ក្រុមហ៊ុន Amazon លោក Jeff Bezos បានក្លាយជាមនុស្សដំបូងគេក្នុងពិភពលោកដែលមានទ្រព្យចំនួន 200 ពាន់លានដុល្លារ។ ប៉ុន្តែ មិនយូរប៉ុន្មាន តួលេខនេះបានធ្លាក់ចុះ ដោយសារមូលបត្រ Amazon ធ្លាក់ថ្លៃ។ ក្រោយមក ទ្រព្យរបស់លោក Bezos ជាថ្មីម្ដងទៀត បានកើនឡើងលើសពី 200 ពាន់លានដុល្លារកាលពីខែតុលា ឆ្នាំ 2020។

បច្ចុប្បន្ន ពិភពលោកទាំងមូល មានមហាសេដ្ឋីចំនួន 5 រូប ដែលមានទ្រព្យចាប់ពី 100 ពាន់លានដុល្លារអាមេរិកឡើងទៅ។ ក្រៅពី Elon Musk និង Jeff Bezos ក៏មានលោក Bill Gates សហស្ថាបនិករបស់ Microsoft (134 ពាន់លានដុល្លារ) លោក Bernard Arnault ប្រធានក្រុមហ៊ុន LVMH (117 ពាន់លានដុល្លារ) និងលោក Mark Zuckerberg CEO របស់ Facebook (101 ពាន់លានដុល្លារ)។

មហាសេដ្ឋីដែលមានទ្រព្យច្រើនជាងគេបង្អស់នៅអាស៊ី Zhong Shanshan (អ្នកជំនួញចិន) និងកំពុងកាន់កាប់ទ្រព្យដែលមានតម្លៃសរុប 95.1 ពាន់លានដុល្លារអាមេរិក នឹងអាចមានឈ្មោះក្នុងក្រុមមហាសេដ្ឋីដែលមានទ្រព្យលើសពី 100 ពាន់លានដុល្លារនាពេលដ៏ខ្លីខាងមុខ៕

ប្រភព៖ Bloomberg

January 9, 2021

ផ្ទុះធំនៅអ៊ីតាលី មន្ទីរពេទ្យព្យាបាល Covid-19 ត្រូវជម្លៀសអ្នកជំងឺ

«រណ្ដៅយក្ស» មួយបានបង្ហាញខ្លួនក្រោយពីមានករណីផ្ទុះដ៏ធំមួយនៅក្បែរមន្ទីរពេទ្យក្នុងទីក្រុង Naples ប្រទេសអ៊ីតាលី បណ្ដាលឱ្យមានការជម្លៀសអ្នកជំងឺ Covid-19 ចេញទៅរកកន្លែងសុវត្ថិភាព។

រណ្ដៅយក្សមួយដែលមានទំហំប្រហែល 50ម និងជម្រៅប្រហែល 15ម បានបង្ហាញខ្លួនភ្លាមៗនៅក្នុងទីលានចតរថយន្តក្បែរមន្ទីរពេទ្យ Ponticelli កាលពីថ្ងៃទី 8 មករា បន្ទាប់ពីមានសំឡេងផ្ទុះមួយយ៉ាងធំ។ ករណីនេះបានធ្វើឱ្យរថយន្តជាច្រើនគ្រឿងត្រូវ «លេបត្របាក់» ចូលក្នុងដី ប៉ុន្តែមិនទាន់មានរបាយការណ៍ស្ដីអំពីការស្លាប់នៅឡើយ។

កងកម្លាំងជួយសង្គ្រោះត្រូវបានបញ្ជូនទៅដល់កន្លែងកើតហេតុ ខណៈការស៊ើបអង្កេតរកមូលហេតុកំពុងចាប់ផ្ដើម។

មន្ទីរពេទ្យ Ponticelli ដែលជាកន្លែងព្យាបាលអ្នកជំងឺ Covid-19 កំពុងត្រូវបានដាក់ឱ្យស្ថិតក្នុងស្ថានភាពអាសន្ន បន្ទាប់ពីមានរណ្ដៅយក្សនេះបង្ហាញខ្លួន។ មន្ទីរពេទ្យក៏ត្រូវប្រើប្រាស់ម៉ាស៊ីនភ្លើង ដោយសារតែខ្សែភ្លើងរដ្ឋបានដាច់ក្រោយការផ្ទុះ។

ការិយាល័យរដ្ឋអាជ្ញានៃទីក្រុង Naples នឹងធ្វើការស្រាវជ្រាវលើហេតុការណ៍នេះ បើទោះពួកគេមិនបានគិតដល់សម្មតិកម្មដែលថាមានការវាយប្រហារភេរវកម្ម។ ព័ត៌មានដំបូងបានឱ្យដឹងថា បំពង់នាំអុកស៊ីសែនក្រោមដីរបស់មន្ទីរពេទ្យទំនងជាបានលេចធ្លាយ បង្កឱ្យមានការប្រមូលផ្ដុំឧស្ម័ន និងនាំឱ្យមានការផ្ទុះនេះ៕

ប្រភព៖ RT

January 9, 2021

កម្ពុជារកឃើញអ្នកវិជ្ជមាននឹង Covid-19 ថ្មី ចំនួន 1ករណី ខណៈពិភពលោករកឃើញជាង 811,290 ករណី

ក្រសួងសុខាភិបាលកម្ពុជាបានប្រកាសឱ្យដឹងថា បានរកឃើញអ្នកវិជ្ជមាននឹង Covid-19 សរុបចំនួន 387 នាក់ ក្នុងនោះមានអ្នកឆ្លងថ្មីចំនួន 1 ករណី។

អ្នកវិជ្ជមានថ្មីខាងលើគឺជាពលករដែលទើបតែត្រលប់មកពីប្រទេសថៃ មានអាយុ 24 ឆ្នាំ ស្នាក់នៅក្នុងស្រុកមង្គលបុរី ខេត្តបន្ទាយមានជ័យ។ ព័ត៌មានបន្ថែម សូមអានតារាងខាងក្រោម។ ក្រៅពីអ្នកវិជ្ជមានថ្មីខាងលើ ក្នុងរយៈពេល 24 ម៉ោងកន្លងទៅនេះ កម្ពុជាក៏មានអ្នកជាសះស្បើយពីជំងឺ Covid-19 ចំនួន 3 នាក់ទៀតផងដែរ ដែលជាករណីនាំចូល ក្នុងនោះមាន 2 នាក់ជាពលករិនីត្រលប់មកពីប្រទេសថៃ និងម្នាក់ទៀតជាជនជាតិខ្មែរ-អាមេរិកាំង។

គិតមកដល់ព្រឹកថ្ងៃទី 9 ខែមករានេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 387 នាក់ ក្នុងនោះមានអ្នកជាសះស្បើយសរុប 364 នាក់ និងអ្នកកំពុងព្យាបាលមានចំនួន 22 នាក់។

នៅទូទាំងពិភពលោក បច្ចុប្បន្នអ្នកវិជ្ជមាននឹង Covid-19 សរុបឡើងដល់ 89,322,699 នាក់ ក្នុងនោះមាន 63,990,133 បានជាសះស្បើយ 1,920,754 នាក់បានស្លាប់ និង 23,411,824 នាក់កំពុងព្យាបាល ប៉ុន្តែក្នុងចំណោមនេះ មានអ្នកជំងឺ 108,858 នាក់កំពុងមានអាការធ្ងន់ធ្ងរ៕

January 9, 2021

FBI ប្រកាសផ្ដល់រង្វាន់ 50,000 ដុល្លារដើម្បីរកមុខអ្នកដាក់គ្រាប់បែកនៅវ៉ាស៊ីងតោន

FBI បានប្រកាសបង្ហាញរូបថត និងរង្វាន់ 50,000ដុល្លារអាមេរិកដើម្បីស្វែងរកជនសង្ស័យដែលបានឆ្លៀតឱកាសលើករណីវឹកវរដោយសារបាតុកម្មនៅវិមានសភាដើម្បីបង្កៃគ្រាប់បែក។

រូបថតដែលត្រូវបានការិយាល័យជាតិស៊ើបអង្កេត (FBI) ប្រកាសកាលពីយប់ថ្ងៃទី 7 ខែមករា បង្ហាញថា ជនសង្ស័យគឺជាបុរសម្នាក់ ពាក់ម៉ាស ពាក់អាវយឺតធំមានមួក និងពាក់ស្រោមដៃ។ បុរសនេះត្រូវបានគេជឿថា ជាប់ទាក់ទងនឹងករណីដាក់គ្រាប់បែកបំពង់ដែលកែច្នៃដោយខ្លួនឯងនៅខាងក្រៅទីស្នាក់ការកណ្ដាលរបស់គណៈកម្មការជាតិនៃបក្សសាធារណរដ្ឋ និងបក្សប្រជាធិបតេយ្យកាលពីថ្ងៃទី 6 ខែមករា។ ទីស្នាក់ការរបស់គណៈកម្មជាតិនៃបក្សទាំងពីរមានចម្ងាយពីវិមានសភាតែប៉ុន្មានជួរផ្ទះប៉ុណ្ណោះ។

FBI នឹងផ្ដល់រង្វាន់ចំនួន 50,000ដុល្លារដល់អ្នកទាំងឡាយណាដែលផ្ដល់ព័ត៌មាននាំទៅរកការកំណត់អត្តសញ្ញាណ ចាប់ខ្លួន និងដាក់ទោសដល់អ្នកដែលទទួលខុសត្រូវក្នុងករណីដាក់គ្រាប់បែកនេះ។ ជនសង្ស័យបានឆ្លៀតឱកាសនៃភាពច្របូកច្របល់ដែលកើតឡើងដោយសារបាតុករសម្រុកចូលវិមានសភាអាមេរិក ដើម្បីដាក់បង្កៃគ្រាប់បែក។

ប្រភពព័ត៌មានពីសមត្ថកិច្ចឱ្យដឹងថា គ្រាប់បែកទាំងពីរគ្រាប់នេះសុទ្ធតែអាចផ្ទុះ និងបង្កការខូចខាតធំធេងដល់ជីវិត បើសិនត្រូវបានបំផ្ទុះ។ ក្រុមបុគ្គលិកផ្នែករាវមីន បន្ទាប់មកក៏បានប្រើប្រាស់ឧបករណ៍បច្ចេកទេសដើម្បីបំបែកផ្នែកនីមួយៗរបស់គ្រាប់បែកចេញពីគ្នា មុនពេលបិទមិនឱ្យផ្ទុះ នៅចំពេលដែលក្រុមបាតុករគាំទ្រលោក Trump សម្រុកចូលវិមានសភា។ FBI ក៏កំពុងប្រមូលតម្រុយនានាដែលអាចពាក់ព័ន្ធនឹងករណីដាក់គ្រាប់បែកនេះ។

សូមរំលឹកថា យ៉ាងហោចណាស់មានមនុស្សចំនួន 5 នាក់បានស្លាប់ បន្ទាប់ពីបាតុកររាប់រយនាក់ដែលគាំទ្រលោក Donald Trump បានសម្រុកចូលតំបន់ Capitol Hill កាលពីថ្ងៃទី 6 ខែមករា ដើម្បីរារាំងសភាអាមេរិកមិនឱ្យទទួលស្គាល់លទ្ធផលបោះឆ្នោតដែលបញ្ជាក់ថា លោក Joe Biden ជាអ្នកទទួលបានជ័យជំនះ។ ក្នុងចំណោមជនរងគ្រោះក៏មានស្ត្រីម្នាក់ត្រូវបានប៉ូលិសបាញ់សម្លាប់ និងប៉ូលិសម្នាក់ប្រចាំនៅតំបន់ Capitol Hill ផងដែរ។

មនុស្សរាប់សិបនាក់ត្រូវបានចាប់ខ្លួនក្រោមបទចោទថា បានកាន់កាប់កាំភ្លើងខុសច្បាប់ និងប្រើប្រាស់អាវុធដែលត្រូវបានហាមឃាត់ រំលោភលើបទបញ្ជាបម្រាមគោចររបស់ទីក្រុង និងសម្រុកចូលវិមានសភាដោយខុសច្បាប់។

បន្ទាប់ពីមានអំពើហិង្សានៅវិមានសភា ប្រធានាធិបតី Donald Trump ក៏បានចេញសេចក្ដីថ្លែងការណ៍ថ្កោលទោសចំពោះក្រុមបាតុករដែលបានធ្វើឱ្យមានភាពវឹកវរនេះដែរ៕

ប្រភព៖ USA Today

January 8, 2021

Elon Musk ក្លាយជាអ្នកមានជាងគេលំដាប់ទីមួយក្នុងពិភពលោក

មហាសេដ្ឋី Elon Musk ដែលជា CEO របស់ក្រុមហ៊ុន Tesla និងជា CEO របស់ SpaceX ទើបតែបានបង្កើតកំណត់ត្រាថ្មីប្រកបដោយភាពមិនធម្មតា។

យោងតាមទិន្នន័យរបស់ Bloomberg អគ្គនាយកប្រតិបត្តិរបស់ក្រុមហ៊ុនផលិតរថយន្តអគ្គិសនី Tesla លោក Elon Musk បច្ចុប្បន្នមានទ្រព្យនៅក្នុងដៃដែលមានតម្លៃ 194.8 ពាន់លានដុល្លារអាមេរិក ច្រើនជាង 9.5 ពាន់លានដុល្លារបើធៀបជាមួយនឹងលោក Jeff Bezos ដែលជាអគ្គនាយកប្រតិបត្តិរបស់ក្រុមហ៊ុន Amazon និងជាអ្នកដែលធ្លាប់បានកាន់កាប់តំណែងអ្នកមានជាងគេលំដាប់ទីមួយក្នុងពិភពលោក ចាប់ពីខែតុលា ឆ្នាំ 2017។

នេះត្រូវបានគេចាត់ទុកថាជាបរិបទ «មិនធម្មតា» សម្រាប់លោក Elon Musk និងជាប្រការមួយដែលជួយឱ្យជោគជ័យរបស់មហាសេដ្ឋីរូបនេះ អូសបន្លាយបន្តទៅមុខទៀត។ ក្នុងឆ្នាំ 2020 មូលបត្ររបស់ Tesla បានកើនឡើងជាង 740% ដែលក្នុងកម្រិតនេះ ក្រុមអ្នកដែលឈប់ជឿជាក់លើ Tesla បានខាតបង់ជាង 38 ពាន់លានដុល្លារ ដោយសារបានលក់មូលបត្ររបស់ពួកគេ។

បច្ចុប្បន្ន Tesla គឺជាក្រុមហ៊ុនដែលមានតម្លៃទុនខ្ពស់ជាងគេបង្អស់បើធៀបនឹងក្រុមហ៊ុនផលិតរថយន្តដទៃ។ កាលពីឆ្នាំ 2020 Tesla បានប្រគល់រថយន្តជូនដល់ដៃអតិថិជនចំនួន 499,550 គ្រឿង ក្នុងនោះមាន 180,570 គ្រឿងត្រូវបានលក់ក្នុងត្រីមាសទីបួន។

កំណើនមិនឈប់ឈរនៃមូលបត្ររបស់ Tesla បាននិងកំពុងនាំមកនូវផលប្រយោជន៍យ៉ាងច្រើនដល់មហាសេដ្ឋីអាមេរិកាំងដើមកំណើតអាហ្វ្រិកខាងត្បូងរូបនេះ។ ព្រោះថា ក្រៅពីកាន់កាប់មូលបត្រ 20% លោក Musk ក៏កំពុងកាន់កាប់ប្រាក់ចំណេញប្រមាណ 40 ពាន់លានដុល្លារដែលបានមកពីសិទ្ធិជ្រើសរើសមូលបត្រដែលជារង្វាន់របស់ក្រុមហ៊ុនសម្រាប់រូបលោក។ តួលេខមូលបត្រទាំងនេះបានមកពីខ្ទង់រង្វាន់ចំនួនពីរនៅឆ្នាំ 2021 និងឆ្នាំ 2018 ហើយនេះគឺជាខ្ទង់រង្វាន់ដែលធំមិនធ្លាប់បានឃើញពីមុនមកសម្រាប់ CEO ម្នាក់ និងក្រុមប្រឹក្សាភិបាលក្រុមហ៊ុន។

ក្រុមអ្នកវិភាគអះអាងថា Elon Musk ប្រៀបដូចជាកូន Nicola Tesla ដែលជាអ្នកប្រាជ្ញជនជាតិអាមេរិកាំងដើមកំណើតស៊ែប៊ី ដែលបានរកឃើញអគ្គិសនីចរន្តឆ្លាស់ Alternating Current (AC) រួមនឹងប័ណ្ណប៉ាតង់ចំនួន 300 និងរបកគំឃើញជាច្រើនផ្សេងទៀត។ លោក Musk គឺជាមនុស្សម្នាក់ដែលហាក់មានអំណាចដ៏អាថ៌កំបាំងដែលមិនទាន់មានអ្នកណាដឹង។ មហាសេដ្ឋីរូបនេះមានការច្នៃប្រឌិតឥតដែនកំណត់របស់ NicolaTesla ឬ Leonardo da Vinci។

មនុស្សមួយចំនួនបានចាត់ទុកលោក Elon Musk ដូចទៅនឹងមនុស្សដែលមានចក្ខុវិស័យកម្រិតកំពូល។ ចំណែកអ្នកខ្លះថា លោកជាមនុស្សបោកប្រាស់ កំពូលអ្នកអង់អាច និងប្រកបដោយគ្រោះថ្នាក់។ ប៉ុន្តែ អ្នកជំនួញ វិស្វករ សប្បុរសជន និងជាកំពូលអ្នកចូលចិត្តធ្វើឱ្យគេរងរបួសផ្លូវចិត្តដោយសម្ដីរូបនេះ គឺពិតជា «ពូជកម្រ» របស់មនុស្សនៅក្នុងសហស្សវត្សរ៍ទី 21៕

January 8, 2021

សញ្ញាបែងចែក «សត្រូវ និងមិត្ត» លើកាំភ្លើងខ្លីរបស់ប៉ូលិសមួយចំនួនក្នុងអំពើហិង្សានៅសភាអាមេរិក

ក្រុមប៉ូលិសដែលស្លៀកពាក់ស៊ីវិលប្រចាំការនៅវិមានសភាសហរដ្ឋអាមេរិក បានបិទបង់ចាំងពន្លឺលើកាំភ្លើងខ្លីដើម្បីជាសញ្ញាបែកចែកថា «អ្នកណាជាសត្រូវ និងអ្នកណាជាមិត្ត» នៅក្នុងករណីបាតុកម្មហិង្សាដែលបានកើតឡើងនៅឯវិមានសភាសហរដ្ឋអាមេរិក។

ក្នុងពេលដែលក្រុមបាតុករគាំទ្រលោក Donald Trump កំពុងសម្រុកចូលអគារសភាជាតិនៅតំបន់ Capitol Hill កាលពីថ្ងៃត្រង់ ទី 6 ខែមករា ក្រុមមន្ត្រីប៉ូលិសប្រចាំនៅសភាដែលស្លៀកពាក់ស៊ីវិល នាំគ្នាតម្រង់ជួរនៅខាងក្រោយទ្វារបន្ទប់ប្រជុំ និងដកកាំភ្លើងខ្លី Glock ដើម្បីបិទតែមសម្គាល់ ក្នុងបំណងគំរាមដល់ក្រុមបាតុករដែលមាន «ឈាមរាវ»។ កំភ្លើងខ្លីដែលក្រុមប៉ូលិសស្លៀកពាក់ស៊ីវិលប្រើប្រាស់ បានធ្វើឱ្យមានការចាប់អារម្មណ៍ខ្លាំង ដោយសារនៅលើកាំភ្លើងមានតែម ឬបង់ឆ្នូតក្រហម-ស ដែលចាំងប្លាតពន្លឺ។

Tomer Israeli អតីតប្រធានសន្តិសុខនៃអង្គភាពស៊ើបការណ៍សម្ងាត់របស់អ៊ីស្រាអែល (Shin Bet) បានអះអាងថា ការដែលមន្ត្រីប៉ូលិសសភាអាមេរិកបិទតែមចាំងប្លាតពន្លឺនៅលើកាំភ្លើងខ្លី «មិនមែនជារឿងខុសប្រក្រតីនោះទេ»។ Tomer Israeli និយាយថា៖ «បង់នេះត្រូវបានប្រើដើម្បីបែងចែកមិត្តនិងសត្រូវ នៅក្នុងស្ថានការណ៍ដែលមានមនុស្សច្រើន ដែលនេះអាចជួយឱ្យក្រុមមន្ត្រីធ្វើការសម្រេចចិត្តបានត្រឹមត្រូវថា ត្រូវវាយប្រហារលើគោលដៅ ឬអត់ នៅក្នុងមួយប៉ប្រិចភ្នែក»។

កងកម្លាំងសន្តិសុខក៏ប្រើប្រាស់សញ្ញាពិសេសនៅលើកាំភ្លើង ដើម្បីកំណត់អត្តសញ្ញាណក្រុមរបស់ខ្លួន និងដើម្បីជៀសវាងការភាន់ច្រលំនៅក្នុងស្ថានភាពច្របូកច្របល់ ពិសេសនៅពេលមានខ្មាន់កាំភ្លើងម្នាក់ ឬច្រើននាក់ដែលប្រើប្រាស់កាំភ្លើងដូចពួកគេ។

និពន្ធនាយក Joseph Trevithick និង Tyler Rogoway របស់សារព័ត៌មាន The Drive បានអះអាងថា៖ «បង់ចាំងពន្លឺក៏ជាវិធីដើម្បីកំណត់អត្តសញ្ញាបានឆាប់រហ័សថា វាជាកាំភ្លើងរបស់ប៉ូលិសប្រចាំការនៅសភា ពោលគឺមិនមែនជាកាំភ្លើងសម្រាប់ប្រព្រឹត្តអំពើខុសច្បាប់ណាមួយនោះឡើយ»។ កាលពីពេលកន្លងទៅនេះ មន្ត្រីប៉ូលិសប្រចាំនៅសភាអាមេរិកក៏ធ្លាប់បានភ្លេចកាំភ្លើងនៅក្នុងបន្ទប់ទឹកជាច្រើនករណីផងដែរ។

ក្រុមមន្ត្រីប៉ូលិសនៅសភាអាមេរិក ចាប់តាំងពីឆ្នាំ 2019 ត្រូវបានបំពាក់កាំភ្លើងខ្លី ម៉ាក Glock 22។ ប៉ុន្តែ នៅក្នុងការប៉ះទង្គិចគ្នាជាមួយក្រុមបាតុករនៅសភាកាលពីថ្ងៃទី 6 មករា គេមិនទាន់ដឹងច្បាស់ថា កាំភ្លើងដែលក្រុមប៉ូលិសបានប្រើនោះជាប្រភេទអ្វីនៅឡើយ។

កងកម្លាំងសន្តិសុខពិសេស Shin Bet របស់អ៊ីស្រាអែល

នៅក្នុងការប៉ះទង្គិចនៅសភា គេឃើញមានមន្ត្រីប៉ូលិសយ៉ាងតិច 2 នាក់ កាន់កាំភ្លើងដែលមានសញ្ញាខាងលើ ខណៈមន្ត្រីផ្សេងពីនេះមិនមានសញ្ញានេះទេ។ ប៉ុន្តែគេមិនបានដឹងថា ក្នុងចំណោមពួកគេ មានមន្ត្រីរូបណាជាសមាជិករបស់កម្លាំងសម្ងាត់នៅទេ។

នៅពេលហេតុការណ៍កំពុងកើតឡើង ក្រុមមន្ត្រីប៉ូលិស និងកងកម្លាំងពិសេសនៃអធិការដ្ឋាននគរបាលក្រុងវ៉ាស៊ីងតោន អង្គភាពស៊ើបការណ៍ជាតិ (FBI) ស្ថាប័នគ្រប់គ្រងស្រា បារី អាវុធជាតិផ្ទុះ រួមនឹងនគរបាលយុត្តិធម៌ជាដើម ត្រូវបានបញ្ជូនទៅកាន់វិមានសភាដើម្បីជួយដល់កងកម្លាំងដែលនៅខាងក្នុង។ កងកម្លាំងការពារជាតិនៃតំបន់ពិសេស Columbia និង Virginia ក៏ត្រូវបានបញ្ជូនទៅកាន់កន្លែងកើតហេតុដើម្បីទប់ទល់នឹងបាតុករ ខណៈរដ្ឋមួយចំនួនក៏បានបញ្ជូនកងកម្លាំងប្រដាប់អាវុធរបស់ខ្លួន ទៅកាន់រដ្ឋធានីវ៉ាស៊ីងតោន៕

ប្រភព៖ Drive

January 8, 2021

អំពើហិង្សានៅសភាជាន់ខ្ពស់អាមេរិក បណ្ដាលឱ្យប៉ូលិសម្នាក់ស្លាប់! ប៉ុន្តែ អាជ្ញាធរបានបដិសេធដំណឹងនេះ

សមត្ថកិច្ចនៅតំបន់ Capitol Hill បានឱ្យដឹងថា ព័ត៌មានដែលថា មានមន្ត្រីប៉ូលិសម្នាក់បានស្លាប់នៅក្នុងករណីប្រើអំពើហិង្សានៅវិមានសភាអាមេរិកគឺជារឿងមិនពិត។

នៅក្នុងសេចក្ដីប្រកាសមួយកាលពីថ្ងៃទី 7 មករា ប៉ូលិសប្រចាំតំបន់ Capitol Hill បានឱ្យដឹងថា មន្ត្រីនគរបាលជាច្រើនរូបបានរងរបួស និងត្រូវបញ្ជូនចូលពេទ្យ ក្រោយពីក្រុមបាតុករគាំទ្រលោក Trump បានបង្កឱ្យមានអំពើហិង្សានៅវិមានសភា។ ប៉ុន្តែ បច្ចុប្បន្នមិនមានមន្ត្រីប៉ូលិសណាម្នាក់បានបាត់បង់ជីវិតនោះទេ។

មុននេះ ប្រភពព័ត៌មានជាច្រើនបានឱ្យដឹងថា មន្ត្រីប៉ូលិសម្នាក់នៅ Capitol Hill បានស្លាប់ដោយសារក្រុមបាតុករបានយកធុងពន្លត់អគ្គិសភ័យវាយចំក្បាល។ សារព័ត៌មាន NewsNation បានចុះផ្សាយថា មន្ត្រីប៉ូលិសខាងលើបានស្លាប់នៅក្នុងមន្ទីរពេទ្យ បន្ទាប់ពីក្រុមគ្រូពេទ្យបានដកឧបករណ៍ជំនួយដង្ហើម ដោយដឹងថា មន្ត្រីរូបនេះដាច់ខ្យល់ទៅហើយ។

សូមរំលឹកថា មនុស្សរាប់រយនាក់ដែលជាអ្នកគាំទ្ររបស់ប្រធានាធិបតី Donald Trump កាលពីថ្ងៃទី 6 ខែមករា បានបំផ្លាញរបងសន្តិសុខ និងសម្រុកចូលនៅខាងក្នុងតំបន់ Capitol Hill នៅពេលដែលសភាអាមេរិកាំងកំពុងបើកកិច្ចប្រជុំទទួលស្គាល់លទ្ធផលបោះឆ្នោត។ ក្រុមបាតុករបានប្រឈមមុខដាក់គ្នានឹងក្រុមប៉ូលិសប្រដាប់អាវុធ និងបានវាយបំផ្លាញឧបករណ៍មួយចំនួន។ ការប៉ះទង្គិចគ្នានេះបាននាំឱ្យកិច្ចប្រជុំរបស់សភាត្រូវផ្អាកបណ្ដោះអាសន្ន ខណៈក្រុមតំណាងរាស្ត្រខ្លះនាំគ្នារត់ពូនយករួចខ្លួន ខ្លះត្រូវបានជម្លៀសចេញពីកន្លែងកើតហេតុ។

ស្ត្រីម្នាក់ត្រូវបានប៉ូលិសនៅ Capitol Hill បាញ់សម្លាប់នៅនឹងកន្លែង និង 3 នាក់ទៀតបានស្លាប់នៅក្នុងមន្ទីរពេទ្យ ក្រោយពីការជួយសង្គ្រោះបន្ទាន់។ ប៉ូលិសនៅ Capitol Hill និងវ៉ាស៊ីងតោនជាង 50 នាក់ បានរងរបួស ក្នុងនោះមានម្នាក់ត្រូវបានបញ្ជូនទៅកាន់មន្ទីរពេទ្យ។

នៅក្នុងសេចក្ដីថ្លែងការណ៍មួយអំពីអំពើហិង្សាខាងលើ ប្រធានអធិការដ្ឋាននគរបាលតំបន់ Capitol Hill លោក Steven Sund បានថ្កោលទោសក្រុមបាតុករថា បានបញ្ចេញ «ភាពកាចសាហាវ» ដាក់ក្រុមប៉ូលិសដែលកំពុងការពារវិមានសភា និងក្រុមមន្ត្រីអនុវត្តច្បាប់ ដោយពួកគេបានប្រើប្រាស់បំពង់ដែក ជាតិគីមី និងអាវុធជាច្រើនផ្សេងទៀត។

ក្រុមតំណាងរាស្ត្រយល់ថា កងកម្លាំងសន្តិសុខខ្វះការប្រុងប្រៀបឱ្យបានល្អ បើទោះកាលពីច្រើនសប្ដាហ៍កន្លងទៅ លោក Trump បានអំពាវនាវឱ្យមានបាតុកម្មធំមួយដើម្បីរារាំងសភាមិនឱ្យទទួលស្គាល់ជ័យជំនះរបស់លោក Joe Biden។

ប៉ុន្តែ លោក Sund បានបកស្រាយថា ក្រុមប៉ូលិសបានត្រៀមកម្លាំងរួចរាល់សម្រាប់បាតុកម្មដែលបង្ហាញអំពីសេរីភាពបញ្ចេញមតិ ដោយមិនបានគិតដល់ការវាយប្រហារ និងអំពើហិង្សាយ៉ាងដូច្នេះ។ លោកថា នេះគឺជាអំពើហិង្សាដែលមិនដូចទៅនឹងព្រឹត្តិការណ៍ណាមួយដែលខ្លួនធ្លាប់បានជួបប្រទះនៅក្នុងរយៈពេល 30 ឆ្នាំនៃការចូលបម្រើការងារក្នុងវិស័យអនុវត្តច្បាប់។

លោក Steven Sund បានប្រកាសថា នឹងលាលាំងពីតំណែងនៅថ្ងៃទី 16 ខែមករា ទៅតាមការស្នើរបស់ប្រធានសភាជាន់ទាប Nancy Pelosi៕

ប្រភព៖ CNN, Abc27

January 8, 2021

Trump ថ្លែងការណ៍ជាលើកដំបូងក្រោយមានអំពើហិង្សានៅសភា

លោក Donald Trump បានថ្កោលទោសអំពើហិង្សា និងសន្យាថានឹងប្រគល់អំណាចដោយរលូនដល់រដ្ឋបាលលោក Biden នៅក្នុងការធ្វើសេចក្ដីថ្លែងការណ៍ជាសាធារណៈដំបូង ក្រោយពីមានអំពើហិង្សានៅសភា។

«យើងទើបតែបានឆ្លងកាត់ការបោះឆ្នោតប្រកបដោយភាពតានតឹង។ ប៉ុន្តែ ពេលនេះ ក្បាលដែលកំពុងក្ដៅ ត្រូវការត្រជាក់មកវិញ និងកែលម្អអស្ថិរភាព» លោក Trump ថ្លែងដូច្នេះនៅក្នុងវីដេអូមួយដែលត្រូវបានបង្ហោះនៅលើទំព័រ Twitter កាលពីយប់ថ្ងៃទី 7 មករា (ព្រឹកថ្ងៃទី 8 មករា នៅភ្នំពេញ)។

នេះគឺជាសេចក្ដីថ្លែងការណ៍ដំបូងរបស់ប្រធានាធិបតីអាមេរិក ក្រោយពីមានក្រុមអ្នកគាំទ្ររាប់រយនាក់របស់លោក បាននាំគ្នាសម្រុកចូលវិមានសភា នាំឱ្យមានភាពវឹកវរកើតឡើង។

លោក Trump ថ្លែងថា៖ «រដ្ឋាភិបាលថ្មីមួយនឹងស្បថចូលកាន់អំណាចនៅថ្ងៃទី 20 មករា។ អាទិភាពរបស់ខ្ញុំពេលនេះគឺការងាកទៅធានាដល់ការប្រគល់អំណាចប្រកបដោយភាពរលូន។ នេះជាដំណាក់កាលដែលត្រូវអំពាវនាវឱ្យមានការផ្សះផ្សាជាតិ»។

សេចក្ដីថ្លែងការណ៍នេះ ត្រូវបានគេជឿថា ជាការទទួលស្គាល់ដំបូងរបស់លោក Trump ចំពោះបរាជ័យក្នុងការបោះឆ្នោត។ លោក Trump ក៏បាននិយាយថា រយៈពេល 4 ឆ្នាំនៃការកាន់អំណាចគឺជា «កិត្តិយសនៃជីវិតរបស់ខ្ញុំ»។ យោងតាមសារព័ត៌មានអាមេរិក សំឡេងរបស់លោក Trump បានប្ដូរផ្លាស់ទាំងស្រុងក្នុងរយៈពេល 24 ម៉ោងកន្លងទៅនេះ។

«ក្រុមបាតុករដែលបានរំលោភចូលភ្នំ Capitol ធ្វើឱ្យល្អក់កករដល់ទីឋាននៃខឿនប្រជាធិបតេយ្យអាមេរិក។ ក្រុមអ្នកដែលបានចូលរួមប្រើអំពើហិង្សា និងបំផ្លិចបំផ្លាញ មិនតំណាងឱ្យប្រទេសជាតិយើងឡើយ។ ក្រុមអ្នកបំពានច្បាប់ នឹងត្រូវតែទទួលទោស» លោក Trump បញ្ជាក់យ៉ាងដូច្នេះ។

ក្រោយពីសភាអាមេរិកាំងបានទទួលស្គាល់ជ័យជំនះរបស់លោក Joe Biden លោក Trump តាមរយៈជំនួយការ ក៏បានឱ្យដឹងថា លោកនឹង «ប្រគល់អំណាចដោយរលូន» ទៅឱ្យរដ្ឋាភិបាលថ្មី៕

ប្រភព៖ AFP, Hill

January 8, 2021

ពិភពលោករកឃើញអ្នកឆ្លង Covid-19 សរុបជាង 88,459,000នាក់ ខណៈកម្ពុជាកើនជិតដល់ 390នាក់

ក្រសួងសុខាភិបាលកម្ពុជា នាព្រឹកថ្ងៃទី 8 ខែមករានេះ បានឱ្យដឹងថា បានរកឃើញករណីវិជ្ជមាននឹង Covid-19 ថ្មីចំនួន 1 នាក់ទៀតដែលជាពលការិនីទើបតែត្រលប់មកពីប្រទេសថៃ។

ករណីខាងលើនេះកើតឡើងចំពោះស្ត្រីជនជាតិខ្មែរ អាយុ 33 ឆ្នាំ នៅស្រុកបវេល ខេត្តបាត់ដំបង។ ព័ត៌មានលម្អិតសូមអានតារាងខាងក្រោម។

គិតមកដល់ព្រឹកថ្ងៃទី 8 ខែមករា ឆ្នាំ 2021 នេះ តួលេខសរុបនៃអ្នកឆ្លងវីរុស Covid-19 នៅកម្ពុជា បានឡើងដល់ 386 នាក់ ក្នុងនោះមានអ្នកជាសះស្បើយចំនួន 362 នាក់ និងអ្នកកំពុងព្យាបាលមានចំនួន 24 នាក់។

នៅទូទាំងពិភពលោក មានអ្នកឆ្លង Covid-19 សរុបចំនួន 88,459,051 នាក់ ក្នុងនោះមានអ្នកស្លាប់ចំនួន 1,905,209 នាក់ និង 63,595,615 នាក់បានជាសះស្បើយ ខណៈ 22,958,227 នាក់កំពុងទទួលការព្យាបាល ដែលក្នុងនេះមាន 108,292 នាក់កំពុងស្ថិតក្នុងស្ថានភាពគ្រោះថ្នាក់ដល់ជីវិត៕

January 8, 2021

កម្ពុជាមានអ្នកឆ្លង Covid-19 ចំនួន 2 ករណីទៀត ខណៈពិភពលោករកឃើញករណីថ្មី 779,691 នាក់

ក្រសួងសុខាភិបាលកម្ពុជា នាព្រឹកថ្ងៃទី 7 មករា ឆ្នាំ 2021 នេះ បានប្រកាសថា បានរកឃើញអ្នកវិជ្ជមាននឹង Covid-19 ចំនួន 2 ករណីបន្ថែម នាំឱ្យតួលេខសរុបនៃអ្នកឆ្លងវីរុសឡើងដល់ 385 នាក់។

ករណីវិជ្ជមានទាំង 2 នាក់ខាងលើ រួមមាន៖ ទីមួយគឺបុរសជនជាតិខ្មែរ អាយុ 26 ឆ្នាំ នៅស្រុកថ្មគោល ខេត្តបាត់ដំបង ជាពលករទើបតែត្រលប់មកពីប្រទេសថៃ និងទីពីរគឺបុរសជនជាតិខ្មែរ អាយុ 25 ឆ្នាំ នៅស្រុកមង្គលបុរី ខេត្តបន្ទាយមានជ័យ ជាពលករទើបត្រលប់មកពីប្រទេសថៃដូចគ្នា។

គិតមកដល់ព្រឹកថ្ងៃទី 7 ខែមករានេះ កម្ពុជាបានរកឃើញករណីវិជ្ជមាននឹង Covid-19 សរុបចំនួន 385 នាក់ ក្នុងនោះមានអ្នកជាសះស្បើយចំនួន 362 នាក់ និងអ្នកជំងឺកំពុងព្យាបាលចំនួន 23 នាក់។

នៅទូទាំងពិភពលោក គិតមកពេលនេះ មានអ្នកឆ្លងវីរុសសរុប 87,618,339 នាក់ ក្នុងនោះមានអ្នកស្លាប់ចំនួន 1,889,524 នាក់ និងអ្នកបានជាសះស្បើយចំនួន 63,119,308 នាក់។ ក្នុងចំណោមអ្នកកំពុងព្យាបាលចំនួន 22,609,507 នាក់ មាន 108,922 នាក់អាចបាត់បង់ជីវិតដោយសារមានអាការធ្ងន់ធ្ងរ។ ក្នុងរយៈពេល 24 ម៉ោងចុងក្រោយនេះ ពិភពលោករកឃើញអ្នកឆ្លងថ្មីចំនួន 779,691 នាក់៕

January 7, 2021

Author: សឿន សំណាង