សឿន សំណាង - La Reine Media

Jeff Bezos លាលែងពីតំណែង CEO របស់ Amazon

ការលាលែងពីតំណែង CEO របស់ Jeff Bezos នឹងត្រូវបានធ្វើឡើងនៅពេលដែលក្រុមហ៊ុន Amazon កំពុងស្ថិតក្នុងសម័យកាលរីកចម្រើនបំផុត។

សារព័ត៌មាន Bloomberg ទើបតែបានរាយការណ៍ថា ស្ថាបនិករបស់ Amazon គឺលោក Jeff Bezos នឹងចាកចេញពីតំណែង CEO របស់ក្រុមហ៊ុននេះនៅក្នុងត្រីមាសទីបី ឆ្នាំ 2021 ហើយអ្នកចូលមកជំនួសលោក Bezos នោះគឺ Andy Jassy ដែលកំពុងគ្រប់គ្រងផ្នែក cloud-computing របស់ Amazon។

Jassy វ័យ 53 ឆ្នាំ ជាច្រើនឆ្នាំមកនេះ ត្រូវបានគេយល់ថាជាមនុស្សម្នាក់ដែលមានសក្ដានុពលដែលអាចជំនួសលោក Bezos បាន។ លទ្ធភាពនេះកាន់តែត្រូវបានបញ្ជាក់ នៅពេលបេក្ខភាពដែលមានសក្ដានុពលម្នាក់ទៀតគឺ Jeff Wilke ដែលបច្ចុប្បន្នជានាយកផ្នែកអតិថិជន បានប្រកាសថានឹងចាកចេញពីក្រុមហ៊ុននេះ។

Bezos អាយុ 57 ឆ្នាំ បានដឹកនាំ Amazon អស់រយៈពេល 25 ឆ្នាំ រាប់ចាប់តាំងពីត្រូវបានបង្កើតឡើង។ ក្រោយចាកចេញពីតំណែង CEO លោក Bezos នឹងក្លាយជាប្រធានរបស់ក្រុមហ៊ុននេះ។

ការផ្លាស់ប្ដូរខាងលើ ត្រូវបានធ្វើឡើងចំពេលដែល Amazon កំពុងស្ថិតក្នុងស្ថានភាពល្អប្រសើរជាទីបំផុត ដោយសារតែ Covid-19។ Jassy ដែលបានបម្រើការនៅ Amazon ចាប់ពីឆ្នាំ 1997 ទំនងជានឹងដឹកនាំក្រុមហ៊ុនទៅតាមគន្លងបច្ចុប្បន្ន៕

ប្រភព៖ Bloomberg

February 3, 2021

ភ្ញាក់ដឹងខ្លួនឡើង ស្រាប់តែ Covid-19 រាលដាលពេញពិភពលោក ខណៈខ្លួនឯងអត់ដឹងអីសោះ

Joseph Flavill អាយុ 19 ឆ្នាំ មិនបានដឹងអ្វីសោះអំពី Covid-19 ដែលបាន និងកំពុងរាតត្បាតពេញពិភពលោក នៅពេលបានដឹងខ្លួនឡើងវិញក្រោយការសន្លប់រយៈពេល 10 ខែ ដោយសារគ្រោះថ្នាក់ចរាចរណ៍ បើទោះជាកំលោះរូបនេះបានឆ្លងវីរុសពីរលើកមកហើយក៏ដោយ។

កំលោះ Joseph Flavill ត្រូវបានរថយន្តបុកពេញ្មួយទំហឹងពេលកំពុងដើរនៅក្នុងទីរួមស្រុក Burton upon Trent ក្នុងតំបន់ Staffordshire ប្រទេសអង់គ្លេសកាលពីថ្ងៃទី 1 មីនា ឆ្នាំ 2020 ពោលគឺ 3 សប្ដាហ៍មុនពេលអង់គ្លេសដាក់បំរាមគោចរទូទាំងប្រទេសលើកដំបូង។ កំលោះនេះធ្លាក់ក្នុងសភាពបាត់បង់ស្មារតីអស់ជាច្រើនខែព្រោះត្រូវរបួសដល់ខួរក្បាល ប៉ុន្តែថ្មីៗនេះ Joseph ចាប់ផ្ដើមដឹងខ្លួន និងមានប្រតិកម្ម។

«ក្មួយខ្ញុំមិនដឹងអ្វីទាំងអស់អំពីរោគរាតត្បាតនៅពេលវាត្រូវសន្លប់ជាង 10 ខែមកនេះ។ ពេលនេះ វាចាប់ផ្ដើមដឹងខ្លួនឡើងវិញហើយ ប៉ុន្តែខ្ញុំមិនដឹងថា វាដឹងអ្វីខ្លះនោះទេ» Sally Flavill Smith ដែលជាម្ដាយមីងរបស់ Joseph រៀបរាប់។ «ខ្ញុំមិនប្រាកដថា Joseph យល់នូវអ្វីដែលយើងកំពុងតែឆ្លងកាត់ដែរ ឬយ៉ាងណា»។

Sally ឱ្យដឹងថា គ្រួសារបានព្យាបាលពន្យល់តាមរយៈការហៅទូរស័ព្ទជាវីដេអូថា ពួកគេមិនអាចមកនៅក្បែរ Joseph បាន ដោយសារតែបំរាមគោចរដើម្បីកាត់បន្ថយការឆ្លងរាលដាលនៃវីរុស Covid-19។ «ពេលអាក្មួយខ្ញុំដឹងខ្លួន វាមិនបានដឹងថា ហេតុអ្វីបានជាវានៅទីនោះ។ ពួកយើងបានព្យាយាមនិយាយបកស្រាយតាមទូរស័ព្ទ។

Joseph Flavill ជាមនុស្សស្វាហាប់ និងចូលចិត្តលេងកីឡា

Joseph បានចាប់ផ្ដើមកម្រើកដៃជើង បិទបើកភ្នែក និងញញឹម នៅពេលក្រុមគ្រួសារ និងមិត្តភក្ដិសួរនាំ។ អ្នកស្រី Sally និយាយថា ក្មួយរបស់គាត់អាចធ្វើតាមអ្វីដែលពួកគេបានស្នើ ដូចជាយកដៃប៉ះត្រចៀកឆ្វេងនិងស្ដាំង លើកដៃជើង និងឆ្លើយថាយល់ព្រម ឬមិនយល់ព្រម តាមរយៈការធ្មេច និងបើកភ្នែក។ ស្នាមញញឹមដំបូងរបស់ Joseph បានធ្វើឱ្យគ្រប់គ្នាស្រក់ទឹកភ្នែក។

Joseph ក៏ធ្លាប់បានឆ្លង Covid-19 ចំនួនពីរលើកក្នុងពេលសម្រាកព្យាបាលនៅមន្ទីរពេទ្យ ប៉ុន្តែបានជាសះស្បើយហើយ។ អ្នកស្រី Sharon ម្ដាយរបស់ Jeseph ធ្លាប់ទទួលបានការអនុញ្ញាតឱ្យចូលមកមើលកូនក្នុងថ្ងៃខួបកំណើតលើកទី 19 កាលពីខែធ្នូ ឆ្នាំ 2020 ប៉ុន្តែ ត្រូវរក្សាគម្លាត និងពាក់ឈុតការពារវីរុស។

Sally រៀបរាប់ប្រាប់ថា៖ «ពេលនោះ Joseph មិនដឹងអ្វីទាំងអស់ ហើយខ្ញុំគិតថា ម្ដាយរបស់វាបារម្ភខ្លាំងណាស់ ព្រោះមិនដឹងថា កូនប្រុសរបស់គាត់នៅស្គាល់គាត់ដែរ ឬអត់។ ម្ដាយ Joseph ត្រូវរង់ចាំអស់ជាច្រើនខែដើម្បីបានជួបកូនប្រុស»។

មុនពេលជួបគ្រោះថ្នាក់ Joseph គឺជាកំលោះដ៏ស្វាហាប់ និងចូលចិត្តលេងកីឡា។ ក្នុងយុទ្ធនាការស្វែងរកមូលនិធិដើម្បីជួយដល់ Joseph ក្រុមគ្រួសារទទួលបានប្រាក់ឧបត្ថម្ភជាង 30,000 ផោន (41,000 ដុល្លារអាមេរិក) សម្រាប់ការព្យាបាល និងថែទាំកូនប្រុសរបស់ពួកគេ៕

ប្រភព៖ Guardian

February 3, 2021

អគ្គមេបញ្ជាការកងទ័ពមីយ៉ានម៉ានិយាយថា «រដ្ឋប្រហារគឺជារឿងមិនអាចគេចបាន»

លោក Min Aung Hlaing អគ្គមេបញ្ជាការកងទ័ពមីយ៉ានម៉ា កាលពីថ្ងៃទី 2 កុម្ភៈបានប្រកាសថា ការដែលរដ្ឋាភិបាលរបស់លោកស្រី Suu Kyi ត្រូវបានផ្ដួលរំលំគឺជាប្រការដែល «មិនអាចចៀសវាងបាន» ហើយថា កងទ័ពគ្រាន់តែធ្វើទៅតាមច្បាប់ប៉ុណ្ណោះ។

កងទ័ពមីយ៉ានម៉ា កាលពីព្រឹកព្រលឹមថ្ងៃទី 1 មករា បានឆ្មក់ចូលចាប់ខ្លួនទីប្រឹក្សារដ្ឋ លោកស្រី Aung San Suu Kyi និងក្រុមមេដឹកនាំរដ្ឋាភិបាលរបស់បក្សសម្ព័ន្ធជាតិដើម្បីប្រជាធិបតេយ្យ (NLD) រួមនឹងក្រុមតំណាងរាស្ត្រប្រមាណ 400 នាក់ទៀត ជាការចាប់ផ្ដើមនៃអំពើរដ្ឋប្រហារ។

លោក Min Aung Hlaing ត្រូវបានប្រគល់ «សិទ្ធិប្រើប្រាស់ច្បាប់ សិទ្ធិរកយុត្តិធម៌ និងអនុវត្តច្បាប់» បាន និងកំពុងនាំមីយ៉ានម៉ាត្រលប់ទៅមកកាន់របបសឹក ក្រោយការពិសោធលទ្ធិប្រជាធិបតេយ្យអស់រយៈពេល 10 ឆ្នាំ។ ក្នុងសេចក្ដីថ្លែងការណ៍ដំបូងបន្ទាប់ពីបានធ្វើរដ្ឋប្រហារ លោក Hlaing អះអាងថា ការដែលកងទ័ពចូលមកគ្រប់គ្រងប្រទេសគឺជារឿង «ស្របច្បាប់» ដោយសារតែអាជ្ញាធរមិនអាចដោះស្រាយបញ្ហាដែលពួកគេកើតទុក្ខមិនសុខចិត្តអំពីការបោះឆ្នោត។

លោក Hlaing ថ្លែងថា៖ «ក្រោយពីការស្នើជាច្រើនលើក នេះគឺជាជម្រើសដែលមិនអាចគេចរួច ហើយនោះគឺជាមូលហេតុដែលយើងត្រូវជ្រើសរើស»។

នៅរដ្ឋធានី ណៃពីដោ ក្រុមទាហានប្រដាប់អាវុធកំពុងត្រូវបានដាក់ពង្រាយនៅខាងក្រៅអគារសម្រាប់តំណាងរាស្ត្រមួយកន្លែង។ តំណាងរាស្ត្រម្នាក់របស់បក្ស NLD បានអធិប្បាយថា ទីនេះដូចទៅនឹង «មន្ទីរឃុំឃាំងបើកចំហ» យ៉ាងដូច្នោះដែរ។

តំណាងរាស្ត្រម្នាក់របស់បក្ស NLD បានប្រាប់ថា លោកស្រី Aung San Suu Kyi កំពុងត្រូវបានឃុំខ្លួនក្នុងគេហដ្ឋានរបស់លោកស្រី នៅទីក្រុង ណៃពីដោ។ Kyi Toe ដែលជាបុគ្គលិកផ្នែកសារព័ត៌មានរបស់ NLD ក៏បានប្រាប់ថា អ្នកជិតខាងបានឃើញលោកស្រី Suu Kyi ស្ថិតនៅក្នុងគេហដ្ឋានរបស់លោកស្រីកាលពីព្រឹកថ្ងៃទី 2 កុម្ភៈ។ ចំណែក អ្នកវិភាគ Khim Zaw Win នៅទីក្រុង Yangon បានអះអាងថា លោកស្រីទំនងជាមានសុវត្ថិភាព។ អ្នកវិភាគរូបនេះបញ្ជាក់ថា៖ «ព័ត៌មានទាំងអស់សុទ្ធតែបានបង្ហាញថា លោកស្រីកំពុងមានសុវត្ថិភាព»។

បច្ចុប្បន្ន ប្រទេសមីយ៉ានម៉ា កំពុងត្រូវបានគ្រប់គ្រង និងដឹកនាំដោយឧត្ដមសេនីយ៍ Min Aung Hlaing ដែលជាអគ្គមេបញ្ជាការកងទ័ពរបស់មីយ៉ានម៉ា បើទោះជាអតីតឧត្តមសេនីយ៍ Myint Swe កំពុងគ្រប់គ្រងតំណែងប្រធានាធិបតីក៏ដោយ។

ប្រធានាធិបតីអាមេរិក Joe Biden បានថ្កោលទោស និងអំពាវនាវឱ្យសហគមន៍អន្តរជាតិរួមសហការគ្នាដាក់សម្ពាធ ដើម្បីបង្ខំឱ្យកងទ័ពមីយ៉ានម៉ាបោះបង់អំណាចជាបន្ទាន់ និងដោះលែងក្រុមមន្ត្រីដែលត្រូវបានចាប់ខ្លួននៅក្នុងអំពើរដ្ឋប្រហាររបស់កងទ័ព។ លោក Biden ក៏បានព្រមានអំពីការដាក់ទណ្ឌកម្មជាថ្មីទៅលើមីយ៉ានម៉ាដែលអាមេរិកបានដកចេញកាលពី 10 ឆ្នាំមុន៕

ប្រភព៖ AFP

February 3, 2021

លោកស្រី Aung San Suu Kyi ត្រូវបានឃុំខ្លួនក្នុងផ្ទះដូចមុន

តំណាងរាស្ត្រម្នាក់នៃគណបក្ស NLD របស់លោកស្រី Aung San Suu Kyi បានឱ្យដឹងថា លោកស្រីទីប្រឹក្សារដ្ឋរូបនេះកំពុងត្រូវឃុំខ្លួនក្នុងគេហដ្ឋាននៅរដ្ឋធានី ណៃពីដោ និងត្រូវបានគេជឿថា មានសុវត្ថិភាព។

«យើងត្រូវបានគេប្រាប់ថា សូមកុំឱ្យព្រួយ ប៉ុន្តែ យើងនៅតែមានការបារម្ភ។ បើសិនជាអាចមើលឃើញរូបថតមួយសន្លឹក នោះនឹងស្ងប់ចិត្តបន្តិច» តំណាងរាស្ត្រម្នាក់របស់គណបក្សសម្ព័ន្ធជាតិដើម្បីប្រជាធិបតេយ្យ (NLD) របស់លោកស្រី Aung San Suu Kyi ឱ្យដឹងដូច្នេះ។

Kyi Toe ដែលជាបុគ្គលិកផ្នែកសារព័ត៌មានរបស់ NLD ក៏បានប្រាប់ថា អ្នកជិតខាងបានឃើញលោកស្រី Suu Kyi ស្ថិតនៅក្នុងគេហដ្ឋានរបស់លោកស្រីកាលពីព្រឹកថ្ងៃទី 2 កុម្ភៈ។ ចំណែក អ្នកវិភាគ Khim Zaw Win នៅទីក្រុង Yangon បានអះអាងថា លោកស្រីទំនងជាមានសុវត្ថិភាព។ អ្នកវិភាគរូបនេះបញ្ជាក់ថា៖ «ព័ត៌មានទាំងអស់សុទ្ធតែបានបង្ហាញថា លោកស្រីកំពុងមានសុវត្ថិភាព»។

Herve Lemahieu អ្នកជំនាញមកពីវិទ្យាស្ថាន Lowy របស់អូស្ត្រាលី យល់ថា កងទ័ពមីយ៉ានម៉ាទំនងជាមានយុទ្ធសាស្ត្រក្នុងការរាំងខ្ទប់ព័ត៌មានអំពីលោកស្រី Suu Kyi។ «ខ្ញុំគិតថា ពួកគេមិនចង់ឱ្យប្រជាជនមើលឃើញលោកស្រី។ លោកស្រីកំពុងត្រូវបានឃុំខ្លួននៅ ណៃពីដោ ដែលឆ្ងាយពីតំបន់ប្រជុំជន និងជាកន្លែងដែលមនុស្សមិនអាចចេញធ្វើបាតុកម្ម។ ខ្ញុំជឿថា នេះជាជម្រើសដែលមានចេតនា» Herve Lemahieu បន្ថែមដូច្នេះ។

Herve Lemahieu សង្កត់ធ្ងន់ថា ការធានាសុវត្ថិភាព និងសុខភាពចំពោះលោកស្រី Suu Kyi នឹងនាំមកនូវផលប្រយោជន៍ដល់កងទ័ព។ «ក្រុមមន្ត្រីជាន់ខ្ពស់បានដឹងថា បើសិនជាលោកស្រីធ្លាក់ខ្លួនឈឺ ឬបាត់បង់ជីវិតក្នុងពេលត្រូវបានចាប់ខ្លួន នោះគ្រប់គ្នានឹងសង្ស័យថា មានទង្វើអាក្រក់ ដែលនេះអាចបញ្ឆេះកំហឹង និងការប្រតិកម្មខ្លាំងក្លាយជាទីបំផុត»។

កងទ័ពមីយ៉ានម៉ា កាលពីព្រឹកព្រលឹមថ្ងៃទី 1 មករា បានឆ្មក់ចូលចាប់ខ្លួនលោកស្រី Suu Kyi រួមនឹងប្រធានាធិបតី Win Myint និងថ្នាក់ដឹកនាំដទៃទៀតរបស់បក្ស NLD ដោយយកលេសថា មានអំពើលួចបន្លំសន្លឹកឆ្នោតក្នុងការបោះឆ្នោតកាលពីចុងឆ្នាំ 2020 ដែលពេលនោះ NLD ជាបក្សជាប់ឆ្នោត។ កងទ័ព ក្រោយមកក៏បានឡើងកាន់កាប់អំណាចពេញដៃ និងប្រកាសដាក់ប្រទេសឱ្យស្ថិតក្នុងភាពអាសន្នរយៈពេលមួយឆ្នាំ។

បច្ចុប្បន្ន ប្រទេសមីយ៉ានម៉ា កំពុងត្រូវបានគ្រប់គ្រង និងដឹកនាំដោយឧត្ដមសេនីយ៍ Min Aung Hlaing ដែលជាអគ្គមេបញ្ជាការកងទ័ពរបស់មីយ៉ានម៉ា បើទោះជាអតីតឧត្តមសេនីយ៍ Myint Swe កំពុងគ្រប់គ្រងតំណែងប្រធានាធិបតីក៏ដោយ៕

ប្រភព៖ AFP

February 3, 2021

ទិដ្ឋភាពខ្លះៗនៅទីក្រុងធំៗរបស់មីយ៉ានម៉ា ក្នុងគ្រារដ្ឋប្រហារកើតឡើង

ជីវភាពរស់នៅរបស់ពលរដ្ឋនាទីក្រុង Yangon ដែលជាទីក្រុងធំជាងគេលំដាប់ទីបីនៃប្រទេសមីយ៉ានម៉ា ថ្ងៃនេះមានសភាពស្ងប់ស្ងាត់ជាងធម្មតា ក្រោយពីមានការចាប់ខ្លួនលោកស្រី Aung San Suu Kyi ដែលជាមេដឹកនាំបក្សកាន់អំណាច។

ថ្វីបើមានភាពចលាចល ប៉ុន្តែ ផ្សារនានានៅក្នុងទីក្រុង Yangon នៅតែបន្តបើក ហើយអ្នកលក់ដូរក្បែរចិញ្ចើមផ្លូវក៏នៅតែធ្វើសកម្មភាព ចំណែករថយន្តក្រុង និងតាក់ស៊ីក៏នៅតែដំណើរការដូចធម្មតា។

តាមការសង្កេតរបស់ក្រុមហ៊ុនអ្នកយកព័ត៌មាន ពុំទាន់មានសញ្ញាណាមួយបង្ហាញច្បាស់ថា ស្ថានការណ៍កំពុងឈានទៅរកគ្រោះថ្នាក់ធ្ងន់ធ្ងរបំផុតនៅឡើយ។ ក៏ប៉ុន្តែ បរិយាកាសអសន្តិសុខដែលកើតឡើងដោយសារមានការដាក់ពង្រាយទាហាន និងប៉ូលិស ក្រោយការធ្វើរដ្ឋប្រហាររបស់កងទ័ព នៅតែបន្តកើតឡើង។

ព្រោះតែការភ័យខ្លាច ប្រជាជនក៏នាំគ្នាដកហូតទង់ជ័យរបស់គណបក្សសម្ព័ន្ធជាតិដើម្បីប្រជាធិបតី NLD របស់លោកស្រី Aung San Suu Kyi ដែលពួកគេបានដោតនៅផ្ទះ និងនៅតាមអគារពាណិជ្ជកម្មនានា។ល។

សូមរំលឹកថា កងទ័ពមីយ៉ានម៉ា បានធ្វើរដ្ឋប្រហារទម្លាក់រដ្ឋាភិបាលនៃគណបក្សសម្ព័ន្ធដើម្បីប្រជាធិបតេយ្យ (NLD) របស់លោកស្រី Aung San Suu Kyi កាលពីព្រឹកព្រលឹមថ្ងៃទី 1មករា ឆ្នាំ 2021 និងកំពុងឡើងក្ដោបក្ដាប់អំណាចទាំងស្រុងនៅប្រទេសនេះ។ មូលហេតុដែលនាំឱ្យមានអំពើរដ្ឋប្រហារនេះ ត្រូវបានភាគីកងទ័ពនិយាយថា ការដែលខ្លួនចាញ់ឆ្នោតគឺមកពីមានអំពើលួចបន្លំសន្លឹកឆ្នោត នៅក្នុងការបោះឆ្នោតជាតិកាលពីចុងឆ្នាំ 2020៕

ប្រភព៖ AP

February 2, 2021

កងទ័ពមីយ៉ានម៉ាឃុំខ្លួនតំណាងរាស្ត្រ 400 នាក់ នៅក្នុងអគារសម្រាប់មន្ត្រីរដ្ឋការ

ក្រុមសមាជិកសភារបស់មីយ៉ានម៉ា មកពីបក្ស NLD នៅតែត្រូវបានឃុំខ្លួននៅក្នុងអគាររបស់រដ្ឋ ក្រោមការឃ្លាំមើលពីក្រុមទាហាននៅរដ្ឋធានី ណៃពីដោ (Naypyitaw) ក្រោយពីកងទ័ពធ្វើរដ្ឋប្រហារបានមួយថ្ងៃ។

តំណាងរាស្ត្រម្នាក់បានឱ្យដឹងថា លោក និងសមាជិកសភាប្រមាណជា 400 នាក់ អាចនិយាយគ្នាបាននៅខាងក្នុងអគាររដ្ឋមួយខ្នង និងអាចទាក់ទងជាមួយម្ចាស់ឆ្នោតតាមទូរស័ព្ទ ប៉ុន្តែមិនត្រូវបានអនុញ្ញាតឱ្យចាកចេញពីអគារដែលស្ថិតនៅក្នុងរដ្ឋធានី ណៃពីដោ នេះទេ។ តំណាងរូបនេះបន្តថា ក្រុមប៉ូលិសត្រូវបានដាក់ពង្រាយឱ្យយាមខាងក្នុងអគារ ចំណែកក្រុមទាហានឈរយាមនៅខាងក្រៅ។

អ្នកតាក់តែងច្បាប់ខាងលើក៏បានបញ្ជាក់ថា សមាជិកសភាទាំងឡាយដែលត្រូវបានឃុំខ្លួននេះ រួមមានសមាជិកនៃបក្សសម្ព័ន្ធជាតិដើម្បីប្រជាធិបតេយ្យ (NLD) របស់លោកស្រីទីប្រឹក្សារដ្ឋ Aung San Suu Kyi និងបក្សតូចៗមួយចំនួនទៀត។ ពួកគេបាត់បង់ដំណេកពេញមួយយប់ ព្រោះតែមានការព្រួយបារម្ភ ប៉ុន្តែ ពេលនេះ បានប្រសើរជាងមុនបន្តិចហើយ។

អ្នកតំណាងរាស្ត្ររូបនេះបានប្រាប់ថា លោកស្រីទីប្រឹក្សារដ្ឋ Aung San Suu Kyi មិនត្រូវបានឃុំខ្លួននៅក្នុងអគារជាមួយពួកគាត់ទេ។

គណបក្សសម្ព័ន្ធដើម្បីប្រជាធិបតេយ្យ (NLD) ដែលកំពុងត្រូវបានដណ្ដើមអំណាចរបស់ទីប្រឹក្សារដ្ឋនៃប្រទេសមីយ៉ានម៉ា លោកស្រី Aung San Suu Kyi ទទួលបាន 346 ក្នុងចំណោមអាសនៈចំនួន 412 នៅសភាជាតិ ក្រោយការបោះឆ្នោតនៅចុងឆ្នាំ 2020។ ប៉ុន្តែ កងទ័ពមីយ៉ានម៉ាបានចោទថា មានការលួចបន្លំសន្លឹកឆ្នោតចំនួនជាង 10 លានករណី និងស្នើឱ្យគណកម្មការរៀបចំការបោះឆ្នោត ប្រកាសបញ្ជីឈ្មោះអ្នកបោះឆ្នោតដើម្បីពិនិត្យឡើងវិញ ប៉ុន្តែត្រូវបានបដិសេធ។

ប្រការនេះហើយបានធ្វើកងទ័ពសម្រេចធ្វើរដ្ឋប្រហារ ដោយចាប់ខ្លួនលោកស្រី Suu Kyi លោកប្រធានាធិបតី Win Myint រួមនឹងថ្នាក់ដឹកនាំជាច្រើនរូបទៀតរបស់បក្ស NLD និងបានប្រកាសអាសន្នទូទាំងប្រទេសដើម្បីគ្រប់គ្រងអំណាចក្នុងរយៈពេលមួយឆ្នាំ។ ក្រោយមក កងទ័ពក៏បានដកតំណែងរដ្ឋមន្ត្រី និងអនុរដ្ឋមន្ត្រីចំនួន 24 រូបរបស់បក្ស NLD ហើយបានតែងតាំងជំនួសដោយមនុស្សចំនួន 11 នាក់ ឱ្យកាន់កាប់ក្រសួងមួយចំនួន ដូចជា ក្រសួងហិរញ្ញវត្ថុ សុខាភិបាល ព័ត៌មាន ការបរទេស និងក្រសួងការពារជាតិ រួមនឹងក្រសួងមហាផ្ទៃនិងការពារព្រំដែនផងដែរ៕

ប្រភព៖ AP

February 2, 2021

គេភ័យនឹងរដ្ឋប្រហារ ឯនាងជាគ្រូបង្វឹកកីឡា បែរជារាំយ៉ាងសង្ហាតាមចង្វាក់ភ្លេងទៅវិញ

នារីជនជាតិមីយ៉ានម៉ាម្នាក់មានឈ្មោះថា Wai កំពុងតែធ្វើឱ្យកក្រើកបណ្ដាញសង្គម ដោយសារតែវីដេអូដែលបង្ហាញថា នាងរាំតាមចង្វាក់ភ្លេង aerobic យ៉ាងក្លាហាន ក្នុងពេលកងទ័ពមីយ៉ានម៉ាកំពុងធ្វើរដ្ឋប្រហារ។

ក្រូបង្វឹកផ្នែកលំហាត់ប្រាណ ឈ្មោះ Khing Hnin Wai កាលពីថ្ងៃទី 1 មករា បានបង្ហោះវីដេអូនៅលើ Facebook ដែលបង្ហាញអំពីសកម្មភាពដែលនាងកំពុងរាំហាត់ប្រាណនៅខាងក្រៅអគារមួយ ក្នុងគ្រាដែលក្បួនរថយន្តរបស់កងទ័ពកំពុងធ្វើដំណើរ និងទិដ្ឋភាពរណាំងដែកកំពុងត្រូវបានដាក់បញ្ឈរក្រោយខ្នងរបស់នាង។ នេះក៏ជាពេលដែលកងទ័ពមីយ៉ានម៉ា កំពុងធ្វើរដ្ឋប្រហារ និងចាប់ខ្លួនទីប្រឹក្សារដ្ឋ លោកស្រី Aung San Suu Kyi និងប្រធានាធិបតី រួមនឹងថ្នាក់ដឹកនាំជាន់ខ្ពស់ជាច្រើនរូបទៀតរបស់រដ្ឋាភិបាល។

ក្នុងរយៈពេលប្រហែល 3 នាទី នាង Wai ហាក់មិនបានដឹងអំពីហេតុការណ៍មិនប្រក្រតីដែលកំពុងកើតឡើងនៅក្រោយខ្នង ហើយនាងនៅតែបន្តចាក់ក្បាច់រាំតាមចង្វាក់តន្ត្រីធ្វើព្រងើយ។ មនុស្សជាច្រើនមានការសង្ស័យអំពីវីដេអូនេះ ប៉ុន្តែ ក្រោយមក នាង Wai បានបញ្ជាក់ឱ្យដឹងថា នាងពិតជាគ្រូបង្វឹកដែលបានថតវីដេអូរាំតាមចង្វាក់ aerobic នៅទីតាំងនេះប្រាកដមែន។

វីដេអូរបស់ Wai ដែលបានបង្ហោះនៅលើ Facebook ទទួលបានការចុចចូលចិត្តជាង 36,000 លើក និងមតិជាង 1,600 ដង រួមនឹងការចែករំលែកជាង 12,000 ដងផងដែរ។

សូមបញ្ជាក់ថា គណបក្សសម្ព័ន្ធដើម្បីប្រជាធិបតេយ្យ (NLD) ដែលកំពុងកាន់អំណាចរបស់ទីប្រឹក្សារដ្ឋនៃប្រទេសមីយ៉ានម៉ា លោកស្រី Aung San Suu Kyi ទទួលបាន 346 ក្នុងចំណោមអាសនៈចំនួន 412 នៅសភាជាតិ ក្រោយការបោះឆ្នោតនៅចុងឆ្នាំ 2020។ ប៉ុន្តែ កងទ័ពមីយ៉ានម៉ាបានចោទថា មានការលួចបន្លំសន្លឹកឆ្នោតចំនួនជាង 10 លានករណី និងស្នើឱ្យគណកម្មការរៀបចំការបោះឆ្នោត ប្រកាសបញ្ជីឈ្មោះអ្នកបោះឆ្នោតដើម្បីពិនិត្យឡើងវិញ ប៉ុន្តែត្រូវបានបដិសេធ។

ប្រការខាងលើនេះហើយ ជាលេសមួយដែលត្រូវបានកងទ័ពប្រើប្រាស់ដើម្បីរដ្ឋប្រហារ និងបានប្រកាសអាសន្នទូទាំងប្រទេសដើម្បីគ្រប់គ្រងអំណាចក្នុងរយៈពេលមួយឆ្នាំ។ ក្រោយមក កងទ័ពក៏បានដកតំណែងរដ្ឋមន្ត្រី និងអនុរដ្ឋមន្ត្រីចំនួន 24 រូបរបស់បក្ស NLD ហើយបានតែងតាំងជំនួសដោយមនុស្សចំនួន 11 នាក់ ឱ្យកាន់កាប់ក្រសួងមួយចំនួន ដូចជា ក្រសួងហិរញ្ញវត្ថុ សុខាភិបាល ព័ត៌មាន ការបរទេស និងក្រសួងការពារជាតិ រួមនឹងក្រសួងមហាផ្ទៃនិងការពារព្រំដែនផងដែរ៕

https://www.youtube.com/watch?v=Uc-v7y1wDDk

ប្រភព៖ Sputnik

February 2, 2021

ក្រុមប្រឹក្សាសន្តិសុខនៃអង្គការសហប្រជាជាតិ បើកកិច្ចប្រជុំបន្ទាន់អំពីរដ្ឋប្រហាររបស់កងទ័ពមីយ៉ានម៉ា

ក្រុមប្រឹក្សាសន្តិសុខនៃអង្គការសហប្រជាជាតិនឹងបើកកិច្ចប្រជុំបន្ទាន់មួយនៅក្នុងថ្ងៃនេះ (2កុម្ភៈ) ដើម្បីពិភាក្សាអំពីស្ថានភាពនៅមីយ៉ានម៉ា ក្រោយរដ្ឋប្រហាររបស់កងទ័ពប្រទេសនេះ។

កិច្ចប្រជុំសម្ងាត់ដែលធ្វើទៅតាមអនឡាញត្រូវបានសមាជិកនៃក្រុមប្រឹក្សាសន្តិសុខរបស់អង្គការសហប្រជាជាតិអនុម័តយល់ព្រមកាលពីថ្ងៃទី 1 កុម្ភៈ។ Christine Schraner Burgener ប្រេសិតពិសេសទទួលបន្ទុកលើប្រទេសមីយ៉ានម៉ា និងជាអ្នកកាទូតនៃប្រទេសស្វីស តាមផែនការ នឹងប្រកាសដំណឹងអំពីស្ថានការណ៍ថ្មីបំផុតនៅក្នុងកិច្ចប្រជុំ។

សូមរំលឹកថា កងទ័ពមីយ៉ានម៉ាបានឡើងកាន់កាប់អំណាចកាលពីថ្ងៃទី 1 មករាកន្លងទៅ បន្ទាប់ពីបានធ្វើរដ្ឋប្រហារមិនបង្ហូរឈាម ដោយបានចាប់ខ្លួនទីប្រឹក្សារដ្ឋ លោកស្រី Aung San Suu Kyi រួមនឹងក្រុមមេដឹកនាំជាន់ខ្ពស់ដទៃជាច្រើនរូបទៀតនៃរដ្ឋាភិបាលមីយ៉ានម៉ា ធ្វើឱ្យពិភពលោកមានការភ្ញាក់ផ្អើលជាខ្លាំង និងមានការថ្កោលទោសពីសំណាក់អន្តរជាតិផងដែរ។

អងគ្លេសដែលជាប្រទេសកំពុងកាន់កាប់តំណែងប្រធាននៃក្រុមប្រឹក្សាសន្តិសុខបន្តវេននៅក្នុងខែកុម្ភនេះ គ្រោងនឹងបើកកិច្ចប្រជុំមួយស្ដីអំពីប្រទេសមីយ៉ានម៉ាក្នុងសប្ដាហ៍នេះ ប៉ុន្តែកិច្ចប្រជុំនឹងត្រូវបានធ្វើឡើងមុនកាលកំណត់ ដោយសារមានការចាំបាច់ខ្លាំង។

អគ្គរាជទូតអង់គ្លេសប្រចាំនៅអង្គការសហប្រជាជាតិ (UN) លោកស្រី Babara Woodward បានឱ្យដឹងថា លោកស្រីមានសង្ឃឹមថា នឹងមាន «កិច្ចពិភាក្សាដែលប្រកបដោយការស្ថាបនាបំផុតនិយាយអំពីមីយ៉ានម៉ា និងពិនិត្យរាល់វិធានការចាំបាច់ដោយយោងទៅតាមបំណងរបស់ប្រជាជនដែលនឹងបង្ហាញនៅក្នុងការបោះឆ្នោត ក៏ដូចជាការស្នើឱ្យដោះលែងក្រុមមេដឹកនាំស៊ីវិល»។

លោកស្រី Babara បញ្ជាក់ថា «បច្ចុប្បន្ន មិនទាន់មានវិធានការជាក់លាក់ណាមួយដើម្បីចាត់ការបញ្ហា (រដ្ឋប្រហារនៅមីយ៉ានម៉ា) នេះនៅឡើយ។ ប្រការសំខាន់គឺសហគមន៍អន្តរជាតិត្រូវតែឯកភាពគ្នា» នេះបើតាម Stephane Dujarric អ្នកនាំពាក្យរបស់ UN បាននិយាយក្នុងសន្និសីទសារព័ត៌មានមួយកាលពីពេលថ្មីៗនេះ។

សូមរំលឹកថា គណបក្សសម្ព័ន្ធដើម្បីប្រជាធិបតេយ្យ (NLD) ដែលកំពុងកាន់អំណាចរបស់ទីប្រឹក្សារដ្ឋនៃប្រទេសមីយ៉ានម៉ា លោកស្រី Aung San Suu Kyi ទទួលបាន 346 ក្នុងចំណោមអាសនៈចំនួន 412 នៅសភាជាតិ ក្រោយការបោះឆ្នោតនៅចុងឆ្នាំ 2020។ ប៉ុន្តែ កងទ័ពមីយ៉ានម៉ាបានចោទថា មានការលួចបន្លំសន្លឹកឆ្នោតចំនួនជាង 10 លានករណី និងស្នើឱ្យគណកម្មការរៀបចំការបោះឆ្នោត ប្រកាសបញ្ជីឈ្មោះអ្នកបោះឆ្នោតដើម្បីពិនិត្យឡើងវិញ ប៉ុន្តែត្រូវបានបដិសេធ។

ប្រការនេះអាចជាលេសមួយដែលត្រូវបានកងទ័ពប្រើប្រាស់ដើម្បីចាប់ខ្លួនលោកស្រី Suu Kyi លោកប្រធានាធិបតី Win Myint រួមនឹងថ្នាក់ដឹកនាំជាច្រើនរូបទៀតរបស់បក្ស NLD និងបានប្រកាសអាសន្នទូទាំងប្រទេសដើម្បីគ្រប់គ្រងអំណាចក្នុងរយៈពេលមួយឆ្នាំ។ ក្រោយមក កងទ័ពក៏បានដកតំណែងរដ្ឋមន្ត្រី និងអនុរដ្ឋមន្ត្រីចំនួន 24 រូបរបស់បក្ស NLD ហើយបានតែងតាំងជំនួសដោយមនុស្សចំនួន 11 នាក់ ឱ្យកាន់កាប់ក្រសួងមួយចំនួន ដូចជា ក្រសួងហិរញ្ញវត្ថុ សុខាភិបាល ព័ត៌មាន ការបរទេស និងក្រសួងការពារជាតិ រួមនឹងក្រសួងមហាផ្ទៃនិងការពារព្រំដែនផងដែរ។

សហរដ្ឋអាមេរិក អូស្ត្រាលី និងអង្គការសហប្រជាជាតិ បានចេញសេចក្ដីប្រកាសថ្កោលទោសយ៉ាងខ្លាំងក្លា និងបានស្នើឱ្យកងទ័ពមីយ៉ានម៉ា ដោះលែងក្រុមមនុស្សដែលត្រូវបានចាប់ខ្លួននៅក្នុងអំពើរដ្ឋប្រហារកាលពីម្សិលមិញ (1 កុម្ភៈ)។ ចំណែកប្រទេសចិនវិញ ក៏បានអំពាវនាវឱ្យភាគីពាក់ពាន់ដោះស្រាយតាមផ្លូវច្បាប់ ក៏ដូចជារក្សាស្ថិរភាពនយោបាយ និងសង្គម៕

ប្រព៖ AFP

February 2, 2021

ភាគខាងកើតនៃសហរដ្ឋអាមេរិក ត្រូវលិចលង់ក្នុងព្យុះព្រឹល!

ព្យុះព្រឹលបានបង្កឱ្យមានភាពវឹកវរនៅតំបន់មាត់សមុទ្រភាគខាងកើតនៃសហរដ្ឋអាមេរិក បណ្ដាលឱ្យជើងហោះហើររាប់ពាន់ត្រូវបានលុបចោល សាលារៀនត្រូវបិទទ្វារ ខណៈយុទ្ធនាការចាក់វ៉ាក់សាំង Covid-19 ក៏ត្រូវបានពន្យារពេល។

នាយកដ្ឋានគ្រប់គ្រងអាកាសធាតុជាតិរបស់សហរដ្ឋអាមេរិក (NWS) បានចេញសេចក្ដីព្រមានឱ្យមានការប្រុងប្រយ័ត្នខ្ពស់ សម្រាប់តំបន់ចាប់ពី Virginia ដល់ Maine ដែលមានប្រជាជនរាប់សិបលាននាក់កំពុងរស់នៅ ក្នុងគ្រាដែលព្យុះព្រឹលដែលមានកម្លាំងខ្យល់ខ្លាំងបោកបក់ក្នុងល្បឿន 80 គម/ម៉ោង វាយប្រហារទៅលើតំបន់មាត់សមុទ្រភាគខាងកើតរបស់ប្រទេសនេះ។

ទីក្រុង New York បានចេញសេចក្ដីប្រកាសអាសន្ន ក្នុងនោះរួមមាន ការកាត់បន្ថយការធ្វើដំណើរដែលមិនចាំបាច់ ការបិទទ្វារសាលារៀន សិស្សសាលាត្រូវរៀនពីចម្ងាយ ចំណែកការចាក់វ៉ាក់សាំងក៏ត្រូវបានពន្យារពេល ក្នុងគ្រាដែលព្រឹលបានធ្លាក់កម្រាស់ដល់ 60 សម។

រថយន្តពង្រាយអំបិលដើម្បីទប់ទល់នឹងភាពរអិល និងគ្រឿងចក្រជាច្រើនដែលមានជំនាញក្នុងការដោះស្រាយបញ្ហាព្រឹល កំពុងតែធ្វើការយ៉ាងមមាញឹកនៅតាមដងផ្លូវក្នុងទីក្រុង New York។

ជើងហោះហើរជាង 1,600 ដែលត្រូវបានលុបចោល ភាគច្រើនគឺនៅឯព្រលានយន្តហោះក្នុងទីក្រុង New York, Boston, Philadelphia និងរដ្ឋធានីនៃប្រទេស។

យុទ្ធនាការចាក់វ៉ាក់សាំង Covid-19 នៅទីក្រុង New York ក៏ត្រូវបានពន្យារពេលនៅថ្ងៃទី 2 កុម្ភៈ។ «នេះគឺជាស្ថានការណ៍គ្រោះថ្នាក់បំផុត ដែលគំរាមកំហែងដល់អាយុជីវិត» អភិបាលក្រុង New York លោក Andre Cuomo មានប្រសាសន៍។

យោងតាម NWS គិតត្រឹមម៉ោង 16 ថ្ងៃទី 1 ខែកុម្ភៈ ព្រឹលនៅឯឧទ្យាន Central Park ទីក្រុង New York មានកម្រាស់ 13 សម។ តាមការព្យាករ ព្រឹលនឹងបន្តធ្លាក់នៅព្រឹកថ្ងៃទី 2 កុម្ភៈ (ម៉ោងក្នុងស្រុក) ដែលនឹងនាំឱ្យកម្រាស់របស់វាអាចឡើងដល់ 50 សម មុនពេលព្យុះព្រឹលធ្វើដំណើរទៅទិសឦសាន ដោយឆ្លងកាត់តាម New England។

Matthew Wunsch ដែលជាអ្នកជំនាញរបស់ NWS និយាយថា៖ «ព្យុះព្រឹលនេះត្រូវបានព្យាករថានឹងជាព្យុះធំជាងគេមួយក្នុងប្រវត្តិសាស្ត្រនៃទីក្រុង New York»។

នៅរដ្ឋធានីវ៉ាស៊ីងតោន ជាកន្លែងដែលព្រឹលបានចាប់ផ្ដើមធ្លាក់តាំងពីថ្ងៃទី 31 មករា ប្រធានាធិបតី Joe Biden ក៏បានពន្យារពេលការធ្វើដំណើរទៅកាន់ក្រសួងការបរទេស ដោយសារតែអាកាសធាតុមិនអំណោយផល។ គម្រោងបើកសាលារៀនឡើងវិញនៅទីនេះក៏ត្រូវបានផ្អាកបណ្ដោះអាសន្ន។

ព្រឹលក៏បានវាយប្រហារទៅលើរដ្ឋ New Jersey, Philadelphia និង Connecticut ផងដែរ។ អាជ្ញាធរ New Jersey បានប្រកាសអាសន្ន និងបានបិទទ្វារសាលារៀន ជម្លៀសពលរដ្ឋ និងចេញបញ្ជាឱ្យប្រើប្រាស់ឧបករណ៍ជំនាញដើម្បីធានាសុវត្ថិភាពសាធារណៈ។

Philadelphia ក៏បានប្រកាសអាសន្នដោយសារព្យុះព្រឹលនេះ ព្រមទាំងបានបិទទ្វារសាលាក្រុងកាលពីថ្ងៃទី 1 កុម្ភៈ និងស្នើឱ្យប្រជាជនយករថយន្តចេញពីដងផ្លូវដែលមានព្រឹលក្រាស់ដើម្បីទុកផ្លូវឱ្យគ្រឿងចក្រជំនាញធ្វើការ។

ព្យុះព្រឹលបានវាយលុកចូលទៅក្នុងតំបន់ភ្នំរបស់រដ្ឋ California កាលពីសប្ដាហ៍មុន បណ្ដាលឱ្យមានភ្លៀងធ្លាក់ខ្លាំង និងព្រឹលកម្រាស់ជាង 182សម។ ព្យុះនេះបានធ្វើដំណើរទៅកាន់តំបន់ Midwest នាំឱ្យធ្លាក់ព្រឹលកម្រាស់ 20 សម នៅ Chicago៕

ប្រភព៖ AFP

February 2, 2021

បង្រាបទីតាំងផលិតវ៉ាក់សាំង Covid-19 ក្លែងក្លាយ ដែលធ្វើឡើងអំពីទឹកអំបិល និងលក់ក្នុងតម្លៃខ្ពស់

មនុស្សរាប់សិបនាក់ត្រូវបានចាប់ខ្លួន ក្រោយពីក្រុមប៉ូលិសចិនបានឆ្មក់ចូលបង្រាបទីតាំងមួយចំនួនដែលផលិត និងលក់វ៉ាក់សាំង Covid-19 ក្លែងក្លាយ។

ក្រុមជនដែលត្រូវបានចាប់ខ្លួននេះ បាន និងកំពុងផលិតវ៉ាក់សាំងប្រឆាំង Covid-19 ក្លែងក្លាយដែលធ្វើឡើងអំពីទឹកអំបិល និងលក់ក្នុងតម្លៃខ្ពស់។ សារព័ត៌មាន RT បានឱ្យដឹងថា ក្រុមមន្ត្រីមានសមត្ថកិច្ចបានបង្ហើបឱ្យដឹងថា បណ្ដាញផលិតវ៉ាក់សាំងល្មើសច្បាប់ទាំងនេះបានធ្វើសកម្មភាពអស់រយៈពេលជាច្រើនខែមកហើយ។

ប៉ូលិសបានធ្វើការស្រាវជ្រាវលើទីតាំងល្មើសច្បាប់មួយចំនួននៅរដ្ឋធានីប៉េកាំង ក៏ដូចជានៅក្នុងខេត្តចំនួនពីរទៀតគឺ Jiangsu និង Shandong ហើយក៏បានឈានដល់ការចាប់ខ្លួនមនុស្សចំនួន 80 នាក់ និងរឹបអូសបានបំពង់ថ្នាំប្រហែល 3,000 បំពង់ដែលផ្ទុកពេញដោយទឹកអំបិល។ ក្រុមប៉ូលិសក៏បានរកឃើញទីតាំងមួយចំនួនដែលផលិត និងលក់វ៉ាក់សាំងក្លែងក្លាយនេះដែរ។

ក្រុមជនល្មើសទាំងនេះ ត្រូវបានគេជៀថា រកបានប្រាក់យ៉ាងច្រើនសន្ធឹកពីការលក់ទឹកអំបិលដែលក្លាយជាវ៉ាក់សាំង ក្នុងតម្លៃខ្ពស់កប់ពពក។

ប្រទេសចិនបានអនុម័តឱ្យប្រើប្រាស់វ៉ាក់សាំងដែលត្រូវបានអភិវឌ្ឍដោយក្រុមហ៊ុនរដ្ឋ Sinovac និង Sinopharm សម្រាប់យុទ្ធនាការចាក់វ៉ាក់សាំង Covid-19 នៅទូទាំងប្រទេសដោយចាប់ផ្ដើមពីខែមករា។ ក្រុមហ៊ុនទាំងពីរខាងលើនេះ ដំបូងឡើយ បានឱ្យដឹងថា វ៉ាក់សាំងរបស់ពួកគេមានប្រសិទ្ធភាពជាង 78% ប៉ុន្តែ ក្នុងការពិសោធន៍នានាក្នុងដំណាក់កាលចុងក្រោយចំពោះបេក្ខភាពវ៉ាក់សាំង Sinovac នៅប្រេស៊ីល បានបង្ហាញថា វាមានប្រសិទ្ធភាពតែ 50.38% ប៉ុណ្ណោះ។

តាមការស្រង់ស្ថិតិ គិតមកដល់បច្ចុប្បន្ន វ៉ាក់សាំង Covid-19 ប្រមាណជា 24 លានដូសត្រូវបានប្រើប្រាស់នៅប្រទេសចិន។ ប្រទេសនេះសង្ឃឹមថា នឹងអាចចាក់វ៉ាក់សាំងឱ្យពលរដ្ឋបានចំនួន 50 លាននាក់ មុននឹងចាប់ផ្ដើមឈប់សម្រាកក្នុងពិធីបុណ្យចូលឆ្នាំចិននៅពាក់កណ្ដាលខែកុម្ភៈ៕

ប្រភព៖ CNN

February 2, 2021

Author: សឿន សំណាង