សឿន សំណាង - La Reine Media

តួលេខអ្នកឆ្លង Covid-19 នៅកម្ពុជា គិតត្រឹមព្រឹកថ្ងៃទី 19មីនា 2021

កម្ពុជារកឃើញអ្នកវិជ្ជមាននឹង Covid-19 ចំនួន 37នាក់ទៀត នៅក្នុងអំឡុង 24ម៉ោងនៃថ្ងៃទី 18មីនា ទន្ទឹមនឹងមានករណីជាសះស្បើយចំនួន 19នាក់។

អ្នកដែលបានឆ្លងវីរុស Covid-19 ចំនួន 37នាក់ និងអ្នកបានជាសះស្បើយចំនួន 19នាក់ខាងលើនេះ សុទ្ធតែពាក់ព័ន្ធនឹង «ព្រឹត្តិការណ៍សហគមន៍20កុម្ភៈ»។ ព័ត៌មានលម្អិត សូមអានរបាយការណ៍របស់ក្រសួងសុខាភិបាលដូចខាងក្រោម។

គិតមកដល់បច្ចុប្បន្ន កម្ពុជាបានរកឃើញអ្នកឆ្លង Covid-19 សរុបចំនួន 1,578នាក់ ក្នុងនោះមានអ្នកជាសះស្បើយចំនួន 917នាក់, ស្លាប់ 1នាក់ និងកំពុងព្យាបាលចំនួន 658នាក់៕

ប្រភព៖ ក្រសួងសុខាភិបាល
ដកស្រង់ដោយ៖ បុត្រា

March 19, 2021

ក្បួនរថយន្តរបស់ប៉ូលិសម៉ិកស៊ិក ត្រូវបានក្រុមឧក្រិដ្ឋជនវាយឆ្មក់ បណ្ដាលឱ្យមនុស្ស 13នាក់បាត់បង់ជីវិត

ក្បួនរថយន្តរបស់ប៉ូលិសនៅក្នុងរដ្ឋភាគកណ្ដាលនៃប្រទេសម៉ិកស៊ិក ត្រូវបានក្រុមខ្មាន់កាំភ្លើងដែលពាក់ព័ន្ធនឹងគ្រឿងញៀន លួចវាយប្រហារកាលពីថ្ងៃទី 18 មីនា នាំឱ្យមានមនុស្សយ៉ាងតិច 13 នាក់បានស្លាប់។

ក្បួនរថយន្តល្បាតរបស់ប៉ូលិសត្រូវរងការវាយប្រហារនៅទីក្រុង Coatepec Harinas រដ្ឋ Mexico ក្នុងគ្រាដែលកំពុងអនុវត្តច្បាប់សំដៅលើក្រុមប្រដាប់អាវុធខុសច្បាប់នៅក្នុងតំបន់។ ជនរងគ្រោះ រួមមាន ប៉ូលិសចំនួន 8 នាក់ និងក្រុមអ្នកស៊ើបអង្កេតមកពីការិយាល័យរដ្ឋអាជ្ញាស្រុកចំនួន 5 នាក់។ នេះបើតាមស្ថាប័នសន្តិសុខរបស់រដ្ឋ Mexico។

«ក្បួនរថយន្តកំពុងធ្វើការល្បាតក្នុងតំបន់ ដើម្បីប្រយុទ្ធប្រឆាំងនឹងក្រុមល្បើសច្បាប់ដែលធ្វើសកម្មភាពក្នុងតំបន់។ នេះគឺជាការវាយប្រហារមកលើរដ្ឋាភិបាលម៉ិកស៊ិក។ យើងនឹងឆ្លើយតបដោយកងកម្លាំងគ្រប់ប្រភេទ» លោក Rodrigo Martinez Celis មេដឹកនាំអង្គភាពសុវត្ថិភាពសាធារណៈរបស់រដ្ឋ ឱ្យដឹងដូច្នេះ។

នេះគឺជាការវាយប្រហារធំបំផុតសំដៅលើកងកម្លាំងអនុវត្តច្បាប់នៅម៉ិកស៊ិក រាប់ចាប់ពីខែតុលា 2019 ដែលកាលណោះ មានប៉ូលិសចំនួន 14 នាក់បានស្លាប់នៅក្បែររដ្ឋ Mexico បន្ទាប់ពីត្រូវបានក្រុមខ្មាន់កាំភ្លើងលួចបាញ់ប្រហារ។

ទិដ្ឋភាពនៅកន្លែងកើតហេតុកាលពីថ្ងៃទី 18 មីនា 2021

បច្ចុប្បន្ន ក្រុមជនដៃដល់ខាងលើ មិនទាន់ត្រូវបានវែកមុខនៅឡើយ ខណៈសមត្ថកិច្ចកំពុងស្វែងរក ដោយមានជំនួយពីទាហានជើងគោក ទាហានម៉ារីន និងកងកម្លាំងការពារជាតិ។

រដ្ឋ Mexico ដែលនៅជាប់នឹងរដ្ឋធានី ត្រូវបានគេចាត់ទុកថាជាកន្លែងដែលមានអំពើហិង្សាច្រើនជាងគេបំផុតនៅប្រទេសម៉ិកស៊ិក ដោយសារវត្តមានរបស់ក្រុមឧក្រិដ្ឋជនជាច្រើនក្រុម។

ការវាយប្រហារខាងលើ ទំនងជាត្រូវបានធ្វើឡើងដើម្បីរារាំងកិច្ចការរបស់ប្រធានាធិបតី Andrés Manuel López Obrador ដែលកំពុងប្រើប្រាស់យុទ្ធសាស្ត្របោសសម្អាត ដែលប្រឈមមុខនឹងក្រុមឧក្រិដ្ឋជនគ្រឿងញៀនដោយផ្ទាល់ ដើម្បីកាត់បន្ថយអំពើហិង្សានៅប្រទេសនេះ៕

ប្រភព៖ AFP
ប្រែសម្រួល៖ បុត្រា

March 19, 2021

ស្ថិតិសង្ខេបស្ដីពី Covid-19 គិតត្រឹមម៉ោង 6កន្លះព្រឹកថ្ងៃទី 19មីនា 2021៖ ពិភពលោកមានអ្នកវិជ្ជមានជាង 122លាននាក់

យោងតាមគេហទំព័រ Worldometers ក្នុងរយៈពេល 24 ម៉ោងនៃថ្ងៃទី 18 មីនា 2021 ពិភពលោកបានរកឃើញករណីឆ្លង Covid-19 ជាង 517,000 នាក់ និងស្លាប់ជាង 9,690 នាក់ ខណៈតួលេខវិជ្ជមានសរុបកើនឡើងដល់ជាង 122,343,500 នាក់ ក្នុងនោះមានជាង 2,702,000 នាក់បានស្លាប់ និង 21,008,244 នាក់ កំពុងព្យាបាល។

ក្នុងថ្ងៃទី 18 មីនា មានប្រទេសចំនួន 3 ដែលបានរកឃើញករណីវិជ្ជមាននឹង Covid-19 ច្រើនជាងគេ រួមមាន ប្រេស៊ីល (ជាង 80,380 នាក់), សហរដ្ឋអាមេរិក (ជាង 57,200 នាក់) និងឥណ្ឌា (ជាង 39,640 នាក់)។

ចំណែកប្រទេសដែលមានអ្នកជំងឺ Covid-19 ស្លាប់ច្រើនជាងគេក្នុងអំឡុង 24 ម៉ោងនៃថ្ងៃទី 18 មីនា រួមមាន ប្រទេសប្រេស៊ីល (2,363 នាក់), សហរដ្ឋអាមេរិក (1,515 នាក់) និងម៉ិកស៊ិក (789 នាក់)៕

ប្រភព៖ Worldometers
ប្រែសម្រួល៖ បុត្រា

March 19, 2021

ប្រធានាធិបតីប្រទេសតង់សានី លោក John Pombe Magufuli ទទួលមរណភាព

ប្រភពព័ត៌មានពីអាហ្វ្រិក បានឱ្យដឹងថា នាថ្ងៃទី 18 មីនា 2021 នេះ អនុប្រធានាធិបតីនៃប្រទេស តង់សានី (Tanzania) លោក Samia Suluhu Hassan បានប្រកាសថា ប្រធានាធិបតី John Pombe Magufuli នៃប្រទេសនេះ បានទទួលមរណភាពទៅហើយ។

អនុប្រធានាធិបតីបានបញ្ជាក់ថា លោក John Pombe Magufuli បានទទួលមរណភាពនៅវេលាម៉ោង 18 នៃថ្ងៃទី 17 មីនា 2021 (ម៉ោង 21 ថ្ងៃទី 17 មីនា នៅកម្ពុជា) នៅមន្ទីរពេទ្យមួយក្នុងទីក្រុង Dar es Salaam នៃប្រទេសតង់សានី ដោយសារជំងឺបេះដូង។

លោក Samia Suluhu Hassan បានឱ្យដឹងថា ប្រទេសនេះនឹងបង្ហូតទង់ជាតិពាក់កណ្ដាលដងក្នុងរយៈពេល 14 ថ្ងៃ ដើម្បីគោរពដល់វិញ្ញាណក្ខន្ធរបស់សពលោកប្រធានាធិបតី John Pombe Magufuli។

លោក John Pombe Magufuli អាយុ 61 ឆ្នាំ គឺជាប្រធានាធិបតីទី 5 របស់សហសាធារណ⁠រដ្ឋតង់សានី (United Republic of Tanzania) ចាប់ពីឆ្នាំ 2015 ដល់បច្ចុប្បន្ន៕

ប្រភព៖ AP
ប្រែសម្រួល៖ បុត្រា

March 18, 2021

មហាសេដ្ឋី Jack Ma ត្រូវអ្នកជំនាន់ក្រោយ «លោតកាត់មុខ»! ក្រុមហ៊ុន Pinduoduo មានអាយុទើបតែ 5ឆ្នាំ ប៉ុន្តែ មានអ្នកប្រើប្រាស់ច្រើនជាង Alibaba ទៅទៀត

ក្នុងពេលដែល Alibaba កំពុងតែរកវិធីចាកចេញឱ្យផុតពីបញ្ហាដែលមហាសេដ្ឋី Jack Ma បានបង្កឡើង ពួកគេក៏ត្រូវក្រុមហ៊ុនជំនាន់ថ្មីយកឈ្នះពេញមួយទំហឹង នោះគឺក្រុមហ៊ុន Pinduoduo។

ប្រធានរបស់ក្រុមហ៊ុន Pinduoduo ទើបតែបានប្រកាសថានឹងចាកចេញពីក្រុមប្រឹក្សាភិបាលនៃក្រុមហ៊ុននេះ ដើម្បីកាត់បន្ថយសិទ្ធិអំណាចក្នុងការគ្រប់គ្រងនៅក្នុងក្រុមហ៊ុនពាណិជ្ជកម្មអេឡិចត្រូនិកដែលកំពុងរីកចម្រើនឆាប់រហ័សជាងគេនៅប្រទេសចិននាបច្ចុប្បន្ន។ ប្រកាសនេះត្រូវបានធ្វើឡើងស្របពេលដែលក្រុមហ៊ុន Pinduoduo ប្រកាសថា តួលេខអ្នកប្រើប្រាស់របស់ក្រុមហ៊ុន បានកើនឡើងលើសពី Alibaba ទៅទៀត។

តំណែងប្រធានក្រុមហ៊ុនរបស់ស្ថាបនិក Colin Huang នឹងត្រូវបានជំនួសដោយ Lei Chen ជាអ្នកកំពុងកាន់កាប់តំណែង CEO របស់ក្រុមហ៊ុន។ ដូច្នេះ លោក Huang ទំនងជាដកខ្លួនចេញពីក្រុមហ៊ុននេះ ជាកន្លែងដែលជួយឱ្យលោកក្លាយជាអ្នកមានលំដាប់ទីបីនៅប្រទេសចិន។ កាលពីឆ្នាំទៅ លោក Huang ក៏បានដកខ្លួនចេញពីតំណែង CEO ផងដែរ។

Huang បានប្រឹងប្រែងក្នុងការ «បំប៉ន» ដល់អ្នកបន្តវេនរបស់ខ្លួនគឺលោក Lei Chen ដោយកិច្ចការដែលអាចឆ្លើយតបនឹងល្បឿននៃការរីកចម្រើនរបស់ក្រុមហ៊ុន។ ចំណូលនៅក្នុងត្រីមាសទីបួននៃឆ្នាំ 2020 របស់ពួកគេ បានកើន 146% និងឡើងដល់ 4.1 ពាន់លានដុល្លារអាមេរិក។ កំណើននេះគឺខ្ពស់ជាងច្រើនដងបើធៀបនឹង Alibaba និង JD.com ដោយសារតែតម្រូវការនៃទីផ្សារបន្លែផ្លែឈើ និងកំណើននៃអ្នកប្រើប្រាស់នៅក្នុងបណ្ដាទីក្រុងដែលមិនសូវមានការអភិវឌ្ឍខ្លាំង ចាប់ផ្ដើមចូលរួមទិញដូរតាមអនឡាញ។

CEO របស់ក្រុមហ៊ុន Pinduoduo លោក Lei Chen

លោក Huang បានធ្វើឱ្យមានចំណាប់អារម្មណ៍ច្រើននៅប្រទេសចិន ជាមួយនឹងការបង្កើតបានទ្រព្យសម្បត្តិដែលមានតម្លៃ 57 ពាន់លានដុល្លារអាមេរិក រួមនឹងក្រុមហ៊ុនមួយដែលមានតម្លៃមូលធនទីផ្សារឡើងដល់ 180 ពាន់លានដុល្លារ។ មូលបត្រ Pinduoduo បានកើនជាង 4 ដង កាលពីឆ្នាំ 2020 និងបានឡើងដល់ចំណុចកំពូលកាលពីថ្ងៃទី 17 កុម្ភៈ 2021 បើទោះជាក្រោយមកវាបានថយចុះបន្តិចក៏ដោយ។

ចំនួនអ្នកប្រើប្រាស់ប្រចាំឆ្នាំរបស់ Pinduoduo បានកើនឡើងដល់ 788 លាននាក់ គិតត្រឹមខែធ្នូ 2020 ច្រើនជាងបន្តិចបើធៀបនឹង 779 លាននាក់របស់ Alibaba។ នៅក្នុងពិធីបុណ្យនិទាឃរដូវកន្លងទៅ តួលេខអ្នកចូលប្រើប្រាស់របស់ក្រុមហ៊ុន Pinduoduo ពេលខ្លះបានកើនឡើងច្រើនជាង Taobao ទៅទៀត។

អត្រាកំណើនប្រចាំត្រីមាស បានឡើងដល់ 57% ខណៈតម្លៃសរុបនៃទំនិញដែលត្រូវបានជួញដូរក្នុងរយៈពេល 12 ខែ គិតមកដល់ត្រឹមចុងខែធ្នូ 2020 របស់ Pinduoduo បានកើន 66% និងមានតម្លៃសរុប 1.67 ពាន់លានយន់ (256,828,000 ដុល្លារអាមេរិក)។ Pinduoduo កំពុងតែតម្រង់ទិសដៅក្លាយជាអ្នកលក់បន្លែផ្លែឈើធំជាងគេបង្អស់ក្នុងពិភពលោក៕

ប្រភព៖ Bloomberg
ប្រែសម្រួល៖ បុត្រា

March 18, 2021

តៃវ៉ាន់ធ្វើទំនើបកម្មយន្តហោះចម្បាំង F-16 ចំនួន 42គ្រឿង ឱ្យទៅជា F-16V

យន្តហោះចម្បាំង F-16A/B របស់កោះតៃវ៉ាន់ចំនួន 42 គ្រឿងដែលត្រូវបានដំឡើងឱ្យទៅជា F-16V តាមគម្រោងនឹងត្រូវប្រគល់ឱ្យកងកម្លាំងការពារដែនកោះនេះនៅចុងខែមីនា 2021។

Huang Chih-wei មេបញ្ជាការទ័ពអាកាសតៃវ៉ាន់ កាលពីថ្ងៃទី 17 មីនា បានឱ្យដឹងថា យន្តហោះចម្បាំង F-16A/B ដែលត្រូវបានធ្វើទំនើបកម្មឱ្យទៅជា F-16V មានសមត្ថភាពអាច «រកឃើញសត្រូវបានលឿនជាង និងអាចវាយប្រហារក្នុងរយៈចម្ងាយឆ្ងាយជាង»។ យន្តហោះចម្បាំង F-16V របស់ទ័ពអាកាសតៃវ៉ាន់ បច្ចុប្បន្ន មានសមត្ថភាពវាយប្រហារគ្របដណ្ដប់ទូទាំងដែនអាកាសរបស់កោះនេះ។

យន្តហោះចម្បាំង F-16V ទាំងនេះនឹងត្រូវបានដាក់ឱ្យប្រើប្រាស់នៅក្នុងក្រុមហោះហើរយុទ្ធសាស្ត្រលេខ4 នាំឱ្យអង្គភាពនេះក្លាយជាស្ថាប័នដំបូងគេរបស់កងទ័ពការពារដែនអាកាសតៃវ៉ាន់ មានសុទ្ធតែ F-16V នេះបើតាមលោក Huang Chih-wei។ ពិធីប្រគល់យន្តហោះចម្បាំងទាំងនេះនឹងត្រូវបានធ្វើឡើងនៅចុងខែមីនា ដែលក្នុងពិធីនោះនឹងមានវត្តមានរបស់មេដឹកនាំតៃវ៉ាន់ លោកស្រី Tsai Ing-wen ផងដែរ។

ទ័ពអាកាសតៃវ៉ាន់ កាលពីឆ្នាំ 2016 បានចាប់ផ្ដើមដំណើរការកម្មវិធីដំឡើង F-16A/B ទៅជា F-16V ប្រកបដោយភាពទាន់សម័យបំផុត ជាមួយនឹងប្រព័ន្ធអេឡិចត្រូនិកស្ដង់ដាខ្ពស់ជាងគេ រួមនឹងប្រព័ន្ធគ្រប់គ្រងការហោះហើរ និងប្រយុទ្ធទាន់សម័យ។ តាមផែនការ កម្មវិធីដែលត្រូវបានដំណើរការដោយក្រុមហ៊ុនអភិវឌ្ឍឧស្សាហកម្មអាកាសចរណ៍តៃវ៉ាន់ (Aerospace Industrial Development Corporation/AIDC) សហការជាមួយនឹងក្រុមហ៊ុនផលិតអាវុធLockheed Martin របស់អាមេរិក ដែលត្រូវចំណាយប្រាក់ប្រមាណ 3.7 ពាន់លានដុល្លារខាងលើនេះ នឹងត្រូវបញ្ចប់នៅមុនដំណាច់ឆ្នាំ 2023។

ក្រៅពី F-16A/B ដែលត្រូវបានដំឡើងស្ដង់ដាថ្មី តៃវ៉ាន់ក៏បានបញ្ជាទិញយន្តហោះចម្បាំង F-16V ថ្មី ពីសហរដ្ឋអាមេរិកចំនួន 66 គ្រឿង ដែលមានតម្លៃរាប់ពាន់លានដុល្លារផងដែរ ដែលកោះមួយនេះនឹងផ្ដើមទទួលបានចាប់ពីឆ្នាំ 2022។ កាលពីឆ្នាំ 1992 កោះតៃវ៉ាន់បានទិញយន្តហោះចម្បាំង F-16 ចំនួន 160 គ្រឿង ហើយបច្ចុប្បន្នកំពុងគ្រប់គ្រងប្រមាណ 150 គ្រឿង។

កោះតៃវ៉ាន់កំពុងតែស្វែងរកវិធីដើម្បីធ្វើទំនើបកម្មលើសព្វាវុធរបស់ខ្លួន នៅក្នុងគ្រាដែលប្រទេសចិនដីគោក កំពុងបង្កើនសម្ពាធលើកោះនេះ។ មួយរយៈពេលចុងក្រោយនេះ ចិនដីគោក តែងតែបញ្ជូនយន្តហោះចម្បាំងមកកៀកនឹងកោះនេះជារៀងរាល់ថ្ងៃ នាំឱ្យតៃវ៉ាន់ត្រូវពង្រាយយន្តហោះចម្បាំងដើម្បីទប់ទល់។

លោកស្រី Tsai Ing-wen ប្រធានាធិបតីកោះតៃវ៉ាន់ និងយន្តហោះចម្បាំងមួយគ្រឿងរបស់ក្រុមហ៊ុន AIDC

ក្រុមមន្ត្រី តៃវ៉ាន់ បានឱ្យដឹងថា ក្នុងឆ្នាំ 2020 កងកម្លាំងការពារដែនអាកាសរបស់ខ្លួនបានចំណាយប្រាក់ជិត 1.1 ពាន់លានដុល្លារអាមេរិកដើម្បីទប់ស្កាត់យន្តហោះយោធារបស់ចិនដីគោក ដែលហោះចូលក្នុងតំបន់កំណត់អត្តសញ្ញាណដែនអាកាស (ADIZ) របស់កោះនេះ។ មេបញ្ជាការទ័ពអាកាសតៃវ៉ាន់ លោក Huang Chih-wei បានបញ្ជាក់ថា ប្រាក់ចំណាយក្នុងមួយម៉ោងៗ សម្រាប់យន្តហោះចម្បាំង F-16 គឺ 5,300 ដុល្លារអាមេរិក, សម្រាប់ AIDC F-CK-1 គឺ 7,800 ដុល្លារ ហើយសម្រាប់យន្តហោះប្រមាញ់នាវាមុជទឹក P-3C គឺ 7,000 ដុល្លារ។

សាធារណរដ្ឋប្រជាមានិតចិន (ចិនដីគោក) តែងតែចាត់ទុកថា កោះតៃវ៉ាន់គឺជាទឹកដីមួយផ្នែករបស់ខ្លួនដែលមិនអាចកាត់ផ្ដាច់បាន ហើយថា ការប្រកាសឯករាជ្យរបស់កោះនេះគឺ «ស្មើនឹងសង្គ្រាម»។ ប៉ុន្តែ សាធារណរដ្ឋចិន (ចិនតៃវ៉ាន់) ឯណោះវិញ កំពុងតែចាត់ទុកថា ខ្លួនជាប្រទេសឯករាជ្យស្រាប់ មិនចាំបាច់ប្រកាសឯករាជ្យទៀតឡើយ៕

ប្រភព៖ Focus Taiwan
ប្រែសម្រួល៖ បុត្រា

March 18, 2021

តួលេខអ្នកវិជ្ជមាននឹង Covid-19 ទាក់ទិននឹង «ព្រឹត្តិការណ៍សហគមន៍ 20កុម្ភៈ» កើនដល់ 1,025នាក់

ក្រសួងសុខាភិបាលកម្ពុជា នាព្រឹកថ្ងៃទី 18 ខែមីនានេះ បានឱ្យដឹងថា ករណីវិជ្ជមាននឹង Covid-19 ក្នុងអំឡុង 24 ម៉ោងនៃថ្ងៃទី 17 មីនា 2021 មានចំនួន 36 នាក់ និងជាសះស្បើយចំនួន 58 នាក់។

ក្នុងចំណោមអ្នកវិជ្ជមានខាងលើ មាន 1 នាក់ជាករណីនាំចូល (ស្ត្រីជនជាតិហ្វីលីពីន) ខណៈក្រៅពីនេះគឺសុទ្ធតែជាករណីពាក់ព័ន្ធនឹង «ព្រឹត្តិការណ៍ 20មីនា»។

គិតមកដល់ថ្ងៃទី 18 មីនា 2021 ក្រសួងសុខាភិបាល បានរកឃើញករណីវិជ្ជមានទាក់ទិននឹង «ព្រឹត្តិការណ៍ 20កុម្ភៈ» ចំនួន 1,025 នាក់ ក្នុងនោះមានអ្នកជាសះស្បើយចំនួន 394 នាក់។

ចំណែកតួលេខសរុបនៃអ្នកវិជ្ជមាននឹង Covid-19 នៅទូទាំងប្រទេស បានកើនដល់ 1,541 នាក់ ក្នុងនោះមាន 898 នាក់បានជាសះស្បើយ, 640 នាក់កំពុងព្យាបាលនៅមន្ទីរពេទ្យ ខណៈ1ករណីបានបាត់បង់ជីវិតមានចំនួន 1 នាក់៕

ប្រភព៖ ក្រសួងសុខាភិបាល
ដកស្រង់ដោយ៖ បុត្រា

March 18, 2021

ភោជនីយដ្ឋានបម្រើ «ភេសជ្ជដាក់ក្នុងដបទឹកគោកូនក្មេង» មានការពេញនិយមក្នុងតំបន់ឈូតសមុទ្រពែក្ស ប៉ុន្តែរងការរិះគន់ធ្ងន់ធ្ងរ

ភោជនីយដ្ឋាន និងហាងកាហ្វេជាច្រើនកន្លែងនៅក្នុងបណ្ដាប្រទេសនៃតំបន់ឈូងសមុទ្រពែក្ស (Persian Gulf/Arabian Gulf) កំពុងប្រឈមនឹងការរិះគន់ពីសាធារណជន ព្រោះតែយកដបទឹកគោកូនក្មេងមកដាក់កាហ្វេសម្រាប់បម្រើអតិថិជន។

សារព័ត៌មាន AP របស់សហរដ្ឋអាមេរិក បានចុះផ្សាយថា ការនិយមខាងលើបានកើតឡើងពីយីហោកាហ្វេដែលមានឈ្មោះថា Einstein ដែលមានភោជនីយដ្ឋានជាច្រើននៅពាសពេញតំបន់នេះ ចាប់ពីទីក្រុង Dubai របស់អារ៉ាប់រួម រហូតដល់ប្រទេសគុយវ៉ែត និងបារ៉ែន។ ជំនួសឱ្យការប្រើប្រាស់កែវក្រដាសធម្មតា ហាងកាហ្វេ Einstein បែរជាយកដបទឹកដោះគោកូនក្មេងមកដាក់កាហ្វេទៅវិញ។

ភេសជ្ជៈរបស់ហាងកាហ្វេ Einstein ក៏មានមុខខ្លះមានឈ្មោះទាក់ទងនឹងអាហាររបស់កូនក្មេង ដោយវាមានលាយទឹកដោះគោក្រឡុកជាមួយម្សៅបបរកូនក្មេង និងម្សៅអង្ករ។ល។ ទាំងនេះសុទ្ធតែបានក្លាយជាភេសជ្ជពេញនិយមនៅបណ្ដាហាងខាងលើ។

នាយកប្រតិបត្តិរបស់ Einstein ប្រចាំអារ៉ាប់រួម (UAE) នាង Younes Molla បានឱ្យដឹងថា៖ «គ្រប់គ្នាសុទ្ធតែចង់ទិញភេសជ្ជៈដែលដាក់នៅក្នុងដបទឹកគោកូនក្មេង។ ពួកគេនិយាយថា នឹងមកហាងរបស់យើងជាមួយនឹងមិត្តភក្ដិ ឪពុកម្ដាយ។ Covid-19 កើតឡើងជាច្រើនខែ និងបានឆ្លងកាត់ការលំបាកជាច្រើន គ្រប់គ្នាក៏ចង់សប្បាយរីករាយ។ ពួកគេនាំគ្នាថតរូប និងរំលឹកអនុស្សាវរីយ៍កាលពីនៅវ័យកុមារ»។

អតិថិជនជាច្រើនបានសុខចិត្តឈរតម្រង់ជួររង់ចាំនៅហាង Einstein ដើម្បីបានញ៉ាំទឹកផ្លែឈើ ឬកាហ្វេដែលដាក់ក្នុងដបទឹកដោះគោកូនក្មេង។ អតិថិជនមួយចំនួនទៀត ថែមទាំងយកដបទឹកដោះគោរបស់កូនៗពួកគេមកកាន់ភោជនីយដ្ឋានយើង។

រូបភាពស្ដីអំពីដបទឹកដោះគោដែលមានពណ៌ចម្រុះរបស់យីហោ Einstein ទទួលបានការចុចចូលចិត្តរាប់ម៉ឺននៅលើបណ្ដាញសង្គម Instagram និង TikTok។ល។

ក៏ប៉ុន្តែ នៅមានមតិជាច្រើនរិះគន់ថា រូបភាពជំនួញនៃយីហោ Einstein ខាងលើ មិនសមស្របជាមួយនឹងវប្បធម៌របស់អ៊ីស្លាមសាសនា។ ជាងនេះ នៅក្នុងខែមីនា 2021 អាជ្ញាធរនៃទីក្រុង Dubai ថែមទាំងបានមកកាន់ភោជនីយដ្ឋានដើម្បីធ្វើករពិន័យផងដែរ។

ប្រទេសអារ៉ាប់រួម (UAE) បានប្រកាសថា៖ «ការប្រើប្រាស់ដបទឹកគោកូនក្មេង មិនត្រឹមតែផ្ទុយទៅនឹងវប្បធម៌ និងទំនៀមទម្លាប់ក្នុងស្រុកប៉ុណ្ណោះទេ តែវាក៏ធ្វើឱ្យមានហានិភ័យឆ្លងរាលដាលវីរុស Covid-19 ទៀតផង»។

រដ្ឋាភិបាលគុយវ៉ែតឯណោះវិញ ក៏បានបិទភោជនីយដ្ឋាន Einstein ជាបណ្ដោះអាសន្នផងដែរ ខណៈដែលប៉ូលិសនៃប្រទេសបារ៉ែនប្រដាប់ដោយកាមេរ៉ា បានមកកាន់ភោជនីយដ្ឋានដែលមានបម្រើភេសជ្ជៈដាក់ក្នុងដបទឹកដោះគោកូនក្មេង និងបានព្រមានអតិថិជនថា ពួកគេ «រំលោភលើប្រពៃណី និងទំនៀមទម្លាប់របស់បារ៉ែន»។

ប្រទេសអូម៉ង់ ក៏មិនបន្ធូរដៃដែរ ដោយបានលើកទឹកចិត្តឱ្យប្រជាជនរាយការណ៍អំពីករណីភោជនីយដ្ឋានណាដែលបម្រើភេសជ្ជៈដាក់ក្នុងដបទឹកដោះគោកូនក្មេង តាមរយៈការហៅទូរស័ព្ទទៅកាន់នាយកដ្ឋានគាំពារអ្នកប្រើប្រាស់៕

ប្រភព៖ AP
ប្រែសម្រួល៖ បុត្រា

March 18, 2021

ព្រឹទ្ធសភាអាមេរិកតែងតាំងស្ត្រីដើមកំណើតតៃវ៉ាន់ ជាតំណាងពាណិជ្ជកម្មអាមេរិក ដើម្បីប្រឈមមុខនឹងចិន

កាលពីថ្ងៃទី 17 មីនា 2021 ព្រឹទ្ធសភាអាមេរិក បានអនុម័តតែងតាំងលោកស្រី Katherine Tai ជាអ្នកតំណាងពាណិជ្ជកម្មអាមេរិកនៅក្នុងរដ្ឋាភិបាលរបស់ប្រធានាធិបតី Joe Biden។

សារព័ត៌មាន AP និងកាសែត The Hill បានរាយការណ៍ថា លោកស្រី Katherine Tai ទទួលបានការគាំទ្រស្ទើរតែដាច់ខាតនៅក្នុងការបោះឆ្នោតរបស់សភា ដោយមាន 98 សំឡេងគាំទ្រ និងមិនមានសំឡេងជំទាស់។

លទ្ធផលខាងលើនេះ ជួយឱ្យលោកស្រី Katherine Tai ក្លាយជាពលរដ្ឋអាមេរិកាំងដើមកំណើតអាស៊ីដំបូងគេ និងជាស្ត្រីស្បែកខ្មៅដំបូងគេដែលកាន់កាប់តំណែងជាអ្នកតំណាងពាណិជ្ជកម្មអាមេរិក។ លោកស្រីបានក្លាយជាសមាជិកទី 19 នៅក្នុងគណៈរដ្ឋមន្ត្រីរបស់ប្រធានាធីបតី Biden ដែលត្រូវបានសភាជាន់ខ្ពស់គាំទ្រ។

នៅពេលកាន់កាប់តំណែងជាអ្នកតំណាងពាណិជ្ជកម្មអាមេរិក លោកស្រី Tai នឹងត្រូវប្រឈមមុខជាមួយនឹងភារកិច្ចយ៉ាងច្រើននៅក្នុងគ្រាដែលរដ្ឋាភិបាលលោក Biden កំពុងកំណត់គោលនយោបាយពាណិជ្ជកម្ម ក្នុងនោះក៏មានកិច្ចការដោះស្រាយបញ្ហាសង្គ្រាមពាណិជ្ជកម្មជាមួយប្រទេសចិន អនុវត្តកិច្ចព្រមព្រៀងពាណិជ្ជកម្មជាមួយនឹងម៉ិកស៊ិក និងកាណាដា រួមនឹងការដោះស្រាយបញ្ហាពាណិជ្ជកម្មជាមួយនឹងសហភាពអឺរ៉ុប (EU)។ល។

លោកស្រី Katherine Tai បច្ចុប្បន្នមានអាយុ 46 ឆ្នាំ គឺជាកូននៃគ្រួសារមួយមកពីកោះតៃវ៉ាន់។ លោកស្រីជាអ្នកជំនាញខាងចរចាផ្នែកពាណិជ្ជកម្ម និងជាមេធាវីជើងចាស់ម្នាក់ផងដែរ។

លោកស្រី Katherine Tai ត្រូវបានគេស្គាល់ថាជាមេធាវីលំដាប់កំពូលមួយរូបដែលធ្វើការនៅការិយាល័យតំណាងពាណិជ្ជកម្មរបស់សហរដ្ឋអាមេរិក អំពីបញ្ហាជាមួយប្រទេសចិន នៅក្នុងអំឡុងឆ្នាំ 2007-1214 ដោយចូលរួមដោះស្រាយផ្ទាល់រាល់បញ្ហាពាណិជ្ជកម្មរវាងអាមេរិក និងចិន នៅអង្គការពាណិជ្ជកម្មពិភពលោក (WTO)។

មេធាវីរូបនេះក៏ធ្លាប់បានប្រកាសថា នឹងធ្វើការជាមួយក្រុមប្រទេសជាសម្ព័ន្ធមិត្តរបស់អាមេរិក ដើម្បីបង្កើតសមរភូមិរួមមួយ សម្រាប់ទប់ទល់នឹងប្រទេសចិនដែលសហរដ្ឋអាមេរិកយល់ឃើញថា កំពុងធ្វើសកម្មភាពប្រកបដោយភាពដាច់ខាត៕

ប្រភព៖ AP, The Hill
ប្រែសម្រួល៖ បុត្រា

March 18, 2021

សមាគមព្រះពុទ្ធសាសនាធំបំផុតនៅភូមា ថ្កោលទោសកងទ័ព និងត្រៀមចេញសេចក្ដីថ្លែងការណ៍

សមាគមព្រះពុទ្ធសាសនាដែលមាន «ទឹកមាត់ប្រៃ» បំផុត នៅប្រទេសភូមា (មីយ៉ានម៉ា) បានថ្កោលទោសចំពោះការបង្រាប និងសម្លាប់បាតុករដែលកងទ័ពប្រទេសនេះបានធ្វើឡើង ទន្ទឹមនឹងការអំពាវនាវឱ្យបញ្ចប់អំពើហិង្សា។

គណៈកម្មធិការព្រះសង្ឃពុទ្ធសាសនា Maha Nayaka ដែលជាសមាគមព្រះពុទ្ធសាសនាមានអំណាចបំផុតនៅភូមា ថ្ងៃនេះ (17 មីនា 2021) បានចោទប្រកាន់ «សមាជិកមួយចំនួននៃកងកម្លាំងប្រដាប់អាវុធ» ថា បានធ្វើទារុណកម្ម និងសម្លាប់ពលរដ្ឋសាមញ្ញដែលគ្មានទោសពៃរ៍។

តាមគម្រោង សមាគមព្រះសង្ឃខាងលើនឹងផ្អាករាល់សកម្មភាពនៃព្រះពុទ្ធសាសនាដើម្បីជំទាស់នឹងការប្រើអំពើហិង្សារបស់កងទ័ពទៅលើបាតុករ។ សមាគមនេះនឹងចេញសេចក្ដីប្រកាសចុងក្រោយ បន្ទាប់ពីបានទទួលយោបល់ពីរដ្ឋមន្ត្រីក្រសួងធម្មការនិងសាសនា នៅថ្ងៃទី 18 មីនាខាងមុខ។

ក្រុមអ្នកបួសនៅមីយ៉ានម៉ា គឺជាអ្នកនាំមុខក្នុង «បដិវដ្ដ Saffron» កាលពីឆ្នាំ 2007 ក្នុងការប្រឆាំងនឹងរបបយោធា និងបានជួយបើកផ្លូវឱ្យមានរបបប្រជាធិបតេយ្យនៅប្រទេសនេះ។ ឥរិយាបថរបស់ Maha Nayaka បានបង្ហាញអំពីការប្រេះឆារវាងកងទ័ព ជាមួយនឹងសមាគមដែលមានទំនាក់ទំនងជិតស្និទ្ធនឹងរដ្ឋាភិបាល។

មីយ៉ានម៉ា បានធ្លាក់ចូលក្នុងភាពវឹកវរចាប់តាំងពីកងទ័ពបានធ្វើរដ្ឋប្រហារផ្ដួលរំលំរដ្ឋាភិបាលស្របច្បាប់ និងបានចាប់ខ្លួនលោកស្រី Aung San Suu Kyi កាលពីថ្ងៃទី 1 កុម្ភៈ 2021 ព្រមទាំងបានចាប់ខ្លួនក្រុមមន្ត្រីជាន់ខ្ពស់ជាច្រើនរូបរបស់បក្សសម្ព័ន្ធជាតិដើម្បីប្រជាធិបតេយ្យ នាំឱ្យមានបាតុកម្មកើតឡើងពាសពេញប្រទេស។ យោងតាមអង្គការគាំពារអ្នកទោសនយោបាយ បាតុករជាង 180 នាក់ បានស្លាប់នៅពេលប៉ះទង្គិចជាមួយនឹងកងកម្លាំងប្រដាប់អាវុធ។

បើទោះជាត្រូវបានបង្រាបយ៉ាងបង្ហូរឈាមក៏ដោយ ក្រុមបាតុករភូមានៅតែមិនដកថយ។ ប៉ុន្តែពួកគេកំពុងជួបបញ្ហាជាច្រើនផ្សេងទៀត ក្នុងនោះក៏មានបញ្ហាគ្មានអ៊ីនធើណិតប្រើប្រាស់ដើម្បីទាក់ទងគ្នាផងដែរ ដោយសារអាជ្ញាធរបានកាត់ផ្ដាច់៕

ប្រភព៖ Reuters
ប្រែសម្រួល៖ បុត្រា

March 17, 2021

Author: សឿន សំណាង