សឿន សំណាង - La Reine Media

លិចកប៉ាល់វៀតណាមនៅក្បែរកោះត្រឡាច! មនុស្ស 7នាក់បាត់ខ្លួន

កប៉ាល់នេសាទមួយគ្រឿងរបស់វៀតណាមដែលកំពុងធ្វើដំណើរត្រលប់ចូលដីគោក ស្រាប់តែត្រូវរលកសមុទ្រវាយពន្លិចនៅតំបន់សមុទ្រក្បែរកោះ Con Dao (កោះត្រឡាច) បណ្ដាលឱ្យអ្នកនេសាទ 13 នាក់រងគ្រោះ ក្នុងនោះមាន 6 នាក់ត្រូវបានជួយសង្គ្រោះ និង 7 នាក់កំពុងបាត់ខ្លួន។

កាលពីថ្ងៃទី 19 មករា អាជ្ញាធរស្រុក Con Dao បានឱ្យដឹងថា នៅព្រឹកម្សិលមិញ កប៉ាល់នេសាទរបស់ខេត្ត Ben Tre មួយគ្រឿងដែលមានមនុស្ស 13 នាក់ បានធ្វើដំណើរត្រលប់ចូលមកកាន់ដីគោក បន្ទាប់ពីចំណាយពេលច្រើនថ្ងៃលើផ្ទៃសមុទ្រដើម្បីនេសាទ។ នៅពេលមកដល់តំបន់សមុទ្រដែលមានចម្ងាយ 95 គីឡូម៉ែត្រពីកោះ Con Dao ក៏ស្រាប់តែត្រូវរលកសមុទ្របោកពន្លិច។

អ្នកនេសាទ 3 នាក់ដែលកំពុងអណ្ដែតលើផ្ទៃសមុទ្រ ត្រូវបានជួយសង្គ្រោះដោយកប៉ាល់មួយគ្រឿងដែលកំពុងនេសាទនៅក្បែរនេះ និងបានរាយការណ៍ដល់សមត្ថកិច្ច។

កោះ Con Dao ដែលខ្មែរហៅថា កោះត្រឡាច នៅតំបន់សមុទ្រភាគខាងត្បូងប្រទេសវៀតណាម

រាប់ចាប់ពីពេលរងគ្រោះ រហូតដល់ថ្ងៃត្រង់នេះ អ្នកនេសាទរងគ្រោះចំនួន 6 នាក់ហើយដែលត្រូវបានសង្គ្រោះទាន់ពេល ខណៈ 7 នាក់ផ្សេងទៀតកំពុងបាត់ខ្លួន។

លោក Nguyen Anh Nhut អភិបាលរងស្រុក Con Dao ឱ្យដឹងថា៖ «តំបន់កប៉ាល់លិចមានរលកសមុទ្រធំៗ ធ្វើឱ្យបេសកកម្មស្វែងរកជនរងគ្រោះត្រូវជួបការលំបាក»។

លោក Chin Lien ម្ចាស់កប៉ាល់នេសាទរងគ្រោះខាងលើ បញ្ជាក់ថា កប៉ាល់ 900 CV របស់គាត់បានចេញពីកំពង់ផែកាលពី 6 ខែមុន ដែលពេលនោះមានអ្នកនេសាទចំនួន 15 នាក់ ប៉ុន្តែ នៅពេលកំពុងធ្វើដំណើរត្រលប់មកវិញ មានអ្នកនេសាទ 2 នាក់បានឡើងកប៉ាល់ផ្សេង។ នៅលើកប៉ាល់រងគ្រោះនេះ ក៏មានត្រីសមុទ្រប្រហែល 10 តោនផងដែរ៕

ប្រភព៖ Vnexpress

January 19, 2021

សេតវិមានបញ្ចេញសៀវភៅសមិទ្ធផលជាង 600 ប្រការ របស់លោកប្រធានាធិបតី Donald Trump

នៅក្នុងសៀវភៅនិយាយអំពីសមិទ្ធផលនេះ ក៏មានការសង្កត់ធ្ងន់ទៅលើការរីកចម្រើនផ្នែកសេដ្ឋកិច្ចយ៉ាងខ្លាំងក្លាដែលត្រូវបានគេចាត់ទុកថាមិនធ្លាប់មាននៅសហរដ្ឋអាមេរិក មុន Covid-19 មកដល់ នៅក្រោមការដឹកនាំរបស់លោក Donald Trump។

ថ្មីៗនេះ សេតវិមានបានឧទ្ទេសនាមសៀវភៅមួយក្បាលដែលជាបញ្ជីកត់ត្រានូវសមិទ្ធផលសំខាន់ៗចំនួន 603 ប្រការដែលប្រធានាធិបតីអាមេរិក Donald Trump សម្រេចបាននៅក្នុងអាណត្តិរបស់ខ្លួន ខណៈដែលពិភពលោកកំពុងផ្ដោតការយកចិត្តទុកដាក់ទៅលើពិធីស្បថចូលកាន់តំណែងរបស់លោក Joe Biden។

ភាគច្រើននៃសមិទ្ធផលនេះមានជាប់ទាក់ទងនឹងការសន្យារបស់លោក Trump ដែលត្រូវបានធ្វើឡើងកាលពីពេលកំពុងឃោសនារកសំឡេងឆ្នោតនាំឆ្នាំ 2016។ ក្រុមមន្ត្រីសេតវិមានអះអាងថា បញ្ជីឈ្មោះនៃសមិទ្ធផលនេះគឺជាកេរដំណែលចម្បងដែលប្រធានាធិបតី Trump បានបន្សល់ទុក។

ក្នុងសៀវភៅនេះក៏មានការរាប់បញ្ចូលទាំងបញ្ហាអន្តោប្រវេសន៍ ពន្ធដារ សន្តិភាពនៅមជ្ឈឹមបូព៌ា រួមនឹងបញ្ហាសេដ្ឋកិច្ចជាដើម។ សម្រាប់បញ្ហាសេដ្ឋកិច្ច ត្រូវបានគេលើកឡើងថា មានការរីកចម្រើនខ្លាំងនៅក្នុងអាណត្តិរបស់លោក Trump មុនពេលវីរុស Covid-19 រាតត្បាតសហរដ្ឋអាមេរិក ក្នុងនោះ មានការងារថ្មីចំនួន 7 លានតំណែងត្រូវបង្កើតឡើង ខ្ពស់ជាងបីដងបើធៀបនឹងការព្យាករ ព្រមទាំងបានជួយឱ្យអត្រាគ្មានការងារធ្វើថយចុះមកទាបបំផុតក្នុងអំឡុងកន្លះសតវត្សរ៍មកនេះ។

ស្ថិតិខាងលើក៏បានលើកសរសើរចំពោះការដែលប្រធានាធិបតី Trump បានជួយជំរុញឱ្យទីផ្សារមូលបត្រនៅសហរដ្ឋអាមេរិក ហក់ឡើងដល់កម្រិតកំពូលថ្មីជាបន្តបន្ទាប់។

សៀវភៅខាងលើត្រូវបានសេតវិមានប្រកាសជាផ្លូវការ នៅមុនពេលប្រធានាធិបតី Donald Trump ត្រូវចាកចេញពីតំណែងនាប៉ុន្មានថ្ងៃទៀតប៉ុណ្ណោះ។ នេះគឺជាកាលៈទេសៈដែលប្រកបដោយភាពរសើប នៅពេលលោក Trump កំពុងត្រូវបានសភាជាន់ទាបចោទប្រកាន់ទោសជាលើកទីពីរ ក្រោយពីមានព្រឹត្តិការណ៍ហិង្សានៅវិមានសភាកាលពីថ្ងៃទី 6 ខែមករា ខណៈដែលប្រធានាធិបតីជាប់ឆ្នោតបន្ទាប់ Joe Biden នឹងស្បថចូលកាន់អំណាចនៅថ្ងៃទី 20 មករាស្អែកនេះ៕

ប្រភព៖ MSN

January 19, 2021

អាមេរិកបិទ Capitol Hill ព្រោះមានអគ្គិភ័យនៅទីប្រជុំជនក្បែរវិមានសភាជាតិ

តំបន់ Capitol Hill ត្រូវបានបិទនៅក្នុងគ្រាដែលការហាត់សមជាលើកចុងក្រោយសម្រាប់សម្ដែងក្នុងពិធីស្បថចូលកាន់តំណែងរបស់លោក Joe Biden ដោយសារតែមានអគ្គិភ័យកើតឡើងក្នុងតំបន់ប្រជុំជនដែលនៅក្បែរនោះ បង្កឱ្យមានការព្រួយបារម្ភអំពីសន្តិសុខ។

ក្រុមមន្ត្រីអាមេរិកកាលពីថ្ងៃទី 18 មករា បានធ្វើការហាត់ស៊ាំចុងក្រោយសម្រាប់អបអរក្នុងពិធីឡើងកាន់តំណែងប្រធានាធិបតីរបស់លោក Biden ដែលក្នុងនោះមានមនុស្សមួយចំនួនសម្ដែងជាប្រធានាធិបតីជាប់ឆ្នោត និងក្រុមមន្ត្រីជាន់ខ្ពស់ឈរនៅចំពោះមុខភ្នំ Capitol និងទស្សនាការប្រគំតន្ត្រីរបស់កងម៉ារីនអាមេរិក។

នៅក្នុងពេលកំពុងហាត់ស៊ាំ គេឃើញមានផ្សែងខ្មៅខ្មួលខ្មាញ់បាញ់ឡើងទៅលើនៅខាងក្រោយវិមានសភា បណ្ដាលឱ្យគ្រប់គ្នាត្រូវជម្លៀសខ្លួន ហើយ Capitol Hill ក៏ត្រូវបានបិទមិនឱ្យចេញចូល ដោយសារមានការព្រួយបារម្ភអំពីសន្តិសុខ។ ប៉ុន្តែ ផ្សែងនោះ ក្រោយមកត្រូវបានគេដឹងថា កើតឡើងពីអគ្គិភ័យមួយនៅក្នុងជំរំជនគ្មានផ្ទះសម្បែងដែលស្ថិតនៅខាងក្រោមស្ពានមួយ ចម្ងាយ 1.6 គីឡូម៉ែត្រពី Capitol Hill។

Vito Maggiolo អ្នកនាំពាក្យរបស់ការិយាល័យគ្រប់គ្រងអគ្គិភ័យនៃរដ្ឋធានីវ៉ាស៊ីងតោន បានឱ្យដឹងថា អគ្គិភ័យនេះមានប្រភពពីចង្ក្រានកម្ដៅស្វ័យប្រវត្តប្រើហ្គាសរបស់ស្ត្រីម្នាក់រស់នៅក្នុងជំរំនោះ។ ស្ត្រីម្ចាស់ចង្ក្រានកម្ដៅនេះរងរបួស ប៉ុន្តែបដិសេធមិនទទួលការព្យាបាល និងបានឱ្យដឹងថា ទ្រព្យរបស់គាត់ត្រូវឆេះខ្ទេចគ្មានសល់។ អគ្គិភ័យទំនងជាត្រូវបានពន្លត់ទាំងស្រុងបន្ទាប់ពីក្រុមគ្រប់គ្រងអគ្គិភ័យបានទៅដល់កន្លែងកើតហេតុ។

ក្នុងពេលអគ្គិភ័យកំពុងឆាប់ឆេះ ក្រុមមនុស្សដែលចូលរួមក្នុងពិធីហាត់ស៊ាំចុងក្រោយនេះ ត្រូវបានជម្លៀសពីខាងក្រៅវិមានសភា ចូលទៅកាន់ទីសុវត្ថិភាពដែលនៅខាងក្នុងអគារ។

ប្រហែលមួយម៉ោងក្រោយពីហេតុការណ៍បានកើតឡើង បម្រាមគោចរនៅតំបន់ Capitol Hill ក៏ត្រូវបានដកចេញ ហើយការហាត់ស៊ាំក៏បានបន្ត ខណៈដែលឧទ្ធម្ភាគចក្រហោះក្រឡឹងពីលើតំបន់អគារវិមានសភាអាមេរិក។ ក្រុមមន្ត្រីឱ្យដឹងថា មិនមានការគំរាមកំហែងណាមួយដល់ប្រជាជន ហើយអគ្គិភ័យនេះក៏មិនបង្កគ្រោះថ្នាក់ដល់ការហាត់ស៊ាំសម្រាប់ពិធីស្បថចូលកាន់តំណែងរបស់លោក Biden ដែលនឹងត្រូវប្រារព្ធឡើងនៅថ្ងៃទី 20 មករាខាងមុខ។

ក៏ប៉ុន្តែ បញ្ហានេះកំពុងតែធ្វើឱ្យមានការព្រួយបារម្ភកាន់តែខ្លាំងចំពោះសន្តិសុខនៅក្នុងរដ្ឋធានីវ៉ាស៊ីងតោន ចាប់តាំងពីព្រឹត្តិការណ៍ហិង្សានៅវិមានសភាបានកើតឡើងកាលពីថ្ងៃទី 6 មករា ដោយសារក្រុមអ្នកគាំទ្រលោក Trump បានសម្រុកចូលកាន់វិមានសភាដោយខុសច្បាប់៕

ប្រភព៖ AP

January 19, 2021

កម្ពុជារកឃើញករណីវិជ្ជមាននឹង Covid-19 ថ្មី 2នាក់ទៀត ខណៈពិភពលោករកឃើញសរុបជាង 95,989,000នាក់

ក្រសួងសុខាភិបាល នាព្រឹកថ្ងៃទី 19 មករានេះ បានឱ្យដឹងថា មនុស្ស 2 នាក់ត្រូវបានរកឃើញមានផ្ទុក Covid-19 សុទ្ធតែជាករណីនេះចូល។ សម្រាប់ព័ត៌មានលម្អិតសូមអានតារាងខាងក្រោម។

គិតមកដល់ព្រឹកថ្ងៃទី 19 ខែមករានេះ កម្ពុជាបានរកឃើញអ្នកឆ្លងវីរុស Covid-19 សរុបចំនួន 441 នាក់ ក្នុងនោះមានអ្នកជាសះស្បើយចំនួន 386 នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន 55 នាក់។

នៅទូទាំងពិភពលោក អ្នកវិជ្ជមាននឹង Covid-19 សរុបបានកើនដល់ 95,989,807 នាក់ អ្នកស្លាប់ដោយសារវីរុសនេះបានកើនដល់ 2,048,553 នាក់ ខណៈអ្នកជាសះស្បើយមានចំនួន 68,607,983 នាក់។ ក្នុងចំណោមអ្នកកំពុងព្យាបាលចំនួន 25,333,271 នាក់ មាន 111,841 នាក់កំពុងប្រឈមនឹងហានិភ័យនៃការស្លាប់ដោយសារអាការធ្ងន់ធ្ងរ។

January 19, 2021

FBI ស៊ើបអង្កេតលើករណី «លួច laptop របស់ប្រធានសភាអាមេរិក លក់ទៅឱ្យរុស្ស៊ី»

ស្ត្រីម្នាក់ដែលបានលួចយកកុំព្យូទូរយូរដៃរបស់ប្រធានសភាជាន់ទាបអាមេរិក Nancy Pelosi នៅក្នុងព្រឹត្តិការណ៍ហិង្សានៅឯវិមានសភាដើម្បីលក់ទៅឱ្យភាគីរុស្ស៊ី កំពុងត្រូវបានការិយាល័យស៊ើបអង្កេតសហព័ន្ធ (FBI) បើកការស្រាវជ្រាវ។

នៅក្នុងឯកសារចោទប្រកាន់ដែលត្រូវបានបញ្ជូនទៅកាន់តុលាការកាលពីថ្ងៃទី 17 មករា ភ្នាក់ងាររបស់ FBI លោក John Lund បានឱ្យដឹងថា បានទទួលពាក្យបណ្ដឹងប្រឆាំងនឹង Riley June Williams មានអាយុ 22 ឆ្នាំ ជាពលរដ្ឋមកពីរដ្ឋ Pennsylvania ទាក់ទិននឹងសកម្មភាពលួចយក laptop របស់ប្រធានសភាជាន់ទាបអាមេរិក លោកស្រី Pelosi និងមានបំណងលក់ទៅឱ្យប្រទេសរុស្ស៊ី។

ដើមបណ្ដឹងខាងលើគឺជាអតីតមិត្តប្រុសរបស់ Williams។ បុរសនេះបានបញ្ជាក់ថា Williams គឺជាអ្នកដឹកនាំក្រុមបាតុករឡើងជណ្ដើរទៅកាន់បន្ទប់របស់លោកស្រី Pelosi នៅក្នុងព្រឹត្តិការណ៍រំលោភចូលគ្រប់គ្រងវិមានសភាកាលពីថ្ងៃទី 6 មករា។

«Williams មានបំណងបញ្ជូន laptop នេះទៅឱ្យមិត្តម្នាក់នៅប្រទេសរុស្ស៊ី ដើម្បីលក់ទៅឱ្យ SVR ដែលជាអង្គភាពស៊ើបការណ៍សម្ងាត់នៅបរទេសរបស់រុស្ស៊ី។ ប៉ុន្តែ មិនបានដឹងអំពីមូលហេតុដែលនាំឱ្យបែកធ្លាយរឿងនេះ ហើយក៏មិនដឹងច្បាស់ថា Williams កំពុងលាក់ទុក laptop នេះ ឬបំផ្លាញវាចោលនោះដែរ» នេះជាសម្ដីរបស់សាក្សីដែលបានសារភាព។

https://www.youtube.com/watch?v=Fsn9OOGVyr8

FBI ឱ្យដឹងថា កំពុងតែស្រាវជ្រាវលើករណីនេះ ហើយក៏មិនទាន់រកឃើញសញ្ញាណាមួយដែលបង្ហាញថាឧបករណ៍នេះត្រូវបានយកចេញពីការិយាល័យរបស់លោកស្រី Pelosi។ តុលាការបានចេញបញ្ជាឱ្យចាប់ខ្លួន Williams ក៏ប៉ុន្តែ ស្ត្រីម្នាក់នេះមិនទាន់ត្រូវបានចាប់ខ្លួននៅឡើយ។

ឯសារចោទប្រកាន់បញ្ជាក់ថា «Williams ទំនងជាបានគេចខ្លួន»។ ប៉ូលិសក្នុងតំបន់ Harrisburg បានឱ្យដឹងថា ម្ដាយរបស់ Williams និយាយថា នាងបានវេចបង្វេច និងចាកចេញពីផ្ទះដើម្បី «ទៅឆ្ងាយមួយរយៈពេល» ប៉ុន្តែ Williams មិនបានប្រាប់ម្ដាយនាងអំពីគោលដៅរបស់ខ្លួនឡើយ។

អាជ្ញាធរជាតិអាមេរិកបានធ្វើការចោទប្រកាន់កម្រិតព្រហ្មទណ្ឌចំពោះមនុស្សជាង 100 នាក់ដែលជាប់ទាក់ទិននឹងករណីហិង្សានៅវិមានសភាកាលពីថ្ងៃទី 6 មករា ដែលពេលនោះមានអ្នកគាំទ្រលោក Trump រាប់ពាន់នាក់បានសម្រុកចូលកាន់កាប់វិមានសភា។ ការស៊ើបអង្កេត និងស្រាវជ្រាវលើក្រុមមនុស្សដែលបានប្រើអំពើហិង្សាខាងលើ កំពុងត្រូវបានធ្វើឡើងជាបន្តបន្ទាប់៕

ប្រភព៖ CNN

January 18, 2021

ប្រហោងខ្មៅយក្ស ធ្ងន់ជាងព្រះអាទិត្យ 78លានដង កំពុង «ហែកស៊ី» ផ្កាយមួយដួង

ប្រហោងខ្មៅដ៏ធំនៅកណ្ដាលកាឡាក់ស៊ីមួយដែលស្ថិតនៅសែនឆ្ងាយពីផែនដី កំពុងតែ «ស៊ីសាច់» ផ្កាយ «យក្ស» មួយដួងជាសន្សឹមៗ ទៅតាមថេរវេលា 114 ថ្ងៃម្ដង។

កាឡាក់ស៊ី ESO 253-G003 មានចម្ងាយ 570 ឆ្នាំពន្លឺពីផែនដី កំពុងតែបញ្ចេញពន្លឺផ្លេកទៅតាមពេលវេលាយ៉ាងទៀងទាត់។ ក្រុមអ្នកវិទ្យាសាស្ត្របានរកឃើញថា មូលហេតុដែលនាំឱ្យមានការជះពន្លឺផ្លេកបែបនេះគឺដោយសារប្រហោងខ្មៅដ៏ធំមួយនៅកណ្ដាលកាឡាក់ស៊ី កំពុងតែ «ហែកសាច់» ផ្កាយមួយដួងបន្តិចម្ដង។ ផ្កាយមួយដួងនេះ វិលជុំវិញប្រហោងខ្មៅដ៏ធំមួយ ហើយវានឹងហោះទៅក្បែរប្រហោងខ្មៅនេះជារៀងរាល់ 114 ថ្ងៃម្ដង ធ្វើឱ្យវាត្រូវបាត់បង់វត្ថុធាតុមួយផ្នែក និងបញ្ចេញពន្លឺផ្លេកខ្លាំងដែលអ្នកវិទ្យាសាស្ត្រអាចដឹងបាន។

ព្រឹត្តិការណ៍បញ្ចេញពន្លឺផ្លេកដែលមានឈ្មោះថា ASASSN-14ko នេះ ត្រូវបានរកឃើញជាលើកដំបូងកាលពីឆ្នាំ 2014។ ដំបូងឡើយ ក្រុមអ្នកតារាសាស្ត្រយល់ថា វាជាការផ្ទុះផ្កាយដ៏ចម្លែកមួយ។ កាលពីឆ្នាំទៅ Anna Payne ដែលជាប្រធានក្រុមស្រាវជ្រាវ បានពិនិត្យទៅលើទិន្នន័យពីកម្មវិធីសង្កេតស្វ័យប្រវត្តទៅលើការផ្ទុះផ្កាយ (supernova) ទូទាំងចក្រវាល និងបានរកឃើញពន្លឺផ្លេកដែលជះចេញយ៉ាងទៀតទាត់។ Payne រាប់បានពន្លឺផ្លេកនេះចំនួន 17 លើក ក្នុងនោះ ចន្លោះពីមួយលើកទៅមួយលើកមានរយៈពេល 114 ថ្ងៃដូចគ្នា។ របកគំហើញនេះត្រូវបានប្រកាសនៅក្នុងកិច្ចប្រជុំលើកទី 237 របស់សមាគមតារាវិទូអាមេរិក និងនៅលើទស្សនាវដ្ដីតារាវិទ្យា (The Astrophysical Journal)។

Payne និងសហការី ព្យាករបានយ៉ាងត្រឹមត្រូវនូវពន្លឺផ្លេកដែលជះចេញនៅក្នុងខែឧសភា កញ្ញា និងខែធ្នូ ឆ្នាំ 2020។ ក្រោយពីសង្កេតទៅលើការជះពន្លឺផ្លេកសាជាថ្មីចំនួន 20 លើករបស់វត្ថុធាតុអាថ៌កំបាំងនេះ ក្រុមតារាវិទូជឿថា វាអាចបណ្ដាលមកពីប្រហោងខ្មៅយក្សនៅចំកណ្ដាលកាឡាក់ស៊ី។

«យើងយល់ថា ប្រហោងខ្មៅយក្សនៅកណ្ដាលកាឡាក់ស៊ី បង្កើតជាពន្លឺផ្លេកនៅពេលកំពុងរំលាយផ្នែកខ្លះនៃផ្កាយដ៏ធំមួយដែលវិលជុំវិញវា» Anna Payne បេក្ខភាពបណ្ឌិតនៅសាកលវិទ្យាល័យ Hawaii នាជ្រលង Manoa ឱ្យដឹងដូច្នេះ។

ក្រុមអ្នកវិទ្យាសាស្ត្រក៏កំពុងស្វែងយល់ទៅលើសម្មតិកម្មចំនួនពីរផ្សេងទៀត។ ទីមួយនោះគឺថា ពន្លឺផ្លេកនេះអាចបណ្ដាលមកពីការជះឥទ្ធិពលដាក់គ្នារវាងប្រហោងខ្មៅពីរផ្សេងគ្នា។ ប៉ុន្តែ បើទោះជា ESO 253-G003 មានប្រហោងខ្មៅចំនួនពីរ តែពួកវានៅសែនឆ្ងាយពីគ្នា ដូច្នេះមិនអាចមានឥទ្ធិពលលើគ្នានោះឡើយ។

សម្មតិកម្មទីពីរនោះគឺ ទំនាក់ទំនងរវាងផ្កាយ និងថាសវត្ថុធាតុដែលនៅជុំវិញប្រហោងខ្មៅ។ ផ្កាយដែលមានគន្លងគោចររាងពងក្រពើ អាចធ្វើដំណើរឆ្លងកាត់ថាសវត្ថុធាតុ បណ្ដាលឱ្យវត្ថុធាតុទាំងនេះត្រូវស្រូបទាញចូលទៅកាន់ប្រហោងខ្មៅ។ យ៉ាងនេះក្ដី សម្មតិកម្មនេះមិនទំនងទេ ព្រោះថា ផ្កាយត្រូវធ្វើដំណើរឆ្លងកាត់ថាសវត្ថុធាតុចំនួនពីរលើកនៅក្នុងគន្លងគោចរមួយជុំរបស់វា ដែលនេះនឹងបង្កើតបានជាពន្លឺផ្លេកខុសពីការសង្កេតឃើញ។

ក្រុមអ្នកស្រាវជ្រាវខាងលើបានសន្និដ្ឋានជាចុងក្រោយថា ប្រហោងខ្មៅដ៏ធំមួយដែលមានម៉ាសធ្ងន់ជាងព្រះអាទិត្យ 78 ដង កំពុងតែស្រូបទាញវត្ថុធាតុពីផ្កាយនេះជាសន្សឹម។ ក្នុងការធ្វើដំណើរទៅក្បែរប្រហោងខ្មៅម្ដងៗ ផ្កាយនេះត្រូវបាត់បង់វត្ថុធាតុពីខ្លួនអស់ប្រហែលនឹងទំហំភពព្រហស្បតិ៍គុណនឹងបី។ ក្រុមអ្នកស្រាវជ្រាវខាងលើមិនបានដឹងថា ដំណើរការនេះនឹងត្រូវបញ្ចប់នៅពេលណា ប៉ុន្តែ នៅពេលណាមួយនោះ ផ្កាយនេះនឹងត្រូវអស់វត្ថុធាតុពីខ្លួន និងបាត់ខ្លួនពីចក្រវាលមិនខាន។

Anna Payne និងក្រុមការងារបានចាប់ផ្ដើមវិភាគលើទិន្នន័យខាងលើកាលពីខែធ្នូ ឆ្នាំ 2020 ហើយពួកគេនឹងបន្តតាមដានពន្លឺផ្លេកនេះតទៅទៀត ដែលតាមគម្រោង វានឹងបង្ហាញខ្លួនជាថ្មីនៅក្នុងខែមេសា និងខែសីហាខាងមុខ៕

ប្រភព៖ IFL Science

January 18, 2021

GDP របស់ចិនកើន 2.3% ក្នុងឆ្នាំ 2020 ជាមួយនឹងការងើបឡើងពីវិបត្តិ Covid-19

នាថ្ងៃទី 18 មករា ឆ្នាំ 2021 នេះ នាយកដ្ឋានស្ថិតិជាតិ (NBS) របស់ប្រទេសចិន បានបញ្ចេញរបាយការណ៍មួយបង្ហាញថា ផលិតផលក្នុងស្រុកសរុប (GDP) ឆ្នាំ 2020 របស់ប្រទេសនេះ ទទួលបានចំនួន 101,598,000,000,000 ឬ 101.598 លានលានយន់ (ប្រហែល 15,666,000,000,000 ឬ 15.666 លានលានដុល្លារអាមេរិក) ជាមួយនឹងអត្រាកំណើន 2.3%។

នេះគឺជាកំណើនទាបបំផុតរបស់ប្រទេសចិន រាប់ពីពេលប្រទេសនេះបានចាប់ផ្ដើមធ្វើកំណែទម្រង់បើកទ្វារសដ្ឋកិច្ចជាតិកាលពីឆ្នាំ 1978 ប៉ុន្តែ ខឿនសេដ្ឋកិច្ចដែលធំជាងគេលំដាប់ទីពីរក្នុងពិភពលោកនេះ ត្រូវបានគេចាត់ទុកថាជាខឿនសេដ្ឋកិច្ចតែមួយគាត់ដែលមានកំណើនបូក នៅក្នុងគ្រាដែលពិភពលោកទាំងមូលត្រូវរងផលប៉ះពាល់ខ្លាំងដោយសារជំងឺរលាកសួតដែលបង្កឡើងដោយវីរុស Covid-19។ កំណើនខាងលើរបស់ចិន ក៏ជាអត្រាខ្ពស់ជាងបើធៀបនឹង 2% ដែលជាការព្យាកររបស់ទីភ្នាក់ងារសារព័ត៌មានបារាំង AFP។

ការទទួលបានលទ្ធផលខាងលើគឺអាស្រ័យទៅលើកំណើន GDP កាលពីត្រីមាសទីបួន ឆ្នាំ 2020 ដែលបន្តកើនឡើងយ៉ាងឆាប់រហ័ស ពោលគឺកើន 6.5% បើធៀបនឹងដំណាក់កាលដូចគ្នាក្នុងឆ្នាំ 2019។ ទន្ទឹមនឹងនេះ ទិន្នផលឧស្សាហកម្ម (ជាសន្ទស្សន៍សេដ្ឋកិច្ចសំខាន់មួយរបស់ចិន) ក្នុងឆ្នាំ 2020 ក៏បានកើន 2.8% បើធៀបនឹងដំណាក់កាលដូចគ្នាក្នុងឆ្នាំ 2019៕

ប្រភព៖ SCMP

January 18, 2021

ចាប់ខ្លួនមេដឹកនាំក្រុម «គង្វាលគោ» ដែលបានរំលោភចូលវិមានសភានៅ Capitol Hill

Couy Griffin ដែលជាមន្ត្រីថ្នាក់ស្រុកនៅ New Mexico និងស្ថាបនិកនៃក្រុម «គង្វាលគោគាំទ្រ Trump» ត្រូវបានចាប់ខ្លួនដោយសារតែចូលរួមធ្វើបាតុកម្មហិង្សានៅវិមានសភាអាមេរិកក្នុងតំបន់ Capitol Hill។

លោក Couy Griffin ត្រូវបានចាប់ខ្លួននៅទីក្រុងវ៉ាស៊ីងតោនកាលពីថ្ងៃទី 17 មករា ក្រោយពីបានសារភាពជាមួយមន្ត្រីស៊ើបអង្កេតសហព័ន្ធ (FBI) ថា ខ្លួនរួមនឹងក្រុមបាតុកររាប់ពាន់នាក់ដែលគាំទ្រប្រធានាធិបតី Donald Trump បានចូលរួមធ្វើបាតុកម្មហិង្សានៅវិមានសភាកាលពីថ្ងៃទី 6 មករាកន្លងទៅ។

ឯកសារចោទប្រកាន់បានបង្ហាញថា Couy Griffin ទទួលស្គាល់ថាបានឈរនៅលើខឿនខាងក្រៅនៃវិមានសភា ប៉ុន្តែមិនបានចូលទៅខាងក្នុងនោះទេ។ «បើសិនជាយើងធ្វើដូច្នេះ (ចង់និយាយថា ការចូលទៅខាងក្នុងវិមានសភា) វានឹងជាថ្ងៃមួយដ៏គួរឱ្យសោកស្ដាយ ហើយនឹងធ្វើឱ្យមានការបង្ហូរឈាមនៅវិមានសភា» Couy Griffin និយាយនៅក្នុងវីដេអូមួយដែលបានបង្ហោះលើ Facebook បន្ទាប់ពីមានអំពើហិង្សា ប៉ុន្តែវាត្រូវបានលុបទៅវិញ។

លោក Couy Griffin និងប្រធានាធិបតី Donald Trump

មន្ត្រីបក្សសាធារណរដ្ឋខាងលើ កាលពីសប្ដាហ៍មុនក៏ធ្លាប់បានប្រកាសប្រាប់ក្រុមប្រឹក្សានៃស្រុក Otero រដ្ឋ New Mexico ថា លោកមានគម្រោងនាំយកកាំភ្លើងវែងធម្មតាមួយគ្រឿង និងកាំភ្លើងខ្លីមួយគ្រឿងទៅតាមខ្លួន និងបើករថយន្តទៅកាន់វ៉ាស៊ីងតោនដើម្បីជំទាស់នឹងការឡើងកាន់អំណាចរបស់ប្រធានាធិបតីជាប់ឆ្នោត Joe Biden។

ក្រោយមក Griffin បានសារភាពប្រាប់ FBI ថា លោក «សង្ឃឹមថាអាចធ្វើការផ្លាស់ប្ដូរមេដឹកនាំដោយមិនបាច់ប្រើកាំភ្លើង» ប៉ុន្តែ ក៏បានព្រមានថា មិនបោះបង់ជម្រើសណាមួយឡើយ ដើម្បីស្វែងរកសេរីភាព។

បច្ចុប្បន្ន Griffin កំពុងប្រឈមមុខនឹងការចោទប្រកាន់ថាបានរំលោភចូលវិមានសភាជាតិដោយខុសច្បាប់។

Griffin គឺជាស្ថាបនិកនៃក្រុម «ខូវប៊យគាំទ្រ Trump» និងបង្ហាញខ្លួនជាមួយនឹងមួកគង្វាលគោនៅលើក្បាលជាញឹកញាប់។ មន្ត្រីរូបនេះក៏ធ្លាប់បានទៅកាន់សេតវិមានដើម្បីជួបលោក Trump កាលពីខែកញ្ញា ឆ្នាំ 2019 ផងដែរ។

https://www.youtube.com/watch?v=dgb92rpUSGE

អាជ្ញាធរជាតិអាមេរិកបានធ្វើការចោទប្រកាន់កម្រិតព្រហ្មទណ្ឌចំពោះមនុស្សជាង 100 នាក់ដែលជាប់ទាក់ទិននឹងករណីហិង្សានៅវិមានសភាកាលពីថ្ងៃទី 6 មករា ដែលពេលនោះមានអ្នកគាំទ្រលោក Trump រាប់ពាន់នាក់បានសម្រុកចូលកាន់កាប់វិមានសភា។ ការស៊ើបអង្កេត និងស្រាវជ្រាវលើក្រុមមនុស្សដែលបានប្រើអំពើហិង្សាខាងលើ កំពុងត្រូវបានធ្វើឡើងជាបន្តបន្ទាប់៕

ប្រភព៖ ABC/ Hill

January 18, 2021

ឆ្មាំការពារជាតិអាមេរិក ត្រូវគេលួចរថពាសដែកតម្លៃ 120,000ដុល្លារ! អ្នកផ្ដល់ដំណឹងពីជនសង្ស័យនឹងទទួលបានរង្វាន់ធំ

FBI បានប្រកាសផ្ដល់រង្វាន់ជាទឹកប្រាក់ចំនួន 10,000 ដុល្លារអាមេរិកទៅឱ្យអ្នកណាដែលផ្ដល់ព័ត៌មាននាំទៅរកការកំណត់អត្តសញ្ញាណរបស់ចោរដែលបានលួចរថពាសដែក Humvee ពីមូលដ្ឋានឆ្មាំការពារជាតិអាមេរិកនៅរដ្ឋ California។

«រថពាសដែក Humvee ពណ៌ប្រផេះលាយពណ៌ស្លឹកឈើមួយគ្រឿងត្រូវបានគេលួចពីបញ្ជាការដ្ឋានរបស់កងកម្លាំងខ្មាំការពារជាតិអាមេរិកប្រចាំនៅក្នុងរដ្ឋ California កាលពីថ្ងៃទី 15 មករា» នេះបើតាមការិយាល័យសហព័ន្ធស៊ើបអង្កេតអាមេរិក (FBI) ដែលបានប្រកាសនៅលើទំព័រ Twitter កាលពីថ្ងៃទី 17 មករា។

FBI Los Angeles បានឱ្យដឹងថា រថពាសដែកដែលមានតម្លៃប្រហែល 120,000 ដុល្លារនេះ បានបាត់ខ្លួនពីបញ្ជាការដ្ឋានរបស់កងវរសេនាតូចមួយដែលស្ថិតក្រោមកងពលលេខ 40 ដែលមានទីតាំងនៅទីក្រុង Bell។ FBI បានប្រកាសថានឹងផ្ដល់រង្វាន់ចំនួន 10,000 ដុល្លារ ចំពោះជនណាដែលរាយការណ៍ព័ត៌មានទាក់ទងនឹងរថពាសដែកដែលបានបាត់ខ្លួនខាងលើ។

Humvee គឺជាប្រភេទរថពាសដែកដែលត្រូវបានគេលួចច្រើនជាងគេក្នុងចំណោមរថយន្តយោធាអាមេរិក។ កាលពីខែកក្កដា ឆ្នាំ 2020 មានបុរសពីរនាក់បានលួចយករថពាសដែក Humvee របស់កងទ័ពថ្មើរជើងអាមេរិកនៅក្នុងរដ្ឋ Arkansas ប៉ុន្តែបានបរជ្រុលធ្លាក់ប្រឡាយក្រោយពីលួចបានមួយម៉ោង។

កាលពីខែកុម្ភៈ ឆ្នាំ 2018 បុរសម្នាក់បានលួចចូលឃ្លាំងអាវុធនៃឆ្មាំការពារជាតិអាមេរិកនៅវ៉ាស៊ីងតោន និងលួចបានរថពាសដែក Humvee មួយគ្រឿង រួចក៏បានគេចខ្លួនតាមច្រកមុខបាត់ស្រមោល។ បុរសខាងលើបានបើកបររថពាសដែកនេះទៅកាន់មជ្ឈមណ្ឌលហ្វឹកហ្វឺន Yakima និងបាននិយាយថា ចង់ចូលបម្រើការនៅក្នុងជួរកងទ័ពជើងគោកសហរដ្ឋអាមេរិក។

រថពាសដែក Humvee អាចធ្វើដំណើរក្នុងល្បឿន 113 គម/ម៉ោង និងរក្សាល្បឿន 89 គម/ម៉ោងនៅពេលផ្ទុកអីវ៉ាន់ពេញចំណុះ។ Humvee ត្រូវបានផលិតឡើងដើម្បីចូលជំនួស Jeep M151 ដែលត្រូវបានប្រើប្រាស់ចាប់ពីសង្គ្រាមលោកលើកទីពីរ និងកំពុងស្ថិតក្នុងការដាក់ឱ្យចូលនិវត្តន៍ជាបណ្ដើរ។

Humvee សរុប ប្រមាណជា 281,000 គ្រឿងត្រូវបានផលិត ក្នុងនោះមាន 230,000 គ្រឿងស្ថិតក្នុងជួរកងទ័ពថ្មើរជើង និងក្នុងអង្គភាពអនុវត្តច្បាប់ដទៃទៀតរបស់សហរដ្ឋអាមេរិក។ Humvee ក៏ត្រូវបានប្រទេសជាសមាជិករបស់អង្គការ NATO និងដៃគូសហការរបស់អាមេរិកប្រើប្រាស់ផងដែរ៕

ប្រភព៖ Task&Purpose

January 18, 2021

ស្រុតរូងរ៉ែក្រោមដីនៅប៉េរូ! មនុស្សយ៉ាងតិច 4នាក់បានស្លាប់

ប្រភពព័ត៌មាននៅអាមេរិកឡាទីនបានឱ្យដឹងថា កាលពីថ្ងៃទី 17 មករា ក្រុមមន្ត្រីនៅប្រទេសប៉េរូ បានប្រកាសថា យ៉ាងហោចណាស់មានកម្មករអណ្ដូងរ៉ែចំនួន 4 នាក់បានបាត់បង់ជីវិត ក្រោយពីមានករណីបាក់រអិលព្រឹលបានធ្វើឱ្យស្រុតរូងរ៉ែមាសនៅក្នុងខេត្ត Puno ភាគខាងត្បូងប្រទេសនេះ។

ក្រុមអ្នកជួយសង្គ្រោះ និងសមត្ថកិច្ចប៉េរូ កំពុងដុតដៃដុតជើងដើម្បីជួយសង្គ្រោះកម្មករដែលកំពុងជាប់ក្នុងអណ្ដូងរ៉ែធ្យូងដែលត្រូវបាក់ស្រុតនៅក្នុងខេត្ត Oyo នៃតំបន់ជួរភ្នំ Andes មានចម្ងាយ 230 គីឡូម៉ែត្រពីទីក្រុង Lima កាលពីថ្ងៃទី 2 កុម្ភៈ ឆ្នាំ 2019

ករណីគ្រោះថ្នាក់នេះបានកើតឡើងនៅក្នុងទីរួមស្រុក La Rinconada មានចម្ងាយពីរដ្ឋធានី Lima ប្រមាណ 1,357 គម ទៅទិសអាគ្នេយ៍។ អាជ្ញាធរក្នុងតំបន់ និងស្ថាប័នពាក់ព័ន្ធកំពុងធ្វើការស្រាវជ្រាវរកមូលហេតុ និងកំណត់អ្នកទទួលខុសត្រូវនៅតាមច្បាប់ប៉ូរូ។

ស្ថិតនៅលើកម្ពស់ 5,100 ម៉ែត្រធៀបនឹងផ្ទៃទឹកសមុទ្រ នៅភាគខាងត្បូងជួរភ្នំ Andes តំបន់រុករករ៉ែ La Rinconada គឺជាទីតាំងខ្ពស់បំផុតមួយក្នុងពិភពលោកដែលមានមនុស្សរស់នៅ។ កម្មកររ៉ែប្រមាណ 35,000 នាក់ កំពុងធ្វើការនៅតំបន់នេះ ក្នុងគ្រាដែលសីតុណ្ហភាពភាគច្រើនតែងតែស្ថិតក្រោម 0 អង្សាសេ។

ប្រភព៖ MSN

January 18, 2021

Author: សឿន សំណាង