សឿន សំណាង - La Reine Media

មេដឹកនាំក្រុមប្រទេស G7 សន្យាបង្កើនសហប្រតិបត្តិការដើម្បីទប់ទល់នឹង Covid-19

នៅក្នុងកិច្ចប្រជុំកំពូលតាមអនឡាញរបស់ក្រុមមេដឹកនាំនៃបណ្ដាប្រទេសមានឧស្សាកម្មរីកចម្រើនជាងគេក្នុងពិភពលោក (G7) ដែលដឹកនាំដោយនាយករដ្ឋមន្ត្រីអង់គ្លេស Boris Johnson ក្រុមមេដឹកនាំ G7 បានសន្យាបង្កើនកិច្ចសហប្រតិបត្តិការបន្ថែមទៀតក្នុងការប្រយុទ្ធប្រឆាំងនឹង Covid-19 ក៏ដូចជាការជួយដល់ WHO។

មុនបញ្ចប់កិច្ចប្រជុំ ក្រុមមេដឹកនាំ G7 យល់ថា ការលះបង់របស់ក្រុមមនុស្សដែលបំពេញបេសកកម្មជួរមុខនៅគ្រប់ទិសទី បានបង្ហាញនូវអ្វីៗដែលល្អប្រសើរបំផុតរបស់មនុស្សជាតិ ខណៈការអភិវឌ្ឍវ៉ាក់សាំងបានយ៉ាងឆាប់រហ័សដើម្បីទប់ទល់នឹង Covid-19 ក៏បានបង្ហាញអំពីកម្លាំងនៃបញ្ញារបស់មនុស្សលោក។

ដើម្បីសហការ និងរួមគ្នាស្ដារមុខមាត់អង្គការសុខភាពពិភពលោក (WHO) ក៏ដូចជាជួយលើកកម្ពស់តួនាទីដឹកនាំ និងចាត់ចែងរបស់អង្គការនេះ ក្រុមប្រទេស G7 បានសន្យាថានឹងពន្លឿនដំណើរការអភិវឌ្ឍ និងផ្គត់ផ្គង់វ៉ាក់សាំងនៅទូទាំងពិភពលោក សហការដើម្បីបង្កើនលទ្ធភាពផលិតវ៉ាក់សាំង ក្នុងនោះ រួមមានទាំងការអនុម័តផ្ដល់ការអនុញ្ញាតបណ្ដោះអាសន្នលើវ៉ាក់សាំងនានា និងកែលម្អការចែករំលែកព័ត៌មាន។ល។

ក្រុមមេដឹកនាំ G7 ក៏បានអះអាងជាថ្មីអំពីការគាំទ្រចំពោះកម្មវិធីនានារបស់ WHO មានដូចជាកម្មវិធីសហការបង្កើនល្បឿននៃការចូលប្រើឧបករណ៍សម្រាប់ទប់ទល់នឹង Covid-19 (ACT-A) និងកម្មវិធីផ្គត់ផ្គង់វ៉ាក់សាំងដោយយុត្តិធម៌ទៅឱ្យបណ្ដាប្រទេសក្រីក្រ និងប្រទេសដែលមានចំណូលទាប (COVAX) ជាដើម។

សេចក្ដីប្រកាសរួមរបស់ G7 ក៏បានបង្ហាញថា ជាមួយនឹងការសន្យាផ្ដល់ជំនួយបន្ថែម 4 ពាន់លានដុល្លារ ជំនួយសរុបរបស់ G7 សម្រាប់ COVAX និង ACT-A បានកើនដល់ 7.5 ពាន់លានដុល្លារអាមេរិក។ G7 និងធ្វើការជាមួយដៃគូនានា មានដូចជាក្រុមប្រទេសដែលមានសេដ្ឋកិច្ចរីកចម្រើន និងទើបលេចធ្លោ (G20) និងស្ថាប័នហិរញ្ញវត្ថុអន្តរជាតិ ដើម្បីរួមគ្នាជួយដល់សកម្មភាពរបស់ ACT-A និង COVAX របស់ WHO៕

ប្រភព៖ NYT

February 20, 2021

Top 10 អ្នកមានជាងគេលើពិភពលោកសម្រាប់ថ្ងៃទី 19កុម្ភៈ! Elon Musk នាំមុខគេជាថ្មី បន្ទាប់ពីត្រូវ Jeff Bezos ដណ្ដើមបានកាលពីថ្ងៃទី16

កំពូលមហាសេដ្ឋី Elon Musk បានត្រលប់មកកាន់កាប់តំណែងអ្នកមានជាងគេបង្អស់ក្នុងពិភពលោក ក្រោយពីក្រុមហ៊ុន SpaceX បានបញ្ចប់ការប្រមូលទុនថ្មីមួយ ជាមួយនឹងការកំណត់តម្លៃឡើងដល់ 74 ពាន់លានដុល្លារ។

ដោយមានទ្រព្យតម្លៃ 200 ពាន់លានដុល្លារ CEO របស់ Tesla លោក Elon Musk បានក្លាយជាអ្នកមានជាងគេបង្អស់ក្នុងពិភពលោកជាថ្មី នៅលើតារាងចំណាត់ថ្នាក់អ្នកមានរបស់សារព័ត៌មាន Bloomberg។

មុននេះ ក្រោយពីបានបញ្ចប់ការជួញដូរកាលពីថ្ងៃទី 16 កុម្ភៈ មូលបត្ររបស់ក្រុមហ៊ុន Tesla បានធ្លាក់ថ្លៃ បណ្ដាលឱ្យ Elon Musk ត្រូវបាត់បង់តំណែងអ្នកមានជាងគេទៅលើដៃ CEO របស់ Amazon លោក Jeff Bezos។ បច្ចុប្បន្ន ស្ថាបនិករបស់ Amazon មានទ្រព្យសរុបចំនួន 194 ពាន់លានដុល្លារអាមេរិក តិចជាង Elon Musk 6 ពាន់លានដុល្លារ។

ក្រុមហ៊ុនអវកាស SpaceX របស់លោក Musk ទើបតែបានធ្វើការប្រមូលទុនថ្មីមួយដែលរកបាន 850 លានដុល្លារ។ ក្រុមហ៊ុននេះកំពុងតែត្រូវបានកំណត់តម្លៃត្រឹម 74 ពាន់លានដុល្លារ កើត 60% បើធៀបនឹងការប្រមូលទុនកាលពីខែសីហា ឆ្នាំ 2020។ ដូច្នេះហើយទើបទ្រព្យរបស់លោក Musk កើនឡើង 11 ពាន់លានដុល្លារបន្ថែមទៀត៕

ប្រភព៖ Bloomberg

February 19, 2021

ក្លាយជាសេដ្ឋីក្នុងវ័យ 35ឆ្នាំ មិនមែនជារឿងងាយស្រួលឡើង! សេដ្ឋីនេះបានចែករំលែកបទពិសោធន៍ដែលរៀនបានពីម្ដាយ

សេដ្ឋី Drock បាននិយាយថា ជោគជ័យរបស់លោក ភាគច្រើនកើតឡើងដោយសារចំណេះដឹងដែលគាត់បានរៀនសូត្រពីម្ដាយរបស់គាត់។

សម្រាប់មនុស្សជាច្រើនក្នុងពិភពលោក ការដែលរកបានទ្រព្យរាប់លានដុល្លារនៅក្នុងវ័យ 35 ឆ្នាំ គឺហាក់ដូចជារឿងដែលមិនងាយស្រួលសោះឡើយ។ ប៉ុន្តែ ប្រការនេះបានកើតឡើងចំពោះលោក Drock ដែលមានទីលំនៅនៅក្នុងទីក្រុងវ៉ាស៊ីងតោន សហរដ្ឋអាមេរិក។ Drock បានក្លាយជាសេដ្ឋី ក្រោយរយៈពេល 12 ឆ្នាំ ដែលបានខិតខំធ្វើការ និងទទួលបានចំណេះដឹងច្រើនពីម្ដាយ។

ចែករំលែកបទពិសោធន៍ជាមួយសារព័ត៌មាន Business Insider សេដ្ឋី Drock បានបង្ហើបឱ្យដឹងអំពីប្រការចំនួន 5 ដែលគាត់បានរៀនសូត្រពីម្ដាយ និងបាននាំឱ្យគាត់ជោគជ័យដូចសព្វថ្ងៃ។

ខាក្រោមនេះគឺជាបទពិសោធន៍ចំនួន 5 ប្រការដែល Drock បានរៀនពីម្ដាយរបស់គាត់៖

1-ប្រភពចំណូលត្រូវមានច្រើនប្រភេទ

ពីបុគ្គលិកធម្មតាម្នាក់ ម្ដាយរបស់ Drock បានប្ដូរទៅរកស៊ីដោយខ្លួនឯង។ អ្នកស្រីធ្វើកិច្ចការជាច្រើនដើម្បីរកប្រាក់ ហើយសូម្បីតែការងារពេលយប់ និងការងារចុងសប្ដាហ៍ ក៏អ្នកស្រីធ្វើដែរ គឺធ្វើរហូតដល់អ្នកស្រីមានវ័យ 50ឆ្នាំ។

Drock និយាយថា ការធ្វើពិពិធកម្មលើប្រភេទនៃប្រភពចំណូលគឺជាវិធីដ៏សំខាន់ដើម្បីជួយឱ្យមនុស្សម្នាក់ក្លាយជាអ្នកមាន។ បច្ចុប្បន្ន ការងារបន្ទាប់បន្សំរបស់ Drock ត្រូវបានកំណត់តម្លៃត្រឹម 40,000 ដុល្លារ។

2-វិនិយោគទៅលើវិស័យអចលនទ្រព្យ

លោក Drock និងភរិយា ទិញបានអចលនទ្រព្យចំនួនពីរសម្រាប់ដាក់ឱ្យជួល។ នេះគឺជាយុទ្ធសាស្ត្ររកប្រាក់ចំណូលបែបអកម្មដែលគាត់រៀនបានពីម្ដាយ។

Drock បានទិញអចលនទ្រព្យសម្រាប់ដាក់ឱ្យជួលដំបូងកាលពីឆ្នាំ 2009។ ពេលនោះ គាត់នៅតែធ្វើការឱ្យគេ និងរកបានតែ 30,000 ដុល្លារប៉ុណ្ណោះក្នុងមួយឆ្នាំ។

ពួកគេបានទិញអចលនទ្រព្យទីពីរកាលពីឆ្នាំ 2014 ក្នុងតម្លៃ 115,000 ដុល្លារ។ ពួកគេចំណាយប្រាក់ 10,000 ដុល្លារដើម្បីជួសជុល រួចក៏ដាក់ជួលឱ្យគេ។ បច្ចុប្បន្ន ផ្ទះនេះត្រូវបានកំណត់តម្លៃត្រឹម 170,000 ដុល្លារអាមេរិក។

3-រៀនជំនាញថ្មីៗ

ក្នុងជីវិត ម្ដាយរបស់ Drock បានផ្លាស់ប្ដូរការងារមួយចំនួន។ អ្នកស្រីតែងតែស្វែងរករៀនជំនាញថ្មីៗដើម្បីបម្រើដល់ការងារថ្មីរបស់គាត់។

Drock ក៏យកតម្រាប់តាមម្ដាយរបស់គាត់។ បើទោះកំពុងជួសជុលផ្ទះដើម្បីដាក់ឱ្យជួល រៀបគម្រោងសម្រាប់ធ្វើអាជីវកម្មបន្ទាប់សន្សំ ឬសរសេរ blog ប៉ុន្តែ Drock នៅតែប្រឹងប្រែងរៀនជំនាញថ្មី និងលើកកម្ពស់ជំនាញបច្ចុប្បន្នរបស់ខ្លួន។

4-វិនិយោគលើទៅក្នុងទីផ្សារមូលបត្រ

ម្ដាយ និងឪពុករបស់ Drock បានផ្ដល់មូលបត្រ blue-chip មួយចំនួនតូចដល់កូនៗរបស់ពួកគេ តាំងតែពីកូនៗនៅតូច ហើយប្រាប់ឱ្យកូនៗតាមដានតម្លៃរបស់វាទៅតាមពេលវេលា។

ជារៀងរាល់ឆ្នាំ ក្រៅពីខ្ទង់ប្រាក់សន្សំសម្រាប់ពេលចូលនិវត្សរ៍ និងធនារ៉ាប់រង ប្ដីប្រពន្ធ Drock ក៏មានខ្ទង់ចំណាយមួយទៀតសម្រាប់វិនិយោគទៅលើទីផ្សាយមូលបត្រ។

5- ភាពរឹងមាំ និងការតស៊ូ

វិថីទៅកាន់ជោគជ័យរបស់ម្ដាយ Drock មិនមែនជារឿងធម្មតាឡើយ។ ម្ដាយរបស់ Drock ធ្លាប់បានទទួលជោគជ័យក្នុងមុខជំនួញ ប៉ុន្តែក៏បានបាត់បង់ទាំងស្រុងមិនតិចដងនោះដែរ។

Drock និយាយថា៖ «ពិតណាស់ អ្នកណាក៏មានថ្ងៃជោគជ័យ និងថ្ងៃបរាជ័យ។ រៀងរាល់ពេលបរាជ័យ ម្ដាយរបស់ខ្ញុំតែងតែក្រោកឡើង ហើយបន្តដើរទៅមុខ។ ភាពក្លាហាន និងភាពរឹងមាំរបស់ម្ដាយខ្ញុំ គឺជាប្រការដែលខ្ញុំតែងតែគោរពកោតសរសើរ និងប្រឹងប្រែងរៀនសូត្រពីគាត់»៕

ប្រភព៖ Business Insider

February 19, 2021

ព្យុះដំបូងគេក្នុងឆ្នាំ2021 ដែលអាចជះឥទ្ធិពលខ្លះដល់កម្ពុជា នឹងកើតឡើងនាសប្ដាហ៍ក្រោយ

ព្យុះ Dujuan ដែលទើបតែបានកើតឡើងនៅលម្ហសមុទ្រហ្វីលីពីន អាចនឹងបោកបក់ចូលសមុទ្រចិនខាងត្បូងនៅដើមសប្ដាហ៍ក្រោយ និងក្លាយជាព្យុះដំបូងគេនៅសមុទ្រចិនខាងត្បូងសម្រាប់ឆ្នាំ 2021 នេះ។

CNN កាលពីជាង 9 ម៉ោងមុន បានឱ្យដឹងថា ប្រព័ន្ធសម្ពាធទាបនៅភាគអាគ្នេយ៍ប្រទេសហ្វីលីពីន បានក្លាយទៅជាព្យុះ ដែលនេះគឺជាព្យុះដំបូងគេបង្អស់នៅក្នុងឆ្នាំ 2021 សម្រាប់មហាសមុទ្រប៉ាស៊ីហ្វិកភាគពាយព្យ។ ព្យុះនេះត្រូវបានគេដាក់ឈ្មោះថា Dujuan ជាឈ្មោះដែលចិនជាអ្នកស្នើឡើង ហើយវាមានន័យថា ជាផ្កាមួយប្រភេទ។ តាមការព្យាករ ព្យុះ Dujuan នឹងរីកមាឌធំជាងបច្ចុប្បន្ន រួចបោកបក់ចូលកាន់សមុទ្រចិនខាងត្បូងក្នុងអំឡុងចាប់ពីថ្ងៃទី 22-23 ខែកុម្ភៈ។

ការព្យាករបញ្ជាក់ថា មុនពេលធ្វើដំណើរចូលដល់សមុទ្រចិនខាងត្បូង ព្យុះ Dujuan អាចនឹងបង្កើនកម្លាំងរហូតដល់កម្រិតចាប់ពី 9-10 ក៏ប៉ុន្តែ ក្រោយពីបានឆ្លងផុតពីប្រទេសហ្វីលីពីន Dujuan នឹងត្រូវចុះខ្សោយ ហើយបន្តបោកបក់ចូលសមុទ្រចិនខាងត្បូងដោយកម្លាំងចាប់ពីកម្រិត 7 ដល់កម្រិត 8។ ក្រោយពីបានចូលដល់សមុទ្រចិនខាងត្បូង Dujuan ក៏អាចជះឥទ្ធិពលដល់ប្រទេសវៀតណាម និងអាចបណ្ដាលឱ្យអាកាសធាតុនៅកម្ពុជាប្រែប្រួលខ្លះ។

ការព្យាករបានបន្តថា សមុទ្រខាងត្បូងអាចនឹងមិនមានព្យុះណាមួយកើតឡើងទៀតទេ ក្រោយពីព្យុះនេះ រហូតដល់ខែឧសភា ឆ្នាំ 2021។ ចូលដល់ខែមិថុនា-កក្កដា ព្យុះ និងសម្ពាធទាបចាប់ផ្ដើមធ្វើសកម្មភាពឡើងវិញនៅតំបន់សមុទ្រខាងលើ៕

ប្រភព៖ CNN, CNBC

February 19, 2021

វ៉ាក់សាំងប្រឆាំង Covid-19 “Made in Vietnam” អាចប្រើប្រាស់បានចាប់ពីខែឧសភា 2021

ជាមួយនឹងការរីកចម្រើនផ្នែកស្រាវជ្រាវ និងការធ្វើតេស្តវ៉ាក់សាំងយ៉ាងលឿនដូចបច្ចុប្បន្ន ក្រុមមន្ត្រីមានសមត្ថកិច្ចរបស់វៀតណាមរំពឹងថា ចាប់ពីខែឧសភា 2021 វ៉ាក់សាំងនានាដែលត្រូវបានផលិតនៅវៀតណាម នឹងអាចត្រូវបានប្រើប្រាស់យ៉ាងទូលំទូលាយនៅក្នុងប្រទេសនេះ។

ទាក់ទងនឹងលទ្ធផលនៃការប្រើប្រាស់សាកល្បង ឬការពិសោធលើវ៉ាក់សាំង Nano Covax នៃក្រុមហ៊ុន Nanogen លោកវេជ្ជបណ្ឌិត Nguyen Ngo Quang ដែលជាអនុប្រធាននាយកដ្ឋានវិទ្យាសាស្ត្របច្ចេកវិទ្យានិងបណ្ដុះបណ្ដាលរបស់ក្រសួងសុខាភិបាល បានឱ្យដឹងថា ក្នុងដំណាក់កាលទីមួយ វ៉ាក់សាំងនេះមានសុវត្ថិភាព។ ជាមួយនឹងការចាក់បីលើក៖ 25 mcg, 50 mcg និង 75 mcg វ៉ាក់សាំងនេះសុទ្ធតែបង្កើតប្រព័ន្ធការពាររាងកាយបានល្អ ក្នុងនោះអត្រានៃការបង្កើតអង្គបដិប្រាណ (សមត្ថភាពការពាររាងកាយរបស់អ្នកដែលបានចាក់វ៉ាក់សាំងមិនឱ្យឆ្លង Covid-19) បានឡើងដល់ 90%។

នាព្រឹកនេះ ក្រុមប្រឹក្សាភិបាលរបស់ក្រសួងសុខាភិបាលវៀតណាម នឹងមានកិច្ចប្រជុំចុងក្រោយមួយ មុនពេលសម្រេចថា គួរឱ្យ Nano Covax ពិសោធន៍លើមនុស្សដំណាក់ទីពីរដែរ ឬយ៉ាងណា។

វេជ្ជបណ្ឌិត Ngo Quang បញ្ជាក់ថា ក្រុមហ៊ុន Nanogen មានលទ្ធភាពផលិតវ៉ាក់សាំង Covid-19 ចំនួន 70 លានដូស/ឆ្នាំ។ ចំណែកវិទ្យាស្ថាន IVAC បើសិនជាត្រូវបានវិនិយោគ ក៏នឹងអាចផលិតបាន 30 លានដូស/ឆ្នាំផងដែរ។ ជាមួយនឹងល្បឿននៃការអភិវឌ្ឍ និងផលិតភាពដូចបច្ចុប្បន្ន វៀតណាមត្រូវការពេលចំនួន 2 ខែទៀតដើម្បីបញ្ចប់ការពិសោធលើមនុស្សក្នុងដំណាក់កាលទីពីរ។

លោក Ngo Quang បន្ថែមទៀតថា ដល់ខែមេសា ឆ្នាំ 2021 ការពិសោធលើមនុស្សដំណាក់ទី 2 នឹងត្រូវបញ្ចប់ ហើយនិងមានការវាយតម្លៃដោយសុក្រឹតភាពជាងមុនទាក់ទងនឹងបរិមាណសមស្របបំផុតសម្រាប់ការចាក់វ៉ាក់សាំងនេះ។ ឈានចូលដល់ខែឧសភា ឆ្នាំ 2021 នៅក្នុងការពិសោធលើមនុស្សដំណាក់កាលទីបី វ៉ាក់សាំងរបស់វៀតណាមនឹងអាចយកទៅចាក់យ៉ាងទូលំទូលាយនៅក្នុងសហគមន៍នៃប្រទេសនេះ។

អំពីការនាំចូលវ៉ាក់សាំង Covid-19 ពីបរទេស ក្រសួងសុខាភិបាលវៀតណាម បានអនុញ្ញាតឱ្យក្រុមហ៊ុន AstraZeneca ប្រចាំវៀតណាម នាំចូលវ៉ាក់សាំង 204,000 ដូស ជាបន្ទាន់ ដើម្បីឆ្លើយតបនឹងតម្រូវការ។ តាមផែនការដែលបានព្រមព្រៀង វ៉ាក់សាំង AstraZeneca នឹងមកដល់វៀតណាម នៅថ្ងៃទី 28 កុម្ភៈ ឆ្នាំ 2021។

ក្រៅពីបរិមាណនៃវ៉ាក់សាំងខាងលើ វៀតណាមក៏នឹងទទួលបានវ៉ាក់សាំងរបស់ COVAX Facility ប្រមាណ 4.88 លានដូសផងដែរ ដែលនឹងមកដល់នាពេលខាងមុខ។ ដូច្នេះ ដំណាក់កាលដំបូង វៀតណាម នឹងមានវ៉ាក់សាំងប្រហែលជាង 5 លានដូស ដើម្បីចាក់ឱ្យពលរដ្ឋជាង 5 លាននាក់៕

ប្រភព៖ NLD

February 19, 2021

អាមេរិកផ្ដល់ជំនួយ 4ពាន់លានដុល្លារដល់កម្មវិធី COVAX របស់ WHO

រដ្ឋាភិបាលរបស់លោក Joe Biden នឹងផ្ដល់ជំនួយចំនួន 4 ពាន់លានដុល្លារដល់កម្មវិធីផ្គត់ផ្គង់វ៉ាក់សាំង COVAX ដោយសង្ឃឹមថា ប្រទេសដទៃនឹងមានការរួមចំណែកផ្ដល់វិភាគទានប្រហាក់ប្រហែលនេះ។

ប្រធានាធិបតីអាមេរិក Joe Biden បានឱ្យដឹងថា នៅក្នុងកិច្ចប្រជុំដំបូងជាមួយនឹងក្រុមមេដឹកនាំនៃប្រទេស G7 នាថ្ងៃទី 19 កុម្ភៈនេះ នឹងប្រកាសអំពីខ្ទង់ជំនួយ 2 ពាន់លានដុល្លារភ្លាមៗ ដល់ COVAX ដែលជាកម្មវិធីផ្គត់ផ្គង់វ៉ាក់សាំង Covid-19 ដឹកនាំដោយអង្គការសុខភាពពិភពលោក (WHO)។ គោលដៅរបស់ COVAX គឺដើម្បីធានាឱ្យបាននូវការផ្គត់ផ្គង់វ៉ាក់សាំង Covid-19 ប្រកបដោយយុត្តិធម៌នៅទូទាំងពិភពលោក។ ទឹកប្រាក់ជំនួយចំនួន 2 ពាន់លានដុល្លារទៀតរបស់សហរដ្ឋអាមេរិក នឹងត្រូវទូទាត់នៅក្នុងអំឡុងពីរឆ្នាំទៀត ក្រោយពីប្រទេសផ្សេងៗសម្រេចចិត្ត និងលើកឡើងនូវការសន្យាផ្គល់ជំនួយរៀងៗខ្លួនរបស់ពួកគេ។

«យើងមានបំណងប្រែក្លាយ 2 ពាន់លានដុល្លារ ឱ្យទៅជាច្រើនពាន់លានដុល្លារអាមេរិក ពោលគឺយ៉ាងហោចក៏ 15 ពាន់លានដុល្លារអាមេរិក» មន្ត្រីអាមេរិកាំងម្នាក់បានថ្លែងដូច្នេះ។ ខ្ទង់ជំនួយរបស់សហរដ្ឋអាមេរិក ត្រូវបានសភាអនុម័តយល់ព្រមរួចហើយ។

សកម្មភាពរបស់ប្រធានាធិបតី Biden គឺផ្ទុយពីអតីតប្រធានាធិបតី Donald Trump។ លោក Trump ធ្លាប់បានគំរាមថានឹងដកអាមេរិកចេញពី WHO ជាអង្គការដែលលោកចោទប្រកាន់ថា ជាអាយ៉ងរបស់ចិន។

COVAX បានកំណត់គោលដៅហើយថា នឹងផ្គត់ផ្គង់វ៉ាក់សាំង Covid-19 យ៉ាងតិចចំនួនពីរពាន់លានដូស នៅចុងឆ្នាំ 2021 សម្រាប់ពលរដ្ឋងាយឆ្លងវីរុសចំនួន 20% នៃបណ្ដាប្រទេសក្រីក្រ និងប្រទេសមានចំណូលទាប។ កម្មវិធីនេះ កំពុងប្រឈមមុខនឹងហានិភ័យនៃការដួលរលំ ដោយសារតែបញ្ហាខ្វះហិរញ្ញវត្ថុ៕

ប្រភព៖ Reuters

February 19, 2021

តួលេខ Covid-19 នៅកម្ពុជា និងពិភពលោក សម្រាប់ព្រឹកថ្ងៃទី 19 កុម្ភៈ 2021

កម្ពុជារកឃើញករណីឆ្លងវីរុស Covid-19 ថ្មីចំនួន 1 នាក់ទៀត ខណៈពិភពលោកទាំងមូលរកឃើញ 393,029 នាក់។

ក្រសួងសុខាភិបាល បានឱ្យដឹងថា ក្នុងអំឡុងមួយថ្ងៃមួយយប់កន្លងទៅនេះ កម្ពុជាបានរកឃើញករណីថ្មីដែលវិជ្ជមាននឹង Covid-19 ចំនួន 1 នាក់ កើតឡើងចំពោះអ្នកដំណើរជាស្ត្រីជនជាតិចិន អាយុ 25 ឆ្នាំ មកពីអារ៉ាប់ បន្តដំណើរតាមជើងយន្តហោះសិង្ហបុរី។ ព័ត៌មានបន្ថែម សូមបន្តអានរាយបាយករណ៍របស់ក្រសួងដូចមាននៅខាងក្រោម។

គិតមកដល់ព្រឹកនេះ កម្ពុជារកឃើញអ្នកផ្ទុកវីរុស Covid-19 សរុបចំនួន 484 នាក់ ក្នុងនោះមានអ្នកជាសះស្បើយចំនួន 470 នាក់ ខណៈអ្នកកំពុងព្យាបាលមានចំនួន 14 នាក់។

នៅទូទាំងពិភពលោក តួលេខសរុបនៃអ្នកបានឆ្លងវីរុស Covid-19 បានកើនដល់ 110,818,204 នាក់ ក្នុងនោះមាន 2,451,124 នាក់បានស្លាប់ និង 85,762,358 នាក់បានជាសះស្បើយ ខណៈ 22,602,486 នាក់ កំពុងផ្ទុកវីរុស។ ករណីឆ្លងថ្មីដែលទើបត្រូវបានរកឃើញក្នុងអំឡុង 24 ម៉ោងកន្លងទៅ មានចំនួន 393,029 នាក់៕

February 19, 2021

ឥណ្ឌូនេស៊ីពិន័យដល់ប្រាក់ 5លានរូពី ចំពោះអ្នកមិនព្រមចាក់វ៉ាក់សាំង Covid-19

អាជ្ញាធរទីក្រុង ចាកាតា (Jakarta) របស់ប្រទេសឥណ្ឌូនេស៊ី បានចេញប្រកាសព្រមានថានឹងពិន័យជាប្រាក់ចំនួន 5 លានរូពី (rupiah) ដែលប្រហែល 356.89 ដុល្លារអាមេរិក (1,455,000 រៀល) ចំពោះពលរដ្ឋរូបណាដែលមិនព្រមចាក់វ៉ាក់សាំងទប់ស្កាត់វីរុស Covid-19។

ការពិន័យជាប្រាក់ដ៏ច្រើនបែបនេះ ត្រូវបានឡើងដើម្បីបង្ខំឱ្យពលរដ្ឋគោរពទៅតាមការកំណត់ថ្មីរបស់រដ្ឋាភិបាល ក្នុងបំណងទប់ស្កាត់ការបន្តឆ្លងរាលដាលនៃវីរុសបង្កជំងឺរលាកសួតប្រភេទថ្មី Covid-19។

នៅចំពោះមុខក្រុមអ្នកសារព័ត៌មាន អភិបាលរងទីក្រុងចាកាតា Ahmad Riza Patria ថ្លែងថា៖ «បើសិនអ្នកមិនព្រមចាក់វ៉ាក់សាំង នោះអ្នកនឹងត្រូវទទួលបញ្ហាចំនួន 2 គឺមិនទទួលបានជំនួយផ្នែកសង្គមកិច្ច និងត្រូវបង់ប្រាក់ពិន័យ»។

ក្នុងយុទ្ធនាការចាក់វ៉ាក់សាំង Covid-19 ដែលចាប់ផ្ដើមកាលពីខែមុន ឥណ្ឌូនេស៊ី បានកំណត់គោលដៅចាក់វ៉ាក់សាំងដល់ពលរដ្ឋឱ្យបាន 181.5 លាននាក់ ក្នុងចំណោមពលរដ្ឋសរុបជាង 270 លាននាក់របស់ប្រទេសនេះ នៅក្នុងអំឡុង 15 ខែ។

កាលពីដើមខែនេះ ឥណ្ឌូនេស៊ី បានប្រកាសបទបញ្ជាមួយ ក្នុងនោះបានចែងថា អ្នកណាមិនព្រមចាក់វ៉ាក់សាំង Covid-19 នឹងមិនទទួលបានជំនួយផ្នែកសង្គមកិច្ច ឬសេវាកម្មរបស់រដ្ឋាភិបាល ឬមួយត្រូវបង់ប្រាក់ពិន័យ។ កម្រិតនៃការពិន័យនឹងអាស្រ័យលើការសម្រេចចិត្តរបស់ស្ថាប័នសុខាភិបាល ឬអាជ្ញាធរមូលដ្ឋាន។

លទ្ធផលនៃការស្ទង់មតិមួយដែលត្រូវបានធ្វើឡើងដោយក្រុមហ៊ុន Saiful Mujani កាលពីខែធ្នូ 2020 បង្ហាញថា មានតែ 37% ក្នុងចំណោមពលរដ្ឋ 1,202 នាក់ដែលត្រូវបានសួរ បានប្រាប់ថា ពួកគេនឹងចាក់វ៉ាក់សាំង Covid-19 ខណៈ 40% មិនទាន់សម្រេចចិត្ត និង 17% ឆ្លើយថា នឹងបដិសេធការចាក់វ៉ាក់សាំងនេះ៕

ប្រភព៖ Arabnews

February 19, 2021

Covid-19 កំពុងពន្លឿនដំណើរការដាក់ឱ្យប្រើប្រាក់អេឡិចត្រូនិកនៅលើពិភពលោក

ធនាគារកណ្ដាលរបស់ប្រទេសជាច្រើនក្នុងពិភពលោក កាន់តែគិតគូរដល់ការពន្លឿនការអភិវឌ្ឍរូបិយប័ណ្ណទម្រង់ឌីជីថល ឬហៅថា ប្រាក់អេឡិចត្រូនិក ដើម្បីជំនួសក្រដាសប្រាក់ធម្មតានាបច្ចុប្បន្ន។

ក្នុងរដូវចូលឆ្នាំចិនកន្លងទៅ Covid-19 បានធ្វើឱ្យជនជាតិចិន ត្រូវរស់នៅក្នុងស្ថានភាពតានតឹង ខណៈរដ្ឋាភិបាលស្នើឱ្យពលរដ្ឋកាត់បន្ថយការដើរហើរ និងជួបជុំ ហើយប្រការនេះបានប៉ះពាល់យ៉ាងធ្ងន់ធ្ងរដល់វិស័យនានារបស់ប្រទេសនេះ។ ក៏ប៉ុន្តែ ពលរដ្ឋចិននៅទីក្រុងប៉េកាំង ប្រមាណ 50,000 នាក់ បានទទួលអាំងប៉ាវជាប្រាក់អេឡិចត្រូនិក ចំនួន 200 យុន (ប្រហែល 31ដុល្លារអាមេរិក) ពីរដ្ឋាភិបាល ដែលពួកគេអាចចាយវាយតាមអនឡាញ ឬចាយផ្ទាល់។

នៅពេល Covid-19 កំពុងពន្លឿនដំណើរការនៃការអភិវឌ្ឍបច្ចេកវិទ្យា ធនាគារកណ្ដាលរបស់ប្រទេសជាច្រើនក្នុងពិភពលោក ក៏កាន់តែគិតគូរដល់ការពន្លឿនការអភិវឌ្ឍរូបិយប័ណ្ណទម្រង់ឌីជីថល ឬហៅថា ប្រាក់អេឡិចត្រូនិក ដើម្បីជំនួសក្រដាសប្រាក់ធម្មតានាបច្ចុប្បន្ន។

កាលពីខែតុលា ឆ្នាំ 2020 កម្ពុជា គឺជាប្រទេសដំបូងគេនៅអាស៊ី ដែលបានដាក់ឱ្យដំណើរការប្រព័ន្ធទូទាត់ប្រាក់ដូចខាងលើ។ ប្រទេសជាច្រើនផ្សេងទៀត ដូចជា ប្រទេសថៃ សិង្ហបុរី ឬ ជប៉ុន និងកូរ៉េខាងត្បូងជាដើម ក៏កំពុងតែគិតគូរដល់ការអភិវឌ្ឍ និងសាកល្បងប្រើប្រាស់ប្រព័ន្ធប្រាក់ឌីជីថលនេះដែរ។

ការដែលប្រទេសចិនបង្កើនការអភិវឌ្ឍប្រាក់យុនអេឡិចត្រូនិក ទំនងជាជះឥទ្ធិពលខ្លាំងក្លាដល់សេដ្ឋកិច្ចពិភពលោក នេះបើគិតអំពីមហិច្ឆតារបស់រដ្ឋាភិបាលចិន ក្នុងការធ្វើអន្តរជាតូបនីយកម្មលើប្រាក់យុនរបស់ខ្លួន។

ការសាកល្បងប្រើប្រាស់ប្រាក់ទម្រង់អេឡិចត្រូនិករបស់ទីក្រុងប៉េកាំងកាលពីរដូវចូលឆ្នាំចិនកន្លងទៅ បានបញ្ចប់កាលពីថ្ងៃទី 17 កុម្ភៈ។ មុននោះ ក៏មានការសាកល្បងដូចគ្នានេះ នៅតំបន់មួយចំនួននៃប្រទេសចិនផងដែរ។ ជាសរុប ធនាគារជាតិរបស់ប្រទេសចិន បានចែកចាយប្រាក់ជាទម្រង់ឌីជីថល ជាង 100 លានយុន។ ក្រៅពីនេះ ក៏មានកម្មវិធីប្រើប្រាស់ប្រាក់យុនអេឡិចត្រូនិកជាច្រើនផ្សេងទៀត កំពុងត្រូវបានគិតដល់ ក្នុងនោះមានព្រឹត្តិការណ៍កីឡាអូឡាំពិកទីក្រុងប៉េកាំងឆ្នាំ 2022 (Beijing Olympics 2022) ទៀតផង។

ប្រទេសចិនគឺជាទឹកដីដែលមានការជឿនលឿនក្នុងការប្រើប្រាស់ប្រាក់ឌីជីថល។ អ្នកប្រើប្រាស់រាប់រយលាននាក់ កំពុងតែប្រើសេវាកម្ម Alipay និង WeChat ដោយការស្កេនកូដ QR នៅលើអេក្រង់ទូរស័ព្ទឆ្លាតវៃ ពោលគឺមិនប្រើប្រាស់ក្រដាសប្រាក់ ឬកាក់នោះទេ។ រីឯប្រាក់យុនអេឡិចត្រូនិក ក៏ដំណើរការដូចយន្តការនេះដែរ។

ប៉ុន្តែ ធនាគារទូទាត់អន្តរជាតិ (BIS/Bank for International Settlements) មិនបានគិតដូច្នេះទេ។ ប្រាក់អេឡិចត្រូនិកដែលចេញដោយធនាគារកណ្ដាល ត្រូវបានហៅកាត់ថា CBDC (Central Bank Digital Currency)។ ការស្រាវជ្រាវរបស់ BIS កាលពីខែមករា ឆ្នាំ 2021 បានបង្ហាញថា 86% ក្នុងចំណោម 65% នៃធនាគារកណ្ដាលរបស់បណ្ដាប្រទេសក្នុងពិភពលោក កំពុងប្រើប្រាស់យន្តការដូច CBDC។ ធនាគារកណ្ដាលប្រហែល 60% បានឱ្យដឹងថា ពួកគេអាចដាក់ឱ្យប្រើប្រាស់ CBDC ក្រោយរយៈពេល 6 ឆ្នាំទៀត។

ក្រុមប្រទេសដែលមានសេដ្ឋកិច្ចកំពុងរីកចម្រើន និងមានប្រព័ន្ធធនាគារនៅទន់ខ្សោយនៅឡើយ ក៏មានគោលដៅដោយឡែករបស់ខ្លួនដើម្បីតាមប្រមាញ់ CBDC ក្នុងបំណងជួយឱ្យសកម្មភាពទូទាត់ប្រាក់ ដំណើរប្រកបដោយប្រសិទ្ធភាពជាងមុន និងដើម្បីបង្កើនប្រសិទ្ធភាពនៃគោលនយោបាយរូបិយវត្ថុរបស់ពួកគេ។

កម្ពុជា គឺជាឧទាហរណ៍ដ៏សំខាន់មួយ! កាលពីខែតុលា ឆ្នាំ 2020 កម្ពុជាបានប្រកាសដាក់ឱ្យប្រើប្រព័ន្ធទូទាត់មួយដែលមានឈ្មោះថា «បាគង» (Bakong Payment Service) ដែលត្រូវបានអភិវឌ្ឍរួមជាមួយនឹងក្រុមហ៊ុន blockchain របស់ជប៉ុន ដែលមានឈ្មោះថា Soramitsu៕

ប្រភព៖ Nikkei

February 18, 2021

ជប៉ុន «បង់ថ្លៃការពារ» ឱ្យអាមេរិកដូចមុន បើទោះ Trump ធ្លាប់ទារច្រើនជាងនេះ 4ដង

ជប៉ុននឹងពន្យារសុពលភាពនៃកិច្ចព្រមព្រៀងតម្លៃ 1.9 ពាន់លានដុល្លារដែលប្រទេសនេះត្រូវបង់ទៅឱ្យកងទ័ពសហរដ្ឋអាមេរិកដែលបោះជំរំនៅប្រទេសនេះ សម្រាប់រយៈពេលមួយឆ្នាំ បើទោះជាអតីតប្រធានាធិបតី Trump ធ្លាប់ទាមទារច្រើនជាងនេះ 4 ដងក៏ដោយ។

រដ្ឋមន្ត្រីការបរទេសជប៉ុន Toshimitsu Motegi កាលពីថ្ងៃទី 17 កុម្ភៈ បានប្រកាសថា ទីក្រុងតូខ្យូ និងវ៉ាស៊ីងតោន បានយល់ព្រមពន្យារសុពលភាពនៃកិច្ចព្រមព្រៀងខាងលើ ដោយរក្សាទុកតម្លៃដើមដែលជប៉ុនត្រូវបង់ទៅឱ្យទាហានអាមេរិកចំនួន 55,000 នាក់ ដែលបោះទ័ពក្នុងប្រទេសនេះ ក្នុងគ្រាប្រទេសទាំងពីរកំពុងចរចាគ្នាអំពីកិច្ចព្រមព្រៀងចែករំលែកខ្ទង់ចំណាយថ្មី។

កិច្ចព្រមព្រៀងចែករំលែកការចំណាយនាបច្ចុប្បន្ន នឹងត្រូវបញ្ចប់នៅក្រោយខែមីនា ឆ្នាំ 2021 ប៉ុន្តែនឹងត្រូវបានអូសបន្លាយដល់ខែមីនា ឆ្នាំ 2022 ហើយជប៉ុននឹងបន្តបង់ប្រាក់ឱ្យសហរដ្ឋអាមេរិកចំនួន 1.9 ពាន់លានដុល្លារ សម្រាប់អំឡុងពេលនេះ។

អតីតប្រធានាធិបតី Donald Trump កាលពីនៅកាន់តំណែង ធ្លាប់បានដាក់សម្ពាធឱ្យជប៉ុនបង់ថ្លៃការពារដល់អាមេរិកច្រើនជាងបច្ចុប្បន្នដល់ទៅ 4 ដង ពោលគឺប្រហាក់ប្រហែលនឹង 8 ពាន់លានដុល្លារអាមេរិក។ សម្ពាធនេះគឺស្ថិតក្នុងយុទ្ធនាការរបស់លោក Trump ដើម្បីបង្ខំឱ្យប្រទេសជាសម្ព័ន្ធមិត្ត បង្កើនការចំណាយលើវិស័យការពារជាតិរបស់ពួកគេ។

ទាហានជប៉ុន និងអាមេរិក កំពុងធ្វើសមយុទ្ធរួមគ្នា នៅ Okinawa កាលពីឆ្នាំ 2020

ទាហានអាមេរិកប្រមាណ 55,000 នាក់ កំពុងមានវត្តមាននៅលើទឹកដីជប៉ុន ក្នុងនោះមាន កងនាវាចម្បាំងទី7 (United States Seventh Fleet) របស់កងទ័ពជើងទឹក រួមនឹងក្រុមប្រយុទ្ធនាវាផ្ទុកយន្តហោះប្រចាំការ និងកងទ័ពជើងទឹកលេខ3 (III Marine Expeditionary Force) ផងដែរ។ បណ្ដាប្រទេសដែលកងទ័ពសហរដ្ឋអាមេរិកបោះជំរំ ត្រូវមានកាតព្វកិច្ច «ជួយចេញថ្លៃលើការបណ្ដុះបណ្ដាល ពលកម្ម និងភ័ស្តុភារ សម្រាប់មូលដ្ឋានទ័ព»។

រដ្ឋាភិបាលលោក Joe Biden កំពុងតែស្វែងរកការប្ដូរផ្លាស់វិធីសាស្ត្របែប «ប្រឈមមុខ» របស់អតីតរដ្ឋាភិបាលលោក Trump ចំពោះសម្ព័ន្ធមិត្ត ទាក់ទងនឹងកិច្ចសន្យាការពារប្រទេសរបស់ពួកគេ។ លោក Biden មុននេះក៏ធ្លាប់បានផ្អាកផែនការដកទ័ពអាមេរិកប្រមាណ 11,900 នាក់ ចេញ្ពីប្រទេសអាល្លឺម៉ង់ ដែលត្រូវបានលោក Trump បញ្ជាកាលពីលោកនៅគ្រប់គ្រងសេតវិមាន៕

ប្រភព៖ Aljazeera

February 18, 2021

Author: សឿន សំណាង