សឿន សំណាង - La Reine Media

ប្រទេសនាំចេញប្រេងលំដាប់កំពូលរបស់ពិភពលោក ប្រកាសសាងសង់ទីក្រុងគ្មានរថយន្ត និងគ្មានកាបោន

កាលពីថ្ងៃទី 10 មករាកន្លងទៅ រាជបុត្រារបស់ប្រទេសអារ៉ាប៊ីសាអូឌីត ព្រះនាម Mohammed bin Salman បានប្រកាសបង្ហាញផែនការកសាងទីក្រុងមួយដែលមិនមានសកម្មភាពបញ្ចេញឧស្ម័នកាបោន ដែលស្ថិតក្នុងគម្រោងលំដាប់យក្ស NEOM។

អារ៉ាប៊ីសាអូឌីត ដែលជាប្រទេសនាំចេញប្រេងលំដាប់កំពូលរបស់ពិភពលោក បានប្រកាសអំពីគម្រោងបើកដំណើរការទីក្រុងធម្មជាតិ «គ្មានរថយន្ត គ្មានផ្លូវក្នុងក្រុង និងគ្មានសកម្មភាពបញ្ចេញឧស្ម័នពុលកាបោន» នៅក្នុងមហាគម្រោង NEOM។ NEOM ដែលមានតម្លៃ 500 ពាន់លានដុល្លារអាមេរិក ត្រូវបានកសាងតាមបណ្ដោយឆ្នេរសមុទ្រក្រហមនៅក្នុងប្រទេសអារ៉ាប៊ីសាអូឌីត ក្នុងបំណងធ្វើពិធិធកម្មខឿនសេដ្ឋកិច្ចជាតិ។

នៅលើកញ្ចក់ទូរទស្សន៍ជាតិអារ៉ាប៊ីសាអូឌីត រាជបុត្រា Mohammed bin Salman ឱ្យដឹងថា ទីក្រុងថ្មីនេះមានឈ្មោះថា The Line។ ក្នុងទីក្រុងឆ្លាតវៃ The Line ដែលមានបណ្ដោយ 170 គីឡូម៉ែត្រនេះ មនុស្ស 1 លាននាក់អាចស្នាក់នៅបាន និងធានាថា មិនមានរថយន្ត មិនមានផ្លូវសម្រាប់រថយន្ត និងមិនបញ្ចេញឧស្ម័នកាបោន។

ទីក្រុងនេះនឹងមានសេវាកម្មនានាដូចជាសាលារៀន មជ្ឈមណ្ឌលសុខភាព និងទីលានធម្មជាតិ ក៏ដូចជាប្រព័ន្ធដឹកជញ្ជូនសាធារណៈល្បឿនលឿនជាមួយនឹងការធ្វើដំណើរមិនលើសពី 20 នាទី។ បញ្ញាសិប្បនិម្មិតនឹងដើរតួនាទីសំខាន់ក្នុងទីក្រុងនេះ។ សកម្មភាពរបស់ទីក្រុងនេះនឹងដំណើរការដោយថាមពលស្អាត 100% នាំមកនូវបរិស្ថានស្អាត បរិសុទ្ធ និងស្ថិរភាពយូរអង្វែងសម្រាប់ប្រជាជន។

ការសាងសង់ទីក្រុងនេះនឹងត្រូវបានធ្វើឡើងចាប់ពីត្រីមាសទីមួយនៃឆ្នាំ 2021 នេះ ជាមួយនឹងជំនួយរបស់មូលនិធិវិនិយោគសាធារណៈរបស់អារ៉ាប៊ីសាអូឌីត។ តាមផែនការ គម្រោងនេះនឹងបង្កើតការងារចំនួន 380,000 មុខតំណែង និងរួមចំណែក 180 ពាន់លានរីយ៉ាល់ (48 ពាន់លានដុល្លារអាមេរិក) ទៅក្នុង GDP របស់ប្រទេសនេះក្នុងឆ្នាំ 2030។

នេះគឺជាផែនការសាងសង់ធំដំបូងនៅក្នុងគម្រោងយក្ស NEOM រាប់ចាប់ពីគម្រោងនេះត្រូវបានរាជបុត្រា bin Salman ប្រកាសកសាងកាលពីឆ្នាំ 2017 ដោយចាត់ទុកដូចជាសសរទ្រូងក្នុងគម្រោងចក្ខុវិស័យឆ្នាំ 2030 ដើម្បីកាត់បន្ថយការពឹងផ្អែករបស់អារ៉ាប៊ីសាអូឌីត ទៅលើប្រភពចំណូលពីប្រេង៕

ប្រភព៖ Economic Times

January 12, 2021

មហាសេដ្ឋីលំដាប់ទីមួយដំបូងគេក្នុងពិភពលោក ជាអ្នកណា និងមានស្ថានភាពបែបណានាបច្ចុប្បន្ន?

បច្ចុប្បន្ន ឈ្មោះ Bill Gates, Warren Buffett, Jeff Bezos និង Elon Musk ជាដើម ជាបុគ្គលធ្លាប់នាំមុខគេនៅក្នុងបញ្ជីចំណាត់ថ្នាក់អ្នកមានជាងគេរបស់ទស្សនាវដ្ដី Forbes ឬ Bloomberg (ឬទាំងពីរតែម្ដង) ដែលត្រូវមហាជនស្គាល់ច្រើន ប៉ុន្តែ គេហាក់ដូចកម្របានឮឈ្មោះ Yoshiaki Tsutsumi ដែលធ្លាប់ជាអ្នកមានផុតលេខកាលពីប៉ុន្មានទសវត្សរ៍មុន។

ជាមួយនឹងទ្រព្យដែលមានតម្លៃសរុបជិត 20 ពាន់លានដុល្លារអាមេរិក អ្នកជំនួញជនជាតិជប៉ុន Yoshiaki Tsutsumi គឺជាបុគ្គលដំបូងគេដែលត្រូវបាន Forbes លើកជាមហាសេដ្ឋីដែលមានទ្រព្យច្រើនជាងគេបង្អស់ក្នុងពិភពលោកកាលពីឆ្នាំ 1987។ បន្ទាប់មក លោក Yoshiaki Tsutsumi ក៏បានបន្តគ្រប់គ្រងតំណែងនេះរហូតដល់ឆ្នាំ 1990 និងឆ្នាំ 1993-1994។ ជាសរុប លោក Yoshiaki Tsutsumi ធ្លាប់បានស្ថិតនៅលើកំពូលតារាងចំណាត់ថ្នាក់អ្នកមានជាងគេរបស់ទស្សនាវដ្ដី Forbes ដល់ទៅ 6 លើក។

លោក Yoshiaki Tsutsumi កើនឆ្នាំ 1934 នៅក្នុងគ្រួសារអ្នកមានស្ដុកស្ដម្ភមួយនៅជប៉ុន។ ឪពុករបស់លោក Yoshiaki Tsutsumi គឺជាជីតារបស់ក្រុមគ្រួសារមួយក្នុងចំណោមត្រកូលនានាដែលមានឥទ្ធិពលខ្លាំងក្លាបំផុតក្នុងសង្គមជប៉ុននាសម័យទំនើប។ លោក Yoshiaki Tsutsumi កាលនោះគឺជាប្រធានក្រុមហ៊ុន Seibu ដែលជាក្រុមហ៊ុនមានអំណាចបំផុតក្នុងវិស័យផ្លូវដែក សណ្ឋាគារ និងអចលនទ្រព្យ នៅប្រទេសជប៉ុន។

អាយុ 30 ឆ្នាំ លោក Yasujiro បានទទួលមរតក និងគ្រប់គ្រងក្រុមហ៊ុន ក្រោយមរណភាពរបស់ស្ថាបនិកដែលជាឪពុករបស់ខ្លួន។ ក្រោយពីបានឡើងកាន់កាប់ លោកTsutsumi ក៏បានបន្តដឹកនាំក្រុមហ៊ុន Seibu ប្រកបដោយការរីកចម្រើន។ Tsutsumi បានទិញសណ្ឋាគារជាច្រើនកន្លែង តំបន់លេងស្គីលើទឹកកក ទីលានវាយកូនគោលជាដើម និងបានធ្វើឱ្យក្រុមហ៊ុនអចលនទ្រព្យរបស់ខ្លួនក្លាយជាក្រុមហ៊ុនមេធំដ៏សម្បើមមួយក្នុងពិភពលោក។

ហេតុអ្វីពេលនេះ មិនមានអ្នកណារំលឹកដល់ឈ្មោះ Tsutsumi ទៀត?

Tsutsumi ធ្លាប់មានអ្វីៗគ្រប់យ៉ាង និងធ្លាប់ស្ថិតនៅលើចំណុចកំពូលនៃក្ដីសង្ឃឹម។ ប៉ុន្តែ គួរឱ្យស្ដាយ ជីវិតបន្ទាប់មករបស់លោក បែរជាមិនទទួលបានលទ្ធផលល្អទៅវិញ។ វិបត្តិអចលនទ្រព្យនៅជប៉ុនបានដួលកើតឡើងចន្លោះឆ្នាំ 1986 ដល់ 1991 បណ្ដាលឱ្យសេដ្ឋកិច្ចជាតិត្រូវដាំក្បាលចុះ។ បញ្ហានេះបានធ្វើឱ្យ Seibu ធ្លាក់ទៅក្នុងវិបត្តិយ៉ាងធ្ងន់ធ្ងរ។ ប៉ុន្តែ នៅមានកត្តាផ្សេងមួយទៀតដែលនាំឱ្យ Seibu ត្រូវដួលរលំទាំងស្រុង នោះគឺចំណាត់ការរបស់រដ្ឋាភិបាលជប៉ុន។

ក្នុងឆ្នាំ 2004 ជប៉ុនបានបង្កើតស្ដង់ដាគណនេយ្យថ្មី និងគ្រប់គ្រងលើបណ្ដាក្រុមហ៊ុនយ៉ាងតឹងរ៉ឹង។ Seibu បានក្លាយជាគោលដៅរបស់រដ្ឋាភិបាល និងត្រូវបានរកឃើញកំហុសយ៉ាងច្រើន។ ចុងក្រោយ ពួកគេក៏ត្រូវបង្ខំចិត្តលុបចោលការបោះផ្សាយលក់មូលបត្រនៅក្នុងផ្សារហ៊ុន Tokyo។

លោក Yoshiaki Tsutsumi បច្ចុប្បន្នមានអាយុ 86 ឆ្នាំ

នេះគឺជាកាលៈទេសៈដ៏មហាសែនអាក្រក់នៅក្នុងជីវិតរបស់លោក Yoshiaki Tsutsumi ក៏ដូចជាសមាជិករបស់ត្រកូល Tsutsumi។ ឆ្នាំ 2005 លោក Yoshiaki Tsutsumi ត្រូវបានចាប់ខ្លួនក្រោមបទចោទថាបានធ្វើការជួញដូរក្រៅច្បាប់ និងក្លែងឯកសារ។ លោក Yoshiaki Tsutsumi ត្រូវពិន័យ 50,000 ដុល្លារអាមេរិក និងជាប់ពន្ធនាគារ 4 ឆ្នាំ។

ប៉ុន្តែ ភាពអាម៉ាស់របស់លោក មិនមែនជាការដែលត្រូវពិន័យ និងជាប់ពន្ធនាគារនោះទេ តែគឺជាការបាត់បង់ «អាណាចក្រ» Seibu។ នៅពេល Seibu ជួបរឿងអាស្រូវ លោក Yoshiaki Tsutsumi ក៏ត្រូវចាកចេញពីតំណែងនានាដែលលោកកំពុងកាន់កាប់នៅក្នុងក្រុមហ៊ុននេះ។ «ទ្រព្យសម្បត្តិរាប់ពាន់លានដុល្លាររបស់លោក ត្រូវបាត់បង់ទាំងស្រុងក្នុងរយៈពេលដ៏ខ្លីជាទីបំផុត» នេះបើតាមសារព័ត៌មាន Business Insider។

បច្ចុប្បន្ន លោក Tsutsumi មានវ័យ 86 ចូល 87 ឆ្នាំហើយ។ ដូច្នេះ ពិតជាពិបាកខ្លាំងណាស់ក្នុងការដែលលោកអាចសាងកេរ្តិ៍ឈ្មោះជាថ្មី៕

ប្រភព៖ BI

January 11, 2021

ថ្នាំព្យាបាលរលាកសន្លាក់ Actemra ជួយបង្កើនអត្រានៃការ «រួចជីវិត» ពី Covid-19 របស់អ្នកជំងឺធ្ងន់ធ្ងន់

ការសិក្សាស្រាវជ្រាវថ្មីមួយបានបង្ហាញថា ថ្នាំព្យាបាលជំងឺរលាកសន្លាក់ប្រភេទខ្សោយ actemra ឬហៅថា tocilizumab ដែលត្រូវបានសាកលវិទ្យាល័យ Osaka និងក្រុមហ៊ុនផលិតឱសថ Chugai សហការជាមួយអង្គការមួយចំនួនរបស់ជប៉ុនអភិវឌ្ឍនិងផលិតឡើង មានសមត្ថភាពក្នុងការបង្កើនអត្រា «រួចជីវិត» ពី Covid-19 របស់អ្នកជំងឺដែលមានអាការធ្ងន់ធ្ងរ។

លទ្ធផលនៃការពិសោធក្នុងការព្យាបាលអ្នកជំងឺ Covid-19 ដែលធ្វើឡើងដោយក្រុមអ្នកវិទ្យាសាស្ត្រនៃសាកលវិទ្យាល័យ Imperial College London (អង់គ្លេស) សហការជាមួយអង្គការមួយចំនួនបានបង្ហាញថា អត្រានៃការស្លាប់របស់អ្នកជំងឺ Covid-19 ចំនួន 350 នាក់ដែលប្រើប្រាស់ថ្នាំ actemra គឺស្មើនឹង 28% ទាបជាង 7.5% បើធៀបនឹងអ្នកជំងឺ Covid-19 ចំនួន 400 នាក់ដែលមិនបានប្រើប្រាស់ថ្នាំនេះ។ ទន្ទឹមនឹងនេះ ថ្នាំព្យាបាលរលាកសន្លាក់ប្រភេទកម្រិតស្រាលមួយផ្សេងទៀតក៏បានផ្ដល់លទ្ធផលប្រហាក់ប្រហែលគ្នានេះដែរ។

ថ្នាំ actemra មានប្រសិទ្ធភាពក្នុងការគ្រប់គ្រងប្រតិកម្មហួសកម្រិតរបស់ប្រព័ន្ធការពាររាងកាយ។ បច្ចុប្បន្ន ថ្នាំនេះកំពុងត្រូវបានប្រទេសជប៉ុន អង់គ្លេស និងប្រទេសជាច្រើនផ្សេងទៀតប្រើប្រាស់ដើម្បីព្យាបាលអ្នកជំងឺ Covid-19 ដែលមានអាការធ្ងន់ធ្ងរ។

ក្រៅពីថ្នាំ actemra កន្លងមក remdesivir ដែលជាថ្នាំព្យាបាលជំងឺបង្កឡើងដោយវីរុស ក៏បានធ្វើឱ្យមានការចាប់អារម្មណ៍ខ្លាំងនៅក្នុងពិភពវេជ្ជសាស្ត្រ ដោយសារវាមានប្រសិទ្ធភាពក្នុងការព្យាបាលជំងឺ Covid-19។ បច្ចុប្បន្ន remdesivir ទទួលបានការអនុញ្ញាតឱ្យប្រើប្រាស់នៅក្នុងប្រទេសជាង 50 ក្នុងពិភពលោក។ នៅជប៉ុន ថ្នាំ remdesivir នេះ ត្រូវបានអនុញ្ញាតឱ្យប្រើប្រាស់ចាប់ពីខែឧសភា ឆ្នាំ 2020។

បច្ចុប្បន្ន ក្រសួងសុខាភិបាលជប៉ុនក៏កំពុងពិចារណាលើលទ្ធភាពនៃការប្រើប្រាស់តែវ៉ាក់សាំង Covid-19 របស់ ក្រុមហ៊ុន Pfizer/BioNTech សម្រាប់ពលរដ្ឋដែលមានវ័យចាប់ពី 16 ឆ្នាំឡើងទៅ ព្រោះថា នៅប្រទេសជប៉ុន វ៉ាក់សាំងនេះ មិនទាន់ត្រូវបានយកទៅពិសោធលើក្រុមមនុស្សដែលមានអាយុក្រោម 20 ឆ្នាំនៅឡើយហើយក្រៅពីនេះ ការឆ្លងវីរុសនៅលើកុមារក៏មានអត្រាទាបផងដែរ។

មុននេះ ជប៉ុនបានចុះកិច្ចសន្យាទិញវ៉ាក់សាំង Covid-19 ចំនួន 60 លានដូសពីក្រុមហ៊ុន Pfizer/BioNTech សម្រាប់ប្រើប្រាស់នៅពាក់កណ្ដាលដើមឆ្នាំ 2021៕

ប្រភព៖ Japan Times

January 11, 2021

អ៊ីស្រាអែលគ្រោងនឹងចាក់វ៉ាក់សាំង Covid-19 ដល់ពលរដ្ឋទាំងថ្ងៃទាំងយប់

ប្រភពព័ត៌មានពីប្រទេសអ៊ីស្រាអែល បានឱ្យដឹងថា កាលពីថ្ងៃទី 10 ខែមករា ទំនិញជាវ៉ាក់សាំង Covid-19 ចំនួន 700,000 ដូសរបស់ក្រុមហ៊ុន Pfizer ត្រូវបានបញ្ជូនដល់អ៊ីស្រាអែលតាមជើងយន្តហោះ។

នាយករដ្ឋមន្ត្រីអ៊ីស្រាអែល Benjamin Netanyahu និងរដ្ឋមន្ត្រីក្រសួងសុខាភិបាល Yuli Edelstein ជាអ្នកទៅទទួលយកវ៉ាក់សាំងនេះដោយផ្ទាល់។

ក្នុងថ្ងៃដដែល ក្រសួងសុខាភិបាលប្រទេសនេះបានប្រកាសថា រហូតមកដល់បច្ចុប្បន្ន ពលរដ្ឋដែលមានអាយុលើសពី 60 ឆ្នាំ ចំនួន 70% បានចាក់វ៉ាក់សាំង Covid-19 រួចហើយ។ នៅក្នុងកិច្ចប្រជុំមួយជាមួយនឹងបុគ្គលិកក្នុងវិស័យនេះ រដ្ឋមន្ត្រីសុខាភិបាល Edelstein បានស្នើឱ្យរៀបចំផែនការចាក់វ៉ាក់សាំងជូនពលរដ្ឋទាំងថ្ងៃ ទាំងយប់ ដើម្បីទប់ស្កាត់ការឆ្លងវីរុសឱ្យបានជាអតិបរមា។

នាយករដ្ឋមន្ត្រី Netanyahu ឱ្យដឹងថា នឹងបង្កើនចំនួនអ្នកដែលត្រូវបានចាក់វ៉ាក់សាំងឱ្យបាន 170,000 នាក់ក្នុងមួយថ្ងៃ។ ប្រធានអង្គភាពប្រឆាំង Covid-19 លោក Nachman Ash ថ្លែងថា អ៊ីស្រាអែលមានលទ្ធភាពអាចចាក់វ៉ាក់សាំងជូនពលរដ្ឋបាន 200,000 នាក់ក្នុងមួយថ្ងៃ ដែលរួមមានទាំងការចាក់លើកទីមួយ និងលើកទីពីរ។

ក្រសួងសុខាភិបាលអ៊ីស្រាអែលបានចាប់ផ្ដើមរៀបចំគម្រោងសម្រាប់ការចាក់វ៉ាក់សាំងជូនបុគ្គលិកក្នុងវិស័យអប់រំ ក្នុងនោះ គ្រួបង្រៀនដែលត្រូវធ្វើការនៅក្នុងអំឡុងពេលមានបម្រាមគោចរទូទាំងប្រទេស នឹងមានអាទិភាពមុនគេ។ ក្រុមអាទិភាពបន្ទាប់គឺជាក្រុមមនុស្សដែលមានវ័យចាប់ពី 55 ដល់ 60 ឆ្នាំ ហើយបន្ទាប់មកទៀតគឺពលរដ្ឋដែលមានវ័យច្រើនជាង 50 ឆ្នាំ។

យោងតាមកិច្ចព្រមព្រៀងរវាងអ៊ីស្រាអែល និងក្រុមហ៊ុន Pfizer ជារៀងរាល់សប្ដាហ៍ Pfizer នឹងប្រគល់ទំនិញជាវ៉ាក់សាំងចំនួនរាប់ម៉ឺនដូសដល់អ៊ីស្រាអែល រហូតដល់ពលរដ្ឋទាំងអស់នៃប្រទេសនេះបានចាក់វ៉ាក់សាំងរួចរាល់។

គិតមកដល់បច្ចុប្បន្ន នៅអ៊ីស្រាអែល ពលរដ្ឋជាង 1.8 លាននាក់បានចាក់វ៉ាក់សាំង Covid-19 លើកទីមួយរួចហើយ ដែលតួលេខនេះគឺប្រហាក់ប្រហែលនឹង 20% នៃចំនួនប្រជាជនសរុបរបស់ប្រទេសនេះ។

រហូតមកដល់ថ្ងៃទី 11 មករានេះ ប្រទេសអ៊ីស្រាអែលបានរកឃើញអ្នកឆ្លងវីរុស Covid-19 សរុបចំនួន 491,319 នាក់ ក្នុងនោះមាន 3,671 នាក់បានស្លាប់ និង 419,907 នាក់បានជាសះស្បើយ៕

ប្រភព៖ Times of Israel

January 11, 2021

បារាំងទទួលវ៉ាក់សាំង Covid-19 វគ្គដំបូងពីក្រុមហ៊ុន Moderna

ក្នុងថ្ងៃទី 11 ខែមករានេះ បារាំងនឹងទទួលបានវ៉ាក់សាំង Covid-19 ជាង 50,000 ដូស ពីក្រុមហ៊ុនឱសថ Moderna ដែលទើបតែត្រូវបានសហភាពអឺរ៉ុប (EU) អនុម័ត ដើម្បីប្រើប្រាស់ក្នុងពេលដ៏ខ្លីខាងមុខនៅក្នុងតំបន់ទាំងឡាយដែលស្ថិតនៅភាគខាងកើត និងភាគអាគ្នេយ៍នៃប្រទេសនេះ។

នៅក្នុងសេចក្ដីជូនដំណឹងកាលពីថ្ងៃទី 10 ខែមករា ក្រសួងសុខាភិបាលបានឱ្យដឹងថា វ៉ាក់សាំងវគ្គដំបូងរបស់ Moderna នេះ រួមមាន 51,600 ដូស។

នៅលើរលកវិទ្យុ Europe 1 រដ្ឋមន្ត្រីក្រសួងសុខាភិបាលបារាំង Olivier Veran សង្កត់ធ្ងន់ថា វ៉ាក់សាំងទាំងនេះនឹងត្រូវបានបញ្ជូនភ្លាមៗទៅកាន់តំបន់ដែលកំពុងរងការឆ្លងរាលដាលខ្លាំងបំផុត ក្នុងនោះមានដូចជា ទីក្រុង Mulhouse, Colmar, Strasbourg, Reims, Nancy, Metz, Lons-le-Saunier, Besançon, Dijon, Moulins, Nice និងទីក្រុង Toulon។

តាមផែនការ រហូតដល់ចុងខែឧសភា បារាំងនឹងទទួលបានវ៉ាក់សាំងពីក្រុមហ៊ុន Moderna ប្រមាណជា 8 លានដូសបន្ថែមទៀត។ សម្រាប់វ៉ាក់សាំងនេះ គ្រប់គ្នានឹងត្រូវចាក់ពីរលើក ដោយចាក់ចន្លោះពីគ្នាយ៉ាងតិច 28 ថ្ងៃ។

អំពីការចាក់វគ្គដំបូងដែលប្រើប្រាស់វ៉ាក់សាំង BioNTech/Pfizer លោក Olivier Veran ឱ្យដឹងថា មកដល់ចុងសប្ដាហ៍កន្លងទៅនេះ មនុស្សចំនួនជាង 100,000 នាក់ បានចាក់វ៉ាក់សាំងនេះរួចហើយ។

ក្នុងរយៈពេល 24 ម៉ោងចុងក្រោយនេះ បារាំងបានរកឃើញអ្នកឆ្លងវីរុសចំនួនជិត 16,000 ករណី និងក្នុងនោះមាន 151 នាក់បានបាត់បង់ជីវិត៕

ប្រភព៖ France24

January 11, 2021

Donald Trump បញ្ជាឱ្យបង្ហូតទង់ជាតិពាក់កណ្ដាលដងដើម្បីរំលឹកដល់វិញ្ញាណក្ខន្ធមន្ត្រីប៉ូលិសដែលទទួលមរណភាពក្នុងព្រឹត្តិការណ៍ហិង្សានៅវិមានសភា

នៅក្នុងសេចក្ដីថ្លែងការណ៍មួយកាលពីថ្ងៃទី 10 ខែមករា ប្រធានាធិបតីអាមេរិក Donald Trump បានឱ្យដឹងថា ទង្វើខាងលើនេះគឺដើម្បីរំលឹកដល់វិញ្ញាណក្ខន្ធមន្ត្រីប៉ូលិសពីររូបដែលមានឈ្មោះថា Brian D. Sicknick និង Howard Liebengood។ ព្រឹត្តិការណ៍នេះនឹងត្រូវបានធ្វើឡើងនៅសេតវិមាន និងនៅតាមអគាររដ្ឋ រហូតដល់ថ្ងៃទី 13 មករា។

មន្ត្រីប៉ូលិសឈ្មោះ Sicknick បានស្លាប់នៅថ្ងៃទី 7 ខែមករាកន្លងទៅ បន្ទាប់ពីត្រូវបានវាយប្រហារដោយក្រុមបាតុករនៅវិមានសភា។ នៅក្នុងសេចក្ដីប្រកាសផ្លូវការមួយ ការិយាល័យប៉ូលិសប្រចាំតំបន់ Capitol Hill បានឱ្យដឹងថា មន្ត្រីប៉ូលិសខាងលើនេះបានរងរបួសនៅក្នុងពេលក្រុមបាតុករសម្រុកចូលវិមានសភា និងបានបាត់បង់ជីវិតនៅក្នុងមន្ទីរពេទ្យ។

មន្ត្រីប៉ូលិសដែលរងគ្រោះ ឈ្មោះ Brian D. Sicknick

ប៉ូលិសបានឱ្យដឹងថា នឹងធ្វើការស៊ើបអង្កេតអំពីការស្លាប់របស់ប៉ូលិសរងគ្រោះនេះ។ ចំណែក មន្ត្រីប៉ូលិសដែលមានឈ្មោះថា Liebengood ត្រូវបានប្រកាសថា បានបាត់បង់ជីវិតនៅក្នុងថ្ងៃទី 10 មករា។ បច្ចុប្បន្ន មិនទាន់ដឹងច្បាស់ថា ការស្លាប់នេះមានជាប់ទាក់ទងនឹងអំពើហិង្សារបស់ក្រុមបាតុករនៅវិមានសភាកាលពីថ្ងៃទី 6 ខែមករាដែរ ឬយ៉ាងណានៅឡើយ៕

ប្រភព៖ CNN

January 11, 2021

Kim Jong-un បានជាប់ឆ្នោតជាអគ្គលេខាធិការបក្សពលកររបស់កូរ៉េខាងជើង

មេដឹកនាំកូរ៉េខាងជើង លោក Kim Jong-un ត្រូវបានបោះឆ្នោតជ្រើសតាំងជាអគ្គលេខាធិការបក្សពលកររបស់កូរ៉េខាងជើងដែលកំពុងកាន់អំណាច នៅមហាសន្និបាតលើកដំបូងរបស់បក្ស ក្នុងអំឡុងជិត 5 ឆ្នាំកន្លងទៅនេះ។

សារព័ត៌មានរដ្ឋកូរ៉េខាងជើង (KCNA) ថ្ងៃនេះបានចេញផ្សាយថា លោក Kim បានជាប់ឆ្នោតជាអគ្គលេខាធិការក្រោយការបោះឆ្នោតក្នុងសន្និបាតរបស់បក្សពលករលើកទី 8។ KCNA បានឱ្យដឹងថា មហាសន្និបាតនេះត្រូវបានបើកពិភាក្សាចាប់ពីថ្ងៃទី 5 វិច្ឆិកានៅទីក្រុងព្យុងយ៉ាង និងកំពុងបន្តពិភាក្សា ប៉ុន្តែមិនបាននិយាយច្បាស់ថានឹងត្រូវបញ្ចប់នៅពេលនោះទេ។

ប្អូនស្រី និងជាជំនួយការផ្ទាល់របស់លោក Kim Jong-un គឺលោកស្រី Kim Yo-yong លែងមានវត្តមាននៅក្នុងបញ្ជីឈ្មោះសមាជិកជំនួសនៃការិយាល័យនយោបាយរបស់គណៈកម្មាធិការកណ្តាលនៃគណបក្សពលករទៀតហើយ។ មហាសន្និបាតបក្សលើកមុន ដែលជាមហាសន្និបាតដំបូងបង្អស់ត្រូវបានរៀបចំធ្វើឡើងក្រោយរយៈពេល 36ឆ្នាំ បានពិភាក្សារយៈពេល 4ថ្ងៃ បន្ទាប់ពីបានចាប់ផ្ដើមបើកកាលពីថ្ងៃទី 6ឧសភា ឆ្នាំ 2016។

លោក Kim បានក្លាយជាមេដឹកនាំកំពូលរបស់កូរ៉េខាងជើងចាប់តាំងពីខែធ្នូ ឆ្នាំ 2011 ក្រោយពីឪពុករបស់លោក គឺលោកប្រធានរដ្ឋ Kim Jong-il បានទទួលមរណភាព។ លោក Kim Jong-un ក៏ត្រូវបានជ្រើសរើសជាប្រធានបក្សកាលពីខែឧសភា ឆ្នាំ 2016 ហើយបានស្ដារ និងកាន់កាប់តំណែងជាអគ្គលេខាធិការចាប់តាំងពីពេលនោះផងដែរ៕

ប្រភព៖ Nikkei

January 11, 2021

កម្ពុជារកឃើញអ្នកវិជ្ជមាននឹង Covid-19 ថ្មី 1ករណីទៀត ខណៈពិភពលោករកឃើញជាង 598,800ករណី

ក្រសួងសុខាភិបាលកម្ពុជាបានប្រកាសថា មានករណីឆ្លង Covid-19 ថ្មីចំនួន 1 នាក់ទៀត នាំឱ្យតួលេខអ្នកវិជ្ជមាននឹងវីរុសនេះនៅកម្ពុជាកើនដល់ 392 នាក់។

ករណីវិជ្ជមានថ្មីនេះ កើតឡើងចំពោះស្ត្រីជនជាតិខ្មែរ អាយុ 23 ឆ្នាំ ស្នាក់នៅក្នុងស្រុកសង្កែ ខេត្តបាត់ដំបង ជាអ្នកដែលទើបតែបានត្រលប់មកពីប្រទេសថៃកាលពីថ្ងៃទី 8 មករា។ ព័ត៌មានបន្ថែមសូមអានក្នុងតារាងខាងក្រោម។

គិតមកដល់ព្រឹកថ្ងៃទី 11 ខែមករា ឆ្នាំ 2021 នេះ កម្ពុជាបានរកឃើញអ្នកឆ្លងវីរុស Covid-19 សរុបចំនួន 392 នាក់ ក្នុងនោះមានអ្នកជាសះស្បើយចំនួន 374 នាក់ និងអ្នកកំពុងព្យាបាលមានចំនួន 18 នាក់។

ពិភពលោកទើបតែបានរកឃើញអ្នកឆ្លងវីរុស Covid-19 ថ្មីចំនួនជាង 598,800 ករណី ធ្វើឱ្យតួលេខសរុបកើនដល់ជាង 90,662,900 នាក់ ក្នុងនោះមានអ្នកជំងឺជាង 1,942,300 នាក់បានស្លាប់ និងជាង 64,788,500 នាក់បានជាសះស្បើយ។ បច្ចុប្បន្ន ពិភពលោកនៅមានអ្នកជំងឺជាង 23,931,980 កំពុងព្យាបាល ក្នុងនោះមានជាង 108,000 នាក់កំពុងប្រឈមនឹងការស្លាប់ដោយសារអាការធ្ងន់ធ្ងន់៕

January 11, 2021

ធ្លាក់យន្តហោះនៅឥណ្ឌូនេស៊ី! អ្នកនេសាទប្រាប់ថា «យន្តហោះដាំក្បាលចុះលឿនដូចរន្ទះ» មុននឹងផ្ទុះខ្ទេចខ្ទី

អ្នកនេសាទ Solihin បានរៀបរាប់ថា យន្តហោះបានធ្លាក់ដាំក្បាលចុះសមុទ្រ «លឿនដូចរន្ទះ» មុននឹងផ្ទុះនៅលើផ្ទៃទឹក បង្កើតបានជាបំណែកជាច្រើន ហោះ ខ្ទាតចេញពាសពេញផ្ទៃសមុទ្រ។

យន្តហោះ Boeing 737-500 ដែលមានស្លាកលេខ SJ 182 របស់ក្រុមហ៊ុន Srivifaya Air ដឹកអ្នកដំណើរ 62 នាក់ កាលពីថ្ងៃទី 9 មករា បានធ្លាក់នៅក្នុងលម្ហសមុទ្រ Jakarta ប្រទេសឥណ្ឌូនេស៊ី បន្ទាប់ពីហោះឡើងបានប៉ុន្មាននាទីប៉ុណ្ណោះ។ សារព័ត៌មាន Flightradar24 បានឱ្យដឹងថា យន្តហោះបានហោះក្នុងកម្ពស់ 3,000 ម៉ែត្រក្នុងរយៈពេលមិនដល់ 1 នាទីនោះទេ មុននឹងវាបាត់ខ្លួន។ សាក្សីជាច្រើនបានប្រាប់ថា ពួកគេបានឮសំឡេងផ្ទុះយ៉ាងតិចមួយ នៅពេលយន្តហោះធ្លាក់ទៅលើផ្ទៃសមុទ្រ។

«យន្តហោះបោះពួយយ៉ាងលឿនដូចផ្លេកបន្ទោរ សំដៅមកកាន់ផ្ទៃសមុទ្រ និងផ្ទុះខ្ទេចខ្ទីនៅក្រោមទឹក។ វាធ្លាក់នៅជិតពួកខ្ញុំ បំណែករបស់យន្តហោះហាក់ដូចខ្ទាតវិះចំទូករបស់ពួកយើង» អ្នកនេសាទ Solihin ជាអ្នកបានឃើញហេតុការណ៍ផ្ទាល់ និយាយដូច្នេះ។

មនុស្សមួយចំនួនដែលរស់នៅលើកោះក្បែរកន្លែងយន្តហោះបាត់ខ្លួន ឱ្យដឹងថា ពួកគេប្រទះឃើញបំណែកមួយចំនួនដែលសង្ស័យថាជាបំណែកយន្តហោះដែលបានធ្លាក់នេះ រួមមានដូចជាខ្សែភ្លើង បន្ទះក្រណាត់ខោខៅប៊យ និងបន្ទះលោហធាតុមួយចំនួននៅលើផ្ទៃទឹក។

ក្រុមមន្ត្រីឥណ្ឌូនេស៊ីបានឱ្យដឹងថា យន្តហោះនេះដឹកអ្នកដំណើរចំនួន 50 នាក់ រួមមានទាំងកុមារចំនួន 10 នាក់ និងអាកាសយានិកចំនួន 12 នាក់ បើទោះវាអាចផ្ទុកបាន 130 នាក់ក៏ដោយ។ ជនរងគ្រោះទាំងនេះ សុទ្ធតែជាពលរដ្ឋឥណ្ឌូនេស៊ី។ បច្ចុប្បន្ន មិនទាន់ដឹងច្បាស់អំពីជោគវាសនារបស់ជនរងគ្រោះទាំងនេះនៅឡើយ។

Sriwijaya Air ដែលជាក្រុមហ៊ុនអាកាសចរណ៍តម្លៃទាបត្រូវបានបង្កើតឡើងកាលពីឆ្នាំ 2003 និងមានទីស្នាក់ការនៅទីក្រុង Jakarta ភាគច្រើនបម្រើសេវាកម្មក្នុងស្រុក និងក្នុងតំបន់អាស៊ីអាគ្នេយ៍។ ក្រុមហ៊ុនដែលមានយន្តហោះសរុបចំនួន 19 គ្រឿងនេះ មិនធ្លាប់បានជួបគ្រោះថ្នាក់ណាមួយដែលបណ្ដាលឱ្យមានមនុស្សស្លាប់នោះទេចាប់ពីត្រូវបានបើកដំណើរការ៕

ប្រភព៖ BBC

January 10, 2021

កម្ពុជារកឃើញអ្នកវិជ្ជមាននឹង Covid-19 ចំនួន 6 ករណីទៀត ខណៈពិភពលោករកឃើញ 722,862 នាក់

ក្រសួងសុខាភិបាលបានឱ្យដឹងថា បានរកឃើញអ្នកឆ្លងវីរុស Covid-19 ថ្មីចំនួន 6 នាក់ទៀតក្នុងអំឡុង 24 ម៉ោងកន្លងទៅនេះ នាំឱ្យតួលេខសរុបនៃអ្នកបានឆ្លងវីរុសកើនដល់ 391 នាក់។

អ្នកវិជ្ជមាននឹង Covid-19 ទាំងនេះ សុទ្ធតែជាពលករិនីខ្មែរដែលទើបត្រលប់មកពីប្រទេសថៃ។ ព័ត៌មានលម្អិតសូមអានបញ្ជីខាងក្រោម។

គិតមកដល់ថ្ងៃទី 10 ខែមករានេះ កម្ពុជាមានអ្នកឆ្លងវីរុសសុរបចំនួន 391 នាក់ ក្នុងនោះមានអ្នកជាសះស្បើយចំនួន 371 នាក់ និងអ្នកកំពុងព្យាបាលចំនួន 20 នាក់។

នៅទូទាំងពិភពលោក តួលេខអ្នកវិជ្ជមាននឹង Covid-19 សរុបបានឡើងដល់ 90,054,768 នាក់ ក្នុងនោះអ្នកស្លាប់បានកើនដល់ 1,933,575 នាក់ និងអ្នកកំពុងព្យាបាលមានចំនួន 23,670,346 នាក់ ខណៈអ្នកជំងឺបានជាសះស្បើយមានចំនួន 64,450,847 នាក់៕

January 10, 2021

Author: សឿន សំណាង