សឿន សំណាង - La Reine Media

តួលេខអ្នកឆ្លង Covid-19 នៅកម្ពុជា និងពិភពលោក សម្រាប់ព្រឹកថ្ងៃទី17កុម្ភៈ

កម្ពុជាមិនមានអ្នកវិជ្ជមានថ្មីជាមួយនឹងវីរុស Covid-19 នោះទេ ប៉ុន្តែមានអ្នកជាសះស្បើយចំនួន 1 នាក់ នៅក្នុងរយៈពេល 24 ម៉ោងនៃថ្ងៃទី 16 កុម្ភៈ ឆ្នាំ 2021។

ក្រសួងសុខាភិបាលបានឱ្យដឹងថា ករណីជាសះស្បើយនេះកើតឡើងចំពោះពលករខ្មែរដែលបានធ្វើដំណើរពីប្រទេសថៃ។ ព័ត៌មានលម្អិត សូមបន្តអានរបាយការណ៍ខាងក្រោម។

គិតមកដល់ព្រឹកថ្ងៃទី 17 ខែកុម្ភៈ ឆ្នាំ 2021 កម្ពុជាមានអ្នកវិជ្ជមាននឹង Covid-19 សរុបចំនួន 479 នាក់ ក្នុងនោះមានអ្នកជាសះស្បើយចំនួន 470 នាក់ និងអ្នកជំងឺកំពុងព្យាបាលមានចំនួន 9 នាក់។

នៅទូទាំងពិភពលោក Covid-19 បានឆ្លងទៅមនុស្សសរុបចំនួន 110,015,844 នាក់ ក្នុងនោះមានអ្នកស្លាប់ដល់ទៅ 2,428,091 នាក់ និងអ្នកជំងឺកំពុងព្យាបាលចំនួន 22,753,796 នាក់៕

February 17, 2021

បើសិនប្រមូលយកវីរុស Covid-19 ទាំងអស់នៅលើពិភពលោក មកដាក់មួយកន្លែង តើពួកវាមានទំហំប៉ុនណា?

លទ្ធផលនៃការសិក្សាស្រាវជ្រាវថ្មីមួយរបស់គណិតវិទូជនជាតិអង់គ្លេស បានបង្ហាញថា «គេអាចយកវីរុស Covid-19 ទាំងអស់ដែលកំពុងមានវត្តមាននៅទូទាំងពិភពលោក មកដាក់ចូលគ្នាបានមួយកំប៉ុងទឹកក្រូចមានហ្កាស ចំណុះ 330 មិល្លីលីត្រ»។

យោងតាមសារព័ត៌មាន Independent បណ្ឌិត Kit Yates សាស្ត្រាចារ្យផ្នែកគណិតវិទ្យាប្រចាំសាកលវិទ្យាល័យ Bath (អង់គ្លេស) ត្រូវបានស្នើឱ្យគណនាលើទំហំសរុបនៃវីរុស Covid-19 ដែលកំពុងមានវត្តមាននៅលើពិភពលោកទាំងមូល។ សាស្ត្រាចារ្យរូបនេះ ឱ្យដឹងថា វីរុស Covid-19 ចំនួនប្រហែល ពីរលានលានលាន/ពីររយកោដិកោដិ (2,000,000,000,000,000,000) កូន កំពុង «រស់» នៅលើភពផែនដី។

ដើម្បីជាឧទាហរណ៍ លោកបណ្ឌិត Yates បានបកស្រាយថា លោកបានរកឃើញប្រវែងអង្កត់ផ្ចិតមធ្យមរបស់វីរុស Covid-19 មួយគ្រាប់ ដោយមានប្រវែងប្រហែល 100 nanomet ពោលគឺស្មើនឹង 1/100 ពាន់លានម៉ែត្រ។ ក្រោយមក លោកបន្តគណនាលើទំហំរបស់គ្រាប់វីរុសក្នុងទម្រង់ជារាងមូល។

លោកសាស្ត្រាចារ្យបន្ថែមថា សូម្បីតែគណនាទាំងប្រូតេអ៊ីនដែលស្ថិតនៅចន្លោះនៃបណ្ដាគ្រាប់វីរុស Covid-19 (ជាក់ស្ដែងគឺថា បណ្ដាគ្រាប់វីរុសរាងមូលនឹងបន្សល់ទុកចន្លោះប្រហោងពេលត្រូវបានដាក់លើគ្នា) ក៏ទំហំសរុបរបស់វីរុសទាំងអស់នោះ នៅតែតូច ឬតិចជាងភេសជ្ជមានហ្គាសមួយកំប៉ុងដែលមានចំណុះ 330 មិល្លីលីត្រ។

ទំហំរបស់វីរុស Covid-19 ធៀបនឹងសរសៃសក់របស់មនុស្ស

លោកបណ្ឌិតថ្លែងថា៖ «ពិតជាគួរឱ្យភ្ញាក់ផ្អើល នៅពេលគេគិតថា រាល់ការខូចខាត និងការបាត់បង់ជីវិតមនុស្ស ដែលបានកើតឡើងកាលពីឆ្នាំកន្លងទៅដោយសារតែ Covid-19 គឺអាចដាក់បានតែមួយកំប៉ុងយ៉ាងដូច្នេះសោះ។ ប្រាកដណាស់ វានឹងក្លាយជាភេសជ្ជដ៏មហាសែនអាក្រក់ជាទីបំផុតក្នុងប្រវត្តិសាស្ត្រ»។

លទ្ធផលនៃការគណនារបស់លោក Yates បានបញ្ជាក់ថា បើទោះជាវីរុស Covid-19 មានទំហំមហាសែនតូចក៏ពិតមែន ប៉ុន្តែ ពួកវាមានអំណាចយ៉ាងខ្លាំងក្លា អាចបង្កវិនាសកម្មមហាធំធេងនៅទូទាំងពិភពលោក។

គិតមកដល់រសៀលថ្ងៃទី 16 ខែកុម្ភៈ ឆ្នាំ 2021 វីរុស Covid-19 បានសម្លាប់មនុស្សជាង 2,420,000 នាក់ និងកំពុងបង្កជំងឺដល់មនុស្សចំនួនជាង 22,866,000 នាក់ផ្សេងទៀត នៅក្នុងចំណោមមនុស្សជាង 109,715,000 នាក់ ដែលបានឆ្លងវីរុសនេះ៕

ប្រភព៖ Independent

February 16, 2021

ហ្វីលីពីនរិះគន់ថា «ជំនួយផ្នែកយោធារបស់អាមេរិក ប្រៀបបានទៅនឹងខ្ទង់ប្រាក់រាយ»

រដ្ឋាភិបាលហ្វីលីពីន យល់ថា ជំនួយផ្នែកយោធាដែលប្រទេសនេះទទួលបានពីសហរដ្ឋអាមេរិក ប្រៀបស្មើនឹង «ខ្ទង់ប្រាក់រាយ» និងបានអំពាវនាវឱ្យទីក្រុងវ៉ាស៊ីងតោន បង្កើនទំហំកញ្ចប់ជំនួយហិរញ្ញវត្ថុមកឱ្យទីក្រុងម៉ានីល។

«បើសិនជាយើងមានទំនាក់ទំនងយ៉ាងស្អិតល្មួតជាមួយនឹងសម្ព័ន្ធមិត្តដែលមានអំណាចខ្លាំង ខ្ញុំគិតថា វាគួរតែអមជាមួយនឹងជំនួយហិរញ្ញវត្ថុខ្នាតធំ។ យើងទទួលបាន 3.9 ពាន់លានដុល្លារ តើនេះគឺជាខ្ទង់ប្រាក់ដ៏ធំ ឬយ៉ាងណា? វាគ្រាន់តែជាខ្ទង់ប្រាក់រាយប៉ុណ្ណោះ បើធៀបនឹងជំនួយ (របស់អាមេរិក) សម្រាប់ប្រទេសផ្សេង» លោក Harry Roque អ្នកនាំពាក្យរបស់លោកប្រធានាធិបតីហ្វីលីពីន Rodrigo Duterte ថ្លែងកាលពីថ្ងៃទី 15 កុម្ភៈ។

អ្នកនាំពាក្យខាងលើ បានដកស្រង់លទ្ធផលនៃការស្រាវជ្រាវរបស់មជ្ឈមណ្ឌល Stimson ដែលមានមូលដ្ឋាននៅសហរដ្ឋអាមេរិក បានបង្ហាញថា ប្រទេសហ្វីលីពីន ទទួលបានប្រាក់ជំនួយ 3.9 ពាន់លានដុល្លារពីសហរដ្ឋអាមេរិក សម្រាប់ការប្រយុទ្ធប្រឆាំងនឹងក្រុមភេរវកម្ម ដំណាក់កាលឆ្នាំ 2000-2017 ដែលវាតិចជាងឆ្ងាយបើធៀបនឹង 16.4 ពាន់លានដុល្លារដែលសហរដ្ឋអាមេរិកបានជួយដល់ប្រទេសប៉ាគីស្ថាន នៅក្នុងដំណាក់កាលដូចគ្នា។

ស្ថានទូតអាមេរិកប្រចាំរដ្ឋធានីម៉ានីល មិនទាន់បញ្ចេញប្រតិកម្មអ្វីទៅនឹងការលើកឡើងនេះនៅឡើយ។ កាលពីខែធ្នូ 2020 ស្ថានទូតអាមេរិកបានឱ្យដឹងថា ហ្វីលីពីន កំពុងទទួលបានជំនួយច្រើនជាងគេបង្អស់ពីសហរដ្ឋអាមេរិក នៅក្នុងតំបន់ឥណ្ឌា-ប៉ាស៊ីហ្វិក ជាមួយនឹងសព្វាវុធដែលមានតម្លៃឡើងដល់ 689 លានដុល្លារ។

លោក Harry Roque អ្នកនាំពាក្យរបស់ប្រធានាធិបតីហ្វីលីពីន Rodrigo Duterte

ប្រធានាធិបតីហ្វីលីពីន ធ្លាប់បានរអ៊ូរទាំថា រដ្ឋាភិបាលអាមេរិក មិនបានអនុវត្តទៅតាមកិច្ចសន្យាដែលបានធ្វើជាមួយកងទ័ពប្រទេសនេះ ដូចជាករណីដែលទីក្រុងម៉ានីលយល់ព្រមចំណាយប្រាក់ដើម្បីទិញកាំជ្រួចនាំផ្លូវ ពីរដ្ឋាភិបាលរបស់អតីតប្រធានាធិបតី Donald Trump ប៉ុន្តែ មិនទទួលបានចម្លើយ។ លោក Duterte កាលពីសប្ដាហ៍មុន ក៏បានស្នើឱ្យអាមេរិកសងប្រាក់មកវិញ បើសិនជាចង់រក្សា «កិច្ចព្រមព្រៀងទស្សនកិច្ចប្រដាប់អាវុធ VFA» (Philippines–United States Visiting Forces Agreement) ដែលអនុញ្ញាតឱ្យទីក្រុងវ៉ាស៊ីងតោន ដាក់ពង្រាយកងកម្លាំងប្រដាប់អាវុធនៅប្រទេសនេះ។

VFA គឺជាកិច្ចព្រមព្រៀងមួយដែលត្រូវបានហ្វីលីពីន និងសហរដ្ឋអាមេរិកបង្កើតឡើងកាលពីឆ្នាំ 1998 ដើម្បីជាមូលដ្ឋានច្បាប់ អនុញ្ញាតឱ្យមានវត្តមានកងទ័ពអាមេរិកនៅលើទឹកដីហ្វីលីពីន និងគាំទ្រដល់កិច្ចព្រមព្រៀងការពាររួម ដែលធានាថា ប្រទេសទាំងពីរនឹងជួយគាំទ្រផ្នែកយោធាដល់គ្នា នៅក្នុងករណីដែលទឹកដីរបស់ពួកគេនៅក្នុងមហាសមុទ្រប៉ាស៊ីហ្វិក ត្រូវរងការវាយប្រហារ។

ប្រធានាធិបតី Duterte កាលពីឆ្នាំទៅ ក៏ធ្លាប់បានប្រកាសរំលាយកិច្ចព្រមព្រៀង VFA ផងដែរ ក្រោយពីសមាជិកព្រឹទ្ធសភាហ្វីលីពីន Ronald “Bato” dela Rosa ត្រូវសហរដ្ឋអាមេរិកបដិសេធការផ្ដល់ទិដ្ឋាការ ព្រោះតែរងការចោទប្រកាន់ថា បានសម្លាប់មនុស្សដោយគ្មានការកាត់ទោស ក្នុងគ្រាកំពុងកាន់កាប់តំណែងជាមេបញ្ជាការប៉ូលិសជាតិហ្វីលីពីន ទាក់ទងនឹងយុទ្ធនាការប្រយុទ្ធប្រឆាំងនឹងក្រុមជួញដូរគ្រឿងញៀន។

លោក Duterte បានផ្អាកបណ្ដោះអាសន្ននូវការរំលាយកិច្ចព្រមព្រៀង VFA នៅក្នុងស្ថានការណ៍ Covid-19 កំពុងឆ្លងរាលដាល។ ប៉ុន្តែ កាលពីខែធ្នូ ឆ្នាំ 2020 លោកបានបន្តគំរាមថា នឹងបញ្ចប់កិច្ចព្រមព្រៀងនេះ បើសិនអាមេរិកមិនផ្ដល់វ៉ាក់សាំង Covid-19 យ៉ាងតិច 20 លានដូស មកឱ្យហ្វីលីពីន៕

ប្រភព៖ Reuters

February 16, 2021

ការងារបូមប្រេងឆៅនៅតំបន់អប្សរា ប្លុក A ក្នុងខេត្តព្រះសីហនុ កំពុងតែដំណើរការយ៉ាងល្អ

បច្ចុប្បន្ននេះ ការងារបូមប្រេងឆៅ របស់ក្រុមហ៊ុន Kris Energy នៅតំបន់អប្សរា ប្លុក A ក្នុងដែនសមុទ្រកម្ពុជា ក្នុងខេត្តព្រះសីហនុ កំពុងដំណើរការយ៉ាងល្អ ដែលនេះគឺជាប្រសាសន៍របស់តំណាងរាស្ត្រមណ្ឌលខេត្តព្រះសីហនុ។

កាលពីថ្ងៃចន្ទ ទី 15 ខែកុម្ភៈ ឆ្នាំ 2021 ប្រតិភូគណៈកម្មការទី 9 នៃរដ្ឋសភាកម្ពុជា បានចុះពិនិត្យ និងស្វែងយល់ពីដំណើរការនៃការងារបូមប្រេងឆៅរបស់ក្រុមហ៊ុន Kris Energy នៅតំបន់អប្សរា ប្លុក A ក្នុងដែនសមុទ្ររបស់ខេត្តព្រះសីហនុ។

ប្រតិភូខាងលើដែលរួមមាន លោក កែប ជុតិមា អនុប្រធានគណៈកម្មការ , លោក តាក វណ្ណថា និងលោក នង វាសនា សមាជិកគណៈកម្មការទី 9 នៃរដ្ឋសភាជាតិ រួមជាមួយតំណាងក្រសួងរ៉ែនិងថាមពល និងក្រសួងសេដ្ឋកិច្ចនិងហិរញ្ញវត្ថុ និងតំណាងថ្នាក់ដឹកនាំ រដ្ឋបាលខេត្តព្រះសីហនុផងដែរ។

ក្នុងនាមជាប្រតិភូតំណាងរាស្ត្រមណ្ឌលខេត្តព្រះសីហនុ និងជាសមាជិកគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃរដ្ឋសភា ឯកឧត្តម តាក វណ្ណថា បានទូរទស្សន៍ និងសារព័ត៌មានក្នុងស្រុកថា៖ «អ្នកធ្វើការងារនៅក្នុងកន្លែងបូមប្រេងនេះ ក្រៅពីជនបរទេស ក៍មានជនជាតិខ្មែរយើងដែរ»។

តំណាងរាស្ត្រមណ្ឌលខេត្តព្រះសីហនុរូបនេះបញ្ជាក់ថា៖ «បច្ចុប្បន្ននេះ ការងារបូមប្រេងឆៅ របស់ក្រុមហ៊ុន Kris Energy នៅតំបន់អប្សរា ប្លុក A ក្នុងដែនសមុទ្រ កម្ពុជា ក្នុងខេត្តព្រះសីហនុ កំពុងដំណើរការយ៉ាងល្អ ដែលជាលទ្ធផលល្អសម្រាប់ព្រះរាជា ណាចក្រកម្ពុជាយើង ក្រោមគោលនយោបាយ ដឹកនាំរបស់សម្តេចអគ្គមហាសេនាបតីតេជោ ហ៊ុន សែន បន្ទាប់ពីវឌ្ឍនភាពការងារបូមប្រេងនៅកម្ពុជាសម្រេចលទ្ធផល ទទួលយកបានដំណក់ប្រេងជាលើកដំបូង កាលពីថ្ងៃទី 29 ខែធ្នូ ឆ្នាំ 2020»៕

February 16, 2021

Elon Musk អញ្ជើញប្រធានាធិបតី Putin ជជែកគ្នានៅលើកម្មវិធីថ្មីមួយដែលសំឡេងមិនអាចត្រូវបានរក្សាទុក ឬថតចម្លង

ការជជែកគ្នារវាងមហាសេដ្ឋីអាមេរិក Elon Musk និងកំពូលមេដឹកនាំរុស្ស៊ី លោក Vladimir Putin នឹងកើតឡើងដែរ ឬទេ?

សារព័ត៌មាន CNN បានរាយការណ៍ថា លោក Elon Musk បានបង្ហាញពីបំណងអញ្ជើញប្រធានាធិបតីរុស្ស៊ី លោក Vladimir Putin ដើម្បីនិយាយគ្នាលេងនៅលើកម្មវិធីមួយរបស់បណ្ដាញសង្គមថ្មីដែលលោក Musk ចូលចិត្ត នោះគឺ Clubhouse។

កាលពីថ្ងៃទី 7 កុម្ភៈ CEO របស់ក្រុមហ៊ុន Tesla បានរំលឹកដល់គណនីផ្លូវការរបស់វិមានក្រិមឡាំង (Kremlin) ដើម្បីសាកសួរថា តើប្រធានាធិបតីរុស្ស៊ី លោក Putin ចង់ចូលរួមក្នុងការជជែកគ្នាជាមួយលោក នៅលើកម្មវិធី Clubhouse ដែរ ឬទេ។

«តើលោកមានបំណងចូលរួមក្នុងការជជែកគ្នាជាមួយខ្ញុំ នៅលើ Clubhouse ដែរ ឬយ៉ាងណា?» លោក Musk សរសេរដូច្នេះ និងបានបង្ហោះសារមួយឃ្លាដែលត្រូវបានសរសេរជាភាសារុស្ស៊ី ដែលមានខ្លឹមសារថា៖ «ពិតជាមានកិត្តិយសខ្លាំងណាស់ បើសិនជាបានជជែកជាមួយលោក»។

ឆ្លើយតបនឹងការអញ្ជើញរបស់មហាសេដ្ឋីអាមេរិកដើមកំណើតអាហ្វ្រិកនេះ តំណាងរបស់វិមានក្រិមឡាំង និយាយថា៖ «ការអញ្ជើញ» របស់លោក Elon Musk ពិតជាគួរឱ្យចាប់អារម្មណ៍ ប៉ុន្តែពួកគេត្រូវការស្វែងយល់លម្អិតជាងនេះ។ «យើងនឹងពិនិត្យមើល មុននឹងមានការឆ្លើយតបនាពេលក្រោយ» Dmitry Peskov តំណាងរបស់លោក Putin បានប្រាប់ក្រុមអ្នកយកព័ត៌មាននៅក្នុងថ្ងៃនេះ។

ជាក់ស្ដែង ប្រធានាធិបតី Putin មិនមែនជាបុគ្គលល្បីឈ្មោះតែម្នាក់គត់ដែលលោក Musk បានអញ្ជើញឱ្យចូលរួមពិភាក្សាគ្នានោះទេ ថ្មីៗនេះ CEO របស់ Tesla និង SpaceX រូបនេះ ក៏បានបង្ហើបឱ្យដឹងថា លោក និងអ្នកចម្រៀងរ៉ែប Kanye West អតីតបេក្ខភាពប្រធានាធិបតីអាមេរិក ក៏ធ្លាប់បាននិយាយគ្នាលេងនៅលើកម្មវិធី Clubhouse នេះផងដែរ។

លោក Musk ក៏ធ្លាប់បានបង្ហោះសារមួយឃ្លានៅលើ Twitter ប្រាប់ថា៖ «ផ្អាកការប្រើប្រាស់ Twitter មួយរយៈ» ប្រការនេះធ្វើឱ្យអ្នកវិភាគយល់ថា លោកចង់ប្រាប់ថា នឹងប្ដូរទៅប្រើប្រាស់ Clubhouse ជំនួសឱ្យ Twitter វិញម្ដង។

លោក Kanye West (មហាសេដ្ឋី និងជាអ្នកចម្រៀងរ៉ែបអាមេរិក) និងភរិយា នាង Kim Kardashian

Clubhouse គឺជាកម្មវិធីប្រព័ន្ធផ្សព្វផ្សាយសង្គមដែលយោងទៅលើសំឡេង។ ក្រុមហ៊ុនគ្រប់គ្រង Clubhouse បាននិយាយថា Clubhouse គឺជា «ប្រភេទបណ្ដាញសង្គមថ្មីដែលប្រើប្រាស់សំឡេង អនុញ្ញាតឱ្យគ្រប់គ្នានៅលើពិភពលោក ជជែកគ្នាលេង អភិវឌ្ឍគំនិត ធ្វើឱ្យមិត្តភាពកាន់តែប្រសើរឡើង ហើយអ្នកលេងនឹងអាចជួបមនុស្សថ្មីគួរឱ្យចាប់អារម្មណ៍នៅជុំវិញពិភពលោក»។

ជាមូលដ្ឋាន អ្នកអាចចូលរួម និងចាកចេញពី «បន្ទប់» ជជែកគ្នានានា ដែលមានប្រធានបទខុសៗគ្នា ពោលគឺវាស្រដៀងនឹង podcast ផ្សាយផ្ទាល់ និងដោយសេរី។ អ្នកអាចគ្រាន់តែចាំស្ដាប់ ឬជ្រើសរើសចូលរួមបញ្ចេញមតិទៅក្នុងបន្ទប់ជជែកគ្នាណាមួយនោះក៏បាន។

ចំណុចពិសេសរបស់ Clubhouse នោះគឺ សំឡេងនៃការជជែកគ្នានឹងមិនអាចយកចេញពីកម្មវិធីនេះឡើយ។ នេះគឺជាគោលការណ៍ចម្បង៖ មិនអាចថតសំឡេងនៃការជជែកគ្នា ហើយវានឹងមិនអាចត្រូវបានរក្សាទុក៕

ប្រភព៖ CNN

February 16, 2021

ពលរដ្ឋអូទ្រីស ទទួលបានឧបករណ៍ធ្វើតេស្តវីរុស ដោយមិនគិតថ្លៃ ទុកសម្រាប់ស្វែងរក Covid-19 នៅឯផ្ទះ

ការផ្ដល់ជូនដោយមិនគិតថ្លៃនូវឧបករណ៍ធ្វើតេស្តរកវីរុស Covid-19 នេះ នឹងជួយឱ្យពលរដ្ឋមានភាពងាយស្រួលក្នុងការធ្វើតេស្តដោយខ្លួនឯង និងមិនបាច់ព្រួយចិត្តក្នុងការធ្វើដំណើរទៅកាន់មណ្ឌលសុខភាព ក៏ដូចជាការបារម្ភអំពីហានិភ័យនៃការឆ្លងវីរុសនៅក្នុងសហគមន៍ ពិសេសគឺចំពោះមនុស្សវ័យចំណាស់។

រដ្ឋាភិបាលប្រទេសអូទ្រីស បានឱ្យដឹងថា ការចែកជូនឧបករណ៍ធ្វើតេស្តនេះនឹងចាប់ផ្ដើមពីខែមីនាខាងមុខ ពោលគឺចាប់ពីថ្ងៃទី 1 ខែមីនា ពលរដ្ឋគ្រប់រូបនៅប្រទេសនេះនឹងទទួលបានឧបករណ៍ធ្វើតេស្ត PCR ចំនួន 5 ឈុត ឬអង់ទីក័រ ជារៀងរាល់ខែ ដើម្បីទុកសម្រាប់ធ្វើតេស្តរកវីរុស Covid-19 ដោយខ្លួនឯង។

បច្ចុប្បន្ន កម្មវិធីខាងលើនេះ ទើបតែចាប់ផ្ដើមអនុវត្តចំពោះតែមនុស្សពេញវ័យប៉ុណ្ណោះ ប៉ុន្តែ រដ្ឋាភិបាលក៏កំពុងតែពិចារណាអំពីលទ្ធភាពផ្ដល់ជូនដល់ក្រុមគោលដៅជាកុមារផងដែរ។

រដ្ឋមន្ត្រីក្រសួងសុខាភិបាលនៃប្រទេសអូទ្រីស លោក Rudolf Anschober បាមឱ្យដឹងថា ការធ្វើតេស្តគឺជាវិធានការសំខាន់បំផុតដើម្បីទប់ស្កាត់ការឆ្លងរបស់វីរុស។

ក្នុងសប្ដាហ៍កន្លងទៅ ការធ្វើតេស្ត PCR ចំនួនជាង 3 លានដង និងការផ្ដល់ជូនអង់ទីក័រប្រមាណ 520,000 លើក ត្រូវបានធ្វើឡើងនៅប្រទេសអូទ្រីស។ ក្រៅពីពន្លឿនការធ្វើតេស្តរកវីរុស Covid-19 ប្រទេសអូទ្រីសក៏កំពុងតែផ្ដោតការយកចិត្តទុកដាក់ខ្ពស់ទៅលើយុទ្ធនាការចាក់វ៉ាក់សាំងការពារផងដែរ។ បច្ចុប្បន្ន ពលរដ្ឋនៃប្រទេសនេះប្រមាណជា 387,000 នាក់ ត្រូវបានចាក់វ៉ាក់សាំង ក្នុងនោះមានប្រមាណជា 150,000 នាក់ បានចាក់វ៉ាក់សាំងលើកទីពីរ៕

February 16, 2021

លោកស្រី Aung San Suu Kyi បង្ហាញខ្លួននៅតុលាការ

ទីប្រឹក្សារដ្ឋមីយ៉ានម៉ា លោកស្រី Aung San Suu Kyi បង្ហាញខ្លួននៅចំពោះមុខតុលាការតាមអនឡាញ ទាក់ទងនឹងការចោទប្រកាន់ពីសំណាក់កងទ័ព ប្រឆាំងនឹងលោកស្រី។

Khin Maung Zaw ដែលជាមេធាវីរបស់លោកស្រី Suu Kyi បានឱ្យដឹងថា លោកស្រី Suu Kyi និងប្រធានាធិបតី Win Myint នឹងត្រូវឡើងតុលាការនាថ្ងៃទី 16 កុម្ភៈ និង 17 កុម្ភៈ ឆ្នាំ 2021 ក្រោយពីត្រូវបានចាប់ខ្លួនដោយកងទ័ព នៅក្នុងរដ្ឋប្រហារយោធាកាលពីដើមខែ។ លោក Khin Maung Zaw ក្រោយពីមានកិច្ចប្រជុំជាមួយចៅក្រម បានថ្លែងនៅខាងក្រៅតុលាការ នារដ្ឋធានី ណៃពីដោ ថា «ការបង្ហាញខ្លួននៅចំពោះមុខតុលាការនេះនឹងធ្វើឡើងក្រោមរូបភាពវីដេអូអនឡាញ»។

កងទ័ពមីយ៉ានម៉ា កាលពីថ្ងៃទី 1 កុម្ភៈ បានចាប់ខ្លួនលោកស្រី Suu Kyi រួមនឹងមន្ត្រីជាន់ខ្ពស់ជាច្រើនរូបរបស់រដ្ឋាភិបាលស៊ីវិល ដោយត្រូវបានចោទប្រកាន់ថា មានអំពើលួចបន្លំសន្លឹកឆ្នោត នៅក្នុងការបោះឆ្នោតជាតិកាលពីខែវិច្ឆិកា ឆ្នាំ 2020។ ពីរថ្ងៃបន្ទាប់មក លោកស្រី Suu Kyi ក៏ត្រូវបានចោទប្រកាន់ពីបទនាំចូលខុសច្បាប់ នៅពេលក្រុមប៉ូលិសបានរកឃើញវិទ្យុទាក់ទងចំនួន 6 គ្រឿង ដែលត្រូវបាននាំចូល និងប្រើប្រាស់នៅក្នុងគេហដ្ឋានរបស់លោកស្រី នារដ្ឋធានី ណៃពីដោ។

ចំណែកប្រធានាធិបតី Win Myint ដែលត្រូវបានចាប់ខ្លួនជាមួយលោកស្រី Suu Kyi កាលពីថ្ងៃទី 1 កុម្ភៈ ក៏ត្រូវបានចោទប្រកាន់ពីបទរំលោភបទបញ្ជាហាមការជួបជុំក្នុងការទប់ស្កាត់ Covid-19 នៅពេលលោកបានចូលរួមព្រឹត្តិការណ៍ឃោសនារកសំឡេងឆ្នោតដែលមានមនុស្សរាប់រយនាក់បានចូលរួមកាលពីខែកញ្ញា ឆ្នាំ 2020។

មេដឹកនាំបក្សកាន់អំណាចស្របច្បាប់ទាំងពីររូបខាងលើ មិនបានបង្ហាញខ្លួនជាសាធារណៈចាប់តាំងពីក្រោយរដ្ឋប្រហារ ប៉ុន្តែ បក្សសម្ព័ន្ធជាតិដើម្បីប្រជាធិបតេយ្យ (NLD) ត្រូវបានប្រកាសឱ្យដឹងថា លោកស្រី Suu Kyi នៅមានសុខភាពល្អនៅឡើយ។ មេធាវី Khin Maung Zaw ឱ្យដឹងថា ការឃុំខ្លួនមេដឹកនាំខាងលើនឹងត្រូវបញ្ចប់នៅថ្ងៃទី 17 កុម្ភៈខាងមុខ។ ប៉ុន្តែ មកដល់ថ្ងៃទី 16 កុម្ភៈ លោក Zaw មិនទាន់បានជួបកូនក្ដីរបស់លោកនៅឡើយ។

ចាប់ពីរដ្ឋប្រហារកាលពីថ្ងៃទី 1 កុម្ភៈ មនុស្សប្រមាណ 400 នាក់ ត្រូវបានចាប់ខ្លួន ខណៈបាតុកម្មនៅមីយ៉ានម៉ា បានឈានចូលដល់ថ្ងៃទី 11។ កងទ័ពមីយ៉ានម៉ា បានដាក់ពង្រាយរថពាសដែកជាច្រើនគ្រឿងនៅតាមទីក្រុងធំៗ ដើម្បីទប់ទល់នឹងក្រុមបាតុករ ព្រមទាំងបានកាត់ផ្ដាច់សេវាអ៊ីនធើណិតផងដែរ៕

ប្រភព៖ AFP

February 16, 2021

របាយការណ៍ស្ថានភាព Covid-19 នៅកម្ពុជា និងពិភពលោក សម្រាប់ថ្ងៃទី 16កុម្ភៈ

ក្រសួងសុខាភិបាល បានប្រកាសនាព្រឹកថ្ងៃទី 16 កុម្ភៈ ឆ្នាំ 2021 នេះថា កម្ពុជាមិនមានករណីវិជ្ជមានថ្មីនឹង Covid-19 និងករណីជាសះស្បើយនោះទេ ខណៈពិភពលោករកឃើញអ្នកឆ្លងថ្មីចំនួនជាង 259,078 នាក់ នៅក្នុងអំឡុង 24 ម៉ោងកន្លងទៅនេះ។

គិតមកដល់បច្ចុប្បន្ន កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 479 នាក់ ក្នុងនោះមានអ្នកជាសះស្បើយចំនួន 469 នាក់ ខណៈអ្នកកំពុងព្យាបាលចំនួន 10 នាក់។ ព័ត៌មានបន្ថែម សូមបន្តអានរបាយការណ៍របស់ក្រសួងសុខាភិបាលដូចខាងក្រោម។

នៅទូទាំងពិភពលោក Covid-19 បានឆ្លងទៅមនុស្សចំនួន 109,665,710 នាក់ ក្នុងនោះមាន 2,418,025 នាក់ បានស្លាប់ និង 84,195,584

នាក់ បានជាសះស្បើយ ចំណែកអ្នកកំពុងផ្ទុកវីរុសនេះមានចំនួន 22,899,499 នាក់ ក្នុងនោះក៏មាន 259,078 នាក់ ទើបតែត្រូវបានរកឃើញក្នុងរយៈពេល 24 ម៉ោងចុងក្រោយនេះ៕

February 16, 2021

គម្រោងសាងសង់ព្រលានយន្តហោះថ្មីនៅមណ្ឌលគីរី នឹងត្រូវពន្លឿនដោយគណៈកម្មការអន្តរក្រសួង

គណៈកម្មការអន្តរក្រសួងថ្មីមួយត្រូវបានប្រមុខរដ្ឋាភិបាលកម្ពុជាសម្រេចបង្កើតឡើង ក្នុងបំណងសម្របសម្រួល និងពន្លឿនដំណើរការនៃគម្រោង និងការសាងសង់អាកាសយានដ្ឋានថ្មី ខ្នាតតំបន់នៅខេត្តមណ្ឌលគីរី ដែលជាការវិនិយោគ និងសាងសង់ដោយក្រុមហ៊ុនចិន។

សេចក្ដីសម្រេចរបស់ប្រមុខរដ្ឋាភិបាលកម្ពុជា បានបញ្ជាក់ថា លោកម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិលកម្ពុជា ត្រូវបានចាត់តាំងជាប្រធាននៃគណៈកម្មការអន្តរក្រសួង ដែលមានសមាជិកជាន់ខ្ពស់ចំនួន 13 រូប។

គណៈកម្មការអន្តរក្រសួងនេះមានភារកិច្ចរៀបចំកិច្ចព្រមព្រៀងជាមួយក្រុមហ៊ុនសាងសង់ និងសម្របសម្រួល ផ្ដល់អនុសាសន៍ ពន្លឿនការអនុវត្ត ត្រួតពិនិត្យ តាមដាន និងវាយតម្លៃលើគម្រោង ក៏ដូចជាការសាងសង់ប្រលានយន្តហោះ នេះបើតាមសេចក្ដីសម្រេចមួយដែលត្រូវបានចុះហត្ថលេខាដោយសម្ដេចតេជោ ហ៊ុន សែន កាលពីសប្ដាហ៍មុន។

សូមរំលឹកថា រាជរដ្ឋាភិបាលកម្ពុជាបានសម្រេចជាផ្លូវការ អនុញ្ញាតឱ្យរៀបចំគម្រោងសាងសង់អាកាសយានដ្ឋានថ្មីមួយនៅលើផ្ទៃដីប្រមាណ 600 ហិកតា ដែលស្ថិតនៅក្នុងឃុំសែនមនោរម្យ ស្រុកអូររាំង ខេត្តមណ្ឌលគីរី។

សេចក្ដីប្រកាសរបស់ទីស្ដីការគណរដ្ឋមន្ត្រី ចុះថ្ងៃទី 31 ខែធ្នូ ឆ្នាំ 2020 បានបញ្ជាក់ថា ក្រុមហ៊ុនចិនឈ្មោះ Powerchina International Group គឺជាអ្នកវិនិយោគ និងសាងសង់អាកាសយានដ្ឋាននេះ៕

February 15, 2021

ភ្នំភ្លើង Hawaii «ពាក់មួកព្រឹល» ពេលមើលពីលើមេឃ

រូបភាពយ៉ាងច្បាស់ដែលត្រូវបានថតដោយផ្កាយរណបកាលពីថ្ងៃទី 6 កុម្ភៈ បង្ហាញឱ្យឃើញនូវទិដ្ឋភាពព្រឹលសក្បុសកំពុងគ្របដណ្ដប់លើកំពូលភ្នំភ្លើងចំនួនពីរនៅលើកោះធំជាងគេរបស់ Hawaii នៃសហរដ្ឋអាមេរិក។

រូបភាពដែលថតដោយកាមេរ៉ា Operational Land Imager (OLI) នៅលើផ្កាយរណប Landsat-8 បានបង្ហាញយ៉ាងច្បាស់នូវទិដ្ឋភាពព្រឹលលើកំពូលភ្នំ Mauna Kea និង Mauna Loa និងមានទិដ្ឋភាពថ្មភ្នំភ្លើងព័ទ្ធជុំវិញ។ OLI គឺជាគម្រោងសហការរវាងទីភ្នាក់ងារអវកាសអាមេរិក NASA និងនាយកដ្ឋានស្រាវជ្រាវដីធ្លីអាមេរិក។ រូបថតនេះត្រូវបានចែករំលែកដោយស្ថានីយសង្កេតផែនដីរបស់ NASA។

ព្រឹលត្រូវបានគេសម្គាល់ឃើញថា មិនសូវកើតមាននៅតំបន់ត្រូពិកដូចជា Hawaii នេះទេ ប៉ុន្តែ ជាក់ស្ដែង ព្រឹលបានធ្លាក់នៅទីនេះយ៉ាងក្រាស់។ កំពូលភ្នំភ្លើង Mauna Kea កំពុងតែអសកម្ម ខណៈដែលកំពូលភ្នំភ្លើង Mauna Loa កំពុងធ្វើសកម្មភាពខ្លាំងក្លា និងទៀងទាត់នៅលើកម្ពស់ជាង 4,200 ម៉ែត្រ ធៀបនឹងផ្ទៃទឹកសមុទ្រ។ ភ្នំ Mauna Kea ខ្ពស់ជាង 38 ម៉ែត្រ ធៀបនឹង Mauna Loa និងតែងតែត្រូវគ្របដណ្ដប់ដោយព្រឹលស្ដើងៗយ៉ាងតិចមួយដងក្នុងមួយឆ្នាំ។

ឆ្នាំនេះ ដោយសារតែមានព្យុះខ្លាំង ទើបកំពូលភ្នំទាំងនេះមានព្រឹលដល់ទៅ 3 ដងក្នុងរយៈពេល 3 សប្ដាហ៍កន្លងទៅនេះ ដោយចាប់ផ្ដើមពីថ្ងៃទី 18 មករា។ ដោយឡែក ភ្នំភ្លើងអសកម្ម Haleakala ដែលមានកម្ពស់ 3,000 ម៉ែត្រ និងស្ថិតនៅលើកោះ Maui ក៏មានព្រឹលធ្លាក់យ៉ាងក្រាស់កាលពីថ្ងៃទី 3 ខែកុម្ភៈផងដែរ។

ព្រឹលធ្លាក់នៅលើកោះ Hawaii ក៏មានន័យថា រដ្ឋទាំងអស់របស់សហរដ្ឋអាមេរិក លើកលែងតែ Florida សុទ្ធតែមានព្រឹលធ្លាក់នៅក្នុងរដូវរងាឆ្នាំ 2021 នេះបើតាមគេហទំព័រ Weather Channel។ មូលហេតុនៃបាតុភូតនេះគឺដោយសារការប្ដូរទិសរបស់ខ្យល់ដែលកើតឡើងដោយសារព្យុះ Kona។

ការស្រាវជ្រាវកាលពីឆ្នាំ 2017 របស់មជ្ឈមណ្ឌលស្រាវជ្រាវប៉ាស៊ីហ្វិកអន្តរជាតិ (IPRC) នៃសាកលវិទ្យាល័យ Hawaii នៅ Manoa តាមរយៈទិន្នន័យពីផ្កាយរណប និងគំរូនៅលើកុំព្យូទ័រ បានព្យាករថា ព្រឹលធ្លាក់នៅលើភ្នំភ្លើងនឹងត្រូវថយចុះបន្តិចម្ដងៗនៅចុងសតវត្សរ៍ទី 21 ដោយសារតែការឡើងកម្ដៅផែនដី ក្រោមឥទ្ធិពលនៃការប្រែប្រួលអាកាសធាតុ៕

ប្រភព៖ Live Science

February 15, 2021

Author: សឿន សំណាង