សឿន សំណាង - La Reine Media

Kim Jong-un សន្យាបង្កើនចំនួនក្បាលគ្រាប់នុយក្លេអែរ និងឃ្លាំងអាវុធរបស់កូរ៉េខាងជើង

មេដឹកនាំប្រទេសកូរ៉េខាងជើង បានប្រកាសថា នឹងបង្កើនកម្លាំងអាវុធនុយក្លេអែររបស់ប្រទេសនេះ ក្នុងគ្រាដែលពិធីស្បថចូលកាន់តំណែងរបស់ប្រធានាធិបតីជាប់ឆ្នោតអាមេរិក លោក Joe Biden ជិតមកដល់។

«ក្នុងពេលកំពុងលើកកម្ពស់សមត្ថភាពផ្នែកអាវុធនុយក្លេអែរ យើងក៏ត្រូវការធ្វើគ្រប់យ៉ាងដើម្បីកសាងកងទ័ពឱ្យមានឥទ្ធិពលបំផុត» ទីភ្នាក់ងារសារព័ត៌មានរដ្ឋកូរ៉េខាងជើង KCNA ថ្ងៃនេះបានដកស្រង់ និងចុះផ្សាយសម្ដីរបស់មេដឹកនាំ Kim Jong-un ដែលបានថ្លែងនៅក្នុងពិធីបិទបញ្ចប់មហាសន្និបាតលើកទី 8 របស់បក្សពលករ។

មុននេះ ក្នុងអំឡុងមហាសន្និបាតដែលអូសបន្លាយពេល 8 ថ្ងៃ លោក Kim Jong-un បានហៅសហរដ្ឋអាមេរិកថាជា «ឧបសគ្គចម្បងចំពោះការអភិវឌ្ឍរបស់កូរ៉េខាងជើង និងជា «សត្រូវធំបំផុត»។ លោក Kim ថ្លែងថា «គោលបំណងពិតក្នុងគោលនយោបាយរបស់ពួកគេសម្រាប់កូរ៉េខាងជើង នឹងមិនដែលមានការប្ដូរផ្លាស់អ្វីនោះឡើយ បើទោះជាអ្នកឡើងកាន់អំណាចក៏ដោយ»។

យោងតាមក្រុមអ្នកវិភាគ លោក Kim ទំនងជាកំពុងស្វែងរកវិធីដើម្បីទាក់ទាញចំណាប់អារម្មណ៍ពីរដ្ឋាភិបាលរបស់លោក Biden នៅក្នុងគ្រាដែលកូរ៉េខាងជើងកំពុងត្រូវបានដាក់ឱ្យនៅឯកាជាងពេលណាៗទាំងអស់ បន្ទាប់ពីបានបិទព្រំដែនដើម្បីទប់ស្កាត់ Covid-19។

មេដឹកនាំកូរ៉េខាងជើងក៏បានប្រកាសថា ប្រទេសនេះសម្រេចបានផែនការអភិវឌ្ឍនាវាមុជទឹកដំណើរការដោយថាមពលនុយក្លេអែរ ទន្ទឹមនឹងនេះក៏បានលើកឡើងនូវបញ្ជីអាវុធដែលទីក្រុងព្យុងយ៉ាងចង់ចាប់យក រួមមាន ក្បាលគ្រាប់សម្រាប់កាំជ្រួចល្បឿនលឿនជាងសំឡេង ផ្កាយរណបឈ្លបយកការណ៍ផ្នែកយោធា និងកាំជ្រួចផ្លោងឆ្លងទ្វីបដែលប្រើឥន្ធនៈរឹង។

កម្មវិធីអភិវឌ្ឍអាវុធរបស់កូរ៉េខាងជើង បានរីកចម្រើនយ៉ាងឆាប់រហ័សក្រោមការដឹកនាំរបស់លោក Kim Jong-un។ ទីក្រុងព្យុងយ៉ាងក៏បានធ្វើការសាកល្បងអាវុធនុយក្លេអែរធំបំផុតដែលប្រទេសនេះមិនធ្លាប់មានពីមុនមក និងបានផលិតកាំជ្រួចដែលមានសមត្ថភាពបាញ់ដល់ទឹកដីទាំងមូលរបស់សហរដ្ឋអាមេរិក។ ក៏ប៉ុន្តែអ្វីដែលប្រទេសនេះទទួលបានមកវិញ នោះគឺការដាក់ទណ្ឌកម្មពីអន្តរជាតិកាន់តែធ្ងន់ឡើង៕

ប្រភព៖ AFP

January 13, 2021

កម្ពុជារកឃើញអ្នកឆ្លង Covid-19 ថ្មី 6នាក់បន្ថែមទៀត ខណៈពិភពលោករកឃើញ 16,000 នាក់

ក្រសួងសុខាភិបាលកម្ពុជាបានប្រកាសថា បានរកឃើញអ្នកវិជ្ជមាននឹង Covid-19 ចំនួន 6 នាក់បន្ថែមទៀត នាំឱ្យតួលេខសរុបកើនដល់ 398 នាក់។

ករណីឆ្លងថ្មីខាងលើនេះ សុទ្ធតែបានកើតឡើងចំពោះពលការិនីជនជាតិខ្មែរដែលទើបត្រលប់មកពីប្រទេសថៃ។ ព័ត៌មានលម្អិតនៃករណីឆ្លងវីរុសថ្មីនេះ សូមអានតារាងខាងក្រោម។

គិតមកដល់ព្រឹកថ្ងៃទី 13 មករានេះ កម្ពុជាមានអ្នកវិជ្ជមាននឹង Covid-19 សរុបចំនួន 398 នាក់ ក្នុងនោះមានអ្នកជាសះស្បើយចំនួន 376 នាក់ និងអ្នកជំងឺកំពុងសម្រាកព្យាបាលចំនួន 22 នាក់។

នៅទូទាំងពិភពលោក មានមនុស្សជាង 91,968,000 នាក់បានឆ្លងវីរុស Covid-19 ខណៈអ្នកស្លាប់ដោយសារវីរុសនេះកើនដល់ជាង 1,968,000 នាក់ និងអ្នកកំពុងព្យាបាលមានចំនួនជាង 24,219,400 នាក់។ អ្នកជំងឺដែលបានជាសះស្បើយ មានចំនួនជាង 65,780,000 នាក់។ ក្នុងរយៈពេល 24 ម៉ោងកន្លងទៅនេះ ពិភពលោករកឃើញអ្នកឆ្លងថ្មីចំនួន 16,595 នាក់់៕

January 13, 2021

ឥណ្ឌូនេស៊ីបានទទួលវ៉ាក់សាំង Covid-19 Sinovac ចំនួន 15លានដូសបន្ថែមទៀត

ឥណ្ឌូនេស៊ីបានទទួលវ៉ាក់សាំង Covid-19 វគ្គទីបី ពីក្រុមហ៊ុន Sinovac Biotech របស់ប្រទេសចិន បន្ទាប់ពីយុទ្ធនាការចាក់វ៉ាក់សាំងទូទាំងប្រទេសចាប់ផ្ដើមធ្វើឡើងបានមួយថ្ងៃ។

វ៉ាក់សាំង Sinovac វគ្គទីបី ដែលមាន 15 លានដូសនេះ ត្រូវបានដឹកមកដល់ព្រលានយន្តហោះអន្តរជាតិ Soekarno-Hatta ជាយក្រុង Jakarta កាលពីថ្ងៃទី 12 មករាកន្លងទៅ។ មុននេះ ឥណ្ឌូនេស៊ីក៏បានទទួលវ៉ាក់សាំងចំនួន 1.2 លានដូសកាលពីថ្ងៃទី 6 ធ្នូ 2020 និង 1.8 លានដូសទៀតកាលពីថ្ងៃទី 31 ខែធ្នូ 2020។

ក្រសួងសុខាភិបាលប្រទេសឥណ្ឌូនេស៊ីបានឱ្យដឹងថា បច្ចុប្បន្នមានអ្នកជំងឺ Covid-19 ចំនួនជាង 123,000 នាក់កំពុងព្យាបាលនៅមន្ទីរពេទ្យ។

មុននេះ កាលពីថ្ងៃទី 11 មករា ការិយាល័យគ្រប់គ្រងអាហារ និងឱសថនៃប្រទេសឥណ្ឌូនេស៊ី (BPOM) បានផ្ដល់វិញ្ញបនបត្រអនុញ្ញាតឱ្យប្រើប្រាស់បន្ទាន់ចំពោះវ៉ាក់សាំងរបស់ក្រុមហ៊ុន Sinovac។ ការសម្រេចនេះត្រូវបានធ្វើឡើងបន្ទាប់ពីលទ្ធផលនៃការប្រើប្រាស់សាកល្បងក្នុងដំណាក់កាលចុងក្រោយនៅក្នុងស្រុក Bandung ខេត្ត Java ខាងលិចនៃប្រទេសនេះ បង្ហាញថា វ៉ាក់សាំង Sinovac មានប្រសិទ្ធភាព 65.3% ទាបជាងបើធៀបនឹង 91.24% និង 78% ដែលត្រូវបានប្រទេសទួរគី និងប្រេស៊ីលលើកឡើង ប៉ុន្តែក៏នៅតែខ្ពស់ជាងបើធៀបនឹង 50% របស់អង្គការសុខភាពពិភពលោក។

កាលពីថ្ងៃទី 11 មករា ក្រុមប្រឹក្សាអ៊ីស្លាមសាសនា Ulema Indonesia (MUI) ក៏បានទួលស្គាល់ថា វ៉ាក់សាំង Sinovac បានឆ្លើយតបនឹងស្ដង់ដា halal និងបានអនុញ្ញាតឱ្យអ៊ីស្លាមសាសនិកប្រើប្រាស់។ EUA របស់ BPOM និង fatwa របស់ MUI បានបើកផ្លូវឱ្យរដ្ឋាភិបាលឥណ្ឌូនេស៊ីចាប់ផ្ដើមដំណើរការយុទ្ធនាការចាក់វ៉ាក់សាំងដោយមិនគិតថ្លៃនៅទូទាំងប្រទេស ចាប់ពីថ្ងៃទី 13 មករានេះ។

តាមគម្រោង ប្រធានាធិបតី Joko Widodo នឹងជាអ្នកដំបូងគេដែលត្រូវបានចាក់វ៉ាក់សាំង Sinovac នៅក្នុងពិធីមួយដែលត្រូវបានផ្សាយផ្ទាល់តាមកញ្ចក់ទូរទស្សន៍ ក្នុងបំណងលើកទឹកចិត្តដល់ប្រជាជនក្នុងការទទួលយកវ៉ាក់សាំងនេះ។ បន្ទាប់ពីលោក Joko Widodo បុគ្គលិកសុខាភិបាលចំនួន 1.3 លាននាក់នឹងទទួលបានអាទិភាពក្នុងការចាក់វ៉ាក់សាំង Covid-19 ក្នុងដំណាក់កាលដំបូង។ ដំណាក់កាលទីពីរនឹងត្រូវបានចាក់ជូនបុគ្គលិកជួរមុខចំនួន 21.5 លាននាក់ផ្សេងទៀត រួមនឹងក្រុមមនុស្សដែលមានវ័យចាប់ពី 60 ឆ្នាំឡើងទៅ។ បន្ទាប់មកទៀត ពលរដ្ឋ 63.9 លាននាក់នៅតំបន់ងាយរងគ្រោះ នឹងត្រូវបានចាក់វ៉ាក់សាំងក្នុងដំណាក់ទីបី៕

ប្រភព៖ Jakartapost

January 13, 2021

អតីតមន្ត្រីយោធាដែលធ្វើឱ្យកក្រើកតំបន់ Capitol Hill ត្រូវអតីតភរិយាធ្វើឱ្យចេញសារភាព

អតីតវរសេនីយ៍ទោនៃទ័ពអាកាស ឈ្មោះ Larry Rendell Brock ដែលបានចូលរួមក្នុងការសម្រុកចូលកាន់កាប់វិមានសភានៅ Capitol Hill បានចេញមុខសារភាពកំហុស ក្រោយពីត្រូវអតីតភរិយា «បង្ហាញផ្លូវ» ដល់ FBI។

ការិយាល័យសហព័ន្ធស៊ើបអង្កេតអាមេរិក (FBI) នៅចុងសប្ដាហ៍មុនបានអំពាវនាវដល់ពលរដ្ឋឱ្យផ្ដល់ព័ត៌មានអំពីក្រុមមនុស្សជ្រុលនិយមដែលបានប្រើអំពើហិង្សានៅ Capitol Hill កាលពីថ្ងៃទី 6 មករា ដោយយោងទៅតាមរូបភាពដែលត្រូវបានចែករំលែកនៅលើបណ្ដាញសង្គម។

ស្ត្រីម្នាក់ ក្រោយមកក៏បានហៅទូរស័ព្ទទៅកាន់មជ្ឈមណ្ឌលប្រយុទ្ធប្រឆាំងនឹងការគំរាមកំហែងជាតិរបស់ FBI និងបានចោទប្រកាន់អតីតស្វាមីឈ្មោះ Larry Rendell Brock រស់នៅក្នុងទីក្រុង Grapevine នៃរដ្ឋ Texas ថាជាបុរសស្លៀកពាក់ឯកសណ្ឋានជាទាហាន និងកាន់ខ្សែចងប្រភេទរឹតមួយដុំក្នុងដៃនៅពេលស្ថិតក្នុងអគារសភាជាតិ។

«ពេលបានឃើញករណីហិង្សា ខ្ញុំព្រួយបារម្ភថាគាត់នឹងនៅទីនោះ។ ខ្ញុំដឹងច្បាស់ថាគាត់នៅទីនោះ។ នោះគឺជារូបថតច្បាស់ ហើយខ្ញុំស្គាល់រូបសញ្ញានៅលើខ្លួនគាត់» ស្ត្រីជាអតីតភរិយាដែលបានរស់នៅ 18 ឆ្នាំជាមួយនឹង Brock បានប្រាប់បុគ្គលិក FBI។

ក្រោយពេលត្រូវបានចោទប្រកាន់ ថ្ងៃទី 10 មករា Brock ក៏បានទៅកាន់ទីស្នាក់ការ FBI ដើម្បីសារភាព។ អតីតវរសេនីយ៍ទោនៃទ័ពអាកាសអាមេរិកដែលមានអាយុ 53 ឆ្នាំរូបនេះ ត្រូវបានចោទប្រកាន់ពីបទចូលអគាររបស់រដ្ឋដោយខុសច្បាប់ រំលោភចូលដោយប្រើអំពើហិង្សា និងបង្កអស្ថេរភាព។

FBI បានរកឃើញថា Brock បានចូលក្នុងសាលប្រជុំរបស់សភាជាន់ទាប និងនៅខាងក្រៅការិយាល័យរបស់ប្រធានសភា Nancy Pelosi។

Brock បានទទួលស្គាល់កំហុសរបស់ខ្លួន។ «ប្រធានាធិបតីបានអំពាវនាវឱ្យអ្នកគាំទ្របង្ហាញវត្តមាន ហើយខ្ញុំក៏បានចូលរួម ខ្ញុំគិតថា ប្រការនេះពិតជាមានសារសំខាន់ ព្រោះខ្ញុំស្រលាញ់ទឹកដីនេះខ្លាំងណាស់ ហើយខ្ញុំក៏មានវត្តមាននៅទីនោះ» Brock បានប្រាប់សារព័ត៌មាន New Yorker ដូច្នេះ។

សូមរំលឹកថា ក្រុមបាតុករដែលគាំទ្រលោក Trump បានសម្រុកចូលកាន់កាប់វិមានសភាអាមេរិកកាលពីថ្ងៃទី 6 ខែមករា ក្នុងពេលដែលក្រុមតំណាងរាស្ត្រកំពុងប្រជុំដើម្បីពិចារណាលើការទទួលស្គាល់លទ្ធផលបោះឆ្នោត។ ការរំលោភចូលនេះ បាននាំឱ្យមានអំពើហិង្សាកើតឡើង និងបានសម្លាប់មនុស្សយ៉ាងតិច 5 នាក់។ អាជ្ញាធរបានចាប់ខ្លួនបាតុករមួយចំនួនដែលបានចូលរួមប្រើហិង្សា និងកំពុងស៊ើបអង្កេតលើក្រុមមន្ត្រីប៉ូលិសជាច្រើននាក់ដែលប្រចាំការនៅវិមានសភា ដោយសង្ស័យថា បានគាំទ្រដល់ក្រុមបាតុករ៕

ប្រភព៖ Fox News

January 12, 2021

សុនករបស់ Joe Biden នឹងមាន «ពិធីស្បថចូលកាន់តំណែង» ដោយឡែក

Major ជាសុនកដែលត្រូវបានប្រធានាធិបតីជាប់ឆ្នោត Joe Biden ទទួលយកមកចិញ្ចឹមពីក្រុមអ្នកជួយសង្គ្រោះសត្វ នឹងមានពិធីស្បថចូលកាន់តំណែងជា «សុនកទីមួយ» ដោយមានការផ្សាយផ្ទាល់ទៀតផង។

អង្គការមនុស្សធម៌ Delaware (DHA) ដែលជាអ្នកបានជួយសង្គ្រោះ Major មុនពេលត្រូវបានគ្រួសាររបស់លោក Biden ទទួលយកទៅចិញ្ចឹមកាលពីឆ្នាំ 2018 បានប្រកាសកាលពីថ្ងៃទី 10 ខែមករាថា នឹងសហការជាមួយមូលនិធិសង្គ្រោះសត្វ Pumpkin ប្រារព្ធ «ពិធីឡើងកាន់តំណែង» នៅថ្ងៃទី 17 មករា ឱ្យសុនកដំបូងរបស់សេតវិមានដែលមកពីបណ្ឌលសង្គ្រោះសត្វអនាថា។

«ពិធីទទួលតំណែងជាសុនកទីមួយ» ដែលនឹងត្រូវបានដឹកនាំធ្វើឡើងដោយអ្នកកាសែត Jill Martin មកពីអង្គភាព NBC នៅមុនការស្បថចូលកាន់តំណែងរបស់ប្រធានាធិបតីជាប់ឆ្នោត Joe Biden រយៈពេល 3 ថ្ងៃនេះ ក៏នឹងមានការផ្សាយផ្ទាល់តាមកម្មវិធី Zoom ផងដែរ។ គ្រប់គ្នាត្រូវបង់វិភាគទានយ៉ាងតិច 10 ដុល្លារដើម្បីបានចូលរួមក្នុងព្រឹត្តិការណ៍នេះ។ ខ្ទង់ប្រាក់ដែលរៃអង្គាសបាននឹងត្រូវបានវេរទៅកាន់ DHA ដើម្បីបន្តសកម្មភាពការពារសត្វ។

លោកស្រី Jill Biden ជាមួយនឹងសុនក Major (ឆ្វេង) និង Champ

ក្រៅពី Major គ្រួសាររបស់លោក Biden ក៏នៅមានសុនក ប៊ែកហ្សេអាល្លឺម៉ង់ (German Shepherd) មួយក្បាលផ្សេងទៀតដែលមានឈ្មោះថា Champ ប៉ុន្តែ Major ទទួលបានចំណាប់អារម្មណ៍ច្រើនជាង ដោយសារតែមានប្រវត្តិជាសុនកអនាថា។

បន្ទាប់ពី Biden បានឡើងកាន់អំណាច Major និង Champ នឹងក្លាយជាសុនកដំបូងគេដែលបង្ហាញខ្លួននៅសេតវិមាន ក្រោយអវត្តមានសុនកអស់រយៈពេល 4 ឆ្នាំ ព្រោះតែលោក Trump មិនបានចិញ្ចឹមសត្វអ្វីមួយនៅសេតវិមាន៕

ប្រភព៖ CNN

January 12, 2021

ផ្ទុះអណ្ដូងរ៉ែមាសនៅប្រទេសចិន! កម្មករ 22 នាក់ជាប់នៅក្រោមដី

នៅព្រលប់ថ្ងៃទី 11 ខែមករា មន្ត្រីនៃខេត្ត Shandong ភាគខាងកើតប្រទេសចិន បានឱ្យដឹងថា មានការផ្ទុះមួយបានកើតឡើងនៅអណ្ដូងរ៉ែមាសដែលកំពុងត្រូវបានសាងសង់នៅក្នុងខេត្តនេះ បណ្ដាលឱ្យបុគ្គលិកចំនួន 20 នាក់ត្រូវជាប់នៅក្រោមដី។

គ្រោះថ្នាក់ការងារនេះបានកើតឡើងនៅវេលាម៉ោង 14 ថ្ងៃទី 10 ខែមករា នៅឯអណ្ដូងរ៉ែមាសក្នុងទីរួមស្រុក Xicheng ក្រុង Yantai ខេត្ត Shandong។ ក្រុមមន្ត្រីចិនបានបញ្ជូនកម្លាំងទៅកាន់កន្លែងកើតហេតុដើម្បីជួយសង្គ្រោះ។ ប៉ុន្តែ ការផ្ទុះនេះបានបំផ្លាញជណ្ដើរសង្គ្រោះបន្ទាន់ ក៏ដូចជាប្រព័ន្ធទាក់ទងខាងក្នុងអណ្ដូង ទើបក្រុមនៅលើដីមិនអាចទាក់ទងទៅកាន់ជនរងគ្រោះនៅក្រោមដីបាន។ បច្ចុប្បន្ន អាជ្ញាធរកំពុងបញ្ជូនកម្លាំងជំនួយបន្ថែមទៅកាន់កន្លែងកើតហេតុ។

អណ្ដូងរ៉ែមាសខាងលើជាកម្មសិទ្ធិរបស់ក្រុមហ៊ុនវិនិយោគ Shandong Wucailong Investment Co. Ltd ដែលមានទំនាក់ទំនងនឹង Zhaojin ដែលជាក្រុមហ៊ុនរុករករ៉ែមាសធំជាងគេលំដាប់ទីបួននៅប្រទេសចិន។

គ្រោះថ្នាក់នៅក្នុងអណ្ដូងរ៉ែនៅប្រទេសចិន កើតឡើងជាញឹកញាប់

ករណីគ្រោះថ្នាក់នៅឯអណ្ដូងរ៉ែ កើតឡើងជាញឹកញាប់នៅប្រទេសចិន ដោយសារតែលក្ខខណ្ឌការងារផ្នែកពលកម្មនៅមានកម្រិត។ គ្រោះថ្នាក់អណ្ដូងរ៉ែចុងក្រោយនៅប្រទេសចិន បានកើតឡើងកាលពីខែធ្នូ ឆ្នាំ 2020 នៅក្នុងទីក្រុង Chongqing ភាគនិរតីប្រទេសចិន បណ្ដាលឱ្យកម្មករដែលជាប់ក្រោមដីចំនួន 23 នាក់ត្រូវបាត់បង់ជីវិត៕

ប្រភព៖ RT

January 12, 2021

ក្រុមប៉ូលិសដែលជាប់សង្ស័យថា បានដឹកនាំបាតុករ សម្រុកចូលគ្រប់គ្រងវិមានសភាអាមេរិកនៅ Capitol Hill កំពុងត្រូវបានស៊ើបអង្កេត

មន្ត្រីប៉ូលិសចំនួនពីរនាក់ ត្រូវបានផ្អាកពីមុខតំណែង និងយ៉ាងតិច 10 នាក់ទៀតត្រូវបានស៊ើបអង្កេតទាក់ទងនឹងព្រឹត្តិការណ៍បាតុករសម្រុកចូលគ្រប់គ្រង និងប្រើហិង្សានៅក្នុងវិមានសភាសហរដ្ឋអាមេរិកកាលពីថ្ងៃទី 6មករា។

ម្នាក់ក្នុងចំណោមមន្ត្រីប៉ូលិសពីររូបដែលប្រចាំការនៅវិមានសភាជាតិអាមេរិក បានថតរូបសែលហ្វីជាមួយនឹងបាតុករម្នាក់ដែលចូលរួមធ្វើបាតុកម្មនៅវិមានសភា ខណៈមន្ត្រីប៉ូលិសម្នាក់ទៀត ពាក់មួកដែលមានអក្សរថា «ធ្វើឱ្យអាមេរិកមហស្ចារ្យឡើងវិញ» និងដឹកនាំក្រុមបាតុករនៅជុំវិញវិមានសភានៅ Capitol Hill។ នេះបើតាមសម្ដីរបស់តំណាងរាស្ត្រសភាជាន់ទាប Tim Ryan ដែលបានឱ្យដឹងកាលពីថ្ងៃទី 11 ខែវិច្ឆិកា។

លោក Ryan និយាយថា មន្ត្រីប៉ូលិសប្រមាណពី 10 ទៅ 15 នាក់ កំពុងត្រូវបានស៊ើបអង្កេត ដោយសារតែទង្វើរបស់ពួកគេនៅក្នុងព្រឹត្តិការណ៍បាតុកម្មហិង្សាកាលពីថ្ងៃទី 6 មករា ប៉ុន្តែមិនបានបញ្ជាក់អំពីតួលេខ និងមូលហេតុជាក់លាក់នោះទេ។ Ryan បន្តថា មន្ត្រីប៉ូលិសម្នាក់ត្រូវបានចាប់ខ្លួន ប៉ុន្តែក្រោយមក អ្នកនាំពាក្យរបស់លោកបញ្ជាក់ថា លោក Ryan ច្រឡំ និងថា មិនទាន់មានមន្ត្រីប៉ូលិសណាម្នាក់ត្រូវបានចាប់ខ្លួននៅឡើយ។ ចំណែកជំនួយការម្នាក់នៅសភាជាន់ទាប បានឱ្យដឹងថា មន្ត្រីប៉ូលិសដល់ទៅ 17 នាក់ ត្រូវបានស៊ើបអង្កេត។

ក្រុមមន្ត្រីអាមេរិកឱ្យដឹងថា ការស៊ើបអង្កេតលើទំនាក់ទំនងរវាងក្រុមបាតុករហិង្សា និងសមាជិកនៃស្ថាប័នអនុវត្តច្បាប់គឺជារឿងអាទិភាព ដោយសារថា សមត្ថភាពក្នុងការបំពេញភារកិច្ចដែលក្រុមមន្ត្រីទាំងនេះទទួលបានក្នុងការបណ្ដុះបណ្ដាល អាចជួយផ្ដល់ផលប្រយោជន៍ដល់ក្រុមជ្រុលនិយម។

សូមរំលឹកថា ព្រឹត្តិការណ៍បាតុករហិង្សាសម្រុកចូលគ្រប់គ្រងវិមានសភាអាមេរិកកាលពីថ្ងៃទី 6 ខែមករា បានបណ្ដាលឱ្យមនុស្សយ៉ាងតិច 5 នាក់បាត់បង់ជីវិត និងមានមន្ត្រីប៉ូលិសប្រចាំវិមានសភាជាតិ និង បុគ្គលិកអនុវត្តច្បាប់ប្រចាំរដ្ឋធានីវ៉ាស៊ីងតោនជាង 50 នាក់ បានរងរបួស ក្នុងនោះមានអ្នកខ្លះត្រូវបញ្ជូនទៅកាន់មន្ទីរពេទ្យផងដែរ៕

ប្រភព៖ CNN

January 12, 2021

FBI ព្រមានថា «បាតុកម្មប្រដាប់អាវុធ» នៅទូទាំងសហរដ្ឋអាមេរិក នឹងអាចកើតឡើងមុនថ្ងៃចូលកាន់តំណែងរបស់លោក Biden

FBI ព្រមានថា ផែនការបាតុកម្មប្រដាប់អាវុធកំពុងត្រូវបានរៀប ហើយព្រឹត្តិការណ៍នេះនឹងអាចត្រូវបានធ្វើឡើងនៅឯវិមានសភារបស់រដ្ឋចំនួន 50 រួមនឹងវិមានសភាជាតិនៃសហរដ្ឋអាមេរិក មុនថ្ងៃទី 20 មករា 2021។

ផែនការបាតុកម្មទាំងនេះកំពុងត្រូវរៀបចំ ហើយនឹងអាចធ្វើឡើងចាប់ពីថ្ងៃទី 16 ខែមករា រហូតដល់យ៉ាងហោចថ្ងៃទី 20 មករា នៅឯវិមានសភារបស់រដ្ឋចំនួន 50 និងថ្ងៃទី 17 ខែមករា ដល់ថ្ងៃទី 20 ខែដដែលនៅឯវិមានសភាជាតិ នេះបើតាមការព្រមានពី FBI ដែលបានប្រកាសឱ្យដឹងកាលពីថ្ងៃទី 11 ខែមករា។ FBIព្រមានថា អាចនឹងមាន «ការងើបប្រឆាំង» បើសិនជាប្រធានាធិបតី Donald Trump ត្រូវបានដកហូតតំណែងទៅតាមច្បាប់វិសោធនកម្មលើកទី 25 មុនការចូលកាន់តំណែងនៅថ្ងៃទី 20 មករា របស់លោក Joe Biden។

FBI បានឱ្យដឹងថា ចាប់តាំងពីថ្ងៃទី 8 មករា ពួកគេទទួលបានព័ត៌មានសម្ងាត់ថា មានក្រុមមួយកំពុងអំពាវនាវឱ្យធ្វើបាតុកម្មនៅឯវិមានតុលាការ និងទីស្នាក់ការកណ្ដាលរបស់រដ្ឋបាលថ្នាក់រដ្ឋ រួមនឹងថ្នាក់ជាតិ នៅក្នុងករណីដែលប្រធានាធិបតី Donald Trump ត្រូវបានដកហូតតំណែងមុនថ្ងៃទី 20 មករា។ ក្រុមនេះក៏មានគម្រោង «បង្កព្យុះភ្លើង» នៅតំបន់ Capitol Hill និងនៅតាមវិមានសភាទាំង 50 រដ្ឋផងដែរ។

បច្ចុប្បន្ន FBI កំពុងតែតាមដានព័ត៌មានអំពី «ប្រភពនៃការគំរាមកំហែង» ជាច្រើនផ្សេងទៀត នៅមុនពិធីស្បថចូលកាន់តំណែងរបស់ប្រធានាធិបតីជាប់ឆ្នោត Joe Biden រួមទាំងអនុប្រធានាធិបតីជាប់ឆ្នោត លោកស្រី Kamala Harris និងប្រធានសភាជាន់ទាប លោកស្រី Nancy Pelosi៕

ប្រភព៖ CNN

January 12, 2021

WHO ថាអាចចាក់វ៉ាក់សាំង Covid-19 ដល់ពលរដ្ឋប្រទេសក្រីក្រចាប់ពីខែកុម្ភៈ ខណៈអ្នកស្លាប់កើនដល់ជាង 1,952,000នាក់

គិតមកដល់ថ្ងៃទី 12 ខែមករា ឆ្នាំ 2021 នេះ ពិភពលោកបានរកឃើញអ្នកវិជ្ជមាននឹង Covid-19 សរុបចំនួន 91,298,896 នាក់ ក្នុងនោះមានអ្នកស្លាប់ដល់ទៅ 1,952,119 នាក់ ខណៈអ្នកជាសះស្បើយមានចំនួន 65,268,706 នាក់ និងអ្នកកំពុងព្យាបាលមានចំនួន 24,078,071 នាក់ ហើយក្នុងតួលេខនេះមានអ្នកជំងឺ 108,754 នាក់ អាចបាត់បង់ជីវិតព្រោះកំពុងមានអាការធ្ងន់ធ្ងរ។

អង្គការសុខភាពពិភពលោក (WHO) កំពុងបន្តជំរុញការអំពាវនាវបន្ថែមទៀតដើម្បីស្វែងរកប្រភពវ៉ាក់សាំង Covid-19 សម្រាប់ជួយដល់បណ្ដាប្រទេសក្រីក្រក្នុងកម្មវិធី Covax។ WHO សង្ឃឹមថា យុទ្ធនាការចាក់វ៉ាក់សាំងនៅក្នុងប្រទេសទាំងនេះនឹងអាចចាប់ផ្ដើមពីខែកុម្ភៈ ឆ្នាំ 2021។ កម្មវិធី Covax ត្រូវបានដឹកនាំដោយ WHO ក្នុងបំណងចែកចាយវ៉ាក់សាំងប្រកបដោយយុត្តិធម៌នៅលើពិភពលោក។ កម្មវិធីនេះប្រមូលថវិកាបាន 6 ពាន់លានដុល្លារអាមេរិកដើម្បីបញ្ជាទិញវ៉ាក់សាំង Covid-19 ចំនួន 2 ពាន់លានដូស រួមនឹងជម្រើសបម្រុងក្នុងការទិញ 1 ពាន់លានដូសថែមទៀតនាពេលខាងមុខ។

WHO មានការព្រួយបារម្ភខ្លាចបណ្ដាប្រទេសដែលមានចំណូលខ្ពស់ និងមធ្យម ប្រមូលទិញវ៉ាក់សាំងទាំងអស់ បណ្ដាលឱ្យប្រទេសចំនួន 92 ដែលមានប្រាក់ចំណូលទាប មិនមានវ៉ាក់សាំងប្រើប្រាស់ដើម្បីចាក់ឱ្យក្រុមបុគ្គលិកសុខាភិបាល។

ទីប្រឹក្សាជាន់ខ្ពស់របស់ WHO លោក Bruce Aylward បាននិយាយកាលពីម្សិលមិញថា៖ «យើងមានការជឿជាក់ថា អាចផ្ដើមការចាក់វ៉ាក់សាំងនៅក្នុងប្រទេសទាំងនោះ (ប្រទេសដែលមានប្រាក់ចំណូលទាប) ចាប់ពីខែកុម្ភៈ ប៉ុន្តែ យើងមិនអាចធ្វើបានតែឯងនោះទេ។ យើងត្រូវការកិច្ចសហការជាមួយបណ្ដាក្រុមហ៊ុនផលិតវ៉ាក់សាំងដើម្បីផ្ដល់អាទិភាពលើប្រភពទំនិញសម្រាប់ Covax ហើយត្រូវការនាំយកវ៉ាក់សាំងទៅប្រគល់ដល់ដៃក្រុមមនុស្សដែលមានចំណូលទាប ឬមធ្យម»៕

ប្រភព៖ RT

January 12, 2021

កម្ពុជាមិនមានអ្នកឆ្លង Covid-19 នោះទេក្នុងអំឡុង 24ម៉ោងចុងក្រោយនេះ

ក្រសួងសុខាភិបាលកម្ពុជានាព្រឹកនេះបានឱ្យដឹងថា មិនមានអ្នកវិជ្ជមាននឹង Covid-19 នោះទេ ក្នុងរយៈពេល 24 ម៉ោងកន្លងទៅនេះ ប៉ុន្តែមានអ្នកជាសះស្បើយចំនួន 2 នាក់។

សម្រាប់ព័ត៌មានស្ដីអំពីអ្នកជំងឺ Covid-19 ដែលបានជាសះស្បើយ សូមអានតារាងខាងក្រោម។

គិតមកដល់ព្រឹកថ្ងៃទី 12 ខែមករា ឆ្នាំ 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 392 នាក់ ក្នុងនោះមានអ្នកជាសះស្បើយចំនួន 376 នាក់ និងអ្នកកំពុងព្យាបាលចំនួន 16 នាក់។

January 12, 2021

Author: សឿន សំណាង