សឿន សំណាង - La Reine Media

GDP អាមេរិកក្នុងឆ្នាំ 2020 ដាំក្បាលចុះជ្រៅបំផុតក្នុងអំឡុង 74ឆ្នាំមកនេះ

ខឿនសេដ្ឋកិច្ចធំជាងគេបង្អស់ក្នុងពិភពលោកមួយនេះ បានរួញក្រញង់មកនៅត្រឹម 3.5% ដែលនេះគឺជាឱនភាពធំបំផុតរាប់ចាប់ពីឆ្នាំ 1946 ហើយវាក៏ជាឆ្នាំដំបូងនៃការដាំក្បាលចុះបន្ទាប់ពីវិបត្តិហិរញ្ញវត្ថុចន្លោះឆ្នាំ 2007-2009។

ក្រសួងពាណិជ្ជកម្មអាមេរិក កាលពីថ្ងៃទី 28 មករា បានប្រកាសថា ផលិតផលក្នុងស្រុកសរុប (GDP) ប្រទេសនេះកើន 4% ក្នុងត្រីមាសទី 4 នៃឆ្នាំ 2020។ អត្រាកំណើននេះ បានថយចុះយ៉ាងច្រើនបើធៀបនឹង 33.4% ក្នុងត្រីមាសទី 3។ មូលហេតុគឺដោយសារការយឺតយ៉ាវរបស់រដ្ឋាភិបាលក្នុងការបញ្ចេញកញ្ចប់ថវិកាជំនួយសេដ្ឋកិច្ចថ្មី និងសកម្មភាពរបស់បណ្ដាក្រុមហ៊ុនត្រូវបានផ្អាកដំណើរការព្រោះតែ Covid-19។

ជារួម ក្នុងឆ្នាំ 2020 ខឿនសេដ្ឋកិច្ចធំជាងគេលំដាប់ទីមួយក្នុងពិភពលោកនេះ បានថយចុះមកនៅត្រឹម 3.5% ដែលជាអត្រាទាបជាងគេដោយរាប់ចាប់ពីឆ្នាំ 1946 និងជាឱនភាពនៃឆ្នាំដំបូងរាប់ចាប់តាំងពីមានវិបត្តិហិរញ្ញវត្ថុដែលបានកើតឡើងចាប់ពីឆ្នាំ 2007 ដល់ឆ្នាំ 2009។ ឆ្នាំ 2019 GDP អាមេរិកកើន 2.2%។

វិស័យស្ទើរតែទាំងអស់នៅសហរដ្ឋអាមេរិក បានដាំក្បាលចុះ។ ការចាយវាយលក្ខណបុគ្គល ដែលកាន់កាប់ជាង 2/3 នៃទំហំសេដ្ឋកិច្ចជាតិ ក៏បានថយចុះមកនៅត្រឹម 3.9% កាលពីឆ្នាំមុន ដែលនេះក៏ជាឱនភាពធំបំផុតចាប់តាំងពីឆ្នាំ 1932។ សហរដ្ឋអាមេរិកបានធ្លាក់ចូលក្នុងឱនភាពសេដ្ឋកិច្ចចាប់តាំងពីខែកុម្ភៈ ឆ្នាំ 2020។

ល្បឿននៃកំណើនសេដ្ឋកិច្ចអាមេរិកតាមបណ្ដាឆ្នាំ

យ៉ាងនេះក្ដី GDP អាមេរិកក៏ត្រូវបានព្យាករថានឹងវិលត្រលប់ទៅរកស្ថានភាពមុនវិបត្តិសុខភាពនៅក្នុងត្រីមាសទី 2 ឆ្នាំ 2021។ ធនាគារកណ្ដាលអាមេរិក (FED) កាលពីថ្ងៃទី 27 មករា បានសម្រេចរក្សាអត្រាការប្រាក់ជិត 0%។ ទន្ទឹមនឹងនេះ FED ក៏បានសន្យាថានឹងបន្តបញ្ចេញកញ្ចប់ថវិកាជំនួយទៅក្នុងទីផ្សារសេដ្ឋកិច្ចតាមរយៈការទិញមូលបត្របំណុលផងដែរ។

ក្នុងគ្រាដែល Covid-19 នៅតែបន្តរាតត្បាត ក្រុមសេដ្ឋវិទូបានព្យាករថា កំណើនសេដ្ឋកិច្ចអាមេរិកនឹងបន្តធ្វើដំណើរយឺតៗ ដោយកើន 2% នៅក្នុងត្រីមាសដំបូងនៃឆ្នាំ 2021 នេះ។ បន្ទាប់មក GDP នឹងបង្កើនល្បឿននៅក្នុងរដូវក្ដៅ នៅពេលមានកញ្ចប់ថវិកាជំនួយ និងពេលដែលពលរដ្ឋអាមេរិកកាន់តែច្រើនត្រូវបានចាក់វ៉ាក់សាំង។

«យើងយល់ថា កំណើននៃការចាយវាយនឹងកើនឡើងដល់កម្រិតខ្ពស់បំផុតក្នុងឆ្នាំ 2021 នៅពេលគ្រួសារនានាទទួលបានខ្ទង់ជំនួយផ្នែកហិរញ្ញវត្ថុពីរដ្ឋាភិបាលរបស់លោក Biden ខណៈដែលពលរដ្ឋអាមេរិកប្រមាណជា 2/3 គិតដល់ខែកក្កដា ត្រូវបានចាក់វ៉ាក់សាំង រូករួមនឹងទីផ្សារការងារបានបង្កើនល្បឿននៅក្នុងរដូវផ្ការីក» លោក Gregory Daco ប្រធានផ្នែកសេដ្ឋកិច្ចប្រចាំក្រុមហ៊ុន Oxford Economics អះអាងដូច្នេះ៕

ប្រភព៖ Reuters

January 29, 2021

Bloomberg៖ អាមេរិកប្រឈមនឹងសង្គ្រាមរូបិយវត្ថុក្រោយសម័យកាល Covid-19

នៅចំពោះមុខសម្ពាធនៃការបញ្ចុះតម្លៃប្រាក់ដុល្លាររបស់អាមេរិក ខឿនសេដ្ឋកិច្ចនានាជាច្រើនដូចជា អឺរ៉ុប ថៃ និងឈីលីជាដើម ក៏ត្រូវបង្ខំចិត្តបញ្ចុះតម្លៃរូបិយប័ណ្ណក្នុងស្រុករបស់ពួកគេផងដែរ។

រដ្ឋមន្ត្រីក្រសួងហិរញ្ញវត្ថុអាមេរិក លោកស្រី Janet Yellen កំពុងតែឈឺក្បាលយ៉ាងខ្លាំងដោយសារតែឧបសគ្គដ៏ធំមិនចាញ់ Covid-19 ប៉ុន្មានឡើយ នោះគឺសង្គ្រាមរូបិយវត្ថុ។

រាប់ចាប់តាំងពីបានឡើងដល់កម្រិតកំពូលកាលពីខែមីនា ឆ្នាំ 2020 រូបិយប័ណ្ណដុល្លារអាមេរិកបានធ្លាក់ថ្លៃ 13% ព្រោះតែធនាគារកណ្ដាលអាមេរិក (FED) បាន «ជះ» លុយចូលទៅក្នុងទីផ្សារសេដ្ឋកិច្ចជាបន្តបន្ទាប់ ក៏ដូចជាបានបញ្ចុះអត្រាការប្រាក់ដើម្បីជំរុញសកម្មភាពឥណទាន ក្នុងបំណងទប់ទល់នឹងផលប៉ះពាល់ពី Covid-19។ ប៉ុន្តែ ទន្ទឹមនឹងការជួយសង្គ្រោះសេដ្ឋកិច្ចនៅក្នុងវិបត្តិសុខភាព វិធានការខាងលើក៏កំពុងតែជំរុញឱ្យមានសង្គ្រាមរូបិយវត្ថុថ្មីមួយនៅក្នុងពិភពលោក។

នៅចំពោះមុខសម្ពាធនៃការបញ្ចុះតម្លៃប្រាក់ដុល្លាររបស់អាមេរិក ខឿនសេដ្ឋកិច្ចនានាជាច្រើនដូចជា អឺរ៉ុប ថៃ និងឈីលីជាដើម ក៏បាននាំគ្នាធ្វើតាមសហរដ្ឋអាមេរិក ដោយការបញ្ចុះតម្លៃរូបិយប័ណ្ណក្នុងស្រុករបស់ពួកគេ។

នៅក្នុងសវនាការមួយនៅសភាជាតិកាលពីពេលថ្មីៗនេះ រដ្ឋមន្ត្រីក្រសួងហិរញ្ញវត្ថុអាមេរិក និងជាអតីតប្រធាន FED លោកស្រី Yellen បានបង្ហាញអំពីគំនិតបដិសេធការស្ដារកម្លាំងរូបិយវត្ថុអាមេរិក។ ជំនួសមកវិញ លោកស្រី Yellen ឱ្យដឹងថា នឹងបង្កើតសម្ពាធទៅលើបណ្ដាប្រទេសដែលហ៊ានលូកដៃចូលក្នុងរឿងបញ្ចុះតម្លៃរូបិយប័ណ្ណអាមេរិក។

រដ្ឋមន្ត្រីក្រសួងហិរញ្ញវត្ថុអាមេរិក លោកស្រី Janet Yellen

មុននេះ កាលពីអំឡុងឆ្នាំ 2010-2011 សហរដ្ឋអាមេរិកក៏ធ្លាប់បានបញ្ចុះតម្លៃប្រាក់ដុល្លារ និងបង្កឱ្យមានផលប៉ះពាល់ដល់សេដ្ឋកិច្ចទូទាំងពិភពលោក។ ការចុះថ្លៃនៃប្រាក់ដុល្លារអាមេរិក បានធ្វើឱ្យផលិតផលនានាដែលជួញដូរដោយប្រើរូបិយប័ណ្ណដុល្លារអាមេរិកក្នុងទីផ្សារអន្តរជាតិ ត្រូវធ្លាក់ថ្លៃទៅតាមនោះដែរ។ ប្រការនេះក៏បាននាំឱ្យការមានប្រៀបក្នុងការនាំចេញរបស់អាមេរិកបានកើនឡើង ប៉ុន្តែមុខទំនិញដែលនាំចូលប្រទេសនេះបែរជាដាំក្បាលចុះ បណ្ដាលឱ្យប្រទេសជាច្រើនត្រូវខាតបង់ផ្នែកសេដ្ឋកិច្ច។

ដើម្បីដោះស្រាយបញ្ហា ប្រទេសជាច្រើនក៏បានបង្ខំចិត្តបញ្ចុះតម្លៃរូបិយប័ណ្ណក្នុងស្រុកដើម្បីរក្សាលំនឹងផ្នែកសេដ្ឋកិច្ច។ កាលណោះ រដ្ឋមន្ត្រីហិរញ្ញវត្ថុប្រេស៊ីល ក៏បានរិះគន់ដោយចំហចំពោះចំណាត់ការរបស់អាមេរិកថា នេះគឺជាសង្គ្រាមរូបិយវត្ថុ។

បច្ចុប្បន្ន ស្ថានភាពកំពុងតែអាក្រក់ជាងមុន នៅពេលដែលរដ្ឋមន្ត្រីហិរញ្ញវត្ថុអាមេរិក មិនមានគម្រោងណាមួយដើម្បីរក្សាលំនឹងចំពោះតម្លៃរូបិយវត្ថុដុល្លារ ក៏ដូចជាដើម្បីគេចពីសង្គ្រាមរូបិយប័ណ្ណ។ បើទោះជាត្រូវបានចោទថា កំពុងតែធ្វើអន្តរាគមន៍លើចំណាត់ការរបស់រដ្ឋមន្ត្រីហិរញ្ញវត្ថុអាមេរិក ប្រទេសស្វីស និងឥណ្ឌា នៅតែបន្តបញ្ចុះតម្លៃរូបិយវត្ថុរបស់ពួកគេដដែល។

ក្នុងសម័យប្រធានាធិបតីអាមេរិក Donald Trump មុនពេលវិបត្តិ Covid-19 មកដល់ ប្រាក់ដុល្លារអាមេរិកត្រូវបានក្រុមអ្នកវិនិយោគយកចិត្តទុកដាក់ និងផ្ដល់តម្លៃជាខ្លាំង ដោយសារតែកំណើនសេដ្ឋកិច្ចសហរដ្ឋអាមេរិកកើនឡើងខ្ពស់ និងមានលំនឹងល្អ។ ក៏ប៉ុន្តែ Covid-19 បានធ្វើឱ្យប្រែប្រួលគ្រប់យ៉ាង ហើយសង្គ្រាមរូបិយវត្ថុថ្មីមួយនឹងអាចកើតឡើងទ្រង់ទ្រាយធំ នៅពេលដែលប្រទេសនានានាំគ្នាបញ្ចុះតម្លៃរូបិយប័ណ្ណក្នុងស្រុករបស់ពួកគេរៀងៗខ្លួន៕

ប្រភព៖ Bloomberg

January 29, 2021

កម្ពុជារកឃើញអ្នកវិជ្ជមាននឹង Covid-19 ថ្មី 2ករណី ខណៈពិភពលោករកឃើញ 601,559ករណីបន្ថែមទៀត

ក្រសួងសុខាភិបាលកម្ពុជា ព្រឹកថ្ងៃទី 29 មករានេះ ឱ្យដឹងថា បានរកឃើញករណីឆ្លង Covid-19 ថ្មីចំនួន 2 ករណីបន្ថែមទៀត ដែលសុទ្ធតែជាករណីនាំចូល។

ក្នុងចំណោមករណីវិជ្ជមានថ្មីខាងលើនេះ មាន 1 ករណីជាពលករខ្មែរមកពីប្រទេសថៃ និង 1 ករណីជាពលរដ្ឋខ្មែរធ្វើដំណើរពីប្រទេសកូរ៉េខាងត្បូង។ ព័ត៌មានលម្អិត សូមអានរបាយការណ៍របស់ក្រសួងសុខាភិបាលដែលមាននៅក្នុងរូបភាពខាងក្រោម។

គិតមកដល់ព្រឹកថ្ងៃទី 29 មករា ឆ្នាំ 2021 កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 463 នាក់ ក្នុងនោះមានអ្នកជាសះស្បើយចំនួន 438 នាក់ និងអ្នកកំពុងព្យាបាលមានចំនួន 25 នាក់។

នៅទូទាំងពិភពលោក Covid-19 បានឆ្លងទៅមនុស្សចំនួន 101,969,426 លាននាក់ និងបានសម្លាប់អ្នកជំងឺចំនួន 2,198,556 នាក់។ ចំនួនអ្នកជំងឺបានកើនឡើងបន្ថែម 601,559 នាក់ និងអ្នកស្លាប់កើនបន្ថែម 17,375 នាក់ នៅក្នុងរយៈពេល 24 ម៉ោងកន្លងទៅនេះ។ អ្នកជំងឺដែលជាសះស្បើយមានចំនួន 73.802.007 នាក់ នេះបើតាមទំព័រ Worldometers៕

January 29, 2021

26.3លាននាក់បានឆ្លង Covid-19 នៅអាមេរិក ខណៈសហគមន៍អ្នកវេជ្ជសាស្ត្រថា វីរុស Covid-19 ក្លាយពូជថ្មី មានសមត្ថភាពទប់ទល់នឹងវ៉ាក់សាំង

សហរដ្ឋអាមេរិកគឺដែលជាសម្បុកវីរុស Covid-19 ធំជាងគេក្នុងពិភពលោក បានប្រកាសថា វីរុស Covid-19 ក្លាយពូជថ្មី មានសមត្ថភាពទប់ទល់នឹងវ៉ាក់សាំង ធ្វើឱ្យមានការព្រួយបារម្ភកាន់តែខ្លាំង។

សហរដ្ឋអាមេរិក គិតមកដល់ព្រឹកថ្ងៃទី 29 មករានេះ បានរកឃើញអ្នកវិជ្ជមាននឹង Covid-19 សរុប 26,310,559 នាក់ និងអ្នកស្លាប់សរុប 443,162 នាក់ ក្នុងនោះមានអ្នកជំងឺថ្មី 145,343 នាក់ និងអ្នកស្លាប់ថ្មីចំនួន 3,463 នាក់ ដែលត្រូវបានរកឃើញក្នុងអំឡុង 24 ម៉ោងកន្លងទៅនេះ។

ក្រុមមន្ត្រីសុខាភិបាលអាមេរិក កាលពីថ្ងៃទី 28 មករា បានប្រកាសជាលើកដំបូងថា បានរកឃើញវីរុស Covid-19 ក្លាយពូជថ្មីដែលមានប្រភពពីអាហ្វ្រិក នៅលើអ្នកជំងឺ 2 នាក់នៅក្នុងរដ្ឋ Carolina ខាងត្បូង។ សហគមន៍អ្នកវេជ្ជសាស្ត្រយល់ថា វីរុសក្លាយពូជថ្មីនេះគឺជាឧបសគ្គដ៏គួរឱ្យប្រកាសអាសន្ននៅក្នុងការប្រឹងប្រែងទប់ស្កាត់វីរុស ព្រោះថា មន្ទីរពិសោធន៍ជាច្រើនបានបញ្ជាក់ថា វីរុសក្លាយពូជថ្មីនេះមានសមត្ថភាពទប់ទល់នឹងវ៉ាក់សាំង និងកាត់បន្ថយប្រសិទ្ធភាពរបស់អង្គបដិប្រាណដែលបង្កើតឡើងដោយវ៉ាក់សាំងទៀតផង។

ព័ត៌មានខាងលើនេះត្រូវបានលើកឡើងតែប៉ុន្មានថ្ងៃប៉ុណ្ណោះ ក្រោយពីនាយកដ្ឋានសុខាភិបាលរដ្ឋ Minnesota បានរកឃើញករណីឆ្លងវីរុស Covid-19 ក្លាយពូជដែលមានសមត្ថភាពឆ្លងរាលដាលខ្ពស់ និងមានប្រភពពីប្រទេសប្រេស៊ីល ខណៈដែលវីរុសក្លាយពូជមកពីអង់គ្លេសបានបង្ហាញខ្លួននៅក្នុងរដ្ឋយ៉ាងតិចចំនួន 28 នៅសហរដ្ឋអាមេរិក៕

ប្រភព៖ RT

January 29, 2021

ប្រទេសជិតខាងរបស់កម្ពុជា ឈរលើកំពូលតារាងចំណាត់ថ្នាក់ស្ដីពីការគ្រប់គ្រង Covid-19

ប្រទេសនូវែលហ្សេឡង់ វៀតណាម និងតៃវ៉ាន់ គឺជាប្រទេស និងដែនដីដែលឈរលើកំពូលតារាងចំណាត់ថ្នាក់ស្ដីពីការប្រយុទ្ធប្រឆាំងនឹង Covid-19 ដោយសារតែគ្រប់គ្រងស្ថានភាពវិបត្តិសុខភាពនេះបានយ៉ាងល្អ។

តារាងចំណាត់ថ្នាក់នៃការទប់ទល់នឹង Covid-19 (Covid Performance Index) ដែលត្រូវបានវិទ្យាស្ថាន Lowy នៅទីក្រុង Sydney ប្រទេសអូស្ត្រាលី ប្រកាសបង្ហាញក្នុងថ្ងៃទី 28 មករា បានបង្ហាញថា នូវែលហ្សេឡង់ ឈរលំដាប់កំពូលតារាង ព្រោះតែគ្រប់គ្រងស្ថានភាព Covid-19 បានល្អជាងគេនៅក្នុងចំណោមប្រទេស និងដែនដីចំនួនជិត 100 ក្នុងពិភពលោក ដែលវិទ្យាស្ថាន Lowy បានវាយតម្លៃ។ វិទ្យាស្ថាន Lowy បានបញ្ជាក់ថា បញ្ជីចំណាត់ថ្នាក់នេះ មិនបានរាប់បញ្ចូលប្រទេសចិន ជាកន្លែងដែល Covid-19 ចាប់ផ្ដើមបង្ហាញវត្តមានដំបូងគេកាលពីខែធ្នូ ឆ្នាំ 2019 នោះទេ ដោយសារតែខ្វះទិន្នន័យបើកចំហ។ ដូច្នេះ ប្រទេស និងដែនដីទាំងឡាយ (ក្នុងនោះមានកម្ពុជា) ដែលមិនមានឈ្មោះនៅក្នុងបញ្ជីចំណាត់ថ្នាក់នេះ ក៏អាចមានមូលហេតុដូចគ្នានេះដែរ។

ក្រុមប្រទេសផ្សេងៗដែលស្ថិតនៅក្នុង «top 10» នៃតារាងចំណាត់ថ្នាក់នេះ រួមមាន ប្រទេសថៃ (លេខ 3) ប្រទេសស៊ីប ប្រទេសរវ៉ាន់ដា អ៊ីស្លង់ អូស្ត្រាលី ឡាតវី និងស្រីលង្កា។ ទាំងនេះគឺជាប្រទេសដែលសុទ្ធតែមានអត្រានៃការឆ្លង និងអត្រានៃការស្លាប់ក្នុងកម្រិតទាប បើធៀបនឹងប្រជាជនសរុប និងមធ្យមភាគលើមនុស្សម្នាក់។

ចំណែកប្រទេសដែលស្ថិតក្នុង bottom 10 (បាតតារាង) នៃតារាងចំណាត់ថ្នាក់នេះ រួមមាន ប្រទេស ប្រេស៊ីល ម៉ិកស៊ិក កូឡុំប៊ី អ៊ីរ៉ង់ សហរដ្ឋអាមេរិក បូឡាវី ប៉ាណាម៉ា អូម៉ង់ អ៊ូយក្រែន និងប្រទេសឈីលី ដោយសារតែគ្រប់គ្រង Covid-19 មិនបានល្អ។

ជាសរុប មានប្រទេសចំនួន 98 ត្រូវបានវិទ្យាស្ថាន Lowy វាយតម្លៃអំពីស្ថានភាព Covid-19 នៅក្នុងអំឡុងពេល 36 សប្ដាហ៍ រាប់ចាប់ពីការរកឃើញករណីវិជ្ជមានទី 100 នៃប្រទេសនីមួយៗ និងយកទិន្នន័យដែលមានស្រាប និងគិតដល់ថ្ងៃទី 9 មករា។

ទិន្នន័យធម្យមភាគត្រូវបានគិតក្នុងអំឡុង 14 ថ្ងៃ គឺជាករណីឆ្លងត្រូវបានបញ្ជាក់ តួលេខនៃការឆ្លងដែលបានបញ្ជាក់លើពលរដ្ឋ 1លាននាក់ តួលេខអ្នកស្លាប់ដែលបានទទួលស្គាល់ តួលេខអ្នកស្លាប់ម្នាក់លើ 1 លាននាក់ រួមនឹងចំនួនករណីដែលត្រូវបានបញ្ជាក់ទៅតាមអត្រានៃការធ្វើតេស្ត និងអត្រាធ្វើតេស្តលើម្នាក់លើ 1 លាននាក់។

បណ្ដាប្រទេស និងដែនដីដែលឈរលើកំពូលតារាងចំណាត់ថ្នាក់

របាយការណ៍នៃការស្រាវជ្រាវនេះ ត្រូវបានបង្ហាញឱ្យដឹង ក្នុងគ្រាដែលពិភពលោកទាំងមូលបានរកឃើញអ្នកវិជ្ជមានជាង 100 លាននាក់ ក្នុងនោះមានអ្នកស្លាប់ជាង 2 លាននាក់។

តារាងចំណាត់ថ្នាក់ខាងលើក៏បានបង្ហាញថា បណ្ដាប្រទេស និងដែនដីនៅទ្វីបអាស៊ីប៉ាស៊ីហ្វិក ទទួលបានជោគជ័យក្នុងការគ្រប់គ្រង Covid-19 ខណៈដែលអឺរ៉ុប និងអាមេរិក ត្រូវបានជាន់ពន្លិចដោយរលកនៃការឆ្លងរាលដាលយ៉ាងឆាប់រហ័ស៕

ស្វែងយល់បន្ថែម៖ នៅទីនេះ

ប្រភព៖ Reuters

January 28, 2021

(វីដូអូ) រូបភាពស្កែន 3D «ពិត» ដំបូងគេបង្អស់ស្ដីពី Covid-19 ត្រូវបានប្រកាសបង្ហាញ

ក្រុមអ្នកវិទ្យាសាស្ត្របានប្រកាសបង្ហាញវីដេអូមួយស្ដីអំពីរូបភាព 3D ដំបូងគេបង្អស់របស់វីរុស Covid-19 ដែលត្រូវបានស្កែនដោយបច្ចេកវិទ្យាទំនើប ផ្ដល់នូវការយល់ដឹងបន្ថែមអំពីរចនាសម្ព័ន្ធរបស់វីរុសនេះ។

វីដេអូខាងលើនេះ ត្រូវបានបង្ហាញដោយក្រុមអ្នកវិទ្យាសាស្ត្រអន្តរជាតិ មកពីសាកលវិទ្យាល័យ Tsinghua នាទីក្រុងប៉េកាំង សាកលវិទ្យាល័យវិទ្យាសាស្ត្របច្ចេកវិទ្យា King Abdullah (KAUST) របស់ប្រទេសអារ៉ាប់ប៊ីសាអូឌីត ជាមួយនឹងក្រុមហ៊ុន Nanographics នៃសាកលវិទ្យាល័យបច្ចេកវិទ្យា Vienna របស់អូទ្រីស កាលពីថ្ងៃទី 25 ខែមករាកន្លងទៅ។

ទំហំរបស់ធាតុ (element) មួយនៃវីរុស Covid-19 គឺពិតជាតូចល្អិតខ្លាំងណាស់ ដោយមានអង្កត់ផ្ចិត 100 nanomet ដែលស្មើនឹង 1/70,000 នៃអង្កត់ផ្ចិតរបស់សរសៃសក់មនុស្ស។ ប៉ុន្តែ វាមានរចនាសម្ព័ន្ធដ៏ស្មុគស្មាញ។

ដើម្បីបង្កើតបានជារូបភាព 3D ដ៏ពិតប្រាកដបំផុតអំពីវីរុសនេះ ក្រុមអ្នកវិទ្យាសាស្ត្រពីសាកលវិទ្យាល័យ Tsinghua បានស្កែនសំណាកដែលត្រូវបានក្លាសែ ដោយប្រើប្រាស់បច្ចេកវិទ្យាស្កែន Electron cryotomography (CryoET)។

បន្ទាប់មក ក្រុមហ៊ុន Nanographics បានប្រែក្លាយរូបភាពដែលស្កែនដោយ CryoET នេះ ទៅជារូបភាព 3D ដោយប្រើប្រាស់បច្ចេកទេសពិសេសដែលត្រូវបានអភិវឌ្ឍដោយ KAUST។

ចុងក្រោយ បន្ទាប់ពីបានចាក់ពណ៌សិប្បនិម្មិតទៅលើផ្នែកផ្សេងៗរបស់វីរុសនេះ ក្រុមអ្នកវិទ្យាសាស្ត្រ ជាលើកដំបូង អាចមើលឃើញធាតុល្អិតបំផុតរបស់ Covid-19 ជាមួយនឹងកម្រិតនៃភាពប្រាកដ ជាក់ស្ដែង និងលម្អិតខ្ពស់បំផុត៕

ប្រភព៖ SCMP

January 28, 2021

កម្ពុជាមានករណីវិជ្ជមាននឹង Covid-19 ថ្មី 1នាក់ ខណៈពិភពលោករកឃើញជាង 101លាននាក់

ក្រសួងសុខាភិបាលកម្ពុជា ព្រឹកថ្ងៃទី 28 មករានេះ បានឱ្យដឹងថា បានរកឃើញករណីវិជ្ជមាននឹង Covid-19 ថ្មីចំនួន 1 ករណី ដែលជាពលករត្រលប់មកពីប្រទេសថៃ។

ករណីវិជ្ជមានថ្មីនេះកើតឡើងចំពោះស្ត្រីជនជាតិខ្មែរ អាយុ 42 ឆ្នាំ នៅសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ក្រៅពីករណីវិជ្ជមាន ក្នុងរយៈពេល 24 ម៉ោងចុងក្រោយនេះ កម្ពុជាក៏មានករណីជាសះស្បើយចំនួន 5 នាក់ផងដែរ។ ព័ត៌មានលម្អិត សូមអានតារាងខាងក្រោម។

គិតមកដល់ព្រឹកថ្ងៃទី 28 មករា ឆ្នាំ 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 461 នាក់ ក្នុងនោះមានអ្នកជាសះស្បើយចំនួន 428 នាក់ ខណៈអ្នកកំពុងព្យាបាលមានចំនួន 33 នាក់។

នៅទូទាំងពិភពលោក អ្នកវិជ្ជមាននឹង Covid-19 បានកើនដល់ 101,403,758 នាក់ ក្នុងនោះមានអ្នកស្លាប់ចំនួន 2,182,237 នាក់ និងអ្នកកំពុងព្យាបាលមានចំនួន 25,919,908 នាក់។ ក្នុងអំឡុង 24 ម៉ោងមកនេះ ពិភពលោកក៏មានអ្នកវិជ្ជមានថ្មីជាង 582,340 នាក់ផងដែរ៕

January 28, 2021

Elon Musk ជិតទទួលបានរង្វាន់ទី5 តម្លៃ 7ពាន់លានដុល្លារអាមេរិក

ដោយសារតែក្រុមហ៊ុនផលិតរថយន្តអគ្គិសនី Tesla បានរីកចម្រើនយ៉ាងឆាប់រហ័ស CEO Elon Musk ក៏ជិតទទួលបានប្រាក់រង្វាន់ដែលមានតម្លៃជិត 7 ពាន់លានដុល្លារអាមេរិក។ នៅក្នុងរដូវផ្ដល់រង្វាន់លើកមុន (ខែតុលា 2020) មហាសេដ្ឋីអាមេរិកដើមកំណើតអាហ្វ្រិករូបនេះ ទទួលបាន 2.9 ពាន់លានដុល្លារ។

នៅពេលដែលរបាយការណ៍សម្រាប់ត្រីមាសទី 4 ឆ្នាំ 2021 របស់ក្រុមហ៊ុន Tesla ត្រូវបានប្រកាស វានឹងអាចបើកផ្លូវឱ្យមានការផ្ដល់រង្វាន់ទី 5 តម្លៃ 7 ពាន់លានដុល្លារទៅឱ្យអគ្គនាយកប្រតិបត្តិ Elon Musk។ ប្រការនេះគឺយោងទៅតាមការព្យាករអំពីប្រាក់ចំណេញមុនបង់ពន្ធ និងការប្រាក់ដែលត្រូវសង (EBITDA) របស់ Tesla ដែលថា នឹងរកបានចំនួន 2.3 ពាន់លានដុល្លារ កើន 92% ធៀបនឹងដំណាក់កាលដូចគ្នាកាលពីឆ្នាំមុន។

តួលេខ EBITDA បែបនេះគឺគ្រប់គ្រាន់ដើម្បីអាចផ្ដល់រង្វាន់ទី 5 ក្នុងចំណោមរង្វាន់ទាំង 12 កម្រិតរបស់ក្រុមហ៊ុន Tesla សម្រាប់ CEO លោក Elon Musk ដោយយោងទៅលើកិច្ចព្រមព្រៀងកាលពីឆ្នាំ 2018 រវាងមហាសេដ្ឋីរូបនេះ ជាមួយនឹងភាគហ៊ុនិករបស់ Tesla។ គោលដៅនីមួយៗដែល Tesla សម្រេចបាន នឹងអនុញ្ញាតឱ្យ Elon Musk ទិញមូលបត្របន្ថែមចំនួន 8.4 លានហ៊ុន ក្នុងតម្លៃត្រឹមតែ 70 ដុល្លារអាមេរិក/ហ៊ុន។

Tesla មានរង្វាន់ចំនួន 12 កម្រិតសម្រាប់ CEO ដោយអាស្រ័យទៅលើតម្លៃមូលធនទីផ្សារគិតក្នុងអំឡុង 6 ខែម្ដង និងគោលដៅប្រាក់ចំណូល រួមនឹងប្រាក់ចំណេញមួយចំនួនទៀត។ ដោយសារតែមូលបត្រ Tesla កើនឡើងយ៉ាងឆាប់រហ័ស គោលដៅនៃតម្លៃមូលធនទីផ្សារក៏ងាយនឹងសម្រេចបាន ហើយ Elon Musk គ្រាន់តែរង់ចាំបញ្ចប់គោលដៅអមមួយចំនួនទៀតតែប៉ុណ្ណោះ មុននឹងទទួលបានរង្វាន់។

តម្លៃមូលបត្របច្ចុប្បន្នរបស់ Tesla គឺប្រមាណ 880 ដុល្លារ/ហ៊ុន ដូច្នេះ Elon Musk អាចទិញមូលបត្រនេះដោយមានការបញ្ចុះតម្លៃដល់ទៅ 90%។ គិតជាសរុប CEO របស់ Tesla អាចរកបានជិត 7 ពាន់លានដុល្លារពីរង្វាន់លើកនេះ។ រង្វាន់លើកមុន Elon Musk ទទួលបាន 2.9 ពាន់លានដុល្លារ នៅក្នុងខែតុលា ឆ្នាំ 2020៕

ប្រភព៖ Reuters

January 27, 2021

យន្តហោះស៊ើបការណ៍អាមេរិក-ចិន ប្រឈមមុខដាក់គ្នានៅក្បែរកោះតៃវ៉ាន់

យន្តហោះឈ្លបយកការណ៍ EP-3E របស់សហរដ្ឋអាមេរិក និង Y-8G របស់ប្រទេសចិន បានហោះទន្ទឹមគ្នានៅក្នុងតំបន់កំណត់អត្តសញ្ញាណការពារដែនអាកាសភាគនិរតីនៃកោះតៃវ៉ាន់ ដែលនេះគឺជាឥរិយាបថមួយដែលមិនធ្លាប់មានពីមុនមក។

ទំព័រ Aircraft Spots ដែលមានជំនាញខាងតាមដានជើងហោះហើរ បានឱ្យដឹងថា យន្តហោះឈ្លបយកការណ៍យុទ្ធសាស្ត្រដែលបំពាក់ឧបករណ៍បច្ចេកវិទ្យាទំនើបៗ និងអាចចូលរួមក្នុងសង្គ្រាមអេឡិចត្រូនិក EP-3E ដែលមានលេខសម្គាល់ 156528 របស់កងទ័ពជើងទឹកអាមេរិក និងយន្តហោះស៊ើបការណ៍រលកសញ្ញា Y-8G ដែលមានលេខសម្គាល់ 30518 របស់ទ័ពអាកាសចិន បានប្រឈមមុខដាក់គ្នានៅវេលាម៉ោង 11 និង 4 នាទី ក្នុងថ្ងៃទី 26 មករាកន្លងទៅ។

យន្តហោះ Y-8G ហោះនៅលើគន្លងដែលយន្តហោះចម្បាំងចិនធ្លាប់បានហោះហើរស្ទើរតែរាល់ថ្ងៃនៅភាគនិរតីនៃកោះតៃវ៉ាន់ ដែលស្ថិតក្នុងតំបន់កំណត់អត្តសញ្ញាណការពារដែនអាកាស (ADIZ) របស់កោះនេះ។ ប្រការដែលខុសប្លែកពីសព្វមួយដងនោះគឺថា ផ្លូវហោះហើរនេះមានលក្ខណទន្ទឹមគ្នា ប៉ុន្តែបញ្ច្រាសទិញគ្នា នៅក្នុងគម្លាតយ៉ាងជិតទៅនឹងយន្តហោះ EP-3E របស់អាមេរិក។

យន្តហោះស៊ើបការណ៍របស់អាមេរិក និងចិន តែងតែហោះចូលទៅកាន់តំបន់ ADIZ របស់តៃវ៉ាន់ នៅពេលបំពេញភារកិច្ច ប៉ុន្តែកន្លងមក សុទ្ធតែហោះហើរឆ្ងាយពីគ្នា និងមិនដែលហោះទន្ទឹមគ្នាក្នុងគម្លាតជិតយ៉ាងនេះ។

ក្រុមអ្នកតាមដានយល់ថា នេះអាចជាយុទ្ធសាស្ត្រថ្មីរបស់កងទ័ពអាមេរិកក្រោមការដឹកនាំរបស់លោក Joe Biden ក្នុងបំណងកំញើញដល់យន្តហោះចម្បាំងចិនដែលហោះកៀកកោះតៃវ៉ាន់។

ហេតុការណ៍នេះបានកើតឡើងស្របពេលដែលគោលនយោបាយរបស់ប្រធានាធិបតី Biden ជាមួយនឹងតៃវ៉ាន់ មិនទាន់មានភាពច្បាស់លាស់ ប៉ុន្តែ រដ្ឋាភិបាលថ្មីរបស់អាមេរិក ទំនងជានឹងបន្តអនុវត្តវិធានការតឹងរ៉ឹងចំពោះចិន ដូចទៅនឹងរដ្ឋាភិបាលរបស់លោក Trump។

ប្រទេសចិន កាលពីដើមសប្ដាហ៍នេះបានបញ្ជូនយន្តហោះរាប់សិបគ្រឿង រួមមានយន្តហោះទម្លាក់គ្រាប់បែក និងយន្តហោះចម្បាំង ហោះចូលមកក្បែរកោះតៃវ៉ាន់ ក្នុងអំឡុងពីរថ្ងៃជាប់ៗគ្នា ក្នុងគ្រាដែលក្រុមនាវាផ្ទុកយន្តហោះចម្បាំង USS Theodore Roosevelt របស់អាមេរិក ធ្វើដំណើរចូលមកកាន់សមុទ្រចិនខាងត្បូង។

ប្រទេសចិនតែងតែចាត់ទុកថា តៃវ៉ាន់គឺជាផ្នែកមួយនៃទឹកដីរបស់ខ្លួនដែលកំពុងរង់ចាំការបង្រួបបង្រួម។ ទីក្រុងប៉េកាំង បានបញ្ជូនយន្តហោះជាច្រើនគ្រឿង ហោះលើដែនអាកាសភាគខាងត្បូងរបស់តៃវ៉ាន់ជារៀងរាល់ថ្ងៃ នៅក្នុងប៉ុន្មានខែចុងក្រោយនេះ។ ក្នុងសម័យប្រធានាធិបតី Donald Trump ទំនាក់ទំនងរវាងអាមេរិក ជាមួយនឹងតៃវ៉ាន់ កាន់តែកក់ក្ដៅពីមួយថ្ងៃទៅមួយថ្ងៃ ខណៈដែលទំនាក់ទំនងរវាងអាមេរិក-ចិន ឬចិន-តៃវ៉ាន់ តែងតែមានភាពតានតឹងខ្លាំងឡើង៕

ប្រភព៖ Taiwan News

January 27, 2021

ស្នំឯករបស់មហាក្សត្រថៃ ត្រូវបានតែងតាំងជាមហេសីទីពីរ

មហាក្សត្រថៃ ព្រះបាទ Maha Vajiralongkorn តែងតាំងស្នំឯកជាមហេសីទីពីររបស់ទ្រង់ ដើម្បីជាអំណោយនៅក្នុងខួបកំណើតទី 36 របស់របស់ស្នំរូបនេះ។

ប្រភពព័ត៌មាននានាបានឱ្យដឹងថា ព្រះបាទ Maha Vajiralongkorn ព្រះជន្ម 68 វស្សា កាលពីថ្ងៃទី 26 មករា ឆ្នាំ 2021 បានតែងតាំងស្នំឯក Sineenat Wongvajirapakdi ជាមហាសីពេញសិទ្ធិរបស់ទ្រង់។ ព្រះអង្គម្ចាស់ទាំងពីរ គ្រងឈុតពណ៌ខៀវខ្ចី នៅក្នុងព្រះរាជពិធីអភ័យទាន់ដល់សត្វ និងត្រី នៅក្នុងការបួងសួងមួយនៃខួបកំណើតទី 36 របស់ស្នំឯក Sineenat ដែលត្រូវបានរៀបចំឡើងនៅឯកំពង់ផែ Wasukri ក្នុងរាជធានីបាងកក។

ការតែងតាំង និងដំឡើងឋានៈទៅឱ្យស្នំឯក Sinneenat នេះ ធ្វើឱ្យមានការភ្ញាក់ផ្អើលខ្លាំង ព្រោះថា ព្រះស្នំរូបនេះធ្លាប់ត្រូវបានដកហូតតំណែងម្ដងរួចហើយកាលពីខែកក្កដា ឆ្នាំ 2019 ក្រោយទទួលបានការតែងតាំងជាស្នំឯកបាន 3 ខែ ព្រោះតែ «មិនស្មោះត្រង់» និង «មានហិច្ឆតា» ដណ្ដើមតំណែងរបស់មហេសី Suthida។

Sinneenat ទទួលបានការតែងតាំងជាស្នំឯកជាថ្មី បន្ទាប់ពីត្រូវបានដកតំណែងអស់រយៈពេលជិត 1 ឆ្នាំ។ ចាប់តាំងពីពេលនោះមក ស្នំឯករូបនេះតែងតែបង្ហាញខ្លួននៅក្នុងព្រឹត្តិការណ៍នានាក្នុងទីសាធារណៈ។ ថ្មីៗនេះ ព្រះស្នំ Sinneenat ក៏ត្រូវបានតែងតាំងជាទីប្រឹក្សារងនៅក្នុងគណៈកម្មការថែទាំសុខភាពរបស់អ្នកទោសដែលមហាក្សត្រជាអ្នកបង្កើតឡើង។ ព្រះស្នំនេះក៏បង្ហាញខ្លួនក្បែរមហាក្សត្រថៃ ខណៈកំពុងបោសសម្អាតពន្ធនាគារមួយកាលពីដើមខែនេះផងដែរ ដែលនេះត្រូវបានគេមើលឃើញថា ដើម្បីស្ដារកិត្តិយសរបស់រាជវាំងថៃឡើងវិញ៕

ប្រភព៖ Daily Mail

January 27, 2021

Author: សឿន សំណាង