សឿន សំណាង - La Reine Media

សិង្ហបុរី អំពាវនាវឱ្យពលរដ្ឋជូន «អាំងប៉ាវអេឡិចត្រូនិក» ក្នុងរដូវបុណ្យចូលឆ្នាំចិន

ដើម្បីជៀសវាងការជួបជុំគ្នាដែលមានមនុស្សច្រើន និងដើម្បីការពារបរិស្ថាន រដ្ឋាភិបាលប្រទេសសិង្ហបុរី បានចេញសេចក្ដីអំពាវនាវឱ្យពលរដ្ឋរបស់ខ្លួន ជូនអំណោយជាប្រាក់នាំសំណាង (អាំងប៉ាវ) ដោយប្រើប្រាស់រូបភាពឌីជីថល នៅក្នុងឱកាសបុណ្យចូលឆ្នាំប្រពៃណីចិននាពេលខាងមុខ។

នាយកដ្ឋានគ្រប់គ្រងហិរញ្ញវត្ថុរបស់ប្រទេសសិង្ហបុរី (MAS) បានអំពាវនាវឱ្យពលរដ្ឋចាត់ទុកអាំងប៉ាវអេឡិចត្រូនិកជា «បែបផែនធម្មតាថ្មីមួយ» នៅក្នុងវិបត្តិសុខភាពដែលបង្កឡើងដោយ Covid-19។ MAS សង្ឃឹមថា ប្រការនេះនឹងអាចកាត់បន្ថយការឆ្លងរាលដាលរបស់វីរុស ដោយសារមនុស្សមិនបានជួបជុំគ្នាច្រើន និងមិនបានកាន់អាំងប៉ាវដោយផ្ទាល់ដៃ ក៏ដូចជាជួយឱ្យបរិស្ថានមានភាពល្អប្រសើរ ព្រោះមិនត្រូវបោះពុម្ភក្រដាសប្រាក់ថ្មី។

ប្រជាជននៃប្រទេសសិង្ហបុរី ភាគច្រើនគឺជាពលរដ្ឋដើមកំណើតចិន។ រៀងរាល់រដូវបុណ្យចូលឆ្នាំចិន ពួកគេតែងតែជូនពរ និងជូនអំណោយដល់គ្នាដោយក្រដាសប្រាក់ដែលដាក់នៅក្នុងសំបុត្រពណ៌ក្រហម ដែលគេហៅថា អាំងប៉ាវ។ នៅប្រទេសចិនឯណោះវិញ ប្រព័ន្ធអាំងប៉ាវអេឡិចត្រូនិកបានក្លាយជាឧបករណ៍ពេញនិយម អនុញ្ញាតឱ្យគ្រប់គ្នាផ្ទេរប្រាក់តាមរយៈកាបូបអេឡិចត្រូនិកនៅក្នុងទូរស័ព្ទឆ្លាតវៃ មានដូចជាកម្មវិធី Wechat Pay ។ល។ សម្រាប់កម្ពុជា គេក៏ឃើញមានកាបូបអេឡិចត្រូនិកមួយចំនួន មានកម្មវិធី «អាំងប៉ាវ» ផងដែរ ដូចជា Wing ជាដើម។

នៅកម្ពុជា គេក៏ឃើញមានកាបូបអេឡិចត្រូនិកមួយចំនួន មានកម្មវិធី «អាំងប៉ាវ» ផងដែរ ក្នុងនោះមាន Wing ជាដើម

យោងតាមសមាគមធនាគារសិង្ហបុរី ធនាគារចំនួន 6 របស់ប្រទេសនេះ កំពុងផ្គត់ផ្គង់ប្រាក់អេឡិចត្រូនិកសម្រាប់ជូនអាំងប៉ាវតាមរយៈ Paynow ជាសេវាដែលអ្នកប្រើប្រាស់អាចផ្ទេរប្រាក់ពីធនាគារមួយ ទៅធនាគារមួយទៀតដោយប្រើលេខទូរស័ព្ទ។

ក្រៅពីកម្មវិធីអាំងប៉ាវ MAS ក៏កំពុងតែធ្វើការជាមួយសមាគមធនាគារសិង្ហបុរីដើម្បីលើកទឹកចិត្តឱ្យ fintech (Financial technology) អភិវឌ្ឍ និងបង្កើតកម្មវិធីអាំងប៉ាវអេឡិចត្រូនិកប្រភេទផ្សេងផងដែរ។ MAS ជឿជាក់ថា ការធ្វើឌីជីថលឧបណីយកម្មលើសាច់ប្រាក់ គឺជាគន្លឹះសម្រាប់ការអភិវឌ្ឍរយៈពេលមធ្យម និងវែងរបស់សិង្ហបុរី។

ប្រទេសជិតខាងរបស់សិង្ហបុរី គឺម៉ាឡេស៊ី ជាប្រទេសដែលមានពលរដ្ឋដើមកំណើតចិនប្រមាណជា 20% ក៏អាចនឹងមានកម្មវិធីឌីជីថលសម្រាប់ប្រើប្រាស់ក្នុងការជូនអំណោយក្នុងរដូវបុណ្យចូលឆ្នាំចិនឆ្នាំនេះដែរ។ ម៉ាឡេស៊ី កំពុងតែទទួលរងរលកនៃការឆ្លងរាលដាល Covid-19 ថ្មី និងដាក់ប្រទេសក្នុងភាពអាសន្នចាប់ពីថ្ងៃទី 12 ខែមករា។ មូលហេតុនេះនឹងជួយឱ្យការប្រើប្រាស់អាំងប៉ាវឌីជីថល កើនឡើងថែមមួយកម្រិតទៀត៕

ប្រភព៖ Nikkei

January 27, 2021

Forbes៖ មហាសេដ្ឋីដុល្លារនៅទ្វីបអាហ្វ្រិក ថយចុះចំនួន 2រូប បើធៀបនឹងដើមឆ្នាំ 2020

ទស្សនាវដ្ដីពាណិជ្ជកម្ម Forbes បានបញ្ចេញបញ្ជីឈ្មោះស្ដីអំពីអ្នកមានជាងគេបង្អស់ប្រចាំទ្វីបអាហ្វ្រិកសម្រាប់ឆ្នាំ 2021 ដែលបង្ហាញថា ទ្វីបនេះមានមហាសេដ្ឋីត្រឹមតែ 18 នាក់ ហើយពួកគេមានទ្រព្យសរុបចំនួន 73.8 ពាន់លានដុល្លារអាមេរិក។

នៅក្នុងគ្រាដែល Covid-19 កំពុងតែធ្វើឱ្យប៉ះពាល់ដល់សកម្មភាពជំនួញ និងកំណើននៃទ្រព្យសម្បត្តិរបស់មហាសេដ្ឋីនានា មហាសេដ្ឋីមួយចំនួនទៀតបែរជាកាន់តែមានឡើងៗ ដោយសារតែមូលបត្រឡើងថ្លៃ។

ចំនួនមហាសេដ្ឋីដុល្លារនៅអាហ្វ្រិកបានថយចុះពី 20 នាក់កាលពីដើមឆ្នាំ 2020 មកនៅត្រឹម 18 នាក់នាដើមឆ្នាំ 2021 ប៉ុន្តែជាក់ស្ដែង ទ្រព្យសម្បត្តិរបស់ពួកគេនៅតែបន្តកើនឡើង បើទោះជាកើនមិនច្រើន។

មកដល់ដំណាក់កាលដើមឆ្នាំ 2021 នេះ ទ្រព្យសម្បត្តិសរុបរបស់មហាសេដ្ឋីអាហ្វ្រិកទាំង 18 នាក់ខាងលើ មានចំនួន 73.8 ពាន់លានដុល្លារអាមេរិក ច្រើនជាងបន្តិចបើធៀបនឹង 73.4 ពាន់លានដុល្លាររបស់មហាសេដ្ឋីទាំង 20 រូប កាលពីឆ្នាំ 2020។

ប្រការដែលគួរកត់សម្គាល់នោះគឺថា បញ្ជីឈ្មោះមហាសេដ្ឋីអាហ្វ្រិករបស់ទស្សនាវដ្ដី Forbes នេះ គឺគិតតែមហាសេដ្ឋីដែលកំពុងរស់នៅក្នុងទ្វីបអាហ្វ្រិក ជាកន្លែងដែលក្រុមហ៊ុន និងមូលបត្រត្រូវបានដាក់នៅក្នុងទ្វីបនេះ លើកលែងតែមហាសេដ្ឋី Mo Ibrahim សញ្ជាតិអង់គ្លេស ដើមកំណើតស៊ូដង់ និងមហាសេដ្ឋី Mohamed Al-Fayed ជនជាតិអង់គ្លេស ដើមកំណើតអេហ្ស៊ីប។

បើគិតទៅលើប្រទេស គេឃើញថា អាហ្វ្រិកខាងត្បូង និងអេហ្ស៊ីប គឺជាប្រទេសដែលមានមហាសេដ្ឋីច្រើនជាងគេ ដោយប្រទេសនីមួយៗមានមហាសេដ្ឋី 5 នាក់ ស្មើគ្នា បន្ទាប់មកគឺប្រទេសនីហ្សេរីយ៉ាមាន 3 នាក់ និងម៉ារ៉ុក (Morocco) មាន 2 នាក់៕

ប្រភព៖ Forbes

January 27, 2021

ម៉ាឡេស៊ីទិញវ៉ាក់សាំងចំនួន 18.4លានដូស ខណៈអ្នកស្លាប់ដោយសារ Covid-19 កើនដល់ជាង 1.9សែននាក់

ក្រសួងសុខាភិបាលម៉ាឡេស៊ី កាលពីថ្ងៃទី 26 មករា បានចុះកិច្ចព្រមព្រៀងជាមួយក្រុមហ៊ុនផ្គត់ផ្គង់ឱសថចំនួនពីរគឺ Pharmaniaga Lifescience Sdn Bhd និង Doupharma Sdn Bhd ដើម្បីទិញវ៉ាក់សាំង Covid-19 ចំនួន 18.4 លានដូស។

យោងតាមប្រភពព័ត៌មានពីរាជធានី គួឡាឡាំពួរ Pharmaniaga Lifescience Sdn Bhd ដែលជាក្រុមហ៊ុនបុត្រសម្ព័ន្ធរបស់ Pharmaniaga (ក្រុមហ៊ុនលំដាប់កំពូលរបស់ម៉ាឡេស៊ី) នឹងផ្គត់ផ្គង់វ៉ាក់សាំង CoronaVac របស់ក្រុមហ៊ុនចិន Sinovac ចំនួន 12 លានដូស មកឱ្យម៉ាឡេស៊ី។

ក្រសួងសុខាភិបាលឱ្យដឹងថា បរិមាណនៃវ៉ាក់សាំង CornaVac ខាងលើនេះ គ្រប់គ្រាន់សម្រាប់ចាក់ឱ្យមនុស្សចំនួន 6 លាននាក់ ស្មើនឹង 18.75% នៃប្រជាជនសរុបរបស់ប្រទេសម៉ាឡេស៊ី។ វ៉ាក់សាំង CornaVac នឹងត្រូវបានផ្គត់ផ្គង់មកឱ្យម៉ាឡេស៊ី ទៅតាមដំណាក់កាល ដោយចាប់ផ្ដើមពីចុងខែមីនាខាងមុខ។

ចំណែកវ៉ាក់សាំង Sputnik V ដែលផលិតឡើងដោយក្រុមហ៊ុនរុស្ស៊ី Gamaleya ចំនួន 6.4 លានដូស ដែលផ្គត់ផ្គង់ដោយក្រុមហ៊ុន Duopharma នឹងចាក់ឱ្យពលរដ្ឋបាន 3.2 លាននាក់។

វ៉ាក់សាំងចំនួនពីរប្រភេទខាងលើនឹងត្រូវបានចាក់ចំនួន 2 លើកសម្រាប់មនុស្សម្នាក់ និងចាក់ឱ្យពលរដ្ឋដែលមានអាយុចាប់ពី 18 ឆ្នាំឡើងទៅ។ ចំពោះ CoronaVac ការចាក់លើកទីពីរនឹងមានគម្លាតពីលើកទីមួយចំនួនពីរសប្ដាហ៍ ខណៈ Sputnik V គម្លាតនេះនឹងមានរយៈពេល 21 ថ្ងៃ។

ប្រទេសម៉ាឡេស៊ី គិតមកដល់ព្រឹកថ្ងៃទី 27 មករា ឆ្នាំ 2021 នេះ បានរកឃើញអ្នកវិជ្ជមាននឹង Covid-19 សរុបចំនួន 190,434 នាក់ ក្នុងនោះមានអ្នកស្លាប់ចំនួន 700 នាក់ ខណៈ 40,574 នាក់កំពុងសម្រាកព្យាបាល៕

ប្រភព៖ Yahoo News

January 27, 2021

ស្ថានភាព Covid-19 នៅទូទាំងពិភពលោក និងកម្ពុជា គិតត្រឹមព្រឹកថ្ងៃទី 27 មករា

ក្រសួងសុខាភិបាលកម្ពុជា ព្រឹកថ្ងៃទី 27 មករា ឆ្នាំ 2021 នេះ បានឱ្យដឹងថា មិនមានករណីឆ្លងវីរុស Covid-19 ថ្មីនោះទេ ប៉ុន្តែ មានករណីជាសះស្បើយជាច្រើននាក់ ខណៈពិភពលោកមានករណីថ្មីជាង 523,962 នាក់។

ករណីជាសះស្បើយនៅកម្ពុជាសម្រាប់ព្រឹកនេះ មានចំនួន 11 នាក់ សុទ្ធតែជាពលករ ពលការិនី ដែលត្រលប់មក ពីប្រទេសថៃ។ ព័ត៌មានលម្អិត សូមអានតារាងខាងក្រោម។

គិតត្រឹមព្រឹកថ្ងៃទី 27 មករានេះ កម្ពុជាបានរកឃើញអ្នកឆ្លង Covid-19 សរុបចំនួន 460 នាក់ ក្នុងនោះមានអ្នកជាសះស្បើយចំនួន 423 នាក់ អ្នកកំពុងព្យាបាលចំនួន 37 នាក់។

នៅទូទាំងពិភពលោក ករណីឆ្លងវីរុស Covid-19 សរុប បានកើនដល់ 100,807,884 នាក់ ក្នុងនោះមាន 2,165,020 នាក់បានស្លាប់ និង 25,824,124 នាក់កំពុងសម្រាកព្យាបាល៕

January 27, 2021

ត្រូវឆ្នោត 60លានដុល្លារអាមេរិក ដោយសារជឿលើសុបិនរបស់ប្ដី រួមនឹងការព្យាយាម

បន្ទាប់ពីស្វាមីបានប្រាប់អំពីដំណើរដើមទងនៃងសុបិន ស្ត្រីជាភរិយាក៏បានព្យាយាមចាក់ឆ្នោតផ្សងសំណាង ហើយចុងក្រោយក៏បានត្រូវឆ្នោតតម្លៃ 60 លានដុល្លារអាមេរិក ក្រោយការ «តស៊ូ» ចាក់ឆ្នោតមិនដាច់មួយថ្ងៃ។

ឆ្នាំ 2000 ស្វាមីរបស់អ្នកស្រី Deng Pravatoudom យល់សប្ដិចម្លែកមួយ ដោយឃើញលេខមួយខ្សែយ៉ាងច្បាស់នឹងភ្នែក។ ក្រោយពីបានឮស្វាមីរៀបរាប់ប្រាប់ អ្នកស្រី Pravatoudom ក៏ចាប់ផ្ដើមយកលេខនោះទៅចាក់ឆ្នោត។

ជីវភាពរបស់គ្រួសារខាងលើ ចេះតែបន្តទៅមុខដូចធម្មតា ហើយការចាក់ឆ្នោតលេខដដែលៗនេះក៏ចេះតែធ្វើឡើងជារៀងរាល់ថ្ងៃ រហូតដល់ 20 ឆ្នាំ។

ថ្ងៃទី 1 ខែធ្នូ ឆ្នាំ 2020 អ្នកស្រី និងស្វាមីក៏បានទៅទូទាត់វិក្កយបត្រនៅក្នុងធនាគារមួយ។ ខណៈដែលអ្នកស្រីកំពុងទូទាត់ប្រាក់ ស្វាមីអ្នកស្រីក៏ចាប់ផ្ដើមផ្ទៀងលេខឆ្នោត។ ពេលត្រលប់មកកាន់រថយន្ត ស្រាប់តែស្វាមីបានប្រាប់អ្នកស្រីថា «យើងត្រូវឆ្នោតហើយ!»។ ពួកគេត្រូវឆ្នោតដែលមានតម្លៃដល់ទៅ 60 លានដុល្លារអាមេរិក។ នេះបើតាមគេហទំព័រឆ្នោត Ontario ដែលបានចុះផ្សាយកាលពីថ្ងៃទី 25 មករាកន្លងទៅ។

អ្នកស្រី Pravatoudom ក៏បានស្រែកយំ ដោយសារថា អ្នកស្រីមិននឹកស្មានថា សុបិនអាចក្លាយជាការពិតយ៉ាងដូច្នេះសោះ។ ក្នុងពិធីប្រគល់រង្វាន់ឆ្នោត អ្នកស្រីប្រាប់ថា នឹងទិញផ្ទះមួយខ្នង ហើយដើរទេសចរណ៍ជុំវិញពិភពលោក ក្រោយពី Covid-19 បានស្ងប់ស្ងាត់។

បន្ទាប់ពីបានទទួលប្រាក់ អ្នកស្រីបានទិញពេជ្រជាច្រើនគ្រាប់សម្រាប់ខ្លួនឯង។ អ្នកទាំងពីរបានគិតគូរគ្នារួចហើយថា នឹងយកប្រាក់ខ្លះទៅទូទាត់បំណុលដែលនៅសល់ និងជួយដល់កូនចៅរបស់ពួកគាត់។

អ្នកស្រី Pravatoudom គឺជាជនជាតិឡាវដែលបានទៅរស់នៅក្នុងប្រទេសកាណាដាជាមួយនឹងបងប្អូនចំនួន 14 នាក់របស់ខ្លួន កាលពីឆ្នាំ 1980។ 40 ឆ្នាំកន្លងទៅនេះ អ្នកស្រី និងស្វាមី បានធ្វើការយ៉ាងហត់នឿយ និងបានសន្សំសំច័យប្រាក់យ៉ាងលំបាកដើម្បីចិញ្ចឹមកូន។

ការព្យាយាមពិតជាអាចធ្វើឱ្យសុបិនក្លាយជាការពិតបាន ក៏ប៉ុន្តែ បើតាម La Reine នេះគ្រាន់តែជារឿងចៃដន្យដ៏កម្រមួយតែប៉ុណ្ណោះ ហើយការចាក់ឆ្នោតគឺប្រៀបបានទៅនឹងការរាវរកម្ជុលនៅក្នុងព្រែកយ៉ាងដូច្នេះដែរ៕

ប្រភព៖ CNN

January 26, 2021

មហាសេដ្ឋីលំដាប់លេខមួយនៅម៉ិកស៊ិក ឆ្លង Covid-19

កំពូលអ្នកមានលំដាប់លេខមួយ និងជាមេកន្ទ្រាញផ្នែកទូរគមនាគមន៍ប្រចាំប្រទេសម៉ិកស៊ិក លោក Carlos Slim Helu បានឆ្លងវីរុស Covid-19។

កាលពីថ្ងៃទី 25 មករា អ្នកនាំពាក្យរបស់លោក Carlos Slim Helu បានបញ្ជាក់ថា មហាសេដ្ឋីលេខមួយនៅម៉ិកស៊ិក ទទួលបានលទ្ធផលវិជ្ជមាននឹង Covid-19 ប្រហែលមួយសប្ដាហ៍កន្លងទៅហើយ ខណៈដែលលទ្ធផលនៃការព្យាបាលកំពុងតែមានភាពល្អប្រសើរ។ មុននេះ សារព័ត៌មាន Reforma របស់ប្រទេសម៉ិកស៊ិក ក៏បានចុះផ្សាយថា មហាសេដ្ឋីកើតឆ្នាំ 1940 រូបនេះ បានឆ្លង Covid-19 ដោយយោងទៅលើប្រភពព័ត៌មានពី Carlos Slim Domit ដែលជាកូនប្រុសរបស់លោក។

ព័ត៌មាននេះត្រូវបានចេញផ្សាយមួយថ្ងៃបន្ទាប់ពីប្រធានាធិបតីម៉ិកស៊ិក លោក Andres Manuel Lopez Obrador បានប្រកាសនៅលើ Twitter ថា លោកវិជ្ជមាននឹង Covid-19។

ប្រធានាធិបតីម៉ិកស៊ិក លោក Andres Manuel Lopez Obrador (ស្ដាំ) និងមហាសេដ្ឋី Carlos Slim

យោងតាមទស្សនាវដ្ដី Forbes ទ្រព្យសម្បត្តិរបស់លោក Carlos Slim ស្ថិតក្នុងរង្វង់ 59.9 លានដុល្លារអាមេរិក និងជាអ្នកមានជាងគេលំដាប់ទី 21 ក្នុងពិភពលោក។ ទ្រព្យសម្បត្តិភាគច្រើនរបស់លោក Carlos Slim គឺមូលបត្រនៅ America Movil ដែលជាក្រុមហ៊ុនទូរគមនាគមន៍លំដាប់ជួរមុខនៅអាមេរិកឡាទីន។ មហាសេដ្ឋីរូបនេះ ក៏ធ្លាប់ជាអ្នកមានជាងគេលំដាប់លេខមួយនៅលើតារាងចំណាត់ថ្នាក់របស់ Forbes ចាប់ពីឆ្នាំ 2010 ដល់ឆ្នាំ 2013 ផងដែរ៕

ប្រភព៖ Forbes

January 26, 2021

រកឃើញប្រព័ន្ធផ្កាយដែលមានព្រះអាទិត្យចំនួន 6 ដួង នៅក្នុងកាឡាក់ស៊ី Milky Way

ក្រុមអ្នកវិទ្យាសាស្ត្របានរកឃើញប្រព័ន្ធតារាមួយដែលមានផ្កាយចំនួនដល់ទៅ 6 ដួង វិលជុំវិញគ្នា នៅក្នុងកាឡាក់ស៊ី Milky Way ដែលមានចម្ងាយប្រមាណ 2,000 ឆ្នាំពន្លឺពីផែនដី។

ទស្សនាវដ្ដី arXiv កាលពីថ្ងៃទី 12 មករា បានចុះផ្សាយថា ប្រព័ន្ធផ្កាយដែលមានឈ្មោះថា TIC 168789840 នេះ ត្រូវបានរកឃើញដោយទីភ្នាក់ងារអវកាសអាមេរិក (NASA) ដោយយោងទៅលើទិន្នន័យពី TESS ដែលជាផ្កាយរណបជំនាញខាងរុករកភពក្រៅប្រព័ន្ធព្រះអាទិត្យ។

ប្រព័ន្ធផ្កាយ TIC 168789840 នេះ មានព្រះអាទិត្យ ឬផ្កាយចំនួន 6 ដួង ដែលវិលជុំវិញគ្នា។ បើសិនជាគេពិនិត្យមើលដោយប្រើកែវយឹតធម្មតាពីផែនដី គេនឹងគ្រាន់តែឃើញថា ប្រព័ន្ធផ្កាយនេះ មានសភាពដូចទៅនឹងផ្កាយ 1 ដូងនៅលើមេឃតែប៉ុណ្ណោះ។ ក៏ប៉ុន្តែ ដោយសារតែពន្លឺរបស់វាមានការប្រែប្រួលខុសធម្មតា ទើបក្រុមអ្នកវិទ្យាសាស្ត្រប្រើប្រាស់តេឡេស្កុបរបស់ផ្កាយរណប TESS ដើម្បីសង្កេតបន្ថែម ហើយក៏បានរកឃើញថា តាមពិត វាគឺជាប្រព័ន្ធផ្កាយមួយដែលមានព្រះអាទិត្យដោយឡែកចំនួន 6 ដួង។

NASA បានបកស្រាយថា ព្រះអាទិត្យចំនួន 6 ដួងរបស់ TIC 168789840 នេះ វិលជុំវិញគ្នានៅលើផ្ទៃដែលរាប់ស្មើដូចថាស និងចំហៀងរបស់វាបែរត្រង់មករកផែនដី ដូច្នេះ នៅពេលមានផ្កាយណាមួយក្នុងប្រព័ន្ធនេះ គោចរឆ្លងកាត់ពីមុខផ្កាយមួយទៀត នោះវានឹងបង្កើតបានជាបាតុភូតសូរ្យគ្រាស ធ្វើឱ្យពន្លឺរបស់ប្រព័ន្ធផ្កាយត្រូវថយចុះ។

TIC 168789840 មិនមែនជាប្រព័ន្ធផ្កាយដែលមានព្រះអាទិត្យចំនួន 6 តែមួយគត់ក្នុងកាឡាក់ស៊ី Milky Way នោះទេ តែវាស្រដៀងនឹងប្រព័ន្ធផ្កាយ Castor មានចម្ងាយ 51 ឆ្នាំពន្លឺពីផែនដី ដែលត្រូវបានរកឃើញកាលពីឆ្នាំ 1920។

ជាក់ស្ដែង ព័ន្ធផ្កាយនេះវិលជុំវិញគ្នាជាគូ ដោយក្នុងនោះ គូទីមួយ និងគូទីពីរ (ដូចទៅនឹង Castor A និង A) ភ្ជាប់ជាមួយគ្នាយ៉ាងម៉ត់ចត់ ហើយដើម្បីវិលបានមួយជុំលើគន្លងគោលពីរនេះ ផ្កាយមួយដួងស៊ីពេលអស់ 31 ម៉ោង ខណៈផ្កាយមួយដួងទៀតចំណាយអស់ 38 ម៉ោង។ ប្រព័ន្ធផ្កាយទាំងពីរគូនេះ ក៏វិលជុំវិញចំណុចកណ្ដាលរួមមួយដែលធំជាងគន្លងគោចរដោយឡែករបស់ពួកវា ដោយត្រូវចំណាយពេល 3.7 ឆ្នាំ ទើបគោចរបានមួយជុំ។

ចំណែកប្រព័ន្ធផ្កាយភ្លោះទីបី (ដូចទៅនឹង Castor C) ត្រូវចំណាយពេលអស់ 2,000 ឆ្នាំ ឬយូរជាងនេះ ទើបធ្វើដំណើរបានមួយជុំនៃគន្លងគោចរធំជាងគេរបស់ប្រព័ន្ធផ្កាយ TIC 168789840 នេះ។ ផ្កាយ 2 ដូងនៅក្នុងប្រព័ន្ធផ្កាយភ្លោះទីបីនេះ វិលជុំវិញគ្នាលើគន្លងគោចរដែលមានគោលរៀងៗខ្លួន និងត្រូវចំណាយពេល 129 ម៉ោងទើបវិលបានមួយជុំ។

យ៉ាងនេះក្ដី ក្រុមអ្នកវិទ្យាសាស្ត្រមិនបានយល់ច្បាស់អំពីប្រភព ឬវិធីចាប់កំណើតរបស់ប្រព័ន្ធផ្កាយ TIC 168789840 នេះនៅឡើយ៕

ប្រភព៖ Live Science

January 26, 2021

ប្រធានស្ដីទីនៃក្រុមហ៊ុន Samsung យល់ព្រមទទួលទោសជាប់ពន្ធនាគារ 18 ខែ

នៅក្នុងកិច្ចសម្ភាសមួយកាលពីថ្ងៃទី 25មករា មេធាវីរបស់អនុប្រធាន និងជាប្រធានស្ដីទីរបស់ក្រុមហ៊ុន Samsung បានអះអាងថា លោក Lee Jae-yong បាន «បន្ទាបខ្លួនទទួលយក» សាលក្រមតុលាការដែលបានកាត់ទោសឱ្យជាប់ពន្ធនាគាររយៈពេល 30 ខែ។

យោងតាម Bloomberg អ្នកស្នងមរតក Samsung លោក Lee Jae-yong បានសម្រេចចិត្តមិនប្ដឹងឧទ្ធរណ៍ចំពោះការកាត់ក្ដីរបស់តុលាការក្រុងសេអ៊ូលនោះទេ។ ក្នុងកិច្ចសម្ភាសមួយកាលពីថ្ងៃទី 25 មករា មេធាវីរបស់លោក Lee បានបញ្ជាក់ថា កូនក្ដីរបស់ខ្លួនបាន «ដាក់ខ្លួនទទួលយក» ការកាត់ក្ដីរបស់តុលាការ និងយល់ព្រមជាប់ពន្ធនាគាររយៈពេល 18។

កាលពីសប្ដាហ៍មុន តុលាការជាន់ខ្ពស់នៃទីក្រុងសេអ៊ូលរបស់កូរ៉េខាងត្បូងបានប្រកាសសាលក្រមដាក់ពន្ធនាគារចំពោះលោក Lee រយៈពេល 2.5 ឆ្នាំ ព្រោះតែអំពើពុករលួយ។ ប៉ុន្តែ លោក Lee ដែលជាអនុប្រធាន និងជាប្រធានស្ដីទីរបស់ក្រុមហ៊ុន Samsung នឹងត្រូវទទួលទោសជាប់ពន្ធនាគារត្រឹមតែ 18 ខែប៉ុណ្ណោះ ដោយសារមុននេះ លោកបានអនុវត្តតាមសាលក្រមបាន 1 ឆ្នាំ មុនពេលត្រូវបានដោះលែងកាលពីខែកុម្ភៈ ឆ្នាំ 2018។

ដំបូងឡើយ ក្រុមចៅក្រមកូរ៉េខាងត្បូងបានស្នើឱ្យដាក់ពន្ធនាគារ 9 ឆ្នាំ ចំពោះលោក Lee។ ប៉ុន្តែ សារព័ត៌មាន Yonhap Television News បានឱ្យដឹងថា ក្រុមចៅក្រម ក្រោយមក មិនបានជំទាស់នឹងការស្នើឱ្យដាក់ទោសជាប់ពន្ធនាគាររយៈពេល 2.5 ឆ្នាំ សម្រាប់លោក Lee នោះដែរ។

សាលក្រមនេះបានបញ្ចប់ករណីអាស្រូវពុករលួយដែលបានអូសបន្លាយពេលអស់ជាច្រើនឆ្នាំ ទាក់ទងនឹងករណីអតីតប្រធានាធិបតីកូរ៉េខាងត្បូងដែលត្រូវបាត់បង់តំណែង។ លោក Lee ត្រូវបានចោទប្រកាន់ពីបទសូកប៉ាន់ប្រាក់សរុបចំនួន 8.6 ពាន់លានវ៉ុន (7.8 លានដុល្លារអាមេរិក) ទៅឱ្យអតីតប្រធានាធិបតី Park Geun-hye និងមិត្តជិតស្និទ្ធរបស់លោកស្រី គឺអ្នកស្រី Choi Soon-sil ដើម្បីទទួលបានការគាំទ្រពីអាជ្ញាធរសេអ៊ូល ក្នុងបំណងពង្រីកអំណាចគ្រប់គ្រង Samsung។

ភាគីខាងក្រុមហ៊ុន Samsung Electronics មិនធ្វើអធិប្បាយអ្វីទាក់ទងនឹងការសម្រេចមិនប្ដឹងឡើងឧទ្ធរណ៍របស់លោក Lee នោះទេ ខណៈមូលបត្ររបស់ក្រុមហ៊ុននេះ កាលពីថ្ងៃទី 25 មករា បានកើន 3% នៅក្នុងផ្សារហ៊ុនសេអ៊ូល បន្ទាប់ពីបានកើនជាង 40% ក្នុងឆ្នាំ 2020។

អវត្តមានរបស់លោក Lee នៅក្នុងក្រុមហ៊ុន អាចធ្វើឱ្យមានការយឺតយ៉ាវ ឬស្មុគស្មាញចំពោះខ្ទង់វិនិយោគធំៗ ឬយុទ្ធសាស្ត្រយូរអង្វែងរបស់ក្រុមហ៊ុននេះ។ លោក Lee បានដើរតួនាទីវិជ្ជមានមួយនៅក្នុងក្រុមហ៊ុន ដោយលោកតែងចូលរួមក្នុងព្រឹត្តិការណ៍បើកចំហ និងព្រឹត្តិការណ៍ដែលទាក់ទងនឹងរដ្ឋាភិបាលជាដើម ក្រោយពីលោកបានចេញពីពន្ធនាគារកាលពីឆ្នាំ 2018៕

ប្រភព៖ Bloomberg

January 26, 2021

Reuters៖ សភាជាន់ទាបអាមេរិក ចោទប្រកាន់លោក Trump ជាផ្លូវការ

សភាជាន់ទាបអាមេរិក កាលពីថ្ងៃទី 25 មករា បានធ្វើការចោទប្រកាន់លើអតីតប្រធានាធិបតី Donald Trump ជាផ្លូវការ ព្រោះបាន «ញុះញង់ឱ្យមានការបះបោរ» ដោយការអធិប្បាយនៅចំពោះមុខអ្នកគាំទ្ររបស់លោក មុនពេលសភាទទួលស្គាល់ជ័យជំនះរបស់បេក្ខភាព Joe Biden។

កាលពីថ្ងៃទី 6 មករា ឆ្នាំ 2021 ក្រុមបាតុករគាំទ្រលោក Trump បាននាំគ្នាសម្រុកចូលកាន់កាប់វិមានសភា Capitol និងបង្កភាពវឹកវរ បណ្ដាលឱ្យសភាអាមេរិកត្រូវផ្អាកកិច្ចប្រជុំដែលទទួលស្គាល់ជ័យជំនះរបស់លោក Biden សម្រាប់ការបោះឆ្នោតឆ្នាំ 2020។ បាតុកម្មហិង្សានេះបានសម្លាប់មនុស្សចំនួន 5នាក់ ក្នុងនោះមានមន្ត្រីប៉ូលិសផងដែរ។

ពាកក្យបណ្ដឹងចោទប្រកាន់ប្រឆាំងនឹងលោក Trump ត្រូវបានបញ្ជូនឡើងទៅកាន់សភាជាន់ខ្ពស់នៅព្រឹកថ្ងៃទី 25 មករា (ម៉ោងក្នុងស្រុក)។ តំណាងរាស្ត្របក្សប្រជាធិបតេយ្យចំនួន 9 រូបនៅសភាជាន់ទាបនឹងដើរតួនាទីជាចៅក្រម។

ទង្វើខាងលើនេះក៏បង្កើតឱ្យមានកំណត់ត្រាថ្មីចំនួនពីរដំបូងគេក្នុងប្រវត្តិសាស្ត្រអាមេរិក នោះគឺ ទីមួយ លោក Trump គឺជាប្រធានាធិបតីអាមេរិកតែមួយគត់ដែលត្រូវបានសភាជាន់ទាបចោទប្រកាន់ដល់ទៅពីលើក និងជាមនុស្សដំបូងដែលប្រឈមនឹងការចូលខ្លួនទៅបំភ្លឺនៅតុលាការ ក្រោយពីបានចប់អាណត្តិ។ ការដែលត្រូវកាត់ទោសនៅសភាជាន់ខ្ពស់អាចនឹងក្លាយជារនាំងឧបសគ្គដ៏ធំចំពោះការបន្តឈរឈ្មោះជាបេក្ខភាពប្រធានាធិបតរបស់លោក Trump នាពេលអនាគត។

អនុប្រធានាធិបតីអាមេរិក លោកស្រី Kamala Harris

មេដឹកនាំសភាជាន់ខ្ពស់អាមេរិក មុននេះ បានយល់ស្របគ្នាថានឹងមិនកាត់ក្ដីលើការចោទប្រកាន់ចំពោះលោក Trump រហូតដល់ថ្ងៃទី 9 កុម្ភៈ។ សភាជាន់ខ្ពស់អាមេរិក បច្ចុប្បន្នត្រូវបានបែងចែកស្មើគ្នាសម្រាប់បក្សប្រជាធិបតេយ្យ និងបក្សសាធារណរដ្ឋ ប៉ុន្តែ ក្នុងករណីមិនមានអ្នកឈ្នះ-ចាញ់ក្នុងការបោះឆ្នោតនៅសភាជាន់ខ្ពស់ ក្រុមប្រជាធិបតេយ្យក៏នៅតែមានប្រៀបជាងក្រុមសាធារណរដ្ឋ ដោយសារតែមានសំឡេងឆ្នោតសម្រេចចុងក្រោយពីអនុប្រធានាធិបតី Kamala Harris។

ការយឺតយ៉ាវក្នុងការកាត់ទោស អាចផ្ដល់ពេលវេលាបន្ថែមដល់លោក Trump ដើម្បីត្រៀមខ្លួនសម្រាប់រៀបចំមេធាវី និងយុទ្ធសាស្ត្រទប់ទល់ក្នុងការការពារខ្លួន ព្រមទាំងអនុញ្ញាតឱ្យសភាជាន់ខ្ពស់អាចផ្ដោតទៅលើបញ្ហាអាទិភាពរបស់ប្រធានាធិបតី Joe Biden ក្នុងនោះក៏មានការតែងតាំងមន្ត្រីនានាសម្រាប់តំណែងនៅក្នុងជួរគណៈរដ្ឋមន្ត្រីផងដែរ៕

ប្រភព៖ Reuters

January 26, 2021

កម្ពុជារកឃើញអ្នកវិជ្ជមាននឹង Covid-19 ថ្មី 2នាក់ ខណៈអ្នកឆ្លងសរុបទូទាំងពិភពលោកកើនលើស 100លាននាក់

ព្រឹកថ្ងៃទី 26 មករា ឆ្នាំ 2021 នេះ ក្រសួងសុខាភិបាលកម្ពុជាប្រកាសឱ្យដឹងថា ក្នុងថ្ងៃទី 25 មករា បានរកឃើញអ្នកវិជ្ជមាននឹង Covid-19 ថ្មីចំនួន 2 ករណីទៀត នាំឱ្យតួលេខសរុបនៃអ្នកដែលបានឆ្លងវីរុសនៅកម្ពុជាកើនដល់ 460 នាក់។

ករណីវិជ្ជមានទាំងពីរខាងលើនេះ សុទ្ធតែជាករណីនាំចូល ក្នុងនោះមាន 1 ករណីជាពលការិនីត្រលប់មកពីប្រទេសថៃ និង 1 ករណីទៀត ជាបុរសជនជាតិឥណ្ឌូនេស៊ី ធ្វើដំណើរពីប្រទេសឥណ្ឌូនេស៊ី។ ក្រៅពីរកឃើញករណីវិជ្ជមាន ក្នុងរយៈពេល 24 ម៉ោងកន្លងទៅ កម្ពុជាក៏មានអ្នកជាសះស្បើយចំនួន 2 ករណីផងដែរ។ ព័ត៌មានលម្អិត សូមអានតារាងខាងក្រោម។

គិតមកដល់បច្ចុប្បន្ន កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 460 នាក់ ក្នុងនោះមាន 412 នាក់បានជាសះស្បើយ និង 48 នាក់កំពុងសម្បាកព្យាបាល។

នៅទូទាំងពិភពលោក អ្នកឆ្លង Covid-19 បានកើនឡើងដល់ជាង 100 លាននាក់ និងអ្នកស្លាប់កើនដល់ជាង 2,148,000 នាក់ ខណៈអ្នកជំងឺកំពុងព្យាបាលមានចំនួនជាង 25.8 លាននាក់៕

January 26, 2021

Author: សឿន សំណាង