សឿន សំណាង - La Reine Media

ស្ថានភាព Covid-19 នៅកម្ពុជា គិតត្រឹមព្រឹកថ្ងៃទី 4មីនា 2021

កម្ពុជាបន្តរកឃើញអ្នកវិជ្ជមាននឹងវីរុស Covid-19 ចំនួន 31 នាក់បន្ថែមទៀត នៅក្នុងអំឡុង 24 ម៉ោងនៃថ្ងៃទី 3 មីនា ឆ្នាំ 2021។

ក្នុងចំណោមអ្នកវិជ្ជមានខាងលើនេះ មាន 3 នាក់ ជាករណីនាំចូល (ជនជាតិឥណ្ឌូនេស៊ី) និង 28 នាក់ ពាក់ព័ន្ធនឹង «ព្រឹត្តិការណ៍ 20កុម្ភៈ» ក្នុងនោះមាន 10 នាក់ជាជនជាតិខ្មែរ និង 1 នាក់ជាជនជាតិវៀតណាម ក្រៅពីនេះគឺសុទ្ធតែជាជនជាតិចិន។ ក្នុងថ្ងៃទី 3 មីនា កម្ពុជាក៏មានអ្នកជំងឺ 2 នាក់ បានជាសះស្បើយផងដែរ។ ព័ត៌មានបន្ថែម សូមអានរបាយការណ៍របស់ក្រសួងសុខាភិបាលដែលមាននៅខាងក្រោម។

គិតមកដល់ព្រឹកថ្ងៃទី 4 មីនានេះ កម្ពុជាបានរកឃើញអ្នកឆ្លងវីរុស Covid-19 សរុបចំនួន 909 នាក់ និងជាសះស្បើយចំនួន 484 នាក់ ខណៈ 425 នាក់ផ្សេងទៀតកំពុងព្យាបាលនៅមន្ទីរពេទ្យ៕

March 4, 2021

កម្ពុជាណែនាំឱ្យចុះឈ្មោះចាក់វ៉ាក់សាំងបង្ការ Covid-19 តាមប្រព័ន្ធអនឡាញ

ក្រសួងសុខាភិបាលកម្ពុជា តាមរយៈទំព័រ Facebook បានប្រកាសឱ្យប្រើប្រាស់កម្មវិធីទូរស័ព្ទ (App) KhmerVacc សម្រាប់កត់ត្រា និងគ្រប់គ្រងព័ត៌មាននៃការចាក់វ៉ាក់សាំងបង្ការ Covid-19។

កម្មវិធីទូរស័ព្ទខាងលើ ក៏អនុញ្ញាតឱ្យពលរដ្ឋទូទៅ ចុះឈ្មោះចាក់វ៉ាក់សាំងបង្ការ Covid-19 ផងដែរ។ អ្នកអាចចុះឈ្មោះតាមរយៈការចូលទៅកាន់ទំព័រ https://cambodia-vaccine.gov.kh/login រួចចុចលើ តំណភ្ជាប់ «ទាញយកកម្មវិធីចាក់វ៉ាក់សាំង» ដើម្បីទាញយក និងដំឡើងកម្មវិធីនេះលើទូរស័ព្ទដៃ មុននឹងចុះឈ្មោះ។

ព័ត៌មានបន្ថែម សូមទស្សនាវីដេអូខាងក្រោម៖

March 4, 2021

កូរ៉េខាងត្បូងស៊ើបអង្កេតលើករណីស្លាប់ចំនួនពីរនាក់ ក្រោយពីបានចាក់វ៉ាក់សាំង AstraZeneca

បន្ទាប់ពីបានចាក់វ៉ាក់សាំង AstraZeneca ដើម្បីបង្ការវីរុស Covid-19 ស្ត្រីវ័យ 63 ឆ្នាំម្នាក់ក្នុងចំណោមមនុស្សពីរនាក់ដែលបានស្លាប់ មានអាការក្ដៅខ្លួនខ្លាំង។

មន្ត្រីកូរ៉េខាងត្បូង កាលពីថ្ងៃទី 3 មីនា បានឱ្យដឹងថា ក្រុមជំនាញកំពុងតែបើកការស៊ើបអង្កេតលើមូលហេតុដែលនាំឱ្យមានករណីស្លាប់ខាងលើ ក្រោយពីសារព័ត៌មានក្នុងស្រុករាយការណ៍ថា អ្នកទាំង 2 បានស្លាប់ក្រោយពីការចាក់វ៉ាក់សាំង AstraZeneca បានតែប៉ុន្មានថ្ងៃប៉ុណ្ណោះ។

ករណីទីមួយគឺស្ត្រីវ័យ 63 ឆ្នាំ។ បន្ទាប់ពីមានអាការក្ដៅខ្លួនខ្លាំង ស្ត្រីរូបនេះក៏ត្រូវបានបញ្ជូនទៅកាន់មន្ទីរពេទ្យក្នុងថ្ងៃទី 2 មីនា ប៉ុន្តែ ក្រោយមកក៏បានបាត់បង់ជីវិត ដោយមានរោគសញ្ញាពុលឈាម (blood poisoning) និងបញ្ហាសួត។ ករណីទីពីរកើតឡើងលើមនុស្សម្នាក់មានវ័យ 50 ឆ្នាំ ដោយមានបញ្ហាបេះដូង និងទឹកនោមផ្អែក និងបានស្លាប់កាលពីថ្ងៃទី 3 មីនា បន្ទាប់ពីមានអាការឈឺបេះដូង បន្ទាប់ពីបានចាក់វ៉ាក់សាំង AstraZeneca បានមួយថ្ងៃ។

មន្ត្រីម្នាក់នៃនាយកដ្ឋានគ្រប់គ្រង និងបង្ការជំងឺឆ្លងរបស់កូរ៉េខាងត្បូង (KDCA) បាននិយាយថា ពួកគេកំពុងស្រាវជ្រាវរកមូលហេតុដែលនាំឱ្យមានករណីស្លាប់ខាងលើ ប៉ុន្តែ មិនទាន់មានការអធិប្បាយលម្អិតណាមួយនៅឡើយ។ អ្នកនាំពាក្យរបស់ AstraZeneca ប្រចាំទីក្រុងសេអ៊ូល បានឱ្យដឹងថា មិនទាន់ធ្វើការអធិប្បាយអ្វីបាននៅឡើយនៅក្នុងពេលនេះ។

ក្នុងថ្ងៃដដែលនោះ នាយករដ្ឋមន្ត្រីកូរ៉េខាងត្បូង Chung Sye-kyun បានបញ្ជាឱ្យពិនិត្យឡើងវិញនូវការអនុញ្ញាតឱ្យចាក់វ៉ាក់សាំងរបស់ក្រុមហ៊ុន AstraZeneca សម្រាប់មនុស្សវ័យចាប់ 65 ឆ្នាំឡើងទៅ។

កូរ៉េខាងត្បូងចាប់ផ្ដើមចាក់វ៉ាក់សាំងកាលពីសប្ដាហ៍មុន។ គិតត្រឹមព្រលប់ថ្ងៃទី 2 មីនា មនុស្សចំនួន 85,904 នាក់ បានចាក់វ៉ាក់សាំង AstraZeneca និង 1,524 នាក់ បានចាក់វ៉ាក់សាំង Pfizer នេះបើតាម KDCA៕

ប្រភព៖ Reuters
ប្រែសម្រួល៖ បុត្រា

March 4, 2021

មីយ៉ានម៉ា៖ បាតុករ 6នាក់ទៀតត្រូវបានបាញ់សម្លាប់នៅក្នុងថ្ងៃនេះ

ក្នុងចំណោមបាតុករទាំង 6 នាក់ដែលបានបាត់បង់ជីវិត មាន 4 នាក់ត្រូវបានបាញ់សម្លាប់នៅតំបន់ Sagaing ចំណែក 2 នាក់ទៀត បានស្លាប់ក្នុងទីក្រុង Mandalay នេះបើតាមក្រុមគ្រូពេទ្យដែលបានឱ្យដឹងនៅថ្ងៃទី 3 មីនានេះ។

«ក្រុមរបស់ខ្ញុំបានចាត់ចែងសាកសព និងបានទាក់ទងទៅកាន់ក្រុមគ្រួសារសព» Myo Min Tun បុគ្គលិកជួយសង្គ្រោះបន្ទាន់បានប្រាប់ដូច្នេះ។ ក្រុមគ្រូពេទ្យនៅតំបន់ Sagaing ក៏បានបញ្ជាក់អំពីករណីស្លាប់នេះ ប៉ុន្តែមិនបានបញ្ជាក់ថា ជនរងគ្រោះត្រូវគ្រាប់ពិត ឬគ្រាប់កៅស៊ូ។

នៅ Mandalay ដែលជាទីក្រុងធំជាងគេទីពីររបស់ប្រទេសភូមា (មីយ៉ានម៉ា) និងមានចម្ងាយពី Sagaing ប្រហែល 2 ម៉ោងបើធ្វើដំណើរតាមឡាន គ្រូពេទ្យម្នាក់បានប្រាប់ថា មានបាតុករ 2 នាក់ ត្រូវបានកងសន្តិសុខបាញ់សម្លាប់។ «Myo Naing Lin ត្រូវបាញ់ចំដើមទ្រូង ចំណែក Ma Kyay Sin ត្រូវគ្រាប់ចំក្បាល»។

បាតុកម្មប្រឆាំងរដ្ឋប្រហារត្រូវបានធ្វើឡើងនៅក្នុងទីក្រុងជាច្រើននៃប្រទេសមីយ៉ានម៉ានាថ្ងៃនេះ។ បាតុកម្មនៅកណ្ដាលទីក្រុង Myingyan បានក្លាយជាអំពើហិង្សានៅពេលក្រុមប៉ូលិសបានប៉ះទង្គិចជាមួយនឹងក្រុមបាតុករដែលពាក់មួកសុវត្ថិភាពការងារ និងកាន់ខែលការពារគ្រាប់ដែលពួកគេបានច្នៃ។

អង្គការជំនួយអ្នកទោសនយោបាយ (AAPP) បានឱ្យដឹងថា មនុស្សចំនួនជាង 1,200 នាក់ ត្រូវបានចាប់ខ្លួន រាប់ចាប់ពីមានអំពើរដ្ឋប្រហារ ក្នុងនោះមានជាង 900 នាក់ កំពុងជាប់ឃុំ ឬប្រឈមនឹងការកាត់ទោស។ ប៉ុន្តែ តួលេខពិតអាចមានច្រើនជាងនេះ។ សារព័ត៌មានក្នុងស្រុករាយការណ៍ថា ក្នុងថ្ងៃទី 28 កុម្ភៈ មនុស្សជាង 1,300 នាក់ ត្រូវបានចាប់ខ្លួន។ អ្នកយកព័ត៌មាន 34 នាក់ត្រូវបានជាប់ឃុំ ក្នុងនោះមាន 15 នាក់ ត្រូវបានដោះលែង៕

ប្រភព៖ AFP
ប្រែសម្រួល៖ បុត្រា

March 3, 2021

កាដូដែលមានតម្លៃថ្លៃបំផុតនៅក្នុងពិភពលោក សម្រាប់ទិវាសិទ្ធិនារីអន្តរជាតិ 8មីនា

ជូនកាដូណាមួយក្នុងចំណោមអំណោយទាំងឡាយខាងក្រោមនេះទៅឱ្យ Crush របស់អ្នក ខ្ញុំជឿជាក់ថា នាងនឹងយល់ព្រមរៀបការជាមួយអ្នកមិនខាន ព្រោះវាថ្លៃជាងគេក្នុងពិភពលោក។

វ៉ែនតា Chopard De Rigo Vision
តម្លៃ៖ 407,864 ដុល្លារអាមេរិក

វ៉ែនតាដែលផលិតដោយក្រុមហ៊ុន De Rigo Vision និង Chopard នេះ មានរូបរាងស្រស់ស្អាតបំផុត ហើយត្រូវបានចាត់ទុកជាអំណោយយ៉ាងមហាអស្ចារ្យសម្រាប់ជូនដល់នារីជាទីស្រលាញ់របស់អ្នកនៅក្នុងទិវាសិទ្ធិនារី 8 មីនា ឬក៏បុណ្យនៃក្ដីស្រលាញ់។ ផ្នែកខាងចុងរបស់វ៉ែនតានេះ ត្រូវបានលម្អដោយមាសសុទ្ធទម្ងន់ 60 ក្រាម ហើយជុំវិញវាគឺជាពេជ្រចំនួន 51 គ្រាប់។

ប៊ិកដាំពេជ្រ Mystery Masterpiece Limited Edition
តម្លៃ៖ 719,760 ដុល្លារ

ប៊ិក Mystery Masterpiece Limited Edition ត្រូវបានផលិតឡើងដោយក្រុមហ៊ុន Montblanc សហការជាមួយ Van Cleef & Arpels។ ប៊ិកនេះ ត្រូវបានដាំពេជ្រ 840 គ្រាប់។

កាបូបដៃ 1001 Nights Diamond Purse របស់ Mouawad
តម្លៃ៖ 3,8 លានដុល្លារ

កាបូបរាងបេះដូងនេះ ត្រូវបានច្នៃឡើងដោយជាងច្នៃត្បូងលំដាប់កំពូលៗចំនួន 10 នាក់ និងចំណាយពេលអស់ 8,800 ម៉ោងដើម្បីធ្វើការ។ 1001 Nights Diamond Purse ត្រូវបានធ្វើអំពីមាសពណ៌ស 18K និងលម្អដោយពេជ្រចំនួន 4,517 គ្រាប់ ក្នុងនោះមាន 105 គ្រាប់ជាពេជ្រពណ៌លឿង និង 56 គ្រាប់ជាពេជ្រពណ៌ផ្កាឈូក ចំណែក 4,356 គ្រាប់ទៀត ជាពេជ្រពណ៌ស ដែលមានទម្ងន់សរុប 381.92 ការ៉ាត។

ចិញ្ចៀនពេជ្រពណ៌ផ្កាឈូក
តម្លៃ៖ 1.8 លានដុល្លារ

ចិញ្ចៀនពេជ្រពណ៌ផ្កាឈូកតែងតែជាជម្រើសលំដាប់កំពូលរបស់អ្នកជំនួញ ព្រោះវាតំណាងឱ្យមនោសញ្ចេតនាស្នេហាយ៉ាងជ្រាលជ្រៅ នាំមកនូវភាពប្រណិត និងថ្លៃថ្នូរជាទីបំផុត។

កងកពេជ្រ
តម្លៃ៖ 4 លានដុល្លារអាមេរិក

កងកពេជ្រនេះ មានដាំពេជ្រពណ៌លឿងចំនួន 183.08 ការ៉ាត បង្កើតបានជាគ្រឿងអលង្ការមួយប្រភេទដែលមានតម្លៃខ្ពស់ និងប្លែកពីគេទាំងស្រុង។

ចិញ្ចៀនត្បូងមរកត
តម្លៃ៖ 5 លានដុល្លារអាមេរិក

ចិញ្ចៀនដាំត្បូងមរកត 22.91 ការ៉ាតនេះ ទទួលបានការយកចិត្តទុកដាក់យ៉ាងច្រើនពីសំណាក់ក្រុមអ្នកមាន។

នាឡិកា Graff Hallucination
តម្លៃ៖ 60 លានដុល្លារអាមេរិក

Graff Hallucination គឺជាម៉ូដែលនាឡិកាដែលមានតម្លៃថ្លៃជាងគេបំផុតក្នុងពិភពលោក ព្រោះវាត្រូវបានច្នៃឡើងដោយមានដាំពេជ្រដែលមានពណ៌ដ៏កម្រ និងមានទំហំធំនៅពីលើផ្លាទីន។

យ៉ាងនេះក្ដី ក្នុងឱកាសទិវាសិទ្ធិនារីអន្តរជាតិ 3 មីនាខាងមុខ អ្នកគួរតែទិញកាដូអ្វីមួយដែលមានអត្ថន័យសម្រាប់មនុស្សជាទីស្រលាញ់របស់អ្នក ដោយមើលទៅលើស្ថានភាពហិរញ្ញវត្ថុ សមស្របនឹងកត្តាផ្លូវចិត្ត និងវិស័យនាងកំពុងធ្វើការ ហើយអំណោយនេះក៏គួរតែជារបស់ដែលមានប្រយោជន៍ អាចប្រើប្រាស់ប្រចាំថ្ងៃបាន៕

ប្រភព៖ Catawiki, Webuy
ប្រែសម្រួល៖ បុត្រា

March 3, 2021

ភាពសោកសៅរបស់ Jack Ma ៖ ធ្លាក់ពីតំណែងអ្នកមានជាងគេនៅប្រទេសចិនហើយ ថែមទាំងមិនជាប់ Top 3 ទៅទៀត!

ស្ថាបនិករបស់ Alibaba និង Ant Group លោក Jack Ma បានបាត់បង់តំណែងជាអ្នកមានជាងគេបង្អស់នៅប្រទេសចិន នៅក្នុងបញ្ជីចំណាត់ថ្នាក់ថ្មីមួយដែលទើបត្រូវបានប្រកាសកាលពីថ្ងៃទី 2 មីនា ឆ្នាំ 2021។

លោក Jack Ma និងគ្រួសារ ធ្លាប់កាន់កាប់តំណែងអ្នកមានជាងគេនៅប្រទេសចិន នៅក្នុងបញ្ជីចំណាត់ថ្នាក់អ្នកមានទូទាំងពិភពលោករបស់ Hurun (Hurun Global Rich List) កាលពីឆ្នាំ 2019 និង 2020។ ប៉ុន្តែ នាពេលបច្ចុប្បន្ន (3មីនា 2021) លោកបានធ្លាក់មកនៅត្រឹមលេខ 4 ទៅវិញ។

Hurun បានឱ្យដឹងថា ការដែលលោក Jack Ma បានធ្លាក់ពីតំណែងអ្នកមានជាងគេលំដាប់ទី 3 នៅប្រទេសចិននេះ បានកើតឡើងក្រោយពីអាជ្ញាធរចិនត្រួតពិនិត្យយ៉ាងតឹងរ៉ឹងទៅលើសកម្មភាពរបស់ក្រុមហ៊ុន Ant Group និង Alibaba ដោយសារមានការបារម្ភអំពីបញ្ហារកស៊ីផ្ដាច់មុខ។ បើទោះជាទ្រព្យសម្បត្តិបានកើនបន្ថែម 22% នាំឱ្យទ្រព្យសរុបឡើងដល់ 55.6 ពាន់លានដុល្លារ ប៉ុន្តែ Jack Ma នៅតែមិនអាចរក្សាបានចំណាត់ថ្នាក់លេខ 1 របស់ខ្លួននៅក្នុងបញ្ជីប្រចាំឆ្នាំរបស់ Hurun។

ព្រឹត្តិការណ៍ IPO ដែលមានតម្លៃ 37 ពាន់លានដុល្លាររបស់ Ant Group ត្រូវបានពន្យារពេលអស់ជាច្រើនថ្ងៃ មុននឹងមានវត្តមាននៅលើផ្សារហ៊ុន

សំណាងអាក្រក់កាលពីពេលថ្មីៗនេះ បានកើតឡើងជាបន្តបន្ទាប់ចំពោះលោក Jack Ma ចាប់តាំងពីលោកបានរិះគន់ចំពោះប្រព័ន្ធហិរញ្ញវត្ថុរបស់ប្រទេសចិន កាលពីខែតុលា 2020។ ជាលទ្ធផល ព្រឹត្តិការណ៍ IPO ដែលមានតម្លៃ 37 ពាន់លានដុល្លាររបស់ Ant Group ត្រូវបានពន្យារពេលអស់ជាច្រើនថ្ងៃ មុននឹងមានវត្តមាននៅលើផ្សារហ៊ុន។ មកដល់ខែធ្នូ ឆ្នាំ 2020 ក្រុមហ៊ុន Alibaba ក៏ត្រូវបានស៊ើបអង្កេតទាក់ទងនឹងបញ្ហារកស៊ីផ្ដាច់មុខ។

ក្រោយមក ស្ថាប័នពាក់ព័ន្ធរបស់ប្រទេសចិន ក៏បានរឹងបន្តឹងលើការត្រួតពិនិត្យចំពោះក្រុមហ៊ុន Alibaba រួមនឹងវិស័យបច្ចេកវិទ្យាទាំងមូលរបស់ប្រទេសនេះផងដែរ។ អាជ្ញាធរបានបង្ខំឱ្យ Ant Group កែទម្រង់មុខជំនួញរបស់ខ្លួន។ ពួកគេក៏បន្តចេញអនុក្រឹត្យថ្មីជាច្រើន បង្ខំឱ្យ Ant Group វិលត្រលប់ទៅរកធាតុដើម នោះគឺក្រុមហ៊ុនផ្គត់ផ្គង់សេវាកម្មទូទាត់ប្រាក់។ សេវាកម្មផ្សេងៗទៀតរបស់ Ant មានដូចជា ធនាគារអនឡាញ ធានារ៉ាប់រង គ្រប់គ្រងទ្រព្យ និងឈ្មួលកណ្ដាលផ្នែកហិរញ្ញវត្ថុក៏នឹងត្រូវបង្ខំឱ្យបែងចែកដាច់ដោយឡែកយ៉ាងច្បាស់លាស់។ ប្រការនេះនឹងជួយឱ្យអាជ្ញាធរចិន ងាយស្រួលក្នុងការគ្រប់គ្រងសកម្មភាពរបស់ Ant Group។

បន្ទាប់ពីមានដំណឹងមិនល្អខាងលើ Jack Ma ក៏ស្រាប់តែបានបាត់ខ្លួនអស់រយៈពេលប្រហែលជា 3 ខែ ប៉ុន្តែ ក៏បានបង្ហាញខ្លួនជាថ្មីកាលពីខែមករា 2021។

អ្នកមានជាងគេលំដាប់ទី 1 នៅប្រទេសនាពេលបច្ចុប្បន្នគឺលោក Zhang Shanshan ដែលជាស្ថាបនិកនៃក្រុមហ៊ុនផលិតភេសជ្ជ និងទឹកបរិសុទ្ធ Nongfu Spring ។ លោក Shanshan បានឡើងកាន់កាប់តំណែងនេះជាលើកដំបូង ជាមួយនឹងទ្រព្យតម្លៃ 550 ពាន់លានយុន (85 ពាន់លានដុល្លារអាមេរិក)។ ទ្រព្យរបស់លោក ភាគច្រើនបានមកពីមូលបត្ររបស់ក្រុមហ៊ុន Nongfu Spring និងក្រុមហ៊ុនផលិតវ៉ាក់សាំង Beijing Wantai Biological Pharmacy Enterprise ដែលលោកជាអ្នកគ្រប់គ្រង។

មហាសេដ្ឋី Pony Ma ដែលជាស្ថាបនិកនៃក្រុមហ៊ុន Tencent ឈរលំដាប់លេខ 2 ដោយមានទ្រព្យសរុប 74 ពាន់លានដុល្លារអាមេរិក បន្ទាប់ពីបានកើន 70% ក្នុងឆ្នាំ 2020។ ចំណែកចំណាត់ថ្នាក់លេខ 3 បានទៅមហាសេដ្ឋី Collin Huang ដែលជា CEO របស់ក្រុមហ៊ុនអេឡិចត្រូនិក Pinduoduo ដោយមានទ្រព្យសរុបចំនួន 69.5 ពាន់លានដុល្លារអាមេរិក។

Zhang Yiming ស្ថាបនិករបស់ក្រុមហ៊ុន ByteDance ដែលជាភាគីគ្រប់គ្រងបណ្ដាញសង្គម TikTok ក៏បានហក់ឡើងកាន់កាប់ចំណាត់ថ្នាក់លេខ 5 នៅក្នុងបញ្ជីរបស់ Hurun ដោយមានទ្រព្យសរុបចំនួន 54 ពាន់លានដុល្លារអាមេរិក៕

ប្រភព៖ Reuters
ប្រែសម្រួល៖ បុត្រា

March 3, 2021

ស្ពានស្ទឹងត្រង់-ក្រូចឆ្មារ នឹងបើកឱ្យធ្វើចរាចរណ៍មុនបុណ្យចូលឆ្នាំខ្មែរ 2021

ស្ពានមិត្តភាពកម្ពុជា-ចិន ដែលតភ្ជាប់ស្រុកក្រូចឆ្មារនៃខេត្តត្បូនឃ្មុំ ជាមួយនឹងស្រុកស្ទឹងត្រង់នៃខេត្តកំពង់ចាម ត្រូវបានស្ថាបនារួចរាល់ប្រមាណជាង 90%។ តាមគម្រោង ស្ពាននេះនឹងត្រូវដាក់ឱ្យធ្វើចរាចរណ៍មុនពិធីបុណ្យចូលឆ្នាំប្រពៃណីខ្មែរនាឆ្នាំ 2021 នេះ។

ស្ពានឆ្លងកាត់ទន្លេមេគង្គនេះ គឺជាជំនួយឥតសំណងពីរដ្ឋាភិបាលចិន នេះបើតាមប្រសាសន៍របស់រដ្ឋមន្ត្រីក្រសួងសាធារណការ និងដឹកជញ្ជូន។ លោកបន្តថា មកដល់បច្ចុប្បន្ន ស្ពាននេះត្រូវបានសាងសង់រួចរាល់ប្រមាណ 96% ហើយថា នឹងត្រូវដាក់ឱ្យធ្វើចរាចរណ៍នៅមុនពិធីចូលឆ្នាំថ្មីប្រពៃណីខ្មែរក្នុងឆ្នាំ 2021 នេះ។

ស្ពានបេតុងសរសៃដែកដែលមានតម្លៃ 56.998 លានដុល្លារ ប្រវែង 1,131 ម៉ែត្រ និងទទឹងប្រវែង 13.50 ម៉ែត្រនេះ ត្រូវបានសាងសង់ចាប់ពីដើមខែកុម្ភៈ ឆ្នាំ 2018។ តាមគម្រោង ការសាងសង់ស្ពាននេះ នឹងស៊ីពេលអស់ 42 ខែ។

ស្ពានស្ទឹងត្រង់-ក្រូចឆ្មារ ស្ថិតនៅក្នុងភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម និងឆ្លងកាត់ទន្លេមេគង្គទៅកាន់ត្រើយខាងកើតស្ថិតនៅភូមិក្តុលលើ ឃុំ ទ្រា ស្រុកក្រូចឆ្មារ ខេត្តត្បូងឃ្មុំ។ ស្ពាននេះ សាងសង់ដោយក្រុមហ៊ុនចិន Shanghai Construction Group និងត្រូវបានត្រួតពិនិត្យបច្ចេកទេសដោយក្រុមហ៊ុនចិន Guangzhou Wanan Construction Supervision៕

March 3, 2021

ចំនួនមហាសេដ្ឋីនៅឥណ្ឌា កើន 40 នាក់បន្ថែមទៀត នៅក្នុងឆ្នាំ 2020 បើទោះប្រឈមនឹង Covid-19

បើទោះជាសេដ្ឋកិច្ចត្រូវបានព្យាករថានឹងដាំក្បាលចុះនៅក្នុងឆ្នាំសារពើពន្ធបច្ចុប្បន្ន (បញ្ចប់នៅក្នុងខែមីនា ឆ្នាំ2021) ប៉ុន្តែ ក្លឹបមហាសេដ្ឋីរបស់ឥណ្ឌា នៅតែកើនឡើង 40 នាក់បន្ថែមទៀងកាលពីឆ្នាំមុន ជួយឱ្យតួលេខសរុបនៃមហាសេដ្ឋីនៅឥណ្ឌា កើនដល់ 177 នាក់។

សារព័ត៌មាន Business Today ដកស្រង់របាយការណ៍របស់ Hurun Global Rich List ដែលបានប្រកាសកាលពីថ្ងៃទី 2 មីនា 2021 ឱ្យដឹងថា លោក Mukesh Ambani នៅតែជាអ្នកមានជាងគេបង្អស់នៃប្រទេសឥណ្ឌា ដោយមានទ្រព្យសុទ្ធសរុប 83 ពាន់លានដុល្លារអាមេរិក។

ទ្រព្យរបស់មេដឹកនាំក្រុមហ៊ុន Reliance Industries បានកើន 24% ក្នុងឆ្នាំ 2020 ដែលនេះបានជួយឱ្យលោកក្លាយជាអ្នកមានជាងគេលំដាប់ទី 8 ក្នុងពិភពលោក។ ចំណែកលោក Gautam Adani ក៏បានក្លាយជាអ្នកមានជាងគេទី 2 នៅឥណ្ឌា បន្ទាប់ពីទ្រព្យសម្បត្តិរបស់លោក បានកើនទ្វេដង ឡើងដល់ 32 ពាន់លានដុល្លារក្នុងឆ្នាំ 2020 និងក្លាយជាអ្នកមានលំដាប់ទី 48 ក្នុងពិភពលោក។ បងប្រុសរបស់ Gautam Adani គឺលោក Vinod Adani ក៏បានឃើញទ្រព្យសម្បត្តិរបស់ខ្លួនកើនឡើងដល់ 9.8 ពាន់លានដុល្លារ (កើន 128%) ផងដែរ។

ប្រការដែលគួរចាប់អារម្មណ៍ នោះគឺថា បញ្ជីរាយនាមមហាសេដ្ឋីនៅឥណ្ឌា ត្រូវបានអូសសន្លាយយ៉ាងវែងនៅក្នុងគ្រាដែលសេដ្ឋកិច្ចប្រទេសអាស៊ីខាងត្បូងនេះត្រូវបានគេព្យាករថា នឹងដាំក្បាលចុះជាង 7% ដោយសារតែ Covid-19។

សារព័ត៌មាន PTI News ដកស្រង់សម្ដីរបស់លោក Anas Rahman Junaid ដែលជានាយកប្រតិបត្តិ និងជាប្រធានក្រុមស្រាវជ្រាវរបស់ Hurun Global Rich List ប្រចាំឥណ្ឌា យល់ថា ទ្រព្យនៅឥណ្ឌាត្រូវបានបង្កើតឡើងភាគច្រើនគឺអាស្រ័យលើវិស័យឧស្សាហកម្មប្រពៃណី ឬមានលក្ខណជាវដ្ដ ពោលគឺមិនមែនអាស្រ័យលើបច្ចេកវិទ្យាដូចនៅសហរដ្ឋអាមេរិក និងប្រទេសចិននោះឡើយ៕

ប្រភព៖ Business Today
ប្រែសម្រួល៖ បុត្រា

March 3, 2021

លោក ឌូតឺតេ បដិសេធចាក់វ៉ាក់សាំង “ស៊ីណូវ៉ាក់” ដោយអាងថា ពេទ្យ ឱ្យចាំចាក់ អាម៉ាកផ្សេង…

វ៉ាក់សាំងកាពារកូវីដ-19 របស់ចិន 1ឈុតដំបូង ត្រូវបានបញ្ជូនទៅដល់ប្រទេសហ្វ៊ីលីពីនហើយ កាលពីថ្ងៃអាទិត្យ (ទី28កុម្ភៈ) ប៉ុន្តែ លោកប្រធានាធិបតី រ៉ូឌ្រីកូ ឌូតឺតេ បានបដិសេធក្នុងការចូលទទួលយកការចាក់វ៉ាក់សាំងជាមនុស្សដំបូងគេ ដោយយកអាងយោបល់របស់គ្រូពេទ្យ ដែលបានស្នើ ឱ្យលោករង់ចាំ វ៉ាក់សាំងម៉ាកផ្សេង។

លោកឌូតឺតេ បានធ្វើជាអធិបតីក្នុងពិធីប្រគល់-ទទួលវ៉ាក់សាំង “កូរ៉ូណាវ៉ាក់” របស់ក្រុមហ៊ុន ស៊ីណូវ៉ាក់ បៃអូថេក ចំនួន 600,000ដូស ដែលរដ្ឋាភិបាលចិន បានបរិច្ចាគឱ្យប្រទេសហ្វ៊ីលីពីនប្រើយ៉ាង Freeៗ រួចហើយនឹងរៀបចំបញ្ជូនមកឱ្យបន្ថែមទៀត 25លានដូស ក្នុងឆ្នាំនេះ។

យន្តហោះយោធា របស់ប្រទេសចិន បានដឹកនាំវ៉ាក់សាំង មកដល់មូលដ្ឋានទ័ពអាកាស វីលឡាម័រ ក្នុងទីក្រុង Pasay នៃប្រទេសហ្វ៊ីលីពីន នៅម៉ោង 16.10នាទី តាមម៉ោងនៅក្នុងស្រុក ដោយលោកឌូតឺតេ បានបញ្ជាក់យ៉ាងច្បាស់ថា ទោះជាប្រទេសចិន បានបរិច្ចាគវ៉ាក់សាំងឱ្យទៅប្រទេសផ្សេងៗទៀតជាច្រើនក្ដី តែ មានតែហ្វ៊ីលីពីន មួយប៉ុណ្ណោះ ដែលចិនសុខចិត្តលះបង់ពេលវេលា រៀបចំបញ្ជូនយកមកឱ្យដោយខ្លួនឯង។

មេដឹកនាំជើងខ្លាំង រូបនេះ បានបញ្ជាក់ថា “ខ្ញុំចង់ប្រាប់ថា ក្នុងអំឡុងចុងឆ្នាំនេះ បើសិនស្ថានការណ៍ល្អប្រសើរឡើង ខ្ញុំចង់ធ្វើដំណើរទៅលេងប្រទេសចិន ក្នុងរយៈពេលខ្លីមួយ ដើម្បីចាប់ដៃលោកប្រធានាធិបតី ស៊ី ជីនភីង និងអរគុណលោក ដោយខ្លួនឯង ដែលបានប្រគល់វ៉ាក់សាំងមកឱ្យយើង”

យ៉ាងណាក្ដី មេដឹកនាំហ្វ៊ីលីពីន វ័យ 77ឆ្នាំ រូបនេះ បានបដិសេធក្នុងទទួលយកវ៉ាក់សាំងជាមនុស្សដំបូងគេ ដោយបានផ្ដល់ហេតុផលថា គ្រូពេទ្យប្រចាំខ្លួនរបស់លោក សុំឱ្យលោករង់ចាំ “វ៉ាក់សាំងចិនផ្សេងទៀត” ដោយសារតែវ៉ាក់សាំងរបស់ស៊ីណូវ៉ាក់នេះ មានការណែនាំខាងគ្លីនិក(ការព្យាបាល) ឱ្យចាក់ចំពោះតែអ្នកដែលមានអាយុចន្លោះពី 18-59ឆ្នាំប៉ុណ្ណោះ។

លោកបានសារភាពថា លោកបាន “សម្រេចចិត្ត” ជ្រើសរើសចាក់វ៉ាក់សាំងមួយទុករួចហើយ។

ការថ្លែងរបស់លោកឌូតឺតេ បានឆ្លុះបញ្ចាំងឱ្យឃើញពីភាពមិនសូវជឿជាក់លើវ៉ាក់សាំងនៅក្នុងក្រុមប្រជាជនហ្វ៊ីលីពីន ដោយលទ្ធផលស្ទង់មតិយោបល់ បានរកឃើញថា មានប្រជាជនហ្វ៊ីលីពីនមិនដល់ 1នាក់ផង ក្នុងចំណោម 3នាក់ ដែលពេញចិត្តចាក់វ៉ាក់សាំងនៅពេលនេះ ដោយសារតែភ័យខ្លាច កើតផលប៉ះពាល់។

រដ្ឋបាលហ្វ៊ីលីពីន មានផែនការក្នុងការចាក់វ៉ាក់សាំងឱ្យធនធានមនុស្សខាងវេជ្ជសាស្ត្រ ប៉ូលិស និងទាហានមុនគេ និងបានធ្វើកិច្ចសន្យាបញ្ជាទិញវ៉ាក់សាំងជាមួយអ្នកផលិតជាច្រើនក្រុមហ៊ុនទៀត ដោយដាក់គោលដៅ សាងប្រព័ន្ធប្រឆាំងជំងឺឱ្យប្រជាពលរដ្ឋ ចំនួន 70លាននាក់។

ប្រទេសហ្វ៊ីលីពីន បានទទួលវ៉ាក់សាំង 1ឈុតដំបូងនេះ យឺតជាងបណ្ដាប្រទេសជិតខាងក្នុងតំបន់អាស៊ាន ដែលធ្វើឱ្យភាគីជាច្រើនព្រួយបារម្ភថា ការស្ដារសេដ្ឋកិច្ច ដែលធ្លាក់ចុះជាប្រវត្តិសាស្ត្រ ដោយសារតែផលប៉ះពាល់ពីជំងឺកូវីដ-19នេះ អាចនឹងយឺតយ៉ាវទៅតាមនោះដែរ។

លោកឌូតឺតេ បានថ្លែងបញ្ជាក់ថា “អ្វីដែលលោកអ្នកមើលឃើញក្នុងថ្ងៃនេះ គឺវ៉ាក់សាំងដែលយើងបានទទួលពីការបរិច្ចាគ និងបញ្ហា ក៏គឺ គ្រប់ៗប្រទេស សុទ្ធតែនាំគ្នាព្យាយាមប្រមូលទិញវ៉ាក់សាំងទាំងអស់…រហូតទាល់តែមានការផ្គត់ផ្គង់លើសតម្រូវការ ដូច្នេះ ប្រហែលជាយើងត្រូវនាំគ្នារង់ចាំបន្តិចទៀត”

មេដឹកនាំនៃប្រទេសហ្វ៊ីលីពីនរូបនេះ បានសន្យាថា នឹងបន្ធូរបន្ថយការកម្រិតខាងសង្គមកាន់តែច្រើនឡើង ដើម្បីជំរុញសេដ្ឋកិច្ច តែត្រូវរង់ចាំ រហូតទាល់តែមានវ៉ាក់សាំងប្រើច្រើនជាងនេះសិន៕

ប្រភព៖ ទីភ្នាក់ងារព័ត៌មាន Reuter, Inquirer
ប្រែ និងសម្រួលដោយ តាវ៉ែនតា

March 3, 2021

តួលេខអ្នកវិជ្ជមាននឹងវីរុស Covid-19 គិតត្រឹមព្រឹកថ្ងៃទី 3មីនា 2021

ក្រសួងសុខាភិបាលបានរកឃើញមនុស្សចំនួន 34 នាក់បន្ថែមទៀតដែលវិជ្ជមាននឹងវីរុស Covid-19 និងអ្នកជំងឺ 4 នាក់ បានជាសះស្បើយ ក្នុងអំឡុង 24ម៉ោងកន្លងទៅនេះ។

អ្នកវិជ្ជមានថ្មីចំនួន 34 នាក់ខាងលើនេះ សុទ្ធតែពាក់ព័ន្ធនឹង «ព្រឹត្តិការណ៍ 20កុម្ភៈ» រួមមាន ជនជាតិខ្មែរ 15 នាក់ និងជនជាតិវៀតណាម 2 នាក់ ក្រៅពីនេះគឺជាជនជាតិចិន។ ព័ត៌មានលម្អិតសូមបន្តអានរបាយការណ៍របស់ក្រសួងសុខាភិបាល ដែលមាននៅខាងក្រោម។

គិតមកដល់ព្រឹកថ្ងៃទី 3 មីនា ឆ្នាំ 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 878 នាក់ ក្នុងនោះមាន 482 នាក់ បានជាសះស្បើយ និង 396 នាក់ កំពុងព្យាបាលនៅមន្ទីរពេទ្យ៕

March 3, 2021

Author: សឿន សំណាង