សឿន សំណាង - La Reine Media

ក្រសួងសុខាភិបាលនឹងពិន័យចាប់ពី 1លានរៀល រហូតដល់ 50លានរៀល ចំពោះអ្នកដែលគេចវេះ និងអ្នកនាំគេគេចវេះពីការធ្វើចត្តាឡីស័ក

ការពិន័យចំពោះអ្នកផ្តើមគំនិត ដឹកនាំ ណែនាំ ញុះញង់ បញ្ចុះបញ្ចូល ឬជួយសម្រួលដោយចេតនាដល់អ្នកដំណើរ ឬការីនៃយានដឹកជញ្ជូន ឱ្យគេចចេញពីការត្រួតពិនិត្យ ឬគេចវេះពីការអនុវត្តវិធានចត្តាឡីស័ក ត្រូវបានបង្កើនទម្ងន់បន្ថែមទៀតនៅក្នុងអនុក្រឹត្យថ្មីរបស់រាជរដ្ឋាភិបាលកម្ពុជា ដែលទើបបានចេញកាលពីពេលថ្មីៗនេះ។

ក្នុងនោះ អ្នកដំណើរ ឬការីនៃយានដឹកជញ្ជូន ដែលគេចវេះមិនឱ្យមន្ត្រីចត្តាឡីស័កធ្វើការត្រួតពិនិត្យ ឬមិនសហការជាមួយនឹងមន្ត្រីចត្តាឡីស័ក ក្នុងការអនុវត្តវិធានការសុខាភិបាល ឬមិនបំពេញតាមបែបបទ ដែលមានកំណត់ក្នុងអនុក្រឹត្យចុះថ្ងៃទី 17 ខែកញ្ញា ឆ្នាំ 2015 ស្ដីពីវិធានការសុខាភិបាលដើម្បីទប់ស្កាត់ និងឆ្លើយតបការឆ្លងរាលដាលជាអន្តរជាតិ នៃជំងឺនៅតាមច្រកព្រំដែនរបស់កម្ពុជា នឹងត្រូវទទួលពិន័យអន្តរការណ៍ជាប្រាក់ពី 1 លានរៀល ទៅ 5 លានរៀល និងតម្រូវឱ្យអនុវត្តវិធានការសុខាភិបាល។

អនុក្រឹត្យថ្មីបន្ថែមថា ចំពោះជនណាដែលផ្តើមគំនិត ដឹកនាំ ណែនាំ ញុះញង់ បញ្ចុះបញ្ចូល ឬ ជួយសម្រួលដោយ ចេតនាដល់អ្នកដំណើរឬការីនៃយានដឹកជញ្ជូន ឱ្យគេចចេញពីការត្រួតពិនិត្យ ឬគេចពីការអនុវត្តវិធានការ ចត្តាឡីស័ក ត្រូវទទួលពិន័យអន្តរការណ៍ជាប្រាក់ពី 10 លានរៀល ទៅ 50 លានរៀល។ ការពិន័យទាំងនេះគឺជាសមត្ថកិច្ចរបស់ក្រសួងសុខាភិបាល។

ក្រុមមន្ត្រីចត្តាឡីស័ក នឹងសហការជាមួយអាជ្ញាធរពាក់ព័ន្ធ ដើម្បីបដិសេធការចេញ-ចូលប្រទេសកម្ពុជារបស់អ្នកដំណើរ បើសិនពួកគេមិនព្រមអនុវត្តតាមបទប្បញ្ញត្តិរបស់អនុក្រឹត្យខាងលើ។

អនុក្រឹត្យថ្មីនេះត្រូវបានបង្កើតឡើង បន្ទាប់ពីប្រមុខរដ្ឋាភិបាលកម្ពុជា សម្ដេច ហ៊ុន សែន បានបញ្ជាទៅក្រសួងសុខាភិបាល និងក្រសួងយុត្តិធម៌ រួមនឹងក្រុមប្រឹក្សាអ្នកច្បាប់ឱ្យធ្វើវិសោធនកម្ម«អនុក្រឹត្យលេខ 129 ស្តីពីវិធានការសុខាភិបាលដើម្បីទប់ស្កាត់ និងឆ្លើយតបការឆ្លងរាលដាលជាអន្តរជាតិនៃជំងឺនៅតាមច្រកចេញ-ចូល» របស់កម្ពុជា ដែលការបញ្ជានេះ ធ្វើឡើងតាមរយៈការផ្ញើសារជាសំឡេង កាលពីថ្ងៃទី 15 កុម្ភៈ ឆ្នាំ 2021៕

February 18, 2021

អង់គ្លេសជិតឱ្យអ្នកមានសុខភាពល្អ ប៉ះពាល់ Covid-19 ដើម្បីស្វែងយល់បន្ថែម

ប្រទេសអង់គ្លេសនឹងអនុញ្ញាតឱ្យក្រុមអ្នកស្ម័គ្រចិត្ត ប៉ះពាល់នឹង Covid-19 ដើម្បីសិក្សាស្រាវជ្រាវបន្ថែមអំពីវីរុស បន្ទាប់ពីនាយកដ្ឋានសិលធម៌ផ្នែកវេជ្ជសាស្ត្រប្រទេសនេះ បើកភ្លើងខៀវ។

កាលពីថ្ងៃទី 17 កុម្ភៈ អង់គ្លេសបានក្លាយជាប្រទេសដំបូងគេលើពិភពលោកដែលអនុញ្ញាតឱ្យអ្នកស្ម័គ្រចិត្ត ធ្វើសកម្មភាពប៉ះពាល់នឹង Covid-19 ដើម្បីជួយដល់ការសិក្សាស្រាវជ្រាវផ្នែកវេជ្ជសាស្ត្រអំពីរោគរាតត្បាត។ ការពិសោធនេះនឹងធ្វើឡើងនៅមួយខែទៀត ក្នុងនោះ អ្នកស្ម័គ្រចិត្តចំនួន 90 នាក់ ដែលមានសុខភាពល្អ និងមានអាយុចាប់ពី 18-30 ឆ្នាំ នឹងប៉ះពាល់វីរុស Covid-19 នៅក្នុងបរិស្ថានដែលត្រូវបានគ្រប់គ្រង នេះបើតាមសេចក្ដីប្រកាសមួយចុះផ្សាយកាលពីថ្ងៃទី 17 កុម្ភៈ របស់នាយកដ្ឋានសម្រាប់អាជីវកម្ម ថាមពល និងយុទ្ធសាស្ត្រឧស្សាហកម្មអង់គ្លេស (Department for Business, Energy and Industrial Strategy)។

ការពិសោធខាងលើនេះគឺដើម្បីឱ្យដឹងច្បាស់ថា វីរុស Covid-19 ត្រូវមានបរិមាណកម្រិតណាទើបអាចចម្លងបាន និងដើម្បីស្វែងយល់អំពីប្រតិកម្មនៃប្រព័ន្ធការពាររាងកាយ ក៏ដូចជាវិធីដែលវីរុសអាចចម្លងពីមនុស្សទៅមនុស្ស។ ការសិក្សាស្រាវជ្រាវនេះ នឹងរួមចំណែកជួយឱ្យក្រុមអ្នកវិទ្យាសាស្ត្រអភិវឌ្ឍវ៉ាក់សាំង ក៏ដូចជាវិធីព្យាបាលដ៏សមស្រប។ នេះបើតាម Chris Chiu ប្រធានក្រុមស្រាវជ្រាវ មកពីសាកលវិទ្យាល័យក្រុងឡុងដ៍ (University of London) នៃចក្រភពអង់គ្លេស។

ក្រុមអ្នកស្ម័គ្រចិត្តនឹងត្រូវបានតាមដានយ៉ាងយកចិត្តទុកដាក់បំផុតពីសំណាក់ក្រុមគ្រូពេទ្យ និងអ្នកវិទ្យាសាស្ត្រ។ ក្រុមអ្នកទទួលខុសត្រូវលើការពិសោធនេះ និយាយថា វីរុស Covid-19 ដែលពួកគេយកមកធ្វើការពិសោធលើកនេះ មិនមែនជាវីរុសក្លាយពូជថ្មីនៅអង់គ្លេសនោះទេ ប៉ុន្តែវាជាវីរុស Covid-19 ទម្រង់ដើមកាលពីឆ្នាំ 2020។ រដ្ឋាភិបាលអង់គ្លេស ផ្ដល់ប្រាក់ជំនួយចំនួន 46.6 លានដុល្លារអាមេរិក ដើម្បីគាំទ្រដល់កម្មវិធីពិសោធន៍នេះ។ អ្នកដែលចង់ចូលរួមធ្វើជាអ្នកស្ម័គ្រចិត្ត អាចចុះឈ្មោះបានតាមរយៈគេហទំព័រ UK Covid Challenge ។

នៅប្រទេសអង់គ្លេស គិតមកដល់ព្រឹកថ្ងៃទី 18 កុម្ភៈ ឆ្នាំ 2021 នេះ អ្នកវិជ្ជមាននឹង Covid-19 បានកើនដល់ 4,071,185 នាក់ ក្នុងនោះមានអ្នកស្លាប់ដល់ទៅ 118,933 នាក់ និងអ្នកកំពុងផ្ទុកវីរុស ចំនួន 1,669,549 នាក់ ដែលក្នុងនេះដែរ មាន 2,708 នាក់ អាចនឹងបាត់បង់ជីវិតដោយសារមានអាការធ្ងន់ធ្ងរ៕

ប្រភព៖ AFP

February 18, 2021

ជប៉ុន ចាប់ផ្ដើមហើយ! ចាក់វ៉ាក់សាំងកូវីដ-19 បើកឆាកដោយបុគ្គលិកសុខភាពសាធារណៈ

ជប៉ុន ចាប់ផ្ដើមគ្រោងការវ៉ាក់សាំង-19 ហើយ នៅថ្ងៃពុធ (ទី17កុម្ភៈ)ម្សិលមិញ ដោយការចាក់វ៉ាក់សាំងរបស់ហ្វ៉ៃហ្ស៊ើរ ឱ្យបណ្ដាបុគ្គលិករបស់មន្ទីរពេទ្យតូក្យូ ខណៈដែលលោកនាយករដ្ឋមន្ត្រី យ៉ូឈិហ៊ីដេ ស៊ូង៉ៈ ព្យាយាមយកឈ្នះលើស្ថានការណ៍ការឆ្លងរាលដាល មុនពេលធ្វើជាម្ចាស់ផ្ទះ រៀបចំការប្រកួតកីឡាអូឡាំពិក ក្នុងរដូវក្ដៅនេះ។

ស្ថានីយទូរទស្សន៍ក្នុងតំបន់ បានផ្សព្វផ្សាយ រូបភាពបណ្ដាបុគ្គលិករបស់មន្ទីរពេទ្យ ដែលកំពុងចូលទទួលការចាក់វ៉ាក់សាំង ដោយពួកគេ គឺជាមនុស្ស

1ក្រុម ក្នុងចំណោមធនធានមនុស្សផ្នែកសុខាភិបាល 40,000នាក់ ដែលជាគោលដៅ ក្នុងការបានទទួលវ៉ាក់សាំងកូវីដ-19 ដំបូងៗគេ។

ការចាក់វ៉ាក់សាំងកូវីដ-19 ឱ្យប្រជាជន 126លាននាក់ របស់ប្រទេសជប៉ុនយ៉ាងឆាប់រហ័ស បានក្លាយជាគោលដៅសំខាន់ខ្លាំងបំផុត របស់រដ្ឋបាលលោកនាយករដ្ឋមន្ត្រី ស៊ូង៉ៈ ដោយសារតែព្រឹត្តិការណ៍អូឡាំពិក ហ្គេមស៍ ដែលទីក្រុងតូក្យូ ធ្វើជាម្ចាស់ផ្ទះ នឹងមានកំណត់ចាប់ផ្ដើមឡើង ក្នុងអំឡុងចុងខែកក្កដា ក្រោយពីបានពន្យារពេលកាលពីឆ្នាំទៅ។

ទោះជាដូច្នេះមែន ទម្រាំតែគ្រោងការចាក់វ៉ាក់សាំងឱ្យប្រជាជន នឹងរួចរាល់ស្រេចបាច់ និងចប់ជាស្ថាពរ គេសន្និដ្ឋានថា ប្រហែលជាត្រូវប្រើពេលវេលាយូរដល់ទៅរាប់ឆ្នាំ ដោយក្នុងរយៈពេលដំបូងៗ គឺជាការចាក់ឱ្យធនធានមនុស្សខាងសុខាភិបាល ប្រមាណជា 3.7លាននាក់ និងមនុស្សចាស់ អាយុ 65ឆ្នាំឡើងទៅ ប្រមាណជា 36លាននាក់។

តែយ៉ាងណាក៏ដោយ ប្រទេសជប៉ុន អាចជួបប្រទះនឹងបញ្ហារអាក់រអួលមួយចំនួន ដោយសារមានក្ដីកង្វល់ថា អាចនឹងខាតបង់ដោយឥតប្រយោជន៍ នូវវ៉ាក់សាំងរបស់ហ្វៃហ្ស៊ើរ ចំនួនច្រើនលានដូស ដោយសារតែខ្វះខាតសេរ៉ាំង និងម្ជុលចាក់ថ្នាំ ដែលចាំបាច់សម្រាប់ការបែងចែកវ៉ាក់សាំងផ្ទុកក្នុងដប ចេញជាដូសនីមួយ។

កាលពីអំឡុងចុងខែមករា មានរបាយការណ៍ថា ហ្វ៉ៃហ្ស៊ើរ បានពិចារណាកែសម្រួល បរិមាត្រការប្រើវ៉ាក់សាំងផ្ទុកក្នុងដប ដែលពីមុន ឱ្យចាក់បាន ក្នុង 1ដប 5ដូស មកជា 6ដូស និងចាំបាច់ត្រូវប្រើម្ជុលចាក់ថ្នាំថ្មី ដើម្បីឱ្យត្រូវគ្នាទៀតផងដែរ។

កាលពីមុនពេលនេះ វ៉ាក់សាំងដែលហ្វ៉ៃហ្ស៊ើរ អភិវឌ្ឍរួមជាមួយ បៃអូអេនថេក ត្រូវបានបញ្ជាក់ជាផ្លូវការថា ចាក់បាន 5ដូស ក្នុង 1ដប ដោយនៅពេលដែលត្រូវធ្វើឱ្យរលាយហើយ ក្នុងដបនីមួយៗ នឹងត្រូវបន្សាបដោយទឹកសេរ៉ូម ក្នុងបរិមាត្រ 1.8មីល្លីលិត្រ ធ្វើឱ្យវ៉ាក់សាំង ក្រោយពេលផ្សំរួច មានបរិមាត្រ 2.25មីល្លីលិត្រ និងបែងចែកចាក់ ក្នុង 1ដូស 0.3មីល្លីលិត្រ ដែលក្នុងខាងទ្រឹស្ដីវិញ អាចចាក់បានលើស 7ដូសឯណោះ។

តែទ្រឹស្ដី ជាមួយការប្រតិបត្តិ វាខុសប្លែកពីគ្នា ព្រោះបុគ្គលិកសុខាភិបាល មិនអាចគណនាបរិមាត្រថ្នាំ បានយ៉ាងត្រូវចំប៉ាច់ៗ ក្នុងការធ្វើឱ្យគ្រប់ 7ដូសដើម្បីចាក់ឱ្យបានគ្រប់ចំនួនមនុស្សឡើយ និងទោះជាដូច្នេះមែន បើសិនជាមានឧបករណ៍ដែលស័ក្តិសម ពួកគេអាចចាក់បានក្នុងចំនួន 6ដង ដោយបរិមាណដែលគួរឱ្យជឿជាក់បាន។

ប្រទេសជប៉ុន បានចុះហត្ថលេខាលើកិច្ចសន្យាផ្សេងៗ សម្រាប់ការបញ្ជាទិញវ៉ាក់សាំងកូវីដ-19 សរុបទាំងអស់ជាង 314លានដូស ពីហ្វ៉ៃហ្ស៊ើរ, អ៊ែស្ត្រាហ្សេនេកា និងម៉ូឌើណា ដែលគ្រប់គ្រាន់សម្រាប់ប្រជាជនចំនួន 157លាននាក់ ក្នុងខណៈដែលរហូតមកដល់ពេលនេះ ជប៉ុនរកឃើញអ្នកឆ្លងមេរោគកូវីដ-19 ប្រមាណជា 451,000នាក់ ក្នុងនោះមានស្លាប់ 7.013នាក់រួចហើយ។

ទោះជាករណីអ្នកឆ្លងមេរោគប្រចាំថ្ងៃ បានថយចុះក្នុងអំឡុងច្រើនសប្ដាហ៍កន្លងមក ក្រោយពីហក់ឡើងខ្ពស់បំផុត កាលពីអំឡុងដើមខែមករាក្ដី តែក្រុងតូក្យូ និងខេត្តផ្សេងៗ 9កន្លែងទៀត នៅតែស្ថិតក្រោមការប្រកាសស្ថានការណ៍អាសន្ន ដើម្បីការពារការផ្ទុះឡើងជាថ្មីរបស់ជំងឺរាតត្បាតដ៏ធំនេះដដែល៕

ប្រភព៖ ទីភ្នាក់ងារព័ត៌មានរ៉យទ័រ/អេជេនស៊ី
ប្រែ និងសម្រួលដោយ តាវ៉ែនតា

February 18, 2021

កម្ពុជារកឃើញអ្នកវិជ្ជមាននឹង Covid-19 ចំនួន 4ករណីកាលពីថ្ងៃទី 17កុម្ភៈ

ក្រសួងសុខាភិបាលកម្ពុជា នាព្រឹកថ្ងៃទី 18 ខែកុម្ភៈនេះ បានឱ្យដឹងថា មានករណីវិជ្ជមាននឹង Covid-19 ចំនួន 4 នាក់ ត្រូវបានរកឃើញក្នុងអំឡុង 24 ម៉ោងនៃថ្ងៃទី 17 កុម្ភៈ ដែលទាំងអស់សុទ្ធតែជាករណីនាំចូល។

ករណីឆ្លងថ្មីខាងលើនេះ មិនមែនជាពលករដែលត្រលប់មកពីប្រទេសថៃនោះទេ។ ក្នុងអំឡុងពេលខាងលើ កម្ពុជាមិនមានករណីជាសះស្បើយ។ ព័ត៌មានលម្អិត សូមបន្តអានរបាយការណ៍របស់ក្រសួងសុខាភិបាល មានដូចខាងក្រោម។

គិតមកដល់ព្រឹកថ្ងៃទី 18 ខែកុម្ភៈ ឆ្នាំ 2021 កម្ពុជាមានអ្នកឆ្លងវីរុស Covid-19 សរុបចំនួន 483 នាក់ ក្នុងនោះមានអ្នកជាសះស្បើយចំនួន 470 នាក់ និងអ្នកជំងឺកំពុងព្យាបាលមានចំនួន 13 នាក់៕

February 18, 2021

តួលេខអ្នកស្ម័គ្រចិត្តចាក់វ៉ាក់សាំង Covid-19 នៅកម្ពុជា គិតត្រឹមថ្ងៃទី 17កុម្ភៈ 2021

ក្រសួងសុខាភិបាលកម្ពុជា កាលពីយប់ថ្ងៃទី 17 បានឱ្យដឹងអំពីចំនួនអ្នកស្ម័គ្រចិត្តចាក់វ៉ាក់សាំង Covid-19 Sinopharm របស់ចិន (Sinopharm Beijing Institute of Biological Products) ចាប់ពីថ្ងៃទី 10 ដល់ថ្ងៃទី 17 ខែកុម្ភ: ឆ្នាំ 2021។

តួលេខទាក់ទងនឹងការចាក់វ៉ាក់សាំង Sinopharm របស់ចិននៅកម្ពុជា មានដូចខាងក្រោម៖

អ្នកបានមកចាក់វ៉ាក់សាំង សរុប៖ 3,962 នាក់ (ស្រី 1,428 នាក់) ។
អ្នកបានចាក់វ៉ាក់សាំងរួច៖ 3,236 នាក់ (ស្រី 1,040 នាក់)។
អ្នកស្ម័គ្រចិត្តដែលគ្រូពេទ្យមិនអនុញ្ញាតឱ្យចាក់៖ 726 នាក់ (ស្រី 388 នាក់)

February 18, 2021

ទ្រព្យចូលដល់ក្នុងមាត់! កំពុងហូបខ្យង ស្រាប់តែក្លាយជាអ្នកមានមួយរំពេច ដោយសារខាំចំទ្រព្យតម្លៃរាប់សែនដុល្លារអាមេរិក

អ្នកបើកបររថយន្តដឹកទំនិញម្នាក់នៅប្រទេសថៃ បានប្រទះឃើញទ្រព្យដ៏មានតម្លៃមួយ ដែលជួយឱ្យគាត់រកបានរាប់សែនដុល្លារអាមេរិក នៅពេលកំពុងហូបខ្យងស្ងោរជាមួយប្រពន្ធ និងកូន។

សារព័ត៌មាន Daily Mail បានចេញផ្សាយថា បុរសឈ្មោះ Monthian Jansul អាយុ 40 ឆ្នាំ ជាអ្នកបើកបររថយន្តដឹកទំនិញនៅខេត្ត Chonburi ប្រទេសថៃ ទើបតែបានប្រទះឃើញ «កំណប់» ដ៏មានតម្លៃមួយនៅពេលកំពុងទទួលទានអាហារថ្ងៃត្រង់។

ថ្ងៃទី 10 កុម្ភៈ លោក Monthian បានទៅផ្សារទិញអាហារសមុទ្រមកធ្វើម្ហូប ក្នុងនោះក៏មានខ្យលធំមួយក្បាលតម្លៃ 50 បាត (ប្រហែល 6,700 រៀល)។

មកដល់ផ្ទះ លោក Monthian និងភរិយាក៏បាននាំគ្នាធ្វើម្ហូប។ ក្នុងពេលកំពុងញ៉ាំ កូនប្រុសរបស់ Monthian ក៏ខាំចំវត្ថុរឹងមួយគ្រាប់ដែលមានរូបរាងមូលដូចពងត្រី ប៉ុន្តែមានទំហំធំ។ គ្រាប់ចម្លែកនេះមានពណ៌ទឹកក្រូចដ៏ស្រស់ស្អាត និងមានទម្ងន់ជាង 7 ក្រាម។

ដំបូងឡើយ ពួកគេគិតថា វាគឺជាពងរបស់ព្យង និងមិនបានចាប់អារម្មណ៍អ្វីសោះ។ ប៉ុន្តែ មួយរំពេចក្រោយមក លោក Monthian ក៏ចាប់ផ្ដើមសង្ស័យ និងគិតថា វាអាចជាគជ់ខ្យង។ គាត់ក៏បានដើរស្វែងយល់ និងសួរអ្នកជិតខាង ហើយក៏បានសន្និដ្ឋានថា វាអាចជាគជ់ខ្យង Melo ជាគជ់ខ្យងដ៏កម្រមួយប្រភេទ និងមានតម្លៃខ្ពស់ជាងគេក្នុងពិភពលោក។

«នេះគឺជារបស់ដែលពួកយើងមិនធ្លាប់បានឃើញកន្លងមក។ ខ្ញុំជឿថា យើងអាចរកបានប្រាក់ច្រើនពីគ្រាប់គជ់នេះ និងមានអារម្មណ៍ថា ពិតជាសំណាង» លោក Monthian ថ្លែងដូច្នេះ។

គជ់ខ្យង Melo កកើតឡើងនៅក្នុងសម្បកខ្យងសមុទ្រមួយប្រភេទដែលគេហៅថា Melo Melo។ គជ់ប្រភេទនេះមិនអាចផលិតបានដោយបច្ចេកទេសចិញ្ចឹមបែបសិប្បនិម្មិតនោះឡើយ ដោយវាកកើតតែពីធម្មជាតិ និងកម្រត្រូវបានរកឃើញខ្លាំងណាស់ ដូច្នេះហើយទើបវាមានតម្លៃថ្លៃ។ ខ្យង Melo Melo នេះ មានច្រើននៅសមុទ្រថៃ មីយ៉ានម៉ា កម្ពុជា និងវៀតណាម។

គជ់ខ្យង Melo មានច្រើនពណ៌ ដូចជា ពណ៌ទឹកក្រូច ពណ៌លឿងទុំ និងពណ៌ប្រផេះ។ ប៉ុន្តែ ពណ៌ទឹកក្រូចដូចទៅនឹងពណ៌គជ់ដែលលោក Monthian បានប្រទះឃើញគឺមានតម្លៃថ្លៃជាងគេ ព្រោះក្នុងចំណោមរាប់ពាន់ក្បាលគឺមានតែមួយក្បាលប៉ុណ្ណោះដែលមានគជ់។

នៅប្រទេសថៃ កាលពីខែមុន អ្នកនេសាទម្នាក់ឈ្មោះ Hatchai Niyomdecha នៅខេត្ត Nakhon Si Thammarat ក៏បានប្រទះឃើញគជ់ខ្យល់ Melo ពណ៌ទឹកក្រូចមួយគ្រាប់ផងដែរ ដែលវាមានទម្ងន់ 7.68 ក្រាម និងលក់ក្នុងតម្លៃដល់ទៅ 10 លានបាត (ស្មើនឹង 333,000 ដុល្លារអាមេរិក)៕

ប្រភព៖ Daily Mail

February 17, 2021

រកឃើញជីវិតនៅក្នុងជម្រៅ 900ម៉ែត្រ ក្រោមស្រទាប់ទឹកកកនៅប៉ូលខាងត្បូង

ក្រុមអ្នកស្រាវជ្រាវបានរកឃើញទម្រង់ជីវិតចម្លែកៗដែលស្ថិតនៅខាងក្រោមនៃបាតទឹកកកនៅប៉ូលខាងត្បូងរបស់ភពផែនដី និងមានចម្ងាយប្រមាណ 260 គីឡូម៉ែត្រពីសមុទ្រ។

ក្រុមអ្នកស្រាវជ្រាវរបស់ប្រទេសអង់គ្លេសប្រចាំនៅប៉ូលខាងត្បូងនៃភពផែនដី បានរកឃើញសត្វជាច្រើននៅពេលពួកគេកំពុងប្រមូលសំណាកនៃស្នូលដីល្បាប់ពីខាងក្រោមផ្ទាំងទឹកកក Filchner-Ronne។ ពេលខួងដល់ជម្រៅ 900 ម៉ែត្រក្រោមផ្ទាំងទឹកកក ក្បាលខួងរបស់ពួកគេក៏បានប៉ះនឹងថ្ម pebble។ កាមេរ៉ាដែលភ្ជាប់នៅលើក្បាលខួងបានបង្ហាញថា មានបណ្ដុំសត្វមានជិវិតកំពុងតែតោងជាប់នឹងផ្ទៃរបស់ថ្ម។

បណ្ដុំសត្វទាំងនេះគឺជាប្រភេទមិនផ្លាស់ទី ដូចទៅនឹងប្រភេទ sponges ប៉ុន្តែ ពួកវាទំនងជាប្រភេទផ្សេងដទៃទៀតដែលមនុស្សមិនទាន់បានស្គាល់។ យោងតាមលទ្ធផលនៃការសិក្សាស្រាវជ្រាវដែលត្រូវបានចុះផ្សាយកាលពីថ្ងៃទី 15 កុម្ភៈ នៅលើទស្សនាវដ្ដី Frontiers in Marine Science ការរកឃើញខាងលើនេះ រួមចំណែកក្នុងការយល់ដឹងរបស់មនុស្សអំពីជីវិតនៅលើផែនដី។

ការរុករកមុននេះក៏ធ្លាប់បានប្រទះឃើញសត្វមួយចំនួនដែលស៊ីចំណីរលួចជាអាហារ និងសត្វស៊ីសាច់ប្រភេទតូចៗដែលផ្លាស់ទីស្រដៀងនឹងត្រី ជន្លេន និងកំពឹស ឬលៀស។ ប៉ុន្តែ ការរកឃើញលើកនេះពិតជាគួរឱ្យភ្ញាក់ផ្អើល ព្រោះថា សត្វទាំងនេះមិនអាចផ្លាស់ទីនោះទេ ពោលគឺពួកវានៅមួយកន្លែង។ ក្រៅពីនេះ ពួកវាក៏នៅសែនឆ្ងាយពីផ្ទៃទឹក និងពន្លឺព្រះអាទិត្យ។ ពួកវារស់នៅក្នុងភាពងងឹតទាំងស្រុង និងមានសីតុណ្ហភាព -2.2 អង្សាសេ។

ការស្រាវជ្រាវបង្ហាញថា សត្វខាងលើរស់នៅឆ្ងាយពីប្រភពរស្មីសំយោគដែលនៅជិតបំផុត ប្រមាណជា 1,500 គីឡូម៉ែត្រ។ ប្រការនេះហើយ ធ្វើឱ្យក្រុមអ្នកស្រាវជ្រាវចោទជាសំណួរថា «តើពួកវាប្រមូលថាមពលពន្លឺ និងសារធាតុបំប៉នបានពីណា?»។

បណ្ឌិត Huw Griffiths ប្រធានក្រុមស្រាវជ្រាវខាងលើ បានឱ្យដឹងថា៖ «ការរកឃើញនេះបង្ហាញថា ជីវិតនៅប៉ូលខាងត្បូងពិតជាពិសេសអស្ចារ្យ និងមានភាពស៊ាំដ៏ល្អឥតខ្ចោះជាមួយនឹងពិភពទឹកកក។

ដើម្បីបានយល់អំពីដំណើរការនៃការចិញ្ចឹមជីវិតរបស់សត្វមានជីវិតទាំងនោះ ក្រុមអ្នកស្រាវជ្រាវត្រូវការពេលវេលាច្រើនទៀតដើម្បីសិក្សាស្វែងយល់បន្ថែម៕

ប្រភព៖ Live Science

February 17, 2021

តម្លៃ Bitcoin កើនឡើងលើសពី 50,000ដុល្លារ ជាកំណត់ត្រាថ្មីមួយទៀតក្នុងប្រវត្តិសាស្ត្រ

កាលពីខែធ្នូ ឆ្នាំ 2020 តម្លៃរបស់ Bitcoin បានបំបែកឯតទគ្គកម្ម 20,000 ដុល្លារជាលើកដំបូង ក៏ប៉ុន្តែ ត្រឹមតែរយៈពេល 3 ខែក្រោយមក រូបិយប័ណ្ណអេឡិចត្រូនិកនេះ បានឡើងថ្លៃជាង 100% និងបន្តបង្កើតកំណត់ត្រាថ្មីមួយទៀត។

យោងតាមសារព័ត៌មាន CNN នេះជាលើកដំបូងក្នុងប្រវត្តិសាស្ត្រដែលតម្លៃរបស់ប្រាក់អេឡិចត្រូនិក Bitcoin បានកើនលើសពីខ្ទង់ 50,000 ដុល្លារ/Bitcoin។ នៅក្នុងការជួញដូរកាលពីថ្ងៃទី 16 ខែកុម្ភៈ ឆ្នាំ 2021 កន្លងទៅ ប្រាក់ Bitcoin បានឡើងថ្លៃដល់ 50,602.53 ដុល្លារអាមេរិក ពោលគឺខ្ពស់ជាង 260% ធៀបនឹងតម្លៃកាលពីដើមខែវិច្ឆិកា ឆ្នាំ 2021។

ការឡើងថ្លៃរបស់ Bitcoin ត្រូវបានក្រុមអ្នកវិភាគយល់ថា មកពីធនាគារកណ្ដាលអាមេរិក (FED) បានបញ្ចុះអត្រាការប្រាក់មកនៅជិត 0% និងរក្សាវាក្នុងរយៈពេលជាច្រើនឆ្នាំទៀតដើម្បីលើកកម្ពស់សេដ្ឋកិច្ចជាតិ ហើយប្រការទាំងនេះ បានធ្វើឱ្យតម្លៃរបស់ប្រាក់ដុល្លារអាមេរិកត្រូវចុះថោក នាំឱ្យក្រុមអ្នកវិនិយោគងាកមកជ្រកកោននៅក្នុងស្ថាប័នហិរញ្ញវត្ថុផ្សេងៗ ដូចជាប្រាក់ Bitcoin ជាដើម។

ដោយសារតែបរិមាណ Bitcoin មានកំណត់ ដូច្នេះ ក្រុមអ្នកវិនិយោគជឿថា តម្លៃរបស់ប្រាក់អេឡិចត្រូនិកនេះនឹងនៅតែឡើងថ្លៃ។ ព្រោះតែតម្លៃរបស់ប្រាក់ Bitcoin ចេះតែបន្តបំបែកឯតទគ្គកម្មជាបន្តបន្ទាប់ ធ្វើឱ្យក្រុមអ្នកវិនិយោគធំៗ ក៏ដូចជាបណ្ដាក្រុមហ៊ុនហិរញ្ញវត្ថុ នាំគ្នាវិនិយោគទៅលើរូបិយប័ណ្ណនេះ ដែលប្រការនេះក៏ជួយឱ្យប្រាក់ Bitcoin បន្តឡើងថ្លៃ។

ក្រុមហ៊ុន MicroStrategy ដែលចូលចិត្តវិនិយោគទៅលើ Bitcoin បានឱ្យដឹងថា ក្រុមហ៊ុននេះនឹងខ្ចីប្រាក់ធនាគារចំនួន 600 លានដុល្លារបន្ថែមទៀត ដើម្បីបណ្ដាក់ទុនទៅលើប្រាក់ឌីជីថល Bitcoin។

ទន្ទឹមនឹងនេះ ក្រុមហ៊ុនជាច្រើនក្នុងពិភពលោក ក៏កំពុងតែនាំគ្នាវិនិយោគ ប្រើប្រាស់ ឬគាំទ្រដល់ Bitcoin ក្នុងនោះមានដូចជា ក្រុមហ៊ុនផលិតរថយន្តអគ្គិសនី Tesla ក្រុមហ៊ុនគ្រប់គ្រង Mastercard រួមនឹងក្រុមហ៊ុន Square និង Paypal ជាដើម។

ទោះជាយ៉ាងណាក៏ដោយ សារព័ត៌មាន CNN ឱ្យដឹងថា ការឡើងថ្លៃខ្លាំងរបស់ Bitcoin ក្នុងមួយរយៈពេលខ្លីមកនេះ ក៏បង្កប់នូវហានិភ័យទាក់ទងនឹងការធ្លាក់ថ្លៃ នៅពេលក្រុមអ្នកវិនិយោគរយៈពេលខ្លី សម្រេចចិត្តលក់ចេញដើម្បីរកចំណេញ៕

ប្រភព៖ CNN

February 17, 2021

ភរិយាមេដឹកនាំកូរ៉េខាងជើង បង្ហាញខ្លួនលើកដំបូងក្នុងអំឡុងជាងមួយឆ្នាំមកនេះ

ភរិយារបស់លោក Kim Jong-un បង្ហាញខ្លួននៅក្នុងរូបថតដែលត្រូវបានទីភ្នាក់ងារសារព័ត៌មានកូរ៉េខាងជើងចុះផ្សាយ កាលពីពេលថ្មីៗនេះ បន្ទាប់ពីបានអវត្តមាននៅចំពោះមុខសាធារណជន អស់រយៈពេលជាងមួយឆ្នាំ។

សារព័ត៌មាន Rodong Sinmum ដែលជាស្ថាប័ននាំពាក្យផ្លូវការរបស់បក្សពលករកូរ៉េខាងជើង កាលពីម្សិលមិញ (16 កុម្ភៈ) បានចុះផ្សាយរូបថតជាច្រើនសន្លឹកបង្ហាញអំពីព្រឹត្តិការណ៍សម្ដែងសិល្បអប់អរថ្ងៃខួបកំណើតរបស់អតីតប្រធានរដ្ឋ Kim Jong-il នារដ្ឋធានីព្យុងដែលត្រូវបានប្រារព្ធលើងកាលពីថ្ងសទី 15កុម្ភៈ។ ក្នុងបណ្ដារូបថតទាំងនោះ គេឃើញលោកស្រី Ri Sol-ju អង្គុយក្បែរ និងនិយាយគ្នាជាមួយនឹងស្វាមីដែលជាមេដឹកនាំកូរ៉េខាងជើង លោក Kim Jong-un ពេលកំពុងទស្សនាការសម្ដែងសិល្ប។

លោកស្រី Ri តែងតែបង្ហាញខ្លួនជាមួយស្វាមី នៅក្នុងព្រឹត្តិការណ៍ធំៗរបស់ប្រទេសនេះ ប៉ុន្តែ មិនធ្លាប់បានបង្ហាញវត្តមាននៅចំពោះមុខសាធារណជន ចាប់តាំងពីក្រោយពិធីអំណរបុណ្យចូលឆ្នាំចន្ទគតិកាលពីខែមករា ឆ្នាំ 2020។ ប្រការនេះ ធ្វើឱ្យមានការសន្និដ្ឋានថា លោកស្រីប្រហែលជាជួបបញ្ហាសុខភាព ឬកំពុងមានផ្ទៃពោះ។

អង្គភាពស៊ើបការណ៍សម្ងាត់របស់កូរ៉េខាងត្បូង (NIS) បានឱ្យដឹងថា លោកស្រី Ri Sol-ju ទំនងជាកំពុងគេចវេះការបង្ហាញខ្លួននៅទីដែលមានមនុស្សច្រើន ដើម្បីកាន់បន្ថយហានិភ័យនៃការឆ្លងវីរុស Covid-19 ហើយលោកស្រីតែងតែប្រលែងលេងជាមួយកូន។ លោក Kim Jong-un និងភរិយា ត្រូវបានគេជឿថា មានកូនជាមួយគ្នាចំនួន 3 នាក់ ប៉ុន្តែ មិនមានព័ត៌មានច្រើនស្ដីអំពីកូនៗរបស់ពួកគេទេ។

កូរ៉េខាងជើង គិតមកដល់បច្ចុប្បន្ន មិនទាន់មានសេចក្ដីរាយការណ៍អំពីករណីឆ្លង Covid-19 ប៉ុន្តែ NIS យល់ថា ប្រទេសនេះអាចមានការផ្ទុះឆ្លង ដោយសារមានទំនាក់ទំនងពាណិជ្ជកម្មជាច្រើនជាមួយនឹងចិន មុនពេលបិទច្រកព្រំដែនកាលពីដើមឆ្នាំមុន៕

ប្រភព៖ Reuters

February 17, 2021

Covid-19 បង្ហាញសញ្ញាគួរឱ្យត្រេកអរ កាលពីសប្ដាហ៍មុន ប៉ុន្តែវីរុសក្លាយពូជថ្មី កំពុងរាតត្បាតខ្លាំង

អង្គការសុខភាពពិភពលោក (WHO) បានរាយការណ៍ថា តួលេខនៃករណីឆ្លងថ្មីនៅទូទាំងពិភពលោកក្នុងសប្ដាហ៍កន្លង បានថយចុះរហូតដល់ 16% ដែលប្រហាក់ប្រហែលនឹងកន្លះលាននាក់ ខណៈតួលេខអ្នកស្លាប់ក៏បានថយចុះនៅគ្រប់តំបន់ក្នុងពិភពលោក។

សារព័ត៌មាន CNN បានដកស្រង់របាយការណ៍របស់អង្គការសុខភាពពិភពលោក បង្ហាញថា តួលេខសរុបនៃអ្នកឆ្លង Covid-19 ក្នុងពិភពលោក បានថយចុះ 16% ក្នុងសប្ដាហ៍កន្លងដែលបញ្ចប់នៅថ្ងៃទី 14 កុម្ភៈ ធៀបនឹងមួយសប្ដាហ៍មុននោះ។

ជារួម នៅក្នុងសប្ដាហ៍កន្លងទៅ មានករណីស្លាប់ចំនួន 81,000 នាក់ និងករណីឆ្លងថ្មីចំនួន 2.7 លាននាក់ ទាបជាងប្រហែល 500,000 ករណី បើធៀបនឹងមួយសប្ដាហ៍មុននោះ ដែលបញ្ចប់នៅថ្ងៃទី 7 កុម្ភៈ។

WHO បានឱ្យដឹងថា តួលេខអ្នកឆ្លងថ្មី ថយចុះពីរខ្ទង់ នៅក្នុងតំបន់ទាំងអស់លើពិភពលោក លើកលែងតែតំបន់ មេឌីទែរ៉ាណេភាគខាងកើត ចំណែកតួលេខអ្នកស្លាប់ថ្មីក៏ថយចុះនៅគ្រប់តំបន់ក្នុងពិភពលោក។

សហរដ្ឋអាមេរិក បច្ចុប្បន្ន រកឃើញករណីឆ្លងថ្មីខ្ពស់ជាងគេបង្អស់ក្នុងពិភពលោក បន្ទាប់មកគឺប្រទេសប្រេស៊ីល បារាំង រុស្ស៊ី អង់គ្លេស និងតំបន់អៀរឡង់ខាងជើង (Northern Ireland) របស់អង់គ្លេស។

WHO ក៏បានសង្កត់ធ្ងន់ថា វីរុសក្លាយពូជថ្មីនៅប្រទេសអង់គ្លេស បច្ចុប្បន្នត្រូវបានរកឃើញនៅក្នុងប្រទេសចំនួន 94 ចំណែកវីរុសក្លាយពូជនៅប្រទេសអាហ្វ្រិកខាងត្បូង បានបង្ហាញខ្លួននៅក្នុងប្រទេសចំនួន 46 ខណៈដែលវីរុសក្លាយពូជនៅប្រេស៊ីល បានឆ្លងទៅប្រទេសចំនួន 21 ក្នុងពិភពលោក៕

ប្រភព៖ CNN

February 17, 2021

Author: សឿន សំណាង