សឿន សំណាង - La Reine Media

ប៉ូលិសមីយ៉ានម៉ា ឡោមព័ទ្ធក្រុមបាតុករទាំងយប់៖ មនុស្ស 3នាក់ត្រូវបានបាញ់សម្លាប់

ក្រុមសន្តិសុខនៃរបបសឹកមីយ៉ានម៉ា បានឡោមព័ទ្ធបាតុកររាប់រយនាក់ដែលនាំគ្នាធ្វើបាតុកម្មនៅទីក្រុង Yangon និងបានគំរាមដល់ពលរដ្ឋណាដែលលាក់បំពួនបាតុករ។

សកម្មភាពខាងលើត្រូវបានធ្វើឡើងកាលពីយប់ថ្ងៃទី 8 មីនា ឆ្នាំ 2021 នៅក្នុងសង្កាត់ Sanchuang នៃទីក្រុង Yangon។ Stephane Dujarric អ្នកនាំពាក្យរបស់អង្គការសហប្រជាជាតិបានឱ្យដឹងថា អគ្គលេខាធិការ Antonio Guterres បានអំពាវនាវឱ្យ «អត់ធ្មត់ជាអតិបរមា និងដោះលែងគ្រប់គ្នាដោយសុវត្ថិភាព»។ ការិយាល័យអង្គការសហប្រជាជាតិនៅមីយ៉ានម៉ា រួមនឹងស្ថានទូតអាមេរិក និងអង់គ្លេស ក៏បានស្នើឱ្យប៉ូលិសទុកផ្លូវឱ្យបាតុករចាកចេញ។

ក៏ប៉ុន្តែ ពុំមានសញ្ញាណាមួយបង្ហាញថា ប៉ូលិសមីយ៉ានម៉ានឹងបង្អង់ដៃនោះទេ។ សារព័ត៌មានក្នុងស្រុក និងក្រុមអ្នកលេង Facebook បានឱ្យដឹងថា មនុស្សចំនួន 20 នាក់ ត្រូវបានចាប់ខ្លួននៅសង្កាត់ Sanchuang បន្ទាប់ពីក្រុមប៉ូលិសបានឆែកឆេរផ្ទះរបស់ពលរដ្ឋ។

នៅតំបន់ផ្សេងៗក្នុងទីក្រុង Yangon មនុស្សរាប់ពាន់នាក់បានចេញធ្វើបាតុកម្ម និងស្នើឱ្យដោះលែងបាតុករដែលប៉ូលិសបានចាប់ខ្លួន។ ប៉ូលិសបានផ្ទុះអាវុធ និងបាញ់គ្រាប់បែកសម្លត់ស្មារតី ដើម្បីបំបែកហ្វូងបាតុករ។

អ្នកនាំពាក្យរបបយោធាមីយ៉ានម៉ា មិនទាន់ធ្វើការអធិប្បាយអ្វីអំពីហេតុការណ៍ខាងលើនៅឡើយ។

សារព័ត៌មានក្នុងស្រុក កាលពីថ្ងៃទី 8 មីនា បានឱ្យដឹងថា បាតុករ 3 នាក់ ត្រូវបានបាញ់សម្លាប់នៅក្នុងបាតុកម្មនៅភាគខាងជើងប្រទេស និងតំបន់វាលរាបទន្លេ Irrawaddy។ យោងតាមអង្គការសហប្រជាជាតិ សកម្មភាពរបស់ប៉ូលិស និងកងទ័ពមីយ៉ានម៉ា បានបណ្ដាលឱ្យមនុស្សជាង 50 នាក់ ត្រូវបាត់បង់ជីវិត រាប់ចាប់ពីមានបាតុកម្មប្រឆាំងរដ្ឋប្រហារកើតឡើង។

មីយ៉ានម៉ា បានធ្លាក់ចូលក្នុងភាពវឹកវរក្រោយពីកងទ័ពប្រទេសនេះបានធ្វើរដ្ឋប្រហារ និងចាប់ខ្លួនទីប្រឹក្សារដ្ឋ Aung San Suu Kyi រួមនឹងក្រុមមន្ត្រីជាន់ខ្ពស់ជាច្រើនរូបកាលពីថ្ងៃទី 1 កុម្ភៈ ឆ្នាំ 2021។ បាតុកម្មដែលបានកើតឡើងរយៈពេលជាង 1 ខែមកនេះគឺដើម្បីស្នើឱ្យដោះលែងមនុស្សដែលត្រូវបានចាប់ខ្លួន និងស្នើឱ្យមានការគោរពលទ្ធផលនៃការបោះឆ្នោតកាលពីខែវិច្ឆិកា 2020 ដែលកងទ័ពចោទថាមានការលួចបន្លំសន្លឹកឆ្នោត៕

ប្រភព៖ Reuters
ប្រែសម្រួល៖ បុត្រា

March 9, 2021

វៀតណាមចាប់ផ្ដើមចាក់វ៉ាក់សាំងបង្ការវីរុស Covid-19 នៅថ្ងៃនេះ

ព្រឹកថ្ងៃទី 8 មីនានេះ វៀតណាមចាប់ផ្ដើមយុទ្ធនាការចាក់វ៉ាក់សាំងដល់ក្រុមមនុស្សអាទិភាពរបស់ខ្លួនដែលស្ថិតនៅក្នុងតំបន់ដែលមានហានិភ័យខ្ពស់ រួមមាននៅរដ្ឋធានីហាណូយ ទីក្រុងហូជីមិញ និងខេត្តហៃហ្សឿង។

ក្រុមមនុស្សដែលស្ថិតក្នុងអាទិភាពដំបូងគេ មានដូចជាក្រុមគ្រូពេទ្យ និងក្រុមមនុស្សដែលធ្វើកិច្ចការប្រយុទ្ធប្រឆាំងនឹងវីរុស Covid-19 ជាដើម។

វៀតណាម បច្ចុប្បន្នមានវ៉ាក់សាំងបង្ការ Covid-19 AstraZeneca ចំនួន 117,500 ដូស ត្រូវបានផ្គត់ផ្គង់ដល់ខេត្តចំនួន 13 ដែលកំពុងរងផលវិបាកដោយសារ Covid-19 ច្រើនជាងគេ។ ក្រៅពីនេះ មាន 600 ដូស ត្រូវបានប្រើប្រាស់ដើម្បីពិនិត្យគុណភាព។

ក្រុមអ្នកត្រូវចាក់វ៉ាក់សាំង នៅខេត្តហៃហ្សឿង

តាមគម្រោង នៅក្នុងខែមីនានេះ វៀតណាមនឹងទទួលបានវ៉ាក់សាំងចំនួន 1.3លានដូសទៀតនៅក្នុងកម្មវិធី Covax Facility។ ចំនួននេះនឹងកើនឡើងជាបន្តបន្ទាប់ រហូតដល់គម្រប់ 100 លានដូស។

គិតមកដល់បច្ចុប្បន្ន វៀតណាម មានអ្នកឆ្លង Covid-19 សរុបចំនួន 2,512 នាក់ ក្នុងនោះមាន 1,920 នាក់បានជាសះស្បើយ និង 35 នាក់បានបាត់បង់ជីវិត ខណៈ 553 នាក់កំពុងព្យាបាល៕

ប្រភព៖ VE
ប្រែសម្រួល៖ បុត្រា

March 8, 2021

អ្នកវិជ្ជមានថ្មីនៅកម្ពុជា គិតត្រឹមព្រឹកថ្ងៃទី 8មីនា បានកើនឡើងដល់ជាង 1,000នាក់ ខណៈពិភពលោកកើនដល់ជាង 117លាននាក់

កម្ពុជារកឃើញអ្នកវិជ្ជមាននឹង Covid-19 ថ្មី ក្នុងអំឡុង 24 ម៉ោងនៃថ្ងៃទី 7 មីនា ចំនួន 24 នាក់ ដែលសុទ្ធតែពាក់ព័ន្ធនឹងព្រឹត្តិការណ៍ 20កុម្ភៈ។

ករណីវិជ្ជមានខាងលើរួមមាន 7 នាក់ជាជនជាតិខ្មែរ និង 5 នាក់ជាជនជាតិវៀតណាម ក្រៅពីនេះគឺសុទ្ធតែជាជនជាតិចិន។ ក្នុងថ្ងៃដដែល កម្ពុជាក៏មានអ្នកជាសះស្បើយថ្មីចំនួន 7 នាក់ផងដែរ។

គិតមកដល់ព្រឹកថ្ងៃទី 8 ខែមីនានេះ កម្ពុជាបានរកឃើញអ្នកឆ្លង Covid-19 សរុបចំនួន 1,011 នាក់ ក្នុងនោះមាន 517 នាក់ បានជាសះស្បើយ និង 493 នាក់ កំពុងព្យាបាល។

នៅទូទាំងពិភពលោក មានអ្នកឆ្លង Covid-19 សរុបចំនួន 117,434,469 នាក់ ក្នុងនោះមានអ្នកស្លាប់ 2,604,818 នាក់, អ្នកជាសះស្បើយចំនួន 92,941,718 នាក់ ខណៈអ្នកកំពុងព្យាបាល មានចំនួន 21,887,933 នាក់៕

ប្រភព៖ ក្រសួងសុខាភិបាល
ដកស្រង់ដោយ៖ បុត្រា

March 8, 2021

អ្នកវិជ្ជមាននឹង Covid-19 ថ្មីចំនួន 34នាក់ទៀត ត្រូវបានរកឃើញក្នុងអំឡុង 24ម៉ោងមុននេះ

កម្ពុជាទើបតែបានរកឃើញអ្នកផ្ទុកវីរុស Covid-19 ថ្មីចំនួន 34 នាក់ទៀត ទន្ទឹមនឹងករណីជាសះស្បើយចំនួន 19 នាក់ កាលពីថ្ងៃទី 6 មីនាកន្លងទៅ។

ក្នុងចំណោមអ្នកវិជ្ជមានថ្មីខាងលើ មាន 3 នាក់ជាករណីនាំចូល និង 31 នាក់ជាករណីទាក់ទងនឹងព្រឹត្តិការណ៍ 20កុម្ភៈ។ អ្នកវិជ្ជមានថ្មីទាំងនេះ មានជនជាតិខ្មែរ 12 នាក់ និងជនជាតិវៀតណាម 2 នាក់ ក្រៅពីនេះគឺសុទ្ធតែជាជនជាតិចិន។

គិតមកដល់បច្ចុប្បន្ន កម្ពុជាមានអ្នកឆ្លងវីរុស Covid-19 សរុបចំនួន 987 នាក់ ក្នុងនោះមាន 510 នាក់បានជាសះស្បើយ និង 476 នាក់កំពុងព្យាបាល៕

ប្រភព៖ ក្រសួងសុខាភិបាល
ដកស្រង់៖ បុត្រា

March 7, 2021

នំវ៉ាក់សាំងមួយប្រភេទទទួលបានចំណាប់អារម្មណ៍ច្រើននៅហាងមួយនៃទីក្រុង Prague

ហាងកាហ្វេឈ្មោះ Black Madonna មានទីតាំងស្ថិតនៅក្នុងតំបន់ប្រវត្តិសាស្ត្ររបស់រដ្ឋធានី Prague នៃសាធារណរដ្ឋឆេក កំពុងលក់នំជាច្រើនប្រភេទ ក្នុងនោះមានទាំងនំ cake ដែលមានរូបរាងដូចវីរុស Covid-19 និងវ៉ាក់សាំងផងដែរ។

ហាងខាងលើនេះ ធ្លាប់ជាកន្លែងមួយដែលបានឧទ្ទេសនាមនំ cake ដែលមានរូបរាងដូចវីរុស Corona កាលពីរដូវស្លឹកឈើជ្រុះនាឆ្នាំ 2020។ បច្ចុប្បន្ន ហាងនេះមានលក់ «ថ្នាំព្យាបាលជំងឺឃ្លាន» ដ៏គួរឱ្យចាប់អារម្មណ៍ នោះគឺបង្អែមលាងមាត់ដែលមានរស់ជាតិស្ត្រូបូរី និងចេក និងមានរូបរាងជាវ៉ាក់សាំងគួរឱ្យចង់ទទួលទាន។

បង្អែមនេះមានឈ្មោះថា Vaccine Cake។ Olga Budnik ដែលជាអ្នកធ្វើនំនេះ និយាយថា៖ «នេះគឺជាបង្អែមលាងមាត់ធ្វើអំពីស្រទាប់នំពងទាទន់ស្ដើង និងស្នូលធ្វើអំពីស្ត្រូបូរី និងចេក»។

ចំណែកអតិថិជនម្នាក់មានឈ្មោះថា Tatiana Rysko និយាយថា៖ «ខ្ញុំបានទិញនំទាំងពីរប្រភេទ នោះគឺ វីរុស និងវ៉ាក់សាំង។ ខ្ញុំបានភ្លក់នំវីរុសហើយ ខ្ញុំចូលចិត្តវាណាស់។ ខ្ញុំក៏ចង់ភ្លក់នំវ៉ាក់សាំងវិញម្ដង ខ្ញុំកំពុងរង់ចាំ»៕

ប្រភព៖ RT, Yahoo
ប្រែសម្រួល៖ បុត្រា

March 7, 2021

ទិដ្ឋភាពបាតុកម្មនៅមីយ៉ានម៉ា ពេលមើលពីលើមេឃ

បណ្ដារូបថតពីផ្កាយរណបបង្ហាញថា បាតុកម្មប្រឆាំងកងទ័ពនៅប្រទេសភូមា (មីយ៉ានម៉ា) នៅតែមិនទាន់ចុះខ្សោយនៅឡើយ ក្រោយរដ្ឋប្រហារយោធាជាងមួយខែមកនេះ។

(រូបភាពខាងលើ)-បាតុករប្រមូលផ្ដុំគ្នាកាលពីថ្ងៃទី 4 មីនា នៅឧទ្យាន City Park នាទីក្រុង Mandalay ដើម្បីប្រឆាំងនឹងកងទ័ព និងដើម្បីប្រារព្ធពិធីរំលឹកវិញ្ញាណក្ខន្ធ Kyal Sin អាយុ 19 ឆ្នាំ ដែលត្រូវបានប៉ូលិសបាញ់សម្លាប់មុននោះមួយថ្ងៃ នៅពេលកំពុងចូលរួមធ្វើបាតុកម្មនៅ Mandalay។

អក្សរពីរបន្ទាត់ដែលសរសេរថា «ប្រឆាំងនឹងរដ្ឋប្រហារយោធា» និង «ដោះលែងមេដឹកនាំរបស់យើង» ត្រូវបានគេមើលឃើញយ៉ាងច្បាស់ពីផ្កាយរណបដែលបានថតដងផ្លូវក្នុងទីក្រុង Mandalay កាលពីថ្ងៃទី 4 មីនា។

រូបភាពពីផ្កាយរណបដែលហ្ស៊ូមឆ្ងាយជាងរូបខាងលើបន្តិច នៅតែអាចមើលឃើញអក្សរពីរបន្ទាត់យ៉ាងច្បាស់។

អក្សរមួយបន្ទាត់ពណ៌ស «សង្គ្រោះមីយ៉ានម៉ាផង» (ផ្នែកលើគេ និងនៅចំកណ្ដាល) ត្រូវបានសរសេរនៅលើឆ្នេរខ្សាច់តាមបណ្ដោយទន្លេ Irrawaddy នៅ Mandalay កាលពីថ្ងៃទី 4 មីនា។

«ដោះលែងក្រុមមេដឹកនាំរបស់យើងខ្ញុំ» គឺជាឃ្លាដែលត្រូវបានក្រុមបាតុករបាញ់ថ្នាំនៅលើដងផ្លូវក្នុងទីក្រុង Yangon កាលពីខែកុម្ភៈ។

រូបភាពពីផ្កាយរណបដែលបានមកពីក្រុមហ៊ុន Maxar Technologies បង្ហាញថា មានទាហានរាប់ពាន់នាក់ និងរថយន្តដឹកទាហានជិត 400 គ្រឿង ត្រូវបានដាក់ពង្រាយនៅក្បែរមូលដ្ឋានទ័ពនៅភាគខាងត្បូងនៃរដ្ឋធានីណៃពិដោ កាលពីថ្ងៃទី 4 មីនា។

កងទ័ពមីយ៉ានម៉ា នៅតែបន្តដាក់ពង្រាយទាហានទៅកាន់ទីក្រុងធំៗរបស់ប្រទេសនេះ ដើម្បីទប់ស្កាត់បាតុកម្មប្រឆាំងរដ្ឋប្រហារ។ ក្រុមបាតុករមីយ៉ានម៉ា ក៏នៅតែប្ដេជ្ញាចិត្ត ចេញធ្វើបាតុកម្មប្រឆាំងរដ្ឋាភិបាលយោធាដដែល បើទោះជាមានបាតុករជាច្រើនសិបនាក់ត្រូវបានប៉ូលិសបាញ់សម្លាប់។

ក្រុមបាតុករបាន និងកំពុងអំពាវនាវឱ្យកងទ័ពដោះលែងទីប្រឹក្សារដ្ឋ លោក Aung San Suu Kyi និងស្ដាររដ្ឋាភិបាលស៊ីវិលឡើងវីញ៕

ប្រភព៖ AFP/ Reuters/ AP
ប្រែសម្រួល៖ បុត្រា

March 6, 2021

កម្ពុជារកឃើញករណីវិជ្ជមាននឹងវីរុស Covid-19 ថ្មី ចំនួន 21នាក់ទៀត ភាគច្រើនជាជនជាតិចិន

ក្រសួងសុខាភិបាលកម្ពុជាបានឱ្យដឹងថា ករណីវិជ្ជមាននឹង Covid-19 ថ្មី ចំនួន 21នាក់ទៀត ពាក់ព័ន្ធនឹងព្រឹត្តិការណ៍សហគមន៍ 20កុម្ភៈ ត្រូវបានរកឃើញអំឡុង 24 ម៉ោងកន្លងទៅនេះ។

ក្នុងចំណោមអ្នកជំងឺថ្មី មាន 4 នាក់ជាជនជាតិខ្មែរ, 1 នាក់ជាជនជាតិម៉ាឡេស៊ី និង 3 នាក់ជាជនជាតិវៀតណាម ក្រៅពីនេះគឺសុទ្ធតែជាជនជាតិចិន។ ក្នុងរយៈពេល 24 ម៉ោងកន្លងទៅក៏មានអ្នកជាសះស្បើយចំនួន 2 នាក់ផងដែរ ដែលជាករណីនាំចូល។ ព័ត៌មានលម្អិតសូមបន្តអានរបាយការណ៍របស់ក្រសួងសុខាភិបាលដូចខាងក្រោម។

គិតមកដល់ព្រឹកថ្ងៃទី 6 មីនា ឆ្នាំ 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 953 នាក់ ក្នុងនោះមាន 491 នាក់បានជាសះស្បើយ និង 461 នាក់កំពុងព្យាបាលនៅមន្ទីរពេទ្យ៕

March 6, 2021

សេចក្ដីព្រាងច្បាប់ដែលអនុញ្ញាតឱ្យដាក់ពន្ធនាគារចំពោះជនល្មើសពាក់ព័ន្ធនឹង Covid-19 ត្រូវបានបញ្ជូនទៅកាន់ព្រឹទ្ធសភារួចហើយ

សេចក្ដីព្រាងច្បាប់ស្តីពី «វិធានការទប់ស្កាត់ការឆ្លងរាលដាលនៃជំងឺ Covid-19 និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត» ដែលមានចែងអំពីការពិន័យជាប្រាក់ និងដាក់ពន្ធនាគារចំពោះជនល្មើស ត្រូវបានបញ្ជូនទៅកាន់ព្រឹទ្ធសភាភ្លាមៗដើម្បីពិនិត្យ និងអនុម័ត បន្ទាប់ពីរដ្ឋសភាបានអនុម័តរួចរាល់ដោយពុំមានសំឡេងជំទាស់។

ឯកឧត្ដម ឡេង ប៉េងឡុង អគ្គលេខាធិការ និងជាអ្នកនាំពាក្យរបស់រដ្ឋសភា បានឱ្យដឹងកាលពីម្សិលមិញ (5 មីនា) ថា សេចក្តីព្រាងច្បាប់ខាងលើ ដែលរដ្ឋសភាទទួលបានពីទីស្តីការគណៈរដ្ឋមន្ត្រី រដ្ឋសភាបានសម្រេចអនុម័តទាំងស្រុង ដោយសំឡេងគាំទ្រ «83 លើ 83» នៃសមាជិកសភាដែលចូលរួមប្រជុំ កាលពីថ្ងៃទី 5 មីនា ឆ្នាំ 2021។

ខ្លឹមសារសំខាន់ៗនៃសេចក្ដីព្រាងច្បាប់នេះ រួមមាន មាត្រា7, 8, 9 និងមាត្រា13 ដោយបានចែងថា បើបុគ្គលដែលគេចវេះពីការធ្វើចត្តាឡីស័ក ឬគេចចេញពីកន្លែងធ្វើចត្តាឡីស័ក ត្រូវផ្តន្ទាទោសដាក់ពន្ធនាគារចាប់ពី 6 ខែ ទៅ 3 ឆ្នាំ និងពិន័យជាប្រាក់ចាប់ពី 2 លានរៀលទៅ 10 លានរៀល។ បើគេចវេះពីកន្លែងព្យាបាល ត្រូវផ្តន្ទាទោសដាក់ពន្ធនាគារចប់ពី 1 ឆ្នាំទៅ 5 ឆ្នាំ និងពិន័យជាប្រាក់ពី 5 លានទៅ 20 លានរៀល។ បើគេចវេះពីកន្លែងព្យាបាល ហើយទៅចម្លងដល់អ្នកដទៃ ត្រូវផ្តន្ទាទោសដាក់ពន្ធនាគារចាប់ពី 5 ឆ្នាំទៅ 10 ឆ្នាំ ប៉ុន្តែបើរៀបចំចម្លងតាមរយៈជាក្រុម ឬអង្គការចាត់តាំង ត្រូវផ្តន្ទាទោសដាក់ពន្ធនាគារចាប់ពី 10 ឆ្នាំទៅ 20 ឆ្នាំ។

ក្រោយពីរដ្ឋសភាបានអនុម័តកាលពីថ្ងៃទី 5 មីនា សេចក្តីព្រាងច្បាប់នេះក៏បានបញ្ជូនទៅព្រឹទ្ធសភារួចហើយ ដើម្បីពិនិត្យ និងអនុម័តបន្ត។ បើសិនជាមិនមានការជំទាស់ពីព្រឹទ្ធសភា នោះព្រឹទ្ធសភានឹងបញ្ជូនទៅកាន់ព្រះមហាក្សត្រពិនិត្យ និងឡាយព្រះហស្តលេខាដាក់ឱ្យប្រើប្រាស់ជាផ្លូវការនាពេលឆាប់ៗខាងមុខ នេះបើតាមឯកឧត្ដម ឡេង ប៉េងឡុង៕

March 6, 2021

កូរ៉េខាងត្បូង៖ មនុស្ស 3នាក់ទៀតបានស្លាប់ បន្ទាប់ពីបានចាក់វ៉ាក់សាំងបង្ការ Covid-19

កាលពីថ្ងៃទី 4 ខែមីនា ប្រទេសកូរ៉េខាងត្បូងបានរាយការណ៍ថា មានមនុស្សចំនួន 3 នាក់ទៀតបានស្លាប់ ក្រោយពីបានចាក់វ៉ាក់សាំងរបស់ក្រុមហ៊ុន AstraZeneca នាំឱ្យអ្នកស្លាប់ក្នុងករណីនេះឡើងដល់ 5 នាក់។

ចំនួនអ្នកស្លាប់បន្ទាប់ពីបានចាក់វ៉ាក់សាំងនៅកូរ៉េខាងត្បូង បានកើនដល់ 5 នាក់ហើយ នេះបើតាមមន្ត្រីសុខាភិបាលម្នាក់នៅខេត្ត Jeolla ខាងជើង។ មនុស្សដំបូងគេក្នុងចំណោមអ្នកស្លាប់នេះ មានអាយុ 52 ឆ្នាំ ជាអ្នកជំងឺដែលបានព្យាបាលរយៈពេលវែងនៅមន្ទីរពេទ្យ Jeonju ចម្ងាយពីទីក្រុងសេអ៊ូល 243 គីឡូម៉ែត្រទៅទិសខាងត្បូង។ បុរសដែលធ្លាប់មានជំងឺបេះដូង សរសៃឈាមខួរក្បាល និងធ្លាប់ដាច់សរសៃឈាមខួរក្បាលនេះ បានស្លាប់កាលពីព្រឹកថ្ងៃទី 4មីនា ក្រោយការចាក់វ៉ាក់សាំងបានពីរថ្ងៃ។

មនុស្សទីពីរមានអាយុ 58 ឆ្នាំ បានស្លាប់ក្នុងថ្ងៃទី 4មីនា ក្រោយពីចាក់វ៉ាក់សាំងមិនទាន់បានមួយថ្ងៃផង។ អ្នកទីពីរនេះធ្លាប់មានបញ្ហាគាំងបេះដូង និងជំងឺទឹកនោមផ្អែម។ ចំណែកអ្នកទីបីគឺនារីវ័យ 20 ឆ្នាំ បានស្លាប់នៅក្នុងទីក្រុង Daejeon បន្ទាប់ពីបានចាក់វ៉ាក់សាំងកាលពីថ្ងៃទី 2 ខែមីនា។

«ពួកគេពុំមានប្រតិកម្មអវិជ្ជមាននឹងវ៉ាក់សាំងនោះទេ» នេះបើតាមមន្ត្រីសុខាភិបាលម្នាក់នៅខេត្ត Jeolla ខាងជើង។ ប៉ុន្តែបានបញ្ជាក់ថា នឹងបន្តសហការជាមួយក្រុមអ្នកជំនាញអំពីរោគឆ្លងដើម្បីស្វែងយល់អំពីទំនាក់ទំនងរវាងករណីស្លាប់ជាមួយនឹងវ៉ាក់សាំងនេះ។

មុននោះ កូរ៉េខាងត្បូងក៏មានអ្នកស្លាប់ពីរនាក់ ក្រោយពីបានចាក់វ៉ាក់សាំងរបស់ AstraZeneca ក្នុងនោះមានបុរសអាយុ 62 ឆ្នាំម្នាក់ដែលមានជំងឺសរសៃឈាមខួរក្បាល និងស្លាប់នៅថ្ងៃទី 2 មីនា។ ចំណែកម្នាក់ទៀតមានអាយុ 50 ឆ្នាំ ធ្លាប់មានជំងឺបេះដូង និងទឹកនោមផ្អែម និងបានស្លាប់នៅថ្ងៃទី 3 មីនា។

កូរ៉េខាងត្បូង កាលពីសប្ដាហ៍មុន បានចាប់ផ្ដើមយុទ្ធនាការចាក់វ៉ាក់សាំងបង្ការ Covid-19។ គិតមកដល់ថ្ងៃទីបីនៃយុទ្ធនាការ មានមនុស្សជាង 85,000 នាក់ បានចាក់វ៉ាក់សាំង AstraZeneca និងជាង 1,500 នាក់ បានចាក់វ៉ាក់សាំង Pfizer៕

ប្រភព៖ Yonhap
ប្រែសម្រួល៖ បុត្រា

March 5, 2021

ធនាគារមួយនៅវៀតណាម អនុញ្ញាតឱ្យអតិថិជនយកលេខទូរស័ព្ទធ្វើជាលេខគណនី

លេខគណនីធនាគារដែលដូចទៅនឹងលេខទូរស័ព្ទដៃ ត្រូវបានគេយល់ថា មានភាពងាយស្រួលក្នុងការចងចាំ និងមិនបង្កការលំបាកក្នុងការវេរលុយម្ដង។

យោងតាមប្រភពព័ត៌មានពីធនាគាររបស់កងទ័ពវៀតណាម MB Bank (Vietnam’s Military Commercial Joint-Stock Bank) នៅប្រទេសវៀតណាម ក្នុងខែមីនានេះ ធនាគារនឹងអនុញ្ញាតឱ្យអតិថិជនជ្រើសរើសលេខគណនីដូចទៅនឹងលេខទូរស័ព្ទដៃរបស់ពួកគេ។

ដូច្នេះ អតិថិជននឹងមិនចាំបាច់ចងចាំលេខគណនីដ៏វែង (13លេខ) ដូចមុនទៀតហើយ ដោយគ្រាន់តែយកលេខទូរស័ព្ទផ្ទាល់ខ្លួនធ្វើជាលេខគណនី។ អតិថិជនក៏មិនចាំបាច់ទៅកាន់ធនាគារនេះដោយផ្ទាល់ ព្រោះអាចប្រើប្រាស់កម្មវិធី (App) របស់ធនាគារនេះនៅលើទូរស័ព្ទដៃ។

កន្លងមក ធនាគាររបស់កងទ័ពវៀតណាមមួយនេះក៏ធ្លាប់បានអនុវត្តកម្មវិធីជាច្រើនទាក់ទងនឹងលេខគណនីល្អៗផងដែរដើម្បីទាក់ទាញអតិថិចន។

យោងតាមរបាយការណ៍ហិរញ្ញវត្ថុរបស់ MB ប្រាក់បញ្ញើរបស់អតិថិជននៅធនាគារនេះកាលពីថ្ងៃទី 31 ខែធ្នូ 2020 មានចំនួន 310,960 ពាន់លានដុង (13,392,021,032 ដុល្លារអាមេរិក) កើន 14% ធៀបនឹងដើមឆ្នាំ។ MB Bank ចំណេញបាន 310,960 ពាន់លានដុង (460,296,889 ដុល្លារអាមេរិក) កើន 6.5% ធៀបនឹងឆ្នាំ 2019៕

ប្រភព៖ CB

March 5, 2021

Author: សឿន សំណាង