របាយការណ៍របស់ក្រសួងសុខភិបាល បង្ហាញថា អ្នកវិជ្ជមាននឹង Covid-19 ថ្មី ចំនួន 64 នាក់ ត្រូវបានរកឃើញកាលពីម្សិលមិញ (9មីនា 2021) នាំឱ្យតួលេខអ្នកឆ្លងវីរុសសរុបនៅកម្ពុជា ឡើងដល់ 1,124 នាក់។
ព័ត៌មានលម្អិត សូមអានរបាយការណ៍របស់ក្រសួងសុខាភិបាលដែលមានដូចខាងក្រោម៖
យោងតាមក្រសួងការពារជាតិទុយនេស៊ី (Tunisia) កាលពីថ្ងៃទី 9 មីនាកន្លងទៅ មានជនចំណាកស្រុកយ៉ាងហោច 39 នាក់បានបាត់បង់ជីវិតនៅក្នុងករណីលិចកប៉ាល់នៅលើលម្ហសមុទ្ររបស់ប្រទេសទុយនេស៊ី ក្នុងពេលកំពុងព្យាយាមឆ្លងកាត់សមុទ្រមេឌីទែរ៉ាណេ ដើម្បីទៅកាន់កោះ Lampedusa របស់អ៊ីតាលី។
អ្នកនាំពាក្យរបស់ក្រសួងការពារជាតិទុយនេស៊ី បានឱ្យដឹងថា ឆ្មាំការពារឆ្នេរសមុទ្រប្រទេសនេះ សង្គ្រោះជីវិតមនុស្សបាន 165 នាក់ដែលធ្វើដំណើរតាមកប៉ាល់ខាងលើ ហើយបច្ចុប្បន្នកំពុងស្វែងរកជនរងគ្រោះផ្សេងទៀតនៅលម្ហសមុទ្រនៃទីក្រុង Sfax។ ពលរដ្ឋចំណាកស្រុកដែលបានស្លាប់ខាងលើ សុទ្ធតែជាអ្នកមកពីភាគខាងត្បូងនៃសមុទ្រខ្សាច់ Sahara នៅអាហ្វ្រិក។
តំបន់ឆ្នេរសមុទ្រក្បែរកំពង់ផែនៃទីក្រុង Sfax របស់ទុយនេស៊ី កន្លងមកនេះគឺជាកន្លែងចេញដំណើររបស់ក្រុមអ្នកចំណាកស្រុកដែលភៀសខ្លួនពីសង្គ្រាម និងគ្រោះទុរភិក្សនៅតំបន់អាហ្វ្រិក និងមជ្ឈិមបូព៌ា ដើម្បីស្វែងរកជីវភាពល្អប្រសើរនៅអឺរ៉ុប។
ក្នុងឆ្នាំ 2019 ជនភៀសខ្លួនប្រមាណ 90 នាក់មកពីអាហ្វ្រិក បានបាត់បង់ជីវិតនៅពេលកប៉ាល់របស់ពួកគេបានក្រឡាប់នៅលើសមុទ្រទុយនេស៊ី ក្រោយពីបានចេញដំណើរពីប្រទេសលីប៊ី ដើម្បីទៅកាន់អឺរ៉ុប។ តួលេខជនភៀសខ្លួនពីទុយនេស៊ី ទៅកាន់ឆ្នេរសមុទ្ររបស់អ៊ីតាលី បានកើនឡើងដល់ជាង 13,000 នាក់ ក្នុងឆ្នាំ 2020៕
ប្រភព៖ Guardian
ប្រែសម្រួល៖ បុត្រា
ថ្ងៃទី 9 មីនា បណ្ដាប្រទេស ASEAN បានរកឃើញអ្នកឆ្លង Covid-19 ថ្មី ជាង 10,000 នាក់ នាំឱ្យតួលេខអ្នកឆ្លងសរុបឡើងដល់ 2.54 លាននាក់។
យោងតាមស្ថិតិរបស់គេហទំព័រ worldometers.info ក្នុងអំឡុង 24 ម៉ោងនៃថ្ងៃទី 9 មីនា បណ្ដាប្រទេសក្នុងសមាគមប្រជាជាតិអាស៊ីអាគ្នេយ៍ រកឃើញអ្នកវិជ្ជមានចំនួន 10,474 នាក់ និងអ្នកស្លាប់ចំនួន 266 នាក់។ ដូច្នេះ បច្ចុប្បន្ន តំបន់នេះមានអ្នកឆ្លងវីរុស Covid-19 សរុប 2,542,205 នាក់ ក្នុងនោះមាន 54,823 នាក់បានស្លាប់ និង 2,273,580 នាក់ បានជាសះស្បើយ។
ក្នុងថ្ងៃទី 9 មីនា តំបន់អាស៊ីអាគ្នេយ៍ មានប្រទេសចំនួន 3 ដែលមានអ្នកស្លាប់ដោយសារ Covid-19 រួមមាន ឥណ្ឌូនេស៊ី (210 នាក់), ហ្វីលីពីន (7 នាក់) និងម៉ាឡេស៊ី (9 នាក់)។
ឥណ្ឌូនេស៊ី បន្តជាសម្បុកវីរុស Covid-19 គ្រោះថ្នាក់ជាងគេក្នុងតំបន់អាស៊ីនអាគ្នេយ៍ ដោយមានករណីឆ្លងថ្មីចំនួន 6,389 នាក់ នាំឱ្យតួលេខសរុបឡើងដល់ 1,392,945 នាក់ ក្នុងនោះមានអ្នកស្លាប់ចំនួន 37,757 នាក់។
ស្ថានភាព Covid-19 នៅម៉ាឡេស៊ីក៏គួរឱ្យព្រួយបារម្ភ ដោយមានករណីឆ្លងថ្មីចំនួន 1,280 នាក់ កាលពីថ្ងៃទី 9 មីនា នាំឱ្យតួលេខសរុបឡើងដល់ 316,286 នាក់ ក្នុងនោះមានអ្នកស្លាប់សរុប 1,186 នាក់។ ចំណែកហ្វីលីពីនមានអ្នកស្លាប់សរុប 12,528 នាក់ ក្នុងចំណោមអ្នកឆ្លងសរុបចំនួន 600,428 នាក់។
នៅទូទាំងពិភពលោក អ្នកវិជ្ជមាននឹង Covid-19 សរុបបានកើនឡើងដល់ 118,143,312 នាក់ ក្នុងនោះមានអ្នកស្លាប់សរុបចំនួន 2,621,012 នាក់ និងជាសះស្បើយចំនួន 93,827,318 នាក់ ខណៈអ្នកកំពុងព្យាបាលមានចំនួន 21,694,982 នាក់៕
ប្រភព៖ Worldometers
ប្រែសម្រួល៖ បុត្រា
ក្រុមប៉ូលិសប្រទេសភូមា (មីយ៉ានម៉ា) បានដកខ្លួនចេញពីតំបន់ដែលពួកគេបានឡោមព័ទ្ធចាប់បាតុករនៅកណ្ដាលទីក្រុង Yangon ជាកន្លែងដែលបាតុកររាប់រយនាក់បានជាប់គាំងនៅពេលយប់ បន្ទាប់ពីការបង្រាម និងចាប់ខ្លួនពីសំណាក់រដ្ឋអំណាច។
ក្រុមសកម្មជនប្រជាធិបតេយ្យ ថ្ងៃនេះបានឱ្យដឹងថា បាតុករអាចចាកចេញពីតំបន់ប្រជុំជននៅក្នុងសង្កាត់ San Chaung នាទីក្រុង Yangon ក្រោយពីត្រូវបានប៉ូលិសឡោមព័ទ្ធ និងតាមចាប់ខ្លួនពេញមួយយប់។ បាតុករម្នាក់ឈ្មោះ Shar Ya Mone បាននិយាយថា នាងបានជាប់នៅក្នុងអគារមួយដែលមានមនុស្ស ប្រហែលពី 15-20 នាក់ ប៉ុន្តែពេលនេះអាចត្រលប់ទៅផ្ទះបានហើយ។
កងកម្លាំងសន្តិសុខមីយ៉ានម៉ា តាំងពីព្រលប់ថ្ងៃទី 8 មីនា បានឡោមព័ទ្ធតំបន់ប្រជុំជនខាងលើដើម្បីតាមចាប់ខ្លួនបាតុករដែលស្នើឱ្យដោះលែងលោកស្រី Aung San Suu Kyi។ ពេលយប់ចូលមកដល់ ក្រុមប៉ូលិសចាប់ផ្ដើមសម្រុកចូលគាស់ទ្វារផ្ទះពលរដ្ឋដើម្បីឆែកឆេររកបាតុករដែលពួកគេសង្ស័យថាកំពុងលាក់ខ្លួន។
សារព័ត៌មានក្នុងស្រុកបានឱ្យដឹងថា យ៉ាងហោចមានមនុស្សចំនួន 50 នាក់ ត្រូវបានចាប់ខ្លួនដោយមិនមានដីកាតុលាការ នៅក្នុងយប់ថ្ងៃទី 8 មីនា និងរំលងអធ្រាត្រចូលថ្ងៃទី 9 មីនា។
មីយ៉ានម៉ា បានធ្លាក់ចូលក្នុងភាពវឹកវរក្រោយពីកងទ័ពប្រទេសនេះបានធ្វើរដ្ឋប្រហារ និងចាប់ខ្លួនទីប្រឹក្សារដ្ឋ Aung San Suu Kyi រួមនឹងក្រុមមន្ត្រីជាន់ខ្ពស់ជាច្រើនរូបកាលពីថ្ងៃទី 1 កុម្ភៈ ឆ្នាំ 2021។ បាតុកម្មដែលបានកើតឡើងរយៈពេលជាង 1 ខែមកនេះគឺដើម្បីស្នើឱ្យដោះលែងមនុស្សដែលត្រូវបានចាប់ខ្លួន និងស្នើឱ្យមានការគោរពលទ្ធផលនៃការបោះឆ្នោតកាលពីខែវិច្ឆិកា 2020 ដែលកងទ័ពចោទថាមានការលួចបន្លំសន្លឹកឆ្នោត៕
ប្រភព៖ Al Jazeera
ប្រែសម្រួល៖ បុត្រា
អ្នករចនាផលិតផលម្នាក់ឈ្មោះ Daan Roosegaarde បានបង្កើតឧបករណ៍កម្ចាត់មេរោគដោយប្រើប្រាស់កាំរស្មី UV ដែលអាចសម្លាប់វីរុសនៅទីសាធារណៈបានយ៉ាងល្អ។
នៅប្រទេសហូឡង់ ឧបករណ៍ដែលមានឈ្មោះថា Urban Sun នេះ អាចជួយកម្ចាត់វីរុស Covid-19 បាន។ វាកម្ចាត់វីរុស ឬបាក់តេរីនៅទីសាធារណៈ ដោយប្រើប្រាស់កាំរស្មី UV ប្រកបដោយសុវវត្ថិភាពសម្រាប់មនុស្ស ដែលនេះក៏ជួយឱ្យមនុស្សម្នាងាយស្រួលក្នុងការជួបជុំនៅទីសាធារណៈ។
កាំរស្មី UV ត្រូវបានគេស្គាល់ថាជាពន្លឺដែលបង្កការខូចខាតដល់ស្បែកមនុស្ស ប៉ុន្តែក្រុមអ្នកវិទ្យាសាស្ត្របានរកឃើញថា មួយផ្នែកនៃពន្លឺរបស់វាអាចសម្លាប់វីរុសបានរហូតដល់ 99.9% ដោយមិនបង្កផលប៉ះពាល់ដល់មនុស្ស និងសត្វ។
រង្វង់មូលពណ៌លឿងនៅក្នុងវីដេអូនេះគឺជាទីតាំងដែលអាចសម្លាប់វីរុស និងមេរោគផ្សេង។ Urban Sun គឺជាផលិតផលរបស់អ្នករចនា Daan Roosegaarde ជាជនជាតិហូឡង់ សហការជាមួយក្រុមអ្នកវិទ្យាសាស្ត្រមកពីហូឡង់ អាមេរិក ជប៉ុន និងអ៊ីតាលី។
ឧបករណ៍នេះ កំពុងត្រូវបានដាក់ឱ្យដំណើរការសាកល្បង ដោយមានជំនួយពីគណៈកម្មការសុខាភិបាលសាធារណៈ និងពលរដ្ឋហូឡង់។
Roosegaarde សង្ឃឹមថា របកគំហើញរបស់គាត់អាចជួយឱ្យការធ្វើចត្តាឡីស័ក និងការរក្សាគម្លាតសង្គមប្រព្រឹត្តិទៅដោយងាយស្រួលជាងមុន ដោយសារវាជួយឱ្យគ្រប់គ្នាអាចជួបជុំដោយសុវត្ថិភាពខ្ពស់៕
ប្រភព៖ WEF
ប្រែសម្រួល៖ បុត្រា
រដ្ឋាភិបាលសហរដ្ឋអាមេរិកកំពុងតែលើកគម្រោងលក់ដេញថ្លៃរថយន្ត sedan របស់ក្រុមហ៊ុន Ford និង Chevy រួមនឹងកុងតឺន័រដឹកទំនិញជាង 45,000 លីត្រ និងម៉ាស៊ីនអូសនៃក្រុមហ៊ុន Caterpillar ដែលបានខូច ប៉ុន្តែ ក្នុងចំណោមនោះក៏មានទំនិញមួយមុខដ៏ចម្លែក នោះគឺរូបិយវត្ថុអេឡិចត្រូនិកចំនួន 0,7501 Bitcoin។
នាយកដ្ឋានសេវាកម្មទូទៅសហរដ្ឋអាមេរិក (GSA) តែងតែអនុម័តលើការលក់ដេញថ្លៃដែលពួកគេជាអ្នកធ្វើដើម្បីលក់សម្ភារសេសសល់នៅតាមបណ្ដារដ្ឋ ទៅឱ្យប្រជាជន។ តាមរយៈនេះ ជាមួយនឹងលេខកូដ 4KQSCI21105001 ដែលនឹងត្រូវបានលក់ដេញថ្លៃក្នុងរង្វង់មួយសប្ដាហ៍ទៀត រដ្ឋាភិបាលអាមេរិកនឹងលក់ Bitcoin ដែលមានតម្លៃប្រហែល 38,000 ដុល្លារអាមេរិក បើយោងតាមតម្លៃរបស់ Bitcoin ដែលបានជួញដូរកាលពីថ្ងៃទី 8 មីនា 2021។
ក្រុមមន្ត្រីរដ្ឋាភិបាលមិនបានឱ្យដឹងអំពីប្រភពរបស់ Bitcoin ខាងលើនេះទេ។ បើទោះជាមានភាពខុសគ្នាឆ្ងាយទៅនឹង 30,000 Bitcoin ដែលនាយកដ្ឋានពន្ធដាអាមេរិក (U.S Marshal Service) បានលក់ដេញថ្លៃកាលពីឆ្នាំ 2014 ក្រោយពីរឹបអូសរូបិយវត្ថុអេឡិចត្រូនិកនេះពី «ផ្សារងងឹត» មួយដែលមានឈ្មោះថា Silk Road ប៉ុន្តែ ការលក់ដេញថ្លៃលើកនេះរបស់ GSA បានបង្ហាញថា ការនិយមជួញដូរ Bitoin កាន់តែទូលំទូលាយជាងមុន។
ក្រុមហ៊ុនធំៗរបស់ពិភពលោក កំពុងតែទទួលយកវត្តមានរបស់ Bitcoin។ Bank of New York Mellon Corp. បានឱ្យដឹងថា ពួកគេនឹងកាន់កាប់ ផ្ទេរ និងប្រើប្រាស់រូបិយវត្ថុអេឡិចត្រូនិកនេះនាពេលដ៏ខ្លីខាងមុខ ក្នុងគ្រាដែល Mastercard ក៏បានប្រកាសអំពីគម្រោងអនុញ្ញាតឱ្យម្ចាស់ប័ណ្ណ ទូទាត់ដោយប្រាក់អេឡិចត្រូនិកមួយចំនួនផងដែរនៅក្នុងប្រព័ន្ធរបស់ពួកគេ។
ក្រុមហ៊ុនហិរញ្ញវត្ថុ Morgan Stanley និង Goldman Sachs ក៏មានបំណងលោតចូលរកស៊ីទាក់ទងនឹងប្រាក់អេឡិចត្រូនិកខាងលើនេះផងដែរ។
រូបិយវត្ថុ Bitcoin ដែលអាមេរិកបានលក់ដេញថ្លៃកាលពីឆ្នាំ 2014 ត្រូវបានគេប៉ាន់ប្រមាណឃើញថា មានតម្លៃប្រហែល 19 លានដុល្លារអាមេរិក។ អ្នកវិនិយោគ Tim Draper គឺជាអ្នកឈ្នះក្នុងការដេញថ្លៃ ប៉ុន្តែ តម្លៃចុងក្រោយមិនត្រូវបានគេបង្ហើបឱ្យដឹងនោះឡើយ។ ចំនួន Bitcoin នេះនឹងមានតម្លៃ 1.5 ពាន់លានដុល្លារអាមេរិក បើគិតមកដល់ថ្ងៃទី 8 មីនា ឆ្នាំ 2021។
ព្រឹត្តិការណ៍លក់ដេញថ្លៃរបស់ GSA ចំពោះរូបិយវត្ថុអេឡិចត្រូនិកចំនួន 0.7501 Bitcoin ខាងលើ នឹងត្រូវបានធ្វើឡើង ចាប់ពីថ្ងៃទី 15 ដល់ថ្ងៃទី 17 ខែមីនា ឆ្នាំ 2021៕
ប្រភព៖ Yahoo
ប្រែសម្រួល៖ បុត្រា
ក្រសួងសុខាភិបាលនាវេលាថ្ងៃត្រង់ ទី 9 មីនានេះ ទើបតែបានចេញរបាយការណ៍ប្រចាំថ្ងៃរបស់ខ្លួន បង្ហាញថា ករណីឆ្លងវីរុស Covid-19 ថ្មីនៅកម្ពុជាដែលត្រូវបានរកឃើញក្នុងអំឡុងថ្ងៃទី 8 មីនា មានចំនួន 49 នាក់ និងជាសះស្បើយចំនួន 12 នាក់។
អ្នកឆ្លង Covid-19 ថ្មី ខាងលើរួមមាន ករណីឆ្លងសហគមន៍ ចំនួន 48 នាក់ និងករណីនាំចូលចំនួន 1 នាក់។ ទន្ទឹមនឹងរបាយការណ៍របស់ក្រសួងសុខាភិបាល នាព្រឹកនេះក៏មានព័ត៌មានទាក់ទិននឹងករណីឆ្លងថ្មីក្នុងវិស័យសិល្បផងដែរ។ ក្រុម «ឯកសារមន្ត្រីសាធារណៈ» នៅលើបណ្ដាញទំនាក់ទំនង Telegram បានឱ្យដឹងថា តារាចម្រៀងល្បីឈ្មោះ លោក ណុប បាយ៉ារិទ្ធ ក៏ត្រូវបានរាយការណ៍ថា វិជ្ជមាននឹង Covid-19 បន្ទាប់ពីករណីឆ្លងលើគ្រួសាររបស់អ្នកនាង កែវ ច័ន្ទនិមល ដែលជាពិធីការិនីនៃស្ថានីយទូរទស្សន៍ហង្សមាស។
ព័ត៌មានខាងលើនេះ ទំនងជាកំពុងធ្វើឱ្យសិល្បករ សិល្បការិនី និងក្រុមអ្នកមានអាជីពក្នុងវិស័យសិល្បនៅកម្ពុជា មានការព្រួយបារម្ភខ្លាំងអំពីសុវត្ថិភាពនៃសុខភាពរបស់ពួកគេ។
គិតត្រឹមព្រឹក ថ្ងៃទី 9 ខែមីនា ឆ្នាំ 2021 កម្ពុជាបានរកឃើញអ្នកឆ្លង Covid-19 សរុបចំនួន 1,060 នាក់ ក្នុងនោះមានអ្នកជាសះស្បើយចំនួន 538 នាក់ (ឆ្លងថ្មី 21នាក់) និងអ្នកជំងឺកំពុងព្យាបាលមានចំនួន 521 នាក់៕
ប្រភព៖ ក្រសួងសុខាភិបាល
ដកស្រង់ដោយ៖ បុត្រា
នាព្រឹកថ្ងៃទី 9 ខែមីនា ឆ្នាំ 2021 នេះ អាជ្ញាធរខេត្តកណ្ដាលសម្រេចបិទបណ្ដោះអាសន្នចំពោះការធ្វើដំណើរចេញ-ចូល នៅតំបន់ទីប្រជុំជនជ្រៃធំ ស្រុកកោះធំ ខេត្តកណ្ដាល ដើម្បីបង្ការការឆ្លងរាលដាលនៃវីរុស Covid-19 បន្ទាប់ពីមានជនបរទេសចំនួន 5 នាក់ វិជ្ជមាននឹងវីរុសនេះ។
ឯកសារមន្ត្រីសាធារណៈដែលត្រូវបានបញ្ចេញឱ្យដឹងតាមរយៈបណ្ដាញទំនាក់ទំនង Telegram នាព្រឹកនេះ ក៏បានបង្ហាញថា រដ្ឋបាលខេត្តកណ្ដាលបានសម្រេចបិទកាស៊ីណូ និងសណ្ឋាគារមួយចំនួនផងដែរ។ ព័ត៌មានលម្អិត សូមអានសេចក្ដីជូនដំណឹងដូចមាននៅខាងក្រោម។
MacKenzie Scott ដែលជាអតីតភរិយារបស់មហាសេដ្ឋី Jeff Bezos និងជាមហាសេដ្ឋិនីម្នាក់ដែលមានទ្រព្យច្រើនជាងគេក្នុងពិភពលោក បានរៀបអាពាហ៍ពិពាហ៍ជាមួយ Dan Jewett ដែលជាគ្រូបង្រៀនមុខវិជ្ជាវិទ្យាសាស្ត្រ។
លោក Jewett កំពុងបង្រៀននៅសាលាឯកជន Lakeside School នៅក្នុងទីក្រុង Seattle។ ថ្មីៗនេះ បុរសរូបនេះបាននិយាយដល់អាពាហ៍ពិពាហ៍របស់ខ្លួននៅគេហទំព័រ Giving Pledge ដែលជាអង្គការមួយត្រូវបានបង្កើតឡើងដោយមូលនិធិ Bill & Melinda Gates និងលោក Warren Buffett ដើម្បីជំរុញឱ្យក្រុមមហាសេដ្ឋី ចូលរួមធ្វើកិច្ចការមនុស្សធម៌។
នៅលើទំព័រ Giving Pledge កាលពីថ្ងៃទី 6 មីនា លោក Jewett បានសរសេរថា៖ «នៅក្នុងសុភមង្គលដ៏ចៃដន្យមួយ ខ្ញុំបានរៀបការជាមួយស្ត្រីម្នាក់ក្នុងចំណោមអ្នកដែលមានចិត្តទូលាយ និងចិត្តល្អបំផុតដែលខ្ញុំធ្លាប់បានជួប។ ខ្ញុំ និងនាង សន្យាថានឹងបរិច្ចាគទ្រព្យយ៉ាងច្រើនដើម្បីជួយដល់អ្នកដទៃ»។
យោងតាម Washington Post មហាសេដ្ឋិនី Scott ទំនងជាបានជួបលោក Jewett នៅសាលា Lakeside School ព្រោះកូនៗរបស់អ្នកស្រីកំពុងរៀននៅទីនោះ។ មហាសេដ្ឋី Bill Gates ក៏ធ្លាប់បានរៀននៅសាលារៀននេះដែរ។
ឆ្នាំនេះ អ្នកស្រី Scott មានអាយុ 50 ឆ្នាំ។ អ្នកស្រីគឺជាអ្នកមានជាងគេលំដាប់ទី 22 ក្នុងពិភពលោក ដោយមានទ្រព្យសរុប 53.5 ពាន់លានដុល្លារអាមេរិក នេះបើតាមសារព័ត៌មាន Bloomberg។ ក្រោយពីបានលែងលះគ្នាជាមួយនឹងមហាសេដ្ឋី Jeff Bezos កាលពីឆ្នាំ 2019 អ្នកស្រី Scott ក៏បានក្លាយជាសប្បុរសជនមួយរូបដែលមានឥទ្ធិពលជាងគេនៅក្នុងជំនាន់របស់ខ្លួន។
កាលពីឆ្នាំទៅ អ្នកស្រី Scott បានបរិច្ចាគប្រាក់ 6 ពាន់លានដុល្លារអាមេរិក។ គោលដៅមនុស្សធម៌របស់អ្នកស្រី ភាគច្រើនផ្ដោតលើអង្គការមនុស្សធម៌តូច។ អ្នកស្រីក៏ធ្លាប់បានអំពាវនាវឱ្យក្រុមរបស់អ្នកស្រី រិះរកវិធីដើម្បីធ្វើកិច្ចការមនុស្សធម៌ឱ្យបានលឿនផងដែរ។
«Dan គឺជាបុរសម្នាក់ដ៏អស្ចារ្យ ហើយខ្ញុំចូលរួមអបអរសាទរចំពោះពួកគេ» Bezos បាននិយាយដូច្នេះនៅក្នុងប្រកាសមួយដែលត្រូវបានលើកឡើងដោយអ្នកនាំពាក្យរបស់ Amazon កាលពីពេលថ្មីៗនេះ។ មហាសេដ្ឋី Bezos បច្ចុប្បន្នជាអ្នកមានជាងគេបង្អស់ក្នុងពិភពលោក ដោយមានទ្រព្យសរុប ជាង 176.6 ពាន់លានដុល្លារអាមេរិក៕
ប្រភព៖ Bloomberg
ប្រែសម្រួល៖ បុត្រា
ពិភពលោកទាំងមូលបានរកឃើញករណីឆ្លង Covid-19 សរុបចំនួន 117,737,690 នាក់ ក្នុងនោះមានអ្នកស្លាប់សរុប 2,611,556 នាក់ និងជាសះស្បើយ 93,400,984 នាក់ ខណៈអ្នកជំងឺកំពុងទទួលការព្យាបាល មានចំនួន 21,725,150 នាក់។
សហរដ្ឋអាមេរិកដែលជាសម្បុកវីរុសធំជាងគេ បានរកឃើញមនុស្សចំនួន 29,743,289 នាក់ បានឆ្លងវីរុស Covid-19 ក្នុងនោះមាន 538,603 នាក់ បានបាត់បង់ជីវិត។ នាយកដ្ឋានគ្រប់គ្រង និងបង្ការជំងឺឆ្លងរបស់អាមេរិក (CDC) បានចាប់ផ្ដើមបន្ធូរបន្ថយការរឹតត្បិតលើការដើរហើររបស់ពលរដ្ឋដែលបានចាក់វ៉ាក់សាំងរួចរាល់ ដោយអនុញ្ញាតឱ្យមានការជួបជុំគ្នានៅក្នុងផ្ទះដោយមិនបាច់ពាក់ម៉ាស។
ប៉ុន្តែ ពលរដអាមេរិក នៅតែត្រូវបានស្នើឱ្យពាក់ម៉ាសនៅទីសាធារណៈ និងចៀសវាងការធ្វើដំណើរបើសិនមិនចាំបាច់។ ក្រុមមនុស្សដែលបានចាក់វ៉ាក់សាំងក៏នៅតែត្រូវពាក់ម៉ាសនៅពេលជួបមនុស្សដែលមិនទាន់បានចាក់វ៉ាក់សាំង និងចៀសវាការជួបជុំគ្នាដែលមានមនុស្សច្រើន។
បច្ចុប្បន្ន ពលរដ្ឋអាមេរិកជាង 90% មិនទាន់បានចាក់វ៉ាក់សាំងគ្រប់គ្រាន់នៅឡើយ នេះបើតាមប្រធានាធិបតី Joe Biden។ លោក Biden ក៏បានអំពាវនាវឱ្យពលរដ្ឋបន្តអនុវត្តតាមការណែនាំរបស់ CDC ដើម្បីទប់ស្កាត់ការឆ្លងរាលដាលបន្ទាប់៕
ប្រភព៖ Reuters
ប្រែសម្រួល៖ បុត្រា