សឿន សំណាង - La Reine Media

ក្រោយការបិទគណីរបស់ Trump សហភាពអឺរ៉ុបបានថ្កោលទោស និងត្រៀមចេញច្បាប់ទប់ទល់នឹងអំណាចរបស់បណ្ដាញសង្គម

ក្នុងពេលដែលមតិសាធារណជននៅសហរដ្ឋអាមេរិក កំពុងជជែកតតាំងគ្នាអំពីទង្វើរបស់ Twitter ក៏ដូចជាបណ្ដាញសង្គមដទៃទៀត ដែលបានធ្វើចំពោះប្រធានាធិបតីអាមេរិក សហភាពអឺរ៉ុបឯណោះវិញកំពុងតែត្រៀមបញ្ចេញច្បាប់ចំនួនពីរដើម្បីបង្កើនកម្លាំង និងវិសាលភាពក្នុងការគ្រប់គ្រងបច្ចេកវិទ្យា ដែលសំដៅលើបណ្ដាញសង្គមទាំងនោះ។

ការបិទគណនីបណ្ដាញសង្គមរបស់លោក Trump ក្រោយពីមានអំពើហិង្សានៅ Capitol Hill កាលពីថ្ងៃទី 6 មករា បានធ្វើឱ្យមានប្រតិកម្មខុសគ្នាទាំងស្រុងរវាងតំបន់នៃត្រើយទាំងសងខាងរបស់មហាសមុទ្រអាត្លង់ទិក។

មុននេះ បណ្ដាបណ្ដាញសង្គម រួមនឹងក្រុមហ៊ុនធំៗជាច្រើននៅសហរដ្ឋអាមេរិក បានបិទគណនីរបស់លោក Trump ជាបន្តបន្ទាប់ ក្រោយពីមានអំពើហិង្សានៅវិមានសភាជាតិក្នុងតំបន់ Capitol Hill ដោយអះអាងថា បានរំលោភគោលការណ៍របស់ក្រុមហ៊ុន។ ទង្វើនេះមិនត្រឹមតែធ្វើឱ្យប៉ះពាល់ដល់ក្រុមអ្នកគាំទ្ររបស់លោក Trump បណ្ណោះទេ តែក៏កំពុងធ្វើឱ្យមានការសង្ស័យពីសំណាក់ក្រុមអ្នកលើកកម្ពស់សិទ្ធិសេរីភាពបញ្ចេញមតិផងដែរ ពិសេសគឺនៅក្នុងប្រទេសដែលត្រូវបានគេចាត់ទុកថាជា «បិតាប្រជាធិបតេយ្យ» ដូចសហរដ្ឋអាមេរិក។

បញ្ហានេះបានធ្វើឱ្យ CEO របស់ក្រុមហ៊ុន Tesla លោក Elon Musk ដែលកំពុងកាន់កាប់តំណែងជាអ្នកមានជាងគេលំដាប់ទីមួយក្នុងពិភពលោក សរសេរនៅលើ Twitter ថា បណ្ដាក្រុមហ៊ុនបច្ចេកវិទ្យានៅត្រើយខាងលិចនៃមហាសមុទ្រអាត្លង់ទិក កំពុងក្លាយជា «អាជ្ញាកណ្ដាល» ស្ដីអំពីសិទ្ធិសេរីភាពក្នុងការបញ្ចេញមតិ។ មុននេះ CEO របស់ SpaceX ក៏បានរិះគន់ទៅលើប្រព័ន្ធត្រួតពិនិត្យរបស់ Amazon និង Facebook ហើយចាត់ទុកថានេះគឺជាបញ្ហាផ្ដាច់មុខ និងជាទង្វើមិនត្រឹមត្រូវ។

ចំណែកនៅឯត្រើយម្ខាងនៃមហាសមុទ្រអាត្លង់ទិកវិញ មិនដូចទៅនឹងសហរដ្ឋអាមេរិកនោះ សារព័ត៌មានអឺរ៉ុប និងតួអង្គរបស់សាធារណជន កម្រនឹងផ្ដោតសំខាន់ទៅលើនិយមន័យនៃសេរីភាពក្នុងការបញ្ចេញមតិ។ ក៏ប៉ុន្តែ យោងតាមការយល់ឃើញរបស់អឺរ៉ុប ការរាំងខ្ទប់លោក Trump ដោយបណ្ដាញសង្គមដែល Twitter ជាអ្នកនាំមុខគឺជាការប្រើប្រាស់អំណាចមិនសមហេតុផលដើម្បីកាត់បន្ថយសេរីភាពបញ្ចេញមតិ។ ជាក់ច្បាស់ណាស់ បណ្ដាញសង្គមទាំងនោះ មិនបានលើកឡើងឱ្យបានច្បាស់លាស់ថា តើគោលការណ៍ណាមួយត្រូវបានរំលោភបំពាន។ ការសម្រេចបិទគណនីរបស់ប្រធានាធិបតីសហរដ្ឋអាមេរិកគឺជាអំណាចរវើរវាយរបស់ក្រុមមេដឹកនាំនៃបណ្ដាញសង្គម។

សហភាពអឺរ៉ុប (EU) បានអះអាងថា ជាក្រុមហ៊ុនធម្មតា បណ្ដាញសង្គមត្រូវតែកំណត់ឱ្យបានច្បាស់អំពីសិទ្ធិ និងទំនួលខុសត្រូវ។ អ្នកនាំពាក្យរបស់អធិការបតីអាល្លឺម៉ង់ បានថ្លែងកាលពីថ្ងៃទី 11 មករាថា លោកស្រី Merkel មានយោបល់ថា ការបិទរបស់ Twitter ចំពោះគណនីរបស់លោក Trump គឺ «មានបញ្ហា»។

អំពើហិង្សានៅវិមានសភាជាតិក្នុងតំបន់ Capitol Hill នៃសហរដ្ឋអាមេរិក ត្រូវបានបណ្ដាញសង្គម យកធ្វើជាលេសដើម្បីរាំងខ្ទប់សិទ្ធិបញ្ចេញមតិ

កាលពីថ្ងៃទី 10 មករា សមាជិកនៃគណៈកម្មធិការទីផ្សារក្នុងស្រុករបស់គណៈកម្មធិការអឺរ៉ុប លោក Thierry Breton ក៏បានបញ្ចេញមតិទាក់ទងនឹងបញ្ហាខាងលើ។ លោក Thierry Breton បានហៅបញ្ហានៅឯតំបន់ Capitol Hill ថាជា «ព្រឹត្តិការណ៍ 11 កញ្ញា» នៅលើបណ្ដាញសង្គម និងបានរិះគន់បណ្ដាញសង្គមទាំងនោះថា អាចបង្កឱ្យមានការគំរាមកំហែងចំពោះខឿនប្រជាធិបតេយ្យ។ លោក Thierry Breton បន្តថា មុនព្រឹត្តិការណ៍នៅ Capitol Hill បណ្ដាញសង្គមទាំងនេះមិនអាចទប់ស្កាត់ឱ្យមានប្រសិទ្ធភាពនូវព័ត៌មានមិនពិត និងវោហាសាស្ត្របង្កអរិភាពនោះទេ។ ជំនួសមកវិញ ពួកគេបានដាក់ចេញនូវគោលការណ៍សម្រាប់លេងដើម្បីគ្រប់គ្នាដោយខ្លួនពួកគេផ្ទាល់ទៅវិញ។

Steffen Seibert អ្នកនាំពាក្យរបស់នាយករដ្ឋមន្ត្រីអាល្លឺម៉ង់ សង្កត់ធ្ងន់ថា៖ «ក្រុមអ្នកដឹកនាំ (បណ្ដាញសង្គម) មានតួនាទីធំធេងក្នុងការធានាឱ្យបានប្រាកដថា សារព័ត៌មានផ្នែកនយោបាយមិនត្រូវបានគេបំពុលដោយអរិភាព ការកុហក និងអំពើហិង្សា។ សិទ្ធិសេរីភាពក្នុងការបញ្ចេញមតិអាចត្រូវបានធ្វើអន្តរាគមន៍ ប៉ុន្តែត្រូវតែធ្វើឡើងទៅតាមច្បាប់ ពោលគឺមិនត្រូវគោរពតាមយោបល់របស់អ្នកគ្រប់គ្រងបណ្ដាញសង្គម»។

យោបល់ទាំងឡាយដែលលោកស្រី Merkel ជាអ្នកតំណាង ទទួលបានការចាប់អារម្មណ៍ខ្លាំងនៅអឺរ៉ុប។ នៅប្រទេសបារាំង មិនថាតែក្រុមអ្នកនយោបាយដែលលំអៀងទៅរកលោក Trump នោះទេ សូម្បីតែក្រុមដែលធ្លាប់រិះគន់លោក Trump ក៏មានយល់ប្រឆាំងទៅនឹងការដែល Twitter «គ្រប់គ្រងសេរីភាពក្នុងការបញ្ចេញមតិ» នេះដែរ។

ក្នុងពេលដែលមតិសាធារណជននៅសហរដ្ឋអាមេរិក កំពុងនាំគ្នាជជែកតតាំងអំពីទង្វើរបស់ Twitter ក៏ដូចជាបណ្ដាញសង្គមដទៃទៀត ដែលបានធ្វើចំពោះប្រធានាធិបតីអាមេរិក សហភាពអឺរ៉ុបឯណោះវិញកំពុងតែត្រៀមបញ្ចេញច្បាប់ចំនួនពីរដើម្បីបង្កើនអំណាច និងវិសាលភាពក្នុងការគ្រប់គ្រងបច្ចេកវិទ្យា ដែលសំដៅលើបណ្ដាញសង្គមទាំងនោះ រួមមានច្បាប់សេវាកម្មបច្ចេកវិទ្យា និងច្បាប់ទីផ្សារបច្ចេកវិទ្យា។ ច្បាប់ទាំងនេះ ភាគច្រើនសំដៅទៅលើក្រុមហ៊ុនលំដាប់យក្សក្នុងវិស័យអ៊ីនធើណិត និងបណ្ដាញសង្គម៕

ប្រភព៖ Bloomberg

January 14, 2021

«បិទគណនីរបស់ Trump រៀងរហូត» Facebook និង Twitter ខាតបង់ 51 ពាន់លានដុល្លារពីខ្ទង់តម្លៃមូលធនទីផ្សារ

ក្នុងអំឡុងបញ្ចប់ការជួញដូរកាលពីថ្ងៃទី 12 មករា តម្លៃមូលធនទីផ្សារ (Market Capitalization) សរុបរបស់បណ្ដាញសង្គមដែលមានអ្នកប្រើប្រាស់រាប់ពាន់លាននាក់នេះ បានថយចុះ 47.6 ពាន់លានដុល្លារ បើធៀបនឹងថ្ងៃទី 9 មករា។

នៅក្នុងការជួញដូរពីរលើកកន្លងទៅ ទឹកប្រាក់ចំនួន 41.2 ពាន់លានដុល្លារនៃតម្លៃមូលធនទីផ្សាររបស់ក្រុមហ៊ុន Facebook និង Twitter ត្រូវបានបាត់បង់។ នេះគឺជាបណ្ដាញសង្គមខ្នាតយក្សចំនួនពីរ ក្នុងចំណោមបណ្ដាញសង្គមជាច្រើនដែលបានសម្រេចចិត្តបិទគណនីរបស់ប្រធានាធិបតី Donald Trump ជារៀងរហូត ដោយសារតែចាត់ទុកថា លោក Trump នៅពីក្រោយអំពើហិង្សានៅវិមានសភាអាមេរិក កាលពីសប្ដាហ៍មុន។ ក្រុមហ៊ុនទាំងពីរនេះយល់ថា គណនីរបស់លោក Trump អាចបង្កហានិភ័យទាក់ទិននឹងការប្រើប្រាស់អំពើហិង្សានាពេលខាងមុខ។

មិនយូរប៉ុន្មានបន្ទាប់ពីបានសម្រេចបិទគណនីរបស់ Trump តម្លៃមូលបត្ររបស់ Facebook បានធ្លាក់ចុះ 4% នៅក្នុងថ្ងៃទី 11 មករា និង 2.2% នៅក្នុងថ្ងៃទី 12 មករា។ មូលហេតុដែលនាំឱ្យតម្លៃមូលបត្រត្រូវធ្លាក់ថ្លៃបែបនេះគឺ ព្រោះតែអ្នកវិនិយោគមួយចំនួនយល់ថា ការបិទគណនីរបស់លោក Trump នឹងធ្វើឱ្យមនុស្សមួយចំនួនចាកចេញពី Facebook។ ក្នុងអំឡុងបិទការជួញដូរមូលបត្រកាលពីថ្ងៃទី 12 មករា តម្លៃមូលធនទីផ្សាររបស់ Facebook បានថយចុះ 47.6 ពាន់លានដុល្លារ បើធៀបនឹងថ្ងៃទី 9 មករា។

ចំណែក Twitter វិញ ក៏ស្ថិតក្នុងស្ថានភាពប្រហាក់ប្រហែលគ្នានេះដែរ ខណៈដែលតម្លៃមូលបត្ររបស់ក្រុមហ៊ុននេះ បានថយចុះ 6.4% ក្នុងថ្ងៃទី 11 មករា និង 2.4% ក្នុងថ្ងៃទី 12 មករា។ ការធ្លាក់ថ្លៃនេះ បណ្ដាលឱ្យតម្លៃមូលធនទីផ្សាររបស់ Twitter ត្រូវបាត់បង់ 3.5 ពាន់លានដុល្លារអាមេរិក។ ប៉ុន្តែ ក្នុងថ្ងៃទី 13 មករា កំណើននៃតម្លៃមូលបត្ររបស់ Twitter បានស្ថិតនៅត្រឹម 2.9%។

ក្រៅពី Facebook និង Twitter បណ្ដាញសង្គម Youtube ក៏បានបិទដំណើរការគណនីរបស់លោក Trump រយៈពេលយ៉ាងតិចមួយសប្ដាហ៍ ព្រោះតែបានរំលោភលើគោលការណ៍របស់ក្រុមហ៊ុនទាក់ទងនឹងការញុះញង់ឱ្យមានអំពើហិង្សា។ Snapchat, Reddit និង TikTok ក៏ជាបណ្ដាញសង្គមខ្នាតយក្សដែលសម្រេចចិត្តបិទគណនីរបស់លោក Trump និងបានលុបខ្លឹមសារដែលមានលក្ខណញុះញង់។

គណនីរបស់លោក Donald Trump ត្រូវបាន Twitter បិទដោយគ្មានកាលកំណត់

Google និង Apple ក៏បានធ្វើសកម្មភាពប្រហាក់ប្រហែលនេះទាក់ទិននឹងអំពើហិង្សាកន្លងមក។ Google បានលុប Parler (កម្មវិធីដែលត្រូវបានគេចាត់ទុកថាជាមជ្ឈមណ្ឌលនៃបាតុកម្មបែបអភិរក្សនិយមក្នុងពេលកន្លងនៅសហរដ្ឋអាមេរិក) ចេញពីផ្សារកម្មវិធីរបស់ខ្លួនកាលពីថ្ងៃទី 17 មករា ដើម្បីការពារអ្នកប្រើប្រាស់នៅលើ Google Play។

ក្នុងគ្រានោះដែរ មុនពេលលុបចេញពី App Store ក្រុមហ៊ុន Apple បានស្នើឱ្យ Parler លុបសារដែលបានបំពានគោលការណ៍ក៏ដូចជាលើកឡើងអំពីវិធីសាស្ត្រត្រួតពិនិត្យខ្លឹមសារក្នុងអនាគត ប៉ុន្តែ Parler មិនធ្វើតាម។ បន្ទាប់មក កាលពីថ្ងៃទី 9 មករា Parler ក៏ត្រូវបានលុបចេញពី App Store។

ទាក់ទងនឹង Parler នេះដែរ សេវាកម្ម Amazon Web Services នៃក្រុមហ៊ុន Amazon កាលពីថ្ងៃទី 10 មករា ក៏បានប្រកាសឈប់ជួលម៉ាស៊ីនមេ (server) ទៅឱ្យកម្មវិធីនេះ ព្រោះបានរំលោភលើគោលការណ៍របស់ក្រុមហ៊ុន។

តម្លៃមូលបត្ររបស់ Apple និង Google សុទ្ធតែបានកើនឡើងក្នុងអត្រាទាប ក្រោយពីបានប្រកាសលុប Parler ខណៈមូលបត្រ Amazon បានកើន 1.6%។

CNN កាលពីថ្ងៃទី 11 មករា បានចេញផ្សាយថា លោក Trump អាចនឹងសងសឹកចំពោះបណ្ដាក្រុមហ៊ុនបច្ចេកវិទ្យាដែលបានលុបគណនីរបស់លោកនៅក្នុងសប្ដាហ៍ចុងក្រោយនៃអាណត្តិរបស់ខ្លួន។ ប៉ុន្តែមកដល់បច្ចុប្បន្ន គេមិនទាន់ដឹងច្បាប់អំពីចំណាត់ការរបស់ប្រធានាធិបតីអាមេរិករូបនេះ យ៉ាងណានៅឡើយ៕

ប្រភព៖ Business Insider

January 14, 2021

ប៉ូលិសដើមកំណើតវៀតណាម ចូលរួមបាតុកម្មហិង្សានៅវិមានសភាអាមេរិក កំពុងប្រឈមនឹងផ្លូវច្បាប់

Tam Dinh Pham ដែលជាមន្ត្រីប៉ូលិសអាមេរិកាំងដើមកំណើតវៀតណាមម្នាក់ ត្រូវបានផ្អាកពីការងារ ក្រោយពីបានចូលរួមធ្វើបាតុកម្មគាំទ្រលោក Trump និងរំលោភចូលកាន់កាប់វិមានសភាអាមេរិកកាលពីសប្ដាហ៍មុន។

ប្រធានស្នងការដ្ឋានប៉ូលិសក្រុង Houston លោក Art Acevedo កាលពីថ្ងៃទី 13 មករា បានបញ្ជាក់ថា មន្ត្រីប៉ូលិសម្នាក់របស់ស្នងការដ្ឋាននេះត្រូវបានផ្អាកពីការងារ ព្រោះតែបានចូលរួមធ្វើបាតុកម្មហិង្សានៅវ៉ាស៊ីងតោន ដែលក្រោយមកបានចូល «លុកលុយ» តំបន់ Capitol Hill កាលពីថ្ងៃទី 6 មករា។ មន្ត្រីប៉ូលិសឈ្មោះ Tam Dinh Pham កំពុងត្រូវបានស៊ើងអង្កេត ហើយលោក Acevedo ជឿថា ប៉ូលិសរូបនេះនឹងត្រូវប្រឈមនឹងការចោទប្រកាន់ពីអាជ្ញាធរថ្នាក់ជាតិ។

លោក Acevedo ថ្លែងថា៖ «ពុំមានអ្វីដែលត្រូវនិយាយការពារទង្វើល្មើសច្បាប់ ពិសេសនៅពេលជនល្មើសជាមន្ត្រីប៉ូលិស។ នៅតំបន់ Houston យើងតែងតែដើរតាមគន្លងច្បាប់ជានិច្ច»។

Acevedo ឱ្យដឹងថា នៅល្ងាចថ្ងៃអាទិត្យ ទី 10 មករា ពេលកំពុងសម្រាក ស្រាប់តែលោកទទួលបានអ៊ីមេលពីពលរដ្ឋម្នាក់ ក្នុងនោះមានរូបថតមួយសន្លឹកបង្ហាញថា មានប៉ូលិសម្នាក់បិទមុខ កំពុងកាន់ទង់របស់ Trump នៅឯវិមានសភាជាតិ។ លោក Acevedo ក៏បានចូលមើល Facebook របស់មន្ត្រីនគរបាលខាងលើដើម្បីស្វែងយល់ ហើយក៏រកឃើញថា កូនចៅរបស់ខ្លួនពិតជាមានវត្តមាននៅទីនោះពិតមែន។

«គ្រប់គ្នាមានសិទ្ធិ និងសេរីភាពក្នុងការធ្វើសកម្មភាពទៅតាមច្បាប់វិសោធនកម្មទីមួយ ប៉ុន្តែ ដំបូងខ្ញុំចង់ធានាថា ពួកគេមិនធ្វើអ្វីឱ្យលើសពីដែនកំណត់ និងប្រព្រឹត្តអំពើខុសច្បាប់» លោក Acevedo បន្ថែម។

ទូរទស្សន៍ KPRC 2 នៅ Houston បានផ្សាយថា មន្ត្រីប៉ូលិសខាងលើដែលមានឈ្មោះថា Tam Dinh Pham ត្រូវបានផ្អាកពីការងារចាប់ពីព្រឹកថ្ងៃទី 13 មករា។ លោក Acevedo ឱ្យដឹងថា Pham បានចូលបម្រើការក្នុងជួរប៉ូលិសនៅស្នងការដ្ឋាននគរបាលក្រុងអស់រយៈពេល 18 ឆ្នាំមកហើយ និងមិនធ្លាប់បានបំពានច្បាប់អ្វីនោះទេ។ Pham បានធ្វើដំណើរទៅកាន់ក្រុងវ៉ាស៊ីងតោនតែម្នាក់ឯងដើម្បីចូលរួមធ្វើបាតុកម្ម។

សូមរំលឹកថា ក្រុមបាតុករដែលគាំទ្រលោក Trump បានសម្រុកចូលកាន់កាប់វិមានសភាអាមេរិកកាលពីថ្ងៃទី 6 ខែមករា ក្នុងពេលដែលក្រុមតំណាងរាស្ត្រកំពុងប្រជុំដើម្បីពិចារណាលើការទទួលស្គាល់លទ្ធផលបោះឆ្នោត។ ការរំលោភចូលនេះ បាននាំឱ្យមានអំពើហិង្សាកើតឡើង និងបានសម្លាប់មនុស្សយ៉ាងតិច 5 នាក់។ អាជ្ញាធរបានចាប់ខ្លួនបាតុករមួយចំនួនដែលបានចូលរួមប្រើហិង្សា និងកំពុងស៊ើបអង្កេតលើក្រុមមន្ត្រីប៉ូលិសជាច្រើននាក់ដែលប្រចាំការនៅវិមានសភា ដោយសង្ស័យថា បានគាំទ្រដល់ក្រុមបាតុករ៕

ប្រភព៖ Click2houston

January 14, 2021

ព័រទុយហ្គាល និងស្វីស ដាក់បម្រាមគោចរជាថ្មីដោយសារ Covid-19

កាលពីថ្ងៃទី 13 មករា នាយករដ្ឋមន្ត្រីព័រទុយហ្គាល Antonio Costa បានប្រកាសថា ប្រទេសនេះនឹងដាក់បម្រាមគោចរជាថ្មីដើម្បីទប់ស្កាត់ការឆ្លងរាលដាលនៃវីរុសដែលបង្កជំងឺរលាកសួត Covid-19។

នៅក្នុងកិច្ចប្រជុំពិសេសនៃគណៈរដ្ឋមន្ត្រី លោក Antonio Costa ថ្លែងថា បទបញ្ជាបម្រាមគោចរថ្មីនេះនឹងមានសុពលភាពចាប់ពីថ្ងៃទី 15 ខែមករា ឆ្នាំ 2021 ក្នុងនោះនឹងរួមមានទាំងវិធានការរឹតបន្តឹងការធ្វើដំណើរដូចដែលបានធ្វើឡើងកាលពីខែមីនា និងខែមេសា ឆ្នាំទៅ។ ហាងទំនិញមិនចាំបាច់ ហាងកាហ្វេ ភោជនីយដ្ឋានជាដើម ត្រូវតែបិទទ្វារផ្អាកដំណើរការជាបណ្ដោះអាសន្ន លើកលែងតែសាលារៀន។ ទន្ទឹមនឹងនេះ ពលរដ្ឋក៏ត្រូវបានស្នើឱ្យនៅក្នុងផ្ទះ ប៉ុន្តែអាចចេញទៅបោះឆ្នោតជ្រើសរើសប្រធានាធិបតីជុំដំបូង ដែលនឹងត្រូវធ្វើឡើងនៅថ្ងៃទី 24 មករាខាងក្នុង។ លោក Costa បញ្ជាក់ថា ចាប់ពីថ្ងៃទី 17 មករា ពលរដ្ឋប្រទេសនេះអាចទៅបោះឆ្នោតមុនកាលកំណត់បាន។

នៅក្នុងរយៈពេល 24 ម៉ោងកន្លងទៅ ព័រទុយហ្គាលបានរកឃើញអ្នកឆ្លងវីរុស Covid-19 ថ្មីចំនួន 10,556 នាក់ និងស្លាប់ចំនួន 156 នាក់ នាំឱ្យតួលេខសរុបនៃអ្នកវិជ្ជមានកើនដល់ជាង 500,000 នាក់ និងស្លាប់ជាង 8,000 នាក់។

ទន្ទឹមនឹងព័រទុយហ្គាល រដ្ឋាភិបាលស្វីសក៏បានប្រកាសថានឹងដាក់បម្រាមគោចរ ហើយវិធានការតឹងរ៉ឹងនឹងត្រូវបានអនុវត្តចាប់ពីថ្ងៃទី 18 មករា ខាងមុខ។ ប្រទេសនេះ ក្នុងរយៈពេលមួយថ្ងៃនិងមួយយប់កន្លងទៅ បានរកឃើញអ្នកវិជ្ជមាននឹង Covid-19 ថ្មីចំនួន 3,001 នាក់ ធ្វើឱ្យតួលេខសរុបនៃអ្នកវិជ្ជមានឡើងដល់ជាង 490,000 នាក់ និងស្លាប់ជាង 8,500 នាក់៕

ប្រភព៖ RT

January 14, 2021

ប្រធានាធិបតី Trump «ឯកោ» នៅក្នុងវីដេអូដំបូង ក្រោយពីត្រូវសភាជាន់ទាបចោទប្រកាន់ជាផ្លូវការ

លោក Donald Trump បានក្លាយជាប្រធានាធិបតីអាមេរិកដំបូងដែលត្រូវបានថ្កោលទោស និងចោទប្រកាន់រហូតដល់ពីរលើក។ សារព័ត៌មាន AP (អាមេរិក) ឱ្យដឹងថា ក្នុងការចោទប្រកាន់លើកទីពីរនេះ លោក Trump នៅស្ងប់ស្ងាត់តែម្នាក់ឯង។

រសៀលថ្ងៃទី 13 មករា (ម៉ោងក្នុងស្រុក) សភាជាន់ទាបអាមេរិក បានអនុម័តសម្រេចចោទប្រកាន់លោក Donald Trump ជាផ្លូវការ។ ក្នុងចំណោមអ្នកដែលបានបោះឆ្នោតចោទប្រកាន់លោក Trump ក៏មានតំណាងរាស្ត្របក្សកាន់អំណាចបច្ចុប្បន្នដល់ទៅ 10 រូប រួមមាន Adam Kinzinger, Liz Cheney, John Katko, Fred Upton, Jaime Herrera Beutler, Dan Newhouse, Peter Meijer, Anthony Gonzalez, Tom Rice និង David Valadao។

ដូច្នេះ ប្រធានាធិបតី Trump ត្រូវបានសមាជិកបក្សរបស់ខ្លួនបែរខ្លងជាផ្លូវការហើយ។ មេដឹកនាំអាមេរិករូបនេះ មិនអាចធ្វើអ្វីបាន ក្រៅពីការតាមដានព្រឹត្តិការណ៍នៅលើទូរទស្សន៍។ Liz Cheney តំណាងរាស្ត្របក្សសាធារណរដ្ឋប្រចាំសភាជាន់ទាប បាននិយាយថា «មិនធ្លាប់មានអំពើក្បត់ដ៏ធំបែបនេះឡើយ» ចំពោះប្រធានាធិបតីមួយរូប។

សមាជិកមួយចំនួនរបស់បក្សសាធារណរដ្ឋ បានសំដែងការគាំទ្រប្រធានាធិបតី Trump នៅក្នុងការជជែកតវ៉ាគ្នាកាលពីថ្ងៃទី 13 មករា ប៉ុន្តែចុងក្រោយក៏នៅតែមានតំណាងរាស្ត្រចំនួន 10 នាក់របស់បក្សនេះ បោះឆ្នោតថ្កោលទោសមេដឹកនាំកំពូលរបស់សហរដ្ឋអាមេរិក។ នេះគឺជាប្រការមួយដែលមិនដូចទៅនឹងការថ្កោលទោសលើកដំបូងចំពោះប្រធានាធិបតី Trump។

នៅក្នុងការបោះឆ្នោតកាលពីខែធ្នូ 2019 នៅសភាជាន់ទាប ស្ដីអំពីការថ្កោលទោសចោទលោក Trump ទាក់ទិននឹងការប្រើប្រាស់អំណាចកៀបសង្កត់ដើម្បីឱ្យអ៊ុយក្រែនធ្វើការស៊ើបអង្កេតលើអនុប្រធានាធិបតី Joe Biden ក្រុមសម្ព័ន្ធមិត្តរបស់លោក Trump គឺជាអ្នកធ្វើយុទ្ធនាការជំទាស់ដោយការធ្វើសន្និសីទសារព័ត៌មាន។ល។ ឆ្នាំ 2020 សភាជាន់ខ្ពស់អាមេរិកដែលពេលនោះត្រូវបានគ្រប់គ្រងដោយបក្សសាធារណរដ្ឋ បានសម្រេចថា លោក Trump គ្មានកំហុស។

ប្រធានសភាជាន់ទាបអាមេរិក Nancy Pelosi ថ្លែងនៅមុនការបោះឆ្នោតស្ដីអំពីការថ្កោលទោសលោក Trump

កាលពីថ្ងៃទី 13 មករា សេតវិមានបានបង្ហោះវីដេអូលើបណ្ដាញសង្គម Twitter បង្ហាញអំពីសេចក្ដីថ្លែងការណ៍របស់លោក Trump។ លោក Trump បានរិះគន់លើអំពើហិង្សានៅវិមានសភា ប៉ុន្តែមិនបាននិយាយដល់ការដែលត្រូវថ្កោលទោសនោះទេ។ ក្រុមអ្នកវិភាគយល់ថា ក្នុងវីដេអូនេះ មេដឹកនាំអាមេរិកនិយាយយឺតជាងធម្មតា និងមើលទៅដូចជាឯកោខ្លាំងណាស់។

ការថ្កោលទោសដោយការចោទប្រកាន់ខាងលើត្រូវបានធ្វើឡើងបន្ទាប់ពីក្រុមបាតុករគាំទ្រលោក Trump កាលពីថ្ងៃទី 6 មករា បានបង្កឱ្យមានអំពើហិង្សានៅវិមានសភាជាតិនៅ Capitol Hill ក្នុងគ្រាដែលសភាកំពុងតែរាប់សន្លឹកឆ្នោតដើម្បីបញ្ជាក់អំពីការទទួលស្គាល់លទ្ធផលនៃការបោះឆ្នោតសកលដែលថាលោក Joe Biden ជាអ្នកឈ្នះ។ អំពើហិង្សានៅវិមានសភានេះ បានបណ្ដាលឱ្យមានមនុស្សស្លាប់យ៉ាងតិច 5 នាក់ ក្នុងនោះក៏មានមន្ត្រីប៉ូលិសម្នាក់ប្រចាំការនៅវិមានសភាផងដែរ។

ក្នុងករណីដែលត្រូវបានសភាជាន់ខ្ពស់ អនុម័តយល់ព្រមទៅលើការថ្កោលទោសពីសំណាក់សភាជាន់ទាប លោក Trump នឹងត្រូវបាត់បង់ឱកាសក្នុងការក្លាយជាបេក្ខភាពប្រធានាធិបតីនៅក្នុងការបោះឆ្នោតឆ្នាំ 2024។

លោក Donald Trump គឺជាប្រធានាធិបតីសហរដ្ឋអាមេរិកទីបីដែលត្រូវបានសភាថ្កោលទោស និងចោទប្រកាន់។ មុននេះ លោក Bill Clinton និង Andrew Johnson ក៏បានស្ថិតក្នុងបញ្ជីនេះដែរ។ ចំណែកអតីតប្រធានាធិបតី Richard Nixon បានរួចផុតពីការថ្កោលទោសព្រោះរឿងអាស្រូវ Watergate ដោយសារថា លោកបានសម្រេចចិត្តលាលែងពីតំណែង៕

ប្រភព៖ BBC, NYTimes

January 14, 2021

បន្ទាប់ពី Youtube, Twitter និង Facebook បណ្ដាញទំនាក់ទំនង Snapchat ក៏បិទគណនីរបស់ Trump ក្រោយអំពើហិង្សានៅវិមានសភាអាមេរិក

ក្រុមហ៊ុនបច្ចេកវិទ្យា Snap Inc បានប្រកាសថា នឹងបិទគណនីរបស់លោក Donald Trump នៅលើកម្មវិធីទំនាក់ទំនង Snapchat ជារៀងរហូត ដោយសារព្រួយបារម្ភ ក្រោយពីមានករណីហិង្សានៅ Capitol Hill កាលពីសប្ដាហ៍មុន។

អ្នកនាំពាក្យរបស់ក្រុមហ៊ុន Snap Inc កាលពីថ្ងៃទី 13 មករា បានឱ្យដឹងថា ទង្វើនេះត្រូវបានធ្វើឡើងព្រោះតែប្រធានាធិបតី Donald Trump បាន «ព្យាយាមផ្សព្វផ្សាយព័ត៌មានមិនពិត ថ្លែងសារដែលបង្កឱ្យមានកំហឹង និងអំពើហិង្សា ដែលទង្វើនេះ ពិតជារំលោភលើការគោលការណ៍របស់យើង»។

អ្នកនាំពាក្យខាងលើអះអាងថា ការបិទចោលគណនី Snapchat របស់លោក Trump គឺ «ដើម្បីសុវត្ថិភាពសាធារណៈ» និង «ដើម្បីផលប្រយោជន៍ល្អបំផុតសម្រាប់ពិភព Snapchat»។

ការសម្រេចខាងលើនេះ ត្រូវបានលើកឡើងក្រោយពី Snap Inc កាលពីសប្ដាហ៍មុនបានប្រកាសផ្អាកដោយមិនមានកាលកំណត់ចំពោះគណនី Snapchat របស់លោក Trump បន្ទាប់ពីករណីវឹកវរដែលបង្កឡើងដោយក្រុមបាតុករគាំទ្រលោក Trump នៅវិមានសភាអាមេរិក ដែលបានបណ្ដាលឱ្យមនុស្សយ៉ាងតិច 5 នាក់បានបាត់បង់ជីវិត។

Snapchat គឺជាបណ្ដាញសង្គមថ្មីបំផុតដែលប្រើប្រាស់ឥទ្ធិពលរបស់ខ្លួនក្នុងការ «ដាក់ទណ្ឌកម្ម» ទៅលើលោក Trump។ មុននេះ Facebook ក៏បានប្រកាសបិទបណ្ដោះអាសន្នដោយគ្មានកាលកំណត់ទៅលើគណនីរបស់លោក Trump ផងដែរ ខណៈ Twitter ក៏បានបិទគណនីរបស់លោក Trump ជារៀងរហូត «ដោយសារមានការព្រួយបារម្ភអំពីហានិភ័យនៃការបញ្ឆេះអំពើហិង្សា»។

ក្រៅពីនេះ កាលពីថ្ងៃទី 12 មករា Youtube ក៏បានប្រកាសបិទគណនីរបស់លោក Trump ក្នុងរយៈពេលយ៉ាងតិចមួយសប្ដាហ៍ ឬអាចយូរជាងនេះ ដោយសារតែមានការរំលោភលើគោលការណ៍របស់បណ្ដាញសង្គមនេះ៕

ប្រភព៖ Reuters, Yahoo

January 14, 2021

កម្ពុជារកឃើញមនុស្ស 13នាក់វិជ្ជមាននឹង Covid-19 ខណៈពិភពលោករកឃើញ 741,895នាក់ ក្នុងអំឡុង 24ម៉ោងមុននេះ

ក្រសួងសុខាភិបាលកម្ពុជា ព្រឹកនេះ បានឱ្យដឹងថា បានរកឃើញអ្នកផ្ទុកវីរុស Covid-19 សរុបចំនួន 13 នាក់បន្ថែមទៀត ធ្វើឱ្យតួលេខសរុបបានកើនឡើងដល់ 411 នាក់។

សម្រាប់ព័ត៌មានលម្អិតស្ដីអំពីករណីវិជ្ជមានទាំង 13 នាក់ខាងលើនេះ សូមបន្តអាចតារាងខាងក្រោម។

គិតមកដល់ព្រឹកថ្ងៃទី 14 មករា ឆ្នាំ 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 411 នាក់ ក្នុងនោះមានអ្នកជាសះស្បើយចំនួន 377 នាក់ និង 34 នាក់កំពុងសម្រាកព្យាបាលនៅមន្ទីរពេទ្យ។

ដោយឡែកនៅទូទាំងពិភពលោក មានអ្នកឆ្លង Covid-19 សរុបចំនួន 92,747,904 នាក់ ក្នុងនោះមានអ្នកស្លាប់ចំនួន 1,985,405 នាក់ អ្នកជាសះស្បើយចំនួន 66,276,344 នាក់ និងអ្នកកំពុងព្យាបាលមានចំនួន 24,486,155 នាក់ ដែលក្នុងនេះដែរ មានអ្នកជំងឺចំនួន 110,673 នាក់កំពុងប្រឈមនឹងការបាត់បង់ជីវិតដោយសារអាការធ្ងន់ធ្ងរ៕

January 14, 2021

រុស្ស៊ីរកឃើញវីរុស Covid-19 ក្លាយពូជចំនួន 18 ប្រភេទ នៅក្នុងរាងកាយអ្នកជំងឺម្នាក់

ក្រុមអ្នកស្រាវជ្រាវរបស់ប្រទេសរុស្ស៊ី បានរកឃើញវីរុស Covid-19 ក្លាយពូជចំនួន 18 ប្រភេទ នៅក្នុងរាងកាយរបស់ស្ត្រីអ្នកជំងឺម្នាក់ដែលបានឆ្លង Covid-19 កាលពីជាង 4 ខែមុន។

សារព័ត៌មាន Sputnik បានឱ្យដឹងថា លទ្ធផលនៃការសិក្សាស្រាវជ្រាវមួយដែលត្រូវបានប្រកាសនៅដើមខែមករានៅលើទំព័រ virological.org បង្ហាញថា ក្រុមអ្នកវិទ្យាសាស្ត្រនៃវិទ្យាស្ថានវិទ្យាសាស្ត្រនិងបច្ចេកវិទ្យា Skolkovo រួមនឹងបណ្ឌិតសភាវិទ្យាសាស្ត្ររុស្ស៊ី សាកលវិទ្យាល័យវេជ្ជសាស្ត្រ Pavlov First State ប្រចាំ St.Petersburg វិទ្យាស្ថានស្រាវជ្រាវវីរុសផ្ដាសាយ Smorodintsev និងមន្ទីរពេទ្យមួយនៅក្នុងទីក្រុង St.Petersburg បានឱ្យដឹងថា៖ «យើងបានកត់ត្រាការវិភាគហ្សែននៃវីរុស SARS-CoV-2 (Covid-19) ពីអ្នកជំងឺ Covid-19 ម្នាក់ដែលមានជំងឺមហារីក។ ប្រព័ន្ធហ្សែនបានបង្ហាញអំពីការកើនឡើងដោយឯកឯងរបស់វីរុសក្លាយពូជថ្មីចំនួន 18 ប្រភេទ នៅក្នុងរយៈពេលជាង 4 ខែនៃការឆ្លងវីរុស Covid-19។ ពួកវារួមមានបណ្ដាប្រភេទវីរុសក្លាយពូជក្នុងក្រុម S ៖ Y453F និង Δ69-70HV ដែលត្រូវបានរកឃើញនៅក្នុងសម្បុកវីរុសដែលមានទាក់ទាក់ទងនឹងសត្វកញ្ជ្រោង»។

វីរុសក្លាយពូជនានាដែលបានរីកចម្រើននៅលើរាងកាយរបស់ស្ត្រីអ្នកជំងឺវ័យ 47 ឆ្នាំខាងលើ ត្រូវបានគេហៅថា អ្នកជំងឺ S។ អ្នកជំងឺនេះ ទំនងជាបានឆ្លងវីរុសនៅពេលកំពុងព្យាបាលជំងឺមហារីកនៅមន្ទីរពេទ្យ។ «អ្នកជំងឺនេះ ធ្លាប់បានប៉ះពាល់ផ្ទាល់នឹងអ្នកជំងឺវ័យចំណាស់ម្នាក់ ជាអ្នកជំងឺប្រភេទ A ដែលបានស្លាប់ដោយសារបានឆ្លង Covid-19» នេះបើតាមកំណត់ត្រានៃរបាយការណ៍ស្រាវជ្រាវ។

ថ្ងៃទី 17 មេសា 2020 អ្នកជំងឺ S បានចេញពីមន្ទីរពេទ្យ។ ថ្ងៃទី 30 មេសា 2020 អ្នកជំងឺនេះវិជ្ជមាននឹង Covid-19។

ការស្រាវជ្រាវបន្តឱ្យដឹងថា៖ «លទ្ធផលនៃការធ្វើតេស្តក្នុងថ្ងៃទី 14ឧសភា 19ឧសភា 9មិថុនា និងថ្ងៃទី 14 កក្កដា សុទ្ធតែបង្ហាញថា អវិជ្ជមាននឹង Covid-19។ ប៉ុន្តែអ្នកជំងឺ S នេះ មានអាការនៃជំងឺ Covid-19 យ៉ាងធ្ងន់ធ្ងរចាប់ពីថ្ងៃទី 25 ឧសភា ដល់ថ្ងៃទី 21 សីហា។ បន្ទាប់មក អ្នកជំងឺនេះក៏វិជ្ជមានជាថ្មីនៅថ្ងៃទី 3សីហា 8សីហា 17សីហា និង 20សីហា។ ចុងក្រោយ អ្នកជំងឺនេះក៏អវិជ្ជមាននៅក្នុងថ្ងៃទី 12កញ្ញា 2020 និងថ្ងៃទី 10វិច្ឆិកា និង 16ធ្នូ»។

យោងតាមអ្នកវិទ្យាសាស្ត្រ Nikolai Kryuchkov ការក្លាយពូជរបស់វីរុស Covid-19 បានកើតឡើងញឹកញាប់ជាងមុនចំពោះអ្នកជំងឺដែលមានប្រព័ន្ធការពាររាងកាយខ្សោយ បើធៀបនឹងអ្នកជំងឺដែលមានសុខភាពធម្មតា។

ការស្រាវជ្រាវខាងលើបានបង្ហាញទៀតថា វីរុសក្លាយពូជទាំងឡាយនៅលើរាងកាយអ្នកជំងឺខាងលើ មានចំណុចជាច្រើនដែលដូចទៅនឹងវីរុសក្លាយពូជដែលរកឃើញនៅប្រទេសអង់គ្លេស។

ប៉ុន្តែ កាលពីថ្ងៃទី 11 មករា 2021 លោក Alexander Gintsburg ប្រធានមជ្ឈមណ្ឌល Gamaleya ដែលជាកន្លែងអភិវឌ្ឍវ៉ាក់សាំង Covid-19 Sputnik V របស់រុស្ស៊ី បានបញ្ជាក់ថា លទ្ធភាពដែលថា រុស្ស៊ីមានវីរុស Covid-19 ប្រភេទថ្មីដោយឡែកគឺជារឿងដែលអាចកើតមានក្នុងកម្រិតខ្ពស់៕

ប្រភព៖ Sputnik

January 13, 2021

ខេត្ត Heilongjiang ដែលមានប្រជាជន 37 លាននាក់របស់ប្រទេសចិន ត្រូវបានប្រកាសអាសន្ន ដោយសារតែករណីវិជ្ជមាន Covid-19 ថ្មី

ខេត្ត Heilongjiang របស់ប្រទេសចិនត្រូវបានដាក់ឱ្យស្ថិតក្នុងភាពប្រកាសអាសន្នចាប់ពីថ្ងៃទី 13 មករានេះ ក្រោយពីបានរកឃើញករណីវិជ្ជមាននឹង Covid-19 ថ្មីជាច្រើននាក់ដែលមិនមានរោគសញ្ញា។

សារព័ត៌មាន AFP ឱ្យដឹងថា ប្រទេសចិនបានគ្រប់គ្រងការឆ្លងរាលដាលវីរុស Covid-19 បានយ៉ាងល្អ បន្ទាប់ពីវីរុសនេះបានរាតត្បាតពេញទីក្រុង Wuhan កាលពីចុងឆ្នាំ 2019។ ប៉ុន្តែ ប៉ុន្មានសប្ដាហ៍ចុងក្រោយនេះ ចិនបានរកឃើញករណីវិជ្ជមានជាច្រើននាក់ដែលជាករណីឆ្លងក្នុងសហគមន៍។ បញ្ហានេះបានធ្វើឱ្យអាជ្ញាធរថ្នាក់ខេត្ត ដាក់បម្រាមគោចរ កាត់បន្ថយការធ្វើដំណើរ លុបចោលការជួបជុំ រួមនឹងការធ្វើតេស្តបន្ថែមទៀត។

ក្នុងចំណោមខេត្តដែលបានចាប់ផ្ដើមរឹតបន្តឹងការធ្វើដំណើរ ឬការជួបជុំ Heilongjiang ដែលជាខេត្តមួយនៅភាគឦសានប្រទេសចិន ក៏ត្រូវបានដាក់ឱ្យស្ថិតក្នុងស្ថានភាពប្រកាសអាសន្ន ដោយស្នើឱ្យពលរដ្ឋមិនចាកចេញពីតំបន់មូលដ្ឋាន បើសិនមិនមានកិច្ចការសំខាន់ខ្លាំង ក៏ដូចជាការលុបចោលព្រឹត្តិការណ៍ជួបជុំនានាផងដែរ។ វិធានការទាំងនេះត្រូវបានធ្វើឡើងដើម្បីទប់ទល់នឹងការកើនឡើងនៃករណីឆ្លង Covid-19 ថ្មី ដោយសារថា ខេត្តនេះទើបតែបានរកឃើញអ្នកវិជ្ជមានថ្មីចំនួន 28 នាក់ ក្នុងនោះមាន 12 នាក់មិនមានរោគសញ្ញា។

មុននេះ ទីក្រុង Suihua របស់ខេត្ត Heilongjiang ដែលមានប្រជាជនជាង 5.2 លាននាក់ ក៏ត្រូវបានដាក់បម្រាមគោចរកាលពីថ្ងៃទី 11 មករា បន្ទាប់ពីរកឃើញមនុស្សជាង 40 នាក់វិជ្ជមាននឹង Covid-19 ក្នុងនោះមាន 45 នាក់មិនមានរោគសញ្ញា។ ចាប់ពីថ្ងៃទី 13 មករានេះ ទីក្រុងមួយចំនួននៅក្បែរ Suihua ក៏បានចាប់ផ្ដើមដាក់បម្រាមគោចរ ឬរឹតបន្តឹងការធ្វើដំណើរផងដែរ។

ប្រទេសចិនបានឱ្យដឹងថា បានរកឃើញករណីវិជ្ជមាននឹង Covid-19 ថ្មី ចំនួន 115 នាក់ ក្នុងថ្ងៃទី 13 ខែមករានេះ ក្នុងនោះមានជាង 90 ករណីនៅក្នុងខេត្ត Hebei។ អាជ្ញាធរចិន កាលពីសប្ដាហ៍មុនបានចាប់ផ្ដើមយុទ្ធនាការធ្វើតេស្ត Covid-19 ជាថ្មី និងបានបិទប្រព័ន្ធគមនាគមន៍សាធារណៈ សាលារៀន និងហាងនានានៅទីក្រុង Shijiazhuang ខេត្ត Hebei ដែលជាសម្បុកវីរុស Covid-19 ថ្មីបំផុត។

គិតមកដល់បច្ចុប្បន្ន ប្រទេសចិន បានរកឃើញអ្នកឆ្លងវីរុស Covid-19 សរុបចំនួន 87,706 នាក់ ក្នុងនោះមានអ្នកស្លាប់ចំនួន 4,634 នាក់ និងអ្នកកំពុងព្យាបាល 784 នាក់ ខណៈជាអ្នកបានជាសះស្បើយមានចំនួន 82,288 នាក់៕

ប្រភព៖ France24

January 13, 2021

ក្រុមហ៊ុនអាកាសចរណ៍ ត្រូវដោះកៅអីទាំងអស់ក្នុងយន្តហោះមួយគ្រឿង ព្រោះតែចិញ្ចៀនពេជ្ររបស់អ្នកដំណើរ

ផ្នែកបច្ចេកទេសនៃក្រុមហ៊ុនអាកាសចរណ៍មួយរបស់វៀតណាម បាននាំគ្នាដោះកៅអីទាំងអស់នៅក្នុងយន្តហោះមួយគ្រឿងដើម្បីស្វែងរកចិញ្ចៀនពេជ្រមួយវង់ដែលមានតម្លៃខ្ពស់ ក្រោយពីអ្នកដំណើរម្នាក់បានជ្រុះនៅក្នុងកាប៊ីនសម្រាប់អ្នកជំនួញ។

កាលពីថ្ងៃទី 12 មករា តំណាងក្រុមហ៊ុនអាកាសចរណ៍ Vietnam Airlines បានបញ្ជាក់ថា ក្រុមហ៊ុននេះ កាលពីថ្ងៃទី 11 មករា បានប្រគល់ជូនចិញ្ចៀនពេជ្រមួយវង់ដែលបានជ្រុះបាត់នៅក្នុងយន្តហោះនៃក្រុមហ៊ុននេះកាលពីថ្ងៃទី 8 មករា នៅក្នុងជើងហោះហើរក្នុងស្រុក ទៅឱ្យអ្នកដំណើររបស់ខ្លួនវិញហើយ។

អតិថិជនដែលបានធ្វើដំណើរតាមជើងហោះហើរប្រភេទពាណិជ្ជកម្ម បានហោះពីទីក្រុងហូជីមិញ ទៅកាន់រដ្ឋធានីហាណូយនៃប្រទេសវៀតណាម កាលពីថ្ងៃទី 8 ខែមករា និងបានចុះចតនៅវេលាម៉ោង 15 និង 10 នាទី។ ក្នុងពេលយន្តហោះត្រៀមចុះចត ស្ត្រីជាអ្នកដំណើរម្នាក់ក៏បានជ្រុះបាត់ចិញ្ចៀនពេជ្រមួយវង់នៅក្នុងយន្តហោះនេះ។

តំណាងរបស់ក្រុមហ៊ុន Vietnam Airlines បានឱ្យដឹងថា ផ្នែកបច្ចេកទេសរបស់ខ្លួន ក្រោយមកក៏បានដោះកៅអីទាំងអស់ដែលមាននៅលើយន្តហោះ ដើម្បីស្វែងរកចិញ្ចៀន។ ប៉ុន្តែ មិនបានរកឃើញនោះទេ ដោយសារវាមានទំហំតូចពេក។ ផ្នែកបច្ចេកទេសក៏បានរាយការណ៍ហេតុការណ៍នេះដល់អង្គភាពពាក់ព័ន្ធដើម្បីបន្តរុករក។

បន្ទាប់មក យន្តហោះនេះក៏បានហោះត្រលប់មកកាន់ទីក្រុងហូជីមិញវិញ នៅវេលាម៉ោង 18 ថ្ងៃទី 8 មករា ជាមួយនឹងលេខសម្គាល់ជើងហោះហើរ VN275។

ក្រោយមក សំណាងល្អក៏បានកើតឡើងចំពោះក្រុមបុគ្គលិកនៅលើយន្តហោះនេះ នៅពេលដែលអ្នកបម្រើបានរកឃើញចិញ្ចៀនពេជ្រក្នុងពេលពិនិត្យមើលក្នុងកាប៊ីនអ្នកដំណើរ។ ពួកគេក៏បានប្រគល់មកឱ្យអង្គភាព Lost & Found នៅព្រលានយន្តហោះ Tan Son Nhat នាទីក្រុងហូជីមិញ ហើយវាក៏ត្រូវបានប្រគល់ជូនម្ចាស់ដើមនៅរសៀលថ្ងៃទី 11មករា៕

ប្រភព៖ DNTT

January 13, 2021

Author: សឿន សំណាង