សឿន សំណាង - La Reine Media

មហាសេដ្ឋីថ្មី វ័យក្មេងជាងគេបំផុតក្នុងពិភពលោក ធ្លាប់បោះបង់ការសិក្សានៅមហាវិទ្យាល័យ ប៉ុន្តែស្រលាញ់ចូលចិត្តវិស័យបច្ចេកវិទ្យា

Austin Russell គឺជាឈ្មោះមួយដែលអ្នកប្រហែលជាមិនទាន់បានស្គាល់នៅឡើយ ក៏ប៉ុន្តែ ក្នុងវ័យ 25 ឆ្នាំ កំលោះដែលមកពីរដ្ឋ California នៃសហរដ្ឋអាមេរិករូបនេះ បានក្លាយជាមហាសេដ្ឋីថ្មី និងជាមហាសេដ្ឋីដែលមានវ័យនៅក្មេងជាងគេបំផុតក្នុងពិភពលោក ដោយសារតែ Luminar Technologies ជាក្រុមបច្ចេកវិទ្យាថ្មីដែលមានជំនាញខាងអភិវឌ្ឍ និងធ្វើពាណិជ្ជកម្មបច្ចេកវិទ្យាសម្រាប់រថយន្តបើកបរស្វ័យប្រវត្ត។

ស្ថាបនិក និងជានាយកប្រតិបត្តិរបស់ក្រុមហ៊ុន Luminar គឺជាបុគ្គលមួយរូបដ៏កម្រដែលអាចសន្សំទ្រព្យបានយ៉ាងច្រើននៅក្នុងពិភពរថយន្តក្នុងវ័យ 25 ឆ្នាំ។ Austin Russell បច្ចុប្បន្នជាមហាសេដ្ឋីដែលមានវ័យនៅក្មេងជាងគេបំផុតនៅក្នុងពិភពលោក។

Austin Russell បានប្រាប់ទស្សនាវដ្ដី Forbes ថា៖ «វាគឺជាការធ្វើដំណើរប្រកបដោយភាពតានតឹង និងហត់នឿយ។ល។ យើងត្រូវឆ្លងកាត់ឧបសគ្គជារៀងរាល់ថ្ងៃដើម្បីបានលទ្ធផលដូចបច្ចុប្បន្ន។ ប៉ុន្តែ ឱកាសនៃការរួចផុតពីភាពហត់នឿយទាំងឡាយ នោះគឺ រង្វាន់ដ៏អស្ចារ្យនៅពេលក្រុមហ៊ុនបានឈានជើងចូលទីផ្សារ និងរីកចម្រើនជាបន្តបន្ទាប់ តាមរយៈការបោះផ្សាយមូលបត្រសាធារណៈលើកដំបូង (IPO)»។

នៅក្នុងកិច្ចសម្ភាសប្រយោលមួយជាមួយនឹងទស្សនាវដ្ដី Forbes ពីការិយាល័យនៅទីក្រុង Palo Alto ក្នុងរដ្ឋ California លោក Austin Russell ថ្លែងថា៖ «ខ្ញុំនៅក្មេងគួរសម ប៉ុន្តែ បានក្រេបរសជាតិល្វីង ជូរ ចត់ និងទឹកភ្នែកអស់រយៈពេលជាយូរ។ សំណាងល្អណាស់ដែលខ្ញុំទទួលបានលទ្ធផលគួរជាទីពេញចិត្តយ៉ាងដូច្នេះ»។

Austin Russell កំពុងកាន់កាប់មូលបត្រប្រមាណ 107.7 លានហ៊ុន ស្មើនឹង 1/3 នៃភាគហ៊ុនសរុបរបស់ Luminar ដែលតម្លៃមូលធនសរុបរបស់ក្រុមហ៊ុននេះ ស្មើនឹង 2.4 ពាន់លានដុល្លារអាមេរិក។ ក្រុមអ្នកវិនិយោគរបស់ Luminar ក៏មានវត្តមានរបស់មហាសេដ្ឋី Peter Thiel ដែលជាសហស្ថាបនិកនៃក្រុមហ៊ុនទូទាត់ប្រាក់ឌីជីថល Pay Pal (អាមេរិក) និងជាអ្នកដែលធ្លាប់បានផ្ដល់ជំនួយជាអាហារូបករណ៍តម្លៃ 100,000 ដុល្លារដល់បុគ្គលពូកែ ដើម្បីឱ្យពួកគេអាចបន្តតាមចាប់ក្ដីស្រមៃផ្ទាល់ខ្លួន។

ខាងលើនេះក៏ជាវិធីដែលមហាសេដ្ឋី Thiel ជួយដល់ Russell ក្នុងការបង្កើត Luminar។ ក្រៅពីនេះ Thiel ក៏ជាទីប្រឹក្សារបស់ Austin ផងដែរ ចាប់តាំងពីកំលោះនេះបានបោះបង់សាកលវិទ្យាល័យ Stanford (អាមេរិក) ដើម្បីបង្កើតក្រុមហ៊ុនកាលពីឆ្នាំ 2012។

Russell ក្លាយជាមហាសេដ្ឋីដោយរបៀបណា?

Russell ដែលជាបុគ្គលមួយរូបធ្លាប់បានបង្ហាញវត្តមាននៅក្នុងបញ្ជីឈ្មោះនៃក្រុមមនុស្សពូកែជាងគេទាំង 30 រូបដែលមានវ័យក្រោម 30 ឆ្នាំ របស់ Forbes កាលពីឆ្នាំ 2018 កំពុងតែបង្ហើយគម្រោង Lidar ដែលជាប្រព័ន្ធញាណសិប្បនិម្មិត ជួយឱ្យរថយន្តបើកបរស្វ័យប្រវត្ត «មើលឃើញ» បរិស្ថានជុំវិញដោយការបាញ់ពន្លឺឡាស៊ែរ។

យោងតាមគណៈកម្មការមូលបត្រ និងផ្សារហ៊ុនអាមេរិក (SEC) បរិមាណនៃការលក់ចេញរបស់ក្រុមហ៊ុន Luminar គឺបានត្រឹមតែ 15 លានដុល្លារប៉ុណ្ណោះនៅឆ្នាំ 2020 ប៉ុន្តេតួលេខនេះនឹងអាចកើនឡើងដល់យ៉ាងហោច 1.3 ពាន់លានដុល្លារនៅក្នុងឆ្នាំ 2026។

មុនពេលក្លាយជាមហាសេដ្ឋី Russell ក៏ធ្លាប់ទទួលបានជោគជ័យច្រើនក្នុងជីវិត។ Forbes ឱ្យដឹងថា Russell ចាំមាត់យ៉ាងស្ទាត់នូវតារាងខួបនៃធាតុគីមី នៅពេលមានអាយុទើបតែ 2 ឆ្នាំ។

អាយុ 6 ឆ្នាំ Russell បានភ្ជាប់ម៉ាស៊ីនលេងហ្គេម Nintendo DS ទៅនឹងទូរស័ព្ទដៃឡើងវិញ បន្ទាប់ពីត្រូវបានប៉ានិងម៉ាក់ហាមឃាត់។ អាយុ 13 ឆ្នាំ Russell បានចុះបញ្ជីកម្មសិទ្ធិបញ្ញាលើកដំបូងរបស់ខ្លួន នោះគឺ ប្រព័ន្ធកែច្នៃទឹកដែលបានជ្រាបចូលក្នុងដី បន្ទាប់ពីត្រូវបានបញ្ចេញពីក្បាលទូយោ ដើម្បីកាត់បន្ថយការបាត់បង់ទឹក។

ជំនួសឱ្យការសិក្សានៅមធ្យមសិក្សា Russell បានចំណាយវ័យជំទង់របស់ខ្លួនក្នុងសាកលវិទ្យាល័យ California គឺនៅឯវិទ្យាស្ថានស្រាវជ្រាវ Lase Irvine Beckman។ ក្រោយមកក៏បានចូលសិក្សានៅសាកលវិទ្យាល័យ Stanford ប៉ុន្តែបានបោះបង់ទៅវិញ ក្រោយរៀនបានប៉ុន្មានខែប៉ុណ្ណោះ នៅពេលទទួលបានអាហារូបករណ៍តម្លៃ 100,000 ដុល្លារពីមហាសេដ្ឋី Thiel។ បន្ទាប់ពីទទួលបានប័ណ្ណបើកបរភ្លាម Russell ក៏បើកក្រុមហ៊ុន Luminar ភ្លាម។

អនាគតរបស់ Russell និង Luminar

Russell មានការជឿជាក់យ៉ាងខ្លាំងក្លាទៅលើប្រព័ន្ធ Lidar ដោយអះអាងថា វាមានសក្ដានុពលក្នុងការជួយសង្គ្រោះជីវិតមនុស្សពីគ្រោះថ្នាក់ចររាចរណ៍ នៅក្នុងករណីប្រើប្រាស់រថយន្តបើកបរស្វ័យប្រវត្ត ឬប្រព័ន្ធជំនួយការបើកបរទំនើបដែល Volvo និងក្រុមហ៊ុនផលិតរថយន្តដទៃទៀតកំពុងប្រើប្រាស់។

ស្ថាបនិករបស់ Luminar ប្រកាសថា៖ «នៅពេល Lidar ក្លាយជាក្រុមហ៊ុនបច្ចេកវិទ្យាមួយដែលធានាសុវត្ថិភាពសម្រាប់រថយន្ត ត្រូវបានប្រើប្រាស់ពាសពេញពិភពលោក នោះក៏ជាពេលដែលខ្ញុំមានទំនុកចិត្តបំផុតដើម្បីអះអាងថា យើងបានសម្រេចគោលដៅដែលបានកំណត់»៕

ប្រភព៖ Forbes

February 10, 2021

ក្រុមគ្រូពេទ្យណែនាំបណ្ឌិត ហ៊ុន ម៉ាណែត ៖ «មិនគួរហូបអាហារសមុទ្រ និងគ្រឿងស្រវឹង ក្រោយការចាក់វ៉ាក់សាំង Covid-19» របស់ចិន

នាព្រឹកថ្ងៃទី 10 ខែកុម្ភៈ ឆ្នាំ 2021 នេះ ក្រសួងសុខាភិបាលកម្ពុជា បានចាប់ផ្ដើមយុទ្ធនាការចាក់វ៉ាក់សាំងទប់ស្កាត់ Covid-19 ចំនួន ដោយប្រើប្រាស់វ៉ាក់សាំង 600,000 ដូសរបស់ក្រុមហ៊ុន Sinopharm ដែលជាជំនួយពីប្រទេសចិន។

ក្រុមឥស្សរជនអាទិភាពដែលត្រូវបានចាក់វ៉ាក់សាំង Covid-19 ដំបូងគេនៅកម្ពុជា រួមមានកូនរបស់សម្ដេចតោជោ ហ៊ុន សែន និងក្រុមរដ្ឋមន្ត្រីនៃរាជរដ្ឋាភិបាលកម្ពុជា។ ប្រមុខរដ្ឋាភិបាលកម្ពុជា ដំបូងឡើយបានប្រកាសថា នឹងជាអ្នកដំបូងគេដែលត្រូវបានចាក់វ៉ាក់សាំងរបស់ចិននេះ ក៏ប៉ុន្តែ ក្រោយមកក៏បានបញ្ជាក់ថា សម្ដេច មានអាយុ 68 ឆ្នាំហើយ ដូច្នេះគឺលើសពីការកំណត់នៃវ៉ាក់សាំងប្រឆាំង Covid-19 ដែលអភិវឌ្ឍដោយក្រុមហ៊ុនផលិតឱសថចិន Sinopharm។

នៅឯមន្ទីរពេទ្យកាល់ម៉ែតនារាជធានីភ្នំពេញ ឯកឧត្ដម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក នាព្រឹកនេះ បានឱ្យដឹងថា លោកមានការជឿជាក់ជាងមុន ព្រោះតែមានប្រព័ន្ធការពាររាងកាយដែលអាចទប់ទល់នឹង Covid-19។

យ៉ាងនេះក្ដី លោកបណ្ឌិត ម៉ាណែត ត្រូវបានក្រុមវេជ្ជបណ្ឌិតណែនាំថា មិនគួរទទួលទានអាហារសមុទ្រ និងគ្រឿងស្រវឹងនោះទេ ក្រោយពីបានចាក់វ៉ាក់សាំងនេះ។

សូមរំលឹកថា វ៉ាក់សាំងចំនួន 600,000 ដូស ដែលជាជំនួយពីប្រទេសចិននេះ ត្រូវបានបញ្ជូនមកដល់កម្ពុជាកាលពីថ្ងៃទី 7 កុម្ភៈ តាមជើងហោះហើរពិសេសមួយ។ ប្រទេសចិន មុននេះបានសន្យាថានឹងផ្ដល់វ៉ាក់សាំងប្រឆាំង Covid-19 របស់ក្រុមហ៊ុន Sinopharm ចំនួន 1 លានដូសមកឱ្យកម្ពុជា ដែលនេះគឺគ្រប់គ្រាន់សម្រាប់ចាក់ឱ្យមនុស្សចំនួន 500,000 នាក់។

កម្ពុជា មកដល់បច្ចុប្បន្ន ទទួលបានជោគជ័យច្រើនក្នុងការទប់ស្កាត់ និងព្យាបាលជំងឺរលាកសួតដែលបង្កឡើងដោយវីរុស Covid-19។ នៅទូទាំងប្រទេស គិតមកដល់ព្រឹកនេះ បានរកឃើញអ្នកវិជ្ជមាននឹងវីរុសនេះសរុបចំនួន 478 នាក់ ក្នុងនោះមានអ្នកជាសះស្បើយចំនួន 457 នាក់ ខណៈ 21 នាក់ កំពុងទទួលការព្យាបាលនៅមន្ទីរពេទ្យ នេះបើតាមរបាយការណ៍ពីក្រសួងសុខាភិបាលកម្ពុជា៕

February 10, 2021

ទំនៀមទម្លាប់ពិសេសៗនៃការទទួលអំណរឆ្នាំថ្មីរបស់ជនជាតិចិន

ជនជាតិចិនចាត់ទុកពិធីចូលឆ្នាំថ្មីតាមចន្ទគតិជាពិធីបុណ្យប្រពៃណីប្រចាំឆ្នាំធំជាងគេបង្អស់របស់ប្រទេសនេះ ហើយនៅក្នុងពិធីនេះ ជនជាតចិនតែងមានទំនៀមទម្លាប់ពិសេសៗដើម្បីទទួលអំណរឆ្នាំថ្មី។

ពិធីបុណ្យចូលឆ្នាំប្រពៃណីចិនត្រូវបានគេហៅថា បុណ្យនិទាឃរដូវ ឬបុណ្យចូនឆ្នាំចន្ទគតិ ក្នុងនោះ ចាប់ពីថ្ងៃទី 8 ខែ 12 ចន្ទគតិ ត្រូវនឹងថ្ងៃទី 20 ខែមករា (2021) ប្រជាជនចិននៅពាសពេញពិភពលោក ត្រលប់មកផ្ទះ ឬស្រុកកំណើត ជួបជុំគ្រួសារ ដើម្បីទទួលឆ្នាំថ្មី និងសែនដូនតា។

រៀបចំផ្ទះសំបែង

មុនថ្ងៃទី 30 ខែ 12 ចន្ទគតិ រៀងរាល់ឆ្នាំ ជនជាតិចិនមានទំនៀមទម្លាប់រៀបចំផ្ទះសម្បែងយ៉ាងស្អាតបាតដើម្បីទទួលឆ្នាំថ្មី។ របស់របរចាស់ៗដែលលែងប្រើប្រាស់និងសំរាម ធូលីក្នុង និងជុំវិញផ្ទះ ត្រូវបានគេយកទៅបោះចោល ក្នុងបំណងបណ្ដេញភាពឧបទ្រពចង្រៃឱ្យចេញពីឆ្ងាយ និងទទួលយកប្រការល្អៗចូលមកវិញ។

តុបតែងផ្ទះដោយកំណាព្យដែលសរសេរ ឬបោះពុម្ភលើក្រដាសពណ៌ក្រហម

មុនថ្ងៃចូលឆ្នាំ គ្រួសារចិនស្ទើរតែទាំងអស់នៅប្រទេសចិន សុទ្ធតែបិទភ្ជាប់ក្រដាស់ពណ៌ក្រហមដែលមានសរសេរកំណាព្យ នៅមាត់ទ្វារ។ ទម្លាប់នេះបានចាប់ផ្ដើមតាំងពីមុនសម័យរាជវង្សសុង (Song dynasty, 960-1279)។

ទន្ទឹមនឹងនេះ ជនជាតិចិនក៏មានទម្លាប់ព្យួរគោមក្រហម និងបិទក្រដាសក្រហមដើម្បីទទួលអំណរឆ្នាំថ្មីប្រកបដោយភាពកក់ក្ដៅ និងសុខសប្បាយ។

មុខម្ហូប «ត្រីចំហុយ» សម្រាប់ថ្ងៃដំបូងនៃឆ្នាំថ្មី

គ្រួសារមួយចំនួននឹងត្រៀមមុខម្ហូបជាច្រើនមុខ ក្នុងនោះក៏មានត្រីចំហុយផងដែរសម្រប់ទទួលទានក្នុងថ្ងៃចូលឆ្នាំថ្មី។ ក្នុងភាសាចិន ពាក្យថា «ត្រី» គឺមានសំនៀងស្រដៀងនឹងពាក្យថា «សល់ ឬថែម»។ ដូច្នេះ នាំឱ្យមានជំនឿថា ការទទួលទានសាច់ត្រីនឹងជួយឱ្យឆ្នាំថ្មីបានសម្បូរសប្បាយ សល់ប្រាក់កាសហូរហៀរ។

ទស្សនាកម្មវិធីសំដែងទទួលអំណររដូវផ្ការីកនៅលើ CCTV

ឆ្នាំ 1983 ទូរទស្សន៍ជាតិចិន CCTV បានចាក់ផ្សាយមហាកម្មវិធីអំណរឆ្នាំថ្មី (Gala) ជាលើកដំបូង។ មកដល់បច្ចុប្បន្ន វាគឺជាកម្មវិធីដែលត្រូវបានគេមើលច្រើនបំផុតនៅក្នុងពិធីបុណ្យចូលឆ្នាំចិន។

មហាកម្មវិធីខាងលើនេះ រួមមាន កម្មវិធីចម្រៀង រាំរបាំ និងការជជែកជាមួយបុគ្គលល្បីឈ្មោះ រួមទាំងកំប្លែង។ល។ ដែលទាំងអស់នេះត្រូវបានធ្វើឡើងដើម្បីនាំមកនូវអារម្មណ៍សប្បាយរីករាយដល់អ្នកទស្សនាក្នុងរាត្រីឆ្លងឆ្នាំ។

ទទួលទានគាវចំហុយ

ទំនៀមទម្លាប់ទទួលទានម្ហូបគាវចំហុយក្នុងថ្ងៃដើមឆ្នាំថ្មី គឺចង់បង្ហាញថា ពួកគេលាឆ្នាំចាស់ដែលកន្លងផុតទៅ និងទទួលយកឆ្នាំថ្មីដែលបានមកដល់។ ស្នូលរបស់មុខម្ហូបនេះ ធ្វើអំពីសាច់ជ្រូក និងបន្លែចិញ្ច្រាំ ដែលត្រូវបានខ្ចប់នៅក្នុងសម្បកនំដែលធ្វើអំពីម្សៅមី។ ជួនកាល មានគ្រួសារខ្លះដាក់ប្រាក់កាក់ទៅក្នុងស្នូលនំ ដោយជឿថា អ្នកណាយកបានវា អ្នកនោះនឹងមានលាភ មានជ័យច្រើនជាងគេនៅក្នុងឆ្នាំថ្មី។

ជូនពរដល់ញាតិមិត្ត

ក្នុងរយៈពេលប៉ុន្មានថ្ងៃដើមឆ្នាំថ្មី ជនជាតិចិនមានទម្លាប់ទៅលេងផ្ទះញាតិ និងមិត្តភក្ដិ ហើយជួនកាលក៏នៅទទួលទានអាហារជាមួយគ្នា។ ពួកគេក៏ជូនពរគ្នាឱ្យរកស៊ីមានបាន ហេងៗ សុភមង្គល រួមនឹងប្រការល្អៗផ្សេងទៀត។ សម្រាប់ក្មេងៗ គេជូនពរឱ្យឆ្លាតវៃ សប្បាយរីករាយ។ល។ ចំណែកសម្រាប់ចាស់វិញ គេជូនពរសុខភាពល្អ អាយុយឺនយូរ។ល។

ជូនប្រាក់នាំសំណាង (អាំងប៉ាវ)

សម្រាប់ជនជាតិចិន ពណ៌ក្រហមត្រូវបានចាត់ទុកជាពណ៌ដែលនាំមកនូវសំណាងល្អ ដូច្នេះ នៅក្នុងថ្ងៃបុណ្យចូលឆ្នាំប្រពៃណីចិន ចាស់ៗ ឬមនុស្សធំ តែងតែជូន ឬឱ្យប្រាក់នាំសំណាងដែលដាក់ក្នុងសំបុត្រពណ៌ក្រហម ដែលហៅថា អាំងប៉ាវ ដល់ក្មេងៗ ឬមនុស្សដែលមានអាយុតិចជាង។ អត្ថន័យនៃទំនៀមទម្លាប់នេះគឺមានបំណងឱ្យអ្នកទទួល ជួបតែសុភមង្គល សំណាងល្អ និងសុខភាពល្អនៅក្នុងឆ្នាំថ្មី។ សព្វថ្ងៃ កូនចៅក៏ជូនប្រាក់នាំសំណាងនេះដល់ចាស់ទំក្នុងគ្រួសារ ឬញាតិមិត្តទន្ទឹមនឹងពាក្យជូនពរសុខភាពល្អ អាយុយឺនយូរផងដែរ៕

ប្រភព៖ Chinesenewyear

February 10, 2021

អៃឌៀ ឡូយ!! ប្រទេសរុស្ស៊ីជំរុញចិត្តប្រជាជន ឱ្យចាក់វ៉ាក់សាំងកូវីដ-19 ដោយអៃស្គ្រីម

អៃឌៀឡូយ! ប្រទេសរុស្ស៊ី ប្រើកលយុទ្ធ ឱ្យប្រជាជនងាកមកចាក់វ៉ាក់សាំងកូវីដ-19 កាន់តែច្រើនឡើង ដោយការយករបស់ហូបចុកមកធ្វើជារង្វាន់ ចាក់វ៉ាក់សាំង បានអៃស្គ្រីម 1ដើម Free!

វាជារឿងធម្មតាទេ បើសិនជាក្មេងៗនឹងបានទទួលស្ករគ្រាប់ ដើម្បីសម្រាលអាការឈឺចាប់ក្រោយការចាក់ថ្នាំរួច តែនៅប្រទេសរុស្ស៊ីវិញ កំពុងឈានទៅមុខ មួយជំហានទៀត ដោយមជ្ឈមណ្ឌលវ៉ាក់សាំងមួយកន្លែងនៅក្នុងទីក្រុងមូស្គូ បានសម្រេចចិត្តប្រើឧបាយកល ផ្ដល់រង្វាន់ឱ្យអ្នកមកចាក់វ៉ាក់សាំង ដោយការថែមបង្អែម ជាការ៉េមអៃស្គ្រីមឱ្យ 1ដើម។

ក្នុងខណៈដែលប្រទេសជាច្រើន ត្រូវប្រឈមនឹងការខ្វះខាតវ៉ាក់សាំងកូវីដ-19 តែខាងប្រទេសរុស្ស៊ី បែរជាត្រូវប្រឈមនឹងសភាវផ្គត់ផ្គង់ដែលច្រើនហូរហៀរទៅវិញ ព្រោះកំពុងជួបនឹងបញ្ហា លួងលោមបញ្ចុះបញ្ចូលឱ្យប្រជាជនចូលមកទទួលយកវ៉ាក់សាំង។ តាមរយៈលទ្ធផលធ្វើប្រជាមតិរបស់ Levada Center បានរកឃើញថា មានប្រជាជនរុស្ស៊ីត្រឹមតែ 38%ប៉ុណ្ណោះ ដែលពេញចិត្ត ចូលទទួលយកការចាក់វ៉ាក់សាំង Sputnik V ព្រោះភាគច្រើន មានក្ដីកង្វល់ពីផលប៉ះពាល់ បើទោះជា មានលទ្ធផលនៃការស្រាវជ្រាវចេញមក ធានារ៉ាប់រងប្រសិទ្ធភាពហើយក៏ដោយ។

មជ្ឈមណ្ឌលវ៉ាក់សាំង នៅក្នុងហាងផ្សារទំនើប ក្នុងទីក្រុងមូស្គូ បានសម្រេចចិត្តរិះរកកលយុទ្ធជំរុញឱ្យមនុស្សម្នាមកចាក់វ៉ាក់សាំង ពួកគេគិតថា ហេតុផលខាងវិទ្យាសាស្ត្រ ប្រើមិនបានលទ្ធផលល្អទេ ដូច្នេះក៏សម្រេចចិត្តប្រើវិធីសូកប៉ាន់ ដោយការស្នើយុទ្ធនាការ អ្នកណាចាក់វ៉ាក់សាំង នឹងបានទទួលការ៉េមអៃស្គ្រីម 1ដើម Free! ដែលលទ្ធផលទទួលបាន គឺមានប្រជាជននាំគ្នាចូលមកទទួលយកការចាក់វ៉ាក់សាំង កាន់តែច្រើនឡើងៗរៀងរាល់ថ្ងៃ។

លោកស្រី Natalya Kuzentova ប្រធានមជ្ឈមណ្ឌលចាក់វ៉ាក់សាំង បានថ្លែងថា អីលូវនេះ មានមនុស្សមកចាក់វ៉ាក់សាំងនៅក្នុងហាង ប្រមាណជា 300នាក់ក្នុង 1ថ្ងៃ៕

ប្រភព៖ សាព័ត៌មានបរទេស

ប្រែ និងសម្រួលដោយ ទិទីតំតាតូ

February 10, 2021

កម្ពុជារកឃើញករណីវិជ្ជមាននឹង Covid-19 ថ្មីចំនួន 2នាក់បន្ថែមទៀត ខណៈតួលេខអ្នកឆ្លងសរុបនៅទូទាំងពិភពលោកកើនដល់ជាង 107,389,000នាក់

ព្រឹកថ្ងៃទី 10 ខែកុម្ភៈ ឆ្នាំ 2021 នេះ ក្រសួងសុខាភិបាលកម្ពុជាឱ្យដឹងថា មានករណីវិជ្ជមានថ្មីចំនួន 2 នាក់ទៀត ត្រូវបានរកឃើញកាលពីថ្ងៃទី 9 កុម្ភៈ ក្នុងនោះមានពលករខ្មែរមកពីថៃម្នាក់ និងអ្នកដំណើរមកពីប្រទេសផ្សេងម្នាក់ទៀត។

គិតមកដល់ព្រឹកថ្ងៃទី 10 កុម្ភៈ ឆ្នាំ 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 478 នាក់ ក្នុងនោះមានអ្នកជាសះស្បើយចំនួន 457 នាក់ និងអ្នកកំពុងព្យាបាលមានចំនួន 210 នាក់។

នៅទូទាំងពិភពលោក អ្នកស្លាប់ដោយសារវីរុស Covid-19 បានកើនដល់ 2,349,171 នាក់ និងជាសះស្បើយមានចំនួន 79,297,474

នាក់ ខណៈអ្នកកំពុងព្យាបាលមានចំនួន 25,595,712 នាក់ នៅក្នុងចំណោមអ្នកវិជ្ជមានសរុបចំនួន 107,389,998 នាក់៕

February 10, 2021

សភាជាន់ខ្ពស់អាមេរិកចាប់ផ្ដើមកាត់ទោសអតីតប្រធានាធិបតី Trump

នៅវេលាម៉ោង 13 នៃថ្ងៃទី 9 កុម្ភៈ (ទៀបភ្លឺថ្ងៃទី 10 កុម្ភៈ ម៉ោងនៅកម្ពុជា) សភាជាន់ខ្ពស់អាមេរិក បានចាប់ផ្ដើមជំនុំជម្រះក្ដីលើចុងចោទដែលជាអតីតប្រធានាធិបតីនៃប្រទេសនេះ នោះគឺលោក Donald Trump។

ការដែលសភាជាន់ខ្ពស់អាមេរិកបើកការជំនុំជម្រះនេះ លោក Donald Trump បានក្លាយជាអតីតប្រធានាធិបតីដំបូងគេក្នុងប្រវត្តិសាស្ត្រនៃសហរដ្ឋអាមេរិកដែលត្រូវបានសភាកាត់ទោស។ លោកក៏ជាអតីតប្រធានាធិបតីដំបូងគេនៅអាមេរិកដែលត្រូវបានសភាចោទប្រកាន់ដល់ទៅពីរលើកផងដែរ។

កាលពីថ្ងៃទី 13 មករា ឆ្នាំ 2021 សភាជាន់ទាបអាមេរិកដែលគ្រប់គ្រងដោយបក្សប្រជាធិបតេយ្យ បានបោះឆ្នោតអនុម័តលើមាត្រាច្បាប់ដែលចោទប្រកាន់ថា លោកបាន «បញ្ឆេះអំពើវឹកវរនៅវិមានសភា» ដែលពេលនោះ លោក Trump នៅជាប្រធានាធិបតីអាមេរិកនៅឡើយ។

ក្រុមតំណាងរាស្ត្រមកពីបក្សប្រជាធិបតេយ្យ យល់ថា លោក Trump ត្រូវតែទទួលខុសត្រូវ បន្ទាប់ពីបានប្រើប្រាស់ពាក្យពេចន៍ដែលនាំឱ្យមានបាតុកម្មហិង្សានៅវិមានសភាអាមេរិកកាលពីថ្ងៃទី 6 មករា ជាពេលដែលសភាកំពុងប្រជុំដើម្បីទទួលស្គាល់លទ្ធផលនៃការបោះឆ្នោតប្រធានាធិបតីកាលពីខែវិច្ឆិកា 2020។ បាតុកម្មហិង្សានោះបានបណ្ដាលឱ្យមានមនុស្សស្លាប់ 5នាក់។

តាមធម្មតា ការជំនុំជម្រះទោសចំពោះមន្ត្រីអនុវត្តច្បាប់ថ្នាក់កំពូលនៅសហរដ្ឋអាមេរិកនឹងត្រូវបានដឹកនាំដោយប្រធានតុលាការកំពូល។ ប៉ុន្តែ ដោយសារលោក Trump មិនស្ថិតក្នុងតំណែង ទើបតំណាងរាស្ត្របក្សប្រជាធិបតេយ្យ Patrick Leahy នឹងធ្វើជាប្រធានអង្គជំនុំជម្រះលើកនេះ ជំនួសឱ្យប្រធានតុលាការកំពូល John Roberts។

នៅក្នុងអង្គជំនុំជម្រះនេះ តំណាងរាស្ត្រនៅសភាជាន់ខ្ពស់នឹងដើរតួនាទីចំនួនពីរក្នុងពេលតែមួយ៖ គណៈវិនិច្ឆ័យ និងចៅក្រម។ ចំណែកក្រុមតំណាងរបស់សភាជាន់ទាប ដើរតួជាភាគីរដ្ឋអាជ្ញា។

តំណាងនៃក្រុមមេធាវីការពារក្ដីរបស់អតីតប្រធានាធិបតី Trump រួមមានមេធាវី Bruce Castor ដែលជាអតីតមេធាវីរបស់រដ្ឋនៅ Pennsylvania និង David Schoen ដែលជាមេធាវីផ្នែកសិទ្ធិពលរដ្ឋដ៏ល្បីឈ្មោះនៅសហរដ្ឋអាមេរិក។

ក្នុងថ្ងៃដំបូងនៃការជំនុំជម្រះ ក្រុមតំណាងរបស់សភាជាន់ទាប និងក្រុមមេធាវីរបស់លោក Trump មានរយៈពេល 2 ម៉ោងស្មើគ្នាដើម្បីសំដែងការយល់ឃើញរបស់ខ្លួនអំពីភាពស្របច្បាប់នៃអង្គជំនុំជម្រះនេះ។ បន្ទាប់មក សភាជាន់ខ្ពស់បោះឆ្នោតដើម្បីស្វែងរកភាពស្របច្បាប់នៃអង្គជំនុំជម្រះនេះជាផ្លូវការ។ បើសិនជាលទ្ធផលបោះឆ្នោតមានសំឡេងគាំទ្រយ៉ាងតិច 51 សំឡេង នោះការជំនុំជម្រះនេះនឹងត្រូវបន្តទៅមុខទៀត។ ប៉ុន្តែ បើផ្ទុយពីនេះ អង្គជំនុំជម្រះនឹងត្រូវបានលុបចោលជាស្ថាពរ៕

February 10, 2021

ប្រាក់អេឡិចត្រូនិក Bitcoin ឡើងថ្លៃដល់ជាង 44,000ដុល្លារក្នុងមួយ Bitcoin

តម្លៃរបស់ប្រាក់ឌីជីថល ឬប្រាក់អេឡិចត្រូនិក Bitcoin បានហក់ឡើងខ្ពស់ជាងគេបង្អស់ ក្រោយពីក្រុមហ៊ុនផលិតរថយន្ត Tesla ប្រកាសទិញប្រាក់នេះក្នុងបរិមាណដ៏ច្រើន និងយល់ព្រមទទួលការទូទាត់ដោយប្រាក់នេះ។

យោងតាម CoinDesk ប្រាក់ Bitcoin កំពុងត្រូវបានគេជួញដូរជាមួយនឹងតម្លៃក្នុងរង្វង់ 44,200 ដុល្លារអាមេរិកក្នុងមួយ Bitcoin។ មុននេះ តម្លៃរបស់វាបានលោតឡើងដល់ 44,800 ដុល្លារ/Bitcoin។ ប្រាក់ឌីជីថល Bitcoin បានកើនឡើងយ៉ាងខ្ពស់កាលពីយប់ថ្ងៃទី 8 កុម្ភៈ បន្ទាប់ពី Tesla បានប្រកាសដូចបានរៀងរាប់ខាងលើ។

Tesla ថ្ងៃនេះបានដាក់លិខិតទៅកាន់គណៈកម្មការមូលបត្រអាមេរិក (SEC) ដើម្បីជូនដំណឹងថា បានទិញប្រាក់ Bitcoin ដែលមានតម្លៃ 1.5 ពាន់លានដុល្លារ។

ក្រៅពីនេះ Tesla ក៏បានប្រកាសថា នឹងចាប់ផ្ដើមទទួលយកការទូទាត់វិក្កយបត្រដោយប្រាក់ Bitcoin នេះផងដែរ ប៉ុន្តែត្រូវយោងទៅតាមច្បាប់៕

ប្រភព៖ CNBC

February 9, 2021

WHO ការពារវ៉ាក់សាំង Covid-19 របស់ AstraZeneca ក្រោយអាហ្វ្រិកខាងត្បូងផ្អាកប្រើប្រាស់

វ៉ាក់សាំងទប់ស្កាត់ Covid-19 ដែលអភិវឌ្ឍដោយក្រុមហ៊ុនឱសថអង់គ្លេស AstraZeneca សហការជាមួយសាកលវិទ្យា Oxford នៅតែជាអាវុធសំខាន់ក្នុងការប្រយុទ្ធនឹងវីរុសនាពេលបច្ចុប្បន្ន។

មេដឹកនាំនៃសម្ព័ន្ធច្នៃប្រឌិតទប់ទល់នឹងរោគរាតត្បាត CEPI (Coalition for Epidemic Preparedness Innovations) នៃអង្គការសហប្រជាជាតិ (WHO) បានអះអាងដូចខាងលើកាលពីថ្ងៃទី 8 កុម្ភៈ បន្ទាប់ពីប្រទេសអាហ្វ្រិកខាងត្បូងសម្រេចផ្អាកប្រើប្រាស់វ៉ាក់សាំង Covid-19 របស់ AstraZeneca ដោយសារមានការព្រួយបារម្ភអំពីបញ្ហាប្រសិទ្ធភាពរបស់វ៉ាក់សាំងនេះនៅចំពោះមុខការក្លាយពូជរបស់ Covid-19 ដែលបច្ចុប្បន្នបានកើនឡើងដល់ 80% នៃករណីឆ្លងថ្មីនៅប្រទេសនេះ។

លោក Richard Hatchett និយាយថា វាឆាប់រហ័សពេកក្នុងការបំបាត់វ៉ាក់សាំងរបស់ AstraZeneca ហើយវានៅតែជាឧបករណ៍ដែលមានប្រសិទ្ធភាពក្នុងការទប់ទល់នឹងវីរុស Covid-19។ មុននេះ ក្រុមមន្ត្រីនៃប្រទេសមួយចំនួន ដូចជា អូស្ត្រាលី និងអង់គ្លេសក៏ធ្លាប់បានមានមតិការពារវ៉ាក់សាំង AstraZeneca នេះដែរ។ ចំណែកភាគីក្រុមហ៊ុន AstraZeneca បានអះអាងថា វ៉ាក់សាំងរបស់ពួកគេ ធានាសុវត្ថិភាព និងមានប្រសិទ្ធភាពក្នុងការទប់ទល់នឹង Covid-19 ទន្ទឹមនឹងការបញ្ជាក់ថា ក្រុមហ៊ុនកំពុងតែកែសម្រួលវ៉ាក់សាំងនេះដើម្បីឱ្យមានប្រសិទ្ធភាពទប់ទល់នឹងវីរុស Covid-19 ក្លាយពូជថ្មី នៅអាហ្វ្រិកខាងត្បូង។

វ៉ាក់សាំងរបស់ AstraZeneca កាន់កាប់មួយភាគធំនៅក្នុងកម្មវិធី COVAX ដែលជាយន្តការយុត្តិធម៌មួយដែលនឹងបែងចែកវ៉ាក់សាំង Covid-19 ទៅឱ្យបណ្ដាប្រទេសក្រីក្រ។ បច្ចុប្បន្ន WHO និង UN (អង្គការសហប្រជាជាតិ) កំពុងសហការគ្នាបែងចែកវ៉ាក់សាំងសរុប 337.21 លានដូស ទៅឱ្យប្រទេសចំនួន 145 នៅក្នុងពាក់កណ្ដាលដើមឆ្នាំ 2021 ក្នុងក្របខ័ណ្ឌ COVAX។

អាហ្វ្រិកខាងត្បូង ដែលជាប្រទេសកំពុងរងផលប៉ះពាល់ខ្លាំងបំផុតពី Covid-19 នៅអាហ្វ្រិកខាងត្បូង គ្រោងនឹងចាប់ផ្ដើមយុទ្ធនាការចាក់វ៉ាក់សាំង Covid-19 ដោយប្រើប្រាស់វ៉ាក់សាំង AstraZeneca នាប៉ុន្មានថ្ងៃខាងមុខ។ ប៉ុន្តែ ប្រទេសដែលមានវ៉ាក់សាំង Covid-19 ចំនួន 1.5 លានដូសក្នុងដៃនេះ បានសម្រេចចិត្តផ្អាកយុទ្ធនាការចាក់វ៉ាក់សាងទៅវិញ ដោយសារទិន្នន័យដែលប្រមូលបានបង្ហាញថា វ៉ាក់សាំង AstraZeneca មានប្រសិទ្ធភាពតិចតួចចំពោះវីរុស Covid-19 ក្លាយពូជនៅប្រទេសនេះ៕

ប្រភព៖ WSJ

February 9, 2021

វៀតណាមបានបញ្ចប់ការធ្វើតេស្តលើមនុស្សដំណាក់កាលទីមួយដោយជោគជ័យ ចំពោះវ៉ាក់សាំង Covid-19 ឈ្មោះ Nano Covax

វៀតណាម៖ ជំហានដំបូងបង្ហាញថា វ៉ាក់សាំង Nano Covax មានសុវត្ថុភាព បង្កើតប្រតិកម្មប្រឆាំងនឹងវីរុសបានល្អ និងមានប្រសិទ្ធភាពក្នុងការទប់ទល់នឹង Covid-19 សូម្បីតែប្រភេទក្លាយពូជថ្មីរបស់វីរុសនេះ។

ព័ត៌មានពីវិទ្យាស្ថានវេជ្ជសាស្ត្រយោធាបានឱ្យដឹងថា អង្គភាពនេះទើបតែបានបញ្ចប់ការធ្វើតេស្តវ៉ាក់សាំងលើមនុស្សនៅក្នុងដំណាក់កាលដំបូង ក្រោយពីបានចាក់វ៉ាក់សាំង Nano Covax ចំនួន 120 ម្ជុលទៅឱ្យអ្នកស្ម័គ្រចិត្តចំនួន 60 នាក់។

ក្រុមអ្នកជំនាញបានវាយតម្លៃថា ជំហានដំបូងបង្ហាញថា វ៉ាក់សាំង Nano Covax នេះ មានសុវត្ថិភាព បង្កើតប្រតិកម្មប្រឆាំងនឹងវីរុសបានល្អ និងមានប្រសិទ្ធភាពចំពោះវីរុស Covid-19 ក្នុងនោះបូករួមទាំងវីរុស Covid-19 ប្រភេទក្លាយពូជផងដែរ។ បន្ទាប់ពីបានចាក់វ៉ាក់សាំង ក្រុមអ្នកស្ម័គ្រចិត្ត សុទ្ធតែមានសុខភាពល្អ ដោយមានករណីមួយចំនួនតូចប៉ុណ្ណោះដែលមានអាការឈឺត្រង់កន្លែងចាក់ ក្ដៅខ្លួនស្ទេញៗ ប៉ុន្តែបានបាត់ទៅវិញក្រោយរយៈពេលពី 1-2 ថ្ងៃ។

វិទ្យាស្ថានវេជ្ជសាស្ត្រយោធាវៀតណាម កំពុងតែបន្តប្រមូលទិន្នន័យដើម្បីធ្វើរបាយការណ៍ជូនក្រសួងសុខាភិបាល។ តាមគម្រោង ក្រោយបុណ្យចូលឆ្នាំចិន ក្រុមប្រឹក្សាវិទ្យាសាស្ត្រនិងសីលធម៌ជីវវេជ្ជសាស្ត្រ រួមនឹងក្រសួងសុខាភិបាលនឹងជួបប្រជុំគ្នាដើម្បីវាយតម្លៃលើវ៉ាក់សាំងខាងលើ មុនពេលអនុម័តឱ្យធ្វើតេស្តលើមនុស្សដំណាក់ទីពីរ។

ដំណាក់កាលទីពីរនឹងធ្វើតេស្តលើអ្នកស្ម័គ្រចិត្តចំនួន 560 នាក់ ដោយប្រើពេល 6 ខែ ខណៈដែលដំណាក់កាលទីបីនឹងពិសោធលើមនុស្សចំនួនជាង 10,000 នាក់ នៅតាមបណ្ដាប្រទេសដែលមានករណីឆ្លងក្នុងសហគមន៍ច្រើន ហើយដំណាក់កាលនេះនឹងត្រូវបញ្ចប់នៅដើមឆ្នាំ 2022។

Nano Covax គឺជាវ៉ាក់សាំងប្រឆាំង Covid-19 ដំបូងគេរបស់វៀតណាម ដែលត្រូវបានធ្វើតេស្តនៅលើមនុស្ស ក្នុងនោះ វ៉ាក់សាំងម្ជុលដំបូងត្រូវបានចាក់កាលពីថ្ងៃទី 17 ធ្នូ ឆ្នាំ 2020។

លោក Nguyen Thanh Long រដ្ឋមន្ត្រីក្រសួងសុខាភិបាលវៀតណាម កាលពីថ្ងៃទី 5 កុម្ភៈ បានថ្លែងថា បច្ចុប្បន្ន វ៉ាក់សាំង Nano Covax របស់ក្រុមហ៊ុន Nanogen បានឆ្លងផុតដំណាក់កាលទីមួយនៃការធ្វើតេស្តលើមនុស្ស និងត្រៀមចូលដំណាក់កាលទីពីរ។

ក្រៅពី Nanogen វៀតណាមក៏មានក្រុមហ៊ុនមួយចំនួនទៀតដែលកំពុងពិសោធវ៉ាក់សាំងប្រឆាំង Covid-19 មានដូចជា ក្រុមហ៊ុន IVAC និង ក្រុមហ៊ុនVABIOTEC ជាដើម។

គិតដល់ខែមិថុនា ឆ្នាំ 2021 វៀតណាមនឹងមានវ៉ាក់សាំង Covid-19 ប្រមាណ 30 លានដូសដើម្បីចាក់ឱ្យពលរដ្ឋ។ ជាងនេះ វៀតណាមក៏កំពុងតែស្វែងរកជាវវ៉ាក់សាំងពីបរទេស ដើម្បីបង្កើនចំនួននៃប្រភពផ្គត់ផ្គង់។ តាមគម្រោង វ៉ាក់សាំង Covid-19 ឈុតដំបូងដែលវៀតណាមបានបញ្ជាទិញពី AstraZeneca នឹងមកដល់ប្រទេសនេះនៅចុងខែកុម្ភៈ ឬដើមខែមីនា2021៕

February 9, 2021

ញ៉ាំហើយ ហេង!! ប្រជាជនសានតុង ប្រទេសចិន នាំគ្នាធ្វើ “នំត្រីសិរីមង្គល” ស្វាគមន៍បុណ្យចូលឆ្នាំចិន

ពាក្យថា “ត្រី” អក្សរចិនគឺ 鱼 បញ្ចេញសំឡេងថា “អ៊ី៎” ត្រូវគ្នានឹងសំឡេងនៃពាក្យភាសាចិន ដែលមានន័យថា “មានទ្រព្យសម្បត្តិ របស់របរ បរិបូរណ៍ហូរហៀរ” គឺ 余 ដែលមានសំឡេងអានថា “អ៊ី៎” ដូចគ្នា ដែលជាដើមកំណើតនៃប្រយោគដ៏ល្បីល្បាញ និងដែលគេតែងតែប្រើ នៅក្នុងរដូវកាលបុណ្យចូលឆ្នាំចិនថា 年年有余 ដែលមានន័យថា “សូមឱ្យមានទ្រព្យសម្បត្តិច្រើនបរិបូរណ៍ហូរហៀរ” ហ្នឹងឯង។

សូមអញ្ជើញទស្សនាបរិយាកាស បណ្ដាអ្នកស្ម័គ្រចិត្តនៅក្នុងទីក្រុងចាវចួង មណ្ឌលសានតុង ភាគខាងកើតប្រទេសចិន កំពុងវីវក់ក្នុងការធ្វើនំប៉័ងបុរាណរូបត្រី សម្រាប់ស្វាគមន៍ពិធីបុណ្យចូលឆ្នាំចិន ដែលកំពុងជិតចូលមកដល់ នៅថ្ងៃទី12 កុម្ភៈខាងមុខនេះ ដើម្បីនាំយកទៅជូនក្រុមមនុស្សចាស់នៅក្នុងមណ្ឌលថែរក្សាមនុស្សចាស់ក្នុងតំបន់ សម្រាប់ជូនពរឆ្នាំថ្មីតាមប្រពៃណីចិន៖ “សូមឱ្យមានលុយកាក់មាសប្រាក់ ចាយវាយបរិបូរណ៍រហូតតទៅ”

សូមអរគុណ រូបភាពរបស់ទីភ្នាក់ងារព័ត៌មានស៊ីនហួ

ប្រែ សម្រួលដោយ ទិទីតំតាតូ

February 9, 2021

Author: សឿន សំណាង