សឿន សំណាង - La Reine Media

អាស៊ីទទួលអំណរបុណ្យចូលឆ្នាំថ្មីចន្ទគតិ 2021 ក្នុងរលក Covid-19

ពិធីបុណ្យចូលឆ្នាំថ្មីនៃចន្ទគតិ ឆ្នាំ 2021 នៃបណ្ដាប្រទេសនៅទ្វីបអាស៊ី សុទ្ធតែត្រូវបានធ្វើឡើងដោយការប្រុងប្រយ័ត្នខ្ពស់ ព្រោះតែផលប៉ះពាល់ពីរោគរាតត្បាត Covid-19។

អាស៊ីឆ្នាំនេះ ទទួលអំណរបុណ្យចូលឆ្នាំថ្មី ឆ្នាំឆ្លូវ ចន្ទគតិ នៅក្នុងគ្រាដែលប្រទេសជាច្រើនកំពុងប្រឈមនឹងរលកថ្មីនៃការឆ្លងវីរុស Covid-19 នាំឱ្យមានវិធានការទប់ស្កាត់ជាច្រើនត្រូវបានដាក់ចេញ។

រូបភាពខាងលើគឺជាទិដ្ឋភាពក្នុងពិធីបុណ្យចូលឆ្នាំចិន ឬចូលឆ្នាំចន្ទគតិ ឆ្នាំ 2021 នៅឯវិហារ Boen San Bio ក្នុងតំបន់ Tangerang រដ្ឋធានី ចាការតា (Jakarta) ប្រទេសឥណ្ឌូនេស៊ី។

ទិដ្ឋភាពនៅវិហារមួយក្នុងរដ្ឋធានីតៃប៉ិ នៃកោះតៃវ៉ាន់ ក្នុងពេលបាញ់កាំជ្រួចនៅក្នុងយប់ឆ្លងឆ្នាំ កាលពីម្សិលមិញ។

មេដឹកនាំកូរ៉េខាងជើង លោក Kim Jong-un និងក្រុមមន្ត្រីរដ្ឋាភិបាល កំពុងទស្សនាការសំដែងមួយនៅក្នុងពិធីទទួលឆ្នាំថ្មី។ រូបភាពនេះត្រូវបានចុះផ្សាយកាលពីថ្ងៃទី 12 កុម្ភៈ ដោយសារព័ត៌មានក្នុងស្រុក។

សាច់ញាតិរបស់ជនភៀសខ្លួនកូរ៉េខាងជើង រៀបចំទីសក្ការបូជា ដើម្បីប្រារព្ធពិធីរំលឹកវិញ្ញាណក្ខន្ធបុព្វការី នៅក្បែរតំបន់គ្មានកងទ័ព (DMZ) នាទីក្រុង Paju កូរ៉េខាងត្បុង កាលពីថ្ងៃទី 12 កុម្ភៈ។

ទិដ្ឋភាពមួយនៅក្នុងពិធីបុណ្យទន្លេ Hongbao ជាផ្នែកមួយនៃពិធីបុណ្យចូលឆ្នាំថ្មីប្រពៃណីចិន ដែលត្រូវបានធ្វើឡើងនៅប្រទេសសិង្ហបុរី។

ទិដ្ឋភាពមួយផ្សេងទៀត នៅក្នុងពិធីបុណ្យទន្លេ Hongbao នៅប្រទេសសិង្ហបុរី។

ទិដ្ឋភាពមួយនៅទីក្រុងប៉េកាំង ប្រទេសចិន កាលពីថ្ងៃទី 11 ខែកុម្ភៈ ឆ្នាំ 2021។

ទិដ្ឋភាពមួយផ្សេងទៀត នៅទីក្រុងប៉េកាំង ប្រទេសចិន កាលពីថ្ងៃទី 11 ខែកុម្ភៈ ឆ្នាំ 2021។

អាកាសយានដ្ឋានអន្តរជាតិ Wuhan នៃប្រទេសចិន កាលពីថ្ងៃទី 11 កុម្ភៈ (ថ្ងៃចុងឆ្នាំជូត)។

ជនជាតិចិនជាច្រើន ត្រូវបង្ខំចិត្ត ជួបជុំគ្រួសារពីចម្ងាយ តាមរយៈអ៊ីនធើណិត ដោយសារបញ្ហា Covid-19។

ពលរដ្ឋជាប់សែស្រឡាយចិននៅរាជធានីបាងកក ប្រទេសថៃ មកអុជទៀន ធូប នៅក្នុងវត្ត Wat Mongkol Samakhom មុនពេលឆ្លងឆ្នាំ។

ទិដ្ឋភាពក្រុមម៉ុងសៃចិន កំពុងសំដែងនៅក្នុងព្រះរាជវាំងនារាជធានីភ្នំពេញ កាលពីថ្ងៃទី 11 កុម្ភៈ ឆ្នាំ 2021។ រូបភាពនេះថតដោយ Gao Bingnan មកពីសារព័ត៌មាន Xinhua៕

ប្រភព៖ AFP, Reuters, AP, Xinhua

February 12, 2021

ស្អាត ហួសនឹងបរិយាយ! ទិដ្ឋភាពពន្លឺភ្លើងពណ៌នាពេលរាត្រី ស្វាគមន៍បុណ្យចូលឆ្នាំចិន ឆ្នាំឆ្លូវ

ទស្សនាបរិយាកាសនាពេលរាត្រី ខណៈរដូវកាលបុណ្យចូលឆ្នាំចិន បានរំកិលខ្លួនចូលមក បណ្ដាអគារខ្ពស់ៗ និងផ្ទះសំបែងទាំងឡាយ នៅក្នុងប្រទេសចិន សុទ្ធតែមានរៀបចំប្រដាប់តុបតែង លម្អដោយភ្លើងពណ៌ ភ្លឺចិញ្ចាញ ដោយក្ដីសង្ឃឹមថា ជីវិតនឹងរឹតតែល្អប្រសើរឡើង ក្នុងឆ្នាំថ្មីនេះ តាមប្រតិទិនចន្ទគតិ៕

https://www.youtube.com/watch?v=ARL7rptFXWs

ប្រភព៖ XINHUA NEWS
ប្រែ និងសម្រួលដោយ ទិទីតំតាតូ

February 12, 2021

អាមេរិកដាក់ទណ្ឌកម្មលើអគ្គមេបញ្ជាការកងទ័ពមីយ៉ានម៉ា

សហរដ្ឋអាមេរិកចេញបញ្ជាឱ្យដាក់ទណ្ឌកម្មចំពោះអគ្គមេបញ្ជាការកងទ័ពរបស់ប្រទេសមីយ៉ានម៉ា លោកឧត្ដមសេនីយ៍ Min Aung Hlaing រួមនឹងមេបញ្ជាការកងទ័ពជាច្រើនរូបទៀត ដោយសារតែអំពើរដ្ឋប្រហារកាលពីដើមខែនេះ។

ក្រសួងហិរញ្ញវត្ថុអាមេរិក កាលពីថ្ងៃទី 11 កុម្ភៈ បានប្រកាសថា វិធានការដាក់ទណ្ឌកម្មថ្មីនេះ សំដៅលើក្រុមមន្ត្រីយោធាជាន់ខ្ពស់របស់មីយ៉ានម៉ា ដែលជាអ្នកដឹកនាំរដ្ឋប្រហារទម្លាក់រដ្ឋាភិបាលស្របច្បាប់របស់លោកស្រី Aung San Suu Kyi កាលពីថ្ងៃទី 1 ខែកុម្ភៈ ឆ្នាំ 2021។ មុននោះ ប្រធានាធិបតីអាមេរិក លោក Joe Biden ក៏បានចុះហត្ថលេខាលើបទបញ្ជាមួយដែលអនុញ្ញាតឱ្យក្រសួងហិរញ្ញវត្ថុដាក់ទណ្ឌកម្មទៅលើក្រុមមន្ត្រីយោធាជាន់ខ្ពស់មីយ៉ានម៉ា និងក្រុមគ្រួសាររបស់ពួកគេ ទាក់ទិននឹងអំពើរដ្ឋប្រហារ។

«ក្រសួងហិរញ្ញវត្ថុបានកំណត់យកមន្ត្រីយោធាចំនួន 10 នាក់ បូករួមទាំងអ្នកកំពុងកាន់អំណាច ទាំងអ្នកបានចូលនិវត្តន៍ ដែលពួកគេទទួលខុសត្រូវចំពោះរដ្ឋប្រហារកាលពីថ្ងៃទី 1 កុម្ភៈ ឬជាមនុស្សដែលមានទំនាក់ទំនងជាមួយរបបសឹកមីយ៉ានម៉ា» ក្រសួងហិរញ្ញវត្ថុអាមេរិកប្រកាសដូច្នេះ។

អគ្គមេបញ្ជាការកងទ័ពរបស់មីយ៉ានម៉ា លោក Min Aung Hliang

នៅក្នុងបញ្ជីឈ្មោះក្រុមមន្ត្រីយោធាដែលត្រូវបានអាមេរិកដាក់ទណ្ឌកម្មក៏មានឈ្មោះរបស់អគ្គមេបញ្ជាការកងទ័ពមីយ៉ានម៉ា លោក Min Aung Hlaing រួមនឹងអគ្គមេបញ្ជាការរងរបស់លោក ឈ្មោះ Soe Win និងសមាជិកចំនួន 4 នាក់មកពីក្រុមប្រឹក្សាគ្រប់គ្រងប្រទេសរបស់មីយ៉ានម៉ាផងដែរ។

ក្រុមមន្ត្រីយោធាដែលត្រូវរងទណ្ឌកម្មរបស់សហរដ្ឋអាមេរិកនេះ នឹងត្រូវបានរារាំងមិនឱ្យប្រើប្រាស់ខ្ទង់ប្រាក់ជាង 1 ពាន់លានដុល្លារដែលមីយ៉ានម៉ាបានផ្ញើនៅសហរដ្ឋអាមេរិក។ ទណ្ឌកម្មនេះក៏ជះឥទ្ធិពលដល់ក្រុមហ៊ុននានារបស់មីយ៉ានម៉ា មានដូចជា ក្រុមហ៊ុន Myanmar Ruby និង Myanmar Imperial Jade រួមនឹងបណ្ដាក្រុមហ៊ុនដទៃទៀតដែលគ្រប់គ្រងដោយរដ្ឋ។

កងទ័ពមីយ៉ានម៉ា បានចោទប្រកាន់ថាមានអំពើលួចបន្លំសន្លឹកឆ្នោតនៅក្នុងការបោះឆ្នោតកាលពីចុងឆ្នាំ 2020 ដែលជ័យជំនះបានទៅលើបក្សសម្ព័ន្ធជាតិដើម្បីប្រជាធិបតេយ្យ (NLD) របស់ទីប្រឹក្សារដ្ឋ លោកស្រី Aung San Suu Kyi។ នេះគឺជាមូលហេតុដែលកងទ័ពមីយ៉ានម៉ាប្រើប្រាស់ដើម្បីធ្វើរដ្ឋប្រហារយោធា៕

ប្រភព៖ Al Jazeera

February 12, 2021

អាហារសិរីមង្គល នៃរដូវកាលបុណ្យចូលឆ្នាំចិន

បុណ្យចូលឆ្នាំចិន ឆ្នាំឆ្លូវ 2021 នេះ ត្រូវនឹងថ្ងៃទី12 កុម្ភៈ…ប្រពៃណីការបរិភោគអាហារ ក្នុងឱកាសឆ្លងឆ្នាំចាស់ ឈានចូលឆ្នាំថ្មី អាចនិយាយបានថា ជាប្រពៃណីដ៏សំខាន់មួយក្នុងរដូវកាលឆ្នាំថ្មី តាមប្រពៃណីរបស់ជនជាតិចិន ដែលបានធ្វើបន្តគ្នាមក រហូតដល់បច្ចុប្បន្ន។

មុខម្ហូបធ្វើពីត្រី ជាអាហារសម្រាប់ថ្ងៃបុណ្យចូលឆ្នាំចិន ដើម្បីជាគន្លឹះមង្គលឱ្យ “មានលុយកាក់មាសប្រាក់ ហូរចូលបរិបូរណ៍ ចាយមិនអស់”

មុខម្ហូបធ្វើពីសាច់មាន់ ជាអាហារសិរីមង្គល ក្នុងថ្ងៃចូលឆ្នាំចិន ដែលមិនអាចខ្វះបាន…”មាន់” ក្នុងភាសាចិនគឺ “ជី” សំនៀងអានស្រដៀងនឹងពាក្យថា “ជី” ដែលមានន័យថា “សិរីមង្គល”

“ចៀវជឺ” ឬកៀវ ការបរិភោគកៀវ ក្នុងថ្ងៃចូលឆ្នាំថ្មីចិន មានបង្កប់អត្ថន័យរបស់ភាពសប្បាយរីករាយ ភាពចុះសម្រុងគ្នាជាធ្លុងមួយ សិរីមង្គល សមបំណងប្រាថ្នា និងមានអាយុយឺនយូរ

នំ “មៀនកៅ” ដែលខ្មែរយើងហៅថា នំជាល…ភាសាចិន នំមៀនកៅ ត្រូវគ្នានឹងសំឡេងក្នុងភាសាចិន “មៀនមៀនកៅ” ដែលមានន័យថា “ខ្ពស់ឡើងៗ រៀងរាល់ឆ្នាំ”

ម្ហូបអាហារសម្រាប់ថ្ងៃចូលឆ្នាំចិន តែងតែមានបិទក្រដាសពណ៌ក្រហម ឬមានបន្ថែមពណ៌ក្រហមជានិច្ច

នំរូបត្រី សម្រាប់បរិភោគក្នុងឱ្យកាសឆ្លងចូលឆ្នាំថ្មី ជាការឧបកិច្ចឱ្យ “មានលុយ មានកាក់ មានមាស មានប្រាក់ ចាយវាយមិនអស់”

“ផ្លែក្រូច” ក្នុងភាសាចិនបញ្ចេញសំឡេងថា “ជីជី” ស្រដៀងនឹងសំនៀងថា “ជី” ដែលមានន័យថា “សិរីមង្គល” ដូច្នេះហើយ ទើបផ្លែក្រូចពណ៌លឿង ក្លាយជាផ្លែឈើ ដែលត្រូវតែមាននៅលើតុសែនទេវតាជាប្រចាំ

ប្រភព៖ សារព័ត៌មានបរទេស

ប្រែ និងសម្រួលដោយ ទិទីតំតាតូ

February 12, 2021

ស្លាប់ជាង 486,900នាក់ដោយសារ Covid-19 អាមេរិកទិញវ៉ាក់សាំងចំនួន 200លានដូសបន្ថែមទៀត

សហរដ្ឋអាមេរិកគឺជាតំបន់សម្បុកវីរុស Covid-19 ធំជាងគេបង្អស់នៅក្នុងពិភពលោក ដោយមានករណីវិជ្ជមានសរុបចំនួន 28,000,788 នាក់ ក្នុងនោះមានអ្នកស្លាប់ចំនួន 486,914 នាក់។ ក្នុងរយៈពេល 24 ម៉ោងកន្លងទៅនេះ អាមេរិកបានរកឃើញករណីឆ្លងថ្មីចំនួន 93,199 នាក់ និងអ្នកស្លាប់ថ្មីចំនួន 2,657 នាក់។

ប្រធានាធិបតី Joe Biden កាលពីថ្ងៃទី 11 កុម្ភៈ បានឱ្យដឹងថា សហរដ្ឋអាមេរិកបានចុះហត្ថលេខាទិញវ៉ាក់សាំងប្រឆាំង Covid-19 ចំនួន 200 លានដូសបន្ថែមទៀត និងកំពុងតែរៀបចំសម្រាប់ផ្ដល់វ៉ាក់សាំងឱ្យបានគ្រប់គ្រាន់សម្រាប់ពលរដ្ឋចំនួន 300 លាននាក់នៅចុងខែកក្កដា ឆ្នាំ 2021។

«ក្នុងរយៈពេលបីសប្ដាហ៍កន្លងមក ដោយការធ្វើការទាំងយប់ថ្ងៃជាមួយនឹងមនុស្សនៅពីក្រោយ និងនៅខាងមុខជាច្រើននាក់ យើងក៏បានទិញវ៉ាក់សាំងគ្រប់ចំនួនសម្រាប់ចាក់ឱ្យពលរដ្ឋទាំងអស់របស់សហរដ្ឋអាមេរិក ហើយពេលនេះយើងនឹងប្រឹងប្រែងចាក់ជូនពលរដ្ឋរាប់លាននាក់» លោក Biden ថ្លែងពីវិទ្យាស្ថានជាតិសុខាភិបាល។

លោកបន្ថែមថា «នៅរសៀលនេះ យើងបានចុះហត្ថលេខាលើកិច្ចព្រមព្រៀងចុងក្រោយដើម្បីទិញវ៉ាក់សាំងចំនួន 100 លានដូសពី Moderna និង 100 លានដូសពី Pfizer»។

យោងតាមមជ្ឈមណ្ឌលគ្រប់គ្រង និងទប់ស្កាត់រោគឆ្លងអាមេរិក (CDC) ជាមធ្យម វ៉ាក់សាំងប្រឆាំង Covid-19 ចំនួន 1.49 លានដូស ត្រូវបានចាក់ជារៀងរាល់ថ្ងៃកាលពីសប្ដាហ៍មុន។

ដោយឡែក នៅទូទាំងពិភពលោក Covid-19 បានសម្លាប់អ្នកជំងឺសរុបចំនួន 2,377,196 នាក់ និងអ្នកកំពុងផ្ទុកវីរុសចំនួន 25,439,999 នាក់ នៅក្នុងចំណោមអ្នកបានឆ្លងសរុបចំនួន 108,278,235 នាក់ ខណៈអ្នកជំងឺបានជាសះស្បើយមានចំនួន 80,311,739 នាក់៕

ប្រភព៖ Reuters, CNN, AFP

February 12, 2021

កម្ពុជារកឃើញករណីវិជ្ជមាននឹង Covid-19 ថ្មីចំនួន 1នាក់ទៀត

ក្រសួងសុខាភិបាលកម្ពុជាឱ្យដឹងថា ករណីវិជ្ជមាននឹង Covid-19 ដែលបានរកឃើញកាលពីថ្ងៃទី 11 កុម្ភៈនេះគឺជាពលករខ្មែរធ្វើដំណើរពីប្រទេសថៃ។

ក្រៅពីករណីឆ្លងថ្មី ព្រឹកនេះក៏មានករណីជាសះស្បើយចំនួន 4 នាក់ទៀតផងដែរ។ ព័ត៌មានលម្អិតអំពីករណីទាំងនេះ សូមបន្តអានរបាយការណ៍របស់ក្រសួងសុខាភិបាលដែលមានដូចខាងក្រោម។

គិតមកដល់ព្រឹកថ្ងៃទី 12 កុម្ភៈ ឆ្នាំ 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 479 នាក់ ក្នុងនោះមានអ្នកជាសះស្បើយចំនួន 463 នាក់ និងអ្នកកំពុងសម្រាកព្យាបាយ មានចំនួន 16 នាក់។

February 12, 2021

វីដេអូ-ទឹកជ្រោះកម្ពស់ 60ម៉ែត្រ ត្រូវកកទាំងស្រុងនៅពេលកំពុងធ្លាក់នៅឯជ្រលងភ្នំ

រដូវរងាដ៏សែនត្រជាក់ ធ្វើឱ្យទឹកជ្រោះដែលធ្លាក់ចុះតាមជ្រលងភ្នំមួយនៅភាគខាងលិចនៃសហរដ្ឋអាមេរិក បានកកទាំងស្រុង បង្កើតបានជាទិដ្ឋភាពដ៏អស្ចារ្យគួរជាទីគយគន់។

ទឹកជ្រោះដែលមានកម្ពស់ដល់ទៅ 60 ម៉ែត្រ ធ្លាក់ចុះនៅឯជ្រលងភ្នំមួយដែលមានឈ្មោះថា Waterfall Canyon មានទីតាំងនៅក្នុងតំបន់ Ogden នៃរដ្ឋ Utah ភាគខាងលិចសហរដ្ឋអាមេរិក ធ្វើឱ្យទឹកត្រូវកកជាទឹកកកទាំងស្រុងក្រោមអាកាសធាតុដ៏សែនត្រជាក់ បង្កើតបានជាទិដ្ឋដ៏គួរគយគន់ដែលមនុស្សស្ទើរតែទាំងអស់មិនធ្លាប់បានឃើញក្នុងមួយជីវិត។

វីដេអូបង្ហាញអំពីទិដ្ឋភាពនេះ ត្រូវបានថតកាលពីថ្ងៃទី 4 កុម្ភៈ ឆ្នាំ 2021 ដោយកាមេរ៉ានៃយន្តហោះដ្រោនរបស់អ្នកដើរផ្សងព្រេងផ្លូវឆ្ងាយម្នាក់ដែលមានឈ្មោះថា Justin McFarland។ វីដេអូនេះបង្ហាញថា ទឹកធ្លាក់ដែលកកនេះមានពណ៌សក្បុស និងបង្ហាញខ្លួនយ៉ាងលេចធ្លោនៅកណ្ដាលជ្រលងភ្នំដែលហាក់ឈរត្រង់ទៅលើ និងមានពណ៌ប្រផេះ។

ជ្រោះទឹកធ្លាក់ខាងលើនេះគឺជាផ្នែកមួយនៃដងផ្លូវថ្មើរជើង Waterfall Canyon Trail ដ៏ល្បីឈ្មោះ មានប្រវែងជាង 4 គីឡូម៉ែត្រ និងមានកម្ពស់រហូតដល់ 365 គីឡូម៉ែត្រ។ នៅរដូវរងា សីតុណ្ហភាពនៅតំបន់នេះតែងតែធ្លាក់ចុះដល់ក្រោម 0 អង្សាសេ ជាហេតុធ្វើឱ្យទឹកជ្រោះនៅទីនេះត្រូវកកទាំងស្រុង៕

ប្រភព៖ Storyfull

February 11, 2021

អាមេរិកដាក់ទណ្ឌកម្មថ្មីលើក្រុមឧត្ដមសេនីយ៍មីយ៉ានម៉ា ក្រោយរដ្ឋប្រហាររបស់កងទ័ព

ប្រធានាធិបតីអាមេរិកបានចេញបទបញ្ជាមួយដែលបើកផ្លូវឱ្យរដ្ឋាភិបាលអាមេរិកចាប់ផ្ដើមចាត់វិធានការដាក់ទណ្ឌកម្មថ្មីនានារបស់ប្រទេសនេះ ប្រឆាំងនឹងក្រុមមេដឹកនាំយោធាមីយ៉ានម៉ា បន្ទាន់ពីការធ្វើរដ្ឋប្រហាររបស់កងទ័ពប្រទេសអាស៊ីអាគ្នេយ៍មួយនេះ។

កាលពីថ្ងៃទី 10 កុម្ភៈ ប្រធានាធិបតី Joe Biden បានឱ្យដឹងថា បទបញ្ជានេះនឹងអនុញ្ញាតឱ្យរដ្ឋាភិបាលរបស់លោក «ចាប់ផ្ដើមការដាក់ទណ្ឌកម្មភ្លាមៗទៅលើក្រុមមេដឹកនាំយោធាដែលបានដឹកនាំរដ្ឋប្រហារ និងផលប្រយោជន៍ផ្នែកជំនួញរបស់ពួកគេ ក៏ដូចជាសមាជិកគ្រួសាររបស់ពួកគេ»។

លោក Biden និងក្រសួងហិរញ្ញវត្ថុអាមេរិក មិនទាន់បានអធិប្បាយឱ្យបានច្បាស់លាស់ថា ក្រុមមន្ត្រីណាខ្លះនឹងត្រូវរងទណ្ឌកម្ម ឬដាក់ទណ្ឌកម្មដោយវិធីណានៅឡើយ។ ប៉ុន្តែ លោក Biden សន្យាថានឹងត្រួតពិនិត្យលើការនាំចេញ និងទប់ស្កាត់ក្រុមឧត្ដមសេនីយ៍ប្រើប្រាស់ខ្ទង់ប្រាក់ 1 ពាន់លានដុល្លាររបស់រដ្ឋាភិបាលមីយ៉ានម៉ាដែលត្រូវបានរក្សាទុកនៅសហរដ្ឋអាមេរិក។

យ៉ាងនេះក្ដី អ្នកនាំពាក្យរបស់ក្រសួងការបរទេសអាមេរិក Ned Price ឱ្យដឹងថា ព័ត៌មានលម្អិតអំពីការដាក់ទណ្ឌកម្មថ្មីនឹងត្រូវបានប្រកាសនៅក្នុងសប្ដាហ៍នេះ។

សូមរំលឹកថា កងទ័ពមីយ៉ានម៉ា កាលពីថ្ងៃទី 1 កុម្ភៈ បានឆ្មក់ចូលចាប់ខ្លួនក្រុមមេដឹកនាំរបស់គណបក្សសម្ព័ន្ធជាតិដើម្បីប្រជាធិបតេយ្យ (NLD) ដែលមានដូចជា ទីប្រឹក្សារដ្ឋ លោកស្រី Aung San Suu Kyi និងប្រធានាធិបតី Win Myint ជាដើម។ កងរថពាសដែក និងទាហានមីយ៉ានម៉ា ក្រោយមកក៏ត្រូវបានដាក់ពង្រាយយ៉ាងឆាប់រហ័សទៅកាន់ទីក្រុងធំៗរបស់ប្រទេសនេះ។ មូលហេតុនៃការធ្វើរដ្ឋប្រហារនេះ ត្រូវបានកងទ័ពនិយាយថា ដើម្បីប្រឆាំងនឹងការដែលអាជ្ញាធរមិនបានដោះស្រាយបញ្ហាទាក់ទងនឹងការលួចបន្លំសន្លឹកឆ្នោតនៅក្នុងការបោះឆ្នោតសភាកាលពីចុងឆ្នាំ 2020៕

ប្រភព៖ Reuters

February 11, 2021

ប្រការទាំងឡាយដែលជនជាតិចិន «តម» បំផុត នៅក្នុងពិធីបុណ្យចូលឆ្នាំប្រពៃណីជាតិ

ប្រជាជាតិចិនមានការគោរពយ៉ាងខ្ជាប់ខ្ជួនចំពោះគោលការណ៍ «តម» នៅក្នុងថ្ងៃបុណ្យចូលឆ្នាំប្រពៃណីរបស់ជនជាតិនេះ ទន្ទឹមនឹងនេះ ពួកគេក៏ព្យាយាមតមនូវប្រការផ្សេងៗគ្នាជាច្រើនទៀតទៅតាមជំនឿរៀងៗគ្រួសារផងដែរ។

ខាងក្រោមនេះគឺជាការសង្ខេបនូវប្រការលេចធ្លោមួយចំនួនដែលជនជាតិចិនតែងតែនាំគ្នាតម នៅពេលពិធីបុណ្យចូលឆ្នាំថ្មីប្រពៃណីជាតិចូលមកដល់៖

1/ និយាយពាក្យអាក្រក់ស្ដាប់ ឬពាក្យនាំសំណាងមិនល្អ៖ ដូចជាពាក្យ «ស្លាប់» «សម្លាប់» «បែកបាក់» «ខ្មោចព្រាយ» «ឈឺចាប់» «អត់ឃ្លាន»។ល។ ប៉ុន្តែ បើអ្នកត្រូវនិយាយជាចាំបាច់ នោះគួរនិយាយពាក្យដែលពីរោះស្ដាប់ជាងនេះ។

2/ លេបថ្នាំ ឬទៅពេទ្យ៖ ជនជាតិចិនភាគច្រើនសង្ឃឹមថា មិនត្រូវលេបថ្នាំ ឬទៅជួបគ្រូពេទ្យ ព្រោះពួកគេជឿថា ប្រការនេះអាចនាំឱ្យពួកគេត្រូវជួបជំងឺពេញមួយឆ្នាំ។

3/ បាក់បែក៖ ចូលឆ្នាំថ្មីថ្ងៃដំបូង មិនត្រូវធ្វើឱ្យបែកបាក់របស់របរ ដូចជា កែវ ចាន ថូផ្កា ឬកញ្ចក់។ល។ ព្រោះអាចជួបបញ្ហាស្រដៀងគ្នានេះក្នុងជីវិត។

4/ បោកខោអាវ៖ ពីរថ្ងៃដំបូងនៃពិធីបុណ្យចូលឆ្នាំចិន ត្រូវបានចាត់ទុកថាជាថ្ងៃកំណើតរបស់ព្រះគង្គា ដូច្នេះ បើសិនជាអ្នកបោកគក់ខោអាវក្នុងថ្ងៃនេះ មានន័យថា អ្នកបានបំពានលើព្រះគង្គា។

5/ បោសសំរាម៖ បើសិនជាចាំបាច់ អ្នកក៏គួរតែបោសសំរាមពីមាត់ទ្វារចូលមកខាងក្នុងផ្ទះ រួចកើបទុកមួយឡែកសិន ដែលនេះតំណាងឱ្យការប្រមូលទ្រព្យ។ ជាងនេះ អ្នកក៏មិនត្រូវបាច ឬបាញ់ទឹកចេញទៅខាងក្រៅផ្ទះនោះដែរ ព្រោះវាតំណាងឱ្យការបាច ឬបង្ហូរទ្រព្យចេញពីផ្ទះ។

6/ កូនស្រីបានរៀបការរួចត្រលប់មកផ្ទះ៖ កូនស្រីដែលមានស្វាមីរួចហើយ មិនត្រូវត្រលប់មកលេងផ្ទះម្ដាយបង្កើតចំថ្ងៃទីមួយនៃឆ្នាំថ្មីនោះឡើយ ព្រោះវាតំណាងឱ្យការបាត់បង់ប្រាក់កាសរបស់ឪពុក ម្ដាយបង្កើត។

7/ ដាស់អ្នកកំពុងគេងក្នុងថ្ងៃទីមួយនៃឆ្នាំថ្មី៖ ព្រោះក្រោយពីភ្ញាក់ដឹងខ្លួន អ្នកដែលត្រូវបានគេដាសនោះនឹងត្រូវធ្វើការយ៉ាងលំបាកពេញមួយឆ្នាំ ដោយគ្មានពេលសម្រាក។

8/ ស្លៀកពាក់ដាច់ រហែក៖ ខោអាវថ្មី ស្អាតបាត តំណាងឱ្យប្រការថ្មីៗ ស្រស់ស្រាយ ចំណែកការស្លៀកពាក់ខោអាវដាច់រហែក ឬចាស់ គឺតំណាងឱ្យភាពក្រខ្សត់ថោកទាប។

ក្រៅពីប្រការខាងលើ ក៏នៅមានប្រការជាច្រើនដែលអ្នកគួរតែ «តម» រួមមាន៖ សំឡេងយំក្នុងផ្ទះ ទៅខ្ចីប្រាក់ឬសងប្រាក់អ្នកដទៃ ប៉ះពាល់ដល់ម្ជុលដេរខោអាវ ប្រើប្រាស់កន្ត្រៃ កាត់សក់ ហូបបបរជាអាហារពេលព្រឹក សម្ភារដាក់អង្ករបែរជាគ្មានអង្ករ និងការគេងពេលរសៀលជាដើម៕

February 10, 2021

បើកតម្រាពិធីសែនទទួល “ឆ្នាំថ្មីចិន” ធ្វើយ៉ាងម៉េចឱ្យហេងៗ លុយហូរចូល មានបានពេញ ១ឆ្នាំ

បើកតម្រា មើលដំណាក់កាលសែនទេវតា “ចូលឆ្នាំថ្មីចិន ២០២១” រួមទាំងអំឡុងពេល ព្រមទាំងគន្លឹះល្អៗ បង្កើនភាពហេងៗ លុយកាក់មាសប្រាក់ហូរចូលមិនដាច់ពេញ ១ឆ្នាំ។

ចាប់ផ្ដើមរួចរាល់ហើយ សម្រាប់រដូវកាលសំខាន់របស់បងប្អូនប្រជាជនដែលជាប់ខ្សែស្រឡាយចិន និងជនជាតិចិនទូទាំងពិភពលោក គឺ “ថ្ងៃចូលឆ្នាំចិន” តាមប្រតិទិនចិន ដែលឆ្នាំនេះ ថ្ងៃចូលឆ្នាំថ្មីចិន ត្រូវនឹងថ្ងៃទី១២ កុម្ភៈ ២០២១ ដោយនៅក្នុងថ្ងៃសិរីមង្គលបែបនេះ អ្នកហោរាសាស្ត្រល្បីល្បាញ បានបង្ហើបឱ្យដឹងពីតម្រាដំណាក់កាលនៃការសំពះសែនទេវតា “ឆ្នាំថ្មីចិន២០២១” រួមទាំងអំឡុងពេលនៃការសែនព្រេន និងវត្ថុសែនព្រេនសំខាន់ៗ ដែលត្រូវនឹងគោលការណ៍សែនព្រេន ដើម្បីបង្កើនភាពហេងៗ លុយកាក់មាសប្រាក់ហូរចូល។

នៅពេលព្រឹក ចាប់ពីម៉ោង៦ ទៅ

“សែនទេវតា ដោយសាស៊ែ ឬងូវស៊ែ” ឈុតអាហារចម្អាប ដែលប្រកបដោយ សាច់ជ្រូក៣ជាន់ មាន់ស្ងោរ ឬទាខ្វៃ ក្នុងចិត្តអធិដ្ឋានដល់ព្រះអង្គ ទី ជូ អៀក រួមទាំងម្ចាស់ទឹកម្ចាស់ដី “សែនព្រះក្នុងផ្ទះ ដោយទឹកតែ ៥ដង” រួមជាមួយផ្លែឈើ ៥មុខ ដែលមានន័យជាសិរីមង្គល អាចបន្ថែមដោយបង្អែម ឬនំផ្អែម ជាអូវ៉ានី ប៉ិកួយ មានន័យពីភាពក្រអូបឈ្ងុយរបស់ជីវិត និងក្រុមគ្រួសារដែលស្រឡាញ់ និងសាមគ្គីគ្នា ឬចង់មាននំជាល នំគមស្នូលផ្អែម នំល្ង ឬដែលហៅថានំ តែលៀវ ក៏មិនខុសទាស់ដែរ។

ថ្ងៃបន្តិច ជាអំឡុងពេលនៃការសំពះសែនបុព្វបុរសដែលចែកស្ថានទៅហើយ

“សែនបុព្វបុរសដែលចែកស្ថានទៅហើយ ដោយ សាស៊ែ ឬងូវស៊ែ” ដុតក្រដាសមាស ក្រដាសប្រាក់ បញ្ជូនទៅបុព្វបុរសផង អាចបន្ថែមដោយចំណី ឬម្ហូបអាហារដែលបុព្វបុរសចូលចិត្ត និងហាមខ្វះទឹកសម្ល ឬស៊ុប។

ពេលរសៀល ប៉ាយ ហ ហៀ ទី (សែនដួងវិញ្ញាណដែលគ្មានសាច់ញាតិ)

“សែនដល់ខ្មោចដែលគ្មានសាច់ញាតិ” ដោយបាយ ម្ហូប នំនែក និងដុតផាវ ដើម្បីបណ្ដេញអ្វីៗដែលអាក្រក់ចេញ។

ពេលយប់ជ្រៅ

ចាប់ពីអំឡុងពេលកណ្ដាលយប់ ម៉ោង ២៣.០០នាទីតទៅ រហូតដល់ពេលព្រឹក ម៉ោង ៥.០០នាទី នៃថ្ងៃទី12 កុម្ភៈ ថ្ងៃឈីវអ៊ិក (ថ្ងៃដំបូងរបស់ឆ្នាំថ្មី) សំពះសែនអាទិទេព ឆាយ ស៊ីង អៀ និងអាទិទេព ហ៊ី ស៊ីង អៀ (អាទិទេពនៃភាពស្វាគមន៍សប្បាយរីករាយ) សែនដោយ ចេថាយ នំបាញ់ចានឿកក្រហម ផ្លែក្រូច ទឹកតែ ៥ដង និងទឹកសុទ្ធ…។

ប្រភព៖ សារព័ត៌មានបរទេស
ប្រែ និងសម្រួលដោយ ទិទីតំតាតូ

February 10, 2021

Author: សឿន សំណាង