សឿន សំណាង - La Reine Media

លោកស្រី Suu Kyi បង្ហាញខ្លួននៅតុលាការ បន្ទាប់ពីត្រូវនាំចេញពីផ្ទះ ទៅកាន់ទីតាំងអាថ៌កំបាំង

មេដឹកនាំបក្សសម្ព័ន្ធជាតិប្រជាធិបតេយ្យរបស់មីយ៉ានម៉ា លោកស្រី Aung San Suu Kyi បានបង្ហាញខ្លួនតាមរយៈវីដេអូនៅតុលាការក្នុងទីក្រុងណៃពីដោ នាថ្ងៃនេះ។

លោកស្រី កំពុងប្រឈមនឹងការចោទប្រកាន់ជាច្រើនករណី ក្នុងនោះមានដូចជា ការនាំចូលឧបករណ៍ទាក់ទងដោយខុសច្បាប់ និងរំលោភលើវិធានការបង្ការការឆ្លងវីរុស Covid-19 ជាដើម នេះបើតាមក្រុមមេធាវីរបស់លោក។ សហគមន៍អន្តរជាតិបានហៅការចោទប្រកាន់ពីសំណាក់កងទ័ពថាជារឿងគ្មានន័យ និងដើម្បីបង្វែរចំណាប់អារម្មណ៍។

Khin Maung Zaw ដែលជាមេធាវីម្នាក់របស់លោកស្រី Suu Kyi និយាយថា លោកស្រីមានសុខភាពល្អនៅពេលកំពុងបង្ហាញខ្លួននៅតុលាការ។ ចំណែកមេធាវី Min Min Soe និយាយថា លោកស្រីទំនងជាបានស្រកទម្ងន់ និងបានស្នើសុំជួបក្រុមអ្នកច្បាប់របស់លោកស្រី។

លោកស្រី Suu Kyi មិនបានបង្ហាញខ្លួនជាសាធារណៈចាប់តាំងពីរដ្ឋប្រហារបានកើតឡើង និងត្រូវបានគេជឿថា ត្រូវកងទ័ពឃុំខ្លួននៅក្នុងផ្ទះរបស់លោកស្រីនារដ្ឋធានីណៃពីដោ។ ប្រភពព័ត៌មានមួយពីគណៈបក្សសម្ព័ន្ធជាតិប្រជាធិបតេយ្យ (NLD) កាលពីថ្ងៃទី 26 កុម្ភៈ បានឱ្យដឹងថា លោកស្រី Suu Kyi ត្រូវក្រុមប៉ូលិសនាំខ្លួនចេញពីផ្ទះ ទៅកាន់ទីតាំងសម្ងាត់មួយតាំងពី 6 ថ្ងៃមុនមកម្ល៉េះ។

ក្នុងគ្រាដែលលោកស្រី Suu Kyi បង្ហាញខ្លួននៅតុលាការ ពលរដ្ឋនៅក្នុងទីក្រុងសំខាន់ៗជាច្រើននៃប្រទេសនេះ ក៏នាំគ្នាចេញធ្វើបាតុកម្មប្រឆាំងនឹងអំពើរដ្ឋប្រហាររបស់កងទ័ព។ ចំណែកក្រុមប៉ូលិស និងកងសន្តិសុខ រួមនឹងរថយន្តបាញ់ទឹក រថពាសដែកទាំងឡាយរបស់មេដឹកនាំរដ្ឋប្រហារ លោក Min Aung Hlaing ក៏ត្រូវបានដាក់ពង្រាយ ត្រៀមបម្រាបលើក្រុមបាតុករផងដែរ៕

ប្រភព៖ RT
ប្រែសម្រួល៖ បុត្រា

March 1, 2021

ពលរដ្ឋមីយ៉ានម៉ាបន្តចេញធ្វើបាតុកម្ម ក្រោយមានការបង្រាបដ៏បង្ហូរឈាមកាលពីម្សិលមិញ

ប្រជាជនភូមា បន្តនាំគ្នាមកកាន់ដងផ្លូវដើម្បីធ្វើបាតុកម្មប្រឆាំងនឹងរដ្ឋប្រហារយោធាជាបន្តទៀត និងស្នើឱ្យស្ដារប្រជាធិបតេយ្យ បើទោះជាមានការបង្រាបយ៉ាងខ្លាំងក្លាពីក្រុមប៉ូលិសដែលគាំទ្រដោយកងទ័ពប្រទេសនេះកាលពីថ្ងៃទី 28 កុម្ភៈ ឆ្នាំ 2021។

ក្រុមប៉ូលិសប្រដាប់អាវុធ និងរថយន្តបាញ់ទឹក រួមនឹងរថពាសដែករបស់កងទ័ព ត្រូវបានដាក់ពង្រាយនៅតាមទីតាំងសំខាន់ៗរបស់ក្រុមបាតុករនៅទីក្រុង Yangon នាថ្ងៃទី 1 មីនានេះ ខណៈដែលក្រុមបាតុករកំពុងហែក្បួននៅក្នុងទីរួមស្រុក Kale ភាគពាយព្យប្រទេសភូមា។ ក្រុមបាតុករនាំគ្នាលើករូបថតរបស់លោកស្រី Aung San Suu Kyi និងស្រែកជ័យឃោសន៍ «ប្រជាធិបតេយ្យ ជាយុត្តិធម៌របស់យើង»។

វីដេអូដែលបានផ្សាយផ្ទាល់នៅលើ Facebook បង្ហាញថា បាតុករជាច្រើននាក់ដែលពាក់មួកសុវត្ថិភាពការងារ បានប្រមូលផ្ដុំគ្នានៅក្នុងទីប្រជុំជនមួយនៅ Lashio ក្នុងរដ្ឋ Shan និងនាំគ្នាស្រែកជ័យឃោសន៍នៅពេលក្រុមប៉ូលិសកំពុងឆ្ពោះមកកាន់ពួកគេ។

មេដឹកនាំបាតុកម្ម Ei Thinzar Maung បានបង្ហោះសារនៅលើ Facebook ថា៖ «មួយខែបានកន្លងផុតទៅ ចាប់តាំងពីមានរដ្ឋប្រហារ។ ពួកគេបានបង្ក្រាបពួកយើងដោយការបាញ់រះ។ យើងនឹងត្រលប់មកនៅថ្ងៃនេះ»។

បាតុករមួយចំនួនបានអំពាវនាវឱ្យមានការបំផ្លាញកាមេរ៉ាតាមដានដែលអាជ្ញាធរកំពុងប្រើប្រាស់ និងបានចែករំលែកអំពីវិធីច្នៃផ្សែងបង្ហូរទឹកភ្នែកនៅលើបណ្ដាញសង្គមផងដែរ។ សកម្មជនខ្លះបានច្នៃខែលការពារសម្រាប់ក្រុមបាតុករដើម្បីអាចទប់ទល់នឹងកងកម្លាំងប៉ូលិស និងទាហានដែលបំពាក់អាវុធគ្រប់ដៃ។

តាមដងផ្លូវនៅទីក្រុង Yangon បាតុករបានយករូបថតរបស់មេដឹកនាំយោធា Min Aung Hlaing បិទទៅលើដី និងមានសរសេរថា «អាម៉ាស់ចំពោះលោក យើងនឹងមិនលើកលែងទោសឱ្យលោកឡើយ»។

បាតុកម្មនេះបានកើតឡើងមួយថ្ងៃបន្ទាប់ពីការិយាល័យសិទ្ធិមនុស្សរបស់អង្គការសហប្រជាជាតិរាយការណ៍ថា យ៉ាងហោចមានមនុស្ស 18 នាក់បានស្លាប់ និង 30 នាក់រងរបួស ក្រោយការបង្រាបពីសំណាក់ក្រុមប៉ុលិស។

គណៈកម្មការមួយដែលតំណាងឱ្យក្រុមតំណាងរាស្ត្រជាប់ឆ្នោតកាលពីខែវិច្ឆិកា ឆ្នាំ 2020 បានឱ្យដឹងថា មនុស្សយ៉ាងតិច 26 នាក់បានបាត់បង់ជីវិតនៅក្នុង «ថ្ងៃបង្ហូរឈាម» 28 កុម្ភៈ។ គណៈកម្មនេះបញ្ជាក់ថា៖ «ការប្រើប្រាស់កម្លាំងអាវុធហួសហេតុ និងទង្វើរំលោភច្បាប់ផ្សេងទៀតរបស់កងទ័ព កំពុងត្រូវបានលាតត្រដាង ហើយពួកគេនឹងត្រូវទទួលខុសត្រូវ»។

ភាគីកងទ័ពមីយ៉ានម៉ា មិនទាន់អធិប្បាយអ្វីអំពីការប្រើប្រាស់ហិង្សារបស់ខ្លួន ក្នុងគ្រាដែលក្រុមប៉ូលិស និងអ្នកនាំពាក្យរបស់កងទ័ពបានបដិសេធការឆ្លើយនឹងសំណួរទាក់ទង។

សមាគមន៍ជំនួយអ្នកទោសនយោបាយ បានឱ្យដឹងថា យ៉ាងហោចមានមនុស្ស 270 នាក់ ត្រូវបានចាប់ខ្លួនកាលពីថ្ងៃទី 28 កុម្ភៈ នាំឱ្យតួលេខសរុបនៃក្រុមមនុស្សដែលត្រូវបានចាប់ខ្លួន ចោទប្រកាន់ ឬកាត់ទោស រាប់ចាប់ពីអំពើរដ្ឋប្រហារបានកើតឡើង។ សាក្សីជាច្រើនបានឱ្យដឹងថា បាតុករជាច្រើននាក់ត្រូវក្រុមប៉ូលិសវាយតប់ មុនពេលត្រូវបានចាប់ខ្លួនយកទៅបាត់៕

ប្រភព៖ RT
ប្រែសម្រួល៖ បុត្រា

March 1, 2021

ថ្ងៃចុងខែកុម្ភៈ ជាថ្ងៃបង្ហូរឈាមបំផុតក្នុងអំឡុងមួយខែនៃការធ្វើបាតុកម្មប្រឆាំងរដ្ឋប្រហារនៅមីយ៉ានម៉ា

ថ្ងៃទី 28 កុម្ភៈ ឆ្នាំ 2021 ជាថ្ងៃដ៏សោកសៅបំផុតរបស់ចលនាប្រឆាំងរដ្ឋប្រហារនៅភូមា (មីយ៉ានម៉ា) ដោយសារតែក្រុមបាតុករត្រូវបានក្រុមប៉ូលិសបាញ់បង្រាបយ៉ាងចាស់ដៃជាទីបំផុត។

កងកម្លាំងសន្តិសុខដែលមានការគាំទ្រពីកងទ័ពមីយ៉ានម៉ា កាលពីថ្ងៃទី 28 កុម្ភៈ 2021 បានបាញ់រះលើហ្វូងបាតុករអហិស្សានៅទីក្រុងមួយចំនួននៃប្រទេសនេះ បណ្ដាលឱ្យមានមនុស្សយ៉ាងតិច 18 នាក់ បានបាត់បង់ជីវិត នេះបើតាមអង្គការសហប្រជាជាតិ។

វីដេអូនានាដែលត្រូវបានចែករំលែកលើបណ្ដាញសង្គម បានបង្ហាញអំពីទិដ្ឋភាពមនុស្សជាច្រើននាក់ដេកដួលក្នុងថ្លុកឈាមនៅតាមដងផ្លូវក្នុងទីក្រុង ខណៈដែលបាតុករផ្សេងទៀតខំរត់គេចខ្លួនពីក្រុមប៉ូលិស និងផ្សែងបង្ហូរទឹកភ្នែក។ ការបង្រាបបាតុករពីសំណាក់អាជ្ញាធរមីយ៉ានម៉ា បាននាំឱ្យមានការរិះគន់ និងថ្កោលទោសពីសំណាក់អន្តរជាតិ។

ការប្រើកម្លាំងបាយពីភាគីកងទ័ព បានបង្ហាញអំពីការប្ដេជ្ញាយ៉ាងខ្លាំងក្លារបស់រដ្ឋាភិបាលយោធានៅក្នុងការរំសាយអស្ថិរភាពនៅមីយ៉ានម៉ា ដែលបានអូសបន្លាយអស់រយៈពេលពេញមួយខែ ក្រោយពីមានអំពើរដ្ឋប្រហារយោធាកាលពីថ្ងៃទី 1 ខែកុម្ភៈ ឆ្នាំ 2021។

«យើងថ្កោលទោសយ៉ាងខ្លាំងក្លាចំពោះអំពើហិង្សាសំដៅទៅលើក្រុមបាតុករនៅមីយ៉ានម៉ា ហើយយើងអំពាវនាវឱ្យកងទ័ពបញ្ឈប់ជាបន្ទាន់នូវការប្រើប្រាស់អាវុធប្រឆាំងនឹងក្រុមបាតុករអហិង្សា» Ravina Shamdasani អ្នកនាំពាក្យនៃការិយាល័យសិទ្ធិមនុស្សរបស់អង្គការសហប្រជាជាតិ កាលពីម្សិលមិញ (28 កុម្ភៈ) បានថ្លែងដូច្នេះ។

នៅទីក្រុង Dawei នៅភាគខាងត្បូងប្រទេសមីយ៉ានម៉ា ក្រុមប៉ូលិសបានបាញ់រះទៅលើហ្វូងបាតុករដែលមានគ្នារាប់រយនាក់ នេះបើតាមសាក្សីដែលបានប្រាប់សារព័ត៌មាន New York Times។ វេជ្ជបណ្ឌិតដែលបានព្យាបាលជូនជនរងគ្រោះនៅមន្ទីរពេទ្យ បានឱ្យដឹងថា ករណីបាញ់រះនេះបានសម្លាប់មនុស្សយ៉ាងតិច 3 នាក់ និងបង្ករបួសដល់មនុស្សប្រមាណ 50 នាក់។

ក្រុមវេជ្ជបណ្ឌិតនៅ Mandalay បញ្ជាក់ថា មានការផ្ទុះអាវុធចំនួន 3 លើក នាំឱ្យមានការស្លាប់ និងរបួសជាច្រើននៅទីនេះ។ ទីក្រុង Yangon និងទីក្រុង Mawlamyine ក៏មានករណីបាញ់ប្រហារពីសំណាក់ក្រុមប៉ូលិសស្រដៀងគ្នានេះដែរ។ សេចក្ដីប្រកាសពីអង្គការសហប្រជាជាតិ បានឱ្យដឹងថា ពួកគេមានរបាយការណ៍អំពីករណីស្លាប់ «ដោយសារគ្រាប់កាំភ្លើងដែលបាញ់សំដៅហ្វូងបាតុករ» នៅ Yangon, Mandalay, Dawei និងទីក្រុងមួយចំនួនទៀត រួមមាន Myeik, Bago និង Pokokku ផងដែរ។

នេះគឺតួលេខស្លាប់ និងរបួសច្រើនជាងគេនៅក្នុងមួយថ្ងៃ រាប់ចាប់ពីក្រោយអំពើរដ្ឋប្រហាររបស់កងទ័ពដែលបានទម្លាក់រដ្ឋាភិបាលស៊ីវិលនៅមីយ៉ានម៉ា។ មុនថ្ងៃទី 28 កុម្ភៈ មានករណីស្លាប់ចំនួនតែ 3 នាក់ប៉ុណ្ណោះ ដែលត្រូវបានរាយការណ៍ទូលំទូលាយ បើទោះមាន 2 នាក់ផ្សេងទៀតត្រូវបានលើកឡើងពីក្រុមគ្រួសារជនរងគ្រោះ។

សូមរំលឹកថា កាលពីឆ្នាំ 1988 និង 2007 កងទ័ពភូមា ក៏ធ្លាប់បានរំសាយចលនាប្រជាធិបតេយ្យ ដោយការបាញ់រះសំដៅហ្វូងបាតុករដូចករណីថ្ងៃទី 28 កុម្ភ ឆ្នាំ 2021 នេះដែរ៕

ប្រភព៖ NYTimes
ប្រែសម្រួល៖ បុត្រា

March 1, 2021

វ៉ាក់សាំង Sputnik-Light ចាក់តែម្ដងជាការស្រេច ដាក់ពាក្យសុំចុះបញ្ជិកានៅរុស្ស៊ី

គណនី Twitter ផ្លូវការរបស់ Sputnik-V កាលពីថ្ងៃទី 28 កុម្ភៈ បានប្រកាសថា ខ្លួនបានដាក់ពាក្យស្នើចុះបញ្ជីឈ្មោះវ៉ាក់សាំង Sputnik-Light ដើម្បីប្រើប្រាស់ជាបន្ទាន់នៅប្រទេសរុស្ស៊ី និងប្រទេសមួយចំនួនទៀត។ Sputnik-Light គឺជាវ៉ាក់សាំងប្រភេទសាមញ្ញរបស់ Sputnik-V ដោយចាក់តែមួយម្ជុលគត់ជាការស្រេច ហើយអង្គបដិប្រាណនឹងកើតឡើងក្រោយរយៈពេល 1 សប្ដាហ៍ បន្ទាប់ពីបានចាក់។

Alexander Ginzburg ប្រធានមជ្ឈមណ្ឌលសុខាភិបាល Gamalei ដែលជាស្ថាប័នអភិវឌ្ឍវ៉ាក់សាំងនេះ បានសង្កត់ធ្ងន់ថា វ៉ាក់សាំង Sputnik Light នឹងការពាររាងកាយមិនឱ្យឆ្លងវីរុស Covid-19 រយៈពេល 5 ខែ។ ក្រោយពីចាក់វ៉ាក់សាំងនេះបាន 1 សប្ដាហ៍ សមត្ថភាពបង្ការ Covid-19 នឹងចាប់ផ្ដើមកើតឡើង ហើយបរិមាណខ្ពស់បំផុតនៃអង្គបដិប្រាណរបស់វ៉ាក់សាំងនេះ នឹងកើតឡើងក្រោយការចាក់វ៉ាក់សាំងរយៈពេល 4 សប្ដាហ៍។ វ៉ាក់សាំងនេះ តាមគម្រោងនឹងត្រូវចាក់ឱ្យក្រុមគោលដៅដែលមានវ័យក្រោម 30 ឆ្នាំ។

បច្ចុប្បន្ន Gamalei បានចាប់ផ្ដើមធ្វើតេស្ត Sputnik-Light លើមនុស្សដំណាក់កាលពីបី រាប់ចាប់ពីថ្ងៃទី 17 កុម្ភៈ ឆ្នាំ 2021 ដល់ 28 មករា 2022 ដោយមានការស្ម័គ្រចិត្តចូលរួមចំនួន 4,000 នាក់។ ការប្រើប្រាស់សាកល្បងខាងលើនេះ ត្រូវបានធ្វើឡើងនៅបណ្ឌលភាពចំនួន 15 កន្លែង នៅទីក្រុង Moscow, Kaliningrad, Saint Petersburg, Saratov និង Smolensk។ល។

ក៏ប៉ុន្តែ យោងតាមអគ្គនាយកមូលនិធិវិនិយោគផ្ទាល់នៅរុស្ស៊ី Kirill Dmitriv គោលដៅរបស់វ៉ាក់សាំង Sputnik-Light នេះ នោះគឺទីផ្សារបរទេស។

ក្រោយទទួលបានការយល់ព្រមពីអាជ្ញាធរ វ៉ាក់សាំង Sputnik-Light នឹងត្រូវបានចាក់ដំណាលគ្នានឹងវ៉ាក់សាំងប្រភេទចាក់ 2 ម្ជុលផ្សេងទៀតរបស់ប្រទេសរុស្ស៊ី។

មកដល់បច្ចុប្បន្ន រុស្ស៊ីបានអនុញ្ញាតឱ្យប្រើប្រាស់វ៉ាក់សាំងបង្ការ Covid-19 ចំនួន 3 ប្រភេទរួចហើយ ក្នុងនោះមានវ៉ាក់សាំង Sputnik-V, EpiVacCorona និងវ៉ាក់សាំង CoviVac។

ប្រទេសរុស្ស៊ី គិតមកដល់ថ្ងៃត្រង់ទី 1 ខែមីនា 2021 នេះ បានរកឃើញអ្នកវិជ្ជមាននឹង Covid-19 សរុបចំនួន 4,246,079 នាក់ ក្នុងនោះមាន 86,122 នាក់បានស្លាប់ និង 348,160 នាក់ កំពុងទទួលការព្យាបាល៕

ប្រភព៖ RT
ប្រែសម្រួល៖ បុត្រា

March 1, 2021

ធ្វើអ៊ីចឹងក៏បានដែរឬ? ស្ត្រីម្នាក់មិនពាក់ម៉ាស់ការពារ សន្តិសុខបណ្ដេញចេញពីហាង ស្រាប់តែដោះ…យកមកពាក់តែម្ដង

ឃ្លីបវីដេអូដ៏គួរឱ្យភ្ញាក់ផ្អើលមួយនេះ ត្រូវបានថតនៅក្នុងហាងស៊ូភើរម៉ាខេតមួយ ដែលមានឈ្មោះថា Pick n Pay ក្នុងប្រទេសអាហ្វ្រិកខាងត្បូង ដោយមានស្ត្រីម្នាក់ កំពុងដើរទិញទំនិញនៅក្នុងហាង និងមិនបានពាក់ម៉ាស់អនាម័យការពារអ្វីទាំងអស់។ នៅពេលដែលខាងបុគ្គលិកសន្តិសុខប្រទះឃើញ ក៏បានចូលមកដាស់តឿន និងប្រាប់ថា នឹងមិនអនុញ្ញាតឱ្យប្រើ សេវាកម្មហាងនេះទៀតទេ បើនាងនៅតែមិនព្រមពាក់ម៉ាស់អនាម័យការពារ តែនាងហាក់ដូចជាគ្មានឥរិយាបថភិតភ័យ ឬញាប់ញ័រអ្វីទាំងអស់ ព្រមទាំងអះអាងថា មិនបានយកម៉ាស់មកជាមួយទៀតផង។

សូមរំឭកថា កាលពីឆ្នាំ2020 លោក សៃរ៊ីល រ៉ាម៉ាហ្វូសា ប្រធានាធិបតីនៃប្រទេសអាហ្វ្រិកខាងត្បូង បានថ្លែងថា អ្នកណាដែលមិនពាក់ម៉ាស់អនាម័យការពារនៅក្នុងទីសាធារណៈ គឺនឹងមានកំហុសស្មើនឹងទោសឧក្រិដ្ឋ អាចត្រូវចាប់ខ្លួន និងអនុវត្តតាមនីតិវិធីច្បាប់។

បុគ្គលិកសន្តិសុខរូបនោះ បានព្យាយាមនិយាយបញ្ចុះបញ្ចូល ឱ្យនាងព្រមពាក់ម៉ាសកាពារ តែនៅតែមិនទទួលបានការសហការអំពីស្ត្រីរូបនោះឡើយ។ ទីបំផុត ក៏ប្រើក្បាច់ចុងក្រោយ ដោយគំរាមថា បើនៅតែមិនព្រមធ្វើតាមរបៀបវិន័យទេ គេនឹងនាំខ្លួននាង ចេញពីហាងនេះភ្លាមតែម្ដង…។

ភ្លាមៗនោះឯង ស្ត្រីរូបនោះ ក៏ចាប់ផ្ដើមធ្វើរឿងមួយ ដែលគ្មានអ្នកណានឹកស្មានដល់ គឺនាងបានលូកដៃចូលទៅក្នុងសំពត់រ៉ូប ដែលនាងកំពុងស្លៀក ចាត់ការដោះខោលីអូពណ៌ខ្មៅចេញមក ហើយលើកយកមកពាក់នៅលើផ្ទៃមុខ ដើម្បីជំនួសឱ្យម៉ាស់អនាម័យការពារបណ្ដោះអាសន្ន បន្ទាប់ពីនោះ ក៏លើកមេដៃ ដាក់ភ្នាក់សន្តិសុខនោះ ក្នុងទំនងជាសំណួរថា ប៉ុនហ្នឹងអូខេនៅ? ក្រោមក្ដីភ្ញាក់ផ្អើល និងហួសចិត្តរបស់អ្នកដែលនៅក្បែរៗនោះគ្រប់គ្នា។

https://www.youtube.com/watch?v=Aw1eJOipLG0

ទិដ្ឋភាពទាំងនេះ បានក្លាយជាឃ្លិបវីដេអូដ៏សែនហួសចិត្តមួយ នៅក្នុងបណ្ដាញសង្គមអនឡាញ អ្នកដែលបានឃើញជាច្រើននាក់ បានភ្ញាក់ផ្អើល និងមិនយល់ស្របចំពោះទង្វើរបស់ស្ត្រីរូបនោះឡើយ ដោយអ្នកខ្លះនិយាយថា “គួរឱ្យស្អប់ខ្ពើម”, “នៅផ្ទះ ហើយទិញអីវ៉ាន់តាមអនឡាញវិញទៅ បើមិនចូលចិត្តពាក់ម៉ាស់ការពារបែបនេះ”, “ពួកគេមិនគួរឱ្យនាងចូលទៅក្នុងស៊ូភើរម៉ាខេត ដោយមិនបានពាក់ម៉ាស់ការពារបែបនេះតាំងពីដំបូង…គួរឱ្យខ្ពើមឆ្អើមបំផុត”៕

ប្រភព៖ ទីភ្នាក់ងារព័ត៌មាន dailystar
ប្រែសម្រួលដោយ ទិទីតំតាតូ

March 1, 2021

ប៉ូលិសប្រឆាំងកុបកម្ម ប៉ះទង្គិចជាមួយនឹងក្រុមបាតុករថៃ-មីយ៉ានម៉ា នៅមុខបន្ទាយទាហាន

ប៉ូលិសថៃ កាលពីថ្ងៃទី 28 កុម្ភៈ ឆ្នាំ 2021 បានប្រើប្រាស់ឡានទឹក និងផ្សែងបង្ហូរទឹកភ្នែកដើម្បីបង្រាមក្រុមបាតុករនៅក្បែរមូលដ្ឋានទ័ពមួយក្នុងរាជធានីបាងកក។

ចលនាបាតុកម្មដឹកនាំដោយក្រុមយុវជនដែលស្នើឱ្យនាយករដ្ឋមន្ត្រីថា Prayut Chan-o-cha ចុះចេញពីតំណែង នៅក្នុងអំឡុងប៉ុន្មានខែកន្លងទៅនេះ មានភាពស្ងប់ស្ងាត់ ដោយសារតែបញ្ហា Covid-19។ ប៉ុន្តែ ករណីមេដឹកនាំចលនាបាតុកម្មចំនួន 4 នាក់ ត្រូវបានចាប់ខ្លួនកាលពីខែមុនក្រោមបទចោទប្រមាថព្រះមហាក្សត្រ បាននាំឱ្យចលនានេះពុះកញ្ជ្រោលឡើងវិញ។

មេដឹកនាំចលនាចំនួន 4 នាក់នេះ ស្ថិតក្នុងចំណោមបាតុករ 58 នាក់ ដែលកំពុងប្រឈមនឹងការចោទប្រកាន់អំពីបទប្រមាថមហាក្សត្រ អាចត្រូវជាប់ពន្ធនាគារ 15 ឆ្នាំ ប្រសិនបើត្រូវកាត់ទោស។

មនុស្សប្រមាណ 2,000 នាក់ កាលពីម្សិលមិញ (28 កុម្ភៈ) បានហែក្បួនពីវិមានជ័យជំនះនៅទីក្រុងបាងកក ទៅកាន់មូលដ្ឋានទ័ពមួយនៅក្បែរនោះ ជាកន្លែងដែលមានភូមិគ្រឹះរបស់នាយករដ្ឋមន្ត្រី Prayut។ ក្នុងចំណោមបាតុករក៏មានការចូលរួមរបស់ក្រុមពលករមកពីប្រទេសមីយ៉ានម៉ាដែលប្រឆាំងនឹងរដ្ឋប្រហារយោធារបស់ប្រទេសពួកគេផងដែរ។

ក្រុមបាតុករពាក់មួកការពារ និងកាន់ទង់ពណ៌ក្រហម។ ក្រុមបាតុករបានរុញច្រានធុងផ្ទុកទំនិញដែលប៉ូលិសបានដាក់ដើម្បីរារាំងបាតុករ ហើយក្រោយមកក៏បានចូលទៅក្បែររបងបន្លាលួសរបស់បន្ទាយទាហាន នាំឱ្យមានការប៉ះទង្គិចជាមួយក្រុមប៉ូលិសប្រឆាំងកុបកម្មនៅត្រង់ផ្លូវចូលទៅក្នុងបន្ទាយ។

នៅចំពោះមុខភាពវឹកវរនេះ ក្រុមប៉ូលិសក៏បានបាញ់ទឹក និងគ្រាប់បែកផ្សែងបង្ហូរទឹកភ្នែក ទៅលើហ្វូងមនុស្ស។ បាតុករម្នាក់បានប្រាប់សារព័ត៌មានថៃថា «ពួកគេ (ក្រុមប៉ូលិស) ត្រៀមគ្រប់យ៉ាង៖ ខែល ដំបងឆក់ ទឹកលាយធាតុគីមី និងគ្រាប់កាំភ្លើងជ័រ»។

សូមរំលឹកថា បាតុកម្មនៅប្រទេសថៃ បានផ្ទុះឡើងចាប់ពីខែកក្កដា ឆ្នាំ 2020 រហូតដល់បច្ចុប្បន្ន។ ចលនាបាតុកម្មនេះ ផ្ដោតទៅលើបញ្ហា 3 ចំណុច រួមមាន ការទាមទារឱ្យនាយករដ្ឋមន្ត្រី Prayuth ចុះចេញពីតំណែង ការធ្វើវិសោធនកម្មរដ្ឋធម្មនុញ្ញ និងកំណែទម្រង់របបយោធារបស់មហាក្សត្រ Maha Vajiralongkorn។

ក្រុមបាតុករបានចោទប្រកាន់នាយករដ្ឋមន្ត្រីថៃថា បានប្រើឧបាយកលលើការបោះឆ្នោតកាលពីឆ្នាំមុន ដើម្បីបន្តក្ដោបក្ដាប់អំណាច។ ប៉ុន្តែ លោក Prayuth បានអះអាងថា ការបោះឆ្នោតដំណើរការដោយយុត្តិធម៌ ហើយថា លោកនឹងមិនចុះចេញពីតំណែងឡើយ៕

ប្រភព៖ Reuters
ប្រែសម្រួល៖ បុត្រា

March 1, 2021

កម្ពុជារកឃើញករណីវិជ្ជមាននឹងវីរុស Covid-19 ថ្មី 15នាក់ទៀត គិតត្រឹមព្រឹកថ្ងៃទី 1មីនា 2021

ក្នុងចំណោមអ្នកវិជ្ជមានថ្មីចំនួន 15 នាក់ ដែលទើបរកឃើញក្នុងអំឡុង 24 ម៉ោងកន្លងទៅនេះ មាន 1 នាក់ គឺជាអ្នកធ្វើដំណើរពីបរទេស ប៉ុន្តែមិនមែនជាពលករខ្មែរមកពីប្រទេសថៃ ខណៈ 14 នាក់ទៀត ពាក់ព័ន្ធនឹងករណីឆ្លងនៅក្នុង «ព្រឹត្តិការណ៍ 20កុម្ភៈ»។

ករណីឆ្លងថ្មីនេះ រួមមាន ជនជាតិខ្មែរម្នាក់ ជនជាតិឥណ្ឌូនេស៊ីម្នាក់ ហើយក្រៅពីនេះគឺសុទ្ធតែជាជនជាតិចិន។ ក្នុងអំឡុង 24 ម៉ោងកន្លងទៅនេះ កម្ពុជាមិនមានអ្នកជាសះស្បើយនោះទេ។

គិតមកដល់ព្រឹកថ្ងៃទី 1 មីនា 2021 នេះ កម្ពុជាបានរកឃើញអ្នកឆ្លង Covid-19 សរុបចំនួន 820 នាក់ ក្នុងនោះមានអ្នកជាសះស្បើយចំនួន 477 នាក់ និងអ្នកកំពុងព្យាបាលនៅមន្ទីរពេទ្យចំនួន 343 នាក់។

March 1, 2021

កម្ពុជារកឃើញករណីវិជ្ជមាននឹងវីរុស Covid-19 ថ្មី 39នាក់ទៀត គិតត្រឹមព្រឹកថ្ងៃទី 28កុម្ភៈ 2021

ក្នុងចំណោមអ្នកវិជ្ជមានថ្មីចំនួន 39 នាក់ ដែលទើបរកឃើញក្នុងអំឡុង 24 ម៉ោងកន្លងទៅនេះ មាន 4 នាក់ គឺជាករណីនាំចូល ដែលមិនមែនជាពលករខ្មែរមកពីថៃ ប៉ុន្តែសុទ្ធតែជាជនជាតិខ្មែរ។ ចំណែក 35 នាក់ទៀត ពាក់ព័ន្ធនឹងករណីឆ្លងនៅក្នុង «ព្រឹត្តិការណ៍ 20កុម្ភៈ»។

ករណីឆ្លង Covid-19 ក្នុងអំឡុង 24 ម៉ោងកន្លងទៅដែលពាក់ព័ន្ធនឹង «ព្រឹត្តិការណ៍ 20កុម្ភៈ» ភាគច្រើនគឺជាជនជាតិចិន និងវៀតណាម។ ព័ត៌មានលម្អិត សូមបន្តអានរបាយការណ៍របស់ក្រសួងសុខាភិបាល ដូចមាននៅខាងក្រោម។

គិតមកដល់ព្រឹកថ្ងៃទី 28 កុម្ភៈ 2021 នេះ កម្ពុជាបានរកឃើញអ្នកឆ្លង Covid-19 សរុបចំនួន 805 នាក់ ក្នុងនោះមានអ្នកជាសះស្បើយចំនួន 477 នាក់ និងអ្នកកំពុងព្យាបាលនៅមន្ទីរពេទ្យចំនួន 328 នាក់។

February 28, 2021

រកឃើញវីរុសថ្មី ជាង 140,000ប្រភេទ កំពុងរស់នៅក្នុងពោះវៀនមនុស្ស

ក្រុមអ្នកវិទ្យាកំណត់បានអត្តសញ្ញាណរបស់វីរុសថ្មីដែលមិនធ្លាប់ត្រូវបានរកឃើញពីមុនមក រហូតដល់ជាង 140,000 ប្រភេទដែលស្ថិតនៅក្នុងពោះវៀនរបស់មនុស្ស និងរស់នៅលើបាក់តេរីក្នុងពោះវៀន ក៏ប៉ុន្តែ ឥទ្ធិពលរបស់ពួកវា នៅតែជាប្រការអាថ៌កំបាំងនៅឡើយ។

យោងតាមសារព័ត៌មាន ScienceDaily ប្រព័ន្ធបាក់តេរី និងសត្វល្អិត ឬអតិសុខុមប្រាណក្នុងពោះវៀនគឺជាសហគមន៍បាក់តេរីដែលមាននៅក្នុងប្រព័ន្ធរំលាយអាហាររបស់មនុស្ស។ សហគមន៍នេះមានតួនាទីសំខាន់ក្នុងការរំលាយអាហារ និងតុល្យភាពនៃប្រព័ន្ធការពាររាងកាយ ប៉ុន្តែការសិក្សាស្រាវជ្រាវជាច្រើនបានបង្ហាញថា ការបាត់បង់តុល្យភាពបាក់តេរីនៅក្នុងពោះវៀន អាចនាំឱ្យកើតជំងឺថ្លើម ធាត់ និងបញ្ហាប្រតិកម្មនានា។

យ៉ាងណាក៏ដោយ ការយល់ដឹងរបស់មនុស្សអំពីប្រព័ន្ធអតិសុខុមប្រាណនេះ នៅមានកម្រិតនៅឡើយ។ បើទោះជាប្រព័ន្ធអតិសុខុមប្រាណមានសត្វល្អិតច្រើន ក្នុងនោះមានបាក់តេរី និងវីរុសជាដើម ប៉ុន្តែ ការសិក្សាស្រាវជ្រាវស្ទើរតែទាំងអស់នាពេលកន្លងមក បានផ្ដោតទៅលើតែបាក់តេរីក្នុងពោះវៀនប៉ុណ្ណោះ។

នៅក្នុងការសិក្សាស្រាវជ្រាវថ្មី អ្នកវិទ្យាសាស្ត្រមួយក្រុមបានប្រើប្រាស់វិធីសាស្ត្រវិភាគអតិសុខុមប្រាណរស់ ដើម្បីកំណត់អត្តសញ្ញាណប្រភេទវីរុសនៅក្នុងពោះវៀន។ វិធីសាស្ត្រនេះរួមមាន ការវិភាគសមាសធាតុហ្សែនរបស់សហគមន៍បាក់តេរីក្នុងពេលតែមួយ ហើយក្រោយមកបង្កើតផែនទីហ្សែនដោយឡែកសម្រាប់ប្រភេទនីមួយ។ ពួកគេបានវិភាគលើសំណាកចំនួន 28,000 នៃប្រព័ន្ធអតិសុខុមប្រាណក្នុងពោះវៀន ដែលយកមកពីប្រទេសចំនួន 28 ក្នុងពិភពលោក។

ការវិភាគបានបង្ហាញថា ប្រព័ន្ធហ្សែនពេញលេញនៃវីរុសជាង 140,000 ប្រភេទ កំពុងរស់នៅក្នុងពោះវៀនរបស់មនុស្ស។ ក៏ប៉ុន្តែ មនុស្សម្នាក់ៗមានផ្ទុកវីរុសមិនច្រើននោះទេ។

បើទោះជាមានវីរុសច្រើនប្រភេទរស់នៅក្នុងពោះវៀន ប៉ុន្តែ ក្រុមអ្នកវិទ្យាសាស្ត្រផ្ដោតទៅលើតែវីរុសដែលអាចរស់នៅលើបាក់តេរីប៉ុណ្ណោះ។ វីរុសប្រភេទនេះ ត្រូវបានគេហៅថា Bacteriophage។

ប្រធានក្រុមស្រាវជ្រាវ Luis Camarillo-Guerrero មកពីវិទ្យាស្ថាន Wellcome Sanger នៅប្រទេសអង់គ្លេសបានឱ្យដឹងថា ភាគច្រើននៃវីរុសនេះ មិនបង្កគ្រោះថ្នាក់ដល់មនុស្ស ហើយវាគ្រាន់តែជាផ្នែកមួយដែលមិនអាចខ្វះបាននៅក្នុងប្រព័ន្ធអតិសុខុមប្រាណក្នុងរាងកាយមនុស្ស។

Bacteriophage អាចដើរតួជាស្នូលនៅក្នុងប្រព័ន្ធអតិសុខុមប្រាណក្នុងពោះវៀន ដោយសារវាបង្កើតបាក់តេរីមានប្រយោជន៍ដល់រាងកាយ និងមានឥទ្ធិពលលើវិធីសាស្ត្ររីកលូតលាត់របស់បាក់តេរី៕

ប្រភព៖ ScienceDaily
ប្រែសម្រួល៖ បុត្រា

February 27, 2021

ស្ថិតិនៃតួលេខ Covid-19 នៅកម្ពុជា គិតត្រឹមថ្ងៃទី 27កុម្ភៈ 2021

កម្ពុជារកឃើញករណីឆ្លងវីរុស Covid-19 ថ្មី ចំនួន 26 នាក់បន្ថែមទៀត ខណៈមិនមានអ្នកជាសះស្បើយ នៅក្នុងរយៈពេល 24 ម៉ោងនៃថ្ងៃទី 26 កុម្ភៈ ឆ្នាំ 2021។

ក្នុងចំណោមអ្នកវិជ្ជមានថ្មីខាងលើនេះ សុទ្ធតែពាក់ព័ន្ធនឹង «ព្រឹត្តិការណ៍ 20កុម្ភៈ» ក្នុងនោះមានជនជាតិខ្មែរ 1នាក់ និងជនជាតិវៀតណាម 3 នាក់ ក្រៅពីនេះគឺសុទ្ធតែជាជាតិចិន។ ព័ត៌មានលម្អិត សូមបន្តអានរបាយការណ៍របស់ក្រសួងសុខាភិបាលដែលមាននៅខាងក្រោម។

គិតមកដល់ព្រឹកថ្ងៃទី 27 កុម្ភៈ 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 766 នាក់ ក្នុងនោះមាន 477 នាក់បានជាសះស្បើយ និង 287 នាក់ កំពុងព្យាបាលនៅមន្ទីរពេទ្យ៕

February 27, 2021

Author: សឿន សំណាង