សឿន សំណាង - La Reine Media

ចិនមានមហាសេដ្ឋីដុល្លារច្រើនជាងគេក្នុងពិភពលោក

យោងតាម Hurun (Hurun Global Rich List) ចិនគឺជាប្រទេសដំបូងគេក្នុងពិភពលោកដែលមានមហាសេដ្ឋីដុល្លារច្រើនជាង 1,000 នាក់ ក្នុងនោះ មានមហាសេដ្ឋីថ្មីជាង 200 នាក់ បានបង្ហាញខ្លួននៅប្រទេសនេះនាឆ្នាំ 2020។

សារព័ត៌មាន AFP ដកស្រង់របាយការណ៍របស់ Hurun បានបង្ហាញថា ក្នុងឆ្នាំ 2020 អ្នកមានចំនួន 259 នាក់ បានក្លាយជាមហាសេដ្ឋីដុល្លារនៅប្រទេសចិន។ ដូច្នេះ បច្ចុប្បន្ន ប្រទេសចិនមានមហាសេដ្ឋីសរុបចំនួន 1,059នាក់។ សហរដ្ឋអាមេរិកជាប់លេខ 2 ដោយមានមហាសេដ្ឋីសរុបចំនួន 696 នាក់ ក្នុងនោះមានមហាសេដ្ឋីថ្មីចំនួន 70 នាក់។

តួលេខមហាសេដ្ឋីនៅប្រទេសចិន បានកើនជិតទ្វេដងនៅក្នុងអំឡុង 5 ឆ្នាំកន្លងទៅនេះ។ អ្នកមានជាងគេបង្អស់នៅប្រទេសចិននាបច្ចុប្បន្នគឺលោក Zhong Shanshan ជាថៅកែក្រុមហ៊ុនផលិតភេសជ្ជ Nongfu។ ដោយមានទ្រព្យសរុប 74 ពាន់លានដុល្លារ លោក Zhong គឺជាអ្នកមានជាងគេលំដាប់ទីពីរនៅក្នុងទ្វីបអាស៊ី ឈរពីក្រោយមហាសេដ្ឋីឥណ្ឌា លោក Mukesh Ambani ដែលមានទ្រព្យសរុប 81.2 ពាន់លានដុល្លារអាមេរិក។

ពិភពលោកបច្ចុប្បន្នមានមហាសេដ្ឋីចំនួន 3,228 នាក់ កាន់កាប់ក្រុមហ៊ុនចំនួន 2,402 ស្ថាប័ន នៅក្នុងប្រទេសចំនួន 68។ នៅប្រទេសចិន រដ្ឋធានីប៉េកាំង មានមហាសេដ្ឋីចំនួន 145 នាក់ រីឯទីក្រុងសៀងហៃឈរលេខ 2 ដោយមានមហាសេដ្ឋី 113 នាក់ ចំណែកទីក្រុង សិនជិន (Shenzhen) មាន 105 នាក់ ខណៈហុងកុងមាន 82 នាក់។

យោងតាម Bloomberg Billionaires Index អគ្គនាយកប្រតិបត្តិរបស់ក្រុមហ៊ុន Amazon លោក Jeff Bezos បច្ចុប្បន្ន (ថ្ងៃទី 5 មីនា 2021) ជាអ្នកមានជាងគេក្នុងពិភពលោក ដោយមានទ្រព្យសរុបចំនួន 175 ពាន់លានដុល្លារ។ ឈរលំដាប់លេខ 2 គឺអគ្គនាយកប្រតិបត្តិរបស់ក្រុមហ៊ុន Tesla លោក Elon Musk ដោយមានទ្រព្យសរុប 162 ពាន់លានដុល្លារ។ ចំណែកលេខ 3 គឺលោក Bill Gates មាន 134 ពាន់លានដុល្លារ៕

ប្រភព៖ AFP, Bloomberg
ប្រែសម្រួល៖ បុត្រា

March 5, 2021

មនុស្សរាប់ម៉ឺននាក់ត្រូវជម្លៀសខ្លួនព្រោះរលកយក្ស ក្រោយមានគ្រោះរញ្ជួយដីនៅមហាសមុទ្រប៉ាស៊ីហ្វិក

មនុស្សរាប់ម៉ឺននាក់រស់នៅក្បែរឆ្នេរសមុទ្រ ត្រូវជម្លៀសខ្លួន ក្រោយពីគ្រោះរញ្ជួយដីធ្វើឱ្យមានរលកយក្សកើតឡើងនៅប្រទេសមួយចំនួនដែលមានទីតាំងជាប់នឹងមហាសមុទ្រប៉ាស៊ីហ្វីក។

វីដេអូដែលត្រូវបានបង្ហោះលើបណ្ដាញសង្គមបានបង្ហាញថា រលកយក្សបង្ហាញខ្លួននៅឈូងសមុទ្រ Tokomaru ភាគខាងជើងនៃទីក្រុង Gisborne ប្រទេសនូវែលហ្សេឡង់ នាថ្ងៃនេះ។ ឈីលី ក៏បានឱ្យដឹងថា ប្រទេសនេះទំនងជាបានកើតមានរលកយក្សតូចមួយចំនួន។

យោងតាមមជ្ឈមណ្ឌលព្រមានអំពីរលកយក្សនៅមហាសមុទ្រប៉ាស៊ីហ្វិក រលកយក្សតូចៗមួយចំនួនក៏បានកើតមាននៅប្រទេសតុងហ្គោ។ រលកយក្សតូចៗ ត្រូវបានព្យាករថាអាចនឹងទៅដល់ប្រទេសជប៉ុន រុស្ស៊ី ម៉ិកស៊ិក និងឆ្នេរសមុទ្រនៅអាមេរិកខាងត្បូងផងដែរ។

មនុស្សរាប់ម៉ឺននាក់នៅលើឆ្នេរសមុទ្រភាគខាងកើតរបស់កោះ North Island នៃប្រទេស នូវែលហ្សេឡង់ បានជម្លៀសខ្លួនទៅកាន់តំបន់ទួល ក្រោយពីរញ្ជួយដីទីបីកើតមានក្នុងតំបន់ក្នុងអំឡុងមិនដល់ 8 ម៉ោង។ ក្រុមកម្មករ និស្សិត និងពលរដ្ឋរស់នៅក្នុងតំបន់ Northland និង Bay of Plenty ទទួលបានជំនួយពីក្រុមសមត្ថកិច្ចបន្ទាប់ពីមានការព្រមានថា រលកយក្សអាចមានកម្ពស់ខ្ពស់ជាង 3 ម៉ែត្រ បើធៀបនឹងផ្ទៃទឹកជោរ។

ពលរដ្ឋម្នាក់នៅទីក្រុង Auckland ប្រទេសនូវែលហ្សែឡង់ បានបង្ហោះរូបថតមួយសន្លឹកបង្ហាញថា ផ្ទៃទឹកសមុទ្រប្រែក្លាយជាស្រកខ្លាំងនៅកំពង់ផែ Kaipara។ Rachel Cunlife ប្រាប់ថា «ខ្ញុំមិនដែលបានឃើញដីលេចឡើងខ្ពស់យ៉ាងដូច្នេះទេ នៅកំពង់ផែ Kaipara»។

គ្រោះរញ្ជួយដីថ្មីដែលមានកម្លាំង 8.1 រិចទ័រនៅប្រជុំកោះ Kermadec ភាគឦសានរបស់ប្រទេសនូវែលហ្សែឡង់នេះ បានកើតឡើងបន្ទាប់ពីគ្រោះរញ្ជួយដីកម្លាំង 7.4 រិចទ័របានកើតមានក្នុងតំបន់ដដែលនេះ។ មុននោះ គ្រោះរញ្ជួយដីមួយដែលមានកម្លាំង 7.2 រិចទ័រ ក៏ត្រូវបានរាយការណ៍ថា បានកើតឡើងក្នុងតំបន់មួយដែលមានចម្ងាយពី Northland ប្រហែល 900 គីឡូម៉ែត្រ ទៅទិសខាងកើត។

សំឡេងព្រមានបានលាន់កងរំពងពាសពេញតំបន់ Noumea ដែលជាទីក្រុងធំនៃទឹកដី New Caledonia របស់បារាំង នៅពេលក្រុមមន្ត្រីបានចេញបញ្ជាឱ្យពលរដ្ឋជម្លៀសខ្លួន ដោយសារមានការព្រួយបារម្ភអំពីរលកយក្សដែលកំពុងតម្រង់មកកាន់ទីនេះ។

នៅម៉ោងប្រហែល 13:30 នាទី (ម៉ោង 7:30 នាទីនៅភ្នំពេញ) ក្រុមមន្ត្រីរបស់នូវែលហ្សេឡង់ បានដកបទបញ្ជាជម្លៀសខ្លួនខាងលើ ដោយសារតែហានិភ័យនៃការកើតមានរលកយក្សបានកន្លងផុតទៅហើយ។ បច្ចុប្បន្ន មិនទាន់មានរបាយការណ៍អំពីករណីស្លាប់ ឬរងរបួសនៅឡើយ៕

ប្រភព៖ AFP, Reuters, Guardian
ប្រែសម្រួល៖ បុត្រា

March 5, 2021

ចិនអនុម័តឱ្យប្រើប្រាស់ឱសថបុរាណ 3ប្រភេទ ដើម្បីព្យាបាល Covid-19

នាយកដ្ឋានគ្រប់គ្រងផលិតផលសុខាភិបាលជាតិរបស់ចិន (NMPA) កាលពីថ្ងៃទី 4 មីនា បានប្រកាសថា បានផ្ដល់ការអនុញ្ញាតឱ្យផលិតផលឱសថបុរាណចិន មានសិទ្ធិលក់ដើម្បីព្យាបាលជំងឺ Covid-19។

យោងតាម CNN ស្ថាប័នខាងលើបានប្រើប្រាស់បែបបទនៃការអនុម័តពិសេសដើម្បី «បើកភ្លើងខៀវ» ឱ្យផលិតផលឱសថបុរាណចិន (TCM/Traditional Chinese Medicine) ដើម្បី «ផ្ដល់ជម្រើសបន្ថែមនៅក្នុងការព្យាបាល Covid-19»។

ផលិតផលឱសថបុរាណខាងលើ សុទ្ធតែជាប្រភេទគ្រាប់ និងមានប្រភពពី «រូបមន្តនៃឱសថបុរាណរបស់ចិន» នេះបើតាមប្រកាសរបស់ NMPA។ ឱសថទាំងនេះត្រូវបានអភិវឌ្ឍពីវិធីសាស្ត្រព្យាបាលបែបបុរាណ ដែលធ្លាប់ត្រូវបានប្រើប្រាស់នៅខេត្ត Hubei ប្រទេសចិន និងត្រូវបានចម្រាញ់ ជ្រើសរើសដោយក្រុមអ្នកសិក្សាស្រាវជ្រាវ និងក្រុមជំនាញនៅជួរមុខ»។

សេចក្ដីប្រកាសខាងលើក៏បានឱ្យដឹងថា ផលិតផលទាំង 3 ប្រភេទដែលទើបទទួលបានការអនុញ្ញាតនេះគឺជា «គ្រាប់សម្អាត និងបណ្ដេញជាតិពុលក្នុងសួត», «គ្រាប់បណ្ដេញជាតិពុល និងទប់ទល់សំណើម» និង «គ្រាប់បន្ថយកំហាប់ (មេរោគ) និងបណ្ដេញជាតិពុលក្នុងសួត»។

សុវត្ថិភាព និងប្រសិទ្ធភាពរបស់ឱសថបុរាណនៅក្នុងការព្យាបាល Covid-19 មកដល់បច្ចុប្បន្ន នៅតែត្រូវបានគេជជែកដេញដោលគ្នានៅប្រទេសចិន ជាកន្លែងដែលមានទាំងអ្នកធ្លាប់ប្រើប្រាស់ ទាំងអ្នកសង្ស័យ។

បើទោះជាវិធីសាស្ត្រព្យាបាលជំងឹដោយឱសថបុរាណ ត្រូវបានប្រើប្រាស់រាប់រយឆ្នាំមកហើយក្ដី ប៉ុន្តែក្រុមអ្នករិះគន់មួយចំនួនយល់ថា មិនមានភ័ស្ដុតាងបែបវិទ្យាសាស្ត្រដែលអាចរកឃើញផលប្រយោជន៍ដែលត្រូវបានគេចាត់ទុកថាជារបស់ TCM។

ក្នុងអំឡុងច្រើនឆ្នាំចុងក្រោយនេះ រូបមន្តឱសថបុរាណចិន ត្រូវបានប្រធានាធិបតី Xi Jinping កោតសរសើរជាច្រើនលើកថាជា «មោទកភាពជាតិ»។ លោក Xi Jinping គឺជាអ្នកគាំទ្រវិធីសាស្ត្រព្យាបាលដោយឱសថបុរាណ៕

ប្រភព៖ CNN
ប្រែសម្រួល៖ បុត្រា

March 5, 2021

ស្ថានភាព Covid-19 នៅកម្ពុជា គិតត្រឹមព្រឹកថ្ងៃទី 5មីនា 2021

ក្នុងអំឡុង 24 នៃថ្ងៃទី 4 មីនា កម្ពុជាបានរកឃើញអ្នកផ្ទុកវីរុស Covid-19 ថ្មី ចំនួន 23 នាក់ និងជាសះស្បើយចំនួន 5 នាក់ នេះបើតាមក្រសួងសុខាភិបាល។

អ្នកជំងឺថ្មីខាងលើ សុទ្ធតែពាក់ព័ន្ធនឹង «ព្រឹត្តិការណ៍ឆ្លងក្នុងសហគមន៍ 20កុម្ភៈ»។ ក្នុងចំណោមនេះ មាន ជនជាតិខ្មែរ 10 នាក់, ជនជាតិសិង្ហបុរី 1 នាក់, ជនជាតិឥណ្ឌូនេស៊ី 1 នាក់ ក្រៅពីនេះគឺជាជនជាតិចិន។

គិតមកដល់ព្រឹកថ្ងៃទី 5 មីនា ឆ្នាំ 2021 កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 932 នាក់ ក្នុងនោះមានអ្នកជាសះស្បើយចំនួន 489 នាក់ និងកំពុងព្យាបាលចំនួន 442 នាក់៕

March 5, 2021

អ្នកជំងឺ Covid-19 ម្នាក់បានស្លាប់ក្នុងអំឡុងពេលព្យាបាល ក្រសួងបញ្ជាក់ថា ដោយសារថ្នាំញៀន

នាព្រឹកថ្ងៃទី 4 មីនា ឆ្នាំ 2021 មានជនជាតិចិនម្នាក់បានស្លាប់នៅពេលកំពុងទទួលការព្យាបាលជំងឺ Covid-19 នៅមណ្ឌលព្យាបាល Covid-19 ព្រែកព្នៅ រាជធានីភ្នំពេញ នាំឱ្យមានការព្រួយបារម្ភខ្លាំងពីសំណាក់ពលរដ្ឋ។

អ្នកជំងឺដែលបានស្លាប់ខាងលើ មានឈ្មោះថា ឡាយ ប៊ីនស៊ាង ភេទប្រុស កើតឆ្នាំ 1987។ វីដេអូបង្ហាញអំពីការស្លាប់របស់អ្នកជំងឺនេះ ត្រូវបានគេចែករំលែកពេញបណ្ដាញសង្គម កាលពីព្រលប់ថ្ងៃទី 4 មីនា ធ្វើឱ្យមានការព្រួយបារម្ភកាន់តែខ្លាំងអំពីស្ថានភាព Covid-19 នៅកម្ពុជា។

យ៉ាងនេះក្ដី ដើម្បីបញ្ជាក់អំពីមូលហេតុពិតនៃការស្លាប់នេះ ក្រសួងសុខាភិបាលក៏បានចេញសេចក្ដីប្រកាសមួយបញ្ជាក់ថា នេះមិនមែនជាករណីស្លាប់ដោយសារ Covid-19 នោះទេ ពោលគឺដោយសារការប្រើប្រាស់ថ្នាំញៀន នាំឱ្យគាំងបេះដូង។ ព័ត៌មានលម្អិត សូមអានរបាយការណ៍ដូចមាននៅខាងក្រោម។

គិតមកដល់ព្រឹកថ្ងៃទី 4 មីនានេះ កម្ពុជាបានរកឃើញអ្នកឆ្លងវីរុស Covid-19 សរុបចំនួន 909 នាក់ និងជាសះស្បើយចំនួន 484 នាក់ ខណៈ 425 នាក់ផ្សេងទៀតកំពុងព្យាបាលនៅមន្ទីរពេទ្យ៕

March 5, 2021

ចានបុរាណចិននៅអាមេរិក ត្រូវគេទិញក្នុងតម្លៃ 35ដុល្លារ តែលក់វិញតម្លៃ 500,000ដុល្លារ

មនុស្សម្នាក់រស់នៅក្នុងរដ្ឋ Connecticut បានទិញចានសេរ៉ាមិចមួយតម្លៃ 35 ដុល្លារអាមេរិក ពីទីតាំងលក់ទំនិញចាស់ៗមួយកន្លែង ដោយមិនបានដឹងទាល់់តែសោះថា វាគឺជាវត្ថុបុរាណជំនាន់រាចវង្សមីង (Ming Dynasty) របស់ចិន ដែលមានតម្លៃរហូតដល់ 5,00,000 ដុល្លារអាមេរិក។

ចានដែលមានរូបគំនូរស្លឹកឈើដ៏អស្ចារ្យមួយនេះ ត្រូវបានមនុស្សម្នាក់ទិញពីកន្លែងលក់ទំនិញចាស់ៗ ដែលស្ថិតនៅក្នុងរដ្ឋ Connecticut ភាគឦសាននៃសហរដ្ឋអាមេរិក។ អត្តសញ្ញាណរបស់អ្នកទិញរូបនេះ បច្ចុប្បន្នត្រូវបានគេលាក់ជាអាថ៌កំបាំង។

អ្នកទិញខាងលើបានរកក្រុមអ្នកជំនាញខាងសេរ៉ាមិច ប៉សឺឡែន ដើម្បីពិនិត្យចាននេះ ដោយការផ្ញើរូបថតជាដំបូង ហើយក្រោយមកក៏បានយកវាទៅកាន់សាលដេញថ្លៃដើម្បីពិនិត្យឱ្យបានច្បាស់។ ក្រុមអ្នកជំនាញបានឱ្យដឹងថា ចាននេះត្រូវបានផលិតឡើងសម្រាប់រាជបល្ល័ង្ករបស់មហាក្សត្រ Yongle (ព្រះនាមផ្ទាល់ខ្លួនគឺ Zhu Di) ដែលជាស្ដេចទីបីរបស់រាជវង្សមីង សោយរាជចាប់ពីឆ្នាំ 1402 ដល់ 1424។

«នៅក្នុងពិភពលោកនេះ មានចានដូច្នេះចំនួនតែ 6 ប៉ុណ្ណោះដែលត្រូវបានគេដឹង។ នោះគឺជាសម្ភារសម្រាប់តែរាជវង្សប៉ុណ្ណោះ» នេះបើតាម Angela McAteer អ្នកជំនាញខាងស្នាដៃសិល្បៈចិន មកពីការិយាល័យកណ្ដាលរបស់ Sotheby’s នៅទីក្រុង New York។ Sotheby’s គឺជាក្រុមហ៊ុនឈ្មួញជើងសាធំជាងគេបង្អស់មួយនៅក្នុងពិភពលោក ដែលរកស៊ីខាងវត្ថុបុរាណ គ្រឿងអលង្ការ គ្រឿងសិល្បៈតុបតែង អចលនទ្រព្យ និងវត្ថុចម្លែក។

Sotheby’s នឹងនាំយកចានទី 7 នៃរាជបល្ល័ង្ករបស់មហាក្សត្រ Yongle នេះ ទៅដាក់លក់ដេញថ្លៃនៅថ្ងៃទី 17 មីនាខាងមុខ ដោយចាប់ផ្ដើមពីតម្លៃ 300,000 ដុល្លារ ដល់ 500,000 ដុល្លារអាមេរិក។

ចានចំនួន 5 ក្នុងចំណោមចានដែលត្រូវបានគេស្គាល់ កំពុងស្ថិតក្នុងសារមន្ទីរ រួមមាន៖ 2 នៅកោះតៃវ៉ាន់, 2 នៅក្រុងឡុងដ៍ ប្រទេសអង់គ្លេស និង 1 នៅទីក្រុងតេហេរ៉ង់ ប្រទេសអ៊ីរ៉ង់៕

ប្រភព៖ SCMP
ប្រែសម្រួល៖ បុត្រា

March 4, 2021

ប្រាក់ចំណូលប្រចាំថ្ងៃរបស់ Amazon ខ្ពស់ជាង 1ពាន់លានដុល្លារ ក្នុងឆ្នាំ 2020

វីរុសមហារាតត្បាត Covid-19 បាននាំឱ្យមនុស្សម្នាជ្រើសរើសវិធីទិញទំនិញតាមអនឡាញ ចំណែកក្រុមហ៊ុនជាច្រើនក៏បានអនុញ្ញាតឱ្យបុគ្គលិកធ្វើការពីចម្ងាយ ដែលនេះបាន និងកំពុងនាំមកនូវឱកាសយ៉ាងប្រសើរដល់ក្រុមហ៊ុន Amazon របស់មហាសេដ្ឋី Jeff Bezos។

ក្រុមហ៊ុន Amazon មានក្រុមហ៊ុនបុត្រសម្ព័ន្ធចំនួន 2 ដែលកំពុងរកចំណាយបានច្រើនជាងគេ រួមមាន ផ្សារអនឡាញ Amazon និងក្រុមហ៊ុនផ្ដល់សេវាកម្មព័ត៌មានវិទ្យា Amazon Web Services (AWS)។ របាយការណ៍ហិរញ្ញវត្ថុសម្រាប់ត្រីមាសទី 4 ដែលត្រូវបានប្រកាសកន្លងមក បានបង្ហាញថា ជាលើកដំបូងហើយដែលប្រាក់ចំណូលរបស់ Amazon បានលោតផុតចំណុច 100 ពាន់លានដុល្លារអាមេរិក។

គិតត្រឹមចុងខែមីនានេះ Amazon គ្រោងនឹងរកបានចំណូលចាប់ពី 100-106 ពាន់លានដុល្លារ និងចំណេញចាប់ពី 3-6.5 ពាន់ដុល្លារ។ ប៉ុន្តែ ក្រុមអ្នកវិភាគបានព្យាករថា ប្រាក់ចំណូលជាមធ្យមនៅក្នុងត្រីមាសទីមួយរបស់ Amazon នាឆ្នាំនេះ នឹងបានត្រឹមតែ 95.72 ពាន់លានដុល្លារប៉ុណ្ណោះ ខណៈប្រាក់ចំណេញនឹងបានត្រឹម 6.07 ពាន់លានដុល្លារ។

ប្រការដែលគួរឱ្យចាប់អារម្មណ៍ជាងគេនៅក្នុងរបាយការណ៍ហិរញ្ញវត្ថុខាងលើ នោះគឺថា ប្រាក់ចំណូលជាមធ្យមក្នុងមួយថ្ងៃរបស់ក្រុមហ៊ុននេះ ខ្ពស់ជាង 1 ពាន់លានដុល្លារទៅទៀត។ បច្ចុប្បន្ន ក្នុងចំណោមក្រុមហ៊ុនធំៗនៅសហរដ្ឋអាមេរិក មានតែក្រុមហ៊ុនលក់រាយ Wal-Mart តែមួយគត់ដែលរកបានចំណូលប្រហាក់ប្រហែលនេះ។ កាលពីអតីតកាល ឯតទគ្គកម្មនេះបានទៅលើ ExxonMobil ដែលជាក្រុមហ៊ុនសាជីវកម្មប្រេងពហុជាតិរបស់សហរដ្ឋអាមេរិក ដែលមានមូលដ្ឋាននៅទីក្រុង Irving រដ្ឋ Texas។

យោងតាមរបាយការណ៍របស់ EMarketer ការចំណាយតាមរយៈអនឡាញរបស់ជនជាតិអាមេរិកាំងនៅក្នុងឆ្នាំ 2021 នេះ នឹងឡើងដល់ 843.0 ពាន់លានដុល្លារ កើន 6.1% បើធៀបនឹងឆ្នាំ 2020។ ប៉ុន្តែ នៅពេលស្ថានភាព Covid-19 បានល្អប្រសើរឡើងវិញ កំណើននៃការទិញដូរតាមអនឡាញនឹងត្រូវថយចុះមិនខាន ហើយពេលនោះ ប្រាក់ចំណូលរបស់ Amazon ក៏អាចនឹងត្រូវថយចុះ៕

ប្រភព៖ Bloomberg
ប្រែសម្រួល៖ បុត្រា

March 4, 2021

(វីដេអូ)-យានអវកាសគំរូ Starship SN10 ហោះឡើង និងចុះចតដោយជោគជ័យ ប៉ុន្តែបានផ្ទុះខ្ទេចខ្ទីក្រោយពីឈរលើដីបាន 8នាទី

យានអវកាសគំរូសាកល្បង Starship SN10 របស់មហាសេដ្ឋីអាមេរិក Elon Musk ដែលបានផ្ទុះខ្ទេចខ្ទីនៅលើទីលានចុះចត ក្នុងតំបន់ Boca Chica នៃរដ្ឋ Texas អាចកើតឡើងដោយសារបញ្ហាហៀរប្រេង។

យានអវកាស Starship SN10 បានចុះចតដោយជោគជ័យក្រោយពីបានហោះសាកល្បងទៅកាន់រយៈកម្ពស់ខ្ពស់កាលពីថ្ងៃទី 3 មីនា ដែលជាជោគជ័យដ៏ធំមួយទៀតរបស់ក្រុមហ៊ុនអវកាស SpaceX។ ក៏ប៉ុន្តែ យានអវកាសនេះបានផ្ទុះខ្ទេចខ្ទីគ្មានសល់ ក្រោយការចុះចតដោយជោគជ័យបានប្រហែល 8 នាទី។

យានអវកាស SN10 ដែលត្រូវបានច្នៃពីដែកអ៊ីណុកនេះ ត្រូវបានបាញ់បង្ហោះពីមូលដ្ឋានរបស់ SpaceX នៅក្នុងរដ្ឋ Texas ខាងត្បូង នាវេលាម៉ោង 6:15នាទីយប់នៃថ្ងៃទី 3 មីនា (ម៉ោង 6:15 នាទីព្រឹក ថ្ងៃទី 4 មីនា នៅភ្នំពេញ) និងបានហោះឡើងដល់កម្ពស់ 10 គីឡូម៉ែត្រ រួចក៏ទម្លាក់ខ្លួនចុះមកកាន់ផែនដីបានយ៉ាងល្អ ក្រោយហោះឡើងបាន 6នាទី និង 20វិនាទី។ នេះគឺជាលើកទីបីហើយដែល Starship បានហោះឡើងទៅកាន់កម្ពស់ខ្ពស់ដូច្នេះ ប៉ុន្តែជាលើកដំបូងដែលយានអវកាសនេះបានចុះចតដោយជោគជ័យ។ ក៏ប៉ុន្តែ ក្រោយពីបានចុះចតដល់ដីបានជោគជ័យ អណ្ដាតភ្លើងក៏ឆាបឆេះនៅត្រង់ជើងយាន SN10 ហើយក៏បង្កឱ្យមានការផ្ទុះយ៉ាងខ្លាំងក្លា។

កំណែយានអវកាស SN8 និង SN9 ដែលជារៀមច្បងរបស់ SN10 ត្រូវបានបាញ់បង្ហោះសាកល្បងជាបន្តបន្ទាប់នៅថ្ងៃទី 9 ធ្នូ 2020 និងថ្ងៃទី 2 កុម្ភៈ 2021 សុទ្ធតែបានហោះឡើងដោយជោគជ័យ ប៉ុន្តែបានចុះចតដោយបរាជ័យ ដោយសារផ្ទុះឆេះជាបំណែកក្នុងពេលចុះចត។

SpaceX កំពុងអភិវឌ្ឍយានអវកាស Starship ដើម្បីដឹកមនុស្ស និងសម្ភារឡើងទៅកាន់ឋានព្រះចន្ទ ព្រះអង្គារ និងទីអវកាសឆ្ងាយៗផ្សេងទៀត។ ប្រព័ន្ធរបស់ Starship រួមមាន យានអវកាសកម្ពស់ 50 ម៉ែត្រដែលមានឈ្មោះថា Starship និងកាំជ្រួចរុញច្រានដ៏ធំមួយគ្រឿង ឈ្មោះ Super Heavy។ Starship និង Super Heavy សុទ្ធតែត្រូវបានរចនាឡើងដើម្បីអាចប្រើប្រាស់ឡើងវិញបានទាំងស្រុង និងឆាប់រហ័ស៕

ប្រភព៖ Space
ប្រែសម្រួល៖ បុត្រា

March 4, 2021

ប្រជាជនមីយ៉ានម៉ាបន្តធ្វើបាតុកម្ម ក្រោយមានបាតុករ 38នាក់ ត្រូវបានបាញ់សម្លាប់កាលពីម្សិលមិញ

ក្រុមសកម្មជនប្រឆាំងរដ្ឋប្រហារនៅមីយ៉ានម៉ា បានប្រកាសថា នឹងបន្តធ្វើបាតុកម្មជាច្រើនទៀត ក្រោយពីមានបាតុករចំនួន 38 នាក់ ត្រូវបានបាញ់សម្លាប់ដោយក្រុមប៉ូលិសកាលពីម្សិលមិញ។

«យើងដឹងថា អាចត្រូវបានបាញ់សម្លាប់ដោយគ្រាប់កាំភ្លើងពិត ប៉ុន្តែ ក៏គ្មានន័យអ្វីដែរ បើសិនជារស់នៅក្រោមរបបយោធា ដូច្នេះហើយទើបយើងជ្រើសរើសវិធីគ្រោះថ្នាក់នេះដើម្បីដោះស្រាយបញ្ហា» បាតុករម្នាក់ឈ្មោះថា Maung Saungkha បាននិយាយនៅថ្ងៃនេះ។ បាតុកររូបនេះបន្តថា ៖ «យើងនឹងប្រយុទ្ធដោយប្រើគ្រប់មធ្យោបាយដែលអាចធ្វើបាន។ គោលដៅចុងក្រោយរបស់យើងគឺលុបបំបាត់របបនេះ»។

Maung Saungkha ប្រាប់ថា គណៈកម្មការមហាកូដកម្មជនជាតិរបស់លោក មានគម្រោងធ្វើបាតុកម្មធំមួយទៀតនៅថ្ងៃទី 4 មីនានេះ។

សារនៅលើបណ្ដាញសង្គមដែលបង្ហោះដោយក្រុមបាតុករផ្សេងទៀតក៏បានឱ្យដឹងថា យ៉ាងហោចណាស់មានបាតុកម្មចំនួនពីរនឹងត្រូវបានធ្វើឡើងនៅទីក្រុង Yangon។

ការប្រកាសខាងលើនេះបានកើតឡើងបន្ទាប់ពីរដ្ឋទូតរបស់អង្គការសហប្រជាជាតិស្ដីអំពីបញ្ហាមីយ៉ានម៉ា លោកស្រី Christine Schraner Burgener បានហៅថ្ងៃទី 3 មីនាថាជា «ថ្ងៃបង្ហូរឈាមបំផុត» រាប់ចាប់ពីថ្ងៃរដ្ឋប្រហារ ដោយមានបាតុករចំនួន 38 នាក់ ត្រូវបានសម្លាប់ នាំឱ្យតួលេខអ្នកស្លាប់ក្នុងការបង្រាបរបស់រដ្ឋាភិបាលយោធាភូមា កើនដល់ជាង 50 នាក់។ លោកស្រី Schraner Burgener បានឱ្យដឹងថា លោកស្រីបានព្រមានដល់អគ្គមេបញ្ជាការរងកងទ័ពមីយ៉ានម៉ា Soe Win ថា កងទ័ពប្រទេសនេះអាចត្រូវប្រឈមនឹងទណ្ឌកម្មធ្ងន់ធ្ងរពីបណ្ដាប្រទេសក្នុងពិភពលោក ទន្ទឹមនឹងការដាក់ឱ្យនៅឯកោ។

«ចម្លើយគឺថា៖ «យើងបានស៊ាំនឹងទណ្ឌកម្ម ហើយយើងនៅតែជំនះបាន» លោកស្រី Schraner Burgener រៀបរាប់ប្រាប់ក្រុមអ្នកសារព័ត៌មានអំពីការឆ្លើយតបរបស់អគ្គមេបញ្ជាការរងកងទ័ពភូមា។ «ពេលខ្ញុំព្រមានថា ពួកគេនឹងត្រូវដាក់ឱ្យនៅឯកោ ចម្លើយគឺថា «យើងខ្ញុំត្រូវស្វែងយល់អំពីជំហានបន្ទាប់ដោយមានមិត្តតែប៉ុន្មាននាក់ក៏បាន»។

សារព័ត៌មានក្នុងស្រុកបានរាយការណ៍ថា បាតុកររាប់រយនាក់ត្រូវបានបាញ់ប្រហារ ខណៈស្ថាប័នជំនួយមួយបាននិយាយថា ក្នុងចំណោមអ្នកស្លាប់គឺមានកុមារ 4 នាក់។ ចំណែកអ្នកនាំពាកក្យរបស់ក្រុមប្រឹក្សាយោធាដែលកំពុងកាន់អំណាច មិនឆ្លើយតបនឹងសំណួរទាក់ទងនឹងបញ្ហាបាតុករត្រូវបានបាញ់សម្លាប់នេះទេ។

ក្រុមប្រឹក្សាសន្តិសុខអង្គការសហប្រជាធាតិនឹងបើកកិច្ចប្រជុំសម្ងាត់ដើម្បីពិភាក្សាអំពីស្ថានការណ៍នៅប្រទេសមីយ៉ានម៉ា នៅថ្ងៃទី 5 មីនាខាងមុខ។ សហភាពអឺរ៉ុបយល់ថា ការបាញ់ប្រហារលើពលរដ្ឋដែលមិនមានអាវុធគឺជាអំពើខុសច្បាប់អន្តរជាតិ៕

ប្រភព៖ Reuters
ប្រែសម្រួល៖ បុត្រា

March 4, 2021

ស្ត្រីជនជាតិជប៉ុន វ័យ 60ឆ្នាំម្នាក់ ស្លាប់ក្រោយចាក់វ៉ាក់សាំងកូវីដ…រដ្ឋាភិបាល ត្រៀមផ្ដល់សំណង 44លានយ៉េន

ផែនការចាក់វ៉ាក់សាំងទប់ស្កាត់កូវីដ-19 នៅក្នុងប្រទេសជប៉ុន ត្រូវញ័ររញ្ជួយ ក្រោយពីស្ត្រីវ័យ 60ឆ្នាំម្នាក់ បានស្លាប់ ក្រោយពីបានទទួលវ៉ាក់សាំងរួចហើយ ត្រឹមតែ 3ថ្ងៃ ហើយក្រសួងសុខាភិបាល ត្រៀមនឹងបង់ថ្លៃសំណង បើពិសោធឃើញថា ស្លាប់ដោយសារផលប៉ះពាល់ បណ្ដាលពីវ៉ាក់សាំងមែននោះ។

ក្រសួងសុខាភិបាល ពលកម្ម និងសុខុមាលភាពរបស់ជប៉ុន បានរាយការណ៍ ពីករណីស្ត្រីវ័យ 60ឆ្នាំម្នាក់ បានស្លាប់ក្រោយពីចាក់វ៉ាក់សាំងការពារជំងឺកូវីដ-19 របស់ក្រុមហ៊ុនហ្វ៉ៃហ្ស៊ើរ។ ស្ត្រីរូបនោះ បានទទួលវ៉ាក់សាំងកាលពីថ្ងៃទី២៦កុម្ភៈ និងបានស្លាប់នៅថ្ងៃទី1មីនា ដោយសារអាការចេញឈាមនៅក្រោមជាលិកាស្រោបខួរក្បាលស្រទាប់កណ្ដាល។ ស្ត្រីរូបនោះ មិនមានជំងឺប្រចាំកាយទេ និងក៏មិនមានប្រវត្តិ ធ្លាប់កើតប្រតិកម្មចាញ់ថ្នាំដែរ ករណីនេះ គឺជាករណី មានអ្នកស្លាប់ដំបូងគេហើយ ក្រោយពីប្រទេសជប៉ុន ចាប់ផ្ដើមគ្រោងការចាក់វ៉ាក់សាំង ឱ្យធនធានមនុស្សខាងវេជ្ជសាស្ត្រ កាលពីសប្ដាហ៍កន្លងទៅ។

តែយ៉ាងណាក៏ដោយ របាយការណ៍របស់ក្រសួងសុខាភិបាល បានបញ្ជាក់ថា មកដល់ខណៈពេលនេះ នៅមិនទាន់អាចបញ្ជាក់បានថា ការស្លាប់នេះ ពាក់ព័ន្ធជាមួយវ៉ាក់សាំង ឬយ៉ាងណានៅឡើយ។

ការយល់ឃើញពីគ្រូពេទ្យ និងអ្នកជំនាញការផ្នែកឱសថសាស្ត្រ ដែលបញ្ជាក់នៅក្នុងរបាយការណ៍របស់ក្រសួងសុខាភិបាលនេះ បានចង្អុលបង្ហាញថា អាការចេញឈាមនៅក្រោមជាលិកាស្រោបខួរក្បាលស្រទាប់កណ្ដាលនេះ ងាយនឹងកើតឡើងណាស់ នៅលើក្រុមមនុស្សអាយុ 40-60ឆ្នាំ ច្រើនតែមានមូលហេតុមកពីអាការសរសៃឈាមប៉ោងធំ និងនៅឯក្រៅប្រទេស ក៏មិនធ្លាប់មានរបាយការណ៍ថា អាការនេះ មានសម្ព័ន្ធនឹងការទទួលវ៉ាក់សាំងការពារវីរុសកូរ៉ូណាដែរ ដូច្នេះហើយ ទើបវាអាចជារឿងចៃដន្យខ្លាំងណាស់ តែយ៉ាងណាក្ដី យើងចាំបាច់ត្រូវតែប្រមូលទិន្នន័យបន្ថែមទៀត ដើម្បីវាយតម្លៃពីសុវត្ថិភាព និងផលប៉ះពាល់បន្ទាប់បន្សំរបស់វ៉ាក់សាំង។

រដ្ឋាភិបាល ធានាបង់សំណង បើស្លាប់ដោយសារវ៉ាក់សាំង

រដ្ឋាភិបាលជប៉ុន មានគោលការណ៍ថា បើអ្នកដែលទទួលវ៉ាក់សាំងកូវីដ ត្រូវស្លាប់ដោយសារផលប៉ះពាល់ ដែលបណ្ដាលពីវ៉ាក់សាំង នឹងសងប្រាក់សំណង ជូនទៅក្រុមគ្រួសារអ្នកស្លាប់ ចំនួន 44លានយ៉េន ឬប្រមាណជាជាង 40ម៉ឺនដុល្លារអាមេរិក ហើយនឹងផ្ដល់ប្រាក់ថ្លៃរៀបចំពិធីបុណ្យសពថែមទៀត 209,000យ៉េន (ជិត 2,000ដុល្លារអាមេរិក)។

ក្រៅពីនេះ បើមានអាការឈឺថ្កាត់ ឬរងផលប៉ះពាល់ខាងសុខភាពដោយសារវ៉ាក់សាំង ក៏នឹងបានទទួលប្រាក់សំណងដូចគ្នាដែរ ដោយចំនួនទឹកប្រាក់ ច្រើន ឬតិច នឹងអាស្រ័យលើករណីនីមួយ។

ទាំងអស់នេះ ប្រទេសជប៉ុន ធ្លាប់មានប្រវត្តិផលប៉ះពាល់ ដោយសារវ៉ាក់សាំងរួចមកហើយជាច្រើនករណី ដែលធ្វើឱ្យរដ្ឋាភិបាល ត្រូវបង់ប្រាក់សំណងទៅឱ្យអ្នកដែលរងផលប៉ះពាល់ខាងសុខភាព រហូតមកដល់បច្ចុប្បន្ននេះ។ មានការធ្វើការស្ទង់មតិ និងបានរកឃើញថា ប្រជាជនជប៉ុនក្នុងចំនួនដ៏ច្រើន នៅតែស្ទាក់ស្ទើរ ក្នុងការទទួលយកវ៉ាក់សាំង ហើយរឹតតែមានព័ត៌មានពីការស្លាប់ ក្រោយបានទទួលវ៉ាក់សាំងផងនោះ រឹតតែធ្វើឱ្យគោលដៅក្នុងការផ្ដល់វ៉ាក់សាំងជូនប្រជាជន ក្នុងចំនួនច្រើនបំផុត ដើម្បីទប់ស្កាត់ការឆ្លងរាតត្បាតរបស់ជំងឺកូវីដ-19 ឱ្យបានមុន មហាព្រឹត្តការណ៍តូក្យូអូឡាំពិក នៅពាក់កណ្ដាលឆ្នាំនេះ បានក្លាយជាការសាកល្បង ដ៏ធំមួយ៕

ប្រភព៖ សារព័ត៌មានបរទេស
ប្រែ និងសម្រួលដោយ ទិទីតំតាតូ

March 4, 2021

Author: សឿន សំណាង