សឿន សំណាង - La Reine Media

ថៃប្រកាសអំពីគម្រោងចាក់វ៉ាក់សាំង Covid-19 ដល់ក្រុមមនុស្សអាទិភាព

ប្រទេសថៃ កាលពីថ្ងៃទី 25 មករា បានប្រកាសឱ្យដឹងអំពីគម្រោងចាក់វ៉ាក់សាំងទប់ស្កាត់ Covid-19 នៅខែកុម្ភៈខាងមុខ ដោយប្រើប្រាស់វ៉ាក់សាំង 50,000 ដូស របស់ AstraZeneca។

ឆ្លើយនឹងសំណួររបស់ក្រុមអ្នកយកព័ត៌មាន លោក Sopon Mekton ដែលជាមន្ត្រីជាន់ខ្ពស់ផ្នែកសុខាភិបាលរបស់ថៃ បានឱ្យដឹងថា បុគ្គលិកសុខាភិបាលនៅក្នុងខេត្ត Samut Sakhon ដែលជាស្នូលនៃរលកវីរុសថ្មីបំផុតនៅប្រទេសនេះ នឹងត្រូវបានចាក់វ៉ាក់សាំងដំបូងគេ បន្ទាប់មកគឺក្រុមមនុស្សវ័យចំណាស់ និងពលរដ្ឋដែលមានជំងឺប្រចាំកាយ។

កាលពីសប្ដាហ៍មុន ស្ថាប័នគ្រប់គ្រងអាហារ និងថ្នាំពេទ្យរបស់ថៃ បានអនុម័តប្រើប្រាស់បន្ទាន់នូវវ៉ាក់សាំងរបស់ក្រុមហ៊ុន AstraZeneca ប៉ុន្តែមិនទាន់បានអនុម័តឱ្យប្រើប្រាស់វ៉ាក់សាំងរបស់ក្រុមហ៊ុន Sinovac Biotech ដែលខ្លួនបានបញ្ជាទិញពីប្រទេសចិននៅឡើយ។

រដ្ឋមន្ត្រីក្រសួងសុខាភិបាលប្រទេសថៃ Anutin Charnvirakul បញ្ជាក់ថា ប្រទេសនេះបានបញ្ជាទិញវ៉ាក់សាំងជាង 2 សែនដូសរបស់ AstraZeneca និង 2 លានដូស របស់ Sinovac Biotech។

គិតមកដល់ព្រឹកថ្ងៃទី 26 មករា ឆ្នាំ 2021 នេះ ប្រទេសថៃបានរកឃើញអ្នកឆ្លង Covid-19 សរុបចំនួន 13,687 នាក់ ក្នុងនោះមាន 75 នាក់បានស្លាប់៕

ប្រភព៖ Bangkok Post

January 26, 2021

តើអ្នកបានដឹងហើយ ឬនៅថា ទ្រព្យសរុបរបស់ប្រធានាធិបតី Joe Biden មានចំនួនប៉ុន្មានលានដុល្លារ?

លោក Joe Biden បានធ្វើនយោបាយរាប់សិបឆ្នាំមកហើយ ប៉ុន្តែ លោកទើបតែបានក្លាយជាសេដ្ឋីបន្ទាប់ពីចប់អាណត្តិអនុប្រធានាធិបតី និងបោះពុម្ភសៀវភៅ។

ប្រធានាធិបតីថ្មីរបស់សហរដ្ឋអាមេរិក លោក Joe Biden ត្រូវបានទស្សនាវដ្ដី Forbes ស្រាវជ្រាវឃើញថា មានទ្រព្យសម្បត្តិប្រមាណជា 9 លានដុល្លារអាមេរិក។ ពេលចាប់ផ្ដើមឃោសនារកសំឡេងឆ្នោតកាលពីឆ្នាំ 2020 លោក Biden បានប្រកាសព័ត៌មានអំពីហិរញ្ញវត្ថុរបស់ខ្លួន។

មុនពេលក្លាយជាអនុប្រធានាធិបតីអាមេរិកក្នុងអាណត្តិរបស់លោក Barack Obama លោក Biden គឺជាតំណាងរាស្ត្រនៅសភាជាន់ខ្ពស់ចាប់ពីឆ្នាំ 1973 ដល់ឆ្នាំ 2009។ ក្នុងអំឡុងពេលនោះ ប្រាក់បៀវត្សរបស់លោកបានកើនពី 42.500 ដុល្លារ ឡើងដល់ 174,000 ដុល្លារ/ឆ្នាំ នេះបើតាមឯកសាររបស់សភាជាន់ខ្ពស់។ នៅពេលបានជាប់ឆ្នោតជាអនុប្រធានាធិបតីចាប់ពីឆ្នាំ 2009 ដល់ 2017 ប្រាក់បៀវត្សរបស់លោក Biden បានកើនឡើងដល់ 230,000 ដុល្លារ/ឆ្នាំ។

ចាប់ពីបានចាកចេញពីតំណែងអនុប្រធានាធិបតីកាលពីជំនាន់លោក Obama លោក Biden ទើបតែរកបានប្រាក់ច្រើនជាលើកដំបូងពីការបោះពុម្ភសៀវភៅ និងធ្វើជាវាគ្មិន។ ខែវិច្ឆិកា ឆ្នាំ 2019 ទ្រព្យរបស់លោកមានតម្លៃមិនដល់ 30,000 ដុល្លារនោះទេ នេះបើតាមបណ្ដាញទូរទ្សន៍ និងវិទ្យុអាមេរិក CBS។ ប៉ុន្តែ បើយោងតាមរបាយការណ៍ហិរញ្ញវត្ថុកាលពីខែកក្កដា ឆ្នាំ 2019 លោក Biden និងភរិយា រកបានប្រាក់ជិត 16 លានដុល្លារក្នុងឆ្នាំ 2017 និង 2018 ក្នុងនោះក៏មានចំណូលដែលបានមកពីការសហការបោះពុម្ភសៀវភៅជាមួយនឹងក្រុមហ៊ុន Flatiron Books ដែលមានតម្លៃ 8 លានដុល្លារ។

លោក Biden បានសរសេរសៀវភៅចំនួនពីរក្បាលក្នុងរយៈពេល 11 ឆ្នាំកន្លងទៅ រួមមាន «Promises to keep» (បកប្រែក្រៅផ្លូវការថា «សន្យាដែលនឹងត្រូវរក្សា») កាលពីឆ្នាំ 2008។ ឆ្នាំ 2017 សៀវភៅ «Promise me, Dad» (សន្យានឹងកូនណា៎ ពុក) ក៏ត្រូវបានបោះពុម្ភ បន្ទាប់ពីកូនប្រុស Beau Biden របស់លោកបានស្លាប់ដោយសារជំងឺមហារីក។ «Promise me, Dad» បានក្លាយជាសៀវភៅមួយក្នុងចំណោមសៀវភៅដែលលក់ដាច់ជាងគេនៅអាមេរិក ដោយលក់ជាង 300,000ក្បាល។

យោងតាមរបាយការណ៍ហិរញ្ញវត្ថុថ្មីៗនេះ លោក Biden ទទួលបានប្រាក់ប្រមាណពី 8,000 ដល់ 9,000 ដុល្លារនៅរៀងរាល់ចំណុចនៃការផ្អាកការឃោសនាសម្រាប់សៀវភៅដែលលោកបានសរសេរ និងបោះពុម្ភ។ សកម្មភាពនេះ ចុងក្រោយក៏រកបានប្រាក់ចំណូលប្រមាណ 1.8 លានដុល្លារ។

សារព័ត៌មាន AP បានឱ្យដឹងថា ការធ្វើជាវាគ្មិនរបស់លោក Biden មានតម្លៃចាប់ពី 40,000 ដល់ 190,000 ដុល្លារ/ពេល បើទោះជាលោកក៏មានកិច្ចសម្ភាសដោយមិនគិតថ្លៃ។ CNBC បានរាយការណ៍ថា លោក Biden ធ្លាប់ទទួលបានប្រាក់ 190,000 ដុល្លារ សម្រាប់ការធ្វើបទបង្ហាញមួយនៅសាកលវិទ្យាល័យ Drew រដ្ឋ New Jersey កាលពីខែមីនា ឆ្នាំ 2018។ សកម្មភាពធ្វើជាវាគ្មិនបាននាំមកនូវខ្ទង់ប្រាក់ 2.4 លានដុល្លារសម្រាប់គ្រួសារនេះ។

ឆ្នាំ 2019 ពេលធ្វើការឃោសនារកសំឡេងឆ្នោតសម្រាប់តំណែងប្រធានាធិបតី លោក និងលោកស្រី Jill ក៏រកបានប្រហែល 1 លានដុល្លារ។ ក្រៅពីនេះ អតីតអនុប្រធានាធិបតីអាមេរិករូបនេះក៏ទទួលបានប្រាក់ 540,000 ដុល្លារសម្រាប់តួនាទីជាសាស្ត្រាចារ្យនៅមជ្ឈមណ្ឌលការបរទេសនិងអន្តរកម្មសកល Penn Biden នៃសាកលវិទ្យាល័យ Pennsylvania។

មកដល់ចុងឆ្នាំ 2019 លោក Biden បានក្លាយជាបេក្ខភាពប្រធានាធិបតីរបស់បក្សប្រជាធិបតេយ្យ និងជាអ្នកនយោបាយដែលមានទ្រព្យច្រើនមួយរូបផងដែរ ដោយរកបាន 16.7 លានដុល្លារក្នុងរយៈពេល 3 ឆ្នាំ។ រាប់ចាប់ពីឆ្នាំ 1998 លោក Biden បង់ពន្ធលើប្រាក់ចំណូលជូនរដ្ឋបានចំនួន 6.7 លានដុល្លារ ក្នុងនោះមាន 5.5 លានដុល្លាររាប់ចាប់ពីឆ្នាំ 2017។

ក្នុងរយៈពេល 3 ឆ្នាំកន្លងទៅថ្មីៗនេះ គ្រួសារលោក Biden ក៏ចំណាយប្រាក់ជាង 1 លានដុល្លារសម្រាប់សកម្មភាពមនុស្សធម៌ទៀតផង។

ទ្រព្យសម្បត្តិភាគច្រើនរបស់គ្រួសារលោក Biden គឺជាអចលនទ្រព្យ ប៉ុន្តែពួកគេក៏មានខ្ទង់វិនិយោគផងដែរ។ Forbes ឱ្យដឹងថា ផ្ទះចំនួនពីរខ្នងរបស់លោក Biden នៅរដ្ឋ Delaware មានតម្លៃសរុប 4 លានដុល្លារ។ ពួកគេមានទ្រព្យជាសាច់ប្រាក់សុទ្ធ និងខ្ទង់វិនិយោគ មានតម្លៃ 4 លានដុល្លារ រួមនឹងប្រាក់ចូលនិវត្តន៍ចំនួន 1 លានដុល្លារ។

នៅពេលបានក្លាយជាប្រធានាធិបតីអាមេរិក លោក Biden ទទួលបានប្រាក់បៀវត្សចំនួន 400,000 ដុល្លារ/ឆ្នាំ។ យោងតាមច្បាប់ Cornell ប្រធានាធិបតីអាមេរិកក៏ទទួលបានខ្ទង់ប្រាក់ជំនួយបន្ថែមចំនួន 50,000 ដុល្លារ/ឆ្នាំ ដើម្បីអនុវត្តភារកិច្ចរបស់ខ្លួន៕

ប្រភព៖ Business Insider

January 25, 2021

ទាហានឥណ្ឌ – ចិន វាយតប់គ្នានៅព្រំដែនទៀតហើយ!

ទាហានរបស់កងទ័ពឥណ្ឌា និងចិន បន្តវាយតប់គ្នានៅតំបន់ព្រំដែនកំពុងមានជម្លោះ ស្ថិតនៅលើជួរភ្នំហិមពាន្ត (ហិមាល័យ/Himalaya) បណ្ដាលឱ្យទាហានពីរនាក់រងរបួស។

មន្ត្រីឥណ្ឌាថ្ងៃនេះបានឱ្យដឹងថា ករណីវាយតប់គ្នាថ្មីនេះបានកើតឡើងនៅក្នុងថ្ងៃទី 20 មករា នៅ Naku La រដ្ឋ Sikkim ខណៈដែលទាហានល្បាតមួយក្រុមរបស់ចិន ព្យាយាមដើរចូលក្នុងទឹកដីរបស់ឥណ្ឌា រួចក៏ត្រូវបង្ខំឱ្យចាកចេញទៅវិញ។ តំបន់ Naku La ស្ថិតនៅចន្លោះរដ្ឋ Sikkim របស់ឥណ្ឌា និងតំបន់ ទីបី (Tibet) របស់ចិន។

ក្រុមមន្ត្រីឥណ្ឌាបានបញ្ជាក់ថា ករណីវាយតប់គ្នានេះត្រូវបានដោះស្រាយរួចរាល់នៅក្នុងយប់ដដែលនោះ ខណៈដែលភាគីទាំងសងខាងសុទ្ធតែមានអ្នករងរបួស។

ចំណែកភាគីប្រទេសចិនវិញ មកដល់បច្ចុប្បន្នមិនទាន់មានការប្រតិកម្មអ្វីទៅនឹងព័ត៌មាននេះនៅឡើយ។

ជម្លោះដណ្ដើមទឹកដីរវាងឥណ្ឌា និងចិន បានអូសបន្លាយពេលអស់ 7 ទសវត្សរ៍មកហើយ។ ភាគីទាំងពីរធ្លាប់បានវាយប្រយុទ្ធគ្នាដោយកាំភ្លើងរយៈពេលខ្លីកាលពីឆ្នាំ 1962។

ក្រោយភាពតានតឹងនៅខ្ពង់រាប Doklam នាឆ្នាំ 2017 ស្ថានភាពនៅតំបន់មានជម្លោះក៏បានស្ងប់ស្ងាត់ ប៉ុន្តែ ភាពតានតឹងបានកើនឡើងខ្ពស់នាំឱ្យមានការវាយតប់គ្នាជាក្រុមកាលពីខែឧសភា ឆ្នាំ 2020។ មកដល់ខែមិថុនា ឆ្នាំ 2020 ក៏ស្រាប់តែមានករណីវាយតប់គ្នាទៀតរវាងទាហានចិន និងឥណ្ឌា នៅជ្រលងភ្នំ Galwan បណ្ដាលឱ្យទាហានឥណ្ឌា 20 នាក់បានស្លាប់ និងទាហានចិនជាច្រើននាក់ត្រូវស្លាប់ និងរងរបូស។ ក្រោយមកក៏មានករណីវាយតប់គ្នាទ្រង់ទ្រាយតូចកើតឡើងជាបន្តបន្ទាប់។

ការវាយតប់គ្នាជាច្រើនលើក បានធ្វើឱ្យមានបាតុកម្មប្រឆាំងនឹងផលិតផល និងកម្មវិធីទូរស័ព្ទរបស់ចិននៅឥណ្ឌាផងដែរ។ ទាំងចិន ទាំងឥណ្ឌា សុទ្ធតែកំពុងបង្កើនកម្លាំងទ័ពនៅក្បែរព្រំដែនរៀងៗខ្លួន ដើម្បីត្រៀមខ្លួនជាស្រេចសម្រាប់ករណីមានសង្គ្រាម ឬការផ្ទុះអាវុធដាក់គ្នាកើតឡើង។

ភាគីទាំងពីរបានចរចាគ្នាជាច្រើនលើកដើម្បីដោះស្រាយបញ្ហានៅព្រំដែន ក្នុងនោះការចរចាកាលពីថ្ងៃទី 24 មករា បានជួយកាត់បន្ថយភាពតានតឹងបានមួយកម្រិត ប៉ុន្តែពុំទាន់មានការបញ្ចេញឱ្យដឹងអំពីលទ្ធផលជាក់លាក់នៃការជួបចរចានោះនៅឡើយ៕

ប្រភព៖ AFP

January 25, 2021

អ្នកការទូតជាន់ខ្ពស់ម្នាក់របស់កូរ៉េខាងជើង ភៀសខ្លួនចូលទឹកដីកូរ៉េខាងត្បូង

អ្នកការទូតជាន់ខ្ពស់របស់កូរ៉េខាងជើង ដែលធ្លាប់កាន់តំណែងឯកអគ្គរដ្ឋទូតស្ដីទីប្រចាំប្រទេសគុយវ៉ែត បានភៀសខ្លួនចូលទឹកដីកូរ៉េខាងត្បូងជាមួយនឹងគ្រួសារកាលពីឆ្នាំ 2019 ប៉ុន្តែ ទើបតែត្រូវបានបង្ហើបឱ្យដឹងកាលពីពេលថ្មីៗនេះ។

Ryu Hyun-woo ភៀសខ្លួនមកកាន់កូរ៉េខាងត្បូងកាលខែកញ្ញា ឆ្នាំ 2019 និងបានសុំសិទ្ធិជ្រកកោនក្នុងប្រទេសនេះ ប៉ុន្តែព័ត៌មាននេះត្រូវបានគេលាក់បាំងរហូតដល់បច្ចុប្បន្ន នេះបើតាម Maeil Business ជាទីភ្នាក់សារព័ត៌មានសេដ្ឋកិច្ចធំជាងគេនៅកូរ៉េខាងត្បូង ចុះផ្សាយកាលពីថ្ងៃទី 24 មករា ឆ្នាំ 2021។ «ខ្ញុំសម្រេចចិត្តភៀសខ្លួនគឺដោយសារចង់នាំមកនូវអនាគតល្អប្រសើរសម្រាប់កូន» លោក Ryu Hyun-woo ថ្លែងដូច្នេះ។

Ryu Hyun-woo បានក្លាយជាឯកអគ្គរដ្ឋទូតស្ដីទីរបស់កូរ៉េខាងជើងប្រចាំប្រទេសគុយវ៉ែតនៅខែកញ្ញា ឆ្នាំ 2017 បន្ទាប់ពីគុយវ៉ែតបានបណ្ដេញប្រេសិតពិសេស So Chang-sik។ ការបណ្ដេញចេញនេះត្រូវបានធ្វើឡើងក្រោយពីគុយវ៉ែតអនុម័តសេចក្ដីសម្រេចរបស់អង្គការសហប្រជាជាតិស្ដីអំពីកម្មវិធីអាវុធរបស់ទីក្រុងព្យុងយ៉ាង។

យោងតាមសារព័ត៌មាន Maeil Business លោក Ryu Hyun-woo គឺជាកូនប្រសារបស់ Jon Il-chun អតីតមេដឹកនាំការិយាល័យ 39 ដែលជាអង្គភាពគ្រប់គ្រងមូលនិធិសម្ងាត់របស់ក្រុមមេដឹកនាំកូរ៉េខាងជើង។

លោក Thae Yong-ho អតីតឯកអគ្គរដ្ឋទូតរងរបស់កូរ៉េខាងជើងប្រចាំអង់គ្លេសដែលបានភៀសខ្លួនចូលកូរ៉េខាងត្បូងកាលពីឆ្នាំ 2016

Thae Yong-ho អតីតឯកអគ្គរដ្ឋទូតរងរបស់កូរ៉េខាងជើងប្រចាំអង់គ្លេសដែលបានភៀសខ្លួនចូលកូរ៉េខាងត្បូងកាលពីឆ្នាំ 2016 និងត្រូវបានបោះឆ្នោតជាតំណាងរាស្ត្របក្សប្រឆាំងកាលពីឆ្នាំទៅ បានអធិប្បាយថា លោក Ryu Hyun-woo គឺជាផ្នែកមួយនៃ «ស្នូលសំខាន់» របស់ទីក្រុងព្យុងយ៉ាង។ «បើទោះជាជីវភាពរបស់អ្នកមានសិទ្ធិពិសេសយ៉ាងណាក៏ដោយនៅកូរ៉េខាងជើង គំនិតរបស់អ្នកនឹងផ្លាស់ប្ដូរនៅពេលអ្នកចេញទៅបរទេស និងចាប់ផ្ដើមធ្វើការប្រៀបធៀប» លោក Thae បញ្ជាក់។

ជនជាតិកូរ៉េខាងជើងប្រមាណជា 30,000 នាក់ ត្រូវបានគេជឿថា បានភៀសខ្លួនចូលទឹកដីកូរ៉េខាងត្បូង។ ការដែលមន្ត្រីជាន់ខ្ពស់កូរ៉េខាងជើងភៀសខ្លួនពីទឹកដីគឺជារឿងកម្រ បើទោះការភៀសខ្លួនរបស់ Ryu ត្រូវបានធ្វើឡើងក្រោយការភៀសខ្លួនរបស់អតីតឯកអគ្គរដ្ឋទូតកូរ៉េខាងជើងប្រចាំអ៊ីតាលី Jo Song-gil ដែលបានសុំសិទ្ធិជ្រកកោននៅទីក្រុងសេអ៊ូល ត្រឹមតែរយៈពេល 2 ខែក៏ដោយ។

កូរ៉េខាងជើងបានរឹតបន្តឹងសន្តិសុខនៅតាមបន្ទាត់ព្រំដែនដើម្បីទប់ស្កាត់ Covid-19 នាំឱ្យជនភៀសខ្លួនកូរ៉េខាងជើងចូលមកកាន់កូរ៉េខាងត្បូងត្រូវថយចុះច្រើនក្នុងឆ្នាំ 2020។ ទំនាក់ទំនងរវាងបងប្អូនកូរ៉េទាំងពីរនេះ បានធ្លាក់ទៅក្នុងស្ថានភាពជាប់គាំង បន្ទាប់ពីការខិតខំចរចាមិនបាននាំមកនូវលទ្ធផលល្អក្នុងរយៈពេលប៉ុន្មានឆ្នាំចុងក្រោយនេះ៕

ប្រភព៖ AFP

January 25, 2021

កម្ពុជាថា វិស័យចំនួន 3 ក្នុងចំណោម 4 ដែលមានឥទ្ធិពលខ្លាំងជាងគេដល់សេដ្ឋកិច្ចកម្ពុជា បានធ្លាក់ចុះគួរឱ្យកត់សម្គាល់ ក្នុងឆ្នាំ 2020

ទាក់ទងនឹងកំណើនសេដ្ឋកិច្ចរបស់កម្ពុជាក្នុងឆ្នាំ 2020 កន្លងទៅ ធនាគារជាតិនៃកម្ពុជាបានចេញរបាយការណ៍ប្រចាំឆ្នាំរបស់ខ្លួន ឱ្យដឹងថា ក្នុងចំណោមវិស័យដែលរងផលប៉ះពាល់ពីវិបត្តិសុខភាព Covid-19 គឺមានវិស័យចំនួន 3 ដែលរងឥទ្ធិពលខ្លាំងជាងគេ ដោយសារវិស័យទាំងនេះមានការពឹងផ្អែកច្រើនទៅលើតម្រូវការក្រៅប្រទេស។

លទ្ធផលនៃកំណើតសេដ្ឋកិច្ចកម្ពុជាទទួលរងផលប៉ះពាល់ធ្ងន់ធ្ងរពីឥទ្ធិពលនៃការឆ្លងរាលដាលរបស់វីរុស Covid-19 ពិសេសគឺបណ្ដាវិស័យដែលទាក់ទងនឹងតម្រូវការក្រៅប្រទេស មានដូចជា វិស័យទេសចរណ៍ វិស័យកម្មន្តសាល (Manufacturing) និងវិស័យសំណង់។

វិស័យទេសចរណ៍

ទេសចរណ៍គឺជាវិស័យមួយដែលបាន និងកំពុងទទួលរងផលប៉ះពាល់ធ្ងន់ធ្ងរជាងគេបង្អស់នៅកម្ពុជា ព្រោះតែ Covid-19 ដោយកំណើនរបស់វិស័យនេះ បានធ្លាក់ចុះ 9.7%។ អត្រាធ្លាក់ចុះនៃភ្ញៀវទេសចរណ៍បរទេសគឺប្រមាណជា 80% ធៀបនឹងកំណើន 6.6% កាលពីឆ្នាំមុន។

វិស័យកម្មន្តសាល

ចំណែកកំណើននៅក្នុងវិស័យកម្មន្តសាលវិញ បានធ្លាក់ចុះគួរឱ្យកត់សម្គាល់ ដោយសារតម្រូវការខាងក្រៅត្រូវថយចុះ។ តួលេខពីរបាយការណ៍នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ របស់កម្ពុជា បានឱ្យដឹងថា រោងចក្រចំនួន 95 បានបិទទ្វារ ធ្វើឱ្យប៉ះពាល់ដល់កម្លាំងពលកម្មជាង 5 ម៉ឺននាក់។ ផលិតផលសម្រេចក្នុងវិស័យនេះ បានធ្លាក់ចុះ 27%។ ប៉ុន្តែ វិស័យនេះនៅមានសង្ឃឹមច្រើនដោយសាររោងចក្រថ្មី ដែលភាគច្រើនជារោងចក្រកែច្នៃលោហធាតិចំនួន 209 ត្រូវបានបង្កើតឡើង។

វិស័យសំណង់

តាមរយៈរបាយការណ៍ប្រចាំឆ្នាំ 2020 របស់ធនាគារជាតិកម្ពុជា កំណើននៃវិស័យសំណង់បានធ្លាក់ចុះ 3% ដោយសារតែសកម្មភាពវិនិយោគក្នុងស្រុក និងលំហូរទុនពីបរទេសក្នុងវិស័យនេះ ត្រូវបានកាត់បន្ថយ។ កំណើននៃចំនួនគម្រោង តម្លៃ និងផ្ទៃក្រឡានៃគម្រោងសំណង់ក៏បានធ្លាក់ចុះ 0.5%, 25% និង 17% តាមលំដាប់លំដោយ។

វិស័យកសិកម្ម

វិស័យកសិក្មទទួលបានកំណើនជិត 1% ធៀបនឹងឆ្នាំមុន ដោយសារតែកម្លាំងពលកម្មក្នុងវិស័យផ្សេងៗដែលរងផលប៉ះពាល់ពី Covid-19 បានងាកចូលមកវិស័យនេះ រួមនឹងការធ្វើពិពិធកម្មទៅកាន់វិស័យកសិ-ឧស្សាហកម្មរបស់រាជរដ្ឋាភិបាល៕

January 25, 2021

ប្រធានាធិបតីម៉ិកស៊ិក ឆ្លង Covid-19

ប្រធានាធិបតីរបស់ម៉ិកស៊ិក លោក Lopez Obrador ទើបតែបានប្រកាសឱ្យដឹងថា លោក បានឆ្លង Covid-19 នាំឱ្យបញ្ជីឈ្មោះនៃមេដឹកនាំពិភពលោកដែលឆ្លងវីរុស Covid-19 កាន់តែវែងឡើង។

«ខ្ញុំមានការសោកស្ដាយណាស់នៅពេលប្រកាសថា ខ្ញុំបានឆ្លងវីរុស Covid-19។ អាការរោគស្រាលទេ ប៉ុន្តែខ្ញុំកំពុងទទួលការព្យាបាល» ប្រធានធិបតីម៉ិកស៊ិក លោក Andres Manuel Lopez Obrador បានបង្ហោះសារបែបនេះនៅលើបណ្ដាញសង្គលកាលពីថ្ងៃទី 24 មករា (ព្រឹកថ្ងៃទី 25 មករា នៅកម្ពុជា)។ លោកបានបន្ថែមទៀត «ខ្ញុំនៅតែមានការជឿជាក់ដូចដើម»។

លោក Lopez Obrador ថ្លែងថា លោកនឹងបន្តធ្វើការពីវិមានប្រធានាធិបតី និងផ្ដល់សិទ្ធិឱ្យក្រសួងមហាផ្ទៃជំនួសលោកក្នុងសន្និសីទសារព័ត៌មានប្រចាំថ្ងៃនៅក្នុងសប្ដាហ៍នេះ។

លោក Lopez Obrador មានអាយុ 67 ឆ្នាំ ដែលមានជំងឺសម្ពាធឈាមខ្ពស់ និងមានបញ្ហាបេះដូង ត្រូវបានគេមើលឃើញថា ហាក់មិនដែលពាក់ម៉ាស ព្រមទាំងនៅតែធ្វើការទៅតាមធម្មតានៅក្នុងអំឡុងវិបត្តិសុខភាព Covid-19។ លោកធ្លាប់មានបញ្ហាបេះដូង និងត្រូវចូលពេទ្យកាលពីឆ្នាំ 2013។

នៅដើមខែមករានេះ Jesus Ramirez Cuevas ដែលជាអ្នកនាំពាក្យរបស់ប្រធានាធិបតីម៉ិកស៊ិក ក៏មានលទ្ធផលវិជ្ជមាននឹង Covid-19 ផងដែរ។

មុនលោក Lopez Obrador មេដឹកនាំពិភពលោកជាច្រើនរូបក៏ធ្លាប់ឆ្លង Covid-19 ក្នុងនោះមានដូចជា ប្រធានាធិបតីអង់គ្លេស លោក Boris Johnson ប្រធានាធិបតីប្រេស៊ីល លោក Jair Bolsonaro អតីតប្រធានាធិបតីអាមេរិក លោក Donald Trump និងប្រធានាធិបតីបារាំង លោក Emmanuel Macron ផងដែរ។

ម៉ិកស៊ិកគឺជាសម្បុកវីរុស Covid-19 ធំជាងគេលំដាប់ទី 4 ក្នុងតំបន់អាមេរិកឡាទីន ដោយមានអ្នកឆ្លងវីរុសចំនួនជាង 1.7 លាននាក់ និងជិត 150,000 នាក់បានស្លាប់៕

ប្រភព៖ AFP, ABC

January 25, 2021

Covid-19 នៅកម្ពុជា និងពិភពលោក ក្នុងអំឡុង 24ម៉ោងនៃថ្ងៃទី 24មករា

ក្រសួងសុខាភិបាល នាព្រឹកថ្ងៃទី 25 ខែមករានេះ បានប្រកាសឱ្យដឹងថា កម្ពុជាមានករណីជាសះស្បើយពី Covid-19 ថ្មីចំនួន 4 នាក់ ខណៈមិនមានករណីវិជ្ជមាននោះទេនៅក្នុងរយៈពេល 24 ម៉ោងកន្លងទៅនេះ។

ករណីជាសះស្បើយនេះសុទ្ធតែជាពលករ ពលការិនីខ្មែរដែលត្រលប់មកពីប្រទេសថៃ ក្នុងនោះមានបុរសម្នាក់ និងស្ត្រីចំនួន 3 នាក់។ ព័ត៌មានបន្ថែម សូមអានតារាងខាងក្រោម។

គិតមកដល់ព្រឹកថ្ងៃទី 25 ខែមករា ឆ្នាំ 2021 នេះ កម្ពុជាបានរកឃើញករណីវិជ្ជមាននឹង Covid-19 សរុបចំនួន 458 នាក់ ក្នុងនោះមាន 409 នាក់បានជាសះស្បើយ និង 49 នាក់កំពុងសម្រាកព្យាបាលនៅមន្ទីរពេទ្យ។

នៅទូទាំងពិភពលោក Covid-19 បានឆ្លងទៅមនុស្សជាង 99,736,690 នាក់ និងសម្លាប់មនុស្សជាង 2,137,990 នាក់ ខណៈ 25,878,905 នាក់កំពុងព្យាបាល។ អ្នកជំងឺ Covid-19 បានជាសះស្បើយ មានចំនួន 71,718,569 នាក់៕

January 25, 2021

កម្ពុជារកឃើញអ្នកវិជ្ជមាននឹង Covid-19 ថ្មី 2ករណីបន្ថែមទៀត ខណៈពិភពលោករកឃើញ 574,547 នាក់ ក្នុងអំឡុង 24ម៉ោងកន្លង

ក្រសួងសុខាភិបាលកម្ពុជាបានឱ្យដឹងថា ករណីវិជ្ជមានចំនួន 2 នាក់ ដែលទើបត្រូវបានរកឃើញក្នុងអំឡុងមួយយប់និងមួយថ្ងៃកន្លងទៅនេះគឺជាករណីនាំចូល។

ក្នុងចំណោមអ្នកវិជ្ជមានខាងលើគឺមាន 1 ករណីជាពលករខ្មែរមកពីប្រទេសថៃ និងមួយករណីទៀតជាស្ត្រីអ្នកដំណើរមកពីសហរដ្ឋអាមេរិក។ ព័ត៌មានលម្អិតសូមអានតារាងខាងក្រោម។

គិតមកដល់ព្រឹកថ្ងៃទី 24 មករា ឆ្នាំ 2021 នេះ កម្ពុជាមានអ្នកវិជ្ជមាននឹង Covid-19 សរុបចំនួន 458 នាក់ ក្នុងនោះមាន 405 នាក់បានជាសះស្បើយ និង 53 នាក់កំពុងទទួលការព្យាបាលនៅមន្ទីរពេទ្យ។

នៅទូទាំងពិភពលោក មានអ្នកវិជ្ជមាននឹង Covidd-19 សរុប 99,298,747 នាក់ ក្នុងនេះមាន 2,128,755 នាក់បានបាត់បង់ជីវិត និង 71,351,096 នាក់បានជាសះស្បើយ។ អ្នកកំពុងវិជ្ជមាននឹង Covid-19 មានចំនួន 25,818,483 នាក់៕

January 24, 2021

Covid-19 នៅទូទាំងពិភពលោកកើនដល់ជាង 98.7លាននាក់ ក្នុងនោះ កម្ពុជាកើនដល់ជាង 450នាក់

ក្រសួងសុខាភិបាលកម្ពុជាបានឱ្យដឹងថា ក្នុងអំឡុងមួយថ្ងៃនិងមួយយប់កន្លងទៅនេះ កម្ពុជាមិនមានករណីវិជ្ជមាននឹង Covid-19 នោះទេ ក្នុងគ្រាដែលពិភពលោករកឃើញករណីឆ្លងថ្មីចំនួន 23,412 នាក់។

គិតត្រឹមព្រឹកថ្ងៃទី 23 ខែមករា ឆ្នាំ 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 456 នាក់ ក្នុងនោះមាន 403 នាក់បានជាសះស្បើយ និង 53 នាក់ កំពុងព្យាបាល។

នៅទូទាំងពិភពលោក មកដល់បច្ចុប្បន្ន Covid-19 បានសម្លាប់មនុស្សចំនួន 2,116,159 នាក់នៅក្នុងចំណោមអ្នកជំងឺសរុបចំនួន 98,736,967 នាក់ ក្នុងនេះមាន 70,911,582 នាក់បានជាសះស្បើយ និង 25,709,254 នាក់កំពុងទទួលការព្យាបាល។ ក្នុងចំណោមអ្នកកំពុងព្យាបាល មាន 111,239 នាក់ ស្មើនឹង 0.4% អាចបាត់បង់ជីវិតដោយសារអាការធ្ងន់ធ្ងរ៕

January 23, 2021

ធនាគារនាំគ្នាបិទគណនីរបស់ Trump

Banks United នៅ Florida ប្រកាសថា បានបិទគណនីរបស់លោក Trump ធ្វើឱ្យបញ្ជីនៃបណ្ដាធនាគារដែលបែរខ្នងដាក់អតីតប្រធានាធិបតីរូបនេះ កាន់តែវែងអន្លាយ ក្រោយពីមានអំពីហិង្សានៅ Capitol Hill។

«យើងពុំមានទំនាក់ទំនងអ្វីទៀតជាមួយនឹងគាត់» Banks United បានចេញសេចក្ដីក្រកាសកាលពីថ្ងៃទី 21 មករា ប៉ុន្តែមិនបានលើកឡើងអំពីមូលហេតុច្បាស់លាស់ដែលនាំឱ្យមានការបិទគណនីធនាគាររបស់លោក Trump នេះទេ។

Washington Post ឱ្យដឹងថា លោក Donald Trump ធ្លាប់បានប្រកាសថា លោកមានគណនីបញ្ញើប្រាក់ចំនួនពីរនៅធនាគារ Banks United ជាមួយនឹងប្រាក់ក្នុងគណនីប្រមាណ 5.1 លានដុល្លារ និង 25.2 លានដុល្លារ។

មុននេះមានធនាគារមួយផ្សេងទៀតនៅ Florida គឺ Professional Bank ក៏បានប្រកាសផ្ដាច់ទំនាក់ទំនងជាមួយនឹងលោក Trump ដោយអះអាងថា មិនធ្វើការជួញដូរអ្វីជាមួយនឹងអតីតប្រធានាធិបតីរូបនេះ ក៏ដូចជាបណ្ដាក្រុមហ៊ុនរបស់លោក។

ធនាគារ Signature Bank នៅទីក្រុង New York និងធនាគារ Deutsche Bank ក៏ធ្លាប់បានប្រកាស «បដិសេធធ្វើជំនួញលក្ខណបុគ្គលជាមួយនឹង Trump និងចរន្តប្រាក់របស់លោក»។ ក្រោយពីមានអំពើហិង្សានៅវិមានសភាអាមេរិកកាលពីថ្ងៃទី 6 មករា ធនាគារ Signature Bank បានអំពាវអំនាវឱ្យលោក Trump លាលែងពីតំណែង។ ធនាគារនេះក៏បានប្រកាសថា មិនធ្វើជំនួញជាមួយក្រុមតំណាងរាស្ត្រដែលបានចូលរួមប្រឆាំងនឹងលទ្ធផលបោះឆ្នោតនៅវិមានសភាទៀតផង

ចំណែកធនាគារ Deutsche Bank វិញ ត្រូវបានគេជឿថា កំពុងតែស្វែងរកវិធីដោះស្រាយចំពោះខ្ទង់ប្រាក់កម្ចីជាង 300 លានដុល្លាររបស់អតីតប្រធានាធិបតី Trump ដោយអាចបង្វែរសំណើរទៅកាន់ភាគីទីបី។ ខ្ទង់កម្ចីរបស់ Trump នៅធនាគារ Deutsche Bank គឺសម្រាប់ទីលានវាយកូនគោលមួយរបស់លោក នៅ Miami និងសណ្ឋាគារមួយចំនួននៅវ៉ាស៊ីងតោន និងទីក្រុង Chicago។

ក្រោយពីព្រឹត្តិការណ៍ហិង្សានៅ Capitol Hill ការរកស៊ីរបស់លោក Trump ហាក់កំពុងរង្គោះរង្គើខ្លាំងនៅពេលលោកត្រូវបានចោទប្រកាន់ថាជាអ្នកនៅពីក្រោយបាតុកម្មនេះ។ សមាគមកីឡាកូនគោល PGA និង R&A ក៏បានប្រកាសថានឹងផ្អាកប្រើប្រាស់ទីលានចំនួនពីរដែលជាកម្មសិទ្ធិរបស់អតីតប្រធានាធិបតី Donald Trump ផងដែរ ក្រោយព្រឹត្តិការណ៍នៅ Capitol Hill៕

ប្រភព៖ Thehill

January 23, 2021

Author: សឿន សំណាង